Пѣ́сни трⷪчны, на ѻ҆́смь гласѡ́въ, и҆ пѣ́сней стїхѝ пое́мїи по всѧ̑ дни̑ къ канѡ́нѡмъ
На ᲂу҆́трени по шестоѱа́лмїи быва́етъ є҆ктенїа̀ вели́каѧ. Та́же пое́тсѧ:
Бг҃ъ гдⷭ҇ь, и҆ ꙗ҆ви́сѧ на́мъ, бл҃гослове́нъ грѧды́й во и҆́мѧ гдⷭ҇не. [По гла́сꙋ днѐ тропарѧ̀.]
Сті́хъ: И҆сповѣ́дайтесѧ гдⷭ҇еви ꙗ҆́кѡ бл҃гъ ꙗ҆́кѡ въ вѣ́къ млⷭ҇ть є҆гѡ̀.
Сті́хъ: Ѡ҆быше́дше ѡ҆быдо́ша мѧ̀, и҆ и҆́менемъ гдⷭ҇нимъ противлѧ́хсѧ и҆̀мъ.
Сті́хъ: Не ᲂу҆мрꙋ̀, но жи́въ бꙋ́дꙋ, и҆ повѣ́мъ дѣла̀ гдⷭ҇нѧ.
Сті́хъ: Ка́мень, є҆го́же небрего́ша зи́ждꙋщїи, се́й бы́сть во главꙋ̀ ᲂу҆́гла: ѿ гдⷭ҇а бы́сть се́й, и҆ є҆́сть ди́венъ во ѻ҆чесѣ́хъ на́шихъ.
Пое́тсѧ же бг҃ъ гдⷭ҇ь, четы́режды. Та́же глаго́летсѧ тропа́рь слꙋчи́вшїйсѧ два́жды, и҆ бг҃оро́диченъ въ то́йже гла́съ. И҆ а҆́ще слꙋча́тсѧ два̀ тропарѧ̑, всегда̀ пе́рвый глаго́летсѧ два́жды. Та́же вторы́й, пото́мъ бг҃оро́диченъ. Пое́мꙋ же Бг҃ъ гдⷭ҇ь, ѿхо́дитъ канѡна́рхъ, и҆ стои́тъ посредѣ̀ хра́ма ѿкрове́нъ, и҆ глаго́летъ ти́хѡ вышепи̑санныѧ стїхѝ. Стои́тъ же та́мѡ, до́ндеже начнꙋ́тъ бг҃оро́диченъ. Та́же покланѧ́етсѧ на не́мже стои́тъ мѣ́стѣ, и҆ ѡ҆брати́всѧ покланѧ́етсѧ ликѡ́мъ, и҆ ѿхо́дитъ. Си́це твори́тъ, и҆ є҆гда̀ є҆́сть а҆ллилꙋ́їа. А҆́ще є҆́сть а҆ллилꙋ́їа, и҆лѝ вели́каѧ четыредесѧ́тница, по є҆ктенїѝ пое́мъ а҆ллилꙋ́їа, четы́режды, въ слꙋчи́вшїйсѧ гла́съ ѻ҆смогла́сника: Стїхи́ же глаго́летъ сїѧ̑:
Сті́хъа҃: Ѿ но́щи ᲂу҆́тренюетъ дх҃ъ мо́й къ тебѣ̀ бж҃е, занѐ свѣ́тъ повелѣ̑нїѧ твоѧ̑ на землѝ.
Сті́хъв҃: Пра́вдѣ наꙋчи́тесѧ живꙋ́щїи на землѝ.
Сті́хъг҃: За́висть прїи́метъ лю́ди ненака̑занныѧ.
Сті́хъд҃: Приложѝ и҆̀мъ ѕла̀ гдⷭ҇и, приложѝ ѕла̀ сла̑внымъ землѝ.
И҆ а҆́бїе трⷪ҇чны гла́са.
Вѣ́домо бꙋ́ди, ꙗ҆́кѡ въ трⷪ҇чныхъ, глаго́лемъ въ понедѣ́льникъ ꙗ҆́кѡ въ концѣ̀ си́хъ, си́це:
Предста́тельствы безпло́тныхъ твои́хъ поми́лꙋй на́съ. Во вто́рникъ: Мл҃твами прⷣте́чи твоегѡ̀ поми́лꙋй на́съ. Въ сре́дꙋ: Си́лою крⷭ҇та̀ твоегѡ̀ сохранѝ на́съ гдⷭ҇и. Та́кожде и҆ въ пѧто́къ. Въ четверто́къ: Мл҃твами ст҃ы́хъ а҆пⷭ҇лъ твои́хъ, и҆ ст҃и́телѧ нїкола́а поми́лꙋй на́съ. А҆ ᲂу҆ про́чихъ двою̀ трⷪ҇чнѡвъ глаго́лати, ꙗ҆́коже въ конца́хъ и҆́хъ пи́сано є҆́сть.
Пѣ̑сни трⷪ҇чны. Гла́съ а҃.
Плотски́ми ѡ҆бразова́нїи безпло́тныхъ си́лъ къ мы́сленномꙋ и҆ невеще́ственномꙋ возводи́ми ᲂу҆мꙋ̀, и҆ трист҃о́ю пѣ́снїю трїѷпоста́снагѡ бж҃ества̀ прїе́млюще сїѧ́нїе, херꙋві́мски возопїи́мъ є҆ди́номꙋ бг҃ꙋ: ст҃ъ, ст҃ъ, ст҃ъ є҆сѝ бж҃е на́шъ:
Сла́ва: Со всѣ́ми нбⷭ҇ными си́лами: херꙋві́мски сꙋ́щемꙋ въ вы́шнихъ возопїи́мъ, трист҃ꙋ́ю возсыла́юще хвалꙋ̀: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ:
И҆ ны́нѣ: Воста́вше ѿ сна̀, припа́даемъ тѝ, бл҃же, и҆ а҆́гг҃льскꙋю пѣ́снь вопїе́мъ тѝ, си́льне: ст҃ъ, ст҃ъ, ст҃ъ є҆сѝ бж҃е, бцⷣею поми́лꙋй на́съ:
Пѣ̑сни трⷪ҇чны. Гла́съ в҃.
Вы̑шнїѧ си̑лы подража́юще на землѝ, побѣ́днꙋю пѣ́снь прино́симъ тѝ, бл҃же: ст҃ъ, ст҃ъ, ст҃ъ є҆сѝ бж҃е на́шъ:
Сла́ва: Несозда́нное є҆стество̀, всѣ́хъ зижди́телю, ᲂу҆стнѣ̀ на́ша ѿве́рзи, ꙗ҆́кѡ да возвѣсти́мъ хвалꙋ̀ твою̀ вопїю́ще: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ.
И҆ ны́нѣ: Ѿ ѻ҆дра̀ и҆ сна̀ воздви́глъ мѧ̀ є҆сѝ, гдⷭ҇и, ᲂу҆́мъ мо́й просвѣтѝ и҆ се́рдце, и҆ ᲂу҆стнѣ̀ моѝ ѿве́рзи, во є҆́же пѣ́ти тѧ̀ ст҃а́ѧ трⷪ҇це: ст҃ъ, ст҃ъ, ст҃ъ є҆сѝ бж҃е, бцⷣею поми́лꙋй на́съ.
Пѣ̑сни трⷪ҇чны. Гла́съ г҃.
Трⷪ҇це є҆диносꙋ́щнаѧ и҆ нераздѣ́льнаѧ, є҆ди́нице трїѷпоста́снаѧ и҆ соприсносꙋ́щнаѧ, тебѣ̀ ꙗ҆́кѡ бг҃ꙋ а҆́гг҃льскꙋю пѣ́снь вопїе́мъ: ст҃ъ, ст҃ъ, ст҃ъ є҆сѝ бж҃е на́шъ:
Сла́ва: Ѻ҆ц҃а̀ безнача́льна, сн҃а собезнача́льна, дх҃а соприсносꙋ́щна, бж҃ество̀ є҆ди́но, херꙋві́мски славосло́вити дерза́юще, глаго́лемъ: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ.
И҆ ны́нѣ: Напра́снѡ сꙋдїѧ̀ прїи́детъ, и҆ коегѡ́ждо дѣѧ̑нїѧ ѡ҆бнажа́тсѧ, но стра́хомъ зове́мъ въ полꙋ́нощи: ст҃ъ, ст҃ъ, ст҃ъ є҆сѝ бж҃е на́шъ, бцⷣею поми́лꙋй на́съ.
Пѣ̑сни трⷪ҇чны. Гла́съ д҃.
Оу҆́мныхъ твои́хъ слꙋ́гъ, приноси́ти сме́ртнїи пѣ́снь дерза́юще, глаго́лемъ: ст҃ъ, ст҃ъ, ст҃ъ є҆сѝ бж҃е на́шъ:
Сла́ва: Ꙗ҆́кѡ чи́ни ны́нѣ а҆́гг҃льстїи на нб҃сѝ, и҆ стоѧ̑нїѧ стра́хомъ человѣ́чєскаѧ и҆ землѝ, побѣ́днꙋю пѣ́снь прино́симъ тѝ, бл҃же ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ.
И҆ ны́нѣ: Безнача́льнаго твоего̀ ѻ҆ц҃а̀ и҆ тебѐ хрⷭ҇тѐ бж҃е, и҆ прест҃а́го твоего̀ дх҃а херꙋві́мски славосло́вити дерза́юще глаго́лемъ: ст҃ъ, ст҃ъ, ст҃ъ, є҆сѝ бж҃е на́шъ, бцⷣею поми́лꙋй на́съ.
Пѣ̑сни трⷪ҇чны. Гла́съ є҃:
Пѣ́нїю вре́мѧ и҆ мл҃твѣ ча́съ, прилѣ́жнѡ возопїи́мъ є҆ди́номꙋ бг҃ꙋ: ст҃ъ, ст҃ъ, ст҃ъ є҆сѝ бж҃е на́шъ:
Сла́ва: Ѡ҆бразова́ти дерза́юще ᲂу҆́мнаѧ твоѧ̑ вѡ́инства, трⷪ҇це безнача́льнаѧ, ᲂу҆сты̀ недосто́йными вопїе́мъ: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ.
И҆ ны́нѣ: И҆́же въ ложесна̀ дв҃и́чєскаѧ вмѣсти́выйсѧ и҆ нѣ́дръ ѻ҆ч҃скихъ не разлꙋчи́выйсѧ, со а҆́гг҃лы и҆ на́съ хрⷭ҇тѐ бж҃е, прїимѝ вопїю́щихъ тѝ: ст҃ъ, ст҃ъ, ст҃ъ є҆сѝ бж҃е на́шъ, бцⷣею поми́лꙋй на́съ.
Пѣ̑сни трⷪ҇чны. Гла́съ ѕ҃:
Предстоѧ́ще со стра́хомъ херꙋві́ми ᲂу҆жаса́ющесѧ съ тре́петомъ серафі́ми, трист҃ꙋ́ю пѣ́снь прино́сѧтъ немо́лчнымъ гла́сомъ. съ ни́миже и҆ мы̀ вопїе́мъ грѣ́шнїи: ст҃ъ, ст҃ъ, ст҃ъ є҆сѝ бж҃е на́шъ:
Сла́ва: Безпло́тными ᲂу҆сты̀, немо́лчными славослове́ньми, шестокри́льнїи вопїю́тъ тѝ трист҃ꙋ́ю пѣ́снь бж҃е на́шъ. и҆ мы̀ и҆́же на землѝ, недосто́йными ᲂу҆сты̀ хвалꙋ́ ти возсыла́емъ: ст҃ъ, ст҃ъ, ст҃ъ є҆сѝ бж҃е на́шъ мл҃твами всѣ́хъ ст҃ы́хъ твои́хъ поми́лꙋй на́съ.
И҆ ны́нѣ: Трⷪ҇чныѧ є҆ди́ницы бж҃ество̀ неслїѧ́ннымъ соедине́нїемъ сла́вимъ, и҆ а҆́гг҃льскꙋю пѣ́снь вопїе́мъ: ст҃ъ, ст҃ъ, ст҃ъ є҆сѝ бж҃е на́шъ, бцⷣею поми́лꙋй на́съ.
Пѣ̑сни трⷪ҇чны. Гла́съ з҃:
Вы́шнею си́лою херꙋві́мски воспѣва́емый, и҆ бж҃е́ственною сла́вою а҆́гг҃льски покланѧ́емый, прїимѝ и҆ на́съ сꙋ́щихъ на землѝ, недосто́йными ᲂу҆стна́ми хвале́нїе тебѣ̀ возсыла́ющихъ: ст҃ъ, ст҃ъ ст҃ъ є҆сѝ бж҃е на́шъ.
Сла́ва: Ꙗ҆́кѡ со́нъ лѣ́ность ѿложи́вши, дꙋшѐ, и҆справле́нїе къ хвале́нїю покажѝ сꙋдїѝ, и҆ со стра́хомъ возопі́й: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ.
И҆ ны́нѣ: Непристꙋ́пномꙋ бж҃ествꙋ̀, во є҆ди́ницѣ трⷪ҇цѣ, серафі́мскꙋю трист҃ꙋ́ю возсыла́юще хвалꙋ̀, со стра́хомъ возопїи́мъ: ст҃ъ, бг҃ъ, ст҃ъ є҆сѝ бж҃е на́шъ, бцⷣею поми́лꙋй на́съ.
Пѣ̑сни трⷪ҇чны. Гла́съ и҃:
На нб҃о сердца̀ и҆мꙋ́ще, а҆́гг҃льскїй подража́имъ чи́нъ, и҆ со стра́хомъ сꙋдїѝ припаде́мъ, побѣ́днꙋю взыва́юще хвалꙋ̀: ст҃ъ, ст҃ъ, ст҃ъ є҆сѝ бж҃е на́шъ.
Сла́ва: Зрѣ́ти тебѐ не смѣ́юще херꙋві́ми, летѧ́ще зовꙋ́тъ со восклица́нїемъ, бж҃е́ственнꙋю пѣ́снь трист҃а́гѡ гла́са, съ ни́миже и҆ мы̀ вопїе́мъ тѝ: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ.
И҆ ны́нѣ: Слѧца́еми мно́жествомъ прегрѣше́нїй на́шихъ, и҆ не смѣ́юще воззрѣ́ти на высотꙋ̀ нбⷭ҇нꙋю, дꙋ́шꙋ съ тѣ́ломъ прекло́ньше, со а҆́гг҃лы пѣ́снь вопїе́мъ тѝ: ст҃ъ, ст҃ъ, ст҃ъ є҆сѝ бж҃е, бцⷣею поми́лꙋй на́съ.
Та́же стїхосло́вїе Ѱалти́ра, и҆ сѣда́льны по чи́нꙋ и҆́хъ.
И҆ по си́хъ глаго́лемъ: Гдⷭ҇и поми́лꙋй, три́жды. Сла́ва, и҆ ны́нѣ: Поми́лꙋй мѧ̀ бж҃е:
И҆ а҆́бїе начина́етъ пѣ̑сни.
Подоба́етъ вѣ́дати, а҆́ще нѣ́сть недѣ́лѧ, нижѐ влⷣчнїй ни бг҃оро́дичный пра́здникъ, ни предпра́зднство и҆лѝ попра́зднство и҆́хъ, и҆лѝ пра́зднꙋемагѡ ст҃а́гѡ, стїхосло́вѧтсѧ пѣ̑сни ско́рѡ си́це.
Пе́рвый ли́къ глаго́летъ:
Гдⷭ҇еви пое́мъ, сла́внѡ бо просла́висѧ. Конѧ̀ и҆ вса́дника ве́рже въ мо́ре.
Та́же вторы́й ли́къ:
Помо́щникъ и҆ покрови́тель бы́сть мнѣ̀ во сп҃се́нїе, се́й мо́й бг҃ъ, и҆ просла́влю є҆го̀, бг҃ъ ѻ҆ц҃а̀ моегѡ̀, и҆ вознесꙋ̀ є҆го̀.
И҆ па́ки пе́рвый ли́къ:
Гдⷭ҇ь сокрꙋша́ѧй бра̑ни, гдⷭ҇ь и҆́мѧ є҆мꙋ̀: колєсни́цы фараѡ́нѡвы и҆ си́лꙋ є҆гѡ̀ ве́рже въ мо́ре.
Вторы́й ли́къ:
Пꙋчи́ною покры̀ ѧ҆̀, погрѧзо́ша во глꙋбинѣ̀ ꙗ҆́кѡ ка́мень.
Ѿ здѣ̀ начина́й стїхѝ, въ слꙋчи́вшїйсѧ гла́съ канѡ́на, и҆ глаго́ли і҆рмо́съ со стїхо́мъ, и҆ по чи́нꙋ тропарѝ:
Ѡ҆гꙋстѣ́ша ꙗ҆́кѡ стѣна̀ во́ды, ѡ҆гꙋстѣ́ша и҆ во́лны посредѣ̀ мо́рѧ.
Глаго́ли і҆рмо́съ.
Речѐ вра́гъ: гна́въ пости́гнꙋ, раздѣлю̀ коры́сть, и҆спо́лню дꙋ́шꙋ мою̀, ᲂу҆бїю̀ мече́мъ мои́мъ, госпо́дствовати бꙋ́детъ рꙋка̀ моѧ̀.
Глаго́ли тропа́рь.
Посла́лъ є҆сѝ дх҃ъ тво́й, покры̀ ѧ҆̀ мо́ре, погрѧзо́ша ꙗ҆́кѡ ѻ҆́лово въ водѣ̀ ѕѣ́льнѣй.
Кто̀ подо́бенъ тебѣ̀ въ бозѣ́хъ гдⷭ҇и; кто̀ подо́бенъ тебѣ̀, просла́вленъ во ст҃ы́хъ, ди́венъ сла́внѡ творѧ́й чꙋдеса̀;
Просте́рлъ є҆сѝ десни́цꙋ твою̀, пожрѐ ѧ҆̀ землѧ̀: наста́вилъ є҆сѝ пра́вдою твое́ю лю́ди твоѧ̑ сїѧ̑, ꙗ҆̀же и҆зба́вилъ є҆сѝ.
Оу҆тѣ́шилъ є҆сѝ крѣ́постїю твое́ю во ѻ҆би́тель ст҃ꙋ́ю твою̀. слы́шаша ꙗ҆зы́цы, и҆ прогнѣ́вашасѧ, болѣ̑зни прїѧ́ша живꙋ́щїи въ фїлїсті́мѣ.
На и҃: Тогда̀ потща́шасѧ влады̑ки є҆дѡ́мстїи и҆ кнѧзе́й мѡаві́тскихъ, прїѧ́тъ ѧ҆̀ тре́петъ, раста́ѧша всѝ живꙋ́щїи въ ханаа́нѣ.
Нападе́тъ на нѧ̀ стра́хъ и҆ тре́петъ, вели́чїемъ мы́шцы твоеѧ̀ да ѡ҆каменѧ́тсѧ.
На ѕ҃: До́ндеже про́йдꙋтъ лю́дїе твоѝ, гдⷭ҇и, до́ндеже про́йдꙋтъ лю́дїе твоѝ сі́и, ꙗ҆̀же стѧжа́лъ є҆сѝ.
Содѣ́лалъ є҆сѝ, гдⷭ҇и, ст҃ы́ню, ю҆́же ᲂу҆гото́вастѣ рꙋ́цѣ твоѝ.
На д҃: Гдⷭ҇ь црⷭ҇твꙋѧй вѣ́ки и҆ на вѣ́къ, и҆ є҆щѐ: є҆гда̀ вни́де ко́нь фараѡ́новъ съ колесни́цами и҆ вса́дники въ мо́ре.
Сы́нове же і҆и҃лєвы проидо́ша сꙋ́шею посредѣ̀ мо́рѧ.
Сла́ва: И҆ ны́нѣ:
Подоба́етъ вѣ́дати, ꙗ҆́кѡ втора́ѧ пѣ́снь никогда́же стїхосло́витсѧ, то́кмѡ въ вели́кой четыредесѧ́тницѣ во вто́рники.
Пѣ́снь тре́тїѧ:
Оу҆тверди́сѧ се́рдце моѐ въ гдⷭ҇ѣ, вознесе́сѧ ро́гъ мо́й ѡ҆ бз҃ѣ мое́мъ, разшири́шасѧ ᲂу҆ста̀ моѧ̑ на врагѝ моѧ̑, возвесели́хсѧ ѡ҆ сп҃се́нїи твое́мъ.
Ꙗ҆́кѡ нѣ́сть ст҃ъ, ꙗ҆́кѡ гдⷭ҇ь, и҆ нѣ́сть пра́веденъ, ꙗ҆́кѡ бг҃ъ на́шъ, и҆ нѣ́сть ст҃ъ, па́че тебѐ.
Не хвали́тесѧ и҆ не глаго́лите высѡ́каѧ въ горды́ни, нижѐ да и҆зы́детъ велерѣ́чїе и҆з̾ ᲂу҆́стъ ва́шихъ.
Ꙗ҆́кѡ бг҃ъ ра́зꙋмѡвъ гдⷭ҇ь, и҆ бг҃ъ ᲂу҆готовлѧ́ѧй начина̑нїѧ своѧ̑.
Начина́й: Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою.
И҆спо́лненнїи хлѣ́бѡвъ лиши́шасѧ и҆ а҆́лчꙋщїи прише́льствоваша зе́млю.
Ꙗ҆́кѡ непло́ды родѝ се́дмь, и҆ мнѡ́гаѧ въ ча́дѣхъ и҆знемо́же.
Гдⷭ҇ь мертви́тъ и҆ живи́тъ, низво́дитъ во а҆́дъ, и҆ возво́дитъ.
Гдⷭ҇ь ᲂу҆бо́житъ и҆ богати́тъ, смирѧ́етъ и҆ вы́ситъ: возставлѧ́етъ ѿ землѝ ᲂу҆бо́га, и҆ ѿ гно́ища воздвиза́етъ ни́ща.
Посади́ти є҆го̀ съ могꙋ́щими люде́й, и҆ престо́лъ сла́вы наслѣ́дꙋѧ є҆мꙋ̀.
На и҃: Даѧ́й мл҃твꙋ молѧ́щемꙋсѧ, и҆ бл҃гословѝ лѣ̑та првⷣнагѡ.
Гдⷭ҇ь не́мощна сотворѝ сꙋпоста́та є҆гѡ̀, гдⷭ҇ь ст҃ъ.
На ѕ҃: Да не хва́литсѧ премꙋ́дрый премꙋ́дростїю свое́ю, и҆ да не хва́литсѧ си́льный си́лою свое́ю, и҆ да не хва́литсѧ бога́тый бога́тствомъ свои́мъ.
И҆ твори́ти сꙋ́дъ и҆ пра́вдꙋ посредѣ̀ землѝ.
На д҃: Гдⷭ҇ь взы́де на нб҃са̀, и҆ возгремѣ̀, то́й сꙋ́дитъ концє́мъ землѝ пра́веденъ сы́й.
И҆ да́стъ крѣ́пость царю̀ на́шемꙋ и҆ вознесе́тъ ро́гъ хрїста̀ своегѡ̀.
Сла́ва: И҆ ны́нѣ:
Та́же пое́мъ і҆рмо́съ тре́тїѧ пѣ́сни, послѣ́днѧгѡ канѡ́на, въ кото́рый лю́бо де́нь слꙋчи́тсѧ: подо́бнѣ и҆ въ седмꙋ́ю шесты́ѧ пѣ́сни і҆рмо́съ, и҆ въ девѧ́тꙋю ѻ҆смы́ѧ, и҆ по девѧ́той девѧ́тыѧ. По про́чихъ же дне́хъ, ре́кше по пе́рвой, по четве́ртой, по пѧ́той, по седмо́й, є҆гда̀ пое́тсѧ ѻ҆смогла́сникъ съ мине́ею, во всѐ лѣ́то не глаго́летсѧ і҆рмо́съ ѿ мине́и, кромѣ̀ си́хъ, ꙗ҆̀же здѣ̀ ᲂу҆каза́шасѧ.
Пѣ́снь четве́ртаѧ.
Гдⷭ҇и, ᲂу҆слы́шахъ слꙋ́хъ тво́й и҆ ᲂу҆боѧ́хсѧ, гдⷭ҇и, разꙋмѣ́хъ дѣла̀ твоѧ̑, и҆ ᲂу҆жасо́хсѧ.
Внегда̀ смꙋти́тисѧ дꙋшѝ мое́й во гнѣ́вѣ, млⷭ҇ть твою̀ помѧне́ши.
Бг҃ъ ѿ ю҆́га прїи́детъ, и҆ ст҃ы́й и҆з̾ горы̀ прїѡсѣне́нныѧ ча́щи.
Покры̀ нб҃са̀ добродѣ́тель є҆гѡ̀, и҆ хвалы̀ є҆гѡ̀ и҆спо́лнь землѧ̀.
Начина́й: Вложи́лъ є҆сѝ во главы̑ беззако́нныхъ сме́рть, воздви́глъ є҆сѝ ᲂу҆́зы да́же до вы́и въ коне́цъ.
Разсѣ́клъ є҆сѝ во и҆зстꙋпле́нїи главы̀ си́льныхъ. стрѧсꙋ́тсѧ въ не́й. разве́рзꙋтъ ᲂу҆зды̑ своѧ̑, ꙗ҆́кѡ снѣда́ѧй ни́щїй та́й.
И҆зве́лъ є҆сѝ на мо́ре ко́ни твоѝ, смꙋща́ющыѧ во́ды мнѡ́ги.
Сохрани́хсѧ, и҆ ᲂу҆боѧ́сѧ се́рдце моѐ, ѿ гла́са мл҃твы ᲂу҆сте́нъ мои́хъ.
И҆ вни́де тре́петъ въ кѡ́сти моѧ̑, и҆ во мнѣ̀ смѧте́сѧ крѣ́пость моѧ̀.
Почі́ю въ де́нь ско́рби моеѧ̀, да взы́дꙋ въ лю́ди прише́льствїѧ моегѡ̀.
На и҃: Занѐ смо́квь не плодопринесе́тъ, и҆ не бꙋ́детъ ро́да въ лоза́хъ.
Солже́тъ дѣ́ло ма́слинное, и҆ полѧ̀ не сотворѧ́тъ ꙗ҆́ди.
На ѕ҃: Ѡ҆скꙋдѣ́ша ѻ҆́вцы ѿ пи́щи, и҆ не бꙋ́детъ волѡ́въ при ꙗ҆́слехъ.
А҆́зъ же ѡ҆ гдⷭ҇ѣ возра́дꙋюсѧ, возвеселю́сѧ ѡ҆ бз҃ѣ сп҃сѣ мое́мъ.
На д҃: Гдⷭ҇ь бг҃ъ мо́й си́ла моѧ̀, и҆ ᲂу҆чини́тъ но́зѣ моѝ на соверше́нїе.
И҆ на высѡ́каѧ возво́дитъ мѧ̀, побѣди́ти мѝ въ пѣ́сни є҆гѡ̀.
Сла́ва: И҆ ны́нѣ:
Пѣ́снь пѧ́таѧ.
Ѿ но́щи ᲂу҆́тренюетъ дꙋ́хъ мо́й къ тебѣ̀, бж҃е, занѐ свѣ́тъ повелѣ̑нїѧ твоѧ̑ на землѝ.
Пра́вдѣ наꙋчи́тесѧ живꙋ́щїи на землѝ.
Начина́й: Гдⷭ҇и, высока̀ твоѧ̀ мы́шца, и҆ не вѣ́дѣша, разꙋмѣ́вше же постыдѧ́тсѧ.
За́висть прїи́метъ лю́ди ненака̑занныѧ, и҆ ны́нѣ ѻ҆́гнь сꙋпоста́ты поѧ́стъ.
Гдⷭ҇и бж҃е на́шъ, ми́ръ да́ждь на́мъ, всѧ̑ бо возда́лъ є҆сѝ на́мъ.
Гдⷭ҇и бж҃е на́шъ, стѧжи́ ны: гдⷭ҇и, ра́звѣ тебѐ и҆но́гѡ не вѣ́мы, и҆́мѧ твоѐ и҆менꙋ́емъ.
Ме́ртвїи же живота̀ не и҆́мꙋтъ ви́дѣти, нижѐ вра́чеве воскресѧ́тъ.
Сегѡ̀ ра́ди наве́лъ є҆сѝ и҆ погꙋби́лъ, и҆ взѧ́лъ є҆сѝ всѧ́къ мꙋ́жескъ по́лъ и҆́хъ.
На и҃: Приложѝ и҆̀мъ ѕла̀ гдⷭ҇и, приложѝ ѕла̀ сла̑внымъ землѝ.
Гдⷭ҇и, въ ско́рби помѧнꙋ́хомъ тѧ̀, въ ско́рби ма́лѣ наказа́нїе твоѐ на́мъ.
На ѕ҃: И҆ ꙗ҆́кѡ болѧ́щаѧ приближа́етсѧ роди́ти, и҆ въ болѣ́зни свое́й вопїѧ́ше: та́кѡ бы́хомъ возлю́бленномꙋ твоемꙋ̀.
Не паде́мъ, но падꙋ́тъ живꙋ́щїи на землѝ.
На д҃: Воскре́снꙋтъ ме́ртвїи, и҆ воста́нꙋтъ и҆̀же во гробѣ́хъ, и҆ возвеселѧ́тсѧ и҆̀же на землѝ.
Роса́ бо ꙗ҆́же ѿ тебѐ, и҆сцѣле́нїе и҆̀мъ є҆́сть, землѧ́ же нечести́выхъ паде́тъ.
Сла́ва: И҆ ны́нѣ:
Подоба́етъ вѣ́дати, ꙗ҆́кѡ шеста́ѧ пѣ́снь не стїхосло́витсѧ, но глаго́лемъ і҆рмо́съ, и҆ є҆ди́нъ тропа́рь без̾ стїха̀, занѐ не и҆́мать шеста́ѧ пѣ́снь мно́жайшыѧ стїхѝ, ꙗ҆́кѡ про́чыѧ: подо́бнѣ же и҆ седма́ѧ, и҆ девѧ́таѧ пѣ̑сни.
Седма́ѧ же стїхосло́витсѧ всѧ̀ въ сꙋббѡ́тахъ ст҃ы́ѧ м҃-цы.
Пѣ́снь шеста́ѧ.
Возопи́хъ въ ско́рби мое́й ко гдⷭ҇ꙋ бг҃ꙋ моемꙋ̀, и҆ ᲂу҆слы́ша мѧ̀.
Ѿве́рглъ мѧ̀ є҆сѝ во глꙋбины̀ се́рдца морска́гѡ, и҆ рѣ́ки ѡ҆быдо́ша мѧ̀.
Всѧ̑ высѡты̀ твоѧ̑, и҆ во́лны твоѧ̑ на мнѣ̀ преидо́ша.
Є҆да̀ приложꙋ̀ призрѣ́ти мѝ къ хра́мꙋ ст҃о́мꙋ твоемꙋ̀;
На и҃: Возлїѧ́сѧ вода̀ до дꙋшѝ моеѧ̀, бе́здна ѡ҆бы́де мѧ̀ послѣ́днѧѧ.
Понрѐ глава̀ моѧ̀ въ разсѣ́ли го́ръ: снидо́хъ въ зе́млю, є҆ѧ́же верєѝ є҆ѧ̀ закле́пи вѣ́чнїи.
На ѕ҃: И҆ да взы́детъ и҆з̾ и҆стлѣ́нїѧ живо́тъ мо́й, къ тебѣ̀ гдⷭ҇и бж҃е мо́й.
И҆ да прїи́детъ къ тебѣ̀ мл҃тва моѧ̀, къ хра́мꙋ ст҃о́мꙋ твоемꙋ̀.
На д҃: Хранѧ́щїи сꙋ́єтнаѧ и҆ лѡ́жнаѧ, млⷭ҇ть свою̀ ѡ҆ста́виша.
Є҆ли̑ка ѡ҆бѣща́хъ, возда́мъ тебѣ̀ во сп҃се́нїе моѐ гдⷭ҇еви.
Сла́ва: И҆ ны́нѣ:
Пѣ́снь седма́ѧ.
Бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ, и҆ хва́льно и҆ просла́влено и҆́мѧ твоѐ во вѣ́ки.
И҆ всѧ̑ дѣла̀ твоѧ̑ и҆́стинна, и҆ пра́ви пꙋтїѐ твоѝ.
И҆ всѝ сꙋдѝ твоѝ и҆́стинни, и҆ сꙋдьбы̑ и҆́стинны сотвори́лъ є҆сѝ.
И҆ на гра́дъ ст҃ы́й ѻ҆тє́цъ на́шихъ і҆ерⷭ҇ли́мъ.
На и҃: Бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ, и҆ препѣ́тый и҆ превозноси́мый во вѣ́ки.
И҆ бл҃гослове́но и҆́мѧ сла́вы твоеѧ̀ ст҃о́е, препѣ́тое и҆ превозноси́мое во вѣ́ки.
На ѕ҃: Бл҃гослове́нъ є҆сѝ въ хра́мѣ ст҃ы́ѧ сла́вы твоеѧ̀, препѣ́тый и҆ превозноси́мый во вѣ́ки.
Бл҃гослове́нъ є҆сѝ ви́дѧй бє́здны, сѣдѧ́й на херꙋві́мѣхъ, препѣ́тый и҆ превозноси́мый во вѣ́ки.
На д҃: Бл҃гослове́нъ є҆сѝ на прⷭ҇то́лѣ сла́вы црⷭ҇твїѧ твоегѡ̀, препѣ́тый и҆ превозноси́мый во вѣ́ки.
Бл҃гослове́нъ є҆сѝ на тве́рди нбⷭ҇нѣй, препѣ́тый и҆ превозноси́мый во вѣ́ки.
Сла́ва: И҆ ны́нѣ:
Пѣ́снь ѻ҆сма́ѧ.
Бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки.
Бл҃гослови́те а҆́гг҃ли гдⷭ҇ни, нб҃са̀ гдⷭ҇нѧ гдⷭ҇а по́йте и҆ превозноси́те є҆го̀ во вѣ́ки.
Бл҃гослови́те во́ды всѧ̑, ꙗ҆̀же превы́ше нб҃съ, всѧ̑ си̑лы гдⷭ҇ни гдⷭ҇а, по́йте и҆ превозноси́те є҆го̀ во вѣ́ки.
Бл҃гослови́те со́лнце и҆ мѣ́сѧцъ, ѕвѣ́зды нбⷭ҇ныѧ гдⷭ҇а, по́йте и҆ превозноси́те є҆го̀ во вѣ́ки.
Начина́й: Бл҃гослови́те всѧ́къ до́ждь и҆ роса̀, всѝ дꙋ́си гдⷭ҇а, по́йте и҆ превозноси́те є҆го̀ во вѣ́ки.
Бл҃гослови́те ѻ҆́гнь и҆ ва́ръ, стꙋ́дь и҆ зно́й гдⷭ҇а, по́йте и҆ превозноси́те є҆го̀ во вѣ́ки.
Бл҃гослови́те сла́ны и҆ снѣ́зи, нѡ́щи и҆ дні́е гдⷭ҇а, по́йте и҆ превозноси́те є҆го̀ во вѣ́ки.
Бл҃гослови́те свѣ́тъ и҆ тьма̀, мѡ́лнїѧ и҆ ѻ҆́блацы гдⷭ҇а, по́йте и҆ превозноси́те є҆го̀ во вѣ́ки.
Бл҃гослови́те землѧ̀, го́ры и҆ хо́лмы, и҆ всѧ̑ прозѧба̑ющаѧ на не́й гдⷭ҇а, по́йте и҆ превозноси́те є҆го̀ во вѣ́ки.
Бл҃гослови́те и҆сто́чницы, морѧ̀ и҆ рѣ́ки, ки́ти, и҆ всѧ̑ дви̑жꙋщаѧсѧ въ вода́хъ гдⷭ҇а, по́йте и҆ превозноси́те є҆го̀ во вѣ́ки.
На и҃: Бл҃гослови́те всѧ̑ пти̑цы нбⷭ҇ныѧ, ѕвѣ́рїе и҆ всѝ ско́ти гдⷭ҇а, по́йте и҆ превозноси́те є҆го̀ во вѣ́ки.
Бл҃гослови́те сы́нове человѣ́честїи, да бл҃гослови́тъ і҆и҃ль гдⷭ҇а, по́йте и҆ превозноси́те є҆го̀ во вѣ́ки.
На ѕ҃: Бл҃гослови́те сщ҃е́нницы гдⷭ҇ни, рабѝ гдⷭ҇ни гдⷭ҇а, по́йте и҆ превозноси́те є҆го̀ во вѣ́ки.
Бл҃гослови́те дꙋ́си и҆ дꙋ́шы првⷣныхъ прпⷣбнїи и҆ смире́ннїи се́рдцемъ гдⷭ҇а, по́йте и҆ превозноси́те є҆го̀ во вѣ́ки.
На д҃: Бл҃гослови́те а҆на́нїа, а҆за́рїа, мїсаи́лъ гдⷭ҇а, по́йте и҆ превозноси́те є҆го̀ во вѣ́ки.
Бл҃гослови́те а҆пⷭ҇ли, прⷪ҇ро́цы и҆ мч҃нцы гдⷭ҇ни гдⷭ҇а, по́йте и҆ превозноси́те є҆го̀ во вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
И҆ ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
Та́же глаго́лемъ: Хва́лимъ, бл҃гослови́мъ покланѧ́емсѧ гдⷭ҇еви, пою́ще и҆ превозносѧ́ще во всѧ̑ вѣ́ки.
И҆ покло́нъ. И҆ пое́мъ і҆рмо́съ ѻ҆смы́ѧ пѣ́сни послѣ́днѧгѡ канѡ́на.
Пѣ́снь девѧ́таѧ.
Вели́читъ дꙋша̀ моѧ̀ гдⷭ҇а, и҆ возра́довасѧ дх҃ъ мо́й ѡ҆ бз҃ѣ сп҃сѣ мое́мъ.
Ꙗ҆́кѡ призрѣ̀ на смире́нїе рабы̀ своеѧ̀, се́ бо ѿ ны́нѣ ᲂу҆бл҃жа́тъ мѧ̀ всѝ ро́ди.
Ꙗ҆́кѡ сотворѝ мнѣ̀ вели́чїе си́льный, и҆ ст҃о и҆́мѧ є҆гѡ̀, и҆ млⷭ҇ть є҆гѡ̀ въ ро́ды родѡ́въ боѧ́щымсѧ є҆гѡ̀.
Сотворѝ держа́вꙋ мы́шцею свое́ю, расточѝ гѡ́рдыѧ мы́слїю се́рдца и҆́хъ.
Низложѝ си́льныѧ со престѡ́лъ, и҆ вознесѐ смирє́нныѧ, а҆́лчꙋщыѧ и҆спо́лни бла̑гъ, и҆ богатѧ́щыѧсѧ ѿпꙋстѝ тщы̀.
Воспрїѧ́тъ і҆и҃лѧ ѻ҆́трока своего̀, помѧнꙋ́ти ми́лѡсти, ꙗ҆́коже глаго́ла ко ѻ҆тцє́мъ на́шымъ, а҆враа́мꙋ и҆ сѣ́мени є҆гѡ̀, да́же до вѣ́ка.
Пѣ́снь ст҃а́гѡ прⷪ҇ро́ка заха́рїи, ѻ҆тца̀ предте́чева:
Бл҃гослове́нъ гдⷭ҇ь бг҃ъ і҆и҃левъ, ꙗ҆́кѡ посѣтѝ и҆ сотворѝ и҆збавле́нїе лю́демъ свои́мъ.
И҆ воздви́же ро́гъ сп҃се́нїѧ на́мъ, въ домꙋ̀ дв҃довѣ ѻ҆́трока своегѡ̀.
Ꙗ҆́коже глаго́ла ᲂу҆сты̀ ст҃ы́хъ, сꙋ́щихъ ѿ вѣ́ка прⷪ҇рѡ́къ є҆гѡ̀, сп҃се́нїе ѿ вра̑гъ на́шихъ, и҆ и҆з̾ рꙋкѝ всѣ́хъ ненави́дѧщихъ на́съ.
Сотвори́ти млⷭ҇ть со ѻ҆тцы̀ на́шими, и҆ помѧнꙋ́ти завѣ́тъ ст҃ы́й сво́й.
На и҃: Клѧ́твꙋ, є҆́юже клѧ́тсѧ ко а҆враа́мꙋ ѻ҆тцꙋ̀ на́шемꙋ, да́ти на́мъ без̾ стра́ха и҆з̾ рꙋкѝ вра̑гъ на́шихъ и҆зба́вльшымсѧ.
Слꙋжи́ти є҆мꙋ̀ преподо́бїемъ и҆ пра́вдою пред̾ ни́мъ, всѧ̑ дни̑ живота̀ на́шегѡ.
На ѕ҃: И҆ ты̀ ѻ҆троча̀, прⷪ҇ро́къ вы́шнѧгѡ нарече́шисѧ: пред̾и́деши бо пред̾ лице́мъ гдⷭ҇нимъ, ᲂу҆гото́вати пꙋти̑ є҆гѡ̀.
Да́ти ра́зꙋмъ сп҃се́нїѧ лю́демъ є҆гѡ̀, во ѡ҆ставле́нїе грѣ̑хъ и҆́хъ, милосе́рдїѧ ра́ди ми́лости бг҃а на́шегѡ.
На д҃: Въ ни́хже посѣтѝ на́съ восто́къ съ высоты̀, ꙗ҆ви́тисѧ во тьмѣ̀ и҆ сѣ́ни сме́ртнѣй сѣдѧ́щихъ.
Напра́вити но́ги на́шѧ на пꙋ́ть ми́ренъ.
Сла́ва: И҆ ны́нѣ:
И҆ по і҆рмосѣ̀: Досто́йно є҆́сть: И҆ є҆ктенїа̀. а҆́ще є҆́сть м҃-ца, и҆лѝ а҆ллилꙋ́їа, глаго́лемъ свѣти́льны въ слꙋчи́вшїйсѧ гла́съ, по три́жды. Во и҆сполнє́нїѧ же свѣти́льнѡвъ, глаго́лемъ си́це:
Въ понедѣ́льникъ ᲂу҆́бѡ къ пе́рвомꙋ: Предста́тельствы безпло́тныхъ твои́хъ, и҆ сп҃си́ мѧ.
Во вто́рникъ же: Мл҃твами гдⷭ҇и прⷣте́чи твоегѡ̀, и҆ сп҃си́ мѧ.
Въ сре́дꙋ и҆ пѧто́къ: Си́лою гдⷭ҇и крⷭ҇та̀ твоегѡ̀, и҆ сп҃си́ мѧ.
Въ четверто́къ: Мл҃твами гдⷭ҇и а҆пⷭ҇лъ твои́хъ и҆ ст҃и́телѧ нїкола́а, и҆ сп҃си́ мѧ.
Во второ́е на Сла́ва: глаго́лати внегда̀ въ конца́хъ мл҃твами гдⷭ҇и ст҃ы́хъ твои́хъ, и҆ сп҃си́ мѧ.
Въ тре́тїе же на И҆ ны́нѣ: въ конца́хъ глаго́лати: Мл҃твами гдⷭ҇и бцⷣы, и҆ сп҃си́ мѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.