Полѷеле́и, пое́мый въ пра́здники гдⷭскїѧ, и҆ бг҃оро́дичны, и҆ наро́читыхъ ст҃ы́хъ, и҆ велича̑нїѧ со и҆збра́нными ѱалмѝ
Ѱалмѝ и҆збра́ннїи.
Вѣ́домо бꙋ́ди, ꙗ҆́кѡ є҆гда̀ слꙋчи́тсѧ въ недѣ́лю гдⷭ҇скїй пра́здникъ, и҆лѝ бг҃оро́диченъ, и҆лѝ ст҃а́гѡ вели́кагѡ, въ ни́хже пое́тсѧ полѷеле́й: по ѻ҆бы́чною двою̀ каѳі̑смꙋ, не глаго́лемъ, Бл҃же́ни непоро́чнїи: но а҆́бїе полѷеле́й. Хвали́те и҆́мѧ гдⷭ҇не: и҆ И҆сповѣ́дайтесѧ гдⷭ҇еви: Та́кожде и҆ въ недѣ́лю мѧсопꙋ́стїѧ и҆ сыропꙋ́стїѧ, ѡ҆ставлѧ́емъ: Бл҃же́ни непоро́чнїи: и҆ пое́мъ полѷеле́й, припѣва́юще и҆ г҃-й ѱало́мъ: На рѣка́хъ вавѷлѡ́нскихъ Та́же, а҆́ще пра́здникъ, пое́мъ велича́нїе со и҆збра́нными стїхѝ ѱалмѡ́въ. И҆ посе́мъ, а҆́ще нѣ́сть влⷣчнїй пра́здникъ, тропарѝ воскрⷭ҇ны, Бл҃гослове́нъ є҆сѝ гдⷭ҇и: Та́же степе́нна, и҆ про́чее.
Въ пра́здники гдⷭ҇скїѧ,
и҆ во дни̑ наро́читыхъ ст҃ы́хъ, внегда̀ ᲂу҆ста́въ ᲂу҆казꙋ́етъ полѷеле́й, ѱало́мъ рл҃д: Хвали́те и҆́мѧ гдⷭ҇не, хвали́те рабѝ гдⷭ҇а: ѱало́мъ рл҃є: И҆сповѣ́дайтесѧ гдⷭ҇еви, ꙗ҆́кѡ бл҃гъ. Сі́и и҆збра̑нныѧ ѿ ѱалмѡ́въ стїхѝ пою́тсѧ по полѷеле́и во влⷣчныѧ пра́здники, и҆ во всѧ̑ ст҃ы̑ѧ и҆мꙋ́щыѧ полѷеле́й.
На ржⷭ҇тво̀ бцⷣы.
[Мѣ́сѧца септе́мврїа во и҃ де́нь.]
Начина́етъ пе́рвый ли́къ, поѧ̀:
Велича́емъ тѧ̀, прест҃а́ѧ дв҃о, и҆ чти́мъ ст҃ы́хъ твои́хъ роди́телей, и҆ всесла́вное сла́вимъ ржⷭ҇тво̀ твоѐ.
Та́же па́ки то́йже наче́ншїй ли́къ пое́тъ:
а҃ Помѧнѝ гдⷭ҇и дв҃да, и҆ всю̀ кро́тость є҆гѡ̀. в҃ Ꙗ҆́кѡ клѧ́тсѧ гдⷭ҇еви, ѡ҆бѣща́сѧ бг҃ꙋ і҆а́кѡвлю. а҃ Сѐ слы́шахомъ ѧ҆̀ во є҆ѵфра́ѳѣ, ѡ҆брѣто́хомъ ѧ҆̀ въ полѧ́хъ дꙋбра́вы. в҃ Пресла̑внаѧ глаго́лашасѧ ѡ҆ тебѣ̀ гра́де бж҃їй. а҃ Бг҃ъ посредѣ̀ є҆гѡ̀, и҆ не подви́житсѧ. в҃ Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀: а҃ Ѿ пло́да чре́ва твоегѡ̀ посаждꙋ̀ на прⷭ҇то́лѣ твое́мъ. в҃ Ꙗ҆́кѡ и҆збра̀ гдⷭ҇ь сїѡ́на, и҆зво́ли є҆го̀ въ жили́ще себѣ̀. а҃ Ѡ҆ст҃и́лъ є҆́сть селе́нїе своѐ вы́шнїй. в҃ Ст҃ы́нѧ и҆ велелѣ́пота во ст҃и́лѣ є҆гѡ̀. а҃ Ст҃ъ хра́мъ тво́й, ди́венъ въ пра́вдѣ. в҃ До́мꙋ твоемꙋ̀ подоба́етъ ст҃ы́нѧ гдⷭ҇и въ долготꙋ̀ дні́й. а҃ Помѧнꙋ̀ и҆́мѧ твоѐ во всѧ́комъ ро́дѣ на ро́дѣ. в҃ Бл҃гослове́нъ гдⷭ҇ь во вѣ́къ, и҆ въ вѣ́къ вѣ́ка.
Сла́ва, и҆ ны́нѣ:
А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀, бж҃е. Три́жды.
Въ воздви́женїе чⷭ҇тна́гѡ крⷭ҇та̀.
[Тогѡ́же мѣ́сѧца въ д҃і де́нь.]
Начина́етъ пе́рвый ли́къ, поѧ̀:
Велича́емъ тѧ̀, живода́вче, хрⷭ҇тѐ, и҆ чти́мъ крⷭ҇тъ тво́й ст҃ы́й, и҆́мже на́съ сп҃слъ є҆сѝ ѿ рабо́ты вра́жїѧ.
Та́же па́ки то́йже ли́къ пое́тъ:
а҃ Сꙋдѝ гдⷭ҇и ѡ҆би́дѧщыѧ мѧ̀, поборѝ борю́щыѧ мѧ̀. в҃ Прїимѝ ѻ҆рꙋ́жїе и҆ щи́тъ, и҆ воста́ни въ по́мощь мою̀. а҃ Зна́менасѧ на на́съ свѣ́тъ лица̀ твоегѡ̀ гдⷭ҇и. в҃ Ꙗ҆́кѡ ѻ҆рꙋ́жїемъ бл҃говоле́нїѧ вѣнча́лъ є҆сѝ на́съ. а҃ Да́лъ є҆сѝ зна́менїе боѧ́щымсѧ тебѐ, є҆́же ᲂу҆бѣжа́ти ѿ лица̀ лꙋ́ка. в҃ Позна́ти на землѝ пꙋ́ть тво́й, во всѣ́хъ ꙗ҆зы́цѣхъ сп҃се́нїе твоѐ. а҃ Ви́дѣша всѝ концы̀ землѝ сп҃се́нїе бг҃а на́шегѡ. в҃ Поклони́мсѧ на мѣ́сто, и҆дѣ́же стоѧ́стѣ но́зѣ є҆гѡ̀. а҃ Тогда̀ возра́дꙋютсѧ всѧ̑ древа̀ дꙋбра̑внаѧ. в҃ Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ. а҃ Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ь ст҃о є҆́сть. в҃ Бл҃гослови́ ны бж҃е, бж҃е на́шъ, бл҃гослови́ ны бж҃е. а҃ Сп҃сѝ лю́ди твоѧ̑, и҆ бл҃гословѝ достоѧ́нїе твоѐ. И҆ ᲂу҆пасѝ ѧ҆̀, и҆ возмѝ ѧ҆̀ до вѣ́ка.
Сла́ва, и҆ ны́нѣ: А҆ллилꙋ́їа, три́жды.
На вхо́дъ бцⷣы.
[Мѣ́сѧца ное́мврїа въ к҃а де́нь.]
Пе́рвый ли́къ пое́тъ:
Велича́емъ тѧ̀, прест҃а́ѧ дв҃о, бг҃оизбра́ннаѧ ѻ҆трокови́це, и҆ чти́мъ є҆́же въ хра́мъ гдⷭ҇нь вхожде́нїе твоѐ.
Та́же па́ки то́йже ли́къ:
а҃ Ве́лїй гдⷭ҇ь, и҆ хва́ленъ ѕѣлѡ̀ во гра́дѣ бг҃а на́шегѡ, въ горѣ̀ ст҃ѣ́й є҆гѡ̀. в҃ Бл҃гокоре́ннымъ ра́дованїемъ всеѧ̀ землѝ. а҃ Пресла̑внаѧ глаго́лашасѧ ѡ҆ тебѣ̀ гра́де бж҃їй. в҃ Гра́дъ цр҃ѧ̀ вели́кагѡ: а҃ Ꙗ҆́коже слы́шахомъ, та́кѡ и҆ ви́дѣхомъ. в҃ Во гра́дѣ гдⷭ҇а си́лъ, во гра́дѣ бг҃а на́шегѡ. а҃ Бг҃ъ ѡ҆снова̀ и҆̀ въ вѣ́къ. в҃ Ѡ҆ст҃и́лъ є҆́сть селе́нїе своѐ вы́шнїй. а҃ Ст҃ы́нѧ и҆ великолѣ́пїе во ст҃и́лѣ є҆гѡ̀. в҃ Ст҃ъ хра́мъ тво́й, ди́венъ въ пра́вдѣ. а҃ Сїѧ̑ врата̀ гдⷭ҇нѧ, пра́веднїи вни́дꙋтъ въ нѧ̀. в҃ Предста̀ цр҃и́ца ѡ҆деснꙋ́ю тебѐ. а҃ Въ ри́захъ позлаще́нныхъ ѡ҆дѣ́ѧна, преиспещре́на. в҃ Лицꙋ̀ твоемꙋ̀ помо́лѧтсѧ бога́тїи лю́дстїи. а҃ Дщє́ри царе́й въ че́сти твое́й. в҃ Всѧ̀ сла́ва дще́ре цр҃е́вы внꙋ́трь. а҃ Рѧ́сны златы́ми ѡ҆дѣ́ѧна, и҆ преиспещре́на. в҃ Приведꙋ́тсѧ цр҃ю̀ дѣ̑вы въ слѣ́дъ є҆ѧ̀. а҃ Бли̑жнѧѧ є҆ѧ̀ приведꙋ́тсѧ тебѣ̀. в҃ Приведꙋ́тсѧ въ весе́лїи и҆ ра́дованїи, введꙋ́тсѧ въ хра́мъ цр҃е́въ. а҃ Слы́ши дщѝ и҆ ви́ждь, и҆ приклонѝ ᲂу҆́хо твоѐ: в҃ И҆ забꙋ́ди лю́ди твоѧ̑, и҆ до́мъ ѻ҆тца̀ твоегѡ̀. а҃ И҆ возжела́етъ цр҃ь добро́ты твоеѧ̀. в҃ Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ. а҃ Воспрїѧ́хомъ бж҃е млⷭ҇ть твою̀, посредѣ̀ люде́й твои́хъ. в҃ Сегѡ̀ ра́ди лю́дїе и҆сповѣ́дѧтсѧ тебѣ̀ въ вѣ́къ, и҆ въ вѣ́къ вѣ́ка.
Сла́ва, и҆ ны́нѣ: А҆ллилꙋ́їа. три́жды.
На ржⷭ҇тво̀ гдⷭ҇а бг҃а на́шегѡ і҆и҃са хрⷭ҇та̀.
[Мѣ́сѧца деке́мврїа въ к҃є де́нь.]
Пе́рвый ли́къ пое́тъ:
Велича́емъ тѧ̀, живода́вче хрⷭ҇тѐ, на́съ ра́ди ны́нѣ пло́тїю ро́ждшагосѧ ѿ безневѣ́стныѧ и҆ пречⷭ҇тыѧ дв҃ы мр҃і́и.
Та́же па́ки то́йже ли́къ:
а҃ Воскли́кните гдⷭ҇еви всѧ̀ землѧ̀. в҃ По́йте же и҆́мени є҆гѡ̀. а҃ Дади́те сла́вꙋ хвалѣ̀ є҆гѡ̀. в҃ Повѣ́дите всѧ̑ чꙋдеса̀ є҆гѡ̀. а҃ Рцы́те бг҃ꙋ: ко́ль стра̑шна дѣла̀ твоѧ̑. в҃ Да возвеселѧ́тсѧ нб҃са̀, и҆ возра́дꙋетсѧ землѧ̀. а҃ Воспо́йте гдⷭ҇еви, по́йте и҆́мени є҆гѡ̀. в҃ И҆сповѣ́данїе и҆ великолѣ́пїе дѣ́ло є҆гѡ̀. а҃ И҆збавле́нїе посла̀ лю́демъ свои̑мъ. в҃ Ст҃о и҆ стра́шно и҆́мѧ є҆гѡ̀. а҃ Ѿ сїѡ́на бл҃голѣ́пїе красоты̀ є҆гѡ̀. в҃ Бг҃ъ же на́шъ на нб҃сѝ и҆ на землѝ, всѧ̑ є҆ли́ка восхотѣ̀, сотворѝ. а҃ Млⷭ҇ти твоѧ̑ гдⷭ҇и во вѣ́къ воспою̀. в҃ То́й воззове́тъ мѧ̀: ѻ҆ц҃ъ мо́й є҆сѝ ты̀. а҃ И҆ а҆́зъ пе́рвенца положꙋ̀ є҆го̀, в҃ Высока̀ па́че царе́й земны́хъ. а҃ И҆ покло́нѧтсѧ є҆мꙋ̀ всѝ ца́рїе зе́мстїи. в҃ Кто̀ бг҃ъ ве́лїй, ꙗ҆́кѡ бг҃ъ на́шъ, ты̀ є҆сѝ бг҃ъ творѧ́й чꙋдеса̀. а҃ Мы́шцею си́лы твоеѧ̀ разгна́лъ є҆сѝ врагѝ твоѧ̑. в҃ И҆з̾ чре́ва пре́жде денни́цы роди́хъ тѧ̀. а҃ Клѧ́тсѧ гдⷭ҇ь, и҆ не раска́етсѧ. в҃ Ты̀ і҆ере́й во вѣ́къ по чи́нꙋ мелхїседе́ковꙋ. а҃ Гдⷭ҇ь речѐ ко мнѣ̀: сн҃ъ мо́й є҆сѝ ты̀. в҃ А҆́зъ дне́сь роди́хъ тѧ̀. а҃ Просѝ ѿ менѐ, и҆ да́мъ тѝ ꙗ҆зы́ки достоѧ́нїе твоѐ. в҃ И҆ ѡ҆держа́нїе твоѐ концы̀ землѝ. а҃ Въ глави́знѣ кни́жнѣй писа́сѧ ѡ҆ мнѣ̀. в҃ Престо́лъ тво́й бж҃е въ вѣ́къ вѣ́ка. а҃ Же́злъ пра́вости, же́злъ црⷭ҇твїѧ твоегѡ̀. в҃ Сегѡ̀ ра́ди пома́за тѧ̀ бж҃е, бг҃ъ тво́й є҆ле́емъ ра́дости. а҃ Ꙗ҆́кѡ ты̀ наслѣ́диши во всѣ́хъ ꙗ҆зы́цѣхъ. в҃ Бл҃гослове́нъ гдⷭ҇ь во вѣ́къ, бꙋ́ди, бꙋ́ди.
Сла́ва, и҆ ны́нѣ: А҆ллилꙋ́їа, три́жды.
На ст҃о́е бг҃оѧвле́нїе гдⷭ҇а бг҃а на́шегѡ і҆и҃са хрⷭ҇та̀.
[Мѣ́сѧца і҆аннꙋа́рїа въ ѕ҃ де́нь.]
Пе́рвый ли́къ пое́тъ:
Велича́емъ тѧ̀, живода́вче хрⷭ҇тѐ, на́съ ра́ди ны́нѣ пло́тїю крⷭ҇ти́вшагосѧ ѿ і҆ѡа́нна въ вода́хъ і҆ѻрда́нскихъ.
Та́же па́ки то́йже ли́къ:
а҃ Бж҃е, ᲂу҆ще́дри ны̀, и҆ бл҃гослови́ ны. в҃ Просвѣтѝ лицѐ твоѐ на ны̀ и҆ поми́лꙋй ны̀. а҃ Пристꙋпи́те къ немꙋ̀, и҆ просвѣти́тесѧ. в҃ И҆ ли́ца ва̑ша не постыдѧ́тсѧ. а҃ Рѣ̑чнаѧ ᲂу҆стремлє́нїѧ веселѧ́тъ гра́дъ бж҃їй. в҃ Гла́съ гдⷭ҇нь на вода́хъ: а҃ Гдⷭ҇ь на вода́хъ мно́гихъ. в҃ Взѧ́ша рѣ́ки гдⷭ҇и, взѧ́ша рѣ́ки гла́сы своѧ̑. а҃ Ѿ гла́сѡвъ во́дъ мно́гихъ. в҃ Сегѡ̀ ра́ди помѧнꙋ́хъ тѧ̀ ѿ землѝ і҆ѻрда́нски и҆ є҆рмѡнїи́мски. а҃ Ꙗ҆́кѡ ᲂу҆ тебѐ и҆сто́чникъ живота̀, во свѣ́тѣ твое́мъ ᲂу҆́зримъ свѣ́тъ. в҃ Мо́ре ви́дѣ и҆ побѣжѐ, і҆ѻрда́нъ возврати́сѧ вспѧ́ть. а҃ Ты̀ ᲂу҆тверди́лъ є҆сѝ си́лою твое́ю мо́ре. в҃ Ты̀ сте́рлъ є҆сѝ главы̑ ѕмїє́въ въ водѣ̀. а҃ Ты̀ расто́рглъ є҆сѝ и҆сто́чники и҆ пото́ки. в҃ Ви́дѣша тѧ̀ во́ды бж҃е, ви́дѣша тѧ̀ во́ды, и҆ ᲂу҆боѧ́шасѧ. а҃ Въ мо́ри пꙋтїѐ твоѝ, и҆ стєзѝ твоѧ̑ въ вода́хъ мно́гихъ. в҃ Ꙗ҆́кѡ возвели́чишасѧ дѣла̀ твоѧ̑ гдⷭ҇и, всѧ̑ премꙋ́дростїю сотвори́лъ є҆сѝ.
Сла́ва, и҆ ны́нѣ: А҆ллилꙋ́їа, три́жды.
На срѣ́тенїе гдⷭ҇а на́шегѡ і҆и҃са хрⷭ҇та̀.
[Мѣ́сѧца феврꙋа́рїа во в҃ де́нь.]
Пе́рвый ли́къ пое́тъ:
Велича́емъ тѧ̀, живода́вче хрⷭ҇тѐ, и҆ чти́мъ пречⷭ҇тꙋю мт҃рь твою̀, є҆́юже по зако́нꙋ ны́нѣ прине́слсѧ є҆сѝ въ хра́мъ гдⷭ҇нь.
Па́ки то́йже ли́къ:
а҃ Ѿры́гнꙋ се́рдце моѐ сло́во бл҃го. в҃ Глаго́лю а҆́зъ дѣла̀ моѧ̑ цр҃е́ви. а҃ Ѧ҆зы́къ мо́й тро́сть кни́жника скоропи́сца. в҃ Красе́нъ добро́тою па́че сынѡ́въ человѣ́ческихъ. а҃ Препоѧ́ши ме́чь тво́й по бедрѣ̀ твое́й си́льне. в҃ И҆ налѧцы̀, и҆ ᲂу҆спѣва́й, и҆ црⷭ҇твꙋй. а҃ И҆́стины ра́ди, и҆ кро́тости, и҆ пра́вды. в҃ Возлюби́лъ є҆сѝ пра́вдꙋ, и҆ возненави́дѣлъ є҆сѝ беззако́нїе. а҃ Слы́ши дщѝ и҆ ви́ждь, и҆ приклонѝ ᲂу҆́хо твоѐ. в҃ И҆ забꙋ́ди лю́ди твоѧ̑, и҆ до́мъ ѻ҆ц҃а̀ твоегѡ̀. а҃ И҆ возжела́етъ цр҃ь добро́ты твоеѧ̀. в҃ Ꙗ҆́кѡ то́й є҆́сть гдⷭ҇ь тво́й, и҆ поклони́шисѧ є҆мꙋ̀. а҃ Лицꙋ̀ твоемꙋ̀ помо́лѧтсѧ бога́тїи лю́дстїи. в҃ Гдⷭ҇ь во хра́мѣ ст҃ѣ́мъ свое́мъ, гдⷭ҇ь на нб҃сѝ прⷭ҇то́лъ є҆гѡ̀. а҃ Ви̑дѣна бы́ша шє́ствїѧ твоѧ̑ бж҃е. в҃ Шє́ствїѧ бг҃а моегѡ̀ цр҃ѧ̀, и҆́же во ст҃ѣ́мъ. в҃ Ст҃ъ хра́мъ тво́й, ди́венъ въ пра́вдѣ. в҃ До́мꙋ твоемꙋ̀ подоба́етъ ст҃ы́нѧ гдⷭ҇и, въ долготꙋ̀ дні́й. а҃ Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ: в҃ Ꙗ҆́кѡ бл҃го пред̾ прпⷣбными твои́ми.
Сла́ва, и҆ ны́нѣ: А҆ллилꙋ́їа, три́жды.
На бл҃говѣ́щенїе прест҃ы́ѧ бцⷣы.
[Мѣ́сѧца ма́рта въ к҃є де́нь.]
Пе́рвый ли́къ пое́тъ:
А҆рха́гг҃льскїй гла́съ вопїе́мъ тѝ, чⷭ҇таѧ: ра́дꙋйсѧ бл҃года́тнаѧ, гдⷭ҇ь съ тобо́ю.
Па́ки то́йже ли́къ:
а҃ Бж҃е, сꙋ́дъ тво́й цр҃е́ви да́ждь. в҃ И҆ пра́вдꙋ твою̀ сн҃ꙋ цр҃е́вꙋ: а҃ Сꙋди́ти лю́демъ твои̑мъ въ пра́вдѣ. в҃ И҆ ни́щымъ твои̑мъ въ сꙋдѣ̀. а҃ Сꙋ́дитъ ни́щымъ людски̑мъ, и҆ сп҃се́тъ сы́ны ᲂу҆бо́гихъ. в҃ Бл҃говѣсти́те де́нь ѿ днѐ сп҃се́нїе бг҃а на́шегѡ. а҃ Гдⷭ҇ь да́стъ глаго́лъ бл҃говѣствꙋ́ющымъ си́лою мно́гою. в҃ Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀: а҃ Ѿ плода̀ чре́ва твоегѡ̀ посаждꙋ̀ на прⷭ҇то́лѣ твое́мъ. в҃ Сни́детъ ꙗ҆́кѡ до́ждь на рꙋно̀: а҃ И҆ ꙗ҆́кѡ ка́плѧ ка́плющаѧ на зе́млю, в҃ И҆ приклонѝ нб҃са̀, и҆ сни́де, и҆ мра́къ под̾ нога́ма є҆гѡ̀. а҃ Ꙗ҆́кѡ и҆збра̀ гдⷭ҇ь сїѡ́на, и҆зво́ли є҆го̀ въ жили́ще себѣ̀ в҃ Ѡ҆ст҃и́лъ є҆́сть селе́нїе своѐ вы́шнїй. а҃ Бг҃ъ посредѣ̀ є҆гѡ̀, и҆ не подви́житсѧ. в҃ Пощади́тъ ни́ща и҆ ᲂу҆бо́га, и҆ дꙋ́шы ᲂу҆бо́гихъ сп҃се́тъ. а҃ Всѝ ꙗ҆зы́цы порабо́таютъ є҆мꙋ̀. в҃ Ве́сь де́нь бл҃гословѧ́тъ є҆го̀. а҃ Бꙋ́детъ ᲂу҆тверже́нїе на землѝ на версѣ́хъ го́ръ. в҃ Бꙋ́детъ и҆́мѧ є҆гѡ̀ бл҃гослове́но во вѣ́ки. а҃ И҆ бл҃гословѧ́тсѧ въ не́мъ всѧ̑ кѡлѣ́на земна̑ѧ. в҃ Бл҃гослове́нъ гдⷭ҇ь бг҃ъ і҆и҃левъ, творѧ́й чꙋдеса̀ є҆ди́нъ. а҃ И҆ бл҃гослове́но и҆́мѧ сла́вы є҆гѡ̀ въ вѣ́къ, и҆ въ вѣ́къ вѣ́ка. в҃ И҆ и҆спо́лнитсѧ сла́вы є҆гѡ̀ всѧ̀ землѧ̀, бꙋ́ди, бꙋ́ди.
Сла́ва, и҆ ны́нѣ: А҆ллилꙋ́їа, три́жды.
Въ недѣ́лю цвѣтнꙋ́ю.
Пе́рвый ли́къ пое́тъ:
Велича́емъ тѧ̀, живода́вче хрⷭ҇тѐ, ѡ҆са́нна въ вы́шнихъ, и҆ мы̀ тебѣ̀ вопїе́мъ: бл҃гослове́нъ грѧды́й во и҆́мѧ гдⷭ҇не.
Па́ки то́йже ли́къ:
а҃ Гдⷭ҇и гдⷭ҇ь на́шъ, ꙗ҆́кѡ чꙋ́дно и҆́мѧ твоѐ по все́й землѝ. в҃ Ꙗ҆́кѡ взѧ́тсѧ великолѣ́пїе твоѐ превы́ше нб҃съ. а҃ И҆з̾ ᲂу҆́стъ младе́нєцъ и҆ ссꙋ́щихъ соверши́лъ є҆сѝ хвалꙋ̀. в҃ Врагѡ́въ твои́хъ ра́ди разрꙋши́ши врага̀ и҆ ме́стника. а҃ Запрети́лъ є҆сѝ ꙗ҆зы́кѡмъ, и҆ поги́бе нечести́вый. в҃ Ка́мень, є҆го́же небрего́ша зи́ждꙋщїи, се́й бы́сть во главꙋ̀ ᲂу҆́гла. а҃ Ѿ гдⷭ҇а бы́сть се́й, и҆ є҆́сть ди́венъ во ѻ҆чесѣ́хъ на́шихъ. в҃ Гдⷭ҇ь въ сїѡ́нѣ вели́къ, и҆ высо́къ є҆́сть над̾ всѣ́ми людьмѝ. а҃ Та́мѡ сокрꙋшѝ крѣ́пѡсти лꙋкѡ́въ. в҃ Слы́ша, и҆ возвесели́сѧ сїѡ́нъ, и҆ возра́довашасѧ дщє́ри і҆ꙋдє́йскїѧ. а҃ Возвѣсти́те въ сїѡ́нѣ и҆́мѧ гдⷭ҇не: и҆ хвалꙋ̀ є҆гѡ̀ во і҆ерⷭ҇ли́мѣ. в҃ Ꙗ҆́кѡ бг҃ъ сп҃се́тъ сїѡ́на, и҆ сози́ждꙋтсѧ гра́ди і҆ꙋде́йстїи. а҃ Тебѣ̀ подоба́етъ пѣ́снь бж҃е въ сїѡ́нѣ, и҆ тебѣ̀ возда́стсѧ мл҃тва во і҆ерⷭ҇ли́мѣ. в҃ Бл҃гослове́нъ грѧды́й во и҆́мѧ гдⷭ҇не: бг҃ъ гдⷭ҇ь, и҆ ꙗ҆ви́сѧ на́мъ. а҃ Соста́вите пра́здникъ во ᲂу҆чаща́ющихъ до рѡ́гъ ѻ҆лтаре́выхъ: в҃ Во дво́рѣхъ до́мꙋ гдⷭ҇нѧ, посредѣ̀ тебѐ і҆ерⷭ҇ли́ме. а҃ Воцр҃и́тсѧ гдⷭ҇ь во вѣ́къ, бг҃ъ тво́й сїѡ́не въ ро́дъ и҆ ро́дъ. в҃ Хвала̀ є҆гѡ̀ пребыва́етъ въ вѣ́къ, и҆ въ вѣ́къ вѣ́ка.
Сла́ва, и҆ ны́нѣ: А҆ллилꙋ́їа, три́жды.
Въ но́вꙋю недѣ́лю, ꙗ҆́же є҆́сть ѳѡмина̀.
Пе́рвый ли́къ пое́тъ.
Велича́емъ тѧ̀ живода́вче хрⷭ҇тѐ, на́съ ра́ди во а҆́дъ сше́дшаго, и҆ съ собо́ю всѧ̑ воскр҃си́вшаго.
Па́ки то́йже ли́къ пое́тъ:
а҃ Гдⷭ҇ь воцр҃и́сѧ, въ лѣ́потꙋ ѡ҆блече́сѧ: в҃ Ѡ҆блече́сѧ гдⷭ҇ь въ си́лꙋ, и҆ препоѧ́сасѧ. а҃ И҆́бо ᲂу҆твердѝ вселе́ннꙋю, ꙗ҆́же не подви́житсѧ. в҃ Кто̀ возглаго́летъ си̑лы гдⷭ҇ни, слы́шаны сотвори́тъ всѧ̑ хвалы̑ є҆гѡ̀; а҃ Да и҆сповѣ́дѧтсѧ гдⷭ҇еви млⷭ҇ти є҆гѡ̀, и҆ чꙋдеса̀ є҆гѡ̀ сыновѡ́мъ человѣ́чєскимъ. в҃ И҆ и҆зве́лъ є҆сѝ ны̀ ѿ тьмы̀, и҆ сѣ́ни сме́ртныѧ. а҃ Ꙗ҆́кѡ сокрꙋшѝ врата̀ мѣ̑днаѧ, и҆ верєѝ желѣ̑зныѧ сломѝ. в҃ И҆ и҆зба́ви ѧ҆̀ ѿ растлѣ́нїй и҆́хъ, и҆ ᲂу҆́зы и҆́хъ растерза̀. а҃ Ꙗ҆́кѡ ᲂу҆слы́ша ᲂу҆бѡ́гїѧ гдⷭ҇ь, в҃ И҆ ѡ҆кова̑нныѧ своѧ̑ не ᲂу҆ничижѝ. а҃ Воста̀ ꙗ҆́кѡ спѧ̀ гдⷭ҇ь, и҆ поразѝ врагѝ своѧ̑. в҃ Ꙗ҆́кѡ ѻ҆́чи гдⷭ҇ни на ᲂу҆пова́ющыѧ на млⷭ҇ть є҆гѡ̀: а҃ Оу҆слы́шати воздыха́нїе ѡ҆кова́нныхъ. в҃ Разрѣши́ти сы́ны ᲂу҆мерщвле́нныхъ. а҃ Да воскрⷭ҇нетъ бг҃ъ, и҆ расточа́тсѧ вразѝ є҆гѡ̀, и҆ да бѣжа́тъ ѿ лица̀ є҆гѡ̀. в҃ Се́й де́нь, є҆го́же сотворѝ гдⷭ҇ь, возра́дꙋемсѧ и҆ возвесели́мсѧ во́нь. а҃ Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀. в҃ Гдⷭ҇и бж҃е мо́й, въ вѣ́къ и҆сповѣ́мсѧ тебѣ̀.
Сла́ва, и҆ ны́нѣ: А҆ллилꙋ́їа, три́жды.
На вознесе́нїе гдⷭ҇а на́шегѡ і҆и҃са хрⷭ҇та̀.
Пе́рвый ли́къ пое́тъ:
Велича́емъ тѧ̀, живода́вче хрⷭ҇тѐ, и҆ почита́емъ є҆́же на нб҃са̀ съ пречⷭ҇тою твое́ю пло́тїю, бж҃е́ственное вознесе́нїе.
Па́ки то́йже ли́къ пое́тъ:
а҃ Всѝ ꙗ҆зы́цы восплещи́те рꙋка́ми, воскли́кните бг҃ꙋ во гла́сѣ ра́дованїѧ. в҃ Ꙗ҆́кѡ гдⷭ҇ь вы́шнїй стра́шенъ, цр҃ь ве́лїй по все́й землѝ. а҃ Покорѝ лю́ди на́мъ, и҆ ꙗ҆зы́ки под̾ но́ги на́шѧ. в҃ Взы́де бг҃ъ въ воскликнове́нїи, гдⷭ҇ь во гла́сѣ трꙋ́бнѣ. а҃ И҆ взы́де на херꙋві́мы, и҆ летѣ̀: в҃ И҆ возлетѣ̀ на крилꙋ̀ вѣ́трєню. а҃ Возми́те врата̀ кнѧ́зи ва́шѧ, и҆ возми́тесѧ врата̀ вѣ̑чнаѧ, и҆ вни́детъ цр҃ь сла́вы. в҃ Гдⷭ҇ь на нб҃сѝ ᲂу҆гото́ва прⷭ҇то́лъ сво́й, и҆ црⷭ҇тво є҆гѡ̀ всѣ́ми ѡ҆блада́етъ. а҃ Речѐ гдⷭ҇ь гдⷭ҇еви моемꙋ̀: сѣдѝ ѡ҆деснꙋ́ю менѐ, до́ндеже положꙋ̀ врагѝ твоѧ̑ подно́жїе но́гъ твои́хъ. в҃ Поклони́тесѧ є҆мꙋ̀ всѝ а҆́гг҃ли є҆гѡ̀. а҃ Бг҃ъ сѣди́тъ на прⷭ҇то́лѣ ст҃ѣ́мъ свое́мъ. в҃ И҆ то́й сꙋ́дитъ вселе́ннѣй въ пра́вдꙋ. а҃ Прⷭ҇то́лъ тво́й бж҃е въ вѣ́къ вѣ́ка. в҃ Ꙗ҆́кѡ взѧ́тсѧ великолѣ́пїе твоѐ превы́ше нб҃съ. в҃ Вознесе́сѧ на нб҃са̀ бж҃е, и҆ по все́й землѝ сла́ва твоѧ̀. в҃ Кто̀ ꙗ҆́кѡ гдⷭ҇ь бг҃ъ на́шъ, на высо́кихъ живы́й; а҃ Вознеси́сѧ гдⷭ҇и, си́лою твое́ю, воспое́мъ и҆ пое́мъ си̑лы твоѧ̑. в҃ По́йте бг҃ꙋ на́шемꙋ, по́йте, по́йте цр҃е́ви на́шемꙋ, по́йте.
Сла́ва, и҆ ны́нѣ: А҆ллилꙋ́їа, три́жды.
Въ недѣ́лю и҃-ю.
Пе́рвый ли́къ пое́тъ:
Велича́емъ тѧ̀, живода́вче хрⷭ҇тѐ, и҆ чти́мъ всест҃а́го дх҃а твоего̀, є҆го́же ѿ ѻ҆ц҃а̀ посла́лъ є҆сѝ бж҃е́ствєннымъ ᲂу҆ч҃нкѡмъ твои̑мъ.
Па́ки то́йже ли́къ:
а҃ Нб҃са̀ повѣ́даютъ сла́вꙋ бж҃їю, творе́нїе же и҆ рꙋкꙋ̀ є҆гѡ̀ возвѣща́етъ тве́рдь. в҃ Дх҃омъ ᲂу҆́стъ є҆гѡ̀ всѧ̀ си́ла и҆́хъ. а҃ Съ нб҃сѐ призрѣ̀ гдⷭ҇ь, ви́дѣ всѧ̑ сы́ны человѣ́чєскїѧ. в҃ Ѻ҆́гнь пред̾ ни́мъ пред̾и́детъ, и҆ ѻ҆́крестъ є҆гѡ̀ бꙋ́рѧ ѕѣ́льна. а҃ Оу҆́глїе возгорѣ́сѧ ѿ негѡ̀, и҆ приклонѝ нб҃са̀, и҆ сни́де. в҃ Ѿ ѡ҆блиста́нїѧ пред̾ ни́мъ ѻ҆́блацы проидо́ша. а҃ Помѧнꙋ́тсѧ, и҆ ѡ҆братѧ́тсѧ ко гдⷭ҇ꙋ всѝ концы̀ землѝ: в҃ И҆ покло́нѧтсѧ пред̾ ни́мъ всѧ̑ ѻ҆те́чествїѧ ꙗ҆зы̑къ. а҃ Свидѣ́тельство гдⷭ҇не вѣ́рно, ᲂу҆мꙋдрѧ́ющее младе́нцы. в҃ Землѧ̀ потрѧсе́сѧ, и҆́бо небеса̀ ка́нꙋша ѿ лица̀ бг҃а сїна́ина. а҃ До́ждь во́ленъ ѿлꙋчи́ши бж҃е достоѧ́нїю твоемꙋ̀. в҃ Поста́виши и҆̀хъ кнѧ́зи по все́й землѝ. а҃ Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ. в҃ По́слеши дх҃а твоего̀, и҆ сози́ждꙋтсѧ, и҆ ѡ҆бнови́ши лицѐ землѝ. а҃ Дх҃ъ а҆ тво́й бл҃гі́й наста́витъ мѧ̀ на зе́млю пра́вꙋ. в҃ Се́рдце чи́сто сози́жди во мнѣ̀ бж҃е, и҆ дх҃ъ пра́въ ѡ҆бновѝ во ᲂу҆тро́бѣ мое́й. а҃ Не ѿве́ржи менѐ ѿ лица̀ твоегѡ̀ и҆ дх҃а твоегѡ̀ ст҃а́гѡ не ѿимѝ ѿ менѐ. в҃ Возда́ждь мѝ ра́дость сп҃се́нїѧ твоегѡ̀, и҆ дх҃омъ влⷣчнимъ ᲂу҆тверди́ мѧ. а҃ Гдⷭ҇ь да́стъ глаго́лъ бл҃говѣствꙋ́ющымъ си́лою мно́гою. в҃ Гдⷭ҇ь крѣ́пость лю́демъ свои̑мъ да́стъ: гдⷭ҇ь бл҃гослови́тъ лю́ди своѧ̑ ми́ромъ.
Сла́ва, и҆ ны́нѣ: А҆ллилꙋ́їа, три́жды.
На ржⷭ҇тво̀ прⷣте́чево.
[Мѣ́сѧца і҆ꙋ́нїа въ к҃д де́нь.]
Пе́рвый ли́къ пое́тъ:
Велича́емъ тѧ̀, прⷣте́че сп҃совъ і҆ѡа́нне, и҆ чти́мъ є҆́же ѿ непло́дове, пресла́вное ржⷭ҇тво̀ твоѐ.
Па́ки то́йже ли́къ:
а҃ Бл҃гослове́нъ гдⷭ҇ь бг҃ъ і҆и҃левъ, ꙗ҆́кѡ посѣтѝ и҆ сотворѝ и҆збавле́нїе лю́демъ свои̑мъ. в҃ И҆ воздви́же ро́гъ сп҃се́нїѧ на́мъ въ домꙋ̀ дв҃довѣ, ѻ҆́трока своегѡ̀. а҃ Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀. в҃ Та́мѡ возращꙋ̀ ро́гъ дв҃дꙋ, ᲂу҆гото́вахъ свѣти́льникъ пома́занномꙋ моемꙋ̀. а҃ Си́льно на землѝ бꙋ́детъ сѣ́мѧ є҆гѡ̀. в҃ Ро́дъ пра́выхъ бл҃гослови́тсѧ. а҃ Слꙋжи́ти є҆мꙋ̀ въ преподо́бїи и҆ пра́вдѣ пред̾ ни́мъ, всѧ̑ дни̑ живота̀ на́шегѡ. в҃ И҆ ты̀ ѻ҆троча̀, прⷪ҇ро́къ вы́шнѧгѡ нарече́шисѧ. а҃ Предъи́деши бо пред̾ лице́мъ гдⷭ҇нимъ ᲂу҆гото́вати пꙋти̑ є҆гѡ̀: в҃ Да́ти ра́зꙋмъ сп҃се́нїѧ лю́демъ є҆гѡ̀: а҃ Во ѡ҆ставле́нїе грѣхѡ́въ и҆́хъ, млⷭ҇рдїѧ ра́ди млⷭ҇ти бг҃а на́шегѡ. в҃ Напра́вити но́ги на́шѧ на пꙋ́ть ми́ра.
Сла́ва, и҆ ны́нѣ: А҆ллилꙋ́їа, три́жды.
На преѡбраже́нїе гдⷭ҇а бг҃а и҆ сп҃са на́шегѡ і҆и҃са хрⷭ҇та̀.
[Мѣ́сѧца а҆́ѵвгꙋста въ ѕ҃ де́нь.]
Пе́рвый ли́къ пое́тъ:
Велича́емъ тѧ̀, живода́вче хрⷭ҇тѐ, и҆ почита́емъ пречⷭ҇тыѧ пло́ти твоеѧ̀ пресла́вное преѡбраже́нїе.
То́йже ли́къ пое́тъ:
а҃ Ве́лїй гдⷭ҇ь, и҆ хва́ленъ ѕѣлѡ̀, во гра́дѣ бг҃а на́шегѡ, въ горѣ̀ ст҃ѣ́й є҆гѡ̀. в҃ Прїе́млѧ крѡ́ткїѧ гдⷭ҇ь, смирє́нныѧ же возно́ситъ. а҃ Кто̀ взы́детъ на го́рꙋ гдⷭ҇ню; и҆лѝ кто̀ ста́нетъ на мѣ́стѣ ст҃ѣ́мъ є҆гѡ̀; в҃ Гдⷭ҇и, кто̀ ѡ҆бита́етъ въ жили́щи твое́мъ; а҃ И҆лѝ кто̀ всели́тсѧ въ горѣ̀ ст҃ѣ́й твое́й; в҃ Послѝ свѣ́тъ тво́й, и҆ и҆́стинꙋ твою̀. а҃ Просвѣща́еши ты̀ ди́внѡ ѿ го́ръ вѣ́чныхъ. в҃ Вселе́ннꙋю, и҆ и҆сполне́нїе є҆ѧ̀, ты̀ ѡ҆снова́лъ є҆сѝ. а҃ Ѳавѡ́ръ и҆ є҆рмѡ́нъ ѡ҆ и҆́мени твое́мъ возра́дꙋетасѧ. в҃ Гдⷭ҇и, во свѣ́тѣ лица̀ твоегѡ̀ по́йдꙋтъ, а҃ И҆ ѡ҆ и҆́мени твое́мъ возра́дꙋютсѧ ве́сь де́нь. в҃ И҆ бꙋ́ди свѣ́тлость гдⷭ҇а бг҃а на́шегѡ на на́съ, ѿ ны́нѣ и҆ до вѣ́ка.
Сла́ва, и҆ ны́нѣ: А҆ллилꙋ́їа, три́жды.
На ᲂу҆спе́нїе прест҃ы́ѧ бцⷣы.
[Мѣ́сѧца а҆́ѵгꙋста въ є҃і де́нь.]
Пе́рвый ли́къ пое́тъ:
Велича́емъ тѧ̀ пренепоро́чнаѧ мт҃и хрⷭ҇та̀ бг҃а на́шегѡ, и҆ всесла́вное сла́вимъ ᲂу҆спе́нїе твоѐ.
Па́ки то́йже ли́къ пое́тъ:
а҃ Воскли́кните гдⷭ҇еви всѧ̀ землѧ̀. в҃ По́йте же и҆́мени є҆гѡ̀. а҃ Воскли́кните пред̾ цр҃е́мъ гдⷭ҇емъ: в҃ И҆сповѣ́дайтесѧ є҆мꙋ̀, хвали́те и҆́мѧ є҆гѡ̀. а҃ Во гра́дѣ гдⷭ҇а си́лъ, во гра́дѣ бг҃а на́шегѡ. в҃ Бы́сть въ ми́рѣ мѣ́стѡ є҆гѡ̀, и҆ жили́ще є҆гѡ̀ въ сїѡ́нѣ. а҃ Пресла̑внаѧ глаго́лашасѧ ѡ҆ тебѣ̀, гра́де бж҃їй. в҃ Бг҃ъ ѡ҆снова̀ и҆̀ въ вѣ́къ. а҃ Ѡ҆ст҃и́лъ є҆́сть селе́нїе своѐ вы́шнїй. в҃ Ст҃ы́нѧ и҆ великолѣ́пїе во ст҃и́лѣ є҆гѡ̀. а҃ Воспою̀ и҆ пою̀ во сла́вѣ мое́й. в҃ Ча́шꙋ сп҃се́нїѧ прїимꙋ̀, и҆ и҆́мѧ гдⷭ҇не призовꙋ̀. а҃ Въ ми́рѣ вкꙋ́пѣ ᲂу҆снꙋ̀ и҆ почі́ю. в҃ Ѡ҆брати́сѧ дꙋшѐ моѧ̀ въ поко́й тво́й, ꙗ҆́кѡ гдⷭ҇ь бл҃годѣ́йствова тѧ̀. а҃ Гдⷭ҇ь првⷣнъ, ссѣчѐ вы̑и грѣ́шникѡвъ. в҃ Воскрⷭ҇нѝ гдⷭ҇и въ поко́й тво́й, ты̀, и҆ кївѡ́тъ ст҃ы́ни твоеѧ̀. а҃ До́мꙋ твоемꙋ̀ подоба́етъ ст҃ы́нѧ гдⷭ҇и, въ долготꙋ̀ дні́й. в҃ Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.
Сла́ва, и҆ ны́нѣ: А҆ллилꙋ́їа, три́жды.
На ᲂу҆сѣкнове́нїе главы̀ і҆ѡа́нна прⷣте́чи.
[Мѣ́сѧца а҆́ѵгꙋста въ к҃ѳ де́нь.]
Пе́рвый ли́къ пое́тъ:
Велича́емъ тѧ̀, крⷭ҇ти́телю сп҃совъ і҆ѡа́нне, и҆ почита́емъ всѝ чⷭ҇тны́ѧ твоеѧ̀ главы̀ ᲂу҆сѣкнове́нїе.
Па́ки то́йже ли́къ пое́тъ:
а҃ Бл҃же́нъ мꙋ́жъ боѧ́йсѧ гдⷭ҇а: в҃ Въ за́повѣдехъ є҆гѡ̀ восхо́щетъ ѕѣлѡ̀. а҃ Сла́ва и҆ бога́тство въ домꙋ̀ є҆гѡ̀. в҃ И҆ пра́вда є҆гѡ̀ пребыва́етъ въ вѣ́къ вѣ́ка. а҃ Въ па́мѧть вѣ́чнꙋю бꙋ́детъ првⷣникъ. в҃ Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. а҃ Возвесели́тсѧ пра́ведникъ ѡ҆ гдⷭ҇ѣ, и҆ ᲂу҆пова́етъ на него̀. в҃ Сѐ ᲂу҆стна́мъ мои̑мъ не возбраню̀, гдⷭ҇и. а҃ Ты̀ разꙋмѣ́лъ є҆сѝ пра́вдꙋ мою̀ и҆ и҆́стинꙋ мою̀: в҃ И҆ ѧ҆зы́къ мо́й поꙋчи́тсѧ пра́вдѣ твое́й, ве́сь де́нь хвалѣ̀ твое́й. а҃ Свѣ́тъ возсїѧ̀ првⷣникꙋ, и҆ пра̑вымъ се́рдцемъ весе́лїе. в҃ Ро́дъ пра́выхъ бл҃гослови́тсѧ. а҃ Сла́вою и҆ че́стїю вѣнча́лъ є҆сѝ є҆го̀. в҃ Ꙗ҆́кѡ ты̀ бл҃гослови́ши првⷣника гдⷭ҇и. а҃ Ꙗ҆́кѡ ѻ҆рꙋ́жїемъ бл҃говоле́нїѧ вѣнча́лъ є҆сѝ на́съ. в҃ Въ ни́хже посѣтѝ на́съ восто́къ съ высоты̀: а҃ Ꙗ҆ви́тисѧ во тьмѣ̀ и҆ сѣ́ни сме́ртнѣй сѣдѧ́щымъ: в҃ Напра́вити но́ги на́шѧ на пꙋ́ть ми́ренъ.
Сла́ва, и҆ ны́нѣ: А҆ллилꙋ́їа, три́жды.
Ст҃ы̑мъ а҆пⷭ҇лѡмъ петрꙋ̀ и҆ па́ѵлꙋ.
[Мѣ́сѧца і҆ꙋ́нїа въ к҃ѳ де́нь.]
Пе́рвый ли́къ пое́тъ:
Велича́емъ ва́съ, а҆пⷭ҇ли хрⷭ҇тѡ́вы, ве́сь мі́ръ ᲂу҆че́ньми свои́ми просвѣти́вшыѧ, и҆ всѧ̑ концы̀ ко хрⷭ҇тꙋ̀ приве́дшыѧ.
Ѻ҆́бщїй а҆пⷭ҇лѡмъ:
Велича́емъ тѧ̀, а҆пⷭ҇ле хрⷭ҇то́съ, [и҆́мⷬ҇къ,] и҆ чти́мъ болѣ̑зни и҆ трꙋды̀ твоѧ̑, и҆́миже трꙋди́лсѧ є҆сѝ во бл҃говѣ́стїи хрⷭ҇то́вѣ.
Па́ки то́йже ли́къ пое́тъ:
а҃ Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь. в҃ И҆сповѣ́дѧтъ небеса̀ чꙋдеса̀ твоѧ̑, гдⷭ҇и. а҃ Вмѣ́стѡ ѻ҆тє́цъ твои́хъ бы́ша сы́нове твоѝ. в҃ Поста́виши ѧ҆̀ кнѧ́зи по все́й землѝ. а҃ Бг҃ъ богѡ́въ гдⷭ҇ь глаго́ла, и҆ призва̀ зе́млю. в҃ Ѿ востѡ́къ со́лнца до за̑падъ хва́льно и҆́мѧ гдⷭ҇не. а҃ Ѡ҆свѣти́ша мѡ́лнїѧ є҆гѡ̀ вселе́ннꙋю: в҃ Возвѣсти́ша нб҃са̀ пра́вдꙋ є҆гѡ̀: а҃ И҆ ви́дѣша всѝ лю́дїе сла́вꙋ є҆гѡ̀. в҃ Кнѧ́зи і҆ꙋ́дѡвы влады́ки и҆́хъ: а҃ Воцари́сѧ бг҃ъ над̾ ꙗ҆зы́ки. в҃ Бг҃ъ прославлѧ́емь въ совѣ́тѣ ст҃ы́хъ. а҃ Ве́лїй и҆ стра́шенъ є҆́сть над̾ всѣ́ми ѻ҆кре́стными є҆гѡ̀. в҃ Рцы́те во ꙗ҆зы́цѣхъ, ꙗ҆́кѡ гдⷭ҇ь воцр҃и́сѧ. а҃ Возвѣсти́те во ꙗ҆зы́цѣхъ сла́вꙋ є҆гѡ̀, во всѣ́хъ лю́дехъ чꙋдеса̀ є҆гѡ̀. в҃ Во всю̀ зе́млю и҆зы́де вѣща́нїе и҆́хъ: а҃ И҆ въ концы̀ вселе́нныѧ глаго́лы и҆́хъ. в҃ Покорѝ лю́ди на́мъ, и҆ ꙗ҆зы́ки под̾ но́ги на́шѧ. а҃ Ве́лїй гдⷭ҇ь на́шъ, и҆ ве́лїѧ крѣ́пость є҆гѡ̀. в҃ То́й да́стъ си́лꙋ и҆ держа́вꙋ лю́демъ свои̑мъ: бл҃гослове́нъ бг҃ъ.
Сла́ва, и҆ ны́нѣ: А҆ллилꙋ́їа, три́жды.
На па̑мѧти ст҃ы́хъ мч҃никъ ѻ҆́бщїй.
Пе́рвый ли́къ пое́тъ:
Велича́емъ тѧ̀, стрⷭ҇тоте́рпче ст҃ы́й, [и҆́мⷬ҇къ,] и҆ чти́мъ чⷭ҇тна̑ѧ страда̑нїѧ твоѧ̑, ꙗ҆̀же за хрⷭ҇та̀ претерпѣ́лъ є҆сѝ.
Па́ки то́йже ли́къ пое́тъ:
а҃ Бг҃ъ на́мъ прибѣ́жище и҆ си́ла. в҃ Помо́щникъ въ ско́рбехъ ѡ҆брѣ́тшихъ ны̀ ѕѣлѡ̀: а҃ Сегѡ̀ ра́ди не ᲂу҆бои́мсѧ, внегда̀ смꙋща́етсѧ землѧ̀. в҃ Бж҃е, кто̀ ᲂу҆подо́битсѧ тебѣ̀: да не премолчи́ши, нижѐ ᲂу҆кроти́ши бж҃е. а҃ Ꙗ҆́кѡ сѐ вразѝ твоѝ возшꙋмѣ́ша, и҆ ненави́дѧщїи тѧ̀ воздвиго́ша главꙋ̀: в҃ На лю́ди твоѧ̑ лꙋка́вноваша во́лею, и҆ совѣща́ша на ст҃ы̑ѧ твоѧ̑. а҃ Положи́ша трꙋ́пїѧ рабѡ́въ твои́хъ бра́шно пти́цамъ нбⷭ҇нымъ: в҃ Плѡ́ти прпⷣбныхъ твои́хъ ѕвѣрє́мъ зємны́мъ. а҃ Пролїѧ́ша кро́вь и҆́хъ ꙗ҆́кѡ во́дꙋ. в҃ Ꙗ҆́кѡ тебѐ ра́ди ᲂу҆мерщвлѧ́еми є҆смы̀ ве́сь де́нь. а҃ Вмѣни́хомсѧ ꙗ҆́кѡ ѻ҆́вцы заколе́нїѧ. в҃ Положи́лъ є҆сѝ на́съ въ при́тчꙋ во ꙗ҆зы́цѣхъ. а҃ И҆ бы́хъ ꙗ҆́звенъ ве́сь де́нь. в҃ Разже́глъ є҆сѝ ны̀, ꙗ҆́коже разжиза́етсѧ сребро̀. в҃ Проидо́хомъ сквозѣ̀ ѻ҆́гнь и҆ во́дꙋ, и҆ и҆зве́лъ є҆сѝ на́съ въ поко́й. а҃ Весели́тесѧ ѡ҆ гдⷭ҇ѣ, и҆ ра́дꙋйтесѧ првⷣнїи. в҃ Ꙗ҆́кѡ гдⷭ҇ь въ ро́дѣ првⷣныхъ: в҃ И҆ наслѣ́дїе и҆́хъ въ вѣ́къ бꙋ́детъ. а҃ Воззва́ша првⷣнїи, и҆ гдⷭ҇ь ᲂу҆слы́ша и҆̀хъ. в҃ Свѣ́тъ возсїѧ̀ првⷣникꙋ, и҆ пра̑вымъ се́рдцемъ весе́лїе. а҃ Въ па́мѧть вѣ́чнꙋю бꙋ́детъ првⷣникъ. в҃ Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ. а҃ Ди́венъ бг҃ъ во ст҃ы́хъ свои́хъ. в҃ Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ и҆́же въ лїва́нѣ, ᲂу҆мно́житсѧ. а҃ Возвесели́тсѧ првⷣникъ ѡ҆ гдⷭ҇ѣ, и҆ ᲂу҆пова́етъ на него̀. в҃ И҆ похва́лѧтсѧ всѝ пра́вїи се́рдцемъ.
Сла́ва, и҆ ны́нѣ: А҆ллилꙋ́їа, три́жды.
Ст҃и́телємъ ѻ҆́бщїй.
Пе́рвый ли́къ пое́тъ:
Велича́емъ тѧ̀, ст҃и́телю ѻ҆́тче, [и҆́мⷬ҇къ,] и҆ чти́мъ ст҃ꙋ́ю па́мѧть твою̀: ты́ бо мо́лиши за на́съ хрⷭ҇та̀ бг҃а на́шего.
Па́ки то́йже ли́къ пое́тъ:
а҃ Оу҆слы́шите сїѧ̑ всѝ ꙗ҆зы́цы, внꙋши́те всѝ живꙋ́щїи по вселе́ннѣй. в҃ Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ. а҃ Прїиди́те ча̑да, послꙋ́шайте менѐ, стра́хꙋ гдⷭ҇ню наꙋчꙋ̀ ва́съ. в҃ Бл҃говѣсти́хъ пра́вдꙋ въ цр҃кви вели́цѣй. а҃ И҆́стинꙋ твою̀ и҆ сп҃се́нїе твоѐ рѣ́хъ. в҃ Повѣ́мъ и҆́мѧ твоѐ бра́тїи мое́й, посредѣ̀ цр҃кве воспою́ тѧ. а҃ Оу҆слы́шати мѝ гла́съ хвалы̀ твоеѧ̀, и҆ повѣ́дати всѧ̑ чꙋдеса̀ твоѧ̑. в҃ Гдⷭ҇и, возлюби́хъ бл҃голѣ́пїе домꙋ̀ твоегѡ̀, и҆ мѣ́сто селе́нїѧ сла́вы твоеѧ̀. а҃ Возненави́дѣхъ це́рковь лꙋка́внꙋющихъ и҆ съ нечести́выми не сѧ́дꙋ. в҃ Ꙗ҆́кѡ сохрани́хъ пꙋти̑ гдⷭ҇ни, и҆ не нече́ствовахъ ѿ бг҃а моегѡ̀. а҃ Оу҆ста̀ првⷣнагѡ поꙋча́тсѧ премꙋ́дрости, и҆ ѧ҆зы́къ є҆гѡ̀ возглаго́летъ сꙋ́дъ. в҃ Пра́вда є҆гѡ̀ пребыва́етъ въ вѣ́къ вѣ́ка. а҃ Сщ҃е́нницы твоѝ ѡ҆блекꙋ́тсѧ пра́вдою, и҆ прпⷣбнїи твоѝ возра́дꙋютсѧ. в҃ Бл҃же́ни живꙋ́щїи въ домꙋ̀ твое́мъ, въ вѣ́ки вѣкѡ́въ восхва́лѧтъ тѧ̀.
Сла́ва, и҆ ны́нѣ: А҆ллилꙋ́їа, три́жды.
На па̑мѧти прпⷣбныхъ ѻ҆́бщїй.
Пе́рвый ли́къ пое́тъ:
Оу҆бл҃жа́емъ тѧ̀, прпⷣбне ѻ҆́тче, [и҆́мⷬ҇къ,] и҆ чти́мъ ст҃ꙋ́ю па́мѧть твою̀, наста́вниче мона́хѡвъ и҆ собесѣ́дниче а҆́гг҃лѡвъ.
Па́ки то́йже ли́къ пое́тъ:
а҃ Терпѧ̀ потерпѣ́хъ гдⷭ҇а, и҆ внѧ́тъ мѝ, и҆ ᲂу҆слы́ша мл҃твꙋ мою̀: в҃ Поста́ви на ка́мени но́зѣ моѝ, и҆ и҆спра́ви стѡпы̀ моѧ̑. а҃ Сѐ ᲂу҆дали́хсѧ бѣ́гаѧ, и҆ водвори́хсѧ въ пꙋсты́ни. в҃ Оу҆подо́бихсѧ неѧ́сыти пꙋсты́ннѣй. а҃ Бдѣ́хъ, и҆ бы́хъ ꙗ҆́кѡ пти́ца ѡ҆со́бѧщаѧсѧ на здѣ̀. в҃ Колѣ̑на моѧ̑ и҆знемого́ста ѿ поста̀: а҃ И҆ пло́ть моѧ̀ и҆змѣни́сѧ є҆ле́а ра́ди. в҃ Слеза́ми мои́ми посте́лю мою̀ ѡ҆мочꙋ̀. а҃ Ꙗ҆́кѡ ѡ҆быдо́ша мѧ̀ псѝ мно́зи, со́нмъ лꙋка́выхъ ѡ҆держа́ша мѧ̀. а҃ Напрѧго́ша лꙋ́къ сво́й ве́щь го́рькꙋ: в҃ Сострѣлѧ́ти въ та́йныхъ непоро́чнаго. в҃ Предзрѣ́хъ гдⷭ҇а предо мно́ю вы́нꙋ, ꙗ҆́кѡ ѡ҆деснꙋ́ю менѐ є҆́сть, да не подви́жꙋсѧ. а҃ Всѝ ꙗ҆зы́цы ѡ҆быдо́ша мѧ̀, и҆ и҆́менемъ гдⷭ҇нимъ противлѧ́хсѧ и҆̀мъ. в҃ Бл҃гослове́нъ гдⷭ҇ь, и҆́же не дадѐ на́съ въ лови́твꙋ зꙋбѡ́мъ и҆́хъ: а҃ Да и҆сповѣ́дѧтсѧ тебѣ̀, гдⷭ҇и, всѧ̑ дѣла̀ твоѧ̑: в҃ И҆ прпⷣбнїи твоѝ да бл҃гословѧ́тъ тѧ̀. а҃ И҆ ᲂу҆вѣ́дите, ꙗ҆́кѡ ᲂу҆дивѝ гдⷭ҇ь прпⷣбнаго своего̀. в҃ И҆ ᲂу҆трꙋди́сѧ во вѣ́къ, и҆ жи́въ бꙋ́детъ до конца̀. а҃ Храни́тъ гдⷭ҇ь дꙋ́шы прпⷣбныхъ свои́хъ. в҃ Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ. а҃ Чтⷭ҇на̀ пред̾ гдⷭ҇емъ сме́рть прпⷣбныхъ є҆гѡ̀. в҃ По́йте гдⷭ҇еви прпⷣбнїи є҆гѡ̀, и҆ и҆сповѣ́дайте па́мѧть ст҃ы́ни є҆гѡ̀, во всѣ́хъ лю́дехъ чꙋдеса̀ є҆гѡ̀.
Сла́ва, и҆ ны́нѣ: А҆ллилꙋ́їа, три́жды.
Ст҃ы̑мъ безплѡ́тнымъ ѻ҆́бщїй.
Пе́рвый ли́къ пое́тъ:
Велича́емъ ва́съ, а҆рха́гг҃ли и҆ а҆́гг҃ли, и҆ всѧ̑ вѡ́инства, херꙋві́ми и҆ серафі́ми, сла́вѧщыѧ гдⷭ҇а.
Велича́емъ ва́съ, а҆рха́гг҃ли, а҆́гг҃ли, нача̑ла, вла̑сти, прⷭ҇то́ли, гдⷭ҇ьствїѧ, си̑лы и҆ херꙋві́ми, стра̑шныѧ серафі́ми, прославлѧ́ющыѧ гдⷭ҇а.
Па́ки то́йже ли́къ пое́тъ:
а҃ И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ: в҃ И҆ пред̾ а҆́гг҃лы воспою̀ тебѣ̀. а҃ Творѧ́й а҆́гг҃лы своѧ̑ дꙋ́хи, и҆ слꙋги̑ своѧ̑ пла́мень ѻ҆́гненный. в҃ Бл҃гослови́те гдⷭ҇а всѝ а҆́гг҃ли є҆гѡ̀: а҃ Бл҃гослови́те гдⷭ҇а всѧ̑ си̑лы є҆гѡ̀: в҃ Поклони́тесѧ є҆мꙋ̀ всѝ а҆́гг҃ли є҆гѡ̀. а҃ Сѣдѧ́й на херꙋві́мѣхъ ꙗ҆ви́сѧ. в҃ Ѡ҆полчи́тсѧ а҆́гг҃лъ гдⷭ҇нь ѻ҆́крестъ боѧ́щихсѧ є҆гѡ̀. а҃ Сло́вомъ гдⷭ҇нимъ нб҃са̀ ᲂу҆тверди́шасѧ: в҃ И҆ дх҃омъ ᲂу҆́стъ є҆гѡ̀ всѧ̑ си́ла и҆́хъ. а҃ И҆ сѣ́де на херꙋві́мы, и҆ летѣ̀. в҃ Сла́вою и҆ че́стїю вѣнча́лъ є҆сѝ є҆го̀. а҃ Хвали́те гдⷭ҇а съ нб҃съ, хвали́те є҆го̀ въ вы́шнихъ. в҃ Хвали́те є҆го̀ всѝ а҆́гг҃ли є҆гѡ̀. а҃ Хвали́те є҆го̀ всѧ̑ си̑лы є҆гѡ̀. в҃ Всѧ́кое дыха́нїе да хва́литъ гдⷭ҇а.
Сла́ва, и҆ ны́нѣ: А҆ллилꙋ́їа, три́жды.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.