І҆рмосы̀ въ предпра́зднство хрⷭто́ва ржⷭтва̀
І҆РМОСЫ̀
въ предпра́зднство ржⷭ҇тва̀ хрⷭ҇то́ва.
Мцⷭ҇а деке́мврїа въ к҃в-й де́нь, канѡ́нъ, гла́съ ѕ҃.
Пѣ́снь а҃. і҆рмо́съ: Сѣче́ное сѣче́тсѧ:
Пѣ́снь г҃. і҆рмо́съ: Гдⷭ҇ь сы́й всѣ́хъ, и҆ зижди́тель бг҃ъ, созда́нное безстра́стный ѡ҆бнища́въ себѣ̀ соединѝ, и҆ ꙗ҆́кѡ младе́нецъ носи́мь пло́тїю, въ ꙗ҆́слехъ ᲂу҆бо́гихъ покланѧ́емь быва́етъ: ꙗ҆ди́те, вопїѧ̀, тѣ́ло моѐ, и҆ вѣ́рою ᲂу҆тверди́тесѧ.
Пѣ́снь д҃. і҆рмо́съ: Прови́дѧ прⷪ҇ро́къ:
Пѣ́снь є҃. і҆рмо́съ: Сою́зомъ любвѐ свѧзꙋ́еми ꙗ҆́кѡ братолю́бцы, владꙋ́щемꙋ всѣ́ми, мі́ръ ѕѣлѡ̀ возлюби́вшемꙋ, и҆ да́вшемꙋ и҆збавле́нїе сн҃а возлю́бленнаго, дади́мъ сла́вꙋ даю́щемꙋ всѣ̑мъ ми́ръ.
Пѣ́снь ѕ҃. і҆рмо́съ: Бе́здна послѣ́днѧѧ:
Пѣ́снь з҃. і҆рмо́съ: Ѻ҆́троцы въ вавѷлѡ́нѣ:
Пѣ́снь и҃. і҆рмо́съ: За зако́ны ѻ҆те́чєскїѧ:
Пѣ́снь ѳ҃. і҆рмо́съ: Стра́нствїѧ влⷣчнѧ, и҆ безсме́ртныѧ трапе́зы, во ᲂу҆бо́зѣмъ верте́пѣ высо́кими ᲂу҆мы̀ вѣ́рнїи прїиди́те наслади́мсѧ, воплоти́вшеесѧ сло́во неизрече́ннѡ ᲂу҆вѣ́дѣвше, є҆го́же велича́емъ.
Въ к҃г-й де́нь, на повече́рїи трипѣ́снецъ, гла́съ ѕ҃.
Пѣ́снь є҃. і҆рмо́съ: Къ тебѣ̀ ᲂу҆́треннюю, бл҃гоꙋтро́бїѧ ра́ди себѐ и҆стощи́вшемꙋ непрело́жнѡ, и҆ зра́къ раба̀ ѿ дв҃ы носи́вшемꙋ сло́ве бж҃їй, ми́ръ пода́ждь мѝ па́дшемꙋ чл҃вѣколю́бче.
Пѣ́снь и҃. і҆рмо́съ. Сто́лпъ ѕло́бы противобо́жныѧ, ѻ҆́троцы бж҃е́ственнїи ѡ҆бличи́ша: на хрⷭ҇та́ же шата́ѧсѧ и҆́рѡдъ свирѣ́пѣетъ, совѣ́тꙋетъ тщє́тнаѧ, ᲂу҆би́ти поꙋча́етсѧ живота̀ держа́щаго дла́нїю: є҆го́же всѧ̀ тва́рь бл҃гослови́тъ, сла́вѧщи во вѣ́ки.
Пѣ́снь ѳ҃: Чⷭ҇тнѣ́йшꙋю херꙋві̑мъ:
Въ к҃д-й де́нь, на повече́рїи канѡ́нъ, гла́съ ѕ҃.
Пѣ́снь а҃. і҆рмо́съ: Волно́ю морско́ю скры́вшаго дре́вле, гони́телѧ мꙋчи́телѧ, въ ꙗ҆́слехъ сокрыва́емаго ᲂу҆би́ти и҆́щетъ и҆́рѡдъ. но мы̀ волхвы̀ пои́мъ: гдⷭ҇еви воспои́мъ, сла́внѡ бо просла́висѧ.
Пѣ́снь г҃: Тебѐ на вода́хъ повѣ́сившаго всю̀ зе́млю неѡдержи́мѡ, тва́рь ви́дѣвши верте́пѣ ражда́ющасѧ, ᲂу҆жа́снѡ содрага́шесѧ, нѣ́сть ст҃ъ па́че тебѐ гдⷭ҇и, зовꙋ́щи.
Пѣ́снь д҃: Ѿ дв҃ы прише́ствїе твоѐ прови́дѧ а҆ввакꙋ́мъ, ᲂу҆жа́ссѧ вопїѧ́ше: ты̀ ѿ ю҆́га воплоща́ѧсѧ, прише́лъ є҆сѝ и҆зба́вителю, а҆да́ма ѿринове́ннаго воззва́ти.
Пѣ́снь є҃: Бг҃оѧвле́нїѧ твоегѡ̀ хрⷭ҇тѐ, є҆́же къ на́мъ ми́лостивнѡ бы́вшагѡ, и҆са́їа свѣ́тъ ви́дѣвъ невече́рнїй, ѿ но́щи ᲂу҆́треневавъ взыва́ше: сѐ дв҃а во чре́вѣ прїи́метъ, и҆ породи́тъ воплоща́емое сло́во, и҆ всѝ земноро́днїи возра́дꙋютсѧ.
Пѣ́снь ѕ҃: Ꙗ҆́тъ бы́сть, но не ᲂу҆держа́нъ въ пе́рсехъ ки́товыхъ і҆ѡ́на: тво́й бо ѡ҆́бразъ носѧ̀, ро́ждшагѡсѧ и҆ пло́тїю ꙗ҆́вльшагѡсѧ, ꙗ҆́кѡ ѿ черто́га ѿ ѕвѣ́рѧ и҆зы́де. рожде́нный бо ны́нѣ пло́тїю, во гро́бъ и҆ сме́рть хотѣ́лъ є҆сѝ вни́ти, и҆ па́ки воскре́снꙋти тридне́венъ.
Пѣ́снь з҃: Неизрече́нное чꙋ́до, въ пещѝ и҆зба́вивый прпⷣбныѧ ѻ҆́троки и҆з̾ пла́мене, въ ꙗ҆́слехъ ᲂу҆бо́гихъ младе́нецъ возлежа̀, во сп҃се́нїе на́съ пою́щихъ: и҆зба́вителю бж҃е бл҃гослове́нъ є҆сѝ.
Пѣ́снь и҃: Оу҆жасни́сѧ боѧ́йсѧ нб҃о, и҆ да подви́жатсѧ ѡ҆снова̑нїѧ землѝ: се́ бо пелена́ми повива́етсѧ всѧ̑ носѧ́й дла́нїю, и҆ во ꙗ҆́слехъ ма́лѣхъ страннопрїе́млетсѧ. є҆го́же ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
Пѣ́снь ѳ҃: Не диви́сѧ ны́нѣ, ѽ мт҃и! ви́дѧщи ꙗ҆́кѡ младе́нца, є҆го́же и҆з̾ чре́ва пре́жде денни́цы родѝ ѻ҆ц҃ъ: возста́вити бо и҆ сопросла́вити человѣ́ческое па́дшее є҆стество̀, прїидо́хъ ꙗ҆́вственнѡ, вѣ́рою и҆ любо́вїю тѧ̀ велича́ющее.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.