Служба в четверток – Апостолам и Святителю Николаю
Стїхи̑ры и҆ канѡ́ны
а҆пⷭ҇лѡмъ, и҆ ст҃и́телю нїкола́ю.
Гла́съ д҃.
Подо́бенъ: Ꙗ҆́кѡ до́блѧ:
Крѣпча́йшимъ мꙋдрова́нїемъ во́инствовавше сла́внїи, на лꙋка́ваго врага̀ ѡ҆полчи́стесѧ, всеѻрꙋ́жїемъ ѡ҆гра́ждшесѧ дꙋхо́внымъ до́бльственнѣ, и҆ всю̀ крѣ́пость бѣсо́вскꙋю погꙋби́вше, восхи́тисте дꙋ́шы человѣ́чєскїѧ, ꙗ҆́коже коры̑сти. сегѡ̀ ра́ди во вѣ́ки ва́съ почита́емъ а҆пⷭ҇ли.
Крⷭ҇тоѡбра́знѡ распросте́рши мре́жꙋ вѣ́ры, двоенадесѧ́тица бж҃е́ственныхъ а҆пⷭ҇лъ твои́хъ, всѧ̑ ꙗ҆зы́ки ᲂу҆лови́ла є҆́сть, къ твоемꙋ̀ позна́нїю хрⷭ҇тѐ, и҆ мо́рѧ сла́ное страсте́й и҆зсꙋшѝ. сегѡ̀ ра́ди тѧ̀ молю̀: и҆з̾ глꙋбины̀ прегрѣше́нїй воззови́ мѧ, тѣ́хъ всебл҃гопрїѧ́тными мольба́ми.
Двоенадесѧ́тица бг҃оизбра́ннаѧ, а҆пⷭ҇льскаѧ, и҆ всечⷭ҇тна́ѧ, да восхва́литсѧ дне́сь, бж҃е́ственными пѣ́сньми, пе́тръ, и҆ па́ѵелъ, і҆а́кѡвъ, лꙋка̀, і҆ѡа́ннъ же, и҆ матѳе́й, и҆ ѳѡма̀: ма́ркъ, сі́мѡнъ, и҆ фїлі́ппъ: и҆ пресла́вный ны́нѣ а҆ндре́й съ матѳі́емъ, и҆ бж҃е́ственнымъ и҆ премꙋ́дрымъ варѳоломе́емъ, и҆ съ про́чими седми́десѧтьми.
И҆́ны стїхи̑ры ст҃о́мꙋ нїкола́ю, гла́съ то́йже:
Мѵ́ромъ бж҃е́ственнымъ тѧ̀ пома́за бж҃е́ственнаѧ бл҃года́ть дх҃о́внаѧ, мѵ́рѧнѡмъ первопресто́льна, и҆ мѵ́ромъ ѡ҆бл҃гоꙋха́вша, добродѣ́тельми сщ҃е́ннѣйшими мі́ра концы̀: сладкоды́шꙋщими твои́ми мл҃твами, ѕлосмра̑дныѧ прогонѧ́юща стра̑сти всегда̀. сегѡ̀ ра́ди тѧ̀ вѣ́рнѡ сла́вимъ, и҆ па́мѧть твою̀ всест҃ꙋ́ю соверша́емъ нїко́лае.
Ꙗ҆́кѡ ѡ҆сїѧ́телѧ тѧ̀ незаходи́маго, и҆ ꙗ҆́кѡ свѣти́льника всемі́рна, на тве́рди возсїѧ́вша цр҃ко́внѣй нїко́лае, и҆ мі́ръ просвѣти́вша, и҆ бѣ́дъ лю́тыхъ мглꙋ̀ ѿгонѧ́юща, и҆ ѿе́млюща печа́лей зи́мꙋ, и҆ тишинꙋ̀ содѣ́лавшаго глꙋбо́кꙋю, по до́лгꙋ ᲂу҆бл҃жа́емъ.
И҆ сы́й и҆ ꙗ҆влѧ́ѧйсѧ въ со́нїихъ нїко́лае, и҆̀же непра́веднѡ и҆мꙋ́щыѧ ᲂу҆мре́ти сп҃слъ є҆сѝ, ꙗ҆́кѡ сострада́тель, ꙗ҆́кѡ бл҃голюби́вый, ꙗ҆́кѡ и҆зба́витель теплѣ́йшїй, ꙗ҆́кѡ предста́тель и҆́стинный вѣ́рныхъ, и҆ просѧ́щихъ твоегѡ̀ застꙋпле́нїѧ, сщ҃е́ннѣйшїй ѻ҆́тче, а҆́гг҃лѡвъ сограждани́не, прпⷣбныхъ и҆ прⷪ҇ро́кѡвъ равностоѧ́телю.
Сла́ва, и҆ ны́нѣ, бг҃оро́диченъ:
И҆скꙋше́нїѧ всѧ́кагѡ, и҆ ловле́нїѧ льсти́вагѡ, и҆зба́ви мѧ̀ всенепоро́чнаѧ, и҆ страсте́й стремлє́нїѧ ѡ҆бꙋзда́й, молю́сѧ: и҆ ᲂу҆ма̀ моегѡ̀ мглꙋ̀ и҆ ѡ҆мраче́нїе ѿженѝ,ᲂу҆пра́ви ко приста́нищꙋ бж҃е́ственныхъ за́повѣдей сн҃а твоегѡ̀ бг҃омт҃и, ꙗ҆́кѡ да непреста́ннѡ почита́ю тѧ̀.
Тропа́рьа҆пⷭ҇лѡмъ, гла́съ г҃:
А҆пⷭ҇ли ст҃і́и, моли́те млⷭ҇тиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.
Тропа́рьнїкола́ю, гла́съ д҃:
Пра́вило вѣ́ры и҆ ѡ҆́бразъ кро́тости, воздержа́нїѧ ᲂу҆чи́телѧ ꙗ҆ви́ тѧ ста́дꙋ твоемꙋ̀ ꙗ҆́же веще́й и҆́стина. сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ. ѻ҆́тче сщ҃еннонача́льниче нїко́лае, молѝ хрⷭ҇та̀ бг҃а, сп҃сти́сѧ дꙋша́мъ на́шымъ.
Канѡ́нъ ст҃ы̑мъ а҆пⷭ҇лѡмъ.
Творе́нїе ѳеофа́ново, гла́съ д҃.
Пѣ́снь а҃.
І҆рмо́съ: Мо́рѧ чермнꙋ́ю пꙋчи́нꙋ, невла́жными стопа́ми дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Бж҃е́ственнїи ᲂу҆тѣ́шителѧ ѻ҆рга́ни, возглаша́ющїи сего̀ бж҃е́ственными всегда̀ вдохнове́ньми, воспѣ́ша пѣ́снь на́мъ, ꙗ҆́кѡ вои́стиннꙋ сп҃си́тельнꙋю, бл҃госла́внїи хрⷭ҇тѡ́вы а҆пⷭ҇ли.
На ѻ҆дрѣ̀ лѣ́ности слежа̀, и҆ въ сме́рти грѣхо́внѣй недꙋ́гомъ дꙋше́внымъ лю́тѣ и҆ста́емь, посѣще́нїѧ мѧ̀ сла́внїи хрⷭ҇тѡ́вы самови́дцы сподо́бите.
И҆̀же сло́вомъ безслове́сїе разрѣши́вше ꙗ҆зы́кѡвъ а҆пⷭ҇ли, ѿ безслове́сныхъ дѣѧ́нїй лю́тѣ ѡ҆мраче́нное се́рдце моѐ, ᲂу҆тѣ́шителѧ бл҃года́тїю просвѣти́те а҆пⷭ҇ли.
Бг҃оро́диченъ: Дв҃а по ржⷭ҇твѣ̀ нетлѣ́нна пребыла̀ є҆сѝ, на́съ ра́ди ꙗ҆́вльшагосѧ на землѝ, па́че сло́ва ро́ждшаѧ: є҆го́же прилѣ́жнѡ молѝ, просвѣти́ти дꙋ́шы на́шѧ.
Дрꙋгі́й канѡ́нъ ст҃о́мꙋ и҆ вели́комꙋ чꙋдотво́рцꙋ нїкола́ю.
Творе́нїе ѳеофа́ново, гла́съ в҃.
Пѣ́снь а҃.
І҆рмо́съ: Во глꙋбинѣ̀ постла̀ и҆ногда̀, фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ.
Вѣнцено́сецъ прⷭ҇то́лꙋ хрⷭ҇то́вꙋ, премꙋ́дре нїко́лае, предстоѧ̀ со а҆́гг҃льскими чи́нми, просвѣще́нїе мѝ да́рꙋй, ѡ҆зарѧ́ющее дꙋшѝ моеѧ̀ ѡ҆мраче́нїе: ꙗ҆́кѡ да восхвалю̀ ра́дꙋѧсѧ, твою̀ пребл҃же́нне па́мѧть. [Два́жды.]
Прославлѧ́ѧй всѧ̑ гдⷭ҇ь, и҆̀же того̀ сла́вѧщыѧ, тѧ̀ вѣ̑рнымъ прибѣ́жище да́лъ є҆́сть, напа́стей и҆збавлѧ́юща, притека́ющыѧ къ твоемꙋ̀ кро́вꙋ нїко́лае, и҆ призыва́ющыѧ тѧ̀ вѣ́рою и҆ любо́вїю пресла́вне.
Бг҃оро́диченъ: И҆зравни́тисѧ жела́нїе мѝ вло́жь ѕмі́й вселꙋка́вый содѣ́телю, ꙗ҆́кѡ плѣ́нника восхи́ти: тобо́ю же пречⷭ҇таѧ при́званъ бы́хъ, ѡ҆божи́всѧ и҆́стиннѡ: ты́ бо бг҃омт҃и, менѐ ѡ҆божи́вшаго родила̀ є҆сѝ.
Пѣ́снь г҃.
І҆рмо́съ: Весели́тсѧ ѡ҆ тебѣ̀ цр҃ковь твоѧ̀ хрⷭ҇тѐ, зовꙋ́щи: ты̀ моѧ̀ крѣ́пость гдⷭ҇и, и҆ прибѣ́жище, и҆ ᲂу҆твержде́нїе.
Гра́дъ тво́й бж҃е, слове́сныхъ рѣ́къ твои́хъ течє́нїѧ ᲂу҆чєни́къ, влⷣко, сщ҃е́ннѡ возвеселѧ́ютъ.
Гра́ждане нбⷭ҇нїи, сослꙋжє́бницы мы́слєннымъ чинѡ́мъ, всесла́внїи а҆пⷭ҇ли, всѧ́кїѧ на́съ ско́рби и҆зба́вите.
Оу҆тверди́вый хрⷭ҇тѐ, словє́сныѧ твоѧ̑ нб҃са̀, ᲂу҆тверди́ мѧ тѣ́хъ мл҃твами на ка́мени твои́хъ хотѣ́нїй, ꙗ҆́кѡ бл҃гоꙋтро́бенъ.
Бг҃оро́диченъ: Ꙗ҆́кѡ мт҃и тѧ̀ мо́литъ, съ ли́комъ ᲂу҆чєни́къ гдⷭ҇и, ꙗ҆́же тебѐ чи́стѡ роди́вшаѧ: да́рꙋй на́мъ млⷭ҇ти твоѧ̑.
И҆́нъ.
І҆рмо́съ: Процвѣла̀ є҆́сть пꙋсты́нѧ, ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ це́рковь, прише́ствїемъ твои́мъ, въ не́й же ᲂу҆тверди́сѧ моѐ се́рдце.
Нїко́лае бл҃же́нне, влⷣки при́сный ᲂу҆чени́къ ты̀ бы́въ, сп҃са́еши къ тебѣ̀ притека́ющыѧ ѿ лю́тыхъ бѣ́дъ, и҆ сме́рти го́рькїѧ. [Два́жды.]
Ѡ҆чи́сти рабы̑ твоѧ̑ и҆ грѣхѡ́въ ѡ҆ставле́нїе ꙗ҆́кѡ бл҃гъ да́рꙋй, нїкола́а твоегѡ̀ ᲂу҆го́дника и҆̀же къ тебѣ̀ хода́тайствы, многомлⷭ҇тиве.
Бг҃оро́диченъ: Оу҆ста́ви смꙋще́нїе страсте́й мои́хъ влⷣчце, и҆ жи́знь ѡ҆кормѝ прест҃а́ѧ, бг҃а ро́ждшаѧ: въ не́мже ᲂу҆тверди́сѧ се́рдце моѐ.
Конда́кънїкола́ю, гла́съ г҃.
Подо́бенъ: Дв҃а дне́сь:
Въ мѵ́рѣхъ ст҃е свѧщеннодѣ́йствитель показа́лсѧ є҆сѝ: хрⷭ҇то́во бо прпⷣбне є҆ѵⷢ҇лїе и҆спо́лнивъ, положи́лъ є҆сѝ дꙋ́шꙋ твою̀ ѡ҆ лю́дехъ твои́хъ, и҆ сп҃слъ є҆сѝ непови̑нныѧ ѿ сме́рти. сегѡ̀ ра́ди ѡ҆ст҃и́лсѧ є҆сѝ, ꙗ҆́кѡ вели́кїй таи́нникъ бж҃їѧ бл҃года́ти.
І҆́косъ: Воспои́мъ ны́нѣ ст҃и́телѧ пѣ́сньми, мѵ̑рскимъ лю́демъ па́стырѧ и҆ ᲂу҆чи́телѧ, да мл҃твами є҆гѡ̀ просвѣти́мсѧ: се́ бо ꙗ҆ви́сѧ ве́сь чи́стъ, нетлѣ́ненъ дꙋ́хомъ, хрⷭ҇то́ви приносѧ̀ же́ртвꙋ непоро́чнꙋ, чи́стꙋ, бг҃ови бл҃гопрїѧ́тнꙋ, ꙗ҆́кѡ ст҃и́тель ѡ҆чище́нъ и҆ дꙋше́ю и҆ тѣ́ломъ. тѣ́мже є҆́сть вои́стиннꙋ цр҃кви предста́тель, и҆ побо́рникъ сеѧ̀, ꙗ҆́кѡ вели́кїй таи́нникъ бж҃їѧ бл҃года́ти.
Сѣда́ленъа҆пⷭ҇лѡмъ, гла́съ д҃:
Свѣти̑ла въ концѣ́хъ, ᲂу҆ч҃нкѝ твоѧ̑ хрⷭ҇тѐ ꙗ҆ви́лъ є҆сѝ, сїѧ́ющыѧ дꙋша́мъ сꙋ́щымъ во тьмѣ̀, ра́зꙋмъ тво́й влⷣко: и҆ ле́сть і҆́дѡльскꙋю тѣ́хъ ра́ди ѡ҆мрачи́въ, ᲂу҆че́ньми бл҃гоче́стїѧ просвѣти́лъ є҆сѝ мі́ръ. тѣ́хъ мольба́ми сп҃сѝ дꙋ́шы на́шѧ.
Дрꙋгі́й сѣда́ленъ нїкола́ю, гла́съ и҃.
Подо́бенъ: Премꙋ́дрости:
Возше́дъ на высотꙋ̀ добродѣ́телей, бж҃е́ственными ѿтꙋ́дꙋ ѻ҆́тче ѡ҆зари́лсѧ є҆сѝ сїѧ́нїи чꙋде́съ, пресвѣ́телъ вои́стиннꙋ ꙗ҆ви́всѧ мі́рови па́стырь, и҆ въ напа́стехъ сы́й предста́тель непобѣди́мь. тѣ́мже пресла́внѡ врага̀ побѣ́ждь, лжꙋ̀ ѿгна́лъ є҆сѝ, и҆ человѣ́ки сп҃слъ є҆сѝ ѿ сме́рти нїко́лае. молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀.
Сла́ва, и҆ ны́нѣ, бг҃оро́диченъ:
Прибѣ́жище сꙋ́щымъ въ лю́тыхъ, премѣне́нїе къ бг҃ꙋ согрѣша́ющымъ, пречⷭ҇таѧ влⷣчце, сп҃сѝ на́съ ѿ всѧ́кагѡ ѡ҆бстоѧ́нїѧ, и҆ ѡ҆ѕлобле́нїѧ человѣ́ческагѡ, и҆ стра́шнагѡ мꙋче́нїѧ, и҆ страсте́й безче́стїѧ, несꙋмнѣ́нною вѣ́рою тѧ̀ при́снѡ призыва́ющихъ, дв҃о всепѣ́таѧ.
Пѣ́снь д҃.
І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й гдⷭ҇и.
Наве́лъ є҆сѝ на мо́ре ко́ни твоѧ̑ и҆збра̑нныѧ, чл҃вѣколю́бче, ѕловѣ́рїѧ во́ды возмꙋща́ющыѧ, и҆ всѣ̑мъ ра́зꙋмъ тво́й и҆́стинный возвѣща́ющыѧ.
Ѕвѣ́зды просвѣти́вше бл҃гоче́стїемъ мы́сленнꙋю тве́рдь цр҃ко́внꙋю, сла́внїи а҆пⷭ҇ли, ѿ но́щи невѣ́дѣнїѧ и҆ прегрѣше́нїй и҆зба́вите мѧ̀.
Ꙗ҆́вльшесѧ ꙗ҆́коже стрѣ́лы и҆з̾ѡщре́ни а҆пⷭ҇ли, вра̑жїѧ разжжє́нныѧ стрѣ́лы ѕло́бы моеѧ̀ ны́нѣ ᲂу҆гаси́те и҆ помышле́нїе моѐ ᲂу҆тверди́те.
Бг҃оро́диченъ: Дꙋ́шꙋ мою̀ ѡ҆горче́ннꙋю ꙗ҆́домъ, сопроти́внагѡ ᲂу҆грызе́нїемъ, дѣ́йственнымъ врачева́нїемъ и҆сцѣлѝ, мл҃твами хрⷭ҇тѐ, ро́ждшїѧ тѧ̀, и҆ сщ҃е́нныхъ а҆пⷭ҇лъ твои́хъ.
И҆́нъ.
І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ гдⷭ҇и вопло́щьсѧ, и҆ сп҃слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й гдⷭ҇и.
Прибли́живсѧ чи́стѣ зарѧ́мъ дꙋхѡ́внымъ, свѣтоно́сецъ бы́лъ є҆сѝ, мі́ра просвѣща́ѧй концы̀, всѣ̑мъ предстоѧ̀, и҆ всѧ̑ сп҃са́ѧ вѣ́рою къ тебѣ̀ притека́ющыѧ.
И҆збавлѧ́ѧй ѿ сме́рти, ꙗ҆́коже ꙗ҆ви́лсѧ є҆сѝ пе́рвѣе нїко́лае, ю҆́ношы прпⷣбне, та́кѡ и҆ ны́нѣ мѧ̀ сп҃сѝ ѿ всѧ́кагѡ ѡ҆бстоѧ́нїѧ и҆ напа́стей и҆ бѣ́дъ всебл҃же́нне.
Ѡ҆блиста́лъ є҆сѝ добродѣ́телей сїѧ́нїемъ всебога́те, подража́тель преизрѧ́денъ своемꙋ̀ влⷣцѣ бы́въ: сп҃са́еши же призыва́емь, и҆̀же бл҃гоговѣ́нїемъ и҆ любо́вїю тѧ̀ сла́вѧщыѧ.
Бг҃оро́диченъ: На́йде на тѧ̀ влⷣка и҆ гдⷭ҇ь воплоща́емь, и҆ сп҃са́ѧй ꙗ҆́кѡ бл҃гоꙋтро́бенъ всего́ мѧ человѣ́ка, тѣ́мже зовꙋ́ ти: ра́дꙋйсѧ бцⷣе всенепоро́чнаѧ.
Пѣ́снь є҃.
І҆рмо́съ: Ты̀ гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ, вѣ́рою воспѣва́ющыѧ тѧ̀.
Лѡ́зы живѡ́тныѧ, процвѣта́ющѧ гро́здїе, напои́ша всѣ́хъ вїна̀ мы́сленнагѡ весе́лїѧ, сла́внїи а҆пⷭ҇ли.
Къ свѣ́тꙋ за́повѣдей бж҃їихъ наста́вите, а҆пⷭ҇ли, и҆̀же во тьмѣ̀ дꙋше́внагѡ ᲂу҆ны́нїѧ, безꙋ́мнѡ пребыва́ющыѧ.
И҆зба́вите на́съ дꙋше́вныхъ прегрѣше́нїй и҆ сꙋда̀ бꙋ́дꙋщагѡ, и҆ тлѝ, и҆ бѣ́дъ, а҆пⷭ҇ли бл҃же́ннїи.
Бг҃оро́диченъ: Сп҃си́ мѧ бж҃е ꙗ҆́кѡ чл҃вѣколю́бецъ, сп҃си́ мѧ мольба́ми неизрече́ннѡ тебѐ роди́вшїѧ, и҆ всѣ́хъ бж҃е́ственныхъ а҆пⷭ҇лъ твои́хъ.
И҆́нъ.
І҆рмо́съ: Просвѣще́нїе во тьмѣ̀ лежа́щихъ, сп҃се́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо ра́звѣ тебѐ бг҃а не зна́ю.
Бг҃олѣ́пнымъ житїе́мъ пребл҃же́нне просвѣща́емь, ѡ҆сꙋждє́нныѧ непра́веднымъ и҆зрече́нїемъ ᲂу҆мре́ти, предста́въ, и҆зба́вилъ є҆сѝ, влⷣцѣ хрⷭ҇тꙋ̀ зовꙋ́щыѧ: и҆но́гѡ ра́звѣ тебѐ бг҃а не зна́емъ. Два́жды.
На нб҃сѣ́хъ присносꙋ́щнꙋю сла́вꙋ ны́нѣ зрѧ̀, и҆ неизглаго́ланныѧ и҆ бж҃е́ственныѧ зарѝ, пресвѣ́тлыми наслажда́ѧсѧ сїѧ́нїи, покры́й мѧ̀ предста́тельствомъ твои́мъ прпⷣбне, ᲂу҆го́дниче хрⷭ҇то́въ всечⷭ҇тне.
Бг҃оро́диченъ: Да тво́й взы́щеши ѡ҆́бразъ погребе́нный страстьмѝ сп҃се, нбⷭ҇ныхъ ᲂу҆таи́всѧ си́лъ, вопло́щьсѧ ѿ дв҃ы, ꙗ҆ви́лсѧ є҆сѝ тебѣ̀ зовꙋ́щымъ: и҆но́гѡ ра́звѣ тебѐ бг҃а не зна́емъ.
Пѣ́снь ѕ҃.
І҆рмо́съ: Пожрꙋ́ ти со гла́сомъ хвале́нїѧ гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю.
Па́стырѧ до́брагѡ бг҃оизбра̑ннаѧ ѻ҆вча́та, разсѣ̑ѧннаѧ по мі́рꙋ, волкѡ́въ всѧ́ко ѕвѣ́рство во ѻ҆́вчꙋю кро́тость вѣ́рою преложи́ша.
Бж҃е́ственнагѡ раѧ̀ древеса̀ доброплѡ́днаѧ, преѻкаѧ́нныѧ дꙋшѝ моеѧ̀ всенепло́дство во бл҃гопло́дїе добродѣ́тельнагѡ нра́ва преведи́те а҆пⷭ҇ли.
Оу҆ѧ́звенъ бы́хъ сласте́й ѻ҆рꙋ́жїемъ, и҆ ᲂу҆мро́хъ: и҆̀же ѿ хрⷭ҇та̀ прїе́мше сла́внїи бл҃года́ть воскреша́ти мє́ртвыѧ, ᲂу҆мерщвле́ннꙋю ѻ҆каѧ́ннꙋю мою̀ дꙋ́шꙋ ѡ҆живи́те.
Бг҃оро́диченъ: Оу҆толѝ дꙋшѝ моеѧ̀ свирѣ́пꙋю бꙋ́рю, бж҃е всѣ́хъ ще́дрый, мольба́ми ро́ждшїѧ тѧ̀ бцⷣы, а҆пⷭ҇лъ же и҆ мч҃нкъ твои́хъ.
И҆́нъ.
І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ бж҃е мѧ̀ возведѝ.
И҆́же побѣ́ды нїко́лае вѣне́цъ, на твое́мъ версѣ̀ досто́йнѡ положи́сѧ: ꙗ҆́кѡ побѣди́тель ᲂу҆́бѡ и҆зрѧ́денъ, тѧ̀ призыва́ющыѧ сп҃сѝ. Два́жды.
Оу҆мерщвле́на мѧ̀ бл҃же́нне прегрѣшє́нїи, и҆ стра́стными треволне́нїи погрꙋжа́ема, ꙗ҆́вльсѧ сп҃сѝ, направлѧ́ѧ къ приста́нищꙋ бж҃е́ственныѧ во́ли.
Бг҃оро́диченъ: На тѧ̀ ᲂу҆пова́нїе возложи́хъ, мт҃и приснодв҃о, сп҃се́нїѧ моегѡ̀: и҆ тѧ̀ предста́тельницꙋ положи́хъ живота̀, тве́рдꙋ и҆ непоколеби́мꙋ.
Конда́къ,гла́съ в҃:
Твє́рдыѧ и҆ бг҃овѣща̑нныѧ проповѣ́датели, ве́рхъ ᲂу҆чени̑къ твои́хъ гдⷭ҇и, прїѧ́лъ є҆сѝ въ наслажде́нїе бл҃ги́хъ твои́хъ и҆ поко́й: болѣ̑зни бо ѻ҆́нѣхъ и҆ сме́рть прїѧ́лъ є҆сѝ, па́че всѧ́кагѡ всепло́дїѧ, є҆ди́не свѣ́дый сердє́чнаѧ.
І҆́косъ: Оу҆ѧсни́ ми ѧ҆зы́къ сп҃се мо́й, разшири́въ мѝ ᲂу҆ста̀ и҆ и҆спо́лнивъ ѧ҆̀, ᲂу҆милѝ се́рдце моѐ, да ꙗ҆̀же глаго́лю, послѣ́дꙋю, и҆ ꙗ҆̀же ᲂу҆чꙋ̀, сотворю̀ пе́рвѣе: всѧ́къ бо творѧ̀ и҆ ᲂу҆чѧ̀, речѐ, се́й вели́къ є҆́сть. а҆́ще бо глаго́лѧ не творю̀, ꙗ҆́кѡ мѣ́дь звѣнѧ́щаѧ вмѣню́сѧ. тѣ́мже глаго́лати мѝ подѡ́бнаѧ, и҆ твори́ти полє́знаѧ наꙋчѝ, є҆ди́не свѣ́дый сердє́чнаѧ.
Пѣ́снь з҃.
І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Крѣ́постїю всест҃ы́ѧ про́повѣди, неле́стнїи а҆пⷭ҇ли хрⷭ҇тѡ́вы, пре́лести зи́мꙋ разрꙋши́сте, и҆ просвѣти́сте бг҃оразꙋ́мїемъ вѣ́рныхъ мꙋдрова́нїе.
Мѵ́ро бл҃гоꙋха́нное и҆сточа́юще всегда̀ бж҃е́ственнїи ᲂу҆ч҃нцы̀, мѵ́ра ᲂу҆́мнагѡ бл҃гово́нїѧ притека́ющихъ къ ва́мъ и҆спо́лните, и҆ ѕлосмра̑дныѧ стра̑сти ѿжени́те.
Растлѣ́вшаго мѧ̀ плотски́ми безмѣ́стїи, сло́ва нетлѣ́ннагѡ сла́внїи ᲂу҆ч҃нцы̀, сп҃си́те мѧ̀ пою́ща: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Бг҃оро́диченъ: Ли́къ а҆́гг҃льскїй, ли́къ мч҃нкъ и҆ а҆пⷭ҇лъ твои́хъ, сло́ве, мо́лѧтъ всегда̀ мно́гое бл҃гоꙋтро́бїѧ твоегѡ̀ чл҃вѣколю́бче: всѣ́хъ ᲂу҆ще́дри бцⷣею, ꙗ҆́кѡ бл҃гоꙋтро́бенъ.
И҆́нъ.
І҆рмо́съ: Ѡ҆́бразꙋ злато́мꙋ на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ: посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Во ѻ҆́строе и҆скꙋше́нїе впадо́хъ лю́тѣ подстрѣка́емь, и҆ ко вратѡ́мъ а҆́да прибли́жихсѧ, печа́льми ᲂу҆дарѧ́емь, сп҃си́ мѧ мл҃твами твои́ми бл҃же́нне, и҆ возста́ви пою́ща, бл҃гослове́нъ бг҃ъ ѻ҆тє́цъ на́шихъ.
Незаходи́магѡ свѣ́та невеще́ственными мо́лнїѧми ѡ҆блиста́емь, сꙋ́щыѧ во тьмѣ̀ скорбе́й ѡ҆ѕло́блєнныѧ и҆схитѝ, и҆ къ просвѣще́нїю весе́лїѧ наста́ви пою́щыѧ: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ: Молѝ хрⷭ҇та̀, сн҃а твоего̀ и҆ бг҃а, бг҃ороди́тельнице, прода̑ннымъ лю́тыми прегрѣше́ньми и҆ лестьмѝ ѕмїи́ными, кро́вїю є҆гѡ̀ чⷭ҇тно́ю и҆зба́витисѧ пою́щымъ: бл҃гослове́нъ є҆сѝ бж҃е ѻ҆тє́цъ на́шихъ.
Пѣ́снь и҃.
І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тели ѻ҆́троцы взыва́юще: бл҃гослови́те всѧ̑ дѣла̀ гдⷭ҇нѧ гдⷭ҇а.
Оу҆ста̀ ѻ҆гнедохновє́ннаѧ хрⷭ҇тѡ́ва, ꙗ҆̀же бездвє́рнаѧ ᲂу҆ста̀ загради́вше, и҆ сп҃си́тельное проповѣ́данїе повсю́дꙋ разсѣ́ѧвше, ѿ ᲂу҆́стъ во́лка мы́сленнагѡ и҆зба́висте вопїю́щыѧ: всѧ̑ дѣла̀ гдⷭ҇а по́йте, и҆ превозноси́те є҆го̀ во всѧ̑ вѣ́ки.
Вострꙋби́те ѻ҆́крестъ моеѧ̀ ᲂу҆мерщвле́нныѧ дꙋшѝ, бл҃гогла́снїи трꙋбы̑ хрⷭ҇тѡ́вы, а҆пⷭ҇ли сла́внїи: и҆ ѿ гро́ба ѿча́ѧнїѧ и҆ ᲂу҆ны́нїѧ лю́тагѡ сїю̀ воздви́гните, во є҆́же пѣ́ти: всѧ̑ дѣла̀ гдⷭ҇а по́йте, и҆ превозноси́те є҆го̀ во всѧ̑ вѣ́ки.
Менѐ, зако́ны твоѧ̑ хрⷭ҇тѐ попра́вшаго, ᲂу҆ма̀ развраще́нїемъ: менѐ влⷣко блꙋ́днаго, во глꙋбинꙋ̀ попо́лзшасѧ, и҆ ѻ҆бы́чаю лꙋка́вомꙋ при́снѡ рабо́тающа, не пре́зри ᲂу҆ч҃нкѡ́въ твои́хъ мольба́ми.
Бг҃оро́диченъ: Мр҃і́е, гпⷭ҇жѐ всѧ́ческихъ, ѡ҆блада́ема мѧ̀ ѿ ѕмі́ѧ, и҆ согрѣша́юща всегда̀, свободѝ мл҃твами твои́ми, и҆ порабо́ти хрⷭ҇тꙋ̀ въ житїѝ чи́стѣ, воспѣва́ти: всѧ̑ дѣла̀ гдⷭ҇а по́йте, и҆ превозноси́те є҆го̀ во всѧ̑ вѣ́ки.
И҆́нъ.
І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀ ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Ꙗ҆́кѡ бл҃гъ и҆ млⷭ҇рдъ, и҆̀же во глꙋбинѣ̀ напа́стей ѡ҆держи̑мыѧ свободѝ бл҃же́нне, содержа́щихъ лю́тыхъ [нїко́лае] разрѣше́нїе подаѧ̀ мл҃твами твои́ми, ꙗ҆̀же ко сп҃сꙋ хрⷭ҇тꙋ̀, сщ҃еннотаи́нниче. Два́жды.
Таи́нникъ и҆́же па́че ᲂу҆ма̀, ст҃ы́хъ слꙋжи́тель, и҆ нбⷭ҇ныхъ сы́й бг҃омꙋ́дре, а҆рхїере́й же вѣ́ренъ: прегрѣше́нїй ѡ҆ставле́нїѧ просѝ ѿ сп҃са на́шегѡ, сщ҃енноѧвле́нне.
Бг҃оро́диченъ: И҆знемога́етъ мо́й ны́нѣ ᲂу҆́мъ, во глꙋбины̑ впа́дъ безче́стїѧ, ꙗ҆́кѡ ѿвсю́дꙋ разли́чными ѡ҆б̾ѧ́тъ є҆́смь ѕлы́ми: но ты̀ дв҃о и҆сцѣлѝ, безстра́стїѧ свѣ́томъ ѡ҆дѣва́ющи.
Пѣ́снь ѳ҃.
І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебѐ дв҃о, краеꙋго́льный ѿсѣче́сѧ: хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀ бцⷣе велича́емъ.
Ка́менїе и҆збра́нное, положе́ннагѡ во главꙋ̀ ᲂу҆́гла ка́мене, созда́сте всѣ́хъ вѣ́рныхъ сердца̀, ка́менемъ вѣ́ры вра̑жїѧ созда̑нїѧ а҆пⷭ҇ли разве́ргшїи.
Рѣши́ти и҆ вѧза́ти ѿ хрⷭ҇та̀ прїе́мше вла́сть, разрѣши́те ѕѡ́лъ мои́хъ соꙋ́зъ, и҆ къ любвѝ бж҃їей привѧжи́те, и҆ црⷭ҇твїѧ прича́стника бж҃е́ственнагѡ содѣ́лайте а҆пⷭ҇ли.
Бж҃е́ственнїи влⷣки ѻ҆́блацы, и҆зсо́хшее моѐ се́рдце всѧ́кимъ лꙋка́вымъ дѣѧ́нїемъ, бж҃е́ственными тꙋ́чами ны́нѣ напо́йте, и҆ плодоно́сно покажи́те, а҆пⷭ҇ли бг҃обл҃же́ннїи.
Бг҃оро́диченъ: Со ст҃ы́ми а҆́гг҃лы, съ бж҃е́ственными а҆пⷭ҇лы, съ сла́вными мч҃нки, твоего̀ молѝ сн҃а и҆ гдⷭ҇а бг҃ороди́тельнице пречⷭ҇таѧ, ѿ бѣ́дъ и҆зба́вити дꙋ́шы на́шѧ.
И҆́нъ.
І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щьсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.
Свѣща́ми бл҃года́ти бг҃омꙋ́дре просвѣща́емь, и҆ свѣти́льникъ бл҃гоче́стїѧ ꙗ҆́вѣ бы́въ, сꙋ́щыѧ въ напа́стехъ сп҃са́еши, и҆ и҆̀же во глꙋбинѣ̀ морстѣ́й и҆збавлѧ́еши, и҆ пита́еши а҆́лчꙋщыѧ пресла́внѡ всебл҃же́нне. Два́жды.
Ꙗ҆́кѡ въ раѝ пи́щи ны́нѣ водворѧ́емь, и҆ неизрече́ннꙋю сла́вꙋ ꙗ҆́снѡ зрѧ̀, ѿ нбⷭ҇ныхъ крꙋ̑гъ пѣвцы̀ твоѧ̑ назира́еши, ѿ страсте́й и҆збавлѧ́ѧ, бг҃оно́се всебл҃же́нне.
Бг҃оро́диченъ: Премꙋ́рость и҆ си́лꙋ и҆ сло́во ѵ҆поста́сное ѻ҆́ч҃ее, бг҃омт҃и чⷭ҇таѧ, родила̀ є҆сѝ ѿ твои́хъ пречⷭ҇тыхъ крове́й, сво́й хра́мъ прїи́мшꙋю, и҆ семꙋ̀ по соедине́нїю соедини́вшꙋюсѧ нераздѣ́льнѡ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.