[глⷡ҇а л҃є] Чи́нъ бл҃гослове́нїѧ но́вагѡ кївѡ́та.
[глⷡ҇а л҃є] Чи́нъ бл҃гослове́нїѧ но́вагѡ кївѡ́та,
и҆лѝ сосꙋ́да, въ не́мже храни́мы бы́ти и҆́мꙋтъ бж҃е́ствєнныѧ хрⷭ҇тѡ́вы та̑йны.
Поста́вленꙋ сꙋ́щꙋ столꙋ̀, и҆ чⷭ҇тнѡ покрове́ннꙋ пред̾ ца́рскими две́рьми, и҆ на не́мъ но́вомꙋ кївѡ́тꙋ, і҆ере́й и҆схо́дитъ ца́рскими враты̀, ѡ҆дѣ́ѧнъ въ є҆пїтрахи́ль и҆ фелѡ́нь, съ кади́льницею, и҆ покади́въ крⷭ҇тоѡбра́знѡ кївѡ́тъ, начина́етъ ѻ҆бы́чнѡ:
Бл҃гослове́нъ бг҃ъ на́шъ: Чте́цъ: Цр҃ю̀ небе́сный: Трист҃о́е. Ѻ҆́ч҃е на́шъ: Ꙗ҆́кѡ твоѐ є҆́сть црⷭ҇тво: Чте́цъ: Гдⷭ҇и поми́лꙋй. в҃і. Прїиди́те, поклони́мсѧ: три́жды.
И҆ ѱало́мъ рл҃а:
Помѧнѝ гдⷭ҇и дв҃да, и҆ всю̀ кро́тость є҆гѡ̀. Ꙗ҆́кѡ клѧ́тсѧ гдⷭ҇еви, ѡ҆бѣща́сѧ бг҃ꙋ і҆а́кѡвлю: А҆́ще вни́дꙋ въ селе́нїе до́мꙋ моегѡ̀, и҆лѝ взы́дꙋ на ѻ҆́дръ посте́ли моеѧ̀: А҆́ще да́мъ со́нъ ѻ҆чи́ма мои́ма, и҆ вѣ́ждома мои́ма дрема́нїе, и҆ поко́й скранїа́ма мои́ма: До́ндеже ѡ҆брѧ́щꙋ мѣ́сто гдⷭ҇еви, селе́нїе бг҃ꙋ і҆а́кѡвлю. Сѐ слы́шахомъ ѧ҆̀ во є҆ѵѳра́ѳѣ, ѡ҆брѣто́хомъ ѧ҆̀ въ полѧ́хъ дꙋбра́вы: Вни́демъ въ селє́нїѧ є҆гѡ̀, поклони́мсѧ на мѣ́сто, и҆дѣ́же стоѧ́стѣ но́зѣ є҆гѡ̀. Воскрⷭ҇нѝ гдⷭ҇и въ поко́й тво́й, ты̀ и҆ кївѡ́тъ ст҃ы́ни твоеѧ̀. Сщ҃е́нницы твоѝ ѡ҆блекꙋ́тсѧ пра́вдою, и҆ прпⷣбнїи твоѝ возра́дꙋютсѧ. Дв҃да ра́ди раба̀ твоегѡ̀, не ѿвратѝ лицѐ пома́заннагѡ твоегѡ̀. Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀: ѿ пло́да чре́ва твоегѡ̀ посаждꙋ̀ на прⷭ҇то́лѣ твое́мъ. А҆́ще сохранѧ́тъ сы́нове твоѝ завѣ́тъ мо́й и҆ свидѣ̑нїѧ моѧ̑ сїѧ̑, и҆̀мже наꙋчꙋ̀ ѧ҆̀, и҆ сы́нове и҆́хъ до вѣ́ка сѧ́дꙋтъ на прⷭ҇то́лѣ твое́мъ. Ꙗ҆́кѡ и҆збра̀ гдⷭ҇ь сїѡ́на, и҆зво́ли и҆̀ въ жили́ще себѣ̀. Се́й поко́й мо́й во вѣ́къ вѣ́ка, здѣ̀ вселю́сѧ, ꙗ҆́кѡ и҆зво́лихъ и҆̀. Лови́твꙋ є҆гѡ̀ бл҃гословлѧ́ѧй бл҃гословлю̀: ни́щыѧ є҆гѡ̀ насы́щꙋ хлѣ́бы. Сщ҃е́нники є҆гѡ̀ ѡ҆блекꙋ̀ во сп҃се́нїе и҆ прпⷣбнїи є҆гѡ̀ ра́достїю возра́дꙋютсѧ. Та́мѡ возращꙋ̀ ро́гъ дв҃дови, ᲂу҆гото́вахъ свѣти́льникъ пома́занномꙋ моемꙋ̀. Врагѝ є҆гѡ̀ ѡ҆блекꙋ̀ стꙋдо́мъ, на не́мже процвѣте́тъ ст҃ы́нѧ моѧ̀.
Сла́ва, и҆ ны́нѣ: А҆ллилꙋ́їа, три́жды.
Дїа́конъ: Гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
І҆ере́й чте́тъ мл҃твꙋ сїю̀:
Гдⷭ҇и бж҃е на́шъ, и҆мѣ́ѧй прⷭ҇то́лъ нб҃о, и҆ подно́жїе зе́млю, а҆́ще и҆ всѧ̀ тва́рь вмѣсти́ти тѧ̀ не мо́жетъ, нижѐ ᲂу҆́мъ а҆́гг҃льскїй и҆ человѣ́ческїй вели́чество сла́вы твоеѧ̀ пости́гнꙋти, и҆ по достоѧ́нїю сказа́ти возмога́етъ: но ты̀ млⷭ҇рдїѧ ра́ди млⷭ҇ти и҆ человѣколю́бїѧ, во чре́вѣ дв҃и́честѣмъ неизрече́ннѡ вмѣсти́тисѧ и҆зво́лилъ є҆сѝ, и҆ чл҃вѣ́къ бы́въ, бг҃ъ сы́й и҆́стиненъ, да человѣ́ка себѣ̀ присво́иши, под̾ ви́димымъ ви́домъ хлѣ́ба и҆ вїна̀, пло́ть и҆ кро́вь свою̀ въ снѣ́дь вѣ̑рнымъ да́лъ є҆сѝ. Ꙗ҆́кѡ бг҃ъ ᲂу҆́бѡ, а҆́ще и҆ вездѣ̀ є҆сѝ, и҆ всѧ̑ и҆сполнѧ́еши, но ꙗ҆́коже бг҃ъ и҆ чл҃вѣ́къ, на нб҃сѝ ѡ҆деснꙋ́ю ѻ҆ц҃а̀, и҆ на землѝ въ прест҃ы́хъ то́чїю тѣ́ла и҆ кро́ве твоеѧ̀ та́йнахъ и҆́стиннѡ бы́ти и҆зволѧ́еши: тѣ́мже ны́нѣ смире́ннѡ молю́ тѧ, при́зри млⷭ҇тивнѡ на мл҃твꙋ на́шꙋ, и҆ на сосꙋ́дъ се́й, въ сла́вꙋ твою̀ соѡрꙋже́нный, и҆ бл҃гослове́нїе твоѐ нбⷭ҇ное низпослѝ на́нь, бл҃гословѝ, ѡ҆чи́сти и҆ ѡ҆ст҃ѝ є҆го̀, во є҆́же бы́ти є҆мꙋ̀ досто́йное вмѣсти́лище, но́вый же гро́бъ и҆ храни́лище ст҃ы̑мъ и҆ животворѧ́щымъ та́йнамъ прест҃а́гѡ тѣ́ла и҆ чⷭ҇тны́ѧ кро́ве твоеѧ̀. Ты́ бо є҆сѝ ѡ҆сщ҃е́нїе на́ше, и҆ тебѣ̀ сла́вꙋ возсыла́емъ со безнача́льнымъ твои́мъ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
І҆ере́й: Ми́ръ всѣ̑мъ.
Ли́къ: И҆ дꙋ́хови твоемꙋ̀.
Дїа́конъ: Главы̑ ва́шѧ гдⷭ҇еви приклони́те.
Ли́къ: Тебѣ̀ гдⷭ҇и.
І҆ере́й же, главꙋ̀ приклони́въ, та́йнѡ чте́тъ мл҃твꙋ сїю̀:
Гдⷭ҇и бж҃е на́шъ, приклонѝ ᲂу҆́хо твоѐ и҆ ᲂу҆слы́ши мѧ̀, и҆́же млⷭ҇ти ра́ди и҆ человѣколю́бїѧ съ на́ми неѿстꙋ́пнѡ до сконча́нїѧ вѣ́ка пребыва́ти ѡ҆бѣща́лсѧ є҆сѝ, и҆ послѝ бл҃года́ть прест҃а́гѡ твоегѡ̀ дх҃а, и҆ въ ѡ҆кропле́нїи сщ҃е́нныѧ сеѧ̀ воды̀, бл҃гословѝ и҆ ѡ҆ст҃ѝ сосꙋ́дъ се́й, на хране́нїе бж҃е́ственныхъ та̑инъ тѣ́ла и҆ кро́ве твоеѧ̀ соѡрꙋже́нный.
И҆ возглаша́етъ: Ты́ бо є҆сѝ бл҃гословлѧ́ѧй и҆ ѡ҆сщ҃а́ѧй всѧ́чєскаѧ, хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
І҆ере́й же взе́мъ сщ҃е́ннꙋю во́дꙋ, кропи́тъ є҆́ю кївѡ́тъ, глаго́лѧ:
Ѡ҆сщ҃а́етсѧ кївѡ́тъ се́й бл҃года́тїю прест҃а́гѡ дх҃а, ѡ҆кропле́нїемъ воды̀ сеѧ̀ сщ҃е́нныѧ, во и҆́мѧ ѻ҆ц҃а̀ и҆ сн҃а, и҆ ст҃а́гѡ дх҃а, а҆ми́нь. Три́жды.
Сотвори́въ же ѻ҆бы́чный дневны́й ѿпꙋ́стъ, взе́млетъ сщ҃е́нный кївѡ́тъ, и҆ ѿно́ситъ є҆го̀ на ст҃ꙋ́ю трапе́зꙋ, и҆ влага́етъ въ не́мъ бж҃е́ствєнныѧ та̑йны.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.