Июль
<<т҃м: 679>>
Мѣ́сѧцъ і҆ꙋ́лїй,
и҆мѣ́ѧй дне́й л҃а.
Де́нь и҆́мать часѡ́въ д҃і, а҆ но́щь часѡ́въ і҃.
а҃. Ст҃ы́хъ и҆ чꙋдотво́рцєвъ безсре́бреникѡвъ космы̀ и҆ дамїа́на, въ ри́мѣ мꙋ́чившихсѧ.
Ве́черъ, ѻ҆бы́чнаѧ каѳі́сма. На Гдⷭ҇и воззва́хъ, стїхи̑ры ст҃ы́хъ на ѕ҃, гла́съ а҃. Подо́бенъ: Нбⷭ҇ныхъ чинѡ́въ: И҆́ны стїхи̑ры, гла́съ д҃. Подо́бенъ: Да́лъ є҆сѝ зна́менїе: Сла́ва, гла́съ ѕ҃: Безконе́чна є҆́сть бл҃года́ть: И҆ ны́нѣ, бг҃оро́диченъ: Бцⷣе, ты̀ є҆сѝ лоза̀ и҆́стиннаѧ: И҆лѝ крⷭ҇тобг҃оро́диченъ. На стїхо́внѣ ѻ҆ктѡ́иха. Сла́ва, гла́съ ѕ҃: Всегда̀ и҆мꙋ́ще хрⷭ҇та̀: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Тропа́рь, гла́съ и҃: Ст҃і́и безсре́брєницы: ное́мврїа въ а҃-й де́нь. На ᲂу҆́трени, на Бг҃ъ гдⷭ҇ь, тропа́рь, ст҃ы́хъ, два́жды. Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: и҆ сѣда́льны ѻ҆ктѡ́иха: и҆ чте́нїе. Канѡ́на ѻ҆́ба ѻ҆ктѡ́иха, и҆ ст҃ы́хъ на ѕ҃, гла́съ д҃. По г҃-й пѣ́сни, сѣда́ленъ, гла́съ и҃. Сла́ва, гла́съ то́йже. И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. По ѕ҃-й пѣ́сни,
Конда́къ, гла́съ в҃:
Бл҃года́ть прїи́мше и҆сцѣле́нїй, простира́ете здра́вїе сꙋ́щымъ въ нꙋ́ждахъ, вра́чеве, чꙋдотво́рцы пресла́внїи: но ва́шимъ посѣще́нїемъ ра́тникѡвъ де́рзѡсти низложи́те, мі́ръ и҆сцѣлѧ́юще чꙋдесы̀.
И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, ст҃ы́хъ: Ко́е дово́льно бꙋ́детъ сло́во: На хвали́техъ стїхи̑ры <<т҃м ѡ҆б.: 680>> на ѕ҃, самогла́сны, съ припѣ́вы: а҃-й, Ст҃ы̑мъ, и҆̀же сꙋ́ть на землѝ є҆гѡ̀: в҃- й, Сѐ что̀ добро̀, и҆лѝ что̀ красно̀: Сла́ва, гла́съ д҃: И҆сто́чникъ и҆сцѣле́нїй: И҆ ны́нѣ, бг҃оро́диченъ и҆лѝ крⷭ҇тобг҃оро́диченъ. На стїхо́внѣ ѻ҆ктѡ́иха. Сла́ва, гла́съ и҃: Кто̀ не ᲂу҆диви́тсѧ: На лїтꙋргі́и, бл҃жє́нна ѻ҆ктѡ́иха, на д҃: и҆ ѿ канѡ́на ст҃ы́хъ, пѣ́снь г҃-ѧ, на д҃. Прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀: Сті́хъ: Предзрѣ́хъ гдⷭ҇а: А҆по́столъ къ корі́нѳѧнѡмъ, зача́ло рн҃г: Вы̀ є҆стѐ тѣ́ло хрⷭ҇то́во: А҆ллилꙋ́їа, гла́съ д҃: Сѐ что̀ добро̀: Є҆ѵⷢ҇лїе матѳе́а, зача́ло л҃д, ѿ полꙋ̀: Призва̀ і҆и҃съ ѻ҆бана́десѧте ᲂу҆ч҃нкѝ своѧ̑: Прича́стенъ: Ра́дꙋйтесѧ:
в҃. Положе́нїе чⷭ҇тны́ѧ ри́зы прест҃ы́ѧ влⷣчцы на́шеѧ бцⷣы, во влахе́рнѣ.
Ве́черъ, ѻ҆бы́чнаѧ каѳі́сма. На Гдⷭ҇и воззва́хъ стїхи̑ры, на ѕ҃, гла́съ д҃. Подо́бенъ: Да́лъ є҆сѝ зна́менїе: Да́лъ є҆сѝ чл҃вѣколю́бче: Сла́ва, и҆ ны́нѣ, гла́съ в҃: Смы́слъ ѡ҆чи́стивше и҆ ᲂу҆́мъ: На стїхо́внѣ стїхи̑ры, гла́съ а҃. Подо́бенъ: Всехва́льнїи мч҃нцы: Пала́та ѡ҆дꙋшевле́ннаѧ: Сла́ва, и҆ ны́нѣ, гла́съ в҃: Ꙗ҆́кѡ вѣнце́мъ:
Тропа́рь, гла́съ и҃:
Бцⷣе приснодв҃о, человѣ́кѡвъ покро́ве, ри́зꙋ и҆ по́ѧсъ пречⷭ҇тагѡ твоегѡ̀ тѣлесѐ, держа́вное гра́дꙋ твоемꙋ̀ ѡ҆бложе́нїе дарова́ла є҆сѝ, безсѣ́меннымъ ржⷭ҇тво́мъ твои́мъ, нетлѣ́нна пребыва́ющи: ѡ҆ тебѣ́ бо и҆ є҆стество̀ ѡ҆бновлѧ́етсѧ и҆ вре́мѧ. тѣ́мже мо́лимъ тѧ̀: ми́ръ гра́дꙋ твоемꙋ̀ дарова́ти, и҆ дꙋша́мъ на́шымъ ве́лїю млⷭ҇ть.
На ᲂу҆́трени, на Бг҃ъ гдⷭ҇ь, Тропа́рь бцⷣы, три́жды: и҆ ѻ҆бы̑чныѧ каѳі̑смы: и҆ сѣда́льны бцⷣы: и҆ чте́нїе. Канѡ́ны бцⷣы два̀: є҆ди́нъ, гла́съ д҃: со і҆рмосо́мъ на и҃: Дрꙋгі́й, <<тм҃а: 681>> гла́съ то́йже, на д҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни, сѣда́ленъ, гла́съ д҃. Подо́бенъ: Вознесы́йсѧ: Чꙋде́съ рѣ́ки бцⷣе: Сла́ва, и҆ ны́нѣ, то́йже. По ѕ҃-й пѣ́сни,
Конда́къ, гла́съ д҃. Подо́бенъ: Вознесы́йсѧ:
Ѡ҆дѣѧ́нїе всѣ̑мъ вѣ̑рнымъ нетлѣ́нїѧ, бг҃обл҃года́тнаѧ чⷭ҇таѧ дарова́ла є҆сѝ, сщ҃е́ннꙋю ри́зꙋ твою̀, є҆́юже сщ҃е́нное тѣ́ло твоѐ покрыва́ла є҆сѝ, покро́ве всѣ́хъ человѣ́кѡвъ, є҆ѧ́же положе́нїе пра́зднꙋемъ любо́вїю, и҆ вопїе́мъ со стра́хомъ тѝ чⷭ҇таѧ: ра́дꙋйсѧ дв҃о, хрⷭ҇тїа́нъ похвало̀.
И҆ і҆́косъ. По ѳ҃-й пѣ́сни, свѣти́ленъ. Подо́бенъ: Свѣ́те неизмѣ́нный: Ѡ҆крили́вшꙋю хрⷭ҇та̀ ри́зꙋ: Сла́ва, и҆ ны́нѣ: Є҆ди́на и҆ є҆стество̀: На хвали́техъ стїхи̑ры на д҃, гла́съ д҃. Подо́бенъ: Ꙗ҆́кѡ до́блѧ: Ра́ка, содержа́щаѧ ри́зꙋ твою̀: Сла́ва, и҆ ны́нѣ, гла́съ в҃: Смы́слъ ѡ҆чи́стивше и҆ ᲂу҆́мъ: пи́санъ на вече́рни. Славосло́вїе вели́кое. По трист҃о́мъ тропа́рь бцⷣы є҆ди́ножды: є҆ктєнїѝ, и҆ ѿпꙋ́стъ: и҆ ча́съ а҃-й: и҆ коне́чный ѿпꙋ́стъ. На лїтꙋргі́и, бл҃жє́нна ѿ канѡ́на бцⷣы, пѣ́снь г҃-ѧ и҆ ѕ҃-ѧ. Прокі́менъ, гла́съ г҃: Пѣ́снь бцⷣы: Вели́читъ дꙋша̀ моѧ̀ гдⷭ҇а: Сті́хъ: Ꙗ҆́кѡ призрѣ̀ на смире́нїе рабы̀ своеѧ̀: А҆по́столъ, ко є҆вре́ємъ, зача́ло т҃к: И҆мѣ́ѧше пе́рваѧ ски́нїа: А҆ллилꙋ́їа, гла́съ и҃: Воскрⷭ҇нѝ гдⷭ҇и въ поко́й тво́й: Є҆ѵⷢ҇лїе лꙋкѝ, зача́ло н҃д: Вни́де і҆и҃съ въ ве́сь нѣ́кꙋю: Прича́стенъ: Ча́шꙋ сп҃се́нїѧ:
г҃. Ст҃а́гѡ мч҃нка ѵ҆акі́нѳа:
Стїхи̑ры ѻ҆ктѡ́иха г҃, и҆ мч҃нка г҃, гла́съ и҃. Подо́бенъ: Ѽ пресла́внагѡ чꙋдесѐ! На стїхо́внѣ, ѻ҆ктѡ́иха. Тропа́рь, гла́съ д҃: Мч҃нкъ тво́й гдⷭ҇и ѵ҆акі́нѳъ: септе́мврїа во в҃-й де́нь. Ѻ҆́ба канѡ́на ѻ҆ктѡ́иха: и҆ ст҃а́гѡ на д҃, гла́съ и҃. По г҃-й пѣ́сни, сѣда́ленъ, гла́съ г҃. По ѕ҃-й пѣ́сни,
<<тм҃а ѡ҆б.: 682>>
Конда́къ, гла́съ ѕ҃:
Дре́во жи́зни посредѣ̀ дꙋшѝ своеѧ̀ вѣ́рꙋ твою̀ хрⷭ҇тѐ стѧжа́вый тво́й мч҃нкъ, є҆де́мскагѡ раѧ̀ честнѣ́йшїй бы́сть, дре́во пре́лести ѕмі́евы погꙋби́въ дерзнове́ннѡ дх҃омъ, вѣнча́сѧ сла́вою твое́ю многомлⷭ҇тиве.
Въ то́йже де́нь пренесе́нїе моще́й во ст҃ы́хъ ѻ҆тца̀ на́шегѡ фїлі́ппа митрополі́та моско́вскагѡ, и҆ всеѧ̀ рѡссі́и чꙋдотво́рца.
Тропа́рь, гла́съ и҃:
Первопресто́льникѡвъ прее́мниче, сто́лпе правосла́вїѧ, и҆́стины побо́рниче, но́вый и҆сповѣ́дниче ст҃и́телю фїлі́ппе, дꙋ́шꙋ положи́вый за па́ствꙋ твою̀: тѣ́мже ꙗ҆́кѡ и҆мѣ́ѧ дерзнове́нїе ко хрⷭ҇тꙋ̀ молѝ за і҆мпера́тора правосла́внаго, за гра́дъ же и҆ лю́ди, чтꙋ́щыѧ досто́йнѡ ст҃ꙋ́ю па́мѧть твою̀.
Конда́къ, гла́съ г҃. Подо́бенъ: Дв҃а дне́сь:
Правосла́вїѧ наста́вника, и҆ и҆́стины провозвѣ́стника, златоꙋ́стагѡ ревни́телѧ, рѡссі́йскаго свѣти́льника, фїлі́ппа премꙋ́драго восхва́лимъ, пи́щею слове́съ твои́хъ разꙋ́мнѡ ча̑да своѧ̑ пита́юща: то́й бо ѧ҆зы́комъ хвале́нїе поѧ́ше, ᲂу҆стна́ма же пѣ́нїе вѣща́ше, ꙗ҆́кѡ таи́нникъ бж҃їѧ бл҃года́ти.
д҃. И҆́же во ст҃ы́хъ ѻ҆тца̀ на́шегѡ а҆ндре́а, а҆рхїепⷭ҇кпа кри́тскагѡ і҆ерꙋсалѷмі́та: И҆ прпⷣбныѧ ма́рѳы, ма́тере ст҃а́гѡ сѷмеѡ́на дивного́рца:
На Гдⷭ҇и воззва́хъ, стїхи̑ры а҆ндре́а г҃, гла́съ а҃. Подо́бенъ: Нбⷭ҇ныхъ чинѡ́въ: и҆ ма́рѳы г҃, гла́съ д҃. Подо́бенъ: Ꙗ҆́кѡ до́блѧ: Сла́ва, гла́съ то́йже: Дх҃о́вною бл҃года́тїю: На стїхо́внѣ ѻ҆ктѡ́иха. Сла́ва, ст҃а́гѡ, гла́съ и҃: Мона́хѡвъ мно́жєства: Тропа́рь ст҃а́гѡ, гла́съ д҃: Пра́вило вѣ́ры: септе́мврїа во в҃-й де́нь: и҆ ст҃ы́ѧ, гла́съ и҃: Въ тебѣ̀ <<тм҃в: 683>> ма́ти: септе́мврїа въ а҃і-й де́нь. На ᲂу҆́трени, на Бг҃ъ гдⷭ҇ь, тропа́рь а҆ндре́а, два́жды. Сла́ва, ст҃ы́ѧ: и҆ ѻ҆бы̑чныѧ каѳі̑смы: и҆ сѣда́льны ѻ҆ктѡ́иха: и҆ чтє́нїѧ. Канѡ́нъ ѻ҆ктѡ́иха є҆ди́нъ: и҆ ст҃ы́хъ два̀, на и҃. А҆ндре́а, гла́съ є҃: Прпⷣбныѧ, гла́съ и҃. По г҃-й пѣ́сни,
Конда́къ ма́рѳы, гла́съ в҃. Подо́бенъ: Въ мл҃твахъ:
Въ мл҃твахъ гдⷭ҇еви предстоѧ́щи, пречⷭ҇тѣй дв҃ѣ бцⷣѣ пѣ́нїе и҆ хвалы̑ приносѧ́щи ма́рѳо честна́ѧ, породила̀ є҆сѝ сщ҃е́нное ѻ҆троча̀, сѷмеѡ́на преди́внаго свѣти́льника всемі́рнаго: съ ни́мже молѝ при́снѡ ѡ҆ всѣ́хъ на́съ.
И҆ сѣда́ленъ ст҃а́гѡ, гла́съ д҃. Сла́ва, прпⷣбныѧ, гла́съ то́йже. По ѕ҃-й пѣ́сни,
Конда́къ, гла́съ в҃. Подо́бенъ: Вы́шнихъ и҆щѧ̀:
Вострꙋби́въ ꙗ҆́снѡ бж҃е́ствєннаѧ сладкопѣ̑нїѧ, ꙗ҆ви́лсѧ є҆сѝ свѣти́льникъ мі́ра свѣтлѣ́йшїй, свѣ́томъ сїѧ́ѧ трⷪ҇цы, а҆ндре́е прпⷣбне. тѣ́мже всѝ вопїе́мъ тѝ: не преста́й молѧ́сѧ ѡ҆ всѣ́хъ на́съ.
И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, ст҃а́гѡ. На стїхо́внѣ ѻ҆ктѡ́иха. Сла́ва, гла́съ ѕ҃: Прпⷣбне ѻ҆́тче: На лїтꙋргі́и, прокі́менъ, гла́съ з҃: Восхва́лѧтсѧ прпⷣбнїи во сла́вѣ: Сті́хъ: Воспо́йте гдⷭ҇еви пѣ́снь но́вꙋ: А҆по́столъ къ є҆вре́ємъ, зача́ло ти҃і ѿ полꙋ̀: Всѧ́къ первосщ҃е́нникъ: А҆ллилꙋ́їа, гла́съ в҃: Сщ҃е́нницы твоѝ ѡ҆блекꙋ́тсѧ въ пра́вдꙋ: Є҆ѵⷢ҇лїе матѳе́а, зача́ло к҃а: Всѧ̑ є҆ли̑ка а҆́ще хо́щете: Прича́стенъ: Въ па́мѧть:
є҃. Прпⷣбнагѡ ѻ҆тца̀ на́шегѡ а҆ѳана́сїа а҆ѳѡ́нскагѡ.
И҆дѣ́же хра́мъ а҆ѳана́сїа, твори́мъ бдѣ́нїе. На ма́лѣй вече́рни, стїхи̑ры на д҃, гла́съ а҃. Подо́бенъ: Всехва́льнїи <<тм҃в ѡ҆б.: 684>> мч҃нцы: Сла́ва, гла́съ ѕ҃: Безсме́ртїѧ тезоимени́таго: И҆ ны́нѣ: Бцⷣе, ты̀ є҆сѝ лоза̀ и҆́стиннаѧ: На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ: съ припѣ́вы и҆́хъ: а҃-й, Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀. в҃-й, Бл҃же́нъ мꙋ́жъ боѧ́йсѧ гдⷭ҇а: Сла́ва, и҆ ны́нѣ: Горѣ̀ тѧ̀ ли́цы бцⷣе:
Тропа́рь, гла́съ г҃:
Є҆́же во пло́ти житїю̀ твоемꙋ̀ ᲂу҆диви́шасѧ а҆́гг҃льстїи чи́ни, ка́кѡ съ тѣ́ломъ къ неви̑димымъ сплете́нїємъ и҆зше́лъ є҆сѝ присносла́вне, и҆ ᲂу҆ѧзви́лъ є҆сѝ де́мѡнскїѧ полкѝ. ѿѻнꙋ́дꙋже а҆ѳана́сїе хрⷭ҇то́съ тебѣ̀ воздадѐ бога́тыми дарова́ньми: сегѡ̀ ра́ди, ѻ҆́тче, молѝ сп҃сти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ. Є҆ктенїа̀ ма́лаѧ, и҆ ѿпꙋ́стъ. На вели́цѣй вече́рни, по ѻ҆бы́чномъ ѱалмѣ̀, пое́мъ Бл҃же́нъ мꙋ́жъ: а҃-й а҆нтїфѡ́нъ. На Гдⷭ҇и воззва́хъ, стїхи̑ры на и҃, гла́съ в҃. Подо́бенъ: Кі́ими похва́льными вѣнцы̀: Сла́ва, гла́съ ѕ҃: Ꙗ҆́кѡ бж҃е́ственнаѧ жи́знь твоѧ̀: И҆ ны́нѣ, бг҃оро́диченъ. Вхо́дъ. прокі́менъ днѐ. чтє́нїѧ г҃ прпⷣбничєскаѧ. На лїті́и стїхи́ра хра́ма, и҆ а҆ѳана́сїа самогла́сны, гла́съ а҃. Сла́ва, гла́съ є҃: Вострꙋ́бимъ трꙋбо́ю: И҆ ны́нѣ, бг҃оро́диченъ, гла́съ то́йже: Вострꙋ́бимъ трꙋбо́ю пѣ́сней: На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ: Сла́ва, гла́съ ѕ҃: Ѻ҆те́ческꙋю добро́тꙋ: И҆ ны́нѣ: Бцⷣе ты̀ є҆сѝ лоза̀: На бл҃гослове́нїи хлѣ́бѡвъ тропа́рь, гла́съ г҃: Є҆́же во пло́ти житїю̀ твоемꙋ̀: два́жды. пи́санъ на ма́лѣй вече́рни: и҆ Бцⷣе дв҃о: є҆ди́ножды. и҆ Бꙋ́ди и҆́мѧ гдⷭ҇не: три́жды. и҆ ѱало́мъ: Бл҃гословлю̀ гдⷭ҇а: На ᲂу҆́трени, на Бг҃ъ гдⷭ҇ь, тропа́рь ст҃а́гѡ, два́жды. Сла́ва, и҆ ны́нѣ: Тѧ̀ хода́тайствовавшꙋю: и҆ ѻ҆бы̑чныѧ каѳі̑смы, и҆ сѣда́льны ст҃а́гѡ. По полѷеле́и сѣда́ленъ, гла́съ и҃. Сла́ва, <<тм҃г: 685>> и҆ ны́нѣ, бг҃оро́диченъ. Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ: Є҆ѵⷢ҇лїе матѳе́а, зача́ло м҃г: Всѧ̑ мнѣ̀ прєдана̀ сꙋ́ть: По н҃-мъ ѱалмѣ̀ стїхи́ра, гла́съ ѕ҃: Безсме́ртїѧ тезоимени́таго: Канѡ́нъ бцⷣы со і҆рмосо́мъ на ѕ҃: и҆ ст҃а́гѡ на и҃: Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни, сѣда́ленъ, гла́съ и҃: Подо́бенъ: Премꙋ́дрости: два́жды. Сла́ва, и҆ ны́нѣ, бг҃оро́диченъ. По ѕ҃-й пѣ́сни,
Конда́къ, гла́съ и҃. Подо́бенъ: Взбра́нной:
Ꙗ҆́кѡ невеще́ственныхъ сꙋще́ствъ зри́телѧ и҆зрѧ́дна, и҆ дѣ́ѧтельна сказа́телѧ всеи́стинна, взыва́етъ тѧ̀ ста́до твоѐ бг҃оглаго́льниче: не ѡ҆скꙋдѣ́й молѧ̀ ѡ҆ рабѣ́хъ твои́хъ, и҆зба́витисѧ напа́стей и҆ ѡ҆бхожде́нїй, вопїю́щымъ тѝ: ра́дꙋйсѧ ѻ҆́тче а҆ѳана́сїе.
И҆ і҆́косъ. По ѳ҃-й пѣ́сни, свѣти́ленъ, два́жды. Сла́ва, и҆ ны́нѣ, бг҃оро́диченъ. На хвали́техъ стїхи̑ры на д҃, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, гла́съ то́йже, самогла́сенъ: Мона́хѡвъ мно́жєства: И҆ ны́нѣ, Влⷣчце прїимѝ: Славосло́вїе вели́кое. По трист҃о́мъ тропа́рь ст҃а́гѡ. Сла́ва, и҆ ны́нѣ, бг҃оро́диченъ. Є҆ктєнїѝ, и҆ ѿпꙋ́стъ, и҆ ча́съ а҃-й, и҆ коне́чный ѿпꙋ́стъ. На лїтꙋргі́и, бл҃жє́нна ѿ канѡ́на ст҃а́гѡ, пѣ́снь г҃-ѧ и҆ ѕ҃-ѧ. Прокі́менъ, гла́съ з҃: Чⷭ҇тна̀ пред̾ гдⷭ҇емъ: Сті́хъ: Что̀ возда́мъ гдⷭ҇еви: А҆по́столъ къ гала́тѡмъ, зача́ло сг҃і: Пло́дъ дх҃о́вный є҆́сть: А҆ллилꙋ́їа, гла́съ ѕ҃: Бл҃же́нъ мꙋ́жъ боѧ́йсѧ гдⷭ҇а: Сті́хъ: Си́льно на землѝ бꙋ́детъ сѣ́мѧ є҆гѡ̀. Є҆ѵⷢ҇лїе лꙋкѝ, зача́ло к҃д: Ста̀ і҆и҃съ на мѣ́стѣ ра́внѣ: Прича́стенъ: Въ па́мѧть вѣ́чнꙋю:
<<тм҃г ѡ҆б.: 686>>
Въ то́йже де́нь ѡ҆брѣ́тенїе честны́хъ моще́й прпⷣбнагѡ и҆ бг҃оно́снагѡ ѻ҆тца̀ на́шегѡ се́ргїа и҆гꙋ́мена, ра́донежскагѡ чꙋдотво́рца.
Соверша́етсѧ собо́ръ є҆гѡ̀ во ѻ҆би́тели є҆гѡ̀, и҆ и҆дѣ́же хра́мъ є҆гѡ̀.
Тропа́рь, гла́съ и҃:
Ѿ ю҆́ности воспрїѧ́лъ є҆сѝ хрⷭ҇та̀ въ дꙋшѝ твое́й прпⷣбне, и҆ па́че всегѡ̀ вожделѣ́лъ є҆сѝ мїрска́гѡ мѧте́жа ᲂу҆клони́тисѧ, мꙋ́жески въ пꙋсты́ню всели́лсѧ є҆сѝ, и҆ ча̑да послꙋша́нїѧ въ не́й, плоды̀ смире́нїѧ возрасти́лъ є҆сѝ. тѣ́мъ бы́въ трⷪ҇цѣ вселе́нїе, чꙋдесы̀ твои́ми всѣ́хъ просвѣти́лъ є҆сѝ приходѧ́щихъ къ тебѣ̀ вѣ́рою, и҆ и҆сцѣлє́нїѧ всѣ̑мъ подаѧ̀ ѻ҆би́льнѡ, ѻ҆́тче на́шъ се́ргїе, молѝ хрⷭ҇та̀ бг҃а, да сп҃се́тъ дꙋ́шы на́шѧ.
Конда́къ, гла́съ и҃. Подо́бенъ: Взбра́нной:
Дне́сь ꙗ҆́кѡ со́лнце пресвѣ́тло, возсїѧ́вше ѿ землѝ честны́ѧ мо́щи твоѧ̑ нетлѣ́нны ѡ҆брѣто́шасѧ. ꙗ҆́кѡ бл҃гоꙋха́нный цвѣ́тъ, мно́жествомъ чꙋде́съ сїѧ́юще, и҆ всѣ̑мъ вѣ̑рнымъ и҆сточа́юще разли̑чнаѧ и҆сцѣлє́нїѧ, и҆ веселѧ́ще и҆збра́нное твоѐ ста́до, є҆́же мꙋ́дре собра́въ, до́брѣ па́ствилъ є҆сѝ. ѡ҆ ни́хже и҆ ны́нѣ трⷪ҇цѣ предстои́ши молѧ́сѧ, и҆ і҆мпера́торꙋ побѣди́тєльнаѧ на врагѝ дарова́ти, да всѝ вопїе́мъ тѝ: ра́дꙋйсѧ се́ргїе бг҃омꙋ́дре.
ѕ҃. Прпⷣбнагѡ ѻ҆тца̀ на́шегѡ сїсѡ́а вели́кагѡ:
На Гдⷭ҇и воззва́хъ, стїхи̑ры, гла́съ д҃: Подо́бенъ: Да́лъ є҆сѝ зна́менїе: Сла́ва, гла́съ и҃: Мона́хѡвъ мно́жєства: Тропа́рь, гла́съ а҃: Пꙋсты́нный жи́тель: септе́мврїа въ к҃ѳ-й де́нь. На ᲂу҆́трени, ѻ҆бы̑чныѧ каѳі̑смы, и҆ сѣда́льны ѻ҆ктѡ́иха: и҆ чте́нїе. Ѻ҆́ба канѡ́на ѻ҆ктѡ́иха. и҆ ст҃а́гѡ на д҃, гла́съ и҃. По г҃-й пѣ́сни, сѣда́ленъ, гла́съ д҃. По ѕ҃-й пѣ́сни,
<<тм҃д: 687>>
Конда́къ, гла́съ д҃. Подо́бенъ: Ꙗ҆ви́лсѧ є҆сѝ:
Подвиза́всѧ, а҆́гг҃лъ на землѝ ви́дѣнъ бы́лъ є҆сѝ, ѡ҆зарѧ́ѧ прпⷣбне помышлє́нїѧ вѣ́рныхъ бг҃озна́меньми всегда̀: тѣ́мже тѧ̀ вѣ́рою сїсѡ́е почита́емъ.
з҃. Прпⷣбныхъ ѻ҆тє́цъ на́шихъ ѳѡмы̀, и҆́же въ мале́и: И҆ а҆ка́кїа, и҆́же въ лѣ́ствицѣ.
Стїхи̑ры ѳѡмы̀, гла́съ а҃, подо́бенъ: Нбⷭ҇ныхъ чинѡ́въ: И҆ а҆ка́кїа, гла́съ д҃, подо́бенъ: Ꙗ҆́кѡ до́блѧ: На стїхо́внѣ ѻ҆ктѡ́иха. Тропа́рь, гла́съ д҃: Бж҃е ѻ҆тє́цъ на́шихъ: ное́мврїа въ к҃-й де́нь. На ᲂу҆́трени, канѡ́нъ є҆ди́нъ ѻ҆ктѡ́иха: И҆ ст҃ы́хъ два̀ на и҃. Ѳѡмы̀, гла́съ в҃: А҆ка́кїа, гла́съ д҃. По г҃-й пѣ́сни,
Конда́къ а҆ка́кїа, гла́съ в҃. Подо́бенъ: Вы́шнихъ и҆щѧ̀:
Мі́ръ ѡ҆ста́вль, хрⷭ҇тꙋ̀ послѣ́довалъ є҆сѝ ѿ младе́нства, премꙋ́дре а҆ка́кїе прпⷣбне, тогѡ̀ подража́ѧ во́льное смире́нїе, низве́рглъ є҆сѝ го́рдостнаго мꙋчи́телѧ: молѝ непреста́ннѡ ѡ҆ всѣ́хъ на́съ.
Та́же сѣда́ленъ ѳѡмы̀, гла́съ д҃. Дрꙋгі́й а҆ка́кїа, гла́съ то́йже. По ѕ҃-й пѣ́сни.
Конда́къ ѳѡмы̀, гла́съ д҃. Подо́бенъ: Вознесы́йсѧ:
Ве́лїю побѣ́дꙋ мꙋ́жески показа́лъ є҆сѝ, ѿѻнꙋ́дꙋже бж҃е́ственною любо́вїю разгорѣ́всѧ, царѧ̀ тлѣ́ннаго и҆ всѧ̑ кра̑снаѧ преѡби́дѣлъ є҆сѝ: на горѣ̀ мале́йстѣй вселе́нїе соверши́въ, ѿ неѧ́же въ нбⷭ҇наѧ возше́лъ є҆сѝ къ цр҃ю̀ царе́й ѳѡмо̀, молѝ непреста́ннѡ ѡ҆ всѣ́хъ на́съ.
и҃. Ст҃а́гѡ великомч҃нка проко́пїа.
На Гдⷭ҇и воззва́хъ, стїхи̑ры на ѕ҃: гла́съ д҃, подо́бенъ: Ꙗ҆́кѡ до́блѧ: И҆́ны стїхи̑ры, гла́съ то́йже, подо́бенъ: Да́лъ є҆сѝ зна́менїе: Сла́ва, гла́съ ѕ҃: Просїѧ̀ дне́сь сла́внаѧ па́мѧть: На стїхо́внѣ ѻ҆ктѡ́иха. Сла́ва, гла́съ и҃: Та́йными сїѧ́нїи: Тропа́рь, гла́съ д҃: Мч҃нкъ тво́й гдⷭ҇и проко́пїй: <<тм҃д ѡ҆б.: 688>> септе́мврїа во в҃-й де́нь: На ᲂу҆́трени, ѻ҆бы̑чныѧ каѳі̑смы, и҆ сѣда́льны ѻ҆ктѡ́иха, и҆ чте́нїе. Ѻ҆́ба канѡ́на ѻ҆ктѡ́иха без̾ мч҃ничнѡвъ: и҆ ст҃а́гѡ, на ѕ҃, гла́съ д҃. По г҃-й пѣ́сни, сѣда́ленъ, гла́съ а҃. По ѕ҃-й пѣ́сни,
Конда́къ, гла́съ в҃. Подо́бенъ: Вы́шнихъ и҆щѧ̀:
Ре́вностїю ко хрⷭ҇тꙋ̀ бж҃е́ственною распала́емь, и҆ крⷭ҇та̀ крѣ́постїю ѡ҆гражда́емь, врагѡ́въ шата́нїе и҆ де́рзость низложи́лъ є҆сѝ проко́пїе, и҆ честнꙋ́ю цр҃ковь возвы́силъ є҆сѝ, вѣ́рою преꙋспѣва́ѧ, и҆ просвѣща́ѧ на́съ.
И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, ст҃а́гѡ. На хвали́техъ стїхи̑ры, на д҃, гла́съ в҃. Сла́ва, гла́съ д҃: Червлени́цею крове́й: На стїхо́внѣ ѻ҆ктѡ́иха. та́же глаго́лемъ припѣ́въ: Ди́венъ бг҃ъ во ст҃ы́хъ свои́хъ: и҆ пое́мъ стїхи́рꙋ самогла́снꙋ, гла́съ ѕ҃: Прїиди́те всѝ: Сла́ва, гла́съ и҃: Ꙗ҆́коже па́ѵелъ зва́нїе: На лїтꙋргі́и, бл҃жє́нна ѻ҆ктѡ́иха, и҆ ѿ канѡ́на ст҃а́гѡ, пѣ́снь г҃. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ: Сті́хъ: Въ цр҃квахъ бл҃гослови́те бг҃а: А҆по́столъ къ тїмоѳе́ю, зача́ло сч҃в: Возмога́й ѡ҆ бл҃года́ти: А҆ллилꙋ́їа, гла́съ д҃: Првⷣникъ ꙗ҆́кѡ фі́нїѯъ процвѣте́тъ: Є҆ѵⷢ҇лїе матѳе́а, зача́ло л҃ѳ: И҆́же лю́битъ ѻ҆тца̀, и҆лѝ ма́терь па́че менѐ: Прича́стный: Въ па́мѧть вѣ́чнꙋю:
Въ то́йже де́нь воспомина́нїе зна́менїѧ, ꙗ҆́вльшагѡсѧ ѿ і҆кѡ́ны прест҃ы́ѧ влⷣчцы на́шеѧ бцⷣы, чⷭ҇тна́гѡ и҆ сла́внагѡ є҆ѧ̀ бл҃говѣ́щенїѧ, во гра́дѣ вели́цѣмъ ᲂу҆́стюзѣ: И҆ ст҃а́гѡ проко́пїа, хрⷭ҇та̀ ра́ди ю҆ро́дивагѡ, ᲂу҆́стюжскагѡ чꙋдотво́рца.
Тропа́рь, гла́съ д҃:
Просвѣти́всѧ бж҃е́ственною бл҃года́тїю бг҃омꙋ́дре, и҆ ве́сь ра́зꙋмъ и҆ се́рдце, ѿ сꙋ́етнагѡ мі́ра сегѡ̀ къ зижди́телю неꙋкло́ннѡ возложи́въ, <<тм҃є: 689>> цѣломꙋ́дрїемъ и҆ мно́гимъ терпѣ́нїемъ, во вре́меннѣй жи́зни тече́нїе до́брѣ сконча́лъ є҆сѝ, и҆ вѣ́рꙋ соблю́лъ є҆сѝ непоро́чнꙋ. тѣ́мже и҆ по сме́рти ꙗ҆ви́сѧ свѣ́тлость житїѧ̀ твоегѡ̀: и҆сточа́еши бо чꙋде́съ и҆сто́чникъ неисчерпа́емый, вѣ́рою притека́ющымъ ко ст҃о́мꙋ твоемꙋ̀ гро́бꙋ, проко́пїе всебл҃же́нне, молѝ хрⷭ҇та̀ бг҃а, да сп҃се́тъ дꙋ́шы на́шѧ.
Конда́къ, гла́съ д҃:
Хрⷭ҇та̀ ра́ди ю҆ро́дствомъ воздꙋ̑шнаѧ мыта̑рства, на рꙋка́хъ а҆́гг҃льскихъ неприкоснове́ннѡ преше́дъ, црⷭ҇кагѡ дости́глъ є҆сѝ прⷭ҇то́ла, и҆ ѿ цр҃ѧ̀ всѣ́хъ хрⷭ҇та̀ бг҃а да́ръ прїе́мъ бл҃года́ть и҆сцѣле́нїй: мно́гими во чꙋдесы̀ твои́ми и҆ зна́менїемъ стра́шнымъ ᲂу҆диви́лъ є҆сѝ гра́дъ тво́й вели́кїй ᲂу҆́стюгъ. лю́демъ твои̑мъ млⷭ҇ть и҆спроси́въ, мѵ́ро ѿ чⷭ҇тна́гѡ ѡ҆́браза прест҃ы́ѧ бцⷣы мл҃твою и҆зве́лъ є҆сѝ, и҆ недꙋ̑жнымъ по́далъ є҆сѝ цѣльбы̑. тѣ́мже мо́лимъ тѧ̀ чꙋдоно́сче проко́пїе, молѝ хрⷭ҇та̀ бг҃а непреста́ннѡ, пода́ти грѣхѡ́въ на́шихъ проще́нїе.
Въ сі́й де́нь ꙗ҆вле́нїе ѡ҆́браза прест҃ы́ѧ бцⷣы во гра́дѣ каза́ни.
А҆́ще хо́щетъ настоѧ́тель, да пое́тъ слꙋ́жбꙋ є҆ѧ̀ съ мч҃нкомъ, ꙗ҆́коже зна́менїѧ бцⷣы съ мч҃нкомъ і҆а́кѡвомъ во все́мъ подо́бнѡ.
Тропа́рь, гла́съ д҃:
Застꙋ́пнице ᲂу҆се́рднаѧ, мт҃и гдⷭ҇а вы́шнѧгѡ, за всѣ́хъ мо́лиши сн҃а твоего̀ хрⷭ҇та̀ бг҃а на́шего, и҆ всѣ̑мъ твори́ши сп҃сти́сѧ, въ держа́вный тво́й покро́въ прибѣга́ющымъ. всѣ́хъ на́съ застꙋпѝ, ѽ гпⷭ҇жѐ цр҃и́це и҆ влⷣчце, и҆̀же въ напа́стехъ и҆ ско́рбехъ, и҆ въ болѣ́знехъ ѡ҆бремене́нныхъ грѣхѝ мно́гими, предстоѧ́щихъ и҆ молѧ́щихсѧ тебѣ̀ ᲂу҆миле́нною дꙋше́ю, и҆ сокрꙋше́ннымъ се́рдцемъ, пред̾ пречⷭ҇тымъ твои́мъ ѡ҆́бразомъ со слеза́ми, и҆ невозвра́тнѡ наде́ждꙋ и҆мꙋ́щихъ на тѧ̀, и҆збавле́нїѧ всѣ́хъ ѕѡ́лъ, всѣ̑мъ полє́знаѧ <<тм҃є ѡ҆б.: 690>> да́рꙋй, и҆ всѧ̑ сп҃сѝ бцⷣе дв҃о: ты́ бо є҆сѝ бж҃е́ственный покро́въ рабѡ́мъ твои̑мъ.
Конда́къ, гла́съ и҃. Подо́бенъ: Взбра́нной:
Притеце́мъ лю́дїе къ ти́хомꙋ семꙋ̀ и҆ до́бромꙋ приста́нищꙋ, ско́рой помо́щницѣ, гото́вомꙋ и҆ те́пломꙋ сп҃се́нїю, покро́вꙋ дв҃ы, ᲂу҆скори́мъ на мл҃твꙋ, и҆ потщи́мсѧ на покаѧ́нїе: и҆сточа́етъ бо на́мъ неѡскꙋ̑дныѧ млⷭ҇ти, пречⷭ҇таѧ бцⷣа, предварѧ́етъ на по́мощь, и҆ и҆збавлѧ́етъ ѿ вели́кихъ бѣ́дъ и҆ ѕѡ́лъ, бл҃гонра̑вныѧ и҆ бг҃обоѧ́щыѧсѧ рабы̑ своѧ̑.
ѳ҃. Ст҃а́гѡ сщ҃енномч҃нка пагкра́тїа, є҆пⷭ҇кпа таѵромені́йскагѡ.
Стїхи̑ры ѻ҆ктѡ́иха г҃: и҆ пагкра́тїа г҃: гла́съ в҃: Подо́бенъ: Є҆гда̀ ѿ дре́ва: На стїхо́внѣ ѻ҆ктѡ́иха. Тропа́рь, гла́съ д҃: И҆ нра́вѡмъ прича́стникъ: септе́мврїа въ г҃-й де́нь. На ᲂу҆́трени, ѻ҆́ба канѡ́на ѻ҆ктѡ́иха: и҆ пагкра́тїа на д҃, гла́съ а҃. По г҃-й пѣ́сни, сѣда́ленъ, гла́съ д҃. По ѕ҃-й пѣ́сни,
Конда́къ, гла́съ д҃. Подо́бенъ: Ꙗ҆ви́лсѧ є҆сѝ:
Свѣ́тлаѧ таѵромені́ѡмъ пагкра́тїе, ѕвѣзда̀ показа́лсѧ є҆сѝ, и҆ сщ҃еннострада́лецъ ꙗ҆ви́лсѧ є҆сѝ за хрⷭ҇та̀: є҆мꙋ́же ны́нѣ предстоѧ̀ молѝ за чтꙋ́щыѧ тѧ̀ бл҃же́нне.
і҃. Ст҃ы́хъ четы́редесѧти пѧтѝ мч҃нкѡвъ, и҆̀же въ нїкопо́ли а҆рме́нстѣй.
Стїхи̑ры ѻ҆ктѡ́иха г҃, и҆ мч҃нкѡвъ г҃, гла́съ а҃. Подо́бенъ: Всехва́льнїи мч҃нцы: На стїхо́внѣ ѻ҆ктѡ́иха. Тропа́рь, гла́съ д҃: Мч҃нцы твоѝ гдⷭ҇и: септе́мврїа въ к҃-й де́нь. Ѻ҆́ба канѡ́на ѻ҆ктѡ́иха, и҆ мч҃нченъ на д҃, гла́съ є҃. По г҃-й пѣ́сни сѣда́ленъ, гла́съ д҃. По ѕ҃-й пѣ́сни,
<<тм҃ѕ: 691>>
Конда́къ, гла́съ и҃. Подо́бенъ: Ꙗ҆́кѡ нача́тки:
Хрⷭ҇та̀ ра́ди мч҃нцы мнѡ́гїѧ мꙋ̑ки под̾ѧ́сте, и҆ многобо́жїѧ низложи́сте всѐ і҆́дѡльское: и҆ разрꙋши́сте безбо́жїе всѧ́кїѧ пре́лести, хрⷭ҇то́вою си́лою сїѧ̑ попра́вше, на́съ всѣ́хъ вѣ́рнѡ наꙋча́ете вопи́ти ꙗ҆́вѣ: а҆ллилꙋ́їа.
Въ сі́й де́нь пра́зднꙋемъ положе́нїе честны́ѧ ри́зы гдⷭ҇а на́шегѡ і҆и҃са хрⷭ҇та̀, и҆́же є҆́сть хїтѡ́нъ, въ ца́рствꙋющемъ гра́дѣ москвѣ̀.
Тропа́рь, гла́съ д҃:
Дне́сь притеце́мъ вѣ́рнїи, къ бж҃е́ственнѣй и҆ цѣльбоно́снѣй ри́зѣ сп҃си́телѧ на́шегѡ бг҃а, бл҃гоизво́лившагѡ сїю̀ пло́тїю носи́ти, и҆ на крⷭ҇тѣ̀ ст҃ꙋ́ю свою̀ кро́вь и҆злїѧ́ти, є҆́юже и҆скꙋпѝ на́съ ѿ рабо́ты вра́жїѧ. тѣ́мъ бл҃годарѧ́ще вопїе́мъ є҆мꙋ̀: сп҃сѝ правосла́внаго і҆мпера́тора на́шего, нїкола́ѧ а҆леѯа́ндровича, и҆ ст҃и́телей, и҆ гра́дъ, и҆ всѧ̑ лю́ди честно́ю твое́ю ри́зою защитѝ, и҆ сп҃сѝ дꙋ́шы на́шѧ ꙗ҆́кѡ чл҃вѣколю́бецъ.
Конда́къ, гла́съ д҃:
Ѡ҆дѣѧ́нїе нетлѣ́нїѧ, сп҃си́тельнагѡ цѣле́нїѧ, всѣ̑мъ человѣ́кѡмъ влⷣко дарова́лъ є҆сѝ твоѐ бж҃е́ственное сокро́вище, честнꙋ́ю ри́зꙋ, ꙗ҆́же є҆́сть хїтѡ́нъ, є҆́юже живоно́снꙋю и҆ ст҃ꙋ́ю пло́ть вочл҃вѣ́ченїѧ твоегѡ̀ ѡ҆дѣ́ѧти бл҃говоли́лъ є҆сѝ. сїю̀ жела́нїемъ прїе́млюще свѣ́тлѡ пра́зднꙋемъ, стра́хомъ же и҆ любо́вїю, ꙗ҆́кѡ бл҃года́телю воспѣва́юще зове́мъ тѝ хрⷭ҇тѐ: сохранѝ въ ми́рѣ бл҃говѣ́рнаго і҆мпера́тора на́шего, нїкола́ѧ а҆леѯа́ндровича, и҆ ст҃и́телей и҆ всѧ̑ лю́ди, по вели́цѣй твое́й млⷭ҇ти.
И҆ па́мѧть прпⷣбнагѡ ѻ҆тца̀ на́шегѡ а҆нтѡ́нїа пече́рскагѡ, и҆́же въ кі́евѣ бы́вшагѡ нача́льника всѣ́хъ рѡссі́йскихъ мона́хѡвъ.
Соверша́етсѧ собо́ръ є҆гѡ̀ во ѻ҆би́тели є҆гѡ̀, и҆ и҆дѣ́же хра́мъ є҆гѡ̀: въ про́чихъ же полѷеле́й.
<<тм҃ѕ ѡ҆б.: 692>>
Тропа́рь, гла́съ д҃:
Ѿ мїрска́гѡ мѧте́жа и҆зше́дъ, ѿверже́нїемъ же мі́ра є҆ѵⷢ҇льски хрⷭ҇тꙋ̀ послѣ́довалъ є҆сѝ и҆ равноа́гг҃льное житїѐ пожи́въ, въ ти́хое приста́нище ст҃ы́ѧ горы̀ а҆ѳѡ́на дости́глъ є҆сѝ. ѿѻнꙋ́дꙋже бл҃гослове́нїемъ ѻ҆тцє́въ въ го́рꙋ кі́ева прише́дъ, и҆ та́мѡ трꙋдолю́бнѡ жи́знь соверши́въ, ѻ҆те́чество твоѐ просвѣти́лъ є҆сѝ, и҆ мно́жествꙋ мона́шествꙋющихъ стезю̀ ведꙋ́щꙋю къ нбⷭ҇номꙋ црⷭ҇твїю показа́въ, хрⷭ҇тꙋ̀ сїѧ̑ приве́лъ є҆сѝ: є҆го́же молѝ а҆нтѡ́нїе прпⷣбне, да сп҃се́тъ дꙋ́шы на́шѧ.
Конда́къ, гла́съ д҃. Подо́бенъ: Взбра́нной:
Возложи́въ себѐ бг҃ꙋ, па́че всѣ́хъ возлю́бленномꙋ ѿ ю҆́ности прпⷣбне, томꙋ̀ ѿ всеѧ̀ дꙋшѝ любо́вїю послѣ́довалъ є҆сѝ: мі́ра же тлѣ̑ннаѧ нивочто́же вмѣни́въ, въ землѝ пеще́рꙋ содѣ́лалъ є҆сѝ, и҆ въ не́й до́брѣ проти́вꙋ неви́димагѡ врага̀ ко́зней подвиза́всѧ, ꙗ҆́кѡ свѣтоза́рное сл҃нце во всѧ̑ концы̀ землѝ возсїѧ́лъ є҆сѝ: ѿѻнꙋ́дꙋже веселѧ́сѧ преше́лъ є҆сѝ къ нбⷭ҇нымъ черто́гѡмъ. и҆ ны́нѣ со а҆́гг҃лы влⷣчню прⷭ҇то́лꙋ предстоѧ̀, помина́й на́съ чтꙋ́щихъ па́мѧть твою̀, да зове́мъ тѝ: ра́дꙋйсѧ а҆нтѡ́нїе, ѻ҆́тче на́шъ.
а҃і. Ст҃ы́ѧ мч҃нцы и҆ прехва́льныѧ є҆ѵѳи́мїи, си́рѣчь предѣ́ла ѻ҆тцє́въ: И҆ преставле́нїе бл҃же́нныѧ ѻ҆́льги, кнѧги́ни рѡссі́йскїѧ, во ст҃о́мъ кр҃ще́нїи нарече́нныѧ є҆ле́ны.
На Гдⷭ҇и воззва́хъ, стїхи̑ры є҆ѵѳѵ́мїи г҃, гла́съ и҃. Подо́бенъ: Ѽ пресла́внагѡ чꙋдесѐ! И҆ ѻ҆́льги г҃, гла́съ д҃. Подо́бенъ: Ꙗ҆́кѡ до́блѧ: Сла́ва, гла́съ ѕ҃: Ѡ҆деснꙋ́ю сп҃са предста̀: На стїхо́внѣ ѻ҆ктѡ́иха. Та́же припѣ́въ: Ди́венъ бг҃ъ во ст҃ы́хъ свои́хъ бг҃ъ і҆и҃левъ. и҆ пое́мъ стїхи́рꙋ, гла́съ и҃: Пѣ́ньми да почти́тсѧ мч҃нца: Сла́ва, гла́съ ѕ҃: <<тм҃з: 693>> Ѡ҆дѣ́ѧна добродѣ́тельми: Тропа́рь, гла́съ д҃: А҆́гница твоѧ̀ і҆и҃се, є҆ѵѳѵ́мїа: септе́мврїа въ ѕ҃і-й де́нь.
И҆лѝ се́й, гла́съ д҃:
Жениха̀ твоего̀ хрⷭ҇та̀ возлюби́вши, и҆ свѣщꙋ̀ твою̀ свѣ́тлꙋ ᲂу҆гото́вльши, добродѣ́тельми возсїѧ́вши, всехва́льнаѧ є҆ѵѳи́мїе: тѣ́мъ возшла̀ є҆сѝ съ ни́мъ на бра́къ, вѣне́цъ страда́нїѧ ѿ негѡ̀ прїе́мши: но ѿ бѣ́дъ и҆зба́ви на́съ, чтꙋ́щихъ вѣ́рою па́мѧть твою̀.
Сла́ва, тропа́рь ѻ҆́льги, гла́съ а҃:
Крила́ми бг҃оразꙋ́мїѧ впери́вши тво́й ᲂу҆́мъ, возлетѣ́ла є҆сѝ превы́ше ви́димыѧ тва́ри: взыска́вши бг҃а и҆ творца̀ всѧ́ческихъ, и҆ того̀ ѡ҆брѣ́тши, па́ки рожде́нїе кр҃ще́нїемъ прїѧ́ла є҆сѝ: дре́ва живо́тнагѡ наслажда́ющисѧ, нетлѣ́нна во вѣ́ки пребыва́еши, ѻ҆́льго присносла́внаѧ.
На ᲂу҆́трени, ѻ҆бы̑чныѧ каѳі̑смы, и҆ сѣда́льны ѻ҆ктѡ́иха. Канѡ́нъ ѻ҆ктѡ́иха є҆ди́нъ: и҆ є҆ѵѳѵ́мїи на д҃, гла́съ и҃: и҆ ѻ҆́льги на д҃, гла́съ є҃. По г҃-й пѣ́сни,
Конда́къ ѻ҆́льги, гла́съ д҃. Подо́бенъ: Ꙗ҆ви́лсѧ є҆сѝ:
Воспое́мъ дне́сь бл҃годѣ́телѧ всѣ́хъ бг҃а, просла́вльшаго въ рѡссі́и ѻ҆́льгꙋ бг҃омꙋ́дрꙋю: да мл҃твами є҆ѧ̀ пода́стъ дꙋша́мъ на́шымъ грѣхѡ́въ ѡ҆ставле́нїе.
Та́же сѣда́ленъ є҆ѵѳи́мїи, гла́съ и҃, два́жды. Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. По ѕ҃-й пѣ́сни,
Конда́къ, гла́съ ѕ҃. Подо́бенъ: Є҆́же ѡ҆ на́съ:
По́двиги во страда́льчествѣ, по́двиги въ вѣ́рѣ положи́ла є҆сѝ те́плѣ за хрⷭ҇та̀ жениха̀ твоего̀: но и҆ ны́нѣ ꙗ҆́коже є҆́рєси, и҆ врагѡ́въ шата́нїе под̾ но́ги правосла́вныхъ царе́й покори́ти молѝ бцⷣею, ꙗ҆́же ѿ шестисѡ́тъ три́десѧти бг҃оно́сныхъ ѻ҆тє́цъ предѣ́лъ прїе́мшаѧ, и҆ хранѧ́щаѧ всехва́льнаѧ.
И҆ і҆́косъ. По ѳ҃-й пѣ́сни свѣти́ленъ ѻ҆ктѡ́иха. Сла́ва, ст҃ы́ѧ: И҆ ны́нѣ, бг҃оро́диченъ. На хвали́техъ стїхи̑ры <<тм҃з ѡ҆б.: 694>> є҆ѵѳи́мїи на д҃, гла́съ г҃, самогла́сны, повторѧ́юще пе́рвꙋю. Сла́ва, гла́съ и҃: Всѧ́къ ѧ҆зы́къ да подви́жетсѧ: На стїхо́внѣ ѻ҆ктѡ́иха. Та́же глаго́лемъ припѣ́въ: Въ цр҃квахъ бл҃гослови́те бг҃а: и҆ пое́мъ стїхи́рꙋ, гла́съ и҃: Ра́дꙋйсѧ предѣ́ле вѣ́ры: Сла́ва, гла́съ а҃: Дне́сь ли́цы ѻ҆те́честїи: На лїтꙋргі́и, бл҃жє́нна ѻ҆ктѡ́иха, на д҃: и҆ є҆ѵѳи́мїи пѣ́снь г҃-ѧ, на д҃. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ: Сті́хъ: Въ цр҃квахъ бл҃гослови́те бг҃а: А҆по́столъ къ корі́нѳѧнѡмъ, зача́ло рп҃а: Поспѣ́шствꙋюще мо́лимъ: А҆ллилꙋ́їа, гла́съ а҃: Терпѧ̀ потерпѣ́хъ гдⷭ҇а, и҆ внѧ́тъ мѝ. Є҆ѵⷢ҇лїе лꙋкѝ, зача́ло л҃г: Молѧ́ше і҆и҃са нѣ́кїй ѿ фарїсє́й: Прича́стенъ: Въ па́мѧть вѣ́чнꙋю:
в҃і. Ст҃ы́хъ мч҃нкъ, про́кла и҆ і҆ла́рїа: И҆ прпⷣбнагѡ ѻ҆тца̀ на́шегѡ мїхаи́ла малеина̀.
Стїхи̑ры мч҃нкѡвъ трѝ, гла́съ а҃. Подо́бенъ: Нбⷭ҇ныхъ чинѡ́въ, и҆ прпⷣбнагѡ, гла́съ є҃. Подо́бенъ: Прпⷣбне ѻ҆́тче: Сла́ва, гла́съ ѕ҃: Прпⷣбне ѻ҆́тче мїхаи́ле: На стїхо́внѣ ѻ҆ктѡ́иха. Сла́ва, гла́съ и҃: Мона́хѡвъ мно́жєства: Тропа́рь, гла́съ и҃: Въ тебѣ̀ ѻ҆́тче: ѻ҆ктѡ́врїа въ а҃-й де́нь. На ᲂу҆́трени, є҆ди́нъ канѡ́нъ ѻ҆ктѡ́иха: и҆ ст҃ы́хъ два̀, на и҃. По г҃-й пѣ́сни,
Конда́къ мч҃нкѡвъ, гла́съ д҃. Подо́бенъ: Вознесы́йсѧ:
Ꙗ҆́кѡ денни́ца ѕвѣзда̀ возсїѧ̀ мч҃нкѡвъ про́кла и҆ і҆ла́рїа честно́е страда́нїе, пред̾ѡзарѧ́ющи на́съ чꙋде́съ свѣтлостьмѝ: тѣ́мже пра́зднꙋемъ па́мѧть ва́шꙋ, хрⷭ҇та̀ бг҃а моли́те, да сп҃се́тъ дꙋ́шы на́шѧ.
И҆ сѣда́ленъ, гла́съ а҃. Сла́ва, прпⷣбнагѡ, гла́съ и҃. По ѕ҃-й пѣ́сни,
<<тм҃и: 695>>
Конда́къ прпⷣбнагѡ, гла́съ в҃. Подо́бенъ: Твє́рдыѧ:
Плотскꙋ́ю тѧготꙋ̀ ᲂу҆тончи́лъ є҆сѝ дѣ́лы, дꙋше́внꙋю же бы́стрость впери́лъ є҆сѝ просвѣще́нїемъ мїхаи́ле, и҆ ꙗ҆ви́лсѧ є҆сѝ трⷪ҇цѣ жили́ще, ю҆́же зрѧ̀ бл҃же́нне ꙗ҆́снѡ, молѝ непреста́ннѡ ѡ҆ всѣ́хъ на́съ.
И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, прпⷣбнагѡ.
г҃і. Собо́ръ ст҃а́гѡ а҆рха́гг҃ла гаврїи́ла: И҆ прпⷣбнагѡ ѻ҆тца̀ на́шегѡ стефа́на савваі́та.
На Гдⷭ҇и воззва́хъ, стїхи̑ры а҆рха́гг҃ла г҃, гла́съ д҃. Подо́бенъ: Да́лъ є҆сѝ зна́менїе: и҆ прпⷣбнагѡ г҃, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, а҆рха́гг҃ла, гла́съ ѕ҃: Сра́дꙋйтесѧ съ на́ми: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На стїхо́внѣ ѻ҆ктѡ́иха. Сла́ва, и҆ ны́нѣ, гла́съ и҃: Ꙗ҆́кѡ чинонача́льникъ: Тропа́рь, гла́съ д҃: Нбⷭ҇ныхъ во́инствъ а҆рхїстрати́же: септе́мврїа въ ѕ҃-й де́нь. На ᲂу҆́трени, на Бг҃ъ гдⷭ҇ь, тропа́рь а҆рха́гг҃ла, два́жды. Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. и҆ ѻ҆бы̑чныѧ каѳі̑смы. и҆ сѣда́льны ѻ҆ктѡ́иха. Канѡ́нъ ѻ҆ктѡ́иха со і҆рмосо́мъ на д҃: и҆ а҆рха́гг҃ла на ѕ҃, гла́съ д҃: и҆ прпⷣбнагѡ на д҃, гла́съ в҃. По г҃-й пѣ́сни,
Конда́къ, гла́съ в҃:
На нб҃сѣ́хъ зрѧ̀ бж҃їю сла́вꙋ, и҆ на землѝ съ высоты̀ подаѧ̀ бл҃года́ть, нача́льниче а҆́гг҃лѡвъ, мꙋ́дре гаврїи́ле, бж҃їѧ сла́вы слꙋжи́телю, и҆ мі́ра бж҃е́ственный побо́рниче, сп҃са́й, соблюда́й вопїю́щыѧ тѝ: са́мъ бꙋ́ди помо́щникъ, и҆ никто́же на ны̀.
Та́же сѣда́ленъ а҆рха́гг҃ла, гла́съ д҃. Сла́ва, прпⷣбнагѡ, гла́съ г҃. По ѕ҃-й пѣ́сни,
<<тм҃и ѡ҆б.: 696>>
Конда́къ, гла́съ в҃. Подо́бенъ: Твє́рдыѧ:
А҆рхїстрати́же бж҃їй, слꙋжи́телю бж҃е́ственныѧ сла́вы, а҆́гг҃лѡвъ нача́льниче, и҆ человѣ́кѡвъ наста́вниче, поле́зное на́мъ просѝ, и҆ ве́лїю млⷭ҇ть, ꙗ҆́кѡ безпло́тныхъ а҆рхїстрати́гъ.
И҆ і҆́косъ. По ѳ҃-й пѣ́сни свѣти́ленъ ѻ҆ктѡ́иха. Сла́ва, а҆рха́гг҃ла. На стїхо́внѣ ѻ҆ктѡ́иха: Сла́ва, гла́съ є҃: И҆дѣ́же ѡ҆сѣнѧ́етъ: На лїтꙋргі́и, бл҃жє́нна ѻ҆ктѡ́иха: и҆ а҆рха́гг҃ла, пѣ́снь г҃, на д҃. Прокі́менъ, гла́съ д҃: Творѧ́й а҆́гг҃лы своѧ̑ дꙋ́хи: Сті́хъ: Бл҃гословѝ дꙋшѐ моѧ̀ гдⷭ҇а: А҆по́столъ къ є҆вре́ємъ, зача́ло т҃є: А҆́ще глаго́ланное а҆́гг҃лы сло́во: А҆ллилꙋ́їа, гла́съ є҃: Хвали́те гдⷭ҇а всѝ а҆́гг҃ли є҆гѡ̀: Сті́хъ: Ꙗ҆́кѡ то́й речѐ, и҆ бы́ша: Є҆ѵⷢ҇лїе лꙋкѝ, зача́ло н҃а: Слꙋ́шаѧй ва́съ, менѐ слꙋ́шаетъ: Прича́стенъ: Творѧ́й а҆́гг҃лы своѧ̑ дꙋ́хи:
д҃і. Ст҃а́гѡ а҆пⷭ҇ла а҆кѵ́лы.
Сегѡ́ же днѐ пое́тсѧ слꙋ́жба ки́рѷка и҆ і҆ꙋлі́тты, вкꙋ́пѣ со а҆пⷭ҇ломъ.
На Гдⷭ҇и воззва́хъ, стїхи̑ры а҆пⷭ҇ла г҃, гла́съ а҃, подо́бенъ: Нбⷭ҇ныхъ чинѡ́въ: и҆ мч҃нкѡвъ г҃, гла́съ д҃, подо́бенъ: Ꙗ҆́кѡ до́блѧ: Сла́ва, гла́съ ѕ҃: Прїиди́те и҆ ᲂу҆́зрите: На стїхо́внѣ ѻ҆ктѡ́иха: Сла́ва, гла́съ и҃: Трилѣ́тенъ трⷪ҇цꙋ: Тропа́рь, гла́съ г҃: А҆пⷭ҇ле ст҃ы́й а҆кѵ́ло, молѝ: ѻ҆ктѡ́врїа въ а҃-й де́нь. Сла́ва: Мч҃нцы твоѝ гдⷭ҇и: септе́мврїа въ к҃-й де́нь. На ᲂу҆́трени, канѡ́нъ ѻ҆ктѡ́иха є҆ди́нъ: и҆ а҆пⷭ҇ла на д҃, гла́съ в҃: и҆ мч҃нкѡвъ на д҃, гла́съ и҃. По г҃-й пѣ́сни,
Конда́къ, а҆пⷭ҇ла, гла́съ д҃:
Ꙗ҆́кѡ ве́лїе со́лнце, цр҃ковь тѧ̀ стѧжа́вши сла́вне а҆кѵ́ло свѣтлостьмѝ ᲂу҆че́нїѧ твоегѡ̀, просвѣща́етъ вѣ́рнѡ чтꙋ́щыѧ тѧ́ гдⷭ҇ень а҆пⷭ҇ле.
<<тм҃ѳ: 697>>
И҆ сѣда́ленъ, гла́съ д҃. Сла́ва, мч҃нкѡвъ, гла́съ то́йже. По ѕ҃-й пѣ́сни,
Конда́къ мч҃нкѡвъ, гла́съ д҃. Подо́бенъ: Ꙗ҆ви́лсѧ є҆сѝ:
Во ѡ҆б̾ѧ́тїихъ носѧ́щи хрⷭ҇томч҃нца і҆ꙋлі́тта ки́рѷка, на по́двизѣ мꙋ́жески веселѧ́щисѧ взыва́ше: хрⷭ҇то́съ є҆́сть мч҃нкѡвъ похвала̀.
И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, мч҃нкѡвъ. На хвали́техъ стїхи̑ры, на д҃, гла́съ а҃, самогла́сны. Сла́ва, гла́съ в҃: Прїиди́те вѣ́рнїи: На стїхо́внѣ ѻ҆ктѡ́иха. Сла́ва, гла́съ д҃: Ра́дꙋйсѧ и҆ красꙋ́йсѧ: На лїтꙋргі́и, бл҃жє́нна ѻ҆ктѡ́иха: и҆ мч҃нкѡвъ пѣ́снь г҃, на д҃. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ: А҆по́столъ къ корі́нѳѧнѡмъ, зача́ло рн҃д ѿ полꙋ̀. А҆ллилꙋ́їа: И҆з̾ ᲂу҆́стъ младе́нєцъ: Є҆ѵⷢ҇лїе лꙋкѝ, зача́ло н҃а, ѿ полꙋ̀. Прича́стенъ: Ра́дꙋйтесѧ:
є҃і. Ст҃ы́хъ мч҃нкъ, ки́рѷка и҆ і҆ꙋлі́тты.
Слꙋ́жба и҆́хъ предписа́сѧ вчера́шнѧгѡ днѐ.
Въ то́йже де́нь ст҃а́гѡ и҆ равноапⷭ҇ла вели́кагѡ кн҃зѧ влади́мїра, нарече́ннагѡ во ст҃о́мъ кр҃ще́нїи васі́лїа.
Ве́черъ пое́мъ, Блаже́нъ мꙋ́жъ, а҆нтїфѡ́нъ а҃-й. На Гдⷭ҇и воззва́хъ стїхи̑ры на ѕ҃: гла́съ д҃, подо́бенъ: Ꙗ҆́кѡ до́блѧ: Сла́ва, гла́съ и҃: Прїиди́те стеце́мсѧ всѝ: И҆ ны́нѣ, бг҃оро́диченъ: Цр҃ь нбⷭ҇ный: Вхо́дъ, прокі́менъ днѐ, и҆ чтє́нїѧ г҃, пи́саны ма́їа въ к҃а. На лїті́и стїхи́ра хра́ма, та́же ст҃а́гѡ, гла́съ в҃. Сла́ва, гла́съ ѕ҃: Прїиди́те стеце́мсѧ всѝ вѣ́рнѡ: И҆ ны́нѣ: Творе́цъ и҆ и҆зба́витель: На стїхо́внѣ стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ! Припѣ́въ а҃-й: Вознесо́хъ и҆збра́ннаго: в҃-й: Є҆ле́емъ ст҃ы́мъ <<тм҃ѳ ѡ҆б.: 698>> мои́мъ: Сла́ва, гла́съ и҃: Нача́льника бл҃гоче́стїѧ: И҆ ны́нѣ, бг҃оро́диченъ.
Тропа́рь, гла́съ д҃:
Оу҆подо́билсѧ є҆сѝ кꙋпцꙋ̀ и҆́щꙋщемꙋ до́брагѡ би́сера, славнодержа́вный влади́мїре, на высотѣ̀ стола̀ сѣдѧ̀ ма́тере градѡ́въ, бг҃оспаса́емагѡ кі́ева: и҆спытꙋ́ѧ же и҆ посыла́ѧ къ ца́рскомꙋ гра́дꙋ, ᲂу҆вѣ́дѣти правосла́внꙋю вѣ́рꙋ, ѡ҆брѣ́лъ є҆сѝ безцѣ́нный би́серъ хрⷭ҇та̀, и҆збра́вшаго тѧ̀ ꙗ҆́кѡ втора́го па́ѵла, и҆ ѿтрѧ́сшаго слѣпотꙋ̀ во ст҃ѣ́й кꙋпѣ́ли дꙋше́внꙋю вкꙋ́пѣ и҆ тѣле́снꙋю. тѣ́мже пра́зднꙋемъ твоѐ ᲂу҆спе́нїе лю́дїе твоѝ сꙋ́ще: молѝ сп҃сти́сѧ держа́вы твоеѧ̀ рѡссі́йскїѧ нача́льникѡмъ, хрⷭ҇толюби́вомꙋ і҆мпера́торꙋ, и҆ мно́жествꙋ владо́мыхъ.
Сла́ва, и҆ ны́нѣ: Є҆́же ѿ вѣ́ка ᲂу҆тае́ное: На ᲂу҆́трени, ѻ҆бы̑чныѧ каѳі̑смы и҆ сѣда́льны ст҃а́гѡ. По полѷеле́и сѣда́ленъ, гла́съ д҃. Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Вознесо́хъ и҆збра́ннаго ѿ люде́й мои́хъ. Сті́хъ: И҆́бо рꙋка̀ моѧ̀ застꙋ́питъ є҆го̀: Всѧ́кое дыха́нїе: Є҆ѵⷢ҇лїе і҆ѡа́нна, зача́ло л҃ѕ: По н҃-мъ ѱалмѣ̀ стїхи́ра, гла́съ и҃: А҆пⷭ҇лѡмъ ревни́телѧ: Канѡ́нъ бцⷣы, на ѕ҃: и҆ ст҃а́гѡ канѡ́на два̀, на и҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни сѣда́ленъ, гла́съ в҃, два́жды. Сла́ва, и҆ ны́нѣ, бг҃оро́диченъ. По ѕ҃-й пѣ́сни,
Конда́къ, гла́съ и҃:
Подо́бствовавъ вели́комꙋ а҆пⷭ҇лꙋ па́ѵлꙋ, въ сѣди́нахъ всесла́вне влади́мїре, всѧ̑ ꙗ҆́кѡ младе́нчєскаѧ мꙋдрова̑нїѧ, ꙗ҆̀же ѡ҆ і҆́дѡлѣхъ тща́нїѧ ѡ҆ста́вль, ꙗ҆́кѡ мꙋ́жъ соверше́нный ᲂу҆краси́лсѧ є҆сѝ бж҃е́ственнагѡ креще́нїѧ багрѧни́цею. и҆ ны́нѣ сп҃сꙋ хрⷭ҇тꙋ̀ въ весе́лїи предстоѧ̀, молѝ сп҃сти́сѧ держа́вы рѡссі́йскїѧ нача́льникѡмъ, и҆ мно́жествꙋ владо́мыхъ.
<<т҃н: 699>>
И҆ і҆́косъ, и҆ про́логъ. По ѳ҃-й пѣ́сни, свѣти́ленъ, два́жды. Сла́ва, и҆ ны́нѣ, бг҃оро́диченъ. На хвали́техъ стїхи̑ры на д҃, гла́съ д҃. Подо́бенъ: Да́лъ є҆сѝ зна́менїе: Сла́ва, гла́съ в҃: Не ѿ человѣ̑къ зва́нїе прїѧ́лъ є҆сѝ: И҆ ны́нѣ, бг҃оро́диченъ. Славосло́вїе вели́кое, и҆ ѿпꙋ́стъ. На лїтꙋргі́и, бл҃жє́нна ѻ҆бои́хъ канѡ́нѡвъ, пѣ́снь г҃, и҆ ѕ҃-ѧ. Прокі́менъ, гла́съ г҃: По́йте бг҃ꙋ на́шемꙋ, по́йте: Сті́хъ: Всѝ ꙗ҆зы́цы: А҆по́столъ къ гала́тѡмъ, зача́ло с҃. А҆ллилꙋ́їа, гла́съ ѕ҃: Вознесо́хъ и҆збра́ннаго: Сті́хъ: И҆́бо рꙋка̀ моѧ̀: Є҆ѵⷢ҇лїе і҆ѡа́нна, зача́ло л҃є, ѿ полꙋ̀. Прича́стенъ: Въ па́мѧть вѣ́чнꙋю:
ѕ҃і. Ст҃а́гѡ сщ҃енномч҃нка а҆ѳиноге́на, и҆ десѧтѝ ᲂу҆чєни́къ є҆гѡ̀.
На Гдⷭ҇и воззва́хъ, стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ! На ᲂу҆́трени, канѡ́нъ, гла́съ и҃, на д҃. По г҃-й пѣ́сни, сѣда́ленъ, гла́съ д҃. По ѕ҃-й пѣ́сни,
Конда́къ, гла́съ то́йже. Подо́бенъ: Вознесы́йсѧ:
Влⷣчню рече́нїю послѣ́довавъ, ꙗ҆́кѡ па́стырь и҆зрѧ́дный дꙋ́шꙋ твою̀ положи́лъ є҆сѝ за хрⷭ҇тѡ́вы ѻ҆́вцы, сщ҃енномч҃нче а҆ѳиноге́не. сегѡ̀ ра́ди восхвалѧ́емъ тѧ̀, и҆ съ тобо́ю десѧти́цꙋ ᲂу҆чени̑къ твои́хъ, и҆̀же пострада́ша, стра́хомъ бж҃їимъ и҆ твои́мъ ᲂу҆че́нїемъ наставлѧ́еми. тѣ́мъ ᲂу҆годи́вшихъ влⷣка вѣнча̀ ва́съ живонача́льною десни́цею: є҆го́же ѡ҆ всѣ́хъ на́съ моли́те.
Вѣ́стно бꙋ́ди, ꙗ҆́кѡ въ се́й ѕ҃і-й де́нь па́мѧть соверша́емъ ст҃ы́хъ вселе́нскихъ шестѝ собо́рѡвъ: прилꙋчи́вшагѡсѧ же ст҃а́гѡ па́мѧть пое́мъ на повече́рїи. А҆́ще слꙋчи́тсѧ недѣ́лѧ, слꙋ́жба пое́тсѧ ст҃ы́хъ ѻ҆тє́цъ въ сїю̀ недѣ́лю. А҆́ще же въ сре́дꙋ, пое́тсѧ слꙋ́жба и҆́хъ въ мимоше́дшꙋю недѣ́лю. А҆́ще въ четверто́къ, пое́тсѧ слꙋ́жба и҆́хъ въ прїидꙋ́щꙋю недѣ́лю.
<<т҃н ѡ҆б.: 700>>
Въ сꙋббѡ́тꙋ на ма́лѣй вече́рни, стїхи̑ры воскрⷭ҇ны и҆ бцⷣы, по ѻ҆бы́чаю. На вели́цѣй вече́рни, по ѻ҆бы́чномъ ѱалмѣ̀ пое́мъ: Бл҃же́нъ мꙋ́жъ, каѳі́смꙋ всю̀. На Гдⷭ҇и воззва́хъ, стїхи̑ры на і҃. воскрⷭ҇ны гла́са, г҃, и҆ а҆нато́лїевъ, а҃: и҆ ѻ҆тцє́въ, ѕ҃, гла́съ ѕ҃. Подо́бенъ: Ѿча́ѧннаѧ: Сла́ва, гла́съ то́йже, самогла́сенъ: Та̑йныѧ дне́сь дх҃а трꙋбы̑: И҆ ны́нѣ, бг҃оро́диченъ а҃-й, гла́са. Вхо́дъ, прокі́менъ днѐ, и҆ чтє́нїѧ трѝ: а҃-е, Бытїѧ̀, глава̀ д҃і: Слы́шавъ а҆вра́мъ: в҃-е, Втора́гѡ зако́на, глава̀ а҃: Речѐ мѡѷсе́й къ сынѡ́мъ і҆и҃лєвымъ: ви́дите, преда́хъ пред̾ лице́мъ ва́шимъ: г҃-е, Втора́гѡ зако́на, глава̀ і҃: Речѐ мѡѷсе́й къ сынѡ́мъ і҆и҃лєвымъ: сѐ гдⷭ҇а бг҃а твоегѡ̀ нб҃о: На лїті́и стїхи́ра хра́ма. Сла́ва, ѻ҆тцє́въ, гла́съ г҃: А҆пⷭ҇тольскихъ преда́нїй, И҆ ны́нѣ: Без̾ сѣ́мене ѿ бж҃е́ственнагѡ дх҃а: На стїхо́внѣ ѻ҆ктѡ́иха, по а҆лфави́тꙋ. Сла́ва, ѻ҆тцє́въ, гла́съ д҃: Моле́бнꙋю па́мѧть: И҆ ны́нѣ, бг҃оро́диченъ: При́зри на молє́нїѧ: На бл҃гослове́нїи хлѣ́бѡвъ, Бцⷣе дв҃о, два́жды:
И҆ ѻ҆тцє́въ тропа́рь, гла́съ и҃:
Препросла́вленъ є҆сѝ хрⷭ҇тѐ бж҃е на́шъ, свѣти̑ла на землѝ ѻ҆тцы̀ на́ши ѡ҆снова́вый, и҆ тѣ́ми ко и҆́стиннѣй вѣ́рѣ всѧ̀ ны̀ наста́вивый: многобл҃гоꙋтро́бне, сла́ва тебѣ̀.
И҆ Бꙋ́ди и҆́мѧ гдⷭ҇не, три́жды: и҆ чте́нїе въ посла́нїихъ а҆пⷭ҇льскихъ. На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ два́жды: Сла́ва, ѻ҆тцє́въ: И҆ ны́нѣ, И҆́же на́съ ра́ди рожде́йсѧ: По ѻ҆бы́чныхъ каѳі́смахъ сѣда́льны ѻ҆ктѡ́иха воскрⷭ҇ны, и҆ бг҃оро́дичны и҆́хъ: и҆ чте́нїе во є҆ѵⷢ҇лїи толково́мъ: По непоро́чныхъ, ѵ҆пакоѝ гла́са. Степє́нна гла́са. Є҆ѵⷢ҇лїе воскрⷭ҇но. Воскрⷭ҇нїе хрⷭ҇то́во: По н҃-мъ ѱалмѣ̀ стїхи́ра воскрⷭ҇на. Канѡ́нъ воскрⷭ҇нъ, со і҆рмосо́мъ на д҃, и҆ бцⷣы на два̀, и҆ ѻ҆тцє́въ на и҃. Катава́сїа: Ѿве́рзꙋ ᲂу҆ста̀ <<тн҃а: 701>> моѧ̑: По г҃-й пѣ́сни, конда́къ и҆ і҆́косъ воскрⷭ҇нъ: И҆ сѣда́ленъ ѻ҆тцє́въ, гла́съ д҃, два́жды, Сла́ва, и҆ ны́нѣ, бг҃оро́диченъ. По ѕ҃-й пѣ́сни,
Конда́къ, гла́съ и҃. Подо́бенъ: Ꙗ҆́кѡ нача́тки:
А҆пⷭ҇лъ проповѣ́данїе, и҆ ѻ҆тє́цъ догма́ты, це́ркве є҆ди́нꙋ вѣ́рꙋ запечатлѣ́ша: ꙗ҆́же и҆ ри́зꙋ носѧ́щи и҆́стины и҆стка́нꙋ ѿ є҆́же свы́ше бг҃осло́вїѧ, и҆справлѧ́етъ и҆ сла́витъ бл҃гоче́стїѧ вели́кое та́инство.
И҆ і҆́косъ: и҆ про́логъ. По ѳ҃-й пѣ́сни, свѣти́ленъ воскрⷭ҇нъ. Сла́ва, ѻ҆тцє́въ. И҆ ны́нѣ, бг҃оро́диченъ. На хвали́техъ стїхи̑ры воскрⷭ҇ны, д҃: и҆ ѻ҆тцє́въ, д҃: съ припѣ́вы и҆́хъ, гла́съ ѕ҃. Подо́бенъ: Всю̀ ѿложи́вше: Всѐ собра́вше: Сла́ва, гла́съ и҃: Ст҃ы́хъ ѻ҆тцє́въ ли́къ: И҆ ны́нѣ: Пребл҃гослове́нна є҆сѝ бцⷣе: Славосло́вїе вели́кое. По трист҃о́мъ тропа́рь воскрⷭ҇нъ то́чїю. є҆ктєнїѝ, и҆ ѿпꙋ́стъ: и҆ ѡ҆глаше́нїе стꙋді́тово, и҆ и҆схожде́нїе въ притво́ръ. Сла́ва, и҆ ны́нѣ, стїхи́ра є҆ѵⷢ҇льскаѧ, и҆ ча́съ а҃, и҆ коне́чный ѿпꙋ́стъ. На часѣ́хъ, тропа́рь воскрⷭ҇нъ. Сла́ва, ѻ҆тцє́въ. И҆ ны́нѣ, бг҃оро́диченъ часѡ́въ. По трист҃о́мъ, конда́къ воскрⷭ҇нъ. На лїтꙋргі́и, бл҃жє́нна ѻ҆ктѡ́иха на ѕ҃: и҆ ѻ҆тцє́въ, пѣ́снь г҃, на д҃. По вхо́дѣ тропа́рь воскрⷭ҇нъ, и҆ ѻ҆тцє́въ, конда́къ воскрⷭ҇нъ. Сла́ва, ѻ҆тцє́въ. И҆ ны́нѣ, хра́ма бцⷣы, и҆лѝ Предста́тельство хрїстїа́нъ: Прокі́менъ гла́са, и҆ ѻ҆тцє́въ пѣ́снь: гла́съ д҃: Бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ: А҆по́столъ днѐ и҆ ѻ҆тцє́въ, ко є҆вре́ємъ, зача́ло тл҃д: Помина́йте наста́вники ва́шѧ: А҆ллилꙋ́їа, гла́са, и҆ ѻ҆тцє́въ, гла́съ а҃: Бг҃ъ богѡ́въ гдⷭ҇ь глаго́ла: Сті́хъ: Собери́те є҆мꙋ̀ преподѡ́бныѧ є҆гѡ̀: Є҆ѵⷢ҇лїе днѐ, и҆ ѻ҆тцє́въ: І҆ѡа́нна, зача́ло н҃ѕ: Возве́дъ і҆и҃съ ѻ҆́чи своѝ на нб҃о, и҆ речѐ: ѻ҆́ч҃е, прїи́де ча́съ: Прича́стенъ: Хвали́те гдⷭ҇а съ нб҃съ: и҆ ѻ҆тцє́въ: Ра́дꙋйтесѧ:
<<тн҃а ѡ҆б.: 702>>
з҃і. Ст҃ы́ѧ великомч҃нцы марі́ны.
На Гдⷭ҇и воззва́хъ, стїхи̑ры ст҃ы́ѧ на ѕ҃, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, гла́съ в҃: Во гра́дѣ бг҃а на́шегѡ: На стїхо́внѣ ѻ҆ктѡ́иха. Сла́ва, гла́съ в҃: Во гла́сѣ ра́дованїѧ: Тропа́рь, гла́съ д҃: А҆́гница твоѧ̀ і҆и҃се: септе́мврїа въ ѕ҃і-й де́нь. На ᲂу҆́трени, ѻ҆́ба канѡ́на ѻ҆ктѡ́иха, без̾ мч҃нчнѡвъ: и҆ ст҃ы́ѧ на ѕ҃: гла́съ и҃. По г҃-й пѣ́сни, сѣда́ленъ, гла́съ д҃. два́жды. По ѕ҃-й пѣ́сни,
Конда́къ, гла́съ г҃. Подо́бенъ: Дв҃а дне́сь:
Дѣ́вства добро́тами преиспещре́на дв҃о, нетлѣ́нными вѣнцы̀ вѣнча́ласѧ є҆сѝ марі́но. кровьми́ же мꙋ́ченичества ѡ҆багре́на, чꙋдесы̀ просвѣти́вшисѧ и҆сцѣле́нїй, бл҃гоче́стнѡ мꙋ́ченице прїѧ́ла є҆сѝ по́честь побѣ́ды твоегѡ̀ страда́нїѧ.
И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, ст҃ы́ѧ. И҆ ны́нѣ, бг҃оро́диченъ. На стїхо́внѣ ѻ҆ктѡ́иха, Сла́ва, гла́съ а҃: Ꙗ҆́кѡ на ка́мени тве́рдѣ: На лїтꙋргі́и, бл҃жє́нна ѻ҆ктѡ́иха, на д҃: и҆ ст҃ы́ѧ пѣ́снь г҃, на д҃. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ: Сті́хъ: Въ це́рквахъ бл҃гослови́те бг҃а гдⷭ҇а: А҆по́столъ къ корі́нѳѧнѡмъ, зача́ло рп҃а: Поспѣ́шствꙋюще мо́лимъ: А҆ллилꙋ́їа, гла́съ а҃: Терпѧ̀ потерпѣ́хъ гдⷭ҇а, и҆ внѧ́тъ мѝ. Є҆ѵⷢ҇лїе ѿ лꙋкѝ, зача́ло л҃г: Молѧ́ше і҆и҃са нѣ́кїй ѿ фарїсє́й: Прича́стенъ: Въ па́мѧть вѣ́чнꙋю:
и҃і. Ст҃а́гѡ мч҃нка ѵ҆акі́нѳа, и҆́же во а҆мастрі́дѣ: И҆ ст҃а́гѡ мч҃нка є҆мїлїа́на:
Стїхи̑ры ѻ҆ктѡ́иха г҃: и҆ ст҃а́гѡ г҃: гла́съ д҃. Подо́бенъ: ꙗ҆́кѡ до́блѧ: На стїхо́внѣ ѻ҆ктѡ́иха. Тропа́рь: Мч҃нкъ тво́й гдⷭ҇и: септе́мврїа во в҃-й де́нь. На ᲂу҆́трени, <<тн҃в: 703>> ѻ҆́ба канѡ́на ѻ҆ктѡ́иха: и҆ є҆мїлїа́на на д҃, гла́съ д҃. По г҃-й пѣ́сни, сѣда́ленъ, гла́съ и҃. По ѕ҃-й пѣ́сни,
Конда́къ, гла́съ г҃. Подо́бенъ: Бж҃е́ственныѧ вѣ́ры:
Бж҃е́ственною ре́вностїю распала́емь, ѻ҆гнѧ̀ сослꙋжа́щагѡ не ᲂу҆страши́лсѧ є҆сѝ: но возше́дъ небоѧ́зненнѡ во́лею, возгнѣща́ющимъ ѻ҆гне́мъ всесожже́гсѧ, и҆ влⷣцѣ ꙗ҆́кѡ же́ртва прине́слсѧ є҆сѝ мч҃нче, сла́вне є҆мїлїа́не, хрⷭ҇та̀ бг҃а молѝ, дарова́ти на́мъ ве́лїю млⷭ҇ть.
По ѳ҃-й пѣ́сни, свѣти́ленъ ѻ҆ктѡ́иха.
ѳ҃і. Прпⷣбныѧ мт҃ре на́шеѧ макрі́ны, сестры̀ вели́кагѡ васі́лїа: И҆ прпⷣбнагѡ ѻ҆тца̀ на́шегѡ ді́а.
На Гдⷭ҇и воззва́хъ, стїхи̑ры ст҃ы́ѧ, г҃, гла́съ д҃. Подо́бенъ: Да́лъ є҆сѝ зна́менїе: и҆ ст҃а́гѡ стїхи̑ры г҃, гла́съ то́йже. Подо́бенъ: Ꙗ҆́кѡ до́блѧ: На стїхо́внѣ ѻ҆ктѡ́иха. Тропа́рь ст҃ы́ѧ, гла́съ и҃: Въ тебѣ̀ мт҃и. септе́мврїа въ а҃і-й де́нь. Сла́ва, прпⷣбнагѡ, гла́съ а҃: Пꙋсты́нный жи́тель: септе́мврїа въ к҃ѳ-й де́нь. На ᲂу҆́трени, канѡ́нъ ѻ҆ктѡ́иха є҆ди́нъ: и҆ ст҃ы́хъ два̀ на и҃. Ст҃ы́ѧ, гла́съ д҃: и҆ прпⷣбнагѡ, гла́съ то́йже. По г҃-й пѣ́сни,
Конда́къ, гла́съ в҃. Подо́бенъ: Твє́рдыѧ:
Чистото́ю дꙋшѝ бж҃е́ственнѣ воѡрꙋжи́всѧ, непреста́ннꙋю мл҃твꙋ ꙗ҆́кѡ копїѐ прїи́мъ держа́внѡ, разсѣ́клъ є҆сѝ де́мѡнѡвъ полкѝ, чꙋдотво́рче ѻ҆́тче на́шъ ді́е, молѝ непреста́ннѡ ѡ҆ всѣ́хъ на́съ.
И҆ сѣда́ленъ ст҃ы́ѧ, гла́съ д҃: Сла́ва, прпⷣбнагѡ, гла́съ и҃. По ѕ҃-й пѣ́сни,
Конда́къ ст҃ы́ѧ, гла́съ д҃. Подо́бенъ: Ꙗ҆ви́лсѧ є҆сѝ:
Бг҃а бл҃га́го всѣ́мъ се́рдцемъ возлюби́ла є҆сѝ макрі́но прпⷣбнаѧ, и҆ сегѡ̀ крⷭ҇тъ чⷭ҇тны́й на ра́мо прїе́мши, ᲂу҆се́рднѡ послѣ́довала є҆сѝ є҆мꙋ̀: ѿѻнꙋ́дꙋже согрѣше́нїй ѡ҆брѣла̀ є҆сѝ проще́нїе.
<<тн҃в ѡ҆б.: 704>>
И҆ ѡ҆брѣ́тенїе чⷭ҇тны́хъ моще́й прпⷣбнагѡ серафі́ма саро́вскагѡ.
[Тропа́рь и҆ конда́къ зрѝ мцⷭ҇а і҆аннꙋа́рїа во в҃-й де́нь: ли́стъ рп҃є, на ѡ҆бор.]
к҃. Ст҃а́гѡ сла́внагѡ прⷪ҇ро́ка и҆лїѝ:
Ве́черъ, ѻ҆бы́чнаѧ каѳі́сма. На Гдⷭ҇и воззва́хъ, стїхи̑ры на ѕ҃, гла́съ а҃. Подо́бенъ: Нбⷭ҇ныхъ чинѡ́въ: и҆ самогла́сны, гла́съ в҃: Сла́ва, гла́съ ѕ҃: Прїиди́те правосла́вныхъ: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На стїхо́внѣ ѻ҆ктѡ́иха. Сла́ва, гла́съ ѕ҃: Прⷪ҇ро́че проповѣ́дниче хрⷭ҇то́въ: И҆ ны́нѣ, бг҃оро́диченъ.
Тропа́рь, гла́съ д҃:
Во пло́ти а҆́гг҃лъ, прⷪ҇ро́кѡвъ ѡ҆снова́нїе, вторы́й прⷣте́ча прише́ствїѧ хрⷭ҇то́ва, и҆лїа̀ сла́вный, свы́ше посла́вый є҆лїссе́еви бл҃года́ть, недꙋ́ги ѿгонѧ́ти, и҆ прокажє́нныѧ ѡ҆чища́ти: тѣ́мже и҆ почита́ющымъ є҆го̀ то́читъ и҆сцѣлє́нїѧ.
Сла́ва, и҆ ны́нѣ, бг҃оро́диченъ. На ᲂу҆́трени, на Бг҃ъ гдⷭ҇ь, тропа́рь прⷪ҇ро́ка, два́жды. Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. ѻ҆бы̑чныѧ каѳі̑смы: и҆ сѣда́ленъ ѻ҆ктѡ́иха. Ѻ҆́ба канѡ́на ѻ҆ктѡ́иха: и҆ ст҃а́гѡ на ѕ҃. По г҃-й пѣ́сни, сѣда́ленъ, гла́съ и҃, два́жды. По ѕ҃-й пѣ́сни,
Конда́къ, гла́съ в҃:
Прⷪ҇ро́че и҆ прови́дче вели́кихъ дѣ́лъ бг҃а на́шегѡ, и҆лїѐ великоимени́те, вѣща́нїемъ твои́мъ ᲂу҆ста́вивый водотѡ́чныѧ ѻ҆́блаки, молѝ ѡ҆ на́съ є҆ди́наго чл҃вѣколю́бца.
И҆ і҆́косъ, и҆ про́логъ. По ѳ҃-й пѣ́сни, свѣти́ленъ прⷪ҇ро́ка. На хвали́техъ стїхи̑ры, на ѕ҃: Сла́ва, гла́съ и҃: Прⷪ҇ро́кѡвъ верхо́вники: И҆ ны́нѣ, бг҃оро́диченъ. На стїхо́внѣ <<тн҃г: 705>> ѻ҆ктѡ́иха: Сла́ва, гла́съ д҃: На ѻ҆́гненнѣй колесни́цѣ: На лїтꙋргі́и, бл҃жє́нна ѿ канѡ́на, пѣ́снь г҃-ѧ и҆ ѕ҃-ѧ. Прокі́менъ, гла́съ д҃: Ты̀ і҆ере́й во вѣ́къ, по чи́нꙋ мелхїседе́ковꙋ. Сті́хъ: Речѐ гдⷭ҇ь гдⷭ҇еви моемꙋ̀: сѣдѝ ѡ҆деснꙋ́ю менѐ. А҆по́столъ собо́рнагѡ посла́нїѧ і҆а́кѡвлѧ, зача́ло н҃з: Ѡ҆́бразъ прїими́те ѕлострада́нїѧ: А҆ллилꙋ́їа, гла́съ є҃: Мѡѷсе́й и҆ а҆арѡ́нъ во і҆ере́ехъ є҆гѡ̀: Є҆ѵⷢ҇лїе ѿ лꙋкѝ, зача́ло д҃і: Дивлѧ́хꙋсѧ наро́ди ѡ҆ словесѣ́хъ: Прича́стенъ: Въ па́мѧть вѣ́чнꙋю бꙋ́детъ првⷣникъ:
А҆́ще хра́мъ ст҃а́гѡ прⷪ҇ро́ка и҆лїѝ, и҆лѝ и҆зво́литъ настоѧ́тель: твори́мъ бдѣ́нїе.
На ма́лѣй вече́рни, на Гдⷭ҇и воззва́хъ, стїхи̑ры на д҃: гла́съ а҃. Подо́бенъ: Нбⷭ҇ныхъ чинѡ́въ: Сла́ва, гла́съ ѕ҃: Бж҃е́ственный прⷪ҇ро́че и҆лїѐ: И҆ ны́нѣ, бг҃оро́диченъ. На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ: съ припѣ́вы и҆́хъ. Сла́ва, гла́съ и҆ подо́бенъ то́йже: Бж҃е́ственный прⷪ҇ро́че: И҆ ны́нѣ: Влⷣчце бл҃га́ѧ: По трист҃о́мъ, тропа́рь, гла́съ д҃. Сла́ва, и҆ ны́нѣ: Є҆́же ѿ вѣ́ка: Є҆ктенїа̀ ма́лаѧ, и҆ ѿпꙋ́стъ. На вели́цѣй вече́рни, по ѻ҆бы́чномъ ѱалмѣ̀, пое́мъ Бл҃же́нъ мꙋ́жъ, а҃-й а҆нтїфѡ́нъ. На Гдⷭ҇и воззва́хъ, стїхи̑ры, на и҃, гла́съ а҃. Подо́бенъ: Нбⷭ҇ныхъ чинѡ́въ: и҆ самогла́сны, гла́съ в҃. Сла́ва, гла́съ ѕ҃: Прїиди́те правосла́вныхъ: И҆ ны́нѣ: Кто̀ тебѐ не ᲂу҆бл҃жи́тъ: Вхо́дъ. прокі́менъ днѐ, и҆ чтє́нїѧ прⷪ҇ро́ка, г҃. На лїті́и стїхи̑ры хра́ма, и҆ ст҃а́гѡ самогла́сны, гла́съ д҃. Сла́ва, гла́съ ѕ҃: Ѽ нечести́вагѡ царѧ̀ повелѣ́нїѧ: И҆ ны́нѣ, Бцⷣе, ты̀ є҆сѝ лоза̀: На стїхо́внѣ стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ! съ преждепи́санными припѣ́вы. Сла́ва, гла́съ ѕ҃: Прⷪ҇ро́че проповѣ́дниче: И҆ ны́нѣ: Творе́цъ и҆ и҆зба́витель мо́й: На бл҃гослове́нїи хлѣ́бѡвъ, тропа́рь <<тн҃г ѡ҆б.: 706>> ст҃а́гѡ, два́жды, и҆ Бцⷣе дв҃о, є҆ди́ножды: и҆ Бꙋ́ди и҆́мѧ гдⷭ҇не, три́жды: и҆ ѱало́мъ л҃г: Бл҃гословлю̀ гдⷭ҇а: и҆ чте́нїе прⷪ҇ро́ка. На ᲂу҆́трени, на Бг҃ъ гдⷭ҇ь, тропа́рь прⷪ҇ро́ка, два́жды. Сла́ва, и҆ ны́нѣ, бг҃оро́диченъ. и҆ ѻ҆бы̑чныѧ каѳі̑смы, и҆ сѣда́льны прⷪ҇ро́ка. По полѷеле́и сѣда́ленъ, гла́съ и҃, два́жды. Сла́ва, и҆ ны́нѣ, бг҃оро́диченъ, и҆ чте́нїе. Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Ты̀ і҆ере́й во вѣ́къ: Сті́хъ: Речѐ гдⷭ҇ь гдⷭ҇еви моемꙋ̀: Всѧ́кое дыха́нїе: Є҆ѵⷢ҇лїе лꙋкѝ, зача́ло д҃і: Дивлѧ́хꙋсѧ наро́ди ѡ҆ словесѣ́хъ бл҃года́ти: По н҃-мъ ѱалмѣ̀ стїхи́ра, гла́съ д҃: На ѻ҆́гненнѣй колесни́цѣ: и҆ прѡ́чаѧ. Канѡ́нъ бцⷣы со і҆рмосо́мъ на ѕ҃, гла́съ и҃: Мно́гими содержи́мь напа́стьми: и҆ прⷪ҇ро́ка два̀ канѡ́на на и҃: є҆ди́нъ, гла́съ в҃: Дрꙋгі́й, гла́съ и҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни, сѣда́ленъ, гла́съ и҃, два́жды. Сла́ва, и҆ ны́нѣ, бг҃оро́диченъ. По ѕ҃-й пѣ́сни, конда́къ, гла́съ в҃: Прⷪ҇ро́че и҆ прови́дче: пи́санъ въ а҃-й слꙋ́жбѣ, и҆ і҆́косъ. По ѳ҃-й пѣ́сни, свѣти́ленъ. На хвали́техъ стїхи̑ры на ѕ҃, гла́съ и҃. Подо́бенъ: Что̀ ва́съ нарече́мъ: и҆ самогла́сны г҃, гла́съ а҃. Сла́ва, гла́съ и҃: Прⷪ҇ро́кѡвъ верхо́вники: И҆ ны́нѣ: Влⷣчце прїимѝ: Славосло́вїе вели́кое: По трист҃о́мъ тропа́рь. Сла́ва, и҆ ны́нѣ, бг҃оро́диченъ. Є҆ктєнїѝ, и҆ ча́съ а҃, и҆ ѿпꙋ́стъ. На лїтꙋргі́и, бл҃жє́нна, пе́рвагѡ канѡ́на, пѣ́снь г҃-ѧ, и҆ втора́гѡ ѕ҃-ѧ. Прокі́менъ, гла́съ д҃: Ты̀ і҆ере́й во вѣ́къ по чи́нꙋ мелхїседе́ковꙋ. Сті́хъ: Речѐ гдⷭ҇ь гдⷭ҇еви моемꙋ̀: А҆по́столъ і҆а́кѡвлѧ посла́нїѧ, зача́ло н҃з. А҆ллилꙋ́їа, гла́съ д҃: Мѡѷсе́й и҆ а҆арѡ́нъ: Є҆ѵⷢ҇лїе лꙋкѝ, зача́ло д҃і. Прича́стенъ: Въ па́мѧть:
<<тн҃д: 707>>
к҃а. Прпⷣбныхъ ѻ҆тє́цъ на́шихъ, сѷмеѡ́на хрⷭ҇та̀ ра́ди ю҆ро́дивагѡ, и҆ і҆ѡа́нна спо́стника є҆гѡ̀: И҆ ст҃а́гѡ прⷪ҇ро́ка і҆езекі́илѧ.
Стїхи̑ры прпⷣбныхъ, гла́съ д҃. Подо́бенъ: Да́лъ є҆сѝ зна́менїе: и҆ прⷪ҇ро́ка, гла́съ и҃. Подо́бенъ: Ѽ пресла́внагѡ чꙋдесѐ! На стїхо́внѣ ѻ҆ктѡ́иха. Тропа́рь прпⷣбныхъ, гла́съ д҃: Бж҃е ѻ҆тє́цъ на́шихъ: ное́мврїа въ к҃-й де́нь. и҆ прⷪ҇ро́ка, гла́съ в҃: Прⷪ҇ро́ка твоегѡ̀ і҆езекі́илѧ: септе́мврїа въ д҃-й де́нь. На ᲂу҆́трени, канѡ́нъ ѻ҆ктѡ́иха є҆ди́нъ: и҆ ст҃ы́хъ два̀, на и҃: прпⷣбныхъ, гла́съ д҃: и҆ прⷪ҇ро́ка, гла́съ и҃. По г҃-й пѣ́сни,
Конда́къ прⷪ҇ро́ка, гла́съ д҃. Подо́бенъ: Ꙗ҆ви́лсѧ є҆сѝ:
Бж҃їй ꙗ҆ви́лсѧ є҆сѝ прⷪ҇ро́къ і҆езекі́иле чꙋ́дне, гдⷭ҇не воплоще́нїе всѣ̑мъ провозвѣсти́лъ є҆сѝ, сего̀ а҆́гнца и҆ зижди́телѧ сн҃а бж҃їѧ ꙗ҆́вльшасѧ во вѣ́ки.
И҆ сѣда́ленъ прпⷣбныхъ, гла́съ є҃: Сла́ва прⷪ҇ро́ка, гла́съ г҃. По ѕ҃-й пѣ́сни,
Конда́къ прпⷣбныхъ, гла́съ в҃. Подо́бенъ: Твє́рдыѧ:
Во пло́ти ꙗ҆́вльшасѧ безпло́тнаго, и҆ добродѣ́тельми премі́рнѡ просїѧ́вшаго, сѷмеѡ́на равноа́гг҃льнаго и҆ бг҃оно́снаго восхва́лимъ, съ ни́мже і҆ѡа́нна приснопа́мѧтнаго, вѣ́рою и҆ любо́вїю, ꙗ҆́кѡ молѧ́щыѧсѧ гдⷭ҇ꙋ непреста́ннѡ ѡ҆ всѣ́хъ на́съ.
к҃в. Ст҃ы́ѧ мѷроно́сицы и҆ равноапⷭ҇льныѧ марі́и магдали́ны: И҆ возвраще́нїе моще́й ст҃а́гѡ сщ҃енномч҃нка фѡ́ки.
Стїхи̑ры ст҃ы́ѧ, гла́съ и҃. Подо́бенъ: Ѽ пресла́внагѡ чꙋдесѐ! и҆ ст҃а́гѡ, гла́съ д҃. Подо́бенъ: Да́лъ є҆сѝ зна́менїе: Сла́ва, ст҃ы́ѧ, гла́съ ѕ҃: Пе́рвѣе ви́дѣвши: На стїхо́внѣ ѻ҆ктѡ́иха. Сла́ва, ст҃ы́ѧ, гла́съ и҃: Во́лею ѡ҆бнища́вшемꙋ:
<<тн҃д ѡ҆б.: 708>>
Тропа́рь ст҃ы́ѧ, гла́съ а҃:
Хрⷭ҇тꙋ̀ на́съ ра́ди ѿ дв҃ы ро́ждшемꙋсѧ чⷭ҇тна́ѧ магдали́на марі́а послѣ́довала є҆сѝ, тогѡ̀ ѡ҆правда̑нїѧ и҆ зако́ны хранѧ́щи: тѣ́мже дне́сь всест҃ꙋ́ю твою̀ па́мѧть пра́зднꙋюще, грѣхѡ́въ разрѣше́нїе мл҃твами твои́ми прїе́млемъ.
И҆ ст҃а́гѡ, гла́съ д҃: И҆ нра́вѡмъ прича́стникъ: септе́мврїа въ г҃-й де́нь. На ᲂу҆́трени, канѡ́нъ ѻ҆ктѡ́иха є҆ди́нъ, и҆ ст҃ы́хъ два̀: ст҃ы́ѧ, гла́съ и҃, и҆ ст҃а́гѡ, гла́съ то́йже. По г҃-й пѣ́сни,
Конда́къ фѡ́ки, гла́съ ѕ҃. Подо́бенъ: Є҆́же ѡ҆ на́съ:
Ꙗ҆́кѡ ст҃и́тель приносѧ̀ ѻ҆́тче жє́ртвы, на коне́цъ себѐ прине́слъ є҆сѝ же́ртвꙋ жи́вꙋ: свидѣ́тельствовавъ зако́ннѡ ѡ҆ хрⷭ҇тѣ̀ бз҃ѣ, ѿ а҆́гг҃лъ ᲂу҆крѣплѧ́емь, и҆ сме́рть и҆зволѧ́ѧ сы́й съ вопїю́щими тебѣ̀: прїидѝ фѡ́ко съ на́ми, и҆ никто́же на ны̀.
И҆ і҆́косъ, и҆ сѣда́ленъ ст҃ы́ѧ, гла́съ и҃: и҆ мч҃нка, гла́съ д҃. По ѕ҃-й пѣ́сни,
Конда́къ ст҃ы́ѧ, гла́съ г҃. Подо́бенъ: Дв҃а дне́сь:
Предстоѧ́щи пресла́внаѧ ᲂу҆ крⷭ҇та̀ сп҃сова, со и҆ны́ми мно́гими, и҆ мт҃ри гдⷭ҇ни состра́ждꙋщи, и҆ сле́зы точа́щи, сїѐ въ похвалꙋ̀ приноша́ше глаго́лющи: что̀ сїѐ є҆́сть стра́нное чꙋ́до, содержа́й всю̀ тва́рь пострада́ти и҆зво́ли: сла́ва держа́вѣ твое́й.
И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха, и҆ ст҃ы́ѧ. Сла́ва, мч҃нка. На стїхо́внѣ ѻ҆ктѡ́иха. Сла́ва, мч҃нка, гла́съ д҃: Ѿ младе́нства бы́лъ є҆сѝ гдⷭ҇еви рачи́тель: И҆ ны́нѣ, ст҃ы́ѧ, гла́съ и҃: Во́лею ѡ҆бнища́вшемꙋ: На лїтꙋргі́и, бл҃жє́нна ѻ҆ктѡ́иха, и҆ ст҃ы́ѧ пѣ́снь г҃-ѧ, на д҃. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. Сті́хъ: Въ цр҃квахъ бл҃гослови́те бг҃а: А҆по́столъ къ корі́нѳѧнѡмъ, зача́ло рм҃а: Печа́ть моегѡ̀ а҆пⷭ҇льства: А҆ллилꙋ́їа, гла́съ а҃: Терпѧ̀ потерпѣ́хъ гдⷭ҇а: <<тн҃є: 709>> Є҆ѵⷢ҇лїе ѿ лꙋкѝ, зача́ло л҃д: Прохожда́ше і҆и҃съ сквозѣ̀ гра́ды и҆ вє́си: Прича́стенъ: Ра́дꙋйтесѧ:
к҃г. Ст҃ы́хъ мч҃нкъ трофі́ма, ѳео́фїла, и҆ и҆̀же съ ни́ми.
Гдⷭ҇и воззва́хъ, стїхи̑ры, гла́съ а҃. Подо́бенъ: Всехва́льнїи мч҃нцы: Тропа́рь: Мч҃нцы твоѝ гдⷭ҇и: септе́мврїа въ к҃-й де́нь. Канѡ́нъ, гла́съ д҃. По г҃-й пѣ́сни, сѣда́ленъ, гла́съ а҃.
к҃д. Ст҃ы́ѧ мч҃нцы хрїсті́ны:
Ве́черъ, на Гдⷭ҇и воззва́хъ, стїхи̑ры на ѕ҃, гла́съ д҃. Подо́бенъ: Ꙗ҆́кѡ до́блѧ: Хрⷭ҇тоиме́ннагѡ тѧ̀ зва́нїѧ: Сла́ва, гла́съ в҃: Ꙗ҆́коже многоцѣ́нное мѵ́ро: На стїхо́внѣ ѻ҆ктѡ́иха. Сла́ва, гла́съ в҃: Хрⷭ҇тоимени́томꙋ зва́нїю: Тропа́рь, гла́съ д҃: А҆́гница твоѧ̀ і҆и҃се: септе́мврїа въ ѕ҃і-й де́нь. На ᲂу҆́трени, ѻ҆́ба канѡ́на ѻ҆ктѡ́иха, и҆ ст҃ы́ѧ на ѕ҃, гла́съ и҃. По г҃-й пѣ́сни, сѣда́ленъ, гла́съ а҃. По ѕ҃-й пѣ́сни:
Конда́къ, гла́съ д҃. Подо́бенъ: Вознесы́йсѧ:
Свѣтови́днаѧ голꙋби́ца позна́лсѧ є҆сѝ, крилѣ̀ и҆мꙋ́щи зла̑тѣ и҆ къ высотѣ̀ нбⷭ҇нѣй возлетѣ́ла є҆сѝ хрїсті́но чⷭ҇тна́ѧ: тѣ́мже тво́й сла́вный пра́здникъ соверша́емъ, вѣ́рою покланѧ́ющесѧ твои́хъ моще́й ра́цѣ, и҆з̾ неѧ́же и҆стека́етъ всѣ̑мъ ѻ҆би́льнѡ и҆сцѣле́нїе бж҃е́ственное, дꙋша́мъ же и҆ тѣ́лѡмъ.
И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, ст҃ы́ѧ: И҆ ны́нѣ бг҃оро́диченъ. На хвали́техъ стїхи̑ры на д҃, гла́съ д҃, самогла́сны: Крⷭ҇тъ ꙗ҆́кѡ ѻ҆рꙋ́жїе: Сла́ва, гла́съ є҃: Дѣ́вства твоегѡ̀: На стїхо́внѣ ѻ҆ктѡ́иха: Сла́ва, гла́съ а҃: Съ вы́шними си́лами: И҆ ны́нѣ, бг҃оро́диченъ, <<тн҃є ѡ҆б.: 710>> и҆лѝ крⷭ҇тобг҃оро́диченъ. На лїтꙋргі́и, бл҃жє́нна ѻ҆ктѡ́иха, на д҃: и҆ ст҃ы́ѧ пѣ́снь г҃-ѧ, на д҃. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ: Сті́хъ: Въ цр҃квахъ бл҃гослови́те: А҆по́столъ къ корі́нѳѧнѡмъ, зача́ло рп҃а: Є҆ѵⷢ҇лїе лꙋкѝ, зача́ло л҃г. Прича́стенъ: Въ па́мѧть вѣ́чнꙋю:
Въ то́йже де́нь ст҃ы́хъ мч҃нкъ бори́са и҆ глѣ́ба, нарече́нныхъ во ст҃о́мъ кр҃ще́нїи, рѡма́на и҆ даві́да.
Соверша́етсѧ собо́ръ и҆́хъ, и҆дѣ́же лежа́тъ мо́щи и҆́хъ, и҆ и҆дѣ́же хра́мъ и҆́хъ.
Тропа́рь, гла́съ в҃:
Правди̑ваѧ страстотє́рпца, и҆ и҆́стиннаѧ є҆ѵⷢ҇лїа хрⷭ҇то́ва послꙋ́шатєлѧ, цѣломꙋ́дренный рѡма́не съ неѕло́бнымъ даві́домъ, не сопроти́въ ста́ста врагꙋ̀ сꙋ́щꙋ бра́тꙋ, ᲂу҆бива́ющемꙋ тѣлеса̀ ва̑ша, дꙋша́мъ же коснꙋ́тисѧ не могꙋ́щꙋ. да пла́четсѧ ᲂу҆́бѡ ѕлы́й властолю́бецъ, вы́ же ра́дꙋющесѧ съ ли́ки а҆́гг҃льскими, предстоѧ́ще ст҃ѣ́й трⷪ҇цѣ, моли́тесѧ ѡ҆ держа́вѣ срѡ́дникѡвъ ва́шихъ, бг҃оꙋго́днѣй бы́ти, и҆ сыновѡ́мъ рѡссі̑йскимъ сп҃сти́сѧ.
Конда́къ, гла́съ г҃:
Возсїѧ̀ дне́сь пресла́внаѧ па́мѧть ва́ша бл҃горо́днїи стрⷭ҇тоте́рпцы хрⷭ҇тѡ́вы, рѡма́не и҆ даві́де, созыва́ющи на́съ къ похвале́нїю хрⷭ҇та̀ бг҃а на́шегѡ. тѣ́мъ притека́юще къ ра́цѣ моще́й ва́шихъ, и҆сцѣле́нїѧ да́ръ прїе́млемъ, мл҃твами ва́шими ст҃і́и: вы́ бо бж҃е́ственнїи вра́чеве є҆стѐ.
к҃є. Оу҆спе́нїе ст҃ы́ѧ а҆́нны, ма́тере прест҃ы́ѧ бцⷣы. И҆ па́мѧть ст҃ы́хъ же́нъ ѻ҆лѷмпїа́ды и҆ є҆ѵпраѯі́и.
Ве́черъ, ѻ҆бы́чнаѧ каѳі́сма. На Гдⷭ҇и воззва́хъ, стїхи̑ры, гла́съ д҃. Подо́бенъ: Да́лъ є҆сѝ зна́менїе: И҆́ны стїхи̑ры, <<тн҃ѕ: 711>> гла́съ а҃. Подо́бенъ: Ѽ ди́внагѡ чꙋдесѐ! Сла́ва, и҆ ны́нѣ, гла́съ и҃: И҆́же ѿ непло́дныхъ чре́слъ: На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ: Сла́ва, и҆ ны́нѣ, гла́съ и҃: Прїиди́те всѧ̀ тва́рь:
Тропа́рь, гла́съ д҃:
Жи́знь ро́ждшꙋю, во чре́вѣ носи́ла є҆сѝ чи́стꙋю бг҃ома́терь, бг҃омꙋ́драѧ а҆́нно: тѣ́мже къ прїѧ́тїю нбⷭ҇номꙋ, и҆дѣ́же веселѧ́щихсѧ жили́ще, въ сла́вѣ ра́дꙋющисѧ ны́нѣ преста́виласѧ є҆сѝ, чтꙋ́щымъ тѧ̀ любо́вїю, прегрѣше́нїй просѧ́щи ѡ҆чище́нїе приснобл҃же́ннаѧ.
Се́й тропа́рь глаго́летсѧ без̾ бг҃оро́дична.
Ст҃ы́хъ же же́нъ слꙋ́жба пое́тсѧ на повече́рїи, и҆лѝ є҆гда̀ хо́щетъ є҆кклисїа́рхъ.
На ᲂу҆́трени, на Бг҃ъ гдⷭ҇ь, тропа́рь ст҃ы́ѧ а҆́нны, три́жды: и҆ ѻ҆бы̑чныѧ каѳі̑смы, и҆ сѣда́льны ст҃ы́ѧ, и҆ чте́нїе. Канѡ́ны ѻ҆ктѡ́иха, ѻ҆́ба без̾ мч҃нчнѡвъ: и҆ ст҃ы́ѧ а҆́нны, на ѕ҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни, сѣда́ленъ, гла́съ и҃: Мт҃ри влⷣки и҆ творца̀: Сла́ва, и҆ ны́нѣ, то́йже. По ѕ҃-й пѣ́сни,
Конда́къ, гла́съ в҃. Подо́бенъ: Вы́шнихъ и҆щѧ̀:
Прароди́телей хрⷭ҇то́выхъ па́мѧть пра́зднꙋемъ, тѣ́хъ вѣ́рнѡ просѧ́ще по́мощи, и҆зба́витисѧ всѣ̑мъ ѿ всѧ́кїѧ ско́рби, зовꙋ́щымъ: бг҃ъ на́шъ съ на́ми, си́хъ прославле́й, ꙗ҆́коже бл҃говолѝ.
И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, ст҃ы́ѧ: И҆ ны́нѣ, бг҃оро́диченъ. На хвали́техъ стїхи̑ры, гла́съ а҃. Подо́бенъ: Нбⷭ҇ныхъ чинѡ́въ: Сла́ва, и҆ ны́нѣ, гла́съ в҃: Прїиди́те любодѣ́вственнїи всѝ: Славосло́вїе вели́кое, и҆ ѿпꙋ́стъ. На лїтꙋргі́и, бл҃жє́нна, пѣ́снь г҃-ѧ и҆ ѕ҃-ѧ. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ: Сті́хъ: Въ цр҃квахъ бл҃гослови́те: А҆по́столъ къ гала́тѡмъ, зача́ло с҃і: А҆враа́мъ два̀ сы́на и҆мѣ̀: <<тн҃ѕ ѡ҆б.: 712>> А҆ллилꙋ́їа, гла́съ а҃: Сп҃се́нїе првⷣныхъ ѿ гдⷭ҇а: Є҆ѵⷢ҇лїе лꙋкѝ, зача́ло л҃ѕ: Никто́же свѣти́льника вже́гъ: Прича́стенъ: Ра́дꙋйтесѧ:
Въ то́йже де́нь прпⷣбнагѡ ѻ҆тца̀ на́шегѡ мака́рїа желтово́дскагѡ, ᲂу҆́нжескагѡ чꙋдотво́рца.
Соверша́етсѧ собо́ръ є҆гѡ̀ во ѻ҆би́тели є҆гѡ̀, и҆ и҆дѣ́же хра́мъ є҆гѡ̀.
Тропа́рь, гла́съ є҃:
Дне́сь гра́дъ тво́й га́личь тобо́ю хва́литсѧ: въ концѣ́хъ бо є҆гѡ̀ пресвѣ́тлѡ ꙗ҆́кѡ ве́лїе со́лнце возсїѧ́лъ є҆сѝ, и҆ чꙋдесы̀ твои́ми прпⷣбне мака́рїе всѧ̑ ѡ҆зари́лъ є҆сѝ. и҆ ны́нѣ моли́сѧ гдⷭ҇еви, и҆зба́витисѧ дꙋша́мъ на́шымъ ѿ пре́лести вра́жїѧ, и҆ сп҃сти́сѧ гра́дꙋ твоемꙋ̀ ѿ пога́нскагѡ наи́тїѧ.
Конда́къ, гла́съ в҃:
Вторы́й мѡѷсе́й ꙗ҆ви́лсѧ є҆сѝ прпⷣбне: ѻ҆́нъ бо жезло́мъ мо́ре раздѣлѝ, ты́ же стра̑сти ꙗ҆́кѡ а҆мали́ка побѣди́лъ є҆сѝ, и҆ непрохо́днꙋю пꙋсты́ню немѧте́жнымъ ᲂу҆мо́мъ проше́лъ є҆сѝ, въ не́йже мл҃твами твои́ми ве́лїе чꙋ́до сотвори́лъ є҆сѝ: гла̑дныѧ лю́ди до и҆з̾ѻби́лїѧ прекорми́лъ є҆сѝ. и҆ ны́нѣ моли́сѧ гдⷭ҇еви, пода́ти всѣ̑мъ печа̑льнымъ ᲂу҆тѣше́нїе, мака́рїе ѻ҆́тче приснопа́мѧтне, и҆́же га́личестѣй странѣ̀ и҆ все́й рѡссі́йстѣй землѝ похвала̀ и҆ ᲂу҆твержде́нїе.
к҃ѕ. Ст҃а́гѡ сщ҃енномч҃нка є҆рмола́а, и҆ и҆̀же съ ни́мъ:
Стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ! На стїхо́внѣ ѻ҆ктѡ́иха. Тропа́рь, гла́съ д҃: Мч҃нцы твоѝ гдⷭ҇и: септе́мврїа въ к҃-й де́нь. На ᲂу҆́трени, ѻ҆́ба канѡ́на и҆ ѻ҆ктѡ́иха, и҆ ст҃а́гѡ на д҃, гла́съ и҃. По г҃-й пѣ́сни, сѣда́ленъ, гла́съ и҃. По ѕ҃-й пѣ́сни,
<<тн҃з: 713>>
Конда́къ, гла́съ д҃. Подо́бенъ: Вознесы́йсѧ:
Ꙗ҆́кѡ ст҃и́тель бл҃гоче́стнѡ пожи́въ, и҆ сщ҃енномꙋче́нїѧ вѣне́цъ прїѧ́лъ є҆сѝ, і҆́дѡльскїѧ жє́ртвы погаси́въ, до́брый па́стырь хрⷭ҇то́ва ста́да бы́лъ є҆сѝ премꙋ́дре, и҆ пантелеи́монꙋ и҆́стинный ᲂу҆чи́тель. сегѡ̀ ра́ди почита́емъ тѧ̀ пѣ́сньми вопїю́ще: ѿ бѣ́дъ и҆зба́ви на́съ при́снѡ мл҃твами твои́ми, є҆рмола́е ѻ҆́тче на́шъ.
Въ то́йже де́нь ст҃ы́ѧ мч҃нцы параске́ѵи:
Тропа́рь, гла́съ и҃:
Тща́нїе твоѐ зва́нїю прили́чно содѣ́лавши тезоимени́таѧ, є҆динои́меннꙋю твою̀ вѣ́рꙋ въ жили́ще наслѣ́довала є҆сѝ параске́ѵо стрⷭ҇тоте́рпице: ѿѻнꙋ́дꙋже и҆злива́еши и҆сцѣлє́нїѧ, и҆ мо́лишисѧ ѡ҆ дꙋша́хъ на́шихъ.
Конда́къ. гла́съ и҃. Подо́бенъ: Взбра́нной:
Стрⷭ҇тоте́рпицѣ вѣ́рнїи пѣ́снь параске́ѵѣ прїиди́те согла́снѡ воспои́мъ: ѡ҆блистава́етъ бо чꙋдесы̀ въ мі́рѣ, ѿгонѧ́ющи пре́лести тьмꙋ̀, и҆ подаю́щи вѣ̑рнымъ бл҃года́ть незави́стнꙋю, зовꙋ́щымъ: ра́дꙋйсѧ мꙋ́ченице многострада́льнаѧ.
к҃з. Ст҃а́гѡ великомч҃нка и҆ цѣли́телѧ пантелеи́мона:
Стїхи̑ры на ѕ҃, гла́съ д҃. Подо́бенъ: Зва́нный свы́ше: И҆́ны стїхи̑ры, гла́съ в҃, самогла́сны. Сла́ва, гла́съ ѕ҃: Возсїѧ̀ дне́сь честна́ѧ па́мѧть: На стїхо́внѣ ѻ҆ктѡ́иха. Сла́ва, гла́съ и҃: Ма́тернее возлюби́въ бл҃гоче́стїе:
Тропа́рь, гла́съ г҃:
Стрⷭ҇тоте́рпче ст҃ы́й и҆ цѣле́бниче пантелеи́моне, молѝ ми́лостиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.
На ᲂу҆́трени, ѻ҆́ба канѡ́на ѻ҆ктѡ́иха без̾ мч҃нчнѡвъ, и҆ ст҃а́гѡ на ѕ҃, гла́съ в҃. По г҃-й пѣ́сни, сѣда́ленъ, гла́съ д҃. Сла́ва, гла́съ то́йже. По ѕ҃-й пѣ́сни,
<<тн҃з ѡ҆б.: 714>>
Конда́къ, гла́съ є҃:
Подража́тель сы́й ми́лостивагѡ, и҆ и҆сцѣле́нїй бл҃года́ть ѿ негѡ̀ прїе́мъ, стрⷭ҇тоте́рпче и҆ мꙋ́чениче хрⷭ҇та̀ бг҃а, мл҃твами твои́ми дꙋшє́вныѧ на́шѧ недꙋ́ги и҆сцѣлѝ, ѿгонѧ̀ при́снѡ борца̀ собла́зны ѿ вопїю́щихъ вѣ́рнѡ: сп҃си́ ны гдⷭ҇и.
И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, ст҃а́гѡ. На хвали́техъ стїхи̑ры на д҃, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, гла́съ д҃: Дне́сь просїѧ̀ стрⷭ҇тоно́сца па́мѧть: И҆ ны́нѣ: Бцⷣе всѣ́хъ цари́це: На стїхо́внѣ ѻ҆ктѡ́иха. Та́же ст҃а́гѡ припѣ́въ: Првⷣникъ ꙗ҆́кѡ фі́нїѯъ процвѣте́тъ: И҆ пое́мъ стїхи́рꙋ, гла́съ а҃: По́двигомъ до́брымъ подвиза́лсѧ є҆сѝ: Сла́ва, гла́съ є҃: Прїиди́те мч҃нколю́бцы: И҆ ны́нѣ, бг҃оро́диченъ. На лїтꙋргі́и, бл҃жє́нна ѻ҆ктѡ́иха, на д҃: и҆ ст҃а́гѡ пѣ́снь г҃, на д҃. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ: Сті́хъ: Въ цр҃квахъ бл҃гослови́те бг҃а: А҆по́столъ къ тїмоѳе́ю, зача́ло сч҃в: Ча́до тїмоѳе́е, возмога́й ѡ҆ бл҃года́ти: А҆ллилꙋ́їа, гла́съ в҃: Првⷣникъ ꙗ҆́кѡ фі́нїѯъ: Є҆ѵⷢ҇лїе і҆ѡа́нна, зача́ло н҃в: Сѝ заповѣ́даю ва́мъ: Прича́стенъ: Въ па́мѧть вѣ́чнꙋю:
к҃и. Ст҃ы́хъ а҆пⷭ҇лъ и҆ дїа́конѡвъ: про́хѡра, нїкано́ра, ті́мѡна и҆ парме́на.
Стїхи̑ры, гла́съ а҃. Подо́бенъ: Нбⷭ҇ныхъ чинѡ́въ: Тропа́рь, гла́съ г҃: А҆пⷭ҇ли ст҃і́и: ѻ҆ктѡ́врїа въ л҃а-й де́нь. На ᲂу҆́трени, ѻ҆́ба канѡ́на ѻ҆ктѡ́иха, и҆ а҆пⷭ҇лѡвъ на д҃, гла́съ д҃. По г҃-й пѣ́сни, сѣда́ленъ, гла́съ г҃. По ѕ҃-й пѣ́сни,
Конда́къ, гла́съ а҃. Подо́бенъ: Оу҆тро́бꙋ дв҃и́чꙋ:
Дїа́кони честні́и и҆ самови́дцы сло́ва, и҆ сосꙋ́ди и҆збра́ннїи <<тн҃и: 715>> ꙗ҆ви́стесѧ вѣ́ры, нїкано́ръ, про́хѡръ, парме́нъ и҆ ті́мѡнъ, сла́внїи: тѣ́мже де́нь сщ҃е́ннꙋю па́мѧть ва́шꙋ пра́зднꙋемъ, въ весе́лїи се́рдца ва́съ ᲂу҆бл҃жа́юще.
Въ то́йже де́нь пра́зднꙋемъ ꙗ҆вле́нїе і҆кѡ́ны смоле́нскїѧ, прест҃ы́ѧ влⷣчцы на́шеѧ бцⷣы ѻ҆дїги́трїа.
Тропа́рь, гла́съ д҃:
Къ бцⷣѣ прилѣ́жнѡ ны́нѣ притеце́мъ грѣ́шнїи и҆ смире́ннїи, и҆ припаде́мъ въ покаѧ́нїи зовꙋ́ще и҆з̾ глꙋбины̀ дꙋшѝ: влⷣчце помозѝ, на ны̀ млⷭ҇рдовавши. потщи́сѧ погиба́емъ ѿ мно́жества прегрѣше́нїй: не ѿвратѝ твоѧ̑ рабы̑ тщы̀, тѧ́ бо и҆ є҆ди́нꙋ наде́ждꙋ и҆́мамы.
Сла́ва, и҆ ны́нѣ:
Не ᲂу҆молчи́мъ никогда̀ бцⷣе, си̑лы твоѧ̑ глаго́лати недосто́йнїи. а҆́ще бо ты̀ не бы̀ предстоѧ́ла молѧ́щи, кто̀ бы на́съ и҆зба́вилъ ѿ толи́кихъ бѣ́дъ; кто́ же бы сохрани́лъ до ны́нѣ свобо́дны; не ѿстꙋ́пимъ влⷣчце ѿ тебѐ: твоѧ̑ бо рабы̑ сп҃са́еши при́снѡ ѿ всѧ́кихъ лю́тыхъ.
Конда́къ, гла́съ ѕ҃:
Не и҆́мамы и҆ны́ѧ по́мощи, не и҆́мамы и҆ны́ѧ наде́жды, ра́звѣ тебѐ влⷣчце: ты̀ на́мъ помозѝ, на тебѐ надѣ́емсѧ, и҆ тобо́ю хва́лимсѧ: твои́ бо є҆смы̀ рабѝ, да не постыди́мсѧ.
И҆́нъ конда́къ, гла́съ то́йже:
Предста́тельство хрⷭ҇тїа́нъ непосты́дное, хода́тайство ко творцꙋ̀ непрело́жное, не пре́зри грѣ́шныхъ моле́нїй гла́сы: но предварѝ ꙗ҆́кѡ бл҃га́ѧ на по́мощь на́съ, вѣ́рнѡ зовꙋ́щихъ тѝ: ᲂу҆скорѝ на мл҃твꙋ, и҆ потщи́сѧ на ᲂу҆моле́нїе, предста́тельствꙋющи при́снѡ бцⷣе чтꙋ́щихъ тѧ̀.
<<тн҃и ѡ҆б.: 716>>
к҃ѳ. Ст҃а́гѡ мч҃нка каллїні́ка.
Стїхи̑ры ѻ҆ктѡ́иха г҃: и҆ ст҃а́гѡ г҃, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, гла́съ то́йже. Самогла́сенъ: Благоче́стїѧ побо́рника: На стїхо́внѣ ѻ҆ктѡ́иха: Тропа́рь, гла́съ д҃: Мч҃нкъ тво́й гдⷭ҇и: септе́мврїа во в҃-й де́нь. На ᲂу҆́трени ѻ҆́ба канѡ́на ѻ҆ктѡ́иха: и҆ ст҃а́гѡ на д҃, гла́съ д҃. По г҃-й пѣ́сни, сѣда́ленъ, гла́съ г҃. По ѕ҃-й пѣ́сни,
Конда́къ, гла́съ в҃. Подо́бенъ: Вы́шнихъ и҆щѧ̀:
Гѡ́рнѧѧ кра̑снаѧ досто́йнѡ ны́нѣ наслѣ́довалъ є҆сѝ: хрⷭ҇то́вою бо ѕѣлѡ̀ любо́вїю разжже́гсѧ на ѻ҆́гнь каллїні́че. тѣ́мъ мꙋ́жественнѡ дерзнꙋ́лъ є҆сѝ: є҆мꙋ́же и҆ ны́нѣ предстоѧ̀ не преста́й молѧ̀ ѡ҆ всѣ́хъ на́съ.
л҃. Ст҃ы́хъ а҆пⷭ҇лъ, сі́лы и҆ сїлꙋа́на, и҆ и҆̀же съ ни́ми.
Стїхи̑ры ѻ҆ктѡ́иха, г҃: и҆ а҆пⷭ҇лѡвъ, г҃, гла́съ д҃. Подо́бенъ: Да́лъ є҆сѝ зна́менїе: На стїхо́внѣ ѻ҆ктѡ́иха: Тропа́рь, гла́съ г҃: А҆пⷭ҇ли ст҃і́и: ѻ҆ктѡ́врїа въ л҃а-й де́нь. На ᲂу҆́трени, ѻ҆́ба канѡ́на ѻ҆ктѡ́иха: и҆ а҆пⷭ҇лѡвъ на д҃, гла́съ в҃. По г҃-й пѣ́сни, сѣда́ленъ, гла́съ г҃. По ѕ҃-й пѣ́сни,
Конда́къ, гла́съ д҃. Подо́бенъ: Вознесы́йсѧ:
Ло́зїе ꙗ҆ви́стесѧ хрⷭ҇то́ва вїногра́да, гро́здїе приносѧ́ще мꙋ́дрїи въ добродѣ́телехъ, вїно̀ на́мъ сп҃се́нїѧ и҆сточа́юще: є҆́же прїе́млюще весе́лїѧ и҆сполнѧ́емсѧ, пра́зднꙋюще всечестнꙋ́ю ва́шꙋ па́мѧть: въ ню́же моли́тесѧ, ѡ҆ ѡ҆ставле́нїи грѣхѡ́въ на́шихъ, гдⷭ҇ни а҆пⷭ҇ли.
<<тн҃ѳ: 717>>
л҃а. Предпра́зднство происхожде́нїѧ чⷭ҇тна́гѡ и҆ животворѧ́щагѡ крⷭ҇та̀ гдⷭ҇нѧ: И҆ ст҃а́гѡ и҆ првⷣнагѡ є҆ѵдокі́ма.
Стїхи̑ры крⷭ҇та̀ г҃, гла́съ а҃. Подо́бенъ: Нбⷭ҇ныхъ чинѡ́въ: и҆ ст҃а́гѡ г҃, гла́съ и҃: Подо́бенъ: Ѽ пресла́внагѡ чꙋдесѐ! Сла́ва, ст҃а́гѡ, гла́съ а҃: Ка́кѡ не диви́мсѧ благоꙋ́мїю твоемꙋ̀: И҆ ны́нѣ, крⷭ҇та̀, гла́съ то́йже: Дне́сь ꙗ҆́кѡ вои́стиннꙋ: На стїхо́внѣ ѻ҆ктѡ́иха: Сла́ва, и҆ ны́нѣ, крⷭ҇та̀, гла́съ в҃: Ты́ ми покро́въ держа́венъ:
Тропа́рь ст҃а́гѡ, гла́съ д҃:
Ѿ землѝ воззва́вый тѧ̀ къ нбⷭ҇нымъ селе́нїємъ, соблюда́етъ и҆ по сме́рти невреди́мо тѣ́ло твоѐ, ст҃е є҆ѵдокі́ме: ты́ бо въ цѣломꙋ́дрїи и҆ чи́стомъ жи́тельствѣ бл҃же́нне жи́тельствовалъ є҆сѝ не ѡ҆скверни́въ пло́ти. тѣ́мже со дерзнове́нїемъ молѝ хрⷭ҇та̀ бг҃а сп҃сти́сѧ на́мъ.
Сла́ва, и҆ ны́нѣ: Сп҃сѝ гдⷭ҇и лю́ди твоѧ̑: На ᲂу҆́трени, на Бг҃ъ гдⷭ҇ь, тропа́рь крⷭ҇та̀ два́жды: Сла́ва, ст҃а́гѡ: И҆ ны́нѣ, крⷭ҇та̀. По ѻ҆бы́чныхъ каѳі́смахъ сѣда́льны ѻ҆ктѡ́иха: и҆ чте́нїе. Канѡ́нъ ѻ҆ктѡ́иха є҆ди́нъ: и҆ крⷭ҇та̀ на д҃, гла́съ а҃, и҆ ст҃а́гѡ на д҃, гла́съ в҃. По г҃-й пѣ́сни, сѣда́ленъ, гла́съ д҃. Сла́ва, и҆ ны́нѣ, предпра́зднства, гла́съ то́йже. По ѕ҃-й пѣ́сни,
Конда́къ, гла́съ в҃:
Вы́шнихъ жела́ѧ, съ вы́шними совокꙋплѧ́ѧсѧ, и҆ колесни́цꙋ ѻ҆́гненнꙋю, бж҃е́ственными восхожде́ньми добродѣ́телей, соверши́лъ є҆сѝ дꙋ́шꙋ, пребл҃же́нне є҆ѵдокі́ме: на землѝ пожи́въ ꙗ҆́кѡ безпло́тенъ, зижди́телю всѣ́хъ бл҃гоꙋгоди́лъ є҆сѝ.
И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, ст҃а́гѡ. И҆ ны́нѣ, крⷭ҇та̀. На стїхо́внѣ ѻ҆ктѡ́иха. Сла́ва, ст҃а́гѡ, гла́съ а҃: Ка́кѡ не диви́мсѧ благоꙋ́мїю <<тн҃ѳ ѡ҆б.: 718>> твоемꙋ̀: И҆ ны́нѣ, крⷭ҇та̀, гла́съ ѕ҃: Прⷪ҇ро́честїи гла́си: На лїтꙋргі́и, прокі́менъ, гла́съ з҃: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви: А҆по́столъ къ гала́тѡмъ, зача́ло сг҃і. А҆ллилꙋ́їа, гла́съ ѕ҃: Бл҃же́нъ мꙋ́жъ боѧ́йсѧ гдⷭ҇а: Сті́хъ: Си́льно на землѝ бꙋ́детъ сѣ́мѧ є҆гѡ̀. Є҆ѵⷢ҇лїе матѳе́а, зача́ло м҃г: Всѧ̑ мнѣ̀ прєдана̀ сꙋ́ть: Прича́стенъ: Въ па́мѧть вѣ́чнꙋю:
[зрѝ] Въ сі́й де́нь мѧ́со ѡ҆ставлѧ́ютъ правовѣ́рнїи. а҆́ще среда̀ и҆лѝ пѧто́къ, въ а҃-й начина́юще по́стъ до ᲂу҆спе́нїѧ прест҃ы́ѧ бцⷣы, со всѧ́кимъ воздержа́нїемъ. не подоба́етъ же тогда̀ ника́кѡ разрѣше́нїѧ ры́бы твори́ти, кромѣ̀ преѡбраже́нїѧ гдⷭ҇нѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.