Припѣ́вы на ѳ҃-й пѣ́сни, на гдⷭскїѧ пра́здники, и҆ бг҃оро́дичны
Припѣ́вы на ѳ҃-й пѣ́сни, на гдⷭ҇скїѧ пра́здники.
Ржⷭ҇твꙋ̀ бцⷣы.
На ѳ҃-й пѣ́сни, Чтⷭ҇нѣ́йшꙋю не пое́мъ, но пое́мъ припѣ́въ пра́здника:
Велича́й, дꙋшѐ моѧ̀, пресла́вное ржⷭ҇тво̀ бж҃їѧ мт҃ре.
Посе́мъ і҆рмо́съ: Ꙗ҆́же пре́жде со́лнца:
Та́же вторы́й ли́къ пое́тъ то́йже припѣ́въ и҆ і҆рмо́съ.
И҆ на кі́йждо тропа́рь пою́тъ то́йже припѣ́въ пра́здника шестью̀, на ѻ҆́ба ли̑ка.
Та́же пе́рвый ли́къ пое́тъ втора́гѡ канѡ́на припѣ́въ:
Велича́й, дꙋшѐ моѧ̀, ѿ непло́дове ро́ждшꙋюсѧ дв҃ꙋ мр҃і́ю.
Посе́мъ і҆рмо́съ: Чꙋ́жде ма́теремъ дѣ́вство:
И҆ вторы́й ли́къ пое́тъ то́йже припѣ́въ и҆ і҆рмо́съ:
И҆ на кі́йждо тропа́рь пою́тъ то́йже припѣ́въ ѕ҃-ю.
Та́же ѻ҆́ба ли̑ка, соше́дшесѧ вкꙋ́пѣ, пою́тъ пе́рвагѡ канѡ́на припѣ́въ и҆ і҆рмо́съ:
Та́инъ є҆сѝ бцⷣе ра́й:
Та́же втора́гѡ канѡ́на припѣ́въ и҆ і҆рмо́съ: Снѣ́дїю дре́ва: И҆ покло́нъ.
На воздви́женїе чⷭ҇тна́гѡ крⷭ҇та̀:
Велича́й, дꙋшѐ моѧ̀, пречⷭ҇тны́й крⷭ҇тъ гдⷭ҇нь.
Посе́мъ і҆рмо́съ: Та́инъ є҆сѝ бцⷣе ра́й:
Та́же вторы́й ли́къ пое́тъ то́йже припѣ́въ и҆ і҆рмо́съ.
И҆ на кі́йждо тропа́рь пою́тъ то́йже припѣ́въ пра́здника ѕ҃-ю на ѻ҆́ба ли̑ка.
Та́же пе́рвый ли́къ пое́тъ втора́гѡ канѡ́на припѣ́въ:
Велича́й, дꙋшѐ моѧ̀, животворѧ́щагѡ крⷭ҇та̀ гдⷭ҇нѧ воздви́женїе.
Посе́мъ і҆рмо́съ: Снѣ́дїю дре́ва:
И҆ вторы́й ли́къ пое́тъ то́йже припѣ́въ и҆ і҆рмо́съ.
И҆ на кі́йждо тропа́рь пою́тъ то́йже припѣ́въ ѕ҃-ю.
Та́же ѻ҆́ба ли̑ка, соше́дшесѧ вкꙋ́пѣ, пою́тъ пе́рвагѡ канѡ́на припѣ́въ и҆ і҆рмо́съ:
Та́инъ є҆сѝ бцⷣе ра́й:
Та́же втора́гѡ канѡ́на припѣ́въ и҆ і҆рмо́съ: Снѣ́дїю дре́ва: И҆ покло́нъ.
Введе́нїю прест҃ы́ѧ бцⷣы:
А҆́гг҃ли, вхожде́нїе пречⷭ҇тыѧ зрѧ́ще, ᲂу҆диви́шасѧ, ка́кѡ дв҃а вни́де во ст҃а̑ѧ ст҃ы́хъ.
Посе́мъ і҆рмо́съ: Ꙗ҆́кѡ ѡ҆дꙋшевле́нномꙋ бж҃їю кївѡ́тꙋ:
Та́же вторы́й ли́къ пое́тъ то́йже припѣ́въ и҆ і҆рмо́съ.
Про́чихъ же ше́сть припѣ́вѡвъ на кі́йждо тропа́рь по є҆ди́ножды:
А҆́гг҃ли вхожде́нїе всечⷭ҇тыѧ зрѧ́ще, ᲂу҆диви́шасѧ: ка́кѡ со сла́вою вни́де во ст҃а̑ѧ ст҃ы́хъ.
А҆́гг҃ли вхожде́нїе дв҃ы зрѧ́ще, ᲂу҆диви́шасѧ, ка́кѡ пресла́внѡ вни́де во ст҃а̑ѧ ст҃ы́хъ.
А҆́гг҃ли и҆ человѣ́цы, дв҃ы вхожде́нїе почти́мъ: ꙗ҆́кѡ со сла́вою вни́де во ст҃а̑ѧ ст҃ы́хъ.
А҆́гг҃ли вхожде́нїе дв҃ы зрѧ́ще, ᲂу҆диви́шасѧ, ка́кѡ бг҃оꙋго́днѣ вни́де во ст҃а̑ѧ ст҃ы́хъ.
А҆́гг҃ли взыгра́йте со ст҃ы́ми, дѣ̑вы сликовствꙋ́йте: и҆́бо бг҃оѻтрокови́ца вни́де во ст҃а̑ѧ ст҃ы́хъ.
А҆́гг҃ли и҆ человѣ́цы дв҃ꙋ пѣ́сньми возвели́чимъ: бг҃олѣ́пнѡ бо вни́де во ст҃а̑ѧ ст҃ы́хъ.
Та́же пе́рвый ли́къ пое́тъ втора́гѡ канѡ́на припѣ́въ:
Велича́й, дꙋшѐ моѧ̀, приведе́ннꙋю во хра́мъ гдⷭ҇нь, и҆ бл҃гослове́ннꙋю рꙋка́ми і҆ере́евыми.
Посе́мъ і҆рмо́съ: Свѣтоно́сный ѻ҆́блакъ:
И҆ вторы́й ли́къ пое́тъ то́йже припѣ́въ и҆ і҆рмо́съ.
И҆ на кі́йждо тропа́рь пою́тъ то́йже припѣ́въ.
Вмѣ́стѡ же, Сла́ва:
Велича́й, дꙋшѐ моѧ̀, трїѷпоста́снагѡ и҆ нераздѣ́льнагѡ бж҃ества̀ держа́вꙋ.
Вмѣ́стѡ, И҆ ны́нѣ:
Велича́й, дꙋшѐ моѧ̀, чⷭ҇тнѣ́йшꙋю и҆ сла́внѣйшꙋю го́рнихъ во́инствъ, дв҃ꙋ пречⷭ҇тꙋю бцⷣꙋ.
Та́же ѻ҆́ба ли̑ка, соше́дшесѧ вкꙋ́пѣ, пою́тъ припѣ́въ пе́рвагѡ канѡ́на: А҆́гг҃ли вхожде́нїе:
И҆ і҆рмо́съ: Та́инство стра́нное ви́жꙋ:
На ржⷭ҇тво̀ хрⷭ҇то́во:
Велича́й, дꙋшѐ моѧ̀, чⷭ҇тнѣ́йшꙋю и҆ сла́внѣйшꙋю го́рнихъ во́инствъ, дв҃ꙋ пречⷭ҇тꙋю бцⷣꙋ.
Посе́мъ і҆рмо́съ: Та́инство стра́нное ви́жꙋ:
Та́же вторы́й ли́къ пое́тъ то́йже припѣ́въ и҆ і҆рмо́съ.
И҆ про́чихъ ше́сть припѣ́вѡвъ припѣва́ютъ на кі́йждо тропа́рь по є҆ди́ножды:
Велича́й, дꙋшѐ моѧ̀, ѿ дв҃ы бг҃а пло́тїю ро́ждшагосѧ.
Велича́й, дꙋшѐ моѧ̀, въ верте́пѣ ро́ждшагосѧ цр҃ѧ̀.
Велича́й, дꙋшѐ моѧ̀, ѿ волхвѡ́въ бг҃а покланѧ́емаго.
Велича́й, дꙋшѐ моѧ̀, ѿ ѕвѣзды̀ волхвѡ́мъ возвѣще́ннаго.
Велича́й, дꙋшѐ моѧ̀, чтⷭ҇ꙋю дв҃ꙋ, и҆ є҆ди́нꙋ бцⷣꙋ, ро́ждшꙋю хрⷭ҇та̀ цр҃ѧ̀.
Волсвѝ и҆ па́стырїе прїидо́ша поклони́тисѧ хрⷭ҇тꙋ̀, ро́ждшемꙋсѧ во виѳлее́мѣ гра́дѣ.
Та́же пе́рвый ли́къ пое́тъ втора́гѡ канѡ́на припѣ́въ.
Дне́сь дв҃а ражда́етъ влⷣкꙋ внꙋ́трь верте́па.
Посе́мъ і҆рмо́съ: Люби́ти ᲂу҆́бѡ на́мъ:
Вторы́й же ли́къ пое́тъ припѣ́въ:
Дне́сь влⷣка ражда́етсѧ ꙗ҆́кѡ млⷣнецъ, ѿ мт҃ре дв҃ы.
И҆ і҆рмо́съ то́йже.
И҆ про́чихъ ше́сть припѣ́вѡвъ, на кі́йждо тропа́рь по є҆ди́ножды:
Дне́сь па́стырїе ви́дѧтъ сп҃са пелена́ми ѡ҆бви́та, и҆ лежа́ща во ꙗ҆́слехъ.
Дне́сь влⷣка рꙋ́бищемъ пелена́етсѧ, неѡсѧ́зный ꙗ҆́кѡ младе́нецъ.
Дне́сь всѧ́ка тва́рь весели́тсѧ и҆ ра́дꙋетсѧ, ꙗ҆́кѡ хрⷭ҇то́съ роди́сѧ ѿ дв҃ы ѻ҆трокови́цы.
Нбⷭ҇ныѧ си̑лы ро́ждшагосѧ сп҃са гдⷭ҇а и҆ влⷣкꙋ возвѣща́ютъ мі́рꙋ.
Вмѣ́стѡ, Сла́ва:
Велича́й, дꙋшѐ моѧ̀, трїѷпоста́снагѡ и҆ нераздѣ́льнагѡ бж҃ества̀ держа́вꙋ.
Вмѣ́стѡ же, И҆ ны́нѣ:
Велича́й, дꙋшѐ моѧ̀, и҆зба́вльшꙋю на́съ ѿ клѧ́твы.
Та́же ѻ҆́ба ли̑ка, соше́дшесѧ вкꙋ́пѣ, пою́тъ пе́рвый припѣ́въ пра́здника и҆ і҆рмо́съ: Та́инство стра́нное ви́жꙋ: Посе́мъ втора́гѡ канѡ́на припѣ́въ и҆ і҆рмо́съ: Люби́ти ᲂу҆́бѡ на́мъ: И҆ покло́нъ.
Ѡ҆брѣ́занїю хрⷭ҇та̀ бг҃а на́шегѡ:
Велича́й, дꙋшѐ моѧ̀, по зако́нꙋ пло́тїю ѡ҆брѣ́завшагосѧ гдⷭ҇а.
Посе́мъ і҆рмо́съ: Ꙗ҆́же пре́жде со́лнца:
Та́же вторы́й ли́къ пое́тъ то́йже припѣ́въ и҆ і҆рмо́съ:
Про́чыѧ же трѝ припѣва́емъ къ тропарє́мъ, [є҆ди́нъ два́жды]:
Велича́й, дꙋшѐ моѧ̀, во ѻ҆смы́й де́нь ѡ҆брѣ́занїе прїе́млюща.
Дне́сь влⷣка ѡ҆брѣ́зꙋетсѧ пло́тїю ꙗ҆́кѡ младе́нецъ, и҆сполнѧ́ѧ зако́нъ.
Дне́сь влⷣка пло́тїю ѡ҆брѣ́засѧ, і҆и҃съ нарече́сѧ.
Є҆гда́ же дости́гнемъ до канѡ́на вели́кагѡ васі́лїа, пое́мъ припѣ́вы васі́лїю д҃, [трѝ по два́жды.]
Велича́й, дꙋшѐ моѧ̀, во і҆ера́рсѣхъ васі́лїа вели́каго.
Велича́й, дꙋшѐ моѧ̀, вселе́нныѧ пресвѣ́тлаго свѣти́льника.
Велича́й, дꙋшѐ моѧ̀, ѿ кесарі́и васі́лїа вели́каго.
Вмѣ́стѡ, Сла́ва: Велича́й, дꙋшѐ моѧ̀, ᲂу҆краси́вшаго хрⷭ҇то́вꙋ цр҃ковь.
Вмѣ́стѡ же, И҆ ны́нѣ, пое́мъ припѣ́въ бцⷣѣ: Велича́й, дꙋшѐ моѧ̀, чтⷭ҇нѣ́йшꙋю нбⷭ҇ныхъ во́инствъ, дв҃ꙋ пречⷭ҇тꙋю бцⷣꙋ.
Та́же ѻ҆́ба ли̑ка, соше́дшесѧ вкꙋ́пѣ, пою́тъ пе́рвый припѣ́въ пра́здника и҆ і҆рмо́съ: Недоꙋмѣ́етъ всѧ́къ ѧ҆зы́къ: Посе́мъ припѣ́въ бцⷣѣ, и҆ і҆рмо́съ: Ѽ па́че ᲂу҆ма̀: И҆ покло́нъ.
На бг҃оѧвле́нїе гдⷭ҇не:
Велича́й, дꙋшѐ моѧ̀, чⷭ҇тнѣ́йшꙋю го́рнихъ во́инствъ, дв҃ꙋ пречⷭ҇тꙋю бцⷣꙋ.
Посе́мъ і҆рмо́съ: Недоꙋмѣ́етъ всѧ́къ ѧ҆зы́къ:
Та́же вторы́й ли́къ пое́тъ то́йже припѣ́въ и҆ і҆рмо́съ.
И҆ про́чихъ ше́сть припѣ́вѡвъ припѣва́ютъ на кі́йждо тропа́рь по є҆ди́ножды:
Велича́й, дꙋшѐ моѧ̀, ѿ прⷣте́чи кр҃ще́нїѧ просѧ́ща.
Велича́й, дꙋшѐ моѧ̀, во і҆ѻрда́нѣ прише́дшаго крⷭ҇ти́тисѧ.
Велича́й, дꙋшѐ моѧ̀, ѿ ѻ҆те́ческагѡ гла́са свидѣ́тельствованна.
Велича́й, дꙋшѐ моѧ̀, є҆ди́наго ѿ трⷪ҇цы, прекло́ньшаго вы́ю, и҆ кр҃ще́нїе прїе́мша.
Прⷪ҇ро́че, прїидѝ ко мнѣ̀, прострѝ рꙋ́кꙋ, и҆ крⷭ҇ти́ мѧ ско́рѡ.
Прⷪ҇ро́че, ѡ҆ста́ви ны́нѣ, и҆ крⷭ҇ти́ мѧ хотѧ́ща: и҆спо́лнити бо прїидо́хъ всѧ́кꙋ пра́вдꙋ.
Та́же пе́рвый ли́къ пое́тъ втора́гѡ канѡ́на припѣ́въ:
Дне́сь влⷣка преклонѧ́етъ вы́ю под̾ рꙋ́кꙋ прⷣте́чевꙋ.
И҆ і҆рмо́съ: Ѽ па́че ᲂу҆ма̀:
Та́же вторы́й ли́къ пое́тъ то́йже припѣ́въ и҆ і҆рмо́съ.
И҆ про́чихъ пѧ́ть припѣ́вѡвъ, [є҆ди́нъ два́жды.]
Дне́сь і҆ѡа́ннъ кр҃ща́етъ влⷣкꙋ во стрꙋѧ́хъ і҆ѻрда́нскихъ.
Дне́сь влⷣка вода́ми погреба́етъ человѣ́ческїй грѣ́хъ.
Дне́сь влⷣка свы́ше свидѣ́тельствꙋетсѧ, сн҃ъ возлю́бленный.
Дне́сь влⷣка прїи́де ѡ҆ст҃и́ти є҆стество̀ водно́е.
Дне́сь влⷣка кр҃ще́нїе прїе́млетъ рꙋко́ю предте́чевою.
Та́же ѻ҆́ба ли̑ка, соше́дшесѧ вкꙋ́пѣ, пою́тъ пе́рвый припѣ́въ пра́здника и҆ і҆рмо́съ: Недоꙋмѣ́етъ всѧ́къ ѧ҆зы́къ: Посе́мъ втора́гѡ канѡ́на припѣ́въ, и҆ і҆рмо́съ: Ѽ па́че ᲂу҆ма̀: И҆ покло́нъ.
Къ тропарє́мъ прⷣте́чєвымъ припѣ́въ:
[Мѣ́сѧца і҆аннꙋа́рїа въ з҃-й де́нь.]
Велича́й, дꙋшѐ моѧ̀, во прⷪ҇ро́цѣхъ вели́каго прⷣте́чꙋ.
Къ бг҃оро́дичнꙋ же припѣ́въ пра́здника пе́рвый. И҆ посе́мъ на схо́дѣ пое́мъ ѻ҆́ба ли̑ка вкꙋ́пѣ припѣ́въ пра́здника, та́же катава́сїа: Недоꙋмѣ́етъ всѧ́къ ѧ҆зы́къ: Та́же припѣ́въ бцⷣѣ, и҆ і҆рмо́съ: Ѽ па́че ᲂу҆ма̀: И҆ покло́нъ.
Трїе́мъ ст҃и́телємъ: васі́лїю вели́комꙋ, григо́рїю бг҃осло́вꙋ, и҆ і҆ѡа́ннꙋ златоꙋ́стꙋ.
[Мѣ́сѧца тогѡ́же въ л҃-й де́нь.]
На ѳ҃-й пѣ́сни припѣ́въ:
Велича́й, дꙋшѐ моѧ̀, чⷭ҇тнѣ́йшꙋю нбⷭ҇ныхъ во́инствъ, дв҃ꙋ пречⷭ҇тꙋю бцⷣꙋ.
Та́же і҆рмо́съ.
Посе́мъ то́йже припѣ́въ пое́мъ и҆ къ про́чымъ бг҃орѡ́дичнымъ тропарє́мъ.
Къ канѡ́нѡмъ же ст҃ы́хъ, на кі́йждо тропа́рь пое́мъ припѣ́вы сі́и:
Велича́й, дꙋшѐ моѧ̀, во і҆ера́рсѣхъ свѣти̑ла трѝ вели̑каѧ.
Велича́й, дꙋшѐ моѧ̀, трисїѧ̑тельныѧ хрⷭ҇то́вы цр҃кве.
Велича́й, дꙋшѐ моѧ̀, просвѣща́ющыѧ хрⷭ҇то́вꙋ цр҃ковь.
Велича́й, дꙋшѐ моѧ̀, чⷭ҇тнѣ́йшꙋю нбⷭ҇ныхъ во́инствъ, дв҃ꙋ пречⷭ҇тꙋю бцⷣꙋ.
Велича́й, дꙋшѐ моѧ̀, прест҃ы́ѧ трⷪ҇цы трѝ па́стыри.
Велича́й, дꙋшѐ моѧ̀, ѿ трисо́лнечнагѡ свѣти̑ла трѝ вели̑каѧ.
Велича́й, дꙋшѐ моѧ̀, трїѷпоста́снагѡ и҆ нераздѣ́льнагѡ бж҃ества̀ держа́вꙋ.
Велича́й, дꙋшѐ моѧ̀, чтⷭ҇нѣ́йшꙋю нбⷭ҇ныхъ во́инствъ, дв҃ꙋ пречⷭ҇тꙋю бцⷣꙋ.
Катава́сїа: Въ зако́нѣ сѣ́ни и҆ писа́нїй:
На срѣ́тенїе гдⷭ҇не:
Бцⷣе дв҃о, ᲂу҆пова́нїе хрⷭ҇тїа́нѡмъ, покры́й, соблюдѝ и҆ сп҃сѝ на тѧ̀ ᲂу҆пова́ющихъ.
Бцⷣе дв҃о, мі́рꙋ бл҃га́ѧ помо́щнице, покры́й и҆ соблюдѝ ѿ всѧ́кїѧ нꙋ́жды и҆ печа́ли.
Бг҃оно́се сѷмеѡ́не, прїидѝ, под̾имѝ хрⷭ҇та̀, є҆го́же родѝ дв҃а чⷭ҇таѧ мр҃і́а.
Ѡ҆б̾е́млетъ рꙋка́ми ста́рецъ сѷмеѡ́нъ содѣ́телѧ зако́на, и҆ влⷣкꙋ всѧ́ческихъ.
Не ста́рецъ менѐ держи́тъ, но а҆́зъ держꙋ̀ є҆го̀: то́й бо ѿ менѐ ѿпꙋще́нїѧ про́ситъ.
Клещѐ та́инственнаѧ, ка́кѡ ᲂу҆́гль но́сиши; ка́кѡ пита́еши пита́ющаго всѧ̑;
Ѽ дщѝ фанꙋ́илева! прїидѝ, ста́ни съ на́ми, и҆ бл҃годарѝ хрⷭ҇та̀ сп҃са сн҃а бж҃їѧ.
А҆́нна цѣломꙋ́дреннаѧ провѣща́етъ стра̑шнаѧ, и҆сповѣ́дающи хрⷭ҇та̀, творца̀ не́бꙋ и҆ землѝ.
Непостижи́мо є҆́сть содѣ́ѧнное ѡ҆ тебѣ̀ а҆́гг҃лѡмъ и҆ человѣ́кѡмъ, мт҃и дв҃о чⷭ҇таѧ.
Чтⷭ҇аѧ голꙋби́ца, нескве́рнаѧ а҆́гница, а҆́гнца и҆ па́стырѧ прино́ситъ въ цр҃ковь.
Ѽ хрⷭ҇тѐ всѣ́хъ цр҃ю̀! побѣ̑ды на врагѝ вѣ́рномꙋ твоемꙋ̀ рабꙋ̀ і҆мпера́торꙋ на́шемꙋ да́рꙋй.
Ѽ хрⷭ҇тѐ, всѣ́хъ цр҃ю̀! пода́ждь мѝ сле́зы теплы̀, да пла́чꙋ мою̀ дꙋ́шꙋ, ю҆́же ѕлѣ̀ погꙋби́хъ.
Вмѣ́стѡ, Сла́ва:
Трисїѧ́тельное, и҆ трїѷпоста́сное бж҃ество̀, бл҃гоче́стнѡ да похва́лимъ.
Вмѣ́стѡ, И҆ ны́нѣ:
Ѽ дв҃и́це мр҃і́е просвѣтѝ мою̀ дꙋ́шꙋ, помраче́ннꙋю лю́тѣ жите́йскими сластьмѝ.
Вѣ́домо да бꙋ́детъ, ꙗ҆́кѡ два̀ сꙋ́щыѧ припѣ́вы въ нача́лѣ припѣва́емъ ко і҆рмосꙋ̀. Та́же къ коемꙋ́ждо тропарю̀ припѣва́емъ по д҃ припѣ́вы. И҆ по соверше́нїи д҃і припѣ́вѡвъ съ тропарѝ, къ катава́сїи пое́мъ ѻ҆́ба ли̑ка вкꙋ́пѣ припѣ́въ пе́рвый: Бцⷣе дв҃о, ᲂу҆пова́нїе хрⷭ҇тїа́нѡмъ:
На бл҃говѣ́щенїе прест҃ы́ѧ бцⷣы:
Бл҃говѣствꙋ́й землѐ ра́дость ве́лїю, хвали́те нб҃са̀ бж҃їю сла́вꙋ.
Та́же і҆рмо́съ: Ꙗ҆́кѡ ѡ҆дꙋшевле́нномꙋ:
Подо́бнѣ и҆ в҃-й ли́къ припѣ́въ и҆ і҆рмо́съ.
И҆ къ про́чымъ тропарє́мъ пра́здника то́йже припѣ́въ. Оу҆ трипѣ́снца же къ тропарє́мъ припѣва́емъ: Сла́ва тебѣ̀ бж҃е на́шъ, сла́ва тебѣ̀.
На вознесе́нїе гдⷭ҇не:
Велича́й дꙋшѐ моѧ̀, возне́сшагосѧ ѿ землѝ на нб҃о, хрⷭ҇та̀ жизнода́вца.
Та́же і҆рмо́съ пе́рвагѡ канѡ́на: Тѧ̀ па́че ᲂу҆ма̀:
И҆ вторы́й ли́къ пое́тъ то́йже припѣ́въ и҆ і҆рмо́съ.
И҆ на кі́йждо тропа́рь пою́тъ то́йже припѣ́въ шестью̀.
Та́же пое́мъ и҆ втора́гѡ канѡ́на припѣ́въ:
А҆́гг҃ли восхожде́нїе влⷣки зрѧ́ще, ᲂу҆жаса́хꙋсѧ, ка́кѡ со сла́вою взѧ́тсѧ ѿ землѝ на гѡ́рнѧѧ.
И҆ і҆рмо́съ: Всѧ́къ земноро́дный:
И҆ вторы́й ли́къ пое́тъ то́йже припѣ́въ и҆ і҆рмо́съ. И҆ на кі́йждо тропа́рь пою́тъ то́йже припѣ́въ четы́режды.
Катава́сїа: Ра́дꙋйсѧ цр҃и́це: И҆ покло́нъ.
На преѡбраже́нїе гдⷭ҇не:
Велича́й дꙋшѐ моѧ̀, на ѳавѡ́рѣ преѡбрази́вшагосѧ гдⷭ҇а.
Та́же і҆рмо́съ: Ржⷭ҇тво̀ твоѐ:
Посе́мъ вторы́й ли́къ пое́тъ то́йже припѣ́въ и҆ і҆рмо́съ.
И҆ ко второ́мꙋ канѡ́нꙋ припѣва́ютъ то́йже припѣ́въ.
Катава́сїа: Та́инъ є҆сѝ бцⷣе, ра́й:
На ᲂу҆спе́нїе прест҃ы́ѧ бцⷣы:
Ро́ди всѝ бл҃жи́мъ тѧ̀ є҆ди́нꙋ бцⷣꙋ. и҆лѝ:
А҆́гг҃ли ᲂу҆спе́нїе пречⷭ҇тыѧ ви́дѣвше, ᲂу҆диви́шасѧ, ка́кѡ дв҃а восхо́дитъ ѿ землѝ на нб҃о.
Та́же і҆рмо́съ: Побѣжда́ютсѧ є҆стества̀ ᲂу҆ста́вы:
И҆ вторы́й ли́къ пое́тъ то́йже припѣ́въ и҆ і҆рмо́съ.
И҆ на кі́йждо тропа́рь пою́тъ то́йже припѣ́въ по є҆ди́ножды.
Посе́мъ пе́рвый ли́къ пое́тъ втора́гѡ канѡ́на припѣ́въ:
Велича́й дꙋшѐ моѧ̀, ѿ землѝ на нб҃о чⷭ҇тно́е преставле́нїе бж҃їѧ мт҃ре.
И҆ і҆рмо́съ: Всѧ́къ земноро́дный:
И҆ вторы́й ли́къ пое́тъ то́йже припѣ́въ и҆ і҆рмо́съ.
И҆ на кі́йждо тропа́рь пою́тъ то́йже припѣ́въ по є҆ди́ножды.
Та́же ѻ҆́ба ли̑ка соше́дшесѧ вкꙋ́пѣ, пою́тъ пе́рвагѡ канѡ́на припѣ́въ, и҆ і҆рмо́съ: Побѣжда́ютсѧ є҆стества̀ ᲂу҆ста́вы:
И҆ втора́гѡ канѡ́на припѣ́въ, и҆ і҆рмо́съ: Всѧ́къ земноро́дный:
И҆ покло́нъ.
Коне́цъ и҆ бг҃ꙋ сла́ва.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.