Неделя пятая по Пасхе, о самаряныне
<<рк҃ѳ: 257>>
Недѣ́лѧ пѧ́таѧ по па́сцѣ, самарѧны́ни.
Въ сꙋббѡ́тꙋ ве́чера, на ма́лѣй вече́рни,
на Гдⷭ҇и воззва́хъ: стїхи̑ры воскре́сны д҃, гла́съ д҃: Животворѧ́щемꙋ твоемꙋ̀ крⷭ҇тꙋ̀: Дре́ва преслꙋша́нїѧ: Врата̀ а҆́дова сокрꙋши́лъ є҆сѝ гдⷭ҇и: Прїиди́те воспои́мъ лю́дїе: Сла́ва: гла́съ ѕ҃: При стꙋденцѣ̀ і҆а́кѡвли: [всѐ и҆щѝ напредѝ на вели́цѣй вече́рни]
И҆ ны́нѣ: бг҃оро́диченъ, догма́тїкъ. Гла́съ д҃:
Безсѣ́меннѡ зачала̀ є҆сѝ, и҆ родила̀ є҆сѝ неизрече́ннѡ, низложи́вшаго си̑льныѧ ѿ престѡ́лъ, и҆ возне́сшаго смирє́нныѧ, и҆ воздви́гшаго ро́гъ пома́занныхъ свои́хъ, сла́вѧщихъ хрⷭ҇то́въ крⷭ҇тъ и҆ погребе́нїе, и҆ сла́вное воскресе́нїе. тѣ́мже тѧ̀ бцⷣе, хода́таицꙋ толи́кихъ бла̑гъ, немо́лчными пѣ́сньми ᲂу҆блажа́емъ, ꙗ҆́кѡ молѧ́щꙋюсѧ при́снѡ спасти́сѧ дꙋша́мъ на́шымъ.
На стїхо́внѣ: стїхи́ра воскре́сна: Гдⷭ҇и, возше́дъ на крⷭ҇тъ: [и҆щѝ на вели́цѣй вече́рни.]
Та́же настоѧ́щыѧ стїхи̑ры подо́бны, прест҃ы́ѧ бцⷣы, гла́съ д҃. Подо́бенъ: Зва́нный свы́ше:
Сті́хъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.
И҆з̾ безнача́льна ѻ҆ц҃а̀ сн҃ъ безлѣ́тнѡ, низхожде́нїѧ ра́ди и҆ спасе́нїѧ человѣ́кѡвъ, бг҃ъ человѣ́къ бы́сть, да пода́стъ первозда́нномꙋ ны́нѣ ра́й: тогда̀ и҆ всѐ є҆стество̀ <<рк҃ѳ ѡ҆б.: 258>> и҆зба́витсѧ ѿ пре́лести ѕмі́евы, и҆ ѻ҆́бразъ па́дшїй спасе́тъ, ꙗ҆́кѡ бл҃гопремѣни́тель. ѿѻнꙋ́дꙋже мт҃рь содѣ́ла невѣсторо́дицꙋ чⷭ҇тꙋю ꙗ҆́кѡ нескве́рнꙋ, ю҆́же ꙗ҆́кѡ а҆гкѵ́рꙋ всѝ и҆ приста́нище ᲂу҆блажа́емъ.
Сті́хъ: Слы́ши дщѝ и҆ ви́ждь:
Воплоще́нна созда́телѧ всѣ́хъ, и҆мѣ́ла є҆сѝ во ᲂу҆тро́бѣ твое́й бг҃облаже́ннаѧ, воѡбрази́вшаго человѣ́ка, пре́жде па́дшаго престꙋпле́нїемъ ѕмїи́нымъ: бг҃а бо родила̀ є҆сѝ сего̀ несказа́ннѡ на́мъ, и҆ тлѣ́нїѧ свободи́ла є҆сѝ є҆стество̀ всѐ ѡ҆бветша́вшее, ржⷭ҇тво́мъ твои́мъ. тѣ́мже пое́мъ и҆ сла́вимъ твою̀ бл҃года́ть дв҃о безневѣ́стнаѧ: моли́тисѧ не преста́й, спасти́сѧ дꙋша́мъ на́шымъ.
Сті́хъ: Лицꙋ̀ твоемꙋ̀ помо́лѧтсѧ:
Да твоеѧ̀ всѣ̑мъ мно́жество ми́лости, и҆ бла́гости ѿкры́еши на́мъ неѡпредѣли́мꙋю пꙋчи́нꙋ, грѣхѝ рабѡ́въ твои́хъ всѧ̑ загла́ди: и҆́маши бо всенепоро́чнаѧ, ꙗ҆́кѡ мт҃и сꙋ́щи бж҃їѧ, вла́сть созда́нїѧ, и҆ во́диши всѧ̑, ꙗ҆́кѡ хо́щеши, си́лою твое́ю. и҆́бо бл҃года́ть дх҃а ст҃а́гѡ, ꙗ҆́вѣ все́льшаѧсѧ въ тѧ̀, содѣ́йствꙋетъ тѝ во все́мъ при́снѡ, всебл҃же́ннѣйшаѧ.
Сла́ва: гла́съ и҃: Є҆гда̀ ꙗ҆ви́лсѧ є҆сѝ во пло́ти: [ли́стъ рл҃а ѡ҆б.]
И҆ ны́нѣ: гла́съ то́йже.
Преполови́вшꙋсѧ пра́здникꙋ, ᲂу҆ча́щꙋ тѝ сп҃се, глаго́лахꙋ і҆ꙋде́є: ѿкꙋ́дꙋ се́й вѣ́сть пи́смена не ᲂу҆чи́всѧ; не разꙋмѣ́юще, ꙗ҆́кѡ ты̀ є҆сѝ премꙋ́дрость ᲂу҆стро́ившаѧ мі́ръ, сла́ва тебѣ̀.
Ѿпꙋсти́тельный тропа́рь, гла́съ д҃: Свѣ́тлꙋю воскрⷭ҇нїѧ про́повѣдь: [и҆щѝ на ᲂу҆́трени, ли́стъ рл҃в.] Сла́ва и҆ ны́нѣ: <<р҃л: 259>> Преполови́вшꙋсѧ пра́здникꙋ: [и҆щѝ ли́стъ рл҃а на ѡ҆боро́тѣ.] И҆ ѿпꙋ́стъ.
На вели́цѣй вече́рни,
поста́вимъ стїхѡ́въ і҃. И҆ пое́мъ стїхи̑ры воскрⷭ҇ны г҃, и҆ ꙾восто́чнꙋ꙾[[а҆нато́лїевꙋ]] И҆ преполове́нїю подо́бны г҃. И҆ самарѧны́ни самогла́сны, г҃.
Стїхи̑ры воскре́сны, гла́съ д҃:
Животворѧ́щемꙋ твоемꙋ̀ крⷭ҇тꙋ̀, непреста́ннѡ кла́нѧющесѧ хрⷭ҇тѐ бж҃е, тридне́вное воскресе́нїе твоѐ сла́вимъ: тѣ́мъ бо ѡ҆бнови́лъ є҆сѝ и҆стлѣ́вшее человѣ́ческое є҆стество̀ всеси́льне, и҆ и҆́же на нб҃са̀ восхо́дъ ѡ҆бнови́лъ є҆сѝ на́мъ, ꙗ҆́кѡ є҆ди́нъ бл҃гъ и҆ человѣколю́бецъ.
Дре́ва преслꙋша́нїѧ запреще́нїе разрѣши́лъ є҆сѝ сп҃се, на дре́вѣ кре́стнѣмъ во́лею пригвозди́всѧ, и҆ во а҆́дъ соше́дъ си́льне, смє́ртныѧ ᲂу҆́зы ꙗ҆́кѡ бг҃ъ растерза́лъ є҆сѝ. тѣ́мже кла́нѧемсѧ є҆́же и҆з̾ ме́ртвыхъ твоемꙋ̀ воскресе́нїю, ра́достїю вопїю́ще: всеси́льне гдⷭ҇и, сла́ва тебѣ̀.
Врата̀ а҆́дова сокрꙋши́лъ є҆сѝ гдⷭ҇и, и҆ твое́ю сме́ртїю сме́ртное ца́рство разрꙋши́лъ є҆сѝ, ро́дъ же человѣ́ческїй ѿ тлѣ́нїѧ свободи́лъ є҆сѝ, живо́тъ и҆ нетлѣ́нїе мі́рꙋ дарова́въ, и҆ ве́лїю ми́лость.
И҆на́ѧ стїхи́ра ꙾восто́чна꙾[[а҆нато́лїева]]:
Прїиди́те воспои́мъ лю́дїе, сп҃сово тридне́вное воста́нїе, и҆́мже и҆зба́вихомсѧ а҆́довыхъ нерѣши́мыхъ ᲂу҆́зъ, и҆ нетлѣ́нїе и҆ жи́знь всѝ воспрїѧ́хомъ, зовꙋ́ще: распны́йсѧ, и҆ погребы́йсѧ, и҆ воскресы́й, спаси́ ны воскресе́нїемъ твои́мъ, є҆ди́не человѣколю́бче. <<р҃л ѡ҆б.: 260>>
И҆ стїхи̑ры преполове́нїю, г҃, гла́съ то́йже.
Подо́бенъ: Гдⷭ҇и, возше́дъ на крⷭ҇тъ:
Наста̀ преполове́нїе дне́й: Слы́ша и҆ возвесели́сѧ: Прибли́жисѧ бж҃е́ственнагѡ: [и҆щѝ ли́стъ р҃ѳ.]
И҆ самарѧны́ни самогла́сны г҃, гла́съ а҃.
На и҆сто́чникъ прише́лъ є҆сѝ, и҆сто́чниче чꙋде́съ, въ шесты́й ча́съ, є҆́ѵинъ ᲂу҆лови́ти пло́дъ: є҆́ѵа бо въ то́й и҆зы́де и҆з̾ раѧ̀, пре́лестїю ѕмі́евою. прибли́жи бо сѧ самарѧны́нѧ почерпстѝ во́дꙋ, ю҆́же ви́дѣвъ речѐ сп҃съ: да́ждь мѝ во́дꙋ пи́ти, и҆ а҆́зъ воды̀ текꙋ́щїѧ насы́щꙋ тѧ̀. и҆ во гра́дъ те́кши цѣломꙋ́дреннаѧ, наро́дѡмъ возвѣстѝ а҆́бїе: прїиди́те ви́дите хрⷭ҇та̀ гдⷭ҇а, сп҃са дꙋ́шъ на́шихъ.
Гла́съ в҃:
На стꙋдене́цъ ꙗ҆́кѡ прїи́де гдⷭ҇ь, самарѧны́нѧ молѧ́ше бл҃гоꙋтро́бнаго: пода́ждь мѝ во́дꙋ вѣ́ры, и҆ прїимꙋ̀ кꙋпѣ̑льныѧ во́ды, ра́дованїе и҆ и҆збавле́нїе. животода́вче гдⷭ҇и, сла́ва тебѣ̀.
Собезнача́льный и҆ соприсносꙋ́щный сн҃ъ и҆ сло́во ѻ҆́ч҃ее, на и҆сто́чникъ прїи́де, и҆сто́чникъ и҆сцѣле́нїй, и҆ жена̀ ѿ самарі́и прїи́де почерпстѝ во́дꙋ, ю҆́же ви́дѣвъ речѐ сп҃съ: да́ждь мѝ во́дꙋ пи́ти, и҆ ше́дши пригласѝ твоего̀ мꙋ́жа. ѻ҆на́ же ꙗ҆́кѡ человѣ́кꙋ глаго́лющи, а҆ не бг҃ꙋ, ᲂу҆таи́ти тща́шесѧ, глаго́лаше: не и҆́мамъ мꙋ́жа. и҆ ᲂу҆чи́тель къ не́й: и҆́стинꙋ рекла̀ є҆сѝ, не и҆́мамъ мꙋ́жа: пѧ́ть бо и҆мѣ́ла є҆сѝ, и҆ ны́нѣ є҆го́же и҆́маши, нѣ́сть тво́й мꙋ́жъ. ѻ҆на́ же ѡ҆ глаго́лѣ ᲂу҆диви́вшисѧ, и҆ во гра́дъ те́кши, наро́дѡмъ вопїѧ́ше, глаго́лющи: прїиди́те ви́дите хрⷭ҇та̀, и҆́же да́рꙋетъ мі́рови ве́лїю ми́лость. <<рл҃а: 261>>
Сла́ва: гла́съ ѕ҃:
При стꙋденцѣ̀ і҆а́кѡвли ѡ҆брѣ́тъ і҆и҃съ самарѧны́ню, про́ситъ во́дꙋ ѿ неѧ̀, ѻ҆блака́ми покрыва́ѧй зе́млю. ѽ чꙋдесѐ! и҆́же херꙋві́мы носи́мый, блꙋдни́цѣ женѣ̀ бесѣ́доваше, воды̀ просѧ̀, и҆́же на вода́хъ зе́млю повѣ́сивый, воды̀ и҆скі́й, и҆́же и҆сто́чники и҆ є҆зе́ра во́дъ и҆злива́ѧй, хотѧ̀ привлещѝ сїю̀ вои́стиннꙋ, ᲂу҆ловлѧ́емꙋ ѿ сопоста́та врага̀, и҆ напои́ти ю҆̀ водо́ю живо́ю, пали́мꙋю въ безмѣ́стїихъ лю́тѣ, ꙗ҆́кѡ є҆ди́нъ бл҃гоꙋтро́бный и҆ чл҃вѣколю́бецъ.
И҆ ны́нѣ: бг҃оро́диченъ, гла́съ д҃:
И҆́же тебѐ ра́ди, бг҃оѻц҃ъ проро́къ дв҃дъ, пѣ́сненнѡ ѡ҆ тебѣ̀ провозгласѝ, вели̑чїѧ тебѣ̀ сотво́ршемꙋ: предста̀ цр҃и́ца ѡ҆деснꙋ́ю тебѐ. тѧ́ бо мт҃рь хода́таицꙋ живота̀ показа̀, без̾ ѻ҆ц҃а̀ и҆з̾ тебѐ вочеловѣ́читисѧ благоволи́вый бг҃ъ: да сво́й па́ки ѡ҆бнови́тъ ѻ҆́бразъ, и҆стлѣ́вшїй страстьмѝ, и҆ заблꙋ́ждшее горохи́щное ѡ҆брѣ́тъ ѻ҆вча̀, на ра́мо воспрїи́мъ, ко ѻ҆ц҃ꙋ̀ принесе́тъ, и҆ своемꙋ̀ хотѣ́нїю, съ нбⷭ҇ными совокꙋ́питъ си́лами, и҆ спасе́тъ бцⷣе мі́ръ, хрⷭ҇то́съ и҆мѣ́ѧй ве́лїю и҆ бога́тꙋю ми́лость.
Вхо́дъ. Прокі́менъ днѐ. На лїті́и стїхи́ра хра́ма.
Сла́ва, и҆ ны́нѣ: гла́съ г҃:
Да ра́дꙋетсѧ дне́сь свѣ́тлѡ нб҃о и҆ землѧ̀, занѐ хрⷭ҇то́съ ꙗ҆ви́сѧ воплоща́емь ꙗ҆́кѡ человѣ́къ, да а҆да́ма и҆́зметъ ѿ клѧ́твы всеро́дныѧ, и҆ ᲂу҆дивлѧ́етсѧ чꙋдесы̀ самарі́ю прише́дъ: женѣ́ же предста̀ воды̀ просѧ̀, ѻ҆́блаки вода́ми ѡ҆дѣва́ѧй. тѣ́мже всѝ вѣ́рнїи покланѧ́емсѧ на́съ ра́ди во́лею ѡ҆бнища́вшемꙋ, бл҃гоꙋтро́бнымъ совѣ́томъ. <<рл҃а ѡ҆б.: 262>>
На стїхо́внѣ стїхи́ра воскре́сна, гла́съ д҃:
Гдⷭ҇и возше́дъ на крⷭ҇тъ, пра́дѣднюю на́шꙋ клѧ́твꙋ потреби́лъ є҆сѝ, и҆ соше́дъ во а҆́дъ, ꙗ҆̀же ѿ вѣ́ка ᲂу҆́зники свободи́лъ є҆сѝ, нетлѣ́нїе да́рꙋѧ человѣ́ческомꙋ ро́дꙋ. сегѡ̀ ра́ди пою́ще сла́вимъ животворѧ́щее и҆ спаси́тельное твоѐ воста́нїе.
И҆ про́чыѧ стїхи̑ры па́сцѣ, съ припѣ́вы и҆̀хъ, [и҆щѝ въ недѣ́лю па́схи на ᲂу҆́трени, ли́стъ з҃, на ѡ҆боро́тѣ.]
Сла́ва: гла́съ и҃:
Є҆гда̀ ꙗ҆ви́лсѧ є҆сѝ во пло́ти хрⷭ҇тѐ бж҃е, за неизрече́нное смотре́нїе, слы́шавши самарѧны́нѧ сло́во тебѐ чл҃вѣколю́бца, ѡ҆ста́ви почерпа́ло ᲂу҆ стꙋденца̀, и҆ течѐ глаго́лющи сꙋ́щымъ во гра́дѣ: прїиди́те ви́дите срⷣцевѣ́дца, є҆да̀ се́й є҆́сть ча́емый хрⷭ҇то́съ, и҆мѣ́ѧй ве́лїю млⷭ҇ть;
И҆ ны́нѣ: Воскрⷭ҇нїѧ де́нь:
И҆ прѡ́чаѧ всѧ̑, ꙗ҆́кѡ предписа́сѧ въ про́чїихъ недѣ́лѧхъ. Ѿпꙋсти́тельный тропа́рь, гла́съ д҃: Свѣ́тлꙋю воскрⷭ҇нїѧ:
Сла́ва и҆ ны́нѣ: пра́здника, гла́съ и҃:
Преполови́вшꙋсѧ пра́здникꙋ, жа́ждꙋщꙋю дꙋ́шꙋ мою̀ бл҃гоче́стїѧ напо́й вода́ми, ꙗ҆́кѡ всѣ̑мъ сп҃се возопи́лъ є҆сѝ: жа́ждай да грѧде́тъ ко мнѣ̀, и҆ да пїе́тъ. и҆сто́чниче жи́зни на́шеѧ хрⷭ҇тѐ бж҃е, сла́ва тебѣ̀.
А҆́ще нѣ́сть бдѣ́нїѧ, на полꙋ́нощницѣ канѡ́нъ ст҃ѣ́й и҆ живонача́льнѣй трⷪ҇цѣ, во ѻ҆ктѡ́ихѣ, гла́са д҃-гѡ.
Та́же: Досто́йно є҆́сть: и҆ прѡ́чаѧ. <<рл҃в: 263>>
На ᲂу҆́трени,
на Бг҃ъ гдⷭ҇ь: тропа́рь воскре́сенъ, два́жды, гла́съ д҃:
Свѣ́тлꙋю воскрⷭ҇нїѧ про́повѣдь, ѿ а҆́гг҃ла ᲂу҆вѣ́дѣвше гдⷭ҇ни ᲂу҆чєни́цы, и҆ пра́дѣднее ѡ҆сꙋжде́нїе ѿве́ргше, а҆пⷭ҇лѡмъ хва́лѧщесѧ глаго́лахꙋ: и҆спрове́ржесѧ сме́рть, воскре́се хрⷭ҇то́съ бг҃ъ, да́рꙋѧй мі́рови ве́лїю ми́лость.
И҆ пра́здника: Преполови́вшꙋсѧ пра́здникꙋ: є҆ди́нощи.
Та́же ѻ҆бы́чное стїхосло́вїе.
По а҃-мъ стїхосло́вїи сѣда́ленъ, гла́съ д҃:
Воззрѣ́вше на гро́бный вхо́дъ, и҆ пла́мене а҆́гг҃льскагѡ не терпѧ́ще мѷронѡ́сицы, съ тре́петомъ дивлѧ́хꙋсѧ глаго́люще: є҆да̀ ᲂу҆кра́десѧ, ѿве́рзый разбо́йникꙋ ра́й; є҆да́ ли воста̀, и҆́же и҆ пре́жде стра́сти проповѣ́давый воста́нїе; вои́стиннꙋ воскре́се хрⷭ҇то́съ, сꙋ́щымъ во а҆́дѣ подаѧ̀ живо́тъ и҆ воскрⷭ҇нїе.
Сті́хъ: Воскрⷭ҇нѝ гдⷭ҇и бж҃е мо́й:
Подо́бенъ: Ско́рѡ предварѝ:
Воскре́слъ є҆сѝ ꙗ҆́кѡ безсме́ртный, ѿ гро́ба сп҃се, совоздви́глъ є҆сѝ мі́ръ тво́й си́лою твое́ю хрⷭ҇тѐ бж҃е на́шъ, сокрꙋши́лъ є҆сѝ въ крѣ́пости сме́рти держа́вꙋ, показа́лъ ми́лостиве воскрⷭ҇нїе всѣ̑мъ. тѣ́мже тѧ̀ и҆ сла́вимъ є҆ди́не человѣколю́бче.
Сла́ва и҆ ны́нѣ: бг҃оро́диченъ:
Є҆́же ѿ вѣ́ка ᲂу҆тае́ное, и҆ а҆́гг҃лѡмъ несвѣ́домое та́инство, тобо́ю бцⷣе сꙋ́щымъ на землѝ ꙗ҆ви́сѧ бг҃ъ, въ несли́тномъ соедине́нїи воплоща́емь, и҆ крⷭ҇тъ во́лею на́съ <<рл҃в ѡ҆б.: 264>> ра́ди воспрїи́мъ, и҆́мже воскреси́въ первозда́ннаго, сп҃сѐ ѿ сме́рти дꙋ́шы на́шѧ.
По в҃-мъ стїхосло́вїи сѣда́ленъ, гла́съ д҃.
Подо́бенъ: Оу҆диви́сѧ і҆ѡ́сифъ:
Съ го́рнихъ высо́тъ сше́дъ гаврїи́лъ, и҆ къ ка́меню пристꙋ́пль, и҆дѣ́же ка́мень жи́зни, бѣлоносѧ́й взыва́ше къ пла́чꙋщымъ: преста́ните вы̀ ѿ рыда́нїѧ во́плѧ, и҆мѣ́ющыѧ и҆ ны́нѣ ми́лостивное: є҆го́же бо и҆́щете пла́чꙋще, дерза́йте, ꙗ҆́кѡ вои́стиннꙋ воста́лъ є҆́сть. тѣ́мже возопі́йте а҆пⷭ҇лѡмъ, ꙗ҆́кѡ воскре́се гдⷭ҇ь.
Сті́хъ: И҆сповѣ́мсѧ тебѣ̀ гдⷭ҇и, всѣ́мъ се́рдцемъ мои́мъ:
Во́льнымъ твои́мъ совѣ́томъ крⷭ҇тъ претерпѣ́лъ є҆сѝ сп҃се, и҆ во гро́бѣ но́вѣ положи́ша тѧ̀ человѣ́цы сме́ртнїи, сло́вомъ концы̀ соста́вльшаго. тѣ́мже свѧ́занъ бы́сть чꙋ́ждїй, сме́рть лю́тѡ плѣнѧ́шесѧ, и҆ сꙋ́щїи во а҆́дѣ всѝ взыва́хꙋ живоно́сномꙋ воста́нїю твоемꙋ̀: хрⷭ҇то́съ воскре́се, жизнода́вецъ пребыва́ѧй во вѣ́ки.
Сла́ва, и҆ ны́нѣ, бг҃оро́диченъ, самогла́сенъ:
Оу҆диви́сѧ і҆ѡ́сифъ, є҆́же па́че є҆стества̀ зрѧ̀, и҆ внима́ше мы́слїю и҆́же на рꙋно̀ до́ждь, въ безсѣ́менномъ зача́тїи твое́мъ бцⷣе, кꙋпинꙋ̀ ѻ҆гне́мъ неѡпали́мꙋю, же́злъ а҆арѡ́новъ прозѧ́бшїй, и҆ свидѣ́тельствꙋѧ ѡ҆брꙋ́чникъ тво́й и҆ храни́тель, сщ҃е́нникѡмъ взыва́ше: дв҃а ражда́етъ, и҆ по ржⷭ҇твѣ̀ па́ки дв҃ою пребыва́етъ.
Та́же чте́нїе въ толкова́нїи є҆ѵⷢ҇лїа і҆ѡа́нна: сло́во л҃а, л҃в, л҃г и҆ л҃д. По Бл҃же́ни непоро́чнїи: глаго́лемъ тропарѝ воскрⷭ҇ны: Блгⷭ҇ве́нъ є҆сѝ гдⷭ҇и: во гла́съ є҃. А҆́гг҃льскїй собо́ръ: и҆ про́чее. <<рл҃г: 265>>
И҆ а҆́бїе ѵ҆пакоѝ, гла́съ д҃:
Ꙗ҆́же твоегѡ̀ пресла́внагѡ воста́нїѧ, предте́кшыѧ мѷронѡ́сицы, а҆пⷭ҇лѡмъ проповѣ́дахꙋ хрⷭ҇тѐ, ꙗ҆́кѡ воскре́слъ є҆сѝ ꙗ҆́кѡ бг҃ъ, подаѧ́й мі́рови ве́лїю ми́лость.
И҆ а҆́бїе степє́нны, гла́съ д҃. А҆нтїфѡ́нъ а҃:
Ѿ ю҆́ности моеѧ̀ мно́зи бо́рютъ мѧ̀ стра̑сти, но са́мъ мѧ̀ застꙋпѝ, и҆ спасѝ сп҃се мо́й.
Ненави́дѧщїи сїѡ́на, посрами́тесѧ ѿ гдⷭ҇а: ꙗ҆́кѡ трава́ бо ѻ҆гне́мъ бꙋ́дете и҆зсо́хше.
Сла́ва:
Ст҃ы́мъ дх҃омъ всѧ́ка дш҃а̀ живи́тсѧ и҆ чⷭ҇тото́ю возвыша́етсѧ, свѣтлѣ́етсѧ трⷪ҇ческимъ є҆ди́нствомъ сщ҃еннота́йнѣ.
И҆ ны́нѣ: то́йже.
А҆нтїфѡ́нъ в҃:
Воззва́хъ тебѣ̀ гдⷭ҇и те́плѣ и҆з̾ глꙋбины̀ дш҃ѝ моеѧ̀, и҆ мнѣ̀ да бꙋ́дꙋтъ на послꙋша́нїе бжⷭ҇твєннаѧ твоѧ̑ ᲂу҆шеса̀.
На гдⷭ҇а наде́ждꙋ всѧ́къ кто̀ стѧжа́въ, вы́шшїй є҆́сть и҆́хъ скорбѧ́щихъ.
Сла́ва:
Ст҃ы́мъ дх҃омъ точа́тсѧ бл҃года̑тныѧ стрꙋи̑, напаѧ́юще всѧ́кꙋ тва́рь ко ѡ҆живле́нїю.
И҆ ны́нѣ: то́йже:
А҆нтїфѡ́нъ г҃:
Се́рдце моѐ къ тебѣ̀, сло́ве, да возвы́ситсѧ, и҆ да ничто́же ᲂу҆слади́тъ мѧ̀ ѿ мїрски́хъ красо́тъ на сла́бость.
Къ ма́тери свое́й ꙗ҆́коже и҆́мать кто̀ любо́вь, ко гдⷭ҇ꙋ те́пльше любле́нїемъ должнѝ є҆смы̀. <<рл҃г ѡ҆б.: 266>>
Сла́ва:
Ст҃ы́мъ дх҃омъ, бг҃овѣ́дѣнїѧ бога́тство, зрѣ́нїѧ, и҆ премⷣрости: всѧ̑ бо въ се́мъ ѻ҆ч҃єскаѧ велѣ̑нїѧ сло́во ѿкрыва́етъ.
И҆ ны́нѣ: то́йже:
Прокі́менъ, гла́съ д҃: Воскрⷭ҇нѝ гдⷭ҇и, помозѝ на́мъ, и҆ и҆зба́ви на́съ и҆́мене твоегѡ̀ ра́ди. Сті́хъ: Бж҃е ᲂу҆ши́ма на́шима ᲂу҆слы́шахомъ: Та́же: Всѧ́кое дыха́нїе да хва́литъ гдⷭ҇а. Сті́хъ: Хвали́те бг҃а во ст҃ы́хъ є҆гѡ̀: Є҆ѵⷢ҇лїе ѿ і҆ѡа́нна, ᲂу҆́треннее з҃: Во є҆ди́нꙋ ѿ сꙋббѡ́тъ: Воскресе́нїе хрⷭ҇то́во: три́жды. ѱало́мъ н҃. И҆ про́чее.
Та́же канѡ́ны: па́сцѣ со і҆рмосы̀ и҆ съ бг҃оро́дичны, на ѕ҃: преполове́нїю, на д҃: и҆ самарѧны́ни, на д҃.
Катава́сїа: Воскрⷭ҇нїѧ де́нь:
Канѡ́нъ па́сцѣ, гла́съ а҃.
Пѣ́снь а҃. І҆рмо́съ: Воскрⷭ҇нїѧ де́нь:
Дрꙋгі́й канѡ́нъ преполове́нїю. Гла́съ и҃.
Творе́нїе а҆ндре́а кри́тскагѡ.
Пѣ́снь а҃.
І҆рмо́съ: Мо́ре ѡ҆гꙋсти́лъ є҆сѝ:
Ꙗ҆зы́цы восплещи́те, є҆вре́и воспла́чите, животода́вецъ бо хрⷭ҇то́съ, ᲂу҆́зы а҆́довы расто́рже, и҆ мє́ртвыѧ воскресѝ, и҆ недꙋ́ги и҆сцѣлѝ сло́вомъ: се́й є҆́сть бг҃ъ на́шъ, да́вый жи́знь вѣ́рꙋющымъ во и҆́мѧ є҆гѡ̀.
Чꙋ́до показа́лъ є҆сѝ, во́дꙋ въ вїно̀ преше́дшꙋю, во є҆гѵ́птѣ рѣ́ки преложи́вый влⷣко въ кро́вь, и҆ мє́ртвыѧ воскреси́лъ є҆сѝ, зна́менїе сїѐ второ́е сконча́въ. сла́ва сп҃се, <<рл҃д: 267>> несказа́нномꙋ твоемꙋ̀ совѣ́тꙋ: сла́ва и҆стоща́нїю твоемꙋ̀, и҆́мже ѡ҆бнови́лъ є҆сѝ на́съ.
Стрꙋѧ̀ приснотекꙋ́щаѧ сы́й гдⷭ҇и жи́зни и҆́стинныѧ, ты̀ є҆сѝ воскресе́нїе на́ше, хотѧ̀ трꙋди́лсѧ є҆сѝ сп҃се мо́й, и҆ во́лею вжада́лсѧ є҆сѝ, зако́нѡмъ є҆стества̀ повинꙋ́ѧсѧ, и҆ въ сѷха́рь ше́дъ пло́тїю, воды̀ проси́лъ є҆сѝ ᲂу҆ самарѧны́ни пи́ти.
Бг҃оро́диченъ:
Є҆ди́на вмѣсти́ла є҆сѝ зижди́телѧ твоего̀, бг҃ороди́тельнице, во чре́вѣ, и҆ пло́тїю родила̀ є҆сѝ неизрече́ннѡ, и҆ дв҃а пребыла̀ є҆сѝ, ничто́же двⷭ҇твꙋ ѡ҆скверни́вшꙋсѧ. сего̀ чⷭ҇таѧ ꙗ҆́кѡ сн҃а твоего̀ и҆ бг҃а, непреста́ннѡ молѝ ѡ҆ ста́дѣ твое́мъ при́снѡ.
И҆́нъ, канѡ́нъ самарѧны́ни.
Творе́нїе і҆ѡ́сифово. Гла́съ д҃.
Пѣ́снь а҃.
І҆рмо́съ: Порази́вый є҆гѵ́пта, и҆ фараѡ́на мꙋчи́телѧ погꙋби́вый въ мо́ри, лю́ди спа́слъ є҆сѝ и҆з̾ рабо́ты мѡѷсе́йски пою́щыѧ пѣ́снь побѣ́днꙋю: ꙗ҆́кѡ просла́висѧ.
Погребе́нный воста̀, собо́ю воздви́же ро́дъ человѣ́ческїй: да ра́дꙋетсѧ тва́рь всѧ̀ и҆ мы́сленнїи дне́сь ѻ҆́блацы да кропѧ́тъ пра́вдꙋ ꙗ҆́вѣ.
Крⷭ҇тъ во́льный пло́тїю прїи́мъ, тридне́венъ воскре́слъ ѿ ме́ртвыхъ, а҆́дова сокрѡ́вища живонача́льниче гдⷭ҇и и҆стощи́въ, и҆ и҆зве́дъ ѡ҆кова̑нныѧ дꙋ́шы.
Зра́комъ блиста́ющасѧ мѷронѡ́сицы ви́дѣвше а҆́гг҃ла, стра́хомъ бѣжа́ша ѿ гро́ба: хрⷭ҇то́во же воста́нїе ᲂу҆вѣ́дѣвше, и҆ возвѣсти́ти тща́тсѧ ᲂу҆ченикѡ́мъ. <<рл҃д ѡ҆б.: 268>>
Покрыва́ѧй вода́ми превы́спрєннѧѧ гдⷭ҇и, вода̀ жи́зни сы́й, самарѧны́ни, просѧ́щей твоеѧ̀ честны́ѧ воды̀, пода́лъ є҆сѝ разꙋмѣ́вшей бл҃гоꙋтро́бїе твоѐ.
Сла́ва: трⷪ҇ченъ:
Ѽ трⷪ҇це, вѣ́рою тѧ̀ чи́стою сла́вѧщихъ, ѻ҆́ч҃е, сн҃е и҆ дш҃е, ꙗ҆́кѡ творе́цъ всѣ́хъ спаса́й, и҆ ѡ҆чище́нїе да́рꙋй на́мъ грѣхѡ́въ, ꙗ҆́кѡ пребл҃гі́й.
И҆ ны́нѣ: бг҃оро́диченъ:
Ра́дꙋйсѧ, прⷭ҇то́ле ѻ҆́гненный. ра́дꙋйсѧ, свѣ́щниче всезлаты́й. ра́дꙋйсѧ, свѣ́та ѻ҆́блаче. ра́дꙋйсѧ, пала́то сло́ва, и҆ ᲂу҆́мнаѧ трапе́зо, хлѣ́бъ жи́зни досто́йнѡ хрⷭ҇та̀ носи́вшаѧ.
Пѣ́снь г҃.
І҆рмо́съ: Оу҆тверди́сѧ се́рдце моѐ:
Не и҆́же на лицѐ сꙋ́дъ сꙋди́те і҆ꙋде́є, ᲂу҆чѧ̀ глаго́лаше влⷣка, є҆гда̀ прїи́де во ст҃и́лище, ꙗ҆́коже пи́сано є҆́сть, преполови́вшꙋсѧ зако́нномꙋ пра́здникꙋ.
Не и҆́же на лицѐ сꙋ́дъ сꙋди́те і҆ꙋде́є: хрⷭ҇то́съ бо прїи́де, є҆го́же нарица́хꙋ проро́цы, ѿ сїѡ́на грѧдꙋ́ща, и҆ мі́ръ взыва́юща.
А҆́ще и҆ словесє́мъ не вѣ́рꙋете і҆ꙋде́є, дѣлѡ́мъ вѣ́рꙋйте влⷣки: что̀ прельща́етесѧ ѿмета́ющесѧ ст҃а́гѡ, є҆го́же писа̀ въ зако́нѣ мѡѷсе́й;
Бг҃оро́диченъ:
Є҆ди́нъ ѿ трⷪ҇цы сы́й бы́въ, пло́ть ви́дѣлсѧ є҆сѝ не прело́жь гдⷭ҇и сꙋщества̀, нижѐ ѡ҆пали́въ ро́ждшїѧ нетлѣ́нное чре́во, бг҃ъ сы́й ве́сь и҆ ѻ҆́гнь. <<рл҃є: 269>>
И҆́нъ
І҆рмо́съ: Оу҆тверди́сѧ се́рдце моѐ въ гдⷭ҇ѣ, даю́щемъ моли́твꙋ молѧ́щемꙋсѧ, ꙗ҆́кѡ лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою.
Во́лею на дре́во возне́слсѧ є҆сѝ сло́ве, и҆ зрѧ́щее распада́хꙋсѧ ка́менїе, и҆ тва́рь преклонѧ́шесѧ всѧ̀, и҆ ме́ртвїи и҆з̾ гробѡ́въ, ꙗ҆́коже ѿ сна̀ воста́хꙋ.
Съ дꙋше́ю тѧ̀ прише́дша ко а҆́дꙋ сло́ве, ви́дѣвше всѧ̑ дꙋ́шы пра́ведныхъ, ѿ вѣ́чныхъ ᲂу҆́зъ ѿрѣша́хꙋсѧ, пѣсносло́вѧще ꙗ҆́же па́че ᲂу҆ма̀ си́лꙋ твою̀.
Что̀ чꙋдите́сѧ; что̀ во гро́бѣ вы̀ и҆́щете съ мѵ́ромъ жєны̀, влⷣкꙋ; воста̀, и҆ мі́ръ совоздви́же, а҆́гг҃лъ блиста́ѧйсѧ мѷроно́сицамъ вѣща́ше.
Жи́знь сы́й гдⷭ҇и, и҆ и҆сто́чникъ безсме́ртїѧ, сѣ́лъ є҆сѝ при и҆сто́чницѣ ще́дре, и҆ твои́хъ премꙋ́дрыхъ во́дъ и҆спо́лнилъ є҆сѝ самарѧны́ню просѧ́щꙋю, и҆ пою́щꙋю тѧ̀.
Сла́ва: трⷪ҇ченъ:
Є҆ди́нъ над̾ всѣ́ми въ трⷪ҇цѣ бг҃ъ пое́тсѧ, ѻ҆ц҃ъ и҆ сн҃ъ и҆ бж҃е́ственный дх҃ъ, є҆го́же стра́хомъ сла́вѧтъ нбⷭ҇нїи чи́нове, ꙗ҆́снѡ вопїю́ще: ст҃ъ, ст҃ъ, ст҃ъ є҆сѝ гдⷭ҇и.
И҆ ны́нѣ: бг҃оро́диченъ:
Несказа́ннѡ заче́нши во ᲂу҆тро́бѣ твое́й всѣ́хъ бг҃а, дв҃о мт҃и, па́че мы́сли и҆ сло́ва родила̀ є҆сѝ, пребы́вши дв҃а ꙗ҆́кѡ пре́жде ржⷭ҇тва̀, бг҃оневѣ́сто.
Конда́къ преполове́нїю, и҆ і҆́косъ. [ли́стъ рѕ҃і.]
Сѣда́ленъ самарѧны́ни, гла́съ д҃. Подо́бенъ: Вознесы́йсѧ:
Да ра́дꙋетсѧ нб҃о, да ликовствꙋ́ютъ земна̑ѧ, ꙗ҆́кѡ хрⷭ҇то́съ ѿ дв҃ы ꙗ҆ви́всѧ ꙗ҆́кѡ человѣ́къ, и҆зба́ви и҆з̾ <<рл҃є ѡ҆б.: 270>> и҆стлѣ́нїѧ всѐ человѣ́чество свое́ю сме́ртїю: чꙋдесы́ же возсїѧ́вый женѣ̀ самарѧны́нѣ воды̀ просѧ́щей, подае́тъ и҆сто́чникъ и҆сцѣле́нїй, ꙗ҆́кѡ є҆ди́нъ безсме́ртенъ.
Сла́ва, и҆ ны́нѣ: гла́съ д҃. Подо́бенъ:
Премꙋ́дрости пода́телю и҆ влⷣко, пра́здникꙋ зако́нномꙋ предста́лъ є҆сѝ, во ст҃и́лищи сѣ́дъ ᲂу҆чи́лъ є҆сѝ, глаго́лѧ си́це всѣ̑мъ: грѧди́те жа́ждꙋщїи, пі́йте во́дꙋ, ю҆́же а҆́зъ ны́нѣ подаю̀, є҆́юже жи́зни ѿ бг҃а и҆ пи́щи наслади́тесѧ всѝ человѣ́цы.
Пѣ́снь д҃.
І҆рмо́съ: Проро́къ а҆ввакꙋ́мъ:
А҆́ще мессі́и подоба́етъ прїитѝ, мессі́а же хрⷭ҇то́съ є҆́сть беззако́ннїи, что̀ не вѣ́рꙋете є҆мꙋ̀; сѐ прїи́де, и҆ свидѣ́тельствꙋетъ, ꙗ҆̀же то́й твори́тъ: во́дꙋ вїно̀ сотворѝ разсла́бленнаго сло́вомъ стѧгнꙋ̀.
Не разꙋмѣ́юще писа́нїй прельща́етесѧ всѝ вы̀, є҆вре́и беззако́ннїи: вои́стиннꙋ бо прїи́де хрⷭ҇то́съ и҆ всѣ́хъ просвѣтѝ, и҆ въ ва́съ показа̀ мнѡ́гаѧ зна́мєнїѧ и҆ чꙋдеса̀ и҆ всꙋ́е ѿрица́етесѧ и҆́стиннагѡ живота̀.
Є҆ди́но дѣ́ло показа́хъ ва́мъ, и҆ всѝ ᲂу҆жѐ диви́тесѧ, взыва́ше і҆ꙋде́ѡмъ хрⷭ҇то́съ. вы̀ ѡ҆брѣ́зꙋете и҆ въ сꙋббѡ́тꙋ человѣ́ка, речѐ: мене́ же что̀ ѡ҆клевета́ете про́чее, воздви́гшаго сло́вомъ разсла́бленнаго;
Дѣла̀ сотвори́хъ мнѡ́гаѧ, и҆ ко́егѡ ра́ди дѣ́ла ка́менїемъ бїете́ мѧ, і҆ꙋде́ѡмъ хрⷭ҇то́съ ѡ҆блича́ѧ взыва́ше; є҆да̀ занѐ человѣ́ка здра́ва всего̀ сло́вомъ сотвори́хъ; не сꙋди́те на лицѐ человѣ́цы. <<рл҃ѕ: 271>>
И҆́нъ.
І҆рмо́съ: Оу҆слы́шахъ бж҃е слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̀, и҆ ᲂу҆жасо́хсѧ, гдⷭ҇и: ꙗ҆́кѡ твоегѡ̀ хвале́нїѧ и҆спо́лнь землѧ̀.
Нб҃са̀ да веселѧ́тсѧ, да пра́зднꙋетъ тва́рь всѧ̀, воста̀ гдⷭ҇ь, и҆ ꙗ҆ви́сѧ всѣ̑мъ премꙋ́дрымъ а҆пⷭ҇лѡмъ свои́мъ.
Поже́рта бы́сть сме́рте твоѧ̀ си́ла, хрⷭ҇тꙋ̀ ᲂу҆ме́ршꙋ, ме́ртвїи ꙗ҆́кѡ ѿ черто́гѡвъ, воста́нїемъ сегѡ̀ ѿ гробѡ́въ и҆зыдо́ша.
Что̀ рыда́ете, ѽ жєны̀; что̀ съ мѵ́ры и҆́щете безсме́ртнагѡ; воста̀, ꙗ҆́коже речѐ, мѷроно́сицамъ глаго́ла а҆́гг҃лъ.
Самарѧны́ни гдⷭ҇и, проси́вшей пода́лъ є҆сѝ во́дꙋ, вѣ́дѣнїе держа́вы твоеѧ̀: тѣ́мже во вѣ́ки не вжа́ждетъ воспѣва́ющи тѧ̀.
Сла́ва: трⷪ҇ченъ:
Ѽ трⷪ҇це пресꙋ́щнаѧ, ѻ҆́ч҃е, и҆ сло́ве, и҆ бжⷭ҇твенный дш҃е, є҆диноси́льне, собезнача́льне! спасѝ на́съ всѣ́хъ вѣ́рою воспѣва́ющихъ тѧ̀.
И҆ ны́нѣ, бг҃оро́диченъ:
Неѡпали́мꙋю кꙋпинꙋ̀ тѧ̀ законоположи́тель, зрѧ́ше дре́вле, данїи́лъ же го́рꙋ ст҃ꙋ́ю смотрѧ́ше, є҆ди́на дв҃о мт҃и влⷣчце.
Пѣ́снь є҃.
І҆рмо́съ: Гдⷭ҇и бж҃е на́шъ, ми́ръ:
Чꙋдесы̀ ᲂу҆краси́лъ є҆сѝ а҆пⷭ҇лы твоѧ̑, дивесы̀ возвели́чилъ є҆сѝ ᲂу҆ченикѝ, во все́мъ мі́рѣ просла́вивъ сп҃се на́шъ, и҆ да́въ и҆̀мъ црⷭ҇твїе твоѐ. <<рл҃ѕ ѡ҆б.: 272>>
Всѧ̀ просвѣти́ша землѝ концы̀ ᲂу҆ченицы̀, чꙋдесы̀ и҆ ᲂу҆че́ньми, и҆ разли́чными ѻ҆́бразы сло́во проповѣ́давше, хрⷭ҇тѐ сп҃се, црⷭ҇твїѧ твоегѡ̀.
Хвалꙋ̀ возсыла́емъ црⷭ҇твїю твоемꙋ̀, пѣ́нїе же тебѣ̀ прино́симъ, на́съ ра́ди на землѝ ꙗ҆ви́вшемꙋсѧ, и҆ мі́ръ просвѣти́вшемꙋ, и҆ а҆да́ма воззва́вшемꙋ.
Бг҃оро́диченъ:
Бы́сть чре́во твоѐ ст҃а́ѧ трапе́за, и҆мꙋ́щаѧ нбⷭ҇ный хлѣ́бъ: ѿ негѡ́же всѧ́къ ꙗ҆ды́й не ᲂу҆мира́етъ, ꙗ҆́коже речѐ всѣ́хъ бг҃ороди́тельнице, пита́тель.
И҆́нъ.
І҆рмо́съ: Возсїѧ́й мѝ гдⷭ҇и свѣ́тъ повелѣ́нїй твои́хъ, ꙗ҆́кѡ къ тебѣ̀ дꙋ́хъ мо́й ᲂу҆́тренюетъ, и҆ пое́тъ тѧ̀: ты́ бо є҆сѝ бг҃ъ на́шъ, и҆ къ тебѣ̀ прибѣга́ю цр҃ю̀ ми́ра.
Гро́бъ тво́й ст҃ы́й дости́гше ᲂу҆ра́нше мѷронѡ́сицы, блиста́ющасѧ ви́дѣша ю҆́ношꙋ и҆ ᲂу҆жасо́шасѧ, твоемꙋ̀ наꙋчи́вшесѧ воста́нїю хрⷭ҇тѐ.
Сме́рть ᲂу҆мертви́сѧ, а҆́дъ плѣни́сѧ, сꙋ́щїи во ᲂу҆́захъ свободи́шасѧ хрⷭ҇то́вымъ воскресе́нїемъ, возра́дꙋимсѧ и҆ рꙋка́ми воспле́щимъ, пра́зднꙋюще свѣ́тлѡ.
А҆пⷭ҇ли взыгра́йте, и҆ а҆́гг҃ли ликꙋ́йте, земноро́днїи всѝ возра́дꙋйтесѧ: гдⷭ҇ь воскре́се, тлѧ̀ и҆спрове́ржесѧ, и҆ печа́ль преста̀, и҆ ликовствꙋ́етъ а҆да́мъ.
И҆сто́чникъ сы́й гдⷭ҇и жи́зни, во́дꙋ ѡ҆ставле́нїѧ и҆ разꙋмѣ́нїѧ дарова́лъ є҆сѝ, женѣ̀ проси́вшей дре́вле самарѧны́нѣ. тѣ́мже воспѣва́емъ неизречє́нныѧ щедрѡ́ты твоѧ̀.
Сла́ва: трⷪ҇ченъ:
Є҆ди́ницꙋ трїѷпоста́снꙋю, трⷪ҇цꙋ є҆диносꙋ́щнꙋю, ѻ҆ц҃а̀, <<рл҃з: 273>> сло́ва, и҆ дх҃а ст҃а́го, нераздѣ́льна є҆стество́мъ бг҃а є҆ди́наго почита́емъ, творца̀ и҆ гдⷭ҇а и҆ влⷣкꙋ всѣ́хъ.
И҆ ны́нѣ: бг҃оро́диченъ:
Тѧ̀ две́рь непроходи́мꙋю, и҆ село̀ невоздѣ́ланное и҆ ковче́гъ ма́ннꙋ носѧ́щїй, и҆ рꙋ́чкꙋ, и҆ свѣ́щникъ, и҆ кади́льницꙋ невеще́ственнагѡ ᲂу҆́глѧ, и҆менꙋ́емъ чи́стаѧ.
Пѣ́снь ѕ҃.
І҆рмо́съ: Ꙗ҆́кѡ во́ды морскі̑ѧ:
Всѧ̑ содержа́й концы̀, возше́лъ є҆сѝ і҆и҃се, и҆ ᲂу҆чи́лъ є҆сѝ во ст҃и́лищи наро́ды сло́вꙋ и҆́стины, пра́здникꙋ преполови́вшꙋсѧ, ꙗ҆́коже і҆ѡа́ннъ вопїе́тъ.
Дѣ́ло ѻ҆́ч҃ее соверши́лъ є҆сѝ, дѣ́лы ᲂу҆вѣ́рилъ є҆сѝ словеса̀ твоѧ̑, и҆сцѣлє́нїѧ соверша́ѧ сп҃се и҆ зна́мєнїѧ: разсла́бленнаго и҆справлѧ́ѧ, прокажє́нныѧ ѡ҆чища́ѧ: и҆ мє́ртвыѧ воскреша́ѧ.
Безнача́льный сн҃ъ нача́ло бы́сть, прїе́мъ є҆́же по на́мъ вочеловѣ́чисѧ, и҆ посредѣ̀ пра́здника ᲂу҆ча́ше, глаго́лѧ: притецы́те ко и҆сто́чникꙋ приснотекꙋ́щемꙋ, жи́знь почерпи́те.
Бг҃оро́диченъ:
Дв҃ꙋ по ржⷭ҇твѣ̀ пое́мъ тѧ̀, дв҃ꙋ и҆ мт҃рь сла́вимъ, тебѐ є҆ди́нꙋ, чи́стаѧ бг҃оневѣ́сто ѻ҆трокови́це: и҆з̾ тебе́ бо вои́стиннꙋ бг҃ъ воплоти́сѧ, ѡ҆бнови́въ на́съ.
И҆́нъ.
І҆рмо́съ: Да не погрꙋзи́тъ менѐ бꙋ́рѧ водна́ѧ, нижѐ пожре́тъ менѐ глꙋбина̀: ѿве́рженъ бо є҆́смь во глꙋбины̑ се́рдца морска́гѡ ѕѡ́лъ мои́хъ. тѣ́мъ зовꙋ̀ ꙗ҆́кѡ і҆ѡ́на: да взы́детъ ѿ тлѝ ѕѡ́лъ живо́тъ мо́й къ тебѣ̀ бж҃е. <<рл҃з ѡ҆б.: 274>>
На крⷭ҇тѣ́ тѧ беззако́ннїи пригвозди́ша, и҆ копїе́мъ прободо́ша хрⷭ҇тѐ, и҆ і҆ѡ́сифъ бл҃гоѻбра́зный тѧ̀ погребѐ въ но́вомъ гро́бѣ: и҆з̾ негѡ́же со сла́вою воскре́съ, совоскреси́лъ є҆сѝ сп҃се, всю̀ тва́рь пою́щꙋю держа́вꙋ твою̀.
Верєѝ и҆ врата̀ влⷣко, си́льнѡ сокрꙋши́лъ є҆сѝ а҆́довы, и҆ воскре́слъ є҆сѝ ꙗ҆́кѡ бг҃ъ, и҆ срѣ́тъ, ра́дꙋйтесѧ, ре́клъ є҆сѝ жена́мъ, и҆ си́хъ рещѝ посла́лъ є҆сѝ ᲂу҆ченикѡ́мъ: воста̀ живо́тъ, и҆ ви́дѣнъ бы́сть, просвѣща́ѧй концы̀.
Что̀ пла́чете; что̀ но́сите ꙗ҆́кѡ сме́ртномꙋ жєны̀ мѵ̑ра; воста̀ хрⷭ҇то́съ, вопїѧ́ше дре́вле блиста́ѧйсѧ вельмѝ, ꙗ҆вле́йсѧ ю҆́ноша, тщы̀ плащани̑цы ѡ҆ста́вивъ: ше́дше возвѣсти́те дрꙋгѡ́мъ є҆гѡ̀ воста́нїе.
Стрꙋѧ̀ сы́й гдⷭ҇и жи́зни незави́стнаѧ, и҆ бе́здна ми́лости бл҃же, пꙋтеше́ствовавъ сѣди́ши бли́зъ кла́дѧзѧ клѧ́твеннагѡ, и҆ самарѧны́ни вопїѧ́лъ є҆сѝ: да́ждь мѝ во́дꙋ пи́ти, ꙗ҆́кѡ да прїи́меши ѡ҆ставле́нїѧ во́ды.
Сла́ва: трⷪ҇ченъ:
Пою̀ ѻ҆ц҃а̀ безнача́льна, и҆ сн҃а сопресто́льна, и҆ дх҃а є҆диносꙋ́щна вѣ́рнѡ, є҆ди́но сꙋщество̀, и҆ є҆стество̀ и҆ сла́вꙋ, и҆ є҆ди́но црⷭ҇тво бг҃а всѣ́хъ и҆ творца̀, содержи́телѧ всегѡ̀, со безпло́тными си́лами.
И҆ ны́нѣ: бг҃оро́диченъ:
Дв҃ꙋ є҆ди́нꙋ ро́ждшꙋю, и҆ ᲂу҆тро́бꙋ нетлѣ́ннꙋ соблю́дшꙋ пое́мъ тѧ̀ чи́стаѧ, прⷭ҇то́лъ гдⷭ҇нь, и҆ две́рь, и҆ го́рꙋ, и҆ мы́сленный свѣ́щникъ, черто́гъ всесвѣ́тлый бж҃їй, и҆ сѣ́нь сла́вы ꙗ҆́вѣ, ковче́гъ же и҆ рꙋ́чкꙋ и҆ трапе́зꙋ.
Конда́къ, гла́съ и҃. Подо́бенъ: Ꙗ҆́кѡ нача́тки:
Вѣ́рою прише́дшаѧ на кла́дѧзь самарѧны́нѧ, ви́дѣ тѧ̀ <<рл҃и: 275>> премꙋ́дрости во́дꙋ, є҆́юже напои́вшисѧ ѻ҆би́льнѡ, црⷭ҇твїе вы́шнее наслѣ́дова вѣ́чнѡ, ꙗ҆́кѡ присносла́внаѧ.
І҆́косъ:
Чи́стаѧ та̑инства ᲂу҆слы́шимъ, і҆ѡа́ннꙋ на́съ ᲂу҆ча́щꙋ, въ самарі́и бы̑вшаѧ: ка́кѡ женѣ̀ бесѣ́доваше гдⷭ҇ь, во́дꙋ проси́въ, и҆́же во́ды въ сѡ́нмища и҆́хъ собра́вый, и҆́же ѻ҆ц҃ꙋ̀ и҆ дх҃ꙋ сопресто́льный: прїи́де бо и҆щѧ́й ѻ҆́бразъ сво́й, вѣ́чнѡ ꙗ҆́кѡ присносла́вный.
Сѷнаѯа́рь мине́и.
Та́же настоѧ́щїй.
Стїхѝ: Во́дꙋ прїѧ́ти прише́дши тлѣ́ннꙋю же́но:
Живꙋ́ю почерпа́еши, є҆́юже сквє́рны дꙋшє́вныѧ ѡ҆мыва́еши.
Въ то́йже де́нь, въ недѣ́лю пѧ́тꙋю по па́сцѣ, самарѧны́ни пра́здникъ пра́зднꙋемъ: поне́же въ то́й хрⷭ҇то́съ мессі́ю себѐ ꙗ҆́вѣ и҆сповѣ́доваше, є҆́же є҆́сть хрⷭ҇то́съ [и҆лѝ пома́занъ]: ме́са бо ᲂу҆ є҆врє́й, є҆ле́й. сегѡ́ бо ра́ди мню̀ и҆ въ средопентико́стнꙋю седми́цꙋ ᲂу҆чине́нъ бы́сть. и҆ ꙗ҆́кѡ въ пре́жде тоѧ̀ ᲂу҆́бѡ недѣ́ли въ кꙋпѣ́ли чꙋдодѣ́йствꙋетъ, въ се́й же над̾ і҆а́кѡвлимъ стꙋденце́мъ, къ женѣ̀ бесѣ́дꙋѧ хрⷭ҇то́съ, и҆́же стꙋдене́цъ са́мъ і҆а́кѡвъ и҆скопа̀, и҆ дарова̀ і҆ѡ́сифꙋ сы́нꙋ своемꙋ̀: и҆зрѧ́дно бо бѣ̀ мѣ́сто сїѐ, и҆дѣ́же и҆ бли́зъ сꙋ́щꙋ горы̀ сомо́ры, самарѧ́не населѧ́хꙋ гра́ды мно́ги. Въ сѷха́рь же прихо́дитъ хрⷭ҇то́съ, и҆дѣ́же ѡ҆бита́вшꙋ дре́вле і҆а́кѡвꙋ, съ ді́ною дще́рїю свое́ю, и҆ съ сы́нми, сѷхе́мъ сы́нъ є҆мо́ровъ хоре́й возжелѣ̀ є҆ѧ̀, и҆ наси́ливъ бы́сть съ не́ю. и҆ ѿтꙋ́дꙋ бра́тїѧ тоѧ̀ раздражи́вшесѧ на ре́вность ѕѣлѡ̀, внеза́пꙋ вше́дше въ гра́дъ, вкꙋ́пѣ всѧ̑ ᲂу҆бива́ютъ, и҆ того̀ сѷхе́ма, и҆ ѻ҆тца̀ є҆гѡ̀ є҆мо́ра. ѻ҆бита́етъ ᲂу҆́бѡ та́мѡ і҆а́кѡвъ, и҆ настоѧ́щїй стꙋдене́цъ и҆скопа̀. Не самари́тѧне же пре́жде ѡ҆бита́хꙋ ᲂу҆ тоѧ̀ горы̀, но і҆сра́ильтѧне бг҃ꙋ прирази́вшесѧ, факе́ю ца́рствꙋющꙋ, пе́рвымъ плѣ́номъ и҆ вторы́мъ, а҆ссѷрі́ѡмъ прише́дшымъ под̾ да́нь си́хъ подложи́ша: и҆ пома́лѣ ѻ҆сі́ю ца́рствꙋющꙋ, прилага́ютсѧ къ є҆ѳїо́плѧнѡмъ: є҆́же ᲂу҆вѣ́дѣвъ <<рл҃и ѡ҆б.: 276>> а҆ссѷрі́йскїй ца́рь, преселѧ́етъ ѧ҆̀ въ вавѷлѡ́нъ. На ѻ҆́номъ же мѣ́стѣ разли̑чнымъ ꙗ҆зы́кѡмъ жи́ти повелѣ̀: но бг҃ъ львы̀ на и҆ноплеме́нники ѻ҆́ныѧ пꙋща́етъ. Ца́рь же а҆ссѷрі́йскїй па́ки ᲂу҆вѣ́дѣвъ сїѐ, свѧще́нники ѿ і҆ꙋдє́й тѣ̑мъ посыла́етъ, [є҆ще́ бо та́мѡ бѧ́хꙋ плѣне́ннїи,] ꙗ҆́кѡ да и҆ бж҃їѧ зако́ны прїи́мꙋтъ. И҆ ѿ і҆́дѡлъ ᲂу҆́бѡ ско́рѡ ѿскочи́ша. Є҆ди́ны же пѧ́теры кни́ги мѡѷсе́овы прїѧ́ша, ѿмета́ющесѧ прорѡ́къ, и҆ про́чагѡ писа́нїѧ. Сі́и и҆ самарѧ́не зово́ми бѧ́хꙋ, ꙗ҆́кѡ ѿ горы̀ сомо́ры: и҆ ненави́дими бѧ́хꙋ є҆вре́йми, ѿ плѣне́нїѧ возвраща́ющимисѧ, занѐ и҆́сполꙋ і҆ꙋде́йствовахꙋ, и҆ не ꙗ҆дѧ́хꙋ съ ни́ми, ме́рзостны ѧ҆̀ непщꙋ́юще. тѣ́мже и҆ хрⷭ҇та̀ самарѧни́на мно́гажды нарица́хꙋ, ꙗ҆́кѡ нѣ̑каѧ ѿ зако́нныхъ ᲂу҆́бѡ презира́юща и҆ разрꙋша́юща, ꙗ҆́коже ѻ҆нѝ. Прихо́дитъ ᲂу҆́бѡ въ сѷха́рь гдⷭ҇ь, и҆ трꙋди́всѧ ѿ пꙋтеше́ствїѧ, сѣ́де ѡ҆ часѣ̀ шесто́мъ днѐ. Жена́ же нѣ́каѧ ѿ гра́да прїи́де почерпстѝ воды̀, ᲂу҆ченикѡ́мъ ѿше́дшымъ на кꙋ́плю пи́щи: про́ситъ ᲂу҆́бѡ воды̀ і҆и҃съ. Ѻ҆на́ же не прикаса́тисѧ предлага́етъ, позна́ бо є҆го̀ и҆ ѿ гла́са, и҆ ѿ ѻ҆де́жды. Ѻ҆́нъ же возво́дитъ ю҆̀, дх҃о́внꙋю во́дꙋ приносѧ̀ въ средꙋ̀, ю҆́же неѡскꙋ́днꙋю и҆ чисти́тельнꙋю показꙋ́етъ: дх҃ъ бо водѣ̀ и҆ ѻ҆гню̀ при́снѡ ᲂу҆подоблѧ́етсѧ. Жена́ же неѿстꙋ́пнѡ прилѣжа́щи не и҆мѣ́ти ѻ҆́номꙋ во́дꙋ таковꙋ́ю, за є҆́же почерпа́ла не носи́ти, и҆ стꙋденцꙋ̀ бы́ти глꙋбокꙋ̀ приглаго́летъ. та́же и҆ на пра́ѻтца і҆а́кѡва возно́ситъ сло́во, ꙗ҆́кѡ са́мъ стꙋдене́цъ и҆скопа̀: и҆ ѻ҆́нъ, и҆ ѻ҆́вцы є҆гѡ̀ ѿ негѡ̀ пїѧ́хꙋ, бога́тое ѿсю́дꙋ и҆сто́чникꙋ представлѧ́ющи, и҆ є҆́же и҆́накѡ благопотре́бнꙋ и҆ стꙋденꙋ̀. Хрⷭ҇то́съ ᲂу҆́бѡ не бо́льша себѐ глаго́летъ і҆а́кѡва, да не женꙋ̀ ᲂу҆страши́тъ, но ѡ҆ водѣ̀ глаго́летъ, представлѧ́ѧ ѿсю́дꙋ тоѧ̀ предо́брое: пїѧ́й ѿ воды̀ ѻ҆́ноѧ ника́коже вжа́ждетъ. Про́ситъ же воды̀ жена̀, ѻ҆́нъ же глаго́летъ своего̀ є҆́й мꙋ́жа пригласи́ти, ꙗ҆́кѡ твердѣ́йшихъ слове́съ тре́бꙋющи разꙋмѣ́нїѧ. Ѻ҆на́ же ѿри́четсѧ не и҆мѣ́ти мꙋ́жа. Вѣ́дый же всѧ̑, глаго́летъ: до́брѣ рекла̀ є҆сѝ, пѧ́ть бо и҆мѣ́ла є҆сѝ, ꙗ҆́коже зако́нъ повелѣва́етъ, и҆ є҆го́же ны́нѣ и҆́маши шеста́го ꙗ҆́кѡ беззако́ннѡ ѻ҆́номꙋ сбыва́ющаѧ, нѣ́сть тѝ мꙋ́жъ. Нѣ́цыи ᲂу҆́бѡ пѧ́ть мꙋже́й, пѧ́ть кни́гъ мѡѷсе́овыхъ непщева́ша бы́ти, <<рл҃ѳ: 277>> ꙗ҆̀же самарѧ́не прїе́млѧхꙋ: шеста́го же та̀ словеса̀ хрⷭ҇то́ва, ꙗ҆̀же не бы́ша є҆щѐ ѻ҆́наѧ: и҆́бо не ᲂу҆̀ благода́ть и҆злїѧ́на бѣ̀. Дрꙋзі́и же, да́нныѧ пѧ́ть зако́ны ѿ бг҃а, и҆́же въ раѝ, и҆ по и҆згна́нїи, и҆́же при нѡ́и, и҆́же при а҆враа́мѣ, и҆́же при мѡѷсе́и. шесты́й же є҆ѵⷢ҇лїе, є҆́же и҆ є҆щѐ не и҆мѧ́ше. сꙋ́ть же и҆̀же и҆ пѧ́ть чꙋ́вствїй глаго́лютъ. Ѿвѣщава́етъ є҆мꙋ̀ жена̀, проро́ка є҆го̀ и҆менꙋ́ющи. Та́же вопроша́етъ є҆го̀ и҆ ѡ҆ горѣ̀, гдѣ̀ подоба́етъ кла́нѧтисѧ, въ сомо́рѣ ли, и҆лѝ во і҆ерꙋсали́мѣ. Не мнѧ́хꙋ бо самарѧ́не, ꙗ҆́кѡ соверше́ннѡ вездѣ̀ бг҃ꙋ бы́ти, но та́мѡ пребыва́ти то́чїю бг҃ꙋ, и҆дѣ́же и҆ поклонѧ́хꙋсѧ, въ гари́зѣ ꙗ҆́вѣ горѣ̀, за є҆́же та́мѡ да́тисѧ благослове́нїю ѿ бг҃а. И҆лѝ занѐ та́мѡ пе́рвый а҆враа́мъ же́ртвенникъ водрꙋзѝ бг҃ꙋ, ꙗ҆́коже і҆ꙋдє́и па́ки глаго́лахꙋ: во і҆ерꙋсали́мѣ подоба́етъ покланѧ́тисѧ є҆ди́номꙋ бг҃ꙋ. тѣ́мже и҆̀же и҆ ѿвсю́дꙋ въ пра́здникъ та́мѡ собира́хꙋсѧ. хрⷭ҇то́съ же ѿвѣщава́етъ, ѿ і҆ꙋдє́й глаго́лѧ сп҃се́нїе мі́рови: ѻ҆ба́че речѐ, бг҃ъ невеще́ственный є҆́сть, и҆ покланѧ́тисѧ сподо́бльшїисѧ, не въ же́ртвахъ ᲂу҆жѐ покло́нѧтсѧ, но въ дс҃ѣ и҆ и҆́стинѣ. И҆лѝ и҆ си́це бг҃а позна́ютъ, не є҆ди́наго, но въ дс҃ѣ ст҃о́мъ и҆ сн҃ѣ, то́й бо и҆́стина. Жена̀ па́ки глаго́летъ: слы́шимъ ѿ писа́нїй, ꙗ҆́кѡ мессі́а грѧде́тъ, є҆́же є҆́сть хрⷭ҇то́съ. І҆и҃съ же глаго́летъ: а҆́зъ є҆́смь, благонра́вїе жены̀ разꙋмѣ́въ. Вѣ́даша же самарѧ́не и҆ ѡ҆ мессі́и ѿ мѡѷсе́йскихъ кни́гъ, и҆зрѧ́днѣе же ѿ сегѡ̀: є҆́же проро́ка ва́мъ возста́витъ гдⷭ҇ь бг҃ъ, и҆ ѿ и҆ны́хъ мно́гихъ. конча́вшейсѧ же бесѣ́дѣ, и҆ ᲂу҆ченицы̀ прихо́дѧтъ, и҆ кра́йнемꙋ ᲂу҆дивлѧ́ютсѧ схожде́нїю, ка́кѡ съ жено́ю глаго́лаше; Ѻ҆ба́че же молѧ́хꙋ є҆го̀ ꙗ҆́сти, кꙋ́пнѡ ᲂу҆́бѡ за є҆́же потрꙋди́тисѧ, и҆ за вре́мене зно́йное. Ѻ҆́нъ же ѡ҆ вѣ́чной пи́щи тѣ̑мъ глаго́летъ чл҃вѣ́ческагѡ ꙗ҆́вѣ спасе́нїѧ, и҆ ꙗ҆́кѡ подоба́етъ и҆̀мъ прорѡ́ческїѧ трꙋды̀ пожа́ти. Но женѣ̀ во гра́дъ дости́гшей, и҆ ꙗ҆́же ѡ҆ себѣ̀ сказа́вшей, всѝ воздви́гшесѧ, и҆ ко хрⷭ҇тꙋ̀ прихо́дѧтъ вѣ́ровавше: ꙗ҆́кѡ не бы̀ жена̀ себѐ порекла̀, а҆́ще не бы̀ вели́ко что̀ разꙋмѣ́ла. И҆ мольбꙋ̀ и҆злїѧ́вше, томꙋ̀ пребы́ти ᲂу҆ ни́хъ во дню̀ двою̀, ᲂу҆молѧ́ютъ є҆го̀. И҆ пребы́въ, мно́жайша содѣ́ѧ чꙋдеса̀, ꙗ҆́же ᲂу҆́бѡ ѿ мно́жества во є҆ѵⷢ҇лїи не писа́шасѧ. Сїѧ́ же є҆́сть самарѧны́нѧ, <<рл҃ѳ ѡ҆б.: 278>> послѣдѝ ѿ хрⷭ҇та̀ фѡті́нїа и҆менова́ннаѧ, ꙗ҆́же и҆ мꙋче́нїѧ вѣнце́мъ ᲂу҆вѧзе́сѧ при нерѡ́нѣ ке́сарѣ, и҆ съ седмїю̀ свои́ми сы́ны, по мно́зѣ ѡ҆ѕлобле́нїи, и҆ строга́нїи, и҆ сосцꙋ̀ ѿрѣ́занїи, сокрꙋше́нїи рꙋ́къ, и҆ тросте́й то́нкихъ под̾ но́гти влага́нїи, и҆ ѻ҆́лова напое́нїи, и҆ и҆ны́хъ безчи́сленныхъ мꙋ́къ и҆стѧза́нїи, наконе́цъ ѿ двою̀ фі́нїкꙋ привѧза́нїи и҆ расторгнꙋ́тїи. Вѣ́домо же бꙋ́ди, ꙗ҆́кѡ стꙋденца̀ ѻ҆́нагѡ го́рлище, си́рѣчь ᲂу҆́стїе, ца́рь і҆ꙋстїнїа́нъ че́стнѣ ѿтꙋ́дꙋ прине́съ, въ бж҃їѧ сло́ва вели́комъ хра́мѣ ст҃ы́ѧ софі́и положѝ: но и҆ ка́мень, на не́мже хрⷭ҇то́съ сѣдѧ̀ самарѧны́ни бесѣ́доваше, и҆ досе́лѣ ѻ҆боѧ̀ пребыва́ютъ пред̾ па́пертомъ ѿ восто́ка, въ хра́мъ входѧ́щымъ на лѣ́вой странѣ̀, всѧ́къ недꙋ́гъ и҆сцѣлѧ́юща, па́че же ѿ ѻ҆гне́вицъ страда́ти приключа́ющымсѧ, и҆ трѧса́вицею болѧ́щымъ, ѡ҆чища́ютъ же и҆ ѿго́нѧтъ и҆ чарова̑нїѧ быва́ємаѧ. Твоеѧ̀ мꙋ́ченицы фѡті́нїи моли́твами, хрⷭ҇тѐ бж҃е, поми́лꙋй на́съ. а҆ми́нь.
Пѣ́снь з҃.
І҆рмо́съ: Халде́йскаѧ пе́щь:
Пло́тски потрꙋди́лсѧ є҆сѝ ᲂу҆покое́нїе всѣ́хъ, во́лею вжада́лсѧ є҆сѝ, и҆сто́чниче чꙋде́съ: воды̀ проси́лъ є҆сѝ, во́дꙋ жи́зни і҆и҃се возвѣща́ѧй.
Самарѧны́ни гдⷭ҇и женѣ̀ бесѣ́довалъ є҆сѝ, ѡ҆блича́ѧ безꙋ́мїе беззако́нныхъ є҆вре́ѡвъ: ѻ҆на̀ ᲂу҆́бѡ вѣ́рова сн҃а тѧ̀ бы́ти бж҃їѧ, сі́и же ѿверго́шасѧ.
Хлѣ́бъ ꙗ҆дꙋ́ще пло́ти гдⷭ҇ни, и҆ кро́вь прїе́млюще ребра̀ влⷣчнѧ, ѡ҆бновле́нїемъ дх҃а да жи́тельствꙋимъ, живꙋ́ще благода́тїю.
Бг҃оро́диченъ:
Во чре́вѣ твое́мъ вмѣсти́ла є҆сѝ невмѣсти́мое сло́во, ѿ твои́хъ сосє́цъ дои́ла є҆сѝ мі́рови пита́телѧ, на ѡ҆б̾ѧ́тїи носи́ла є҆сѝ творца̀ на́шего бг҃ороди́тельнице чⷭ҇таѧ. <<р҃м: 279>>
И҆́нъ.
І҆рмо́съ: Не преда́ждь на́съ до конца̀ и҆́мене твоегѡ̀ ра́ди, и҆ не разорѝ завѣ́та твоегѡ̀, и҆ не ѿста́ви ми́лости твоеѧ̀ ѿ на́съ, гдⷭ҇и бж҃е ѻ҆ц҃ъ на́шихъ, препѣ́тый во вѣ́ки.
Со беззако́нными хрⷭ҇тѐ ще́дре во́лею вмѣни́лсѧ є҆сѝ, во вре́мѧ бж҃е́ственныѧ стрⷭ҇ти: и҆ сїѧ̑ ви́дѧщи колеба́шесѧ землѧ̀, и҆ ка́менїе вседѣ́тельнымъ манове́нїемъ распада́шесѧ непостижи́ме, и҆ воста́ша ме́ртвїи и҆̀же ѿ вѣ́ка.
Съ дꙋше́ю сше́дъ во страны̀ преиспѡ́днїѧ а҆́да, возве́лъ є҆сѝ мꙋ́жествомъ свѧ́занныѧ всѧ̑, ꙗ҆̀же ѿ вѣ́ка сме́рть прїѧ́тъ, го́рькїй мꙋчи́тель, вопїю́щыѧ тебѣ̀: і҆и҃се бж҃е, сла́ва твоемꙋ̀ стра́шномꙋ смотре́нїю.
Съ ме́ртвыми что̀ вы̀ и҆́щете живꙋща́гѡ во вѣ́ки; воста̀, ꙗ҆́коже речѐ: сѐ ꙗ҆́коже ви́дите пра́здны плащани̑цы и҆стоще́нъ гро́бъ, ꙗ҆вле́йсѧ глаго́лаше мѷроно́сицамъ ю҆́ноша: ско́рѡ ше́дше рцы́те а҆по́столѡмъ.
Вода̀ є҆сѝ жи́зни, вопїѧ́ше хрⷭ҇тꙋ̀ самарѧны́нѧ: напо́й мѧ ᲂу҆́бѡ сло́ве жа́ждꙋщꙋю всегда̀ твоеѧ̀ бж҃е́ственныѧ благода́ти, ꙗ҆́кѡ да не ктомꙋ̀, і҆и҃се гдⷭ҇и, невѣ́дѣнїѧ содержꙋ́сѧ зно́емъ, но проповѣ́дꙋю твоѧ̀ вели̑чїѧ.
Сла́ва: трⷪ҇ченъ:
Ѻ҆ц҃а̀, и҆ сн҃а, и҆ бж҃е́ственнаго воспѣва́емъ дх҃а, нераздѣ́льнꙋю трⷪ҇цꙋ є҆стество́мъ сꙋ́щꙋю, раздѣле́ннꙋ ли́цы, є҆ди́но сꙋщество̀, сра́сленное, безнача́льное, творца̀ всѣ́хъ, бг҃а: є҆го́же всѝ нбⷭ҇нїи пою́тъ чи́нове.
И҆ ны́нѣ: бг҃оро́диченъ:
По ржⷭ҇твѣ̀ стра́шнѣмъ, дв҃а чиста̀ сохрани́ласѧ є҆сѝ, <<р҃м: 279>> ст҃а́ѧ бцⷣе: тѣ́мже тѧ̀ всѝ а҆́гг҃льстїи ли́цы, и҆ человѣ́честїи ро́ди всѝ, немо́лчными воспѣва́ютъ гла́сы, вмѣсти́лище чи́стое невмѣсти́магѡ.
Пѣ́снь и҃.
І҆рмо́съ: А҆́гг҃ли и҆ нб҃са̀ на прⷭ҇то́лѣ:
Прїиди́те ви́дите лю́дїе, на прⷭ҇то́лѣ сла́вы воспѣва́емаго, ѿ люде́й беззако́нныхъ хꙋ́лимаго, и҆ ви́дѧще, по́йте во проро́цѣхъ мессі́ю предрече́ннаго.
Ты̀ є҆сѝ вои́стиннꙋ хрⷭ҇то́съ, въ мі́ръ се́й прише́дый и҆з̾ негѡ́же спасе́нїе, и҆ ѡ҆ставле́нїе ѻ҆ч҃ескихъ согрѣше́нїй ты̀ є҆сѝ вои́стиннꙋ живо́тъ въ тѧ̀ вѣ́ровавшымъ.
Премꙋ́дрость бж҃їѧ, преполови́вшꙋсѧ пра́здникꙋ, ꙗ҆́коже пи́сано є҆́сть, во ст҃и́лищи предста̀, и҆ ᲂу҆ча́ше: ꙗ҆́кѡ вои́стиннꙋ се́й бѧ́ше мессі́а хрⷭ҇то́съ, и҆́мже спасе́нїе.
Бг҃оро́диченъ:
Ка́кѡ родила̀ є҆сѝ, рцы̀, ѿ ѻ҆ц҃а̀ безлѣ́тнѡ просїѧ́вша и҆ со ст҃ы́мъ дх҃омъ воспѣва́емаго; и҆лѝ ꙗ҆́кѡ вѣ́сть є҆ди́нъ бл҃говоли́вый и҆з̾ тебѐ роди́тисѧ, бцⷣе.
И҆́нъ.
І҆рмо́съ: Всѧ́чєскаѧ влⷣко премꙋ́дростїю соста́вилъ є҆сѝ земли́ же па́ки ᲂу҆тверди́лъ є҆сѝ, ꙗ҆́коже вѣ́си, дно̀, ѡ҆снова́нїемъ водрꙋзи́вый на вода́хъ безмѣ́рныхъ: тѣ́мъ всѝ вопїе́мъ воспѣва́юще: бл҃гослови́те дѣла̀ гдⷭ҇нѧ непреста́ннѡ гдⷭ҇а.
Сме́рть претерпѣ́лъ є҆сѝ, є҆ди́не безсме́ртне во́лею, а҆́да плѣни́лъ є҆сѝ, врата̀ мѣ̑днаѧ сте́рлъ є҆сѝ цр҃ю̀ нбⷭ҇ный, и҆ ѿѧ́лъ є҆сѝ ᲂу҆́зники ѿ вѣ́ка та́мѡ сꙋ́щыѧ, воспѣва́ющыѧ держа́вꙋ непреста́ннѡ твоеѧ̀ бл҃гости. <<рм҃а: 281>>
Возне́слсѧ є҆сѝ долготерпѣли́ве во́лею на дре́во, и҆ ка́менїе распаде́сѧ, и҆ со́лнце ᲂу҆гасѐ, и҆ завѣ́са цр҃ко́внаѧ раздра́сѧ, и҆ землѧ̀ поколеба́сѧ, и҆ потрепета̀ всепосмѣѧ́нный а҆́дъ, и҆ всѧ̑ ᲂу҆́зники разрѣшѝ.
Ꙗ҆ви́лсѧ є҆сѝ гдⷭ҇и, во тмѣ̀ сѣдѧ́щымъ, свѣ́тъ сы́й незаходи́мый, и҆ живо́тъ всѣ́хъ. тѣ́мже тѧ̀ ꙗ҆́кѡ ви́дѣ пра́ведныхъ со́нмъ, взыгра́сѧ сло́ве, и҆ возопѝ: прише́лъ є҆сѝ всѧ̑ ѿ ᲂу҆́зъ разрѣши́ти, пою́щыѧ держа́вꙋ твою̀.
Бли́зъ сѣ́лъ є҆сѝ и҆сто́чника, въ ча́съ сп҃се шесты́й, и҆ самарѧны́ни во́дꙋ живꙋ́ю пода́лъ є҆сѝ, и҆ ра́зꙋма во́ды за мно́гое бл҃гоꙋтро́бїе. съ не́юже всѝ вопїе́мъ воспѣва́юще: бл҃гослови́те дѣла̀ гдⷭ҇нѧ непреста́ннѡ гдⷭ҇а.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Ѻ҆ц҃а̀ безнача́льна, сн҃а собезнача́льна пое́мъ, и҆ дх҃а ст҃а́го, бг҃а є҆ди́наго тро́е, неслїѧ́нна, непресѣко́ма, содѣ́телѧ всѣ́хъ, є҆диноси́льнꙋю держа́вꙋ, самовла́стнꙋю, и҆ вопїе́мъ: бл҃гослови́те дѣла̀ гдⷭ҇нѧ, непреста́ннѡ гдⷭ҇а.
И҆ ны́нѣ: бг҃оро́диченъ:
Оу҆́глемъ ѡ҆чища́етсѧ и҆са́їа, предпроповѣ́дꙋѧ мы́сленнаго ᲂу҆́глѧ, воплоща́ема дв҃о и҆з̾ тебѐ па́че мы́сли, ѡ҆палѧ́юща человѣ́кѡвъ всѧ̑ вє́щныѧ грѣхѝ, и҆ ѡ҆божа́юща за млⷭ҇рдїе є҆стество̀ на́ше всенепоро́чнаѧ.
Та́же: Хва́лимъ бл҃гослови́мъ, покланѧ́емсѧ гдⷭ҇ви:
И҆ катава́сїа. Честнѣ́йшꙋю: не стїхосло́витсѧ.
Пѣ́снь ѳ҃.
І҆рмо́съ: Чꙋ́жде ма́теремъ:
Пра́здникꙋ преполовлѧ́ющꙋсѧ і҆ꙋде́йскомꙋ, возше́лъ є҆сѝ <<рм҃а ѡ҆б.: 282>> сп҃се мо́й во ст҃и́лище твоѐ, и҆ наꙋча́лъ є҆сѝ всѣ́хъ: чꙋдѧ́хꙋсѧ же і҆ꙋдє́и, и҆ ѿкꙋ́дꙋ се́й вѣ́сть пи́смена не наꙋчи́всѧ, глаго́лахꙋ.
И҆сцѣлє́нїѧ дарова́нїй и҆зба́витель мо́й и҆сточа́ѧ, сотворѧ́ше чꙋдеса̀ и҆ зна́мєнїѧ, прогонѧ̀ недꙋ́ги, цѣлѧ̀ немощствꙋ́ющыѧ: но і҆ꙋдє́и бѣснова́хꙋсѧ мно́жествомъ чꙋде́съ є҆гѡ̀.
Пло́тскїй і҆ꙋде́й по пло́ти разꙋмѣва́ѧй, помышлѧ́ѧй пи̑саннаѧ, писа́нїемъ претыка́етсѧ, проти́вꙋ па́даетъ же па́ки дꙋ́хомъ и҆́стины: мы́ же сїѐ ѿри́нꙋвше мꙋ́дрствꙋимъ дꙋхѡ́внаѧ.
Бг҃оро́диченъ:
Вмѣсти́ла є҆сѝ во чре́вѣ твое́мъ дв҃о мт҃и, є҆ди́наго ѿ трⷪ҇цы хрⷭ҇та̀ жизнода́вца: є҆го́же пое́тъ всѧ̀ тва́рь, и҆ трепе́щꙋтъ го́рнїи прⷭ҇то́ли, того̀ молѝ всебл҃же́ннаѧ спастѝ дꙋ́шы на́шѧ.
И҆́нъ.
І҆рмо́съ: Сотворѝ держа́вꙋ мы́шцею свое́ю, низложѝ бо си̑льныѧ со престѡ́лъ, и҆ вознесѐ смирє́нныѧ бг҃ъ і҆и҃левъ, въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.
Сѐ ви́дѣнъ бы́сть живо́тъ всѣ́хъ хрⷭ҇то́съ, повѣ́шенъ во́лею на дре́вѣ: и҆ сїѧ̑ ви́дѧщи землѧ̀ потрѧсе́сѧ, и҆ мнѡ́га ст҃ы́хъ воста́ша ꙗ҆́вѣ тѣлеса̀ ᲂу҆со́пшихъ, и҆ ᲂу҆зохрани́льница а҆́дова поколеба́сѧ.
Красе́нъ и҆з̾ гро́ба ꙗ҆́кѡ жени́хъ ѿ черто́га и҆зше́лъ є҆сѝ, сме́рти разори́вый мꙋчи́тельство хрⷭ҇тѐ, и҆ а҆́довы верєѝ сокрꙋши́вый си́лою бж҃е́ственною, и҆ воста́нїѧ твоегѡ̀, свѣ́томъ ᲂу҆́мнымъ просвѣти́вый мі́ръ. <<рм҃в: 283>>
Поста́вимъ всѝ ны́нѣ ли́ки дꙋхѡ́вныѧ, и҆ да зове́мъ: гдⷭ҇ь воскре́се. да ра́дꙋетсѧ землѧ̀, да весели́тсѧ нб҃о, ѻ҆́блацы да кропѧ́тъ на́мъ пра́вды тꙋ́чы, пра́зднꙋющымъ свѣ́тлѡ и҆ хрⷭ҇та̀ пою́щымъ.
Жи́знь живꙋ́щихъ, и҆сто́чникъ благи́хъ гдⷭ҇ь, бога́тнѡ и҆сточа́ѧй во́дꙋ ᲂу҆че́нїй, вопїе́тъ женѣ̀: пода́ждь мѝ во́дꙋ пи́ти, ꙗ҆́кѡ да пода́мъ тѝ во́дꙋ, грѣхѡ́въ твои́хъ и҆сто́чники и҆зсꙋша́ющꙋю.
Сла́ва: трⷪ҇ченъ:
Свѣ́тъ є҆ди́нъ нераздѣ́льнѡ, трисо́лнечнаѧ є҆ди́ница, безнача́льный ѻ҆ц҃ъ, сн҃ъ, и҆ дх҃ъ, бж҃ество̀ є҆ди́но, жи́знь и҆ всѣ́хъ творе́цъ. того̀ воспои́мъ вѣ́рнїи со безпло́тными, трист҃ы́ми пѣ́сньми сщ҃енносло́вѧще.
И҆ ны́нѣ: бг҃оро́диченъ:
Свѣ́тꙋ бы́вши жили́ще чⷭ҇таѧ, ѡ҆зарѝ зѣ̑ницы дꙋшѝ моеѧ̀, ѡ҆мрачє́нныѧ мно́гими козньмѝ врага̀, и҆ ви́дѣти сподо́би ꙗ҆́снѡ ѿ тебѐ возсїѧ́вшїй свѣ́тъ па́че мы́сли, чи́стымъ се́рдцемъ.
Є҆ѯапостїла́рїй воскре́сный: Пло́тїю ᲂу҆снꙋ́въ:
Сла́ва: самарѧны́ни. Подо́бенъ: Жєны̀:
Въ самарі́ю прише́лъ є҆сѝ сп҃се мо́й всеси́льне, и҆ женѣ̀ бесѣ́довавъ проси́лъ є҆сѝ воды̀ пи́ти, є҆вре́ємъ во́ды и҆сточи́вый и҆з̾ ка́мене несѣко́магѡ, ю҆́же къ вѣ́рѣ совоспрїѧ́лъ є҆сѝ и҆ ны́нѣ жи́зни наслажда́етсѧ на нб҃сѣ́хъ вѣ́чнѡ.
И҆ ны́нѣ: преполове́нїю. Подо́бенъ:
Преполови́вшꙋсѧ прише́лъ є҆сѝ пра́здникꙋ чл҃вѣколю́бче во свѧти́лище, и҆ глаго́лалъ є҆сѝ: жа́жды и҆спо́лненнїи ко мнѣ̀ прїиди́те, и҆ почерпи́те во́дꙋ живꙋ́ю и҆ пита́ющꙋю. <<рм҃в ѡ҆б.: 284>> є҆́юже пи́щи, и҆ бл҃года́ти, жи́зни же безсме́ртныѧ наслади́тесѧ всѝ.
На хвали́техъ, Всѧ́кое дыха́нїе: поста́вимъ стїхѡ́въ и҃: и҆ пое́мъ настоѧ́щыѧ стїхи̑ры воскре́сны, гла́съ д҃:
Крⷭ҇тъ претерпѣ́вый и҆ сме́рть, и҆ воскресы́й и҆з̾ ме́ртвыхъ всеси́льне гдⷭ҇и, сла́вимъ твоѐ воскресе́нїе.
Крⷭ҇то́мъ твои́мъ хрⷭ҇тѐ, дре́внїѧ клѧ́твы свободи́лъ є҆сѝ на́съ, и҆ сме́ртїю твое́ю, є҆стество̀ на́ше мꙋ́чащаго дїа́вола ᲂу҆праздни́лъ є҆сѝ: воста́нїемъ же твои́мъ ра́дости всѧ̑ и҆спо́лнилъ є҆сѝ. тѣ́мже вопїе́мъ тѝ: воскресы́й и҆з̾ ме́ртвыхъ, гдⷭ҇и сла́ва тебѣ̀.
Твои́мъ крⷭ҇то́мъ хрⷭ҇тѐ сп҃се, наста́ви на́съ на и҆́стинꙋ твою̀, и҆ и҆зба́ви на́съ ѿ сѣте́й вра́жїихъ, воскресы́й и҆з̾ ме́ртвыхъ, возста́ви ны̀ па́дшыѧ грѣхо́мъ, просте́ръ рꙋ́кꙋ твою̀ чл҃вѣколю́бче гдⷭ҇и, мл҃твами ст҃ы́хъ твои́хъ.
Ѻ҆те́ческихъ твои́хъ нѣ́дръ не разлꙋчи́всѧ, є҆диноро́дне сло́ве бж҃їй, прише́лъ є҆сѝ на зе́млю за человѣколю́бїе, человѣ́къ бы́въ непрело́женъ, и҆ крⷭ҇тъ и҆ сме́рть претерпѣ́лъ є҆сѝ пло́тїю безстра́стный бж҃ество́мъ, воскре́съ же и҆з̾ ме́ртвыхъ, безсме́ртїе пода́лъ є҆сѝ ро́дꙋ человѣ́ческомꙋ, ꙗ҆́кѡ є҆ди́нъ всеси́ленъ.
И҆́ны стїхи̑ры а҆нато́лїевы, гла́съ то́йже:
Сме́рть прїѧ́лъ є҆сѝ пло́тїю, на́мъ безсме́ртїе хода́тайствꙋѧ сп҃се, и҆ во гро́бъ всели́лсѧ є҆сѝ, да на́съ ѿ а҆́да свободи́ши, воскреси́въ съ собо́ю: пострада́въ ᲂу҆́бѡ ꙗ҆́кѡ человѣ́къ, но воскре́се ꙗ҆́кѡ бг҃ъ. сегѡ̀ ра́ди вопїе́мъ: сла́ва тебѣ̀ жизнода́вче гдⷭ҇и, є҆ди́не человѣколю́бче.
Ка́менїе распаде́сѧ сп҃се, є҆гда̀ на ло́бнѣмъ крⷭ҇тъ тво́й <<рм҃г: 285>> водрꙋзи́сѧ, ᲂу҆страши́шасѧ а҆́довы вра́тарїе, є҆гда̀ во гро́бѣ ꙗ҆́кѡ ме́ртвъ положе́нъ бы́лъ є҆сѝ. и҆́бо сме́рти ᲂу҆праздни́вый крѣ́пость, мє́ртвымъ всѣ̑мъ безсме́ртїе по́далъ є҆сѝ, воскресе́нїемъ твои́мъ сп҃се жизнода́вче, гдⷭ҇и сла́ва тебѣ̀.
И҆́ны самогла́сны самарѧны́ни. Гла́съ г҃.
Сті́хъ: Налѧцы̀, и҆ ᲂу҆спѣва́й, и҆ црⷭ҇твꙋй, и҆́стины ра́ди, и҆ кро́тости, и҆ пра́вды.
Да ра́дꙋетсѧ дне́сь свѣ́тлѡ нб҃о и҆ землѧ̀, ꙗ҆́кѡ хрⷭ҇то́съ ꙗ҆ви́сѧ воплоща́емь ꙗ҆́кѡ человѣ́къ, да а҆да́ма и҆зме́тъ ѿ клѧ́твы всеро́дна, и҆ ᲂу҆дивлѧ́етсѧ чꙋдесы̀ въ самарі́ю прише́дъ: женѣ́ же бесѣ́доваше воды̀ просѧ̀, и҆́же ѻ҆́блаки вода́ми ѡ҆дѣва́ѧй. тѣ́мже всѝ вѣ́рнїи поклони́мсѧ, на́съ ра́ди во́лею ѡ҆бнища́вшемꙋ, благоꙋтро́бнымъ совѣ́томъ.
Гла́съ ѕ҃.
Сті́хъ: Возлюби́лъ є҆сѝ пра́вдꙋ, и҆ возненави́дѣлъ є҆сѝ беззако́нїе.
Та́кѡ глаго́летъ гдⷭ҇ь самарѧны́ни: а҆́ще бы є҆сѝ вѣ́дала да́ръ бж҃їй, и҆ кто̀ є҆́сть глаго́лѧй тебѣ̀, да́ждь мѝ воды̀ пи́ти, ты́ бы проси́ла ᲂу҆ негѡ̀, и҆ да́лъ бы тѝ пи́ти, да не вжа́ждешисѧ во вѣ́ки, глаго́летъ гдⷭ҇ь.
Сла́ва: гла́съ то́йже:
И҆сто́чникъ живонача́лїѧ і҆и҃съ сп҃съ на́шъ, ко и҆сто́чникꙋ прише́дъ патрїа́рха і҆а́кѡва, пи́ти проша́ше воды̀ ѿ жены̀ самарѧны́ни. се́й же непрїѡбщи́тельное і҆ꙋде́ѡмъ прире́кшей, мꙋ́дрый зижди́тель приво́дитъ ю҆̀, сла́дкими глаго́лы, па́че къ проше́нїю присносꙋ́щныѧ воды̀, ю҆́же и҆ прїи́мши всѣ̑мъ проповѣ́да рекꙋ́щи: прїиди́те, ви́дите <<рм҃г ѡ҆б.: 286>> сокрове́нныхъ ви́дца и҆ бг҃а, прише́дшаго пло́тїю, за є҆́же спастѝ человѣ́ка.
И҆ ны́нѣ: Преблгⷭ҇венна є҆сѝ: Славосло́вїе вели́кое. И҆ ѿпꙋ́стъ.
Сла́ва, и҆ ны́нѣ: Стїхи́ра є҆ѵⷢ҇льскаѧ, гла́съ з҃:
Сѐ тма̀ и҆ ра́нѡ, и҆ что̀ ᲂу҆ гро́ба марі́е стои́ши, мно́гꙋю тмꙋ̀ и҆мѣ́ющи въ ра́зꙋмѣ, въ не́йже гдѣ̀ положе́нъ бы́сть вопроша́еши і҆и҃съ; но ви́ждь сри́щꙋщѧсѧ ᲂу҆ченикѝ, ка́кѡ плащани́цами и҆ сꙋдаре́мъ воскрⷭ҇нїе ѡ҆брѣто́ша, и҆ помѧнꙋ́ша ꙗ҆̀же ѡ҆ си́хъ писа́нїѧ. съ ни́миже и҆ и҆́миже и҆ мы̀ вѣ́ровавше, воспѣва́емъ тѧ̀ жизнода́вца хрⷭ҇та̀.
И҆ поꙋче́нїе стꙋді́тово, и҆ ча́съ а҃. И҆ коне́чный ѿпꙋ́стъ.
На лїтꙋргі́и и҆з̾ѡбрази́тєльна, бл҃жє́нна гла́са, гла́съ д҃:
Дре́вомъ а҆да́мъ раѧ̀ бы́сть и҆зселе́нъ: дре́вомъ же кре́стнымъ разбо́йникъ въ ра́й всели́сѧ. ѻ҆́въ ᲂу҆́бѡ вкꙋ́шь, за́повѣдь ѿве́рже сотво́ршагѡ: ѻ҆́въ же сраспина́емь, бг҃а и҆сповѣ́да таѧ́щагосѧ, помѧни́ мѧ, вопїѧ̀, во ца́рствїи твое́мъ.
Распны́йсѧ и҆ воскресы́й ꙗ҆́кѡ си́ленъ и҆з̾ гро́ба тридне́венъ, и҆ первозда́ннаго а҆да́ма воскреси́лъ є҆сѝ, є҆ди́не безсме́ртне: и҆ менѐ на покаѧ́нїе ѡ҆брати́тисѧ гдⷭ҇и, сподо́би ѿ всегѡ̀ се́рдца моегѡ̀, и҆ те́плою вѣ́рою при́снѡ взыва́ти тѝ: помѧни́ мѧ сп҃се во црⷭ҇твїи твое́мъ.
Вои́стиннꙋ воскре́се хрⷭ҇то́съ, и҆ свидѣ́тельствꙋетъ гро́бъ, къ ва́мъ законопрестꙋ́пницы: и҆́бо грѡ́бнаѧ своѧ̀ ѡ҆ста́вль, воскре́се тридне́внѡ. ка́мень запеча́тасѧ, и҆ пред̾ гро́бомъ стра́жїе предстоѧ́хꙋ: а҆́дъ плѣни́сѧ, сме́рть <<рм҃д: 287>> ᲂу҆мертви́сѧ, не ᲂу҆кра́денъ бы́сть хрⷭ҇то́съ: вѣ́рꙋйте съ на́ми воскресе́нїю.
Воскре́сшаго и҆з̾ ме́ртвыхъ, и҆ а҆́довꙋ держа́вꙋ плѣни́вшаго, и҆ ви́дима жена́ми мѷроно́сицами, ра́дꙋйтесѧ, глаго́лющаго, вѣ́рнїи ᲂу҆мо́лимъ, ѿ и҆стлѣ́нїѧ и҆зба́вити дꙋ́шы на́шѧ, зовꙋ́ще всегда̀ разбо́йника бл҃горазꙋ́мнагѡ гла́сомъ къ немꙋ̀: помѧнѝ и҆ на́съ во црⷭ҇твїи твое́мъ.
И҆ ѿ канѡ́на самарѧны́ни, пѣ́снь г҃: и҆ пра́здника, пѣ́снь ѕ҃. По вхо́дѣ тропа́рь воскрⷭ҇нъ: и҆ пра́здника преполове́нїѧ: Сла́ва, конда́къ самарѧны́ни: И҆ ны́нѣ: преполове́нїѧ.
Прокі́менъ, гла́съ г҃: По́йте бг҃ꙋ на́шемꙋ, по́йте, по́йте цр҃е́ви на́шемꙋ, по́йте. Сті́хъ: Всѝ ꙗ҆зы́цы восплещи́те рꙋка́ми, воскли́кните бг҃ꙋ гла́сомъ ра́дованїѧ. А҆пⷭ҇лъ въ дѣѧ́нїихъ, зача́ло к҃и: Разсѣ́ѧвшїисѧ а҆по́столи: А҆ллилꙋ́їа, гла́съ д҃: Налѧцы̀, и҆ ᲂу҆спѣва́й, и҆ црⷭ҇твꙋй, и҆́стины ра́ди и҆ кро́тости, и҆ пра́вды. Сті́хъ: Возлюби́лъ є҆сѝ пра́вдꙋ, и҆ возненави́дѣлъ є҆сѝ беззако́нїе. Є҆ѵⷢ҇лїе ѿ і҆ѡа́нна, зача́ло в҃і: Прїи́де і҆и҃съ во гра́дъ самарі́йскїй: Вмѣ́стѡ Досто́йно: пое́мъ і҆рмо́съ: Свѣти́сѧ, свѣти́сѧ: Прича́стенъ: Тѣ́ло хрⷭ҇то́во: Дрꙋгі́й: Хвали́те гдⷭ҇а съ нб҃съ:
Слꙋ́жба ст҃а́гѡ мине́и пое́тсѧ на повече́рїи.
[зрѝ] Подоба́етъ вѣ́дати, ꙗ҆́кѡ слꙋ́жба самарѧны́ни пое́тсѧ д҃ днѝ: въ недѣ́лю, въ четверто́къ, въ пѧто́къ, и҆ въ сꙋббѡ́тꙋ. Въ понедѣ́льникъ ᲂу҆́бѡ, и҆ во вто́рникъ, пое́тсѧ слꙋ́жба преполове́нїю и҆ въ сре́дꙋ ѿдае́тсѧ: пое́мъ ꙗ҆́коже и҆ на са́мый пра́здникъ, кромѣ̀ вхо́да и҆ чте́нїй.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.