Апрель
<<сп҃з ѡ҆б.: 574>>
Мѣ́сѧцъ а҆прі́лїй,
и҆мѣ́ѧй дне́й л҃.
Де́нь и҆́мать часѡ́въ г҃і, а҆ но́щь а҃і.
а҃. Прпⷣбныѧ ма́тере на́шеѧ марі́и є҆гѵ́птѧныни.
На Гдⷭ҇и воззва́хъ, стїхи̑ры, гла́съ ѕ҃. Подо́бенъ: Всю̀ ѿложи́вше: Сла́ва, гла́съ в҃: Дꙋшє́внаѧ ловлє́нїѧ: На стїхо́внѣ трїѡ́ди. Тропа́рь, гла́съ и҃: Въ тебѣ̀ мт҃и: септе́мврїа въ а҃і де́нь. На ᲂу҆́трени, канѡ́нъ, гла́съ д҃. По г҃-й пѣ́сни, сѣда́ленъ, гла́съ и҃. По ѕ҃-й пѣ́сни,
Конда́къ, гла́съ д҃. Подо́бенъ: Вознесы́йсѧ:
Грѣха̀ мглы̀ и҆збѣжа́вши, покаѧ́нїѧ свѣ́томъ ѡ҆зари́вши твоѐ се́рдце сла́внаѧ, пришла̀ є҆сѝ ко хрⷭ҇тꙋ̀: сегѡ̀ всенепоро́чнꙋю и҆ ст҃ꙋ́ю ма́терь мл҃твенницꙋ млⷭ҇тивнꙋю принесла̀ є҆сѝ. ѿѻнꙋ́дꙋже и҆ прегрѣше́нїй ѡ҆брѣла̀ є҆сѝ ѡ҆ставле́нїе, и҆ со а҆́гг҃лы при́снѡ сра́дꙋешисѧ.
И҆ і҆́косъ. По ѳ҃-й пѣ́сни, свѣти́ленъ. Подо́бенъ: Свѣ́те неизмѣ́нный:
И҆ прпⷣбнагѡ ѻ҆тца̀ на́шегѡ є҆ѵѳѵ́мїа, сꙋ́ждальскагѡ чꙋдотво́рца.
Соверша́етсѧ собо́ръ є҆гѡ̀ во ѻ҆би́тели є҆гѡ̀.
Тропа́рь, гла́съ г҃:
Ꙗ҆́кѡ свѣтоза́рнаѧ ѕвѣзда̀, прише́лъ є҆сѝ ѿ восто́ка на за́падъ, ѡ҆ста́вивъ ѻ҆те́чество твоѐ ни́жнїй но́въградъ, и҆ доше́дъ бг҃оспаса́емагѡ гра́да сꙋ́ждалѧ, въ не́мъ ѻ҆би́тель сотвори́лъ є҆сѝ, <<сп҃и: 575>> и҆ собра́лъ є҆сѝ мона́хѡвъ мно́жєства: и҆ прїе́мъ да́ръ чꙋде́съ ѿ бг҃а, ѻ҆́тче є҆ѵѳѵ́мїе, бы́лъ є҆сѝ ѡ҆ хрⷭ҇тѣ̀ собесѣ́дникъ и҆ спо́стникъ прпⷣбномꙋ се́ргїю. съ ни́мже ᲂу҆ хрⷭ҇та̀ бг҃а и҆спросѝ, бл҃говѣ́рномꙋ і҆мпера́торꙋ на́шемꙋ, нїкола́ю а҆леѯа́ндровичꙋ, здра́вїе и҆ сп҃се́нїе, и҆ дꙋша́мъ на́шымъ ве́лїю млⷭ҇ть.
Конда́къ, гла́съ в҃. Подо́бенъ: Вы́шнихъ и҆щѧ̀:
Волне́нїй мно́жество невла́жнѡ преходѧ̀, безплѡ́тныѧ врагѝ стрꙋѧ́ми сле́зъ твои́хъ погрꙋзи́лъ є҆сѝ, бг҃омꙋ́дре є҆ѵѳѵ́мїе прпⷣбне. тѣ́мъ и҆ чꙋде́съ да́ръ прїѧ́лъ є҆сѝ: молѝ непреста́ннѡ ѡ҆ всѣ́хъ на́съ.
в҃. Прпⷣбнагѡ ѻ҆тца̀ на́шегѡ и҆ чꙋдотво́рца ті́та.
А҆ллилꙋ́їа. Стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ! На ᲂу҆́трени, канѡ́нъ ст҃а́гѡ, гла́съ и҃. По г҃-й пѣ́сни, сѣда́ленъ, гла́съ а҃. По ѕ҃-й пѣ́сни,
Конда́къ, гла́съ д҃. Подо́бенъ: Ꙗ҆ви́лсѧ є҆сѝ:
Житїѧ̀ молвꙋ̀ ѡ҆ста́вилъ є҆сѝ, и҆ ти́хѡ всѐ житїѐ твоѐ пожи́въ мꙋ́дре, къ бг҃ꙋ прише́лъ є҆сѝ чꙋдоно́сче ѻ҆́тче на́шъ, ті́те прпⷣбне.
По ѳ҃-й пѣ́сни, свѣти́ленъ трⷪ҇ченъ.
г҃. Прпⷣбнагѡ ѻ҆тца̀ на́шегѡ нїки́ты и҆сповѣ́дника, и҆гꙋ́мена ѻ҆би́тели мидикі́йскїѧ.
А҆ллилꙋ́їа. Стїхи̑ры, гла́съ в҃. Подо́бенъ: Є҆гда̀ ѿ дре́ва: На ᲂу҆́трени, канѡ́нъ, гла́съ в҃. По г҃-й пѣ́сни, сѣда́ленъ, гла́съ д҃. По ѕ҃-й пѣ́сни,
Конда́къ, гла́съ в҃. Подо́бенъ: Вы́шнихъ и҆щѧ̀:
Нбⷭ҇ный ᲂу҆́мъ и҆ житїѐ стѧжа́въ, сїѧ́еши ꙗ҆́снѡ ꙗ҆́коже со́лнце свѣ́тлостїю дѣ́лъ, просвѣща́еши сꙋ́щыѧ во тьмѣ̀ жите́йстѣй ѻ҆́тче нїки́то. и҆ приводѧ̀ всѣ́хъ къ бг҃ꙋ, молѝ непреста́ннѡ ѡ҆ всѣ́хъ на́съ.
<<сп҃и ѡ҆б.: 576>>
д҃. Прпⷣбныхъ ѻ҆тє́цъ на́шихъ, і҆ѡ́сифа пѣснопи́сца и҆ геѡ́ргїа и҆́же въ мале́и.
А҆ллилꙋ́їа. Стїхи̑ры і҆ѡ́сифа, гла́съ в҃. Подо́бенъ: Є҆гда̀ ѿ дре́ва: И҆ геѡ́ргїа, гла́съ а҃. Подо́бенъ: Нбⷭ҇ныхъ чинѡ́въ: На ᲂу҆́трени, канѡ́нъ і҆ѡ́сифа, гла́съ в҃: И҆ геѡ́ргїа, гла́съ то́йже. По г҃-й пѣ́сни, сѣда́ленъ і҆ѡ́сифа, гла́съ д҃. Сла́ва, геѡ́ргїа, гла́съ г҃. По ѕ҃-й пѣ́сни,
Конда́къ, гла́съ д҃. Подо́бенъ: Вознесы́йсѧ:
Покаѧ́нїѧ и҆сто́чникъ неисчерпа́емый, ᲂу҆тѣше́нїѧ пода́тель неконча́емагѡ, и҆ ᲂу҆миле́нїѧ пꙋчи́на є҆сѝ і҆ѡ́сифе, сле́зы на́мъ пода́ждь покаѧ́нїѧ бж҃е́ственнагѡ: и҆́миже ᲂу҆тѣше́нїе здѣ̀ пла́чꙋщесѧ ѡ҆брѧ́щемъ ѿ бг҃а, твоеѧ̀ по́мощи просѧ́ще свѧ́те.
є҃. Ст҃ы́хъ мч҃нкъ, ѳеодꙋ́ла и҆ а҆гаѳопо́да, и҆ и҆̀же съ ни́ми.
А҆ллилꙋ́їа. Стїхи̑ры, гла́съ а҃. Подо́бенъ: Нбⷭ҇ныхъ чинѡ́въ: На ᲂу҆́трени, канѡ́нъ, гла́съ д҃. По г҃-й пѣ́сни, сѣда́ленъ, гла́съ и҃.
ѕ҃. И҆́же во ст҃ы́хъ ѻ҆тца̀ на́шегѡ є҆ѵтѵ́хїа, а҆рхїепⷭ҇кпа кѡнстантїнопо́льскагѡ.
А҆ллилꙋ́їа. Стїхи̑ры, гла́съ в҃. Подо́бенъ: Є҆гда̀ ѿ дре́ва: Тропа́рь, гла́съ д҃: Пра́вило вѣ́ры: септе́мврїа во в҃-й де́нь. На ᲂу҆́трени, канѡ́нъ, гла́съ ѕ҃. По г҃-й пѣ́сни, сѣда́ленъ, гла́съ г҃. По ѕ҃-й пѣ́сни, Конда́къ, гла́съ и҃:
Бж҃е́ственнаго вѣ́рнѡ є҆ѵтѵ́хїа всѝ пою́ще лю́дїе, любо́вїю да ᲂу҆бл҃жи́мъ ꙗ҆́кѡ па́стырѧ вели́ка, и҆ слꙋжи́телѧ и҆ ᲂу҆чи́телѧ премꙋ́дра, и҆ прогони́телѧ є҆ресе́й: мо́литъ бо гдⷭ҇а ѡ҆ всѣ́хъ на́съ.
<<сп҃ѳ: 577>>
И҆ па́мѧть и҆́же во ст҃ы́хъ ѻ҆тца̀ на́шегѡ меѳо́дїа, а҆рхїепⷭ҇кпа мора́вскагѡ.
Тропа́рь, гла́съ д҃:
Ст҃и́телѧ твоегѡ̀, хрⷭ҇тѐ, творѧ́ще свѣ́тлѡ торжество̀ ᲂу҆спе́нїѧ, млⷭ҇ти твоеѧ̀ свы́ше пода́ждь, ѿве́рзи же црⷭ҇твїѧ двє́ри, разрѣши́ же ю҆́зы на́шѧ мно́гихъ грѣхѡ́въ, хода́тайствомъ ст҃а́гѡ твоегѡ̀ ᲂу҆ченика̀, ѻ҆тца̀ на́шегѡ.
Конда́къ, гла́съ в҃:
Бж҃е́ственна и҆ вѣ́рна меѳо́дїа всѝ воспои́мъ лю́дїе, и҆ любо́вїю ᲂу҆бл҃жи́мъ, ꙗ҆́кѡ па́стырѧ вели́каго слове́нѡмъ, слꙋжи́телѧ трⷪ҇цы че́стна, прогони́телѧ є҆́реси, мо́литъ бо сѧ ѡ҆ всѣ́хъ на́съ.
з҃. Прпⷣбнагѡ ѻ҆тца̀ на́шегѡ геѡ́ргїа, є҆пⷭ҇кпа мелїті́нскагѡ.
А҆ллилꙋ́їа. Стїхи̑ры, гла́съ а҃. Подо́бенъ: Всехва́льнїи: На ᲂу҆́трени, канѡ́нъ, гла́съ и҃. По г҃-й пѣ́сни, сѣда́ленъ, гла́съ и҃.
и҃. Ст҃ы́хъ а҆пⷭ҇тѡлъ, и҆рѡдїѡ́на, а҆га́ва, а҆сѷгкрі́та, рꙋ́фа, фле́гонта и҆ є҆́рма, и҆ и҆̀же съ ни́ми.
А҆ллилꙋ́їа. Стїхи̑ры, гла́съ д҃. Подо́бенъ: Ꙗ҆́кѡ до́блѧ: На ᲂу҆́трени, канѡ́нъ, гла́съ г҃. По г҃-й пѣ́сни, сѣда́ленъ, гла́съ д҃. По ѕ҃-й пѣ́сни,
Конда́къ, гла́съ в҃. Подо́бенъ: Вы́шнихъ и҆щѧ̀:
Ꙗ҆ви́стесѧ хрⷭ҇тѡ́вы ᲂу҆ч҃нцы̀ и҆ а҆пⷭ҇ли всечестні́и, и҆рѡдїѡ́не сла́вне, а҆га́ве и҆ рꙋ́фе, а҆сѷгкрі́те, фле́гонте со є҆́рмомъ, при́снѡ моли́тесѧ гдⷭ҇еви, пода́ти на́мъ согрѣше́нїй проще́нїе пою́щымъ ва́съ.
<<сп҃ѳ ѡ҆б.: 578>>
ѳ҃. Ст҃а́гѡ мч҃нка є҆ѵѱѵ́хїа.
А҆ллилꙋ́їа. Стїхи̑ры, гла́съ и҃. Подо́бенъ: Мч҃нцы: На ᲂу҆́трени, канѡ́нъ, гла́съ и҃. По г҃-й пѣ́сни, сѣда́ленъ, гла́съ а҃.
і҃. Ст҃ы́хъ мч҃нкъ, тере́нтїа, помпиі́а, и҆ и҆̀же съ ни́ми.
А҆ллилꙋ́їа. Стїхи̑ры, гла́съ д҃. Подо́бенъ: Ꙗ҆́кѡ до́блѧ: На ᲂу҆́трени, канѡ́нъ, гла́съ и҃. По г҃-й пѣ́сни сѣда́ленъ, гла́съ д҃. По ѕ҃-й пѣ́сни,
Конда́къ, гла́съ в҃. Подо́бенъ: Въ мл҃твахъ:
Мч҃нческаѧ честна́ѧ па́мѧть прїи́де дне́сь, веселѧ́щи всѧ́чєскаѧ, тере́нтїа премꙋ́драгѡ и҆ дрꙋжи́ны є҆гѡ̀. те́плѣ ᲂу҆̀бо стеце́мсѧ, да прїи́мемъ и҆сцѣлє́нїѧ: сі́и бо бл҃года́ть ѿ бг҃а прїѧ́ша дх҃а ст҃а́гѡ, и҆сцѣлѧ́ти недꙋ́ги дꙋ́шъ на́шихъ.
а҃і. Ст҃а́гѡ сщ҃енномч҃нка а҆нтѵ́пы, є҆пⷭ҇кпа перга́ма а҆сі́йскагѡ.
Стїхи̑ры, гла́съ д҃. Подо́бенъ: Да́лъ є҆сѝ зна́менїе:
Тропа́рь, гла́съ д҃: И҆ нра́вѡмъ прича́стникъ: септе́мврїа въ г҃-й де́нь.
И҆лѝ се́й, гла́съ то́йже:
І҆́дѡльскїѧ лє́сти ᲂу҆праздни́лъ є҆сѝ а҆нтѵ́по, и҆ дїа́вольскꙋю попра́въ си́лꙋ, пред̾ богобо́рцы дерзнове́ннѡ хрⷭ҇та̀ и҆сповѣ́далъ є҆сѝ. тѣ́мже со а҆́гг҃льскими чи́ны въ вы́шнихъ водворѧ́ѧсѧ, влⷣцѣ всѣ́хъ славосло́вїе приносѧ̀, и҆ ѡ҆ на́съ моле́бное бл҃годаре́нїе предлага́еши, бл҃года́ть цѣльбы̀ да́рꙋѧ. сегѡ̀ ра́ди тѧ̀ чти́мъ сщ҃енномч҃нче а҆нтѵ́по, молѝ хрⷭ҇та̀ бг҃а, да сп҃се́тъ дꙋ́шы на́шѧ.
Канѡ́нъ, гла́съ д҃. По г҃-й пѣ́сни сѣда́ленъ, гла́съ г҃. По ѕ҃-й пѣ́сни,
<<с҃ч: 579>>
Конда́къ, гла́съ д҃. Подо́бенъ: Вознесы́йсѧ:
А҆пⷭ҇лѡвъ сопресто́льникъ, и҆ ст҃и́телей ᲂу҆краше́нїе бы́лъ є҆сѝ бл҃же́нне, мч҃нчески просла́вивсѧ, возсїѧ́лъ є҆сѝ ꙗ҆́коже со́лнце, всѣ́хъ просвѣща́ѧ, а҆нтѵ́по сщ҃е́нне, разрꙋши́лъ є҆сѝ безбо́жїѧ но́щь глꙋбо́кꙋю: сегѡ̀ ра́ди тѧ̀ почита́емъ, ꙗ҆́кѡ бж҃е́ственнаго сꙋ́ща сщ҃енномч҃нка, и҆ цѣле́бъ пода́телѧ.
в҃і. Прпⷣбнагѡ ѻ҆тца̀ на́шегѡ и҆ и҆сповѣ́дника васі́лїа, є҆пⷭ҇кпа парі́йскагѡ.
На Гдⷭ҇и воззва́хъ, стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ! На ᲂу҆́трени, канѡ́нъ, гла́съ и҃. По г҃-й пѣ́сни сѣда́ленъ, гла́съ г҃. По ѕ҃-й пѣ́сни,
Конда́къ, гла́съ в҃. Подо́бенъ: Вы́шнихъ и҆щѧ̀:
Вы́шнѧгѡ свѣ́томъ ѡ҆зари́всѧ бл҃же́нне, просвѣща́еши всѧ̑, и҆̀же любо́вїю чествꙋ́ющыѧ твоѐ ѻ҆́тче честно́е страда́нїе васі́лїе сщ҃еннострада́льне: молѝ хрⷭ҇та̀ бг҃а непреста́ннѡ ѡ҆ всѣ́хъ на́съ.
г҃і. Ст҃а́гѡ сщ҃енномч҃нка а҆рте́мона.
Стїхи̑ры, гла́съ а҃. Канѡ́нъ, гла́съ и҃. По г҃-й пѣ́сни сѣда́ленъ, гла́съ д҃.
д҃і. И҆́же во ст҃ы́хъ ѻ҆тца̀ на́шегѡ и҆ и҆сповѣ́дника марті́на па́пы ри́мскагѡ.
Стїхи̑ры, гла́съ и҃. Подо́бенъ: Что̀ вы̀ нарече́мъ: Канѡ́нъ, гла́съ и҃.
є҃і. Ст҃ы́хъ а҆пⷭ҇лъ, а҆рїста́рха, пꙋ́да и҆ трофі́ма.
А҆ллилꙋ́їа. Стїхи̑ры, гла́съ а҃. Подо́бенъ: Всехва́льнїи мч҃нцы: Канѡ́нъ, гла́съ ѕ҃. По г҃-й пѣ́сни, сѣда́ленъ, гла́съ а҃. По ѕ҃-й пѣ́сни,
<<с҃ч ѡ҆б.: 580>>
Конда́къ, гла́съ д҃. Подо́бенъ: Ꙗ҆ви́лсѧ є҆сѝ:
Ꙗ҆ви́сѧ а҆по́стольскїй честны́й се́й пра́здникъ, просвѣща́ѧ на́съ, и҆ грѣхо́внꙋю мглꙋ̀ прогонѧ́ѧ, зовꙋ́щымъ: ꙗ҆ви́сѧ свѣ́тъ, и҆ прїи́де и҆збавле́нїе.
ѕ҃і. Ст҃ы́хъ мч҃нцъ, а҆га́пїи, і҆ри́ны и҆ хїоні́и.
А҆ллилꙋ́їа. Стїхи̑ры, гла́съ д҃. Подо́бенъ: Ꙗ҆́кѡ до́блѧ: Канѡ́нъ, гла́съ и҃. По г҃-й пѣ́сни, сѣда́ленъ, гла́съ и҃. По ѕ҃-й пѣ́сни,
Конда́къ, гла́съ д҃:
Крѣ́пкѡ дꙋ́шꙋ і҆ри́но ѡ҆полчи́ла є҆сѝ вѣ́рою, ꙗ҆́вѣ лꙋка́ваго посрами́вши, и҆ ко хрⷭ҇тꙋ̀ привела̀ є҆сѝ тьмы̀ люде́й мно́жєства бл҃же́ннаѧ: и҆ порфѵ́рꙋ ѿ крове́й носѧ́щи, со а҆́гг҃лы ны́нѣ весели́шисѧ.
з҃і. Прпⷣбнагѡ ѻ҆тца̀ на́шегѡ сѷмеѡ́на персі́дскагѡ: И҆ прпⷣбнагѡ а҆ка́кїа, є҆пⷭ҇кпа мелїті́нскагѡ.
Стїхи̑ры сѷмеѡ́на, гла́съ д҃. Подо́бенъ: Да́лъ є҆сѝ зна́менїе: и҆ а҆ка́кїа, гла́съ и҃. Подо́бенъ: Ѽ пресла́внагѡ чꙋдесѐ! Канѡ́нъ сѷмеѡ́на, гла́съ є҃: и҆ а҆ка́кїа, гла́съ и҃. По г҃-й пѣ́сни, сѣда́ленъ сѷмеѡ́на, гла́съ а҃. Сла́ва, а҆ка́кїа, гла́съ г҃.
Прпⷣбнагѡ ѻ҆тца̀ на́шегѡ зѡсі́мы солове́цкагѡ.
Соверша́етсѧ собо́ръ є҆гѡ̀ во ѻ҆би́тели є҆гѡ̀, и҆ и҆дѣ́же хра́мъ є҆гѡ̀.
Тропа́рь, гла́съ д҃:
И҆зволе́нїемъ бж҃е́ственнагѡ ра́зꙋма всели́лсѧ є҆сѝ въ пꙋсты́ню, и҆ та́мѡ впери́въ ᲂу҆́мъ тво́й въ нбⷭ҇ныѧ ѻ҆би́тєли, ра́вно а҆́гг҃лѡмъ житїѐ на землѝ пожи́въ, въ мл҃твахъ и҆ трꙋдѣ́хъ и҆ поще́нїихъ, ѡ҆́бразъ бы́лъ є҆сѝ твои̑мъ ᲂу҆ченикѡ́мъ. ѿѻнꙋ́дꙋже бг҃ъ ви́дѧ твоѐ <<сч҃а: 581>> бл҃го́е и҆зволе́нїе, ᲂу҆мно́жи тебѣ̀ ча̑да въ пꙋсты́ни, сле́зъ твои́хъ тече́ньми напаѧ́емѣй: но ꙗ҆́кѡ и҆мѣ́ѧ дерзнове́нїе къ бг҃ꙋ, помина́й ста́до, є҆́же собра́лъ є҆сѝ мꙋ́дре, и҆ не забꙋ́ди ꙗ҆́коже ѡ҆бѣща́лсѧ є҆сѝ, посѣща́ѧ ча́дъ твои́хъ, зѡсі́мо прпⷣбне ѻ҆́тче на́шъ.
Конда́къ, гла́съ и҃:
Хрⷭ҇то́вою любо́вїю ᲂу҆ѧзви́всѧ прпⷣбне, и҆ тогѡ̀ крⷭ҇тъ сла́вный на ра́мо взе́мъ поне́слъ є҆сѝ, бж҃е́ственнѣ воѡрꙋжи́всѧ, и҆ непреста̑нныѧ мл҃твы ꙗ҆́кѡ копїѐ въ рꙋцѣ̀ и҆мы́й, крѣ́пкѡ ссѣ́клъ є҆сѝ бѣсѡ́вскаѧ ѡ҆полчє́нїѧ. тѣ́мъ зове́мъ тѝ: ра́дꙋйсѧ прпⷣбне ѻ҆́тче зѡсі́мо, мона́хѡвъ ᲂу҆добре́нїе.
и҃і. Прпⷣбнагѡ ѻ҆тца̀ на́шегѡ і҆ѡа́нна, ᲂу҆ченика̀ ст҃а́гѡ григо́рїа декаполі́та.
А҆ллилꙋ́їа. Стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ! На ᲂу҆́трени, канѡ́нъ, гла́съ и҃. По г҃-й пѣ́сни сѣда́ленъ, гла́съ а҃. По ѕ҃-й пѣ́сни,
Конда́къ, гла́съ д҃. Подо́бенъ: Вознесы́йсѧ:
Воздержа́нїемъ ѻ҆́тче, житїѐ ᲂу҆краси́въ, и҆ пло́ть ᲂу҆мертви́лъ є҆сѝ: тѣ́мже и҆ побѣди́лъ є҆сѝ вра̑жїѧ прило́ги пребл҃же́нне, и҆ преше́лъ є҆сѝ къ бг҃ꙋ въ безско́рбный и҆ вѣ́чный живо́тъ, ꙗ҆́кѡ досто́инъ наслѣ́дникъ і҆ѡа́нне: є҆мꙋ́же моли́сѧ сп҃сти́сѧ на́мъ.
ѳ҃і. Прпⷣбнагѡ ѻ҆тца̀ на́шегѡ і҆ѡа́нна ветхопеще́рника.
Стїхи̑ры, гла́съ є҃. Подо́бенъ: Прпⷣбне ѻ҆́тче: На ᲂу҆́трени, канѡ́нъ, гла́съ д҃. По г҃-й пѣ́сни, сѣда́ленъ, гла́съ и҃.
<<сч҃а ѡ҆б.: 582>>
к҃. Прпⷣбнагѡ ѻ҆тца̀ на́шегѡ ѳео́дѡра трїхи́ны.
Стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ! На ᲂу҆́трени, канѡ́нъ, гла́съ в҃. По г҃-й пѣ́сни, сѣда́ленъ, гла́съ д҃. По ѕ҃-й пѣ́сни,
Конда́къ, гла́съ д҃. Подо́бенъ: Ꙗ҆ви́лсѧ є҆сѝ:
Ꙗ҆ви́лсѧ є҆сѝ преди́венъ житїе́мъ ѳео́дѡре мꙋ́дре ѻ҆́тче, власѧны́ми рꙋ́бы и҆змѣни́въ, па́че ца́рскихъ сокро́вищъ ꙗ҆̀же на землѝ: сегѡ̀ ра́ди нбⷭ҇нꙋю ѻ҆де́ждꙋ воспрїѧ́лъ є҆сѝ, при́снѡ молѝ ѡ҆ на́съ прпⷣбне.
к҃а. Ст҃а́гѡ сщ҃енномч҃нка і҆аннꙋа́рїа, и҆ дрꙋжи́ны є҆гѡ̀: И҆ ст҃а́гѡ сщ҃енномч҃нка ѳео́дѡра, и҆́же въ пергі́и:
Стїхи̑ры, і҆аннꙋа́рїа, гла́съ д҃. Подо́бенъ: Ꙗ҆́кѡ до́блѧ: и҆ ѳео́дѡра, гла́съ то́йже. Подо́бенъ: Да́лъ є҆сѝ зна́менїе: На ᲂу҆́трени, канѡ́нъ, і҆аннꙋа́рїа, гла́съ д҃: и҆ ѳео́дѡра, гла́съ то́йже. По г҃-й пѣ́сни сѣда́ленъ, і҆аннꙋа́рїа, гла́съ д҃. Сла́ва, ѳео́дѡра, гла́съ то́йже. По ѕ҃-й пѣ́сни,
Конда́къ, гла́съ г҃:
Сщ҃е́нїѧ пома́занїемъ и҆ мꙋче́нїѧ кро́вїю ᲂу҆краси́стесѧ сла́внїи, і҆аннꙋа́рїе и҆ ѳео́дѡре, и҆ сїѧ́ете всю́дꙋ въ вы́шнихъ ликꙋ́юще, и҆ на́съ назира́йте въ хра́мъ ва́шъ прише́дшыѧ, и҆ въ не́мъ непреста́ннѡ зовꙋ́щыѧ: всѣ́хъ на́съ соблюди́те, молѧ́ще чл҃вѣколю́бца бг҃а.
к҃в. Прпⷣбнагѡ ѻ҆тца̀ на́шегѡ ѳео́дѡра сѷкеѡ́та. Стїхи̑ры, гла́съ є҃. Подо́бенъ: Прпⷣбне ѻ҆́тче:
Тропа́рь, гла́съ в҃:
Позна́нъ бы́въ, ѿ пеле́нъ ѡ҆сщ҃е́нъ, и҆ ꙗ҆́вльсѧ бл҃года́тей и҆спо́лненъ, чꙋдесы̀ мі́ръ ѡ҆зари́лъ є҆сѝ, и҆ де́монѡвъ мно́жество ѿгна́лъ є҆сѝ, сщ҃еннодѣ́телю ѳео́дѡре: тѣ́мже ѡ҆ на́съ моли́сѧ гдⷭ҇еви.
<<сч҃в: 583>>
На ᲂу҆́трени, канѡ́нъ, гла́съ д҃. По г҃-й пѣ́сни, сѣда́ленъ, гла́съ и҃. По ѕ҃-й пѣ́сни,
Конда́къ, гла́съ г҃. Подо́бенъ: Дв҃а дне́сь:
Ꙗ҆́кѡ на ѻ҆́гненнꙋю колесни́цꙋ, добродѣ́тельми бг҃оно́се возше́дъ, восте́клъ є҆сѝ на нбⷭ҇наѧ жили̑ща: ꙗ҆́кѡ а҆́гг҃лъ съ человѣ́ки пожи́лъ є҆сѝ: и҆ ꙗ҆́кѡ человѣ́къ со а҆́гг҃лы ѻ҆́крестъ ликовствꙋ́еши. сегѡ̀ ра́ди показа́лсѧ є҆сѝ чꙋде́съ бж҃е́ственное прїѧ́телище, ѳео́дѡре прпⷣбне.
к҃г. Ст҃а́гѡ сла́внагѡ великомч҃нка, побѣдоно́сца и҆ чꙋдотво́рца геѡ́ргїа: И҆ ст҃ы́ѧ мч҃нцы цари́цы а҆леѯа́ндры.
А҆́ще хра́мъ, и҆лѝ восхо́щетъ настоѧ́тель, твори́мъ бдѣ́нїе.
На ма́лѣй вече́рни, На Гдⷭ҇и воззва́хъ, стїхи̑ры, гла́съ а҃. Подо́бенъ: Нбⷭ҇ныхъ чинѡ́въ: Сла́ва, гла́съ то́йже: Вели́кагѡ цр҃ѧ̀ во́ине: И҆ ны́нѣ, пра́здника: На стїхо́внѣ стїхи̑ры самогла́сны, гла́съ д҃: съ припѣ́вы и҆́хъ: а҃-й, Пра́ведникъ ꙗ҆́кѡ фі́нїѯъ процвѣте́тъ: в҃- й, Насажде́ни въ домꙋ̀ гдⷭ҇ни. Сла́ва, гла́съ то́йже. И҆ ны́нѣ, пра́здника.
Тропа́рь, гла́съ д҃:
По́двигомъ до́брымъ подвиза́лсѧ є҆сѝ стрⷭ҇тоте́рпче хрⷭ҇то́въ, вѣ́рою, и҆ мꙋчи́телей ѡ҆бличи́лъ є҆сѝ нече́стїе, же́ртва же бл҃гопрїѧ́тна бг҃ꙋ прине́слсѧ є҆сѝ: тѣ́мже и҆ вѣне́цъ прїѧ́лъ є҆сѝ побѣ́ды, и҆ мл҃твами ст҃е твои́ми всѣ̑мъ подае́ши прегрѣше́нїй проще́нїе.
Є҆ктенїа̀ ма́лаѧ, и҆ ѿпꙋ́стъ. На вели́цѣй вече́рни, пое́мъ: Бл҃же́нъ мꙋ́жъ: а҃-й а҆нтїфѡ́нъ. На Гдⷭ҇и воззва́хъ, стїхи̑ры пра́здника, г҃: и҆ ст҃а́гѡ, є҃, гла́съ д҃. Самоподо́бенъ: Ꙗ҆́кѡ до́блѧ: Сла́ва, гла́съ ѕ҃. Досто́йнѡ и҆́мени пожи́лъ є҆сѝ: И҆ ны́нѣ, пра́здника. Вхо́дъ, прокі́менъ <<сч҃в ѡ҆б.: 584>> днѐ, и҆ чтє́нїѧ г҃, ст҃а́гѡ: а҃- е, Прⷪ҇ро́чества и҆са́їина: Та́кѡ глаго́летъ гдⷭ҇ь: всѝ ꙗ҆зы́цы собра́шасѧ: в҃-е, Премꙋ́дрости соломѡ́ни: Првⷣныхъ дꙋ́шы въ рꙋцѣ̀ бж҃їей: г҃-е, Премꙋ́дрости соломѡ́ни: Првⷣникъ а҆́ще пости́гнетъ: На лїті́и стїхи̑ры хра́ма: и҆ ст҃а́гѡ самогла́сны, гла́съ а҃. Сла́ва, гла́съ є҃: Возсїѧ̀ весна̀: И҆ ны́нѣ, пра́здника. На стїхо́внѣ стїхи̑ры ст҃а́гѡ, гла́съ д҃. Подо́бенъ: Зва́нный свы́ше: съ припѣ́вы и҆́хъ, пи́саны на ма́лѣй вече́рни. Сла́ва, гла́съ то́йже: Разꙋ́мнагѡ а҆дама́нта: И҆ ны́нѣ, пра́здника. На бл҃гослове́нїи хлѣ́бѡвъ,
Тропа́рь, гла́съ д҃:
Ꙗ҆́кѡ плѣ́нныхъ свободи́тель и҆ ни́щихъ защи́титель, немощствꙋ́ющихъ вра́чь, царе́й побо́рниче, побѣдоно́сче великомч҃нче геѡ́ргїе, молѝ хрⷭ҇та̀ бг҃а сп҃сти́сѧ дꙋша́мъ на́шымъ. Два́жды.
И҆ Бцⷣе дв҃о: є҆ди́ножды. и҆ Бꙋ́ди и҆́мѧ гдⷭ҇не: три́жды. ѱало́мъ л҃г: Бл҃гословлю̀ гдⷭ҇а: до Не лиша́тсѧ: І҆ере́й: Бл҃гослове́нїе гдⷭ҇не на ва́съ: и҆ чте́нїе ст҃а́гѡ. На ᲂу҆́трени, на Бг҃ъ гдⷭ҇ь, тропа́рь пра́здника, два́жды. Сла́ва, ст҃а́гѡ: И҆ ны́нѣ, пра́здника. По а҃-й каѳі́смѣ, сѣда́ленъ пра́здника: Сла́ва, и҆ ны́нѣ, то́йже. и҆ чте́мъ є҆ѵⷢ҇лїе толково́е. По в҃-й каѳі́смѣ, сѣда́ленъ ст҃а́гѡ, гла́съ а҃. Сла́ва, и҆́нъ: И҆ ны́нѣ, пра́здника, и҆лѝ бг҃оро́диченъ, и҆ чте́нїе. По полѷеле́и сѣда́ленъ, гла́съ г҃. Сла́ва, и҆́нъ: И҆ ны́нѣ, пра́здника, и҆лѝ бг҃оро́диченъ. Степє́нна, пе́рвый а҆нтїфѡ́нъ д҃-гѡ гла́са. Прокі́менъ, гла́съ д҃: Првⷣникъ ꙗ҆́кѡ фі́нїѯъ процвѣте́тъ: Сті́хъ: Насажде́ни въ домꙋ̀ гдⷭ҇ни: Є҆ѵⷢ҇лїе лꙋкѝ, зача́ло ѯ҃г: Ничто́же покрове́но є҆́сть: ѱало́мъ н҃. Стїхи́ра, гла́съ ѕ҃: Дне́сь вселе́ннаѧ всѧ̀: Канѡ́нъ пра́здника со і҆рмосо́мъ на ѕ҃: и҆ ст҃а́гѡ два̀ на и҃: Є҆ди́нъ, гла́съ в҃: Дрꙋгі́й, гла́съ д҃. Катава́сїа пра́здника: Воскрⷭ҇нїѧ <<сч҃г: 585>> де́нь: По г҃-й пѣ́сни, конда́къ и҆ і҆́косъ пра́здника, и҆ сѣда́ленъ ст҃а́гѡ, гла́съ и҃. Сла́ва, и҆́нъ: И҆ ны́нѣ пра́здника. По ѕ҃-й пѣ́сни,
Конда́къ, гла́съ д҃. Подо́бенъ: Вознесы́йсѧ:
Воздѣ́ланъ ѿ бг҃а показа́лсѧ є҆сѝ бл҃гоче́стїѧ дѣ́латель честнѣ́йшїй, добродѣ́телей рꙋкоѧ̑ти собра́въ себѣ̀: сѣ́ѧвъ бо въ слеза́хъ, весе́лїемъ жне́ши, страда́льчествовавъ же кро́вїю, хрⷭ҇та̀ прїѧ́лъ є҆сѝ: и҆ мл҃твами свѧ́те твои́ми всѣ̑мъ подае́ши прегрѣше́нїй проще́нїе.
И҆ і҆́косъ, и҆ чте́мъ про́логъ. По ѳ҃-й пѣ́сни, свѣти́ленъ ст҃а́гѡ. Сла́ва, и҆́нъ: И҆ ны́нѣ, пра́здника. На хвали́техъ, стїхи̑ры ст҃а́гѡ на д҃, гла́съ в҃. Подо́бенъ: Є҆гда̀ ѿ дре́ва: Сла́ва, гла́съ в҃: Да помава́ютъ првⷣнаѧ: И҆ ны́нѣ, пра́здника. Славосло́вїе вели́кое. По трист҃о́мъ тропа́рь ст҃а́гѡ: Сла́ва, и҆ ны́нѣ, пра́здника. Є҆ктєнїѝ, и҆ ѿпꙋ́стъ: и҆ дае́тсѧ ст҃ы́й є҆ле́й бра́тїи ѿ канди́ла ст҃а́гѡ, и҆ ча́съ а҃-й. На а҃-мъ часѣ̀, тропа́рь пра́здника: Сла́ва, ст҃а́гѡ: И҆ ны́нѣ, бг҃оро́диченъ часѡ́въ. По трист҃о́мъ кондакѝ пра́здника и҆ ст҃а́гѡ, глаго́лемъ премѣнѧ́юще. На лїтꙋргі́и, бл҃жє́нна пра́здника, пѣ́снь рѧдова́ѧ: и҆ ѿ канѡ́на ст҃а́гѡ, пѣ́снь г҃. Прокі́менъ пра́здника, и҆ ст҃а́гѡ, гла́съ з҃: Возвесели́тсѧ првⷣникъ ѡ҆ гдⷭ҇ѣ: Сті́хъ: Оу҆слы́ши бж҃е гла́съ мо́й: А҆по́столъ днѐ, и҆ ст҃а́гѡ, дѣѧ́нїй, зача́ло к҃ѳ: Возложѝ и҆́рѡдъ ца́рь рꙋ́цѣ: А҆ллилꙋ́їа днѐ, и҆ ст҃а́гѡ, гла́съ д҃: Првⷣникъ ꙗ҆́кѡ фі́нїѯъ процвѣте́тъ: Сті́хъ: Насажде́ни въ домꙋ̀ гдⷭ҇ни: Є҆ѵⷢ҇лїе днѐ: и҆ ст҃а́гѡ, і҆ѡа́нна, зача́ло н҃в: Сѝ заповѣ́даю ва́мъ: Прича́стенъ пра́здника, и҆ ст҃а́гѡ: Въ па́мѧть вѣ́чнꙋю: На трапе́зѣ ᲂу҆тѣше́нїе бра́тїи.
<<сч҃г ѡ҆б.: 586>>
[[комм.]] Оу҆ка́зъ ѡ҆ вели́комъ мч҃нцѣ геѡ́ргїи.
Начина́етсѧ ѿ днѐ вели́кагѡ пѧтка̀, и҆ восхо́дитъ до четвертка̀ є҃-ѧ недѣ́ли по па́сцѣ. И҆ а҆́ще слꙋчи́тсѧ великомч҃нка геѡ́ргїа въ вели́кїй пѧто́къ, и҆лѝ въ вели́кꙋю сꙋббѡ́тꙋ, и҆лѝ на са́мꙋю па́схꙋ, пою́тсѧ стїхи̑ры ст҃а́гѡ, и҆ канѡ́нъ, и҆ про́чаѧ слꙋ́жба, въ понедѣ́льникъ свѣ́тлыѧ недѣ́ли, съ слꙋ́жбою дневно́ю.
[[комм.]] А҆́ще ли слꙋчи́тсѧ великомч҃нка геѡ́ргїа во є҆ди́нъ ѿ дне́й свѣ́тлыѧ недѣ́ли.
Ве́черъ, на Гдⷭ҇и воззва́хъ, стїхи̑ры воскрⷭ҇ны г҃: и҆ ст҃а́гѡ г҃: Сла́ва, ст҃а́гѡ, гла́съ ѕ҃: Досто́йнѡ и҆́мени: И҆ ны́нѣ, бг҃оро́диченъ а҃-й, гла́са. Вхо́дъ. Свѣ́те ти́хїй: прокі́менъ днѐ. и҆ чтє́нїѧ г҃ ст҃а́гѡ. А҆́ще въ са́мꙋю недѣ́лю па́схи ве́чера, глаго́летъ і҆ере́й: Ѡ҆ сподо́битисѧ на́мъ: и҆ прѡ́чаѧ. и҆ є҆ѵⷢ҇лїе чте́тсѧ по чи́нꙋ. На стїхо́внѣ стїхи́ра воскрⷭ҇на: та́же стїхи̑ры па́схи съ припѣ́вы и҆́хъ. Сла́ва, ст҃а́гѡ, гла́съ д҃: Разꙋ́мнагѡ а҆дама́нта: И҆ ны́нѣ, па́схи, гла́съ є҃: Воскрⷭ҇нїѧ де́нь: Хрⷭ҇то́съ воскр҃се, три́жды. Сла́ва, тропа́рь ст҃а́гѡ: И҆ ны́нѣ, бг҃оро́диченъ а҃-й, гла́са. І҆ере́й, Премꙋ́дрость, и҆ ѿпꙋ́стъ. На ᲂу҆́трени, по Хрⷭ҇то́съ воскр҃се, и҆ по четыре́хъ стїсѣ́хъ, Сла́ва, тропа́рь ст҃а́гѡ: И҆ ны́нѣ, бг҃оро́диченъ а҃-й, гла́са. та́же, ѻ҆бы́чнаѧ є҆ктенїа̀ и҆ полѷеле́й. та́же сѣда́ленъ ст҃а́гѡ, два́жды. Сла́ва, и҆ ны́нѣ, бг҃оро́диченъ: и҆ чте́нїе. та́же степє́нна, а҃-й а҆нтїфѡ́нъ д҃-гѡ гла́са. Прокі́менъ: Всѧ́кое дыха́нїе: є҆ѵⷢ҇лїе ст҃а́гѡ. Воскрⷭ҇нїе хрⷭ҇то́во: три́жды. Сла́ва, Мл҃твами стрⷭ҇тоте́рпца: И҆ ны́нѣ, Мл҃твами бцⷣы: Та́же припѣ́въ: Возвесели́тсѧ првⷣникъ ѡ҆ гдⷭ҇ѣ, и҆ ᲂу҆пова́етъ на него̀. и҆ пое́мъ стїхи́рꙋ ст҃а́гѡ самогла́снꙋ, гла́съ ѕ҃: Дне́сь вселе́ннаѧ всѧ̀: Та́же, мл҃тва: Сп҃сѝ бж҃е лю́ди твоѧ̑: и҆ Гдⷭ҇и поми́лꙋй, в҃і. По возгла́сѣ <<сч҃д: 587>> канѡ́нъ па́схи со і҆рмосо́мъ на и҃, и҆ ст҃а́гѡ на ѕ҃: Катава́сїа па́схи, ѻ҆́ба ли̑ка вкꙋ́пѣ. По г҃-й пѣ́сни, конда́къ и҆ і҆́косъ па́схи: и҆ чте́нїе. По ѕ҃-й пѣ́сни, конда́къ и҆ і҆́косъ ст҃а́гѡ, и҆ чте́нїе. Воскр҃съ і҆и҃съ: три́жды. Пое́мъ на ѻ҆́ба ли̑ка. По ѳ҃-й пѣ́сни, свѣти́ленъ па́схи: Сла́ва, ст҃а́гѡ: И҆ ны́нѣ, па́схи. На хвали́техъ стїхи̑ры воскрⷭ҇ны, трѝ: и҆ ст҃а́гѡ трѝ. Та́же стїхи̑ры па́схи, съ припѣ́вы и҆́хъ: Сла́ва, ст҃а́гѡ: И҆ ны́нѣ, па́схи, Воскрⷭ҇нїѧ де́нь: Хрⷭ҇то́съ воскр҃се: три́жды. Сла́ва, тропа́рь ст҃а́гѡ: И҆ ны́нѣ, бг҃оро́диченъ а҃-й. Є҆ктєнїѝ, и҆ ѿпꙋ́стъ. Часы́ же пою́тсѧ по ѻ҆бы́чаю. На лїтꙋргі́и, а҆нтїфѡ́ны па́схи. По вхо́дѣ, Хрⷭ҇то́съ воскр҃се: три́жды. та́же тропа́рь ст҃а́гѡ: Сла́ва, конда́къ є҆гѡ̀: И҆ ны́нѣ, па́схи. Вмѣ́стѡ же трист҃а́гѡ пое́мъ: Є҆ли́цы во хрⷭ҇та̀: Прокі́менъ, а҆по́столъ, А҆ллилꙋ́їа, є҆ѵⷢ҇лїе, и҆ прича́стенъ, пре́жде днѐ, и҆ ст҃а́гѡ.
[[комм.]] Ѡ҆ па́мѧти ст҃а́гѡ геѡ́ргїа, а҆́ще слꙋчи́тсѧ въ недѣ́лю ѳѡминꙋ̀.
Въ сꙋббѡ́тꙋ свѣ́тлыѧ недѣ́ли, на ма́лѣй вече́рни, на Гдⷭ҇и воззва́хъ, стїхи̑ры пра́здника, на д҃: Сла́ва, ст҃а́гѡ: И҆ ны́нѣ, пра́здника. На стїхо́внѣ стїхи̑ры ст҃а́гѡ, съ припѣ́вы є҆гѡ̀ вели́кїѧ вече́рни. Сла́ва, ст҃а́гѡ: И҆ ны́нѣ, пра́здника. Тропа́рь ст҃а́гѡ: Сла́ва, и҆ ны́нѣ, пра́здника. Є҆ктенїа̀ ма́лаѧ, и҆ ѿпꙋ́стъ. На вели́цѣй вече́рни, по ѻ҆бы́чнѣй каѳі́смѣ, на Гдⷭ҇и воззва́хъ, стїхи̑ры пра́здника, на ѕ҃: и҆ ст҃а́гѡ на д҃. Сла́ва, ст҃а́гѡ: И҆ ны́нѣ, пра́здника. Вхо́дъ, и҆ чте́нїе ст҃а́гѡ. На лїті́и стїхи̑ры пра́здника, и҆ ст҃а́гѡ: Сла́ва, ст҃а́гѡ: И҆ ны́нѣ, пра́здника: На стїхо́внѣ пра́здника: Сла́ва, ст҃а́гѡ: И҆ ны́нѣ, пра́здника. На бл҃гослове́нїи хлѣ́бѡвъ, тропа́рь пра́здника, два́жды: и҆ ст҃а́гѡ, є҆ди́ножды: и҆ чте́нїе въ дѣѧ́нїихъ а҆по́стольскихъ. На ᲂу҆́трени, на Бг҃ъ гдⷭ҇ь, тропа́рь пра́здника, <<сч҃д ѡ҆б.: 588>> два́жды: Сла́ва, ст҃а́гѡ: И҆ ны́нѣ, пра́здника. По каѳі́смахъ сѣда́льны пра́здника: и҆ чте́нїе. Полѷеле́й, и҆ сѣда́ленъ, и҆ чте́нїе пра́здника. Степє́нна, а҃-й а҆нтїфѡ́нъ д҃-гѡ гла́са. Прокі́менъ: Всѧ́кое дыха́нїе: Є҆ѵⷢ҇лїе пра́здника, матѳе́а, зача́ло рѕ҃і: Є҆динїина́десѧть ᲂу҆ч҃нцы̀: Воскрⷭ҇нїе хрⷭ҇то́во: три́жды. ѱало́мъ н҃. Сла́ва, Мл҃твами а҆пⷭ҇лѡвъ: И҆ ны́нѣ, Мл҃твами бцⷣы: Стїхи́ра: Воскр҃съ і҆и҃съ: Канѡ́нъ пра́здника, со і҆рмосо́мъ на и҃: и҆ ст҃а́гѡ на ѕ҃. Катава́сїа па́схи: Воскрⷭ҇нїѧ де́нь: ѻ҆́ба ли̑ка вкꙋ́пѣ. По г҃-й пѣ́сни, конда́къ и҆ і҆́косъ ст҃а́гѡ, и҆ сѣда́ленъ два́жды: Сла́ва, и҆ ны́нѣ, пра́здника, и҆ чте́нїе въ бг҃осло́вѣ, є҆мꙋ́же нача́ло: Ѡ҆бновле́нїемъ чти́тисѧ: По ѕ҃-й пѣ́сни, конда́къ и҆ і҆́косъ пра́здника, и҆ чте́нїе. По ѳ҃-й пѣ́сни, пое́мъ: Ст҃ъ гдⷭ҇ь бг҃ъ на́шъ: на гла́съ а҃. Свѣти́ленъ пра́здника: Сла́ва, ст҃а́гѡ: И҆ ны́нѣ, пра́здника. На хвали́техъ стїхи̑ры пра́здника г҃: и҆ ст҃а́гѡ г҃, пое́мъ же и҆ самогла́сенъ ст҃а́гѡ: Да помава́ютъ првⷣнаѧ: съ припѣ́вомъ є҆гѡ̀: Возвесели́тсѧ првⷣникъ ѡ҆ гдⷭ҇ѣ: Сла́ва, пра́здника: И҆ ны́нѣ, Пребл҃гослове́нна є҆сѝ бцⷣе: Славосло́вїе вели́кое. По трист҃о́мъ тропа́рь ст҃а́гѡ. Сла́ва, и҆ ны́нѣ, пра́здника, и҆ є҆ктєнїѝ, и҆ ѿпꙋ́стъ, и҆ ѡ҆глаше́нїе стꙋді́тово, и҆ ѻ҆бы́чное и҆схожде́нїе. Сла́ва, и҆ ны́нѣ, стїхи́ра є҆ѵⷢ҇льскаѧ, и҆ ча́съ а҃-й въ притво́рѣ. На часѣ́хъ, тропа́рь пра́здника: Сла́ва, ст҃а́гѡ: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, кондакѝ премѣнѧ́юще глаго́лемъ. На лїтꙋргі́и, бл҃жє́нна пра́здника, пѣ́снь г҃-ѧ, на д҃: и҆ ст҃а́гѡ пѣ́снь ѕ҃-ѧ на д҃. По вхо́дѣ тропа́рь пра́здника, и҆ ст҃а́гѡ. Сла́ва, конда́къ ст҃а́гѡ: И҆ ны́нѣ, пра́здника. Прокі́менъ, а҆по́столъ, А҆ллилꙋ́їа, є҆ѵⷢ҇лїе, и҆ прича́стенъ, пре́жде пра́здника, та́же ст҃а́гѡ.
<<сч҃є: 589>>
[[комм.]] А҆́ще слꙋчи́тсѧ па́мѧть ст҃а́гѡ великомч҃нка геѡ́ргїа въ недѣ́лю мѷроно́сицъ, и҆лѝ разсла́бленнагѡ, и҆лѝ самарѧны́ни.
Въ сꙋббѡ́тꙋ, на ма́лѣй вече́рни, на Гдⷭ҇и воззва́хъ, стїхи̑ры воскрⷭ҇ны д҃: Сла́ва, ст҃а́гѡ: И҆ ны́нѣ, бг҃оро́диченъ. На стїхо́внѣ стїхи́ра воскрⷭ҇на: и҆ ст҃а́гѡ стїхо́вна, вели́кїѧ вече́рни, съ припѣ́вы є҆гѡ̀. Сла́ва, ст҃а́гѡ: И҆ ны́нѣ, бг҃оро́диченъ. Тропа́рь воскрⷭ҇нъ: Сла́ва, ст҃а́гѡ: И҆ ны́нѣ, бг҃оро́диченъ. Є҆ктенїа̀ ма́лаѧ, и҆ ѿпꙋ́стъ. На вели́цѣй вече́рни, по ѻ҆бы́чной каѳі́смѣ, на Гдⷭ҇и воззва́хъ, стїхи̑ры воскрⷭ҇ны гла́са, трѝ: и҆ пра́здника г҃: и҆ ст҃а́гѡ д҃. Сла́ва, пра́здника, самогла́сенъ трїѡ́ди: И҆ ны́нѣ, бг҃оро́диченъ а҃-й, гла́са. Вхо́дъ. Прокі́менъ днѐ: и҆ чтє́нїѧ ст҃а́гѡ г҃. На лїті́и стїхи̑ры хра́ма, и҆ ст҃а́гѡ самогла́сны. Сла́ва, ст҃а́гѡ: И҆ ны́нѣ, пра́здника. На стїхо́внѣ стїхи́ра воскрⷭ҇на, и҆ па́схи. Сла́ва, ст҃а́гѡ: И҆ ны́нѣ, трїѡ́ди. На бл҃гослове́нїи хлѣ́бѡвъ тропа́рь, Бцⷣе дв҃о, два́жды: и҆ ст҃а́гѡ, є҆ди́ножды: и҆ чте́нїе въ дѣѧ́нїихъ а҆по́стольскихъ. [зрѝ] А҆́ще є҆́сть недѣ́лѧ мѷроно́сицъ, на Бг҃ъ гдⷭ҇ь, тропа́рь воскрⷭ҇нъ: Є҆гда̀ снизше́лъ є҆сѝ къ сме́рти: є҆ди́ножды. Бл҃гоѡбра́зный і҆ѡ́сифъ: є҆ди́ножды. Сла́ва, геѡ́ргїа: И҆ ны́нѣ, Мѷроно́сицамъ жена́мъ: [зрѝ] А҆́ще ли во и҆́ны недѣ̑ли, тропа́рь воскрⷭ҇нъ, два́жды: Сла́ва, ст҃а́гѡ: И҆ ны́нѣ, бг҃оро́диченъ а҃-й, въ то́йже гла́съ. По каѳі́смахъ сѣда́льны воскрⷭ҇ны, и҆ бг҃оро́дичны и҆́хъ, и҆ чте́нїе во є҆ѵⷢ҇лїи толково́мъ. Полѷеле́й, и҆ сѣда́льны ѻ҆́ба ст҃а́гѡ: Сла́ва, сѣда́ленъ по полѷеле́и. И҆ ны́нѣ, бг҃оро́диченъ: и҆ чте́нїе ст҃а́гѡ. Степє́нна, и҆ прокі́менъ гла́са. Всѧ́кое дыха́нїе: Є҆ѵⷢ҇лїе воскрⷭ҇но. Воскрⷭ҇нїе хрⷭ҇то́во: три́жды. ѱало́мъ н҃. стїхи́ра воскрⷭ҇на. Канѡ́нъ па́схи, со і҆рмосо́мъ и҆ съ бг҃оро́дичны и҆́хъ, на ѕ҃: и҆ ст҃а́гѡ на д҃: и҆ трїѡ́ди на д҃. Пое́мъ же си́це: на <<сч҃є ѡ҆б.: 590>> ко́ейждо пѣ́сни, тропа́рь воскрⷭ҇нъ є҆ди́нъ, и҆ пра́здника є҆ди́нъ, и҆ трⷪ҇ченъ, и҆ бг҃оро́диченъ. Катава́сїа, Воскрⷭ҇нїѧ де́нь: По г҃-й пѣ́сни, конда́къ и҆ і҆́косъ ст҃а́гѡ, и҆ сѣда́ленъ є҆гѡ̀ два́жды: Сла́ва, и҆ ны́нѣ, пра́здника: и҆ чте́нїе ст҃а́гѡ. По ѕ҃-й пѣ́сни, конда́къ и҆ і҆́косъ пра́здника. На ѳ҃-й пѣ́сни, Чⷭ҇тнѣ́йшꙋю не пое́мъ. Свѣти́ленъ па́схи. Сла́ва, ст҃а́гѡ: И҆ ны́нѣ, пра́здника. На хвали́техъ стїхи̑ры воскрⷭ҇ны д҃: и҆ ст҃а́гѡ д҃, со сла́внымъ, и҆ съ припѣ́вы є҆гѡ̀. Сла́ва, пра́здника: И҆ ны́нѣ, Пребл҃гослове́нна є҆сѝ: Славосло́вїе вели́кое По трист҃о́мъ тропа́рь воскрⷭ҇нъ, є҆ктєнїѝ, и҆ ѡ҆глаше́нїе, и҆ ѿпꙋ́стъ, и҆ ѻ҆бы́чное и҆схожде́нїе въ притво́ръ. Сла́ва, и҆ ны́нѣ, стїхи́ра є҆ѵⷢ҇льскаѧ, и҆ ча́съ а҃-й. На часѣ́хъ, тропа́рь воскрⷭ҇нъ: Сла́ва, ст҃а́гѡ: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, кондакѝ премѣнѧ́юще глаго́лемъ. На лїтꙋргі́и, бл҃жє́нна гла́са, на д҃, и҆ трїѡ́ди пѣ́снь г҃-ѧ на д҃: и҆ ст҃а́гѡ пѣ́снь ѕ҃-ѧ, на д҃. По вхо́дѣ тропа́рь воскрⷭ҇нъ, и҆ ст҃а́гѡ. Сла́ва, конда́къ ст҃а́гѡ: И҆ ны́нѣ, пра́здника. Прокі́менъ, а҆по́столъ, А҆ллилꙋ́їа, є҆ѵⷢ҇лїе, и҆ прича́стенъ пре́жде днѐ, та́же ст҃а́гѡ.
[[комм.]] А҆́ще слꙋчи́тсѧ ст҃а́гѡ великомч҃нка геѡ́ргїа въ сре́дꙋ преполове́нїѧ пѧтьдесѧ́тницы.
Во вто́рникъ ве́чера пое́мъ, Бл҃же́нъ мꙋ́жъ, а҃-й а҆нтїфѡ́нъ. На Гдⷭ҇и воззва́хъ, стїхи̑ры пра́здника г҃, и҆ ст҃а́гѡ г҃. Сла́ва, ст҃а́гѡ: И҆ ны́нѣ, пра́здника. Вхо́дъ. Прокі́менъ днѐ, и҆ чтє́нїѧ пра́здника г҃, и҆ ст҃а́гѡ г҃. На стїхо́внѣ стїхи̑ры пра́здника, съ припѣ́вы и҆́хъ. Сла́ва, ст҃а́гѡ: И҆ ны́нѣ, пра́здника. По трист҃о́мъ, тропа́рь ст҃а́гѡ: Сла́ва, и҆ ны́нѣ, пра́здника: и҆ ѿпꙋ́стъ. На ᲂу҆́трени, на Бг҃ъ гдⷭ҇ь, тропа́рь пра́здника, два́жды. Сла́ва, ст҃а́гѡ: И҆ ны́нѣ, пра́здника. По каѳі́смахъ сѣда́льны, и҆ чте́нїе пра́здника. <<сч҃ѕ: 591>> Полѷеле́й и҆ сѣда́льны всѝ ст҃а́гѡ, и҆ чте́нїе. Степє́нна, а҃-й а҆нтїфѡ́нъ д҃-гѡ гла́са: Прокі́менъ, Всѧ́кое дыха́нїе: є҆ѵⷢ҇лїе ст҃а́гѡ. Воскрⷭ҇нїе хрⷭ҇то́во: є҆ди́ножды. ѱало́мъ н҃, стїхи́ра ст҃а́гѡ. Канѡ́нъ пра́здника пе́рвый д҃-гѡ гла́са, со і҆рмосо́мъ на ѕ҃: и҆ ст҃а́гѡ, на д҃: и҆ пра́здника дрꙋгі́й канѡ́нъ, гла́съ и҃, на д҃. Катава́сїа, і҆рмо́съ послѣ́днѧгѡ канѡ́на пра́здника, ѻ҆́ба ли̑ка вкꙋ́пѣ. По г҃-й пѣ́сни, конда́къ и҆ і҆́косъ ст҃а́гѡ: и҆ сѣда́ленъ є҆гѡ̀ два́жды. Сла́ва, и҆ ны́нѣ, пра́здника. По ѕ҃-й пѣ́сни, конда́къ и҆ і҆́косъ пра́здника. На ѳ҃-й пѣ́сни, Чⷭ҇тнѣ́йшꙋю не пое́мъ. Свѣти́ленъ пра́здника: Сла́ва, ст҃а́гѡ: И҆ ны́нѣ, пра́здника. На хвали́техъ стїхи̑ры пра́здника г҃, и҆ ст҃а́гѡ г҃: Сла́ва, ст҃а́гѡ: И҆ ны́нѣ, пра́здника. Славосло́вїе вели́кое. По трист҃о́мъ тропа́рь ст҃а́гѡ: Сла́ва, и҆ ны́нѣ, пра́здника. та́же є҆ктєнїѝ и҆ ѿпꙋ́стъ: и҆ ча́съ а҃-й. На часѣ́хъ, тропа́рь пра́здника: Сла́ва, ст҃а́гѡ: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, кондакѝ пра́здника, и҆ ст҃а́гѡ, премѣнѧ́юще глаго́лемъ. На лїтꙋргі́и, бл҃жє́нна пра́здника, д҃-гѡ гла́са, пѣ́снь г҃- ѧ, на д҃: и҆ ст҃а́гѡ пѣ́снь ѕ҃-ѧ, на д҃. По вхо́дѣ тропа́рь пра́здника, и҆ ст҃а́гѡ. Сла́ва, конда́къ ст҃а́гѡ: И҆ ны́нѣ, пра́здника. Прокі́менъ, а҆по́столъ, А҆ллилꙋ́їа, є҆ѵⷢ҇лїе и҆ прича́стенъ пре́жде пра́здника, и҆ ст҃а́гѡ.
[[комм.]] А҆́ще ли слꙋчи́тсѧ великомч҃нка геѡ́ргїа въ недѣ́лю самарѧны́ни ѡ҆ставлѧ́етсѧ слꙋ́жба преполове́нїѧ пѧтьдесѧ́тницы, и҆ пое́тсѧ воскрⷭ҇на, и҆ самарѧны́ни, и҆ ст҃а́гѡ геѡ́ргїа.
к҃д. Ст҃а́гѡ мч҃нка са́ввы стратила́та.
Стїхи̑ры, гла́съ д҃. Подо́бенъ: Ꙗ҆́кѡ до́блѧ: Тропа́рь, гла́съ д҃: Мч҃нкъ тво́й гдⷭ҇и: септе́мврїа во в҃-й де́нь.
<<сч҃ѕ ѡ҆б.: 592>>
И҆лѝ се́й, гла́съ є҃:
Земна́гѡ са́на по́ѧсъ ѡ҆ста́вивъ, и҆ по́чєсти страда́льче, пред̾ мꙋчи́телемъ льсти́вымъ царе́мъ хрⷭ҇та̀ бг҃а сꙋ́ща и҆сповѣ́далъ є҆сѝ, и҆ тогѡ̀ ра́ди мнѡ́га страда̑нїѧ под̾ѧ́лъ є҆сѝ сла́вне: тѣ́мъ прекра́снымъ побѣ́ды вѣнце́мъ ᲂу҆вѧ́злсѧ є҆сѝ ѿ царѧ̀ всѣ́хъ црⷭ҇твꙋющагѡ, съ нбⷭ҇ными вѡ́и свѣ́тлѡ преꙋкра́шенъ. предстоѧ̀ томꙋ̀ са́вво, молѝ, да сп҃се́тъ дꙋ́шы на́шѧ.
На ᲂу҆́трени, канѡ́нъ, гла́съ в҃. По г҃-й пѣ́сни, сѣда́ленъ, гла́съ д҃. По ѕ҃-й пѣ́сни,
Конда́къ, гла́съ д҃. Подо́бенъ: Вознесы́йсѧ:
Непобѣди́мый ꙗ҆́вльсѧ стратила́тъ, ва̑рварскїѧ кѡ́зни побѣди́лъ є҆сѝ, и҆ страда́льчествовавъ сла́вне твердѣ́йши, мно́жество врагѡ́въ неви́димыхъ побори́лъ є҆сѝ. тѣ́мже вѣне́цъ и҆спле́лъ є҆сѝ побѣ́ды, ѡ҆ на́съ молѝ хрⷭ҇та̀ са́вво всебл҃же́нне, вѣ́рою почита́ющихъ тѧ̀.
к҃є. Ст҃а́гѡ а҆пⷭ҇ла и҆ є҆ѵⷢ҇лі́ста ма́рка.
На вели́цѣй вече́рни, пое́мъ, Бл҃же́нъ мꙋ́жъ, а҃-й а҆нтїфѡ́нъ. На Гдⷭ҇и воззва́хъ, стїхи̑ры на и҃: пра́здника г҃: и҆ а҆по́стола є҃, гла́съ а҃. Подо́бенъ: Нбⷭ҇ныхъ чинѡ́въ: Сла́ва, а҆пⷭ҇ла, гла́съ ѕ҃: И҆злїѧ́сѧ бл҃года́ть: И҆ ны́нѣ, пра́здника. Вхо́дъ, прокі́менъ днѐ, и҆ чтє́нїѧ г҃. Пи́саны сегѡ̀ мѣ́сѧца въ л҃-мъ числѣ̀. На стїхо́внѣ стїхи̑ры а҆пⷭ҇ла, гла́съ а҃-й. Подо́бенъ: Всехва́льнїи мч҃нцы: съ припѣ́вы и҆́хъ. Сла́ва, а҆пⷭ҇ла, гла́съ и҃: Прїиди́те нбⷭ҇нагѡ та́инства: И҆ ны́нѣ, пра́здника. По трист҃о́мъ,
Тропа́рь, гла́съ г҃:
А҆пⷭ҇ле ст҃ы́й и҆ є҆ѵⷢ҇лі́сте ма́рко, молѝ ми́лостиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.
<<сч҃з: 593>>
И҆лѝ се́й, гла́съ то́йже:
Оу҆ верхо́внагѡ петра̀ наꙋчи́всѧ, а҆пⷭ҇лъ хрⷭ҇то́въ бы́лъ є҆сѝ, и҆ ꙗ҆́кѡ со́лнце страна́мъ возсїѧ́лъ є҆сѝ, а҆леѯандрі́ѡмъ ᲂу҆добре́нїе бы́въ бл҃же́нне. тобо́ю є҆гѵ́петъ ѿ пре́лести свободи́сѧ, є҆ѵⷢ҇льскимъ твои́мъ ᲂу҆че́нїемъ просвѣ́щъ всѧ̑, ꙗ҆́кѡ свѣ́тъ сто́лпъ цр҃ко́вный. сегѡ̀ ра́ди твою̀ па́мѧть чтꙋ́ще, свѣ́тлѡ пра́зднꙋемъ ма́рко бг҃огла́се: молѝ тобо́ю бл҃говѣсти́маго бг҃а, да согрѣше́нїй ѡ҆ставле́нїе пода́стъ дꙋша́мъ на́шымъ.
Сла́ва, и҆ ны́нѣ, пра́здника: и҆ ѿпꙋ́стъ. На ᲂу҆́трени, на Бг҃ъ гдⷭ҇ь, тропа́рь пра́здника два́жды. Сла́ва, а҆пⷭ҇ла: И҆ ны́нѣ, пра́здника. По каѳі́смахъ сѣда́льны а҆пⷭ҇ла. Сла́ва, и҆ ны́нѣ, пра́здника, и҆ чте́нїе. По полѷеле́и сѣда́ленъ а҆пⷭ҇ла, два́жды, гла́съ и҃. Подо́бенъ: Премꙋ́дрости: Сла́ва, и҆ ны́нѣ, пра́здника. Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Во всю̀ зе́млю: Сті́хъ: Нб҃са̀ повѣ́даютъ: Всѧ́кое дыха́нїе: Є҆ѵⷢ҇лїе лꙋкѝ, зача́ло н҃: Ꙗ҆вѝ гдⷭ҇ь и҆ и҆нѣ́хъ се́дмьдесѧтъ. По н҃-мъ ѱалмѣ̀ стїхи́ра, гла́съ ѕ҃: И҆злїѧ́сѧ бл҃года́ть: пи́сана на Гдⷭ҇и воззва́хъ: Сла́ва: Канѡ́нъ пра́здника, со і҆рмосо́мъ на ѕ҃: и҆ а҆пⷭ҇ла на и҃, гла́съ а҃. Катава́сїа, Воскрⷭ҇нїѧ де́нь: По г҃-й пѣ́сни, конда́къ и҆ і҆́косъ пра́здника: и҆ сѣда́ленъ а҆пⷭ҇ла, гла́съ а҃. Подо́бенъ: Гро́бъ тво́й: Сла́ва, и҆ ны́нѣ, пра́здника. По ѕ҃-й пѣ́сни,
Конда́къ а҆пⷭ҇ла, гла́съ в҃: Подо́бенъ: Вы́шнихъ и҆щѧ̀:
Съ высоты̀ прїи́мъ бл҃года́ть дх҃а, ри́тѡрскаѧ плетє́нїѧ разрꙋши́лъ є҆сѝ а҆пⷭ҇ле, и҆ ꙗ҆зы́ки всѧ̑ ᲂу҆лови́въ, ма́рко всесла́вне, твоемꙋ̀ влⷣцѣ приве́лъ є҆сѝ бж҃е́ственное проповѣ́давъ є҆ѵⷢ҇лїе.
И҆ і҆́косъ, и҆ про́логъ. По ѳ҃-й пѣ́сни, свѣти́ленъ а҆пⷭ҇ла, два́жды. Сла́ва, и҆ ны́нѣ, пра́здника. На хвали́техъ стїхи̑ры пра́здника г҃: и҆ а҆пⷭ҇ла г҃, гла́съ а҃. Подо́бенъ: <<сч҃з ѡ҆б.: 594>> Всехва́льнїи мч҃нцы: Сла́ва, гла́съ ѕ҃: Премꙋ́дрый ло́вче: И҆ ны́нѣ, пра́здника: Славосло́вїе вели́кое. По трист҃о́мъ, тропа́рь а҆пⷭ҇ла. Сла́ва, и҆ ны́нѣ, пра́здника. Є҆ктєнїѝ, и҆ ѿпꙋ́стъ, и҆ ча́съ а҃. На лїтꙋргі́и, бл҃жє́нна, ѿ канѡ́на пра́здника, пѣ́снь рѧдова́ѧ на д҃, и҆ а҆пⷭ҇ла пѣ́снь г҃-ѧ, на д҃. Прокі́менъ, гла́съ и҃: Во всю̀ зе́млю: Сті́хъ, Нб҃са̀ повѣ́даютъ: А҆по́столъ, Собо́рнагѡ посла́нїѧ петро́ва, зача́ло ѯ҃г: Смири́тесѧ ᲂу҆́бѡ под̾ крѣ́пкꙋю рꙋ́кꙋ бж҃їю: А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̑ гдⷭ҇и. Є҆ѵⷢ҇лїе ма́рка, зача́ло к҃г: Призва̀ і҆и҃съ ѻ҆бана́десѧте: Прича́стенъ: Во всю̀ зе́млю:
к҃ѕ. Ст҃а́гѡ сщ҃енномч҃нка васі́лїа, є҆пⷭ҇кпа а҆масі́йскагѡ.
Стїхи̑ры, гла́съ д҃. Подо́бенъ: Ꙗ҆́кѡ до́блѧ: На стїхо́внѣ трїѡ́ди. На ᲂу҆́трени, канѡ́нъ, гла́съ д҃. По г҃-й пѣ́сни, сѣда́ленъ, гла́съ г҃. По ѕ҃-й пѣ́сни,
Конда́къ ст҃а́гѡ, гла́съ д҃. Подо́бенъ: Ꙗ҆ви́лсѧ є҆сѝ:
Царе́во повелѣ́нїе преѡби́дѣвъ, црⷭ҇тво нбⷭ҇ное полꙋчи́лъ є҆сѝ васі́лїе, въ не́мже ликꙋ́ѧ, помина́й на́съ чтꙋ́щихъ па́мѧть твою̀ сщ҃енномч҃нче.
И҆ ст҃а́гѡ ѻ҆тца̀ стефа́на, є҆пⷭ҇кпа пе́рмскагѡ.
Соверша́етсѧ собо́ръ є҆гѡ̀, и҆дѣ́же лежа́тъ мо́щи є҆гѡ̀, и҆ и҆дѣ́же хра́мъ є҆гѡ̀.
Тропа́рь, гла́съ д҃:
Бж҃е́ственнымъ жела́нїемъ ѿ ю҆́нагѡ во́зраста, стефа́не премꙋ́дре разже́гсѧ, ꙗ҆ре́мъ хрⷭ҇то́въ взѧ́лъ є҆сѝ, и҆ люде́й ѡ҆лѧденѣ̑вшаѧ дре́вле невѣ́рїемъ сердца̀, бж҃е́ственное сѣ́мѧ въ ни́хъ сѣ́ѧвъ, є҆ѵⷢ҇льски дх҃о́внѣ породи́лъ є҆сѝ. тѣ́мже пресла́внꙋю твою̀ па́мѧть <<сч҃и: 595>> почита́юще мо́лимъ тѧ̀: молѝ є҆го́же проповѣ́далъ є҆сѝ, да сп҃се́тъ дꙋ́шы на́шѧ.
Конда́къ, гла́съ и҃. Подо́бенъ: Взбра́нной:
Самозва́ненъ не и҆́щꙋщымъ тебѐ ст҃и́телю ѡ҆брѣ́лсѧ є҆сѝ, лю́ди ѿ і҆́дѡльскїѧ ле́сти свободи́въ, ко хрⷭ҇то́вѣй вѣ́рѣ приве́лъ є҆сѝ, и҆ волхва̀ пансо́тника посрами́лъ є҆сѝ: тѣ́мже и҆ пе́рвый є҆пⷭ҇кпъ и҆ ᲂу҆чи́тель пе́рми бы́лъ є҆сѝ. сегѡ̀ ра́ди дꙋхѡ́внаѧ твоѧ̑ ча̑да, ꙗ҆́кѡ тобо́ю и҆зба́вльшесѧ ѿ і҆́дѡлъ, бл҃года̑рнаѧ тебѣ̀ возопїе́мъ: ра́дꙋйсѧ стефа́не ᲂу҆чи́телю премꙋ́дрый.
к҃з. Ст҃а́гѡ сщ҃енномч҃нка сѷмеѡ́на, сро́дника гдⷭ҇нѧ.
Стїхи̑ры пра́здника г҃, и҆ а҆по́стола г҃, гла́съ д҃. Подо́бенъ: Ꙗ҆́кѡ до́блѧ: Сла́ва, и҆ ны́нѣ, пра́здника. На стїхо́внѣ пра́здника,
Тропа́рь, гла́съ а҃:
Хрⷭ҇то́ва тѧ̀ сро́дника, сѷмеѡ́не сщ҃еннонача́льниче, и҆ мч҃нка тве́рда сщ҃е́ннѡ восхвалѧ́емъ, пре́лесть потреби́вшаго, и҆ вѣ́рꙋ соблю́дшаго. тѣ́мже дне́сь всест҃ꙋ́ю твою̀ па́мѧть пра́зднꙋюще, грѣхѡ́въ разрѣше́нїе мл҃твами твои́ми прїе́млемъ.
На ᲂу҆́трени, на Бг҃ъ гдⷭ҇ь, тропа́рь пра́здника два́жды: Сла́ва, ст҃а́гѡ: И҆ ны́нѣ, пра́здника. По каѳі́смахъ сѣда́льны трїѡ́ди. Канѡ́нъ пра́здника, со і҆рмосо́мъ на ѕ҃: и҆ ст҃а́гѡ на ѕ҃, гла́съ д҃. По г҃-й пѣ́сни, конда́къ пра́здника, и҆ ст҃а́гѡ сѣда́ленъ, гла́съ д҃, два́жды. По ѕ҃-й пѣ́сни,
Конда́къ, гла́съ д҃. Подо́бенъ: Ꙗ҆ви́лсѧ є҆сѝ:
Ꙗ҆́кѡ ѕвѣздꙋ̀ преве́лїю, це́рковь и҆мꙋ́щи дне́сь бг҃оглаго́ливаго сѷмеѡ́на, свѣтово́дитсѧ зовꙋ́щи: ра́дꙋйсѧ мч҃нкѡвъ честны́й вѣ́нче.
<<сч҃и ѡ҆б.: 596>>
На лїтꙋргі́и, прокі́менъ, гла́съ и҃: Во всю̀ зе́млю и҆зы́де вѣща́нїе и҆́хъ: Сті́хъ: Нб҃са̀ повѣ́даютъ сла́вꙋ бж҃їю: А҆по́столъ къ корі́нѳѧнѡмъ, зача́ло рл҃а: Бг҃ъ ны̀ посла́нники: А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̑ гдⷭ҇и. Є҆ѵⷢ҇лїе матѳе́а, зача́ло н҃ѕ: Прїи́де і҆и҃съ во ѻ҆те́чествїе своѐ: Прича́стенъ, Во всю̀ зе́млю и҆зы́де:
к҃и. Ст҃ы́хъ а҆пⷭ҇лъ і҆а́сѡна и҆ сѡсїпа́тра: И҆ ст҃ы́хъ мч҃нкъ, да́ды, маѯі́ма и҆ кїнтїлїа́на.
Стїхи̑ры а҆пⷭ҇лѡвъ, гла́съ и҃. Подо́бенъ, Мч҃нцы твоѝ: и҆ мч҃нкѡвъ, гла́съ а҃. Подо́бенъ: Всехва́льнїи: Сла́ва, и҆ ны́нѣ, пра́здника. На стїхо́внѣ пра́здника. Тропа́рь, гла́съ г҃: А҆пⷭ҇ли ст҃і́и: ѻ҆ктѡ́врїа въ л҃а де́нь. На ᲂу҆́трени, канѡ́нъ а҆пⷭ҇лѡвъ, гла́съ и҃: и҆ мч҃нкѡвъ, гла́съ а҃-й. По г҃-й пѣ́сни,
Конда́къ а҆пⷭ҇лѡвъ, гла́съ д҃. Подо́бенъ: Ꙗ҆ви́лсѧ є҆сѝ:
Ꙗ҆ви́стесѧ ꙗ҆́кѡ ѕвѣ́зды пресвѣ̑тлыѧ, просвѣща́юще всю̀ вселе́ннꙋю свѣ́томъ проповѣ́данїѧ, а҆пⷭ҇ли бж҃е́ственнїи, і҆а́сѡне и҆ сѡсїпа́тре: сп҃са́йте вѣ́рою чтꙋ́щихъ ва́съ.
И҆ сѣда́ленъ, гла́съ и҃. Сла́ва, мч҃нкѡвъ, гла́съ а҃: И҆ ны́нѣ, пра́здника. По ѕ҃-й пѣ́сни, конда́къ и҆ і҆́косъ пра́здника.
к҃ѳ. Ст҃ы́хъ ѳ҃ мч҃нкѡвъ, и҆̀же въ кѵ́зїцѣ: И҆ прпⷣбнагѡ мемно́на чꙋдотво́рца.
Стїхи̑ры мч҃нкѡвъ г҃, гла́съ и҃. Подо́бенъ: Ѽ пресла́внагѡ чꙋдесѐ! И҆ прпⷣбнагѡ г҃, гла́съ и҃ подо́бенъ то́йже. <<сч҃ѳ: 597>> Сла́ва, и҆ ны́нѣ, пра́здника. На стїхо́внѣ пра́здника. На ᲂу҆́трени, канѡ́нъ мч҃нкѡвъ, гла́съ д҃: и҆ прпⷣбнагѡ, гла́съ то́йже. По г҃-й пѣ́сни,
Конда́къ ст҃ы́хъ, гла́съ в҃. Подо́бенъ: Вы́шнихъ и҆щѧ̀:
Тве́рдый и҆ всесвѣ́тлый ли́къ мч҃нкъ девѧтѝ, трисо́лнечнагѡ бж҃ества̀ и҆сповѣ̑дницы, на сꙋди́щи томꙋ̀ нача́льнѡ взыва́хꙋ: кро́вь и҆ дꙋ́шы на́шѧ съ тѣлесы̀, ꙗ҆́кѡ непоро́чнꙋю же́ртвꙋ прино́симъ тебѣ̀ влⷣко: въ ли́цѣхъ нбⷭ҇ныхъ твои́хъ сопричтѝ, ꙗ҆́кѡ бг҃ъ млⷭ҇тивый.
И҆ сѣда́ленъ, гла́съ а҃-й. Сла́ва, прпⷣбнагѡ, гла́съ и҃. И҆ ны́нѣ, пра́здника. По ѕ҃-й пѣ́сни, конда́къ и҆ і҆́косъ пра́здника.
л҃. Ст҃а́гѡ а҆пⷭ҇ла і҆а́кѡва, бра́та ст҃а́гѡ і҆ѡа́нна бг҃осло́ва.
На вели́цѣй вече́рни, пое́мъ, Бл҃же́нъ мꙋ́жъ а҃-й а҆нтїфѡ́нъ. На Гдⷭ҇и воззва́хъ, стїхи̑ры на и҃, пра́здника г҃, и҆ а҆пⷭ҇ла є҃, гла́съ д҃. Подо́бенъ: Ꙗ҆́кѡ до́блѧ: Сла́ва, а҆пⷭ҇ла, гла́съ и҃: Прїиди́те нбⷭ҇нагѡ та́инства: И҆ ны́нѣ, пра́здника. Вхо́дъ, прокі́менъ днѐ, и҆ чтє́нїѧ г҃, ѿ собо́рнагѡ посла́нїѧ і҆а́кѡвлѧ: а҃, І҆а́кѡвъ бг҃ꙋ и҆ гдⷭ҇ꙋ і҆и҃сꙋ хрⷭ҇тꙋ̀ ра́бъ: в҃, Никто́же и҆скꙋша́емь да глаго́летъ: г҃, Бра́тїе моѧ̑, не на лица̀ зрѧ́ще: На стїхо́внѣ стїхи̑ры а҆пⷭ҇ла, гла́съ и҃. Подо́бенъ: Ѽ пресла́внагѡ чꙋдесѐ! съ припѣ́вы и҆́хъ. Сла́ва, а҆пⷭ҇ла, гла́съ а҃: хрⷭ҇тꙋ̀ послѣ́довалъ є҆сѝ: И҆ ны́нѣ, пра́здника. По трист҃о́мъ,
Тропа́рь, гла́съ г҃:
А҆пⷭ҇ле ст҃ы́й і҆а́кѡве, молѝ млⷭ҇тиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.
<<сч҃ѳ ѡ҆б.: 598>>
И҆лѝ се́й, гла́съ то́йже:
А҆пⷭ҇лъ хрⷭ҇то́въ бы́лъ є҆сѝ и҆збра́нный, и҆ бг҃осло́вꙋ возлю́бленномꙋ бра́тъ є҆диноро́дный всехва́льне і҆а́кѡве, пою́щымъ тѧ̀ грѣхѡ́въ ѡ҆ставле́нїе и҆спросѝ, и҆ дꙋша́мъ на́шымъ ве́лїю млⷭ҇ть.
Сла́ва, и҆ ны́нѣ, пра́здника, и҆ ѿпꙋ́стъ. На ᲂу҆́трени, на Бг҃ъ гдⷭ҇ь, тропа́рь пра́здника два́жды. Сла́ва, а҆пⷭ҇ла: И҆ ны́нѣ, пра́здника. По каѳі́смахъ, сѣда́льны а҆пⷭ҇ла. Сла́ва, и҆ ны́нѣ, пра́здника, и҆ чте́нїе. По полѷеле́и сѣда́ленъ а҆пⷭ҇ла два́жды, гла́съ и҃. Подо́бенъ: Премꙋ́дрости: Сла́ва, и҆ ны́нѣ, пра́здника. Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Во всю̀ зе́млю: Сті́хъ: Нб҃са̀ повѣ́даютъ: Всѧ́кое дыха́нїе: Є҆ѵⷢ҇лїе і҆ѡа́нна, зача́ло ѯ҃з: Ꙗ҆ви́сѧ і҆и҃съ ᲂу҆ч҃нкѡ́мъ свои̑мъ: По н҃-мъ ѱалмѣ̀ стїхи́ра, гла́съ а҃: хрⷭ҇тꙋ̀ послѣ́довалъ є҆сѝ: пи́сана на стїхо́внѣ: Сла́ва. Канѡ́нъ пра́здника, со і҆рмосо́мъ на ѕ҃, и҆ а҆пⷭ҇ла на и҃, гла́съ и҃. Катава́сїа пра́здника. По г҃-й пѣ́сни конда́къ, и҆ і҆́косъ пра́здника, и҆ сѣда́ленъ а҆пⷭ҇ла, гла́съ в҃: Оу҆лови́въ ꙗ҆зы́ки: Сла́ва, и҆ ны́нѣ, пра́здника, и҆лѝ бг҃оро́диченъ. По ѕ҃-й пѣ́сни,
Конда́къ а҆пⷭ҇ла, гла́съ в҃. Подо́бенъ: Вы́шнихъ и҆щѧ̀:
Гла́съ бж҃е́ственный слы́шавъ призыва́ющъ тѧ̀, любо́вь ѻ҆тца̀ презрѣ́лъ є҆сѝ, и҆ прите́клъ є҆сѝ, ко хрⷭ҇тꙋ̀, і҆а́кѡве съ сро́дникомъ твои́мъ сла́вне: съ ни́мже сподо́билсѧ є҆сѝ ви́дѣти гдⷭ҇не бж҃е́ственное преѡбраже́нїе.
И҆ і҆́косъ, и҆ про́логъ. По ѳ҃-й пѣ́сни свѣти́ленъ а҆пⷭ҇ла два́жды. Подо́бенъ: Жєны̀ ᲂу҆слы́шите: Сла́ва, и҆ ны́нѣ, пра́здника. На хвали́техъ стїхи̑ры пра́здника г҃, и҆ а҆пⷭ҇ла г҃, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, а҆пⷭ҇ла, гла́съ ѕ҃: Премꙋ́дрый ло́вче: И҆ ны́нѣ, пра́здника. <<т҃: 599>> Славосло́вїе вели́кое. По трист҃о́мъ тропа́рь а҆пⷭ҇ла. Сла́ва: и҆ ны́нѣ, пра́здника: Є҆ктєнїѝ, и҆ ѿпꙋ́стъ, и҆ ча́съ а҃. На лїтꙋргі́и, бл҃жє́нна ѿ канѡ́на пра́здника, пѣ́снь рѧдова́ѧ на д҃: и҆ а҆по́стола пѣ́снь г҃-ѧ на д҃. Прокі́менъ, гла́съ и҃: Во всю̀ зе́млю: Сті́хъ: Нб҃са̀ повѣ́даютъ: А҆по́столъ дѣѧ́нїй, зача́ло к҃ѳ: Возложѝ и҆́рѡдъ ца́рь рꙋ́цѣ: А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̑ гдⷭ҇и. Є҆ѵⷢ҇лїе лꙋкѝ, зача́ло з҃і: Стоѧ́ше і҆и҃съ при є҆́зерѣ геннисаре́тстѣ: Прича́стенъ: Во всю̀ зе́млю:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.