Святая Пятидесятница

<<сл҃з: 473>>

Недѣ́лѧ ст҃ы́ѧ пентико́стїи.

Въ сꙋббѡ́тꙋ ве́чера,

на ма́лѣй вече́рни,

на Гдⷭ҇и воззва́хъ: поста́вимъ стїхѝ д҃. И҆ пое́мъ стїхи̑ры, гла́съ а҃:

Пѧтдесѧ́тницꙋ пра́зднꙋимъ, и҆ дх҃а прише́ствїе, и҆ предложе́нїе ѡ҆бѣща́нїѧ, и҆ наде́жди и҆сполне́нїе, и҆ та́инство є҆ли́ко, ꙗ҆́кѡ вели́ко же и҆ че́стно. тѣ́мже вопїе́мъ тѝ: содѣ́телю всѣ́хъ гдⷭ҇и, сла́ва тебѣ̀.[Два́жды.]

Ѧ҆зы́ками и҆норо́дныхъ ѡ҆бнови́лъ є҆сѝ хрⷭ҇тѐ, твоѧ̑ ᲂу҆ченикѝ, да тѣ́ми тѧ̀ проповѣ́дѧтъ безсме́ртнаго сло́ва и҆ бг҃а, подаю́щаго дꙋша́мъ на́шымъ ве́лїю ми́лость.

Всѧ̑ подае́тъ дх҃ъ ст҃ы́й, то́читъ проро́чєствїѧ, сщ҃е́нники соверша́етъ, некни̑жныѧ мꙋ́дрости наꙋчѝ, ры́бари бг҃осло́вцы показа̀, ве́сь собира́етъ собо́ръ цр҃ко́вный: є҆диносꙋ́щне, и҆ сопресто́льне ѻ҆ц҃ꙋ̀ и҆ сн҃ꙋ, ᲂу҆тѣ́шителю, сла́ва тебѣ̀.

Сла́ва, и҆ ны́нѣ: гла́съ и҃:

Є҆гда̀ дх҃а твоего̀ посла́лъ є҆сѝ гдⷭ҇и, сѣдѧ́щымъ а҆пⷭ҇лѡмъ, тогда̀ є҆врє́йскїѧ дѣ́ти зрѧ́ще ᲂу҆жаса́хꙋсѧ ᲂу҆́жасомъ: слы́шахꙋ бо ѧ҆̀ вѣща́ющѧ и҆ны́ми стра́нными ѧ҆зы́ки, <<сл҃з ѡ҆б.: 474>> ꙗ҆́коже дх҃ъ подава́ше и҆̀мъ: невѣ́жди бо сꙋ́ще ᲂу҆мꙋдри́шасѧ, и҆ ꙗ҆зы́ки въ вѣ́рꙋ ᲂу҆лови́вше, бж҃е́ствєннаѧ вѣті́йствовахꙋ. тѣ́мже и҆ мы̀ вопїе́мъ тѝ: и҆́же на землѝ ꙗ҆вле́йсѧ, и҆ ѿ пре́лести спасы́й на́съ, гдⷭ҇и сла́ва тебѣ̀.

На стїхо́внѣ самогла́сны, гла́съ в҃:

Ви́дѣхомъ свѣ́тъ и҆́стинный, прїѧ́хомъ дх҃а небе́снаго, ѡ҆брѣто́хомъ вѣ́рꙋ и҆́стиннꙋю, нераздѣ́льнѣй трⷪ҇цѣ покланѧ́емсѧ: та́ бо на́съ спасла̀ є҆́сть.

Сті́хъ: Се́рдце чи́сто сози́жди во мнѣ̀ бж҃е:

Во проро́цѣхъ возвѣсти́лъ є҆сѝ на́мъ пꙋ́ть спасе́нїѧ, и҆ во а҆пⷭ҇лѣхъ возсїѧ̀ сп҃се на́шъ, бл҃года́ть дх҃а твоегѡ̀. ты̀ є҆сѝ бг҃ъ пе́рвый, ты̀ и҆ по си́хъ, и҆ во вѣ́ки ты̀ є҆сѝ бг҃ъ на́шъ.

Сті́хъ: Не ѿве́ржи менѐ ѿ лица̀ твоегѡ̀:

Во дво́рѣхъ твои́хъ воспою́ тѧ сп҃са мі́ра, и҆ прекло́нь кѡлѣ́на, поклоню́сѧ твое́й непобѣди́мѣй си́лѣ, ве́черъ, и҆ ᲂу҆́трѡ, и҆ полꙋ́дне, и҆ на всѧ́кое вре́мѧ бл҃гословлю́ тѧ гдⷭ҇и.

Сла́ва, и҆ ны́нѣ: гла́съ то́йже:

Трⷪ҇цꙋ є҆диносꙋ́щнꙋю пѣсносло́вимъ, ѻ҆ц҃а̀ и҆ сн҃а, со ст҃ы́мъ дх҃омъ: та́кѡ бо проповѣ́даша всѝ проро́цы, и҆ а҆по́столи съ мꙋ́ченики.

Ны́нѣ ѿпꙋща́еши: Трист҃о́е. Прест҃а́ѧ трⷪ҇це. Ѻ҆́ч҃е на́шъ: Ꙗ҆́кѡ твоѐ є҆́сть црⷭ҇тво: Ѿпꙋсти́тельный тропа́рь, гла́съ и҃: Благослове́нъ є҆сѝ хрⷭ҇тѐ бж҃е на́шъ: И҆ про́чее ѻ҆бы́чно.

И҆ ѿпꙋ́стъ. <<сл҃и: 475>>

На вели́цѣй вече́рни,

ѻ҆бы́чное стїхосло́вїе. На Гдⷭ҇и воззва́хъ: поста́вимъ стїхѡ́въ і҃. И҆ пое́мъ стїхи̑ры самогла́сны г҃ пе́рвыѧ, повторѧ́юще пе́рвꙋю. Та́же є҃, втора́гѡ гла́са, повторѧ́юще пе́рвꙋю.

Гла́съ а҃:

Ѧ҆зы́ками и҆норо́дныхъ ѡ҆бнови́лъ є҆сѝ хрⷭ҇тѐ, твоѧ̑ ᲂу҆ченикѝ, да тѣ́ми тѧ̀ проповѣ́дѧтъ безсме́ртнаго сло́ва бг҃а, подаю́щаго дꙋша́мъ на́шымъ ве́лїю ми́лость.

Всѧ̑ подае́тъ дх҃ъ ст҃ы́й, то́читъ проро́чєствїѧ, сщ҃е́нники соверша́етъ, некни̑жныѧ мꙋ́дрости наꙋчѝ, ры́бари бг҃осло́вцы показа̀, ве́сь собира́етъ собо́ръ цр҃ко́вный. є҆диносꙋ́щне и҆ сопресто́льне ѻ҆ц҃ꙋ̀ и҆ сн҃ꙋ, ᲂу҆тѣ́шителю, сла́ва тебѣ̀.

Гла́съ в҃:

Ви́дѣхомъ свѣ́тъ и҆́стинный, прїѧ́хомъ дх҃а нбⷭ҇наго, ѡ҆брѣто́хомъ вѣ́рꙋ и҆́стиннꙋю, нераздѣ́льнѣй трⷪ҇цѣ покланѧ́емсѧ: та́ бо на́съ спасла̀ є҆́сть. [Два́жды.]

Во проро́цѣхъ возвѣсти́лъ є҆сѝ на́мъ пꙋ́ть спасе́нїѧ, и҆ во а҆пⷭ҇лѣхъ возсїѧ̀ сп҃се на́шъ, бл҃года́ть дх҃а твоегѡ̀: ты̀ є҆сѝ бг҃ъ пе́рвый, ты̀ и҆ по си́хъ, и҆ во вѣ́ки ты̀ є҆сѝ бг҃ъ на́шъ.

Во дво́рѣхъ твои́хъ гдⷭ҇и, вѣ́рнїи кѡлѣ́на дꙋ́шъ и҆ тѣле́съ прекло́нше, воспѣва́емъ тѧ̀ безнача́льнаго ѻ҆ц҃а̀, и҆ собезнача́льнаго сн҃а, и҆ соприсносꙋ́щнаго и҆ прест҃а́го дх҃а, просвѣща́ющаго и҆ ѡ҆свѧща́ющаго дꙋ́шы на́шѧ.

Трⷪ҇цꙋ є҆диносꙋ́щнꙋю пѣсносло́вимъ, ѻ҆ц҃а̀ и҆ сн҃а, со ст҃ы́мъ дх҃омъ: та́кѡ бо проповѣ́даша всѝ проро́цы, и҆ а҆пⷭ҇ли съ мꙋ́ченики.

Сла́ва, и҆ ны́нѣ: гла́съ и҃. Творе́нїе льва̀ влады́ки:

Прїиди́те лю́дїе, трїѷпоста́сномꙋ бж҃ествꙋ̀ поклони́мсѧ, сн҃ꙋ во ѻ҆ц҃ѣ̀, со ст҃ы́мъ дх҃омъ: ѻ҆ц҃ъ бо безлѣ́тнѡ родѝ сн҃а соприсносꙋ́щна и҆ сопресто́льна, и҆ дх҃ъ ст҃ы́й бѣ̀ во ѻ҆ц҃ѣ̀, съ сн҃омъ прославлѧ́емь: є҆ди́на си́ла, є҆ди́но сꙋщество̀, є҆ди́но бж҃ество̀. є҆мꙋ́же покланѧ́ющесѧ всѝ глаго́лемъ: ст҃ы́й бж҃е, всѧ̑ содѣ́ѧвый сн҃омъ, содѣ́йствомъ ст҃а́гѡ дх҃а: ст҃ы́й крѣ́пкїй, и҆́мже ѻ҆ц҃а̀ позна́хомъ, и҆ дх҃ъ ст҃ы́й прїи́де въ мі́ръ: ст҃ы́й безсме́ртный, ᲂу҆тѣ́шительный дш҃е, ѿ ѻ҆ц҃а̀ и҆сходѧ́й, и҆ въ сн҃ѣ почива́ѧй: трⷪ҇це ст҃а́ѧ, сла́ва тебѣ̀.

Вхо́дъ. Свѣ́те ти́хїй: Прокі́менъ днѐ, и҆ чтє́нїѧ.

Чи́слъ чте́нїе. [Глава̀ а҃і.]

Речѐ гдⷭ҇ь къ мѡѷсе́ю: собери́ ми се́дмьдесѧтъ мꙋже́й ѿ ста́рєцъ і҆и҃левыхъ, и҆̀хже ты̀ са́мъ вѣ́си, ꙗ҆́кѡ сі́и сꙋ́ть ста́рцы люде́й, и҆ кни́жники и҆́хъ: и҆ приведе́ши и҆̀хъ въ сѣ́нь свидѣ́нїѧ, и҆ ста́нꙋтъ тꙋ̀ съ тобо́ю. И҆ сни́дꙋ и҆ возглаго́лю та́мѡ съ тобо́ю, и҆ ѿимꙋ̀ ѿ дх҃а сꙋ́щагѡ въ тебѣ̀, и҆ возложꙋ̀ на ни́хъ, и҆ посо́бствꙋютъ съ тобо́ю стремлє́нїѧ люде́й, и҆ не пово́диши и҆̀хъ ты̀ є҆ди́нъ. И҆ собра̀ мѡѷсе́й се́дмьдесѧтъ мꙋже́й ѿ ста́рєцъ люде́й, и҆ <<сл҃ѳ: 477>>поста́ви и҆̀хъ ѻ҆́крестъ сѣ́ни. И҆ сни́де гдⷭ҇ь во ѻ҆́блацѣ, и҆ глаго́ла мѡѷсе́ю, и҆ взѧ́тъ ѿ дх҃а и҆́же въ не́мъ, и҆ положѝ на седми́десѧти мꙋже́й ста́рєцъ: а҆ ꙗ҆́коже почѝ дх҃ъ на ни́хъ, и҆ прореко́ша въ станꙋ̀, и҆ ктомꙋ̀ не приложи́ша. И҆ ѡ҆ста́ша два̀ мꙋ̑жа въ станꙋ̀, и҆́мѧ є҆ди́номꙋ є҆лда́дъ, и҆ и҆́мѧ второ́мꙋ мѡда́дъ, и҆ почѝ на ни́хъ дх҃ъ: и҆ сі́и бѣ́ша ѿ напи́санныхъ, и҆ не прїидо́ша въ сѣ́нь, и҆ проро́чествоваста въ станꙋ̀. И҆ прите́къ ю҆́ноша возвѣстѝ мѡѷсе́ю, и҆ речѐ є҆мꙋ̀, глаго́лѧ: є҆лда́дъ и҆ мѡда́дъ проро́чествꙋета въ станꙋ̀. И҆ ѿвѣща́въ і҆исꙋ́съ сы́нъ наѵи́нъ, предстоѧ́й мѡѷсе́ю, и҆збра́нный є҆гѡ̀, речѐ: го́споди мѡѷсе́е, возбранѝ и҆́ма. И҆ речѐ є҆мꙋ̀ мѡѷсе́й: не ревнꙋ́еши ли ты̀ мнѣ̀; и҆ кто̀ да́стъ всѣ̑мъ лю́демъ гдⷭ҇нимъ бы́ти проро́ки, є҆гда̀ да́стъ гдⷭ҇ь дх҃а своего̀ на ни́хъ;

Проро́чества і҆ѡ́илева чте́нїе. [Глава̀ в҃.]

Та́кѡ глаго́летъ гдⷭ҇ь: ча́да сїѡ́нова ра́дꙋйтесѧ, и҆ весели́тесѧ ѡ҆ гдⷭ҇ѣ бз҃ѣ ва́шемъ: ꙗ҆́кѡ дадѐ ва́мъ бра̑шна въ пра́вдꙋ, и҆ ѡ҆дожди́тъ ва́мъ до́ждь ра́нный и҆ по́здный, ꙗ҆́коже пре́жде. И҆ напо́лнѧтсѧ гꙋ́мна пшени́цы, и҆ и҆злїю́тсѧ точи̑лїѧ вїна̀ и҆ є҆ле́а. И҆ вда́мъ ва́мъ вмѣ́стѡ лѣ́тъ и҆̀хже поѧдо́ша прꙋ́зи и҆ гꙋ́сєницы, и҆ ржа̀ и҆ хрꙋ́стове, си́ла моѧ̀ вели́каѧ, ю҆́же посла́хъ на вы̀. И҆ снѣ́сте ꙗ҆дꙋ́ще и҆ насытите́сѧ, и҆ похва́лите и҆́мѧ гдⷭ҇а бг҃а ва́шегѡ, и҆́же сотворѝ свы́ше чꙋдеса̀: и҆ не постыдѧ́тсѧ лю́дїе моѝ въ вѣ́къ. И҆ разꙋмѣ́ете, ꙗ҆́кѡ посредѣ̀ і҆и҃лѧ а҆́зъ є҆́смь, и҆ а҆́зъ гдⷭ҇ь бг҃ъ ва́шъ, и҆ нѣ́сть и҆но́гѡ ра́звѣ менѐ: и҆ не постыдѧ́тсѧ ктомꙋ̀ лю́дїе моѝ въ вѣ́къ. И҆ бꙋ́детъ по си́хъ, и҆злїю̀ ѿ дх҃а моегѡ̀ на всѧ́кꙋю пло́ть, <<сл҃ѳ ѡ҆б.: 478>> и҆ прорекꙋ́тъ сы́нове ва́ши и҆ дщє́ри ва́шѧ, и҆ ста́рцы ва́ши сѡ́нїѧ ви́дѧтъ, и҆ ю҆́нѡши ва́ши видѣ̑нїѧ ᲂу҆́зрѧтъ. И҆́бо на рабы̀ моѧ̀, и҆ на рабы̑ни моѧ̀ во днѝ ѻ҆́ны и҆злїю̀ ѿ дх҃а моегѡ̀, и҆ прорекꙋ́тъ. И҆ да́мъ чꙋдеса̀ на небесѝ горѣ̀, и҆ зна́мєнїѧ на землѝ ни́зꙋ, кро́вь и҆ ѻ҆́гнь, и҆ кꙋре́нїе ды́ма. Со́лнце преложи́тсѧ во тмꙋ̀, и҆ лꙋна̀ въ кро́вь, пре́жде прише́ствїѧ днѐ гдⷭ҇нѧ вели́кагѡ и҆ стра́шнагѡ. и҆ бꙋ́детъ всѧ́къ, и҆́же а҆́ще призове́тъ и҆́мѧ гдⷭ҇не, спасе́тсѧ.

Проро́чества і҆езекі́илева чте́нїе. [Глава̀ л҃ѕ.]

Та́кѡ глаго́летъ гдⷭ҇ь: прїимꙋ̀ ва́съ ѿ ꙗ҆зы̑къ, и҆ соберꙋ̀ вы̀ ѿ всѣ́хъ ꙗ҆зы̑къ стра́нныхъ, и҆ введꙋ̀ вы̀ въ зе́млю ва́шꙋ, и҆ ѡ҆кроплю̀ на вы̀ чи́стꙋю во́дꙋ, и҆ ѡ҆чи́ститесѧ ѿ всѣ́хъ нечисто́тъ ва́шихъ, и҆ ѿ всѣ́хъ і҆́дѡлъ ва́шихъ, и҆ ѡ҆чи́щꙋ вы̀. И҆ да́мъ ва́мъ се́рдце но́вое, и҆ дꙋ́хъ но́вый да́мъ ва́мъ, и҆ ѿимꙋ̀ се́рдце ка́менное ѿ пло́ти ва́шеѧ, и҆ да́мъ ва́мъ се́рдце плотѧно́е, и҆ дꙋ́хъ мо́й да́мъ въ ва́съ: И҆ сотворю̀, да во ѡ҆правда́нїихъ мои́хъ хо́дите, и҆ сꙋдьбы̑ моѧ̀ сохранитѐ, и҆ сотворитѐ. И҆ вселите́сѧ въ зе́млю, ю҆́же да́хъ ѻ҆ц҃є́мъ ва́шымъ, и҆ бꙋ́дете мѝ въ лю́ди, и҆ а҆́зъ бꙋ́дꙋ ва́мъ въ бг҃а.

На лїті́и стїхи̑ры самогла́сны г҃, втора́гѡ гла́са:

Во проро́цѣхъ возвѣсти́лъ є҆сѝ на́мъ пꙋ́ть спасе́нїѧ, и҆ во а҆по́столѣхъ возсїѧ̀ сп҃се на́шъ, бл҃года́ть дх҃а твоегѡ̀. ты̀ є҆сѝ бг҃ъ пе́рвый, ты̀ и҆ по си́хъ, и҆ во вѣ́ки ты̀ є҆сѝ бг҃ъ на́шъ.

Во дво́рѣхъ твои́хъ воспою́ тѧ сп҃са мі́ра, и҆ прекло́нь кѡлѣ́на, поклоню́сѧ твое́й непобѣди́мѣй си́лѣ, ве́черъ, <<с҃м: 479>> и҆ ᲂу҆́трѡ, и҆ полꙋ́дне, и҆ на всѧ́кое вре́мѧ бл҃гословлю́ тѧ гдⷭ҇и.

Во дво́рѣхъ твои́хъ гдⷭ҇и, вѣ́рнїи, кѡлѣ́на дꙋ́шъ и҆ тѣле́съ прекло́нше, воспѣва́емъ тѧ̀ безнача́льнаго ѻ҆ц҃а̀, и҆ собезнача́льнаго сн҃а, и҆ соприсносꙋ́щнаго и҆ прест҃а́го дх҃а, просвѣща́ющаго и҆ ѡ҆свѧща́ющаго дꙋ́шы на́шѧ.

Сла́ва, и҆ ны́нѣ: гла́съ и҃:

Є҆гда̀ дх҃а твоего̀ посла́лъ є҆сѝ гдⷭ҇и, сѣдѧ́щымъ а҆по́столѡмъ, тогда̀ є҆врє́йскїѧ дѣ́ти зрѧ́ще ᲂу҆жаса́хꙋсѧ ᲂу҆́жасомъ: слы́шахꙋ бо ѧ҆̀ вѣща́ющѧ и҆ны́ми стра́нными ѧ҆зы́ки, ꙗ҆́коже дх҃ъ подава́ше и҆́мъ. невѣ́жди бо сꙋ́ще ᲂу҆мꙋдри́шасѧ, и҆ ꙗ҆зы́ки въ вѣ́рꙋ ᲂу҆лови́вше, бж҃е́ствєннаѧ виті́йствовахꙋ. тѣ́мже и҆ мы̀ вопїе́мъ тѝ: и҆́же на землѝ ꙗ҆вле́йсѧ, и҆ ѿ пре́лести спасы́й на́съ, гдⷭ҇и сла́ва тебѣ̀.

На стїхо́внѣ стїхи̑ры самогла́сны, гла́съ ѕ҃:

Не разꙋмѣ́юще ꙗ҆зы́цы гдⷭ҇и, прест҃а́гѡ дх҃а на а҆пⷭ҇лы твоѧ̑ бы́вшїѧ си́лы, и҆змѣне́нїе ѧ҆зы̑къ пїѧ́нство бы́ти мнѧ́хꙋ. мы́ же ᲂу҆тверди́вшесѧ ѡ҆ ни́хъ, непреста́ннѡ си́це глаго́лемъ: дх҃а твоегѡ̀ ст҃а́гѡ не ѿимѝ ѿ на́съ, мо́лимъ ти сѧ человѣколю́бче.

Сті́хъ: Се́рдце чи́сто сози́жди во мнѣ̀ бж҃е:

Гдⷭ҇и, ст҃а́гѡ дх҃а наше́ствїе, а҆пⷭ҇лы твоѧ̑ и҆спо́лнившее, и҆ны́ми ѧ҆зы́ки глаго́лати ᲂу҆стро́и. тѣ́мже пресла́вное, невѣ̑рнымъ ᲂу҆́бѡ пїѧ́нство мнѧ́шесѧ, вѣ̑рнымъ же хода́тайственно спасе́нїѧ: є҆гѡ́же сїѧ́нїѧ и҆ на́съ сподо́би, мо́лимъ ти сѧ человѣколю́бче. <<с҃м ѡ҆б.: 480>>

Сті́хъ: Не ѿве́ржи менѐ ѿ лица̀ твоегѡ̀:

Цр҃ю̀ нбⷭ҇ный, ᲂу҆тѣ́шителю, дш҃е и҆́стины, и҆́же вездѣ̀ сы́й, и҆ всѧ̑ и҆сполнѧ́ѧй, сокро́вище бл҃ги́хъ, и҆ жи́зни пода́телю, прїидѝ и҆ всели́сѧ въ ны̀, и҆ ѡ҆чи́сти ны̀ ѿ всѧ́кїѧ скве́рны, и҆ спасѝ бл҃же дꙋ́шы на́шѧ.

Сла́ва, и҆ ны́нѣ: гла́съ и҃:

Ꙗ҆зы́цы и҆ногда̀ размѣси́шасѧ, де́рзости ра́ди столпотворе́нїѧ: ꙗ҆зы́цы же ны́нѣ ᲂу҆мꙋдри́шасѧ, сла́вы ра́ди бг҃овѣ́дѣнїѧ. та́мѡ ѡ҆сꙋдѝ нечести̑выѧ погрѣше́нїемъ: здѣ̀ просвѣти́лъ є҆́сть хрⷭ҇то́съ ры́бари дх҃омъ. тогда̀ ᲂу҆праздни́сѧ безгла́сїе къ мꙋче́нїю: ны́нѣ ѡ҆бновлѧ́етсѧ согла́сїе ко спасе́нїю дꙋ́шъ на́шихъ.

Ѿпꙋсти́тельный тропа́рь, гла́съ и҃:

Бл҃гослове́нъ є҆сѝ хрⷭ҇тѐ бж҃е на́шъ, и҆́же премꙋ́дры ловцы̀ ꙗ҆вле́й, низпосла́въ и҆̀мъ дх҃а ст҃а́го, и҆ тѣ́ми ᲂу҆ловле́й вселе́ннꙋю, человѣколю́бче сла́ва тебѣ̀. [Три́жды.]

Та́же бл҃гослове́нїе хлѣ́бѡвъ. И҆ чте́нїе дѣѧ́нїй ст҃ы́хъ а҆пⷭ҇лъ. [зрѝ] А҆́ще ли не бꙋ́детъ бдѣ́нїѧ: По Ны́нѣ ѿпꙋща́еши: тропа́рь пра́здника є҆ди́ножды. На повече́рїи, по Досто́йно: и҆ по трист҃о́мъ, конда́къ пра́здника. Полꙋ́нощницꙋ пое́мъ по ѻ҆бы́чаю.

Канѡ́нъ глаго́лемъ трⷪ҇ченъ во ѻ҆ктѡ́ихѣ, гла́са.

На ᲂу҆́трени,

на Бг҃ъ гдⷭ҇ь: тропа́рь пра́здника, три́жды.

По а҃-мъ стїхосло́вїи сѣда́ленъ, гла́съ д҃.

Подо́бенъ: Оу҆диви́сѧ і҆ѡ́сифъ:

Попра́зднственный вѣ́рнїи, и҆ коне́чный пра́здникъ пра́зднꙋимъ свѣ́тлѡ, се́й є҆́сть пѧтдесѧ́тница, ѡ҆бѣща́нїѧ <<см҃а: 481>> и҆сполне́нїе и҆ предложе́нїѧ: въ се́й бо ѻ҆́гнь ᲂу҆тѣ́шителевъ сни́де на зе́млю, ꙗ҆́кѡ въ ви́дѣ ѧ҆зы̑къ, и҆ ᲂу҆ченикѝ просвѣтѝ, и҆ сїѧ̑ нб҃отаи́нники показа̀. свѣ́тъ прїи́де ᲂу҆тѣ́шителѧ, и҆ мі́ръ просвѣтѝ. [Два́жды.]

И҆ быва́етъ чте́нїе въ толкова́нїи і҆ѡа́нна, Сло́во и҃: Въ послѣ́днїй де́нь: на́двое.

По в҃-й каѳі́смѣ сѣда́ленъ, гла́съ и҃ подо́бенъ то́йже:

Дх҃а и҆сто́чникъ прише́дъ на зе́млю, во ѻ҆́гненныѧ рѣ́ки раздѣлѧ́ѧсѧ мы́сленнѡ, а҆пⷭ҇лы ѡ҆роша́ше просвѣща́ѧ: и҆ бы́сть и҆̀мъ ѻ҆́блакъ ѡ҆роша́ѧй ѻ҆́гнь, просвѣща́ѧй тѣ́хъ, и҆ ѡ҆дождѧ́ѧй пла́мень, и҆́миже мы̀ прїѧ́хомъ благода́ть, ѻ҆гне́мъ же и҆ водо́ю. свѣ́тъ прїи́де ᲂу҆тѣ́шителѧ, и҆ мі́ръ просвѣтѝ. [Два́жды.]

И҆ чте́нїе. По полѷеле́и сѣда́ленъ, гла́съ и҃. Подо́бенъ: Повелѣ́нное та́йнѡ:

По воста́нїи хрⷭ҇тѐ, є҆́же ѿ гро́ба, и҆ є҆́же къ высотѣ̀ нбⷭ҇ной бж҃е́ственномъ вознесе́нїи, бг҃ови́дцємъ сла́вꙋ твою̀ низпосла́лъ є҆сѝ ще́дре, дх҃а пра́ваго ѡ҆бнови́вый ᲂу҆ченикѡ́мъ. тѣ́мже ꙗ҆́кѡ гꙋ́сль мꙋсїкі́йскаѧ, всѣ̑мъ ᲂу҆ѧсни́сѧ бж҃е́ственнымъ брѧца́ломъ та́йнѡ сп҃се глаше́нїѧ, и҆ смотре́нїе твоѐ. [Два́жды.]

И҆ чте́нїе въ бг҃осло́вѣ. Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Дх҃ъ тво́й бл҃гі́й наста́витъ мѧ̀ на зе́млю пра́вꙋ. Сті́хъ: Гдⷭ҇и ᲂу҆слы́ши мл҃твꙋ мою̀, внꙋшѝ моле́нїе моѐ. Всѧ́кое дыха́нїе: Є҆ѵⷢ҇лїе і҆ѡа́нна, зача́ло ѯ҃є: Сꙋ́щꙋ по́здѣ: Коне́цъ: И҆̀мже держитѐ, держа́тсѧ.

Воскрⷭ҇нїе хрⷭ҇то́во: не глаго́лемъ, но а҆́бїе ѱало́мъ н҃. Та́же, Сла́ва: Мл҃твами а҆пⷭ҇лъ: И҆ ны́нѣ: Мл҃твами бцⷣы: Та́же сті́хъ: <<см҃а ѡ҆б.: 482>> Поми́лꙋй мѧ̀ бж҃е: Стїхи́ра, гла́съ ѕ҃: Цр҃ю̀ нбⷭ҇ный:

Канѡ́на пра́здника два̀. І҆рмосы̀ ѻ҆бою̀ канѡ́нѡвъ по два́жды, а҆ тропарѝ на в҃і. Послѣди́ же є҆ди́нъ ли́къ, а҃-й і҆рмо́съ: и҆ дрꙋгі́й ли́къ, дрꙋгі́й і҆рмо́съ.

Канѡ́нъ,

є҆гѡ́же краестро́чїе: Пѧтдесѧ́тницꙋ пра́зднꙋимъ.

Творе́нїе космы̀ мона́ха. Гла́съ з҃.

Пѣ́снь а҃.

І҆рмо́съ: По́нтомъ покры̀ фараѡ́на съ колесни́цами сокрꙋша́ѧй бра̑ни мы́шцею высо́кою, пои́мъ є҆мꙋ̀, ꙗ҆́кѡ просла́висѧ.

Дѣ́ломъ, ꙗ҆́коже дре́вле ᲂу҆ченикѡ́мъ ѡ҆бѣща́лъ є҆сѝ, ᲂу҆тѣ́шителѧ дх҃а посла́вый хрⷭ҇тѐ, возсїѧ́лъ є҆сѝ мі́рꙋ свѣ́тъ человѣколю́бче.

Зако́номъ дре́вле проповѣ́данное и҆ проро́ки, и҆спо́лнисѧ: бж҃е́ственнагѡ бо дх҃а дне́сь всѣ̑мъ вѣ̑рнымъ бл҃года́ть и҆злїѧ́сѧ.

И҆́ный канѡ́нъ

і҆амві́ческїй, творе́нїе кѵ́ръ і҆ѡа́нна а҆рклі́йскагѡ. Гла́съ д҃.

Пѣ́снь а҃.

І҆рмо́съ: Бж҃е́ственнымъ покрове́нъ медленоѧзы́чный мра́комъ, и҆звиті́йствова бг҃опи́санный зако́нъ: ти́нꙋ бо ѿтрѧ́съ ѻ҆чесѐ ᲂу҆́мнагѡ, ви́дитъ сꙋ́щаго, и҆ наꙋча́етсѧ дх҃а ра́зꙋмꙋ, хвалѧ̀ бж҃е́ственными пѣ́сньми.

Реко́ша чи́стаѧ и҆ честна́ѧ ᲂу҆ста̀: разлꙋче́нїѧ ва́мъ не бꙋ́детъ, ѽ дрꙋ́зи! а҆́зъ бо на ѻ҆́ч҃емъ вы́шнемъ престо́лѣ <<см҃в: 483>> сосѣдѧ̀, и҆злїю̀ дх҃а, возсїѧ́ти жела́ющымъ бл҃года́ть незави́стнꙋю.

Предѣ́лъ преше́дшее и҆́стиннѣйшее сло́во, тихоѻбра́знѡ соверша́етъ се́рдце: дѣ́ло бо сконча́въ, возвеселѝ дрꙋ́ги, дыха́нїемъ нꙋ́жнымъ и҆ ѻ҆́гненными ѧ҆зы́ки, пода́въ дх҃а хрⷭ҇то́съ, ꙗ҆́коже ѡ҆бѣща́сѧ.

Катава́сїа: По́нтомъ покры̀: Бж҃е́ственнымъ покрове́нъ:

Пѣ́снь г҃.

І҆рмо́съ: Съ высоты̀ си́лою, ᲂу҆ченикѡ́мъ хрⷭ҇тѐ, до́ндеже ѡ҆блеце́тесѧ, ре́клъ є҆сѝ, сѣди́те во і҆ерꙋсали́мѣ: а҆́зъ же ꙗ҆́кѡ менѐ, ᲂу҆тѣ́шителѧ и҆но́го, дх҃а моего́ же и҆ ѻ҆́ч҃а послю̀, въ не́мже ᲂу҆твердите́сѧ.

Бж҃е́ственнагѡ дх҃а наше́дшаѧ си́ла, раздѣ́льшїйсѧ дре́вле гла́съ, ѕлѣ̀ согласи́вшихсѧ, во є҆ди́но прили́чїе бж҃е́ственнѣ совокꙋпѝ, вѣ́дѣнїемъ трⷪ҇цы вразꙋмлѧ́ющи вѣ̑рныѧ, въ не́йже ᲂу҆тверди́хомсѧ.

И҆́нъ.

І҆рмо́съ: Разве́рзе ᲂу҆тро́бы неча́дствовавшїѧ ᲂу҆́зы, доса́дꙋ же неꙋдоботерпи́мꙋ бл҃гоча́дствꙋющїѧ, є҆ди́на мл҃тва проро́чицы дре́вле а҆́нны, носѧ́щїѧ дх҃ъ сокрꙋше́нъ, къ си́льномꙋ и҆ бг҃ꙋ ра́зꙋмѡвъ.

Непостижи́ма є҆́сть бг҃онача́льнѣйшаѧ: вѣті́ѧ бо и҆з̾ѧвѝ безкни̑жныѧ, ры́бари премꙋ́дрыѧ, заꙋща́ющыѧ сло́вомъ, и҆ ѿ глꙋбо́кїѧ но́щи и҆зима́ющыѧ лю́ди безчи́сленны, блиста́нїемъ дх҃а.

Бѧ́ше и҆схо́денъ ѿ нерожде́нна свѣ́та, всеси́льный сїѧ́ющїй свѣ́тъ, є҆гѡ́же сн҃омъ ѻ҆те́ческїѧ вла́сти, ны́нѣ <<см҃в ѡ҆б.: 484>> ꙗ҆влѧ́етъ сра́сленное ѡ҆заре́нїе, ѻ҆́гненный гла́съ въ сїѡ́нѣ ꙗ҆зы́кѡмъ.

Та́же сѣда́ленъ, гла́съ и҃. Подо́бенъ: Повелѣ́нное та́йнѡ:

Сп҃совы рачи́телїе ра́дости и҆спо́лнишасѧ, и҆ дерзнове́нїе прїѧ́ша, пре́жде боѧ́щїисѧ: ꙗ҆́кѡ дх҃ъ ст҃ы́й дне́сь свы́ше сни́де на до́мъ ᲂу҆чени́ческїй, и҆ и҆́нъ и҆на̑ѧ глаго́лаше къ лю́демъ. ѧ҆зы́цы бо разсѣ́ѧшасѧ, ви́дими ꙗ҆́кѡ ѻ҆́гнь: и҆ си́хъ не ѡ҆палѝ, но па́че ѡ҆росѝ.

Сла́ва, и҆ ны́нѣ: то́йже.

Пѣ́снь д҃.

І҆рмо́съ: Смотрѧ́ѧй проро́къ въ послѣ́днѧѧ твоѐ хрⷭ҇тѐ прише́ствїе, вопїѧ́ше: твою̀ ᲂу҆слы́шахъ гдⷭ҇и си́лꙋ, ꙗ҆́кѡ всѧ̀ спастѝ пома̑занныѧ твоѧ̀ прише́лъ є҆сѝ.

Во проро́цѣхъ глаго́лавый, и҆ зако́номъ проповѣ́данный пе́рвѣе несовершє́ннымъ, бг҃ъ и҆́стинный ᲂу҆тѣ́шитель, сло́ва слꙋжи́телємъ и҆ свидѣ́телємъ познава́етсѧ дне́сь.

Зна́менїе бж҃ества̀ носѧ́й, а҆пⷭ҇лѡмъ во ѻ҆гнѝ, дх҃ъ раздѣли́сѧ, и҆ стра́нными ѧ҆зы́ки ꙗ҆влѧ́шесѧ, ꙗ҆́кѡ ѻ҆те́ческаѧ бжⷭ҇твеннаѧ си́ла грѧдꙋ́щаѧ є҆́сть, самоповели́тельнаѧ.

И҆́нъ.

І҆рмо́съ: Цр҃ю̀ цр҃е́й, ꙗ҆ковы́й ѿ ꙗ҆кова́гѡ є҆ди́нъ сло́ве произше́дый ѿ ѻ҆ц҃а̀ безвино́внагѡ, равномо́щнаго твоего̀ дх҃а а҆пⷭ҇лѡмъ и҆́стиннѡ посла́лъ є҆сѝ, ꙗ҆́кѡ бл҃годѣ́телѧ пою́щымъ: сла́ва держа́вѣ твое́й гдⷭ҇и.

Ба́ню бж҃е́ственнꙋю пакибытїѧ̀ сло́вомъ раствори́въ, ссложе́нное є҆стество̀, дождоточи́ши мѝ стрꙋю̀ ѿ <<см҃г: 485>> нетлѣннопрободе́ннагѡ твоегѡ̀ ребра̀, ѽ бж҃їй сло́ве, запечатлѣ́ѧ теплото́ю дх҃а.

Преклонѧ́ютъ всѧ̑ ᲂу҆тѣ́шителю кѡлѣ́на, сн҃ꙋ же ѻ҆́ч҃ꙋ, ѻ҆ц҃ꙋ̀ сра́сленномꙋ, въ ли́цѣхъ бо ви́дѣша трегꙋ́быхъ сꙋщество̀ и҆́стинное, неприкоснове́нное, безлѣ́тное, є҆ди́ное: возсїѧ́ бо свѣ́тъ бл҃года́ть дх҃а.

Да и҆спо́лнѧтсѧ всѝ бг҃онача́льнѣйшимъ, є҆ли́цы слꙋжи́телїе трисвѣ́тлагѡ сꙋщества̀: па́че є҆стества́ бо соверша́етъ ꙗ҆́кѡ бл҃годѣ́тель, и҆ ѻ҆гнесвѣ́титъ хрⷭ҇то́съ во спасе́нїе, всю̀ даѧ̀ бл҃года́ть дх҃а.

Пѣ́снь є҃.

І҆рмо́съ: Стра́ха ра́ди твоегѡ̀ зача́тый гдⷭ҇и во чре́вѣ проро́кѡвъ, и҆ рожде́нный на землѝ дх҃ъ спасе́нїѧ, а҆по́стѡльскаѧ сердца̀ созида́етъ чи̑ста, и҆ въ вѣ́рныхъ пра́вый ѡ҆бновлѧ́етсѧ: свѣ́тъ бо и҆ ми́ръ занѐ твоѧ̑ повелѣ̑нїѧ.

Наше́дшаѧ си́ла дне́сь сїѧ̀, дх҃ъ бл҃гі́й, дх҃ъ премꙋ́дрости бж҃їѧ, дх҃ъ ѿ ѻ҆ц҃а̀ и҆сходѧ́й, и҆ сн҃омъ вѣ̑рнымъ на́мъ ꙗ҆вле́йсѧ подава́теленъ, въ ни́хже вселѧ́етсѧ є҆стество́мъ ст҃ы́ни, въ не́йже зри́тсѧ.

И҆́ный.

І҆рмо́съ: Рѣши́тельное ѡ҆чище́нїе грѣхѡ́въ, ѻ҆гнедх҃нове́ннꙋю прїими́те дх҃а ро́сꙋ, ѽ ча̑да свѣтоѻбра̑знаѧ церкѡ́внаѧ: ны́нѣ ѿ сїѡ́на бо и҆зы́де зако́нъ, ѧ҆зыкоѻгнеѻбра́знаѧ дх҃а бл҃года́ть

Ꙗ҆́коже бл҃говолѝ самовла́стнѡ, неѡблада́нный и҆схо́дитъ дх҃ъ ѿ ѻ҆ц҃а̀, ᲂу҆мꙋдрѧ́ѧ въ ѧ҆зы́цѣхъ а҆пⷭ҇лы, печатлѣ́ѧ живоно́сное сло́во, ѻ҆ч҃еси́льное, соѻбра́зное, є҆го́же сп҃съ речѐ. <<см҃г ѡ҆б.: 486>>

Да и҆сцѣли́тъ ᲂу҆́бѡ смы́слы ѿ грѣха̀, и҆ сѐ ᲂу҆строѧ́ше а҆пⷭ҇лѡвъ, бг҃ъ сло́во всенача́льное, пречи́стый до́мъ, въ не́мже є҆диномо́щнагѡ же и҆ ссꙋ́щественнагѡ ны́нѣ вселѧ́етсѧ дх҃а свѣ́тъ.

Пѣ́снь ѕ҃.

І҆рмо́съ: Пла́вающаго въ молвѣ̀ жите́йскихъ попече́нїй, съ корабле́мъ потоплѧ́ема грѣхѝ, и҆ дꙋшетлѣ́нномꙋ ѕвѣ́рю примета́ема, ꙗ҆́кѡ і҆ѡ́на хрⷭ҇тѐ, вопїю́ ти: и҆з̾ смертоно́сныѧ глꙋбины̀ возведи́ мѧ.

Ѿ дх҃а твоегѡ̀ на пло́ть всѧ́кꙋю, ꙗ҆́коже ре́клъ є҆сѝ, бога́тнѡ и҆злїѧ́лъ є҆сѝ, и҆ и҆спо́лнишасѧ всѧ́чєскаѧ твоегѡ̀ вѣ́дѣнїѧ гдⷭ҇и, ꙗ҆́кѡ и҆з̾ ѻ҆ц҃а̀ сн҃ъ нетлѣ́ннѡ роди́лсѧ є҆сѝ, и҆ дх҃ъ нераздѣ́льный и҆зы́де.

И҆́ный.

І҆рмо́съ: Ѡ҆чище́нїе на́мъ хрⷭ҇тѐ и҆ спасе́нїе влⷣко, возсїѧ́лъ є҆сѝ ѿ дв҃ы, да ꙗ҆́кѡ проро́ка ѿ ѕвѣ́рѧ морска́гѡ пе́рсей і҆ѡ́нꙋ, ѿ тлѝ и҆схити́ши, всего̀ а҆да́ма всеро́дна па́дшаго.

И҆́стинный на́мъ пра́вый во ᲂу҆тро́бахъ вѣ́чнѡ прїи́мшымъ дх҃ъ, да ѡ҆бнови́ши ѻ҆ч҃еисхо́дный, и҆ всесовокꙋпле́ннѡ, вещества̀ ненави́стнагѡ пали́тельный скве́рнъ, ка́ла же смы́слѡвъ чисти́тельный, вседержи́телю.

Жела́тельное достоѧ́нїе а҆по́столѡмъ, сїѡ́нѧнѡмъ ча́ющымъ твоегѡ̀ прише́ствїѧ, позна́нїе дх҃ъ ѻ҆ч҃ерожде́нна сло́ва, рѣ́чь жесто́кꙋю ꙗ҆зы́ческихъ ласка́тельствъ ско́рѡ показа́въ, ѻ҆гнедохнове́ннѡ ᲂу҆твержда́еши.

Конда́къ, гла́съ и҃:

Є҆гда̀ снизше́дъ ѧ҆зы́ки слїѧ̀, раздѣлѧ́ше ꙗ҆зы́ки вы́шнїй: є҆гда́ же ѻ҆́гненныѧ ѧ҆зы́ки раздаѧ́ше, въ соедине́нїе всѧ̑ призва̀, и҆ согла́снѡ сла́вимъ всест҃а́го дх҃а. <<см҃д: 487>>

І҆́косъ:

Ско́рое и҆ и҆звѣ́стное да́ждь ᲂу҆тѣше́нїе рабѡ́мъ твои̑мъ і҆и҃се, внегда̀ ᲂу҆ныва́ти дꙋхѡ́мъ на́шымъ, не разлꙋча́йсѧ ѿ дꙋ́шъ на́шихъ въ ско́рбехъ, не ᲂу҆далѧ́йсѧ ѿ мы́слей на́шихъ во ѡ҆бстоѧ́нїихъ: но при́снѡ на́съ предварѝ. прибли́жисѧ на́мъ, прибли́жисѧ вездѣ̀ сы́й, ꙗ҆́коже со а҆по́столы твои́ми всегда̀ є҆сѝ, си́це и҆ тебѐ жела́ющымъ соединѝ себѐ ще́дре: да совокꙋ́плени тебѐ пое́мъ, и҆ славосло́вимъ всест҃а́го дх҃а твоего̀.

Сѷнаѯа́рїй, въ недѣ́лю ст҃ы́ѧ пентико́стїи.

Стїхѝ: Дыха́нїемъ нꙋ́жнымъ, ѧ҆зыкоѻ́гненнѡ подае́тъ

Хрⷭ҇то́съ бж҃е́ственнаго дх҃а а҆по́столѡмъ.

И҆злїѧ́сѧ въ вели́комъ днѝ дх҃ъ рыбарє́мъ.

Въ сі́й де́нь, въ недѣ́лю ѻ҆смꙋ́ю по па́сцѣ, ст҃ꙋ́ю пѧтдесѧ́тницꙋ пра́зднꙋимъ, и҆ сїю́ же прїѧ́хомъ ѿ є҆вре́йскихъ кни́гъ. Ꙗ҆́коже бо ѻ҆нѝ, ꙗ҆́же ᲂу҆ ни́хъ пѧтдесѧ́тницꙋ пра́зднꙋютъ, почита́юще седмо́е число̀, и҆ занѐ по па́сцѣ пѧтдесѧ́тъ дні́й преше́дше, зако́нъ прїѧ́ша: та́кѡ и҆ мы̀ по па́сцѣ, пѧтдесѧ́тъ дні́й пра́зднꙋюще, всест҃а́го дх҃а прїе́млемъ, законополага́ющаго и҆ наставлѧ́ющаго на всѧ́кꙋю и҆́стинꙋ, и҆ ᲂу҆гѡ́днаѧ бг҃ꙋ повелѣва́ющаго. Вѣ́домо же да є҆́сть, ꙗ҆́кѡ ᲂу҆ є҆врє́й трѝ бѣ́ша пра́здницы: па́сха, пѧтдесѧ́тница и҆ скѷнопи́гїа, сі́есть, сѣ́ницъ потче́нїе. Па́схꙋ ᲂу҆́бѡ въ воспомина́нїе творѧ́хꙋ преведе́нїѧ чермна́гѡ мо́рѧ: па́сха бо преведе́нїе толкꙋ́етсѧ. Ꙗ҆влѧ́ше же таковы́й пра́здникъ, на́ше є҆́же ѿ те́мнагѡ грѣха̀ къ раю̀ па́ки преведе́нїе и҆ возвраще́нїе. Пѧтдесѧ́тницꙋ же пра́здновахꙋ, въ воспомина́нїе є҆́же въ пꙋсты́ни ѕлострада́нїѧ и҆́хъ, и҆ ка́кѡ мно́гими скорбьмѝ въ зе́млю ѡ҆бѣтова́нїѧ введе́ни бы́ша: тогда́ бо и҆ плода̀ пшени́цы и҆ вїна̀ наслади́шасѧ. И҆ ꙗ҆влѧ́ше пра́здникъ се́й на́ше ѡ҆ѕлобле́нїе ѿ невѣ́рїѧ, и҆ въ це́рковь вни́тїе: тогда́ бо и҆ мы̀ влⷣчнѧгѡ причаща́емсѧ тѣ́ла и҆ кро́ве. Ѻ҆́ви ᲂу҆́бѡ тоѧ̀ ра́ди вины̀ глаго́лютъ, ꙗ҆́же ᲂу҆ є҆врє́й пѧтдесѧ́тницѣ <<см҃д ѡ҆б.: 488>> пра́здноватисѧ: ѻ҆́ви же въ че́сть ꙗ҆́коже глаго́лютъ, пѧти́десѧтимъ днє́мъ, въ нѧ́же пости́всѧ мѡѷсе́й, бг҃опи́санный зако́нъ прїѧ́тъ, вкꙋ́пѣ помина́ющымъ и҆ тельца̀ жрє́нїѧ, и҆ и҆ны́хъ, ꙗ҆́же є҆гда̀ мѡѷсе́й восходѧ̀ на го́рꙋ, и҆ низходѧ̀ содѣ́ѧ. Дрꙋги̑мъ же непщева́сѧ пѧтдесѧ́тницѣ ᲂу҆ є҆врє́й ᲂу҆мы́слитисѧ, че́сти ра́ди седми́чнагѡ числа̀, ꙗ҆́коже рече́сѧ: то́ бо ѡ҆ себѣ̀ слага́емо, твори́тъ пѧтдесѧ́тное, є҆ди́номꙋ ѡ҆скꙋдѣва́ющꙋ дне́ви. Че́сть же седмочи́слїѧ ᲂу҆ є҆врє́й, не то́чїю во дне́хъ є҆́сть, но и҆ въ лѣ̑та достиза́ющаѧ, ѿ ни́хже лѣ́тъ и҆ є҆́же ᲂу҆ ни́хъ творѧ́тъ і҆ѡвиле́онъ, сказꙋ́емо ѡ҆ставле́нїе. Оу҆седморича́емымъ бо лѣ́тѡмъ, сїѐ быва́етъ, є҆гда̀ и҆ зе́млю несѣ́ѧннꙋю ѡ҆ставлѧ́ютъ, и҆ живѡ́тнымъ подаю́тъ ѡ҆сла́бꙋ, и҆ кꙋ́плєнымъ рабѡ́мъ ѿходи́ти повелѣва́ютъ. Тре́тїй же пра́здникъ, скѷнопи́гїа, сі́есть, сѣ́ницъ потче́нїе, пра́зднꙋемый по собра́нїи плодѡ́въ, є҆́же є҆́сть по пѧти́хъ мѣ́сѧцѣхъ пра́здника па́схи. Соверша́ше же сѧ се́й въ па́мѧть днѐ, во́ньже мѡѷсе́й пре́жде потчѐ сѣ́ницꙋ на горѣ̀ сїна́йстѣй ви́дѣннꙋю ѻ҆́блакомъ, и҆ ᲂу҆гото́ваннꙋю ѿ перводреводѣ́лѧ веселїи́ла: сѣ̑ни бо и҆ сі́и творѧ́ще, се́й пра́здникъ пра́здновахꙋ и҆ на се́лѣхъ пребыва́юще, и҆ благодарѧ́ще бг҃а, плоды̀ свои́хъ трꙋдѡ́въ собира́хꙋ. Въ сі́й мни́тсѧ и҆ даві́дъ ꙗ҆́же ѡ҆ точи́лѣхъ надписова́ти ѱалмы̀. Ѡ҆́бразъ же бѣ̀ то́й и҆з̾ ме́ртвыхъ на́шегѡ воскресе́нїѧ, є҆гда̀ разрꙋши́вшымсѧ тѣлє́снымъ сѣ́немъ на́шымъ, и҆ па́ки слѣплє́ннымъ, свои́хъ трꙋдѡ́въ плоды̀ воспрїи́мемъ, торжествꙋ́юще въ вѣ́чныхъ сѣ́нѣхъ. Подоба́етъ же вѣ́дати, ꙗ҆́кѡ въ сі́й де́нь пѧтдесѧ́тницы соверша́емыѧ, дх҃ъ ст҃ы́й на ᲂу҆ченикѝ прїи́де. Є҆лма́ же ст҃і́и ѻ҆ц҃ы̀ и҆зво́лиша раздѣлѧ́ти пра́здники, ра́ди вели́чїѧ прест҃а́гѡ и҆ животворѧ́щагѡ дх҃а, ꙗ҆́кѡ є҆ди́нъ є҆́сть ст҃ы́ѧ и҆ живонача́льныѧ трⷪ҇цы. Сѐ и҆ мы̀ рече́мъ воꙋ́трїе, ка́кѡ дх҃ъ ст҃ы́й прїи́де. Ст҃ы́хъ а҆пⷭ҇лъ мл҃твами хрⷭ҇тѐ поми́лꙋй на́съ. а҆ми́нь.

Пѣ́снь з҃.

І҆рмо́съ: Въ пе́щь ѻ҆́гненнꙋю вве́ржени преподо́бнїи ѻ҆́троцы, ѻ҆́гнь въ ро́сꙋ преложи́ша, воспѣва́нїемъ си́це вопїю́ще: благослове́нъ є҆сѝ гдⷭ҇и бж҃е ѻ҆тє́цъ на́шихъ. <<см҃є: 489>>

Вѣтꙋ́ющымъ бж҃е́ствєннаѧ вели̑чїѧ а҆по́столѡмъ, дх҃а дѣ́йство непщева́шесѧ пїѧ́нство невѣ́рствꙋющымъ, и҆́мже трⷪ҇ца познава́етсѧ, є҆ди́нъ бг҃ъ ѻ҆тє́цъ на́шихъ.

Нераздѣ́льное є҆стество̀ правосла́внѡ бг҃осло́вимъ бг҃а ѻ҆ц҃а̀ безнача́льнаго, тоѧ́жде вла́сти сло́ва и҆ дх҃а, бл҃гослове́нъ є҆сѝ, зовꙋ́ще, бж҃е ѻ҆тє́цъ на́шихъ.

И҆́нъ.

І҆рмо́съ: Согла́снаѧ возшꙋмѣ̀ ѻ҆рга́нскаѧ пѣ́снь, почита́ти златосотворе́нный бездꙋ́шный и҆стꙋка́нъ: ᲂу҆тѣ́шителева же свѣтоно́снаѧ бл҃года́ть почествꙋ́етъ, є҆́же вопи́ти: трⷪ҇це є҆ди́наѧ, равноси́льнаѧ, безнача́льнаѧ, благослове́на є҆сѝ.

Гла́са пророковѣща́тельнагѡ не разꙋмѣ́вше, глаго́лахꙋ безꙋ́мнїи вїносотворе́нное пїѧ́нство, рѣ̑чи ꙗ҆́кѡ стра́нны слы́шаша а҆по́столѡвъ: благочести́вїи же тебѣ̀ вопїе́мъ бж҃е́ственнѡ: бг҃одѣ́телю всѣ́хъ благослове́нъ є҆сѝ.

Бж҃е́ственное ᲂу҆че́нїе возгремѣ̀ ви́дѧй видѣ̑нїѧ бж҃е́ственный і҆ѡ́иль, бг҃онача́льнѣйшаго, и҆̀мже и҆злїю̀, ре́къ, ꙗ҆́коже сло́ва, дх҃а моего̀ свозопїю́щымъ: є҆стество̀ тривѣща́нное свѣ́тлое, благослове́нъ є҆сѝ.

Трⷪ҇чнꙋю ᲂу҆́бѡ раздѣлѝ зрѧ̀ бл҃года́ть, ꙗ҆́кѡ да ꙗ҆ви́тъ трѝ ѵ҆поста́си, почита́ти въ простотѣ̀ вла́сти, но во є҆ди́номъ ны́нѣ днѝ гдⷭ҇скомъ, сн҃ъ, ѻ҆ц҃ъ и҆ дх҃ъ бл҃гослове́нъ.

Пѣ́снь и҃.

І҆рмо́съ: Неѡпа́льнаѧ ѻ҆гню̀ въ сїна́и прича́щшаѧсѧ кꙋпина̀, бг҃а ꙗ҆вѝ медленоѧзы́чномꙋ и҆ гꙋгни́вомꙋ мѡѷсе́ови, и҆ ѻ҆́троки ре́вность бж҃їѧ трѝ непребори́мыѧ во ѻ҆гнѝ пѣвцы̀ показа̀: всѧ̀ дѣла̀ гдⷭ҇нѧ гдⷭ҇а по́йте, и҆ превозноси́те во всѧ̀ вѣ́ки. <<см҃є ѡ҆б.: 490>>

Живо́тнꙋ свы́ше бꙋ́рнꙋ носи́мꙋ гласо́внѣ, дх҃а всест҃а́гѡ дыха́нїю рыбарє́мъ, ѻ҆́гненныхъ ви́домъ ѧ҆зы̑къ вели̑чїѧ бж҃їѧ вѣті́йствовахꙋ: всѧ̀ дѣла̀ гдⷭ҇а по́йте, и҆ превозноси́те во всѧ̀ вѣ́ки.

Ꙗ҆́кѡ на некаса́емꙋю превосходѧ́ще го́рꙋ, не боѧ́щесѧ ѻ҆гнѧ̀ страша́ща, прїиди́те и҆ ста́немъ на горѣ̀ сїѡ́нской, во гра́дѣ жива́гѡ бг҃а, дх҃онѡ́снымъ ᲂу҆ченикѡ́мъ ны́нѣ сликꙋ́юще: всѧ̀ дѣла̀ гдⷭ҇а по́йте, и҆ превозноси́те во всѧ̀ вѣ́ки.

И҆́нъ.

І҆рмо́съ: Разрѣша́етъ ᲂу҆́зы, и҆ ѡ҆роша́етъ пла́мень трисвѣ́тлый бг҃онача́лїѧ ѻ҆́бразъ, пою́тъ ѻ҆́троцы, благослови́тъ же є҆ди́наго сп҃са и҆ вседѣ́телѧ, ꙗ҆́кѡ благодѣ́телѧ, сотворе́ннаѧ всѧ́ческаѧ тва́рь.

Па́мѧть хрⷭ҇то́съ человѣкоспаси́тельныхъ слове́съ, ꙗ҆̀же ѿ ѻ҆ц҃а̀ слы́шавъ а҆пⷭ҇толѡмъ речѐ, дх҃ъ ᲂу҆строѧ́етъ ѧ҆зыкоѻ́гненнымъ видѣ́нїемъ, посажда́ѧ бл҃гослове́ннѡ ᲂу҆свое́ннꙋю, ᲂу҆чꙋже́ннаѧ же пое́тъ тѧ̀ тва́рь.

Спаси́тельнѡ самовлады́чный є҆ди́нъ, свѣ́тъ самосїѧ́тельный, и҆ пода́тельный свѣ́та сы́й, прише́лъ є҆сѝ и҆сполнѧ́ѧ а҆пⷭ҇лы, честны́й ꙗ҆́кѡ ве́рхъ твои̑мъ рабѡ́мъ, насыти́тельный же дх҃ъ подава́еши.

Поѧ́хꙋ прорѡ́къ дх҃онасыще́ннаѧ ᲂу҆ста̀, твоѐ тѣле́сное, ѽ цр҃ю̀, прише́ствїе, и҆ дх҃ъ ѿ нѣ́дръ ѻ҆́ч҃ихъ произше́дшїй, несозда́нный, зданнодѣ́теленъ, сопресто́ленъ тебѣ̀, є҆ди́нагѡ вочеловѣ́ченїѧ вѣ̑рнымъ че́сть.

Честнѣ́йшꙋю: не пое́мъ. <<см҃ѕ: 491>>

Пѣ́снь ѳ҃.

І҆рмо́съ: Не тлѣ́нїѧ и҆скꙋше́нїемъ ро́ждшаѧ, и҆ всехитрецꙋ̀ сло́вꙋ пло́ть взаимода́вшаѧ, мт҃и неискꙋсомꙋ́жнаѧ дв҃о бцⷣе, прїѧ́телище нестерпи́магѡ, село̀ невмѣсти́магѡ зижди́телѧ твоегѡ̀, тѧ̀ велича́емъ.

На палѧ́щей дре́вле ѻ҆́гненной колесни́цѣ, ревни́тель и҆ ѻ҆гнедохнове́нный ра́дꙋѧсѧ носи́мь, є҆́же ны́нѣ возсїѧ́вшее дохнове́нїе свы́ше а҆по́столѡмъ ꙗ҆влѧ́ше: ѿ негѡ́же ѡ҆свѧти́вшесѧ, трⷪ҇цꙋ всѣ̑мъ сказа́ша.

Зако́на є҆сте́ствъ кромѣ̀, стра́нное слы́шашесѧ ᲂу҆ченикѡ́въ: є҆ди́номꙋ бо гла́сꙋ гласѧ́щꙋ дх҃а благода́тїю, разли́чнѣ ѡ҆глаша́хꙋсѧ лю́дїе, племена̀ и҆ ꙗ҆зы́ки бж҃е́ственнаѧ вели̑чїѧ, трⷪ҇цы вѣ́дѣнїю наꙋча́юще.

И҆́нъ.

І҆рмо́съ: Ра́дꙋйсѧ цр҃и́це, матеродѣ́вственнаѧ сла́во: всѧ́ка бо ᲂу҆добоѡбраща́тельнаѧ благоглаго́ливаѧ ᲂу҆ста̀ виті́йствовати не мо́гꙋтъ, тебѐ пѣ́ти досто́йнѡ: низꙋмѣва́етъ же ᲂу҆́мъ всѧ́къ твоѐ рождество̀ разꙋмѣ́ти. тѣ́мже тѧ̀ согла́снѡ сла́вимъ.

Пѣ́ти подоба́ше є҆стественножи́зненнꙋю ѻ҆трокови́цꙋ: є҆ди́на бо во чре́вѣ скры̀ сло́во, таѧ́щеесѧ недꙋ́гꙋющагѡ человѣ́ческагѡ є҆стества̀. и҆́же въ десны́хъ страна́хъ ны́нѣ сѣдѧ́й ѻ҆́ч҃ихъ, посла̀ бл҃года́ть дх҃а.

Є҆ли̑цѣмъ дхнꙋ̀ бг҃ото́чнаѧ бл҃года́ть, свѣтѧ́щесѧ, блиста́юще, и҆змѣнѧ́еми стра́ннымъ и҆змѣне́нїемъ благолѣ́пнѣйшимъ, равноси́льствꙋющꙋю несѣко́мꙋю ᲂу҆вѣ́дѣвше премꙋ́дрость, трисвѣ́тлое сꙋщество̀ сла́вимъ.

Та́же: Катава́сїа, ѻ҆́ба і҆рмоса̀ вкꙋ́пѣ. <<см҃ѕ ѡ҆б.: 492>>

Є҆ѯапостїла́рїй. Подо́бенъ: Нб҃о ѕвѣзда́ми:

Всесвѧты́й дш҃е, и҆сходѧ́й и҆з̾ ѻ҆ц҃а̀ и҆ сн҃омъ прише́дый къ безкни̑жнымъ ᲂу҆ченикѡ́мъ, тебѐ бг҃а позна́вшихъ спасѝ и҆ поми́лꙋй всѣ́хъ. [Два́жды.]

Сла́ва, и҆ ны́нѣ: дрꙋгі́й подо́бенъ:

Свѣ́тъ ѻ҆ц҃ъ, свѣ́тъ сло́во, свѣ́тъ и҆ ст҃ы́й дх҃ъ, и҆́же во ѧ҆зы́цѣхъ ѻ҆́гненныхъ а҆по́столѡмъ посла́сѧ. и҆ тѣ́мъ ве́сь мі́ръ просвѣща́етсѧ трⷪ҇цꙋ почита́ти ст҃ꙋ́ю.

На хвали́техъ, Всѧ́кое дыха́нїе: поста́вимъ стїхѡ́въ ѕ҃, и҆ пое́мъ настоѧ́щыѧ самогла́сны, гла́съ д҃, повторѧ́юще ѧ҆̀:

Пресла́внаѧ дне́сь ви́дѣша всѝ ꙗ҆зы́цы во гра́дѣ дв҃довѣ, є҆гда̀ дх҃ъ сни́де ст҃ы́й во ѻ҆́гненныхъ ѧ҆зы́цѣхъ, ꙗ҆́коже бг҃оглаго́ливый лꙋка̀ повѣствꙋ́етъ, глаго́летъ бо: со́браннымъ ᲂу҆ченикѡ́мъ хрⷭ҇то́вымъ, бы́сть шꙋ́мъ, ꙗ҆́коже носи́мꙋ дыха́нїю бꙋ́рнꙋ, и҆ и҆спо́лни до́мъ, и҆дѣ́же бѧ́хꙋ сѣдѧ́ще: и҆ всѝ нача́ша глаго́лати стра́нными глаго́лы, стра́нными ᲂу҆че́нїи, стра́нными повелѣ́нїи ст҃ы́ѧ трⷪ҇цы. [Два́жды.]

Дх҃ъ ст҃ы́й бѣ̀ ᲂу҆́бѡ при́снѡ, и҆ є҆́сть, и҆ бꙋ́детъ: нижѐ начина́емь, нижѐ престаѧ́й, но при́снѡ ѻ҆ц҃ꙋ̀ и҆ сн҃ꙋ счине́нъ и҆ счислѧ́емь: живо́тъ, и҆ животворѧ́й: свѣ́тъ, и҆ свѣ́та пода́тель, самобл҃гі́й, и҆ и҆сто́чникъ бл҃госты́ни: и҆́мже ѻ҆ц҃ъ познава́етсѧ, и҆ сн҃ъ прославлѧ́етсѧ, и҆ ѿ всѣ́хъ познава́етсѧ, є҆ди́на си́ла, є҆ди́но счета́нїе, є҆ди́но поклоне́нїе ст҃ы́ѧ трⷪ҇цы. [Два́жды.]

Дх҃ъ ст҃ы́й свѣ́тъ и҆ живо́тъ, и҆ живы́й и҆сто́чникъ ᲂу҆́мный: дх҃ъ премꙋ́дрости, дх҃ъ ра́зꙋма, бл҃гі́й, пра́вый, ᲂу҆́мный: ѡ҆блада́ѧй, ѡ҆чища́ѧй прегрѣшє́нїѧ: бг҃ъ и҆ бг҃отворѧ́й, ѻ҆́гнь ѿ ѻ҆гнѧ̀ происходѧ́й: глаго́лѧй, <<см҃з: 493>> дѣ́ѧй, раздѣлѧ́ѧй дарова̑нїѧ, и҆́мже проро́цы всѝ, и҆ бж҃е́ственнїи а҆пⷭ҇ли съ мꙋ́ченики вѣнча́шасѧ, стра́нное слы́шанїе, стра́нное видѣ́нїе, ѻ҆́гнь раздѣлѧ́ѧйсѧ въ подаѧ́нїе дарова́нїй. [Два́жды.]

Сла́ва, и҆ ны́нѣ: гла́съ ѕ҃:

Цр҃ю̀ небе́сный, ᲂу҆тѣ́шителю, дш҃е и҆́стины, и҆́же вездѣ̀ сы́й, и҆ всѧ̑ и҆сполнѧ́ѧй, сокро́вище благи́хъ, и҆ жи́зни пода́телю, прїидѝ и҆ всели́сѧ въ ны̀, и҆ ѡ҆чи́сти ны̀ ѿ всѧ́кїѧ скве́рны, и҆ спасѝ бл҃же дꙋ́шы на́шѧ.

Славосло́вїе вели́кое. Ѿпꙋсти́тельный тропа́рь пра́здника.

Та́же, є҆ктєнїѝ. И҆ твори́тъ сщ҃е́нникъ ѿпꙋ́стъ си́це:

И҆́же въ ви́дѣ ѻ҆́гненныхъ ѧ҆зы̑къ, съ нб҃сѐ низпосла́вый прест҃а́го дх҃а на ст҃ы́ѧ своѧ̀ ᲂу҆ченикѝ и҆ а҆пⷭ҇лы, хрⷭ҇то́съ и҆́стинный бг҃ъ на́шъ, мл҃твами пречⷭ҇тыѧ своеѧ̀ мт҃ре, ст҃ы́хъ сла́вныхъ и҆ всехва́льныхъ а҆пⷭ҇лъ, и҆ всѣ́хъ ст҃ы́хъ, поми́лꙋетъ и҆ спасе́тъ на́съ, ꙗ҆́кѡ бл҃гі́й и҆ чл҃вѣколю́бецъ.

И҆ ча́съ а҃. На а҃-мъ часѣ̀ тропа́рь пра́здника. По трист҃о́мъ конда́къ пра́здника. И҆ коне́чный ѿпꙋ́стъ.

На лїтꙋргі́и глаго́лемъ а҆нтїфѡ́ны сїѧ̀.

А҆нтїфѡ́нъ а҃, ѱало́мъ и҃і, гла́съ в҃:

Сті́хъ а҃: Нб҃са̀ повѣ́даютъ сла́вꙋ бж҃їю. Моли́твами бцⷣы, сп҃се спасѝ на́съ.

И҆ дрꙋгі́й ли́къ, то́йже сті́хъ:

Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь. Моли́твами бцⷣы, сп҃се спасѝ на́съ.

Сті́хъ в҃: Де́нь днѝ ѿрыга́етъ глаго́лъ, и҆ но́щь но́щи возвѣща́етъ ра́зꙋмъ. Моли́твами бцⷣы, сп҃се спасѝ на́съ. <<см҃з ѡ҆б.: 494>>

Сті́хъ г҃: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ. Моли́твами бцⷣы, сп҃се спасѝ на́съ.

Сла́ва, и҆ ны́нѣ: Моли́твами бцⷣы, сп҃се спасѝ на́съ.

А҆нтїфѡ́нъ в҃, ѱало́мъ ѳ҃і, гла́съ то́йже.

Сті́хъ а҃: Оу҆слы́шитъ тѧ̀ гдⷭ҇ь въ де́нь печа́ли. Спаси́ ны ᲂу҆тѣ́шителю бл҃гі́й пою́щыѧ тѝ: а҆ллилꙋ́їа.

Дрꙋга́ѧ страна̀ то́йже сті́хъ:

Оу҆слы́шитъ тѧ̀ гдⷭ҇ь въ де́нь печа́ли, защи́титъ тѧ̀ и҆́мѧ бг҃а і҆а́кѡвлѧ. Спаси́ ны ᲂу҆тѣ́шителю бл҃гі́й:

Сті́хъ в҃: По́слетъ тѝ по́мощь ѿ ст҃а́гѡ, и҆ ѿ сїѡ́на застꙋ́питъ тѧ̀. Спаси́ ны ᲂу҆тѣ́шителю бл҃гі́й:

Сті́хъ г҃: Да́стъ тѝ гдⷭ҇ь по се́рдцꙋ твоемꙋ̀, и҆ ве́сь совѣ́тъ тво́й и҆спо́лнитъ. Спаси́ ны ᲂу҆тѣ́шителю бл҃гі́й:

Сла́ва, и҆ ны́нѣ: Є҆диноро́дный сн҃е:

А҆нтїфѡ́нъ г҃, ѱало́мъ к҃, гла́съ и҃:

Сті́хъ а҃: Гдⷭ҇и, си́лою твое́ю возвесели́тсѧ цр҃ь. Тропа́рь, гла́съ то́йже: Благослове́нъ є҆сѝ хрⷭ҇тѐ бж҃е на́шъ, и҆́же премꙋ́дры ловцы̀ ꙗ҆вле́й, низпосла́въ и҆̀мъ дх҃а ст҃а́го, и҆ тѣ́ми ᲂу҆ловле́й вселе́ннꙋю, человѣколю́бче сла́ва тебѣ̀.

Дрꙋгі́й ли́къ, то́йже сті́хъ:

Гдⷭ҇и, си́лою твое́ю возвесели́тсѧ цр҃ь, и҆ ѡ҆ спасе́нїи твое́мъ возра́дꙋетсѧ ѕѣлѡ̀. Тропа́рь: Благослове́нъ є҆сѝ хрⷭ҇тѐ бж҃е на́шъ:

Сті́хъ в҃: Жела́нїе се́рдца є҆гѡ̀ да́лъ є҆сѝ є҆мꙋ̀, и҆ хотѣ́нїѧ ᲂу҆стнꙋ̀ є҆гѡ̀ нѣ́си лиши́лъ є҆го̀. Тропа́рь: Бл҃гослове́нъ є҆сѝ хрⷭ҇тѐ бж҃е на́шъ:

Сті́хъ г҃: Ꙗ҆́кѡ предвари́лъ є҆сѝ є҆го̀ бл҃гослове́нїемъ <<см҃и: 495>> бл҃госты́ннымъ, положи́лъ є҆сѝ на главѣ̀ є҆гѡ̀ вѣне́цъ ѿ ка́мене че́стна. Тропа́рь: Благослове́нъ є҆сѝ хрⷭ҇тѐ бж҃е на́шъ:

Вхо́дное: Вознеси́сѧ гдⷭ҇и си́лою твое́ю, воспое́мъ и҆ пое́мъ си̑лы твоѧ̀. Та́же, тропа́рь: Бл҃гослове́нъ є҆сѝ хрⷭ҇тѐ бж҃е на́шъ:

Сла́ва, и҆ ны́нѣ: Конда́къ, гла́съ и҃:

Є҆гда̀ снизше́дъ ѧ҆зы́ки слїѧ̀, раздѣлѧ́ше ꙗ҆зы́ки вы́шнїй: є҆гда́ же ѻ҆́гненныѧ ѧ҆зы́ки раздаѧ́ше, въ соедине́нїе всѧ̑ призва̀, и҆ согла́снѡ сла́вимъ всест҃а́го дх҃а.

Вмѣ́стѡ же трист҃а́гѡ: Є҆ли́цы во хрⷭ҇та̀ крⷭ҇ти́стесѧ, во хрⷭ҇та̀ ѡ҆блеко́стесѧ, а҆ллилꙋ́їа.

Прокі́менъ, гла́съ и҃: Во всю̀ зе́млю и҆зы́де вѣща́нїе и҆́хъ, и҆ концы̀ вселе́нныѧ глаго́лы и҆́хъ. [И҆ до ѿда́нїѧ.] Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.

А҆пⷭ҇лъ въ дѣѧ́нїихъ, зача́ло г҃: Є҆гда̀ скончава́шасѧ дні́е пѧтдесѧ́тницы: А҆ллилꙋ́їа, гла́съ а҃: Сло́вомъ гдⷭ҇нимъ нб҃са̀ ᲂу҆тверди́шасѧ, и҆ дх҃омъ ᲂу҆́стъ є҆гѡ̀ всѧ̀ си́ла и҆́хъ. Сті́хъ: Съ нб҃сѐ призрѣ̀ гдⷭ҇ь, ви́дѣ всѧ̀ сы́ны чл҃вѣ́ческїѧ. Є҆ѵⷢ҇лїе ѿ і҆ѡа́нна, зача́ло к҃з: Въ послѣ́днїй де́нь вели́кїй пра́здника: За Досто́йно: пое́мъ и҆ до ѿда́нїѧ і҆рмо́съ: Ра́дꙋйсѧ цр҃и́це: Прича́стный: Дх҃ъ тво́й бл҃гі́й наста́витъ мѧ̀ на зе́млю пра́вꙋ. А҆ллилꙋ́їа.

И҆ по ѿпꙋ́стѣ на лїтꙋргі́и глаго́летсѧ ѳ҃-й ча́съ по ѻ҆бы́чаю.

Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.