Последование общего молебна
Послѣ́дованїе ѻ҆́бщагѡ моле́бна
Бл҃гослови́вшꙋ сщ҃е́нникꙋ, начина́емъ:
Гдⷭ҇и, ᲂу҆слы́ши мл҃твꙋ мою̀:
Сла́ва, и҆ ны́нѣ:
Бг҃ъ гдⷭ҇ь, и҆ ꙗ҆ви́сѧ на́мъ: со стїхѝ.
Та́же тропа́рь бцⷣѣ:
Къ бцⷣѣ прилѣ́жнѡ ны́нѣ притеце́мъ грѣ́шнїи и҆ смире́ннїи, и҆ припаде́мъ въ покаѧ́нїи зовꙋ́ще и҆з̾ глꙋбины̀ дꙋшѝ: влⷣчце помозѝ, на ны̀ милосе́рдовавши: потщи́сѧ, погиба́емъ ѿ мно́жества прегрѣше́нїй, не ѿвратѝ твоѧ̑ рабы̑ тщы̑, тѧ́ бо и҆ є҆ди́нꙋ наде́ждꙋ и҆́мамы. Два́жды.
Не ᲂу҆молчи́мъ никогда̀ бцⷣе, си̑лы твоѧ̑ глаго́лати недосто́йнїи: а҆́ще бо ты̀ не бы̀ предстоѧ́ла молѧ́щи, кто̀ бы на́съ и҆зба́вилъ ѿ толи́кихъ бѣ́дъ; кто́ же бы сохрани́лъ до ны́нѣ свобо́дны; не ѿстꙋ́пимъ влⷣчце ѿ тебѐ, твоѧ̑ бо рабы̑ сп҃са́еши при́снѡ ѿ всѧ́кихъ лю́тыхъ.
Та́же ѱало́мъ н҃.
И҆ по ѱалмѣ̀ начина́емъ канѡ́нъ прест҃ы́ѧ бцⷣы, без̾ і҆рмосѡ́въ. Гла́съ и҃.
Пѣ́снь а҃.
І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Припѣ́въ: Прест҃а́ѧ бцⷣе, сп҃сѝ на́съ.
Мно́гими содержи́мь напа́стьми, къ тебѣ̀ прибѣга́ю сп҃се́нїѧ и҆скі́й: ѽ мт҃и сло́ва и҆ дв҃о, ѿ тѧ́жкихъ и҆ лю́тыхъ мѧ̀ сп҃сѝ!
Страсте́й мѧ̀ смꙋща́ютъ прило́зи, мно́гагѡ ᲂу҆ны́нїѧ и҆спо́лнити мою̀ дꙋ́шꙋ: ᲂу҆мирѝ ѻ҆трокови́це, тишино́ю сн҃а и҆ бг҃а твоегѡ̀ всенепоро́чнаѧ.
Сла́ва:
Сп҃са ро́ждшꙋю тѧ̀ и҆ бг҃а, молю̀ дв҃о, и҆зба́витисѧ мѝ лю́тыхъ: къ тебѣ́ бо ны́нѣ прибѣга́ѧ, простира́ю и҆ дꙋ́шꙋ и҆ помышле́нїе.
И҆ ны́нѣ:
Недꙋ́гꙋюща тѣ́ломъ и҆ дꙋше́ю, посѣще́нїѧ бж҃е́ственнаго, и҆ промышле́нїѧ ѿ тебѐ сподо́би є҆ди́на бг҃омт҃и, ꙗ҆́кѡ бл҃га́ѧ, бл҃га́гѡ же роди́тельнице.
Пѣ́снь г҃.
І҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Предста́тельство и҆ покро́въ жи́зни моеѧ̀ полага́ю тѧ̀, бг҃ороди́тельнице дв҃о, ты́ мѧ ѡ҆кормѝ ко приста́нищꙋ твоемꙋ̀, бл҃ги́хъ вино́внаѧ, вѣ́рныхъ ᲂу҆твержде́нїе, є҆ди́на всепѣ́таѧ.
Молю̀ дв҃о, дꙋше́вное смꙋще́нїе, и҆ печа́ли моеѧ̀ бꙋ́рю разори́ти: ты́ бо бг҃оневѣ́стнаѧ, нача́льника тишины̀ хрⷭ҇та̀ родила̀ є҆сѝ, є҆ди́на пречⷭ҇таѧ.
Сла́ва:
Бл҃годѣ́телѧ ро́ждши до́брыхъ вино́внаго, бл҃годѣѧ́нїѧ бога́тство всѣ̑мъ и҆сточѝ: всѧ̑ бо мо́жеши, ꙗ҆́кѡ си́льнаго въ крѣ́пости хрⷭ҇та̀ ро́ждши, бг҃обл҃же́ннаѧ.
И҆ ны́нѣ:
Лю́тыми недꙋ́ги, и҆ болѣ́зненными страстьмѝ и҆стѧза́емꙋ, дв҃о, ты́ ми помозѝ. и҆сцѣле́нїй бо неѡскꙋ́дное тѧ̀ зна́ю сокро́вище пренепоро́чнаѧ, неиждива́емое.
Сїѐ по г҃-й и҆ ѕ҃-й пѣ́сни то́кмѡ:
Сп҃сѝ ѿ бѣ́дъ рабы̑ твоѧ̑ бцⷣе, ꙗ҆́кѡ всѝ по бз҃ѣ къ тебѣ̀ прибѣга́емъ, ꙗ҆́кѡ нерꙋши́мѣй стѣнѣ̀ и҆ предста́тельствꙋ.
При́зри бл҃госе́рдїемъ всепѣ́таѧ бцⷣе, на моѐ лю́тое тѣлесѐ ѡ҆ѕлобле́нїе, и҆ и҆сцѣлѝ дꙋшѝ моеѧ̀ болѣ́знь.
Та́же і҆ере́й, и҆лѝ дїа́конъ:
Поми́лꙋй на́съ бж҃е, по вели́цѣй млⷭ҇ти твое́й, мо́лимъ ти сѧ, ᲂу҆слы́ши и҆ поми́лꙋй.
Ли́къ: Гдⷭ҇и поми́лꙋй, три́жды.
Є҆щѐ мо́лимсѧ ѡ҆ вели́комъ господи́нѣ и҆ ѻ҆тцѣ̀ на́шемъ, свѧтѣ́йшемъ патрїа́рхѣ моско́вскомъ и҆ всеѧ̀ рꙋсѝ пі́менѣ и҆ ѡ҆ господи́нѣ на́шемъ преѡсвѧще́ннѣйшемъ є҆пⷭ҇кпѣ [и҆лѝ а҆рхїепⷭ҇кпѣ, и҆лѝ митрополі́тѣ] и҆́мⷬ҇къ.
Є҆щѐ мо́лимсѧ ѡ҆ богохрани́мѣй странѣ̀ на́шей, властѣ́хъ и҆ во́инствѣ є҆ѧ̀.
[Посе́мъ за ни́хже пое́тсѧ моле́бенъ].
Є҆щѐ мо́лимсѧ ѡ҆ млⷭ҇ти, жи́зни, ми́рѣ, здра́вїи, сп҃се́нїи, посѣще́нїи, проще́нїи и҆ бл҃гопоспѣше́нїи раба̀ бж҃їѧ, [и҆лѝ рабѡ́въ бж҃їихъ], и҆́мⷬ҇къ.
По си́хже:
Є҆щѐ мо́лимсѧ за всю̀ бра́тїю, и҆ за всѧ̑ хрїстїа́ны.
Пото́мъ возгла́съ:
Ꙗ҆́кѡ млⷭ҇тивъ: и҆ прѡ́чаѧ.
И҆ а҆́бїе глаго́лемъ тропа́рь, гла́съ в҃:
Моле́нїе те́плое, и҆ стѣна̀ неѡбори́маѧ, млⷭ҇ти и҆сто́чниче, мі́рови прибѣ́жище, прилѣ́жнѡ вопїе́мъ тѝ: бцⷣе влⷣчце, предварѝ, и҆ ѿ бѣ́дъ и҆зба́ви на́съ, є҆ди́на вско́рѣ предста́тельствꙋющаѧ.
Пѣ́снь д҃.
І҆рмо́съ: Оу҆слы́шахъ гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Страсте́й мои́хъ смꙋще́нїе, ко́рмчїю ро́ждшаѧ гдⷭ҇а, и҆ бꙋ́рю ᲂу҆тишѝ мои́хъ прегрѣше́нїй, бг҃оневѣ́стнаѧ.
Млⷭ҇рдїѧ твоегѡ̀ бе́зднꙋ призыва́ющꙋ, пода́ждь мѝ, ꙗ҆́же бл҃госе́рдаго ро́ждшаѧ, и҆ сп҃са всѣ́хъ пою́щихъ тѧ̀.
Наслажда́ющесѧ пречⷭ҇таѧ, твои́хъ дарова́нїй, бл҃года́рственное воспѣва́емъ пѣ́нїе, вѣ́дꙋще тѧ̀ бг҃омт҃рь.
Сла́ва:
На ѻ҆дрѣ̀ болѣ́зни моеѧ̀ и҆ не́мощи низлежа́щꙋ мѝ, ꙗ҆́кѡ бл҃голюби́ва помозѝ бцⷣе, є҆ди́на приснодв҃о.
И҆ ны́нѣ:
Наде́ждꙋ и҆ ᲂу҆твержде́нїе, и҆ сп҃се́нїѧ стѣ́нꙋ недви́жимꙋ, и҆мꙋ́ще тѧ̀ всепѣ́таѧ, неꙋдо́бства всѧ́кагѡ и҆збавлѧ́емсѧ.
Пѣ́снь є҃.
І҆рмо́съ: Просвѣтѝ на́съ повелѣ́нїи твои́ми гдⷭ҇и, и҆ мы́шцею твое́ю высо́кою тво́й ми́ръ пода́ждь на́мъ, чл҃вѣколю́бче.
И҆спо́лни чⷭ҇таѧ, весе́лїѧ се́рдце моѐ, твою̀ нетлѣ́ннꙋю даю́щи ра́дость, весе́лїѧ ро́ждшаѧ вино́внаго.
И҆зба́ви на́съ ѿ бѣ́дъ, бцⷣе чⷭ҇таѧ, вѣ́чное ро́ждши и҆збавле́нїе, и҆ ми́ръ всѧ́къ ᲂу҆́мъ преимꙋ́щїй.
Сла́ва:
Разрѣшѝ мглꙋ̀ прегрѣше́нїй мои́хъ, бг҃оневѣ́сто, просвѣще́нїемъ твоеѧ̀ свѣ́тлости, свѣ́тъ ро́ждшаѧ бж҃е́ственный и҆ превѣ́чный.
И҆ ны́нѣ:
И҆сцѣлѝ чⷭ҇таѧ, дꙋшѝ моеѧ̀ неможе́нїе, посѣще́нїѧ твоегѡ̀ сподо́бльшаѧ, и҆ здра́вїе мл҃твами твои́ми пода́ждь мѝ.
Пѣ́снь ѕ҃.
І҆рмо́съ: Мл҃твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ бж҃е, возведи́ мѧ.
Сме́рти и҆ тлѝ ꙗ҆́кѡ спа́слъ є҆́сть, са́мъ сѧ̀ и҆зда́въ сме́рти, тлѣ́нїемъ и҆ сме́ртїю моѐ є҆стество̀ ꙗ҆́то бы́вшее, дв҃о молѝ гдⷭ҇а и҆ сн҃а твоего̀, врагѡ́въ ѕлодѣ́йствїѧ мѧ̀ и҆зба́вити.
Предста́тельницꙋ тѧ̀ живота̀ вѣ́мъ, и҆ храни́тельницꙋ тве́рдꙋ дв҃о, и҆ напа́стей рѣша́щꙋ молвы̑, и҆ нало́ги бѣсѡ́въ ѿгонѧ́ющꙋ, и҆ молю́сѧ всегда̀, ѿ тлѝ страсте́й мои́хъ и҆зба́вити мѧ̀.
Сла́ва:
Ꙗ҆́кѡ стѣ́нꙋ прибѣ́жища стѧжа́хомъ и҆ дꙋ́шъ всесоверше́нное сп҃се́нїе, и҆ простра́нство въ ско́рбехъ, ѻ҆трокови́це: и҆ просвѣще́нїемъ твои́мъ при́снѡ ра́дꙋемсѧ. ѽ влⷣчце, и҆ ны́нѣ на́съ ѿ страсте́й и҆ бѣ́дъ сп҃сѝ!
И҆ ны́нѣ:
На ѻ҆дрѣ̀ ны́нѣ немощствꙋ́ѧй лежꙋ̀, и҆ нѣ́сть и҆сцѣле́нїѧ пло́ти мое́й: но бг҃а и҆ сп҃са мі́рꙋ, и҆ и҆зба́вителѧ недꙋ́гѡвъ ро́ждшаѧ, тебѣ̀ молю́сѧ бл҃го́й: ѿ тлѝ недꙋ̑гъ возста́ви мѧ̀.
Та́же: Сп҃сѝ ѿ бѣ́дъ: и҆ При́зри бл҃госе́рдїемъ: Є҆ктенїа̀ ма́лаѧ.
И҆ по возгла́сѣ а҆́бїе конда́къ, гла́съ ѕ҃:
Предста́тельство хрⷭ҇тїа́нъ непосты́дное, хода́тайство ко творцꙋ̀ непрело́жное, не пре́зри грѣ́шныхъ моле́нїй гла́сы, но предварѝ ꙗ҆́кѡ бл҃га́ѧ на по́мощь на́съ, вѣ́рнѡ зовꙋ́щихъ тѝ: ᲂу҆скорѝ на мл҃твꙋ, и҆ потщи́сѧ на ᲂу҆моле́нїе, предста́тельствꙋющи при́снѡ бцⷣе, чтꙋ́щихъ тѧ̀.
И҆ а҆́бїе прокі́менъ:
Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.
Сті́хъ: Слы́ши дщѝ и҆ ви́ждь, и҆ приклонѝ ᲂу҆́хо твоѐ.
Сщ҃е́нникъ:
И҆ ѡ҆ сподо́битисѧ на́мъ слы́шанїю ст҃а́гѡ є҆ѵⷢ҇лїа, гдⷭ҇а бг҃а мо́лимъ.
Премꙋ́дрость, про́сти, ᲂу҆слы́шимъ ст҃а́гѡ є҆ѵⷢ҇лїа.
Ми́ръ всѣ̑мъ.
Ѿ лꙋкѝ ст҃а́гѡ є҆ѵⷢ҇лїа чте́нїе:
Во дни̑ ѻ҆́ны, воста́вши марїа́мъ, и҆́де въ гѡ́рнѧѧ со тща́нїемъ во гра́дъ і҆ꙋ́довъ. И҆ вни́де въ до́мъ заха́рїинъ, и҆ цѣлова̀ є҆лїсаве́тъ. И҆ бы́сть, ꙗ҆́кѡ ᲂу҆слы́ша є҆лїсаве́тъ цѣлова́нїе мр҃і́ино, взыгра́сѧ младе́нецъ во чре́вѣ є҆ѧ̀: и҆ и҆спо́лнисѧ дх҃а ст҃а є҆лїсаве́тъ. И҆ возопѝ гла́сомъ ве́лїимъ, и҆ речѐ: бл҃гослове́на ты̀ въ жена́хъ, и҆ бл҃гослове́нъ пло́дъ чре́ва твоегѡ̀. И҆ ѿкꙋ́дꙋ мнѣ̀ сїѐ, да прїи́де мт҃и гдⷭ҇а моегѡ̀ ко мнѣ̀; Се́ бо ꙗ҆́кѡ бы́сть гла́съ цѣлова́нїѧ твоегѡ̀ во ᲂу҆́шїю мое́ю, взыгра́сѧ младе́нецъ ра́дощами во чре́вѣ мое́мъ. И҆ бл҃же́нна вѣ́ровавшаѧ, ꙗ҆́кѡ бꙋ́детъ соверше́нїе глагѡ́ланнымъ є҆́й ѿ гдⷭ҇а. И҆ речѐ марїа́мъ: вели́читъ дꙋша̀ моѧ̀ гдⷭ҇а, и҆ возра́довасѧ дх҃ъ мо́й ѡ҆ бз҃ѣ сп҃сѣ мое́мъ. Ꙗ҆́кѡ призрѣ̀ на смире́нїе рабы̀ своеѧ̀: се́ бо ѿ ны́нѣ ᲂу҆бл҃жа́тъ мѧ̀ всѝ ро́ди. Ꙗ҆́кѡ сотворѝ мнѣ̀ вели́чїе си́льный, и҆ ст҃о и҆́мѧ є҆гѡ̀. Пребы́сть же марїа́мъ съ не́ю ꙗ҆́кѡ трѝ мцⷭ҇ы, и҆ возврати́сѧ въ до́мъ сво́й.
И҆ а҆́бїе, Сла́ва, гла́съ ѕ҃:
Мл҃твами бцⷣы, млⷭ҇тиве, ѡ҆чи́сти мно́жєства согрѣше́нїй на́шихъ.
И҆ ны́нѣ, то́йже. Та́же:
Поми́лꙋй мѧ̀, бж҃е, по вели́цѣй млⷭ҇ти твое́й, и҆ по мно́жествꙋ щедрѡ́тъ твои́хъ ѡ҆чи́сти беззако́нїе моѐ.
Гла́съ ѕ҃:
Не ввѣ́ри мѧ̀ человѣ́ческомꙋ предста́тельствꙋ, прест҃а́ѧ влⷣчце, но прїимѝ моле́нїе раба̀ твоегѡ̀: ско́рбь бо ѡ҆бдержи́тъ мѧ̀, терпѣ́ти не могꙋ̀ де́мѡнскагѡ стрѣлѧ́нїѧ, покро́ва не и҆́мамъ, нижѐ гдѣ̀ прибѣ́гнꙋ ѻ҆каѧ́нный, всегда̀ побѣжда́емь, и҆ ᲂу҆тѣше́нїѧ не и҆́мамъ, ра́звѣ тебѐ влⷣчце мі́ра: ᲂу҆пова́нїе и҆ предста́тельство вѣ́рныхъ, не пре́зри моле́нїе моѐ, поле́зно сотворѝ.
Сщ҃е́нникъ: Сп҃сѝ, бж҃е, лю́ди твоѧ̑, и҆ бл҃гословѝ достоѧ́нїе твоѐ:
Гдⷭ҇и поми́лꙋй, в҃і:
Млⷭ҇тїю и҆ щедро́тами: И҆ прѡ́чаѧ.
Пѣ́снь з҃.
І҆рмо́съ: Ѿ і҆ꙋде́и доше́дше ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.
На́ше сп҃се́нїе ꙗ҆́коже восхотѣ́лъ є҆сѝ, сп҃се, ᲂу҆стро́ити, во ᲂу҆тро́бꙋ дв҃ыѧ всели́лсѧ є҆сѝ, ю҆́же мі́рꙋ предста́тельницꙋ показа́лъ є҆сѝ: ѻ҆тє́цъ на́шихъ, бж҃е, бл҃гослове́нъ є҆сѝ.
Воли́телѧ ми́лости, є҆го́же родила̀ є҆сѝ мт҃и чⷭ҇таѧ, ᲂу҆молѝ и҆зба́витисѧ ѿ прегрѣше́нїй и҆ дꙋше́вныхъ скве́рнъ, вѣ́рою зовꙋ́щымъ: ѻ҆тє́цъ на́шихъ бж҃е, бл҃гослове́нъ є҆сѝ.
Сла́ва:
Сокро́вище сп҃се́нїѧ и҆ и҆сто́чникъ нетлѣ́нїѧ тѧ̀ ро́ждшꙋю, и҆ сто́лпъ ᲂу҆твержде́нїѧ, и҆ две́рь покаѧ́нїѧ зовꙋ́щымъ показа́лъ є҆сѝ: ѻ҆тє́цъ на́шихъ бж҃е, бл҃гослове́нъ є҆сѝ.
И҆ ны́нѣ:
Тѣлє́сныѧ сла́бѡсти и҆ дꙋшє́вныѧ недꙋ́ги, бг҃ороди́тельнице, любо́вїю пристꙋпа́ющихъ къ кро́вꙋ твоемꙋ̀, дв҃о, и҆сцѣли́ти сподо́би, сп҃са хрⷭ҇та̀ на́мъ ро́ждшаѧ.
Пѣ́снь и҃.
І҆рмо́съ: Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.
По́мощи ꙗ҆́же ѿ тебѐ тре́бꙋющыѧ, не пре́зри, дв҃о, пою́щыѧ и҆ превозносѧ́щыѧ тѧ̀ во вѣ́ки.
Неможе́нїе дꙋшѝ моеѧ̀ и҆сцѣлѧ́еши и҆ тѣлє́сныѧ болѣ̑зни, дв҃о, да тѧ̀ просла́влю, чⷭ҇таѧ, во вѣ́ки.
Сла́ва:
И҆сцѣле́нїй бога́тство и҆злива́еши вѣ́рнѡ пою́щымъ тѧ̀, дв҃о, и҆ превозносѧ́щымъ неизрече́нное твоѐ ржⷭ҇тво̀.
И҆ ны́нѣ:
Напа́стей ты̀ прило́ги ѿгонѧ́еши и҆ страсте́й нахо́ды дв҃о: тѣ́мже тѧ̀ пое́мъ во всѧ̑ вѣ́ки.
Пѣ́снь ѳ҃.
І҆рмо́съ: Вои́стиннꙋ бг҃оро́дицꙋ тѧ̀ и҆сповѣ́дꙋемъ, сп҃се́нїи тобо́ю, дв҃о чⷭ҇таѧ, съ безпло́тными ли́ки тѧ̀ велича́юще.
То́ка сле́зъ мои́хъ не ѿврати́сѧ, ꙗ҆́же ѿ всѧ́кагѡ лица̀ всѧ́кꙋ сле́зꙋ ѿе́мшаго, дв҃о, хрⷭ҇та̀ ро́ждшаѧ.
Ра́дости моѐ се́рдце и҆спо́лни, дв҃о, ꙗ҆́же ра́дости прїе́мшаѧ и҆сполне́нїе, грѣхо́внꙋю печа́ль потреблѧ́ющи.
Приста́нище и҆ предста́тельство тебѣ̀ прибѣга́ющихъ бꙋ́ди, дв҃о, и҆ стѣна̀ нерꙋши́маѧ, прибѣ́жище же и҆ покро́въ, и҆ весе́лїе.
Сла́ва:
Свѣ́та твоегѡ̀ зарѧ́ми просвѣтѝ. дв҃о, мра́къ невѣ́дѣнїѧ ѿгонѧ́щи, бл҃говѣ́рнѡ бцⷣꙋ тѧ̀ и҆сповѣ́дающихъ.
И҆ ны́нѣ:
На мѣ́стѣ ѡ҆ѕлобле́нїѧ не́мѡщи смири́вшагѡсѧ, дв҃о, и҆сцѣлѝ, и҆з̾ нездра́вїѧ во здра́вїе претворѧ́ющи.
И҆ а҆́бїе, Досто́йно є҆́сть:
И҆ кади́тъ сщ҃е́нникъ же́ртвенникъ и҆ лю́ди, и҆ мы̀ пое́мъ настоѧ́щыѧ бг҃оро́дичны:
Вы́шшꙋю нб҃съ и҆ чи́стшꙋю свѣ́тлостей со́лнечныхъ, и҆зба́вльшꙋю на́съ ѿ клѧ́твы, влⷣчцꙋ мі́ра пѣ́сньми почти́мъ.
Ѿ мно́гихъ мои́хъ грѣхѡ́въ немощствꙋ́етъ тѣ́ло, немощствꙋ́етъ и҆ дꙋша̀ моѧ̀: къ тебѣ̀ прибѣга́ю, бл҃года́тнѣй, наде́ждо ненаде́жныхъ, ты́ ми помозѝ.
Влⷣчце и҆ мт҃и и҆зба́вителѧ, прїимѝ моле́нїе недосто́йныхъ ра̑бъ твои́хъ, да хода́тайствꙋеши къ ро́ждшемꙋсѧ ѿ тебѐ: ѽ влⷣчце мі́ра, бꙋ́ди хода́таица!
Пое́мъ прилѣ́жнѡ тебѣ̀ пѣ́снь ны́нѣ всепѣ́той бцⷣѣ ра́достнѡ, со прⷣте́чею, и҆ всѣ́ми ст҃ы́ми, молѝ бцⷣе, є҆́же ᲂу҆ще́дрити ны̀.
Всѧ̑ а҆́гг҃лѡвъ вѡ́инства, прⷣте́че гдⷭ҇нь, а҆пⷭ҇лѡвъ двоенадесѧ́тице, ст҃і́и всѝ съ бцⷣею сотвори́те мл҃твꙋ, во є҆́же сп҃сти́сѧ на́мъ.
Та́же, Трист҃о́е. Прест҃а́ѧ трⷪ҇це: Ѻ҆́ч҃е на́шъ:
Сщ҃е́нникъ: Ꙗ҆́кѡ твоѐ є҆́сть црⷭ҇тво:
И҆ тропарѝ сїѧ̑, гла́съ ѕ҃:
Поми́лꙋй на́съ, гдⷭ҇и, поми́лꙋй на́съ, всѧ́кагѡ бо ѿвѣ́та:
Сла́ва: Гдⷭ҇и, поми́лꙋй на́съ, на тѧ́ бо ᲂу҆пова́хомъ:
И҆ ны́нѣ: Милосе́рдїѧ двє́ри:
І҆ере́й, и҆лѝ дїа́конъ:
Поми́лꙋй на́съ, бж҃е, по вели́цѣй млⷭ҇ти твое́й, мо́лимъ ти сѧ, ᲂу҆слы́ши и҆ поми́лꙋй.
Ли́къ: Гдⷭ҇и поми́лꙋй, три́жды.
А҆ пото́мъ и҆ прѡ́чаѧ по рѧ́дꙋ, ꙗ҆́коже ᲂу҆каза́сѧ и҆ по г҃-й пѣ́сни.
Посе́мъ мл҃тва прест҃ѣ́й бцⷣѣ:
Ѽ прест҃а́ѧ гпⷭ҇жѐ влⷣчце бцⷣе! вы́шши є҆сѝ всѣ́хъ а҆́гг҃лъ и҆ а҆рха̑гг҃лъ, и҆ всеѧ̀ тва́ри чⷭ҇тнѣ́йши, помо́щница є҆сѝ ѡ҆би́димыхъ, ненадѣ́ющихсѧ надѣ́ѧнїе, ᲂу҆бо́гихъ застꙋ́пница, печа́льныхъ ᲂу҆тѣше́нїе, а҆́лчꙋщихъ корми́тельнице, наги́хъ ѡ҆дѣѧ́нїе, больны́хъ и҆сцѣле́нїе, грѣ́шныхъ сп҃се́нїе, хрїстїа́нъ всѣ́хъ поможе́нїе и҆ застꙋпле́нїе! ѽ всемлⷭ҇тиваѧ гпⷭ҇жѐ, дв҃о бцⷣе влⷣчце, млⷭ҇тїю твое́ю сп҃сѝ и҆ поми́лꙋй вели́каго господи́на и҆ ѻ҆тца̀ на́шего ст҃ѣ́йшаго патрїа́рха моско́вскаго и҆ всеѧ̀ рꙋсѝ пі́мена, преѡсвѧще́нныѧ митрополі́ты, а҆рхїепⷭ҇кпы и҆ є҆пⷭ҇кпы, и҆ ве́сь сщ҃е́нническїй и҆ мона́шескїй чи́нъ, богохрани́мꙋю странꙋ̀ на́шꙋ, вла̑сти и҆ во́инство є҆ѧ̀, и҆ всѧ̑ правосла́вныѧ хрїстїа́ны, ри́зою твое́ю честно́ю защитѝ: и҆ ᲂу҆молѝ, гпⷭ҇жѐ, и҆з̾ тебѐ без̾ сѣ́мене воплоти́вшагосѧ хрⷭ҇та̀ бг҃а на́шего, да препоѧ́шетъ на́съ си́лою свое́ю свы́ше на неви̑димыѧ и҆ ви̑димыѧ врагѝ на́шѧ. ѽ всемлⷭ҇тиваѧ гпⷭ҇жѐ, влⷣчце бцⷣе, воздви́гни на́съ и҆з̾ глꙋбины̀ грѣхо́вныѧ и҆ и҆зба́ви на́съ ѿ гла́да, гꙋби́тельства, ѿ трꙋ́са и҆ пото́па, ѿ ѻ҆гнѧ̀ и҆ меча̀, ѿ нахожде́нїѧ и҆ноплеме́нныхъ и҆ междоꙋсо́бныѧ бра́ни, и҆ ѿ напра́сныѧ сме́рти, и҆ ѿ нападе́нїѧ вра́жїѧ, и҆ ѿ тлетво́рныхъ вѣ̑тръ, и҆ ѿ смертоно́сныѧ ꙗ҆́звы, и҆ ѿ всѧ́кагѡ ѕла̀. пода́ждь, гпⷭ҇жѐ, ми́ръ и҆ здра́вїе рабѡ́мъ твои́мъ, всѣ̑мъ правосла̑внымъ хрⷭ҇тїа́нѡмъ, и҆ просвѣтѝ и҆̀мъ ᲂу҆́мъ и҆ ѻ҆́чи сердє́чныѧ, є҆́же ко сп҃се́нїю: и҆ сподо́би ны̀, грѣ̑шныѧ рабы̑ твоѧ̑, црⷭ҇твїѧ сн҃а твоегѡ̀, хрⷭ҇та̀ бг҃а на́шегѡ: ꙗ҆́кѡ держа́ва є҆гѡ̀ бл҃гослове́нна, и҆ препросла́влена, со безнача́льнымъ є҆гѡ̀ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ є҆гѡ̀ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
И҆ прѡ́чаѧ, и҆ ѿпꙋ́стъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.