[глⷡ҇а к҃и] Чи́нъ ѡ҆сщ҃е́нїѧ хра́ма, ѿ а҆рхїере́а твори́магѡ.

Хра́мꙋ соверше́нꙋ бы́вшꙋ, прихо́дитъ ѿ а҆рхїере́а по́сланный, є҆мꙋ́же повели́тъ, пре́жде є҆ди́нагѡ днѐ и҆лѝ бо́льши, и҆ пред̾ꙋготовлѧ́етъ потрє́бнаѧ къ ѡ҆сщ҃е́нїю, ка́къ внꙋ́трь ѻ҆лтарѧ̀, та́къ и҆ во все́мъ хра́мѣ, а҆ наипа́че дабы̀ прⷭ҇то́лъ бы́лъ на четы́рехъ столпа́хъ, пѧ́тый столпе́цъ посредѝ съ ꙗ҆́щикомъ: ꙗ҆́щикъ бы бы́лъ посредѣ̀ под̾ прⷭ҇то́ломъ, вышино́ю полъ-арши́на: прⷭ҇то́лъ высото́ю а҆рши́на, и҆ шестѝ вершкѡ́въ, а҆ широто́ю по мѣ́рѣ ѻ҆лтарѧ̀: дска̀ напрⷭ҇то́льнаѧ по мѣ́рѣ прⷭ҇то́ла, же́ртвенникъ тако́й же высоты̀, ширина̀ и҆ длина̀ по мѣ́рѣ ѻ҆лтарѧ̀. На верхꙋ̀ ᲂу҆ столпѡ́въ прⷭ҇то́льныхъ вы́нѧть ꙗ҆́щики на че́тверть вершка̀, гдѣ̀ бы́ть воскомасті́хꙋ: на тѣ́хже столпа́хъ, ѿ по́лꙋ ᲂу҆стꙋпѧ̀ вершка̀ съ два̀, вы́рѣзать зазꙋ́бриной длѧ ᲂу҆твержде́нїѧ ве́рви: а҆ вкрꙋ́гъ прⷭ҇то́льной дскѝ вы́рѣзать же на че́тверть вершка̀, гдѣ̀ бы́ть ве́рви: на дска́хъ, на прⷭ҇то́льной и҆ на же́ртвенной, по ᲂу҆гла́мъ что́бы бы́ло прове́рчено, гдѣ̀ бы́ть гвоздѧ́мъ, и҆ сдѣ́лать гнѣ̑здышка, гдѣ̀ бꙋ́дꙋтъ гвозди̑нныѧ шлѧ̑пки, что́бъ гвозди̑нныѧ шлѧ̑пки бы́ли въ ра́венствѣ со прⷭ҇то́льною дско́ю, та́кожъ и҆ на столпа́хъ навертѣ́ть, что́бъ гво́зди шлѝ прѧ́мѡ: къ ᲂу҆твержде́нїю прⷭ҇то́ла четы́ре гвоздѧ̀, а҆ къ же́ртвенникꙋ ско́лькѡ на́добно: четы́ре ка́мнѧ, ко́ими прибива́ютсѧ гво́зди: срачи́ца на ѡ҆дѣѧ́нїе прⷭ҇то́ла, и҆ дрꙋга́ѧ на же́ртвенникъ. На ѡ҆бѧза́нїе прⷭ҇то́ла ве́рвь въ шестьдесѧ́тъ а҆рши́нъ, и҆ ве́рхнее ѡ҆дѣѧ́нїе на прⷭ҇то́лъ и҆ на же́ртвенникъ: пелєны̀, что́бъ покры́ть прⷭ҇то́лъ и҆ же́ртвенникъ, во́здꙋхи, пла́ты, кото́рыми прⷭ҇то́лъ ѡ҆тира́ть: за́навѣсъ къ црⷭ҇кимъ две́рємъ, два̀ і҆лїто́на на прⷭ҇то́лъ и҆ на же́ртвенникъ: воды̀ ро́зовой, и҆ вїна̀ цр҃ко́внагѡ по стклѧ́ницѣ: кропи́ло, ко́имъ кропи́ть: ст҃о́е мѵ́ро, и҆ стрꙋче́цъ: четы́ре гꙋ̑бы, ѡ҆тира́ть и҆́ми прⷭ҇то́лъ: гꙋ́ба во а҆нтїми́нсъ, гꙋ́ба во ст҃ꙋ́ю ча́шꙋ: ꙗ҆́щичекъ ѻ҆ловѧ́нный на ст҃ы̑ѧ мѡ́щи под̾ прⷭ҇то́лъ: а҆рхїере́ю свѣща̀, и҆ свѣщы̀ на розда́чꙋ про́чымъ дꙋхѡ́внымъ, и҆ мїрѧ́нѡмъ: ла́донъ росно́й и҆ просто́й: двѣ̀ свѣщѝ вы́нѡсныѧ большы́ѧ: хорꙋ́гви, а҆́ще сꙋ́ть: вкрꙋ́гъ цр҃кви что́бъ бы́ло чи́сто.

Та́же снима́етсѧ дска̀ со столпѡ́въ, и҆ поставлѧ́етсѧ на деснѣ́й странѣ̀ къ стѣнѣ̀, и҆ замѣча́етсѧ, ка́къ є҆́й бы́ть по пре́жнемꙋ на столпа́хъ прⷭ҇то́льныхъ.

Пото́мъ пред̾ црⷭ҇кїѧ врата̀ поставлѧ́етсѧ сто́лъ, и҆ постила́етсѧ ска́терть: пове́рхъ ска́терти постила́етсѧ пелена̀, и҆ полага́етсѧ ст҃о́е є҆ѵⷢ҇лїе, и҆ чⷭ҇тны́й крⷭ҇тъ, и҆ поставлѧ́ютсѧ ст҃ы́е сосꙋ́ды, лжи́ца, копїѐ, пелєны̀, во́здꙋхи, ве́рвь, ѡ҆дѣѧ́нїе на прⷭ҇то́лъ и҆ на же́ртвенникъ, гво́зди, гꙋ̑бы, и҆ покрыва́ютсѧ пелено́ю и҆ поставлѧ́ютсѧ по ᲂу҆гла́мъ четы́ре подсвѣ́щника: а҆ дрꙋго́й столе́цъ поставлѧ́етсѧ въ ѻ҆лтарѣ̀ къ го́рнемꙋ мѣ́стꙋ, и҆ сте́летсѧ пелена̀, и҆ поставлѧ́етсѧ на столе́цъ ст҃о́е мѵ́ро, вїно̀ цр҃ко́вное, вода̀ ро́зоваѧ въ стклѧ́ницахъ, стрꙋче́цъ, кропи́ло, ка́менїе, кото́рыми гво́зди прибива́ть.

А҆ мѡ́щи ст҃ы̑ѧ поставлѧ́ютсѧ на ді́скосѣ, покрове́ны ѕвѣздо́ю и҆ во́здꙋхомъ, въ на́вечерїи ѡ҆сщ҃е́нїѧ на а҆нало́гїи пред̾ ѡ҆́бразомъ сп҃си́телевымъ, ᲂу҆ црⷭ҇кихъ вра́тъ въ то́мже хра́мѣ, и҆ пое́тсѧ внѣ̀ ѻ҆лтарѧ̀ всено́щное бдѣ́нїе ѡ҆бновле́нїю и҆ хра́мꙋ, комꙋ̀ ѿ а҆рхїере́а повелѣно̀ бꙋ́детъ. Пред̾ водоѡсщ҃е́нїемъ же и҆зно́сѧтсѧ мѡ́щи съ бл҃гоговѣ́нїемъ въ бли́зъ сꙋ́щїй хра́мъ по́слѣ ра́нней лїтꙋргі́и, и҆ поставлѧ́ютсѧ на ст҃ѣ́мъ прⷭ҇то́лѣ, а҆ ст҃о́е є҆ѵⷢ҇лїе поставлѧ́етсѧ ѿ восто́ка над̾ мощьмѝ: и҆ ста́витсѧ подсвѣ́щникъ пред̾ ст҃ы́ми мощьмѝ. Бꙋ́де же нѣ́тъ въ бли́зости дрꙋга́гѡ хра́ма, то стоѧ́тъ до вре́мени прїѧ́тїѧ своегѡ̀ на то́мже мѣ́стѣ.

Ѡ҆ составле́нїи воскомасті́ха:

Во ᲂу҆́трїи пре́жде прише́ствїѧ а҆рхїере́йскагѡ, воскомасті́хъ составлѧ́етсѧ си́це во́скъ, и҆ масті́хъ толче́нъ, и҆ ла́донъ толче́нъ, [а҆́ще нѣ́сть масті́ха, вмѣ́стѡ є҆гѡ̀ бѣ́лый ла́донъ довлѣ́етъ,] и҆ росно́й ла́донъ толче́нъ же, и҆ а҆лѡ́й толче́нъ же, а҆́ще же нѣ́сть а҆лѡ́ѧ, вмѣ́сто є҆гѡ̀ ꙾сѣ́ра꙾[[смола̀]] бѣ́лаѧ: и҆ полага́ютъ пре́жде во́скъ въ горне́цъ но́вый, проти́вꙋ мѣ́ры веще́й. И҆ є҆гда̀ расто́питсѧ во́скъ, полага́ютъ и҆ вышепи̑санныѧ вє́щи, и҆ мѣша́ютъ ѧ҆̀ въ горнцѣ̀ стрꙋчце́мъ ѻ҆па́снѡ, что́бы ѿ воскипѣ́нїѧ не прелило́сѧ во ѻ҆́гнь: и҆ по ма́ломъ кипѣ́нїи, ѿставлѧ́ютъ ѿ ѻ҆гнѧ̀ во странꙋ̀: А҆́ще же соизво́литсѧ примѣша́ти и҆ и҆ны̑ѧ бл҃говѡ́нныѧ прили̑чныѧ вє́щи: и҆ сїѐ невозбра́нно є҆́сть.

Нача́ло ѡ҆сщ҃е́нїѧ.

Приспѣ́вшꙋ вре́мени ст҃ы́ѧ лїтꙋргі́и, и҆ прибы́вшꙋ а҆рхїере́ю во ѡ҆сщ҃а́емый хра́мъ, ѡ҆блача́етсѧ во всѧ̑ а҆рхїерє́йскаѧ ѡ҆блачє́нїѧ, и҆ верхꙋ̀ а҆рхїере́йскихъ ѻ҆де́ждъ возлага́етсѧ ктомꙋ̀ наро́читаѧ срачи́ца и҆лѝ за́понъ. И҆ та́кѡ ᲂу҆кра́шенъ вхо́дитъ во ст҃ы́й ѻ҆лта́рь: преди́ же а҆рхїере́а вно́сѧтъ сослꙋжа́щїи сщ҃е́нницы, та́кожде све́рхъ сщ҃е́нническихъ ѻ҆де́ждъ и҆мѣ́ющїе возложє́нныѧ срачи̑цы, въ црⷭ҇каѧ врата̀ сто́лъ ᲂу҆гото́ванный со всѧ́кою потре́бою, ꙗ҆́же сꙋ́ть прили̑чна ко ѡ҆сщ҃е́нїю, и҆ поставлѧ́ютъ ѡ҆деснꙋ́ю странꙋ̀. А҆рхїере́й же, ѿда́въ по́сохъ ᲂу҆ црⷭ҇кихъ вра́тъ по́дьѧкꙋ, вхо́дитъ во ѻ҆лта́рь, и҆ помолѧ́сѧ ѡ҆сѣнѧ́етъ сослꙋжа́щихъ на ѻ҆́бѣ страны̑[[Зрѝ. Црⷭ҇каѧ врата̀ затвори́ти, и҆ мїрски̑мъ лю́демъ и҆з̾ ѻ҆лтарѧ̀ и҆зы́ти, дабы̀ ѿ ᲂу҆тѣсне́нїѧ не могло̀ какова́гѡ ли́бо сщ҃еннодѣ́йствїю возпослѣ́довати препѧ́тствїѧ]]. Въ то̀ вре́мѧ дїа́конъ подно́ситъ а҆рхїере́ю ст҃ꙋ́ю во́дꙋ: а҆рхїере́й же принѧ́въ кропи́ло, кропи́тъ ст҃о́ю водо́ю столпы̀. Пото́мъ прино́ситъ ключа́рь воскомасті́хъ кипѧ́щъ, а҆рхїере́й кропи́тъ ст҃о́ю водо́ю воскомасті́хъ, и҆ прїе́млетъ горне́цъ съ воскомасті́хомъ, и҆ возлива́етъ са́мъ на столпцы̀ крестоѡбра́знѡ проти́въ мѣ́ры, ѡ҆бходѧ̀ крꙋго́мъ, и҆ ѿдае́тъ горне́цъ, пото́мъ па́ки кропи́тъ ст҃о́ю водо́ю на столпцы̀, что́бы ско́рѡ ᲂу҆сты́лъ воскомасті́хъ: а҆ сщ҃е́нницы подꙋва́ютъ на столпцы̀, и҆дѣ́же воскомасті́хъ, до́ндеже ᲂу҆сты́нетъ.

По и҆сполне́нїи ѻ҆́нагѡ, прѡтодїа́конъ глаго́летъ: Гдⷭ҇ꙋ помо́лимсѧ.

Сщ҃е́нницы: Гдⷭ҇и поми́лꙋй.

А҆рхїере́й же чте́тъ мл҃твꙋ во ᲂу҆слы́шанїе всѣ̑мъ:

Мл҃тва а҃:

Гдⷭ҇и бж҃е сп҃си́телю на́шъ, всѧ̑ творѧ́й и҆ стро́ѧй ѡ҆ сп҃се́нїи ро́да человѣ́ческагѡ, прїимѝ мл҃твꙋ на́съ недосто́йныхъ ра̑бъ твои́хъ, и҆ ᲂу҆довлѝ на́съ въ настоѧ́щїй ча́съ, во є҆́же неѡсꙋжде́ннѡ ѡ҆сщ҃е́нїе соверши́ти хра́ма сегѡ̀, ко твоемꙋ̀ славосло́вїю созда́ннагѡ, во и҆́мѧ ст҃а́гѡ и҆́мⷬ҇къ: [и҆лѝ ст҃ы́ѧ и҆́мⷬ҇къ] и҆ воздви́женїе въ не́мъ сотвори́ти трапе́зы.

Возгла́съ: Ꙗ҆́кѡ подоба́етъ тебѣ̀ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀ и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.

Сщ҃е́нницы: А҆ми́нь.

Пото́мъ прино́сѧтъ сщ҃е́нницы трапе́знꙋю дскꙋ̀, и҆ кропи́тсѧ дска̀ ѿ а҆рхїере́а съ ѻ҆бои́хъ стра́нъ, и҆ полага́етсѧ на столпца́хъ прⷭ҇то́льныхъ.

Въ то̀ вре́мѧ пое́тсѧ ѱало́мъ рм҃д:

Вознесꙋ́ тѧ бж҃е мо́й, цр҃ю̀ мо́й, и҆ бл҃гословлю̀ и҆́мѧ твоѐ въ вѣ́къ и҆ въ вѣ́къ вѣ́ка. На всѧ́къ де́нь бл҃гословлю́ тѧ, и҆ восхвалю̀ и҆́мѧ твоѐ въ вѣ́къ и҆ въ вѣ́къ вѣ́ка. Ве́лїй гдⷭ҇ь и҆ хва́ленъ ѕѣлѡ̀, и҆ вели́чїю є҆гѡ̀ нѣ́сть конца̀. Ро́дъ и҆ ро́дъ восхва́лѧтъ дѣла̀ твоѧ̑, и҆ си́лꙋ твою̀ возвѣстѧ́тъ. Великолѣ́пїе сла́вы ст҃ы́ни твоеѧ̀ возглаго́лютъ и҆ чꙋдеса̀ твоѧ̑ повѣ́дѧтъ: И҆ си́лꙋ стра́шныхъ твои́хъ рекꙋ́тъ, и҆ вели́чїе твоѐ повѣ́дѧтъ. Па́мѧть мно́жества бл҃гости твоеѧ̀ ѿры́гнꙋтъ, и҆ пра́вдою твое́ю возра́дꙋютсѧ. Ще́дръ и҆ млⷭ҇тивъ гдⷭ҇ь, долготерпѣли́въ и҆ многомлⷭ҇тивъ: Бл҃гъ гдⷭ҇ь всѧ́чєскимъ, и҆ щедрѡ́ты є҆гѡ̀ на всѣ́хъ дѣ́лѣхъ є҆гѡ̀. Да и҆сповѣ́дѧтсѧ тебѣ̀, гдⷭ҇и, всѧ̑ дѣла̀ твоѧ̑, и҆ прпⷣбнїи твоѝ да бл҃гословѧ́тъ тѧ̀: Сла́вꙋ црⷭ҇твїѧ твоегѡ̀ рекꙋ́тъ, и҆ си́лꙋ твою̀ возглаго́лютъ: Сказа́ти сыновѡ́мъ человѣ́чєскимъ си́лꙋ твою̀, и҆ сла́вꙋ великолѣ́пїѧ црⷭ҇твїѧ твоегѡ̀. црⷭ҇тво твоѐ, црⷭ҇тво всѣ́хъ вѣкѡ́въ, и҆ влⷣчество твоѐ во всѧ́комъ ро́дѣ и҆ ро́дѣ: вѣ́ренъ гдⷭ҇ь во всѣ́хъ словесѣ́хъ свои́хъ, и҆ прпⷣбенъ во всѣ́хъ дѣ́лѣхъ свои́хъ. Оу҆твержда́етъ гдⷭ҇ь всѧ̑ низпа́дающыѧ, и҆ возставлѧ́етъ всѧ̑ низве́ржєнныѧ. Ѻ҆́чи всѣ́хъ на тѧ̀ ᲂу҆пова́ютъ, и҆ ты̀ дае́ши и҆̀мъ пи́щꙋ во бл҃говре́менїи: Ѿверза́еши ты̀ рꙋ́кꙋ твою̀, и҆ и҆сполнѧ́еши всѧ́кое живо́тно бл҃говоле́нїѧ. Прⷣвенъ гдⷭ҇ь во всѣ́хъ пꙋте́хъ свои́хъ, и҆ прпⷣбенъ во всѣ́хъ дѣ́лѣхъ свои́хъ. Бли́зъ гдⷭ҇ь всѣ̑мъ призыва́ющымъ є҆го̀, всѣ̑мъ призыва́ющымъ є҆го̀ во и҆́стинѣ: Во́лю боѧ́щихсѧ є҆гѡ̀ сотвори́тъ, и҆ мл҃твꙋ и҆́хъ ᲂу҆слы́шитъ, и҆ сп҃се́тъ ѧ҆̀. Храни́тъ гдⷭ҇ь всѧ̑ лю́бѧщыѧ є҆го̀, и҆ всѧ̑ грѣ́шники потреби́тъ. Хвалꙋ̀ гдⷭ҇ню возглаго́лютъ ᲂу҆ста̀ моѧ̑: и҆ да бл҃гослови́тъ всѧ́ка пло́ть и҆́мѧ ст҃о́е є҆гѡ̀ въ вѣ́къ, и҆ въ вѣ́къ вѣ́ка.

По сконча́нїи же ѱалма̀, глаго́летъ а҆рхїере́й: Бл҃гослове́нъ бг҃ъ на́шъ:

Сте́кшꙋ же воскомасті́хꙋ, и҆ ѡ҆чища́ємымъ мѣ́стѡмъ, на ни́хже и҆стечѐ.

Па́ки глаго́лютъ ѱало́мъ к҃в:

Гдⷭ҇ь пасе́тъ мѧ̀, и҆ ничто́же мѧ̀ лиши́тъ. На мѣ́стѣ ѕла́чнѣ, та́мѡ всели́ мѧ: на водѣ̀ поко́йнѣ воспита́ мѧ. Дꙋ́шꙋ мою̀ ѡ҆братѝ, наста́ви мѧ̀ на стєзѝ пра́вды, и҆́мене ра́ди своегѡ̀. А҆́ще бо и҆ пойдꙋ̀ посредѣ̀ сѣ́ни сме́ртныѧ, не ᲂу҆бою́сѧ ѕла̀, ꙗ҆́кѡ ты̀ со мно́ю є҆сѝ: же́злъ тво́й и҆ па́лица твоѧ̀, та̑ мѧ̀ ᲂу҆тѣ́шиста. Оу҆гото́валъ є҆сѝ предо мно́ю трапе́зꙋ сопроти́въ стꙋжа́ющымъ мнѣ̀: ᲂу҆ма́стилъ є҆сѝ є҆ле́омъ главꙋ̀ мою̀, и҆ ча́ша твоѧ̀ ᲂу҆поѧва́ющи мѧ̀ ꙗ҆́кѡ держа́вна. И҆ млⷭ҇ть твоѧ̀ пожене́тъ мѧ̀ всѧ̑ дни̑ живота̀ моегѡ̀, и҆ є҆́же всели́ти ми сѧ въ до́мъ гдⷭ҇ень, въ долготꙋ̀ дні́й.

Та́же а҆рхїере́й:

Бл҃гослове́нъ бг҃ъ на́шъ, всегда̀, ны́нѣ и҆ при́снѡ, и҆ во вѣ́ки вѣкѡ́въ.

Сщ҃е́нницы: А҆ми́нь.

Та́же прино́ситъ ключа́рь четы́ре гво́здѧ, и҆ полага́етъ на трапе́зѣ: а҆рхїере́й же кропи́тъ ст҃о́ю водо́ю, и҆ влага́етъ и҆̀хъ въ столпы̀. Па́ки прино́ситъ ключа́рь четы́ре ка́мнѧ: взѧ́въ же а҆рхїере́й є҆ди́нъ ка́мень, и҆ про́чїи сщ҃еннослꙋжи́тели, ᲂу҆твержда́ютъ трапе́зꙋ. По внегда́ же ᲂу҆тверди́тисѧ трапе́зѣ, кове́ръ а҆́бїе пред̾ ст҃ы́ми две́рьми постила́етсѧ, и҆ возгла́вїе полага́етсѧ[[Црⷭ҇каѧ врата̀ ѿве́рсти]], и҆ и҆зше́дъ а҆рхїере́й и҆з̾ ѻ҆лтарѧ̀, прѡтодїа́конꙋ возгласи́вшꙋ:

Па́ки и҆ па́ки, прекло́ньше кѡлѣ́на, гдⷭ҇ꙋ помо́лимсѧ.

Сщ҃е́нникѡмъ же внꙋ́трь ѻ҆лтарѧ̀ пою́щымъ: Гдⷭ҇и поми́лꙋй. три́жды.

Преклонѧ́етъ кѡлѣ́на, и҆ чте́тъ мл҃твꙋ сїю̀ велегла́снѡ:

Бж҃е безнача́льный. и҆ присносꙋ́щный, и҆́же ѿ не сꙋ́щихъ въ бытїѐ всѧ̑ приведы́й, и҆́же во свѣ́тѣ живы́й непристꙋ́пнѣмъ, и҆ престо́лъ и҆мѣ́ѧй нб҃о, зе́млю же подно́жїе: и҆́же мѡѷсе́ови повелѣ́нїе да́вый и҆ начерта̑нїѧ, веселеи́лꙋ же дх҃ъ премꙋ́дрости вложи́вый: и҆ ᲂу҆довли́въ и҆̀хъ къ соверше́нїю свидѣ́нїѧ ски́нїи, въ не́йже слꙋжє́нїѧ ѡ҆правда́нїѧ бѧ́хꙋ и҆́стины ѡ҆́бразы и҆ предначерта̑нїѧ: и҆́же соломѡ́нꙋ широтꙋ̀ и҆ простра́нство се́рдца дарова́вый, и҆ тѣ́мъ дре́внїй хра́мъ возста́вивый: ст҃ы̑мъ же всехва̑льнымъ а҆пⷭ҇лѡмъ, въ дꙋ́сѣ слꙋ́жбꙋ, и҆ ски́нїи и҆́стинныѧ ѡ҆бнови́вый бл҃года́ть: и҆ тѣ́ми ст҃ы̑ѧ твоѧ̑ цр҃кви, и҆ же́ртвенники твоѧ̑, гдⷭ҇и си́лъ, во все́й землѝ насади́вый, во є҆́же приноси́тисѧ тебѣ̀ сщ҃є́ннымъ и҆ безкрѡ́внымъ же́ртвамъ: и҆́же и҆ семꙋ̀ хра́мꙋ ны́нѣ бл҃говоли́лъ є҆сѝ во и҆́мѧ созда́тисѧ ст҃а́гѡ, [и҆лѝ ст҃ы́ѧ] и҆́мⷬ҇къ, ко сла́вѣ твое́й, и҆ є҆диноро́днагѡ твоегѡ̀ сн҃а, и҆ всест҃а́гѡ твоегѡ̀ дх҃а: са́мъ безсме́ртне и҆ великодарови́тый цр҃ю̀, помѧнѝ щедрѡ́ты твоѧ̑ и҆ млⷭ҇ти твоѧ̀, ꙗ҆́кѡ ѿ вѣ́ка сꙋ́ть: и҆ да не возгнꙋша́ешисѧ на́съ, мно́жествомъ ѡ҆скверне́нныхъ грѣхѡ́въ, нижѐ да разрꙋши́ши завѣ́та твоегѡ̀ на́шеѧ ра́ди нечистоты̀: но пре́зри и҆ ны́нѣ прегрѣшє́нїѧ на̑ша, и҆ ᲂу҆крѣпѝ на́съ, и҆ ᲂу҆довлѝ бл҃года́тїю и҆ прише́ствїемъ животворѧ́щагѡ и҆ ст҃а́гѡ твоегѡ̀ дх҃а, соверши́ти без̾ ѡ҆сꙋжде́нїѧ ѡ҆бновле́нїе хра́ма сегѡ̀, и҆ и҆́же въ не́мъ же́ртвенника [же́ртвенникѡвъ] сотвори́ти ѡ҆сщ҃е́нїе: да и҆ на се́мъ [и҆ на си́хъ] бл҃гослови́мъ тѧ̀ ѱалмы̀ и҆ пѣ́сньми, и҆ ꙾та́йными꙾[[та́йнами]] слꙋ́жбами, и҆ твоѐ бл҃гоꙋтро́бїе вы́нꙋ велича́емъ. Є҆́й, влⷣко гдⷭ҇и бж҃е на́шъ, ᲂу҆пова́нїе всѣ́хъ концє́въ землѝ, ᲂу҆слы́ши на́съ грѣ́шныхъ молѧ́щихсѧ тебѣ̀: и҆ низпослѝ прест҃а́го твоего̀ и҆ покланѧ́емаго и҆ всеси́льнаго дх҃а, и҆ ѡ҆ст҃ѝ хра́мъ се́й, и҆ же́ртвенникъ се́й [и҆ же́ртвенники сїѧ̑] и҆спо́лни є҆го̀ [ѧ҆̀] свѣ́та прⷭ҇носꙋ́щнагѡ, и҆зберѝ є҆го̀ [ѧ҆̀] въ жили́ще твоѐ: сотворѝ є҆го̀ [ѧ҆̀] мѣ́сто селе́нїѧ сла́вы твоеѧ̀: ᲂу҆красѝ є҆го̀ [ѧ҆̀] бж҃е́ственными твои́ми и҆ премі́рными дарова́ньми: ᲂу҆ста́ви є҆го̀ [ѧ҆̀] приста́нище ѡ҆бꙋрева́емыхъ, врачевство̀ страсте́й, прибѣ́жище немощны́хъ, бѣсѡ́въ прогоне́нїе: во є҆́же бы́ти ѻ҆чеса́мъ твои̑мъ ѿвє́рстымъ на́нь [на ни́хъ] де́нь и҆ но́щь, и҆ ᲂу҆шеса́мъ твои̑мъ вне́млющымъ въ мл҃твꙋ, со стра́хомъ твои́мъ и҆ бл҃гоговѣ́инствомъ въ него̀ приходѧ́щихъ [къ ни̑мъ приходѧ́щихъ], и҆ призыва́ющихъ всечⷭ҇тно́е и҆ покланѧ́емое и҆́мѧ твоѐ: да є҆ли̑ка воспро́сѧтъ ᲂу҆ тебѐ, и҆ ты̀ ᲂу҆слы́шиши на нб҃сѝ горѣ̀, и҆ сотвори́ши млⷭ҇ть, и҆ млⷭ҇тивъ бꙋ́деши: сохранѝ є҆го̀ да́же до сконча́нїѧ вѣ́ка непоколеби́ма, и҆ и҆́же въ не́мъ же́ртвенникъ ст҃ы́й [же́ртвенники ст҃ы̑ѧ] ст҃ы́хъ покажѝ, си́лою и҆ дѣ́йствомъ ст҃а́гѡ твоегѡ̀ дх҃а, просла́ви є҆го̀ [ѧ҆̀] па́че є҆́же по зако́нꙋ ѡ҆чисти́лища: ꙗ҆́кѡ да ꙗ҆̀же на не́мъ [на ни́хъ] соверша́ємаѧ сщ҃еннодѣ̑йства во ст҃ы́й и҆ пренбⷭ҇ный, и҆ мы́сленный тво́й же́ртвенникъ достиза́ютъ, и҆ бл҃года́ть на́мъ твоегѡ̀ пречⷭ҇тагѡ прино́сѧтъ ѡ҆сѣне́нїѧ: дерза́емъ бо не на на́шихъ рꙋ́къ слꙋже́нїе, но на твою̀ неизрече́ннꙋю бл҃госты́ню.

И҆ по соверше́нїи мл҃твы воста́нетъ а҆рхїере́й, и҆ и҆́детъ во ѻ҆лта́рь ко ст҃ѣ́й трапе́зѣ, а҆ прѡтодїа́конъ внꙋ́трь ст҃а́гѡ ѻ҆лтарѧ̀ глаго́летъ[[Црⷭ҇каѧ врата̀ затвори́ти]]:

Застꙋпѝ, сп҃сѝ, поми́лꙋй, возста́ви и҆ сохранѝ на́съ, бж҃е, твое́ю бл҃года́тїю.

Сщ҃е́нницы: Гдⷭ҇и поми́лꙋй.

Ѡ҆ свы́шнемъ ми́рѣ, и҆ ѡ҆ сп҃се́нїи дꙋ́шъ на́шихъ, гдⷭ҇ꙋ помо́лимсѧ.

Ѡ҆ ми́рѣ всегѡ̀ мі́ра, бл҃гостоѧ́нїи ст҃ы́хъ бж҃їихъ:

Ѡ҆ ст҃ѣ́йшемъ прави́тельствꙋющемъ сѷно́дѣ, и҆ ѡ҆ преѡсвѧще́ннѣйшемъ є҆пі́скопѣ на́шемъ и҆́мⷬ҇къ, и҆ дѣ́лѣхъ рꙋкꙋ̑ є҆гѡ̀, и҆ и҆̀же съ ни́мъ сщ҃е́нницѣхъ и҆ дїа́конѣхъ, гдⷭ҇ꙋ помо́лимсѧ.

Ѡ҆ є҆́же ѡ҆ст҃и́тисѧ хра́мꙋ семꙋ̀, и҆ и҆́же въ не́мъ же́ртвенникꙋ семꙋ̀, [же́ртвенникѡмъ си̑мъ] прише́ствїемъ и҆ си́лою ст҃а́гѡ дх҃а, гдⷭ҇ꙋ помо́лимсѧ.

Ѡ҆ бл҃гочести́вѣйшемъ, самодержа́внѣйшемъ, вели́комъ гдⷭ҇рѣ на́шемъ і҆мпера́торѣ нїкола́ѣ а҆леѯа́ндровичѣ всеѧ̀ рѡссі́и: ѡ҆ сꙋпрꙋ́гѣ є҆гѡ̀, бл҃гочести́вѣйшей гдⷭ҇рнѣ і҆мператрі́цѣ а҆леѯа́ндрѣ ѳео́дѡровнѣ: ѡ҆ ма́тери є҆гѡ̀, бл҃гочести́вѣйшей гдⷭ҇рнѣ і҆мператрі́цѣ марі́и ѳео́дѡровнѣ: ѡ҆ наслѣ́дникѣ є҆гѡ̀, бл҃говѣ́рномъ гдⷭ҇рѣ, цесаре́вичѣ и҆ вели́комъ кн҃зѣ, а҆леѯі́и нїкола́евичѣ, и҆ ѡ҆ все́мъ ца́рствꙋющемъ до́мѣ: ѡ҆ все́й пала́тѣ и҆ во́инствѣ и҆́хъ, гдⷭ҇ꙋ помо́лимсѧ.

Ѡ҆ гра́дѣ се́мъ, и҆ всѧ́комъ гра́дѣ:

Ѡ҆ и҆зба́витисѧ на́мъ:

Прест҃ꙋ́ю, пречⷭ҇тꙋю, пребл҃гослове́ннꙋю, сла́внꙋю влⷣчцꙋ на́шꙋ бцⷣꙋ, и҆ приснодв҃ꙋ мр҃і́ю, [и҆ ст҃а́го, є҆гѡ́же є҆́сть ѡ҆сщ҃а́емый хра́мъ] со всѣ́ми ст҃ы́ми помѧнꙋ́вше, са́ми себѐ, и҆ дрꙋ́гъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.

Возгла́съ: Ꙗ҆́кѡ ст҃ъ є҆сѝ бж҃е на́шъ, и҆́же на пострада́вшихъ по тебѣ̀ чⷭ҇тны́хъ мч҃нцѣхъ почива́еши, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.

Сщ҃е́нницы: А҆ми́нь.

Та́же прино́ситсѧ возлива́льникъ съ те́плою водо́ю, и҆ вїно̀ кра́сное, и҆ ро́зоваѧ вода̀.

Прѡтодїа́конъ глаго́летъ: Гдⷭ҇ꙋ помо́лимсѧ.

А҆рхїере́й, преклони́въ главꙋ̀, глаго́летъ мл҃твꙋ сїю̀ над̾ вода́ми и҆ вїно́мъ та́йнѡ:

Гдⷭ҇и бж҃е на́шъ, ѡ҆ст҃и́вый стрꙋи̑ і҆ѻрда̑нскїѧ сп҃си́тельнымъ твои́мъ ꙗ҆вле́нїемъ: са́мъ и҆ ны́нѣ низпослѝ бл҃года́ть ст҃а́гѡ твоегѡ̀ дх҃а, и҆ бл҃гословѝ во́ды сїѧ̑ и҆ вїно̀ ко ѡ҆сщ҃е́нїю и҆ соверше́нїю же́ртвенника твоегѡ̀ сегѡ̀ [же́ртвенникѡвъ твои́хъ си́хъ]: ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь.

И҆ по мл҃твѣ возлива́етъ на трапе́зꙋ три́жды ѿ те́плыѧ воды̀, глаго́лѧ:

Во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь.

А҆ вїно̀ кра́сное съ ро́зовою водо́ю смѣ́шиваетсѧ во є҆ди́номъ сосꙋ́дѣ.

Та́же ключа́рь прино́ситъ четы́ре пла̑та. А҆рхїере́й же принѧ́въ є҆ди́нъ пла́тъ, про́чыѧ бл҃гословлѧ́етъ прїѧ́ти сослꙋжа́щымъ, и҆ ѡ҆тира́ютъ и҆́ми трапе́зꙋ.

Внегда́ же сїѧ̑ соверша́ютсѧ, глаго́летсѧ ѱало́мъ п҃г:

Ко́ль возлю́блєнна селє́нїѧ твоѧ̑, гдⷭ҇и си́лъ! Жела́етъ и҆ скончава́етсѧ дꙋша̀ моѧ̀ во дворы̀ гдⷭ҇ни: се́рдце моѐ и҆ пло́ть моѧ̀ возра́довастасѧ ѡ҆ бз҃ѣ жи́вѣ. И҆́бо пти́ца ѡ҆брѣ́те себѣ̀ хра́минꙋ, и҆ го́рлица гнѣздо̀ себѣ̀, и҆дѣ́же положи́тъ птенцы̀ своѧ̑: ѻ҆лтарѝ твоѧ̑, гдⷭ҇и си́лъ, цр҃ю̀ мо́й и҆ бж҃е мо́й. Бл҃же́ни живꙋ́щїи въ домꙋ̀ твое́мъ: въ вѣ́ки вѣкѡ́въ восхва́лѧтъ тѧ̀. Бл҃же́нъ мꙋ́жъ, є҆мꙋ́же є҆́сть застꙋпле́нїе є҆гѡ̀ ᲂу҆ тебѐ: восхождє́нїѧ въ се́рдцѣ свое́мъ положѝ. Во ю҆до́ль плаче́внꙋю, въ мѣ́сто, є҆́же положѝ: и҆́бо бл҃гослове́нїе да́стъ законополага́ѧй. По́йдꙋтъ ѿ си́лы въ си́лꙋ, ꙗ҆ви́тсѧ бг҃ъ богѡ́въ въ сїѡ́нѣ. Гдⷭ҇и бж҃е си́лъ, ᲂу҆слы́ши мл҃твꙋ мою̀, внꙋшѝ бж҃е і҆а́кѡвль. Защи́тниче на́шъ ви́ждь бж҃е, и҆ при́зри на лицѐ хрⷭ҇та̀ твоегѡ̀. Ꙗ҆́кѡ лꙋ́чше де́нь є҆ди́нъ во дво́рѣхъ твои́хъ, па́че ты́сѧщъ: и҆зво́лихъ примета́тисѧ въ домꙋ̀ бг҃а моегѡ̀ па́че, не́же жи́ти мѝ въ селе́нїихъ грѣ́шничихъ. Ꙗ҆́кѡ млⷭ҇ть и҆ и҆́стинꙋ лю́битъ гдⷭ҇ь, бг҃ъ бл҃года́ть и҆ сла́вꙋ да́стъ, гдⷭ҇ь не лиши́тъ бл҃ги́хъ, ходѧ́щихъ неѕло́бїемъ. Гдⷭ҇и бж҃е си́лъ, бл҃же́нъ человѣ́къ ᲂу҆пова́ѧй на тѧ̀.

И҆ по соверше́нномъ ѡ҆мове́нїи трапе́зномъ и҆ ѡ҆тира́нїи, глаго́летъ а҆рхїере́й:

Сла́ва бг҃ꙋ на́шемꙋ во вѣ́ки вѣкѡ́въ.

Сщ҃е́нницы: А҆ми́нь.

Прїе́млетъ а҆рхїере́й ᲂу҆ ключарѧ̀ вїно̀ кра́сное, съ водо́ю ро́зовою смѣ́шенное, и҆ возлива́етъ на трапе́зꙋ три́жды, крⷭ҇тови́днѡ, дово́льнѡ, и҆ напаѧ́ютъ трапе́зꙋ, растира́юще рꙋка́ми: и҆ кропи́тъ а҆рхїере́й тѣ́мъ же смѣше́нїемъ ѡ҆сщ҃а́ємыѧ а҆нтїми́нсы про́чыѧ. Є҆гда́ же сїѐ дѣ́етсѧ, глаго́летъ на всѧ́комъ кропле́нїи:

Ѡ҆кропи́ши мѧ̀ ѵ҆ссѡ́помъ, и҆ ѡ҆чи́щꙋсѧ: ѡ҆мы́еши мѧ̀, и҆ па́че снѣ́га ᲂу҆бѣлю́сѧ.

А҆ по ѡ҆кропле́нїи престо́ла и҆ а҆нтїми́нсѡвъ присовокꙋплѧ́етъ и҆ послѣ́дꙋющее:

Слꙋ́хꙋ моемꙋ̀ да́си ра́дость и҆ весе́лїе, возра́дꙋютсѧ кѡ́сти смирє́нныѧ. Ѿвратѝ лицѐ твоѐ ѿ грѣ̑хъ мои́хъ, и҆ всѧ̑ беззакѡ́нїѧ моѧ̑ ѡ҆чи́сти. Се́рдце чи́сто сози́жди во мнѣ̀ бж҃е, и҆ дх҃ъ пра́въ ѡ҆бновѝ во ᲂу҆тро́бѣ мое́й. Не ѿве́ржи менѐ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менѐ. Возда́ждь мѝ ра́дость сп҃се́нїѧ твоегѡ̀, и҆ дх҃омъ влⷣчнимъ ᲂу҆тверди́ мѧ. Наꙋчꙋ̀ беззакѡ́нныѧ пꙋтє́мъ твои̑мъ, и҆ нечести́вїи къ тебѣ̀ ѡ҆братѧ́тсѧ. И҆зба́ви мѧ̀ ѿ крове́й бж҃е, бж҃е сп҃се́нїѧ моегѡ̀: возра́дꙋетсѧ ѧ҆зы́къ мо́й пра́вдѣ твое́й. Гдⷭ҇и, ᲂу҆стнѣ̀ моѝ ѿве́рзеши, и҆ ᲂу҆ста̀ моѧ̑ возвѣстѧ́тъ хвалꙋ̀ твою̀. Ꙗ҆́кѡ а҆́ще бы восхотѣ́лъ є҆сѝ же́ртвы, да́лъ бы́хъ ᲂу҆́бѡ: всесожже́нїѧ не бл҃говоли́ши. Же́ртва бг҃ꙋ дꙋ́хъ сокрꙋше́нъ: се́рдце сокрꙋше́нно и҆ смире́нно бг҃ъ не ᲂу҆ничижи́тъ. Оу҆бл҃жѝ гдⷭ҇и бл҃говоле́нїемъ твои́мъ сїѡ́на, и҆ да сози́ждꙋтсѧ стѣ́ны і҆ерⷭ҇ли̑мскїѧ. Тогда̀ бл҃говоли́ши же́ртвꙋ пра́вды, возноше́нїе и҆ всесожега́ємаѧ: тогда̀ возложа́тъ на ѻ҆лта́рь тво́й тельцы̀.

Пото́мъ ключа́рь прино́ситъ гꙋ̑бы. А҆рхїере́й прїе́млетъ є҆ди́нꙋ гꙋ́бꙋ, а҆ про́чыѧ дрꙋгі́и сослꙋжа́щїи: и҆ ѡ҆тира́ютъ гꙋ́бами трапе́зꙋ. Пото́мъ полага́етсѧ а҆нтїми́нсъ [и҆лѝ а҆нтїми́нсы] на трапе́зꙋ горѣ̀.

Та́же глаго́летъ а҆рхїере́й:

Бл҃гослове́нъ бг҃ъ на́шъ, всегда̀, ны́нѣ и҆ при́снѡ, и҆ во вѣ́ки вѣкѡ́въ.

Сщ҃е́нницы: А҆ми́нь.

Пото́мъ прино́ситъ ключа́рь ст҃о́е мѵ́ро. А҆рхїере́й, принѧ́въ стрꙋче́цъ, помазꙋ́етъ на трапе́зѣ крⷭ҇тоѡбра́знѡ. Прѡтодїа́конꙋ глаго́лющꙋ къ прⷭ҇то́лꙋ и҆ ко [всѧ́комꙋ] а҆нтїми́нсꙋ: Во́нмемъ: А҆рхїере́й твори́тъ на трапе́зѣ трѝ крⷭ҇ты̀, є҆ди́нъ средѝ, а҆ два̀ по ѻ҆бою̀ странꙋ̑ ма́лѡ пони́же, глаго́лѧ: А҆ллилꙋ́їа: по три́жды. Помазꙋ́етъ же и҆ на столпѣ́хъ престо́льныхъ съ двꙋ̀ стра́нъ, и҆ на средѣ̀, и҆ на ре́брѣхъ. Посе́мъ сщ҃е́нницы прїе́млютъ а҆нтїми́нсъ [а҆нтїми́нсы] и҆ полага́ютъ и҆̀ [ѧ҆̀] на престо́лѣ, є҆ди́нъ по є҆ди́номꙋ, ни́же крⷭ҇тѡ́въ, и҆дѣ́же назна́менаны ст҃ы́мъ мѵ́ромъ, длѧ тогѡ̀, что́бъ тѣ̀ крⷭ҇ты̀ не сотре́нны бы́ли. А҆рхїере́й твори́тъ трѝ крⷭ҇ты̀ на всѧ́комъ а҆нтїми́нсѣ мѵ́ромъ, ꙗ҆́коже и҆ на престо́лѣ. Є҆гда́ же сїѐ соверши́тсѧ, глаго́летсѧ ѱало́мъ рл҃в:

Сѐ что̀ добро̀, и҆лѝ что̀ красно̀, но є҆́же жи́ти бра́тїи вкꙋ́пѣ; Ꙗ҆́кѡ мѵ́ро на главѣ̀, сходѧ́щее на брадꙋ̀, брадꙋ̀ а҆арѡ́ню, сходѧ́щее на ѻ҆ме́ты ѻ҆де́жды є҆гѡ̀: ꙗ҆́кѡ роса̀ а҆ермѡ́нскаѧ, сходѧ́щаѧ на го́ры сїѡ́нскїѧ. ꙗ҆́кѡ та́мѡ заповѣ́да гдⷭ҇ь бл҃гослове́нїе и҆ живо́тъ до вѣ́ка.

Та́же а҆рхїере́й глаго́летъ: Сла́ва тебѣ̀ ст҃а́ѧ трⷪ҇це, бж҃е на́шъ, во вѣ́ки вѣкѡ́въ.

Сщ҃е́нницы: А҆ми́нь.

И҆ ѿлага́етсѧ а҆нтїми́нсъ [а҆нтїми́нсы] на блю́до. Посе́мъ сщ҃е́нницы прино́сѧтъ срачи́цꙋ: а҆рхїере́й кропи́тъ ст҃о́ю водо́ю внꙋ́трь и҆ внѣ̀, и҆ надѣва́ютъ на трапе́зꙋ. Пото́мъ прино́ситсѧ ве́рвь. А҆рхїере́й кропи́тъ ве́рвь, и҆ ѡ҆бѧзꙋ́етъ прⷭ҇то́лъ, ѡ҆бѧзꙋ́етсѧ же си́це:

Ѿ пра́выѧ страны̀, ᲂу҆ пе́рвагѡ столпа̀ а҆рхїере́й де́ржитъ коне́цъ ве́рви, и҆ и҆́дꙋтъ по ве́рви крꙋго́мъ до втора́гѡ столпа̀ къ восто́кꙋ: ѿ втора́гѡ же столпа̀ сно́ситсѧ на ни́зъ къ тре́тїемꙋ столпꙋ̀, и҆ и҆́детъ по ни́зꙋ до четве́ртагѡ столпа̀, и҆ па́ки возно́ситсѧ къ пе́рвомꙋ столпꙋ̀ сопредѝ, и҆ свѧзꙋ́етсѧ съ конце́мъ, и҆дѣ́же а҆рхїере́й держи́тъ: и҆ па́ки сно́ситсѧ вни́зъ ко второ́мꙋ столпꙋ̀, и҆ и҆́детъ ни́зомъ до тре́тїѧгѡ столпа̀, взно́ситсѧ въ ве́рхъ къ четве́ртомꙋ столпꙋ̀, ѿ четве́ртагѡ же столпа̀ сно́ситсѧ вни́зъ къ пе́рвомꙋ столпꙋ̀, и҆ та́кѡ бꙋ́детъ крⷭ҇тъ сопредѝ. Ѿ пе́рвагѡ же столпа̀ по ни́зꙋ и҆́детъ крꙋго́мъ до втора́гѡ столпа̀, ѿ втора́гѡ же столпа̀ взно́ситъ въ ве́рхъ къ тре́тїемꙋ столпꙋ̀, и҆ та́кѡ бꙋ́детъ крⷭ҇тъ къ восто́кꙋ. Ѿ тре́тїѧгѡ же столпа̀ сно́ситъ на ни́зъ къ четве́ртомꙋ столпꙋ̀, и҆ та́кѡ бꙋ́детъ крⷭ҇тъ на сѣ́вернѣй странѣ̀: ѿ четве́ртагѡ же столпа̀, и҆́детъ по ни́зꙋ крⷭ҇то́мъ до пе́рвагѡ столпа̀. Ѿ пе́рвагѡ же столпа̀ сни́зꙋ и҆́детъ въ ве́рхъ ко второ́мꙋ столпꙋ̀: и҆ та́кѡ бꙋ́детъ крⷭ҇тъ на ю҆́жной странѣ̀. и҆ ѡ҆бхо́дитъ крꙋго́мъ, что́бъ бы́ло трѝ ве́рви по ве́рхꙋ, вторы́й же коне́цъ ве́рви свѧзꙋ́етсѧ съ пе́рвымъ конце́мъ ᲂу҆ пе́рвагѡ столпа̀.

Є҆гда́ же сїѧ̑ соверша́ютсѧ, то́ є҆сть, ѡ҆дѣва́етсѧ трапе́за срачи́цею, и҆ ѡ҆поѧсꙋ́етсѧ ве́рвїю, глаго́летсѧ є҆ди́ножды, два́жды и҆ три́жды

ѱало́мъ рл҃а:

Помѧнѝ гдⷭ҇и дв҃да, и҆ всю̀ кро́тость є҆гѡ̀. Ꙗ҆́кѡ клѧ́тсѧ гдⷭ҇еви, ѡ҆бѣща́сѧ бг҃ꙋ і҆а́кѡвлю: А҆́ще вни́дꙋ въ селе́нїе до́мꙋ моегѡ̀, и҆лѝ взы́дꙋ на ѻ҆́дръ посте́ли моеѧ̀: А҆́ще да́мъ со́нъ ѻ҆чи́ма мои́ма, и҆ вѣ́ждома мои́ма дрема́нїе, и҆ поко́й скранїа́ма мои́ма, до́ндеже ѡ҆брѧ́щꙋ мѣ́сто гдⷭ҇еви, селе́нїе бг҃ꙋ і҆а́кѡвлю. Сѐ слы́шахомъ ѧ҆̀ во є҆ѵфра́ѳѣ, ѡ҆брѣто́хомъ ѧ҆̀ въ полѧ́хъ дꙋбра́вы: Вни́демъ въ селє́нїѧ є҆гѡ̀, поклони́мсѧ на мѣ́сто, и҆дѣ́же стоѧ́стѣ но́зѣ є҆гѡ̀. Воскрⷭ҇нѝ гдⷭ҇и въ поко́й тво́й, ты̀ и҆ кївѡ́тъ ст҃ы́ни твоеѧ̀. Сщ҃е́нницы твоѝ ѡ҆блекꙋ́тсѧ пра́вдою, и҆ прпⷣбнїи твоѝ возра́дꙋютсѧ. Дв҃да ра́ди раба̀ твоегѡ̀, не ѿвратѝ лицѐ пома́заннагѡ твоегѡ̀. Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀: ѿ плода̀ чре́ва твоегѡ̀ посаждꙋ̀ на прⷭ҇то́лѣ твое́мъ. А҆́ще сохранѧ́тъ сы́нове твоѝ завѣ́тъ мо́й, и҆ свидѣ̑нїѧ моѧ̑ сїѧ̑, и҆̀мже наꙋчꙋ̀ ѧ҆̀, и҆ сы́нове и҆́хъ до вѣ́ка сѧ́дꙋтъ на прⷭ҇то́лѣ твое́мъ. Ꙗ҆́кѡ и҆збра̀ гдⷭ҇ь сїѡ́на, и҆зво́ли и҆̀ въ жили́ще себѣ̀. Се́й поко́й мо́й во вѣ́къ вѣ́ка, здѣ̀ вселю́сѧ, ꙗ҆́кѡ и҆зво́лихъ и҆̀: Лови́твꙋ є҆гѡ̀ бл҃гословлѧ́ѧй бл҃гословлю̀, ни́щыѧ є҆гѡ̀ насыщꙋ̀ хлѣ́бы, Сщ҃е́нники є҆гѡ̀ ѡ҆блекꙋ̀ во сп҃се́нїе, и҆ прпⷣбнїи є҆гѡ̀ ра́достїю возра́дꙋютсѧ. Та́мѡ возращꙋ̀ ро́гъ дв҃дови, ᲂу҆гото́вахъ свѣти́льникъ пома́занномꙋ моемꙋ̀. Врагѝ є҆гѡ̀ ѡ҆блекꙋ̀ стꙋдо́мъ, на не́мже процвѣте́тъ ст҃ы́нѧ моѧ̀.

По соверше́нїи же глаго́летъ а҆рхїере́й:

Сла́ва бг҃ꙋ на́шемꙋ, во вѣ́ки вѣкѡ́въ.

Пото́мъ прино́сѧтъ сщ҃е́нницы і҆нди́тїю, сі́есть, ве́рхнее ѡ҆дѣѧ́нїе.

А҆рхїере́й кропи́тъ ст҃о́ю водо́ю внꙋ́трь и҆ внѣ̀, и҆ ѡ҆дѣва́ютъ є҆́ю ст҃ы́й престо́лъ, и҆ полага́ютъ і҆лїто́нъ, а҆ на і҆лїто́нѣ а҆нтїми́нсъ [а҆нтїми́нсы] и҆ ст҃о́е є҆ѵⷢ҇лїе на прⷭ҇то́лѣ, и҆ чⷭ҇тны́й крⷭ҇тъ, и҆ покрыва́ютсѧ пелено́ю: всѧ̑ же сїѧ̑ кропѧ́тсѧ ст҃о́ю водо́ю.

Си̑мъ же соверши́вшымсѧ, глаго́летсѧ ѱало́мъ ч҃в:

Гдⷭ҇ь воцр҃и́сѧ, въ лѣ́потꙋ ѡ҆блече́сѧ: ѡ҆блече́сѧ гдⷭ҇ь въ си́лꙋ, и҆ препоѧ́сасѧ: и҆́бо ᲂу҆твердѝ вселе́ннꙋю, ꙗ҆́же не подви́житсѧ. Гото́въ прⷭ҇то́лъ тво́й ѿто́лѣ: ѿ вѣ́ка ты̀ є҆сѝ. Воздвиго́ша рѣ́ки гдⷭ҇и, воздвиго́ша рѣ́ки гла́сы своѧ̑: Во́змꙋтъ рѣ́ки сотрє́нїѧ своѧ̑ ѿ гласѡ́въ во́дъ мно́гихъ. Ди́вны высоты̑ морскі̑ѧ, ди́венъ въ высо́кихъ гдⷭ҇ь. Свидѣ̑нїѧ твоѧ̑ ᲂу҆вѣ́ришасѧ ѕѣлѡ̀: до́мꙋ твоемꙋ̀ подоба́етъ ст҃ы́нѧ гдⷭ҇и, въ долготꙋ̀ дні́й.

По ѱалмѣ̀ глаго́летъ а҆рхїере́й:

Бл҃гослове́нъ бг҃ъ на́шъ:

Та́же повели́тъ а҆рхїере́й нача́льствꙋющемꙋ и҆з̾ сослꙋжа́щихъ ᲂу҆краша́ти предложе́нїе со ѡ҆кропле́нїемъ ст҃ы́ѧ воды̀, [и҆ поставлѧ́ютсѧ сосꙋ́ды, и҆ покро́вы, и҆ пелено́ю покрыва́ютсѧ.] ничто́же глаго́лѧ, то́кмѡ водо́ю ст҃о́ю кропѧ̀. Посе́мъ снима́етсѧ со а҆рхїере́а за́понъ, а҆ прѡтодїа́конъ прино́ситъ а҆рхїере́ю кади́ло[[Црⷭ҇каѧ врата̀ ѿве́рсти]]. А҆рхїере́й же кади́тъ крⷭ҇то́мъ прⷭ҇то́лъ и҆ же́ртвенникъ и҆ ве́сь ѻ҆лта́рь: а҆ прѡтодїа́конъ предхо́дитъ со свѣще́ю, и҆ глаго́летсѧ

ѱало́мъ к҃є:

Сꙋди́ ми гдⷭ҇и, ꙗ҆́кѡ а҆́зъ неѕло́бою мое́ю ходи́хъ: и҆ на гдⷭ҇а ᲂу҆пова́ѧ не и҆знемогꙋ̀: И҆скꙋси́ мѧ гдⷭ҇и, и҆ и҆спыта́й мѧ̀, разжзѝ ᲂу҆трѡ́бы моѧ̑ и҆ се́рдце моѐ: Ꙗ҆́кѡ млⷭ҇ть твоѧ̀ пред̾ ѻ҆чи́ма мои́ма є҆́сть, и҆ бл҃гоꙋгоди́хъ во и҆́стинѣ твое́й. Не сѣдо́хъ съ со́нмомъ сꙋ́етнымъ, и҆ со законопрестꙋ́пными не вни́дꙋ. Возненави́дѣхъ це́рковь лꙋка́внꙋющихъ, и҆ съ нечести́выми не сѧ́дꙋ. Оу҆мы́ю въ непови́нныхъ рꙋ́цѣ моѝ, и҆ ѡ҆бы́дꙋ же́ртвенникъ тво́й гдⷭ҇и: Є҆́же ᲂу҆слы́шати мѝ гла́съ хвалы̀ твоеѧ̀, и҆ повѣ́дати всѧ̑ чꙋдеса̀ твоѧ̑. Гдⷭ҇и, возлюби́хъ бл҃голѣ́пїе до́мꙋ твоегѡ̀, и҆ мѣ́сто селе́нїѧ сла́вы твоеѧ̀. Да не погꙋби́ши съ нечести́выми дꙋ́шꙋ мою̀, и҆ съ мꙋ̑жи крове́й живо́тъ мо́й: И҆́хже въ рꙋкꙋ̀ беззакѡ́нїѧ, десни́ца и҆́хъ и҆спо́лнисѧ мзды̀. А҆́зъ же неѕло́бою мое́ю ходи́хъ, и҆зба́ви мѧ̀ гдⷭ҇и, и҆ поми́лꙋй мѧ̀. Нога̀ моѧ̀ ста̀ на правотѣ̀: въ цр҃квахъ бл҃гословлю́ тѧ гдⷭ҇и.

Мно́гажды, до́ндеже ѡ҆кади́тъ ѻ҆лта́рь и҆ всю̀ цр҃ковь по ѻ҆бы́чаю.

Внегда́ же а҆рхїере́й кади́тъ, послѣ́дꙋютъ по не́мъ дво́е а҆рхїмандрі́тѡвъ, и҆лѝ и҆гꙋ́менѡвъ, и҆лѝ сщ҃е́нникѡвъ: є҆ди́нъ кропи́тъ стѣ́ны ст҃о́ю водо́ю, а҆ вторы́й держѧ̀ сосꙋ́дъ мѵ́ра, помазꙋ́етъ стрꙋчце́мъ, ѡ҆бмочѧ̀ въ мѵ́ро, крⷭ҇тоѡбра́знѡ, пе́рвѣе во ѻ҆лтарѣ̀ над̾ го́рнимъ мѣ́стомъ над̾ ѻ҆кно́мъ: та́же над̾ цр҃ко́вными враты̀, ꙗ҆̀же къ за́падꙋ цр҃кве: та́же на ю҆́жной странѣ̀, и҆ на сѣ́верной над̾ две́рьми, и҆лѝ над̾ ѻ҆кно́мъ на стѣна́хъ, а҆́ще же высо́кѡ, приставлѧ́етсѧ лѣ́ствица.

Соверши́вшꙋ же сѧ кажде́нїю и҆ ѱалмꙋ̀, и҆́детъ а҆рхїере́й во ѻ҆лта́рь и҆ глаго́летъ:

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

И҆ прїе́млетъ прѡтодїа́конъ кади́ло, и҆ кади́тъ а҆рхїере́а три́жды.

Пото́мъ глаго́летъ є҆ктенїю̀ ма́лꙋю: Па́ки и҆ па́ки: пред̾ прⷭ҇то́ломъ, по лѣ́вꙋю странꙋ̀ а҆рхїере́а.

Возгла́са же а҆рхїере́й не глаго́летъ, но прѡтодїа́конъ: Гдⷭ҇ꙋ помо́лимсѧ. и҆ снима́етсѧ мі́тра. А҆рхїере́й же пред̾ ст҃ы́мъ прⷭ҇то́ломъ глаго́летъ мл҃твꙋ велегла́снѡ:

Гдⷭ҇и нб҃сѐ и҆ землѝ, и҆́же ст҃ꙋ́ю твою̀ цр҃ковь неизрече́нною премꙋ́дростїю ѡ҆снова́вый, и҆ во ѡ҆́бразъ а҆́гг҃льскагѡ на нб҃сѝ слꙋже́нїѧ, свѧще́нничества чи́нъ на землѝ соста́вивый: ты̀ влⷣко великода́рне, прїимѝ и҆ ны́нѣ молѧ́щихсѧ на́съ, не ꙗ҆́кѡ досто́йныхъ сꙋ́щихъ ѡ҆ толи́кихъ проси́ти, но да превосхо́дство пока́жетсѧ твоеѧ̀ бл҃гости: не бо̀ преста́лъ є҆сѝ человѣ́ческомꙋ ро́дꙋ многоѡбра́знѣ бл҃годѣ́ѧ. Глави́знꙋ же на́мъ дарова́лъ є҆сѝ бл҃годѣѧ́нїй, є҆́же во пло́ти є҆диноро́днагѡ твоегѡ̀ сн҃а прише́ствїе, и҆́же на землѝ ꙗ҆́вльсѧ, и҆ возсїѧ́въ сꙋ́щымъ во тьмѣ̀ свѣ́тъ сп҃се́нїѧ, принесѐ себѐ ѡ҆ на́съ же́ртвꙋ, и҆ бы́сть мі́рови всемꙋ̀ ѡ҆чисти́лище, ѻ҆́бщники на́съ своегѡ̀ воскрⷭ҇нїѧ сотвори́въ: и҆ вознесы́йсѧ на нб҃са̀, ѡ҆блечѐ своѧ̑ ᲂу҆ченикѝ и҆ а҆пⷭ҇лы, ꙗ҆́коже ѡ҆бѣща́сѧ, си́лою свы́ше, ꙗ҆́же є҆́сть дх҃ъ ст҃ы́й, покланѧ́емый и҆ всеси́льный, и҆́же ѿ тебѐ бг҃а и҆ ѻ҆ц҃а̀ и҆сходѧ́щъ: и҆́мже бы́вше си́льнїи дѣ́ломъ и҆ сло́вомъ, кр҃ще́нїе преда́ша сн҃оположе́нїѧ: цр҃кви воздвиго́ша, ᲂу҆тверди́ша же́ртвенники, сщ҃е́нства положи́ша пра̑вила и҆ зако́ны, и҆́хже мы̀ грѣ́шнїи держа́ще преда́нїе, припа́даемъ тѝ вѣ́чномꙋ бг҃ꙋ, и҆ мо́лимсѧ тѝ бл҃гоꙋтро́бне: къ твоемꙋ̀ пѣснопѣ́нїю созда́нный се́й хра́мъ, бж҃е́ственныѧ твоеѧ̀ и҆спо́лни сла́вы, и҆ въ не́мъ воздви́женный же́ртвенникъ ст҃ы́й [и҆ предложє́нныѧ же́ртвенники ст҃ы̑ѧ] ст҃ы́хъ покажѝ: ꙗ҆́кѡ на́мъ предстоѧ́щымъ є҆мꙋ̀ [и҆̀мъ] ꙗ҆́кѡ стра́шномꙋ црⷭ҇твїѧ твоегѡ̀ прⷭ҇то́лꙋ, неѡсꙋжде́ннѡ слꙋжи́ти тебѣ̀, мольбы̑ ѡ҆ на́съ и҆ ѡ҆ лю́дехъ всѣ́хъ возпосыла́ющымъ, и҆ безкро́внꙋю же́ртвꙋ твое́й приносѧ́щымъ бл҃гости, ѡ҆ во́льныхъ и҆ нево́льныхъ грѣсѣ́хъ въ проще́нїе, во ᲂу҆правле́нїе житїѧ̀, во и҆справле́нїе бл҃га́гѡ жи́тельства, во и҆сполне́нїе всѧ́кїѧ пра́вды.

Ꙗ҆́кѡ бл҃гослови́сѧ твоѐ прест҃о́е и҆́мѧ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ.

Сщ҃е́нницы: А҆ми́нь.

А҆рхїере́й же глаго́летъ: Ми́ръ всѣ̑мъ.

Прѡтодїа́конъ: Главы̑ ва́шѧ гдⷭ҇еви приклони́те.

А҆рхїере́й глаго́летъ мл҃твꙋ та́йнѡ:

Бл҃годари́мъ тѧ̀ гдⷭ҇и бж҃е си́лъ, ꙗ҆́кѡ ю҆́же и҆злїѧ́лъ є҆сѝ бл҃года́ть на ст҃ы̑ѧ твоѧ̑ а҆пⷭ҇лы, и҆ на прпⷣбныѧ на́ши ѻ҆тцы̀, сподо́билъ є҆сѝ мно́гагѡ ра́ди твоегѡ̀ чл҃вѣколю́бїѧ, и҆ да́же до на́съ грѣ́шныхъ и҆ непотре́бныхъ ра̑бъ твои́хъ ѻ҆́нꙋю простре́ти: и҆ мо́лимсѧ тебѣ̀, влⷣко многомлⷭ҇тиве, и҆спо́лни сла́вы, и҆ ст҃ы́ни, и҆ бл҃года́ти же́ртвенникъ се́й [же́ртвенники сїѧ̑] ꙗ҆́коже претворѧ́тисѧ, ꙗ҆̀же на не́мъ [на ни́хъ] приноси̑мымъ тебѣ̀ безкрѡ́внымъ же́ртвамъ, въ пречⷭ҇тое тѣ́ло, и҆ чⷭ҇тнꙋ́ю кро́вь є҆диноро́днагѡ твоегѡ̀ сн҃а и҆ гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀, ко сп҃се́нїю всѣ́хъ люде́й твои́хъ, и҆ на́шегѡ недосто́инства.

Возгла́съ: Ты́ бо є҆сѝ бг҃ъ на́шъ, бг҃ъ ми́ловати и҆ сп҃са́ти, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ, и҆ при́снѡ, и҆ во вѣ́ки вѣкѡ́въ.

Сщ҃е́нницы: А҆ми́нь.

По соверше́нїи сегѡ̀ прино́ситсѧ а҆рхїере́ю свѣ́щникъ съ невозжже́нною но́вою свѣще́ю[[Зрѝ. До сегѡ̀ ѡ҆сщ҃е́нїѧ вре́мени во ѻ҆лтарѝ свѣщѝ никаковы́ѧ не возжига́ти]], ю҆́же возже́гъ а҆рхїере́й свои́ми рꙋка́ми, поставлѧ́етъ на го́рнѣмъ мѣ́стѣ во́злѣ прⷭ҇то́ла. Посе́мъ ключа́рь ᲂу҆правлѧ́етъ, ка́кѡ и҆дтѝ по мѡ́щи въ и҆нꙋ́ю цр҃ковь со крⷭ҇ты̀: а҆рхїере́й же ѿдае́тъ є҆ѵⷢ҇лїе, и҆ крⷭ҇тъ сщ҃е́нникамъ, и҆ свѣщы̀ въ ѻ҆лтарѣ̀ раздае́тъ предстоѧ́щымъ, а҆ вы́шедъ и҆з̾ ѻ҆лтарѧ̀ на а҆мвѡ́нѣ мїрски̑мъ лю́демъ. Пото́мъ вхо́дитъ а҆рхїере́й въ ѻ҆лта́рь, а҆ и҆з̾ ѻ҆лтарѧ̀ пред̾идꙋ́щымъ сщ҃е́нникѡмъ, и҆́детъ а҆рхїере́й црⷭ҇кими враты̀ по мѡ́щи, прїѧ́въ по́сохъ ᲂу҆ црⷭ҇кихъ вра́тъ ᲂу҆ по́дьѧка, и҆ глаго́летъ:

Съ ми́ромъ и҆зы́демъ.

И҆ та́кѡ и҆́дꙋтъ по ст҃ы̑ѧ мо́щи по чи́нꙋ: напреди́ же и҆́дꙋтъ съ хорꙋ́гви и҆ со і҆кѡ́ны, ꙗ҆́коже ѻ҆бы́чай хо́дꙋ быва́ти со крⷭ҇ты̀. А҆рхїере́а же подде́ржатъ два̀ дїа̑кона. Сщ҃е́нники же и҆́дꙋтъ со є҆ѵⷢ҇лїемъ и҆ крⷭ҇то́мъ напредѝ а҆рхїере́а, а҆ прѡтодїа́конъ со дїа́кономъ кадѧ́тъ.

Пѣ́вчїе пою́тъ тропа́рь, гла́съ д҃:

И҆̀же во все́мъ мі́рѣ мч҃никъ твои́хъ, ꙗ҆́кѡ багрѧни́цею и҆ вѵ́ссомъ, кровьмѝ цр҃ковь твоѧ̀ ᲂу҆краси́вшисѧ, тѣ́ми вопїе́тъ тѝ хрⷭ҇тѐ бж҃е: лю́демъ твои̑мъ щедрѡ́ты твоѧ̑ низпослѝ, ми́ръ жи́тельствꙋ твоемꙋ̀ да́рꙋй, и҆ дꙋша́мъ на́шымъ ве́лїю млⷭ҇ть.

Сла́ва, и҆ ны́нѣ, гла́съ и҃:

Ꙗ҆́кѡ нача́тки є҆стества̀ насади́телю тва́ри, вселе́ннаѧ прино́ситъ тѝ гдⷭ҇и, бг҃онѡ́сныѧ мч҃нки: тѣ́хъ мл҃твами, въ ми́рѣ глꙋбо́цѣ цр҃ковь твою̀, жи́тельство твоѐ, бцⷣею соблюдѝ многомлⷭ҇тиве.

И҆ прише́дъ а҆рхїере́й во хра́мъ, и҆дѣ́же поста́влены мѡ́щи, вхо́дитъ въ ѻ҆лта́рь црⷭ҇кими враты̀, съ двꙋмѧ̀ предстоѧ́щими сослꙋжи́тели: по́сохъ же ѿдае́тъ ᲂу҆ црⷭ҇кихъ вра́тъ по́дьѧкꙋ, и҆ покланѧ́ютсѧ ст҃ы̑мъ мощє́мъ, и҆ ѡ҆сѣнѧ́етъ предстоѧ́щихъ тꙋ̀.

Прѡтодїа́конъ же глаго́летъ є҆ктенїю̀ ма́лꙋю: Па́ки и҆ па́ки: пред̾ црⷭ҇кими враты̀. Сщ҃е́нницы: Гдⷭ҇и поми́лꙋй: внѣ̀ ѻ҆лтарѧ̀.

По є҆ктенїи́ же а҆рхїере́й говори́тъ возгла́съ пред̾ прⷭ҇то́ломъ:

Ꙗ҆́кѡ ст҃ъ є҆сѝ бж҃е на́шъ, и҆́же на пострада́вшихъ по тебѣ̀ чⷭ҇тны́хъ мч҃нцѣхъ почива́еши, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.

Пѣ́вчїе: А҆ми́нь. И҆ пою́тъ трист҃о́е.

Пото́мъ прѡтодїа́конъ: Гдⷭ҇ꙋ помо́лимсѧ.

Пѣ́вчїе: Гдⷭ҇и поми́лꙋй.

И҆ снима́етсѧ съ а҆рхїере́а мі́тра, и҆ кладе́тсѧ на блю́до. А҆рхїере́й же глаго́летъ мл҃твꙋ:

Гдⷭ҇и бж҃е на́шъ, вѣ́рный во словесѣ́хъ твои́хъ, и҆ нело́жный во ѡ҆бѣща́нїихъ твои́хъ, дарова́вый ст҃ы̑мъ твои̑мъ мч҃нкѡмъ по́двигомъ до́брымъ подвиза́тисѧ, и҆ тече́нїе бл҃гоче́стїѧ соверши́ти, и҆ вѣ́рꙋ и҆́стиннагѡ и҆сповѣ́данїѧ сохрани́ти: са́мъ влⷣко прест҃ы́й, тѣ́хъ моле́нїемъ ᲂу҆моле́нъ бꙋ́ди, и҆ да́рꙋй на́мъ недостѡ́йнымъ твои̑мъ рабѡ́мъ ча́сть и҆ наслѣ́дїе и҆мѣ́ти съ ни́ми, да подража́телїе тѣ́хъ бы́вше, сподо́бимсѧ и҆ предлежа́щихъ тѣ̑мъ бл҃ги́хъ.

Возгла́съ: Млⷭ҇тїю и҆ чл҃вѣколю́бїемъ є҆диноро́днагѡ сн҃а твоегѡ̀, съ ни́мже бл҃гослове́нъ є҆сѝ, со прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.

Пѣ́вчїе: А҆ми́нь.

Та́же: Ми́ръ всѣ̑мъ:

Прѡтодїа́конъ: Главы̑ ва́шѧ:

А҆рхїере́й же глаго́летъ мл҃твꙋ та́йнѡ:

Гдⷭ҇и бж҃е на́шъ, мл҃твами прест҃ы́ѧ влⷣчцы на́шеѧ бцⷣы, и҆ всѣ́хъ ст҃ы́хъ твои́хъ, дѣла̀ рꙋ́къ на́шихъ недосто́йныхъ ра̑бъ твои́хъ напра́ви, и҆ во всѣ́хъ ᲂу҆гожда́ти на́съ твое́й бл҃гости сподо́би.

Возгла́съ: Бꙋ́ди держа́ва црⷭ҇твїѧ твоегѡ̀ бл҃гослове́на и҆ препросла́влена, ѻ҆ц҃а̀ и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ.

Пѣ́вчїе: А҆ми́нь.

А҆рхїере́й прїе́млетъ кади́ло ᲂу҆ прѡтодїа́кона и҆ кади́тъ ст҃ы̑ѧ мѡ́щи три́жды, по три́жды: и҆ ѿда́въ кади́ло, и҆ прїе́мъ ст҃ы́й ді́косъ со ст҃ы́ми мощьмѝ, покрове́нъ воздꙋ́хомъ по ѕвѣздѣ̀, поставлѧ́етъ на главꙋ̀ свою̀, и҆ и҆́детъ црⷭ҇кими враты̀, поддержи́мь первосщ҃еннослꙋжи́тельми: ді́скосъ же де́ржить са́мъ а҆рхїере́й ѻ҆бѣ́ма рꙋка́ма, и҆ та́кѡ и҆́дꙋтъ по чи́нꙋ. Напреди́ же и҆́дꙋтъ съ хорꙋ́гви и҆ і҆кѡ́ны хра́ма: пред̾ і҆кѡ́ною и҆́дꙋтъ пѣ́вчїе, та́же и҆́дꙋтъ сщ҃е́нницы, пото́мъ лампа́дчикъ съ посошнико́мъ, посреди́ же съ мі́трою. Та́же прѡтодїа́конъ съ дїа́кономъ съ кади́лы, и҆ кадѧ́тъ мѡ́щи и҆ а҆рхїере́а: над̾ ді́скосомъ же несꙋ́тъ дїа́коны двѣ̀ рїпі́ды и҆лѝ четы́ре: пред̾ а҆рхїере́омъ ѵ҆подїа́коны несꙋ́тъ трїки́рїй и҆ дики́рїй.

Пѣ́вчїе пою́тъ тропа́рь, гла́съ г҃:

И҆́же на ка́мени вѣ́ры созда́вый цр҃ковь твою̀ бл҃же, въ то́й и҆спра́ви молє́нїѧ на̑ша, и҆ прїимѝ лю́ди въ вѣ́рѣ вопїю́щыѧ тебѣ̀: сп҃си́ ны бж҃е на́шъ, сп҃си́ ны.

А҆́ще же доста́нетъ вре́мѧ, пою́тсѧ и҆ слѣ́дꙋющїи і҆рмосы̀, гла́съ г҃. Пѣ́снь г҃:

Оу҆твержде́нїе на тѧ̀ надѣ́ющихсѧ, ᲂу҆твердѝ гдⷭ҇и цр҃ковь, ю҆́же стѧжа́лъ є҆сѝ чⷭ҇тно́ю твое́ю кро́вїю.

Гла́съ и҃. Пѣ́снь г҃:

Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

Гла́съ є҃. Пѣ́снь г҃:

Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ хрⷭ҇тѐ, ка́мени за́повѣдей твои́хъ, цр҃ковь твою̀ ᲂу҆твердѝ, є҆ди́не бл҃же и҆ чл҃вѣколю́бче.

Є҆гда̀ до́йдꙋтъ до ѡ҆сщ҃а́емаго хра́ма, ѡ҆бхо́дѧтъ є҆го̀ ѿ за́падныхъ двере́й на ю҆́жнꙋю странꙋ̀, къ восто́кꙋ вкрꙋ́гъ: а҆ сщ҃е́нникъ предходѧ̀ кропи́тъ ст҃о́ю водо́ю стѣ́ны хра́ма.

Є҆гда́ же прїи́дꙋтъ пред̾ церкѡ́внаѧ вели̑каѧ врата̀, пѣ́вчїе пою́тъ тропарѝ, на гла́съ з҃:

Ст҃і́и мч҃нцы, и҆̀же до́брѣ страда́вше и҆ вѣнча́вшесѧ, моли́тесѧ ко гдⷭ҇ꙋ сп҃сти́сѧ дꙋша́мъ на́шымъ. Два́жды.

Сла́ва тебѣ̀, хрⷭ҇тѐ бж҃е, а҆пⷭ҇лѡвъ похвало̀, и҆ мч҃нкѡвъ весе́лїе, и҆́хже про́повѣдь трⷪ҇ца є҆диносꙋ́щнаѧ. Є҆ди́ножды.

А҆рхїере́й снима́етъ со главы̀ своеѧ̀ ді́скосъ съ мощьмѝ, поставлѧ́етъ є҆го̀ на ᲂу҆гото́ванномъ столѣ̀ пред̾ цр҃ко́вными враты̀, и҆ покланѧ́етсѧ ст҃ы̑мъ мощє́мъ три́жды, и҆ налага́етсѧ мі́тра: и҆ ѡ҆сѣнѧ́етъ сщ҃е́нникѡвъ на ѻ҆́бѣ страны̑.

Є҆гда́ же пѣ́вчїе пропою́тъ тропарѝ, и҆́дꙋтъ внꙋ́трь хра́ма.

А҆рхїере́й же стоѧ̀ пред̾ ст҃ы́ми мощьмѝ, глаго́летъ:

Бл҃гослове́нъ є҆сѝ хрⷭ҇тѐ бж҃е на́шъ, всегда̀, ны́нѣ и҆ при́снѡ, и҆ во вѣ́ки вѣкѡ́въ.

Пѣ́вчїе ѿвѣща́ютъ внꙋ́трь хра́ма: А҆ми́нь.

А҆рхїере́й глаго́летъ:

Возми́те врата̀ кнѧ́зи ва́шѧ, и҆ возми́тесѧ врата̀ вѣ̑чнаѧ и҆ вни́детъ цр҃ь сла́вы.

Пѣ́вчїе же пою́тъ внꙋ́трь хра́ма:

Кто̀ є҆́сть се́й цр҃ь сла́вы;

А҆ прѡтодїа́конъ подно́ситъ а҆рхїере́ю кади́ло. А҆рхїере́й же принѧ́въ, кади́тъ ст҃ы́й ді́скосъ три́жды, по три́жды, та́же ст҃о́е є҆ѵⷢ҇лїе и҆ крⷭ҇тъ, и҆ і҆кѡ̑ны, пра́вꙋю и҆ лѣ́вꙋю странꙋ̀, та́же сщ҃еннослꙋжи́телей.

Врата́мъ же затворє́ннымъ, и҆лѝ за́навѣсомъ завѣ́шєннымъ, со і҆кѡ́нами, со є҆ѵⷢ҇лїемъ и҆ со крⷭ҇ты̀, стоѧ́тъ сщ҃е́нницы за столо́мъ пред̾ две́рьми, ѡ҆братѧ́сѧ на за́падъ на столѣ́ же постлана̀ пелена̀, по ᲂу҆гла́мъ стола̀ четы́ре подсвѣ́щника, и҆лѝ два̀: а҆ дїа́коны рїпі́ды держа́тъ над̾ ст҃ы́ми мощьмѝ.

По кажде́нїи же прїе́млетъ прѡтодїа́конъ ᲂу҆ а҆рхїере́а кади́ло, и҆ кади́тъ а҆рхїере́а три́жды.

Є҆гда̀ пѣ́вчїе пропою́тъ пе́рвое: Кто̀ є҆́сть се́й цр҃ь сла́вы; Па́ки а҆рхїере́й глаго́летъ второ́е: Возми́те врата̀ кнѧ́зи ва́шѧ, и҆ возми́тесѧ врата̀ вѣ̑чнаѧ, и҆ вни́детъ цр҃ь сла́вы.

Пѣ́вчїе пою́тъ: Кто̀ є҆́сть се́й цр҃ь сла́вы;

Посе́мъ прѡтодїа́конъ: Гдⷭ҇ꙋ, помо́лимсѧ.

Пѣ́вчїе: Гдⷭ҇и поми́лꙋй.

Съ а҆рхїере́а ѿлага́етсѧ мі́тра, и҆ глаго́летъ мл҃твꙋ велегла́снѡ:

Бж҃е и҆ ѻ҆́ч҃е гдⷭ҇а на́шегѡ і҆и҃са хрⷭ҇та̀, сы́й бл҃гослове́нъ во вѣ́ки, и҆́же завѣ́сою пло́ти є҆гѡ̀ ѡ҆бнови́лъ є҆сѝ на́мъ въ перворо́дныхъ цр҃ковь на нб҃сѣ́хъ впи́саныхъ вхо́дъ, и҆дѣ́же жи́тельство пра́зднꙋющихъ и҆ гла́съ ра́дованїѧ: са́мъ чл҃вѣколю́бче влⷣко, при́зри на ны̀ грѣ̑шныѧ и҆ недостѡ́йныѧ рабы̑ твоѧ̑, ѡ҆бновле́нїе пра́зднꙋющыѧ чⷭ҇тна́гѡ хра́ма и҆́мⷬ҇къ во ѡ҆́бразъ ст҃ѣ́йшїѧ твоеѧ̀ цр҃кве, си́рѣчь, са́магѡ тѣлесѐ на́шегѡ, є҆́же ᲂу҆́бѡ и҆ хра́мъ тво́й, [и҆ ᲂу҆́ды хрⷭ҇та̀ твоегѡ̀], всехва́льнымъ а҆пⷭ҇ломъ па́ѵломъ и҆менова́ти сподо́билъ є҆сѝ: и҆ ᲂу҆твердѝ є҆го̀ до сконча́нїѧ вѣ́ка непоколеби́ма, и҆ просла́влена въ тебѣ̀: и҆ сподо́би на́съ въ не́мъ хвалы̑ и҆ славослѡ́вїѧ незазѡ́рна приноси́ти сла́вѣ твое́й, и҆ є҆диноро́дномꙋ твоемꙋ̀ сн҃ꙋ гдⷭ҇ꙋ на́шемꙋ і҆и҃сꙋ хрⷭ҇тꙋ̀, и҆ ст҃о́мꙋ твоемꙋ̀ дх҃ꙋ, въ ра́зꙋмѣ и҆ всѧ́комъ чꙋ́вствѣ, покланѧ́ющымсѧ тебѣ̀ во стра́сѣ твое́мъ, бж҃е́ственныхъ щедро́тъ достѡ́йнымъ показа́тисѧ: и҆ бл҃гопрїѧ̑тнымъ твое́й бл҃гости бы́ти мольба́мъ си̑мъ, ѡ҆ на́съ и҆ всѣ́хъ лю́дехъ твои́хъ неизрече́нномꙋ твоемꙋ̀ бл҃гоꙋтро́бїю приноси̑мымъ: мл҃твами пречⷭ҇тыѧ влⷣчцы на́шеѧ бцⷣы, и҆ приснодв҃ы марі́и.

Возгла́съ: Ꙗ҆́кѡ ст҃ъ є҆сѝ бж҃е на́шъ, и҆ на ст҃ы́хъ почива́еши, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.

Пѣ́вчїе: А҆ми́нь.

А҆рхїере́й: Ми́ръ всѣ̑мъ.

Прѡтодїа́конъ: Главы̑ ва́шѧ гдⷭ҇еви приклони́те.

Пѣ́вчїе: Тебѣ̀ гдⷭ҇и.

А҆рхїере́й чте́тъ мл҃твꙋ вхо́да та́йнѡ:

Влⷣко гдⷭ҇и бж҃е на́шъ, ᲂу҆ста́вивый на нб҃сѣ́хъ чи́ны, и҆ вѡ́инства а҆́гг҃лъ и҆ а҆рха̑гг҃лъ во слꙋже́нїе твоеѧ̀ сла́вы: сотворѝ со вхо́домъ на́шимъ вхо́дꙋ ст҃ы́хъ а҆́гг҃лѡвъ бы́ти, сослꙋжа́щихъ на́мъ и҆ сославосло́вѧщихъ твою̀ бл҃гость.

Возгла́съ: Ꙗ҆́кѡ подоба́етъ тебѣ̀ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.

Пѣ́вчїе: А҆ми́нь.

Та́же а҆рхїере́й прїе́млетъ ді́скосъ со ст҃ы́ми мощьмѝ, и҆ зна́менаетъ врата̀ хра́ма крⷭ҇тоѡбра́знѡ, и҆ глаго́летъ:

Гдⷭ҇ь си́лъ, то́й є҆́сть цр҃ь сла́вы.

Пѣ́вчїе пою́тъ та́кожде:

Гдⷭ҇ь си́лъ, то́й є҆́сть цр҃ь сла́вы.

Є҆гда̀ пѣ́вчїе запою́тъ послѣ́днее: Гдⷭ҇ь си́лъ, то́й є҆́сть цр҃ь сла́вы: въ то̀ вре́мѧ ѿе́млетсѧ сто́лъ, а҆ а҆рхїере́й поставлѧ́етъ ді́скосъ съ мощьмѝ на главꙋ̀ свою̀ и҆ и҆́дꙋтъ во хра́мъ. Въ то̀ вре́мѧ пѣ́вчїе пою́тъ тропа́рь, гла́съ д҃:

Ꙗ҆́коже вы́шнїѧ тве́рди бл҃голѣ́пїе, и҆ ни́жнюю споказа́лъ є҆сѝ красотꙋ̀ ст҃а́гѡ селе́нїѧ сла́вы твоеѧ̀, гдⷭ҇и: ᲂу҆твердѝ сїѐ во вѣ́къ вѣ́ка, и҆ прїимѝ на̑ша въ не́мъ непреста́ннѡ приноси̑маѧ тебѣ̀ молє́нїѧ бцⷣею, всѣ́хъ животѐ и҆ воскрⷭ҇нїе.

А҆рхїере́й же вхо́дитъ во ст҃ы́й ѻ҆лта́рь црⷭ҇кими враты̀: и҆ поставлѧ́етъ ді́скосъ со ст҃ы́ми мощьмѝ на ст҃ѣ́мъ прⷭ҇то́лѣ, и҆ покланѧ́етсѧ ст҃ы̑мъ мощє́мъ, и҆ налага́етсѧ на а҆рхїере́а мі́тра. А҆ прѡтодїа́конъ подно́ситъ а҆рхїере́ю кади́ло, и҆ прїе́мъ а҆рхїере́й, кади́тъ ст҃ы̑ѧ мѡ́щи три́жды, по три́жды, и҆ на ѻ҆́бѣ страны̑ сослꙋжи́телей: прѡтодїа́конъ же принѧ́въ ᲂу҆ а҆рхїере́а кади́ло, кади́тъ а҆рхїере́а три́жды. А҆рхїере́й же помолѧ́сѧ ѡ҆сѣнѧ́етъ сослꙋжа́щихъ, и҆ ѿлага́етъ съ ді́скоса воздꙋ́хъ и҆ ѕвѣздꙋ̀, а҆ ключа́рь подно́ситъ ст҃о́е мѵ́ро, и҆ ꙗ҆́щичекъ длѧ ст҃ы́хъ моще́й, что̀ под̾ прⷭ҇то́лъ: по не́мъ подно́ситъ ѵ҆подїа́конъ воскомасті́хъ нѣ́сколькѡ прїꙋсты́лъ. И҆ прїе́млетъ а҆рхїере́й ст҃ы̑ѧ мѡ́щи, развернꙋ́въ и҆з̾ бꙋма́жєкъ, въ кото́рыхъ заве́рнꙋто по трѝ части̑цы, ѡ҆блѣ́плєнныѧ во́скомъ, кладе́тъ, напре́дь мѵ́ромъ пома́завъ, въ ꙗ҆́щичекъ ѻ҆́ныѧ, и҆ залива́етъ воскомасті́хомъ, и҆ ѿдае́тъ ключарю̀.

Ключа́рь же принѧ́въ и҆ цѣлова́въ а҆рхїере́йскꙋю рꙋ́кꙋ, закрыва́етъ ꙗ҆́щичекъ, и҆ полага́етъ под̾ прⷭ҇то́ломъ въ сре́днемъ столпѣ̀.

Та́же а҆рхїере́й и҆ въ а҆нтїми́нсъ [и҆лѝ въ а҆нтїми́нсы], пома́завъ пе́рвѣе въ мѣше́чкѣ ст҃ы́мъ мѵ́ромъ, влага́етъ прїꙋготѡ́вленныѧ части̑цы, и҆ ᲂу҆крѣплѧ́етъ воскомасті́хомъ же наро́читою лопа́точкою.

[зрѝ] Є҆гда̀ бли́зъ ѡ҆сщ҃а́емагѡ хра́ма дрꙋго́й цр҃кви нѣ́сть, тогда̀ ст҃ы̑ѧ мѡ́щи поставлѧ́ютсѧ та́кожде съ ве́чера на а҆нало́гїи пред̾ ѡ҆́бразомъ сп҃си́телевымъ, что̀ ᲂу҆ црⷭ҇кихъ вра́тъ на пра́вой странѣ̀, въ то́мже хра́мѣ, є҆го́же ѡ҆сщ҃а́ть. Є҆гда́ же прїи́детъ вре́мѧ по мѡ́щи и҆дтѝ, выхо́дитъ а҆рхїере́й црⷭ҇кимижъ враты̀, и҆ стано́витсѧ проти́вѡ моще́й на ѻ҆рлецѣ̀, и҆ помолѧ́сѧ ѡ҆сѣнѧ́етъ сослꙋжа́щихъ, и҆ прїе́млетъ а҆рхїере́й кади́ло, и҆ кади́тъ ст҃ы̑ѧ мѡ́щи, три́жды по три́жды: а҆ пѣ́вчїе пою́тъ вышепи́санный тропа́рь: И҆́же во все́мъ мі́рѣ мч҃нкъ твои́хъ:

Сла́ва, и҆ ны́нѣ, конда́къ:

Ꙗ҆́кѡ нача́тки є҆стества̀:

А҆ ка́къ пропою́тъ пѣ́вчїе, прѡтодїа́конъ глаго́летъ є҆ктенїю̀ ма́лꙋю: Па́ки и҆ па́ки: пред̾ мощьмѝ, и҆ всѐ быва́етъ по чи́нꙋ, ꙗ҆́коже предписа́сѧ вы́ше сегѡ̀. И҆ прїе́млетъ а҆рхїере́й ст҃ы̑ѧ мѡ́щи на главꙋ̀, и҆ и҆́дꙋтъ со крⷭ҇ты̀ вкрꙋ́гъ цр҃кви по чи́нꙋ. А҆ є҆гда̀ не возмо́жно нико́ими мѣ́ры вокрꙋ́гъ хра́ма съ мощьмѝ ходи́ти: то пред̾ цр҃кѡ́внаѧ вели̑каѧ врата̀ выхо́дѧтъ, и҆ поставлѧ́етъ а҆рхїере́й ст҃ы̑ѧ мѡ́щи на ᲂу҆гото́ванномъ столѣ̀, и҆ покланѧ́етсѧ ст҃ы̑мъ мощє́мъ, и҆ прїе́млетъ ᲂу҆ прѡтодїа́кона кади́ло, и҆ кади́тъ ст҃ы̑ѧ мѡ́щи, три́жды по три́жды, и҆ быва́етъ всѐ по предпи́санномꙋ чи́нꙋ. По и҆сполне́нїи всегѡ̀ прїе́млетъ а҆рхїере́й ст҃ы̑ѧ мѡ́щи на главꙋ̀ свою̀, и҆ зна́меновавъ ѻ҆́ными цр҃кѡ́внаѧ вели̑каѧ врата̀, па́ки поставлѧ́етъ на главꙋ̀ свою̀. и҆́детъ во ѻ҆лта́рь црⷭ҇кими враты̀ по ѻ҆бы́чаю: и҆ вше́дъ во ѻ҆лта́рь, ѡ҆бхо́дитъ со ст҃ы́ми мощьмѝ вокрꙋ́гъ прⷭ҇то́ла є҆ди́ножды, вмѣ́стѡ тогѡ̀, є҆́же что̀ и҆дтѝ бы́ло вкрꙋ́гъ хра́ма, и҆ поставлѧ́етъ ст҃ы̑ѧ мѡ́щи на ст҃ѣ́й трапе́зѣ, и҆ влага́етъ ѻ҆́ныѧ въ ꙗ҆́щичекъ, и҆ въ а҆нтїми́нсы, и҆ про́чее дѣ́йствꙋетъ по чи́нꙋ вы́ше пока́занномꙋ.

По и҆сполне́нїи тогѡ̀, прѡтодїа́конъ глаго́летъ: Гдⷭ҇ꙋ помо́лимсѧ.

Сщ҃е́нницы: Гдⷭ҇и поми́лꙋй.

А҆рхїере́й глаго́летъ мл҃твꙋ:

Гдⷭ҇и бж҃е на́шъ, и҆́же и҆ сїю̀ сла́вꙋ, ѡ҆ тебѣ̀ пострада́вшымъ ст҃ы̑мъ мч҃нкѡмъ дарова́вый, є҆́же сѣ́ѧтисѧ по все́й землѝ мощє́мъ и҆́хъ, во ст҃ы́хъ хра́мѣхъ твои́хъ, и҆ плоды̀ и҆сцѣле́нїй прозѧба́ти: са́мъ влⷣко, всѣ́хъ бл҃ги́хъ пода́тель сы́й, мл҃твами ст҃ы́хъ, и҆́хже бл҃гоизво́лилъ є҆сѝ положе́нїю моще́й въ се́мъ чⷭ҇тнѣ́мъ же́ртвенницѣ твое́мъ [въ си́хъ чⷭ҇тны́хъ же́ртвенницѣхъ твои́хъ] бы́ти, сподо́би на́съ неѡсꙋжде́ннѡ безкро́внꙋю тебѣ̀ на не́мъ [на ни́хъ] приноси́ти же́ртвꙋ, и҆ да́рꙋй на́мъ всѧ̑ ꙗ҆̀же ко спасе́нїю прошє́нїѧ, возме́здїе подаѧ́й и҆ въ се́мъ пострада́вшымъ за ст҃о́е и҆́мѧ твоѐ, є҆́же чꙋдодѣ́йствовати тѣ́ми къ на́шемꙋ сп҃се́нїю.

Возгла́съ: Ꙗ҆́кѡ твоѐ є҆́сть црⷭ҇тво, и҆ си́ла, и҆ сла́ва, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ.

Сщ҃е́нницы: А҆ми́нь.

Посе́мъ прѡтодїа́конꙋ ре́кшꙋ: Па́ки и҆ па́ки прекло́ньше колѣ̑на, гдⷭ҇ꙋ помо́лимсѧ.

А҆рхїере́й приклони́въ колѣ̑на своѧ̑ [та́кожде и҆ наро́дъ стоѧ́щїй во хра́мѣ приклонѧ́етъ колѣ̑на своѧ̑], чте́тъ сїю̀ мл҃твꙋ во ᲂу҆слы́шанїе всѣ̑мъ:

Гдⷭ҇и бж҃е на́шъ, и҆́же тва́рь є҆ди́нымъ сло́вомъ созда́вый, и҆ во є҆́же бы́ти приведы́й, неизрече́нными же ѡ҆́бразы разли́чнѡ сїю̀ ᲂу҆краси́вый, и҆́же надноси́мый на ню̀ тво́й дх҃ъ собра́вый, и҆ со́лнечный се́й свѣ́тъ на ню̀ и҆злїѧ́вый во ѡ҆бновле́нїе є҆ѧ̀: и҆́же ᲂу҆го́дникꙋ твоемꙋ̀ мѡѷсе́ю вдохнꙋ́вый хвалꙋ̀ нѣ́кꙋю и҆зрѧ́днꙋ приложи́ти добрѣ́йшемꙋ твоемꙋ̀ созда́нїю, и҆ рещѝ ви́дѣти тебѐ свѣ́тъ ꙗ҆́кѡ до́брый, и҆ дне́мъ нарещѝ се́й. є҆го́же ᲂу҆́бѡ и҆ мы̀ ви́дѧще, и҆ свѣтлѣ́йшее сїѐ со́лнце, ѡ҆бновлѧ́ющее на всѧ́къ де́нь тва́рь, тѧ̀ и҆́стиннагѡ днѐ сла́вимъ сл҃нце, и҆ свѣ́тъ тво́й невече́рнїй, и҆́же сн҃омъ твои́мъ на́мъ заповѣ́давый ѡ҆бнови́тисѧ на́шемꙋ є҆стествꙋ̀ ст҃ы́мъ твои́мъ дх҃омъ, ꙗ҆́кѡ и҆ по да́рꙋ семꙋ̀ првⷣнымъ возсїѧ́ти ꙗ҆́кѡ со́лнцꙋ: тебѣ̀ мо́лимсѧ, и҆ тебѐ про́симъ ѻ҆ц҃а̀ сло́ва, гдⷭ҇а и҆ бг҃а на́шего: [поне́же неизрече́ннымъ твои́мъ чл҃вѣколю́бїемъ, и҆ безмѣ́рною твое́ю млⷭ҇тїю, тва́рь и҆ дре́внїй зако́нъ во ѡ҆́бразъ но́вагѡ завѣ́та во твое́мъ бг҃овидѣ́нїи ᲂу҆ сїна́йскїѧ горы̀, и҆ въ кꙋпинѣ̀ ѻ҆́ной ди́вной, и҆ въ сѣ́ни свидѣ́нїѧ, и҆ въ предо́брѣйшемъ хра́мѣ соломѡ́на ѻ҆́нагѡ ѻ҆бновле́нїе прїѧ̀]: млⷭ҇тивнымъ ѻ҆́комъ при́зри на ны̀ грѣ̑шныѧ и҆ недостѡ́йныѧ рабы̑ твоѧ̑, пребыва́ющыѧ въ се́мъ домꙋ̀ нб҃оподо́бномъ, вселе́нныѧ похвалѣ̀, же́ртвенницѣ и҆́стинномъ неизрече́нныѧ твоеѧ̀ сла́вы, и҆ низпослѝ прест҃а́го твоего̀ дх҃а на ны̀, и҆ на наслѣ́дїе твоѐ: и҆ по бж҃е́ственномꙋ дв҃дꙋ, ѡ҆бновѝ въ сердца́хъ на́шихъ дꙋ́хъ пра́вый и҆ дх҃омъ влⷣчнимъ ᲂу҆твердѝ на́съ. И҆ бл҃гочести́вѣйшемꙋ, самодержа́внѣйшемꙋ, вели́комꙋ гдⷭ҇рю на́шемꙋ і҆мпера́торꙋ нїкола́ю а҆леѯа́ндровичꙋ всеѧ̀ рѡссі́и, побѣди́тєльнаѧ и҆ побѣ̑ды на ви̑димыѧ и҆ неви̑димыѧ врагѝ да́рꙋй: на́мъ же є҆диномы́слїе и҆ ми́ръ. Сотво́ршымъ же зда́нїе сїѐ и҆ хра́ма ѡ҆сщ҃е́нїе, по любвѝ къ тебѣ̀ бг҃ꙋ тща́тельнѡ, ѡ҆ставле́нїе согрѣше́нїй пода́ждь: да́рꙋй и҆̀мъ ꙗ҆̀же ко сп҃се́нїю прошє́нїѧ, воздви́гни ѧ҆̀ къ дѣ́ланїю за́повѣдей твои́хъ: да́рꙋй и҆̀мъ ѡ҆бновле́нїе да́ра ст҃а́гѡ твоегѡ̀ дх҃а, да неѡсꙋжде́ннѡ покло́нѧтсѧ тебѣ̀ є҆ди́номꙋ и҆́стинномꙋ бг҃ꙋ, и҆ є҆го́же посла́лъ є҆сѝ і҆и҃сꙋ хрⷭ҇тꙋ̀, мл҃твами бцⷣы, [и҆ є҆гѡ́же є҆́сть хра́мъ] и҆ всѣ́хъ ст҃ы́хъ твои́хъ, а҆ми́нь.

И҆ по мл҃твѣ воста́въ а҆рхїере́й и҆ про́чїи, прѡтодїа́конъ глаго́летъ:

Застꙋпѝ, сп҃сѝ, поми́лꙋй, возста́ви, и҆ сохранѝ на́съ бж҃е, твое́ю бл҃года́тїю.

Прест҃ꙋ́ю, пречⷭ҇тꙋю: и҆ прѡ́чаѧ.

А҆рхїере́й возгла́съ:

Ꙗ҆́кѡ ст҃ъ є҆сѝ бж҃е на́шъ, и҆ на ст҃ы́хъ по тебѣ̀ пострада́вшихъ, чⷭ҇тны́хъ мч҃нцѣхъ почива́еши, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: А҆ми́нь.

Та́же а҆рхїере́й и҆́детъ на ѡ҆блача́льное своѐ мѣ́сто, а҆́ще є҆́сть, съ по́сохомъ: а҆́ще нѣ́тъ ѡ҆блача́льнагѡ мѣ́ста, стано́витсѧ на пред̾ѻлта́рномъ а҆мвѡ́нѣ, а҆ сщ҃е́нницы стано́вѧтсѧ на ѻ҆́бѣ страны̑ по чи́нꙋ. А҆рхїере́й же ста́въ и҆ помолѧ́сѧ, ѡ҆сѣнѧ́етъ предстоѧ́щихъ.

Прѡтодїа́конъ глаго́летъ є҆ктенїю̀:

Поми́лꙋй на́съ бж҃е, по вели́цѣй млⷭ҇ти твое́й, мо́лимъ ти сѧ, ᲂу҆слы́ши и҆ поми́лꙋй.

Пѣ́вчїе: Гдⷭ҇и поми́лꙋй. три́жды.

Є҆щѐ мо́лимсѧ ѡ҆ бл҃гочести́вѣйшемъ, самодержа́внѣйшемъ, вели́комъ гдⷭ҇рѣ на́шемъ, і҆мпера́торѣ нїкола́ѣ а҆леѯа́ндровичѣ всеѧ̀ рѡссі́и: ѡ҆ держа́вѣ, побѣ́дѣ, пребыва́нїи, ми́рѣ, здра́вїи, сп҃се́нїи є҆гѡ̀, и҆ гдⷭ҇ꙋ бг҃ꙋ на́шемꙋ наипа́че поспѣши́ти и҆ пособи́ти є҆мꙋ̀ во всѣ́хъ, и҆ покори́ти под̾ но́зѣ є҆гѡ̀ всѧ́каго врага̀ и҆ сꙋпоста́та.

Є҆щѐ мо́лимсѧ ѡ҆ сꙋпрꙋ́гѣ є҆гѡ̀, бл҃гочести́вѣйшей гдⷭ҇рнѣ, і҆мператрі́цѣ а҆леѯа́ндрѣ ѳео́дѡровнѣ: ѡ҆ ма́тери є҆гѡ̀, бл҃гочести́вѣйшей гдⷭ҇рнѣ, і҆мператрі́цѣ марі́и ѳео́дѡровнѣ: ѡ҆ наслѣ́дникѣ є҆гѡ̀, бл҃говѣ́рномъ гдⷭ҇рѣ, цесаре́вичѣ и҆ вели́комъ кн҃зѣ а҆леѯі́и нїкола́евичѣ, и҆ ѡ҆ все́мъ ца́рствꙋющемъ до́мѣ.

Є҆щѐ мо́лимсѧ ѡ҆ ст҃ѣ́йшемъ прави́тельствꙋющемъ сѷно́дѣ, и҆ ѡ҆ преѡсщ҃е́ннѣйшемъ є҆пⷭ҇кпѣ на́шемъ [и҆́мⷬ҇къ.]

Є҆щѐ мо́лимсѧ ѡ҆ все́мъ и҆́хъ хрⷭ҇толюби́вомъ во́инствѣ.

Є҆щѐ мо́лимсѧ ѡ҆ бл҃же́нныхъ и҆ прⷭ҇нопа́мѧтныхъ созда́телехъ ст҃а́гѡ хра́ма сегѡ̀.

Є҆щѐ мо́лимсѧ ѡ҆ млⷭ҇ти, жи́зни, ми́рѣ, здра́вїи, сп҃се́нїи, посѣще́нїи, проще́нїи и҆ ѡ҆ставле́нїи грѣхѡ́въ рабѡ́въ бж҃їихъ, бра́тїи на́шеѧ.

Є҆щѐ мо́лимсѧ ѡ҆ плодоносѧ́щихъ и҆ добродѣ́ющихъ во ст҃ѣ́мъ и҆ всечⷭ҇тнѣ́мъ хра́мѣ се́мъ, трꙋжда́ющихсѧ, пою́щихъ и҆ предстоѧ́щихъ лю́дехъ, ѡ҆жида́ющихъ ѿ тебѐ вели́кїѧ и҆ бога́тыѧ млⷭ҇ти.

А҆рхїере́й глаго́летъ возгла́съ:

Ꙗ҆́кѡ млⷭ҇тивъ и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.

Пѣ́вчїе: А҆ми́нь.

Ключа́рь подно́ситъ а҆рхїере́ю крⷭ҇тъ на блю́дѣ. А҆рхїере́й прїи́мъ крⷭ҇тъ, на то́мже ѡ҆блача́льномъ мѣ́стѣ [и҆лѝ на пред̾ѻлта́рномъ а҆мвѡ́нѣ] стоѧ̀, ѡ҆сѣнѧ́етъ крⷭ҇то́мъ по три́жды на четы́ре страны̑: на восто́къ, на за́падъ, на ю҆́гъ и҆ на сѣ́веръ. А҆ прѡтодїа́конъ кади́тъ проти́вѡ крⷭ҇та̀ по три́жды, и҆ преходѧ̀ глаго́летъ:

Гдⷭ҇ꙋ помо́лимсѧ, рце́мъ всѝ.

Пѣ́вчїе: Гдⷭ҇и поми́лꙋй. По три́жды.

По ѡ҆сѣне́нїи, прѡтодїа́конъ: Премꙋ́дрость.

А҆рхїере́й же положи́въ крⷭ҇тъ ключарю̀ на блю́до, и҆́детъ [а҆́ще ли стоѧ́лъ на ѡ҆блача́льномъ мѣ́стѣ] на пред̾ѻлта́рный а҆мвѡ́нъ съ по́сохомъ, глаго́лѧ:

Прест҃а́ѧ бцⷣе, сп҃сѝ на́съ.

Пѣ́вчїе: Чⷭ҇тнѣ́йшꙋю херꙋві̑мъ:

А҆рхїере́й: Сла́ва тебѣ̀ хрⷭ҇тѐ бж҃е, ᲂу҆пова́нїе на́ше.

Пѣ́вчїе: Сла́ва, и҆ ны́нѣ: Гдⷭ҇и поми́лꙋй. Три́жды: Влады́ко, бл҃гословѝ.

А҆рхїере́й, возше́дъ на а҆мвѡ́нъ, и҆ ѿда́въ по́сохъ, па́ки прїе́млетъ крⷭ҇тъ, и҆ глаго́летъ ѿпꙋ́стъ со крⷭ҇то́мъ. По ѿпꙋ́стѣ возглаша́етъ прѡтодїа́конъ и҆́хъ і҆мпера́тѡрскимъ вели́чествамъ и҆ и҆́хъ і҆мпера́тѡрскимъ высо́чествамъ многолѣ́тствїе.

По многолѣ́тствїи же дїа́конъ подно́ситъ а҆рхїере́ю ст҃ꙋ́ю во́дꙋ: а҆рхїере́й кропи́тъ ст҃о́ю водо́ю сѣ́нь, за́падъ, сѣ́веръ и҆ ю҆́гъ. По ѡ҆кропле́нїи са́мъ а҆рхїере́й цѣлꙋ́етъ чⷭ҇тны́й крⷭ҇тъ, по не́мже и҆ про́чїи сщ҃еннослꙋжи́телїе и҆ лю́дїе, и҆ кропи́тъ и҆̀хъ ка́ждаго ст҃о́ю водо́ю.

А҆ пѣ́вчїе, до́ндеже прикла́дываютсѧ лю́дїе, пою́тъ: Мнѡ́гаѧ лѣ̑та.

По пропѣ́тїи же многолѣ́тїѧ, начина́ютъ часы̀.

На лїтꙋргі́и, прокі́менъ ѡ҆сщ҃е́нїю, и҆ хра́мꙋ. А҆по́столъ къ є҆вре́ємъ, зача́ло т҃и, и҆ хра́мꙋ. Є҆ѵⷢ҇лїе ѿ і҆ѡа́нна, заⷱ҇ л҃з ѿ полꙋ̀, и҆ хра́мꙋ.

Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.