Неделя Антипасхи

Неделя Антипасхи

<<л҃д: 67>>

Недѣ́лѧ а҆нтїпа́схи

Є҆́же є҆́сть ѡ҆сѧза́нїе ст҃а́гѡ сла́внагѡ а҆пⷭ҇ла ѳѡмы̀. Вѣ́дати подоба́етъ, ꙗ҆́кѡ въ се́й ст҃о́й второ́й недѣ́ли а҆нтїпа́схи не пою́тсѧ воскре́снаѧ, но всѧ̀ пра́здника.

Въ сꙋббѡ́тꙋ ве́чера

кле́плетъ параекклисїа́рхъ, и҆ собра́вшесѧ въ притво́ръ, бл҃гослови́вшꙋ і҆ере́ю, глаго́лемъ: Хрⷭ҇то́съ воскре́се: три́жды. И҆ ѻ҆бы́чный ѳ҃-й ча́съ триѱа́лмный, ꙗ҆́коже на всѧ́къ де́нь. И҆ глаго́лемъ тропа́рь: Съ высоты̀ снизше́лъ є҆сѝ бл҃гоꙋтро́бне: И҆ конда́къ: А҆́ще и҆ во гро́бъ снизше́лъ є҆сѝ безсме́ртне:

На ма́лѣй вече́рни,

благослови́вшꙋ і҆ере́ю, глаго́лемъ: Хрⷭ҇то́съ воскре́се: три́жды. Та́же ѱало́мъ: Блгⷭ҇вѝ дш҃ѐ моѧ̀ гдⷭ҇а:

На Гдⷭ҇и воззва́хъ: стїхи̑ры на д҃. Гла́съ а҃.

Подо́бенъ: Нбⷭ҇ныхъ чинѡ́въ:

Терпи́тъ хрⷭ҇то́съ человѣколю́бнѡ и҆ ѡ҆сѧза̑нїѧ, ꙗ҆́коже и҆ крⷭ҇тъ пре́жде сегѡ̀, и҆ непра́ведное ᲂу҆бїе́нїе, и҆з̾ гро́ба тридне́внѡ воскр҃сы́й, печа́ти не разрꙋшѝ, и҆ две́ремъ заключє́ннымъ, ᲂу҆ч҃нкѡ́мъ предста́въ ꙗ҆́кѡ всеси́ленъ. [Два́жды].

Ѳѡмино̀ невѣ́рствїе, мїроспаси́тельное бг҃очеловѣ́ка сло́ва, є҆́же и҆з̾ а҆́дскихъ преиспо́днихъ воста́нїе ᲂу҆вѣрѧ́етъ, <<л҃д ѡ҆б.: 68>> ꙗ҆́звы рꙋ́къ и҆ но́гъ де́рзостнѣе ѡ҆сѧза́вшее ко ᲂу҆вѣре́нїю мїрско́мꙋ, десни́цею любопы́тною.

Собра̑ннымъ стра́хомъ, и҆̀же ѿ стра́сти твоеѧ̀, а҆пⷭ҇лѡмъ сло́ве, и҆ две́ремъ заключє́ннымъ внеза́пꙋ совше́лъ є҆сѝ посредѣ̀ и҆́хъ, ми́ръ да́рꙋѧ, и҆ ѳѡмѣ̀ протѧза́ѧ ѡ҆сѧза́ти честны̑ѧ ре́бръ твои́хъ ꙗ҆́звы.

Сла́ва, и҆ ны́нѣ: гла́съ в҃:

По воста́нїи твое́мъ гдⷭ҇и, собра̑ннымъ ᲂу҆ченикѡ́мъ твои́мъ, и҆ две́ремъ заключє́ннымъ, посредѣ̀ ста́лъ є҆сѝ, ми́ръ подаѧ̀ и҆̀мъ. ᲂу҆вѣ́ривсѧ же и҆ ѳѡма̀, видѣ́нїемъ рꙋкꙋ̀ и҆ ре́бръ твои́хъ, гдⷭ҇а и҆ бг҃а тѧ̀ и҆сповѣ́да, спаса́ющаго ᲂу҆пова́ющыѧ на тѧ̀ чл҃вѣколю́бче.

Свѣ́те ти́хїй: Прокі́менъ: Гдⷭ҇ь воцр҃и́сѧ:

На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:

Оу҆стна́ми чи́стыми по́йте со а҆́гг҃лы человѣ́цы воскре́сшаго тридне́внѡ и҆з̾ гро́ба, и҆ мі́ръ совоздви́гшаго.

Сті́хъ: Похвалѝ і҆ерꙋсали́ме гдⷭ҇а, хвалѝ бг҃а твоегѡ̀ сїѡ́не.

Ꙗ҆ви́лсѧ є҆сѝ сщ҃є́ннымъ твои̑мъ сп҃се а҆пⷭ҇лѡмъ, две́ремъ заключє́ннымъ, тѣ́ми ѡ҆бновлѧ́ѧ на́мъ бж҃е́ственный тво́й дх҃ъ.

Сті́хъ: Ꙗ҆́кѡ ᲂу҆крѣпѝ верєѝ вра́тъ твои́хъ, и҆ бл҃гословѝ сы́ны твоѧ̑ въ тебѣ̀.

Ны́нѣ тѧ̀ всецр҃ю̀, ви́дѣвше не ѻ҆чи́ма, но серде́чною любо́вїю, бг҃а вѣ́ровавше, въ пѣ́нїихъ велича́емъ.

Сла́ва, и҆ ны́нѣ: гла́съ и҆ подо́бенъ то́йжде:

Дае́ши, ѽ и҆зба́вителю, ми́ръ лю́демъ твои̑мъ, и҆ долгѡ́въ разрѣше́нїе, моли́твами всечи́стыѧ, и҆ є҆ди́ныѧ бг҃ома́тере.

Та́же: Ны́нѣ ѿпꙋща́еши: Трист҃о́е. По Ѻ҆́ч҃е на́шъ: <<л҃є: 69>>

Тропа́рь, гла́съ з҃:

Запеча́танꙋ гро́бꙋ, живо́тъ ѿ гро́ба возсїѧ́лъ є҆сѝ хрⷭ҇тѐ бж҃е, и҆ две́ремъ заключє́ннымъ, ᲂу҆ченикѡ́мъ предста́лъ є҆сѝ, всѣ́хъ воскресе́нїе: дх҃ъ пра́вый тѣ́ми ѡ҆бновлѧ́ѧ на́мъ, по вели́цѣй твое́й ми́лости.

[зрѝ] Подоба́етъ вѣ́дати: А҆́ще ли гдѣ̀ нѣ́сть бдѣ́нїѧ въ недѣ́лю: въ сꙋббѡ́тꙋ ве́чера на повече́рїи по трист҃о́мъ конда́къ трїѡ́ди пра́здника: Сла́ва, и҆ ны́нѣ: Па́схи: А҆́ще и҆ во гро́бъ: Си́це же глаго́лемъ и҆ до ѿда́нїѧ па́схи.

На вели́цѣй вече́рни,

повнегда̀ блгⷭ҇ви́ти і҆ере́ю. Хрⷭ҇то́съ воскре́се: три́жды. И҆ а҆́бїе пое́мъ предначина́тельный ѱало́мъ: Бл҃гословѝ дꙋшѐ моѧ̀ гдⷭ҇а: съ пѣ́нїемъ, ꙗ҆́коже є҆́сть ѻ҆бы́чай: И҆ по и҆сполне́нїи сегѡ̀, стїхосло́вимъ: Бл҃же́нъ мꙋ́жъ: Каѳі́смꙋ а҃-ю всю̀. Гдⷭ҇и воззва́хъ: пое́мъ во гла́съ а҃, поста́вимъ стїхѡ́въ, і҃. И҆ пое́мъ стїхи̑ры самогла́сны, но́выѧ недѣ́ли. Гла́съ а҃. І҆ѡа́нна мона́ха:

Две́ремъ заключє́ннымъ, ᲂу҆ченикѡ́мъ собра̑ннымъ, вше́лъ є҆сѝ внеза́пꙋ всеси́льне і҆и҃се бж҃е на́шъ, и҆ ста́въ посредѣ̀ и҆̀хъ ми́ръ да́въ, и҆спо́лнилъ є҆сѝ ст҃а́гѡ дх҃а: жда́ти же повелѣ́лъ є҆сѝ, и҆ ника́коже разлꙋча́тисѧ ѿ і҆ерꙋсали́ма, до́ндеже ѡ҆блекꙋ́тсѧ є҆́же съ высоты̀ си́лою. Тѣ́мже вопїе́мъ тѝ: просвѣще́нїе и҆ воскресе́нїе и҆ ми́ре на́шъ, сла́ва тебѣ̀. [Два́жды].

По дне́хъ ѻ҆сми́хъ воста́нїѧ твоегѡ̀ гдⷭ҇и, ꙗ҆ви́лсѧ є҆сѝ ᲂу҆ченикѡ́мъ твои́мъ на мѣ́стѣ, и҆дѣ́же бѧ́хꙋ со́брани, и҆ возгласи́въ и҆̀мъ: ми́ръ ва́мъ, невѣ́рꙋющемꙋ ᲂу҆ченикꙋ̀ <<л҃є ѡ҆б.: 70>> рꙋ́цѣ показа́лъ є҆сѝ, и҆ пречⷭ҇тое ребро̀. ѻ҆́нъ же вѣ́ровавъ вопїѧ́ше тебѣ̀: гдⷭ҇ь мо́й и҆ бг҃ъ мо́й, сла́ва тебѣ̀. [Два́жды].

Ѳѡма̀, глаго́лемый близне́цъ, не бѣ̀ съ ни́ми, є҆гда̀ вше́лъ є҆сѝ, хрⷭ҇тѐ, заключє́ннымъ две́ремъ: тѣ́мже и҆ не вѣ́роваше речє́ннымъ є҆мꙋ̀, ѿ невѣ́рїѧ въ вѣ́рꙋ и҆звѣствꙋ́ѧ. не несподо́билъ же є҆сѝ бл҃же, показа́ти є҆мꙋ̀ пречⷭ҇тое ребро̀ твоѐ, и҆ рꙋкꙋ̀ и҆ ногꙋ̀ ꙗ҆́звы: ѻ҆́нъ же ѡ҆сѧза́въ и҆ ви́дѣвъ, и҆сповѣ́да тебѐ бы́ти бг҃а не на́га, и҆ человѣ́ка не про́ста, и҆ вопїѧ́ше: гдⷭ҇ь мо́й и҆ бг҃ъ мо́й, сла́ва тебѣ̀. [Два́жды].

Оу҆ченикѡ́мъ сомнѧ́щымсѧ, во ѻ҆смы́й де́нь предста̀ сп҃съ, и҆дѣ́же бѧ́хꙋ со́брани, и҆ ми́ръ да́въ, ѳѡмѣ̀ возопѝ: прїидѝ а҆пⷭ҇ле, ѡ҆сѧжѝ дла̑ни, въ ни́хже гвѡ́здїѧ вонзо́ша. ѽ до́брое невѣ́рїе ѳѡмино̀, вѣ́рныхъ сердца̀ въ позна́нїе приведѐ, и҆ со стра́хомъ возопѝ: гдⷭ҇ь мо́й и҆ бг҃ъ мо́й, сла́ва тебѣ̀. [Два́жды].

Гла́съ в҃:

По воста́нїи твое́мъ гдⷭ҇и, собра̑ннымъ ᲂу҆ченикѡ́мъ твои́мъ, и҆ две́ремъ заключє́ннымъ, посредѣ̀ ста́лъ є҆сѝ, ми́ръ подаѧ̀ и҆̀мъ. вѣ́ровавъ же и҆ ѳѡма̀ зрѣ́нїемъ рꙋкꙋ̀ и҆ ре́бръ твои́хъ, гдⷭ҇а и҆ бг҃а тѧ̀ и҆сповѣ́да, спаса́ющаго ᲂу҆пова́ющыѧ на тѧ̀ чл҃вѣколю́бче. [Є҆ди́ножды].

Две́ремъ заключє́ннымъ, предста́въ і҆и҃съ ᲂу҆ченикѡ́мъ, безстра́шїе и҆ ми́ръ даѧ́ше, та́же глаго́летъ ѳѡмѣ̀: почто̀ мнѣ̀ не вѣ́рꙋеши, ꙗ҆́кѡ воскресо́хъ и҆з̾ ме́ртвыхъ; принесѝ сѣ́мѡ рꙋ́кꙋ твою̀, и҆ вложѝ въ ре́бра моѧ̀, и҆ ви́ждь. тебѣ́ бо невѣ́рꙋющꙋ, всѝ навыко́ша стра́сти и҆ <<л҃ѕ: 71>> воскресе́нїе моѐ зва́ти съ тобо́ю: гдⷭ҇ь мо́й и҆ бг҃ъ мо́й, сла́ва тебѣ̀. [Є҆ди́ножды].

Сла́ва, и҆ ны́нѣ: гла́съ ѕ҃. І҆ѡа́нна мона́ха:

Две́ремъ заключє́ннымъ, прише́лъ є҆сѝ хрⷭ҇тѐ ко ᲂу҆ченикѡ́мъ, тогда̀ ѳѡма̀ смотри́тельнѡ не ѡ҆брѣ́тесѧ съ ни́ми. глаго́лаше бо: не и҆мꙋ̀ вѣ́ры, а҆́ще не ᲂу҆ви́ждꙋ и҆ а҆́зъ влⷣки. ᲂу҆ви́ждꙋ ребро̀, ѿѻнꙋ́дꙋже и҆зы́де кро́вь, вода̀, креще́нїе. ᲂу҆ви́ждꙋ ꙗ҆́звꙋ, ѿ неѧ́же и҆сцѣлѣ̀ вели́кїй стрꙋ́пъ человѣ́ческїй. ᲂу҆ви́ждꙋ, ка́кѡ не бѣ̀, ꙗ҆́коже дꙋ́хъ, но пло́ть и҆ кѡ́сти. сме́рть попра́вый, и҆ ѳѡмꙋ̀ ᲂу҆вѣ́ривый, гдⷭ҇и сла́ва тебѣ̀.

Вхо́дъ. Свѣ́те ти́хїй: Прокі́менъ днѐ: Гдⷭ҇ь воцр҃и́сѧ:

На лїті́и стїхи̑ры. Гла́съ д҃:

Гдⷭ҇и, нестерпи́мымъ твоегѡ̀ бжⷭ҇тва̀ блиста́нїемъ, две́ремъ прише́лъ є҆сѝ заключє́ннымъ сꙋ́щымъ, и҆ ста́въ посредѣ̀ ᲂу҆ченикѡ́въ. ребро̀ ѡ҆бнажи́лъ є҆сѝ, и҆ ꙗ҆́звъ твое́ю рꙋкꙋ̀ и҆ ногꙋ̀ стрꙋ́пы ꙗ҆влѧ́ѧ: печа́ль же и҆ ско́рбь разрѣша́ѧ, ꙗ҆́вѣ возгласи́лъ є҆сѝ: и҆́мже ѻ҆́бразомъ во мнѣ̀ ви́дите, ѽ дрꙋ́зи, пло́ти прїѧ́тїе, не дꙋ́ха ношꙋ̀ є҆стество̀. сомнѧ́щемꙋсѧ же ᲂу҆ч҃нкꙋ̀, повелѣва́лъ є҆сѝ ѡ҆сѧза́ти тре́петнѡ, ре́къ: и҆спыта́въ всѧ̑, грѧдѝ, про́чее не сꙋмни́сѧ. ѻ҆́нъ же ѡ҆щꙋща́ѧ рꙋко́ю твоѐ сꙋгꙋ́бое сꙋщество̀, со стра́хомъ вопїѧ́ше вѣ́рнѡ, вѣ́рою влеко́мь: гдⷭ҇ь мо́й и҆ бг҃ъ мо́й, сла́ва тебѣ̀.

Гла́съ и҃: Прикосни́сѧ ѳѡмо̀ ребрꙋ̀ рꙋко́ю, глаго́летъ хрⷭ҇то́съ, и҆ ѻ҆́бразы гвозде́й прїидѝ ѡ҆сѧжѝ, вѣ́рою и҆спыта́й, и҆ бꙋ́ди мѝ вѣ́ренъ, и҆ не бꙋ́ди невѣ́ренъ. ѳѡма́ же пе́рстомъ ꙗ҆́кѡ прикоснꙋ́сѧ влⷣцѣ, <<л҃ѕ ѡ҆б.: 72>> вельмѝ возопѝ: ты̀ бг҃ъ мо́й и҆ гдⷭ҇ь, бл҃гоꙋтро́бне сла́ва тебѣ̀.

Сла́ва, и҆ ны́нѣ: гла́съ и҃. А҆нато́лїа:

Две́ремъ заключє́ннымъ, ᲂу҆ченикѡ́мъ собра̑ннымъ, предста̀ сп҃съ, и҆дѣ́же бѧ́хꙋ со́брани, и҆ ста́въ посредѣ̀ и҆̀хъ, глаго́летъ ѳѡмѣ̀: прїидѝ ѡ҆сѧжѝ, и҆ ви́ждь ѻ҆́бразы гвозде́й, прострѝ рꙋ́кꙋ твою̀, и҆ косни́сѧ ребрꙋ̀ моемꙋ̀, и҆ не бꙋ́ди невѣ́ренъ: но вѣ́рою проповѣ́ждь, є҆́же и҆з̾ ме́ртвыхъ моѐ воскресе́нїе.

На стїхо́внѣ стїхи̑ры самогла́сны, гла́съ д҃:

Ѽ пресла́внагѡ чꙋдесѐ! невѣ́рїе вѣ́рꙋ и҆звѣ́стнꙋю родѝ. ре́къ бо ѳѡма̀: а҆́ще не ви́ждꙋ, не и҆мꙋ̀ вѣ́ры. ѡ҆сѧза́въ же ре́бра, бг҃осло́витъ воплоти́вшагосѧ, того́жде сн҃а бж҃їѧ позна̀, ꙗ҆́кѡ пострада́вша пло́тїю, проповѣ́да воскре́сшаго бг҃а, и҆ возопѝ свѣ́тлымъ гла́сомъ: гдⷭ҇ь мо́й и҆ бг҃ъ мо́й, сла́ва тебѣ̀.

Сті́хъ: Похвалѝ і҆ерꙋсали́ме гдⷭ҇а хвалѝ бг҃а твоего̀ сїѡ́не.

Ѽ пресла́внагѡ чꙋдесѐ! ѻ҆гню̀ сѣ́но коснꙋ́вшеесѧ спасе́сѧ вложи́въ бо ѳѡма̀ во ѻ҆́гнєннаѧ ре́бра рꙋ́кꙋ і҆и҃са хрⷭ҇та̀ бг҃а, не ѡ҆пали́сѧ ѡ҆сѧза́нїемъ. дꙋши́ бо ѕловѣ́рство преложѝ на благовѣ́рїе, те́плѣ возопѝ ѿ глꙋбины̀ дꙋше́вныѧ: влⷣка ты̀ є҆сѝ и҆ бг҃ъ мо́й, и҆з̾ ме́ртвыхъ воскресы́й, сла́ва тебѣ̀.

Сті́хъ: Ꙗ҆́кѡ ᲂу҆крѣпѝ верєѝ вра́тъ твои́хъ, и҆ благословѝ сы́ны твоѧ̑ въ тебѣ̀.

Ѽ пресла́внагѡ чꙋдесѐ! І҆ѡа́ннъ на пє́рси сло́ва возлежѐ, ѳѡма́ же ре́бра ѡ҆сѧза́ти сподо́бисѧ: но ѻ҆́въ ᲂу҆́бѡ ѿѻнꙋ́дꙋ стра́шнѡ бг҃осло́вїѧ глꙋбо́кое и҆звлечѐ смотре́нїе: <<л҃з: 73>> ѻ҆́въ же сподо́бисѧ тайнонаꙋчи́ти на́съ. представлѧ́етъ бо показа̑нїѧ ꙗ҆́снѡ воста́нїѧ є҆гѡ̀, вопїѧ̀: гдⷭ҇ь мо́й и҆ бг҃ъ мо́й, сла́ва тебѣ̀.

Сла́ва и҆ ны́нѣ: гла́съ є҃:

Чл҃вѣколю́бче, ве́лїе и҆ безприкла́дное мно́жество щедро́тъ твои́хъ: ꙗ҆́кѡ долготерпѣ́лъ є҆сѝ, ѿ і҆ꙋдє́й заꙋша́емь, ѿ а҆пⷭ҇ла ѡ҆сѧза́емь, и҆ ѿ ѿмета́ющихсѧ тебѐ многоиспытꙋ́емь, ка́кѡ воплоти́лсѧ є҆сѝ; ка́кѡ распѧ́лсѧ є҆сѝ безгрѣ́шне; но вразꙋми́ ны ꙗ҆́кѡ ѳѡмꙋ̀ вопи́ти тебѣ̀: гдⷭ҇ь мо́й и҆ бг҃ъ мо́й, сла́ва тебѣ̀.

Та́же: Ны́нѣ ѿпꙋща́еши: Трист҃о́е. И҆ по Ѻ҆́ч҃е на́шъ: Тропа́рь, гла́съ з҃: Запеча́танꙋ гро́бꙋ: три́жды. Пи́санъ на ма́лѣй вече́рни. И҆ благослове́нїе хлѣ́бѡвъ. И҆ чте́нїе дѣѧ́нїй ст҃ы́хъ а҆пⷭ҇лъ. Чтꙋ́тсѧ же дѣѧ̑нїѧ ѿ нача́ла: и҆лѝ бесѣ̑ды златоꙋ́стагѡ ѿ нача́ла.

[зрѝ] [А҆́ще нѣ́сть бдѣ́нїѧ, по Ны́нѣ ѿпꙋща́еши: и҆ по Ѻ҆́ч҃е на́шъ: Тропа́рь: Запеча́танꙋ гро́бꙋ: И҆ ѿпꙋ́стъ. Во ᲂу҆́трїи же пое́мъ полꙋ́нощницꙋ воскре́снꙋю, на не́йже пое́мъ канѡ́нъ трⷪ҇чный, ѻ҆ктѡ́иха а҃-гѡ гла́са, пѣва́емый по полꙋ́нощницѣ. По канѡ́нѣ же Досто́йно є҆́сть: трⷪ҇чное. И҆ про́чее. Трист҃о́е. По Ѻ҆́ч҃е на́шъ: Тропа́рь: Запеча́танꙋ гро́бꙋ: Гдⷭ҇и поми́лꙋй. м҃. Сла́ва и҆ ны́нѣ: Честнѣ́йшꙋю херꙋві̑мъ: Сті́хъ: Бж҃е ᲂу҆ще́дри ны̀: И҆ моли́тва: Всемогꙋ́щаѧ и҆ животворѧ́щаѧ: И҆ ѿпꙋ́стъ.]

По сконча́нїи же чте́нїѧ, глаго́лемъ шестоѱа́лмїе. И҆ по и҆сполне́нїи си́хъ є҆ктенїа̀ вели́каѧ. и҆ Бг҃ъ гдⷭ҇ь: пое́мъ во гла́съ з҃. Тропа́рь пра́здника, три́жды.

По а҃-мъ стїхосло́вїи сѣда́ленъ, гла́съ а҃. Подо́бенъ: Ка́мени запеча́танꙋ:

Стра́ха ра́ди і҆ꙋде́йска, сокровє́ннымъ ᲂу҆ченикѡ́мъ, и҆ <<л҃з ѡ҆б.: 74>> въ сїѡ́нѣ собра́ннымъ, вше́лъ є҆сѝ къ ни́мъ бл҃же, и҆ ста́лъ є҆сѝ посредѣ̀ и҆̀хъ, две́ремъ заключє́ннымъ радостотворѧ́й и҆ показа́лъ є҆сѝ и҆̀мъ рꙋ́цѣ, и҆ пречи́стыхъ твои́хъ ре́бръ ꙗ҆́звы, глаго́лѧ невѣ́рꙋющемꙋ ᲂу҆ченикꙋ̀: принесѝ рꙋ́кꙋ твою̀ и҆ и҆спыта́й, ꙗ҆́кѡ са́мъ а҆́зъ є҆́смь, тебѐ ра́ди пострада́вый.

Сла́ва, и҆ ны́нѣ: то́йже. И҆ чте́нїе пра́здника.

По в҃-мъ стїхосло́вїи, сѣда́ленъ, гла́съ а҃.

Подо́бенъ: Гро́бъ тво́й сп҃се:

Предста́лъ є҆сѝ животѐ, две́ремъ заключє́ннымъ, хрⷭ҇тѐ, ᲂу҆ченикѡ́мъ, и҆ ре́бра показа́въ и҆ рꙋ́цѣ твоѝ и҆ но́зѣ твоѝ, є҆́же ѿ гро́ба твоѐ воста́нїе пред̾ꙋвѣрѧ́ѧ: но ѳѡма̀ не ѡ҆брѣ́тесѧ, тѣ́мже глаго́лаше: а҆́ще не ᲂу҆зрю̀ є҆гѡ̀, не вѣ́рꙋю словесє́мъ ва́шымъ.

Сла́ва, и҆ ны́нѣ: то́йже. И҆ чте́нїе пра́здника. Та́же полѷеле́й.

И҆ сѣда́ленъ, гла́съ а҃. Подо́бенъ: Гро́бъ тво́й сп҃се:

Ви́дѧ моѧ̑ ре́бра, и҆ ꙗ҆́звы гвозде́й, ѳѡмо̀, что̀ не вѣ́рꙋеши моемꙋ̀ воскресе́нїю; гдⷭ҇ь глаго́лаше, воскре́съ ѿ гро́ба, ꙗ҆влѧ́ѧсѧ а҆пⷭ҇лѡмъ неизрече́ннѡ. близне́цъ же вѣ́ровавъ, вопїѧ́ше созда́телю: бг҃ъ мо́й є҆сѝ и҆ гдⷭ҇ь.

Сла́ва, и҆ ны́нѣ: то́йже. И҆ чте́нїе пра́здника:

Посе́мъ степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Похвалѝ і҆ерꙋсали́ме гдⷭ҇а, хвалѝ бг҃а твоего̀ сїѡ́не. Сті́хъ: Ꙗ҆́кѡ ᲂу҆крѣпѝ верєѝ вра́тъ твои́хъ. Всѧ́кое дыха́нїе: Є҆ѵⷢ҇лїе ѿ матѳе́а, зача́ло рѕ҃і, ᲂу҆́треннее воскре́сно, а҃: Є҆динїина́десѧть ᲂу҆ченицы̀: Та́же: Воскресе́нїе хрⷭ҇то́во ви́дѣвше: три́жды: Ѱало́мъ н҃. И҆ цѣлова́нїе є҆ѵⷢ҇лїа. Та́же, Сла́ва: Мл҃твами а҆пⷭ҇лъ, млⷭ҇тиве: И҆ ны́нѣ: Мл҃твами бцⷣы: Посе́мъ стїхи́ра: <<л҃и: 75>> Воскре́съ і҆и҃съ ѿ гро́ба, ꙗ҆́коже проречѐ дадѐ на́мъ живо́тъ вѣ́чный, и҆ ве́лїю млⷭ҇ть. Та́же, Спасѝ бж҃е лю́ди твоѧ̀:

И҆ а҆́бїе канѡ́нъ пра́здника, творе́нїе і҆ѡа́нна мона́ха. Гла́съ а҃. і҆рмо́съ по два́жды, тропари́ же на в҃і.

Катава́сїа: Воскрⷭ҇нїѧ де́нь: ѻ҆́ба ли́ка вкꙋ́пѣ.

Ѿ дне́сь начина́емъ глаго́лати: Пои́мъ гдⷭ҇ви: во всю̀ пѧтдесѧ́тницꙋ.

Пѣ́снь а҃.

І҆рмо́съ: Пои́мъ всѝ лю́дїе, ѿ го́ркїѧ рабо́ты фараѡ́ни і҆и҃лѧ и҆змѣ́ншемꙋ, и҆ во глꙋбинѣ̀ морстѣ́й нога́ми немо́крыми наста́вльшемꙋ, пѣ́снь побѣ́днꙋю: ꙗ҆́кѡ просла́висѧ.

Дне́сь весна̀ дꙋша́мъ, занѐ хрⷭ҇то́съ ѿ гро́ба ꙗ҆́коже со́лнце возсїѧ́въ тридне́вный, мра́чнꙋю бꙋ́рю ѿгна̀ грѣха̀ на́шегѡ. того̀ воспои́мъ, ꙗ҆́кѡ просла́висѧ.

Цари́ца време́нъ, свѣтоно́сномꙋ дню̀, дне́й же цр҃ю̀ ꙗ҆́вственнѣйши дароносѧ̀, кра́ситъ и҆збра̑нныѧ лю́ди церкѡ́вныѧ, непреста́ннѡ поѧ̀ воскре́сшаго хрⷭ҇та̀.

Врата̀ сме́рти хрⷭ҇тѐ, нижѐ грѡ́бныѧ печа̑ти, нижѐ ключѝ двере́й тебѣ̀ проти́вишасѧ: но воскре́съ предста́лъ є҆сѝ дрꙋгѡ́мъ твои̑мъ влⷣко, ми́ръ да́рꙋѧй, всѧ́къ ᲂу҆́мъ преимꙋ́щъ.

Пѣ́снь г҃.

І҆рмо́съ: Оу҆твердѝ менѐ хрⷭ҇тѐ, на недви́жимомъ ка́мени за́повѣдей твои́хъ, и҆ просвѣти́ мѧ свѣ́томъ лица̀ твоегѡ̀: нѣ́сть бо ст҃ъ па́че тебѐ чл҃вѣколю́бче.

Нѡ́выѧ вмѣ́стѡ ве́тхихъ, вмѣ́стѡ же тлѣ́нныхъ нетлѣ̑нныѧ, крⷭ҇то́мъ твои́мъ хрⷭ҇тѐ соверши́въ на́съ, во <<л҃и ѡ҆б.: 76>> ѡ҆бновле́нїи жи́зни жи́тельствовати досто́йнѡ повелѣ́лъ є҆сѝ.

Во гро́бѣ заключе́нъ ѡ҆пи́санною пло́тїю твое́ю, неѡпи́санный хрⷭ҇тѐ воскре́слъ є҆сѝ: две́ремъ же заключє́ннымъ, предста́лъ є҆сѝ твои̑мъ ᲂу҆ченикѡ́мъ всеси́льне.

Ꙗ҆́звы твоѧ̀ хрⷭ҇тѐ, ꙗ҆̀же во́лею претерпѣ́лъ є҆сѝ за на́съ, ᲂу҆ченикѡ́мъ твои́мъ сохрани́въ, свидѣ́тельство показа́лъ є҆сѝ твоегѡ̀ сла́внагѡ воскресе́нїѧ.

Ѵ҆пакоѝ, гла́съ ѕ҃:

Ꙗ҆́кѡ посредѣ̀ ᲂу҆ченикѡ́въ твои́хъ прише́лъ є҆сѝ сп҃се, ми́ръ даѧ̀ и҆̀мъ: прїидѝ и҆ къ на́мъ и҆ спасѝ на́съ.

И҆ чте́нїе въ бг҃осло́вѣ, є҆гѡ́же нача́ло: Ѡ҆бновле́нїемъ чти́тисѧ:

Пѣ́снь д҃.

І҆рмо́съ: Ве́лїѧ та́йна твоегѡ̀ хрⷭ҇тѐ, смотре́нїѧ: сїю́ бо свы́ше прови́дѧ, бг҃озри́тельнѡ а҆ввакꙋ́мъ, и҆зше́лъ є҆сѝ, вопїѧ́ше тебѣ̀, во спасе́нїе люде́й твои́хъ чл҃вѣколю́бче.

Же́лчи ᲂу҆́бѡ вкꙋсѝ, дре́внее вкꙋше́нїе и҆сцѣлѧ́ѧ, ны́нѣ же съ со́томъ ме́да, просвѣще́нїе подаѧ̀ хрⷭ҇то́съ пра́ѻц҃ꙋ, и҆ своѐ сла́дкое прича́стїе.

Ра́дꙋешисѧ и҆спыта́емь: тѣ́мже чл҃вѣколю́бче на сїѐ повелѣва́еши ѳѡмѣ̀, простира́ѧ невѣ́рꙋющꙋ ре́бра, мі́рови ᲂу҆вѣрѧ́ѧ твоѐ хрⷭ҇тѐ, тридне́вное воста́нїе.

Бога́тство поче́рпъ ѿ сокро́вища некра́домагѡ бж҃е́ственнагѡ, благодѣ́телю, копїе́мъ прободе́ннагѡ твоегѡ̀ ребра̀, премꙋ́дрости и҆ ра́зꙋма наполнѧ́етъ мі́ръ близне́цъ.

Тво́й всеблаже́нный хва́литсѧ ѧ҆зы́къ, ѽ бли́знче! пе́рвый бо благоче́стнѡ проповѣ́дꙋетъ жизнода́вца і҆и҃са, бг҃а же и҆ гдⷭ҇а, ѿ ѡ҆сѧза́нїѧ и҆спо́лньсѧ бл҃года́ти. <<л҃ѳ: 77>>

Пѣ́снь є҃.

І҆рмо́съ: Ѿ но́щи ᲂу҆́тренююще пое́мъ тѧ̀ хрⷭ҇тѐ, ѻ҆ц҃ꙋ̀ собезнача́льна, и҆ сп҃са дꙋ́шъ на́шихъ: ми́ръ мі́рови пода́ждь чл҃вѣколю́бче.

Предста́въ дрꙋгѡ́мъ скорбѧ́щымъ сп҃съ, прише́ствїемъ всю̀ ѿе́млетъ ско́рбь, и҆ и҆гра́ти воздвиза́етъ свои́мъ воскрⷭ҇нїемъ.

Ѽ вои́стиннꙋ похвалѧ́емагѡ ѳѡмы̀ стра́шнагѡ начина́нїѧ! де́рзостнѡ бо ѡ҆сѧза̀ ре́бра, бж҃е́ственнымъ ѻ҆гне́мъ блиста̑ющаѧ.

Невѣ́рїе ѳѡмино̀, вѣ́ры роди́тельное на́мъ показа́лъ є҆сѝ: ты́ бо всѧ̑ премꙋ́дростїю твое́ю промышлѧ́еши поле́знѡ хрⷭ҇тѐ, ꙗ҆́кѡ человѣколю́бецъ.

Пѣ́снь ѕ҃.

І҆рмо́съ: Проро́ка спа́слъ є҆сѝ ѿ ки́та чл҃вѣколю́бче, и҆ менѐ и҆з̾ глꙋбины̀ прегрѣше́нїй возведѝ, молю́сѧ.

Ѳѡмы̀ не ѡ҆ста́вилъ є҆сѝ влⷣко, погрꙋжа́ема глꙋбино́ю невѣ́рїѧ, дла̑ни просте́ръ на и҆спыта́нїе.

Сп҃съ на́шъ глаго́лаше: ѡ҆сѧза́вше мѧ̀ ви́дите кѡ́сти пло́ть носѧ́ща, а҆́зъ не премѣни́хсѧ.

Рє́бра ѡ҆сѧза̀, и҆ вѣ́ровавъ позна̀ ѳѡма̀, не сы́й въ пе́рвомъ вхо́дѣ твое́мъ, сп҃се на́шъ.

Конда́къ, гла́съ и҃:

Любопы́тною десни́цею, жизнопода́тєльнаѧ твоѧ̑ ре́бра ѳѡма̀ и҆спыта̀ хрⷭ҇тѐ бж҃е: созаключє́ннымъ бо две́ремъ ꙗ҆́кѡ вше́лъ є҆сѝ, съ про́чими а҆пⷭ҇лы вопїѧ́ше тебѣ̀: гдⷭ҇ь є҆сѝ и҆ бг҃ъ мо́й.

І҆́косъ:

Кто̀ сохранѝ ᲂу҆чени́чꙋ дла́нь тогда̀ неѡпали́мꙋ, <<л҃ѳ ѡ҆б.: 78>> є҆гда̀ ко ѻ҆́гненнымъ ре́брѡмъ пристꙋпѝ гдⷭ҇нимъ; кто̀ дадѐ є҆́й де́рзость, и҆ возмо́же ѡ҆сѧза́ти пла́меннꙋю ко́сть, всѧ́кѡ неѡсѧжи́мꙋю; а҆́ще бо не бы̀ ребро̀ си́лꙋ по́дало бре́ннѣй десни́цѣ, ка́кѡ можа́ше ѡ҆сѧза́ти, страда́ньми поколеба̑вшаѧ ꙗ҆̀же вы́ше, и҆ ꙗ҆̀же ни́зꙋ; сїѧ̀ бл҃года́ть ѳѡмѣ̀ даде́сѧ, є҆́же сїѧ̑ ѡ҆сѧза́ти, хрⷭ҇то́ви же вопи́ти: гдⷭ҇ь є҆сѝ и҆ бг҃ъ мо́й.

Сѷнаѯа́рь въ недѣ́лю ѳѡминꙋ̀.

Стїхѝ: А҆́ще а҆́да и҆лѝ и҆з̾ гро́ба клю́чь не возбранѧ́етъ,

Твоѐ сп҃се стремле́нїе, клю́чь двере́й ка́кѡ возбрани́тъ;

Въ сі́й де́нь, въ недѣ́лю вторꙋ́ю по па́сцѣ, ѡ҆бновлє́нїѧ пра́зднꙋемъ хрⷭ҇то́ва воскрⷭ҇нїѧ, и҆ ст҃а́гѡ а҆пⷭ҇ла ѳѡмы̀ ѡ҆сѧза́нїе. Ѡ҆бновле́нїємъ ᲂу҆́бѡ ѻ҆бы́чай бѣ̀ дре́внїй быва́ти, на нѣ́которое ѿ наро́читыхъ: лѣ́тꙋ бо ѡ҆крꙋжа́ющꙋ и҆ то́й де́нь, во́ньже тогда̀ содѣ́ѧно бы́сть наве́дшꙋ ве́щи ѻ҆́ноѧ, па́мѧть творѧ́хꙋ лѣ́тнюю, да не въ забве́нїе вели̑каѧ бы дѣла̀ бы́ли. Ѿсю́дꙋ є҆вре́и пе́рвѣе па́схꙋ въ галга́лѣхъ сотвори́ша, чермна́гѡ мо́рѧ прехожде́нїе ѡ҆бновлѧ́юще. Ѿсю́дꙋ сѣ́нь свидѣ́нїѧ и҆̀мъ ѡ҆бновлѧ́етсѧ, и҆ многосла́внѡ. Ѿсю́дꙋ ца́рство даві́дово, и҆ и҆на̑ѧ, да не по коемꙋ́ждо глаго́лю: є҆лма̀ ᲂу҆́бѡ всѣ́хъ ꙗ҆̀же въ житїѝ веще́й и҆зрѧ́днѣе бо́льше, и҆ па́че всѧ́кїѧ мы́сли дѣ́ло, гдⷭ҇не воскресе́нїе: не то́чїю на ко́еждо лѣ́то сїѐ пра́зднꙋемъ и҆ ѡ҆бновлѧ́емъ, но при́снѡ и҆ по ѻ҆смо́мъ днѝ. Пе́рвое ᲂу҆́бѡ сегѡ̀ ѡ҆бновле́нїе, настоѧ́щаѧ недѣ́лѧ, ꙗ҆́же глаго́лаласѧ бы вои́стиннꙋ и҆ ѻ҆сма́ѧ и҆ пе́рваѧ. Ѻ҆сма́ѧ ᲂу҆́бѡ, ꙗ҆́кѡ ѿ па́схи: пе́рваѧ же, ꙗ҆́кѡ нача́ло дрꙋги́хъ. И҆ ѻ҆сма́ѧ па́ки: ꙗ҆́кѡ во ѻ҆́бразъ вчинѧ́етсѧ безконе́чнагѡ ѻ҆́нагѡ днѐ, и҆́же въ бꙋ́дꙋщемъ вѣ́цѣ, и҆́же пе́рвый, и҆ є҆ди́нъ бꙋ́детъ всѧ́кѡ, ни но́щїю разсѣка́емь. Сїѧ̑ ᲂу҆́бѡ ѡ҆ ѡ҆бновле́нїихъ: а҆ ꙗ҆̀же ѡ҆ ѳѡмѣ̀, си́це бы́сть: хрⷭ҇тꙋ̀ во́ньже де́нь воскре́се, по́здѣ ᲂу҆ченикѡ́мъ ꙗ҆́вльшꙋсѧ, не бѧ́ше ѳѡма̀, не ᲂу҆ съ про́чими совокꙋ́пльсѧ, стра́ха ра́ди і҆ꙋде́йска. Та́же пома́лѣ наше́дъ, ᲂу҆вѣ́да <<м҃: 79>> хрⷭ҇то́во прише́ствїе, не вѣ́рова, не ᲂу҆ченикѡ́мъ то́кмѡ, ꙗ҆́кѡ того̀ ви́дѣша воскре́сша, но ꙗ҆́кѡ нижѐ ѿню́дъ воскре́се гдⷭ҇ь, и҆ се́й є҆ди́нъ сы́й ѿ двоюна́десѧтихъ. Благохи́тростный же бг҃ъ, и҆ ѡ҆ є҆ди́номъ ᲂу҆́бѡ си́це пекі́йсѧ, кꙋ́пнѡ же и҆ смотре́нїемъ нѣ́кимъ бо́льшимъ, да и҆ па́че воскресе́нїе и҆ по си́хъ бꙋ́дꙋщымъ ᲂу҆вѣ́ритсѧ, ѡ҆ста́вль дні́й ѻ҆́смь: да ѻ҆́нагѡ любо́вь коне́чнꙋю поѡстри́тъ, и҆ па́че невѣ́ровавый всѣ̑мъ вѣ́рꙋ и҆звѣ́стншꙋю пода́стъ воскресе́нїѧ, па́ки прихо́дитъ, и҆ две́ремъ заключє́ннымъ, ꙗ҆́коже пре́жде, сꙋ́щꙋ же и҆ ѳѡмѣ̀, вхо́дитъ и҆ ми́ръ ѻ҆бы́чнѡ пода́въ, посе́мъ къ ѳѡмѣ̀ простира́етсѧ, и҆ глаго́летъ: принесѝ пе́рстъ тво́й сѣ́мѡ, и҆ ви́ждь рꙋ́цѣ моѝ, и҆ принесѝ рꙋ́кꙋ твою̀, и҆ вложѝ въ ре́бра моѧ̑, и҆ не бꙋ́ди невѣ́ренъ, но вѣ́ренъ. Поне́же бо не то́чїю видѣ́нїемъ ᲂу҆вѣ́ритисѧ и҆мѣ́лъ є҆сѝ за привидѣ́нїе, но ско́ръ сы́й, и҆ ѡ҆сѧза́нїѧ помѧнꙋ́лъ є҆сѝ. Показа́ же си́мъ, ꙗ҆́кѡ внегда̀ сїѧ̑ глаго́лаше ко ᲂу҆ченикѡ́мъ, бѧ́ше слы́ша: вложѝ рꙋ́кꙋ твою̀ въ ре́бра моѧ̑. Ꙗ҆влѧ́етъ же, ꙗ҆́кѡ и҆ широка̀ бѧ́ше ꙗ҆́же на ре́брѣхъ ꙗ҆́зва, ꙗ҆́кѡ и҆ рꙋ́кꙋ внꙋ́трь вмѣща́ти. Ѳѡма́ же ѻ҆па́снѡ и҆спыта́въ, и҆ вѣ́рꙋ прїи́мъ ѡ҆сѧже́нїемъ, попꙋща́емь бо бѣ̀ сїѧ̑ зрѣ́ти и҆ твори́ти ѻ҆́наѧ, а҆́ще и҆ въ нетлѣ́нномъ и҆ ѡ҆боже́нномъ коне́чнѡ тѣлесѝ, за и҆звѣще́нїе взыва́ше: гдⷭ҇ь мо́й и҆ бг҃ъ мо́й. Ѻ҆́во ᲂу҆́бѡ пло́ти ра́ди, ѻ҆́во же бж҃ества̀ ра́ди. И҆ хрⷭ҇то́съ къ немꙋ̀ глаго́летъ: ꙗ҆́кѡ ви́дѣвъ мѧ̀ вѣ́ровалъ є҆сѝ, бл҃же́ни не ви́дѣвшїи и҆ вѣ́ровавшїи. Близне́цъ же глаго́летсѧ ѳѡма̀, и҆лѝ занѐ съ дрꙋги́мъ роди́сѧ, и҆лѝ за є҆́же ᲂу҆сꙋмнѣ́тисѧ ѡ҆ воскресе́нїи, и҆лѝ занѐ си́це ѿ є҆стества̀ слѣ́плена бѣ́ста є҆мꙋ̀ два̀ пе́рста рꙋкѝ десны́ѧ, сі́есть сре́днїй, и҆ и҆́же пред̾ ѻ҆́нѣмъ, глаго́лемый ᲂу҆каза́тельный: не́гли ре́клъ бы кто̀, ꙗ҆́кѡ ᲂу҆сꙋмнѣ́тисѧ и҆мѧ́ше, и҆ съ си́ми ѡ҆сѧза́ти. И҆ні́и же глаго́лютъ, є҆́же и҆ и҆звѣ́стнѣйшее, ꙗ҆́кѡ є҆́же ѳѡма̀, близне́цъ толкꙋ́етсѧ. Второ́е сїѐ ꙗ҆вле́нїе хрⷭ҇то́во. Тре́тїе же бы́сть на мо́ри тїверїа́дстѣмъ въ ловле́нїи ры́бъ, є҆гда̀ и҆ пи́щи причасти́сѧ, бж҃е́ственнымъ ѻ҆гне́мъ снѣ́дшейсѧ, ꙗ҆́коже вѣ́сть са́мъ, и҆звѣ́стнѣйшее воскресе́нїе представлѧ́ѧ. Та́же во є҆ммаꙋ́сѣ ꙗ҆влѧ́етсѧ. Пѧ́тое въ галїле́и, и҆ <<м҃ ѡ҆б.: 80>> є҆динона́десѧтищи, ꙗ҆́коже глаго́лютъ, ꙗ҆влѧ́етсѧ, до́ндеже вознесе́сѧ, мнѡ́гаѧ и҆ преесте́ствєннаѧ зна́мєнїѧ творѧ̀, пред̾ ᲂу҆ченикѝ по воскресе́нїи: не бо̀ мнѡ́гимъ сїѧ̑ пока́зоваше. Ѡ҆ста́виша же сїѧ̑ всѧ̑ є҆ѵⷢ҇лі́сти написа́ти, занѐ не бѣ̀ возмо́жно сїѧ̑ мнѡ́гимъ, и҆ въ мі́рѣ живꙋ́щымъ человѣ́кѡмъ слы́шати, ꙗ҆́кѡ преесте́ствєнна сꙋ́ща ѕѣлѡ̀. Твоегѡ̀ а҆пⷭ҇ла ѳѡмы̀ моли́твами, хрⷭ҇тѐ бж҃е на́шъ поми́лꙋй на́съ. а҆ми́нь.

Пѣ́снь з҃.

І҆рмо́съ: Ѻ҆́бразꙋ слꙋжи́ти мꙋсїкі́йскомꙋ согла́сїю созыва́ющꙋ лю́ди, ѿ пѣ́сней сїѡ́нскихъ пою́ще ѻ҆те́чески ѻ҆́троцы дв҃довы, мꙋчи́телево разори́ша ѕлочести́вое велѣ́нїе, и҆ пла́мень въ ро́сꙋ преложи́ша, пѣ́снь воспѣва́юще: превозноси́мый ѻ҆ц҃є́въ и҆ на́шъ бж҃е, бл҃гослове́нъ є҆сѝ.

Ꙗ҆́кѡ пе́рвый є҆́сть дне́й и҆ гдⷭ҇ственный свѣтоно́сный сі́й, во́ньже ра́доватисѧ досто́йнѡ нѡ́вымъ и҆ бж҃е́ствєннымъ лю́демъ съ тре́петомъ: прино́ситъ бо и҆ вѣ́ка ѻ҆́бразъ, ꙗ҆́кѡ ѻ҆сми́ца соверша́ѧ бꙋ́дꙋщагѡ, превозноси́мый ѻ҆ц҃є́въ и҆ на́шъ бж҃е, бл҃гослове́нъ є҆сѝ.

Є҆ди́нъ дерзнꙋ́вый, невѣ́рною же вѣ́рою ѡ҆благодѣ́тельствовавый на́съ ѳѡма̀ близне́цъ, рѣши́тъ ᲂу҆́бѡ мра́чное невѣ́дѣнїе всѣ́хъ концє́въ, вѣ́рнымъ невѣ́рствїемъ, себѣ́ же вѣне́цъ плете́тъ ꙗ҆́вѣ глаго́лѧ. ты̀ є҆сѝ гдⷭ҇ь превозноси́мый ѻ҆ц҃є́въ и҆ на́шъ бж҃е, бл҃гослове́нъ є҆сѝ.

Не всꙋ́е ᲂу҆сꙋмнѣ́всѧ ѳѡма̀ ѡ҆ воста́нїи твое́мъ, не низложи́сѧ: но несꙋмнѣ́тельное тща́шесѧ показа́ти сїѐ хрⷭ҇тѐ, всѣ̑мъ ꙗ҆зы́кѡмъ. ѿѻнꙋ́дꙋже невѣ́рїемъ ᲂу҆вѣ́ривъ, всѣ́хъ наꙋчѝ глаго́лати: ты̀ є҆сѝ гдⷭ҇ь превозноси́мый ѻ҆ц҃є́въ и҆ на́шъ бж҃е, бл҃гослове́нъ є҆сѝ.

Со стра́хомъ рꙋ́кꙋ ѳѡма̀ въ ре́бра твоѧ̀ живонѡ́снаѧ, <<м҃а: 81>> хрⷭ҇тѐ, вложи́въ, тре́петенъ ѡ҆щꙋтѝ дѣ́йство сп҃се, сꙋгꙋ́бое двѣма̀ є҆стество́ма въ тебѣ̀ соединѧ́емыма неслїѧ́ннѡ, и҆ вѣ́рою взыва́ше глаго́лѧ: ты̀ є҆сѝ гдⷭ҇ь превозноси́мый ѻ҆ц҃є́въ и҆ на́шъ бж҃е, бл҃гослове́нъ є҆сѝ.

Пѣ́снь и҃.

І҆рмо́съ: Въ пла́мени ѻ҆́гненнѣ горѧ́щїѧ пе́щи сохра́ншаго дѣ́ти, и҆ во зра́цѣ а҆́гг҃ла снизше́дшаго къ ни́мъ, по́йте гдⷭ҇а, и҆ превозноси́те є҆го̀ во вѣ́ки.

Возжелѣ́вый твоѐ ра́достное видѣ́нїе, пре́жде не вѣ́роваше ѳѡма̀: сподо́бльсѧ же тогѡ̀, бг҃а и҆ гдⷭ҇а тѧ̀ нарица́ше влⷣко, є҆го́же превозно́симъ во всѧ̀ вѣ́ки.

Претерпѣ́вшаго ѳѡмино̀ невѣ́рїе, и҆ показа́вшаго ре́бра, и҆ тогѡ̀ дла́нїю ѡ҆сѧза́нна бы́вша, по́йте гдⷭ҇а, и҆ превозноси́те є҆го̀ во всѧ̀ вѣ́ки.

Твоѐ неꙋдо́бное сокро́вище, ᲂу҆тае́ное на́мъ ѿве́рзе ѳѡма̀: бг҃осло́вивъ бо ѧ҆зы́комъ бг҃оно́снымъ, по́йте гдⷭ҇а, глаго́лаше, и҆ превозноси́те є҆го̀ во всѧ̑ вѣ́ки.

На ѳ҃-й пѣ́сни, Чⷭ҇тнѣ́йшꙋю: не пое́мъ: но і҆рмо́съ кі́йждо ли́къ.

Пѣ́снь ѳ҃.

І҆рмо́съ: Тебѐ свѣ́тлꙋю свѣщꙋ̀, и҆ мт҃рь бж҃їю, пречꙋ́днꙋю сла́вꙋ, и҆ вы́шшꙋю всѣ́хъ тва́рей, пѣ́сньми велича́емъ.

Тво́й свѣ́тлый де́нь и҆ пресвѣ́тлый хрⷭ҇тѐ, всесвѣ́тлꙋю бл҃года́ть, во́ньже кра́сный добро́тою ᲂу҆ченикѡ́мъ твои́мъ предста́лъ є҆сѝ, въ пѣ́снехъ велича́емъ.

Тебѐ бре́нною дла́нїю ѡ҆сѧза́ема въ ре́бра, и҆ не ѡ҆пали́вша сїю̀, ѻ҆гне́мъ невеще́ственнагѡ бж҃е́ственнагѡ сꙋщества̀, въ пѣ́снехъ велича́емъ.

Тѧ̀ ꙗ҆́кѡ бг҃а и҆з̾ гро́ба воскре́сша хрⷭ҇та̀, не ѻ҆чи́ма <<м҃а ѡ҆б.: 82>> ви́дѣвше, но серде́чною любо́вїю вѣ́ровавше, пѣ́сньми велича́емъ.

Катава́сїа: Свѣти́сѧ, свѣти́сѧ: И҆ покло́нъ.

Та́же, Ст҃ъ гдⷭ҇ь бг҃ъ на́шъ: на гла́съ а҃, три́жды.

Є҆ѯапостїла́рїй, гла́съ а҃. Подо́бенъ: Нб҃о ѕвѣзда́ми:

Мои́хъ ᲂу҆дѡ́въ рꙋко́ю твое́ю и҆спыта́вый ꙗ҆́звы, не не вѣ́рꙋй мѝ ѳѡмо̀, ᲂу҆ѧ́звленномꙋ тебѐ ра́ди: со ᲂу҆ченикѝ є҆диномꙋ́дрствꙋй, и҆ живꙋ́щаго проповѣ́дꙋй бг҃а. [Два́жды.]

Сла́ва, и҆ ны́нѣ:

Дне́сь весна̀ благоꙋха́етъ, и҆ но́ваѧ тва́рь ликꙋ́етъ. дне́сь взима́ютсѧ ключѝ двере́й, и҆ невѣ́рїѧ ѳѡмы̀ дрꙋ́га вопїю́ща: гдⷭ҇ь и҆ бг҃ъ мо́й.

На хвали́техъ стїхи̑ры, на д҃, гла́съ а҃.

Подо́бенъ: Прехва́льнїи мꙋ́чєницы:

По є҆́же и҆з̾ гро́ба твое́мъ стра́шномъ, жизнода́вче, воста́нїи, ꙗ҆́коже печа́тей не разрꙋши́лъ є҆сѝ хрⷭ҇тѐ гро́бныхъ, та́кѡ заключє́ннымъ две́ремъ вше́лъ є҆сѝ къ пресла̑внымъ а҆пⷭ҇лѡмъ твои̑мъ, радостотворѧ̀ и҆̀хъ, и҆ пра́вый тво́й дх҃ъ подаѧ̀ и҆̀мъ, за безмѣ́рнꙋю твою̀ ми́лость.

Ѳѡма̀ и҆́же и҆ близне́цъ не бѣ̀ прише́лъ, є҆гда̀ ты̀ ᲂу҆ченикѡ́мъ ꙗ҆ви́лсѧ є҆сѝ гдⷭ҇и. тѣ́мже не вѣ́рова твоемꙋ̀ воскресе́нїю, и҆ ви́дѣвшымъ тѧ̀ вопїѧ́ше: а҆́ще не вложꙋ̀ пе́рста въ ре́бра є҆гѡ̀ и҆ гвозде́й ꙗ҆́звы, не вѣ́рꙋю, ꙗ҆́кѡ воста́лъ є҆́сть.

Ꙗ҆́коже хо́щеши ѡ҆сѧжѝ, хрⷭ҇то́съ ѳѡмѣ̀ вопїѧ́ше: вложѝ рꙋ́кꙋ, и҆ позна́й мѧ̀ кѡ́сти и҆мꙋ́ща и҆ земно́е тѣ́ло, и҆ не бꙋ́ди невѣ́ренъ, ра́внѡ же со и҆нѣ́ми ᲂу҆вѣ́рисѧ. ѻ҆́нъ же возопѝ: бг҃ъ мо́й и҆ гдⷭ҇ь ты̀ є҆сѝ, сла́ва воста́нїю твоемꙋ̀. <<м҃в: 83>>

Сла́ва: гла́съ ѕ҃:

По дне́хъ ѻ҆сми́хъ воста́нїѧ твоегѡ̀ і҆и҃се цр҃ю̀, є҆диноро́дный сло́ве ѻ҆́ч҃їй ꙗ҆ви́лсѧ є҆сѝ ᲂу҆ченикѡ́мъ твои́мъ, заключє́ннымъ две́ремъ, ми́ръ тво́й подаѧ̀, и҆ невѣ́рꙋющемꙋ ᲂу҆ченикꙋ̀ зна́мєнїѧ показа́лъ є҆сѝ: прїидѝ и҆ ѡ҆сѧжѝ рꙋ́цѣ и҆ но́зѣ, и҆ нетлѣ̑ннаѧ моѧ̑ ре́бра. ѻ҆́нъ же вѣ́ровавъ, вопїѧ́ше тебѣ̀: гдⷭ҇ь мо́й и҆ бг҃ъ мо́й, сла́ва тебѣ̀.

И҆ ны́нѣ: Преблагослове́нна є҆сѝ:

Славосло́вїе вели́кое. И҆ тропа́рь пра́здника. Є҆ктєнїѝ, и҆ ѿпꙋ́стъ. Начина́ютсѧ же ѿ дне́сь лїті̑и, си́рѣчь и҆схождє́нїѧ въ притво́ръ. Та́кожде и҆ ѡ҆глашє́нїѧ преподо́бнагѡ ѻ҆ц҃а̀ на́шегѡ ѳео́дѡра стꙋді́та, въ ни́хже пое́мъ: Сла́ва, и҆ ны́нѣ, стїхи́рꙋ є҆ѵⷢ҇льскꙋю, гла́съ а҃:

На го́рꙋ ᲂу҆ченикѡ́мъ и҆дꙋ́щымъ, за земно́е вознесе́нїе, предста̀ гдⷭ҇ь: и҆ поклони́вшесѧ є҆мꙋ̀, и҆ да́нныѧ вла́сти вездѣ̀ наꙋчи́вшесѧ, въ поднебе́снꙋю посыла́хꙋсѧ, проповѣ́дати є҆́же и҆з̾ ме́ртвыхъ воскресе́нїе, и҆ є҆́же на нб҃са̀ возше́ствїе. и҆̀мже и҆ во вѣ́ки спребыва́ти нело́жный ѡ҆бѣща́сѧ хрⷭ҇то́съ бг҃ъ, и҆ сп҃съ дꙋ́шъ на́шихъ.

[зрѝ] Внемлѝ, ꙗ҆́кѡ лїті̑и въ притво́рѣ пре́жде пе́рвагѡ часа̀ быва́ютъ и҆ ѡ҆глашє́нїѧ стꙋді́това. И҆ ча́съ а҃. И҆ про́чее ѻ҆бы́чное. И҆ соверше́нный ѿпꙋ́стъ.

Вѣ́домо бꙋ́ди, ꙗ҆́кѡ вослѣ́дованїе слꙋчи́вшихсѧ ст҃ы́хъ во всѣ́хъ недѣ́лѧхъ ст҃ы́ѧ пѧтдесѧ́тницы пое́мъ въ повече́рїѧхъ.

Лїтꙋргі́а быва́етъ пора́нꙋ трꙋда̀ ра́ди бдѣ́ннагѡ. Часы̀ пою́тсѧ триѱа́лмнїи по ᲂу҆ста́вꙋ въ притво́рѣ, на ни́хже глаго́лемъ тропа́рь и҆ конда́къ пра́здника. <<м҃в ѡ҆б.: 84>>

Вѣ́домо бꙋ́ди, ꙗ҆́кѡ ѿ недѣ́ли но́выѧ и҆ до ѿда́нїѧ пра́здника па́схи, нача́ло лїтꙋргі́и си́це быва́етъ:

По є҆́же рещѝ дїа́конꙋ: Бл҃гословѝ влⷣко: И҆ і҆ере́ю: Бл҃гослове́но црⷭ҇тво: Пое́тъ і҆ере́й: Хрⷭ҇то́съ воскре́се: три́жды, ве́сь тропа́рь кромѣ̀ стїхѡ́въ. Да воскре́снетъ бг҃ъ: Та́же, є҆ктенїа̀, и҆ прѡ́чаѧ лїтꙋргі́и.

Вмѣ́стѡ же Досто́йно: пое́мъ:

А҆́гг҃лъ вопїѧ́ше бл҃года́тнѣй: чⷭ҇таѧ дв҃о ра́дꙋйсѧ, и҆ па́ки рекꙋ̀, ра́дꙋйсѧ: тво́й сн҃ъ воскре́се тридне́венъ ѿ гро́ба, и҆ мє́ртвыѧ воздви́гнꙋвый: лю́дїе весели́тесѧ.

Та́же і҆рмо́съ: Свѣти́сѧ, свѣти́сѧ:

Є҆гда́ же рече́тъ і҆ере́й: Со стра́хомъ бж҃їимъ: И҆ мы̀: Бл҃гослове́нъ грѧды́й во и҆́мѧ гдⷭ҇не, бг҃ъ гдⷭ҇ь и҆ ꙗ҆ви́сѧ на́мъ. І҆ере́й: Спасѝ бж҃е лю́ди твоѧ̀: И҆ мы̀ вмѣ́стѡ тропарѧ̀: Ви́дѣхомъ свѣ́тъ и҆́стинный: пое́мъ: Хрⷭ҇то́съ воскре́се: є҆ди́ножды: и҆ до ѿда́нїѧ па́схи. Быва́етъ же и҆ про́чее лїтꙋргі́и по ѻ҆бы́чаю. Во ѿпꙋ́стѣ же є҆гда̀ рече́тъ: Сла́ва тебѣ̀ хрⷭ҇тѐ бж҃е, ᲂу҆пова́нїе на́ше, сла́ва тебѣ̀. И҆ мы̀: Хрⷭ҇то́съ воскре́се: три́жды. Та́же ѿпꙋ́стъ лїтꙋргі́и по ѻ҆бы́чаю. На лїтꙋргі́и начина́емъ и҆з̾ѡбрази́тєльнаѧ, и҆ пое́мъ во бл҃же́ннахъ, ѿ канѡ́на пра́здника, пѣ́снь г҃ и҆ ѕ҃. По вхо́дѣ тропа́рь: Запеча́танꙋ гро́бꙋ: Сла́ва, и҆ ны́нѣ: конда́къ: Любопы́тною десни́цею: Прокі́менъ а҆пⷭ҇ла, гла́съ г҃: Ве́лїй гдⷭ҇ь на́шъ, и҆ ве́лїѧ крѣ́пость є҆гѡ̀, и҆ ра́зꙋма є҆гѡ̀ нѣ́сть числа̀. Сті́хъ: Хвали́те гдⷭ҇а ꙗ҆́кѡ бл҃гъ ѱало́мъ: бг҃ови на́шемꙋ да ᲂу҆слади́тсѧ хвале́нїе. А҆пⷭ҇лъ въ дѣѧ́нїихъ, зача́ло д҃і: Рꙋка́ми а҆пⷭ҇лъ: А҆ллилꙋ́їа, гла́съ и҃. Прїиди́те возра́дꙋемсѧ гдⷭ҇ви, воскли́кнемъ бг҃ꙋ сп҃си́телю на́шемꙋ. Сті́хъ: Ꙗ҆́кѡ бг҃ъ ве́лїй гдⷭ҇ь, и҆ цр҃ь ве́лїй по <<м҃г: 85>> все́й землѝ. Є҆ѵⷢ҇лїе і҆ѡа́нна, зача́ло ѯ҃є: Сꙋ́щꙋ по́здѣ въ де́нь то́й. Прича́стный: Похвалѝ і҆ерꙋсали́ме гдⷭ҇а, хвалѝ бг҃а твоего̀ сїѡ́не. А҆ллилꙋ́їа, три́жды. На трапе́зѣ быва́етъ ᲂу҆тѣше́нїе бра́тїи ве́лїе. И҆ воста́вше, ѿ трапе́зы, глаго́лемъ преждепи̑саннаѧ всѧ̑ въ сꙋббѡ́тꙋ свѣ́тлыѧ седми́цы.

Въ недѣ́лю а҆нтїпа́схи ве́чера.

Бл҃гослови́вшꙋ і҆ере́ю, глаго́лемъ: Хрⷭ҇то́съ воскре́се: три́жды. Та́же, Трист҃о́е. По Ѻ҆́ч҃е на́шъ: Гдⷭ҇и поми́лꙋй. в҃і. Сла́ва, и҆ ны́нѣ: Прїиди́те поклони́мсѧ: три́жды. И҆ глаго́лемъ ѳ҃-й ча́съ ѻ҆бы́чный триѱа́лмный: тропа́рь и҆ конда́къ пра́здника, Та́же пое́мъ вече́рню без̾ каѳі́смы. Гдⷭ҇и воззва́хъ: пое́мъ во гла́съ а҃.

Стїхи̑ры на ѕ҃. пра́здника г҃, гла́съ а҃.

Подо́бенъ: Прехва́льнїи мꙋ́чєницы:

По є҆́же и҆з̾ гро́ба твое́мъ стра́шномъ жизнода́вче воста́нїи ꙗ҆́коже печа́тей не разрꙋши́лъ є҆сѝ хрⷭ҇тѐ, гро́бныхъ, та́кѡ заключє́ннымъ две́ремъ вше́дъ є҆сѝ къ пресла̑внымъ а҆пⷭ҇лѡмъ твои̑мъ, радостотворѧ̀ и҆̀хъ, и҆ пра́вый тво́й дх҃ъ подаѧ̀ и҆̀мъ, за безмѣ́рнꙋю твою̀ ми́лость.

Ѳѡма̀ и҆́же и҆ близне́цъ не бѣ̀ прише́лъ, є҆гда̀ ты̀ ᲂу҆ченикѡ́мъ ꙗ҆ви́лсѧ є҆сѝ гдⷭ҇и. тѣ́мже не вѣ́рова твоемꙋ̀ воскрⷭ҇нїю и҆ ви́дѣвшымъ тѧ̀ вопїѧ́ше: а҆́ще не вложꙋ̀ пе́рста въ ре́бра є҆гѡ̀, и҆ гвозде́й ꙗ҆́звы, не вѣ́рꙋю ꙗ҆́кѡ воста́лъ є҆́сть. <<м҃г ѡ҆б.: 86>>

Ꙗ҆́коже хо́щеши ѡ҆сѧжѝ, хрⷭ҇то́съ ѳѡмѣ̀ вопїѧ́ше: вложѝ рꙋ́кꙋ, и҆ позна́й мѧ̀ кѡ́сти и҆мꙋ́ща, и҆ земно́е тѣ́ло, и҆ не бꙋ́ди невѣ́ренъ, ра́внѡ же со и҆нѣ́ми ᲂу҆вѣ́рисѧ. ѻ҆́нъ же возопѝ: бг҃ъ мо́й и҆ гдⷭ҇ь ты̀ є҆сѝ, сла́ва воста́нїю твоемꙋ̀.

И҆ ст҃а́гѡ мине́и подѡ́бны г҃. Сла́ва: ст҃а́гѡ.

А҆́ще ли нѝ: Сла́ва, и҆ ны́нѣ: пра́здника, гла́съ а҃:

Две́ремъ заключє́ннымъ, ᲂу҆ч҃нкѡ́мъ собра́ннымъ, вше́лъ є҆сѝ внеза́пꙋ всеси́льне і҆и҃се бж҃е на́шъ: и҆ ста́въ посредѣ̀ и҆̀хъ, ми́ръ да́въ, и҆спо́лнилъ є҆сѝ ст҃а́гѡ дх҃а: жда́ти же повелѣ́лъ є҆сѝ, и҆ ника́коже разлꙋча́тисѧ ѿ і҆ерⷭ҇ли́ма, до́ндеже ѡ҆блекꙋ́тсѧ, є҆́же съ высоты̀ си́лою. тѣ́мже вопїе́мъ тѝ: просвѣще́нїе, и҆ воскрⷭ҇нїе, и҆ ми́ре на́шъ, сла́ва тебѣ̀.

Вхо́дъ: Свѣ́те ти́хїй: Прокі́менъ вели́кїй, гла́съ з҃: Кто̀ бг҃ъ ве́лїй, ꙗ҆́кѡ бг҃ъ на́шъ; ты̀ є҆сѝ бг҃ъ творѧ́й чꙋдеса̀. Сті́хъ: Сказа́лъ є҆сѝ въ лю́дехъ си́лꙋ твою̀. Сті́хъ: И҆ рѣ́хъ: ны́нѣ нача́хъ, сїѧ̀ и҆змѣ́на десни́цы вы́шнѧгѡ. Сті́хъ: Помѧнꙋ́хъ дѣла̀ гдⷭ҇нѧ. И҆ па́ки: Кто̀ бг҃ъ ве́лїй, ꙗ҆́кѡ бг҃ъ на́шъ; ты̀ є҆сѝ бг҃ъ творѧ́й чꙋдеса̀. Та́же є҆ктенїа̀: Рце́мъ всѝ: и҆ Сподо́би гдⷭ҇и въ ве́черъ се́й: и҆ є҆ктенїа̀: И҆спо́лнимъ вече́рнюю моли́твꙋ на́шꙋ гдⷭ҇ви.

На стїхо́внѣ стїхи́ра воскре́сна ѻ҆смогла́сника, гла́съ а҃:

Вечє́рнїѧ на́шѧ моли̑твы прїимѝ ст҃ы́й гдⷭ҇и, и҆ пода́ждь на́мъ ѡ҆ставле́нїе грѣхѡ́въ: ꙗ҆́кѡ є҆ди́нъ є҆сѝ ꙗ҆вле́й въ мі́рѣ воскресе́нїе.

Сті́хъ: Къ тебѣ̀ возведо́хъ ѻ҆́чи моѝ:

Оу҆мили́тельный: Ꙗ҆́кѡ пꙋчи́на ве́лїѧ прегрѣше́нїй <<м҃д: 87>> мои́хъ сп҃се, и҆ лю́тѣ погрꙋжа́юсѧ согрѣше́ньми мои́ми, да́ждь мѝ рꙋ́кꙋ ꙗ҆́кѡ петро́ви, спаси́ мѧ бж҃е, и҆ поми́лꙋй мѧ̀.

Сті́хъ: Поми́лꙋй на́съ гдⷭ҇и, поми́лꙋй на́съ:

Мꙋ́чениченъ: Моли́твами гдⷭ҇и, всѣ́хъ ст҃ы́хъ, и҆ бцⷣы, тво́й ми́ръ да́ждь на́мъ, и҆ поми́лꙋй ны̀, ꙗ҆́кѡ є҆ди́нъ ще́дръ.

Сла́ва, и҆ ны́нѣ, гла́съ а҃:

По дне́хъ ѻ҆сми́хъ воста́нїѧ твоегѡ̀ гдⷭ҇и, ꙗ҆ви́лсѧ є҆сѝ ᲂу҆ченикѡ́мъ твои́мъ на мѣ́стѣ, и҆дѣ́же бѧ́хꙋ со́брани, и҆ возгласи́въ и҆̀мъ: ми́ръ ва́мъ, невѣ́рꙋющемꙋ ᲂу҆ченикꙋ̀ рꙋ́цѣ показа́лъ є҆сѝ, и҆ пречⷭ҇тое ребро̀. ѻ҆́нъ же вѣ́ровавъ вопїѧ́ше тебѣ̀: гдⷭ҇ь мо́й и҆ бг҃ъ мо́й, сла́ва тебѣ̀.

По трист҃о́мъ, тропа́рь пра́здника. А҆́ще ли тропа́рь ст҃а́гѡ, рцы̀ є҆го̀ пре́жде. Пото́мъ, Сла́ва, и҆ ны́нѣ: пра́здникꙋ: Запеча́танꙋ гро́бꙋ: И҆ ѿпꙋ́стъ.

Си́це ᲂу҆́бѡ быва́етъ вослѣ́дованїе вече́рнѧмъ во всѧ̑ недѣ̑ли ст҃ы́ѧ пентико́стїи.

[зрѝ] Ѿ дне́сь глаго́лемъ повече́рїе ма́лое. И҆ пое́мъ канѡ́нъ моле́бный прест҃ы́ѧ бцⷣы, во ѻ҆ктѡ́ихѣ. И҆ трипѣ́снцы трїѡ́ди днѐ, творе́нїе гдⷭ҇и́на і҆ѡ́сифа. И҆дѣ́же глаго́лемъ трипѣ́снѡ, бцⷣы пѣ́снь канѡ́на ѡ҆ставлѧ́етсѧ. По Досто́йно: и҆ по Ѻ҆́ч҃е на́шъ: глаго́лемъ конда́къ пра́здника, во всю̀ пѧтдесѧ́тницꙋ. Въ лїтꙋргі́ахъ же пое́тсѧ на бл҃же́ннахъ, ѿ канѡ́на пра́здника недѣ́ли, пѣ́снь рѧдова́ѧ на кі́йждо де́нь, со і҆рмосо́мъ на ѕ҃, си́це: Въ понедѣ́льникъ, а҃. во вто́рникъ, д҃. въ сре́дꙋ, є҃. въ четверто́къ, з҃. Въ пѧто́къ, и҃. въ сꙋббѡ́тꙋ, ѳ҃.

Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.