Служба в среду Богородице Одигитрии
Стїхи̑ры, и҆ канѡ́нъ прест҃ѣ́й бцⷣѣ, ѻ҆диги́трїи
Гла́съ в҃.
Подо́бенъ: Є҆гда̀ ѿ дре́ва:
Всѣ̑мъ предста́тельствꙋеши бл҃га́ѧ, прибѣга́ющымъ съ вѣ́рою въ держа́вный тво́й покро́въ: и҆но́гѡ бо не и҆́мамы грѣ́шнїи къ бг҃ꙋ въ бѣ́дахъ и҆ ско́рбехъ при́снѡ и҆збавле́нїѧ, ѡ҆бремене́ни грѣхѝ мно́гими, мт҃и бг҃а вы́шнѧгѡ. тѣ́мже тѝ припа́даемъ, и҆зба́ви ѿ всѧ́кагѡ ѡ҆бстоѧ́нїѧ рабы̑ твоѧ̑.
Всѣ́хъ скорбѧ́щихъ ра́досте, и҆ ѡ҆би́димыхъ застꙋ́пнице, и҆ а҆́лчꙋщихъ пита́тельнице, стра́нныхъ ᲂу҆тѣше́нїе, ѡ҆бꙋрева́емыхъ приста́нище, больны́хъ посѣще́нїе, немощны́хъ покро́въ и҆ застꙋ́пнице, же́злъ ста́рости, мт҃и бг҃а вы́шнѧгѡ, ты̀ є҆сѝ пречⷭ҇таѧ: потщи́сѧ мо́лимсѧ сп҃сти́сѧ рабѡ́мъ твои̑мъ.
Ра́дꙋйсѧ пречⷭ҇таѧ дв҃о. ра́дꙋйсѧ чⷭ҇тны́й ски́птре цр҃ѧ̀ хрⷭ҇та̀. ра́дꙋйсѧ прозѧ́бшаѧ гро́здъ та́йный. ра́дꙋйсѧ две́ре нбⷭ҇наѧ, и҆ неѡпали́маѧ кꙋпино̀. ра́дꙋйсѧ всемі́рный свѣ́те. ра́дꙋйсѧ всѣ́хъ ра́досте. ра́дꙋйсѧ вѣ́рныхъ сп҃се́нїе. ра́дꙋйсѧ застꙋ́пнице всѣ́хъ хрⷭ҇тїа́нъ, и҆ прибѣ́жище влⷣчце.
Сла́ва, и҆ ны́нѣ, гла́съ и҃:
Ра́дꙋйсѧ вселе́нныѧ похвало̀. ра́дꙋйсѧ хра́ме гдⷭ҇ень. ра́дꙋйсѧ горо̀ прїѡсѣне́ннаѧ. ра́дꙋйсѧ всѣ́хъ прибѣ́жище. ра́дꙋйсѧ свѣ́щниче златы́й. ра́дꙋйсѧ сла́во правосла́вныхъ чⷭ҇тна́ѧ. ра́дꙋйсѧ мр҃і́е, мт҃и хрⷭ҇та̀ бг҃а. ра́дꙋйсѧ раю̀. ра́дꙋйсѧ бж҃е́ственнаѧ трапе́зо. ра́дꙋйсѧ сѣ́не. ра́дꙋйсѧ рꙋ́чко всезлата́ѧ. ра́дꙋйсѧ всѣ́хъ ᲂу҆пова́нїе.
Тропа́рь,гла́съ д҃:
Къ бцⷣѣ прилѣ́жнѡ ны́нѣ притеце́мъ, грѣ́шнїи и҆ смире́ннїи, и҆ припаде́мъ, въ покаѧ́нїи зовꙋ́ще и҆з̾ глꙋбины̀ дꙋшѝ: влⷣчце помозѝ, на ны̀ милосе́довавши. потщи́сѧ погиба́емъ ѿ мно́жества прегрѣше́нїй: не ѿвратѝ твоѧ̑ рабы̑ тщы̀, тѧ́ бо и҆ є҆ди́нꙋ наде́ждꙋ и҆́мамы.
Дрꙋгі́й. Сла́ва, и҆ ны́нѣ:
Не ᲂу҆молчи́мъ никогда̀ бцⷣе, си̑лы твоѧ̑ глаго́лати недосто́йнїи. а҆́ще бо ты̀ не бы̀ предстоѧ́ла молѧ́щи, кто́ бы на́съ и҆зба́вилъ ѿ толи́кихъ бѣ́дъ; кто́ же бы сохрани́лъ до ны́нѣ свобо́дны; не ѿстꙋ́пимъ влⷣчце ѿ тебѐ: твоѧ̑ бо рабы̑ сп҃са́еши при́снѡ ѿ всѧ́кихъ лю́тыхъ.
Канѡ́нъ моле́бный прест҃ѣ́й бцⷣѣ
Творе́нїе сщ҃енномона́ха і҆гна́тїѧ. Гла́съ д҃.
Пѣ́снь а҃.
І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.
Ра́достнѡ чⷭ҇таѧ, ны́нѣ наста́вшее хвале́нїе приноша́ю ра́дꙋѧсѧ, и҆ ти́химъ гла́сомъ ѻ҆диги́трїе вопїю́ ти: ра́дꙋйсѧ, и҆ и҆спо́лни мѧ̀ ра́зꙋма, пѣ́ти начина́юща.
Хрⷭ҇та̀ роди́вшаѧ, ра́дость на́мъ вѣ́чнꙋю, ѽ ра́дꙋйсѧ всепѣ́таѧ, правосла́вныхъ наде́ждо, ѻ҆диги́трїе всепѣ́таѧ дв҃и́це! ра́дости и҆спо́лни мѧ̀ мі́рови жела́нныѧ.
Сла́ва: Ликꙋ́ютъ всѝ человѣ́цы, и҆ а҆́гг҃ли всегда̀ согла́снѡ вопїю́ще на нб҃сѝ и҆ на землѝ, ѻ҆диги́трїе: ра́дꙋйсѧ, дв҃и́це, ра́дости бо ржⷭ҇тво́мъ твои́мъ всѧ́чєскаѧ и҆спо́лнила є҆сѝ.
И҆ ны́нѣ: Ра́дость ѻ҆диги́трїе, со стра́хомъ тѝ вопїю́щихъ ра́дости сподо́би, мт҃и сꙋ́щїѧ ра́дости, и҆збавлѧ́ющи скорбе́й всѧ́ческихъ, и҆ всѣ́хъ поми́лꙋй къ тебѣ̀ прибѣга́ющихъ.
Пѣ́снь г҃:
І҆рмо́съ: Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѣ̀ совкꙋ́пльшыѧ дх҃о́внѡ ᲂу҆твердѝ, въ бж҃е́ственнѣй твое́й сла́вѣ, вѣнцє́въ сла́вы сподо́би.
Хрⷭ҇та̀ вы́шнѧгѡ цр҃ѧ̀, ѽ ра́дꙋйсѧ непоколеби́маѧ чⷭ҇таѧ, и҆ ѡ҆дꙋшевле́ннаѧ пала́то! ра́дꙋйсѧ, ѻ҆диги́трїе, ра́дꙋйсѧ, тобо́ю нерꙋши́мъ на́шъ гра́дъ сохранѧ́етсѧ.
Вмѣсти́ти є҆го́же не возмо́же тва́рь, во ᲂу҆тро́бꙋ неискꙋсобра́чнꙋю, ѻ҆диги́трїе дв҃и́це, тѣле́снѡ вмѣсти́ла є҆сѝ. тѣ́мже тѝ ра́дꙋйсѧ пое́мъ, по до́лгꙋ велича́юще.
Сла́ва: Ра́дость многопѣ́таѧ мі́рови, ра́достнѡ тѝ пою́ще при́снѡ, вѣ́чнꙋющїѧ чⷭ҇таѧ ра́дости сподоблѧ́емсѧ, твои́ми мт҃рними мл҃твами, къ ро́ждшемꙋсѧ и҆з̾ тебѐ, ѻ҆диги́трїе.
И҆ ны́нѣ: Златꙋ́ю тѧ̀ ста́мнꙋ, и҆ свѣ́щникъ, и҆ же́злъ, и҆ трапе́зꙋ чⷭ҇таѧ, призыва́емъ ѻ҆диги́трїе, и҆ гла́съ, є҆́же ра́дꙋйсѧ, тебѣ̀ при́снѡ приноша́емъ, съ си́ми же и҆мены̀.
Сѣда́ленъ,гла́съ в҃:
Моле́нїе те́плое, и҆ стѣна̀ неѡбори́маѧ, млⷭ҇ти и҆сто́чниче, мі́рови прибѣ́жище, прилѣ́жнѡ вопїе́мъ тѝ: бцⷣе влⷣчце предварѝ, и҆ ѿ бѣ́дъ и҆зба́ви на́съ, є҆ди́на вско́рѣ предста́тельствꙋющаѧ.
Пѣ́снь д҃.
І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ сп҃сѐ зовꙋ́щїѧ: сла́ва си́лѣ твое́й.
Ра́дꙋйсѧ, чꙋ́до чꙋде́съ, ѻ҆диги́трїе влⷣчце, ра́дꙋйсѧ всѣ́хъ ра́досте, градѡ́въ и҆ ве́сей непобѣди́мое хрⷭ҇тїа́нское въ бѣда́хъ храни́лище, и҆ предгра́дїе, и҆ на врагѝ побѣжде́нїе.
Ра́дꙋйсѧ, ра́дꙋйсѧ люде́й правосла́вныхъ похвало̀, и҆ хрⷭ҇толюби́выхъ во́инствъ покро́въ пребыва́еши всѣ́хъ цр҃и́це. ра́дꙋйсѧ ѻ҆диги́трїе, прибѣ́жище всѣ́хъ на́съ и҆ ᲂу҆твержде́нїе.
Сла́ва: Ра́дꙋйсѧ всѣ́хъ ско́рое въ бѣда́хъ и҆збавле́нїе. ра́дꙋйсѧ гото́вое всѣ́хъ скорбѧ́щихъ ᲂу҆тѣше́нїе. ра́дꙋйсѧ ѻ҆диги́трїе всебл҃гослове́ннаѧ, всѣ́хъ немощны́хъ и҆сцѣли́тельнице.
И҆ ны́нѣ: Ра́дꙋйсѧ, є҆ѧ́же вели̑чїѧ всѧ̀ тва́рь сла́вити ᲂу҆́бѡ спѣши́тъ по достоѧ́нїю,не не возмога́етъ, ѻ҆диги́трїе, и҆ сегѡ̀ ра́ди зове́тъ тѝ: ра́дꙋйсѧ влⷣчце бг҃овмѣсти́мое жили́ще.
Пѣ́снь є҃.
І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Бл҃госты́ни бе́здно и҆ щедро́тъ є҆сѝ, ра́дꙋйсѧ ѻ҆диги́трїе дв҃и́це. ра́дꙋйсѧ всѣ̑мъ ра́дость творѧ́щи вѣ̑рнымъ, ѽ ра́дꙋйсѧ, сꙋ́щихъ въ бѣ́дахъ и҆ скорбѧ́щихъ пребы́страѧ застꙋ́пнице!
Ра́дости ѿ и҆сполне́нїѧ, вели̑чїѧ чꙋде́съ твои́хъ зрѧ́ще, и҆сполнѧ́емсѧ всѝ не зрѧ́щїи, слы́шаще же вѣ́рнїи. тѣ́мже ра́дꙋйсѧ, тебѣ̀ при́снѡ всю́дꙋ и҆ всѝ ѻ҆диги́трїе пое́мъ.
Сла́ва: Хрⷭ҇та̀ бг҃а на́шегѡ, ѽ ра́дꙋйсѧ ѻ҆диги́трїе, жили́ще и҆ сла́вы є҆гѡ̀! Ѽ ра́дꙋйсѧ пала́то преꙋкраше́ннаѧ, ра́дꙋйсѧ гра́де ѡ҆дꙋшевле́нный, при́снѡ ца́рствꙋющїй.
И҆ ны́нѣ: Ра́дость неѡскꙋ́днꙋю тѧ̀ разсмотрѧ́юще, ꙗ҆́кѡ мо́ре ѻ҆трокови́це, ѻ҆диги́трїе дв҃и́це, ра́дꙋющесѧ всѝ, ра́дꙋйсѧ, вопїе́мъ тѝ, и҆ пою́ще, бж҃е́ственныхъ дарѡ́въ неви́димѡ при́снѡ ѿ тебѐ ѡ҆жида́юще.
Пѣ́снь ѕ҃.
І҆рмо́съ: Бжⷭ҇твенное сїѐ и҆ всечⷭ҇тно́е соверша́юще пра́зднество бг҃омꙋ́дрїи, бг҃омт҃ре, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Хрⷭ҇та̀ чⷭ҇таѧ прїе́млющи, гла́съ є҆́же ра́дꙋйсѧ ѻ҆диги́трїе дв҃и́це слы́шала є҆сѝ, є҆го́же неизрече́ннѡ ро́ждши, ра́дꙋйсѧ, ѿ всѣ́хъ слы́шиши всегда̀.
Ра́дости всѧ̑ и҆спо́лнила є҆сѝ, вы̑шнїѧ и҆ ни̑жнїѧ ты̀ совокꙋпи́ла є҆сѝ ѻ҆диги́трїе, тѣ́мже ра́достнѡ и҆ согла́снѡ ны́нѣ, нб҃о и҆ землѧ̀ зове́тъ тѝ.
Сла́ва: Вдѡ́въ, ѽ ра́дꙋйсѧ всепѣ́таѧ, и҆ всѣ́хъ си́рыхъ ѻ҆диги́трїе ᲂу҆тѣше́нїе! ра́дꙋйсѧ, всѣ̑мъ и҆сточа́ющи ни́щымъ бога́тство неистощи́мое.
И҆ ны́нѣ: Зла́та всѧ́кагѡ блиста́ема, и҆ ᲂу҆́тра со́лнечнагѡ свѣтлѣ́йши, жили́ще хрⷭ҇то́во, ра́дꙋйсѧ ѻ҆диги́трїе, ра́дꙋйсѧ дв҃и́це, ра́дꙋйсѧ невѣ́сто неневѣ́стнаѧ.
Конда́къ,гла́съ ѕ҃.
Не и҆́мамы и҆ны́ѧ по́мощи, не и҆́мамы и҆ны́ѧ наде́жды, ра́звѣ тебѐ влⷣчце, ты̀ на́мъ помозѝ, на тебѐ надѣ́емсѧ, и҆ тобо́ю хва́лимсѧ: твои́ бо є҆смы̀ рабѝ, да не постыди́мсѧ.
Дрꙋгі́й конда́къ, гла́съ то́йже.
Предста́тельство хрⷭ҇тїа́нъ непосты́дное, хода́тайство ко творцꙋ̀ непрело́жное, не пре́зри грѣ́шныхъ моле́нїй гла́сы, но предварѝ ꙗ҆́кѡ бл҃га́ѧ на по́мощь на́съ, вѣ́рнѡ зовꙋ́щихъ тѝ: ᲂу҆скорѝ на мл҃твꙋ и҆ потщи́сѧ на ᲂу҆моле́нїе, предста́тельствꙋющи при́снѡ бцⷣе чтꙋ́щихъ тѧ̀.
І҆́косъ: Прострѝ дла̑ни твоѧ̑, и҆́мже всѣ́хъ влⷣкꙋ ꙗ҆́кѡ младе́нца прїѧ́ла є҆сѝ, за мно́жество бл҃гости, не ѡ҆ста́ви на́съ всегда̀ надѣ́ющихсѧ на тѧ̀. бо́дренною твое́ю мл҃твою, и҆ неизче́тною просты́нею ᲂу҆ще́дри на́съ, и҆ пода́ждь дꙋша́мъ на́шимъ млⷭ҇рдїе твоѐ, во вѣ́ки и҆сточа́ющи: тебе́ бо и҆́мамы грѣ́шнїи застꙋ́пницꙋ, ѿ находѧ́щихъ на ны̀ бѣ́дъ и҆ ѕѡ́лъ. но ꙗ҆́кѡ и҆мꙋ́щи млⷭ҇рдїѧ щедрѡ́ты, ᲂу҆скорѝ на мл҃твꙋ, и҆ потщи́сѧ на ᲂу҆моле́нїе, предста́тельствꙋющи при́снѡ бцⷣе чтꙋ́щихъ тѧ̀.
Стїхи́ра, гла́съ ѕ҃:
Не ввѣ́ри мѧ̀ человѣ́ческомꙋ предста́тельствꙋ, прест҃а́ѧ влⷣчце, но прїимѝ моле́нїе раба̀ твоегѡ̀: ско́рбь бо ѡ҆бдержи́тъ мѧ̀, терпѣ́ти не могꙋ̀ де́мѡнскагѡ стрѣлѧ́нїѧ, покро́ва не и҆́мамъ, нижѐ гдѣ̀ прибѣ́гнꙋ ѻ҆каѧ́нный, всегда̀ побѣжда́емъ, и҆ ᲂу҆тѣше́нїѧ не и҆́мамъ, ра́звѣ тебѐ, влⷣчце мі́ра, ᲂу҆пова́нїе и҆ предста́тельство вѣ́рныхъ, не пре́зри моле́нїе моѐ, поле́зно сотворѝ.
Пѣ́снь з҃.
І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.
Ра́дꙋйсѧ, ра́дꙋйсѧ бцⷣе ѻ҆диги́трїе, всѣ́хъ и҆ всегда̀ наставлѧ́ющи вѣ́рныхъ, ше́ствовати ко всѧ́комꙋ пꙋтѝ сп҃си́тельномꙋ. ра́дꙋйсѧ влⷣчце, тобо́ю бо при́снѡ и҆збавлѧ́емсѧ настоѧ́щїѧ ва́рварскїѧ бѣды̀.
Ра́дꙋйсѧ, ра́дꙋйсѧ ѻ҆диги́трїе, бдѧ́щи и҆ молѧ́щисѧ ѡ҆ на́съ къ бг҃ꙋ, и҆ всѧ́кїѧ ѕло́бы хода́тайствомъ твои́мъ, всѧ́ческихъ скорбе́й бг҃ороди́тельнице, всѣ́хъ люде́й и҆збавлѧ́ющи.
Сла́ва: Ра́дꙋйсѧ, ра́дꙋйсѧ прест҃а́ѧ ѻ҆диги́трїе, ꙗ҆́же прошє́нїѧ на̑ша къ по́льзѣ на́мъ и҆сполнѧ́ющи, и҆ хотѧ́щи всѣ̑мъ при́снѡ всегда̀ любодрꙋ́жное бл҃го́е є҆ди́нство, спѣ́шное же во и҆зѧ́щныхъ.
И҆ ны́нѣ: Ра́дꙋйсѧ, ра́дꙋйсѧ кораблє́мъ ѻ҆диги́трїе, нꙋ́жднѡ пла́вающымъ, и҆збавлѧ́ющи вѣ́рныхъ и҆ всѣ̑мъ и҆збавле́нїе ѿ всѧ́кїѧ ско́рби, и҆ недꙋ́ги пестрѡ́тныѧ и҆ ме́длєнныѧ разрѣша́ющи вско́рѣ.
Пѣ́снь и҃.
І҆рмо́съ: Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо сп҃сло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Ра́дꙋйсѧ всебл҃гослове́ннаѧ мр҃і́е, и҆з̾ тебе́ бо всебл҃гослове́нный бг҃ъ ѡ҆дѣ́ѧвсѧ соединѝ своемꙋ̀ бжⷭ҇твꙋ̀,неизрече́ннымъ соедине́нїемъ дв҃о ѻ҆диги́трїе. ра́дꙋйсѧ бл҃года́тнаѧ, ра́досте всегѡ̀ мі́ра.
Ра́дꙋйсѧ лꙋка́выхъ дꙋхѡ́въ прогони́тельнице, ра́дꙋйсѧ бцⷣе ѻ҆диги́трїе. ра́дꙋйсѧ, ꙗ҆́кѡ тебѐ нбⷭ҇наѧ неви̑димаѧ вѡ́инства славосло́вѧтъ всегда̀, и҆ велича́ютъ ꙗ҆́кѡ мт҃рь бж҃їю бы́вшꙋю. ра́дꙋйсѧ, ꙗ҆́же ни̑жнѧѧ сочета́вши съ вы́шними.
Сла́ва: Ра́дꙋйсѧ, всѧ̑ нбⷭ҇ныѧ си̑лы без̾ разсꙋжде́нїѧ превосходѧ́щаѧ. ра́дꙋѧсѧ ѻ҆диги́трїе. ра́дꙋйсѧ всѧ́кїѧ тва́ри, бг҃а ро́ждшаѧ гдⷭ҇ьствꙋющи, є҆́й влⷣчце всепѣ́таѧ, ра́дꙋйсѧ, ꙗ҆́кѡ пребыва́еши дв҃ою чⷭ҇таѧ и҆ по ржⷭ҇твѣ̀.
И҆ ны́нѣ: Ра́дꙋйсѧ же́нъ всѣ́хъ сла́во, хра́ме преѡсщ҃е́нный бг҃а на́шего. ра́дꙋйсѧ, ѻ҆диги́трїе, ра́дꙋйсѧ дꙋшесп҃си́тельнаѧ все́й вселе́ннѣй. ра́дꙋйсѧ покрыва́ющїй ѻ҆́блаче, нб҃съ ши́ршаѧ. Ра́дꙋйсѧ мѷрополо́жнице бж҃е́ственнагѡ мѵ́ра полна̀.
Пѣ́снь ѳ҃.
І҆рмо́съ: Всѧ́къ земноро́дный да взыгра́етсѧ дх҃омъ просвѣща́емъ, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее торжество̀ бг҃омт҃ре, и҆ да вопїе́тъ: ра́дꙋйсѧ всебл҃же́ннаѧ, бцⷣе чⷭ҇таѧ приснодв҃о.
Ра́дꙋйсѧ свѣщѐ, свѣ́тъ невече́рнїй поне́сшаѧ, и҆ въ рождествѣ̀ твое́мъ многобо́жїѧ тьмꙋ̀ разрꙋши́вшаѧ, и҆ а҆́довы про́пасти и҆зба́вльшаѧ лю́ди. ра́дꙋйсѧ ѻ҆диги́трїе бцⷣе, добро́тъ всѣ́хъ предхода́таице.
Ра́дꙋйсѧ землѐ, и҆з̾ неѧ́же кГла́съ прозѧ́бшїй нбⷭ҇ный вѣ̑рнымъ, и҆ мі́ръ ве́сь дꙋшегꙋби́тельнагѡ гла́да и҆зба́ви, разꙋ́мнаѧ и҆ ѡ҆дꙋшевле́ннаѧ. Ѽ ра́дꙋйсѧ вїногра́дъ, ꙗ҆́же гро́здъ живо́тный ро́ждшаѧ, бцⷣе чⷭ҇таѧ ѻ҆диги́трїе.
Сла́ва: Ра́дꙋйсѧ та́йныхъ цвѣтѡ́въ прекра́сный сꙋ́щїй раю̀. ра́дꙋйсѧ мт҃и дв҃о, неви́димыхъ ра́зꙋмъ, чистото́ю страннолѣ́пнѡ побѣ́ждши бг҃ороди́тельнице. ра́дꙋйсѧ ѻ҆трокови́це. ра́дꙋйсѧ ѻ҆диги́трїе, всемі́рное чꙋ́до и҆ слы́шанїе.
И҆ ны́нѣ: Лѣ́то живота̀ на́шегѡ, про́чее сохранѝ неврежде́нно: поможе́нїемъ твои́мъ дв҃о ѻ҆трокови́це, и҆ сподо́би коне́цъ бл҃гі́й полꙋчи́ти на́мъ воспѣва́ющымъ тѧ̀ и҆ взыва́ющымъ: ра́дꙋйсѧ всеблаже́ннаѧ бцⷣе чⷭ҇таѧ, ѻ҆диги́трїе.
Мл҃тва прест҃ѣ́й гпⷭ҇жѣ̀ бцⷣѣ.
Прест҃а́ѧ влⷣчце моѧ̀ бцⷣе, ст҃ы́ми и҆ всеси́льными мольба́ми, ѿженѝ ѿ менѐ смире́ннагѡ и҆ ѡ҆каѧ́ннагѡ раба̀ твоегѡ̀ ᲂу҆ны́нїе, забве́нїе, неразꙋ́мїе, нерадѣ́нїе, и҆ всѧ̑ сквє́рнаѧ, лꙋка̑ваѧ, и҆ хꙋ̑льнаѧ помышлє́нїѧ, ѿ ѻ҆каѧ́ннагѡ моегѡ̀ се́рдца, и҆ ѿ помраче́ннагѡ ᲂу҆ма̀ моегѡ̀. И҆ погасѝ пла́мень страсте́й мои́хъ, ꙗ҆́кѡ ни́щь є҆́смь и҆ ѻ҆каѧ́ненъ. и҆ и҆зба́ви мѧ̀ ѿ мно́гихъ и҆ лю́тыхъ воспомина́нїй, и҆ предпрїѧ́тїй: и҆ ѿ всѣ́хъ дѣ́йствъ ѕлы́хъ свободи́ мѧ. Ꙗ҆́кѡ бл҃гослове́нна є҆сѝ ѿ всѣ́хъ родѡ́въ, и҆ сла́витсѧ пречⷭ҇тно́е и҆́мѧ твоѐ, во вѣ́ки вѣкѡ́въ, а҆ми́нь.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.