Слꙋ́жба пра́здникѡмъ бг҃орѡ́дичнымъ
<<в҃і: 23>>
[глⷡ҇а в҃] СЛꙊ́ЖБА Ѻ҆́БЩА
пра́здникѡмъ бг҃орѡ́дичнымъ.
Ве́черъ, на Гдⷭ҇и воззва́хъ стїхи̑ры, гла́съ д҃.
Подо́бенъ: Да́лъ є҆сѝ зна́менїе:
Бжⷭ҇твенными дѣ́тельми соблюда́ющи и҆ покрыва́ющи ꙳ ѿ вра́жїихъ нахожде́нїй, любо́вїю пра́зднꙋющыѧ пресла́вное твоѐ и҆́мⷬ҇къ, ꙳ зовꙋ́щыѧ тѝ: ꙳ ты̀ є҆сѝ крѣ́пость на́ша и҆ ᲂу҆твержде́нїе, ꙳ и҆ ра́дованїе бг҃олѣ́пное є҆ди́нъ сн҃ъ тво́й и҆ бг҃ъ на́шъ, ꙳ є҆мꙋ́же покланѧ́ющесѧ глаго́лемъ: ꙳ і҆и҃се всеси́льне, ꙳ сп҃сѝ дꙋ́шы на́шѧ, ꙗ҆́кѡ млⷭ҇рдъ.
Дне́сь сщ҃е́ннѡ собра́вшесѧ похва́лимъ бцⷣꙋ: ꙳ прест҃а́ѧ дв҃о, ꙳ мнѡ́гаѧ твоѧ̑ вели̑чїѧ и҆ чꙋде́съ пꙋчи́на: ꙳ ты́ бо є҆сѝ на́мъ ст҃о́е ѡ҆гражде́нїе ꙳ и҆ похвала̀ и҆ сла́ва ꙳ и҆ и҆сто́чникъ и҆сцѣле́нїѧ ꙳ пра́зднꙋющихъ ст҃о́е твоѐ и҆́мⷬ҇къ, ꙳ мо́лимсѧ глаго́люще: ꙳ і҆и҃се всеси́льне, ꙳ сп҃сѝ дꙋ́шы на́шѧ, ꙗ҆́кѡ млⷭ҇рдъ.
Бл҃гочести́внѡ, пречтⷭ҇аѧ, ꙳ чтⷭ҇ны́ми твои́ми мл҃твами ꙳ ѡ҆градѝ и҆ сохранѝ ꙳ и҆ стра̑шны врагѡ́мъ и҆ нерабѡ́тны ꙗ҆вѝ, ꙳ творѧ́щыѧ пра́зднество твоѐ и҆́мⷬ҇къ, ꙳ да сн҃ꙋ твоемꙋ̀ зове́мъ: ꙳ і҆и҃се всеси́льне, ꙳ сп҃сѝ на́съ, ꙗ҆́кѡ млⷭ҇рдъ.
Сла́ва, и҆ ны́нѣ, гла́съ ѕ҃:
Ꙗ҆́кѡ вѣнце́мъ пресвѣ́тлымъ, пречтⷭ҇аѧ бцⷣе, и҆́мⷬ҇къ, цр҃ковь бж҃їѧ ѡ҆бложи́сѧ, и҆ свѣ́титсѧ ра́дꙋющисѧ, дне́сь та́йнѡ ликꙋ́етъ вопїю́щи тебѣ̀, влⷣчце: ра́дꙋйсѧ, дїади́мо чтⷭ҇на́ѧ и҆ вѣ́нче бж҃е́ственныѧ сла́вы. ра́дꙋйсѧ, Є҆ди́на сла́вы и҆сполне́нїе, и҆ вѣ́чное весе́лїе. ра́дꙋйсѧ, къ тебѣ̀ прибѣга́ющымъ приста́нище, предста́тельнице и҆ сп҃се́нїе дꙋ́шъ на́шихъ.
Вхо́дъ. Прокі́менъ днѐ.
<<в҃і ѡ҆б.: 24>>
Бытїѧ̀ чте́нїе. [Глава̀ к҃и].
И҆зы́де і҆а́кѡвъ ѿ стꙋденца̀ клѧ́твеннагѡ, и҆ и҆́де въ харра́нь, И҆ ѡ҆брѣ́те мѣ́сто, и҆ спа̀ та́мѡ. за́йде бо сл҃нце, и҆ взѧ́тъ ѿ ка́менїѧ мѣ́ста тогѡ̀, и҆ положѝ возгла́вїе себѣ̀, и҆ спа̀ на мѣ́стѣ ѻ҆́номъ: и҆ со́нъ ви́дѣ. И҆ сѐ лѣ́ствица ᲂу҆твержде́на на землѝ, є҆ѧ́же глава̀ досѧза́ше до нб҃съ, и҆ а҆́гг҃ли бж҃їи восхожда́хꙋ и҆ низхожда́хꙋ по не́й. Гдⷭ҇ь же ᲂу҆твержда́шесѧ на не́й, и҆ речѐ: а҆́зъ бг҃ъ а҆враа́мовъ ѻ҆ц҃а̀ твоегѡ̀, и҆ бг҃ъ і҆саа́ковъ, не бо́йсѧ: землѧ̀, и҆дѣ́же ты̀ спи́ши на не́й, тебѣ̀ да́мъ ю҆̀, и҆ сѣ́мени твоемꙋ̀. И҆ бꙋ́детъ сѣ́мѧ твоѐ ꙗ҆́кѡ песо́къ земны́й, и҆ распространи́тсѧ на мо́ре, и҆ лі́вꙋ, и҆ сѣ́веръ и҆ на восто́ки, и҆ возбл҃гословѧ́тсѧ ѡ҆ тебѣ̀ всѧ̑ колѣ́на зємна́ѧ, и҆ ѡ҆ сѣ́мени твое́мъ. И҆ сѐ а҆́зъ съ тобо́ю сохранѧ́ѧй тѧ̀ на всѧ́комъ пꙋтѝ, а҆́може а҆́ще по́йдеши. и҆ возвращꙋ̀ тѧ̀ въ зе́млю сїю̀, ꙗ҆́кѡ не и҆́мамъ тебѐ ѡ҆ста́вити, до́ндеже сотвори́ти мѝ всѧ̑, є҆ли̑ка глаго́лахъ тебѣ̀. И҆ воста̀ і҆а́кѡвъ ѿ сна̀ своегѡ̀, и҆ речѐ: ꙗ҆́кѡ є҆́сть гдⷭ҇ь на мѣ́стѣ се́мъ, а҆́зъ же не вѣ́дѣхъ. И҆ ᲂу҆боѧ́сѧ, и҆ речѐ: ꙗ҆́кѡ стра́шно мѣ́сто сїѐ, нѣ́сть сїѐ, но до́мъ бж҃їй, и҆ сїѧ̑ врата̀ нбⷭ҇наѧ.
Прⷪ҇ро́чества і҆езекі́илева чте́нїе. [Главы̑ м҃г и҆ м҃д].
Та́кѡ глаго́летъ гдⷭ҇ь: бꙋ́детъ ѿ днѐ ѻ҆сма́гѡ и҆ про́чее, сотворѧ́тъ і҆ерє́и на ѻ҆лтарѝ всесожже́нїѧ ва́шегѡ, и҆ ꙗ҆̀же сп҃се́нїѧ ва́шегѡ, и҆ прїимꙋ̀ вы̀, глаго́летъ а҆донаі̀ гдⷭ҇ь. И҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ, зрѧ́щихъ на восто́ки, и҆ сїѧ̑ бѧ́хꙋ затворє́на. И҆ речѐ гдⷭ҇ь ко мнѣ̀: врата̀ сїѧ̑ затворє́на бꙋ́дꙋтъ, и҆ не ѿве́рзꙋтсѧ, и҆ никто́же про́йдетъ сквозѣ̀ и҆́хъ, ꙗ҆́кѡ гдⷭ҇ь бг҃ъ і҆и҃левъ про́йдетъ и҆́ми, и҆ бꙋ́дꙋтъ затворє́на. Ꙗ҆́кѡ и҆гꙋ́менъ сѧ́детъ въ ни́хъ снѣ́сти хлѣ́бъ, по пꙋтѝ є҆ла́мскихъ вра́тъ вни́детъ, и҆ по пꙋтѝ є҆гѡ̀ и҆зы́детъ. И҆ введе́ мѧ по пꙋтѝ вра́тъ ст҃ы́хъ сꙋ́щихъ къ сѣ́верꙋ, прѧ́мѡ хра́мꙋ, и҆ ви́дѣхъ, и҆ сѐ и҆спо́лнь сла́вы хра́мъ гдⷭ҇ень.
<<г҃і: 25>>
При́тчей чте́нїе. [Глава̀ ѳ҃].
Премꙋ́дрость созда̀ себѣ̀ до́мъ, и҆ ᲂу҆твердѝ столпѡ́въ се́дмь. Закла̀ своѧ̑ же́ртвєннаѧ, и҆ растворѝ въ ча́ши свое́й вїно̀, и҆ ᲂу҆гото́ва свою̀ трапе́зꙋ. Посла̀ своѧ̑ рабы̑, созыва́ющи съ высо́кимъ проповѣ́данїемъ на ча́шꙋ, глаго́лющи: И҆́же є҆́сть безꙋ́менъ, да ᲂу҆клони́тсѧ ко мнѣ̀. и҆ тре́бꙋющымъ ᲂу҆ма̀ речѐ: Прїиди́те, ꙗ҆ди́те мо́й хлѣ́бъ, и҆ пі́йте вїно̀, є҆́же раствори́хъ ва́мъ. Ѡ҆ста́вите безꙋ́мїе, и҆ жи́ви бꙋ́дете, и҆ взыщи́те ра́зꙋма, да поживетѐ и҆ и҆спра́вите ра́зꙋмъ въ вѣ́дѣнїи. Наказꙋ́ѧй ѕлы̑ѧ, прїи́метъ себѣ̀ безче́стїе: ѡ҆блича́ѧй же нечести́ваго ѡ҆поро́читъ себѐ. ѡ҆бличє́нїѧ бо нечести́вомꙋ ра̑ны є҆мꙋ̀. Не ѡ҆блича́й ѕлы́хъ, да не возненави́дѧтъ тебѐ: ѡ҆блича́й премꙋ́дра, и҆ возлю́битъ тѧ̀. Да́ждь премꙋ́дромꙋ винꙋ̀, и҆ премꙋ́дршїй бꙋ́детъ: сказꙋ́й првⷣномꙋ, и҆ приложи́тъ прїима́ти. Нача́ло премꙋ́дрости стра́хъ гдⷭ҇ень, и҆ совѣ́тъ ст҃ы́хъ ра́зꙋмъ. Разꙋмѣ́ти бо зако́нъ по́мысла є҆́сть бл҃га́гѡ: си́мъ бо ѡ҆́бразомъ мно́гое поживе́ши вре́мѧ, и҆ приложа́тсѧ тебѣ̀ лѣ̑та живота̀.
На стїхо́внѣ стїхи̑ры, гла́съ г҃:
Прїиди́те, всѝ концы̀ землѝ, чтⷭ҇но́е и҆́мⷬ҇къ бж҃їѧ мт҃ре ᲂу҆бл҃жи́мъ: и҆́бо рꙋ́цѣ къ сн҃ꙋ воздѣ́ющи мо́литсѧ, тѣ́мже ст҃ы̑мъ и҆́мⷬ҇къ є҆ѧ̀ мі́ръ ѡ҆живле́нъ бы́сть: ѱалмы̑ и҆ пѣ́ньми и҆ пѣ́сньми дꙋхо́вными, со всѣ́ми ст҃ы́ми пра́зднꙋемъ свѣ́тлѡ.
Сті́хъ: Приведꙋ́тсѧ цр҃ю̀ дѣ́вы въ слѣ́дъ є҆ѧ̀: и҆ и҆́скрєннїѧ є҆ѧ̀ приведꙋ́тсѧ тебѣ̀.
Вельмѝ добро́тою ᲂу҆красѝ тѧ̀ бг҃ъ, ꙗ҆́кѡ въ человѣ́цѣхъ свѣ́тъ на рꙋкꙋ̀ твоє́ю, ꙗ҆́же є҆ди́на во свѣ́тѣ є҆гѡ̀, ᲂу҆пова́нїе хрⷭ҇тїа́нѡмъ, помо́щница сꙋ́щымъ въ нꙋ́ждахъ и҆ ско́рбехъ, и҆ приста́нище въ пꙋчи́нѣ трꙋжда́ющымсѧ: молѝ и҆зба́витисѧ ѿ напа́стей, любо́вїю пою́щымъ и҆́мⷬ҇къ твоѐ всечтⷭ҇но́е.
Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ.
Всечтⷭ҇но́е твоѐ и҆́мⷬ҇къ, прест҃а́ѧ дв҃о чтⷭ҇аѧ, а҆́гг҃лъ мно́жество на нб҃сѣ́хъ, и҆ человѣ́ческїй ро́дъ на землѝ бл҃жи́тъ: ꙗ҆́кѡ мт҃и бы́сть творца̀ всѣ́хъ хрⷭ҇та̀ бг҃а. того̀ молѧ́щи за ны̀ не преста́й <<г҃і ѡ҆б.: 26>> мо́лимъ тѧ̀, и҆̀же на тѧ̀ съ бг҃омъ ᲂу҆пова́нїе возложи́хомъ, бцⷣе препѣ́таѧ и҆ неискꙋсобра́чнаѧ.
Сла́ва, и҆ ны́нѣ, гла́съ в҃:
Мы̑сли ѡ҆чи́стивше и҆ ᲂу҆́мъ, со а҆́гг҃лы и҆ мы̀ торжествꙋ́емъ свѣ́тлѡ, начина́юще дв҃дскꙋю пѣ́снь ѻ҆трокови́цѣ невѣ́стѣ всѣ́хъ цр҃ѧ̀ хрⷭ҇та̀ бг҃а на́шегѡ: воскрⷭ҇нѝ, гдⷭ҇и, глаго́люще, въ поко́й тво́й, ты̀, и҆ кївѡ́тъ ст҃ы́ни твоеѧ̀, ꙗ҆́коже пала́тꙋ краснꙋ̀ сїю̀ ᲂу҆краси́лъ є҆сѝ, и҆ приче́лъ є҆сѝ ю҆̀ гра́дꙋ твоемꙋ̀, влⷣко, стро́ити и҆ покрыва́ти ѿ сопоста́тныхъ пога̑нъ держа́вною си́лою, тоѧ̀ мл҃твами.
Тропа́рь пра́здникꙋ, во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й тропа́рь, гла́съ д҃:
Къ бцⷣѣ приле́жнѡ ны́нѣ притеце́мъ, грѣ́шнїи и҆ смире́ннїи, и҆ припаде́мъ, въ покаѧ́нїи зовꙋ́ще и҆з̾ глꙋбины̀ дꙋшѝ: влⷣчце, помозѝ, на ны̀ млⷭ҇рдовавши: потщи́сѧ, погиба́емъ ѿ мно́жества прегрѣше́нїй: не ѿвратѝ твоѧ̑ рабы̑ тщы̀, тѧ́ бо и҆ є҆ди́нꙋ наде́ждꙋ и҆́мамы.
Сла́ва, и҆ ны́нѣ:
Не ᲂу҆молчи́мъ никогда̀, бцⷣе, си̑лы твоѧ̑ глаго́лати недосто́йнїи: а҆́ще бо ты̀ не бы̀ предстоѧ́ла молѧ́щи, кто́ бы на́съ и҆зба́вилъ ѿ толи́кихъ бѣ́дъ; кто́ же бы сохрани́лъ до ны́нѣ свобѡ́дны; не ѿстꙋ́пимъ, влⷣчце, ѿ тебѐ, твоѧ̑ бо рабы̑ сп҃са́еши при́снѡ ѿ всѧ́кихъ лю́тыхъ.
На ᲂу҆́трени,
на Бг҃ъ гдⷭ҇ь: тропа́рь два́жды.
Сла́ва, и҆ ны́нѣ: Не ᲂу҆молчи́мъ никогда̀: є҆ди́ножды.
По а҃-й каѳі́смѣ сѣда́ленъ, гла́съ д҃.
Подо́бенъ: Ꙗ҆ви́лсѧ є҆сѝ дне́сь:
Зарѧ́ми просїѧ̀ всемі́рнаѧ ра́дость и҆́мⷬ҇къ твоегѡ̀, дв҃о мт҃и мр҃і́е: на землѝ просвѣтѝ мы̑сли любо́вїю пою́щихъ тѧ̀.
Сла́ва, и҆ ны́нѣ: то́йже.
<<д҃і: 27>>
По в҃-й каѳі́смѣ сѣда́ленъ, гла́съ д҃.
Подо́бенъ: Оу҆диви́сѧ:
Дв҃а мр҃і́а бцⷣа вои́стиннꙋ, ꙗ҆́кѡ ѡ҆́блакъ свѣ́тлый на́мъ возсїѧ̀. ктомꙋ̀ а҆да́мъ не ѡ҆сꙋжда́етсѧ, и҆ є҆́ѵа ѿ ᲂу҆́зъ свободи́сѧ, сегѡ̀ ра́ди и҆ мы̀ зове́мъ, вопїю́ще съ дерзнове́нїемъ є҆ди́нѣй чтⷭ҇ѣй: прест҃а́ѧ дв҃о, молѝ сн҃а твоего̀, пода́ти грѣхѡ́въ ѡ҆ставле́нїе.
Сла́ва, и҆ ны́нѣ, то́йже.
По Хвали́те и҆́мѧ гдⷭ҇не: Припѣ́въ:
Пѣ́снь всѧ́кꙋ дꙋхо́внꙋю принесе́мъ бцⷣѣ.
Ѱало́мъ и҆збра́нный: Помѧнѝ, гдⷭ҇и, дв҃да, и҆ всю̀ кро́тость є҆гѡ̀:
По полѷеле́и сѣда́ленъ, гла́съ а҃.
Подо́бенъ: А҆́гг҃льскїѧ си̑лы:
Дв҃ческагѡ твоегѡ̀ чре́ва кра́сенъ кла́съ ꙗ҆́вльсѧ, и҆зрасти́ла бо є҆сѝ мі́рови жи́знь, сегѡ̀ ра́ди си̑лы нбⷭ҇ныѧ вопїю́тъ тебѣ̀, бцⷣе, сла́вѧще чтⷭ҇но́е твоѐ пра́зднество, пречтⷭ҇аѧ: сла́ва и҆́мⷬ҇къ твоемꙋ̀: сла́ва дѣ́вствꙋ твоемꙋ̀, мт҃и безневѣ́стнаѧ.
Сла́ва, и҆ ны́нѣ: то́йже.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ, гла́съ д҃:
Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.
Сті́хъ: Ѿры́гнꙋ се́рдце моѐ сло́во бл҃го, глаго́лю а҆́зъ дѣла̀ моѧ̑ цр҃е́ви.
Всѧ́кое дыха́нїе:
Є҆ѵⷢ҇лїе пи́сано въ концѣ̀ кни́ги сеѧ̀.
По н҃-мъ ѱалмѣ̀ стїхи́ра, гла́съ ѕ҃:
Дне́сь нбⷭ҇наѧ врата̀ ѿверза́ютсѧ, и҆ две́рь бж҃е́ственнаѧ предгрѧде́тъ. дне́сь ра́дости бл҃года́ть начина́етсѧ, ꙗ҆влѧ́ющи мі́рови и҆́мⷬ҇къ бж҃їѧ мт҃ре: є҆́юже земна̑ѧ съ нбⷭ҇ными совокꙋплѧ́ютсѧ, во сп҃се́нїе дꙋша́мъ на́шымъ.
Канѡ́нъ прест҃ѣ́й бцⷣѣ, гла́съ и҃.
І҆рмосы̀ по два́жды: тропарѝ на в҃і.
Пѣ́снь а҃.
І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
<<д҃і ѡ҆б.: 28>>
Бж҃їею си́лою бл҃гоче́стнѡ ᲂу҆крѣпи́ мѧ, ра́достнѡ пѣ́ти и҆́мⷬ҇къ твоѐ, пречтⷭ҇аѧ, застꙋпле́нїе гра́дꙋ твоемꙋ̀ и҆ всѣ̑мъ лю́демъ твои̑мъ держа́вꙋ неразрꙋши́мꙋ, прест҃а́ѧ, и҆ ста́дꙋ твоемꙋ̀ ᲂу҆твержде́нїе.
Бл҃госты́ню и҆ млⷭ҇ть почерпа́емъ твои́ми мл҃твами: ты́ бо бг҃а си́льнаго родила̀ є҆сѝ, сп҃са́ющаго всѧ̑ бл҃говѣ̑рныѧ моле́нїемъ твои́мъ, пренепоро́чнаѧ. є҆гѡ́же ра́ди тѧ̀ ᲂу҆бл҃жа́емъ всѝ, влⷣчце.
Твоѐ бж҃е́ственное и҆́мⷬ҇къ пра́зднꙋюще, пречтⷭ҇аѧ бцⷣе, тобо́ю сп҃се́нїе нетлѣ́нно дарова́сѧ, и҆ неразрꙋши́мо весе́лїе и҆ наде́жда, покро́въ и҆ держа́ва, и҆ дꙋша́мъ на́шымъ прибѣ́жище.
Под̾ тво́й кро́въ притека́емъ, влⷣчце, лю́дїе твоѝ, пренепоро́чнаѧ, помо́щница бꙋ́ди на́мъ рабѡ́мъ твои̑мъ, и҆ сп҃се́нїю проше́нїе подаю́щи, любо́вїю пою́щымъ тѧ̀.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃.
І҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Вѣ́рою сердца̀ ѡ҆бнови́мъ и҆́мⷬ҇къ ст҃ы́ѧ бцⷣы, всѣ̑мъ подава́ѧ вѣ́рою просѧ́щымъ и҆збавле́нїѧ, ѿ вра̑гъ ви́димыхъ и҆ неви́димыхъ на́съ соблюдѝ, пречтⷭ҇аѧ.
Ѡ҆сщ҃а́еши бл҃гоче́стнѡ, вѣ́рнѡ притека́ющихъ ко хра́мꙋ твоемꙋ̀, и҆ припа́дающихъ любо́вїю и҆́мⷬ҇къ твоемꙋ̀: и҆зба́ви на́съ ѿ всѧ́кихъ бѣ́дъ, и҆ млⷭ҇тива сотворѝ на́мъ сн҃а твоего̀ и҆ бг҃а на́шегѡ.
И҆з̾ тебѐ бж҃їю сло́вꙋ вопло́щшꙋсѧ, и҆ до́мъ сотворѝ себѣ̀ во ст҃ѣ́мъ чре́вѣ твое́мъ, и҆ и҆зво́ли роди́тисѧ, ꙗ҆́коже восхотѣ̀, и҆ дарова̀ на́мъ де́нь ви́дѣти твоегѡ̀ и҆́мⷬ҇къ, то́же любо́вїю пра́зднꙋюще, мо́лимсѧ тѝ.
Ра́достными дꙋша́ми, и҆ въ весе́лїи се́рдца прїи́мше ᲂу҆́мъ къ твоемꙋ̀ чтⷭ҇но́мꙋ и҆ бж҃е́ственномꙋ и҆́мⷬ҇къ и҆ всѝ вѣ́рнїи <<є҃і: 29>> мо́лимъ тѧ̀, бцⷣе, ꙗ҆́кѡ пречтⷭ҇омꙋ сн҃ꙋ твоемꙋ̀ млеко̀ подала̀ є҆сѝ, и҆́же на́съ пита́вый млⷭ҇тїю свое́ю.
Сѣда́ленъ, гла́съ д҃:
Цр҃ковь твоѧ̀ свѣ́тлѡ пра́зднꙋетъ твоегѡ̀ сла́внагѡ и҆́мⷬ҇къ, и҆ всѝ вѣ́рнїи, пою́ще зове́мъ тѝ приле́жнѡ, чтⷭ҇аѧ дв҃о: всѧ̑ вѣ̑рныѧ ᲂу҆крѣпѝ на вра́жїѧ си́лꙋ, и҆ совѣ́ты беззако́нныхъ разорѝ, и҆ живо́тъ на́шъ напра́ви, твори́ти бж҃е́ственнꙋю во́лю сн҃а твоегѡ̀.
Сла́ва, и҆ ны́нѣ, то́йже.
Пѣ́снь д҃.
І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Ты̀ ᲂу҆́бѡ, дв҃о чтⷭ҇аѧ, къ свѣ́тꙋ незаходи́момꙋ прише́дши помѧнѝ на́съ, молѧ́щи сн҃а твоего̀ и҆ бг҃а на́шего, твоѐ чтⷭ҇но́е и҆́мⷬ҇къ пра́зднꙋющихъ, пода́ти грѣхѡ́въ ѡ҆ставле́нїе.
Ꙗ҆́коже со́лнце свѣтоза́рное, и҆́бо преходѧ́щи сїѧ́етъ, и҆ тво́й бж҃е́ственный пра́здникъ лꙋчы̀ и҆спꙋща́етъ: страсте́й же мглꙋ̀ ѿ на́съ ѿгонѧ́ѧ, да́рꙋетъ дꙋша́мъ на́шымъ ѡ҆чище́нїе, и҆ ѿ бѣ́дъ свобожде́нїе.
Ны́нѣ мра́къ ѕло́бный потреби́сѧ, и҆ со́лнечный и҆ дꙋше́вный свѣ́тъ возсїѧ̀, всенепоро́чныѧ бж҃їѧ мт҃ре, пра́здникъ чтⷭ҇на́гѡ и҆́мⷬ҇къ, є҆го́же бл҃гоче́стнѡ пра́зднꙋемъ.
Прибѣ́жище вели́кое и҆ похвала̀, пречтⷭ҇аѧ и҆ пренепоро́чнаѧ мт҃и всепѣ́таѧ: ты̀ кївѡ́тъ ᲂу҆́мныѧ ст҃ы́ни, ты̀ цѣле́бъ и҆сто́чникъ неисчерпа́емый, чтꙋ́щымъ твоѐ чтⷭ҇но́е и҆́мⷬ҇къ.
Пѣ́снь є҃.
І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѡ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
И҆сполнѧ́етсѧ ст҃ы́ни всѧ́чєскаѧ, къ тебѣ̀ прибѣга́ющымъ и҆ проще́нїе, вѣ́рнїи, прїе́млюще, пра́зднꙋемъ твоѐ чтⷭ҇но́е и҆́мⷬ҇къ, въ не́мже мо́лимъ тѧ̀, пода́ти на́мъ бл҃года́ть и҆ млⷭ҇ть въ де́нь сꙋ́дный.
<<є҃і ѡ҆б.: 30>>
Оу҆краси́ласѧ є҆сѝ дѣ́вства чистото́ю, ро́ждшаѧ кра́снаго сн҃а твоего̀ и҆ бг҃а на́шего: ᲂу҆красѝ тво́й пра́здникъ чтⷭ҇на́гѡ и҆́мⷬ҇къ, и҆ сщ҃е́нническїй чи́нъ возвеселѝ, и҆ лю́ди твоѧ̑ ѿ всѧ́кихъ бѣ́дъ свободѝ.
Ꙗ҆́кѡ дрꙋгі́й ра́й всѣ̑мъ познава́етсѧ, стѧжа́вый посредѣ̀ бл҃гоꙋха́нїѧ цвѣ́тъ, тво́й чтⷭ҇ны́й пра́здникъ, бж҃їимъ бл҃гоꙋха́нїемъ вѣ́рныхъ сердца̀ и҆сполнѧ́етъ, и҆̀же любо́вїю чтꙋ́щихъ тѧ̀, пренепоро́чнаѧ влⷣчце.
Ѡ҆́блакъ была̀ є҆сѝ, дв҃о, дождю̀ бж҃їю, пренепоро́чнаѧ влⷣчце, во́дꙋ сп҃си́тельнꙋю и҆спꙋща́ющи, зе́млю грѣхмѝ и҆зсо́хшꙋю напои́вши, приводѧ́щи пло́дъ творе́нїю добродѣ́тели: сегѡ̀ ра́ди ᲂу҆бл҃жа́емъ тѧ̀.
Пѣ́снь ѕ҃.
І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀.
Пре́жде всѣ́хъ вѣ̑къ сꙋ́щаго, ꙗ҆́кѡ ѻ҆троча̀ родила̀ є҆сѝ, и҆ на̑ша сердца̀ ѡ҆бнови́ла є҆сѝ, мно́гими грѣхѝ ѡ҆бетша̑вшаѧ: и҆ ѡ҆бновле́нїе прїимѝ на́шегѡ пѣ́нїѧ, приносѧ́щее твоемꙋ̀ пра́здникꙋ, бцⷣе приснодв҃о.
Цр҃ковь твоѧ̀ ст҃а́ѧ, и҆ ди́вна в̾пра́вдꙋ є҆́сть, є҆́же твоѐ пречтⷭ҇ое и҆́мⷬ҇къ въ не́й бл҃гоче́стнѡ пра́зднꙋемъ, и҆ всѣ̑мъ сердє́чнаѧ подава́еши и҆сцѣлє́нїѧ, бл҃жа́щымъ тѧ̀, пречтⷭ҇аѧ, и҆ ѿ всѧ́кихъ бѣ́дъ соблюдѝ рабы̑ твоѧ̑.
Дꙋша̀ всѧ́ка весели́тсѧ, соше́дшесѧ въ цр҃ковь твою̀, и҆ тво́й пра́зднꙋемъ пра́здникъ пою́ще, дв҃о бцⷣе, чтⷭ҇но́е и҆́мⷬ҇къ твоѐ, ꙗ҆́кѡ со́лнце свѣтѧ́щеесѧ, и҆ свѣ́та сїѧ́ющее бж҃їѧ дх҃а бл҃года́тїю, и҆ на́съ ѡ҆зарѝ, и҆ просвѣтѝ сердца̀ на̑ша, дв҃о мт҃и влⷣчце.
Пое́мъ пречтⷭ҇ое твоѐ и҆́мⷬ҇къ, и҆ чти́мъ непоро́чное твоѐ зача́тїе, и҆ ржⷭ҇тво̀ твоѐ, бг҃оневѣ́сто ѻ҆трокови́це: сла́вѧтъ же съ на́ми а҆́гг҃льстїи чи́нове, и҆ всѣ́хъ ст҃ы́хъ ли́кове.
<<ѕ҃і: 31>>
Та́же конда́къ прилꙋчи́вшагѡсѧ пра́здника.
А҆́ще ли нѣ́сть, глаго́ли се́й конда́къ, гла́съ а҃:
Честно́е жили́ще бы́вшее неизрече́ннагѡ є҆стества̀ бж҃е́ственнагѡ, вы́ше сло́ва, и҆ па́че ᲂу҆ма̀, и҆ грѣ̑шнымъ є҆сѝ спорꙋ́чница, подава́еши бл҃года́ть и҆ и҆сцѣле́нїе, ꙗ҆́кѡ мт҃и всѣ́хъ црⷭ҇твꙋющагѡ: молѝ сн҃а твоего̀, полꙋчи́ти на́мъ млⷭ҇ть въ де́нь сꙋ́дный.
И҆́нъ конда́къ, гла́съ ѕ҃:
Не и҆́мамы и҆ны́ѧ по́мощи, не и҆́мамы и҆ны́ѧ наде́жды, ра́звѣ тебѐ, влⷣчце: ты̀ на́мъ помозѝ, на тебѐ надѣ́емсѧ, и҆ тобо́ю хва́лимсѧ: твои́ бо є҆смы̀ рабѝ, да не постыди́мсѧ.
І҆́косъ: Къ бцⷣѣ вопїе́мъ любо́вїю: ра́дꙋйсѧ, гра́де гдⷭ҇ень. ра́дꙋйсѧ, ски́птре дв҃довъ. ра́дꙋйсѧ, пала́то ѡ҆дꙋшевле́ннаѧ. ра́дꙋйсѧ, рꙋ́чко бж҃е́ственныѧ ма́нны. ра́дꙋйсѧ, неѡпали́маѧ кꙋпино̀. ра́дꙋйсѧ, свѣ́щниче златы́й, ра́дꙋйсѧ, свѣщѐ неꙋгаси́маѧ. ра́дꙋйсѧ, горо̀ бж҃їѧ прїѡсѣне́ннаѧ. ра́дꙋйсѧ, ѻ҆гнено́сный прⷭ҇то́ле, ра́дꙋйсѧ, лѣ́ствице и҆ две́рь нбⷭ҇наѧ. ра́дꙋйсѧ, же́зле а҆арѡ́новъ невла́жнѡ прозѧбы́й, ра́дꙋйсѧ, всѣ́хъ сп҃са́ющи ѿ всѧ́кихъ бѣ́дъ и҆ скорбе́й, и҆ молѝ, пречтⷭ҇аѧ, сн҃а твоего̀ полꙋчи́ти на́мъ млⷭ҇ть въ де́нь сꙋ́дный.
Пѣ́снь з҃.
І҆рмо́съ: Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.
Цр҃и́ца всѣ́хъ прише́дши, нбⷭ҇ный кро́въ на сла́вꙋ на́мъ ᲂу҆ста́ви, своегѡ̀ пра́здника бжⷭ҇твеннагѡ и҆́мⷬ҇къ, и҆́мже сп҃са́емсѧ ѿ неви́димыхъ вра̑гъ нахожде́нїѧ, къ сн҃ꙋ твоемꙋ̀ вопїю́ще: бл҃гослове́нъ бг҃ъ ѻ҆тє́цъ на́шихъ.
Ржⷭ҇тво́мъ твои́мъ, гпⷭ҇жѐ бцⷣе дв҃о, и҆ всѣ́ми твои́ми пра̑здники, крꙋ́гъ лѣ́та вѣнча́сѧ: и҆ ны́нѣ ᲂу҆красѝ де́нь чтⷭ҇на́гѡ, и҆́мⷬ҇къ твоегѡ̀, бл҃года́ть и҆сточа́ющи, мы́ же всѝ вѣ́рнїи во хра́мъ тво́й притека́юще.
<<ѕ҃і ѡ҆б.: 32>>
Всѧ̑ си̑лы нбⷭ҇ныѧ восхвалѧ́ютъ ро́ждшꙋю гдⷭ҇а, и҆ ро́ди человѣ́честїи прославлѧ́ютъ ю҆̀, ꙗ҆́вльшꙋю на́мъ де́нь чтⷭ҇на́гѡ своегѡ̀ и҆́мⷬ҇къ, прибѣ́жище на́ше, наде́жда и҆ покро́въ, и҆ ѡ҆гражде́нїе, ѿ вра́жїихъ нахожде́нїй.
Бл҃года́тный ѡ҆́блаче, ѡ҆кропѝ на́съ свы́ше росо́ю бл҃года́ти и҆ млⷭ҇ти твоеѧ̀, чтꙋ́щихъ де́нь пра́здника твоегѡ̀ сла́внагѡ, и҆́мⷬ҇къ, то́же пое́тъ и҆ сла́витъ всѧ́ка дꙋша̀ ра́дꙋющисѧ: бл҃гослове́на ты̀ въ жена́хъ, и҆ бл҃гослове́нъ пло́дъ чре́ва твоегѡ̀.
Пѣ́снь и҃.
І҆рмо́съ: Безнача́льнаго цр҃ѧ̀ сла́вы, є҆гѡ́же трепе́щꙋтъ нбⷭ҇ныѧ си̑лы, по́йте, сщ҃е́нницы, лю́дїе, превозноси́те во всѧ̑ вѣ́ки.
Цр҃и́ца є҆сѝ всѣ́хъ є҆ди́на бг҃ꙋ бг҃ороди́тельнице чтⷭ҇аѧ, ст҃ы́й прⷭ҇то́лъ и҆ пала́та хрⷭ҇та̀ бг҃а: є҆го́же молѝ ѡ҆ чтꙋ́щихъ твоѐ чтⷭ҇но́е и҆́мⷬ҇къ, пода́ти грѣхѡ́въ ѡ҆ставле́нїе.
Рꙋка́ми ст҃ы́ми и҆́стиннѡ понесла̀ є҆сѝ, въ тебѣ̀ воплоти́вшагосѧ гдⷭ҇а, на землѝ пресла́внаѧ: и҆ ны́нѣ возшла̀ є҆сѝ превы́ше нб҃съ, и҆ ѡ҆ста́вльши человѣ́кѡмъ пресвѣ́тлый де́нь честна́гѡ и҆́мⷬ҇къ твоегѡ̀, во́ньже сла́вимъ пою́ще: гдⷭ҇а по́йте, и҆ превозноси́те є҆го̀ во вѣ́ки.
Бж҃е́ственнїи и҆гра́йте прⷪ҇ро́цы, чтꙋ́ще дв҃ы бцⷣы чтⷭ҇но́е и҆́мⷬ҇къ: та́ бо и҆спо́лни всѣ́хъ речє́нїѧ, ва́ми сказꙋ́емаго ро́ждши хрⷭ҇та̀ всѣ́хъ цр҃ѧ̀, то́же превозно́симъ во вѣ́ки.
Па́дшымъ воста́нїе, ᲂу҆ныва́ющымъ ра́дованїе, заблꙋ́ждшымъ наста́внице, болѧ́щымъ посѣще́нїе и҆ и҆сцѣле́нїе, и҆ всѣ̑мъ хрⷭ҇тїа́нѡмъ сп҃се́нїе: соблюдѝ на́съ, гпⷭ҇жѐ, вопїю́щихъ, и҆ чтꙋ́щихъ твоѐ и҆́мⷬ҇къ, и҆ и҆зба́ви на́съ ѿ и҆ноплеме́нныхъ нахожде́нїѧ.
Пѣ́снь ѳ҃.
І҆рмо́съ: Оу҆страши́сѧ всѧ́къ слꙋ́хъ неизрече́нна бж҃їѧ снисхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃ческагѡ чре́ва бы́въ человѣ́къ. тѣ́мже пречтⷭ҇ꙋю бцⷣꙋ вѣ́рнїи велича́емъ.
Пресла̑внаѧ глаго́лашасѧ ѡ҆ тебѣ̀ гра́де бж҃їй, и҆ при́снѡ црⷭ҇твꙋющагѡ нбⷭ҇ными и҆ земны́ми, ѿ тебѐ ро́ждшагѡсѧ, и҆ ѿ землѝ <<з҃і: 33>> тѧ̀ на нб҃о возве́дша, є҆мꙋ́же непреста́ннѡ моли́сѧ ѡ҆ чтꙋ́щихъ чтⷭ҇но́е и҆́мⷬ҇къ, съ ни́мже тѧ̀ велича́емъ.
Безпло́тныхъ чи́нове, патрїа̑рхъ собо́ръ, и҆ а҆пⷭ҇лъ бж҃е́ственный соста́въ, прⷪ҇ро́ческїй ли́къ, и҆ мч҃нчестїи полцы̀, ст҃и́телей и҆ прпⷣбныхъ ѻ҆тє́цъ ли́ки, и҆ всѝ ст҃і́и, весели́тесѧ съ на́ми, пра́зднꙋюще бж҃їѧ мт҃ре и҆́мⷬ҇къ и҆ велича́юще.
Всѧ́ческаѧ ѡ҆ст҃и́ла є҆сѝ ржⷭ҇тво́мъ твои́мъ, пречтⷭ҇аѧ дв҃о, и҆ ꙗ҆ви́ла є҆сѝ бо́льшее просвѣще́нїе, пречестны́й де́нь и҆́мⷬ҇къ твоегѡ̀: є҆го́же пра́зднꙋюще, тебѐ велича́емъ.
Вознесѝ ро́гъ правосла́вныхъ хрⷭ҇тїа́нъ, бг҃ороди́тельнице пречтⷭ҇аѧ: невоева́ны соблюдѝ гра́ды твоѧ̑, и҆ всѧ̑ страны̑ хрⷭ҇тїа̑нскїѧ сохранѝ, въ ни́хже вели́кое твоѐ и҆́мѧ и҆ многосла́вное велича́етсѧ, и҆ вѣ́рнѡ сла́витсѧ ѿ всѣ́хъ, влⷣчце чтⷭ҇аѧ.
Свѣти́ленъ.
Подо́бенъ: Жєны̀ ᲂу҆слы́шите:
А҆да́ме, ѡ҆бнови́сѧ, и҆ є҆́ѵо, весели́сѧ, прⷪ҇ро́цы со а҆пⷭ҇лы и҆ мч҃нки ликовствꙋ́йте, и҆ прпⷣбнїи со ст҃и́тєли, весели́тесѧ: и҆́бо ра́дость и҆ весе́лїе, а҆́гг҃лѡмъ же и҆ человѣ́кѡмъ пречтⷭ҇ыѧ и҆́мⷬ҇къ бцⷣы мр҃і́и. [Три́жды.]
На Хвали́техъ стїхи̑ры, гла́съ а҃:
И҆сто́чникъ свѣ́та, и҆ пото́къ свѣ́тлости неистощи́мый, приноси́тъ пра́здникъ и҆́мⷬ҇къ твоегѡ̀: ᲂу҆́бѡ молѝ, бцⷣе, неразꙋ́мїѧ тьмы̀ и҆зба́вити мѧ̀, и҆ страсте́й дꙋше́вныхъ же и҆ тѣле́сныхъ, и҆ въ бꙋ́дꙋщемъ вѣ́цѣ безконе́чныѧ мꙋ́ки и҆зба́ви на́съ, [Два́жды.]
И҆сто́чника премꙋ́дрости бл҃гі́ѧ, ра́зꙋма же пꙋчи́нꙋ и҆ бл҃года́ти: тѣ́мъ тѧ̀ бе́зднꙋ ѵ҆поста́снаѧ бж҃їѧ премꙋ́дрость, бцⷣе, показа̀ пра́здникъ и҆́мⷬ҇къ и҆з̾ тебѐ пло́тїю рожде́йсѧ. є҆гѡ́же ра́ди ка́плю мѝ премꙋ́дрости твоеѧ̀ и҆ ра́зꙋма пода́ждь, и҆ къ жи́зни наста́ви мѧ̀.
<<з҃і ѡ҆б.: 34>>
Нача́ло та́йныхъ хрⷭ҇то́выхъ чꙋде́съ, влⷣчце, стра́шнꙋ ви́дѣвше глави́знꙋ, честно́е и҆сполне́нїе чтⷭ҇на́гѡ твоегѡ̀ ѡ҆́браза пра́здникъ и҆́мⷬ҇къ и҆ бжⷭ҇твенныхъ чꙋде́съ, почита́емъ и҆ покланѧ́емсѧ: ѿ болѣ́зней и҆ скорбе́й посѣтѝ, наста́внице, и҆ бꙋ́дꙋщагѡ, бцⷣе, и҆зба́ви на́съ мꙋче́нїѧ.
Сла́ва, и҆ ны́нѣ, гла́съ и҃:
Бцⷣꙋ мр҃і́ю всѝ воспои́мъ: ра́дꙋйсѧ, мт҃и бж҃їѧ, ра́дꙋйсѧ, лѣ́ствице ѡ҆дꙋшевле́ннаѧ и҆ разꙋ́мнаѧ. ра́дꙋйсѧ, кꙋпино̀ неѡпали́маѧ. ра́дꙋйсѧ, ста́мно всест҃а́ѧ. ра́дꙋйсѧ, цвѣ́те вѣ́ры. ра́дꙋйсѧ, же́зле прозѧ́бшїй, ра́дꙋйсѧ, злата́ѧ кади́льнице. ра́дꙋйсѧ, горо̀ бж҃їѧ присѣ́ннаѧ дв҃о. ра́дꙋйсѧ, разрѣше́нїе пе́рвыѧ є҆́ѵы. ра́дꙋйсѧ, прⷭ҇то́ле бж҃їй. ра́дꙋйсѧ, многомлⷭ҇тивнаѧ красото̀. ра́дꙋйсѧ, влⷣчце.
Славосло́вїе вели́кое, и҆ ѿпꙋ́стъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.