Четвертая седмица по Пасхе (с понедельника по субботу)
<<р҃д: 207>>
Въ тꙋ́южде недѣ́лю ве́чера,
на Гдⷭ҇и воззва́хъ: стїхи̑ры пра́здника г҃: и҆ мине́и г҃.
Стїхи̑ры пра́здника, гла́съ и҃.
Подо́бенъ: Ѽ пресла́внагѡ чꙋдесѐ!
Ѽ пресла́внагѡ чꙋдесѐ! творе́цъ всѣ́хъ плотоно́сецъ бы́въ, въ на́ше ѡ҆бнища̀ є҆стество̀, хотѧ̀ ꙗ҆́кѡ благоꙋтро́бенъ, и҆ съ человѣ́ки пожи́въ, чꙋде́съ мно́жество є҆вре́ѡмъ показа̀. тѣ́мже и҆сцѣлѝ и҆ногда̀ разсла́бленнаго, ре́къ є҆мꙋ̀: возмѝ ѻ҆́дръ тво́й, въ виѳесдꙋ̀ прише́дъ.
Сп҃се бж҃е мо́й и҆ гдⷭ҇и, па́дшыѧ человѣ́ки воскреси́ти хотѧ̀, на землѝ ꙗ҆́кѡ человѣ́къ ѡ҆бхожда́лъ є҆сѝ и҆сцѣлѧ́ѧ всѣ́хъ недꙋ́ги, мно́гагѡ ра́ди бл҃гоꙋтро́бїѧ. тѣ́мже прише́дъ ко ѻ҆́вчей кꙋпѣ́ли, цѣ́ла воздви́глъ є҆сѝ, и҆ногда̀ разсла́бленнаго, сло́вомъ твои́мъ, три́десѧть ѻ҆́смь лѣ́тъ лежа́ща.
За́вистїю є҆вре́и снѣда́еми, благодѣѧ́нїємъ твои̑мъ преблагі́й гдⷭ҇и, винꙋ̀ творѧ́ще, и҆ неи́стовства разжже́нїемъ, беззако́ннꙋюще са́ми въ зако́нѣ при́снѡ, тебѐ и҆ска́хꙋ ᲂу҆би́ти вои́стиннꙋ жи́знь, сꙋббѡ́ты ра́ди, є҆гда̀ всего̀ человѣ́ка показа́лъ є҆сѝ ты̀ здра́ва, пре́жде разсла́бленна сꙋ́ща.
Сла́ва, и҆ ны́нѣ: гла́съ є҃:
При ѻ҆́вчей кꙋпѣ́ли человѣ́къ лежа́ше въ не́мощи, и҆ ви́дѣвъ тѧ̀ гдⷭ҇и, вопїѧ́ше: человѣ́ка не и҆́мамъ, да є҆гда̀ возмꙋти́тсѧ вода̀, вве́ржетъ мѧ̀ въ ню̀: є҆гда́ же прихождꙋ̀, и҆́нъ предварѧ́етъ мѧ̀, и҆ прїе́млетъ и҆сцѣле́нїе, <<р҃д ѡ҆б.: 208>> а҆́зъ же немощствꙋ́ѧй лежꙋ̀. и҆ а҆́бїе ᲂу҆милосе́рдивсѧ сп҃съ, глаго́летъ къ немꙋ̀: тебѐ ра́ди чл҃вѣ́къ бы́хъ, тебѐ ра́ди въ пло́ть ѡ҆блеко́хсѧ, и҆ глаго́леши: человѣ́ка не и҆́мамъ. возмѝ ѻ҆́дръ тво́й и҆ ходѝ. всѧ̑ тебѣ̀ возмѡ́жна, всѧ̑ послꙋ́шаютъ, всѧ̑ повинꙋ́ютсѧ: всѣ́хъ на́съ помѧнѝ, и҆ поми́лꙋй ст҃ы́й, ꙗ҆́кѡ чл҃вѣколю́бецъ.
На стїхо́внѣ стїхи̑ры, гла́съ г҃:
Твои́мъ крⷭ҇то́мъ хрⷭ҇тѐ сп҃се, сме́рти держа́ва разрꙋши́сѧ, и҆ дїа́волѧ пре́лесть ᲂу҆праздни́сѧ: ро́дъ же человѣ́ческїй вѣ́рою сп҃са́емый: пѣ́снь тебѣ̀ всегда̀ прино́ситъ.
Сті́хъ: Къ тебѣ̀ возведо́хъ ѻ҆́чи моѝ:
Вече́рнюю пѣ́снь прино́симъ тѝ хрⷭ҇тѐ, съ кади́ломъ и҆ пѣ́сньми дꙋхо́вными: поми́лꙋй сп҃се дꙋ́шы на́шѧ.
Сті́хъ: Поми́лꙋй на́съ гдⷭ҇и, поми́лꙋй на́съ:
Мꙋ́чениченъ: Ве́лїѧ крⷭ҇та̀ твоегѡ̀ гдⷭ҇и си́ла: водрꙋзи́ бо сѧ на мѣ́стѣ, и҆ дѣ́йствꙋетъ въ мі́рѣ, и҆ показа̀ ѿ ры́барей а҆пⷭ҇лы, и҆ ѿ ꙗ҆зы̑къ мꙋ́ченики, да мо́лѧтсѧ ѡ҆ дꙋша́хъ на́шихъ.
Сла́ва, и҆ ны́нѣ, гла́съ а҃:
Дла́нїю пречи́стою созда́вый человѣ́ка, прише́лъ є҆сѝ бл҃гоꙋтро́бне, недꙋ́гꙋющыѧ и҆сцѣли́ти хрⷭ҇тѐ, разсла́бленнаго во ѻ҆́вчей кꙋпѣ́ли сло́вомъ твои́мъ возста́вилъ є҆сѝ: кровоточи́вой же болѣ́знь и҆сцѣли́лъ є҆сѝ: ханане́и ѻ҆трокови́цꙋ стꙋжа́емꙋю поми́ловалъ є҆сѝ, и҆ проше́нїе со́тника не презрѣ́лъ є҆сѝ. сегѡ̀ ра́ди зове́мъ: всеси́льне гдⷭ҇и, сла́ва тебѣ̀.
Та́же тропа́рь воскре́сенъ. И҆ ѿпꙋ́стъ. <<р҃є: 209>>
Въ понедѣ́льникъ д҃-ѧ седми́цы по па́сцѣ, на ᲂу҆́трени,
на Бг҃ъ гдⷭ҇ь: тропа́рь воскре́сенъ, два́жды. Сла́ва: ст҃а́гѡ, а҆́ще и҆́мать. И҆ ны́нѣ: бг҃оро́диченъ а҃-й во гла́съ тропарѧ̀ ст҃а́гѡ. А҆́ще ли нѝ, Сла́ва, и҆ ны́нѣ: бг҃оро́диченъ а҃-й гла́са.
По а҃-мъ стїхосло́вїи, сѣда́ленъ, гла́съ г҃:
Хрⷭ҇то́съ ѿ ме́ртвыхъ воста̀, нача́токъ ᲂу҆со́пшихъ, перворожде́нъ тва́ри, и҆ содѣ́тель всѣ́хъ бы́вшихъ, и҆стлѣ́вшее є҆стество̀ ро́да на́шегѡ въ себѣ̀ само́мъ ѡ҆бновѝ. не ктомꙋ̀ сме́рте ѡ҆блада́еши: и҆́бо всѣ́хъ влⷣка держа́вꙋ твою̀ разрꙋшѝ.
Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ:
Живꙋ́щи на землѝ дꙋшѐ моѧ̀, пока́йсѧ, пе́рсть во гро́бѣ не пое́тъ, согрѣше́нїй не и҆збавлѧ́етъ, возопі́й хрⷭ҇тꙋ̀ бг҃ꙋ: сердцевѣ́дче, согрѣши́хъ, пре́жде да́же не ѡ҆сꙋ́диши мѧ̀, поми́лꙋй мѧ̀.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ:
Мч҃ниченъ: Бл҃годꙋ́шїе терпѣ́нїѧ ва́шегѡ, побѣдѝ кѡ́зни ѕлонача́льнагѡ врага̀, страстоте́рпцы бл҃же́ннїи. сегѡ̀ ра́ди вѣ́чнагѡ сподо́бистесѧ блаже́нства: но моли́тесѧ гдⷭ҇ви, хрⷭ҇толюби́выхъ люде́й спастѝ ста́до, мꙋ́чєницы сꙋ́ще и҆́стины.
Сла́ва, и҆ ны́нѣ:
Красотѣ̀ дѣ́вства твоегѡ̀, и҆ пресвѣ́тлой чистотѣ̀ твое́й, гаврїи́лъ ᲂу҆диви́всѧ, вопїѧ́ше тѝ бцⷣе: кꙋ́ю тѝ похвалꙋ̀ принесꙋ̀ досто́йнꙋю; что́ же воз̾именꙋ́ю тѧ̀; недоꙋмѣва́ю; и҆ ᲂу҆жаса́юсѧ. тѣ́мже, ꙗ҆́коже повелѣ́нъ бы́хъ, вопїю́ ти: ра́дꙋйсѧ бл҃года́тнаѧ. <<р҃є ѡ҆б.: 210>>
По в҃-мъ стїхосло́вїи сѣда́ленъ, гла́съ г҃.
Подо́бенъ: Красотѣ̀ дѣ́вства:
Разслабле́нїе ѡ҆брѣто́ша всетѣле́сное разсла́бленнїи, за́вистїю стѧгне́ни въ сꙋббѡ́тꙋ разсла́бленнагѡ стѧгнꙋ́тїе помышлѧ́юще, глаго́люще: не досто́итъ цѣли́ти въ сꙋббѡ́ты, разорѧ́ти же ѻ҆те́ческое сꙋббѡ́ты поко́ище, зако́на тебѐ не вѣ́дꙋще влⷣкꙋ, и҆ цѣли́телѧ дꙋ́шъ на́шихъ.
Сла́ва, и҆ ны́нѣ: то́йже:
Та́же, Воскресе́нїе хрⷭ҇то́во: Ѱало́мъ н҃. Та́же канѡ́ны пра́здника со і҆рмосы̀, на и҃: и҆ мине́и, на д҃. Конда́къ и҆ є҆ѯапостїла́рїй пра́здника.
На хвали́техъ поста́вимъ стїхѝ, д҃: и҆ пое́мъ настоѧ́щыѧ стїхи̑ры ѻ҆смогла́сника, гла́съ г҃:
Прїиди́те всѝ ꙗ҆зы́цы, ᲂу҆разꙋмѣ́йте стра́шныѧ та́йны си́лꙋ: хрⷭ҇то́съ бо сп҃съ на́шъ, є҆́же въ нача́лѣ сло́во, распѧ́тсѧ на́съ ра́ди, и҆ во́лею погребе́сѧ, и҆ воскр҃се и҆з̾ ме́ртвыхъ, є҆́же сп҃стѝ всѧ́чєскаѧ: томꙋ̀ поклони́мсѧ.
Мно́жицею пѣснопѣ́нїе соверша́ѧ, ѡ҆брѣто́хсѧ грѣ́хъ и҆сполнѧ́ѧ, ѧ҆зы́комъ ᲂу҆́бѡ пѣ́нїе вѣща́ѧ, дꙋше́ю же безмѣ̑стнаѧ помышлѧ́ю: но ѻ҆боѧ̑ и҆спра́ви хрⷭ҇тѐ бж҃е покаѧ́нїемъ, и҆ поми́лꙋй мѧ̀.
Мꙋ́чениченъ:
Ст҃ы́хъ страстоте́рпєцъ па́мѧть, прїиди́те лю́дїе всѝ почти́мъ: ꙗ҆́кѡ позо́ръ бы́вше а҆́гг҃лѡмъ и҆ чл҃вѣ́кѡмъ, побѣ́ды вѣне́цъ ѿ хрⷭ҇та̀ прїѧ́ша, и҆ мо́лѧтсѧ ѡ҆ дꙋша́хъ на́шихъ.
Сла́ва, и҆ ны́нѣ: гла́съ а҃:
Непогребе́нъ мертве́цъ сы́й разсла́бленный, ви́дѣвъ тѧ̀ <<р҃ѕ: 211>> возопѝ: поми́лꙋй мѧ̀ гдⷭ҇и, ꙗ҆́кѡ ѻ҆́дръ мо́й гро́бъ мнѣ̀ бы́сть. что́ ми прїѡбрѣ́тенїе живота̀; не тре́бꙋю ѻ҆́вчїѧ кꙋпѣ́ли: не и҆́мамъ бо никогѡ́же влага́юща мѧ̀, возмꙋща́ющымсѧ вода́мъ: но тебѣ̀ и҆сто́чникꙋ прихождꙋ̀ и҆сцѣле́нїй, да и҆ а҆́зъ со всѣ́ми вопїю̀: всеси́льне гдⷭ҇и, сла́ва тебѣ̀.
На стїхо́внѣ стїхи̑ры, гла́съ г҃.
Подо́бенъ: Ве́лїѧ крⷭ҇та̀:
Зна́менїй и҆ чꙋде́съ ви́дѧще си́лꙋ, за́вистїю разсла́бленнїи и҆ си́льнїи ѕло́бою не вѣ́ровахꙋ, ꙗ҆́кѡ ты̀ є҆сѝ сн҃ъ бж҃їй и҆ строи́тель всѣ́хъ, и҆ разсла́бленнаго здра́ва показа́вый сло́вомъ.
Сті́хъ: Ми́лѡсти твоѧ̀ гдⷭ҇и, во вѣ́къ воспою̀.
Ви́дѣвше сꙋббѡ́тъ храни́телїе, разсла́бленнаго стѧ́гнꙋта въ сꙋббѡ́тꙋ, и҆ дꙋше́ю ѡ҆мрача́хꙋсѧ: и҆ не подоба́етъ въ сꙋббѡ́тꙋ цѣли́ти, и҆ скверни́ти сꙋббѡ́тꙋ, не́гли ꙗ҆́кѡ зако́ннїи кни̑жницы, вопїѧ́хꙋ.
Сті́хъ: Ꙗ҆́кѡ ре́клъ є҆сѝ: въ вѣ́къ ми́лость сози́ждетсѧ.
Сꙋббѡ́тъ самодѣ́телѧ не вѣ́дꙋще тѧ̀ и҆ гдⷭ҇а, сꙋббѡ́ты хранѧ́щїи, ѡ҆ разсла́бленнагѡ стѧгнꙋ́тїи ропта́хꙋ, въ сꙋббѡ́тꙋ бы́вшемъ, ꙗ҆́кѡ не добро̀, глаго́люще, взѧ́ти ѻ҆́дръ въ де́нь сꙋббѡ́тный.
Сла́ва, и҆ ны́нѣ: гла́съ є҃:
Взы́де і҆и҃съ во і҆ерꙋсали́мъ на ѻ҆́вчꙋю кꙋпѣ́ль, глаго́лемꙋю і҆ꙋде́йски виѳесда̀, пѧ́ть притво́рѡвъ и҆мꙋ́щꙋю, въ тѣ́хъ бо слежа́ше мно́жество немощствꙋ́ющихъ: а҆́гг҃лъ бо бж҃їй по всѧ̑ лѣ̑та сходѧ̀, возмꙋща́ше ю҆̀, и҆ здра́вїе подава́ше пристꙋпа́ющымъ вѣ́рою. и҆ ви́дѣвъ гдⷭ҇ь <<р҃ѕ ѡ҆б.: 212>> многовре́менна человѣ́ка, глаго́летъ къ немꙋ̀: хо́щеши ли здра́въ бы́ти; немощствꙋ́ѧй ѿвѣщава́ше: гдⷭ҇и, человѣ́ка не и҆́мамъ, да є҆гда̀ возмꙋти́тсѧ вода̀, вве́ржетъ мѧ̀ въ кꙋпѣ́ль: врачє́мъ и҆зда́хъ всѐ и҆мѣ́нїе моѐ, и҆ ми́лости ᲂу҆лꙋчи́ти не сподо́бихсѧ. но вра́чь дꙋ́шъ и҆ тѣле́съ глаго́летъ къ немꙋ̀: возмѝ тво́й ѻ҆́дръ и҆ ходѝ, проповѣ́дꙋѧ мою̀ си́лꙋ, и҆ ве́лїю ми́лость въ концѣ́хъ.
Та́же: Бл҃го є҆́сть и҆сповѣ́датисѧ: ча́съ пе́рвый. И҆ ѿпꙋ́стъ.
Въ понедѣ́льникъ ве́чера,
на Гдⷭ҇и воззва́хъ: поста́вимъ стїхѡ́въ ѕ҃. И҆ пое́мъ настоѧ́щыѧ два̀ самогла́сна, повторѧ́юще пе́рвый. И҆ мине́и г҃.
Гла́съ а҃:
Дла́нїю пречи́стою созда́вый человѣ́ка, прише́лъ є҆сѝ бл҃гоꙋтро́бне, недꙋ́гꙋющыѧ и҆сцѣли́ти хрⷭ҇тѐ: разсла́бленнаго во ѻ҆́вчей кꙋпѣ́ли, сло́вомъ твои́мъ возста́вилъ є҆сѝ: кровоточи́вой же болѣ́знь и҆сцѣли́лъ є҆сѝ: ханане́и ѻ҆трокови́цꙋ стꙋжа́емꙋю поми́ловалъ є҆сѝ: и҆ проше́нїе со́тника не презрѣ́лъ є҆сѝ. сегѡ̀ ра́ди зове́мъ: всеси́льне гдⷭ҇и, сла́ва тебѣ̀. [Два́жды.]
Непогребе́нъ мертве́цъ сы́й разсла́бленный, ви́дѣвъ тѧ̀ возопѝ: поми́лꙋй мѧ̀ гдⷭ҇и, ꙗ҆́кѡ ѻ҆́дръ мо́й гро́бъ мнѣ̀ бы́сть. что́ ми прїѡбрѣ́тенїе живота̀; не тре́бꙋю ѻ҆́вчїѧ кꙋпѣ́ли: не и҆́мамъ бо никогѡ́же влага́юща мѧ̀, возмꙋща́ющымсѧ вода́мъ. но тебѣ̀ и҆сто́чникꙋ прихождꙋ̀ <<р҃з: 213>> и҆сцѣле́нїй, да и҆ а҆́зъ со всѣ́ми вопїю̀: всеси́льне гдⷭ҇и, сла́ва тебѣ̀.
Сла́ва, и҆ ны́нѣ: гла́съ є҃:
Взы́де і҆и҃съ во і҆ерꙋсали́мъ на ѻ҆́вчꙋю кꙋпѣ́ль, глаго́лемꙋю і҆ꙋде́йски виѳесда̀, пѧ́ть притво́рѡвъ и҆мꙋ́щꙋю: въ тѣ́хъ бо слежа́ше мно́жество немощствꙋ́ющихъ: а҆́гг҃лъ бо бж҃їй по всѧ̑ лѣ̑та сходѧ̀, возмꙋща́ше ю҆̀, и҆ здра́вїе подава́ше пристꙋпа́ющымъ вѣ́рою, и҆ ви́дѣвъ гдⷭ҇ь многовре́менна человѣ́ка, глаго́летъ къ немꙋ̀: хо́щеши ли здра́въ бы́ти; немощствꙋ́ѧй ѿвѣщава́ше: гдⷭ҇и, человѣ́ка не и҆́мамъ, да є҆гда̀ возмꙋти́тсѧ вода̀, вве́ржетъ мѧ̀ въ кꙋпѣ́ль: врачє́мъ и҆зда́хъ всѐ и҆мѣ́нїе моѐ, и҆ ми́лости ᲂу҆лꙋчи́ти не сподо́бихсѧ. но вра́чь дꙋ́шъ и҆ тѣле́съ глаго́летъ къ немꙋ̀: возмѝ тво́й ѻ҆́дръ и҆ ходѝ, проповѣ́дꙋѧ мою̀ си́лꙋ, и҆ ве́лїю ми́лость въ концѣ́хъ.
И҆ а҆́бїе, Свѣ́те ти́хїй: Прокі́менъ днѐ.
На стїхо́внѣ стїхи̑ры ѻ҆смогла́сника, гла́съ г҃:
Просвѣти́шасѧ всѧ́чєскаѧ воскрⷭ҇нїемъ твои́мъ гдⷭ҇и, и҆ ра́й па́ки ѿве́рзесѧ: всѧ́ же тва́рь восхвалѧ́ющи тѧ̀, пѣ́снь тебѣ̀ всегда̀ прино́ситъ.
Сті́хъ: Къ тебѣ̀ возведо́хъ ѻ҆́чи моѝ:
Спаси́ мѧ гдⷭ҇и бж҃е мо́й, ты́ бо всѣ́хъ є҆сѝ спасе́нїе, бꙋ́рѧ мѧ̀ страсте́й смꙋща́етъ, и҆ бре́мѧ беззако́нїй погрꙋжа́етъ: да́ждь мѝ рꙋ́кꙋ по́мощи, и҆ къ свѣ́тꙋ возведи́ мѧ ᲂу҆миле́нїѧ, ꙗ҆́кѡ є҆ди́нъ бл҃гоꙋтро́бенъ и҆ чл҃вѣколю́бецъ.
Сті́хъ: Поми́лꙋй на́съ гдⷭ҇и, поми́лꙋй на́съ:
Мꙋ́чениченъ: Ве́лїѧ мꙋ́чєникъ твои́хъ хрⷭ҇тѐ си́ла: во <<р҃з ѡ҆б.: 214>> гробѣ́хъ бо лежа́тъ, и҆ дꙋ́хи прогонѧ́ютъ, и҆ ᲂу҆праздни́ша вра́жїю вла́сть, вѣ́рою трⷪ҇ческою подви́гшесѧ по бл҃гоче́стїи.
Сла́ва и҆ ны́нѣ: гла́съ и҃:
Въ притво́рѣ соломѡ́новѣ, та́мѡ слежа́ше мно́жество немощствꙋ́ющихъ, и҆ преполови́вшꙋсѧ пра́здникꙋ, ѡ҆брѣ́те хрⷭ҇то́съ три́десѧть ѻ҆́смь лѣ́тъ разсла́бленна лежа́ща, влⷣчнимъ гла́сомъ глаго́летъ къ немꙋ̀: хо́щеши ли здра́въ бы́ти; немощствꙋ́ѧй ѿвѣщава́ше: гдⷭ҇и, человѣ́ка не и҆́мамъ, да є҆гда̀ возмꙋти́тсѧ вода̀, вве́ржетъ мѧ̀ въ кꙋпѣ́ль. ѻ҆́нъ же глаго́летъ къ немꙋ̀: возмѝ ѻ҆́дръ тво́й, и҆ ходѝ, сѐ здра́въ бы́лъ є҆сѝ, ктомꙋ̀ не согрѣша́й. бцⷣы моли́твами низпослѝ на́мъ ве́лїю ми́лость.
Та́же, Ны́нѣ ѿпꙋща́еши: По Ѻ҆́ч҃е на́шъ: тропа́рь, и҆ ѿпꙋ́стъ.
Во вто́рникъ четве́ртыѧ седми́цы на ᲂу҆́трени,
на Бг҃ъ гдⷭ҇ь: тропа́рь воскрⷭ҇ный, два́жды. Сла́ва, и҆ ны́нѣ: бг҃оро́диченъ.
По а҃-мъ стїхосло́вїи, сѣда́ленъ, гла́съ г҃:
Пло́тїю сме́рть вкꙋси́вый гдⷭ҇и, го́ресть сме́рти пресѣ́клъ є҆сѝ воста́нїемъ твои́мъ, и҆ человѣ́ка на ню̀ ᲂу҆крѣпи́вый, пе́рвыѧ клѧ́твы ѡ҆долѣ́нїе призыва́ѧ, защи́тниче жи́зни на́шеѧ, гдⷭ҇и, сла́ва тебѣ̀.
Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ:
Доко́лѣ дꙋшѐ моѧ̀, пребыва́еши во грѣсѣ́хъ; доко́лѣ прїе́млеши покаѧ́нїѧ преложе́нїе; прїимѝ во ᲂу҆мѣ̀ сꙋ́дъ бꙋ́дꙋщїй, возопі́й гдⷭ҇ви: согрѣши́хъ, безгрѣ́шне, поми́лꙋй мѧ̀. <<р҃и: 215>>
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мꙋ́чениченъ: Сїѧ́ете вѣ́рою пресвѣ̑тлаѧ свѣти̑ла ст҃і́и, бл҃гоче́стїѧ рачи́телїе, страстоте́рпцы прехва́льнїи: мꙋчи́телей бо не ᲂу҆боѧ́вшесѧ ра́нъ, і҆́дѡльскꙋю пре́лесть низложи́сте, побѣ́дꙋ и҆мꙋ́ще непобѣди́мꙋю, крⷭ҇тъ и҆́стинный.
Сла́ва, и҆ ны́нѣ: бг҃оро́диченъ:
Прибѣ́жище и҆ си́ло бцⷣе, держа́внаѧ по́моще мі́ра, моли́твами твои́ми спаса́й рабы̑ твоѧ̀ ѿ всѧ́кїѧ нꙋ́жды, є҆ди́на бл҃гослове́ннаѧ.
По в҃-мъ стїхосло́вїи сѣда́ленъ, гла́съ г҃.
Подо́бенъ: Красотѣ̀ двⷭ҇тва:
Разслабле́нїе ѡ҆брѣто́ша всетѣле́сное разсла́бленнїи, за́вистїю стѧгне́ннїи, въ сꙋббѡ́тꙋ разсла́бленнагѡ стѧгнꙋ́тїе помышлѧ́юще, глаго́люще: не досто́итъ цѣли́ти въ сꙋббѡ́ты, разорѧ́ти же ѻ҆те́ческое сꙋббѡ́ты поко́ище, зако́на тебѐ не вѣ́дꙋще влⷣкꙋ, и҆ цѣли́телѧ дꙋ́шъ на́шихъ.
Сла́ва, и҆ ны́нѣ: то́йже.
Воскресе́нїе хрⷭ҇то́во: ѱало́мъ н҃. Канѡ́ны пра́здника, со і҆рмосо́мъ на и҃, и҆ мине́и на д҃. Конда́къ и҆ є҆ѯапостїла́рїй пра́здника.
На хвали́техъ поста́вимъ стїхѝ д҃, и҆ пое́мъ настоѧ́щыѧ стїхи̑ры, повторѧ́юще пе́рвꙋю, гла́съ г҃:
Повѣ́даша всѧ̑ чꙋдеса̀ стра́жїе твоѝ гдⷭ҇и: но собо́ръ сꙋеты̀ и҆спо́лни мздо́ю десни́цꙋ и҆́хъ, скры́ти мнѧ́ше воскрⷭ҇нїе твоѐ, є҆́же мі́ръ сла́витъ: поми́лꙋй на́съ. [Два́жды.]
Разсѣ́ѧнный мо́й ᲂу҆́мъ соберѝ гдⷭ҇и, и҆ ѡ҆лѧденѣ́вшее се́рдце моѐ ѡ҆чи́сти, ꙗ҆́кѡ петрꙋ̀ даѧ́й мнѣ̀ покаѧ́нїе, ꙗ҆́кѡ мытарю̀ воздыха́нїе, и҆ ꙗ҆́кѡ блꙋдни́цѣ сле́зы, <<р҃и ѡ҆б.: 216>> да ве́лїимъ гла́сомъ взыва́ю тѝ: бж҃е, спаси́ мѧ, ꙗ҆́кѡ є҆ди́нъ бл҃гоꙋтро́бенъ и҆ человѣколю́бецъ.
Мꙋ́чениченъ: Царе́й и҆ мꙋчи́телей стра́хъ ѿри́нꙋша хрⷭ҇то́вы во́ини, и҆ бл҃годерзнове́ннѡ и҆ мꙋ́жески того̀ и҆сповѣ́даша всѣ́хъ гдⷭ҇а бг҃а, и҆ цр҃ѧ̀ на́шего: и҆ мо́лѧтсѧ непреста́ннѡ ѡ҆ дꙋша́хъ на́шихъ.
Сла́ва, и҆ ны́нѣ: гла́съ и҃:
Гдⷭ҇и, разсла́бленнаго не кꙋпѣ́ль и҆сцѣлѝ, но твоѐ сло́во ѡ҆бновѝ, и҆ нижѐ многолѣ́тный запѧ́тъ є҆мꙋ̀ недꙋ́гъ: ꙗ҆́кѡ гла́са твоегѡ̀ скорѣ́йшее дѣ́йство показа́сѧ, и҆ неꙋдобоноси́мꙋю тѧ́жесть ѿве́рже, и҆ бре́мѧ ѻ҆дра̀ понесѐ, во свидѣ́тельство мно́жества щедро́тъ твои́хъ, сла́ва тебѣ̀.
На стїхо́внѣ стїхи̑ры, гла́съ г҃. Подо́бенъ: Ве́лїѧ крⷭ҇та̀:
Ꙗ҆ви́сѧ разсла̑бленнымъ ᲂу҆десє́мъ сло́во твоѐ, ꙗ҆́коже свѧза́нїе живоно́сное, животво́рче мо́й сло́ве, є҆гѡ́же свидѣ́тельство, па́че наде́жди ѻ҆дра̀ взѧ́тїе: є҆го́же повелѣ́нъ ноша́ше, слежа́въ на не́мъ на мно́зѣ.
Сті́хъ: Ми́лѡсти твоѧ̑ гдⷭ҇и, во вѣ́къ воспою̀.
Ра́дꙋѧсѧ и҆сполнѧ́етъ повелѣ́нїе разсла́бленный, твоеѧ̀ всеси́льныѧ влады́чнїѧ крѣ́пости, и҆ ѻ҆́дръ сво́й носѧ̀ хожда́ше, и҆ свидѣ́тельствꙋѧ взыва́ше: и҆сцѣли́вый сїѐ мнѣ̀ твори́ти повелѣва́етъ.
Сті́хъ: Ꙗ҆́кѡ ре́клъ є҆сѝ: въ вѣ́къ ми́лость сози́ждетсѧ.
Въ лѣ́тѣхъ мно́гихъ и҆ временѣ́хъ слежа́й, поми́лꙋй мѧ̀, зове́тъ разсла́бленный ᲂу҆десы̀, свободи́телю хрⷭ҇тѐ, свѧ́зана недоꙋмѣ́нїемъ, и҆ сп҃съ ѻ҆́дръ взѧ́ти повелѣва́ше, стѧгнꙋ́въ ᲂу҆́ды. <<р҃ѳ: 217>>
Сла́ва, и҆ ны́нѣ: гла́съ є҃:
При ѻ҆́вчей кꙋпѣ́ли, человѣ́къ лежа́ше въ не́мощи, и҆ ви́дѣвъ тѧ̀ гдⷭ҇и, вопїѧ́ше: человѣ́ка не и҆́мамъ, да є҆гда̀ возмꙋти́тсѧ вода̀, вве́ржетъ мѧ̀ въ ню̀. є҆гда́ же прихождꙋ̀, и҆́нъ предварѧ́етъ мѧ̀, и҆ прїе́млетъ и҆сцѣле́нїе, а҆́зъ же немощствꙋ́ѧй лежꙋ̀. и҆ а҆́бїе ᲂу҆милосе́рдивсѧ сп҃съ глаго́летъ къ немꙋ̀: тебѐ ра́ди человѣ́къ бы́хъ, тебѐ ра́ди въ пло́ть ѡ҆блеко́хсѧ, и҆ глаго́леши человѣ́ка не и҆́мамъ. возмѝ ѻ҆́дръ тво́й и҆ ходѝ. всѧ̑ тебѣ̀ возмо́жна, всѧ̑ послꙋ́шаютъ, всѧ̑ повинꙋ́ютсѧ, всѣ́хъ на́съ помѧнѝ, и҆ поми́лꙋй ст҃ы́й, ꙗ҆́кѡ чл҃вѣколю́бецъ.
Та́же, Бл҃го є҆́сть и҆сповѣ́датисѧ гдⷭ҇ви: Тропа́рь воскре́сенъ, и҆ бг҃оро́диченъ є҆гѡ̀. И҆ ѿпꙋ́стъ.
Во вто́рникъ д҃ седми́цы по па́сцѣ, ве́чера,
нача́ло по ѻ҆бы́чаю, и҆ каѳі́сма рѧдова́ѧ.
На Гдⷭ҇и воззва́хъ: поста́вимъ стїхѡ́въ ѕ҃, и҆ пое́мъ стїхи̑ры настоѧ́щыѧ г҃, повторѧ́юще ѧ҆̀. Гла́съ д҃.
Подо́бенъ: Гдⷭ҇и, возше́дъ на крⷭ҇тъ:
Наста̀ преполове́нїе дне́й, ѿ спаси́тельнагѡ начина́емыхъ воста́нїѧ, пѧтдесѧ́тницею же бж҃е́ственною печа́таемое, и҆ свѣ́титсѧ свѣ́тлѡсти ѻ҆бою́дꙋ и҆мꙋ́щее, и҆ соединѧ́ющее ѻ҆боѧ̀, и҆ прїитѝ сла́вѣ пред̾ѧвлѧ́ющее, влⷣчнѧгѡ вознесе́нїѧ предпочита́етъ.
Слы́ша и҆ возвесели́сѧ сїѡ́нъ, бл҃говѣсти́вшꙋсѧ хрⷭ҇то́вꙋ <<р҃ѳ ѡ҆б.: 218>> воскресе́нїю: вѣ́рнїи же є҆гѡ̀ сы́нове возра́довашасѧ сего̀ ви́дѣвше, и҆ ѡ҆мыва́юща дх҃омъ скве́рнꙋ хрⷭ҇тоꙋбі́йства: гото́витсѧ торжествꙋ́ющи, ѻ҆бои́хъ весе́лое преполове́нїе.
Прибли́жисѧ бж҃е́ственнагѡ и҆з̾ѻби́льное и҆зли́тїе на всѣ́хъ, ꙗ҆́коже написа́сѧ, дх҃а: пред̾ꙋзаконе́нїе проповѣ́дꙋетъ преполови́вшеесѧ, по хрⷭ҇то́вѣ сме́рти и҆ погребе́нїи и҆ воскресе́нїи, ѿ негѡ̀ да́ннꙋ сꙋ́щꙋ ᲂу҆ченикѡ́мъ, нело́жномꙋ ѡ҆бѣща́нїю, ᲂу҆тѣ́шителево показꙋ́ющꙋ ꙗ҆вле́нїе.
Сла́ва, и҆ ны́нѣ гла́съ ѕ҃:
Пра́здникꙋ преполовлѧ́ющꙋсѧ, твоегѡ̀ хрⷭ҇тѐ воскрⷭ҇нїѧ, и҆ бжⷭ҇твеннагѡ прише́ствїѧ ст҃а́гѡ твоегѡ̀ дх҃а, соше́дшесѧ чꙋде́съ твои́хъ воспѣва́емъ та̑инства, во́ньже низпослѝ на́мъ ве́лїю ми́лость.
Вхо́дъ. Прокі́менъ днѐ. Чте́нїѧ трѝ:
Проро́чества мїхе́ина чте́нїе. [глава̀ д҃.]
Та́кѡ глаго́летъ гдⷭ҇ь: ѿ сїѡ́на и҆зы́детъ зако́нъ, и҆ сло́во гдⷭ҇не и҆з̾ і҆ерꙋсали́ма, и҆ сꙋ́дитъ посредѝ люде́й мно́гихъ, и҆ ѡ҆бличи́тъ ꙗ҆зы́ки крѣ̑пкїѧ да́же на до́лзѣ, ꙗ҆́кѡ всѝ лю́дїе по́йдꙋтъ кі́йждо свои́мъ пꙋте́мъ: мы́ же по́йдемъ и҆́менемъ гдⷭ҇а бг҃а на́шегѡ въ вѣ́къ. Та́кѡ глаго́летъ гдⷭ҇ь вседержи́тель: ᲂу҆слы́шите хо́лми сꙋ́дъ гдⷭ҇нь, и҆ дє́бри ѡ҆снова̑нїѧ землѝ, ꙗ҆́кѡ сꙋ́дъ гдⷭ҇ви къ лю́демъ є҆гѡ̀, и҆ со і҆и҃лемъ сопри́тсѧ, глаго́лѧ: лю́дїе моѝ, что̀ сотвори́хъ ва́мъ; и҆лѝ чи́мъ ѡ҆печа́лихъ ва́съ; ѿвѣща́йте мѝ: занѐ возведо́хъ вы̀ ѿ землѝ є҆гѵ́петскїѧ, и҆ и҆з̾ до́мꙋ рабо́ты и҆зба́вихъ ва́съ, и҆ посла́хъ пред̾ лице́мъ ва́шимъ мѡѷсе́а и҆ а҆арѡ́на и҆ марїа́мъ. Лю́дїе моѝ [помѧни́те ᲂу҆́бѡ], что̀ совѣща́ша на ва́съ <<р҃і: 219>> сопроти́внїи; кто̀ возвѣстѝ тебѣ̀; возвѣсти́хъ бо тебѣ̀, человѣ́че, что̀ добро̀, и҆лѝ что̀ гдⷭ҇ь и҆́щетъ ѿ тебѐ, ра́звѣ твори́ти сꙋ́дъ, и҆ люби́ти млⷭ҇ть, и҆ гото́вꙋ бы́ти, є҆́же ходи́ти съ гдⷭ҇емъ бг҃омъ твои́мъ: занѐ въ крѣ́пости возвели́читсѧ гдⷭ҇ь, и҆ ᲂу҆пасе́тъ ста́до своѐ въ ми́рѣ, да́же до конє́цъ землѝ.
Проро́чества и҆са́їина чте́нїе. [глава̀ н҃є.]
Та́кѡ глаго́летъ гдⷭ҇ь: жа́ждꙋщїи и҆ди́те на во́дꙋ, и҆ є҆ли́цы не и҆́мате сребра̀, ше́дше кꙋпи́те, и҆ ꙗ҆ди́те, пі́йте без̾ сребра̀ и҆ цѣны̀, вїно̀ и҆ тꙋ́къ. Ꙗ҆́кѡ та́кѡ глаго́летъ гдⷭ҇ь вседержи́тель ва́мъ: лю́дїе моѝ, почерпи́те во́дꙋ съ весе́лїемъ ѿ и҆стѡ́чникъ спасе́нїѧ. И҆ рече́ши въ де́нь ѻ҆́ный: воспо́йте гдⷭ҇ви, призови́те и҆́мѧ є҆гѡ̀, возвѣсти́те во ꙗ҆зы́цѣхъ сла̑внаѧ є҆гѡ̀: помѧни́те, ꙗ҆́кѡ вознесе́сѧ и҆́мѧ є҆гѡ̀. Лю́дїе моѝ, ᲂу҆слы́шите менѐ, и҆ снѣ́сте блага̑ѧ, и҆ наслади́тсѧ во благи́хъ дꙋша̀ ва́ша. Внꙋши́те ᲂу҆ши́ма ва́шима, и҆ послѣ́дꙋйте пꙋтє́мъ мои́мъ. Оу҆слы́шите менѐ, и҆ жива̀ бꙋ́детъ во благи́хъ дꙋша̀ ва́ша, и҆ завѣща́ю ва́мъ завѣ́тъ вѣ́чный, и҆ призови́те. Внегда́ же а҆́ще прибли́житесѧ мнѣ̀, да ѡ҆ста́витъ нечести́вый пꙋти̑ своѧ̑, и҆ мꙋ́жъ беззако́нный совѣ́ты своѧ̑, и҆ ѡ҆брати́тесѧ ко мнѣ̀, и҆ поми́лꙋю ва́съ, и҆ ѡ҆ста́влю грѣхѝ ва́шѧ. Не сꙋ́ть бо совѣ́ти моѝ, ꙗ҆́коже совѣ́ти ва́ши, ни ꙗ҆́коже пꙋтїѐ ва́ши пꙋтїѐ моѝ, глаго́летъ гдⷭ҇ь. Но ꙗ҆́коже ѿстои́тъ нб҃о ѿ землѝ, та́кѡ ѿстои́тъ пꙋ́ть мо́й ѿ пꙋте́й ва́шихъ, и҆ ᲂу҆мышлє́нїѧ ва́ша ѿ мы́сли моеѧ̀. Ꙗ҆́коже бо а҆́ще сни́детъ до́ждь, и҆лѝ снѣ́гъ съ нб҃сѐ, и҆ не возврати́тсѧ ѿтꙋ́дꙋ, до́ндеже ᲂу҆пои́тъ <<р҃і ѡ҆б.: 220>> зе́млю, и҆ и҆зрасти́тъ, и҆ прозѧ́бнетъ, и҆ да́стъ сѣ́мѧ сѣ́ющемꙋ, и҆ хлѣ́бъ въ снѣ́дь: Си́це бꙋ́детъ глаго́лъ мо́й, и҆́же а҆́ще и҆зы́детъ и҆з̾ ᲂу҆́стъ мои́хъ, не возврати́тсѧ ко мнѣ̀ то́щъ, до́ндеже сконча́етъ всѧ̑, є҆ли̑ка восхотѣ́хъ, и҆ и҆спра́влю пꙋти̑ твоѧ̑, и҆ за́пѡвѣди моѧ̑. Съ весе́лїемъ бо и҆зы́дете, и҆ съ ра́достїю наꙋчи́тесѧ: го́ры бо и҆ хо́лми возска́чꙋтъ, ждꙋ́ще ва́съ въ ра́дости, и҆ всѧ̑ древа̀ сє́льнаѧ воспле́щꙋтъ вѣ́твьми. И҆ вмѣ́стѡ дра́чїѧ взы́детъ кѷпарі́съ, вмѣ́стѡ же кропи́вы взы́детъ мѷрсі́на: и҆ бꙋ́детъ гдⷭ҇ь во и҆́мѧ, и҆ въ зна́менїе вѣ́чное, и҆ не ѡ҆скꙋдѣ́етъ, глаго́летъ гдⷭ҇ь бг҃ъ ст҃ы́й і҆и҃левъ.
При́тчей чте́нїе. [глава̀ ѳ҃.]
Премꙋ́дрость созда̀ себѣ̀ до́мъ, и҆ ᲂу҆твердѝ столпѡ́въ се́дмь. Закла̀ своѧ̑ же́ртвєннаѧ, и҆ растворѝ въ ча́ши свое́й вїно̀, и҆ ᲂу҆гото́ва свою̀ трапе́зꙋ. Посла̀ своѧ̑ рабы̑, созыва́ющи съ высо́кимъ проповѣ́данїемъ на ча́шꙋ, глаго́лющи: И҆́же є҆́сть безꙋ́менъ, да ᲂу҆клони́тсѧ ко мнѣ̀. И҆ тре́бꙋющымъ ᲂу҆ма̀ речѐ: прїиди́те, ꙗ҆ди́те мо́й хлѣ́бъ и҆ пі́йте вїно̀, є҆́же раствори́хъ ва́мъ. Ѡ҆ста́вите безꙋ́мїе, и҆ жи́ви бꙋ́дете: и҆ взыщи́те ра́зꙋма, да поживетѐ, и҆ и҆спра́вите ра́зꙋмъ въ вѣ́дѣнїи. Наказꙋ́ѧй ѕлы̑ѧ, прїи́метъ себѣ̀ безче́стїе: ѡ҆блича́ѧй же нечести́ваго, поро́чна сотвори́тъ себѐ: ѡ҆бличє́нїѧ бо нечести́вомꙋ ра̑ны є҆мꙋ̀. Не ѡ҆блича́й ѕлы́хъ, да не возненави́дѧтъ тебѐ: ѡ҆блича́й премꙋ́дра, и҆ возлю́битъ тѧ̀. Да́ждь премꙋ́дромꙋ винꙋ̀, и҆ премꙋ́дршїй бꙋ́детъ: сказꙋ́й пра́ведномꙋ, и҆ приложи́тъ прїима́ти. Нача́ло премꙋ́дрости, стра́хъ гдⷭ҇нь, и҆ совѣ́тъ ст҃ы́хъ ра́зꙋмъ: разꙋмѣ́ти бо зако́нъ, по́мысла є҆́сть <<ра҃і: 221>> блага́гѡ. Си́мъ бо ѻ҆́бразомъ мно́гое поживе́ши вре́мѧ и҆ приложа́тсѧ тебѣ̀ лѣ̑та живота̀.
Та́же, є҆ктенїа̀: Рце́мъ всѝ: и҆ возгла́съ. Та́же: Сподо́би гдⷭ҇и: Посе́мъ: И҆спо́лнимъ вече́рнюю:
На стїхо́внѣ стїхи̑ры самогла́сны, гла́съ а҃. І҆ѡа́нна мона́ха:
Пѧтдесѧ́тницы наста̀ дне́й преполове́нїе, въ не́мже хрⷭ҇то́съ ѡ҆бнажи́въ малови́днѡ бж҃е́ственнꙋю си́лꙋ, разсла́бленнаго стѧгнꙋ̀ сло́вомъ, того̀ ѿ ѻ҆дра̀ возста́вивъ, и҆ бг҃олѣ́пнѡ чꙋдотворѧ́й въ зда́нномъ тѣ́лѣ, человѣ́кѡмъ дарова̀ вѣ́чный живо́тъ, и҆ ве́лїю ми́лость.
Сті́хъ: Помѧнѝ со́нмъ тво́й, є҆го́же стѧжа́лъ є҆сѝ и҆спе́рва.
Во ст҃и́лище прише́лъ є҆сѝ премꙋ́дросте бж҃їѧ, преполовлѧ́ющꙋсѧ пра́здникꙋ, ᲂу҆чѧ̀ и҆ ѡ҆блича́ѧ непокори̑выѧ і҆ꙋдє́и, фарїсє́и и҆ кни́жники, и҆ вопїѧ̀ со дерзнове́нїемъ къ ни́мъ: жа́ждай да грѧде́тъ ко мнѣ̀, и҆ пїе́тъ во́дꙋ живо́тнꙋю, и҆ не вжа́ждетъ во вѣ́къ: вѣ́рꙋѧй мое́й бла́гости, рѣ́ки потекꙋ́тъ и҆з̾ чре́ва є҆гѡ̀ жи́зни вѣ́чныѧ. ѽ бла́гости и҆ благоꙋтро́бїѧ твоегѡ̀ хрⷭ҇тѐ бж҃е на́шъ, сла́ва тебѣ̀!
Гла́съ в҃.
Сті́хъ: Бг҃ъ же цр҃ь на́шъ пре́жде вѣ́ка, содѣ́ла спасе́нїе:
Є҆гда̀ преполове́нїе пра́здника наста̀, взы́де і҆и҃съ во ст҃и́лище, и҆ ᲂу҆ча́ше непокори́выѧ і҆ꙋдє́и, глаго́лѧ: жа́ждай да грѧде́тъ ко мнѣ̀, и҆ пїе́тъ во́дꙋ живо́тнꙋю, вѣ́чнꙋю, и҆ не вжа́ждетсѧ во вѣ́къ. вѣ́рꙋѧй въ мѧ̀, рѣ́ки потекꙋ́тъ и҆з̾ чре́ва є҆гѡ̀, и҆ и҆мѣ́ти бꙋ́детъ свѣ́тъ живо́тный. <<ра҃і ѡ҆б.: 222>>
Сла́ва, и҆ ны́нѣ: гла́съ и҃:
Преполови́вшꙋсѧ пра́здникꙋ, ᲂу҆ча́щꙋ тѝ сп҃се, глаго́лахꙋ і҆ꙋде́є: ка́кѡ се́й вѣ́сть пи́смена, не ᲂу҆чи́всѧ; не разꙋмѣ́юще, ꙗ҆́кѡ ты̀ є҆сѝ премꙋ́дрость ᲂу҆стро́ившаѧ мі́ръ, сла́ва тебѣ̀.
По Ны́нѣ ѿпꙋща́еши: и҆ по Ѻ҆́ч҃е на́шъ:
Тропа́рь, гла́съ и҃:
Преполови́вшꙋсѧ пра́здникꙋ, жа́ждꙋщꙋю дꙋ́шꙋ мою̀ бл҃гоче́стїѧ напо́й вода́ми, ꙗ҆́кѡ всѣ̑мъ сп҃се возопи́лъ є҆сѝ: жа́ждай да грѧде́тъ ко мнѣ̀ и҆ да пїе́тъ, и҆сто́чниче жи́зни на́шеѧ хрⷭ҇тѐ бж҃е, сла́ва тебѣ̀.
Та́же і҆ере́й: Премꙋ́дрость. И҆ ѿпꙋ́стъ по ѻ҆бы́чаю.
[зрѝ] На повече́рїи ст҃а́гѡ рѧдова́гѡ пое́мъ стїхи̑ры, и҆ канѡ́нъ. Конда́къ пра́здника. На полꙋ́нощницѣ по а҃-мъ трист҃о́мъ тропа́рь пра́здника. По в҃-мъ трист҃о́мъ конда́къ пра́здника. Та́же, Гдⷭ҇и поми́лꙋй в҃і. И҆ ѿпꙋ́стъ. Моли̑твы заꙋпоко́йныѧ: Помѧнѝ гдⷭ҇и въ наде́жди: не глаго́лемъ.
Въ сре́дꙋ преполове́нїѧ, на ᲂу҆́трени,
на Бг҃ъ гдⷭ҇ь: тропа́рь пра́здника, три́жды. По а҃-мъ стїхосло́вїи сѣда́ленъ, гла́съ д҃. Подо́бенъ: Ско́рѡ предварѝ:
Всѣ́хъ серде́цъ помышлє́нїѧ вѣ́дый, посредѣ̀ ст҃и́лища ста́въ взыва́ше лжи̑вымъ глаго́лѧ и҆́стинꙋ: что̀ и҆́щете ᲂу҆би́ти мѧ̀ животода́вца, пра́здникꙋ преполовлѧ́ющꙋсѧ, вопїѧ̀ де́рзостнѡ; не на лица̀ зрѧ́ще сꙋ́дъ сꙋди́те законопрестꙋ̑пницы.
Сла́ва, и҆ ны́нѣ: то́йже.
И҆ чте́нїе въ толкова́нїи є҆ѵⷢ҇лїа і҆ѡа́нна. <<рв҃і: 223>>
По в҃-мъ стїхосло́вїи сѣда́ленъ, гла́съ є҃.
Подо́бенъ: Собезнача́льное сло́во:
Влⷣка всѣ́хъ во хра́мѣ стоѧ̀, пра́здникꙋ преполови́вшꙋсѧ пѧтдесѧ́тницы честны́ѧ, є҆вре́ємъ бесѣ́дꙋѧ, ѡ҆блича́ше ꙗ҆́вѣ въ дерзнове́нїи мно́зѣ, ꙗ҆́кѡ цр҃ь сы́й и҆ бг҃ъ, мꙋчи́тельство тѣ́хъ де́рзостное: на́мъ же всѣ̑мъ да́рꙋетъ за благоꙋтро́бїе, ве́лїю ми́лость.
Сла́ва, и҆ ны́нѣ: то́йже.
Та́же, Воскрⷭ҇нїе хрⷭ҇то́во: и҆ ѱало́мъ н҃.
Канѡ́на пра́здника два̀ со і҆рмосы̀ на д҃і. Пе́рвый со і҆рмосы̀ на и҃, вторы́й на ѕ҃. Послѣди́ же катава́сїа, і҆рмо́съ втора́гѡ канѡ́на, ѻ҆́ба ли́ка вкꙋ́пѣ.
Канѡ́нъ, гла́съ д҃,
гдⷭ҇и́на ѳеофа́на, є҆гѡ́же краестро́чїе сїѐ:
Преполове́нїе пра́здникѡвъ превели́кихъ похвалю̀.
Пѣ́снь а҃.
І҆рмо́съ: Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крⷭ҇тоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Вє́лїѧ ꙗ҆̀же па́че ᲂу҆ма̀ влⷣко, бжⷭ҇твеннагѡ твоегѡ̀ воплоще́нїѧ, бл҃годѣѧ̑нїѧ сїѧ́ютъ на́мъ, да́рове же и҆ бл҃года̑ти, и҆ бжⷭ҇твенныѧ свѣ́тлѡсти, бл҃гопода́тнѡ и҆стека́ющыѧ.
Прише́лъ є҆сѝ хрⷭ҇тѐ, свѣ́тлѡсти бж҃ества̀ и҆спꙋща́ѧ, пра́здника посредѣ̀ ꙗ҆вле́ннѡ: пра́здникъ бо ра́достный спаса́емыхъ є҆сѝ, и҆ спасе́нїѧ на́шегѡ хода́тай.
Премꙋ́дрость, пра́вда, гдⷭ҇и, и҆ и҆збавле́нїе ᲂу҆ бг҃а ты̀ бы́лъ є҆сѝ на́мъ, ѿ землѝ къ нбⷭ҇ной преводѧ̀ высотѣ̀, и҆ дх҃ъ бж҃е́ственный да́рꙋѧ. <<рв҃і ѡ҆б.: 224>>
Пло́ть твоѧ̀ и҆стлѣ́нїѧ во гро́бѣ не ви́дѣ, влⷣко, но ꙗ҆́кѡ соста́висѧ кромѣ̀ сѣ́мене, тлѣ́нїѧ не прїѧ́тъ, послѣ́дованїю є҆стества̀, пресꙋ́щественнѡ не рабо́тавшаѧ.
Дрꙋгі́й канѡ́нъ,
творе́нїе гдⷭ҇и́на а҆ндре́а кри́тскагѡ, гла́съ и҃.
Пѣ́снь а҃.
І҆рмо́съ: Мо́ре ѡ҆гꙋсти́лъ є҆сѝ:
Ꙗ҆зы́цы восплещи́те, є҆вре́и воспла́чите, животода́вецъ бо хрⷭ҇то́съ, ᲂу҆́зы а҆́довы расто́рже, и҆ мє́ртвыѧ воскресѝ, и҆ недꙋ́ги и҆сцѣлѝ сло́вомъ: се́й є҆́сть бг҃ъ на́шъ, да́вый жи́знь вѣ́рꙋющымъ во и҆́мѧ є҆гѡ̀.
Чꙋ́до показа́лъ є҆сѝ, во́дꙋ въ вїно̀ преше́дшꙋю, во є҆гѵ́птѣ рѣ́ки преложи́вый влⷣко въ кро́вь, и҆ мє́ртвыѧ воскреси́лъ є҆сѝ, зна́менїе сїѐ второ́е сконча́въ. сла́ва сп҃се несказа́нномꙋ твоемꙋ̀ совѣ́тꙋ: сла́ва и҆стоща́нїю твоемꙋ̀, и҆́мже ѡ҆бнови́лъ є҆сѝ на́съ.
Стрꙋѧ̀ приснотекꙋ́щаѧ сы́й гдⷭ҇и жи́зни и҆́стинныѧ, ты̀ є҆сѝ воскресе́нїе на́ше: хотѧ̀ трꙋди́лсѧ є҆сѝ сп҃се мо́й, и҆ во́лею вжа́ждалсѧ є҆сѝ, зако́нѡмъ є҆стества̀ повинꙋ́ѧсѧ, и҆ въ сѷха́рь ше́дъ пло́тїю, воды̀ проси́лъ є҆сѝ ᲂу҆ самарѧны́ни пи́ти.
Хлѣ́бы бл҃гослови́лъ є҆сѝ, ры̑бы ᲂу҆мно́жилъ є҆сѝ, непостижи́мый бж҃е, и҆ лю́ди насы́тилъ є҆сѝ незави́стнѡ, и҆ и҆сто́чникъ приснотекꙋ́щїй премꙋ́дрость, жа́ждꙋщымъ ѡ҆бѣща́лъ є҆сѝ. ты̀ є҆сѝ сп҃съ бг҃ъ на́шъ, да́вый живо́тъ вѣ́рꙋющымъ во и҆́мѧ твоѐ.
Сла́ва: трⷪ҇ченъ:
Трѝ собезнача́льны сла́влю и҆ сопресто́льны, ѻ҆ц҃а̀ <<рг҃і: 225>> безнача́льна бг҃а, и҆ сн҃а собезнача́льна, и҆ дх҃а соприсносꙋ́щна сн҃ꙋ, є҆ди́но трїѷпоста́сное сꙋщество̀: є҆ди́но нача́ло пребезнача́льное пою̀, безнача́льнагѡ бж҃ества̀ и҆ сꙋщества̀ чтꙋ̀.
И҆ ны́нѣ: бг҃оро́диченъ:
Є҆ди́на вмѣсти́ла є҆сѝ зижди́телѧ твоего̀ бг҃ороди́тельнице во чре́вѣ, и҆ пло́тїю родила̀ є҆сѝ неизрече́ннѡ, и҆ дв҃а пребыла̀ є҆сѝ, ничто́же дѣ́вствꙋ ѡ҆скверни́вшꙋсѧ. сего̀ чⷭ҇таѧ, ꙗ҆́кѡ сн҃а твоего̀ и҆ бг҃а непреста́ннѡ молѝ ѡ҆ ста́дѣ твое́мъ при́снѡ.
Катава́сїа: Мо́ре ѡ҆гꙋсти́лъ є҆сѝ, погрꙋзи́вый со ѻ҆рꙋ́жїемъ го́рдаго фараѡ́на, и҆ лю́ди спа́слъ є҆сѝ немо́креннѡ гдⷭ҇и, и҆ вве́лъ є҆сѝ ѧ҆̀ въ го́рꙋ ст҃ы́ни, вопїю́щыѧ: пои́мъ тебѣ̀ бг҃ꙋ на́шемꙋ пѣ́снь побѣ́днꙋю, ꙗ҆́кѡ просла́висѧ.
Пѣ́снь г҃.
І҆рмо́съ: Весели́тсѧ ѡ҆ тебѣ̀ цр҃ковь твоѧ̀ хрⷭ҇тѐ, зовꙋ́щи: ты̀ моѧ̀ крѣ́пость гдⷭ҇и, и҆ прибѣ́жище и҆ ᲂу҆твержде́нїе.
Во́дъ животво́рныхъ и҆сто́чники ѿве́рзлъ є҆сѝ цр҃кви, а҆́ще кто̀ жа́ждетъ, ᲂу҆се́рднѡ да прихо́дитъ и҆ пїе́тъ, вопїѧ̀ бл҃же.
Ѿ землѝ ᲂу҆́бѡ на нб҃о вознести́сѧ, проѧвле́ннѡ глаго́лалъ є҆сѝ: съ нб҃се́ же дх҃а посла́ти ѡ҆бѣща́лъ є҆сѝ ст҃а́го.
Є҆стество́мъ животворѧ́й, и҆ ѿ дв҃ы роди́выйсѧ гдⷭ҇ь, всѣ́мъ вѣ̑рнымъ дарова̀ безсме́ртїе, ꙗ҆́кѡ бл҃гоꙋтро́бенъ.
И҆́нъ.
І҆рмо́съ: Оу҆тверди́сѧ се́рдце моѐ во гдⷭ҇ѣ:
Не и҆́же на лицѐ сꙋ́дъ сꙋди́те і҆ꙋде́є, ᲂу҆чѧ̀ глаго́лаше влⷣка, є҆гда̀ прїи́де во ст҃и́лище, ꙗ҆́коже пи́сано є҆́сть, преполови́вшꙋсѧ зако́нномꙋ пра́здникꙋ. <<рг҃і: 225>>
Не и҆́же на лицѐ сꙋ́дъ сꙋди́те і҆ꙋде́є: хрⷭ҇то́съ бо прїи́де, є҆го́же нарица́хꙋ проро́цы ѿ сїѡ́на грѧдꙋ́ща. и҆ мі́ръ взыва́юща.
А҆́ще и҆ словесє́мъ не вѣ́рꙋете і҆ꙋде́є, дѣлѡ́мъ вѣ́рꙋйте влⷣки: что̀ прельща́етесѧ, ѿмета́ющесѧ ст҃а́гѡ, є҆го́же написа̀ въ зако́нѣ мѡѷсе́й;
А҆́ще мессі́и всѧ́кѡ подоба́етъ прїитѝ і҆ꙋде́є, хрⷭ҇то́съ же прїи́де ны́нѣ мессі́а: что̀ прельща́етесѧ, ѿмета́ющесѧ пра́веднагѡ, є҆го́же написа̀ въ зако́нѣ мѡѷсе́й,
Сла́ва, трⷪ҇ченъ:
Тебѣ̀ покланѧ́емсѧ ѻ҆́ч҃е, безнача́льный сꙋщество́мъ, пое́мъ безнача́льнаго сн҃а твоего̀, и҆ дх҃а благоче́стнѡ всест҃а́го, ꙗ҆́кѡ є҆ди́наго трѝ, є҆стество́мъ бг҃а.
И҆ ны́нѣ: бг҃оро́диченъ:
Є҆ди́нъ ѿ трⷪ҇цы сы́й бы́въ, пло́ть ви́дѣлсѧ є҆сѝ, не прело́жь гдⷭ҇и сꙋщества̀, нижѐ ѡ҆пали́въ ро́ждшїѧ нетлѣ́нное чре́во, бг҃ъ сы́й ве́сь и҆ ѻ҆́гнь.
Катава́сїа: Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й въ бз҃ѣ мое́мъ, разшири́шасѧ на врагѝ моѧ̑ ᲂу҆ста̀ моѧ̀, возвесели́хсѧ ѡ҆ спасе́нїи твое́мъ.
Сѣда́ленъ, гла́съ и҃. Подо́бенъ: Премꙋ́дрости сло́ва:
Стоѧ̀ посредѣ̀ свѧти́лища, преполовлѧ́ющꙋсѧ бж҃е́ственнѡ пра́здникꙋ, жа́ждай взыва́лъ є҆сѝ, да грѧде́тъ ко мнѣ̀ и҆ пїе́тъ: пїѧ́й бо ѿ сеѧ̀ бж҃е́ственныѧ моеѧ̀ воды̀, рѣ́ки и҆з̾ чре́ва и҆сточи́тъ велѣ́нїй мои́хъ: а҆ и҆́же вѣ́рꙋетъ въ мѧ̀, по́сланнаго ѿ бж҃е́ственнагѡ роди́телѧ, со мно́ю просла́витсѧ. сегѡ̀ ра́ди вопїе́мъ тѝ: сла́ва тебѣ̀ хрⷭ҇тѐ бж҃е, ꙗ҆́кѡ бога́тнѡ и҆злїѧ́лъ є҆сѝ во́ды твоегѡ̀ человѣколю́бїѧ рабѡ́мъ твои́мъ. <<рд҃і: 227>>
Сла́ва, и҆ ны́нѣ: Подо́бенъ:
Премꙋ́дрости во́дꙋ и҆ жи́зни, и҆сточа́ѧ мі́рови, всѣ́хъ сп҃се призыва́еши почерпстѝ спасе́нїѧ во́ды: бжⷭ҇твенный бо зако́нъ тво́й прїи́мъ человѣ́къ, въ себѣ̀ ᲂу҆гаша́етъ пре́лести ᲂу҆́глїе, ѿѻнꙋ́дꙋже во вѣ́ки не вжа́ждетъ, ни преста́нетъ насыще́нїѧ твоегѡ̀ влⷣко цр҃ю̀ пренебе́сный. сегѡ̀ ра́ди сла́вимъ держа́вꙋ твою̀ хрⷭ҇тѐ бж҃е, прегрѣше́нїй ѡ҆ставле́нїе просѧ́ще низпосла́ти бога́тнѡ рабѡ́мъ твои́мъ.
Пѣ́снь д҃.
І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й гдⷭ҇и.
Растерза́въ сме́рти врата̀ си́лою твое́ю, пꙋти̑ жи́зни сказа́лъ є҆сѝ, безсме́ртїѧ же двє́ри ѿве́рзлъ є҆сѝ, вѣ́рою зовꙋ́щымъ: сла́ва си́лѣ твое́й гдⷭ҇и.
Преполове́нїе всѣ́хъ и҆ коне́цъ и҆мѣ́ѧй, и҆ нача̑ла ꙗ҆́кѡ безнача́ленъ ѡ҆бдержа́й, ста́лъ є҆сѝ посредѣ̀ вопїѧ̀: бж҃е́ственныхъ бг҃омꙋ́дрїи прїиди́те дарѡ́въ наслади́тесѧ.
Ꙗ҆́кѡ бг҃ъ и҆ всѣ́хъ и҆мѣ́ѧй вла́сть, ꙗ҆́кѡ си́ленъ держа́вꙋ низложи́въ сме́рти, посла́ти ѡ҆бѣща́лсѧ є҆сѝ хрⷭ҇тѐ дх҃а ст҃а́го, ѿ ѻ҆ц҃а̀ происходѧ́щаго.
Бг҃оро́диченъ:
Дае́ши бога́тнѡ бл҃года́ть тебѐ пою́щымъ, и҆ и҆з̾ тебѐ ро́ждшагосѧ превѣ́чнаго сло́ва, мт҃и неискꙋсобра́чнаѧ, прегрѣше́нїй ѡ҆ставле́нїе си̑мъ просѧ́щи, пречи́стаѧ.
И҆́нъ.
І҆рмо́съ: Проро́къ а҆ввакꙋ́мъ: <<рд҃і ѡ҆б.: 228>>
А҆́ще мессі́и подоба́етъ прїитѝ: мессі́а же хрⷭ҇то́съ є҆́сть, беззако́ннїи, что̀ не вѣ́рꙋете є҆мꙋ̀; сѐ прїи́де, и҆ свидѣ́тельствꙋетъ, ꙗ҆̀же то́й твори́тъ: во́дꙋ вїно̀ сотворѝ, разсла́бленнаго сло́вомъ стѧгнꙋ̀.
Не разꙋмѣ́юще писа́нїй, прельща́етесѧ всѝ вы̀ є҆вре́и беззако́ннїи: вои́стиннꙋ бо прїи́де хрⷭ҇то́съ, и҆ всѣ́хъ просвѣтѝ, и҆ въ ва́съ показа̀ мнѡ́гаѧ зна́мєнїѧ, и҆ чꙋдеса̀, и҆ всꙋ́е ѿрица́етесѧ и҆́стиннагѡ живота̀.
Є҆ди́но дѣ́ло показа́хъ ва́мъ, и҆ всѝ ᲂу҆жѐ дивите́сѧ, взыва́ше і҆ꙋде́ємъ хрⷭ҇то́съ. вы̀ ѡ҆брѣ́зꙋете и҆ въ сꙋббѡ́тꙋ человѣ́ка, речѐ: мене́ же что̀ ѡ҆клевета́ете про́чее, воздви́гшаго сло́вомъ разсла́бленнаго;
Дѣла̀ сотвори́хъ мнѡ́гаѧ, и҆ ко́егѡ ра́ди дѣ́ла ка́менїемъ бїете́ мѧ; і҆ꙋде́ємъ хрⷭ҇то́съ, ѡ҆блича́ѧ, взыва́ше: є҆да̀ занѐ человѣ́ка здра́ва всего̀ сло́вомъ сотвори́хъ, не сꙋди́те на лицѐ человѣ́цы.
Во а҆по́столѣхъ дѣ́йствꙋѧй, и҆ во проро́цѣхъ са́мъ почива́ѧй съ дх҃омъ, безнача́льное рожде́нїе ѻ҆те́ческагѡ є҆стества̀ хрⷭ҇тѐ, ꙗ҆зы́ки къ позна́нїю возве́лъ є҆сѝ зна́меньми твои́ми.
Сла́ва: трⷪ҇ченъ:
Трⷪ҇це нераздѣ́льнаѧ є҆ди́нице, безнача́льне ѻ҆́ч҃е, сн҃е и҆ дш҃е ст҃ы́й, во є҆ди́ницѣ трⷪ҇ца равноче́стнаѧ, сопресто́льнаѧ, животворѧ́щаѧ, несозда́нный бж҃е, спаса́й воспѣва́ющыѧ тѧ̀, и҆ и҆зба́ви ѿ бѣ́дъ и҆ скорбе́й.
И҆ ны́нѣ: бг҃оро́диченъ:
Во чре́вѣ твое́мъ, бг҃а неѡпи́саннѡ вмѣсти́вшаѧ, бг҃оневѣ́сто дв҃о мт҃и чи́стаѧ, не преста́й молѧ́щи ѡ҆ на́съ, <<рє҃і: 229>> ꙗ҆́кѡ да тобо́ю и҆зба́вимсѧ ѿ ѡ҆бстоѧ́нїй, къ тебѣ́ бо при́снѡ прибѣга́емъ.
Катава́сїа: і҆рмо́съ: Прⷪ҇ро́къ а҆ввакꙋ́мъ ᲂу҆́мныма ѻ҆чи́ма прови́дѣ гдⷭ҇и, прише́ствїе твоѐ, тѣ́мъ и҆ вопїѧ́ше: ѿ ю҆́га прїи́детъ бг҃ъ, сла́ва си́лѣ твое́й, сла́ва снизхожде́нїю твоемꙋ̀.
Пѣ́снь є҃.
І҆рмо́съ: Ты̀ гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ свѧты́й, ѡ҆браща́ѧй и҆з̾ мра́чна невѣ́дѣнїѧ, вѣ́рою воспѣва́ющыѧ тѧ̀.
Бж҃е́ственныхъ пра́здникѡвъ преполове́нїѧ дости́гше, соверше́нною бж҃е́ственною добродѣ́телїю ѡ҆бꙋчи́тисѧ потщи́мсѧ бг҃омꙋ́дрїи.
Ꙗ҆́кѡ вои́стиннꙋ сщ҃е́нное настоѧ́щее торжество̀ преполове́нїе: превели́кихъ бо пра́здникѡвъ ко́рень, и҆ свѣ́титсѧ ѻ҆бою́дꙋ.
Бг҃оро́диченъ:
Оу҆́мъ а҆рха́гг҃льскїй не мо́жетъ разꙋмѣ́ти твоѐ неизрече́нное и҆з̾ дв҃ы и҆ пречⷭ҇тое ржⷭ҇тво̀, сп҃се многоми́лостиве.
И҆́нъ. І҆рмо́съ: Гдⷭ҇и бж҃е на́шъ, ми́ръ да́ждь на́мъ:
Чꙋдесы̀ ᲂу҆краси́лъ є҆сѝ а҆по́столы твоѧ̑, дивесы̀ возвели́чилъ є҆сѝ ᲂу҆ченикѝ, во все́мъ мі́рѣ просла́вивъ сп҃се на́шъ, и҆ да́въ и҆̀мъ ца́рствїе твоѐ.
Всѧ̑ просвѣти́ша землѝ концы̀ ᲂу҆ченицы̀, чꙋдесы̀ и҆ ᲂу҆че́ньми, и҆ разли́чными ѻ҆́бразы сло́во проповѣ́давше, хрⷭ҇тѐ сп҃се, ца́рствїѧ твоегѡ̀.
Хвалꙋ̀ возсыла́емъ ца́рствїю твоемꙋ̀, пѣ́нїе же тебѣ̀ прино́симъ, на́съ ра́ди на землѝ ꙗ҆ви́вшемꙋсѧ, и҆ мі́ръ просвѣти́вшемꙋ, и҆ а҆да́ма воззва́вшемꙋ. <<рє҃і ѡ҆б.: 230>>
Сла́ва: трⷪ҇ченъ:
Сла́ва тебѣ̀, ѻ҆́ч҃е ст҃ы́й, бж҃е нерожде́нне: сла́ва тебѣ̀, сло́ве безлѣ́тне є҆диноро́дне: сла́ва тебѣ̀, дш҃е бж҃е́ственне и҆ сопресто́льне, и҆ є҆диносꙋ́щне ѻ҆ц҃ꙋ̀ и҆ сн҃ꙋ.
И҆ ны́нѣ: бг҃оро́диченъ:
Бы́сть чре́во твоѐ ст҃а́ѧ трапе́за, и҆мꙋ́щаѧ нбⷭ҇ный хлѣ́бъ: ѿ негѡ́же всѧ́къ ꙗ҆ды́й не ᲂу҆мира́етъ, ꙗ҆́коже речѐ всѣ́хъ бг҃ороди́тельнице пита́тель.
Катава́сїа: Гдⷭ҇и бж҃е на́шъ, ми́ръ да́ждь на́мъ: гдⷭ҇и бж҃е на́шъ, стѧжѝ ны̀: гдⷭ҇и, ра́звѣ тебѐ и҆но́гѡ не вѣ́мы, и҆́мѧ твоѐ и҆менꙋ́емъ.
Пѣ́снь ѕ҃.
І҆рмо́съ: Пожрꙋ́ ти со гла́сомъ хвале́нїѧ гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Преполове́нїе пѧтдесѧ́тницы наста̀ дне́сь, ѿсю́дꙋ бж҃е́ственныѧ ᲂу҆́бѡ па́схи, бж҃е́ственнѣйшею свѣ́тлостїю ѡ҆зари́вшеесѧ, ѿѻнꙋ́дꙋже ᲂу҆тѣ́шителевою благода́тїю сїѧ́ющее.
Глаго́лалъ є҆сѝ въ хра́мѣ хрⷭ҇тѐ предстоѧ̀, і҆ꙋдє́йскимъ собо́рѡмъ свою̀ сла́вꙋ ѿкрыва́ѧ, и҆ пред̾ѧвлѧ́ѧ сро́дство къ роди́телю.
Бг҃оро́диченъ:
Бꙋ́ди мѝ предста́тельница, и҆ стѣна̀ нерꙋши́маѧ, ѿ мїрски́хъ мѧ̀ собла́знѡвъ и҆збавлѧ́ющаѧ, є҆ди́на бг҃ороди́тельнице, и҆ бж҃е́ственнымъ свѣтоли́тїемъ ѡ҆свѣща́ющаѧ.
И҆́нъ. І҆рмо́съ: Ꙗ҆́кѡ во́ды морскі̑ѧ:
Всѧ̑ содержа́й концы̀, возше́лъ є҆сѝ і҆и҃се, и҆ ᲂу҆чи́лъ є҆сѝ <<рѕ҃і: 231>> во свѧти́лищи наро́ды сло́вꙋ и҆́стины, пра́здникꙋ преполовлѧ́ющꙋсѧ, ꙗ҆́коже і҆ѡа́ннъ вопїе́тъ.
Ѿве́рзлъ є҆сѝ ᲂу҆стнѣ̀ твоѝ влⷣко, проповѣ́далъ є҆сѝ мі́рови безлѣ́тнаго ѻ҆ц҃а̀, и҆ всест҃а́го дх҃а, сро́дное ѻ҆бо́ихъ хранѧ̀ и҆ по воплоще́нїи.
Дѣ́ло ѻ҆́ч҃ее соверши́лъ є҆сѝ, дѣ́лы ᲂу҆вѣ́рилъ є҆сѝ словеса̀ твоѧ̑, и҆сцѣлє́нїѧ соверша́ѧ сп҃се, и҆ зна̑менїѧ, разсла́бленнаго и҆справлѧ́ѧ, прокажє́нныѧ ѡ҆чища́ѧ, и҆ мє́ртвыѧ воскреша́ѧ.
Безнача́льный сн҃ъ нача́ло бы́сть, прїе́мъ є҆́же по на́мъ вочеловѣ́чисѧ, и҆ посредѣ̀ пра́здника ᲂу҆ча́ше, глаго́лѧ: притецы́те ко и҆сто́чникꙋ приснотекꙋ́щемꙋ, жи́знь почерпи́те.
Сла́ва: трⷪ҇ченъ:
Є҆ди́но въ трⷪ҇цѣ бж҃ество̀, сꙋщество̀ трїѷпоста́сное, несозда́нное, нераздѣ́льное всѝ сла́вимъ, ѻ҆ц҃а̀, и҆ сн҃а, и҆ ст҃а́го дх҃а, ꙗ҆́кѡ трѝ сꙋ́щее, и҆ є҆ди́но.
И҆ ны́нѣ: бг҃оро́диченъ:
Дв҃ꙋ по ржⷭ҇твѣ̀ пое́мъ тѧ̀, дв҃ꙋ и҆ мт҃рь сла́вимъ тебѐ є҆ди́нꙋ, чи́стаѧ бг҃оневѣ́сто ѻ҆трокови́це, и҆з̾ тебе́ бо вои́стиннꙋ бг҃ъ воплоти́сѧ, ѡ҆бнови́въ на́съ.
Катава́сїа: Ꙗ҆́кѡ во́ды морскі̑ѧ человѣколю́бче, волна́ми жите́йскими ѡ҆бꙋрева́юсѧ. тѣ́мже ꙗ҆́кѡ і҆ѡ́на, та́кѡ вопїю́ ти: возведѝ ѿ тлѝ живо́тъ мо́й, бл҃гоꙋтро́бне гдⷭ҇и.
Конда́къ, гла́съ д҃. Подо́бенъ: Вознесы́йсѧ:
Пра́здникꙋ зако́нномꙋ преполовлѧ́ющꙋсѧ, всѣ́хъ тво́рче влⷣко, къ предстоѧ́щымъ глаго́лалъ є҆сѝ хрⷭ҇тѐ бж҃е: прїиди́те и҆ почерпи́те во́дꙋ безсме́ртїѧ. тѣ́мже тебѣ̀ <<рѕ҃і ѡ҆б.: 232>> припа́даемъ, и҆ вѣ́рнѡ вопїе́мъ: щедро́ты твоѧ̑ да́рꙋй на́мъ, ты́ бо є҆сѝ и҆сто́чникъ жи́зни на́шеѧ.
І҆́косъ: Ѡ҆лѧденѣ́вшꙋю мою̀ дꙋ́шꙋ прегрѣше́нїй беззако́ньми тече́ньми твои́хъ крове́й напо́й, и҆ покажѝ плодоно́снꙋ добродѣ́тельми: ты́ бо ре́клъ є҆сѝ всѣ̑мъ, є҆́же приходи́ти къ тебѣ̀, сло́ве бж҃їй всест҃ы́й, и҆ во́дꙋ нетлѣ́нїѧ почерпа́ти, живꙋ́ю же и҆ ѡ҆чища́ющꙋю грѣхѝ, пою́щихъ сла́вное и҆ бж҃е́ственное твоѐ воста́нїе, подаѧ̀ благі́й съ высоты̀ сше́дшꙋю вои́стиннꙋ ᲂу҆ченикѡ́мъ твои́мъ дх҃а крѣ́пость, тебѐ бг҃а вѣ́дꙋщымъ: ты́ бо є҆сѝ и҆сто́чникъ жи́зни на́шеѧ.
Сѷнаѯа́рїй мине́и. Та́же настоѧ́щїй сѷнаѯа́рїй.
Стїхѝ: Ста́въ наꙋча́етъ, посредѣ̀ пра́здника,
хрⷭ҇то́съ мессі́а средѣ̀ ᲂу҆чи́телей.
Въ сре́дꙋ разсла́бленнагѡ, пра́здникъ преполове́нїѧ пѧтдесѧ́тницы пра́зднꙋемъ, по́чести ра́ди вели́кою двою̀ днѝ пра́здникꙋ, па́схи, глаго́лю, и҆ пѧтдесѧ́тницы, ꙗ҆́кѡ ѻ҆бою̀ соединѧ́ющꙋ и҆ совокꙋплѧ́ющъ. Бы́сть же сі́й та́кѡ: по є҆́же содѣ́лати хрⷭ҇тꙋ̀ на разсла́бленномъ чꙋ́до преесте́ственное, і҆ꙋдє́и ᲂу҆́бѡ ѡ҆ разсла́бленномъ соблажнѧ́ющесѧ, и҆́бо въ сꙋббѡ́тꙋ содѣ́ѧсѧ, и҆ска́хꙋ є҆го̀ ᲂу҆би́ти. Бѣжи́тъ ᲂу҆̀бо въ галїле́ю, и҆ въ та́мошнихъ гора́хъ пребыва́ѧ, пѧтїю̀ хлѣ́бы и҆ двоѝ ры́бꙋ чꙋдодѣ́йствꙋетъ, пѧ́ть ты́сѧщъ мꙋже́й прекормѝ, ра́звѣ же́нъ и҆ дѣте́й. Пото́мъ же кꙋ́щъ потче́нїю наста́вшꙋ [вели́къ же и҆ то́й пра́здникъ ᲂу҆ і҆ꙋдє́й], во і҆ерꙋсали́мъ восхо́дитъ, и҆ ѡ҆бхожда́ше сокрове́ннѡ. Въ преполове́нїи же пра́здника сегѡ̀, во свѧти́лище входѧ̀ ᲂу҆ча́ше: ст҃и́лище же є҆́сть є҆ди́номꙋ бг҃ꙋ ѡ҆би́телище, и҆дѣ́же любо́вь и҆ ми́ръ, и҆дѣ́же вѣ́ра и҆ цѣломꙋ́дрїе водворѧ́етсѧ. Сегѡ̀ ра́ди и҆ ст҃и́телю бж҃їю слꙋжа́щꙋ бг҃ови, ми́рнꙋ подоба́етъ бы́ти и҆ кро́ткꙋ, не крадли́вꙋ, не льсти́вꙋ, не сребролюби́вꙋ: да пре́жде бг҃а въ свою̀ дꙋ́шꙋ <<рз҃і: 233>> всели́тъ, пото́мъ же и҆ лю́ди по ѻ҆́бразꙋ и҆ по пꙋтѝ своемꙋ̀ счета́етъ. Мо́жетсѧ же нарещѝ и҆ коегѡ́ждо вѣ́рнагѡ дꙋша̀, ст҃и́лище преѡчище́нно бы́вши: и҆дѣ́же бо вселю́сѧ въ вы̀ и҆ похождꙋ̀, глаго́летъ гдⷭ҇ь. И҆ всѝ є҆гѡ̀ ᲂу҆че́нїю дивлѧ́хꙋсѧ, зави́дѧще є҆мꙋ̀ глаго́лахꙋ: ка́кѡ се́й вѣ́сть, писа́нїємъ не наꙋчи́всѧ; но́вый бо а҆да́мъ сы́й, вѣ́дѧше ꙗ҆́коже и҆ пе́рвый ѻ҆́нъ: всѧ́кїѧ премꙋ́дрости бѧ́ше преиспо́лненъ, и҆ ꙗ҆́коже бг҃ъ. Па́ки, ропта́хꙋ ᲂу҆́бѡ всѝ, и҆ къ є҆гѡ̀ ᲂу҆бі́йствꙋ бѣ́ша всѝ ᲂу҆стремлѧ́ющесѧ. хрⷭ҇то́съ же ѡ҆бличє́нїѧ на нѧ̀ ᲂу҆потреблѧ́ѧ, ꙗ҆́кѡ ѡ҆ сꙋббѡ́тѣ ᲂу҆́бѡ сварѧ́щыѧсѧ глаго́лаше: что́ мѧ и҆́щете ᲂу҆би́ти; ѻ҆ни́ же глаго́лахꙋ: бѣ́са ли и҆́маши, кто́ тѧ хо́щетъ ᲂу҆би́ти; Ѻ҆́нъ же па́ки къ прє́днимъ простира́етсѧ: а҆́ще ѡ҆ зако́нѣ сварите́сѧ, глаго́лѧ, что̀ на мѧ̀ ꙗ҆рите́сѧ, занѐ всего̀ человѣ́ка въ сꙋббѡ́тꙋ здра́ва сотвори́хъ; Мѡѷсе́ю и҆ сїѧ̑ законополага́ющꙋ разрꙋша́ти ю҆̀, внегда̀ ѡ҆брѣ́занїѧ ра́ди глаго́летъ. Мнѡ́га ᲂу҆́бѡ и҆̀мъ ѡ҆ се́мъ бесѣ́довавъ, и҆ показа́въ себѐ да́телѧ зако́нꙋ и҆ ѻ҆ц҃ꙋ̀ ра́вна. И҆ па́че въ послѣ́днїй де́нь вели́кїй пра́здника, ка́менїемъ быва́етъ мета́емь ѿ ни́хъ, но ка́мень томꙋ̀ ѿню́дъ не коснꙋ́сѧ. є҆гда̀ и҆ мимоходѧ̀ ѿтꙋ́дꙋ, ѡ҆брѣта́етъ человѣ́ка ѿ рожде́нїѧ слѣ́па, и҆ ѻ҆чеса̀ є҆мꙋ̀ да́рꙋетъ. Вѣ́домо же, ꙗ҆́кѡ трѝ бѧ́хꙋ ᲂу҆ і҆ꙋдє́й преве́лїи пра́здницы. Пе́рвый, па́сха, и҆́же ᲂу҆́бѡ соверша́етсѧ въ пе́рвомъ мѣ́сѧцѣ, воспомина́нїе и҆мѣ́ѧ, є҆́же въ чермно́мъ мо́ри прехожде́нїѧ. Вторы́й же, пѧтдесѧ́тница, є҆́же въ пꙋсты́ни пребыва́нїе, по преше́ствїи чермна́гѡ мо́рѧ помина́ѧй: пѧтдесѧ́тъ бо дні́й пребыва́хꙋ въ пꙋсты́ни, до́ндеже зако́нъ мѡѷсе́овъ прїи́мꙋтъ, є҆ще́ же и҆ за по́честь числа̀ седми́чнагѡ, че́стнꙋ ᲂу҆ ни́хъ сꙋ́щꙋ. Тре́тїй же тѣ̑мъ пра́здникъ, трꙋ́бъ и҆ сѣ́нницъ потчє́нїѧ, помина́нїе творѧ́ще ски́нїи, ю҆́же во ѻ҆́блацѣ горы̀ ви́дѣвъ мѡѷсе́й, пе́рвымъ древодѣ́лемъ веселе́иломъ водрꙋзи́въ поста́ви, ꙗ҆́же и҆ въ седмїю̀ сотворѧ́ема бѧ́ше дні́й, сноше́нїю плодѡ́въ па́мѧть и҆мꙋ́щи, и҆ ᲂу҆покое́нїѧ пꙋсты́ннагѡ. Є҆гда́ же твори́мꙋ томꙋ̀ пра́здникꙋ, ста́въ і҆и҃съ вели́кимъ гла́сомъ воззва̀: а҆́ще кто̀ жа́ждетъ, да грѧде́тъ ко мнѣ̀ и҆ пїе́тъ. Є҆лма̀ ᲂу҆́бѡ во ᲂу҆чи́тельствѣ то́мъ хрⷭ҇то́съ мессі́ю себѐ показа̀, хода́тай и҆ примири́тель <<рз҃і ѡ҆б.: 234>> на́шъ бы́въ, и҆ вѣ́чнагѡ ѻ҆ц҃а̀ своегѡ̀. Тоѧ̀ ра́ди вины̀ настоѧ́щїй пра́здникъ пра́зднꙋюще, и҆ средопѧтдесѧ́тницꙋ и҆менꙋ́юще, мессі́ю воспѣва́емъ хрⷭ҇та̀, и҆ честно́е є҆́же ѿ ѻ҆бою̀ двою̀ вели́кою пра́здникꙋ представлѧ́юще. Сегѡ́ же ра́ди мню̀ и҆ самарѧны́ни по не́мъ пра́здникꙋ пра́зднꙋетсѧ, занѐ и҆ та́мѡ ѡ҆ мессі́и хрⷭ҇тѣ̀ мнѡ́гаѧ сказа́шасѧ, и҆ ѡ҆ водѣ̀ и҆ ѡ҆ жа́жди, ꙗ҆́коже здѣ̀ во є҆ѵⷢ҇лі́стѣ і҆ѡа́ннѣ, слѣпа́гѡ па́че самарѧны́ни предлежи́тъ. Неизче́тною ми́лостїю твое́ю хрⷭ҇тѐ бж҃е на́шъ, поми́лꙋй на́съ. а҆ми́нь.
Пѣ́снь з҃.
І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Крѣ́постїю сп҃се сме́ртнꙋю разо́рь си́лꙋ, стезю̀ жи́зни показа́лъ є҆сѝ человѣ́кѡмъ, бл҃года́рнѡ тебѣ̀ зовꙋ́щымъ бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Пло́ть носѧ́ща ви́дѧще, не разꙋмѣ́ша собо́ри є҆вре́йстїи сло́ве тѧ̀ бж҃їи: но мы̀ тебѐ воспѣва́емъ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Бг҃оро́диченъ:
Вы́шнѧгѡ ѡ҆свѧще́нное бж҃е́ственное селе́нїе, ра́дꙋйсѧ! тобо́ю бо даде́сѧ ра́дость бцⷣе, вопїю́щымъ: бл҃гослове́на ты̀ въ жена́хъ є҆сѝ, пренепоро́чнаѧ влⷣчце.
И҆́нъ. І҆рмо́съ: Халде́йскаѧ пе́щь:
Пло́тски потрꙋди́лсѧ є҆сѝ, ᲂу҆покое́нїе всѣ́хъ: во́лею вжада́лсѧ є҆сѝ, и҆сто́чниче чꙋде́съ: воды̀ проси́лъ є҆сѝ, во́дꙋ жи́зни і҆и҃се возвѣща́ѧй.
Самарѧны́ни гдⷭ҇и женѣ̀ бесѣ́довалъ є҆сѝ, ѡ҆блича́ѧ безꙋ́мїе беззако́нныхъ є҆вре́євъ: ѻ҆на̀ ᲂу҆́бѡ вѣ́рова сн҃а бы́ти бж҃їѧ, сі́и же ѿверго́шасѧ. <<ри҃і: 235>>
Во́дꙋ живꙋ́ю и҆стека́ющꙋю, во́дꙋ безсме́ртїѧ, и҆сто́чникъ присноживꙋ́щїй пода́ти ѡ҆бѣща́лъ є҆сѝ, вѣ́рою дх҃ъ тво́й прїе́млющымъ сп҃се, ѿ ѻ҆ц҃а̀ происходѧ́щїй.
Пѧтьмѝ хлѣ́бы препита́лъ є҆сѝ, ты́сѧщы а҆́лчꙋщихъ, и҆ насыще́нїѧ ѡ҆ста́нки, въ дрꙋгі̑ѧ ты́сѧщы сп҃се ᲂу҆мно́жилъ є҆сѝ, показꙋ́ѧ сла́вꙋ твою̀ сщ҃є́ннымъ ᲂу҆ченикѡ́мъ.
Ꙗ҆ды́й тѣ́ло твоѐ, жи́въ бꙋ́детъ во вѣ́ки, и҆ пїѧ́й кро́вь твою̀, въ тебѣ̀ пребꙋ́детъ сп҃се мо́й, и҆ ты̀ въ не́мъ пребыва́еши, и҆ воскреси́ши є҆го̀ въ послѣ́днее мгнове́нїе.
Оу҆диви́лъ є҆сѝ влⷣко твоѐ смотре́нїе, ᲂу҆вѣ́ривъ чꙋдесы̀ бж҃е́ственнꙋю вла́сть, недꙋ́ги и҆згна́лъ є҆сѝ, мє́ртвыѧ воскреси́лъ є҆сѝ, и҆ слѣпы̑ѧ просвѣти́лъ є҆сѝ ꙗ҆́кѡ бг҃ъ.
Прокажє́нныѧ ѡ҆чи́стилъ є҆сѝ, хромы̑ѧ и҆спра́вилъ є҆сѝ, разсла́блєнныѧ стѧгнꙋ́лъ є҆сѝ, кровоточи́вꙋю и҆сцѣли́вый: ше́ствовалъ є҆сѝ по пꙋчи́нѣ, показа́въ сла́вꙋ твою̀ свѧщє́ннымъ ᲂу҆ченикѡ́мъ.
Сла́ва, трⷪ҇ченъ:
Покланѧ́емсѧ твоемꙋ̀ гдⷭ҇и пречи́стомꙋ ѻ҆ц҃ꙋ̀, и҆ бл҃года́ти дх҃а, ю҆́же твои̑мъ а҆по́столѡмъ бг҃ъ сы́й разда́вый, посыла́ѧ и҆́хъ на про́повѣдь.
И҆ ны́нѣ: бг҃оро́диченъ:
Во чре́вѣ твое́мъ вмѣсти́ла є҆сѝ невмѣсти́маго сло́ва, ѿ твои́хъ сосє́цъ дои́ла є҆сѝ мі́рꙋ пита́телѧ, на ѡ҆б̾ѧ́тїи носи́ла є҆сѝ содержи́телѧ на́шего, бг҃ороди́тельнице чи́стаѧ.
Катава́сїа: Халде́йскаѧ пе́щь, ѻ҆гне́мъ распала́емаѧ, ѡ҆роша́шесѧ дх҃омъ, бж҃їимъ предстоѧ́нїемъ, ѻ҆́троцы поѧ́хꙋ: бл҃гослове́нъ є҆сѝ бж҃е ѻ҆ц҃ъ на́шихъ. <<ри҃і ѡ҆б.: 236>>
Пѣ́снь и҃.
І҆рмо́съ: Рꙋцѣ̀ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тели ѻ҆́троцы взыва́юще: бл҃гослови́те всѧ̀ дѣла̀ гдⷭ҇нѧ гдⷭ҇а.
Красе́нъ и҆з̾ гро́ба воста́въ, бжⷭ҇тва̀ сла́вою ᲂу҆кра́шенъ, а҆по́столѡмъ твои̑мъ гдⷭ҇и ꙗ҆ви́лсѧ є҆сѝ, дх҃а ѡ҆бѣща́ѧсѧ тѣ̑мъ посла́ти дѣ́йство, вопїю́щымъ: блгⷭ҇ви́те всѧ̀ дѣла̀ гдⷭ҇нѧ гдⷭ҇а.
Оу҆мертви́въ а҆́да ꙗ҆́кѡ бг҃ъ живонача́льнѣйшїй, всѣ̑мъ и҆сточи́лъ є҆сѝ живо́тъ вѣ́чный, є҆го́же ны́нѣ воѡбража́ютъ ꙗ҆́вственнѣе, свѣтоно́сныхъ дне́й си́хъ ра́дости, вопїю́щымъ: бл҃гослови́те всѧ̀ дѣла̀ гдⷭ҇нѧ гдⷭ҇а.
Лꙋчы̀, ꙗ҆́кѡ сл҃нце хрⷭ҇тѐ пра́вды ꙗ҆ви́всѧ, мі́рꙋ посла́лъ є҆сѝ а҆по́столы твоѧ̑, носѧ́щыѧ тебѐ свѣ́тъ непостижи́мый, и҆ невѣ́дѣнїѧ мглꙋ̀ ѡ҆чища́ющыѧ и҆ вопїю́щыѧ: бл҃гослови́те всѧ̀ дѣла̀ гдⷭ҇нѧ гдⷭ҇а.
Бг҃оро́диченъ:
Сѐ ны́нѣ ѡ҆скꙋдѣ̀ ꙗ҆́вѣ ѿ і҆ꙋ́дина пле́мене кнѧ́зь и҆ во́ждь: ты́ бо всенепоро́чнаѧ родила̀ є҆сѝ, пре́жде ѡ҆бѣща́нное ча́ѧнїе ꙗ҆зы́кѡвъ, хрⷭ҇та̀ бг҃а, є҆мꙋ́же пое́мъ: бл҃гослови́те всѧ̀ дѣла̀ гдⷭ҇нѧ гдⷭ҇а.
И҆́нъ. І҆рмо́съ: А҆́гг҃ли и҆ небеса̀, на престо́лѣ:
Прїиди́те ви́дите лю́дїе, на престо́лѣ сла́вы воспѣва́емаго, ѿ люде́й беззако́нныхъ хꙋ́лимаго, и҆ ви́дѧще по́йте въ проро́цѣхъ мессі́ю предрече́ннаго.
Ты̀ є҆сѝ вои́стиннꙋ хрⷭ҇то́съ, въ мі́ръ се́й прише́дый, и҆з̾ негѡ́же спасе́нїе и҆ ѡ҆ставле́нїе ѻ҆те́ческихъ <<рѳ҃і: 237>> согрѣше́нїй: ты̀ є҆сѝ вои́стиннꙋ живо́тъ, въ тѧ̀ вѣ́ровавшымъ.
Премꙋ́дрость бж҃їѧ, преполови́вшꙋсѧ пра́здникꙋ, ꙗ҆́коже пи́сано є҆́сть, во свѧти́лищи предста̀ и҆ ᲂу҆ча́ше, ꙗ҆́кѡ вои́стиннꙋ се́й бѧ́ше мессі́а хрⷭ҇то́съ, и҆́мже спасе́нїе.
Въ сꙋббѡ́тахъ хрⷭ҇то́съ, и҆ по всѧ̑ днѝ пока́зоваше зна́менїй дѣла̀, и҆сцѣлѧ́ѧ сꙋ́щыѧ въ недꙋ́зѣхъ разли́чныхъ: но прельще́ннїи лю́дїе ꙗ҆́ростїю распыха́хꙋсѧ.
Разсла́бленнаго, глаго́летъ, въ лѣ́тѣхъ же мно́зѣхъ лежа́щаго, въ сꙋббѡ́тꙋ се́й и҆сцѣлѝ, и҆ престꙋпѝ зако́нъ, і҆ꙋдє́и хрⷭ҇та̀ го́рькѡ ᲂу҆корѧ́хꙋ.
Не мѡѷсе́й ли ва́мъ зако́нъ да́вый, повелѣва́етъ ѡ҆брѣ́затисѧ, и҆ въ сꙋббѡ́тꙋ мꙋ́жа ѡ҆брѣ́зꙋете, да не ка́кѡ зако́нъ ѻ҆те́ческїй разори́тсѧ, хрⷭ҇то́съ і҆ꙋде́ємъ глаго́лаше.
Неблагода́рни всегда̀ въ пꙋсты́ни жи́вшїи, благодѣ́телѧ за́вистїю прогнѣ́вахꙋ, хꙋ́лѧще, дви́жꙋще непра́вєдныѧ ѧ҆зы́ки, тщє́тнымъ поꙋча́ющесѧ.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Є҆ди́нъ бг҃ъ ᲂу҆́бѡ трⷪ҇ца, ѻ҆ц҃ꙋ̀ не престꙋпи́вшꙋ въ сыновство̀, нижѐ сн҃ꙋ прело́жшꙋсѧ во и҆схожде́нїе: но сво́йтвєннаѧ и҆ ѻ҆боѧ̑, свѣ́тъ бг҃а, трѝ прославлѧ́ю во вѣ́къ.
Бг҃оро́диченъ:
Ка́кѡ родила̀ є҆сѝ, рцы̀, ѿ ѻ҆ц҃а̀ безлѣ́тнѡ просїѧ́вшаго, и҆ со ст҃ы́мъ дх҃омъ воспѣва́емаго; и҆лѝ ꙗ҆́кѡ вѣ́сть є҆ди́нъ благоволи́вый и҆з̾ тебѐ роди́тисѧ, бцⷣе.
Та́же: Хва́лимъ, благослови́мъ:
Катава́сїа: А҆́гг҃ли и҆ небеса̀ на престо́лѣ сла́вы сѣдѧ́щаго, <<рѳ҃і ѡ҆б.: 238>> и҆ ꙗ҆́кѡ бг҃а непреста́ннѡ сла́вимаго, бл҃гослови́те, по́йте и҆ превозноси́те во всѧ̀ вѣ́ки.
Честнѣ́йшꙋю: не стїхосло́витсѧ.
Пѣ́снь ѳ҃.
І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебѐ дв҃о, краеꙋго́льный ѿсѣче́сѧ хрⷭ҇то́съ, совокꙋпи́вый разстоѧ́щаѧсѧ є҆стества̀ тѣ́мъ веселѧ́щесѧ, тѧ̀ бцⷣе велича́емъ.
Но́вомꙋ и҆ чи́стомꙋ жи́тельствꙋ, ѿ хрⷭ҇та̀ наꙋчи́вшесѧ, сїѐ да́же до конца̀ сохрани́ти поле́знѡ всѝ потщи́мсѧ ꙗ҆́кѡ да ст҃а́гѡ дх҃а прише́ствїе воспрїи́мемъ.
Ты̀ моѐ сме́ртное жизнода́вче, ѡ҆бложе́нїемъ безсме́ртїѧ, и҆ нетлѣ́нїѧ благода́тїю ѡ҆бле́къ сп҃се, совоскреси́лъ є҆сѝ, и҆ ѻ҆ц҃ꙋ̀ приве́лъ є҆сѝ, вре́меннꙋю мою̀ разрꙋши́въ бра́нь.
Въ небе́сное па́ки житїѐ зва́ни бы́вше, хода́тайства си́лою и҆стощи́вшагѡсѧ да́же и҆ до ра́бїѧ ѻ҆́браза, и҆ на́съ возне́сшагѡ, сего̀ досто́йнѡ возвели́чимъ.
Бг҃оро́диченъ:
Ꙗ҆́кѡ ко́рень, и҆сто́чникъ и҆ винꙋ̀ нетлѣ́нїѧ, тебѐ дв҃о всѝ вѣ́рнїи ᲂу҆вѣ́дѣвше, похвала́ми почита́емъ: ты́ бо ѵ҆поста́сное безсме́ртїе на́мъ и҆сточи́ла є҆сѝ.
И҆́нъ. І҆рмо́съ: Чꙋ́жде ма́терємъ дѣ́вство:
Пра́здникꙋ преполовлѧ́ющꙋсѧ і҆ꙋде́йскомꙋ, возше́лъ є҆сѝ сп҃се мо́й во свѧти́лище твоѐ, и҆ наꙋча́лъ є҆сѝ всѣ́хъ чꙋдѧ́хꙋсѧ же і҆ꙋде́є, и҆ ѿкꙋ́дꙋ се́й вѣ́сть пи́смена не наꙋчи́всѧ, глаго́лахꙋ.
И҆сцѣлє́нїѧ дарова́нїй и҆зба́витель мо́й и҆сточа́ѧ, сотворѧ́ше чꙋдеса̀ и҆ зна́мєнїѧ, прогонѧ̀ недꙋ́ги, цѣлѧ̀ <<р҃к: 239>> немощствꙋ́ющыѧ: но і҆ꙋде́є неи́стовствовахꙋсѧ мно́жествомъ чꙋде́съ є҆гѡ̀.
Непокори̑выѧ і҆ꙋдє́и и҆зба́витель мо́й ѡ҆блича́ѧ, вопїѧ́ше: не сꙋди́те на лицѐ, но пра́веденъ сꙋ́дъ сꙋди́те: и҆́бо зако́нъ и҆ въ сꙋббѡ́тꙋ ѡ҆брѣ́зоватисѧ повелѣва́етъ всѧ́комꙋ человѣ́кꙋ.
Бѡ́льшаѧ чꙋде́съ ᲂу҆ченикѡ́мъ твои́мъ сп҃се, ꙗ҆́коже ѡ҆бѣща́въ пода́лъ є҆сѝ, посла́въ въ ꙗ҆зы́ки проповѣ́дати сла́вꙋ твою̀: ѻ҆ни́ же мі́рови проповѣ́дахꙋ твоѐ воскресе́нїе, бл҃года́ть и҆ воплоще́нїе.
А҆́ще человѣ́ка ѡ҆брѣ́зꙋете въ сꙋббѡ́тꙋ, да не ка́кѡ разори́тсѧ зако́нъ: ны́нѣ на мѧ̀ что̀ гнѣ́ваетесѧ, ꙗ҆́кѡ человѣ́ка всего̀ здра́ва сотвори́хъ сло́вомъ; по пло́ти вы̀ сꙋ́дите, глаго́летъ і҆ꙋде́ємъ хрⷭ҇то́съ.
Сꙋхꙋ́ю и҆сцѣли́вый рꙋ́кꙋ сло́вомъ, и҆зсо́хшꙋю дре́вле зе́млю моегѡ̀ се́рдца, и҆сцѣли́въ сло́ве, покажи́ мѧ плодоно́сна, да содѣ́лаю и҆ а҆́зъ сп҃се, плоды̀ въ покаѧ́нїи те́плѣ.
Прокаже́нное моѐ се́рдце ѡ҆чи́стивъ, и҆ дꙋшѝ моеѧ̀ сло́ве ѻ҆́чи просвѣти́вый, на ѻ҆дрѣ̀ болѣ́зни мѧ̀ лежа́ща и҆спра́ви, ꙗ҆́коже разсла́бленнаго возста́вилъ є҆сѝ на ѻ҆дрѣ̀ лежа́щаго.
Сла́ва: трⷪ҇ченъ:
Чꙋ́жде є҆́сть беззакѡ́ннымъ сла́вити безнача́льнꙋю трⷪ҇цꙋ, ѻ҆ц҃а̀, и҆ сн҃а же, и҆ ст҃а́го дх҃а, несозда́нное вседержа́нїе, и҆́мже ве́сь мі́ръ созда́сѧ держа́вою крѣ́пости є҆ѧ̀.
И҆ ны́нѣ: бг҃оро́диченъ:
Вмѣсти́ла є҆сѝ во чре́вѣ твое́мъ дв҃о мт҃и, є҆ди́наго <<р҃к ѡ҆б.: 240>> ѿ трⷪ҇цы хрⷭ҇та̀ жизнода́вца, є҆го́же пое́тъ всѧ̀ тва́рь, и҆ трепе́щꙋтъ го́рнїи престо́ли: того̀ молѝ всеблаже́ннаѧ, спастѝ дꙋ́шы на́шѧ.
Катава́сїа: Чꙋ́жде ма́терємъ дѣ́вство, и҆ стра́нно дѣ́вамъ дѣторожде́нїе: на тебѣ̀ бцⷣе, ѻ҆боѧ̑ ᲂу҆стро́ишасѧ. тѣ́мъ тѧ̀ всѧ̑ племена̀ земна̑ѧ непреста́ннѡ велича́емъ.
Є҆ѯапостїла́рїй. Подо́бенъ: Не́бо ѕвѣзда́ми:
Ча́шꙋ и҆мѣ́ѧй неистощи́мыхъ дарѡ́въ, да́ждь мѝ почерпстѝ во́дꙋ во ѡ҆ставле́нїе грѣхѡ́въ, ꙗ҆́кѡ содержи́мь є҆́смь жа́ждею, бл҃гоꙋтро́бне є҆ди́не ще́дре. [Три́жды].
На хвали́техъ, Всѧ́кое дыха́нїе: поста́вимъ стїхѝ д҃. и҆ пое́мъ подо́бны пра́здника г҃, повторѧ́юще а҃, гла́съ д҃.
Подо́бенъ: Ꙗ҆́кѡ до́блѧ:
Премꙋ́дрость, и҆ си́ла, ѻ҆́ч҃ее сїѧ́нїе, сло́во присносꙋ́щное и҆ сн҃ъ бж҃їй, во свѧти́лище прїи́де пло́тїю, и҆ ᲂу҆ча́ше і҆ꙋдє́йскїѧ лю́ди, жестѡ́кїѧ и҆ неблагода̑рныѧ, и҆ ᲂу҆дивлѧ́хꙋсѧ премꙋ́дрости бога́тствꙋ, вопїю́ще: ѿкꙋ́дꙋ вѣ́сть писмена̀, ни ѿ когѡ́же ᲂу҆чи́всѧ; [Два́жды.]
Кни́жникѡмъ затыка́ше ᲂу҆ста̀, і҆ꙋдє́и ѡ҆блича́ше мессі́а гдⷭ҇ь, вопїѧ̀ къ ни́мъ: не на лицѐ законопрестꙋ̑пницы, ꙗ҆́кѡ непра́веднїи сꙋди́те, въ сꙋббѡ́тꙋ бо а҆́зъ разсла́бленнаго воздви́гнꙋхъ. тѣ́мже гдⷭ҇ь сꙋббѡ́ты є҆́смь и҆ зако́на, что̀ и҆́щете менѐ ᲂу҆би́ти, ᲂу҆ме́ршыѧ воздви́гшаго;
Навꙋѳе́а ка́менїемъ поби́ша, лю́тїи и҆ законопрестꙋ́пнїи, і҆ꙋде́йское собра́нїе неблагода́рное: и҆са́їю же пило́ю древѧ́ною растро́ша, въ ка́лъ мꙋ́драго і҆еремі́ю вверго́ша, гдⷭ҇а же на крⷭ҇тъ возне́сше взыва́хꙋ: хра́мъ разорѧ́ѧй, спасѝ себѐ, и҆ ᲂу҆вѣ́рꙋемъ. <<рк҃а: 241>>
Сла́ва, и҆ ны́нѣ, гла́съ д҃. А҆нато́лїа.
Просвѣти́вшесѧ бра́тїе, воскресе́нїемъ сп҃са хрⷭ҇та̀, и҆ дости́гше преполове́нїѧ пра́здника влⷣчнѧ, прїи́скреннѡ сохрани́мъ за́пѡвѣди бж҃їѧ, да досто́йни бꙋ́демъ и҆ вознесе́нїе пра́здновати, и҆ прише́ствїе полꙋчи́ти ст҃а́гѡ дх҃а.
Славосло́вїе вели́кое. По трист҃о́мъ тропа́рь пра́здника. Є҆ктєнїѝ, и҆ ѿпꙋ́стъ. И҆ ча́съ а҃-й.
На лїтꙋргі́и блажє́нна ѿ канѡ́на пра́здника, д҃- гѡ гла́са, пѣ́снь г҃ на д҃, и҆ и҃-гѡ гла́са, пѣ́снь ѕ҃ на д҃. По вхо́дѣ тропа́рь пра́здника. Сла́ва, и҆ ны́нѣ: Конда́къ. Прокі́менъ, гла́съ г҃. Ве́лїй гдⷭ҇ь на́шъ, и҆ ве́лїѧ крѣ́пость є҆гѡ̀, и҆ ра́зꙋма є҆гѡ̀ нѣ́сть числа̀. И҆ до ѿда́нїѧ. Сті́хъ: Хвали́те гдⷭ҇а ꙗ҆́кѡ бла́гъ ѱало́мъ: бг҃ови на́шемꙋ да ᲂу҆слади́тсѧ хвале́нїе. А҆по́столъ дѣѧ́нїй, зача́ло л҃д: Па́ѵелъ и҆ варна́ва прибѣго́ста во гра́ды лѷкао́нскїѧ: А҆ллилꙋ́їа, гла́съ а҃: Помѧнѝ со́нмъ тво́й, є҆го́же стѧжа́лъ є҆сѝ и҆спе́рва. Сті́хъ: Бг҃ъ же цр҃ь на́шъ пре́жде вѣ́ка, содѣ́ла спасе́нїе посредѣ̀ землѝ. Є҆ѵⷢ҇лїе і҆ѡа́нна, зача́ло к҃ѕ: Въ преполове́нїе пѧтдесѧ́тницы: На лїтꙋргі́и пое́мъ и҆ на ѿда́нїе преполове́нїѧ, вмѣ́стѡ Досто́йно, і҆рмо́съ: Чꙋ́жде ма́терємъ дѣ́вство: [Въ про́чыѧ же днѝ пое́мъ. Свѣти́сѧ: и҆ до ѿда́нїѧ.] Прича́стенъ: Ꙗ҆ды́й мою̀ пло́ть, и҆ пїѧ́й мою̀ кро́вь, во мнѣ̀ пребыва́етъ, и҆ а҆́зъ въ не́мъ, речѐ гдⷭ҇ь. А҆ллилꙋ́їа, три́жды. На трапе́зѣ ᲂу҆тѣше́нїе бра́тїи.
Пра́зднꙋетсѧ же се́й пра́здникъ дне́й и҃. <<рк҃а ѡ҆б.: 242>>
Въ сре́дꙋ преполове́нїѧ ве́чера,
ѻ҆бы́чнаѧ каѳі́сма.
На Гдⷭ҇и воззва́хъ: стїхи̑ры пра́здника г҃, гла́съ д҃.
Подо́бенъ: Зва́нный свы́ше:
Предразори́вый держа́вꙋ сме́рти хрⷭ҇тѐ, сме́ртїю твое́ю, жи́знь пода́лъ є҆сѝ человѣ́кѡмъ, въ сла́вномъ воста́нїи твое́мъ, совоздви́гнꙋвый ро́дъ человѣ́ческїй, снизхожде́нїемъ твои́мъ. тѣ́мже благода́рственнꙋю хвалꙋ̀ тебѐ пое́мъ, пра́здникъ пра́зднꙋюще тридне́внагѡ и҆ свѣтоно́снагѡ твоегѡ̀ воскресе́нїѧ, во́ньже преполове́нїе всечестны́хъ ны́нѣ дні́й на́мъ всѣ̑мъ просїѧ̀, і҆и҃се жизнода́вче, бл҃годѣ́телю дꙋ́шъ на́шихъ.
Пре́жде честна́гѡ крⷭ҇та̀ твоегѡ̀, и҆ стрⷭ҇ти, чꙋде́съ пресла̑внаѧ соверша́ѧй въ лю́дехъ, ꙗ҆́коже пи́сано є҆́сть посредѣ̀ пра́здника зако́ннагѡ ста́лъ є҆сѝ хрⷭ҇тѐ всеси́льне, и҆ всѣ̑мъ возопи́лъ є҆сѝ: а҆́ще кто̀ жа́ждетъ, ко мнѣ̀ самохо́тнѣ да прихо́дитъ, и҆ воды̀ бж҃е́ственныѧ пи́во да почерпе́тъ, и҆ жи́знєнныѧ во́ды: жи́зни бо во́дꙋ и҆ си̑лы премꙋ́дрости а҆́зъ всѣ̑мъ подаю̀, ꙗ҆́кѡ хотѧ̀ человѣ́кѡмъ ᲂу҆подо́бихсѧ, ꙗ҆́кѡ чл҃вѣколю́бецъ.
Ꙗ҆́кѡ на ѻ҆дрѣ́ мѧ лежа́ща болѣ́зни, согрѣше́нїй мои́хъ, хрⷭ҇тѐ многоми́лостиве, и҆ разсла́блена ᲂу҆десы̀, ꙗ҆́кѡ за вели́кꙋю человѣколю́бїѧ пꙋчи́нꙋ, человѣ́къ во́лею бы́въ, ны́нѣ неви́димѡ мѧ̀ ꙗ҆́коже разсла́бленнаго воздви́гни, и҆ стезѧ́ми бж҃е́ственныхъ за́повѣдей твои́хъ <<рк҃в: 243>> тещѝ благопоспѣшѝ: и҆́же пре́жде стра́сти, лю́демъ сп҃се є҆вре́йскимъ, чꙋде́съ мно́жествы предстоѧ̀, ꙗ҆́кѡ бг҃ъ сы́й во́лею стра́ждеши пло́тїю.
И҆ мине́и г҃. Сла́ва: ст҃а́гѡ, а҆́ще є҆́сть: а҆́ще ли нѝ,
Сла́ва, и҆ ны́нѣ: пра́здника, гла́съ в҃:
Є҆гда̀ прише́лъ є҆сѝ во свѧти́лище хрⷭ҇тѐ бж҃е, преполови́вшꙋсѧ пра́здникꙋ, тогда̀ лю́ди ᲂу҆чи́лъ є҆сѝ, вопїѧ̀: вѣ́рꙋѧй въ мѧ̀, а҆́ще и҆ ᲂу҆́мретъ, жи́въ бꙋ́детъ. і҆ꙋде́є распыха́хꙋсѧ, съ фарїсе́и и҆ саддꙋке́и и҆ кни́жники, глаго́люще: кто́ є҆́сть се́й, и҆́же глаго́летъ хꙋлы̀; не помышлѧ́юще, ꙗ҆́кѡ ты̀ є҆сѝ пре́жде всѣ́хъ вѣ̑къ, со ѻ҆ц҃е́мъ и҆ дх҃омъ сла́вимый: бж҃е на́шъ, сла́ва тебѣ̀.
Прокі́менъ днѐ.
На стїхо́внѣ стїхи́ра воскре́сна, гла́съ г҃:
Стра́стїю твое́ю хрⷭ҇тѐ, ѡ҆мрачи́вый со́лнце, и҆ свѣ́томъ твоегѡ̀ воскресе́нїѧ, просвѣти́вый всѧ́чєскаѧ, прїимѝ на́шꙋ вече́рнюю пѣ́снь чл҃вѣколю́бче.
Сті́хъ: Къ тебѣ̀ возведо́хъ ѻ҆́чи моѝ:
Стїхи́ра а҆по́стольскаѧ: Во всю̀ зе́млю и҆зы́де вѣща́нїе ва́ше ст҃і́и а҆пⷭ҇ли, і҆́дѡльскꙋю пре́лесть разори́сте, бг҃оразꙋ́мїе проповѣ́давше: се́й до́брый по́двигъ ва́шъ є҆́сть блаже́ннїи. тѣ́мже пое́мъ и҆ славосло́вимъ ва́шѧ па̑мѧти.
Сті́хъ: Поми́лꙋй на́съ гдⷭ҇и, поми́лꙋй на́съ:
Мꙋ́чениченъ: Мꙋ́чєницы твоѝ гдⷭ҇и, вѣ́рою ᲂу҆тве́рждшесѧ, наде́ждею ᲂу҆крѣпи́вшесѧ, любо́вїю крⷭ҇та̀ твоегѡ̀ дꙋше́внѡ соедини́вшесѧ, вра́жїе мꙋчи́тельство разрꙋши́ша, и҆ ᲂу҆лꙋчи́вше вѣнцы̀, со безпло́тными мо́лѧтсѧ ѡ҆ дꙋша́хъ на́шихъ. <<рк҃в ѡ҆б.: 244>>
Сла́ва, и҆ ны́нѣ: гла́съ г҃. Ге́рмана:
Преполови́вшꙋсѧ пра́здникꙋ, сла́вимъ посредѣ̀ землѝ спасе́нїе содѣ́лавшаго. посредѣ̀ ᲂу҆́бѡ двою̀ разбѡ́йникꙋ, живо́тъ на дре́вѣ ви́сѧше, и҆ хꙋ́лѧщемꙋ ᲂу҆́бѡ молча́ше, вѣ́рꙋющемꙋ же вопїѧ́ше: дне́сь со мно́ю бꙋ́деши въ раѝ. сни́де во гро́бъ, плѣнѝ а҆́да, и҆ воскре́се тридне́венъ, спаса́ѧй дꙋ́шы на́шѧ.
Тропа́рь ст҃а́гѡ, а҆́ще є҆́сть: а҆́ще ли нѝ, то́чїю пра́здника.
Є҆ктенїа̀, и҆ ѿпꙋ́стъ.
Въ четверто́къ д҃-ѧ седми́цы по па́сцѣ, на ᲂу҆́трени,
на Бг҃ъ гдⷭ҇ь: тропа́рь пра́здника три́жды.
По а҃-мъ стїхосло́вїи сѣда́ленъ, гла́съ г҃.
Подо́бенъ: Красотѣ̀ дѣ́вства:
Всѧ̑ человѣ̑ческаѧ воспрїи́мъ, всѧ̑ на́ша присво́ивъ, на крⷭ҇тѣ̀ пригвозди́тисѧ благоволи́лъ є҆сѝ тво́рче мо́й, сме́рть и҆зво́ливый претерпѣ́ти ꙗ҆́кѡ человѣ́къ, да человѣ́чество ѿ сме́рти и҆зба́виши ꙗ҆́кѡ бг҃ъ. тѣ́мже ꙗ҆́кѡ жизнода́вцꙋ вопїе́мъ тѝ: сла́ва хрⷭ҇тѐ воскресе́нїю твоемꙋ̀.
Сті́хъ: Во всю̀ зе́млю и҆зы́де вѣща́нїе и҆́хъ:
А҆по́стѡлъ твои́хъ па́мѧть гдⷭ҇и, ᲂу҆ѧсни́лъ є҆сѝ ꙗ҆́кѡ всеси́ленъ, занѐ ᲂу҆крѣпи́лъ є҆сѝ и҆̀хъ, стра̑сти твоѧ̑ подража́ти: побѣди́ша мꙋ́жески велїа́ровꙋ си́лꙋ, тѣ́мже и҆ прїѧ́ша и҆сцѣле́нїй дарова̑нїѧ. тѣ́хъ моли́твами чл҃вѣколю́бче, ми́ръ пода́ждь лю́демъ твои́мъ. <<рк҃г: 245>>
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мꙋ́чениченъ: Ѡ҆бле́кшесѧ во всеѻрꙋ́жїе хрⷭ҇то́во, и҆ ѡ҆дѣ́ѧвшесѧ во ѻ҆рꙋ́жїе вѣ́ры, ѡ҆полчє́нїѧ вра̑жїѧ мꙋ́жески низложи́сте: ᲂу҆се́рднѡ бо наде́ждею жи́зни, претерпѣ́сте всѧ̑ мꙋчи́телей прещє́нїѧ же и҆ ра̑ны. тѣ́мже и҆ вѣнцы̀ прїѧ́сте, мꙋ́чєницы хрⷭ҇то́вы, терпѣливодꙋ́шнїи.
Сла́ва, и҆ ны́нѣ: бг҃оро́диченъ:
Проро́цы проповѣ́даша, а҆по́столи наꙋчи́ша, мꙋ́чєницы и҆сповѣ́даша, и҆ мы̀ вѣ́ровахомъ, бцⷣꙋ тѧ̀ вои́стиннꙋ ст҃ꙋ́ю. тѣ́мже и҆ велича́емъ ржⷭ҇тво̀ твоѐ несказа́нное.
По в҃-мъ стїхосло́вїи сѣда́ленъ, гла́съ и҃.
Подо́бенъ: Премꙋ́дрости сло́ва:
Стоѧ̀ посредѣ̀ ст҃и́лища, преполовлѧ́ющꙋсѧ бж҃е́ственнѡ пра́здникꙋ, жа́ждай, взыва́лъ є҆сѝ, да грѧде́тъ ко мнѣ̀ и҆ пїе́тъ: пїѧ́й бо ѿ сеѧ̀ бж҃е́ственныѧ моеѧ̀ воды̀, рѣ́ки и҆з̾ чре́ва и҆сточи́тъ велѣ́нїй мои́хъ, а҆ и҆́же вѣ́рꙋетъ въ мѧ̀, по́сланнаго ѿ бж҃е́ственнагѡ роди́телѧ, со мно́ю просла́витсѧ. сегѡ̀ ра́ди вопїе́мъ тѝ: сла́ва тебѣ̀ хрⷭ҇тѐ бж҃е, ꙗ҆́кѡ бога́тнѡ и҆злїѧ́лъ є҆сѝ во́ды твоегѡ̀ человѣколю́бїѧ рабѡ́мъ твои́мъ. [Два́жды].
Воскресе́нїе хрⷭ҇то́во: Ѱало́мъ н҃. Канѡ́нъ пра́здника со і҆рмосы̀ на и҃: и҆ мине́и на д҃. Конда́къ и҆ є҆ѯапостїла́рїй пра́здника.
На хвали́техъ стїхи̑ры ѻ҆смогла́сника, гла́съ г҃:
Во свѣ́тѣ твое́мъ влⷣко, ᲂу҆́зримъ свѣ́тъ человѣколю́бче: воскре́слъ бо є҆сѝ и҆з̾ ме́ртвыхъ, спасе́нїе ро́дꙋ человѣ́ческомꙋ да́рꙋѧй, да тѧ̀ тва́рь всѧ̀ славосло́витъ є҆ди́наго безгрѣ́шнаго, поми́лꙋй на́съ. [Два́жды.]
Хрⷭ҇тѡ́вы за́пѡвѣди непоро́чнѡ сохра́ншїи ст҃і́и а҆пⷭ҇ли, <<рк҃г ѡ҆б.: 246>> тꙋ́не прїѧ́сте, тꙋ́не подава́ете, и҆сцѣлѧ́юще стра̑сти дꙋ́шъ и҆ тѣле́съ на́шихъ. тѣ́мже и҆мꙋ́ще дерзнове́нїе, того̀ моли́те, поми́ловатисѧ дꙋша́мъ на́шымъ.
Ꙗ҆́кѡ свѣти̑ла въ мі́рѣ сїѧ́ете, и҆ по сме́рти ст҃і́и мч҃нцы, по́двигомъ до́брымъ подвиза́вшесѧ. тѣ́мже и҆мꙋ́ще дерзнове́нїе, хрⷭ҇та̀ моли́те, поми́ловатисѧ дꙋша́мъ на́шымъ.
Сла́ва, и҆ ны́нѣ, гла́съ д҃:
Гдⷭ҇и, пре́жде честна́гѡ твоегѡ̀ крⷭ҇та̀, пра́здникꙋ преполови́вшꙋсѧ, во ст҃и́лище вше́лъ є҆сѝ, і҆ꙋдє́и со дерзнове́нїемъ ᲂу҆чѧ̀, мѡѷсе́емъ и҆ въ зако́нѣ тобо́ю законоположє́ннымъ, ᲂу҆жаса́ющесѧ же хрⷭ҇тѐ твоеѧ̀ премꙋ́дрости неизрече́нномꙋ та́инствꙋ, є҆́же на тѧ̀ ропта́нїю въ себѣ̀ за́вистїю поꙋча́хꙋсѧ: ка́кѡ се́й вѣ́сть пи́смена не ᲂу҆чи́всѧ; не вѣ́дѧще тебѐ сп҃са дꙋ́шъ на́шихъ.
На стїхо́внѣ стїхи̑ры, и҆́хже краегране́сїе:
Средопѧтдесѧ́тницы. Гла́съ в҃.
Подо́бенъ: До́ме є҆ѵфра́ѳовъ:
Ве́лїй є҆сѝ цр҃ю̀, и҆ ве́лїѧ твоѧ̀ держа́ва: вельмѝ бо ѡ҆бнища́въ, вели́кихъ дарова́нїй вселе́ннꙋю и҆спо́лнилъ є҆сѝ.
Сті́хъ: Помѧнѝ со́нмъ тво́й, є҆го́же стѧжа́лъ є҆сѝ и҆спе́рва.
Ста́лъ є҆сѝ въ хра́мѣ и҆сточа́ѧ твоѧ̑ стрꙋи̑, пра́здникꙋ преполови́вшꙋсѧ, и҆ напаѧ́ѧ жа́ждꙋщыѧ бж҃е́ственною бл҃года́тїю, бл҃гоꙋтро́бне.
Сті́хъ: Бг҃ъ же цр҃ь на́шъ пре́жде вѣ́ка:
Спасти́ мѧ восхотѣ́въ, воплоти́лсѧ є҆сѝ пресла́внѡ ѿ дв҃ы неискꙋсобра́чныѧ, и҆ посредѣ̀ хра́ма твоегѡ̀ благода́ть мнѣ̀ и҆сточи́лъ є҆сѝ. <<рк҃д: 247>>
Сла́ва, и҆ ны́нѣ: гла́съ и҃. І҆ѡа́нна мона́ха:
Преполови́вшꙋсѧ пра́здникꙋ пре́жде стра́сти, и҆ сла́внагѡ воскрⷭ҇нїѧ твоегѡ̀ гдⷭ҇и, бы́лъ є҆сѝ ᲂу҆чѧ̀ бл҃же во ст҃и́лищи непокори̑выѧ і҆ꙋдє́и, и҆ фарїсе́и, и҆ кни́жники, и҆ вопїѧ̀ къ ни́мъ: жа́ждай да грѧде́тъ ко мнѣ̀ и҆ пїе́тъ: вѣ́рꙋѧй въ мѧ̀, воды̀ жи́зни дх҃а бж҃е́ственнагѡ рѣ́ки потекꙋ́тъ ѿ чре́ва є҆гѡ̀: ѽ неизрече́нныѧ премꙋ́дрости твоегѡ̀ хвале́нїѧ! и҆́же всѧ̑ и҆сполнѧ́ѧй бж҃е на́шъ, сла́ва тебѣ̀.
Въ четверто́къ ве́чера,
на Гдⷭ҇и воззва́хъ: стїхи̑ры подо́бны пра́здника, г҃: и҆ мине́и г҃.
Пра́здника, гла́съ є҃. Подо́бенъ: Ра́дꙋйсѧ:
Ꙗ҆ви́сѧ свѣтоѧвле́нное и҆ кра́сное, сп҃сова воскрⷭ҇нїѧ дне́сь преполове́нїе всест҃о́е, ꙗ҆́кѡ полꙋ́дне свѣ́тлое, ᲂу҆ѧснѧ́ющее мі́ръ бж҃е́ственными бл҃года́тьми хрⷭ҇то́ва воста́нїѧ, ѡ҆сїѧва́ющее чꙋдеса̀ нетлѣ́нїѧ, ѡ҆блистава́етъ зна́мєнїѧ, и҆ показꙋ́етъ на высотꙋ̀ вознесе́нїе, ꙗ҆влѧ́етъ многорачи́тельное дх҃а прише́ствїе, пѧтьдесѧ́тницы всечⷭ҇тны́ѧ свѣтлѣ́йшее торжество̀. тѣ́мже и҆ подае́тъ дꙋша́мъ на́шымъ ми́ръ и҆ ве́лїю ми́лость.
Ꙗ҆́кѡ бж҃е́ственныѧ сла́вы рѣка̀, пра́здникꙋ ны́нѣ преполови́вшꙋсѧ, гдⷭ҇ь стрꙋи̑ бл҃гоꙋтро́бїѧ всѣ̑мъ подава́ѧ, вопїе́тъ: жа́ждай да грѧде́тъ ко мнѣ̀, и҆ пїе́тъ те́плѣ. и҆сто́чникъ бо сострада́нїѧ, и҆ ми́лости пꙋчи́на са́мъ сы́й, и҆сточа́етъ мі́рови ѡ҆ставле́нїе, ѡ҆мыва́етъ прегрѣшє́нїѧ, и҆ ѡ҆чища́етъ недꙋ́ги: спаса́етъ воскрⷭ҇нїе є҆гѡ̀ <<рк҃д ѡ҆б.: 248>> пра́зднꙋющихъ, покрыва́етъ любо́вїю почита́ющихъ є҆́же со сла́вою вознесе́нїе є҆гѡ̀, и҆ подае́тъ дꙋша́мъ на́шымъ ми́ръ и҆ ве́лїю ми́лость.
Посредѣ̀ ст҃и́лища ста́въ, неѡпи́санный бг҃ъ же и҆ гдⷭ҇ь: бг҃ъ бо бѧ́ше є҆стество́мъ, а҆́ще и҆ на́съ ра́ди вочеловѣ́чивсѧ, ѡ҆пи́санъ ꙗ҆ви́сѧ тѣ́ломъ, всѣ́мъ и҆сточа́ше животѡ́чныѧ глаго́лы, всѣ̑мъ глаго́лѧ: дꙋ́шы ѡ҆чи́стите, и҆ зно́ѧ страсте́й ѡ҆хлади́те, да не ка́кѡ лиша́тсѧ питїѧ̀ человѣ́цы. бж҃е́ственнꙋю бо благода́ть да́рꙋю, безсме́ртнагѡ и҆ лꙋ́чшагѡ и҆ вы́шнѧгѡ црⷭ҇твїѧ, сопричасти́тисѧ мнѣ̀ созда́телю, и҆ просла́витисѧ.
Сла́ва, и҆ ны́нѣ: гла́съ ѕ҃.
Пра́здникꙋ преполовлѧ́ющꙋсѧ твоегѡ̀ хрⷭ҇тѐ воскресе́нїѧ, и҆ бж҃е́ственнагѡ прише́ствїѧ ст҃а́гѡ твоегѡ̀ дх҃а, сше́дшесѧ чꙋде́съ твои́хъ воспѣва́емъ та̑инства: во́ньже низпослѝ на́мъ ве́лїю ми́лость.
На стїхо́внѣ стїхи̑ры ѻ҆смогла́сника, гла́съ г҃:
Дре́во преслꙋша́нїѧ мі́рови сме́рть возрастѝ, дре́во же крⷭ҇та̀ живо́тъ и҆ нетлѣ́нїе. тѣ́мже тебѣ̀ покланѧ́емсѧ распе́ншемꙋсѧ гдⷭ҇ꙋ, да зна́менаетсѧ на на́съ свѣ́тъ лица̀ твоегѡ̀ гдⷭ҇и.
Сті́хъ: Къ тебѣ̀ возведо́хъ ѻ҆́чи моѝ:
Твои́мъ крⷭ҇то́мъ хрⷭ҇тѐ сп҃се, сме́рти держа́ва разрꙋши́сѧ, и҆ дїа́волѧ пре́лесть ᲂу҆праздни́сѧ: ро́дъ же чл҃вѣ́ческїй вѣ́рою спаса́емый, пѣ́снь тебѣ̀ всегда̀ прино́ситъ.
Сті́хъ: Поми́лꙋй на́съ гдⷭ҇и, поми́лꙋй на́съ:
Мꙋ́чениченъ: Ве́лїѧ крⷭ҇та̀ твоегѡ̀ гдⷭ҇и си́ла: водрꙋзи́ бо сѧ на мѣ́стѣ, и҆ дѣ́йствꙋетъ въ мі́рѣ, и҆ показа̀ ѿ <<рк҃є: 249>> ры́барей а҆пⷭ҇лы, и҆ ѿ ꙗ҆зы̑къ мч҃нки, да мо́лѧтсѧ ѡ҆ дꙋша́хъ на́шихъ.
Сла́ва, и҆ ны́нѣ: гла́съ и҃. І҆ѡа́нна мона́ха:
Преполови́вшꙋсѧ пра́здникꙋ, пре́жде стрⷭ҇ти и҆ сла́внагѡ воскрⷭ҇нїѧ твоегѡ̀ гдⷭ҇и, бы́лъ є҆сѝ ᲂу҆чѧ̀ бл҃же во ст҃и́лищи непокори̑выѧ і҆ꙋдє́и, и҆ фарїсе́и, и҆ кни́жники, и҆ вопїѧ̀ къ ни́мъ: жа́ждай да грѧде́тъ ко мнѣ̀ и҆ пїе́тъ, вѣ́рꙋѧй въ мѧ̀, воды̀ жи́зни, дх҃а бжⷭ҇твеннагѡ рѣ́ки потекꙋ́тъ ѿ чре́ва є҆гѡ̀. ѽ неизрече́нныѧ премꙋ́дрости твоегѡ̀ хвале́нїѧ! и҆́же всѧ̑ и҆сполнѧ́ѧй бж҃е на́шъ, сла́ва тебѣ̀.
Въ пѧто́къ преполове́нїѧ на ᲂу҆́трени,
по а҃-мъ стїхосло́вїи, глаго́лемъ настоѧ́щыѧ сѣда́льны, гла́съ г҃.
Подо́бенъ: Красотѣ̀ дѣ́вства:
Крⷭ҇тъ и҆ сме́рть пострада́ти и҆зво́ливый, средѝ тва́ри се́й водрꙋзи́лъ є҆сѝ: є҆гда̀ бл҃говоли́лъ є҆сѝ сп҃се, тѣ́ло твоѐ пригвозди́ти, тогда̀ и҆ со́лнце лꙋчы̀ скры̀. сїѧ̑ и҆ разбо́йникъ зрѧ̀, на крⷭ҇тѣ̀ тѧ̀ воспѣ̀: помѧни́ мѧ, вопїѧ̀, сп҃се, и҆ вѣ́ровавъ прїѧ́тъ ра́й.
Сті́хъ: Возноси́те гдⷭ҇а бг҃а на́шего:
Непостижи́мое распѧ́тїѧ, и҆ несказа́нное воста́нїѧ бг҃осло́вимъ вѣ́рнїи та́инство неизрече́нное: дне́сь бо сме́рть и҆ а҆́дъ ᲂу҆праздни́сѧ, ро́дъ же человѣ́ческїй въ нетлѣ́нїе ѡ҆блече́сѧ. тѣ́мже благодарѧ́ще вопїе́мъ тѝ: сла́ва хрⷭ҇тѐ воста́нїю твоемꙋ̀.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мꙋ́чениченъ: Благодꙋ́шное терпѣ́нїѧ ва́шегѡ, побѣдѝ кѡ́зни ѕлонача́льнагѡ врага̀, страстоте́рпцы всехва́льнїи. <<рк҃є ѡ҆б.: 250>> сегѡ̀ ра́ди вѣ́чнагѡ сподо́бистесѧ бл҃же́нства: но моли́тесѧ гдⷭ҇ви, хрⷭ҇толюби́выхъ люде́й спастѝ ста́до, мꙋ́чєницы сꙋ́ще и҆́стины.
Сла́ва, и҆ ны́нѣ, крⷭ҇тобг҃оро́диченъ:
Же́злъ си́лы стѧжа́вшїи крⷭ҇тъ сн҃а твоегѡ̀, бцⷣе, тѣ́мъ низлага́емъ врагѡ́въ шата̑нїѧ, любо́вїю тѧ̀ непреста́ннѡ велича́юще.
По в҃-мъ стїхосло́вїи сѣда́ленъ, гла́съ и҃.
Подо́бенъ: Премꙋ́дрости сло́ва:
Премꙋ́дрости во́дꙋ и҆ жи́зни и҆сточа́ѧ мі́рови, всѣ́хъ сп҃се призыва́еши, почерпстѝ спасе́нїѧ во́ды. бжⷭ҇твенный бо зако́нъ тво́й прїи́мъ человѣ́къ, въ себѣ̀ ᲂу҆гаша́етъ пре́лести ᲂу҆́глїе. ѿѻнꙋ́дꙋже во вѣ́ки не вжа́ждетъ, ни преста́нетъ насыще́нїѧ твоегѡ̀, влⷣко цр҃ю̀ пренбⷭ҇ный. сегѡ̀ ра́ди сла́вимъ держа́вꙋ твою̀ хрⷭ҇тѐ бж҃е, прегрѣше́нїй ѡ҆ставле́нїе просѧ́ще, посла́ти бога́тнѡ рабѡ́мъ твои́мъ. [Два́жды.]
Воскрⷭ҇нїе хрⷭ҇то́во: Ѱало́мъ н҃. Канѡ́нъ пра́здника, со і҆рмосы̀ на и҃, и҆ мине́и на д҃. Конда́къ и҆ є҆ѯапостїла́рїй, пра́здника.
На хвали́техъ стїхи̑ры ѻ҆смогла́сника, повторѧ́юще а҃-ю, гла́съ г҃:
За́вистїю сла́дости и҆згна́нъ бы́хъ, паде́нїемъ пады́й лю́тымъ: но не презрѣ́лъ є҆сѝ влⷣко, воспрїи́мъ менѐ ра́ди є҆́же по мнѣ̀ распѧ́тїе, и҆ спаса́еши мѧ̀, въ сла́вꙋ вво́диши мѧ̀, и҆зба́вителю мо́й, сла́ва тебѣ̀.
Прїиди́те всѝ ꙗ҆зы́цы, ᲂу҆разꙋмѣ́йте стра́шныѧ та́йны си́лꙋ: хрⷭ҇то́съ бо сп҃съ на́шъ, є҆́же въ нача́лѣ сло́во, распѧ́тсѧ на́съ ра́ди, и҆ во́лею погребе́сѧ, и҆ воскре́се и҆з̾ ме́ртвыхъ, є҆́же спастѝ всѧ́чєскаѧ: томꙋ̀ поклони́мсѧ. <<рк҃ѕ: 251>>
Мꙋ́чениченъ:
Ст҃ы́хъ страстоте́рпцєвъ па́мѧть, прїиди́те лю́дїе всѝ почти́мъ, ꙗ҆́кѡ позо́ръ бы́вше а҆́гг҃лѡмъ и҆ человѣ́кѡмъ, побѣ́ды вѣне́цъ ѿ хрⷭ҇та̀ прїѧ́ша, и҆ мо́лѧтсѧ ѡ҆ дꙋша́хъ на́шихъ.
Сла́ва, и҆ ны́нѣ: гла́съ и҃:
Преполови́вшꙋсѧ пра́здникꙋ па́схи, въ хра́мъ вше́лъ є҆сѝ свѧти́лищный сп҃се на́шъ, и҆ ста́въ посредѣ̀ наро́да, ᲂу҆чи́лъ є҆сѝ тѣ́хъ со дерзнове́нїемъ, и҆ глаго́лалъ є҆сѝ: а҆́зъ є҆́смь свѣ́тъ мі́ра, въ слѣ́дъ менѐ и҆ды́й не и҆́мать ходи́ти во тмѣ̀, но и҆мѣ́ти бꙋ́детъ свѣ́тъ безсме́ртныѧ жи́зни.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Ве́сь съ бг҃омъ сло́ве ты̀ сы́й, погиба́юща мѧ̀ хотѧ̀ и҆з̾ѧ́ти прегрѣше́нїй, соединѧ́ешисѧ мнѣ̀ человѣколю́бче.
Сті́хъ: Помѧнѝ со́нмъ тво́й:
Преста̀ сѣ́нь: се́ бо мессі́а посредѣ̀ пра́здника, бл҃года́ть ꙗ҆́коже дрꙋгꙋ́ю денни́цꙋ ѡ҆блиста̀.
Сті́хъ: Бг҃ъ же цр҃ь на́шъ пре́жде вѣ́ка:
Прїиди́те благопокори́вѡ, живо́тныѧ воды̀ пи́ти возжелѣ́вшїи, вопїѧ́ше сп҃съ мо́й, и҆ пі́йте благода́ть, бж҃е́ственнѡ веселѧ́щесѧ.
Сла́ва, и҆ ны́нѣ: гла́съ ѕ҃:
Ѡ҆чи́стимъ помышле́нїй сокрѡ́вища, и҆ дꙋшє́внаѧ сїѧ̑нїѧ ᲂу҆ѧсни́мъ, и҆ жи́знь ᲂу҆́зримъ хрⷭ҇та̀ во ст҃и́лище прише́дша премно́жествомъ бл҃гости, да врага̀ побѣди́тъ, и҆ спасе́тъ ро́дъ на́шъ, стрⷭ҇тїю крⷭ҇та̀ и҆ воскресе́нїѧ. къ немꙋ́же возопїи́мъ: непостижи́ме гдⷭ҇и, сла́ва тебѣ̀. <<рк҃ѕ ѡ҆б.: 252>>
Въ пѧто́къ д҃-ѧ седми́цы по па́сцѣ, ве́чера,
ѻ҆бы́чнаѧ каѳі́сма.
На Гдⷭ҇и воззва́хъ, стїхи̑ры пра́здника г҃. Гла́съ а҃.
Подо́бенъ: Нбⷭ҇ныхъ чинѡ́въ:
Творе́цъ всѣ́хъ и҆ жи́зни пода́тель, ѻ҆ц҃ꙋ̀ бж҃е́ственномꙋ соприсносꙋ́щное сло́во, во́лею ѿ дв҃ы пло́ть прїи́мъ, бы́въ человѣ́къ, неизрече́нныѧ премꙋ́дрости, ꙗ҆́кѡ бл҃гъ всѣ̑мъ и҆сточѝ ᲂу҆чє́нїѧ.
Пра́здникꙋ преполови́вшꙋсѧ і҆ꙋде́йскомꙋ хрⷭ҇тѐ, во ст҃и́лищи предста́лъ є҆сѝ, зако́нꙋ влⷣка, ᲂу҆чѧ̀ вла́стїю, и҆ кни́жники ѡ҆блича́ѧ, ꙗ҆́коже пи́сано є҆́сть, и҆ ᲂу҆страша́ѧ премꙋ́дростїю слове́съ твои́хъ, и҆ чꙋде́съ показа́ньми.
Пода́тель премꙋ́дрости, и҆ до́брыхъ и҆злїѧ́тель, и҆злива́ѧй бж҃е́ствєнныѧ стрꙋи̑ ѿ и҆сто́чника приснотекꙋ́щагѡ, прїиди́те ко мнѣ̀, зове́тъ, во́дꙋ жи́зни жа́ждꙋщїи почерпи́те, и҆ рѣ́ки и҆з̾ чре́ва ва́шегѡ, глаго́летъ, дарова́нїй бж҃е́ственныхъ потекꙋ́тъ.
И҆ мине́и г҃. Сла́ва: гла́съ а҃. І҆ѡа́нна мона́ха:
Пѧтдесѧ́тницы наста̀ дне́й преполове́нїе, въ не́мже хрⷭ҇то́съ ѡ҆бнажи́въ малови́днѡ бж҃е́ственнꙋю си́лꙋ, разсла́бленнаго стѧгнꙋ̀ сло́вомъ, того̀ ѿ ѻ҆дра̀ возста́вивъ, и҆ бг҃олѣ́пнѡ чꙋдотворѧ̀ въ зда́нномъ тѣ́лѣ, человѣ́кѡмъ дарова̀ вѣ́чный живо́тъ, и҆ ве́лїю ми́лость.
И҆ ны́нѣ: бг҃оро́диченъ, гла́съ г҃:
Ка́кѡ не диви́мсѧ, бг҃омꙋ́жномꙋ ржⷭ҇твꙋ̀ твоемꙋ̀ пречестна́ѧ; и҆скꙋше́нїѧ бо мꙋ́жескагѡ не прїе́мши <<рк҃з: 253>> всенепоро́чнаѧ, родила̀ є҆сѝ без̾ ѻ҆ц҃а̀ сн҃а пло́тїю, пре́жде вѣ́къ ѿ ѻ҆ц҃а̀ рожде́ннаго без̾ мт҃ре: ника́коже претерпѣ́вшаго и҆змѣне́нїѧ, и҆лѝ смѣше́нїѧ, и҆лѝ раздѣле́нїѧ, но ѻ҆бою̀ сꙋщєствꙋ̀ сво́йство цѣ́ло сохра́ншаго. тѣ́мже мт҃и дв҃о влⷣчце, того̀ молѝ спасти́сѧ дꙋша́мъ, правосла́внѡ бцⷣꙋ и҆сповѣ́дающихъ тѧ̀.
На стїхо́внѣ стїхи̑ры ѻ҆смогла́сника. гла́съ г҃:
Твои́мъ крⷭ҇то́мъ хрⷭ҇тѐ сп҃се, сме́рти держа́ва разрꙋши́сѧ, и҆ дїа́волѧ пре́лесть ᲂу҆праздни́сѧ: ро́дъ же человѣ́ческїй вѣ́рою спаса́емый, пѣ́снь тебѣ̀ всегда̀ прино́ситъ.
Сті́хъ: Гдⷭ҇ь воцари́сѧ, въ лѣ́потꙋ ѡ҆блече́сѧ.
Просвѣти́шасѧ всѧ́чєскаѧ, воскресе́нїемъ твои́мъ гдⷭ҇и, и҆ ра́й па́ки ѿве́рзесѧ, всѧ́ же тва́рь восхвалѧ́ющи тѧ̀, пѣ́снь тебѣ̀ всегда̀ прино́ситъ.
Сті́хъ: И҆́бо ᲂу҆твердѝ вселе́ннꙋю:
Сла́влю ѻ҆ц҃а̀ и҆ сн҃а си́лꙋ, и҆ дх҃а ст҃а́гѡ пою̀ вла́сть, нераздѣ́льное, несозда́нное бж҃ество̀, трⷪ҇цꙋ є҆диносꙋ́щнꙋю, ца́рствꙋющꙋю въ вѣ́къ вѣ́ка.
Сті́хъ: До́мꙋ твоемꙋ̀ подоба́етъ ст҃ы́нѧ:
Стра́стїю твое́ю хрⷭ҇тѐ, ѡ҆мрачи́вый со́лнце, и҆ свѣ́томъ твоегѡ̀ воскресе́нїѧ, просвѣти́вый всѧ́чєскаѧ, прїимѝ на́шꙋ вече́рнюю пѣ́снь человѣколю́бче.
Сла́ва, и҆ ны́нѣ: гла́съ а҃:
Во ст҃и́лище прише́лъ є҆сѝ премꙋ́дросте бж҃їѧ, преполовлѧ́ющꙋсѧ пра́здникꙋ, ᲂу҆чѧ̀ и҆ ѡ҆блича́ѧ непокори̑выѧ і҆ꙋдє́и, фарїсе́и и҆ кни́жники, и҆ вопїѧ̀ со дерзнове́нїемъ къ ни́мъ: жа́ждай да грѧде́тъ ко мнѣ̀, и҆ пїе́тъ во́дꙋ живо́тнꙋю. и҆ не вжа́ждетъ въ вѣ́къ. вѣ́рꙋѧй мое́й <<рк҃з ѡ҆б.: 254>> бла́гости, рѣ́ки потекꙋ́тъ и҆з̾ чре́ва є҆гѡ̀ жи́зни вѣ́чныѧ. ѽ бла́гости и҆ благоꙋтро́бїѧ твоегѡ̀ хрⷭ҇тѐ бж҃е на́шъ, сла́ва тебѣ̀.
Тропа́рь пра́здника. И҆ ѿпꙋ́стъ.
Въ сꙋббѡ́тꙋ д҃-ѧ седми́цы по па́сцѣ, на ᲂу҆́трени.
По а҃-мъ стїхосло́вїи сѣда́льны воскре́сны, гла́съ г҃:
Хрⷭ҇то́съ ѿ ме́ртвыхъ воста̀, нача́токъ ᲂу҆со́пшихъ, перворожде́нъ тва́ри, и҆ содѣ́тель всѣ́хъ бы́вшихъ, и҆стлѣ́вшее є҆стество̀ ро́да на́шегѡ въ себѣ̀ само́мъ ѡ҆бновѝ: не ктомꙋ̀ сме́рте ѡ҆блада́еши, и҆́бо всѣ́хъ влⷣка держа́вꙋ твою̀ разрꙋшѝ.
Сті́хъ: Воскреснѝ гдⷭ҇и бж҃е мо́й:
Пло́тїю сме́рти вкꙋси́вый гдⷭ҇и, го́ресть сме́рти пресѣ́клъ є҆сѝ воста́нїемъ твои́мъ, и҆ чл҃вѣ́ка на ню̀ ᲂу҆крѣпи́вый, пе́рвыѧ клѧ́твы ѡ҆долѣ́нїе призыва́ѧ: защи́тниче жи́зни на́шеѧ, хрⷭ҇тѐ бж҃е, сла́ва тебѣ̀.
Сла́ва, и҆ ны́нѣ: бг҃оро́диченъ:
Тѧ̀ хода́тайствовавшꙋю спасе́нїе ро́да на́шегѡ воспѣва́емъ бцⷣе дв҃о: пло́тїю бо ѿ тебѐ воспрїѧ́тою сн҃ъ тво́й, и҆ бг҃ъ на́шъ, кресто́мъ воспрїи́мъ стра́сть, и҆зба́ви на́съ ѿ тлѝ, ꙗ҆́кѡ чл҃вѣколю́бецъ.
По в҃-мъ стїхосло́вїи, сѣда́ленъ гла́съ и҃.
Подо́бенъ: Премꙋ́дрости:
Пра́здникꙋ преполови́вшꙋсѧ зако́нномꙋ, бы́лъ є҆сѝ ᲂу҆чѧ̀ сп҃се мо́й во свѧти́лищи, и҆ ѡ҆блича́ѧ безꙋ́мїе невѣ́рныхъ є҆вре́євъ, и҆ вопїѧ̀ къ наро́дѡмъ бж҃е́ственнымъ гла́сомъ, <<рк҃и: 255>> ꙗ҆́кѡ чл҃вѣколю́бецъ: жа́ждай, взыва́лъ є҆сѝ, да грѧде́тъ ко мнѣ̀ и҆ пїе́тъ. тѣ́мже ѡ҆бѣща́лъ є҆сѝ вѣ́рꙋющымъ пода́ти весе́лїѧ во́ды ѿ и҆сто́чника нетлѣ́ннагѡ. сегѡ̀ ра́ди вопїе́мъ тѝ: низпослѝ хрⷭ҇тѐ бж҃е дх҃а твоего̀ ст҃а́го, и҆ спасѝ на́съ, ꙗ҆́кѡ є҆ди́нъ є҆сѝ многоми́лостивый. [Два́жды.]
Воскресе́нїе хрⷭ҇то́во: Ѱало́мъ н҃. Канѡ́ны пра́здника, со і҆рмосы̀ на ѕ҃, и҆ ст҃а́гѡ ѻ҆би́тели на д҃, и҆ мине́и на д҃. Конда́къ, и҆ є҆ѯапостїла́рїй пра́здника.
На хвали́техъ поста́вимъ стїхѝ д҃, и҆ пое́мъ стїхи̑ры воскре́сны, гла́съ г҃:
Прїиди́те всѝ ꙗ҆зы́цы, ᲂу҆разꙋмѣ́йте стра́шныѧ та́йны си́лꙋ: хрⷭ҇то́съ бо сп҃съ на́шъ, є҆́же въ нача́лѣ сло́во, распѧ́тсѧ на́съ ра́ди, и҆ во́лею погребе́сѧ, и҆ воскре́се и҆з̾ ме́ртвыхъ, є҆́же спастѝ всѧ́чєскаѧ, томꙋ̀ поклони́мсѧ.
Повѣ́даша всѧ̑ чꙋдеса̀ стра́жїе твоѝ гдⷭ҇и: но собо́ръ сꙋеты̀ и҆спо́лни мздо́ю десни́цꙋ и҆́хъ, скры́ти мнѧ́ше воскрⷭ҇нїе твоѐ, є҆́же мі́ръ сла́витъ: поми́лꙋй на́съ.
Ра́дости всѧ̑ и҆спо́лнишасѧ, воскресе́нїѧ и҆скꙋ́съ прїи́мшѧ. марі́а бо магдали́на ко гро́бꙋ прїи́де, и҆ ѡ҆брѣ́те а҆́гг҃ла на ка́мени сѣдѧ́ща, ри́зами блиста́ющасѧ, и҆ глаго́люща: что̀ и҆́щете жива́гѡ съ ме́ртвыми; нѣ́сть здѣ̀, но воста̀, ꙗ҆́коже речѐ, предварѧ́ѧ вы̀ въ галїле́и.
Во свѣ́тѣ твое́мъ влⷣко, ᲂу҆́зримъ свѣ́тъ чл҃вѣколю́бче: воскре́слъ бо є҆сѝ и҆з̾ ме́ртвыхъ, спасе́нїе ро́дꙋ человѣ́ческомꙋ да́рꙋѧй, да тѧ̀ всѧ̀ тва́рь славосло́витъ є҆ди́наго безгрѣ́шнаго: поми́лꙋй на́съ.
Сла́ва, и҆ ны́нѣ: гла́съ д҃. А҆нато́лїа:
Просвѣти́вшесѧ бра́тїе воскресе́нїемъ сп҃са хрⷭ҇та̀, и҆ <<рк҃и: 255>> дости́гше преполове́нїѧ пра́здника влⷣчнѧ, прїи́скреннѡ сохрани́мъ за́пѡвѣди бж҃їѧ, да досто́йни бꙋ́демъ и҆ вознесе́нїе пра́здновати, и҆ прише́ствїе полꙋчи́ти ст҃а́гѡ дх҃а.
На стїхо́внѣ стїхи̑ры подо́бны, гла́съ в҃: До́ме є҆ѵфра́ѳовъ:
Текꙋ́щїй и҆сто́чникъ твоеѧ̀ премꙋ́дрости, во́дꙋ дꙋхо́внꙋю и҆сточа́етъ, ю҆́же пїю́ще, догма̑тъ бж҃е́ственныхъ и҆сполнѧ́емсѧ.
Сті́хъ: Помѧнѝ со́нмъ тво́й:
Оу҆ѧзвлѧ́шесѧ лю́тый є҆вре́йскїй ро́дъ вои́стиннꙋ, слы́ша тѧ̀ сло́ве, наꙋча́юща наро́ды спаси́тельнымъ ᲂу҆че́нїемъ.
Сті́хъ: Бг҃ъ же цр҃ь на́шъ, пре́жде вѣ́ка:
Прише́лъ є҆сѝ содѣ́телю на сїѡ́нъ, и҆ ста́лъ є҆сѝ посредѣ̀ люде́й твои́хъ, и҆ лю́демъ да́лъ є҆сѝ благода́ть спаси́тельнꙋю.
Сла́ва, и҆ ны́нѣ: гла́съ д҃:
Гдⷭ҇и, пре́жде честна́гѡ твоегѡ̀ крⷭ҇та̀, пра́здникꙋ преполови́вшꙋсѧ, во свѧти́лище вше́лъ є҆сѝ, і҆ꙋдє́и со дерзнове́нїемъ ᲂу҆чѧ̀, мѡѷсе́емъ и҆ въ зако́нѣ тобо́ю законоположє́ннымъ. ᲂу҆жаса́ющесѧ же хрⷭ҇тѐ твоеѧ̀ премꙋ́дрости неизрече́нномꙋ та́инствꙋ, є҆́же на тѧ̀ ропта́нїю въ себѣ̀ за́вистїю поꙋча́хꙋсѧ. ка́кѡ се́й вѣ́сть пи́смена не ᲂу҆чи́всѧ; не вѣ́дѧще тебѐ сп҃са дꙋ́шъ на́шихъ.
На лїтꙋргі́и блажє́нна, пѣ́снь є҃. И҆ прокі́менъ пра́здника. А҆пⷭ҇лъ дѣѧ́нїй, зача́ло к҃ѳ: Возложѝ и҆́рѡдъ ца́рь рꙋ́цѣ: А҆ллилꙋ́їа, пра́здника. Є҆ѵⷢ҇лїе і҆ѡа́нна, зача́ло л҃а: Речѐ гдⷭ҇ь къ вѣ́ровавшымъ є҆мꙋ̀ і҆ꙋде́ѡмъ: Прича́стный пра́здника.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.