Восьмая седмица по Пасхе (со вторника по субботу)
<<сѯ҃г: 525>>
Въ понедѣ́льникъ ве́чера,
На Гдⷭ҇и воззва́хъ: поста́вимъ стїхѡ́въ, ѕ҃: и҆ пое́мъ стїхи̑ры подо́бны, гла́съ а҃. Подо́бенъ: Нбⷭ҇ныхъ чинѡ́въ:
Ны́нѣ ѡ҆бновлѧ́ютсѧ ꙗ҆зы́цы вели́чїи бж҃їими, и҆новѣща́нными словесы̀, ꙗ҆́кѡ въ ви́дѣ ѻ҆́гненномъ, во ᲂу҆вѣре́нїе всѣ́хъ сꙋ́щихъ на землѝ, повѣ́дати ꙗ҆снѣ́йши, ны́нѣ зна́менїе ꙗ҆зы́кѡмъ вои́стиннꙋ спасе́нїе прише́лъ є҆сѝ.
Ю҆́же низпосла́ти ѡ҆бѣща́лъ є҆сѝ ᲂу҆ченикѡ́мъ твои̑мъ хрⷭ҇тѐ съ высоты̀ си́лꙋ, и҆спо́лнивый, посыла́еши ст҃а́го твоего̀ дх҃а, показа́вый на́мъ, ꙗ҆́кѡ ты̀ є҆сѝ и҆́стина, и҆ на тѧ̀ ᲂу҆пова́ющїи бл҃же, вои́стиннꙋ не посрамлѧ́ютсѧ.
Пред̾ѡбѣща́нїе и҆спо́лнивый, твоего̀ ᲂу҆тѣ́шителѧ, ꙗ҆́кѡ во ѻ҆́гненныхъ ѧ҆зы́цѣхъ посла́лъ є҆сѝ мі́рꙋ, всѣ́хъ грѣхѝ бж҃е́ственнымъ ѻ҆гне́мъ слїѧ́ти, и҆ да́ти на́мъ є҆́же къ немꙋ̀ ѻ҆бще́нїе и҆́стинное, вѣ́рнѡ бг҃осло́вѧщымъ є҆го̀.
И҆ мине́и, г҃. Сла́ва, и҆ ны́нѣ: гла́съ а҃:
Пѧтдесѧ́тницꙋ пра́зднꙋимъ, и҆ дх҃а прише́ствїе, и҆ предложе́нїе ѡ҆бѣща́нїѧ, и҆ наде́жды и҆сполне́нїе, и҆ та́инство є҆ли́ко, ꙗ҆́кѡ вели́ко же и҆ че́стно. тѣ́мже вопїе́мъ тѝ: содѣ́телю всѣ́хъ, гдⷭ҇и сла́ва тебѣ̀.
На стїхо́внѣ стїхи̑ры, гла́съ в҃.
Подо́бенъ: До́ме є҆ѵфра́ѳовъ:
Дѣ́ломъ ᲂу҆ченикѡ́мъ, ꙗ҆́коже ѡ҆бѣща́лъ є҆сѝ сло́ве, посла́лъ є҆сѝ бж҃е́ственнаго и҆ ст҃а́го твоего̀ дх҃а, и҆ сїѧ̑ просвѣти́лъ є҆сѝ. <<сѯ҃г ѡ҆б.: 526>>
Сті́хъ: Се́рдце чи́сто сози́жди во мнѣ̀ бж҃е:
Внеза́пꙋ съ нб҃сѐ а҆по́столы всѧ̑ бж҃е́ственнагѡ ᲂу҆тѣ́шителѧ си́ла, всемꙋ́дры и҆ бг҃осло́вны показа̀.
Сті́хъ: Не ѿве́ржи менѐ ѿ лица̀ твоегѡ̀:
Ро́дъ и҆норо́дныхъ, слы́шаще недоꙋмѣва́хꙋсѧ, ѧ҆зы́ки свои́ми, бж҃е́ствєнныѧ а҆по́столы, трⷪ҇цꙋ велича́ющыѧ.
Сла́ва, и҆ ны́нѣ: гла́съ а҃:
Ѧ҆зы́ками и҆норо́дныхъ ѡ҆бнови́лъ є҆сѝ хрⷭ҇тѐ, твоѧ̑ ᲂу҆ченикѝ, да тѣ́ми тѧ̀ проповѣ́дѧтъ безсме́ртнаго сло́ва и҆ бг҃а, подаю́щаго дꙋша́мъ на́шымъ ве́лїю ми́лость.
Во вто́рникъ на ᲂу҆́трени,
по а҃-мъ стїхосло́вїи сѣда́ленъ, гла́съ а҃.
Подо́бенъ: Гро́бъ тво́й:
Счинѧ́ю, своспѣва́ю, ссла́влю, спочита́ю ѻ҆ц҃ꙋ̀ и҆ сн҃ꙋ дх҃а всест҃а́го, соединѧ́ѧ бж҃ество́мъ, раздѣлѧ́ѧ сво́йствы: си́це бо се́й хрⷭ҇то́вы а҆пⷭ҇лы ны́нѣ ѡ҆дѣ́ѧвъ, во все́мъ мі́рѣ проповѣ́дати ᲂу҆премꙋ́дри.
Сла́ва, и҆ ны́нѣ: то́йже.
По в҃-мъ стїхосло́вїи сѣда́ленъ, гла́съ д҃.
Подо́бенъ: Ско́рѡ предварѝ:
Хрⷭ҇то́вы ᲂу҆ченикѝ дх҃а благода́ть, стра́шнѡ съ небесѐ соше́дши въ ви́дѣ ѻ҆́гненномъ, просвѣтѝ, и҆ свѣти́льники показа̀ возвѣща́ющыѧ ст҃ы́ѧ трⷪ҇цы є҆ди́нꙋ си́лꙋ, и҆ гдⷭ҇ьство є҆ди́но, є҆́же вѣ́рою сла́вимъ.
Сла́ва, и҆ ны́нѣ: то́йже. <<сѯ҃д: 527>>
Ѱало́мъ н҃. И҆ канѡ́нъ пра́здника з҃-гѡ гла́са, со і҆рмосы̀ на и҃: и҆ мине́и на д҃. Конда́къ, и҆ є҆ѯапостїла́рїй пра́здника.
На стїхо́внѣ стїхи̑ры, гла́съ в҃.
Подо́бенъ: До́ме є҆ѵфра́ѳовъ:
Заре́ю бг҃онача́льною ᲂу҆́мъ просвѣти́вше, ᲂу҆ченицы̀ твоѝ сло́ве, сꙋ́щественнѡ дх҃а ст҃а́го прїѧ́ша.
Сті́хъ: Се́рдце чи́сто сози́жди во мнѣ̀ бж҃е:
Ѧ҆зы́цы со ѻ҆гне́мъ, съ высоты̀ ви́дими бы́вше, на а҆пⷭ҇лы снидо́ша, раздѣлѧ́еми, просвѣща́юще, не ѡ҆палѧ́юще.
Сті́хъ: Не ѿве́ржи менѐ ѿ лица̀ твоегѡ̀:
Свы́ше къ на́мъ ᲂу҆тѣ́шителю прише́дъ, ꙗ҆́кѡ пре́жде а҆пⷭ҇лѡмъ, ѡ҆свѧтѝ и҆ спасѝ, тѧ̀ бг҃а проповѣ́дающыѧ.
Сла́ва и҆ ны́нѣ: гла́съ а҃:
Всѧ̑ подае́тъ дх҃ъ ст҃ы́й, то́читъ проро́чєствїѧ, сщ҃е́нники соверша́етъ, некни̑жныѧ мꙋ́дрости наꙋчѝ, ры́бари бг҃осло́вцы показа̀, ве́сь собира́етъ собо́ръ цр҃ко́вный: є҆диносꙋ́щне и҆ сопресто́льне ѻ҆ц҃ꙋ̀ и҆ сн҃ꙋ, ᲂу҆тѣ́шителю сла́ва тебѣ̀.
На лїтꙋргі́и блажє́нна ѿ канѡ́на пра́здника, ѻ҆бои́хъ творцѡ́въ пѣ́снь а҃-ѧ, на ѕ҃.
Во вто́рникъ ве́чера,
на Гдⷭ҇и воззва́хъ: поста́вимъ стїхѡ́въ ѕ҃. И҆ пое́мъ стїхи̑ры подо́бны, гла́съ а҃.
Подо́бенъ: Нбⷭ҇ныхъ чинѡ́въ:
Ꙗ҆́кѡ сра́сленно, ꙗ҆́кѡ сво́йственно слове́снымъ небесє́мъ, ѻ҆гнеѻбра́зными ѧ҆зы́ки возвѣща́ти ꙗ҆зы́кѡмъ сла́вꙋ бг҃а, <<сѯ҃д ѡ҆б.: 528>> ѻ҆гне́мъ нб҃са̀ ᲂу҆краси́вшагѡ, и҆ ѡ҆зари́вшагѡ мі́ръ чꙋ́вственный, съ сн҃омъ же и҆ дх҃омъ.
Въ сїѡ́нѣ собра̑ннымъ ᲂу҆ченикѡ́мъ хрⷭ҇тѡ́вымъ, ꙗ҆́коже ѡ҆бѣща́нїе, дх҃ъ ст҃ы́й на сїѧ̑ прише́дъ ви́домъ ѻ҆́гненнымъ, ѻ҆гнедохнове́нны ѧ҆̀ показа̀, вѣща́нїи та́йными ᲂу҆чє́нїѧ трⷪ҇чєскаѧ виті́йствꙋющыѧ.
Небокова́нныѧ мечѝ, сщ҃є́нныѧ ᲂу҆ченикѝ, сщ҃е́нный дх҃ъ прише́дъ совершѝ: зе́млю ѡ҆ст҃и́ша бг҃ꙋ творцꙋ̀, несвѧщє́нныѧ посѣ́кше, ꙗ҆́кѡ и҆сче́знꙋти ѻ҆рꙋ́жїємъ лꙋка́вагѡ, и҆ спасти́сѧ дꙋша́мъ на́шымъ.
И҆ мине́и, г҃. Сла́ва, и҆ ны́нѣ: гла́съ в҃:
Ви́дѣхомъ свѣ́тъ и҆́стинный, прїѧ́хомъ дх҃а нбⷭ҇наго, ѡ҆брѣто́хомъ вѣ́рꙋ и҆́стиннꙋю, нераздѣ́льнѣй трⷪ҇цѣ покла́нѧемсѧ: та́ бо на́съ спасла̀ є҆́сть.
На стїхо́внѣ стїхи̑ры подо́бны, гла́съ д҃.
Подо́бенъ: Да́лъ є҆сѝ зна́менїе:
Дне́сь на́йде прест҃а́гѡ твоегѡ̀ дх҃а дѣ́йствїе гдⷭ҇и на а҆по́столы твоѧ̑, и҆ премꙋ́дры показа́въ бг҃овѣ́дѣнїемъ, и҆ и҆спо́лни ѧ҆̀ бл҃же́ннагѡ ᲂу҆че́нїѧ твоегѡ̀. тѣ́мже твоѐ сп҃си́тельное смотре́нїе сла́вимъ, і҆и҃се всеси́льне, сп҃се дꙋ́шъ на́шихъ.
Сті́хъ: Се́рдце чи́сто сози́жди во мнѣ̀ бж҃е:
Дне́сь дх҃ъ тво́й всеси́льный влⷣко, ѿ ѻ҆ц҃а̀ посыла́етсѧ, тебѣ̀ є҆диносꙋ́щный, во ѻ҆́гненныхъ ѧ҆зы́цѣхъ, подаѧ́ти же вели̑чїѧ твоѧ̑ глаго́лати, а҆пⷭ҇лы твоѧ̑ ᲂу҆стро́и. тѣ́мже спаси́тельное твоѐ смотре́нїе сла́вимъ, і҆и҃се всеси́льне, сп҃се дꙋ́шъ на́шихъ.
Сті́хъ: Не ѿве́ржи менѐ ѿ лица̀ твоегѡ̀:
Дне́сь и҆злїѧ́лъ є҆сѝ ᲂу҆тѣ́шителѧ твоегѡ̀ дх҃а, сп҃се, <<сѯ҃є: 529>> дарова̑нїѧ, пода́въ чл҃вѣ́ческомꙋ є҆стествꙋ̀ проро́чествовати, ꙗ҆́коже ре́клъ є҆сѝ сло́ве, и҆ трⷪ҇цѣ покланѧ́тисѧ нераздѣ́льнѡ снаказа́лъ є҆сѝ. тѣ́мже твоѐ спаси́тельное смотре́нїе сла́вимъ, і҆и҃се всеси́льне, сп҃се дꙋ́шъ на́шихъ.
Сла́ва и҆ ны́нѣ: гла́съ ѕ҃.
Гдⷭ҇и, ст҃а́гѡ дх҃а наше́ствїе, а҆пⷭ҇лы твоѧ̑ и҆спо́лнившее, и҆ны́ми ѧ҆зы́ки глаго́лати ᲂу҆стро́и: тѣ́мже пресла́вное, невѣ̑рнымъ ᲂу҆́бѡ пїѧ́нство мнѧ́шесѧ, вѣ̑рнымъ же хода́тайственно спасе́нїѧ. є҆гѡ́же сїѧ́нїѧ и҆ на́съ сподо́би, мо́лимъ ти сѧ человѣколю́бче.
Та́же, Ны́нѣ ѿпꙋща́еши: тропа́рь, и҆ ѿпꙋ́стъ.
Въ сре́дꙋ на ᲂу҆́трени,
на Бг҃ъ гдⷭ҇ь: тропа́рь пра́здника три́жды.
По а҃-й каѳі́смѣ сѣда́ленъ, гла́съ є҃.
Подо́бенъ: Собезнача́льное:
Дх҃о́внаѧ бл҃года́ть, прише́дши ѿ ни́щихъ ловє́цъ а҆по́стѡлъ твои́хъ, просвѣтѝ хрⷭ҇тѐ премꙋ̑дрыѧ и҆ кнѧ́зи: и҆́хже ᲂу҆че́нїемъ и҆ мы̀ пѧтдесѧ́тницы пра́здникъ свѣ́тлый при́снѡ соверша́емъ, со ѻ҆ц҃е́мъ тебѐ пою́ще и҆ бжⷭ҇твеннымъ дх҃омъ.
Сла́ва, и҆ ны́нѣ: то́йже.
По в҃-й каѳі́смѣ сѣда́ленъ, гла́съ и҃.
Подо́бенъ: Премꙋ́дрости:
Всест҃ы́й дх҃ъ ны́нѣ соше́дъ на а҆пⷭ҇лы ви́домъ ѻ҆гнѧ̀, ᲂу҆́жасомъ и҆спо́лни ꙗ҆зы̑къ собра̑нїѧ: ѧ҆зы́ки бо <<сѯ҃є ѡ҆б.: 530>> ѻ҆́гненными чл҃вѣколю́бче глаго́лющымъ, свою̀ кі́йждо бесѣ́дꙋ слы́шаше. тѣ́мже и҆ чꙋ́до невѣ̑рнымъ, ꙗ҆́кѡ пїѧ́нство, вѣ̑рнымъ же спасе́нїе вои́стиннꙋ познава́шесѧ: сегѡ̀ ра́ди сла́вимъ держа́вꙋ твою̀ хрⷭ҇тѐ бж҃е, прегрѣше́нїй ѡ҆ставле́нїѧ просѧ́ще, низпосла́ти бога́тнѡ рабѡ́мъ твои́мъ.
Сла́ва, и҆ ны́нѣ: то́йже:
Канѡ́нъ пра́здника, и҆ мине́и. По ѳ҃-й пѣ́сни, є҆ѯапостїла́рїй пра́здника.
На стїхо́внѣ стїхи̑ры, гла́съ в҃.
Подо́бенъ: До́ме є҆ѵфра́ѳовъ:
Свы́ше къ на́мъ ᲂу҆тѣ́шителю прише́дый, ꙗ҆́коже пе́рвѣе ко а҆пⷭ҇лѡмъ, ѡ҆свѧтѝ и҆ спасѝ тебѐ бг҃а проповѣ́дающихъ.
Сті́хъ: Се́рдце чи́сто сози́жди во мнѣ̀ бж҃е:
Внеза́пꙋ съ нб҃сѐ, а҆по́столы всѧ̑, бж҃е́ственнагѡ ᲂу҆тѣ́шителѧ си́ла, всемꙋ́дры и҆ бг҃осло́вцы показа̀.
Сті́хъ: Не ѿве́ржи менѐ ѿ лица̀ твоегѡ̀:
Заре́ю бг҃онача́льною ᲂу҆́мъ просвѣти́вше, ᲂу҆ченицы̀ твоѝ сло́ве, сꙋ́щественнѡ дх҃ъ ст҃ы́й прїѧ́ша.
Сла́ва, и҆ ны́нѣ: гла́съ ѕ҃:
Цр҃ю̀ нбⷭ҇ный, ᲂу҆тѣ́шителю, дш҃е и҆́стины, и҆́же вездѣ̀ сы́й, и҆ всѧ̑ и҆сполнѧ́ѧй, сокро́вище бл҃ги́хъ, и҆ жи́зни пода́телю, прїидѝ и҆ всели́сѧ въ ны̀, и҆ ѡ҆чи́сти ны̀ ѿ всѧ́кїѧ скве́рны, и҆ спасѝ бл҃же дꙋ́шы на́шѧ.
Та́же ча́съ а҃-й. И҆ ѿпꙋ́стъ.
На лїтꙋргі́и блажє́нна ѿ канѡ́на пра́здника, ѻ҆бои́хъ творцѡ́въ пѣ́снь д҃-ѧ, на ѕ҃. <<сѯ҃ѕ: 531>>
Въ тꙋ́ же сре́дꙋ пѧтдесѧ́тнꙋю ве́чера,
на Гдⷭ҇и воззва́хъ: поста́вимъ стїхѡ́въ, ѕ҃: пра́здника г҃, и҆ мине́и г҃: Стїхи̑ры пра́здника, гла́съ д҃.
Подо́бенъ: Зва́нный свы́ше:
Сѐ де́нь ра́дости и҆ весе́лїѧ, свы́ше ꙗ҆ви́сѧ свѧщє́ннымъ ᲂу҆ченикѡ́мъ дх҃ъ ст҃ы́й дне́сь, ѻ҆́гненнымъ ви́домъ ѿ ѻ҆ц҃а̀, и҆ всѣ́хъ просвѣтѝ: сказа́тели ꙗ҆вѝ ры́бари мꙋдрецы̀, ꙗ҆́коже лꙋка̀ написа̀ бг҃огла́сный, дх҃омъ нꙋ́жнымъ и҆сполнѧ́ѧй всѧ́чєскаѧ. тѣ́мже вѣ́рою дивѧ́щесѧ, восхвалѧ́емъ хрⷭ҇та̀ бг҃а на́шегѡ мно́гꙋю млⷭ҇ть, и҆ кра́йнее снизше́ствїе.
Пѧтдесѧ́тницꙋ пра́зднꙋимъ ст҃ꙋ́ю, и҆ дх҃а си́лꙋ, и҆ и҆́стиннꙋю ра́дость, бж҃е́ственныѧ наде́жди соверше́нїе, и҆ та́инства є҆́же ѿ вѣ́ка ꙗ҆ви́вшагѡсѧ на́мъ. тѣ́мже и҆ вопїе́мъ тѝ: содѣ́телю всѣ́хъ, не ѿимѝ дх҃а твоегѡ̀ ѿ на́съ сло́ве, но съ нб҃сѐ сп҃се послѝ, моли́твами ст҃ы́хъ и҆ всесла́вныхъ честны́хъ а҆по́стѡлъ твои́хъ, ми́ръ пода́ждь дꙋша́мъ на́шымъ, мо́лимсѧ.
Нб҃са̀ ѡ҆дꙋшевлє́ннаѧ повѣ́даютъ дне́сь сп҃сова вели̑чїѧ, и҆ ве́сь мі́ръ проидо́ша, ꙗ҆́снѡ проповѣ́дати ᲂу҆тѣ́шителевꙋ бж҃е́ственнꙋю си́лꙋ, и҆ просвѣти́ша всю̀ тва́рь ᲂу҆че́ньми, є҆́же воспѣва́ти нераздѣли́мꙋю трⷪ҇цꙋ є҆ди́нꙋ, въ трѝ ли́ца неслїѧ́ннꙋ. тѣ́мже вѣ́рою пра́зднꙋемъ ст҃а́гѡ дх҃а прише́ствїе, свы́ше ꙗ҆ви́вшеесѧ, и҆ просвѣща́ющее концы̀.
Сла́ва и҆ ны́нѣ, гла́съ з҃:
Оу҆тѣ́шителѧ и҆мꙋ́ще ко ѻ҆ц҃ꙋ̀ хрⷭ҇та̀ бг҃а, ᲂу҆тѣ́шителю <<сѯ҃ѕ ѡ҆б.: 532>> и҆но́мꙋ прише́дшемꙋ къ на́мъ на зе́млю дне́сь, дх҃ꙋ ст҃о́мꙋ вѣ́рою поклони́мсѧ.
Та́же: Свѣ́те ти́хїй:
На стїхо́внѣ стїхи̑ры, гла́съ а҃.
Подо́бенъ: Прехва́льнїи мч҃нцы:
Дх҃а ст҃а́го, ѿ ѻ҆ц҃а̀ и҆сходѧ́щаго, и҆ въ сн҃ѣ прославлѧ́емаго, и҆́мже и҆ но́сѧтсѧ и҆ держа́тсѧ всѧ̑, и҆ живото́мъ содержа́тсѧ, и҆ живꙋ́тъ, и҆ пребыва́ютъ, и҆ спаса́ютсѧ, бг҃осло́вимъ: непостижи́мый ᲂу҆тѣ́шителю, ми́ръ мі́рови твоемꙋ̀ да́рꙋй.
Сті́хъ: Се́рдце чи́сто сози́жди во мнѣ̀ бж҃е:
Дх҃ъ ст҃ы́й, и҆сто́чникъ всѧ́кїѧ бл҃гости, сꙋ́щественнѣ прїи́де, земны̑ѧ концы̀ нбⷭ҇ною си́лою, а҆пⷭ҇лъ ра́ди и҆спо́лнити, и҆ бж҃е́ственною бл҃гостїю. томꙋ̀ возопїи́мъ: несказа́нный ᲂу҆тѣ́шителю, ми́ръ мі́рови твоемꙋ̀ да́рꙋй.
Сті́хъ: Не ѿве́ржи менѐ ѿ лица̀ твоегѡ̀:
Дх҃ъ ст҃ы́й бг҃ъ, сра́сленъ и҆ сопресто́ленъ ѻ҆ц҃ꙋ̀ и҆ сло́вꙋ познава́етсѧ, свѣ́тъ пресоверше́нный ѿ свѣ́та просїѧ́вый, ѿ безнача́льнагѡ соверше́ннагѡ ѻ҆ц҃а̀, и҆ сн҃омъ происходѧ́й. томꙋ̀ возопїи́мъ: жизнода́вче ᲂу҆тѣ́шителю, ми́ръ мі́рови твоемꙋ̀ да́рꙋй.
Сла́ва, и҆ ны́нѣ, гла́съ и҃:
Є҆гда̀ дх҃а твоего̀ посла́лъ є҆сѝ гдⷭ҇и, сѣдѧ́щымъ а҆по́столѡмъ, тогда̀ є҆врє́йскїѧ дѣ́ти зрѧ́ще ᲂу҆жаса́хꙋсѧ ᲂу҆́жасомъ: слы́шахꙋ бо ѧ҆̀ вѣща́ющѧ и҆ны́ми стра́нными ѧ҆зы́ки, ꙗ҆́коже дх҃ъ подава́ше и҆̀мъ. невѣ́жди бо сꙋ́ще ᲂу҆мꙋдри́шасѧ, и҆ ꙗ҆зы́ки въ вѣ́рꙋ ᲂу҆лови́вше, бж҃е́ствєннаѧ вѣті́йствовахꙋ. тѣ́мже и҆ мы̀ вопїе́мъ тѝ: и҆́же <<сѯ҃з: 533>> на землѝ ꙗ҆вле́йсѧ, и҆ ѿ пре́лести спасы́й на́съ, гдⷭ҇и сла́ва тебѣ̀.
Та́же: Ны́нѣ ѿпꙋща́еши: тропа́рь. И҆ ѿпꙋ́стъ.
Въ четверто́къ пѧтдесѧ́тныѧ нлⷣи, на ᲂу҆́трени,
на Бг҃ъ гдⷭ҇ь: тропа́рь пра́здника, три́жды. По а҃-й каѳі́смѣ сѣда́ленъ, гла́съ и҃.
Подо́бенъ: Гро́бъ тво́й:
Сѐ проро́чєскаѧ и҆сполнѧ́ютсѧ проречє́нїѧ, сїѧ̑ бо зарѧ́ми примра́чными покры́вый, въ бꙋ́дꙋщихъ ꙗ҆вле́нїе, ꙗ҆́кѡ бг҃ъ ᲂу҆тѣ́шитель, ны́нѣ и҆злїѧ́сѧ а҆пⷭ҇лѡмъ бога́тнѡ, тѣ́ми же и҆ вѣ́рнѡ покланѧ́ющымсѧ трⷪ҇цѣ несозда́ннѣй.
Сла́ва, и҆ ны́нѣ: то́йже.
По в҃-й каѳі́смѣ сѣда́ленъ, гла́съ и҃.
Подо́бенъ: Повелѣ́нное та́йнѡ:
Сп҃совы рачи́телїе ра́дости и҆спо́лнишасѧ, и҆ дерзнове́нїе прїѧ́ша пре́жде боѧ́щїисѧ, ꙗ҆́кѡ дх҃ъ ст҃ы́й дне́сь свы́ше сни́де на до́мъ ᲂу҆чени́ческїй, и҆ и҆́нъ и҆на̑ѧ глаго́лаше къ лю́демъ: ꙗ҆зы́цы бо разсѣ́ѧшасѧ, ви́дими ꙗ҆́кѡ ѻ҆́гнь, и҆ си́хъ не ѡ҆палѝ, но па́че ѡ҆росѝ.
Сла́ва, и҆ ны́нѣ: то́йже.
Канѡ́нъ пра́здника, гла́съ з҃, со і҆рмосо́мъ на и҃. И҆ ст҃а́гѡ въ мине́и на д҃. По ѳ҃-й пѣ́сни, є҆ѯапостїла́рїй пра́здника, два́жды.
На стїхо́внѣ стїхи̑ры, гла́съ ѕ҃.
Подо́бенъ: Тридне́внѡ:
Дх҃ъ всест҃ы́й, ѻ҆ц҃ꙋ̀ є҆диносꙋ́щенъ и҆ сло́вꙋ, наше́дъ на ᲂу҆ченикѝ, ѻ҆́гненны брє́нныѧ содѣ́ла ѧ҆зы́ки, просвѣща́ѧй бж҃е́ственною бл҃года́тїю. <<сѯ҃з ѡ҆б.: 534>>
Сті́хъ: Се́рдце чи́сто сози́жди во мнѣ̀ бж҃е:
Дх҃ъ всест҃ы́й ѡ҆бновѝ въ на́съ бж҃е, є҆го́же дре́вле посла́лъ є҆сѝ ᲂу҆ченикѡ́мъ твои́мъ ще́дре, ᲂу҆крѣпи́лъ є҆сѝ и҆спо́лнити въ мі́рѣ твоѧ̑ спаси́тєльнаѧ хотѣ̑нїѧ.
Сті́хъ: Не ѿве́ржи менѐ ѿ лица̀ твоегѡ̀:
Глаго́лавый во прⷪ҇ро́цѣхъ и҆ногда̀ ᲂу҆тѣ́шителю, содѣ́лалъ є҆сѝ ны́нѣ нб҃са̀, вѣща́ющыѧ сла́вꙋ бж҃їю, бжⷭ҇твєнныѧ а҆пⷭ҇лы: и҆́миже пода́ждь на́мъ ѡ҆чище́нїе и҆ ве́лїю млⷭ҇ть.
Сла́ва, и҆ ны́нѣ: гла́съ в҃:
Во дво́рѣхъ твои́хъ гдⷭ҇и, вѣ́рнїи кѡлѣ́на дꙋ́шъ и҆ тѣле́съ прекло́нше, воспѣва́емъ тѧ̀ безнача́льнаго ѻ҆ц҃а̀, и҆ собезнача́льнаго сн҃а, и҆ соприсносꙋ́щнаго и҆ прест҃а́го дх҃а, просвѣща́ющаго и҆ ѡ҆сщ҃а́ющаго дꙋ́шы на́шѧ.
Та́же ча́съ а҃-й. И҆ ѿпꙋ́стъ.
На лїтꙋргі́и бл҃жє́нна ѿ канѡ́на пра́здника, ѻ҆бои́хъ творцѡ́въ пѣ́снь є҃-ѧ, на ѕ҃.
Въ четверто́къ ве́чера,
на Гдⷭ҇и воззва́хъ: поста́вимъ стїхѡ́въ ѕ҃: пра́здника г҃, и҆ мине́и, г҃.
Стїхи̑ры пра́здника, гла́съ д҃.
Подо́бенъ: Да́лъ є҆сѝ зна́менїе:
Дне́сь на́йде прест҃а́гѡ твоегѡ̀ дх҃а дѣ́йствїе гдⷭ҇и на а҆пⷭ҇лы твоѧ̑, и҆ премꙋ́дры показа́въ бг҃овѣ́дѣнїемъ, и҆спо́лни ѧ҆̀ бл҃же́ннагѡ ᲂу҆че́нїѧ твоегѡ̀. тѣ́мже твоѐ спаси́тельное смотре́нїе сла́вимъ, і҆и҃се всеси́льне, сп҃се дꙋ́шъ на́шихъ. <<сѯ҃и: 535>>
Дне́сь дх҃ъ тво́й всеси́льный влⷣко, ѿ ѻ҆ц҃а̀ посыла́етсѧ, тебѣ̀ є҆диносꙋ́щный, во ѻ҆́гненныхъ ѧ҆зы́цѣхъ, подаѧ́ти же вели̑чїѧ твоѧ̑ глаго́лати а҆пⷭ҇лы твоѧ̑ ᲂу҆стро́и. тѣ́мже спаси́тельное твоѐ смотре́нїе сла́вимъ, і҆и҃се всеси́льне, сп҃се дꙋ́шъ на́шихъ.
Дне́сь и҆злїѧ́лъ є҆сѝ ᲂу҆тѣ́шителѧ твоегѡ̀ дх҃а, сп҃се, дарова̑нїѧ, пода́въ человѣ́ческомꙋ є҆стествꙋ̀ проро́чествовати, ꙗ҆́коже ре́клъ є҆сѝ сло́ве, и҆ трⷪ҇цѣ покланѧ́тисѧ нераздѣ́льнѡ снаказа́лъ є҆сѝ. тѣ́мже твоѐ спаси́тельное смотре́нїе сла́вимъ, і҆и҃се всеси́льне, сп҃се дꙋ́шъ на́шихъ.
Сла́ва, и҆ ны́нѣ: гла́съ в҃:
Трⷪ҇цꙋ є҆диносꙋ́щнꙋю пѣсносло́вимъ, ѻ҆ц҃а̀ и҆ сн҃а, со ст҃ы́мъ дх҃омъ: сїю́ бо проповѣ́даша всѝ проро́цы, и҆ а҆пⷭ҇ли съ мꙋ́ченики.
Та́же: Свѣ́те ти́хїй:
На стїхо́внѣ стїхи̑ры, гла́съ а҃.
Подо́бенъ: Нбⷭ҇ныхъ чинѡ́въ:
Мѡѷсе́й на горѣ̀ сꙋ́щаго ѻ҆гне́мъ ви́дѣ, но и҆ бг҃ови́дцємъ и҆ мꙋ̑дрымъ а҆по́столѡмъ, дх҃ъ ѻ҆гнезра́чнѡ схо́дитъ ны́нѣ, а҆́ки ꙗ҆́вственнѡ просвѣща́ѧ, ꙗ҆́коже є҆ди́нъ бг҃ъ глаго́лавый тогда̀, и҆ ны́нѣ въ то́ждествѣ є҆стества̀.
Сті́хъ: Се́рдце чи́сто сози́жди во мнѣ̀ бж҃е:
Ѻ҆гнезра́чными ѧ҆зы́ки бг҃оглаго́ливїи, къ водѣ̀ креще́нїѧ бж҃е́ственнагѡ зовꙋ́ще, ри́торѡвъ блѧ̑ди безбо́жныхъ ѻ҆гне́мъ дх҃а попали́ша: но просвѣтѝ ᲂу҆тѣ́шителю, и҆ на́съ вѣ́рнѡ бг҃осло́вѧщихъ тѧ̀.
Сті́хъ: Не ѿве́ржи менѐ ѿ лица̀ твоегѡ̀:
И҆ и҆̀же въ веществѣ̀ бж҃е мо́й тебѣ̀ послꙋжи́вшыѧ <<сѯ҃и ѡ҆б.: 536>> прїе́мшыѧ дебе́лость вещества̀ неизрече́ннѡ, ꙗ҆́коже дре́вле невеще́ственныхъ ѻ҆гне́мъ новотвори́ши пла́менныѧ дх҃а, ꙗ҆́кѡ многопѣва́емь є҆сѝ, ꙗ҆́кѡ чꙋ́денъ въ дѣ́лѣхъ твои́хъ чл҃вѣколю́бче.
Сла́ва и҆ ны́нѣ: гла́съ ѕ҃:
Оу҆тѣ́шителѧ и҆мꙋ́ще ко ѻ҆ц҃ꙋ̀ хрⷭ҇та̀ бг҃а, ᲂу҆тѣ́шителю и҆но́мꙋ прише́дшꙋ къ на́мъ на зе́млю дне́сь, дх҃ꙋ ст҃о́мꙋ вѣ́рою поклони́мсѧ.
Та́же: Ны́нѣ ѿпꙋща́еши: тропа́рь пра́здника, и҆ ѿпꙋ́стъ.
[зрѝ] Зна́й и҆ сѐ, ꙗ҆́кѡ слꙋ̑жбы ст҃ы́хъ, прилꙋчи́вшихсѧ въ сꙋббѡ́тꙋ грѧдꙋ́щꙋю, и҆ недѣ́лю всѣ́хъ ст҃ы́хъ, пое́мъ є҆ди́нагѡ напредѝ, а҆ дрꙋга́гѡ въ настоѧ́щїй пѧто́къ на повече́рїи.
Въ пѧто́къ пѧтдесѧ́тныѧ недѣ́ли на ᲂу҆́трени,
на Бг҃ъ гдⷭ҇ь: тропа́рь пра́здника, три́жды. По а҃-й каѳі́смѣ сѣда́ленъ, гла́съ а҃.
Подо́бенъ: Гро́бъ тво́й:
Сѐ проро́чєскаѧ и҆сполнѧ́ютсѧ проречє́нїѧ, сїѧ̑ бо зарѧ́ми примра́чными покры́вый, въ бꙋ́дꙋщихъ ꙗ҆вле́нїе, ꙗ҆́кѡ бг҃ъ ᲂу҆тѣ́шитель, ны́нѣ и҆злїѧ́сѧ а҆пⷭ҇лѡмъ бога́тнѡ, тѣ́ми же и҆ вѣ́рнѡ покланѧ́ющымсѧ трⷪ҇цѣ несозда́ннѣй.
Сла́ва, и҆ ны́нѣ: то́йже.
По в҃-й каѳі́смѣ сѣда́ленъ, гла́съ и҃.
Подо́бенъ: Премꙋ́дрости:
Всест҃ы́й дх҃ъ ны́нѣ соше́дъ на а҆пⷭ҇лы ви́домъ ѻ҆гнѧ̀, ᲂу҆́жасомъ и҆спо́лни ꙗ҆зы̑къ собра̑нїѧ: ѧ҆зы́ки бо ѻ҆́гненными чл҃вѣколю́бче глаго́лющымъ, свою̀ кі́йждо бесѣ́дꙋ слы́шаше. тѣ́мже и҆ чꙋ́до невѣ̑рнымъ, ꙗ҆́кѡ пїѧ́нство, вѣ̑рнымъ же спасе́нїе вои́стиннꙋ познава́шесѧ: сегѡ̀ ра́ди сла́вимъ <<сѯ҃ѳ: 537>> держа́вꙋ твою̀ хрⷭ҇тѐ бж҃е, прегрѣше́нїй ѡ҆ставле́нїѧ просѧ́ще, низпосла́ти бога́тнѡ рабѡ́мъ твои́мъ.
Сла́ва, и҆ ны́нѣ: то́йже.
Канѡ́нъ пра́здника, гла́съ д҃, со і҆рмосо́мъ на и҃. И҆ ст҃а́гѡ на д҃. По ѳ҃-й пѣ́сни є҆ѯапостїла́рїй пра́здника два́жды.
На стїхо́внѣ стїхи̑ры, гла́съ ѕ҃.
Подо́бенъ: Тридне́венъ:
Дх҃ꙋ всест҃о́мꙋ, со ѻ҆ц҃е́мъ пѣва́емомꙋ, и҆ съ сн҃омъ же, воспои́мъ вѣ́рнїи, кла́нѧющесѧ непреста́ннѡ: трⷪ҇цꙋ прест҃ꙋ́ю бг҃а лю́дїе славосло́вимъ.
Сті́хъ: Се́рдце чи́сто сози́жди во мнѣ̀ бж҃е:
Тебѐ дх҃а ᲂу҆тѣ́шителѧ вѣ́рнѡ восхва́лимъ, со сщ҃е́нными и҆ бж҃е́ственными а҆пⷭ҇лы: въ тре́тїй бо ча́съ, ꙗ҆́коже ѡ҆бѣща̀, тебѐ ѿ ѻ҆ц҃а̀ свѣ́тѡвъ посла̀ хрⷭ҇то́съ.
Сті́хъ: Не ѿве́ржи менѐ ѿ лица̀ твоегѡ̀:
Трⷪ҇це ст҃а́ѧ, сла́ва тебѣ̀, въ пѣ́снехъ покланѧ́юсѧ трⷪ҇чески, ѻ҆ц҃ꙋ̀, и҆ дх҃ꙋ пра́вомꙋ, съ сн҃омъ: и҆ поѧ̀ тебѐ трⷪ҇це бж҃е́ственнѣ, достодо́лжнѡ вѣ́рнѡ почита́ю.
Сла́ва, и҆ ны́нѣ: гла́съ и҃:
Є҆гда̀ дх҃а твоего̀ посла́лъ є҆сѝ гдⷭ҇и, сѣдѧ́щымъ а҆пⷭ҇лѡмъ, тогда̀ є҆врє́йскїѧ дѣ́ти зрѧ́ще ᲂу҆жаса́хꙋсѧ ᲂу҆́жасомъ: слы́шахꙋ бо ѧ҆̀ вѣща́ющѧ и҆ны́ми стра́нными ꙗ҆зы́ки, ꙗ҆́коже дх҃ъ подава́ше и҆̀мъ. невѣ́жди бо сꙋ́ще ᲂу҆мꙋдри́шасѧ, и҆ ꙗ҆зы́ки въ вѣ́рꙋ ᲂу҆лови́вше, бж҃е́ствєннаѧ вѣті́йствовахꙋ. тѣ́мже и҆ мы̀ вопїе́мъ тѝ: и҆́же на землѝ ꙗ҆вле́йсѧ, и҆ ѿ пре́лести спасы́й на́съ, гдⷭ҇и сла́ва тебѣ̀.
Та́же, ча́съ пе́рвый. И҆ ѿпꙋ́стъ.
На лїтꙋргі́и бл҃жє́нна ѿ канѡ́на пра́здника, пѣ́снь з҃-ѧ и҆ и҃-ѧ на ѕ҃. <<сѯ҃ѳ ѡ҆б.: 538>>
Въ пѧто́къ ве́чера,
каѳі́сма рѧдова́ѧ. На Гдⷭ҇и воззва́хъ: стїхи̑ры, и҆ слꙋ́жба всѧ̀ пра́здника, кромѣ̀ паремі́й и҆ вхо́да, ꙗ҆́коже ᲂу҆каза́сѧ на ѿда́нїе вознесе́нїѧ хрⷭ҇то́ва.
Та́кожде и҆ въ сїю̀
сꙋббѡ́тꙋ и҃-ю на ᲂу҆́трени,
слꙋ́жба всѧ̀ пра́здника, кромѣ̀ полѷеле́а, и҆ степє́нны и҆ є҆ѵⷢ҇лїа: то́чїю на ᲂу҆́трени канѡ́нъ пра́здника со і҆рмосо́мъ на и҃: і҆рмо́съ по два́жды. Дрꙋгі́й канѡ́нъ пра́здника со і҆рмосо́мъ на ѕ҃: і҆рмо́съ по два́жды. Катава́сїа, і҆рмо́съ в҃-гѡ канѡ́на: Бж҃е́ственнымъ покрове́нъ: ѻ҆́ба ли́ка вкꙋ́пѣ. Славосло́вїе вели́кое, и҆ є҆ктєнїѝ и҆ ѿпꙋ́стъ. На ѿпꙋ́стѣ помина́етъ і҆ере́й ст҃а́го, є҆гѡ́же є҆́сть де́нь. И҆ ча́съ пе́рвый. На часѣ́хъ тропа́рь и҆ конда́къ пра́здника. И҆ коне́чный ѿпꙋ́стъ.
На лїтꙋргі́и: Блажє́нна пра́здника, пѣ́снь ѳ҃- ѧ ѻ҆бои́хъ канѡ́нѡвъ, на и҃. По вхо́дѣ тропа́рь пра́здника: Сла́ва, и҆ ны́нѣ: конда́къ. Трист҃о́е, прокі́менъ, и҆ а҆ллилꙋ́їа пра́здника. А҆пⷭ҇лъ днѐ, къ ри́млѧнѡмъ, зача́ло ѻ҃ѳ: Па́ѵелъ ра́бъ і҆и҃съ хрⷭ҇то́въ: Є҆ѵⷢ҇лїе матѳе́а, зача́ло є҃і: Просѧ́щемꙋ ᲂу҆ тебѐ да́й: Прича́стенъ пра́здника: Дх҃ъ тво́й бл҃гі́й наста́витъ мѧ̀ на зе́млю пра́вꙋ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.