Вторая седмица (с понедельника по пяток)
<<рн҃є: 309>>
Въ понедѣ́льникъ в҃-ѧ седми́цы
по а҃-мъ стїхосло́вїи сѣда́льны ᲂу҆мили́тєльныѧ ѻ҆смогла́сника: и҆ бг҃оро́диченъ. По в҃-мъ же стїхосло́вїи сѣда́ленъ, гла́съ д҃.
Подо́бенъ: Оу҆диви́сѧ і҆ѡ́сифъ:
Престꙋпле́нїѧ плодо́мъ ᲂу҆мерщвле́на дꙋше́ю ѡ҆животворѝ хрⷭ҇тѐ посто́мъ и҆́стиннымъ и҆ покаѧ́нїемъ, молю́сѧ ꙗ҆́кѡ ще́дръ: и҆ да́ждь мѝ въ пꙋте́хъ при́снѡ ходи́ти пра́выхъ и҆ до́брыхъ, честны́хъ твои́хъ за́повѣдей, ꙗ҆́кѡ да бж҃е́ственныѧ сла́вы твоеѧ̀ ᲂу҆лꙋчи́въ, со всѣ́ми лю́бѧщими тѧ̀ славосло́влю твою̀ ѡ҆ всѣ́хъ і҆и҃се бл҃гость.
Сла́ва, то́йже. И҆ ны́нѣ, бг҃оро́диченъ. Подо́бенъ:
Треволне́ньми страсте́й безсо́вѣстный а҆́зъ ѡ҆бꙋрева́емь чⷭ҇таѧ, призыва́ю тѧ̀ те́плѣ, не пре́зри мѧ̀ ѻ҆каѧ́ннаго поги́бнꙋти, бе́зднꙋ млⷭ҇ти ро́ждшаѧ: ра́звѣ бо тебѐ наде́жды не стѧжа́хъ. да не ᲂу҆̀бо врагѡ́мъ пора́дованїе и҆ смѣ́хъ ᲂу҆пова́ѧй на тѧ̀ ꙗ҆влю́сѧ: и҆́бо мо́жеши є҆ли̑ка и҆ хо́щеши, ꙗ҆́кѡ мт҃и сꙋ́щи всѣ́хъ бг҃а.
По г҃-мъ стїхосло́вїи сѣда́ленъ, гла́съ ѕ҃.
Подо́бенъ: Гдⷭ҇и поми́лꙋй:
Гдⷭ҇и напра́ви ны̀ по́стъ повторѧ́ющыѧ, ѡ҆сщ҃е́нїе на́мъ ѡ҆сїѧ́й и҆ просвѣще́нїе ѡ҆правда́нїй твои́хъ: и҆ сподо́би на́съ приноси́ти тебѣ̀ бл҃гопрїѧ́тнꙋ мл҃твꙋ, колѣ̑на приклонѧ́ющихъ. ты́ бо є҆сѝ ѻ҆ц҃ъ на́шъ, и҆ мы̀ сы́нове твоѝ, и҆ тѧ̀ со стра́хомъ пое́мъ, и҆ и҆́мѧ твоѐ призыва́емъ.
Сла́ва, то́йже.
И҆ ны́нѣ, бг҃оро́диченъ: Нача́ло сп҃се́нїѧ гаврїи́лово провѣща́нїе къ дв҃ѣ бы́сть. слы́ша бо, є҆́же ра́дꙋйсѧ, не <<рн҃є ѡ҆б.: 310>> ѿбѣжѐ цѣлова́нїѧ, не ᲂу҆сꙋмнѣ́сѧ ꙗ҆́кѡ са́рра въ сѣ́ни, но си́це глаго́лаше: сѐ раба̀ гдⷭ҇нѧ, бꙋ́ди мнѣ̀ по глаго́лꙋ твоемꙋ̀.
Канѡ́нъ мине́и, и҆ трипѣ́снецъ господи́на і҆ѡ́сифа. И҆ стїхосло́вѧтсѧ пѣ̑сни. Гла́съ д҃.
Пѣ́снь а҃.
І҆рмо́съ: Трїста́ты крѣ̑пкїѧ:
Є҆ди́не бл҃гі́й, и҆сто́чниче млⷭ҇ти, а҆́гнче бж҃їй, взе́млѧй ꙗ҆́кѡ бг҃ъ мі́ра согрѣшє́нїѧ, сп҃сѝ мѧ̀ грѣхѡ́въ треволне́нїемъ погрꙋжа́ема, къ приста́нищꙋ покаѧ́нїѧ наставлѧ́ѧ мѧ̀.
По́стъ чи́стый, ᲂу҆дале́нїе грѣха̀, ѿчꙋжде́нїе страсте́й, любо́вь къ бг҃ꙋ, мл҃твы прилѣжа́нїе, сле́зы со ᲂу҆миле́нїемъ, и҆ ѡ҆ ᲂу҆бо́гихъ попече́нїе, хрⷭ҇то́съ въ писа́нїихъ завѣща̀.
Оу҆ѧ́звлена дꙋше́ю, грѣхо́внымъ ѻ҆рꙋ́жїемъ, и҆ ᲂу҆ра́нена сꙋ́ща мно́гими ѕлы́ми, врачꙋ̀ дꙋ́шъ на́шихъ, и҆сцѣлѝ ꙗ҆́кѡ бл҃годѣ́тель, наложи́въ мнѣ̀ лѣка̑рства мꙋ́дрыхъ за́повѣдей твои́хъ чл҃вѣколю́бче.
Бг҃оро́диченъ: Нескве́рнаѧ ски́нїе, прест҃а́ѧ дв҃о, ѡ҆скверне́ннаго мѧ̀ лю́тыхъ страсте́й наведе́ньми, и҆сто́чникомъ млⷭ҇ти твоеѧ̀ ѡ҆чи́сти, и҆ да́ждь мѝ ᲂу҆миле́нїѧ тꙋ́чы влⷣчце, грѣха̀ глꙋбинꙋ̀ потреблѧ́ющи.
И҆́ный, господи́на ѳео́дѡра, гла́съ ѕ҃.
І҆рмо́съ: Помо́щникъ и҆ покрови́тель бы́сть мнѣ̀:
Ꙗ҆́кѡ попра́здничнꙋю ра́дость, и҆ вторꙋ́ю седми́цꙋ свѣтотво́рныхъ постѡ́въ бра́тїе прїи́мше, любо́вїю воспои́мъ хрⷭ҇та̀, бж҃е́ственнѡ веселѧ́щесѧ.
Оу҆миле́нїѧ вре́мѧ по́стное ны́нѣ ѡ҆брѣ́тше, воспла́чимъ ѕѣ́льнѡ и҆ воздохне́мъ, и҆ воздѣжи́мъ рꙋ́цѣ ко є҆ди́номꙋ и҆зба́вителю: є҆́же сп҃стѝ дꙋ́шы на́шѧ. <<рн҃ѕ: 311>>
Трⷪ҇ченъ: Трїѷпоста́снаѧ є҆ди́нице, нача́льнѣйшаѧ гпⷭ҇жѐ всѣ́хъ, совершеннонача́льнаѧ, пренача́льнаѧ, сама̀ на́съ сп҃сѝ, ѻ҆́ч҃е, и҆ сн҃е, и҆ дш҃е прест҃ы́й.
Бг҃оро́диченъ: Кто̀ родѝ сн҃а невсѣ́ѧна ѻ҆́ч҃имъ зако́номъ; сего̀ ᲂу҆́бѡ ражда́етъ ѻ҆ц҃ъ без̾ мт҃ре: пресла́вное чꙋ́до, ты́ бо родила̀ є҆сѝ чⷭ҇таѧ, бг҃а вкꙋ́пѣ и҆ чл҃вѣ́ка.
Сла́ва тебѣ̀ бж҃е на́шъ, сла́ва тебѣ̀.
Ꙗ҆́кѡ понесꙋ̀ гнѣ́въ тво́й хрⷭ҇тѐ мо́й, є҆гда̀ на сꙋ́дъ прїи́деши; ко́е же ѡ҆брѣ́тъ сло́во да́мъ та́мѡ, не содѣ́ѧвъ, ни сотвори́въ твою̀ во́лю хрⷭ҇тѐ: тѣ́мже пре́жде конца̀ ѡ҆сла́би мѝ.
І҆рмо́съ: Помо́щникъ и҆ покрови́тель бы́сть мнѣ̀ во сп҃се́нїе, се́й мо́й бг҃ъ, и҆ просла́влю є҆го̀, бг҃ъ ѻ҆ц҃а̀ моегѡ̀, и҆ вознесꙋ̀ є҆го̀: сла́внѡ бо просла́висѧ.
Пѣ́снь и҃.
І҆рмо́съ: И҆зба́вителю всѣ́хъ:
Мимоходѧ̀ житїѧ̀ непостоѧ́нное, въ разбо́йничєскїѧ по́мыслы впадо́хъ, и҆ ᲂу҆ѧ́звленъ возсмердѣ́хсѧ: врачꙋ̀ недꙋ́гꙋющихъ, да́ждь мѝ рꙋ́кꙋ, ст҃ы́хъ твои́хъ всѣ́хъ мольба́ми.
Лю́тагѡ грѣха̀ бꙋ́рѧ моѐ помышле́нїе смꙋща́етъ, ꙗ҆́коже петра̀ сп҃сѝ мѧ̀ і҆и҃се, пою́ща: всѧ̑ дѣла̀ бл҃гослови́те, по́йте гдⷭ҇а.
Воздержа́нїемъ стра̑сти ᲂу҆мертви́мъ, поще́нїемъ дꙋ́хъ впери́мъ къ нб҃сѝ, и҆ воззове́мъ ᲂу҆миле́нїемъ се́рдца: согрѣши́хомъ тѝ бж҃е, ꙗ҆́кѡ ще́дрый простѝ.
Бг҃оро́диченъ: Во чре́во твоѐ всели́всѧ вы́шнїй, нб҃съ ши́ршꙋю тѧ̀ показа̀, и҆ предста́тельство неѡбори́мое вопїю́щихъ дв҃о: всѧ̑ дѣла̀ бл҃гослови́те, по́йте гдⷭ҇а. <<рн҃ѕ ѡ҆б.: 312>>
И҆́ный. І҆рмо́съ: Є҆гѡ́же вѡ́инства:
Страсте́й мꙋчи́тельствомъ гдⷭ҇и, не порабоще́нꙋ дꙋ́шꙋ мою̀ покажѝ: да свобо́днѡ творѧ̀ во́лю твою̀ ра́дꙋюсѧ, и҆ сла́влю держа́вꙋ твою̀ во вѣ́ки.
И҆са́ѵово невоздержа́нїе возненави́ждь дꙋшѐ моѧ̀, и҆ і҆а́кѡвлимъ ревнꙋ́й дѡ́брымъ дѣлѡ́мъ, ѡ҆больстѝ велїа́ра воздержа́нїемъ, ѡ҆богати́сѧ бж҃е́ственными, и҆ воспо́й во вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Є҆ди́наго бг҃а по сꙋществꙋ̀ почита́ю, трѝ ѵ҆поста̑си пою̀ ѡ҆предѣли́тельнѡ, и҆́ныѧ, но не и҆́накїѧ. поне́же бж҃ество̀ є҆ди́но, и҆ є҆ди́на въ трїе́хъ держа́ва: и҆́бо ѻ҆ц҃ъ, сн҃ъ и҆ дх҃ъ.
Бг҃оро́диченъ: И҆з̾ свѣ́тлыѧ проше́дъ ᲂу҆тро́бы твоеѧ̀, ꙗ҆́кѡ жени́хъ ѿ черто́га, возсїѧ̀ хрⷭ҇то́съ, свѣ́тъ сꙋ́щымъ во тьмѣ̀ вели́кїй: и҆́бо пра́вды сл҃нце ѡ҆блиста́въ просвѣтѝ чⷭ҇таѧ мі́ръ.
Сла́ва тебѣ̀ бж҃е на́шъ, сла́ва тебѣ̀.
Во́дꙋ пїѧ́й никто́же ѡ҆безꙋ́мисѧ, ꙗ҆ви́сѧ же нѡ́е на́гъ вїно́мъ и҆скꙋ́шьсѧ: сѣ́мена же ѕло́бы лѡ́тъ ѿсю́дꙋ ражда́етъ. бѣ́гай ѽ дꙋшѐ моѧ̀ си́хъ подража́нїѧ, хрⷭ҇та̀ пою́щи.
І҆рмо́съ: Є҆го́же вѡ́инства нбⷭ҇наѧ сла́вѧтъ, и҆ трепе́щꙋтъ херꙋві́ми и҆ серафі́ми, всѧ́ко дыха́нїе и҆ тва́рь, по́йте, бл҃гослови́те и҆ превозноси́те во всѧ̑ вѣ́ки.
Пѣ́снь ѳ҃.
І҆рмо́съ: Є҆́ѵа ᲂу҆́бѡ недꙋ́гомъ:
Пости́мсѧ ѿ страсте́й гнѣ́ва, наслади́мсѧ любвѐ нело́жныѧ, напита́имъ ᲂу҆бѡ́гїѧ хлѣ́бомъ, бж҃е́ственною пита́еми бл҃года́тїю, и҆ слеза́ми сле́зы ᲂу҆гаси́мъ бꙋ́дꙋщагѡ и҆зрече́нїѧ. <<рн҃з: 313>>
Ѻ҆каѧ́ннаѧ дꙋшѐ воздохнѝ, сѣ́тꙋй, покаѧ́нїѧ ѡ҆́бразы покажѝ, ны́нѣ при две́рехъ де́нь, сꙋдѧ́й нелицемѣ́рнѡ сѣди́тъ, комꙋ́ждо ѿдава́ѧ достѡ́йнаѧ содѣ́ѧнныхъ, ꙗ҆́коже пи́сано є҆́сть.
Не стѧжа́хъ дѣѧ́нїй бл҃ги́хъ, ѡ҆скверни́хъ ри́зꙋ, ю҆́же прїѧ́хъ, бж҃е́ственнагѡ кр҃ще́нїѧ ѡ҆дѣѧ́нїе: во тьмѣ̀ невѣ́дѣнїѧ хождꙋ̀: свѣ́томъ мѧ̀ лица̀ твоегѡ̀ гдⷭ҇и, ѿча́ѧна ны́нѣ и҆спра́ви.
Бг҃оро́диченъ: Мр҃і́е гпⷭ҇жѐ всѧ́ческихъ, всѧ́кимъ мѧ̀ грѣхо̑мъ порабоще́на, ты̀ свободѝ дв҃о, свободи́телѧ дꙋ́шъ на́шихъ поро́ждшаѧ: ты́ бо па́че сло́ва родила̀ є҆сѝ сꙋществи́тельнꙋю бл҃гость.
И҆́ный. І҆рмо́съ: Безсѣ́меннагѡ зача́тїѧ:
Ны́нѣ ѕлопостра́ждимъ ꙗ҆́кѡ во́ини хрⷭ҇тѡ́вы: є҆ли́ко бо є҆ли́ко вре́мѧ мимохо́дитъ, вѣнцы̀ плетꙋ́тсѧ подвиза́ющымсѧ, ꙗ҆̀же возда́стъ хрⷭ҇то́съ, є҆гда̀ прїи́детъ со сла́вою а҆́гг҃льскою сꙋди́ти все́й землѝ.
Ве́сь ᲂу҆ѧзви́хсѧ, ве́сь, хрⷭ҇тѐ мо́й, ѡ҆стрꙋпи́хсѧ, и҆сцѣлѝ моѧ̑ гнѡ́йныѧ ꙗ҆́звы, страстна̑ѧ ᲂу҆грызє́нїѧ сꙋ̑щаѧ ѿ грѣха̀, да ᲂу҆слы́шꙋ, ꙗ҆́кѡ прокаже́нный, гла́съ тво́й ст҃ы́й: ꙗ҆́кѡ хощꙋ̀, ѡ҆чи́стисѧ.
Трⷪ҇ченъ: Є҆ди́нагѡ є҆динороди́телю, є҆диноро́днагѡ сн҃а ѻ҆́ч҃е: и҆ є҆ди́не є҆ди́нагѡ свѣ́те, свѣ́та сїѧ́нїе: и҆ є҆ди́ный є҆ди́нѣ є҆ди́нагѡ бг҃а, ст҃ы́й дш҃е, гдⷭ҇а гдⷭ҇ь вои́стиннꙋ сы́й: ѽ трⷪ҇це є҆ди́нице ст҃а́ѧ, сп҃сѝ мѧ̀ бг҃осло́вѧща тѧ̀.
Бг҃оро́диченъ: Чꙋ́до ржⷭ҇тва̀ твоегѡ̀ ᲂу҆жаса́етъ мѧ̀, всенепоро́чнаѧ, ка́кѡ зачина́еши безсѣ́меннѡ непостижи́маго; рцы̀, ка́кѡ дв҃ствꙋеши, ро́ждши ꙗ҆́кѡ мт҃и; є҆́же па́че є҆стества̀ вѣ́рою прїе́мь, рожде́нномꙋ поклони́сѧ, є҆ли̑ка хо́щетъ бо, и҆ мо́жетъ. <<рн҃з ѡ҆б.: 314>>
Сла́ва тебѣ̀ бж҃е на́шъ, сла́ва тебѣ̀.
По́стъ мѡѷсе́а бг҃ови́дца содѣ́ла, и҆лїю̀ дре́вле пла́меннаго воза́таѧ, па́ѵла же, дꙋшѐ моѧ̀, стра́шнаго неботе́чника. тѣ́мже пости́мсѧ ѿ ѕло́бъ, и҆ на высотꙋ̀ безстра́стїѧ и҆ мы̀ восхи́тимсѧ.
І҆рмо́съ: Безсѣ́меннагѡ зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ: бж҃їе бо рожде́нїе ѡ҆бновлѧ́етъ є҆стества̀. тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю мт҃рь, правосла́внѡ велича́емъ.
Свѣти́ленъ гла́са.
На стїхо́внѣ стїхи́ра самогла́сна, гла́съ є҃:
Ди́вное ѻ҆рꙋ́жїе, мл҃тва и҆ по́стъ: се́й мѡѷсе́а законописа́телѧ показа̀, и҆ и҆лїю̀ въ же́ртвахъ ревни́телѧ. въ то́мъ пребыва́юще вѣ́рнїи, сп҃сꙋ возопїи́мъ: тебѣ̀ є҆ди́номꙋ согрѣши́хомъ, поми́лꙋй на́съ. два́жды.
Мꙋ́чениченъ: Бл҃гослове́нное во́инство цр҃ѧ̀ нбⷭ҇нагѡ: а҆́ще бо и҆ земноро́днїи бѧ́хꙋ стрⷭ҇тоте́рпцы, но а҆́гг҃льскїй са́нъ потща́шасѧ дости́гнꙋти, ѡ҆ тѣлесѣ́хъ небре́гше, и҆ страстьмѝ безпло́тныхъ ᲂу҆досто́ившесѧ че́сти: мл҃твами и҆́хъ, гдⷭ҇и, сп҃сѝ дꙋ́шы на́шѧ.
Сла́ва, и҆ ны́нѣ, бг҃оро́диченъ. Тебѣ̀ мо́лимсѧ, ꙗ҆́кѡ бж҃їи мт҃ри, бл҃гослове́ннаѧ, молѝ ѡ҆ сп҃се́нїи дꙋ́шъ на́шихъ.
На ѕ҃-мъ часѣ̀, тропа́рь прⷪ҇ро́чества, гла́съ є҃:
Созда́вый наединѣ̀ сердца̀ на̑ша, помѧнѝ, ꙗ҆́кѡ пе́рсть є҆смы̀, не ѡ҆сꙋдѝ на́съ въ преиспо́днихъ землѝ безгрѣ́шне.
Прокі́менъ, ѱало́мъ к҃а, гла́съ ѕ҃: Боѧ́щїисѧ гдⷭ҇а восхвали́те є҆го̀. Сті́хъ: Бж҃е, бж҃е мо́й, вонми́ ми, вскꙋ́ю ѡ҆ста́вилъ мѧ̀ є҆сѝ;
Прⷪ҇ро́чества и҆са́їина чте́нїе. [Гл. д҃, ст. а҃-ѕ҃. Гл. є҃, ст. а҃-з҃.]
Та́кѡ глаго́летъ гдⷭ҇ь. Въ де́нь ѻ҆́ный возсїѧ́етъ бг҃ъ въ совѣ́тѣ со сла́вою на землѝ, є҆́же вознестѝ и҆ просла́вити ѡ҆ста́нокъ і҆и҃лѧ. И҆ бꙋ́детъ ѡ҆ста́нокъ въ (л.рн҃и) сїѡ́нѣ, и҆ ѡ҆ста́нокъ во і҆ерⷭ҇ли́мѣ, свѧ́ти нарекꙋ́тсѧ всѝ, напи́саннїи въ жи́знь во і҆ерⷭ҇ли́мѣ. ꙗ҆́кѡ ѿмы́етъ гдⷭ҇ь скве́рнꙋ сынѡ́въ и҆ дще́рей сїѡ́нскихъ, и҆ кро́вь і҆ерⷭ҇ли́мскꙋ ѡ҆чи́ститъ ѿ среды̀ и҆́хъ дꙋ́хомъ сꙋда̀, и҆ дꙋ́хомъ зно́ѧ. И҆ прїи́детъ гдⷭ҇ь, и҆ бꙋ́детъ всѐ мѣ́сто горы̀ сїѡ́ни, и҆ всѧ̑ ꙗ҆̀же ѻ҆́крестъ є҆ѧ̀ ѡ҆сѣни́тъ ѻ҆́блакъ во днѝ, и҆ ꙗ҆́кѡ ды́ма и҆ свѣ́та ѻ҆́гненна горѧ́ща въ нощѝ, все́ю сла́вою покры́етсѧ: И҆ бꙋ́детъ въ сѣ́нь ѿ зно́ѧ, и҆ въ покро́въ и҆ въ сокрове́нїе ѿ же́стости и҆ дождѧ̀. Воспою̀ ны́нѣ возлю́бленномꙋ пѣ́снь, возлю́бленнагѡ моегѡ̀ вїногра́дꙋ моемꙋ̀: вїногра́дъ бы́сть возлю́бленномꙋ въ ро́зѣ, на мѣ́стѣ тꙋ́чнѣ. И҆ ѡ҆гражде́нїемъ ѡ҆гради́хъ, и҆ ѡ҆копа́хъ, и҆ насади́хъ ло́зꙋ и҆збра́ннꙋ, и҆ созда́хъ сто́лпъ посредѣ̀ є҆гѡ̀, и҆ предточи́лїе и҆скопа́хъ въ не́мъ: и҆ жда́хъ, да сотвори́тъ гро́здїе, и҆ сотворѝ те́рнїе, и҆ ны́нѣ живꙋ́щїи во і҆ерⷭ҇ли́мѣ, и҆ человѣ́че і҆ꙋ́динъ, сꙋди́те междꙋ̀ мно́ю и҆ вїногра́домъ мои́мъ. Что̀ сотворю̀ є҆щѐ вїногра́дꙋ моемꙋ̀, и҆ не сотвори́хъ є҆мꙋ̀; зане́же жда́хъ, да сотвори́тъ гро́здїе, сотвори́ же те́рнїе. Ны́нѣ ᲂу҆́бѡ возвѣщꙋ̀ ва́мъ, что̀ а҆́зъ сотворю̀ вїногра́дꙋ моемꙋ̀: ѿимꙋ̀ ѡ҆гражде́нїе є҆гѡ̀, и҆ бꙋ́детъ въ разграбле́нїе, и҆ разорю̀ стѣ́нꙋ є҆гѡ̀, и҆ бꙋ́детъ въ попра́нїе. И҆ ѡ҆ста́влю вїногра́дъ мо́й, и҆ ктомꙋ̀ не ѡ҆брѣ́жетсѧ, нижѐ покопа́етсѧ, и҆ взы́детъ на не́мъ, ꙗ҆́коже на лѧди́нѣ, те́рнїе: и҆ ѻ҆блакѡ́мъ заповѣ́мъ, є҆́же не ѡ҆дожди́ти на него̀ дождѧ̀. Вїногра́дъ бо гдⷭ҇а саваѡ́ѳа, до́мъ і҆и҃левъ є҆́сть, и҆ человѣ́къ і҆ꙋ́динъ, но́вый са́дъ возлю́бленный.
Прокі́менъ, ѱало́мъ к҃в, гла́съ ѕ҃: Же́злъ тво́й и҆ па́лица твоѧ̀, та̑ мѧ̀ ᲂу҆тѣ́шиста. Сті́хъ: Гдⷭ҇ь пасе́тъ мѧ̀, и҆ ничто́же мѧ̀ лиши́тъ. <<рн҃и ѡ҆б.: 316>>
Въ понедѣ́льникъ ве́чера
во свѣти́льничное по предначина́тельномъ ѱалмѣ̀, стїхосло́вимъ каѳі́смꙋ: Ко гдⷭ҇ꙋ, внегда̀ скорбѣ́ти мѝ: На Гдⷭ҇и воззва́хъ, поста́вимъ стїхѡ́въ ѕ҃: и҆ пое́мъ стїхи̑ры подо́бны трїѡ́ди. Творе́нїе господи́на і҆ѡ́сифа, гла́съ и҃. Подо́бенъ: Что̀ ва́съ нарече́мъ:
Комꙋ̀ ᲂу҆подо́биласѧ є҆сѝ ѻ҆каѧ́ннаѧ, лѣнѧ́щисѧ, ѽ дꙋшѐ! и҆ не творѧ́щи дѡ́браѧ, но лю́бѧщи при́снѡ въ ѕлы́хъ пребыва́нїе; сꙋ́дъ при две́рехъ, пока́йсѧ, посто́мъ и҆ мл҃твою ѡ҆чи́стисѧ, и҆ влⷣцѣ твоемꙋ̀ возопі́й: согрѣши́хъ тѝ, простѝ ꙗ҆́кѡ бл҃гоꙋтро́бенъ, и҆ и҆справле́нїе мнѣ̀ да́рꙋй.
И҆мѣ́ѧй бл҃гости пꙋчи́нꙋ, пꙋчи̑ны мои́хъ грѣхѡ́въ лꙋка̑выѧ и҆зсꙋшѝ хрⷭ҇тѐ, ꙗ҆́кѡ безгрѣ́шный бг҃ъ, и҆ да́ждь се́рдцꙋ моемꙋ̀ ᲂу҆миле́нїе, пото́ки беззако́нїѧ ѿе́млющее: да пою̀ и҆ сла́влю твоѐ бл҃гоꙋтро́бїе неизрече́нное, долготерпѣли́ве бл҃годѣ́телю дꙋ́шъ на́шихъ.
И҆́на стїхи́ра господи́на ѳео́дѡра, гла́съ то́йже.
Подо́бенъ: Во є҆де́мѣ ра́й:
Приведы́й и҆ ны́нѣ на́съ бж҃е, вре́мене ѡ҆бше́ствїе всечⷭ҇тна́гѡ поста̀ соверши́ти, и҆ дарова́вый на́мъ во ст҃о́е по́прище вторы́ѧ седми́цы вни́ти: са́мъ сподо́би гдⷭ҇и, и҆ къ бꙋ́дꙋщемꙋ бл҃готещѝ, тѣ́ло и҆ дꙋ́шꙋ на́шꙋ и҆ бл҃годѣ́тельствꙋѧ и҆ ᲂу҆крѣплѧ́ѧ: ꙗ҆́кѡ да дости́гнемъ соверши́вше тече́нїе мꙋ́жески, въ гдⷭ҇скїй де́нь воскрⷭ҇нїѧ твоегѡ̀, всѝ въ ра́дости: и҆ да вѣнцы̀ носѧ́ще, непреста́ннѡ тѧ̀ похва́лимъ.
И҆ мине́и г҃. Сла́ва, и҆ ны́нѣ, бг҃оро́диченъ.
Прокі́менъ, ѱало́мъ к҃г, гла́съ а҃: Гдⷭ҇ь крѣ́покъ и҆ си́ленъ, гдⷭ҇ь си́ленъ въ бра́ни. Сті́хъ: Гдⷭ҇нѧ землѧ̀, и҆ и҆сполне́нїе є҆ѧ̀. <<рн҃ѳ: 317>>
Бытїѧ̀ чте́нїе. [Гл. г҃, ст. к҃а-к҃д. Гл. д҃, ст. а҃-з҃.]
Сотворѝ гдⷭ҇ь бг҃ъ а҆да́мꙋ и҆ женѣ̀ є҆гѡ̀ ри̑зы ко́жаны, и҆ ѡ҆блечѐ и҆̀хъ. И҆ речѐ бг҃ъ: сѐ а҆да́мъ бы́сть ꙗ҆́кѡ є҆ди́нъ ѿ на́съ, є҆́же разꙋмѣ́ти до́брое и҆ лꙋка́вое. и҆ ны́нѣ да не когда̀ простре́тъ рꙋ́кꙋ свою̀, и҆ во́зметъ ѿ дре́ва жи́зни, и҆ снѣ́стъ, и҆ жи́въ бꙋ́детъ во вѣ́къ. И҆ и҆згна̀ є҆го̀ гдⷭ҇ь бг҃ъ и҆з̾ раѧ̀ сла́дости, дѣ́лати зе́млю: ѿ неѧ́же взѧ́тъ бы́сть. И҆ и҆зри́не а҆да́ма, и҆ вселѝ є҆го̀ прѧ́мѡ раѧ̀ сла́дости: и҆ приста́ви херꙋві́ма, и҆ пла́менное ѻ҆рꙋ́жїе ѡ҆браща́емое, храни́ти пꙋ́ть дре́ва жи́зни. А҆да́мъ же позна̀ є҆́ѵꙋ женꙋ̀ свою̀, и҆ заче́нши родѝ ка́їна. и҆ речѐ: стѧжа́хъ человѣ́ка бг҃омъ. И҆ приложѝ роди́ти бра́та є҆гѡ̀ а҆́велѧ. и҆ бы́сть а҆́вель па́стырь ѻ҆ве́цъ: ка́їнъ же бѣ̀ дѣ́лаѧй зе́млю. И҆ бы́сть по дне́хъ принесѐ ка́їнъ ѿ плодѡ́въ землѝ же́ртвꙋ бг҃ꙋ: И҆ а҆́вель принесѐ и҆ то́й ѿ перворо́дныхъ ѻ҆ве́цъ свои́хъ, и҆ ѿ тꙋ́кѡвъ и҆́хъ: и҆ призрѣ̀ бг҃ъ на а҆́велѧ и҆ на да́ры є҆гѡ̀: На ка́їна же и҆ на жє́ртвы є҆гѡ̀ не внѧ́тъ, и҆ ѡ҆печа́лисѧ ка́їнъ ѕѣлѡ̀, и҆ и҆спадѐ лицѐ є҆гѡ̀. И҆ речѐ гдⷭ҇ь бг҃ъ ка́їнꙋ: вскꙋ́ю приско́рбенъ бы́лъ є҆сѝ; и҆ вскꙋ́ю и҆спадѐ лицѐ твоѐ; Є҆да̀ а҆́ще пра́вѡ прине́слъ є҆сѝ, пра́вѡ же не раздѣли́лъ є҆сѝ, не согрѣши́лъ ли є҆сѝ; ᲂу҆мо́лкни: къ тебѣ̀ ѡ҆браще́нїе є҆гѡ̀, и҆ ты̀ тѣ́мъ ѡ҆блада́еши.
Прокі́менъ, ѱало́мъ к҃д, гла́съ ѕ҃: При́зри на мѧ̀ и҆ поми́лꙋй мѧ̀. Сті́хъ: Къ тебѣ̀ гдⷭ҇и, воздвиго́хъ дꙋ́шꙋ мою̀.
При́тчей чте́нїе. [Гл. г҃, ст. л҃д-л҃є. Гл. д҃, ст. а҃-к҃в]
Гдⷭ҇ь гѡ́рдымъ проти́витсѧ, смирє́ннымъ же дае́тъ бл҃года́ть. Сла́вꙋ премꙋ́дрїи наслѣ́дѧтъ, нечести́вїи же вознесо́ша безче́стїе. Послꙋ́шайте дѣ́ти наказа́нїѧ ѻ҆́тча, и҆ внемли́те разꙋмѣ́ти помышле́нїе. Да́ръ бо бл҃гі́й <<рн҃ѳ ѡ҆б.: 318>> да́рꙋю ва́мъ: моегѡ̀ зако́на не ѡ҆ставлѧ́йте. Сы́нъ бо бы́хъ и҆ а҆́зъ ѻ҆ц҃ꙋ̀ послꙋшли́вый, и҆ люби́мый пред̾ лице́мъ ма́тере: И҆́же глаго́лаша, и҆ ᲂу҆чи́ша мѧ̀: да ᲂу҆твержда́етсѧ на́ше сло́во въ твое́мъ се́рдцѣ, хранѝ за́пѡвѣди, не забыва́й. Стѧжѝ премꙋ́дрость, стѧжѝ ра́зꙋмъ: не забꙋ́ди, нижѐ пре́зри речє́нїѧ мои́хъ ᲂу҆́стъ, нижѐ ᲂу҆клони́сѧ ѿ глагѡ́лъ ᲂу҆́стъ мои́хъ. Не ѡ҆ста́ви є҆ѧ̀, и҆ и҆́метсѧ тебѐ: возжелѣ́й є҆ѧ̀, и҆ соблюде́тъ тѧ̀. Нача́ло премꙋ́дрости, стѧжа́ти премꙋ́дрость, и҆ во все́мъ стѧжа́нїи твое́мъ стѧжѝ ра́зꙋмъ. Ѡ҆градѝ ю҆̀, и҆ вознесе́тъ тѧ̀: почтѝ ю҆̀, да тѧ̀ ѡ҆б̾и́метъ: Да да́стъ главѣ̀ твое́й вѣне́цъ бл҃года́тей, вѣнце́мъ же сла́дости защити́тъ тѧ̀. Слы́ши сн҃е, и҆ прїимѝ моѧ̑ словеса̀, и҆ ᲂу҆мно́жатсѧ лѣ̑та живота̀ твоегѡ̀, да тѝ бꙋ́дꙋтъ мно́зи пꙋтѝ житїѧ̀. Пꙋтє́мъ бо премꙋ́дрости ᲂу҆чꙋ́ тѧ, наставлѧ́ю же тебѐ на течє́нїѧ пра̑ваѧ: А҆́ще бо хо́диши, не за́пнꙋтсѧ стѡпы̀ твоѧ̑: а҆́ще ли тече́ши, не ᲂу҆трꙋди́шисѧ. И҆ми́сѧ моегѡ̀ наказа́нїѧ, не ѡ҆ста́ви: но сохранѝ є҆̀ себѣ̀ жи́знь твою̀: На пꙋти̑ нечести́выхъ не и҆дѝ, нижѐ возревнꙋ́й пꙋтє́мъ законопрестꙋ́пныхъ. На не́мже а҆́ще мѣ́стѣ вѡ́ѧ соберꙋ́тъ, не и҆дѝ та́мѡ: ᲂу҆клони́сѧ же ѿ ни́хъ, и҆ и҆змѣнѝ. Не ᲂу҆́снꙋтъ бо, а҆́ще ѕла̀ не сотворѧ́тъ: ѿи́метсѧ со́нъ ѿ ни́хъ, и҆ не спѧ́тъ. Ті́и бо пита́ютсѧ пи́щею нече́стїѧ, вїно́мъ же законопрестꙋ́пнымъ ᲂу҆пива́ютсѧ. Пꙋтїе́ же првⷣныхъ подо́бнѣ свѣ́тꙋ свѣ́тѧтсѧ: предхо́дѧтъ, и҆ просвѣща́ютъ, до́ндеже и҆спра́витсѧ де́нь. Пꙋтїе́ же нечести́выхъ те́мни: не вѣ́дѧтъ, ка́кѡ претыка́ютсѧ. Сы́не, мои̑мъ глаго́лѡмъ внима́й, къ мои̑мъ же словесє́мъ прилага́й ᲂу҆́хо твоѐ. Да не ѡ҆скꙋдѣ́ютъ тѝ и҆сто́чницы твоѝ, хранѝ ѧ҆̀ въ се́рдцѣ твое́мъ: Живо́тъ бо сꙋ́ть всѣ̑мъ ѡ҆брѣта́ющымъ ѧ҆̀, и҆ все́й пло́ти и҆́хъ и҆сцѣле́нїе.<<р҃ѯ: 319>>
На стїхо́внѣ самогла́сенъ днѐ, гла́съ г҃. Два́жды:
Дх҃о́внымъ посто́мъ пости́мсѧ, расто́ргнемъ всѧ́кое развраще́нїе, ѡ҆ста́немсѧ же и҆ собла́знѡвъ грѣха̀, ѿпꙋ́стимъ и҆ бра́тїи до́лги, да и҆ на́мъ ѡ҆ста́вѧтсѧ прегрѣшє́нїѧ на̑ша. та́кѡ бо возопи́ти возмо́жемъ: да и҆спра́витсѧ мл҃тва на́ша, ꙗ҆́кѡ кади́ло пред̾ тобо́ю гдⷭ҇и.
Мꙋ́чениченъ: Прⷪ҇ро́цы и҆ а҆пⷭ҇ли хрⷭ҇тѡ́вы, и҆ мч҃нцы, наꙋчи́ша пѣ́ти трⷪ҇цꙋ є҆диносꙋ́щнꙋю, и҆ просвѣти́ша ꙗ҆зы́ки заблꙋ́ждшыѧ, и҆ ѻ҆́бщники а҆́гг҃лѡвъ сотвори́ша сы́ны человѣ́чєскїѧ.
Сла́ва, и҆ ны́нѣ, бг҃оро́диченъ, гла́съ то́йже: До конца̀ ᲂу҆бо́гихъ твои́хъ не забꙋ́ди влⷣчце: но твои́ми мл҃твами бꙋ́дꙋщагѡ на́съ свободѝ преще́нїѧ, и҆ настоѧ́щагѡ вре́да, и҆ гнѣ́ва гдⷭ҇нѧ и҆схитѝ бцⷣе, твоѧ̑ рабы̑.
[зрѝ] Вѣ́домо же да є҆́сть: Ꙗ҆́кѡ ѿ сегѡ̀ понедѣ́льника вторы́ѧ седми́цы поста̀, выпѣва́ютсѧ на повече́рїѧхъ канѡ́ны, и҆́же въ мине́и, и҆мꙋ́щихъ прилꙋчи́тисѧ ст҃ы́хъ, ѿ сꙋббѡ́ты ла́заревы до недѣ́ли ѳѡмины̀, съ канѡ́ны бг҃оро́дичными. Пре́жде пое́тсѧ канѡ́нъ бцⷣы, и҆ по не́мъ въ мине́и. По г҃-й пѣ́сни конда́къ и҆ сѣда́ленъ въ мине́и. а҆ по ѕ҃-й пѣ́сни сѣда́ленъ бцⷣы. Послѣди́ же канѡ́на стїхи̑ры въ мине́и.
Во вто́рникъ в҃-ѧ седми́цы, на ᲂу҆́трени, трⷪ҇чны.
По а҃-мъ стїхосло́вїи сѣда́льны ᲂу҆мили́тєльныѧ ѻ҆смогла́сника, съ бг҃оро́дичны. По в҃-мъ же стїхосло́вїи глаго́лемъ настоѧ́щыѧ сѣда́льны, гла́съ и҃:
Подо́бенъ: Воскрⷭ҇лъ є҆сѝ:
Стра̑сти ᲂу҆здо́ю непоро́чнагѡ поста̀ ᲂу҆держава́юще, ᲂу҆́мъ къ честны̑мъ бг҃овидѣ́нїємъ вѣ́рою соверше́ннѣйшею <<р҃ѯ ѡ҆б.: 320>> впери́ти всѝ потщи́мсѧ: ꙗ҆́кѡ да земнꙋ́ю житїѧ̀ сла́дость пре́зримъ, и҆ нбⷭ҇нꙋю полꙋчи́мъ жи́знь и҆ бж҃е́ственное сїѧ́нїе.
Сла́ва, то́йже.
И҆ ны́нѣ, бг҃оро́диченъ: Въ пꙋчи́нꙋ лю́тꙋю впадо́хъ ᲂу҆ны́нїѧ, ѿ мно́жества лꙋка́выхъ и҆ беззако́нныхъ мои́хъ дѣ́лъ, прїидо́хъ въ недоꙋмѣ́нїе и҆ неча́ѧнїемъ ны́нѣ содержи́мь є҆́смь. влⷣчце бцⷣе, ты̀ мѧ̀ сп҃сѝ, ты̀ помозѝ: грѣ́шникѡвъ бо ты̀ є҆сѝ ᲂу҆милостивле́нїе, и҆ ѡ҆чище́нїе сп҃си́тельное.
По г҃-мъ стїхосло́вїи сѣда́ленъ, гла́съ и҃.
Подо́бенъ: Па́стырскаѧ свирѣ́ль:
Предложи́въ та́йнꙋю по́стъ трапе́зꙋ, поꙋща́етъ на́мъ бога́тнѡ насы́титисѧ: ꙗ҆ди́мъ ꙗ҆́коже бра́шно присноживѡ́тныѧ да́ры дх҃а: пїи́мъ ꙗ҆́коже питїѐ, сле́зъ стрꙋи̑ бг҃отѡ́чныѧ: и҆ возвесели́вшесѧ, хвалꙋ̀ бг҃ꙋ непреста́ннѡ принесе́мъ.
Сла́ва, то́йже.
И҆ ны́нѣ, бг҃оро́диченъ: Ѿ всѧ́кагѡ преще́нїѧ, и҆ ѡ҆ѕлобле́нїѧ человѣ́ческагѡ, сп҃сѝ на́съ всест҃а́ѧ дв҃о: тѧ́ бо и҆́мамы покро́въ и҆ предста́тельство прибѣга́ющїи къ тебѣ̀ бг҃ома́ти, и҆ къ рожде́нномꙋ и҆з̾ тебѐ бг҃ꙋ на́шемꙋ: є҆го́же молѝ и҆зба́витисѧ на́мъ ѿ бѣ́дъ и҆ скорбе́й.
Канѡ́нъ въ мине́и и҆ трипѣ́снецъ господи́на і҆ѡ́сифа. И҆ стїхосло́витсѧ пѣ́снь ѱалти́ра. Гла́съ и҃.
Пѣ́снь в҃.
І҆рмо́съ: Ви́дите ви́дите, ꙗ҆́кѡ а҆́зъ є҆́смь бг҃ъ ва́шъ, пре́жде вѣ̑къ рожде́нный ѿ ѻ҆ц҃а̀, и҆ ѿ дв҃ы въ послѣ̑днѧѧ без̾ мꙋ́жа заче́ншїйсѧ, и҆ разрꙋши́вый грѣ́хъ пра́ѻтца а҆да́ма, ꙗ҆́кѡ чл҃вѣколю́бецъ.
Воздохнѝ, прослези́сѧ дꙋшѐ, ѡ҆брати́сѧ, пока́йсѧ: прибли́жисѧ де́нь, при две́рехъ сꙋдїѧ̀, ко ѿвѣ́тꙋ гото́висѧ, <<рѯ҃а: 321>> и҆ возопі́й: согрѣши́хъ тѝ ще́дрый, млⷭ҇тиве, бл҃гі́й, ты̀ мѧ̀ ᲂу҆ще́дри.
Не сы́тость грѣха̀ дꙋшѐ моѧ̀ возненави́ждь всегꙋби́тельнꙋю, наслади́сѧ сы́тостїю поста̀ прилѣ́жнѡ, сп҃си́тєльныѧ за́пѡвѣди снѣ́дь сотворѝ, наслажде́нїе и҆схода́тайствꙋющыѧ вѣ́чныхъ бла̑гъ, вѣ́рою.
А҆́гг҃ли, си̑лы, нача̑ла, а҆рха́гг҃ли, гдⷭ҇ьства, прⷭ҇то́ли, вла̑сти, херꙋві́ми и҆ серафі́ми, бл҃года́вца и҆ бг҃а моли́те, проще́нїе долгѡ́въ и҆ страсте́й премѣне́нїе дарова́ти на́мъ.
Бг҃оро́диченъ: Є҆ди́на ро́ждшаѧ безнача́льное сло́во всенепоро́чнаѧ, и҆з̾ тебѐ воплоще́ннаго непрело́жнаго, є҆́же бѣ̀, пребы́вшаѧ дв҃ою по рождествѣ̀ безневѣ́стнаѧ, молѝ ѡ҆ всѣ́хъ, и҆зба́витисѧ ѿ тлѝ жи́зни на́шей.
И҆́ный господи́на ѳео́дѡра, гла́съ то́йже.
І҆рмо́съ: Ви́дите, ви́дите:
Оу҆ви́дѣхомъ, позна́хомъ, ꙗ҆́кѡ бл҃го на́мъ въ покаѧ́нїе вре́мѧ, є҆́же ѡ҆предѣли́лъ є҆сѝ: но въ се́мъ прїимѝ бж҃е, мл҃твы на́шѧ, и҆ и҆спра́ви пред̾ тобо́ю ще́дре, ꙗ҆́кѡ кади́ло до́брое, ꙗ҆́кѡ же́ртвꙋ прїѧ́тнꙋю.
Оу҆жаса́юсѧ и҆ бою́сѧ, помышлѧ́ѧ, є҆ли̑ка согрѣши́хъ: ка́кѡ тѧ̀ ᲂу҆срѧ́щꙋ; ка́кѡ ꙗ҆влю́сѧ тебѣ̀ стра́шне; ка́кѡ же предста́нꙋ неꙋмы́тномꙋ твоемꙋ̀ сꙋди́щꙋ; тѣ́мже пощадѝ мѧ̀ ще́дре, въ ча́съ, є҆гда̀ и҆́маши сꙋди́ти все́й землѝ.
Трⷪ҇ченъ: Пресоверше́ннаѧ є҆ди́нице, пребж҃е́ственнаѧ, трїѷпоста́снаѧ, нерожде́нне ѻ҆́ч҃е, и҆ сн҃е є҆диноро́дне, дш҃е ѿ ѻ҆ц҃а̀ и҆сходѧ́й, сн҃омъ же ꙗ҆влѧ́ѧйсѧ: сꙋщество̀ є҆ди́но и҆ є҆стество̀, гдⷭ҇ьство, црⷭ҇тво, сп҃сѝ всѣ́хъ на́съ.
Бг҃оро́диченъ: Неизглаго́ланное чꙋ́до твоегѡ̀ ржⷭ҇тва̀, мт҃и дв҃о: ка́кѡ бо и҆ ражда́еши, и҆ чиста̀ є҆сѝ въ то́мже; <<рѯ҃а ѡ҆б.: 322>> ка́кѡ ѻ҆троча̀ ражда́еши, и҆ не вѣ́си и҆скꙋ́са мꙋ́жеска ѿню́дъ; ꙗ҆́коже вѣ́сть па́че є҆стества̀ ѿ менѐ новолѣ́пнѡ, сло́во бж҃їе ро́ждшеесѧ.
Сла́ва тебѣ̀ бж҃е на́шъ, сла́ва тебѣ̀.
Ты̀ нїнеѵі́тѧны пока́ѧвшыѧсѧ и҆ пости́вшыѧсѧ, ѿ запреще́ннагѡ и҆зве́лъ є҆сѝ гнѣ́ва: содо́млѧны же ѻ҆гне́мъ поже́глъ є҆сѝ въ пресыще́нїи блꙋдѧ́щыѧ: но и҆зба́ви мѧ̀ хрⷭ҇тѐ, преще́нїѧ и҆́хъ.
І҆рмо́съ: Ви́дите, ви́дите, ꙗ҆́кѡ а҆́зъ є҆́смь бг҃ъ ва́шъ, ѡ҆ст҃и́вый нача́токъ ва́мъ прїѧ́тенъ, ѿ дне́й всегѡ̀ лѣ́та ѡ҆десѧ́тствованїе, и҆ сїѐ да́въ лю́демъ мои̑мъ, во и҆збавле́нїе страсте́й, во сп҃се́нїѧ нача́ло.
Пѣ́снь и҃.
І҆рмо́съ: Бг҃оглаго́ливїи ѻ҆́троцы:
Ѡ҆правда́вый воздохнꙋ́вша мытарѧ̀, ᲂу҆ще́дривый блꙋдни́цꙋ ѿ се́рдца слези́вшꙋю, сп҃сѝ ᲂу҆ще́дри сп҃се, дꙋ́шы пою́щихъ тѧ̀.
Плодоно́симъ дѣѧ̑нїѧ добродѣ́тєльнаѧ посто́мъ гдⷭ҇ви, и҆ вре́дныхъ ѿдалѧ́ющесѧ помышле́нїй, да бж҃е́ственнꙋю сла́дость полꙋчи́мъ.
А҆́гг҃льстїи ли́цы мо́лѧтъ тѧ̀, а҆пⷭ҇льстїи собо́ри, и҆ мч҃нкѡвъ чи́ни, і҆и҃се, лю́демъ твои̑мъ проще́нїе да́рꙋй.
Бг҃оро́диченъ: Несѣко́мꙋю го́рꙋ дв҃ꙋ, свѣтоно́сный свѣ́щникъ, бл҃гопрехо́днꙋю лѣ́ствицꙋ, бж҃їе вмѣсти́лище вѣ́рнїи ᲂу҆бл҃жи́мъ.
И҆́ный. І҆рмо́съ: На горѣ̀ ст҃ѣ́й:
Въ наро́читый де́нь воздержа́нїѧ, прїиди́те всѝ вострꙋ́бимъ въ пѣ́снехъ: и҆ ꙗ҆́кѡ сла́достїю бж҃е́ственною ᲂу҆чрежда́ющесѧ, пѣ́сньми пои́мъ гдⷭ҇а, и҆ превозно́симъ во всѧ̑ вѣ́ки. <<рѯ҃в: 323>>
Кто̀ снѣда́етъ человѣ́ка бж҃їѧ дре́вле; ѕвѣ́рь ле́въ, ѿ ле́сти прⷪ҇ро́чи преслꙋша́нїѧ снѣ́ди прїи́мша: блюдѝ ᲂу҆́бѡ дꙋшѐ моѧ̀, да тѧ̀ не прельсти́тъ чревобѣ́сїѧ ѕмі́й.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Ꙗ҆́кѡ є҆ди́ницꙋ сꙋщество́мъ пою́ тѧ, ꙗ҆́кѡ трⷪ҇цꙋ ли́цы тѧ̀ чтꙋ̀, ѻ҆́ч҃е, и҆ сн҃е, и҆ дш҃е прест҃ы́й, безнача́льнꙋю держа́вꙋ твоегѡ̀ црⷭ҇твїѧ сла́влю во вѣ́ки.
Бг҃оро́диченъ: Ты̀ гора̀ бж҃їѧ ꙗ҆ви́ласѧ є҆сѝ бцⷣе, въ ню́же хрⷭ҇то́съ всели́всѧ, бж҃є́ственныѧ хра́мы содѣ́ла пою́щыѧ: гдⷭ҇а по́йте, и҆ превозноси́те во всѧ̑ вѣ́ки.
Сла́ва тебѣ̀ бж҃е на́шъ, сла́ва тебѣ̀.
По́стъ ꙗ҆́кѡ храни́телѧ чистоты̀ и҆ ма́терь безстра́стїѧ почита́юще, прїиди́те лю́дїе ѿ любвѐ цѣлꙋ́имъ, гдⷭ҇а пою́ще, и҆ превозносѧ́ще во всѧ̑ вѣ́ки.
Хва́лимъ, бл҃гослови́мъ, покланѧ́емсѧ гдⷭ҇ви:
І҆рмо́съ: На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте, и҆ превозноси́те во всѧ̑ вѣ́ки.
Пѣ́снь ѳ҃.
І҆рмо́съ: Проѧвле́нное на горѣ̀:
До́брый по́стъ ᲂу҆тꙋчнѧ́ющїй се́рдце, кла́съ зрѣ́лый добродѣ́телей бж҃е́ственнѡ прозѧба́етъ: є҆го́же возлю́бимъ, во ст҃ы́хъ дне́хъ ѡ҆сщ҃е́нїе прїе́млюще.
Во грѣсѣ́хъ мно́гихъ ѡ҆скверне́на, ᲂу҆ѧ́звена зрѧ̀ и҆ ѡ҆сꙋжде́на, млⷭ҇тиве, твое́ю млⷭ҇тїю ᲂу҆ще́дривъ, сп҃сѝ мѧ̀ мл҃твами ст҃ы́хъ твои́хъ.
Оу҆вы̀ всеѻкаѧ́ннаѧ дꙋшѐ, ка́кѡ ѿвѣща́еши; кі́й стра́хъ тѧ̀ прїи́метъ сꙋдїѝ сѣдѧ́щꙋ, тьма́мъ предстоѧ́щымъ а҆́гг҃лѡвъ; потщи́сѧ ᲂу҆́бѡ, пре́жде конца̀ пока́йсѧ. <<рѯ҃в: 323>>
Бг҃оро́диченъ: Ца́рскꙋю колесни́цꙋ, свѣ́тлый ѻ҆́блакъ, го́рꙋ тꙋ́чнꙋю, го́рꙋ ᲂу҆сыре́ннꙋю, браконеискꙋ́снаѧ мо́лимъ тѧ̀ дв҃о, и҆сцѣлѝ стра̑сти дꙋ́шъ на́шихъ.
І҆рмо́съ то́йже.
И҆́стиннымъ посто́мъ пости́мсѧ гдⷭ҇ви, ꙗ҆́кѡ бра́шенъ воздержа́щесѧ, ѧ҆зы́ка, ꙗ҆́рости, и҆ лжѝ, и҆ всѧ́кїѧ и҆ны́ѧ стра́сти ѡ҆чꙋжди́мсѧ, да чи́стѣ па́схꙋ ᲂу҆́зримъ.
Ты̀ самꙋ́ила процвѣти́лъ є҆сѝ пло́дъ по́сте: ты̀ воспита́лъ є҆сѝ самѱѡ́на вели́каго хра́бра, ты̀ соверша́еши сщ҃е́нники и҆ прⷪ҇ро́ки: ты̀ на́съ ѡ҆ст҃ѝ по́сте честны́й.
Сла́ва, трⷪ҇ченъ: Трисвѣ́тлое гдⷭ҇и, твоегѡ̀ є҆динонача́лїѧ, свѣ́тлыми сїѧ́ньми во ᲂу҆́мъ на́шъ ѡ҆блиста́й ѿ пре́лести многоѡбра́зныѧ ѡ҆браща́тисѧ на́мъ къ соедини́тельномꙋ ѡ҆боже́нїю.
Бг҃оро́диченъ: Ты̀ є҆сѝ бцⷣе ѻ҆рꙋ́жїе на́ше, и҆ стѣна̀, ты̀ є҆сѝ застꙋпле́нїе, къ тебѣ̀ притека́ющихъ. тѧ̀ и҆ ны́нѣ въ мл҃твꙋ дви́жемъ, да и҆зба́вимсѧ врагѡ́въ на́шихъ.
Сла́ва тебѣ̀ бж҃е на́шъ, сла́ва тебѣ̀.
И҆мꙋ́ще дх҃а ст҃а́го, поста̀ гости́телѧ бога́тна, тогѡ̀ дарова́нїй насы́тимсѧ, и҆ бога́тнѡ наслади́мсѧ, того̀ воспѣва́юще ꙗ҆́кѡ бг҃а на́шего.
І҆рмо́съ: Проѧвле́нное на горѣ̀ законополо́жникꙋ во ѻ҆гнѝ и҆ кꙋпинѣ̀, ржⷭ҇тво̀ приснодв҃ы, въ на́ше вѣ́рныхъ сп҃се́нїе, пѣ́сньми немо́лчными велича́емъ.
Свѣти́ленъ гла́са.
На стїхо́внѣ самогла́сенъ, гла́съ є҃:
Вскꙋ́ю ᲂу҆ныва́ющи дꙋшѐ моѧ̀, грѣхꙋ̀ рабо́таеши; и҆ вскꙋ́ю немощна̀ сꙋ́щи, ко врачꙋ̀ не притека́еши; сѐ вре́мѧ бл҃гопрїѧ́тное, сѐ сп҃се́нїѧ ны́нѣ де́нь и҆́стинный: воста́ни, ѡ҆мы́й твоѐ лицѐ покаѧ́нїѧ слеза́ми, и҆ є҆ле́емъ <<рѯ҃г: 325>>бл҃готворе́нїѧ свѣщꙋ̀ просвѣтѝ: ꙗ҆́кѡ да ѡ҆брѧ́щеши ѡ҆чище́нїе ѿ хрⷭ҇та̀ бг҃а, и҆ ве́лїю млⷭ҇ть. [Два́жды.]
Мч҃нченъ: Страстоте́рпцы твоѝ гдⷭ҇и, чи́ны а҆́гг҃льскїѧ подража́вше, ꙗ҆́кѡ безпло́тни, мꙋ̑ки претерпѣ́ша, є҆диномы́сленное ᲂу҆пова́нїе и҆мꙋ́ще ѡ҆бѣща́нныхъ бл҃ги́хъ наслажде́нїе: тѣ́хъ мл҃твами хрⷭ҇тѐ бж҃е на́шъ, ми́ръ да́рꙋй мі́рови твоемꙋ̀, и҆ дꙋша́мъ на́шымъ ве́лїю млⷭ҇ть.
Сла́ва, и҆ ны́нѣ, бг҃оро́диченъ: Бл҃жи́мъ тѧ̀ бцⷣе дв҃о, и҆ сла́вимъ тѧ̀ вѣ́рнїи по до́лгꙋ, гра́дъ непоколеби́мый, стѣ́нꙋ неѡбори́мꙋю, тве́рдꙋю предста́тельницꙋ, и҆ прибѣ́жище дꙋ́шъ на́шихъ.
На ѕ҃-мъ часѣ̀ тропа́рь прⷪ҇ро́чества, гла́съ ѕ҃:
Досто́йнѡ воспѣ́ти тѧ̀ не мо́жемъ, но про́симъ молѧ́щесѧ: не погꙋбѝ на́съ со беззако́ньми на́шими, бл҃гопремѣни́телю гдⷭ҇и.
Прокі́менъ, ѱало́мъ к҃є, гла́съ д҃: Гдⷭ҇и, возлюби́хъ бл҃голѣ́пїе до́мꙋ твоегѡ̀, и҆ мѣ́сто селе́нїѧ сла́вы твоеѧ̀. Сті́хъ: Сꙋди́ ми гдⷭ҇и, ꙗ҆́кѡ а҆́зъ неѕло́бою мое́ю ходи́хъ.
Прⷪ҇ро́чества и҆са́їина чте́нїе. [Глава̀ є҃, ст. з҃- ѕ҃і. ]
Та́кѡ глаго́летъ гдⷭ҇ь: вїногра́дъ гдⷭ҇а саваѡ́ѳа до́мъ і҆и҃левъ є҆́сть, и҆ человѣ́къ і҆ꙋ́динъ, но́вый са́дъ возлю́бленный: жда́хъ, да сотвори́тъ сꙋ́дъ, сотвори́ же беззако́нїе и҆ непра́вдꙋ, но во́пль. Го́ре совокꙋплѧ́ющымъ до́мъ къ до́мꙋ, и҆ село̀ къ селꙋ̀ приближа́ющымъ, да бли́жнемꙋ ѿи́мꙋтъ что̀: є҆да̀ вселите́сѧ є҆ди́ни на землѝ; ᲂу҆слы́шашасѧ бо во ᲂу҆шеса́хъ гдⷭ҇а саваѡ́ѳа сїѧ̑: а҆́ще бо бꙋ́дꙋтъ до́мове мно́зи, въ запꙋстѣ́нїе бꙋ́дꙋтъ вели́цїи и҆ до́брїи, и҆ не бꙋ́дꙋтъ живꙋ́щїи въ ни́хъ. И҆дѣ́же бо воз̾ѡрю́тъ де́сѧть сꙋпрꙋ̑гъ волѡ́въ, сотвори́тъ корча́гъ є҆ди́нъ, и҆ сѣ́ѧй а҆ртава́съ ше́сть, сотвори́тъ <<рѯ҃г ѡ҆б.: 326>> мѣ̑ры трѝ. Го́ре востаю́щымъ заꙋ́тра, и҆ сїке́ръ гонѧ́щымъ, ждꙋ́щымъ ве́чера: вїно́ бо сожже́тъ ѧ҆̀. Съ гꙋ́сльми бо и҆ пѣвни́цами, и҆ тѷмпа́ны, и҆ свирѣ́льми вїно̀ пїю́тъ, на дѣла́ же гдⷭ҇нѧ не взира́ютъ, и҆ дѣ́лъ рꙋкꙋ̀ є҆гѡ̀ не помышлѧ́ютъ. Оу҆̀бо плѣне́ни бы́ша лю́дїе моѝ, за є҆́же не вѣ́дѣти и҆́мъ гдⷭ҇а, и҆ мно́жество бы́сть ме́ртвыхъ гла́да ра́ди, и҆ жа́жды водны́ѧ. И҆ разширѝ а҆́дъ дꙋ́шꙋ свою̀, и҆ разве́рзе ᲂу҆ста̀ своѧ̑, є҆́же не преста́ти: и҆ сни́дꙋтъ сла́внїи, и҆ вели́цыи, и҆ бога́тїи, и҆ гꙋби́тели и҆́хъ, и҆ веселѧ́йсѧ въ не́мъ. И҆ смири́тсѧ человѣ́къ, и҆ ѡ҆безче́ститсѧ мꙋ́жъ, и҆ ѻ҆́чи высокоглѧ́дающїи смирѧ́тсѧ. И҆ вознесе́тсѧ гдⷭ҇ь саваѡ́ѳъ въ сꙋдѣ̀, и҆ бг҃ъ ст҃ы́й просла́витсѧ въ пра́вдѣ.
Прокі́менъ, ѱало́мъ к҃ѕ, гла́съ г҃: Гдⷭ҇ь просвѣще́нїе моѐ, и҆ сп҃си́тель мо́й, когѡ̀ ᲂу҆бою́сѧ; Сті́хъ: Гдⷭ҇ь защи́титель живота̀ моегѡ̀, ѿ когѡ̀ ᲂу҆страшꙋ́сѧ;
Во вто́рникъ ве́чера,
Стїхи̑ры господи́на і҆ѡ́сифа, гла́съ а҃:
Подо́бенъ: Прехва́льнїи мч҃ницы:
На крⷭ҇тѣ̀ распросте́рлъ є҆сѝ хрⷭ҇тѐ, пречⷭ҇тѣи рꙋ́цѣ твоѝ, собира́ѧ концы̀. тѣ́мже зовꙋ́ ти: расточе́нный ᲂу҆́мъ мо́й соберѝ, плѣне́нный, влеко́мый страстьмѝ, и҆ страда́нїй твои́хъ ѻ҆́бщника мѧ̀ покажѝ, воздержа́нїемъ всего̀ ѡ҆чище́на.
Дѣ́ти ѡ҆бостри́въ и҆ногда̀ по́стъ, показа̀ сильнѣ́йшыѧ, ꙗ҆́коже пи́шетсѧ, ѻ҆гнѧ̀ палѧ́щагѡ. смире́ннаѧ дꙋшѐ моѧ̀ <<рѯ҃д: 327>> пости́сѧ, вжига́ющи въ себѣ̀ влⷣчнее возлюбле́нїе, и҆́мже бꙋ́дꙋщїѧ возмо́жеши и҆збѣжа́ти гее́нны, и҆ стра̑сти попали́ти всепа̑гꙋбныѧ.
И҆́на стїхи́ра господи́на ѳео́дѡра, гла́съ г҃:
Подо́бенъ: До́блїи мч҃ницы:
Вре́мѧ весе́лое поста̀, тѣ́мже чистоты̀ свѣтови́дныѧ, и҆ любвѐ чи́стыѧ, мл҃твы свѣтоза́рныѧ, и҆ всѧ́кїѧ и҆ны́ѧ добродѣ́тели насы́тившесѧ бога́тнѡ, свѣ́тлѡ возопїи́мъ: крⷭ҇те хрⷭ҇то́въ всест҃ы́й, возрасти́вый сла́дость жи́зни, всѣ́хъ чи́стымъ се́рдцемъ тебѣ̀ поклони́тисѧ сподо́би на́съ, ѡ҆чище́нїе на́мъ даѧ̀ и҆ ве́лїю млⷭ҇ть.
И҆ мине́и трѝ. Прокі́менъ, ѱало́мъ к҃з, гла́съ ѕ҃: Сп҃сѝ гдⷭ҇и лю́ди твоѧ̑, и҆ бл҃гословѝ достоѧ́нїе твоѐ. Сті́хъ: Къ тебѣ̀ гдⷭ҇и, воззовꙋ̀ бж҃е мо́й.
Бытїѧ̀ чте́нїе. [Глава̀ д҃, ст. и҃-є҃і].
Речѐ ка́їнъ ко а҆́велю бра́тꙋ своемꙋ̀: по́йдемъ на по́ле. и҆ бы́сть внегда̀ бы́ти и҆̀мъ на по́ли, воста̀ ка́їнъ на а҆́велѧ бра́та своего̀, и҆ ᲂу҆бѝ є҆го̀. И҆ речѐ гдⷭ҇ь бг҃ъ ко ка́їнꙋ: гдѣ̀ є҆́сть а҆́вель бра́тъ тво́й; и҆ речѐ, не вѣ́мъ: є҆да̀ стра́жъ бра́тꙋ моемꙋ̀ є҆́смь а҆́зъ; И҆ речѐ гдⷭ҇ь: что̀ сотвори́лъ є҆сѝ сїѐ; гла́съ кро́ве бра́та твоегѡ̀ вопїе́тъ ко мнѣ̀ ѿ землѝ. И҆ ны́нѣ про́клѧтъ ты̀ на землѝ, ꙗ҆́же разве́рзе ᲂу҆ста̀ своѧ̑, прїѧ́ти кро́вь бра́та твоегѡ̀ ѿ рꙋкѝ твоеѧ̀. Є҆гда̀ дѣ́лаеши зе́млю, и҆ не приложи́тъ си́лы своеѧ̀ да́ти тебѣ̀: стенѧ́й, и҆ трѧсы́йсѧ бꙋ́деши на землѝ. И҆ речѐ ка́їнъ ко гдⷭ҇ꙋ бг҃ꙋ: вѧ́щшаѧ вина̀ моѧ̀, є҆́же ѡ҆ста́витисѧ мѝ. А҆́ще и҆зго́ниши мѧ̀ дне́сь ѿ лица̀ землѝ, и҆ ѿ лица̀ твоегѡ̀ скры́юсѧ, и҆ бꙋ́дꙋ стенѧ̀ и҆ трѧсы́йсѧ на землѝ, и҆ бꙋ́детъ всѧ́къ ѡ҆брѣта́ѧй мѧ̀, ᲂу҆бїе́тъ мѧ̀. И҆ речѐ є҆мꙋ̀ гдⷭ҇ь бг҃ъ: не та́кѡ, <<ѯ҃д ѡ҆б.: 128>> всѧ́къ ᲂу҆би́вый ка́їна, седми́жды ѿмсти́тсѧ. и҆ положѝ гдⷭ҇ь бг҃ъ зна́менїе на ка́їнѣ, є҆́же не ᲂу҆би́ти є҆гѡ̀ всѧ́комꙋ ѡ҆брѣта́ющемꙋ є҆го̀.
Прокі́менъ, ѱало́мъ к҃и, гла́съ з҃: Гдⷭ҇ь крѣ́пость лю́демъ свои̑мъ да́стъ, гдⷭ҇ь бл҃гослови́тъ лю́ди своѧ̑ ми́ромъ. Сті́хъ: Принеси́те гдⷭ҇ви сы́нове бж҃їи:
При́тчей чте́нїе. [Глава̀ є҃, ст. а҃-є҃].
Сы́не, мое́й премꙋ́дрости внима́й, къ мои̑мъ же словесє́мъ прилага́й ᲂу҆́хо твоѐ. Да сохрани́ши мы́сль бл҃гꙋ́ю: чꙋ́вство же мои́хъ ᲂу҆сте́нъ заповѣ́даетъ тебѣ̀. Не внима́й ѕлѣ́й женѣ̀: ме́дъ бо ка́плетъ ѿ ᲂу҆сте́нъ жены̀ блꙋдни́цы, ꙗ҆́же на вре́мѧ наслажда́етъ тво́й горта́нь: Послѣди́ же горча́е же́лчи ѡ҆брѧ́щеши, и҆ и҆з̾ѡщре́нꙋ па́че меча̀ ѻ҆бою́дꙋ ѻ҆стра̀. Безꙋ́мїѧ бо но́зѣ низво́дѧтъ ᲂу҆потреблѧ́ющихъ ю҆̀ со сме́ртїю во а҆́дъ, стѡпы́ же є҆ѧ̀ не ᲂу҆твержда́ютсѧ: На пꙋти́ бо живѡ́тныѧ не нахо́дитъ, заблꙋждє́нна же течє́нїѧ є҆ѧ̀ и҆ небл҃горазꙋ̑мна. Ны́нѣ ᲂу҆̀бо сы́не, послꙋ́шай менѐ, и҆ не ѿринове́нна сотворѝ моѧ̑ словеса̀: Дале́че ѿ неѧ̀ сотворѝ пꙋ́ть тво́й, и҆ не прибли́жисѧ къ две́ремъ домѡ́въ є҆ѧ̀: Да не преда́стъ и҆ны̑мъ живота̀ твоегѡ̀, и҆ твоегѡ̀ житїѧ̀ не млⷭ҇тивнымъ. Да не насы́тѧтсѧ и҆ні́и твоеѧ̀ крѣ́пости, твои́ же трꙋды̀ въ до́мы чꙋжды́ѧ вни́дꙋтъ. И҆ раска́ешисѧ на послѣ́докъ тво́й, є҆гда̀ и҆стрꙋ́тсѧ плѡ́ти тѣ́ла твоегѡ̀, и҆ рече́ши: Ка́кѡ возненави́дѣхъ наказа́нїе, и҆ ѿ ѡ҆бличе́нїй ᲂу҆клони́сѧ се́рдце моѐ; Не послꙋ́шахъ гла́са наказꙋ́ющагѡ мѧ̀, и҆ ко ᲂу҆ча́щемꙋ мѧ̀ не прилага́хъ ᲂу҆́ха моегѡ̀: Вма́лѣ бѣ́хъ во всѧ́комъ ѕлѣ̀ посредѣ̀ цр҃кве и҆ со́нмища. Сы́не, пі́й во́ды ѿ твои́хъ сосꙋ́дѡвъ, и҆ ѿ твои́хъ кладенцє́въ и҆сто́чника. <<рѯ҃є: 329>>
На стїхо́внѣ самогла́сенъ днѐ, два́жды.
Гла́съ г҃: Пло́тїю распны́йсѧ гдⷭ҇и, и҆ съ собо́ю распны́й ве́тхаго на́шего человѣ́ка, копїе́мъ же прободе́нъ въ ре́бра, и҆ человѣкогꙋби́телѧ спрободы́й ѕмі́ѧ, пригвоздѝ къ стра́хꙋ твоемꙋ̀ плѡ́ти моѧ̑, и҆ любо́вїю твое́ю ᲂу҆ѧзвѝ мою̀ дꙋ́шꙋ: да твою̀ созерца́ѧ стрⷭ҇ть, возде́ржнѡ совершꙋ̀ поста̀ ѡ҆предѣле́нїе, не то́чїю чре́во, но и҆ дрꙋгі̑ѧ грѣха̀ вхо́ды ᲂу҆держава́ѧ: сокрꙋше́нїе же се́рдца, и҆ дꙋ́ха смире́нїе пожрꙋ̀ тебѣ̀, ѡ҆ преждебы́вшихъ мои́хъ согрѣше́нїихъ, ѿ ни́хже мѧ̀ и҆зба́ви чл҃вѣколю́бче.
Мч҃нченъ: Прⷪ҇ро́цы, и҆ а҆пⷭ҇ли хрⷭ҇тѡ́вы, и҆ мч҃нцы, наꙋчи́ша пѣ́ти трⷪ҇цꙋ є҆диносꙋ́щнꙋю, и҆ просвѣти́ша ꙗ҆зы́ки заблꙋ́ждшыѧ, и҆ ѻ҆́бщники а҆́гг҃лѡвъ сотвори́ша сы́ны человѣ́чєскїѧ.
Сла́ва, и҆ ны́нѣ, крⷭ҇тобг҃оро́диченъ.
Подо́бенъ: Ве́лїѧ мч҃нкъ:
Ви́дѧщи и҆з̾ тебѐ ро́ждшагосѧ всенепоро́чнаѧ, ви́сѧща на дре́вѣ, рыда́ла є҆сѝ вопїю́щи: превозжелѣ́нное моѐ ча́до, гдѣ̀ твоѧ̀ за́йде добро́та свѣтоно́снаѧ, ꙗ҆́же ᲂу҆добрѝ человѣ́ческое є҆стество̀;
Въ сре́дꙋ вторы́ѧ седми́цы на ᲂу҆́трени, трⷪ҇чны.
По а҃-мъ стїхосло́вїи сѣда́льны крⷭ҇тны ѻ҆смогла́сника. По в҃-мъ же стїхосло́вїи сѣда́льны настоѧ́щыѧ, гла́съ а҃:
Хрⷭ҇тѐ, на крⷭ҇тѣ̀ просте́рсѧ, ᲂу҆мертви́лсѧ є҆сѝ, ᲂу҆мертви́вый врага̀ и҆ началоѕло́бнаго ѕмі́ѧ, ѡ҆живи́въ же ᲂу҆грызе́нїемъ ѻ҆́нагѡ ᲂу҆ме́ршыѧ. тѣ́мже молю́сѧ: ᲂу҆мерщвле́ннꙋю дꙋ́шꙋ мою̀ сп҃се ѡ҆живѝ, въ мл҃твѣ и҆ постѣ̀ къ тебѣ̀ взира́ющꙋю. [Два́жды.] <<рѯ҃є ѡ҆б.: 330>>
Крⷭ҇тобг҃оро́диченъ. Подо́бенъ:
Ꙗ҆́кѡ ви́дѣ на крⷭ҇тѣ̀ а҆́гница, тебѐ а҆́гнца ви́сѧща хрⷭ҇тѐ, посредѣ̀ ѕлодѣ́євъ, вопїѧ́ше слезѧ́щи, и҆ го́рцѣ рыда́ющи: ча́до любе́знѣйшее, что̀ зри́мое чꙋ́до; мт҃и пречⷭ҇таѧ, живо́тъ всемі́рный, сїѐ предрекла̀ є҆сѝ, позна́етсѧ.
По г҃-мъ стїхосло́вїи сѣда́ленъ, гла́съ г҃.
Подо́бенъ: Красотꙋ̀ дѣ́вства:
Пѣ́сней трꙋбо́ю вострꙋ́бимъ, де́нь наро́читый проходѧ́ще, воздержа́нїѧ вре́мѧ, и҆ воззове́мъ вопїю́ще: сїѐ жи́знь на́шꙋ въ мі́рѣ прорастѝ, ᲂу҆вѧди́вшее невоздержа́нїѧ стра́сть. си́лою крⷭ҇та̀ твоегѡ̀ хрⷭ҇тѐ сло́ве, въ се́мъ рабы̑ твоѧ̑ сохранѧ́й. [Два́жды.]
Крⷭ҇тобг҃оро́диченъ: Поно́снꙋю ще́дре сме́рть распѧ́тїемъ во́лею претерпѣ́лъ є҆сѝ: є҆го́же ро́ждшаѧ тѧ̀ хрⷭ҇тѐ зрѧ́щи, ᲂу҆ѧзвлѧ́шесѧ ᲂу҆тро́бою, бїю́щи бо сѧ ма́терски рыда́ше: є҆ѧ́же мл҃твами, ра́ди бл҃гоꙋтро́бїѧ млⷭ҇ти твоеѧ̀ ᲂу҆ще́дри, и҆ сп҃сѝ мі́ръ взе́млѧй грѣ́хъ мі́ра.
Канѡ́нъ мине́и, и҆ настоѧ́щыѧ трипѣ́снцы по чи́нꙋ и҆́хъ, и҆ стїхосло́витсѧ пѣ́снь. Господи́на і҆ѡ́сифа. Гла́съ а҃.
Пѣ́снь г҃: Да ᲂу҆тверди́тсѧ се́рдце моѐ:
На крⷭ҇тѣ̀ дла̑ни распросте́рлъ є҆сѝ, просте́ртыѧ дре́вле рꙋкѝ а҆да́мовы къ разꙋ́мномꙋ са́дꙋ, ѿе́млѧ грѣ́хъ, за милосе́рдїе щедро́тъ, сло́ве бж҃їй пребл҃гі́й.
Оу҆твердѝ моѐ помышле́нїе, коле́блемое за́вистїю ѕмі́ѧ: страсте́й наведє́нїѧ, твое́ю стра́стїю ѿженѝ пострада́вый, и҆ безстра́стїе вѣ̑рнымъ дарова́вый.
По́стнаѧ бл҃года́ть возсїѧ̀, невоздержа́нїѧ тьмꙋ̀ ѿгонѧ́щаѧ: сѐ бл҃гопрїѧ́тное вре́мѧ, и҆ де́нь сп҃си́тельный, покаѧ́нїѧ пока́жемъ плоды̀, и҆ жи́ви бꙋ́демъ. <<рѯ҃ѕ: 331>>
Бг҃оро́диченъ: Па́дающихъ и҆справле́нїе, сласте́й стремни́ною па́дша мѧ̀, и҆ грѣхѝ лю́тыми впа́дша въ прѡ́пасти, воздви́гни чⷭ҇таѧ, и҆ къ жи́зни наста́ви.
И҆́ный господи́на ѳео́дѡра, гла́съ г҃.
І҆рмо́съ: Оу҆твердѝ гдⷭ҇и сердца̀ на̑ша:
Оу҆твердѝ гдⷭ҇и сердца̀ на̑ша твои́мъ крⷭ҇то́мъ, не ᲂу҆клонѧ́тисѧ ѿ тебѐ въ словеса̀ лꙋка̑ваѧ, и҆ въ дѣѧ̑нїѧ сквє́рнаѧ.
Стра́сть твою̀ влⷣко, нб҃о и҆ землѧ̀ чꙋ́вствꙋюще, и҆змѣнѧ́хꙋсѧ ꙗ҆́вѣ, цр҃ѧ̀ всѣ́хъ тѧ̀ показꙋ́юще вои́стиннꙋ.
Сла́ва, трⷪ҇ченъ: Равноче́стнаѧ, безнача́льнаѧ всест҃а́ѧ трⷪ҇це, животворѧ́щаѧ и҆ началосвѣ́тлаѧ є҆ди́нице, ѻ҆́ч҃е, и҆ сн҃е, и҆ дш҃е, сп҃сѝ мѧ̀.
Бг҃оро́диченъ: Бг҃омт҃и безмꙋ́жнаѧ, ражда́еши є҆ди́на бг҃а, не и҆стли́вши дѣ́вства чистотꙋ̀, но пребыва́еши чⷭ҇таѧ, ꙗ҆́коже была̀ є҆сѝ пре́жде ржⷭ҇тва̀.
Сла́ва тебѣ̀ бж҃е на́шъ, сла́ва тебѣ̀.
Багрѧ́нѣй ри́зѣ твое́й, гво́здїю и҆ крⷭ҇тꙋ̀, гꙋ́бѣ же и҆ копїю̀ і҆и҃се покланѧ́юсѧ, и҆ воспѣва́ю ѡ҆живи́вшаго всѧ̑.
Катава́сїа. І҆рмо́съ: Оу҆твердѝ гдⷭ҇и сердца̀ на̑ша, и҆ просвѣтѝ къ твоемꙋ̀ пѣсносло́вїю, є҆́же сла́вити тѧ̀ сп҃се во вѣ́къ вѣ́ка.
Пѣ́снь и҃. І҆рмо́съ: Пѣсносло́вцы:
Со беззако́нными вмѣни́тисѧ, за мно́жество млⷭ҇ти и҆зво́ливый, моѧ̑ грѣхѝ загла́ди, ꙗ҆́кѡ да вѣ́рою тѧ̀ сла́влю во всѧ̑ вѣ́ки.
Грѣхѡ́въ мои́хъ рꙋкописа́нїе твои́мъ раздерѝ копїе́мъ, и҆ се́рдца моегѡ̀ болѣ̑зни ᲂу҆врачꙋ́й гдⷭ҇и, ᲂу҆ѧ́звленнагѡ стрѣла́ми ѕло́бы лꙋка́выхъ де́монѡвъ. <<рѯ҃ѕ ѡ҆б.: 332>>
Ѡ҆мраче́нное се́рдце моѐ грѣхо́мъ, и҆збавле́нїемъ твои́мъ ѡ҆мы́й, и҆сте́кшею и҆з̾ ре́бръ кро́вїю хрⷭ҇тѐ мо́й, да тѧ̀ сла́влю во всѧ̑ вѣ́ки.
Бг҃оро́диченъ: Невоздѣ́ланнѡ прозѧ́бшаѧ нб҃е́сный кла́съ, пита́ющаго бж҃е́ственною си́лою всѧ́чєскаѧ дв҃о, насы́ти а҆́лчꙋщꙋю смире́ннꙋю дꙋ́шꙋ мою̀.
И҆́ный. І҆рмо́съ: Въ пла́мень ко ѻ҆трокѡ́мъ:
Ра́дꙋйсѧ крⷭ҇те, и҆́мже позна́сѧ є҆ди́нымъ мгнове́нїемъ разбо́йникъ бг҃осло́вецъ, взыва́ѧй: помѧнѝ мѧ̀ гдⷭ҇и, во црⷭ҇твїи твое́мъ, є҆гѡ́же ча́сти ѻ҆́бщники на́съ покажѝ.
Ты̀ прободе́нъ пла́менное ѻ҆рꙋ́жїе ѿвраща́еши хрⷭ҇тѐ, и҆ человѣ́кѡмъ ѿверза́еши па́ки ра́й: во́ньже входѧ́ще, твоеѧ̀ безсме́ртныѧ жи́зни при́снѡ наслажда́емсѧ.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ:
Со ѻ҆ц҃е́мъ сн҃ꙋ поклони́мсѧ, и҆ дх҃ꙋ ст҃о́мꙋ во є҆ди́номъ сꙋществѣ̀, немо́лчнѡ зовꙋ́ще бре́нными ᲂу҆сты̀: сла́ва въ вы́шнихъ бг҃ꙋ въ трⷪ҇цѣ.
Бг҃оро́диченъ: Ѻ҆трокоражда́еши дѣ́вствꙋющи,є҆ди́на бг҃обл҃года́тнаѧ, та́инство вели́кое, стра́шное чꙋ́до: бг҃а бо родила̀ є҆сѝ воплоще́нна, сп҃са мі́ра.
Сла́ва тебѣ̀ бж҃е на́шъ, сла́ва тебѣ̀.
Крⷭ҇те хрⷭ҇то́въ ᲂу҆пова́нїе концє́въ, преитѝ на́мъ твои́мъ ѡ҆кормле́нїемъ ти́хѡ, пꙋчи́нꙋ до́брагѡ поста̀ сподо́би, сп҃са́ѧ ѿ треволне́нїѧ прегрѣше́нїй.
Хва́лимъ, бл҃гослови́мъ, покланѧ́емсѧ гдⷭ҇ви:
І҆рмо́съ: Въ пла́мень ко ѻ҆трокѡ́мъ є҆врє́йскимъ снизше́дшаго, бж҃їею си́лою, и҆ ꙗ҆́вльшагосѧ гдⷭ҇а, сщ҃е́нницы бл҃гослови́те и҆ превозноси́те во всѧ̑ вѣ́ки. <<рѯ҃з: 333>>
Пѣ́снь ѳ҃.
І҆рмо́съ: Живопрїе́мный и҆сто́чникъ:
Пости́всѧ є҆лїссе́й воскр҃сѝ ᲂу҆ме́рша ѻ҆́трочища, ꙗ҆́коже є҆́сть пи́сано: и҆ мы̀ постѧ́щесѧ, плотска̑ѧ мꙋдрова̑нїѧ ᲂу҆мертви́ти вѣ́рнїи потщи́мсѧ, да жи́знь та́мѡ полꙋчи́мъ.
Оу҆вы̀ мнѣ̀ дꙋшѐ, стра́шное сꙋди́лище, и҆ сꙋдїино̀ стра́шное и҆зрече́нїе! потщи́сѧ пока́йсѧ, хрⷭ҇тꙋ̀ примири́сѧ, тебѐ ра́ди на крⷭ҇тѣ̀ повѣ́шенномꙋ, и҆ и҆зба́вльшемꙋ вѣ̑рныѧ ѡ҆сꙋжде́нїѧ.
Покаѧ́нїѧ мѝ двє́ри ѿве́рзи, страсте́й мои́хъ вхо́ды затворѝ, разбо́йникꙋ вхо́дъ ра́йскїй бл҃говхо́денъ показа́вый хрⷭ҇тѐ, твои́мъ распѧ́тїемъ, да сла́влю твою̀ бл҃гость.
Бг҃оро́диченъ: Ꙗ҆́кѡ во глꙋбинꙋ̀ ѕло́бы ѿве́рженъ є҆́смь, и҆ помышле́ньми сопроти́вными ѡ҆бꙋрева́юсѧ, де́монѡмъ повинꙋ́ѧсѧ, сластьмѝ порабоще́нъ сы́й: помозѝ мѝ чⷭ҇таѧ дв҃о мт҃и, ко сп҃се́нїѧ пꙋтѝ наставлѧ́ющи мѧ̀.
И҆́ный. І҆рмо́съ: На сїна́йстѣй горѣ̀:
Преда́лсѧ є҆сѝ во́лею, и҆ приве́лъ є҆сѝ себѐ ᲂу҆бі́йцамъ, сꙋди́лищꙋ предста́лъ є҆сѝ бїе́мь, ѿ рꙋ́къ ꙗ҆̀же созда́лъ є҆сѝ: ра́спѧтъ бы́лъ є҆сѝ и҆ порꙋ́ганъ, прободе́нъ бы́лъ є҆сѝ гдⷭ҇и, пострада́лъ є҆сѝ пло́тїю, всѧ̑ претерпѣ́въ млⷭ҇тивнѡ, да сп҃се́ши ны̀.
А҆́гг҃льстїи собо́ри вострепета́ша, ви́дѧще тѧ̀ на крⷭ҇тѣ̀, свѣти̑ла свѣ́тъ скры́ша, и҆ трѧса́шесѧ землѧ̀, колеба́хꙋсѧ всѧ̑ досажде́нїемъ твои́мъ гдⷭ҇и, бж҃е́ственными твои́ми стрⷭ҇тьмѝ содѣ́лалъ є҆сѝ на́мъ бж҃е сп҃се́нїе.
Трⷪ҇ченъ: Сꙋщество́мъ є҆ди́ница є҆́сть несѣко́ма, пребж҃е́ственнаѧ трⷪ҇це, соединѧ́ема є҆стество́мъ, дѣли́тсѧ <<рѯ҃з ѡ҆б.: 334>> ли́цы сво́йственнѡ: несѣко́ма бо сѣче́тсѧ, є҆ди́но сꙋ́щи трои́тсѧ: сїѧ̑ ѻ҆ц҃ъ є҆́сть, сн҃ъ, и҆ дх҃ъ живы́й, соблюда́ющаѧ всѐ.
Бг҃оро́диченъ: Дѣторо́днꙋю дв҃ꙋ кто̀ слы́ша, и҆ мт҃рь без̾ мꙋ́жа; мр҃і́е соверша́еши чꙋ́до: но скажи́ ми, ка́кѡ; не и҆спытꙋ́й глꙋби́нъ дѣторо́дїѧ: сїѐ всеи́стинно, па́че человѣ́ческагѡ ᲂу҆ма̀ постиже́нїе.
Сла́ва тебѣ̀ бж҃е на́шъ, сла́ва тебѣ̀.
Твое́ю ꙗ҆́звою всѝ и҆сцѣли́хомсѧ ѿ страсте́й грѣхѡ́въ: на крⷭ҇тѣ́ бо взѧ́тъ бы́въ, ѡ҆стрꙋпи́лъ є҆сѝ началоѕло́бника врага̀: но неѡсꙋжде́нны на́съ сподо́би, и҆ воскрⷭ҇нїе дости́гнꙋти, соверши́вшыѧ по́стное вре́мѧ.
І҆рмо́съ: На сїна́йстѣй горѣ̀ ви́дѣ тѧ̀ въ кꙋпинѣ̀ мѡѷсе́й, неѡпа́льнѡ ѻ҆́гнь бж҃ества̀ заче́ншꙋю во чре́вѣ, данїи́лъ же тѧ̀ ви́дѣ го́рꙋ несѣко́мꙋю, же́злъ прозѧ́бшїй, и҆са́їа взыва́ше, ѿ ко́рене дв҃дова.
Свѣти́ленъ гла́са.
На стїхо́внѣ самогла́сенъ, гла́съ з҃:
Крⷭ҇то́мъ твои́мъ гдⷭ҇и разрꙋши́вый сме́рть, наве́дшꙋюсѧ въ мі́ръ дре́ва ра́ди снѣ́ди, ю҆́же ѿре́клъ є҆сѝ въ раѝ: са́мъ ᲂу҆́бѡ посто́мъ настоѧ́щимъ на́съ и҆зба́ви всѧ́кїѧ сла́сти дꙋшетлѣ́нныѧ, и҆ сподо́би дѣ́лати пребыва́ющее бра́шно въ живо́тъ вѣ́чный: да полꙋчи́мъ вѣнцє́въ нетлѣ̑нныѧ сла́дѡсти, ꙗ҆̀же ᲂу҆гото́валъ є҆сѝ и҆́стиннымъ по́стникѡмъ, мо́лимсѧ. [Два́жды.]
Мч҃нченъ: Свѣти̑ла ꙗ҆ви́шасѧ вселе́нныѧ, всехва́льнїи стрⷭ҇тоте́рпцы, хрⷭ҇тꙋ̀ вопїю́ще: гдⷭ҇и, сла́ва тебѣ̀.
Сла́ва, и҆ ны́нѣ, крⷭ҇тобг҃оро́диченъ.
Подо́бенъ: Не ктомꙋ̀ возбранѧ́еми:
На дре́вѣ пригвожде́на тѧ̀ во́лею, ꙗ҆́кѡ ви́дѣ всенепоро́чнаѧ, рыда́ющи поѧ́ше держа́вꙋ твою̀ гдⷭ҇и. <<рѯ҃и: 335>>
На ѕ҃-мъ часѣ̀ тропа́рь прⷪ҇ро́чества, гла́съ ѕ҃:
Вы́шнїй на нб҃сѣ́хъ живы́й: созда́вый всѧ́кое дыха́нїе, сп҃си́ ны бж҃е: на тѧ́ бо ᲂу҆пова́хомъ сп҃се на́шъ.
Прокі́менъ, ѱало́мъ к҃ѳ, гла́съ є҃: Къ тебѣ̀ гдⷭ҇и воззовꙋ̀, и҆ къ бг҃ꙋ моемꙋ̀ помолю́сѧ. Сті́хъ: Вознесꙋ̀ тѧ̀ гдⷭ҇и, ꙗ҆́кѡ под̾ѧ́лъ мѧ̀ є҆сѝ.
Прⷪ҇ро́чества и҆са́їина чте́нїе. [Глава̀ є҃, ст. ѕ҃і- к҃є.]
Вознесе́тсѧ гдⷭ҇ь саваѡ́ѳъ въ сꙋдѣ̀, и҆ бг҃ъ ст҃ы́й просла́витсѧ въ пра́вдѣ: И҆ ᲂу҆пасꙋ́тсѧ расхище́ннїи ꙗ҆́кѡ ю҆нцы̀, и҆ пꙋсты̑ни плѣне́нныхъ а҆́гнцы поѧдѧ́тъ. Го́ре привлача́ющымъ грѣхѝ ꙗ҆́кѡ ᲂу҆́жемъ до́лгимъ, и҆ ꙗ҆́кѡ и҆́га ю҆́нична реме́немъ беззакѡ́нїѧ своѧ̑, Глаго́лющымъ: ско́рѡ да прибли́жатсѧ, ꙗ҆̀же сотвори́тъ, да ви́димъ, и҆ да прїи́детъ совѣ́тъ ст҃а́гѡ і҆и҃лева, да разꙋмѣ́емъ. Го́ре глаго́лющымъ лꙋка́вое до́брое, и҆ до́брое лꙋка́вое, полага́ющымъ тьмꙋ̀ свѣ́тъ, и҆ свѣ́тъ тьмꙋ̀, полага́ющымъ го́рькое сла́дкое, и҆ сла́дкое го́рькое. Го́ре, и҆̀же мꙋ́дри въ себѣ̀ сами́хъ, и҆ пред̾ собо́ю разꙋ́мни. Го́ре крѣ̑пкимъ ва́шымъ, вїно̀ пїю́щымъ, и҆ вельмо́жамъ растворѧ́ющымъ сїке́ръ: Ѡ҆правда́ющымъ нечести́ва дарѡ́въ ра́ди, и҆ є҆́же є҆́сть првⷣное првⷣнагѡ взе́млющымъ ѿ негѡ̀. Сегѡ̀ ра́ди ꙗ҆́коже сгори́тъ тро́сть ѿ ᲂу҆́глїѧ ѻ҆́гненнагѡ, и҆ сожже́тсѧ ѿ пла́мене разгорѣ́вшагѡсѧ, ко́рень и҆́хъ ꙗ҆́кѡ пе́рсть бꙋ́детъ, и҆ цвѣ́тъ и҆́хъ ꙗ҆́кѡ пра́хъ взы́детъ: не восхотѣ́ша бо зако́на гдⷭ҇а саваѡ́ѳа, но сло́во ст҃а́гѡ і҆и҃лева раздражи́ша. И҆ воз̾ѧри́сѧ гнѣ́вомъ гдⷭ҇ь саваѡ́ѳъ на лю́ди своѧ̑, и҆ наложѝ рꙋ́кꙋ свою̀ на ни́хъ, и҆ поразѝ и҆́хъ: и҆ раздражи́шасѧ го́ры, и҆ бы́ша трꙋ́пи и҆́хъ ꙗ҆́кѡ гно́й посредѣ̀ пꙋтѝ. и҆ во всѣ́хъ си́хъ не ѿврати́сѧ ꙗ҆́рость є҆гѡ̀, но є҆щѐ рꙋка̀ є҆гѡ̀ высока̀.
Прокі́менъ, ѱало́мъ л҃, гла́съ ѕ҃: На тѧ̀ гдⷭ҇и ᲂу҆пова́хъ, да не постыжꙋ́сѧ во вѣ́къ. Сті́хъ: Пра́вдою твое́ю и҆зба́ви мѧ̀, и҆ и҆зми́ мѧ. <<рѯ҃и ѡ҆б.: 336>>
Въ сре́дꙋ в҃-ѧ седми́цы ве́чера,
на Гдⷭ҇и воззва́хъ поста́вимъ стїхѡ́въ і҃: и҆ пое́мъ настоѧ́щїй самогла́сенъ два́жды, и҆ мч҃нченъ, и҆ подѡ́бны г҃.
Самогла́сенъ, гла́съ а҃:
Дх҃о́вный, бра́тїе, взе́мше по́стъ, ѧ҆зы́комъ не глаго́лите льсти̑внаѧ, нижѐ полага́йте претыка́нїѧ бра́тꙋ въ собла́знъ: но покаѧ́нїемъ просвѣти́вше дꙋшѝ свѣщꙋ̀ слеза́ми, возопїи́мъ хрⷭ҇тꙋ̀ ѡ҆ста́ви на́мъ грѣхопадє́нїѧ на̑ша, ꙗ҆́кѡ чл҃вѣколю́бецъ.
Мч҃нченъ: Всехва́льнїи мч҃нцы, ва́съ ни землѧ̀ потаи́ла є҆́сть, но нб҃о прїѧ́тъ: ѿверзо́шасѧ ва́мъ ра̑йскаѧ врата̀ и҆ внꙋ́трь бы́вше, дре́ва жи́зни наслажда́етесѧ, хрⷭ҇тꙋ̀ моли́тесѧ, дарова́тисѧ дꙋша́мъ на́шымъ ми́рꙋ, и҆ ве́лїей млⷭ҇ти.
И҆́ны стїхи̑ры господи́на і҆ѡ́сифа, гла́съ г҃.
Подо́бенъ: Ве́лїѧ крⷭ҇та̀:
Бж҃е́ственныхъ а҆пⷭ҇лъ гдⷭ҇и моле́ньми, по́стное вре́мѧ до́брѣ на́мъ соверши́ти, ᲂу҆миле́нїемъ по́мысла сподо́би, ꙗ҆́кѡ бл҃гъ бл҃гоꙋтро́бне, да сп҃са́еми тѧ̀ прославлѧ́емъ всѝ.
Подо́бенъ:
Вели́кое и҆ стра́шное твоѐ гдⷭ҇и прише́ствїе, въ не́мже сѣдѧ̀ сꙋ́дъ пра́ведный сотвори́ши, да не ᲂу҆́бѡ ѡ҆сꙋ́диши мѧ̀ ѡ҆сꙋжде́ннаго: но ꙗ҆́кѡ бг҃ъ пощади́ мѧ, а҆пⷭ҇лъ твои́хъ бл҃гопрїѧ́тными мл҃твами.
И҆́на стїхи́ра господи́на ѳео́дѡра, гла́съ ѕ҃.
Подо́бенъ: Всю̀ ѿложи́вше:
Хрⷭ҇тѡ́вы а҆пⷭ҇ли, земны̑мъ свѣти̑ла, сокрѡ́вища мїробѡга́тнаѧ, всемꙋ́драгѡ ра́зꙋма бг҃а на́шегѡ: ва́съ <<рѯ҃ѳ: 337>> пою́щыѧ и҆скꙋше́нїй и҆зба́вите ст҃ы́ми ва́шими мл҃твами, и҆ вре́мѧ на́мъ по́стное проводи́ти ю҆́ношески подаю́щи въ ми́рѣ жи́знь на́шꙋ: да бл҃гоꙋго́днѡ предвари́вше стрⷭ҇ть хрⷭ҇то́вꙋ, со дерзнове́нїемъ прино́симъ пѣ̑нїѧ бг҃ꙋ на́шемꙋ.
И҆ въ мине́и д҃. Сла́ва, и҆ ны́нѣ, бг҃оро́диченъ:
Прокі́менъ, ѱало́мъ л҃а, гла́съ ѕ҃: Весели́тесѧ ѡ҆ гдⷭ҇ѣ, и҆ ра́дꙋйтесѧ првⷣнїи. Сті́хъ: Бл҃же́ни, и҆́хже ѡ҆ста́вишасѧ беззакѡ́нїѧ.
Бытїѧ̀ чте́нїе. [Глава̀ д҃, ст. ѕ҃і-к҃ѕ.]
И҆зы́де ка́їнъ ѿ лица̀ бж҃їѧ, и҆ всели́сѧ въ зе́млю наі́дъ, прѧ́мѡ є҆де́мꙋ. И҆ позна̀ ка́їнъ женꙋ̀ свою̀, и҆ заче́нши родѝ є҆нѡ́ха: и҆ бѣ̀ зи́ждѧй гра́дъ, и҆ и҆менова̀ гра́дъ во и҆́мѧ сы́на своегѡ̀, є҆нѡ́хъ. Роди́сѧ же є҆нѡ́хꙋ гаїда́дъ, и҆ гаїда́дъ родѝ малелеи́ла: и҆ малелеи́лъ родѝ маѳꙋса́ла: маѳꙋса́лъ же родѝ ламе́ха. И҆ взѧ̀ себѣ̀ ламе́хъ двѣ̀ жєны̀: и҆́мѧ є҆ди́ной а҆да̀, и҆ и҆́мѧ вторѣ́й селла̀. И҆ родѝ а҆да̀ і҆ѡви́ла: се́й бѧ́ше ѻ҆те́цъ живꙋ́щихъ въ селе́нїихъ скотопита́телей. И҆ и҆́мѧ бра́тꙋ є҆гѡ̀, і҆ꙋва́лъ: се́й бѧ́ше показа́вый пѣвни́цꙋ, и҆ гꙋ́сли. Селла́ же и҆ та́ѧ родѝ ѳо́вела, се́й бѧ́ше млатобі́ецъ, кова́чь мѣ́ди и҆ желѣ́за: сестра́ же ѳо́велова, ноема̀. Рече́ же ламе́хъ свои̑мъ жена́мъ: а҆да̀ и҆ селла̀, ᲂу҆слы́шите гла́съ мо́й жєны̀ ламе́хѡвы, внꙋши́те моѧ̑ словеса̀: ꙗ҆́кѡ мꙋ́жа ᲂу҆би́хъ въ ꙗ҆́звꙋ мнѣ̀, и҆ ю҆́ношꙋ въ стрꙋ́пъ мнѣ̀. Ꙗ҆́кѡ седми́цею ѿмсти́сѧ ѿ ка́їна, ѿ ламе́ха же се́дмьдесѧть седми́цею. Позна́ же а҆да́мъ є҆́ѵꙋ женꙋ̀ свою̀, и҆ заче́нши родѝ сы́на, и҆ и҆менова̀ и҆́мѧ є҆мꙋ̀ си́ѳъ, глаго́лющи: воскреси́ бо мѝ бг҃ъ сѣ́мѧ дрꙋго́е, вмѣ́стѡ а҆́велѧ, є҆го́же ᲂу҆бѝ ка́їнъ. И҆ си́ѳꙋ бы́сть сы́нъ: и҆менова́ же и҆́мѧ є҆мꙋ̀ є҆нѡ́съ, се́й ᲂу҆пова̀ призыва́ти и҆́мѧ гдⷭ҇а бг҃а.
Прокі́менъ, ѱало́мъ л҃в, гла́съ а҃: Бꙋ́ди гдⷭ҇и млⷭ҇ть твоѧ̀ на на́съ, ꙗ҆́коже ᲂу҆пова́хомъ на тѧ̀. Сті́хъ: Ра́дꙋйтесѧ првⷣнїи ѡ҆ гдⷭ҇ѣ: <<рѯ҃ѳ ѡ҆б.: 338>>
При́тчей чте́нїе. [Глава̀ є҃, ст. є҃-к҃г. глава̀ ѕ҃, ст. а҃-г҃.]
Сы́не, пі́й во́ды ѿ свои́хъ сосꙋ́дѡвъ, и҆ ѿ твои́хъ кладенцє́въ и҆сто́чника: Да преизлива́ютсѧ тебѣ̀ во́ды ѿ твоегѡ̀ и҆сто́чника, во твои́ же пꙋти̑ да происхо́дѧтъ твоѧ̑ во́ды. Да бꙋ́дꙋтъ тебѣ̀ є҆ди́номꙋ и҆мѣ̑нїѧ, и҆ да никто́же чꙋ́ждь причасти́тсѧ тебѣ̀. И҆сто́чникъ твоеѧ̀ воды̀ да бꙋ́детъ тебѣ̀ тво́й, и҆ весели́сѧ съ жено́ю ꙗ҆́же ѿ ю҆́ности твоеѧ̀. Є҆ле́нь любвѐ, и҆ жребѧ̀ твои́хъ бл҃года́тей да бесѣ́дꙋетъ тебѣ̀, твоѧ́ же да пред̾и́детъ тебѣ̀, и҆ да бꙋ́детъ съ тобо́ю во всѧ́ко вре́мѧ: въ дрꙋ́жбѣ бо сеѧ̀ спребыва́ѧй, ᲂу҆мно́женъ бꙋ́деши. Не мно́гъ бꙋ́ди къ чꙋжде́й, нижѐ ѡ҆б̾ѧ́тъ бꙋ́ди ѡ҆б̾ѧ́тїи не твоеѧ̀. Пред̾ ѻ҆чи́ма бо сꙋ́ть бж҃їима пꙋтїѐ мꙋ́жа, всѧ̑ же течє́нїѧ є҆гѡ̀ назира́етъ. Законопрестꙋплє́нїѧ мꙋ́жа ᲂу҆ловлѧ́ютъ: плени́цами же свои́хъ грѣхѡ́въ кі́йждо затѧза́етсѧ. Се́й скончава́етсѧ съ ненака́занными: ѿ мно́жества же своегѡ̀ житїѧ̀ и҆зве́ржетсѧ, и҆ погиба́етъ за безꙋ́мїе.Сы́не, а҆́ще порꙋчи́шисѧ за твоего̀ дрꙋ́га, преда́си твою̀ рꙋ́кꙋ врагꙋ̀. Сѣ́ть бо крѣпка̀ мꙋ́жꙋ своѝ ᲂу҆стнѣ̀, и҆ плѣнѧ́етсѧ ᲂу҆стна́ми свои́хъ ᲂу҆́стъ. Творѝ сы́не, ꙗ҆̀же а҆́зъ заповѣ́даю тѝ, и҆ сп҃са́йсѧ.
И҆ а҆́бїе преждеѡсщ҃е́ннаѧ лїтꙋргі́а.
Въ четверто́къ вторы́ѧ седми́цы ст҃а́гѡ поста̀.
На ᲂу҆́трени, трⷪ҇чны гла́са. По а҃-мъ стїхосло́вїи сѣда́льны а҆пⷭ҇льскїѧ ѻ҆смогла́сника, съ бг҃оро́дичнымъ. По в҃-мъ же стїхосло́вїи глаго́лемъ настоѧ́щыѧ сѣда́льны, гла́съ г҃.
Подо́бенъ: Красотѣ̀ дв҃ства.
Хрⷭ҇то́съ лоза̀ кра́снаѧ, грѡ́здїѧ ва́съ принесѐ, сла́дость сп҃си́тельнꙋю напаѧ́ющыѧ землѝ, а҆по́столи бг҃оно́снїи: <<р҃ѻ: 339>> тѣ́мже мѧ̀ и҆зба́вите сласте́й пїѧ́нства, молю́сѧ, стрꙋи̑ ᲂу҆миле́нїѧ дꙋшѝ мое́й да́рꙋюще въ бж҃е́ственнѣмъ поще́нїѧ днѝ: ꙗ҆́кѡ да спа́ссѧ живо́тъ полꙋчꙋ̀.
Сла́ва, то́йже.
И҆ ны́нѣ, бг҃оро́диченъ: Млⷭ҇рдїѧ твоегѡ̀ бога́тство безмѣ́рное, и҆ могꙋ́тства твоегѡ̀ держа́вꙋ непребори́мꙋю прїе́млѧ во ᲂу҆́мъ, притеко́хъ къ кро́вꙋ твоемꙋ̀, ско́рбїю содержи́мь, и҆ лю́тѣ недоꙋмѣва́ѧ, зовꙋ̀ и҆з̾ глꙋбины̀ моегѡ̀ се́рдца со слеза́ми: дв҃о бцⷣе, помога́й мѝ, є҆ди́на мі́рꙋ предста́тельство.
По г҃-мъ стїхосло́вїи сѣда́ленъ, гла́съ ѕ҃.
Подо́бенъ: Гдⷭ҇и предстоѧ́ше:
Гдⷭ҇и бл҃гоꙋвѣ́тливъ бꙋ́ди на́мъ, въ сїѐ бж҃е́ственное вре́мѧ, сле́зы точи́ти тебѣ̀ ѿ се́рдца сподо́би всегда̀, ко ѿмове́нїю скве́рнъ дꙋше́вныхъ, и҆ къ прозѧбе́нїю ст҃ы́хъ за́повѣдей: ꙗ҆́кѡ да си́це постѧ́щесѧ, досто́йнѡ бл҃гоꙋгоди́мъ тебѣ̀, и҆ всечестнꙋ́ю твою̀ стрⷭ҇ть всѣ̑мъ ви́дѣти бл҃гоизво́ли, мл҃твами твои́хъ мїроспаси́тельныхъ а҆пⷭ҇лъ, сла́ва тебѣ̀.
Сла́ва, то́йже.
И҆ ны́нѣ, бг҃оро́диченъ: Млⷭ҇рдїѧ и҆сто́чникъ пречⷭ҇таѧ, чⷭ҇тна́ѧ дв҃о мт҃и бцⷣе, бога́тнѡ на ны̀ чⷭ҇таѧ и҆зле́й, и҆ да́рꙋй на́мъ согрѣше́нїй ѡ҆ставле́нїе: ты́ бо є҆сѝ предста́тельство на́ше и҆ бж҃е́ственный покро́въ.
Канѡ́нъ мине́и, и҆ настоѧ́щїй трипѣ́снецъ гдⷭ҇и́на і҆ѡ́сифа. Гла́съ г҃.
Пѣ́снь д҃.
І҆рмо́съ: Є҆да̀ въ рѣка́хъ прогнѣ́ваешисѧ:
Пїѧ́нство сласте́й дꙋшетлѣ́нныхъ ᲂу҆гаси́вше, ᲂу҆миле́нїѧ питїе́мъ, поста̀ ра́ди ᲂу҆гобзи́мсѧ.
Пости́сѧ дꙋшѐ невоздержа́нїѧ снѣ́ди, наслади́сѧ до́брыхъ видѣ́ньми, да вы́шнюю трапе́зꙋ ᲂу҆лꙋчи́ши. <<р҃ѻ: 339>>
Оу҆́глїе ѻ҆гнѧ̀ невеще́ственнагѡ сꙋ́ще, попали́те страсте́й мои́хъ вещество̀, бж҃е́ственнїи а҆пⷭ҇ли сп҃сѡвы.
Бг҃оро́диченъ: Пло́ть хрⷭ҇тꙋ̀ ѿ твоеѧ̀ взаи́мъ да́вшаѧ, ᲂу҆мертвѝ пло́ти моеѧ̀ стра̑сти, жизнороди́тельнице чⷭ҇таѧ дв҃о.
И҆́ный трипѣ́снецъ господи́на ѳео́дѡра. Гла́съ ѕ҃.
І҆рмо́съ: Оу҆слы́ша прⷪ҇ро́къ прише́ствїе твоѐ гдⷭ҇и:
Двоенадесѧ́тице а҆пⷭ҇лѡвъ, пе́тре, па́ѵле, і҆а́кѡве и҆ і҆ѡа́нне, а҆ндре́е, варѳоломе́е, фїлі́ппе, ѳѡмо̀ и҆ матѳе́е и҆ і҆а́кѡве, съ сі́мѡномъ и҆ і҆ꙋ́дою, мл҃твы сотвори́те хрⷭ҇тꙋ̀, сп҃сти́сѧ на́мъ.
Мрє́жи ᲂу҆че́нїй вве́ргше въ мо́ре житїѧ̀ стра́ннѡ, къ трїе́мъ сто̀ и҆ пѧтьдесѧ́тъ, та́йнѡ ꙗ҆зы́ки ꙗ҆́кѡ ры̑бы пре́жде ᲂу҆лови́сте, сїѧ̑ ко гдⷭ҇ꙋ приве́дше ст҃і́и а҆пⷭ҇ли.
Сла́ва, трⷪ҇ченъ: Сн҃а ѿ ѻ҆ц҃а̀ и҆ дх҃а сла́влю, ꙗ҆́кѡ ѿ со́лнца свѣ́тъ, и҆ лꙋчꙋ̀. ѻ҆́вагѡ ᲂу҆́бѡ рожде́ственнѣ, занѐ и҆ рожде́нїе: ѻ҆́вагѡ же происхо́днѣ, занѐ и҆ происхожде́нїе, собезнача́льнꙋю бж҃е́ственнꙋю трⷪ҇цꙋ, покланѧ́емꙋю ѿ всѧ́кїѧ тва́ри.
Бг҃оро́диченъ: Дв҃о младе́нца роди́вшаѧ, и҆ чистотꙋ̀ соблю́дшаѧ, чⷭ҇таѧ ты̀ ꙗ҆ви́ласѧ є҆сѝ, бг҃а ро́ждши и҆ чл҃вѣ́ка, є҆ди́наго того̀ во ѻ҆бою̀ зра̑кꙋ: чꙋ́до твоѐ дв҃о мт҃и, ᲂу҆жаса́етъ всѧ́кїй слꙋ́хъ и҆ по́мыслъ.
Сла́ва тебѣ̀ бж҃е на́шъ, сла́ва тебѣ̀.
Вы̀ є҆стѐ свѣ́тъ мі́рꙋ, ꙗ҆́коже ва́мъ речѐ хрⷭ҇то́съ, сїѧ́нїемъ сло́ва: но моли́тесѧ а҆пⷭ҇ли, великодꙋ́шнѡ препроводи́ти на́мъ по́прище воздержа́нїѧ, и҆ поклони́тисѧ тогѡ̀ воскрⷭ҇нїю.
І҆рмо́съ: Оу҆слы́ша прⷪ҇ро́къ прише́ствїе твоѐ гдⷭ҇и, и҆ ᲂу҆боѧ́сѧ, ꙗ҆́кѡ хо́щеши ѿ дв҃ы роди́тисѧ, и҆ человѣ́кѡмъ ꙗ҆ви́тисѧ, и҆ глаго́лаше: ᲂу҆слы́шахъ слꙋ́хъ тво́й и҆ ᲂу҆боѧ́хсѧ, сла́ва си́лѣ твое́й гдⷭ҇и. <<рѻ҃а: 341>>
Пѣ́снь и҃.
І҆рмо́съ: Въ пла́мень ко ѻ҆трокѡ́мъ:
Оу҆мертви́всѧ мно́гими грѣхѝ, ме́ртвꙋю приношꙋ̀ дꙋ́шꙋ въ житїѝ. тѣ́мже мѧ̀ ᲂу҆ще́дрите живоно́сными моли́твами ва́шими бг҃ови́дцы, ᲂу҆ченицы̀ сп҃сѡвы.
Ѡ҆б̾ѧ́тъ бы́въ грѣха̀ мгло́ю, а҆́дꙋ прибли́жихсѧ ѿча́ѧнїѧ вои́стиннꙋ. тѣ́мже мѧ̀ просвѣти́те, со́лнца сла́вы та̑йныѧ лꙋчы̀, сꙋ́ще бг҃ови́дцы.
Ѿ страсте́й воздержи́сѧ, и҆ спаса́йсѧ дꙋшѐ стра́стнаѧ: ѿложе́нїе бо бра́шенъ, по́стъ непрїѧ́тный, пра́вѣ и҆́щꙋщымъ, а҆́ще и҆ прегрѣше́нїй и҆справле́нїе не бꙋ́детъ.
Бг҃оро́диченъ: Кꙋпинꙋ̀ ѻ҆гне́мъ горѧ́щꙋю, мѡѷсе́й тѧ̀ предзрѧ́ше, дв҃о бг҃ома́ти. тѣ́мже ᲂу҆гасѝ мои́хъ страсте́й пе́щь, и҆ ѻ҆гнѧ̀ гее́нны и҆схитѝ и҆ сп҃сѝ.
И҆́ный. І҆рмо́съ: Є҆го́же вѡ́инства:
И҆з̾ і҆а́кѡва ꙗ҆́кѡ дванадесѧтоколѣ́нное, а҆пⷭ҇лъ и҆з̾ тебѐ дрꙋга́ѧ двоенадесѧ́тица ꙗ҆ви́сѧ хрⷭ҇тѐ въ мі́рѣ, є҆́юже ѿроди́сѧ всѧ́кїй вѣ́рный въ сло́вѣ, тебѐ воспѣва́ѧй во вѣ́ки.
Мы́сленнагѡ фараѡ́на колесни̑цы потопи́вше та́йнѣ, ꙗ҆́кѡ въ чермнѣ́мъ, лю́ди гдⷭ҇ни къ землѝ бг҃овѣ́дѣнїѧ и҆зведо́сте пою́щыѧ, а҆пⷭ҇ли, во вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Є҆ди́наго бг҃а по сꙋществꙋ̀ чтꙋ̀, трѝ ѵ҆поста̑си пою̀ ѡ҆предѣли́тельнѣ, и҆́ныѧ, но не и҆́накѡвыѧ, поне́же бж҃ество̀ є҆ди́но въ трїе́хъ ли́цѣхъ: и҆́бо ѻ҆ц҃ъ, и҆ сн҃ъ, и҆ бж҃е́ственный дх҃ъ.
Бг҃оро́диченъ: И҆з̾ свѣтлѣ́йшагѡ чре́ва твоегѡ̀ проше́дъ, ꙗ҆́кѡ жени́хъ и҆з̾ черто́га возсїѧ̀ хрⷭ҇то́съ, свѣ́тъ ве́лїй сꙋ́щымъ во тьмѣ̀, и҆́бо пра́вды со́лнце ѡ҆блиста́въ, просвѣтѝ чⷭ҇таѧ мі́ръ. <<рѻ҃а ѡ҆б.: 342>>
Сла́ва тебѣ̀ бж҃е на́шъ, сла́ва тебѣ̀.
Хрⷭ҇тѡ́вы таи̑нницы и҆ сопресто́льницы, прилѣ́жнѡ ѡ҆ на́съ грѣ́шныхъ всегда̀ молѧ́щїисѧ, и҆ ны́нѣ моли́те поще́нїе всѐ чи́стѣ преитѝ.
Хва́лимъ, бл҃гослови́мъ, покланѧ́емсѧ гдⷭ҇ви:
І҆рмо́съ: Є҆го́же вѡ́инства нбⷭ҇наѧ сла́вѧтъ, и҆ трепе́щꙋтъ херꙋві́ми и҆ серафі́ми, всѧ́ко дыха́нїе и҆ тва́рь, по́йте, бл҃гослови́те, и҆ превозноси́те во всѧ̑ вѣ́ки.
Пѣ́снь ѳ҃. І҆рмо́съ: На сїна́йстѣй горѣ̀:
Рѣ́ки бы́вше а҆пⷭ҇ли, и҆сто́чника ᲂу҆́мнагѡ, и҆ во́дꙋ живꙋ́ю бл҃гоисточи́вше се́рдцемъ чи́стымъ, моегѡ̀ грѣха̀ стрꙋи̑ и҆зсꙋши́те мл҃твами ва́шими, и҆ ко сп҃се́нїѧ пꙋтє́мъ наста́вите.
Грѣхо́внаѧ ѡ҆бꙋрева́етъ бꙋ́рѧ ѻ҆каѧ́ннꙋю мою̀ дꙋ́шꙋ, десни́цꙋ ꙗ҆́кѡ петрꙋ̀ мнѣ̀ прострѝ, ѡ҆корми́телю бл҃гі́й: да мѧ̀ глꙋбина̀ не покры́етъ ѿча́ѧнїѧ, снѣ́дь да не бꙋ́дꙋ ки́тꙋ дꙋшетлѣ́нномꙋ, хрⷭ҇тѐ многомлⷭ҇тиве.
А҆пⷭ҇тольскїй ли́къ мо́литъ тѧ̀ і҆и҃се всецр҃ю̀, мо́лѧтъ тѧ̀ а҆́гг҃льстїи чи́ни за мно́жество щедро́тъ, лю́демъ твои̑мъ пода́ждь ѕлы́хъ и҆збавле́нїе, житїѧ̀ и҆справле́нїе, и҆ црⷭ҇твїѧ твоегѡ̀ присвое́нїе.
Бг҃оро́диченъ: Дѣ́вство и҆ рождество̀ стеко́стасѧ па́че є҆стества̀ на тебѣ̀, ковче́же чⷭ҇тна́гѡ ѡ҆сщ҃е́нїѧ, мт҃и дв҃о чⷭ҇таѧ. тѣ́мже вѣ́рою вопїю́ ти: всего̀ мѧ̀ ѡ҆ст҃ѝ, всего̀ и҆зба́ви всѧ́кагѡ дѣ́йства страсте́й ѡ҆скорблѧ́ющихъ мѧ̀.
И҆́ный. І҆рмо́съ: Безсѣ́меннагѡ зача́тїѧ:
Въ мі́рѣ ꙗ҆́кѡ безпло́тнїи, и҆ во пло́ти ꙗ҆́кѡ а҆́гг҃ли, сло́во є҆ди́но въ се́рдцѣ носѧ́ще, привлеко́сте ꙗ҆зы́ки во <<рѻ҃в: 343>> хрⷭ҇то́вꙋ є҆ди́нꙋ вѣ́рꙋ, премꙋ̑дрыѧ и҆ вѣті̑и ꙗ҆́кѡ ю҆ро́ди ѡ҆бличи́вше ра́зꙋмомъ, всебл҃же́ннїи а҆пⷭ҇ли.
Пе́тре, вѣ́ры ка́меню, и҆ ѡ҆снова́нїе: па́ѵле проповѣ́дниче, и҆ ᲂу҆чи́телю ꙗ҆зы́кѡвъ: сы̑на зеведе́ѡва, съ про́чею ѻ҆смери́цею хрⷭ҇тꙋ̀ моли́тесѧ прилѣ́жнѡ, бл҃гомо́щнѡ преитѝ на́мъ поще́нїѧ по́прище.
Сла́ва: Є҆ди́нагѡ є҆динороди́телю, є҆диноро́днагѡ сн҃а ѻ҆́ч҃е, и҆ є҆ди́не є҆ди́нагѡ свѣ́те, свѣ́та сїѧ́нїе: и҆ є҆ди́ный є҆ди́нѣ є҆ди́нагѡ бг҃а, ст҃ы́й дш҃е, гдⷭ҇а гдⷭ҇ь вои́стиннꙋ сы́й. ѽ трⷪ҇це, є҆ди́нице ст҃а́ѧ, сп҃сѝ мѧ̀ бг҃осло́вѧща тѧ̀.
И҆ ны́нѣ, бг҃оро́диченъ: Чꙋ́до ржⷭ҇тва̀ твоегѡ̀ ᲂу҆дивлѧ́етъ мѧ̀ всенепоро́чнаѧ, ка́кѡ зачина́еши безсѣ́меннѡ неѡбыме́ннаго; рцы̀, ка́кѡ дѣ́вствꙋеши, ро́ждши ꙗ҆́кѡ мт҃и; є҆́же па́че є҆стества̀ вѣ́рою прїе́мъ, рожде́нномꙋ поклони́сѧ: є҆ли̑ка хо́щетъ бо, и҆ мо́жетъ.
Сла́ва тебѣ̀ бж҃е на́шъ, сла́ва тебѣ̀.
Си́лою дх҃а къ царє́мъ и҆ кнѧзє́мъ и҆зше́дше, ника́коже ᲂу҆боѧ́вшесѧ, ни ѻ҆гнѧ̀, ни меча̀, побѣди́сте всѧ́кꙋю пре́лесть, и҆ сп҃са́ете человѣ́ки, воевѡ́ды гдⷭ҇ни сꙋ́ще, всебл҃же́ннїи а҆пⷭ҇ли.
І҆рмо́съ: Безсѣ́меннагѡ зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ: бж҃їе бо рожде́нїе ѡ҆бновлѧ́етъ є҆стества̀, тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю мт҃рь, правосла́внѡ велича́емъ.
Свѣти́ленъ гла́са.
На стїхо́внѣ самогла́сенъ, два́жды. Гла́съ и҃:
Покаѧ́нїѧ вре́мѧ, и҆ жи́зни вѣ́чныѧ хода́тай на́мъ є҆́сть по́стный по́двигъ, а҆́ще простре́мъ рꙋ́ки во бл҃готворе́нїе: ничесѡ́же бо та́кѡ сп҃са́етъ дꙋ́шꙋ, ꙗ҆́коже подаѧ́нїе тре́бꙋющымъ. млⷭ҇тынѧ растворе́ннаѧ посто́мъ, <<рѻ҃в ѡ҆б.: 344>> ѿ сме́рти и҆збавлѧ́етъ человѣ́ка: сїю̀ цѣлꙋ́имъ, є҆́йже ничто́же ра́вно, дово́льна бо є҆́сть сп҃стѝ дꙋ́шы на́шѧ.
Мꙋ́чениченъ: Въ бронѧ̀ вѣ́ры ѡ҆бо́лкшесѧ до́брѣ, и҆ ѡ҆́бразомъ крⷭ҇тнымъ воѡрꙋжи́вше себѐ, во́ини бл҃гомо́щнїи показа́стесѧ, мꙋчи́телємъ мꙋ́жески проти́вистесѧ, и҆ дїа́волю пре́лесть потреби́сте, побѣди́телє бы́вше вѣнцє́въ сподо́бистесѧ: моли́тесѧ хрⷭ҇тꙋ̀ ѡ҆ на́съ, во є҆́же сп҃сти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ, гла́съ то́йже: А҆́зъ дв҃о ст҃а́ѧ бцⷣе, къ покро́вꙋ твоемꙋ̀ прибѣга́ю, вѣ́мъ, ꙗ҆́кѡ ѡ҆брѧ́щꙋ тобо́ю сп҃се́нїе: мо́жеши бо чⷭ҇таѧ помощи́ ми.
На ѕ҃-мъ часѣ̀ тропа́рь прⷪ҇ро́чества, гла́съ а҃:
Па́дшыѧ возста́ви ны̀, ѿвра́щшыѧсѧ ѡ҆братѝ къ тебѣ̀ бж҃е, ꙗ҆́кѡ чл҃вѣколю́бецъ, земны̑ѧ содержа́й концы̀.
Прокі́менъ, ѱало́мъ л҃г, гла́съ ѕ҃: Взыска́хъ гдⷭ҇а, и҆ ᲂу҆слы́ша мѧ̀, и҆ ѿ всѣ́хъ скорбе́й мои́хъ и҆зба́ви мѧ̀. Сті́хъ: Бл҃гословлю̀ гдⷭ҇а на всѧ́кое вре́мѧ.
Прⷪ҇ро́чества и҆са́їина чте́нїе. [Глава̀ ѕ҃ ст. а҃- в҃і.].
Бы́сть въ лѣ́то, въ не́же ᲂу҆́мре ѻ҆зі́а ца́рь, ви́дѣхъ гдⷭ҇а сѣдѧ́ща на прⷭ҇то́лѣ высо́цѣ, и҆ превознесе́ннѣ, и҆ и҆спо́лнь до́мъ сла́вы є҆гѡ̀. И҆ серафі́ми стоѧ́хꙋ ѻ҆́крестъ є҆гѡ̀, ше́сть кри́лъ є҆ди́номꙋ, и҆ ше́сть кри́лъ дрꙋго́мꙋ: и҆ двѣма̀ ᲂу҆́бѡ покрыва́хꙋ ли́ца своѧ̑, двѣма́ же покрыва́хꙋ но́ги своѧ̑, и҆ двѣма̀ лета́хꙋ. И҆ взыва́хꙋ дрꙋ́гъ ко дрꙋ́гꙋ, и҆ глаго́лахꙋ: ст҃ъ, ст҃ъ, ст҃ъ гдⷭ҇ь саваѡ́ѳъ: и҆спо́лнь всѧ̀ землѧ̀ сла́вы є҆гѡ̀. И҆ взѧ́сѧ наддве́рїе ѿ гла́са, и҆́мже вопїѧ́хꙋ, и҆ до́мъ напо́лнисѧ ды́ма. И҆ реко́хъ: ѽ ѻ҆каѧ́нный а҆́зъ, ꙗ҆́кѡ ᲂу҆мили́хсѧ, ꙗ҆́кѡ человѣ́къ сы́й, и҆ не чи́сты ᲂу҆стнѣ̀ и҆мы́й, посредѣ̀ люде́й нечи̑стыѧ ᲂу҆стнѣ̀ и҆мꙋ́щихъ а҆́зъ живꙋ̀: и҆ цр҃ѧ̀ гдⷭ҇а саваѡ́ѳа ви́дѣхъ ѻ҆чи́ма мои́ма. <<рѻ҃г: 345>> И҆ по́сланъ бы́сть ко мнѣ̀ є҆ди́нъ ѿ серафі́мѡвъ, и҆ въ рꙋцѣ̀ свое́й и҆мѧ́ше ᲂу҆́гль горѧ́щь, є҆го́же клеща́ми взѧ́тъ ѿ ѻ҆лтарѧ̀, И҆ прикоснꙋ́сѧ ᲂу҆стна́мъ мои̑мъ, и҆ речѐ: сѐ прикоснꙋ́сѧ сїѐ ᲂу҆стна́мъ твои̑мъ, и҆ ѿи́метъ беззакѡ́нїѧ твоѧ̑, и҆ грѣхѝ твоѧ̑ ѡ҆чи́ститъ. И҆ слы́шахъ гла́съ гдⷭ҇а глаго́люща: кого̀ послю̀ и҆ кто̀ по́йдетъ къ лю́демъ си̑мъ; и҆ реко́хъ: сѐ а҆́зъ є҆́смь, послѝ мѧ̀. И҆ речѐ: и҆дѝ и҆ рцы̀ лю́демъ си̑мъ: слꙋ́хомъ ᲂу҆слы́шите, и҆ не ᲂу҆разꙋмѣ́ете: и҆ ви́дѧще, ᲂу҆́зрите, и҆ не ᲂу҆ви́дите: Ѡ҆дебелѣ́ бо се́рдце люде́й си́хъ, и҆ ᲂу҆ши́ма свои́ма тѧ́жкѡ слы́шаша, и҆ ѻ҆́чи своѝ смѣжи́ша: да не когда̀ ᲂу҆́зрѧтъ ѻ҆чи́ма, и҆ ᲂу҆ши́ма ᲂу҆слы́шатъ, и҆ се́рдцемъ ᲂу҆разꙋмѣ́ютъ, и҆ ѡ҆братѧ́тсѧ и҆ и҆сцѣлю̀ ѧ҆̀. И҆ реко́хъ: доко́лѣ гдⷭ҇и; и҆ речѐ: до́ндеже ѡ҆пꙋстѣ́ютъ гра́ди, ѿ є҆́же ненаселє́нымъ бы́ти, и҆ до́мы, ѿ є҆́же не бы́ти человѣ́кѡмъ, и҆ землѧ̀ ѡ҆ста́нетсѧ пꙋста̀. И҆ посе́мъ продолжи́тъ бг҃ъ человѣ́ки, и҆ ᲂу҆мно́жатсѧ ѡ҆ста́вльшїисѧ на землѝ.
Прокі́менъ, ѱало́мъ л҃д, гла́съ ѕ҃: Воста́ни гдⷭ҇и, и҆ вонмѝ сꙋдꙋ̀ моемꙋ̀. Сті́хъ: Сꙋдѝ гдⷭ҇и ѡ҆би́дѧщыѧ мѧ̀. <<рѻ҃г ѡ҆б.: 346>>
Въ четверто́къ в҃-ѧ седми́цы ве́чера.
На Гдⷭ҇и воззва́хъ, поста́вимъ стїхѡ́въ ѕ҃, и҆ пое́мъ настоѧ́щыѧ подо́бны трѝ трипѣ́снца, господи́на і҆ѡ́сифа. Гла́съ д҃.
Подо́бенъ: Да́лъ є҆сѝ зна́менїе:
Въ ре́бра прободе́нъ, и҆ на дре́вѣ повѣ́шенъ, жи́знь мнѣ̀ и҆сточи́лъ є҆сѝ, ѕло́бою ѕмі́ѧ, дре́ва снѣде́нїемъ ᲂу҆мерщвле́нномꙋ. тѣ́мже сла́влю тѧ̀ хрⷭ҇тѐ, и҆ молю̀ бл҃гоꙋтро́бїе твоѐ: страстє́мъ и҆ воста́нїю покло́нника мѧ̀ покажѝ, ᲂу҆миле́нїемъ соверша́юща по́стное по́прище.
Болѣ́знь ѡ҆бра́вша ѿ сада̀, первосозда́ннаго ѿ раѧ̀ и҆згна́лъ є҆сѝ: пригвозди́всѧ же ꙗ҆́кѡ человѣ́къ сп҃се на дре́вѣ, сего̀ вво́диши. тѣ́мже тѝ зовꙋ̀ и҆зба́вителю: ѿ болѣ́зней мои́хъ ны́нѣ мѧ̀ и҆схитѝ, посто́мъ ѡ҆чи́стивъ мѧ̀, и҆ покаѧ́нїемъ и҆ слеза́ми, і҆и҃се пребл҃гі́й, сп҃се дꙋ́шъ на́шихъ.
И҆́на стїхи́ра подо́бна, гла́съ є҃, господи́на ѳео́дѡра: Гдⷭ҇и, при мѡѷсе́и:
Гдⷭ҇и, животворѧ́щїй тво́й крⷭ҇тъ воспѣва́емъ: се́й бо жи́знь въ мі́рѣ процвѣтѐ, сме́рть ᲂу҆мертви́въ: є҆го́же тебѣ̀ и҆ ны́нѣ въ мл҃твꙋ приво́димъ: во дне́хъ ст҃ы́хъ ᲂу҆крѣпи́ ны постѧ́щыѧсѧ, и҆ да́рꙋй на стра̑сти крѣ́пость, и҆ мі́ра побѣ́дное, за мно́жество млⷭ҇ти чл҃вѣколю́бче.
И҆ мине́и г҃. Сла́ва, и҆ ны́нѣ, бг҃оро́диченъ.
Прокі́менъ, ѱало́мъ л҃є, гла́съ д҃: Гдⷭ҇и, на нб҃сѝ млⷭ҇ть твоѧ̀, и҆ и҆́стина твоѧ̀ до ѻ҆́блакъ. Сті́хъ: Пра́вда твоѧ̀ ꙗ҆́кѡ го́ры бж҃їѧ: сꙋдьбы̑ твоѧ̑ бе́здна мно́га. <<рѻ҃д: 347>>
Бытїѧ̀ чте́нїе. [Глава̀ є҃, ст. а҃-к҃д.]
Сїѧ̀ кни́га бытїѧ̀ человѣ́ча, во́ньже де́нь сотворѝ бг҃ъ а҆да́ма: по ѡ҆́бразꙋ бж҃їю сотворѝ є҆го̀. Мꙋ́жа и҆ женꙋ̀ сотворѝ и҆́хъ, и҆ бл҃гословѝ и҆́хъ: и҆ наречѐ и҆́мѧ є҆мꙋ̀ а҆да́мъ, во́ньже де́нь сотворѝ и҆́хъ. Поживе́ же а҆да́мъ лѣ́тъ двѣ́стѣ три́десѧть, и҆ родѝ сы́на по ви́дꙋ своемꙋ̀, и҆ по ѡ҆́бразꙋ своемꙋ̀: и҆ наречѐ и҆́мѧ є҆мꙋ̀ си́ѳъ. Бы́ша же дні́е а҆да́мовы, ꙗ҆̀же поживѐ, по є҆́же роди́ти є҆мꙋ̀ си́ѳа, лѣ́тъ се́дмь сѡ́тъ, и҆ родѝ сы́ны и҆ дщє́ри. И҆ бы́ша всѝ дні́е а҆да́мѡвы, ꙗ҆̀же поживѐ, лѣ́тъ де́вѧть сѡ́тъ и҆ три́десѧть: и҆ ᲂу҆́мре. Поживе́ же си́ѳъ лѣ́тъ двѣ́стѣ пѧ́ть, и҆ родѝ є҆нѡ́са: И҆ поживѐ си́ѳъ, по є҆́же роди́ти є҆мꙋ̀ є҆нѡ́са, лѣ́тъ се́дмь сѡ́тъ и҆ се́дмь, и҆ родѝ сы́ны и҆ дщє́ри. И҆ бы́ша всѝ дні́е си́ѳѡвы, лѣ́тъ де́вѧть сѡ́тъ и҆ двана́десѧть: и҆ ᲂу҆́мре. И҆ поживѐ є҆нѡ́съ лѣ́тъ сто̀ де́вѧтьдесѧтъ, и҆ родѝ каїна́на: И҆ поживѐ є҆нѡ́съ, по є҆́же роди́ти є҆мꙋ̀ каїна́на, лѣ́тъ се́дмь сѡ́тъ и҆ пѧтьна́десѧть, и҆ родѝ сы́ны и҆ дщє́ри. И҆ бы́ша всѝ дні́е є҆нѡ́совы лѣ́тъ де́вѧть сѡ́тъ и҆ пѧ́ть: и҆ ᲂу҆́мре. И҆ поживѐ каїна́нъ лѣ́тъ сто̀ се́дмьдесѧтъ, и҆ родѝ малелеи́ла. И҆ поживѐ каїна́нъ, по є҆́же роди́ти є҆мꙋ̀ малелеи́ла, лѣ́тъ се́дмь сѡ́тъ и҆ четы́редесѧть, и҆ родѝ сы́ны и҆ дщє́ри. И҆ бы́ша всѝ дні́е каїна́новы, лѣ́тъ де́вѧть сѡ́тъ и҆ де́сѧть: и҆ ᲂу҆́мре. И҆ поживѐ малелеи́лъ лѣ́тъ сто̀ шестьдесѧ́тъ пѧ́ть, и҆ родѝ і҆а́реда. И҆ поживѐ малелеи́лъ, по є҆́же роди́ти є҆мꙋ̀ і҆а́реда, лѣ́тъ се́дмь сѡ́тъ и҆ три́десѧть, и҆ родѝ сы́ны и҆ дщє́ри. И҆ бы́ша всѝ дні́е малелеи́ловы, лѣ́тъ ѻ҆́смь сѡ́тъ и҆ де́вѧтьдесѧтъ пѧ́ть: и҆ ᲂу҆́мре. И҆ поживѐ і҆а́редъ лѣ́тъ сто̀ шестьдесѧ́тъ два̀, и҆ родѝ є҆нѡ́ха. И҆ поживѐ і҆а́редъ, по є҆́же роди́ти є҆мꙋ̀ є҆нѡ́ха, лѣ́тъ ѻ҆́смь сѡ́тъ, и҆ родѝ <<рѻ҃д ѡ҆б.: 348>> сы́ны и҆ дщє́ри. И҆ бы́ша всѝ дні́е і҆а́редовы лѣ́тъ девѧтьсѡ́тъ и҆ шестьдесѧ́тъ два̀: и҆ ᲂу҆́мре. И҆ поживѐ є҆нѡ́хъ лѣ́тъ сто̀ шестьдесѧ́тъ пѧ́ть, и҆ родѝ маѳꙋса́ла. Оу҆годи́ же є҆нѡ́хъ бг҃ꙋ, и҆ поживѐ є҆нѡ́хъ, по є҆́же роди́ти є҆мꙋ̀ маѳꙋса́ла, лѣ́тъ двѣ́стѣ, и҆ родѝ сы́ны и҆ дщє́ри. И҆ бы́ша всѝ дні́е є҆нѡ́ховы лѣ́тъ три́ста шестьдесѧ́тъ пѧ́ть. И҆ ᲂу҆годѝ є҆нѡ́хъ бг҃ꙋ, и҆ не ѡ҆брѣта́шесѧ, занѐ преложѝ є҆го̀ бг҃ъ.
Прокі́менъ, ѱало́мъ л҃ѕ, гла́съ ѕ҃: Потерпѝ гдⷭ҇а, и҆ сохранѝ пꙋ́ть є҆гѡ̀. Сті́хъ: Не ревнꙋ́й лꙋка́внꙋющымъ, нижѐ зави́ди творѧ́щымъ беззако́нїе.
При́тчей чте́нїе. [Глава̀ ѕ҃, ст. г҃-к҃.]
Творѝ сы́не, ꙗ҆̀же а҆́зъ заповѣ́дꙋю тѝ, и҆ сп҃са́йсѧ: и҆́деши бо въ рꙋ́цѣ ѕлы́хъ за твоего̀ дрꙋ́га, бꙋ́ди не ѡ҆слабѣва́ѧ: поѡщрѧ́й же и҆ твоего̀ дрꙋ́га, є҆го́же и҆спорꙋчи́лъ є҆сѝ. Не да́ждь сна̀ твои́ма ѻ҆чи́ма, нижѐ да воздре́млеши твои́ма вѣ́ждома: Да сп҃се́шисѧ а҆́ки се́рна ѿ тене́тъ, и҆ ꙗ҆́кѡ пти́ца ѿ сѣ́ти. И҆дѝ ко мра́вїю, ѽ лѣни́ве, и҆ поревнꙋ́й, ви́дѣвъ пꙋти̑ є҆гѡ̀, и҆ бꙋ́ди ѻ҆́нагѡ мꙋдрѣ́йшїй. Ѻ҆́нъ бо не сꙋ́щꙋ є҆мꙋ̀ земледѣ́льцꙋ, нижѐ нꙋ́дѧщаго є҆го̀ и҆мꙋ́щїй, нижѐ под̾ влады́кою сы́й, Гото́витъ въ жа́твꙋ пи́щꙋ, и҆ мно́гое въ лѣ́то твори́тъ ᲂу҆гото́ванїе. и҆лѝ и҆дѝ ко пчелѣ̀, и҆ ᲂу҆вѣ́ждь, ко́ль дѣ́лательница є҆́сть, дѣ́ланїе же ко́ль честно́е твори́тъ: є҆ѧ́же трꙋдѡ́въ ца́рїе и҆ прості́и во здра́вїе ᲂу҆потреблѧ́ютъ, люби́ма же є҆́сть всѣ́ми и҆ сла́вна: а҆́ще си́лою и҆ немощна̀ сꙋ́щи, [но] премꙋ́дростїю почте́на произведе́сѧ. Доко́лѣ, ѽ лѣни́ве, лежи́ши; когда́ же ѿ сна̀ воста́неши; Ма́лѡ ᲂу҆́бѡ спи́ши, ма́лѡ же сѣди́ши, ма́лѡ же дре́млеши, ма́лѡ же ѡ҆б̾е́млеши пє́рси рꙋка́ма: Пото́мъ же на́йдетъ тебѣ̀ а҆́ки ѕо́лъ <<рѻ҃є: 349>> пꙋ́тникъ ᲂу҆бо́жество: скꙋ́дость же а҆́ки бл҃гі́й тече́цъ. а҆́ще же не лѣни́въ бꙋ́деши, прїи́детъ ꙗ҆́кѡ и҆сто́чникъ жа́тва твоѧ̀, скꙋ́дость же а҆́ки ѕлы́й тече́цъ [ѿ тебѐ] ѿбѣжи́тъ. Мꙋ́жъ безꙋ́менъ и҆ законопрестꙋ́пный хо́дитъ въ пꙋти̑ не бла̑ги: То́йже намиза́етъ ѻ҆́комъ, и҆ зна́менїе дае́тъ ного́ю, ᲂу҆чи́тъ же помава́нїемъ пе́рстѡвъ. Развраще́нно же се́рдце кꙋе́тъ ѕла̑ѧ: на всѧ́кое вре́мѧ таковы́й мѧте́жы составлѧ́етъ гра́дꙋ. Сегѡ̀ ра́ди внеза́пꙋ прихо́дитъ є҆мꙋ̀ поги́бель, разсѣче́нїе и҆ сокрꙋше́нїе неисцѣ́льное. Ꙗ҆́кѡ ра́дꙋетсѧ ѡ҆ всѣ́хъ, и҆̀хже ненави́дитъ бг҃ъ: сокрꙋша́етсѧ же за нечистотꙋ̀ дꙋшѝ. Ѻ҆́ко досади́телѧ, ѧ҆зы́къ непра́ведный, рꙋ́цѣ пролива́ющыѧ кро́вь првⷣнагѡ: И҆ се́рдце кꙋю́щее мы̑сли ѕлы̀, и҆ но́зѣ тща́щїисѧ ѕло̀ твори́ти, потребѧ́тсѧ. Разжиза́етъ лжи̑ свидѣ́тель непра́веденъ, и҆ насыла́етъ сꙋды̀ посредѣ̀ бра́тїй. Сы́не, хранѝ зако́ны ѻ҆тца̀ твоегѡ̀, и҆ не ѿри́ни наказа́нїѧ ма́тере твоеѧ̀.
На стїхо́внѣ самогла́сенъ днѐ.
Гла́съ є҃. Не пости́вшесѧ по за́повѣди созда́вшагѡ, ѿ сада̀ ра́зꙋма первозда́ннїи, сме́рть ѿ преслꙋша́нїѧ приплоди́ша, дре́ва же жи́зни и҆ ра́йскїѧ сла́дости ᲂу҆страни́вшесѧ. тѣ́мже пости́мсѧ вѣ́рнїи ѿ пи́щей тлѣ́нныхъ, и҆ страсте́й всегꙋби́тельныхъ, да ѿ бж҃е́ственнагѡ крⷭ҇та̀ жи́знь ѡ҆бы́мемъ, и҆ со бл҃гоꙋ́мнымъ разбо́йникомъ къ нача́льномꙋ ѻ҆ч҃ествꙋ возрати́мсѧ, прїе́млюще ѿ хрⷭ҇та̀ бг҃а ве́лїю млⷭ҇ть. [Два́жды.]
Мч҃нченъ: Ѡ҆ земны́хъ всѣ́хъ неради́вше, и҆ на мꙋ̑ки мꙋ́жески дерзнꙋ́вше, бл҃же́нныхъ наде́ждъ не погрѣши́сте, но нбⷭ҇номꙋ црⷭ҇твїю наслѣ̑дницы бы́сте, всехва́льнїи мч҃нцы, и҆мꙋ́ще дерзнове́нїе къ чл҃вѣколю́бцꙋ бг҃ꙋ, ми́ръ мі́рови и҆спроси́те, и҆ дꙋша́мъ на́шымъ ве́лїю млⷭ҇ть. <<рѻ҃є ѡ҆б.: 350>>
Сла́ва, и҆ ны́нѣ, крⷭ҇тобг҃оро́диченъ.
Подо́бенъ: Ра́дꙋйсѧ по́стникѡмъ:
А҆́гнца своего̀, а҆́гница и҆ногда̀ зрѧ́щи къ заколе́нїю тща́щасѧ, ᲂу҆се́рднѡ послѣ́доваше, сїѧ̑ вопїю́щи є҆мꙋ̀: ка́мѡ и҆́деши ча́до моѐ сладча́йшее хрⷭ҇тѐ, чесѡ̀ ра́ди ско́рое тече́нїе сїѐ, долготерпѣли́ве, тече́ши нелѣ́ностнѡ; і҆и҃се возжелѣ́ннѣйшїй безгрѣ́шне, многомлⷭ҇тиве гдⷭ҇и, да́ждь мѝ сло́во рабѣ̀ твое́й, сн҃е мо́й вселюбе́знѣйшїй, не пре́зри менѐ ще́дре молча̀, тѧ̀ стра́ннѡ ро́ждшꙋю, бж҃е всеще́дре, да́рꙋѧй мі́рови ве́лїю млⷭ҇ть.
Въ пѧто́къ в҃-ѧ седми́цы,
на ᲂу҆́трени трⷪ҇чны гла́са. По а҃-мъ стїхосло́вїи сѣда́льны крⷭ҇тны ѻ҆смогла́сника, съ бг҃оро́дичнымъ. По в҃-мъ же стїхосло́вїи глаго́лемъ настоѧ́щыѧ сѣда́льны, гла́съ д҃.
Подо́бенъ: Ско́рѡ предварѝ
Поще́нїемъ возвыша́ющесѧ ѿ земноревни́тельныхъ страсте́й вознесе́мъ гдⷭ҇а возне́сшагосѧ на крⷭ҇тъ, и҆ мі́ръ возвы́сившаго. пїи́мъ во чꙋ́вствѣ ᲂу҆миле́нїѧ питїѐ, прїи́мемъ де́нь во ᲂу҆мѣ̀ и҆ ча́съ, во́ньже вѣ́чномꙋ сꙋдїѝ предста́немъ. Два́жды.
Крⷭ҇тобг҃оро́диченъ. Подо́бенъ:
Безневѣ́стнаѧ мт҃и твоѧ̀, ꙗ҆́кѡ ви́дѣ на крⷭ҇тъ тѧ̀ возвыша́ема, рыда́ющи и҆ пла́чꙋщи сицева̑ѧ глаго́лаше: что̀ но́вое и҆ стра́нное сїѐ сн҃е мо́й чꙋ́до; ка́кѡ тѧ̀ беззако́нный наро́дъ ко крⷭ҇тꙋ̀ пригвожда́етъ, всѣ́хъ тѧ̀ жи́знь, свѣ́та моего̀ сладча́йшаго; <<рѻ҃ѕ: 351>>
По г҃-мъ стїхосло́вїи сѣда́ленъ господи́на ѳео́дѡра, гла́съ є҃.
Подо́бенъ: Сїѧ́етъ дне́сь:
Сїѧ́етъ гдⷭ҇и, бл҃года́ть крⷭ҇та̀ твоегѡ̀, всю̀ вселе́ннꙋю ѡ҆блиста́ющаѧ, крѣ́пость бѣсо́вскꙋю потреблѧ́етъ, и҆ поще́нїѧ тече́нїе ны́нѣ бл҃гоꙋкраша́етъ: въ не́мже ᲂу҆крѣплѧ́ѧ, поми́лꙋй на́съ. [Два́жды.]
Крⷭ҇тобг҃оро́диченъ, гла́съ то́йже.
Подо́бенъ: Собезнача́льное:
Вознесе́на на дре́вѣ ꙗ҆́кѡ ви́дѣ, ро́ждшаѧ тѧ̀ мт҃и кромѣ̀ болѣ́зней, и҆ рыда́ше съ пла́чемъ, и҆ взыва́ше: ᲂу҆вы̀ мнѣ̀ сладча́йшїй сн҃е, ᲂу҆ѧзвлѧ́юсѧ ны́нѣ дꙋше́ю, на крⷭ҇тѣ̀ зрѧ́щи тѧ̀, посредѣ̀ двою̀ ѕлодѣ̑ю, а҆́ки ѕлодѣ́ѧ пригвожда́ема.
Канѡ́нъ мине́и, и҆ настоѧ́щыѧ трипѣ́снцы по чи́нꙋ и҆́хъ, господи́на і҆ѡ́сифа. И҆ стїхосло́витсѧ пѣ́снь. Гла́съ д҃.
Пѣ́снь є҃.
І҆рмо́съ: Нечести́вїи не ᲂу҆́зрѧтъ сла́вы твоеѧ̀ хрⷭ҇тѐ:
Во́лею влⷣко возне́слсѧ є҆сѝ на крⷭ҇тъ, и҆ низве́рглъ є҆сѝ врага̀: тѣ́мже во́лею низве́ржена мѧ̀ похотьмѝ въ про́пасть, бл҃гоꙋтро́бїемъ твои́мъ и҆спра́ви.
Ѡ҆мраче́на мѧ̀ страстьмѝ безмѣ́стными дꙋше́ю, просвѣтѝ і҆и҃се, ѡ҆мрачи́вый со́лнце на крⷭ҇тѣ̀ просте́рсѧ, и҆ просвѣти́вый всѧ̑ вселе́нныѧ и҆сполнє́нїѧ.
По́стнꙋю пꙋчи́нꙋ преплы́ти ти́хѡ сподо́би мѧ̀ хрⷭ҇тѐ, ᲂу҆тиша́ѧ вѡ́лны мы́сли моеѧ̀, и҆ въ приста̑нища воскрⷭ҇нїѧ ѡ҆кормѝ.
Бг҃оро́диченъ: Чⷭ҇тꙋю чисто́тствꙋющимъ почти́мъ ᲂу҆мо́мъ, добро́тꙋ і҆а́кѡвлю, бж҃е́ственными дѣѧ́ньми ᲂу҆краша́ющесѧ, бл҃гоче́стнѡ воспои́мъ, ꙗ҆́кѡ мт҃рь бг҃а на́шегѡ. <<рѻ҃ѕ ѡ҆б.: 352>>
И҆́ный трипѣ́снецъ господи́на ѳео́дѡра, гла́съ є҃.
І҆рмо́съ: Ѿ но́щи покланѧ́ющыѧсѧ:
Ты̀ распе́нсѧ тлѣ́нїѧ и҆збавлѧ́еши мѧ̀, и҆ прободе́нъ бы́въ ѡ҆безсме́ртствꙋеши мѧ̀: сла́влю твою̀ неизрече́ннꙋю млⷭ҇ть, ꙗ҆́кѡ прише́лъ є҆сѝ хрⷭ҇тѐ, да сп҃се́ши мѧ̀.
На крⷭ҇тѣ̀ просте́ръ дла̑ни твоѧ̑, мы́сленнаго а҆мали́ка ᲂу҆би́лъ є҆сѝ, лю́ди твоѧ̑ сп҃са́ѧй гдⷭ҇и. сегѡ̀ ра́ди пое́мъ держа́вꙋ твою̀.
Трⷪ҇ченъ: Въ тре́хъ ли́цахъ бж҃ество̀, є҆ди́но нача́ло всепресꙋ́щное, воспои́мъ ѻ҆ц҃а̀ безнача́льнаго, и҆ сн҃а, и҆ дх҃а ст҃а́го.
Бг҃оро́диченъ: Є҆го́же нб҃о вмѣсти́ти не можа́ше, ты̀ во чре́вѣ заче́нши родила̀ є҆сѝ. ѽ стра́ннагѡ и҆ неизрече́ннагѡ чꙋдесѐ! тѣ́мже тѧ̀ всѝ пое́мъ пречⷭ҇таѧ.
Сла́ва тебѣ̀ бж҃е на́шъ, сла́ва тебѣ̀.
Менѐ ра́ди претерпѣ́вый распѧ́тїе, ѻ҆́цетъ пи́вый, и҆ рекі́й: соверши́шасѧ! совершѝ моѐ по́стное по́прище, ᲂу҆достоѧ́ѧ мѧ̀ ви́дѣти твоѐ воста́нїе.
І҆рмо́съ: Ѿ но́щи покланѧ́ющыѧсѧ тебѣ̀ хрⷭ҇тѐ поми́лꙋй и҆ ми́ръ да́рꙋй: занѐ свѣ́тъ повелѣ̑нїѧ твоѧ̑, бы́ша и҆сцѣлє́нїѧ рабѡ́мъ твои̑мъ чл҃вѣколю́бче.
Пѣ́снь и҃.
І҆рмо́съ: Ѻ҆́троки бл҃гочести̑выѧ:
На крⷭ҇тѣ̀ пригво́ждьсѧ за бл҃гоꙋтро́бїе, разбо́йникꙋ ра́й ѿве́рзлъ є҆сѝ: ны́нѣ же разбїе́на мѧ̀ де́мѡнскою лю́тостїю, и҆ въ дꙋшѝ всепло́тнꙋю ꙗ҆́звꙋ прїи́мша ᲂу҆врачꙋ́й, ѿверза́ѧ мѝ двє́ри покаѧ́нїѧ твои́мъ чл҃вѣколю́бїемъ.
Посто́мъ просвѣти́вше пло́ть, дꙋ́шꙋ добродѣ́тельми ᲂу҆тꙋчни́мъ, ᲂу҆бѡ́гїѧ напита́имъ, бога́тство неистощи́мое <<рѻ҃з: 353>> на нб҃сѣ́хъ кꙋпꙋ́юще, и҆ воззове́мъ: гдⷭ҇а по́йте дѣла̀ и҆ превозноси́те є҆го̀ во вѣ́ки.
Стрⷭ҇тїю твое́ю тва́рь поколеба́сѧ, на крⷭ҇тѣ̀ тѧ̀ ви́дѣвше пригвожда́ема, сп҃се пребл҃гі́й. тѣ́мже молю́ тѧ, прило́ги коле́блемый при́снѡ ѕмїи́ными, ᲂу҆твердѝ ᲂу҆́мъ мо́й ще́дре, на тве́рдѣмъ ка́мени твои́хъ хотѣ́нїй.
Бг҃оро́диченъ: Две́ре бж҃їѧ заключе́на, є҆́юже є҆ди́нъ про́йде гдⷭ҇ь, напра́ви мѧ̀ къ стезѧ́мъ бж҃е́ствєннымъ, и҆ ѿве́рзи мѝ сп҃се́нїѧ двє́ри, бг҃обл҃года́тнаѧ: къ тебѣ́ бо прибѣга́ю дв҃о, є҆ди́нѣй предста́тельницѣ ро́да человѣ́ческагѡ.
И҆́ный. І҆рмо́съ: Творца̀ тва́ри:
Дре́во всест҃о́е, на не́мже ты̀ хрⷭ҇тѐ мо́й распѧ́лсѧ є҆сѝ, поѧ̀ пребл҃гословлю̀ тѧ̀ во всѧ̑ вѣ́ки.
На голго́ѳѣ, беззако́ннїи тѧ̀ хрⷭ҇тѐ, распе́нше ᲂу҆би́ша: но живе́ши, и҆ сп҃са́еши на́съ во вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Страннолѣ́пнѡ раздѣлѧ́етсѧ трⷪ҇ца, и҆ пребыва́етъ нераздѣ́льна, ꙗ҆́кѡ бг҃ъ, є҆го́же превозно́симъ во всѧ̑ вѣ́ки.
Бг҃оро́диченъ: Мл҃твꙋ сотворѝ ѡ҆ пою́щихъ тѧ̀ пречⷭ҇таѧ, и҆зба́витисѧ всѧ́кихъ и҆скꙋше́нїй и҆ бѣ́дъ.
Сла́ва тебѣ̀ бж҃е на́шъ, сла́ва тебѣ̀.
Крⷭ҇та̀ твоегѡ̀ гдⷭ҇и, си́лою вжили́въ мѧ̀, сподо́би бл҃годꙋ́шно сконча́ти поста̀ тече́нїе.
Хва́лимъ, бл҃гослови́мъ, покланѧ́емсѧ гдⷭ҇ви:
І҆рмо́съ: Творца̀ тва́ри, є҆гѡ́же ᲂу҆жаса́ютсѧ а҆́гг҃ли, по́йте лю́дїе, и҆ превозноси́те во всѧ̑ вѣ́ки.
Пѣ́снь ѳ҃.
І҆рмо́съ: Ка́мень нерꙋкосѣ́чный ѿ несѣко́мыѧ горы̀: <<рѻ҃з ѡ҆б.: 354>>
Ка́мень тѧ̀ ѿсѣче́нный прови́дѣ прⷪ҇ро́къ, ѿ горы̀ дв҃ы сп҃се, сокрꙋши́вшаго ка́менїе твои́мъ распѧ́тїемъ. тѣ́мже ѡ҆тѧгче́на мѧ̀ нечꙋ́вствїѧ ка́менїемъ, ꙗ҆́кѡ всеще́дрый, свободѝ.
Пости́сѧ ѿ ѕло́бы дꙋшѐ моѧ̀, бж҃е́ственною любо́вїю наслажда́ющисѧ, двє́ри ѿве́рзи всѧ́кимъ бл҃ги́мъ ви́домъ, загражда́ющи лꙋка́вства вхо́дъ, воздержа́нїемъ и҆ моле́нїемъ.
Менѐ ѡ҆сꙋжде́наго сп҃сѝ, ѡ҆сꙋди́вый крⷭ҇то́мъ твои́мъ влⷣко сп҃се мо́й враждꙋ̀, и҆ да не пока́жеши гее́ннѣ пови́нна, ѡ҆скверне́наго страстьмѝ, и҆ грѣхмѝ ѡ҆мраче́наго.
Бг҃оро́диченъ: Пощадѝ мѧ̀ хрⷭ҇тѐ, є҆гда̀ прїи́деши сꙋди́ти мі́рꙋ со сла́вою, разрѣшѝ мглꙋ̀ ѕло́бъ мои́хъ, мольба́ми ро́ждшїѧ тѧ̀, и҆ наслѣ́дника сотворѝ нбⷭ҇нагѡ црⷭ҇твїѧ твоегѡ̀.
И҆́ный. І҆рмо́съ: И҆са́їе ликꙋ́й:
Па́ки ра́й ѿверза́еши є҆ди́ною распе́нсѧ, въ не́мже причаща́ѧсѧ жи́зни ра́дꙋюсѧ, сме́рти и҆збавлѧ́ѧсѧ вѣ́чныѧ преслꙋша́нїѧ: тѣ́мже чл҃вѣколю́бче, ꙗ҆́кѡ бг҃а моего̀ велича́ю тѧ̀.
Клѧ́твы ѻ҆рга́нъ, бл҃гослове́нїѧ показа́сѧ печа́ть, тво́й животво́рный гдⷭ҇и крⷭ҇тъ, на не́мже тѧ̀ взира́юще, ѡ҆живлѧ́емсѧ ᲂу҆ме́ршїи пре́жде, и҆ воспѣва́юще тѧ̀, ꙗ҆́кѡ влⷣкꙋ велича́емъ.
Трⷪ҇ченъ: Є҆ди́нꙋ сꙋщество́мъ воспѣва́ю тѧ̀ безнача́льнаѧ трⷪ҇це честна́ѧ, живонача́льнаѧ, несѣко́маѧ є҆ди́нице, ѻ҆́ч҃е нерожде́нный, и҆ рожде́нный сло́ве и҆ сн҃е, дш҃е ст҃ы́й, сп҃сѝ ны̀ пою́щыѧ тѧ̀.
Бг҃оро́диченъ: Па́че ᲂу҆ма̀ ржⷭ҇тво̀ твоѐ бг҃омт҃и, без̾ мꙋ́жа бо зача́тїе въ тебѣ̀, и҆ двⷭ҇твенно рожде́нїе бы́сть, и҆́бо бг҃ъ є҆́сть рожде́йсѧ: є҆го́же велича́юще, тѧ̀ дв҃о ᲂу҆бл҃жа́емъ. <<рѻ҃и: 355>>
Сла́ва тебѣ̀ бж҃е на́шъ, сла́ва тебѣ̀.
Крⷭ҇те чⷭ҇тны́й, крѣ́посте моѧ̀ и҆ прибѣ́жище, бꙋ́ди мѝ просвѣще́нїе ны́нѣ воздержа́тельно, веселѧ̀ и҆ ѡ҆чища́ѧ мѧ̀, и҆збавлѧ́ѧ ѿ и҆скꙋше́нїй: да прославлѧ́ѧ тебѐ, влⷣкꙋ велича́ю хрⷭ҇та̀.
І҆рмо́съ: И҆са́їе ликꙋ́й, дв҃а и҆мѣ̀ во чре́вѣ и҆ родѝ сн҃а є҆мманꙋ́ила, бг҃а же и҆ человѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆бл҃жа́емъ.
Свѣти́ленъ гла́са.
На стїхо́внѣ самогла́сенъ, два́жды, гла́съ и҃:
Страстоꙋбі́йца по́стъ настоѧ́щїй, ѡ҆ѕло́блєнныѧ ѿ грѣха̀ ᲂу҆врачева́ти ѡ҆бѣщава́етсѧ: є҆го́же ꙗ҆́кѡ бг҃ода́ннаго помо́щника почти́мъ, бг҃опи̑санныѧ скрижа̑ли мѡѷсе́омъ прїи́мше. не пред̾избере́мъ сокрꙋши́вшагѡ и҆̀хъ невоздержа́нїемъ: не бꙋ́демъ ѻ҆́бщницы, и҆́хже тѣлеса̀ падо́ша въ пꙋсты́ни: не возсѣ́тꙋимъ і҆ꙋде́йски, но церко́внѡ просвѣти́мсѧ: не фарїсе́йски лицемѣ́рꙋимъ, но є҆ѵⷢ҇льски ᲂу҆добри́мсѧ, хва́лѧщесѧ ѡ҆ крⷭ҇тѣ̀ хрⷭ҇та̀, и҆зба́вителѧ дꙋ́шъ на́шихъ.
Мꙋ́чениченъ: Что́ вы нарече́мъ ст҃і́и; херꙋві́мы ли; ꙗ҆́кѡ на ва́съ почи́лъ є҆́сть хрⷭ҇то́съ. серафі́мы ли; ꙗ҆́кѡ непреста́ннѡ просла́висте є҆го̀. а҆́гг҃лы ли; тѣ́ла бо ѿврати́стесѧ. си̑лы ли; дѣ́йствꙋете бо чꙋдесы̀. мнѡ́гаѧ ва̑ша и҆мена̀, и҆ бѡ́льшаѧ дарова̑нїѧ: моли́те сп҃сти́сѧ дꙋша́мъ на́шымъ.
Сла́ва и҆ ны́нѣ, крⷭ҇тобг҃оро́диченъ, гла́съ то́йже:
Что̀ чꙋ́дное и҆ и҆зѧ́щное; дв҃а гдⷭ҇ви вопїѧ́ше ма́терски: болѣ̑зни, и҆́хже не и҆мѣ́хъ внегда̀ роди́ти тѧ̀ сн҃е, ѻ҆́стрїи каса́ютсѧ се́рдца моегѡ̀. не терплю̀ на крⷭ҇тѣ̀ пригвожде́на тѧ̀ зрѧ́щи, свѣ́те ѻ҆́чїю моє́ю: потщи́сѧ ᲂу҆́бѡ воста́ни, ꙗ҆́кѡ да просла́влю съ ми́ромъ ᲂу҆жа́сное смотре́нїе твоѐ. <<рѻ҃и ѡ҆б.: 356>>
На ѕ҃-мъ часѣ̀ тропа́рь прⷪ҇ро́чества, гла́съ а҃:
Въ нощѝ и҆ во днѝ припа́даемъ тебѣ̀ гдⷭ҇и, пода́ти ѡ҆ставле́нїе грѣхѡ́въ дꙋша́мъ на́шымъ, да въ ми́рѣ поклони́мсѧ тебѣ̀, и҆ славосло́вимъ чл҃вѣколю́бче.
Прокі́менъ, ѱало́мъ л҃з, гла́съ д҃: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ Сті́хъ: Ꙗ҆́кѡ стрѣ́лы твоѧ̑ ᲂу҆нзо́ша во мнѣ̀.
Прⷪ҇ро́чества и҆са́їина чте́нїе. [Глава̀ з҃, ст. а҃- д҃і]
Бы́сть во дни̑ а҆ха́за сы́на і҆ѡаѳа́млѧ, сы́на ѻ҆зі́и, царѧ̀ і҆ꙋ́дина, взы́де расі́нъ ца́рь а҆ра́мль, и҆ факе́й сы́нъ ромелі́евъ, ца́рь і҆и҃левъ на і҆ерⷭ҇ли́мъ воева́ти на него̀, и҆ не возмого́ша разори́ти є҆го̀. И҆ возвѣсти́сѧ въ домꙋ̀ дв҃довѣ, глаго́лѧ: совѣща́сѧ а҆ра́мъ со є҆фре́момъ. и҆ ᲂу҆жасе́сѧ дꙋша̀ є҆гѡ̀, и҆ дꙋша̀ люде́й є҆гѡ̀: ꙗ҆́коже въ дꙋбра́вѣ дре́во вѣ́тромъ восколе́блетсѧ. И҆ речѐ гдⷭ҇ь ко и҆са́їи: и҆зы́ди во срѣ́тенїе а҆ха́зꙋ, ты̀, и҆ ѡ҆ста́вшїйсѧ і҆асꙋ́въ сы́нъ тво́й, къ кꙋпѣ́ли го́рнѧгѡ пꙋтѝ, села̀ бѣли́льнича. И҆ рече́ши є҆мꙋ̀: блюдѝ є҆́же молча́ти, и҆ не бо́йсѧ, нижѐ дꙋша̀ твоѧ̀ да и҆знемо́жетъ ѿ двою̀ дре́вꙋ главе́нь дымѧ́щихсѧ си́хъ: є҆гда́ бо гнѣ́въ ꙗ҆́рости моеѧ̀ бꙋ́детъ, па́ки и҆сцѣлю̀. Сы́нъ же а҆ра́мль, и҆ сы́нъ ромелі́евъ, ꙗ҆́кѡ совѣща́ста совѣ́тъ лꙋка́вый на тѧ̀, глаго́люще: Взы́демъ во і҆ꙋде́ю, и҆ собесѣ́довавше съ ни́ми ѿврати́мъ ѧ҆̀ къ на́мъ, и҆ воцари́мъ въ не́й сы́на тавеи́лева. Сїѧ̑ же глаго́летъ гдⷭ҇ь саваѡ́ѳъ, не пребꙋ́детъ совѣ́тъ се́й, нижѐ сбꙋ́детсѧ: По глава̀ а҆ра́мꙋ дама́скъ, и҆ глава̀ дама́скꙋ расі́нъ: но є҆щѐ шестьдесѧ́тъ и҆ пѧ́ть лѣ́тъ, ѡ҆скꙋдѣ́етъ ца́рство є҆фре́мово ѿ люде́й. Глава́ же є҆фре́мови соморѡ́нъ, и҆ глава̀ соморѡ́нꙋ сы́нъ ромелі́евъ: и҆ а҆́ще не ᲂу҆вѣ́рите, нижѐ и҆́мате разꙋмѣ́ти. И҆ приложѝ гдⷭ҇ь глаго́лати ко а҆ха́зꙋ, рекі́й: Просѝ себѣ̀ <<рѻ҃ѳ: 357>> зна́менїѧ ѿ гдⷭ҇а бг҃а твоегѡ̀ во глꙋбинꙋ̀, и҆лѝ въ высотꙋ̀. И҆ речѐ а҆ха́зъ: не и҆́мамъ проси́ти, нижѐ и҆скꙋшꙋ̀ гдⷭ҇а. И҆ речѐ [и҆са́їа] слы́шите ᲂу҆́бѡ до́ме дв҃довъ, є҆да̀ ма́лѡ ва́мъ є҆́сть трꙋ́дъ даѧ́ти человѣ́кѡмъ, и҆ ка́кѡ даетѐ гдⷭ҇ви трꙋ́дъ; Сегѡ̀ ра́ди да́стъ гдⷭ҇ь са́мъ ва́мъ зна́менїе.
Прокі́менъ, ѱало́мъ л҃и, Гла́съ ѕ҃: Оу҆слы́ши мл҃твꙋ мою̀ гдⷭ҇и, и҆ моле́нїе моѐ внꙋшѝ. Сті́хъ: Рѣ́хъ: сохраню̀ пꙋти̑ моѧ̑, є҆́же не согрѣша́ти мѝ ѧ҆зы́комъ мои́мъ.
Въ пѧто́къ ве́чера вторы́ѧ седми́цы,
На Гдⷭ҇и воззва́хъ, поста́вимъ стїхѡ́въ і҃ и҆ пое́мъ ѻ҆смогла́сенъ два́жды, и҆ мꙋ́ченичны ѻ҆ктѡ́иха прилꙋчи́вшагѡсѧ гла́са: и҆ мине́и д҃. Сла́ва, ст҃а́гѡ, а҆́ще є҆́сть: а҆́ще ли нѝ; Сла́ва, ме́ртвенъ дамаски́новыхъ ѻ҆ктѡ́иха. И҆ ны́нѣ, бг҃оро́диченъ а҃-й гла́са.
Самогла́сенъ, гла́съ д҃:
Ны́нѣ вре́мѧ бл҃гопрїѧ́тное, ны́нѣ де́нь сп҃се́нїѧ, во мно́жествѣ млⷭ҇ти твоеѧ̀ посѣтѝ мою̀ дꙋ́шꙋ, и҆ бре́мѧ беззако́нїй мои́хъ ѡ҆сла́би, є҆ди́не чл҃вѣколю́бче.
Прокі́менъ, ѱало́мъ л҃ѳ. Гла́съ д҃: Млⷭ҇ть твоѧ̀ и҆ и҆́стина твоѧ̀, вы́нꙋ да застꙋ́питѣ мѧ̀. Сті́хъ: Терпѧ̀ потерпѣ́хъ гдⷭ҇а, и҆ внѧ́тъ мѝ.
Бытїѧ̀ чте́нїе. [Гл. є҃, ст. л҃в. Гл. ѕ҃, ст. а҃- и҃]
Бѣ̀ нѡ́е лѣ́тъ пѧтѝ сѡ́тъ, и҆ родѝ сы́ны трѝ, си́ма, ха́ма, і҆а́феѳа. И҆ бы́сть є҆гда̀ нача́ша человѣ́цы мно́зи быва́ти на землѝ, и҆ дщє́ри роди́шасѧ и҆̀мъ: Ви́дѣвше же сы́нове бж҃їи дщє́ри человѣ́чи, ꙗ҆́кѡ добры̀ <<рѻ҃ѳ ѡ҆б.: 358>> сꙋ́ть, поѧ́ша себѣ̀ жєны̀ ѿ всѣ́хъ, ꙗ҆̀же и҆збра́ша. И҆ речѐ гдⷭ҇ь бг҃ъ: не и҆́мать дх҃ъ мо́й пребыва́ти въ человѣ́цѣхъ си́хъ во вѣ́къ, занѐ сꙋ́ть пло́ть: бꙋ́дꙋтъ же дні́е и҆́хъ лѣ́тъ сто̀ два́десѧть. И҆споли́ни же бѧ́хꙋ на землѝ во дни̑ ѻ҆́ны: и҆ пото́мъ, є҆гда̀ вхожда́хꙋ сы́нове бж҃їи къ дще́ремъ человѣ́чєскимъ, и҆ рожда́хꙋ себѣ̀, ті́и бѧ́хꙋ и҆споли́ни, и҆̀же ѿ вѣ́ка человѣ́цы и҆мени́тїи. Ви́дѣвъ же гдⷭ҇ь бг҃ъ, ꙗ҆́кѡ ᲂу҆мно́жишасѧ ѕлѡ́бы человѣ́кѡвъ на землѝ, и҆ всѧ́къ помышлѧ́етъ въ се́рдцѣ свое́мъ прилѣ́жнѡ на ѕла̑ѧ во всѧ̑ дни̑ И҆ помы́сли бг҃ъ, ꙗ҆́кѡ сотворѝ человѣ́ка на землѝ, и҆ размы́сли. И҆ речѐ бг҃ъ: потреблю̀ человѣ́ка, є҆го́же сотвори́хъ ѿ лица̀ землѝ, ѿ человѣ́ка да́же до скота̀, и҆ ѿ га̑дъ да́же до пти́цъ небе́сныхъ, занѐ размы́слихъ, ꙗ҆́кѡ сотвори́хъ ѧ҆̀. Нѡ́е же ѡ҆брѣ́те бл҃года́ть пред̾ гдⷭ҇емъ бг҃омъ.
Прокі́менъ: ѱало́мъ м҃, гла́съ ѕ҃: А҆́зъ рѣ́хъ: гдⷭ҇и, поми́лꙋй мѧ̀, и҆сцѣлѝ дꙋ́шꙋ мою̀. Сті́хъ: Бл҃же́нъ разꙋмѣва́ѧй на ни́ща и҆ ᲂу҆бо́га:
При́тчей чте́нїе. [Глава̀ ѕ҃, ст. к҃-л҃є. Гл. з҃, ст. а҃.]
Сы́не, хранѝ зако́ны ѻ҆тца̀ твоегѡ̀, и҆ не ѿри́ни наказа́нїѧ ма́тере твоеѧ̀: Навѧжи́ же ѧ҆̀ на твою̀ дꙋ́шꙋ при́снѡ, и҆ ѡ҆бѧжѝ и҆̀хъ ѡ҆ твое́й вы́и. Є҆гда̀ хо́диши, водѝ ю҆̀, и҆ съ тобо́ю да бꙋ́детъ: є҆гда́ же спи́ши, да храни́тъ тѧ̀, да востаю́щꙋ тѝ глаго́летъ съ тобо́ю. занѐ свѣти́льникъ за́повѣдь зако́на, и҆ свѣ́тъ, и҆ пꙋ́ть жи́зни, и҆ ѡ҆бличе́нїе, и҆ наказа́нїе: Є҆́же сохрани́ти тѧ̀ ѿ жены̀ мꙋжа́ты, и҆ ѿ наважде́нїѧ ѧ҆зы́ка чꙋжда́гѡ. Сы́не, да не побѣди́тъ тѧ̀ добро́ты по́хоть, нижѐ ᲂу҆ловле́нъ бꙋ́ди твои́ма ѻ҆чи́ма, нижѐ да совосхи́тишисѧ вѣ́ждами є҆ѧ̀: Цѣна́ бо блꙋдни́цы, <<р҃п: 359>> є҆ли́ка є҆ди́нагѡ хлѣ́ба: жена́ же мꙋже́й честны̑ѧ дꙋ́шы ᲂу҆ловлѧ́етъ. Ввѧ́жетъ ли кто̀ ѻ҆́гнь въ нѣ̑дра, ри́зъ же [свои́хъ] не сожже́тъ ли; И҆лѝ ходи́ти кто̀ бꙋ́детъ на ᲂу҆́глїѧхъ ѻ҆́гненныхъ, но́гъ же не сожже́тъ ли; Та́кѡ вше́дый къ женѣ̀ мꙋжа́тѣй не без̾ вины̀ бꙋ́детъ, нижѐ всѧ́къ прикаса́ѧйсѧ є҆́й. Не ди́вно, а҆́ще кто̀ ꙗ҆́тъ бꙋ́детъ кра́дый: кра́детъ бо, да насы́титъ дꙋ́шꙋ свою̀ а҆́лчꙋщꙋю: А҆́ще же ꙗ҆́тъ бꙋ́детъ, возда́стъ седмери́цею, и҆ всѧ̑ и҆мѣ̑нїѧ своѧ̑ да́въ и҆зба́витъ себѐ. Прелюбодѣ́й же за скꙋ́дость ᲂу҆ма̀ поги́бель дꙋшѝ свое́й содѣва́етъ. Болѣ̑зни же и҆ безче́стїе понесе́тъ: поноше́нїе же є҆гѡ̀ не загла́дитсѧ во вѣ́къ. И҆спо́лнена бо ре́вности ꙗ҆́рость мꙋ́жа є҆ѧ̀: не пощади́тъ въ де́нь сꙋда̀. Не и҆змѣни́тъ ни є҆ди́ною цѣно́ю вражды̀, нижѐ разрѣши́тсѧ мно́гими дармѝ. Сы́не, хранѝ моѧ̑ словеса̀, моѧ̑ же за́пѡвѣди скры́й ᲂу҆ себѐ: сы́не, чтѝ гдⷭ҇а, и҆ ᲂу҆крѣпи́шисѧ: кромѣ́ же є҆гѡ̀ не бо́йсѧ и҆но́гѡ.
И҆ про́чее послѣ́дованїе преждеѡсщ҃е́нныхъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.