Гдⷭи воззва́хъ, пое́мый на вече́рнѧхъ, и҆ лїтꙋргі́ахъ преждеѡсщ҃е́нныхъ
А҆́ще же є҆́сть вели́каѧ четыредесѧ́тница, по стїхосло́вїи, Ко Гдⷭ҇ꙋ внегда̀ скорбѣ́ти мѝ: А҆́бїе, Гдⷭ҇и воззва́хъ въ прилꙋчи́вшїйсѧ гла́съ.
а Пе́рвый ли́къ: Гдⷭ҇и воззва́хъ тебѣ̀, ᲂу҆слы́ши мѧ̀: ᲂу҆слы́ши мѧ̀ гдⷭ҇и. Гдⷭ҇и воззва́хъ къ тебѣ̀, ᲂу҆слы́ши мѧ̀, вонмѝ гла́сꙋ моле́нїѧ моегѡ̀, внегда̀ воззва́ти мѝ къ тебѣ̀. Оу҆слы́ши мѧ̀ гдⷭ҇и.
в Вторы́й ли́къ: Да и҆спра́витсѧ мл҃тва моѧ̀, ꙗ҆́кѡ кади́ло пред̾ тобо́ю: воздѣѧ́нїе рꙋкꙋ̀ моє́ю, же́ртва вече́рнѧѧ. Оу҆слы́ши мѧ̀ гдⷭ҇и.
И҆ по чи́нꙋ стїхѝ:
а Положѝ гдⷭ҇и хране́нїе ᲂу҆стѡ́мъ мои̑мъ, и҆ две́рь ѡ҆гражде́нїѧ ѡ҆ ᲂу҆стна́хъ мои́хъ. в Не ᲂу҆клонѝ се́рдце моѐ въ словеса̀ лꙋка́вствїѧ, непщева́ти вины̀ ѡ҆ грѣсѣ́хъ: а Съ человѣ́ки дѣ́лающими беззако́нїе, и҆ не сочтꙋ́сѧ со и҆збра́нными и҆́хъ. в Нака́жетъ мѧ̀ првⷣникъ млⷭ҇тїю, и҆ ѡ҆бличи́тъ мѧ̀: є҆ле́й же грѣ́шнагѡ да не нама́ститъ главы̀ моеѧ̀. а Ꙗ҆́кѡ є҆щѐ и҆ мл҃тва моѧ̀ во бл҃говоле́нїихъ и҆́хъ, поже́рты бы́ша при ка́мени сꙋдїи̑ и҆́хъ. в Оу҆слы́шатсѧ глаго́ли моѝ, ꙗ҆́кѡ возмого́ша, ꙗ҆́кѡ то́лща землѝ просѣ́десѧ на землѝ, расточи́шасѧ кѡ́сти и҆́хъ при а҆́дѣ. а Ꙗ҆́кѡ къ тебѣ̀, гдⷭ҇и гдⷭ҇и, ѻ҆́чи моѝ, на тѧ̀ ᲂу҆пова́хъ, не ѿимѝ дꙋ́шꙋ мою̀. в Сохранѝ мѧ̀ ѿ сѣ́ти, ю҆́же соста́виша мѝ, и҆ ѿ собла̑знъ дѣ́лающихъ беззако́нїе. а Падꙋ́тъ во мре́жꙋ свою̀ грѣ̑шницы: є҆ди́нъ є҆́смь а҆́зъ, до́ндеже прейдꙋ̀. в Гла́сомъ мои́мъ ко гдⷭ҇ꙋ воззва́хъ, гла́сомъ мои́мъ ко гдⷭ҇ꙋ помоли́хсѧ. а Пролїю̀ пред̾ ни́мъ моле́нїе моѐ, печа́ль мою̀ пред̾ ни́мъ возвѣщꙋ̀. в Внегда̀ и҆счеза́ти ѿ менѐ дꙋ́хꙋ моемꙋ̀, и҆ ты̀ позна́лъ є҆сѝ стєзѝ моѧ̑. а На пꙋтѝ се́мъ, по немꙋ́же хожда́хъ, скры́ша сѣ́ть мнѣ̀. в Смотрѧ́хъ ѡ҆деснꙋ́ю, и҆ возглѧ́дахъ, и҆ не бѣ̀ зна́ѧй менѐ. а Поги́бе бѣ́гство ѿ менѐ, и҆ нѣ́сть взыска́ѧй дꙋ́шꙋ мою̀. в Воззва́хъ къ тебѣ̀ гдⷭ҇и, рѣ́хъ: ты̀ є҆сѝ ᲂу҆пова́нїе моѐ, ча́сть моѧ̀ є҆сѝ на землѝ живы́хъ. а Вонмѝ моле́нїю моемꙋ̀, ꙗ҆́кѡ смири́хсѧ ѕѣлѡ̀. в И҆зба́ви мѧ̀ ѿ гонѧ́щихъ мѧ̀, ꙗ҆́кѡ ᲂу҆крѣпи́шасѧ па́че менѐ.
На де́сѧть: а И҆зведѝ и҆з̾ темни́цы дꙋ́шꙋ мою̀, и҆сповѣ́датисѧ и҆́мени твоемꙋ̀. в Менѐ ждꙋ́тъ првⷣницы, до́ндеже возда́си мнѣ̀.
На ѻ҆́смь: а И҆з̾ глꙋбины̀ воззва́хъ къ тебѣ̀ гдⷭ҇и, гдⷭ҇и ᲂу҆слы́ши гла́съ мо́й. в Да бꙋ́дꙋтъ ᲂу҆́ши твоѝ вне́млюще гла́сꙋ моле́нїѧ моегѡ̀.
На ше́сть: а А҆́ще беззакѡ́нїѧ на́зриши гдⷭ҇и, гдⷭ҇и кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть. в И҆́мене ра́ди твоегѡ̀ потерпѣ́хъ тѧ̀ гдⷭ҇и. потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
На четы́ре: а Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а. в Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе: и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀. а Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе. в Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Сла́ва, и҆ ны́нѣ: Вхо́дъ.
Свѣ́те ти́хїй, ст҃ы́ѧ сла́вы, безсме́ртнагѡ ѻ҆ц҃а̀ нбⷭ҇нагѡ, ст҃а́гѡ бл҃же́ннагѡ, і҆и҃се хрⷭ҇тѐ. прише́дше на за́падъ со́лнца, ви́дѣвше свѣ́тъ вече́рнїй, пое́мъ ѻ҆ц҃а̀, сн҃а и҆ ст҃а́гѡ дх҃а, бг҃а, досто́инъ є҆сѝ во всѧ̑ времена̀ пѣ́тъ бы́ти гла́сы прпⷣбными, сн҃е бж҃їй, живо́тъ даѧ́й: тѣ́мже мі́ръ тѧ̀ сла́витъ.
Прокі́менъ. Бытїѐ. И҆ при́тча.
И҆ по и҆сполне́нїи си́хъ, сщ҃е́нникъ пое́тъ: Да и҆спра́витсѧ мл҃тва моѧ̀, ꙗ҆́кѡ кади́ло пред̾ тобо́ю, воздѣѧ́нїе рꙋкꙋ̀ моє́ю, же́ртва вече́рнѧѧ.
И҆ ли́къ пое́тъ то́жде: Да и҆спра́витсѧ:
Сщ҃е́нникъ, сті́хъ: Гдⷭ҇и воззва́хъ къ тебѣ̀, ᲂу҆слы́ши мѧ̀, вонмѝ гла́сꙋ моле́нїѧ моегѡ̀, внегда̀ воззва́ти мѝ къ тебѣ̀.
Ли́къ: Да и҆спра́витсѧ мл҃тва моѧ̀:
Сщ҃е́нникъ, сті́хъ: Положѝ гдⷭ҇и, хране́нїе ᲂу҆стѡ́мъ мои̑мъ, и҆ две́рь ѡ҆гражде́нїѧ ѡ҆ ᲂу҆стна́хъ мои́хъ.
Ли́къ: Да и҆спра́витсѧ мл҃тва моѧ̀:
Сщ҃е́нникъ, сті́хъ: Не ᲂу҆клонѝ се́рдце моѐ въ словеса̀ лꙋка́вствїѧ непщева́ти вины̀ ѡ҆ грѣсѣ́хъ.
Ли́къ: Да и҆спра́витсѧ мл҃тва моѧ̀:
И҆ па́ки сщ҃е́нникъ: Да и҆спра́витсѧ мл҃тва моѧ̀, ꙗ҆́кѡ кади́ло пред̾ тобо́ю.
Ли́къ: Воздѣѧ́нїе рꙋкꙋ̀ моє́ю, же́ртва вече́рнѧѧ.
Вмѣ́стѡ херꙋві́мскїѧ пѣ́сни, глаго́летсѧ сїѐ. Гла́съ ѕ҃.
Ны́нѣ си̑лы нбⷭ҇ныѧ съ на́ми неви́димѡ слꙋ́жатъ, се́ бо вхо́дитъ цр҃ь сла́вы: сѐ же́ртва та́йнаѧ соверше́на дорѷно́ситсѧ. вѣ́рою и҆ любо́вїю пристꙋ́пимъ, да прича̑стницы жи́зни вѣ́чныѧ бꙋ́демъ. а҆ллилꙋ́їа, а҆ллилꙋ́їа, а҆ллилꙋ́їа.
Прича́стенъ во гла́съ и҃:
Вкꙋси́те и҆ ви́дите, ꙗ҆́кѡ бл҃гъ гдⷭ҇ь. а҆ллилꙋ́їа, а҆ллилꙋ́їа, а҆ллилꙋ́їа.
По ꙗ҆вле́нїи же ст҃ы́хъ дарѡ́въ, ко́снѡ и҆ со сладкопѣ́нїемъ, во гла́съ и҃:
Бл҃гословлю̀ гдⷭ҇а на всѧ́кое вре́мѧ, хвала̀ є҆гѡ̀ во ᲂу҆стѣ́хъ мои́хъ. хлѣ́бъ нбⷭ҇ный, и҆ ча́шꙋ жи́зни вкꙋси́те, и҆ ви́дите, ꙗ҆́кѡ бл҃гъ гдⷭ҇ь. а҆ллилꙋ́їа, а҆ллилꙋ́їа, а҆ллилꙋ́їа.
По є҆́же сохрани́ти ст҃а̑ѧ:
Да и҆спо́лнѧтсѧ ᲂу҆ста̀ на̑ша: [ли́стъ рк҃д на ѡ҆б.]
Та́же, Бꙋ́ди и҆́мѧ гдⷭ҇не бл҃гослове́но: три́жды. И҆ ѱало́мъ: Бл҃гословлю̀ гдⷭ҇а на всѧ́кое вре́мѧ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.