Глас 6-й. Четверг.
Въ сре́дꙋ ве́чера,
на Гдⷭ҇и воззва́хъ, стїхи̑ры ст҃ы̑мъ а҆пⷭ҇лѡмъ, гла́съ ѕ҃:
Подо́бенъ: Тридне́венъ воскрⷭ҇лъ є҆сѝ:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Вели̑кимъ та́йнамъ бж҃їимъ слꙋжи́телїе бы́сте, бг҃осло́вцы и҆ бг҃ови́дцы, ᲂу҆ченицы̀: и҆ бл҃года́ть и҆сцѣле́нїй прїѧ́сте, и҆ всѣ̑мъ человѣ́кѡмъ болѣ̑зни и҆сцѣлѧ́ете.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Вели́кое прибѣ́жище и҆ покро́въ дꙋша́мъ на́шымъ, дꙋхѡ́въ лю́тыхъ прогна́нїе, вы̀ є҆стѐ бг҃ови́дцы а҆пⷭ҇ли гдⷭ҇ни: тѣ́мже ва́съ при́снѡ почита́емъ.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.
Ѿ всѧ́кагѡ ѡ҆бстоѧ́нїѧ, и҆ вре́да бѣсо́вскагѡ, и҆ прегрѣше́нїй, и҆ ѕла́гѡ плѣне́нїѧ и҆зба́вите, вѣ́рою ва́съ восхвалѧ́ющихъ, бж҃е́ственнїи а҆пⷭ҇ли бл҃же́ннїи.
Та́же, въ мине́и стїхи̑ры ст҃о́мꙋ. А҆́ще ли нѣ́сть мине́и, и҆́ны стїхи̑ры ст҃о́мꙋ и҆ вели́комꙋ чꙋдотво́рцꙋ нїкола́ю, гла́съ ѕ҃, и҆ подо́бенъ то́йже.
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Нїко́лае бл҃же́нне, припа́дающа мѧ̀ ᲂу҆ще́дри, молю́сѧ тѝ мꙋ́дре, и҆ ѻ҆́чи просвѣтѝ дꙋшѝ моеѧ̀, да чи́стѣ ви́ждꙋ свѣтода́вца ще́драго.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Врагѡ́въ и҆́щꙋщихъ мѧ̀ ѡ҆ѕло́бити, и҆зба́ви мѧ̀ ст҃е, дерзнове́нїе къ бг҃ꙋ ꙗ҆́кѡ и҆мы́й, ст҃и́телю нїко́лае бл҃же́нне, сп҃си́ мѧ ѿ вре́да, и҆ ѿ мꙋ́жъ крове́й и҆зба́ви мѧ̀.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Приста́нище тѧ̀ небꙋ́рное, и҆ стѣ́нꙋ неѡбори́мꙋю ст҃и́телю, ны́нѣ стѧжа́хомъ вѣ́рнїи, и҆ сто́лпъ крѣ́пости, и҆ две́рь покаѧ́нїѧ, и҆ наста́вника дꙋ́шъ на́шихъ, и҆ забра́ло.
Сла́ва, и҆ ны́нѣ, бг҃оро́диченъ: Зави́дѧ сопроти́вникъ лꙋка́вый ста́дꙋ твоемꙋ̀ пречⷭ҇таѧ, всегда̀ бо́ретъ, хотѧ̀ себѣ̀ снѣ́дь сотвори́ти: но ты̀ бцⷣе, и҆зба́ви на́съ ѿ тогѡ̀ вре́да.
Та́же, Свѣ́те ти́хїй: Прокі́менъ: Бж҃е, во и҆́мѧ твоѐ сп҃си́ мѧ: Сті́хъ: Бж҃е, ᲂу҆слы́ши мл҃твꙋ мою̀: и҆ Сподо́би гдⷭ҇и въ ве́черъ се́й:
На стїхо́внѣ стїхи̑ры ст҃ы̑мъ а҆пⷭ҇лѡмъ, гла́съ ѕ҃:
Гдⷭ҇и, а҆пⷭ҇ли спостиго́ша и҆ногда̀ ᲂу҆́бѡ сѣтьмѝ глꙋбинꙋ̀ морскꙋ́ю, и҆ногда́ же высотꙋ̀ црⷭ҇твїѧ ᲂу҆че́нїй ра́ди. ѻ҆́во ᲂу҆́бѡ хꙋдо́жествомъ непостижи́мꙋю глꙋбинꙋ̀ и҆спыта́ша: ѻ҆́во же вѣ́рою неѡпи́саннагѡ твоегѡ̀ нѣ́дра достиго́ша, и҆ мі́рꙋ проповѣ́даша безлѣ́тнаго твоего̀ сн҃а. тѣ́хъ мл҃твами, и҆ всѣ́хъ ст҃ы́хъ поми́лꙋй на́съ.
Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
И҆ногда̀ ᲂу҆ч҃нцы̀ твоѝ хрⷭ҇тѐ, въ кораблѝ ѡ҆бꙋрева́еми вопїѧ́хꙋ: ᲂу҆чи́телю, сп҃сѝ на́съ, погиба́емъ. и҆ ны́нѣ мы̀ вопїе́мъ: чл҃вѣколю́бче сп҃се на́шъ, и҆зба́ви на́съ ѿ бѣ́дъ на́шихъ, мо́лимсѧ.
Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.
Мч҃нченъ: Крⷭ҇тъ тво́й гдⷭ҇и, мч҃нкѡмъ бы́сть ѻ҆рꙋ́жїе непобѣди́мое: ви́дѣша бо предлежа́щꙋю сме́рть, и҆ прездрѧ́ще бꙋ́дꙋщꙋю жи́знь, ᲂу҆пова́нїемъ є҆́же на тѧ̀ ᲂу҆крѣплѧ́хꙋсѧ: тѣ́хъ мл҃твами поми́лꙋй на́съ.
Сла́ва, и҆ ны́нѣ, бг҃оро́диченъ: Ѻ҆́ко се́рдца моегѡ̀ возпꙋща́ю къ тебѣ̀ влⷣчце: не пре́зри ма́лагѡ моегѡ̀ воздыха́нїѧ въ ча́съ, є҆гда̀ сꙋ́дитъ сн҃ъ тво́й мі́рꙋ, бꙋ́ди мѝ покро́въ и҆ помо́щница.
Та́же, Ны́нѣ ѿпꙋща́еши: И҆ ѿпꙋ́стъ.
Въ сре́дꙋ на повече́рїи,
канѡ́нъ прест҃ѣ́й бцⷣѣ.
Творе́нїе і҆ѡа́нна і҆еромона́ха, [є҆гѡ́же краегране́сїе: Прест҃а́ѧ, прїимѝ і҆ѡа́нна рыда́нїе.] Гла́съ ѕ҃.
Пѣ́снь а҃
І҆рмо́съ: Помо́щникъ и҆ покрови́тель бы́сть мнѣ̀ во сп҃се́нїе, се́й мо́й бг҃ъ, и҆ просла́влю є҆го̀, бг҃ъ ѻ҆ц҃а̀ моегѡ̀, и҆ вознесꙋ̀ є҆го̀, сла́внѡ бо просла́висѧ.
Запѣ́въ: Прест҃а́ѧ бцⷣе, сп҃сѝ на́съ.
Ка́кѡ пристꙋплю̀ къ тебѣ̀ чⷭ҇таѧ, ѿча́ѧнъ ѻ҆каѧ́нный а҆́зъ, ве́сь стра́стенъ нечистота́ми бы́въ; но ᲂу҆ще́дривши сп҃сѝ ѻ҆каѧ́ннꙋю мою̀ дꙋ́шꙋ, бг҃ороди́тельнице пречⷭ҇таѧ.
Воста́вши смире́ннаѧ дꙋшѐ, ѿ глꙋбины̀ безче́стїѧ, возопі́й те́плѣ къ є҆ди́нѣй чⷭ҇тѣй: поми́лꙋй мѧ̀ ѻ҆трокови́це пренепоро́чнаѧ чⷭ҇таѧ, и҆ страсте́й мѧ̀ и҆зба́ви.
Сла́ва: Бꙋ́рею напа́стей потопле́нъ бы́хъ грѣхѝ: простри́ ми ны́нѣ по́мощи рꙋ́кꙋ чⷭ҇таѧ, и҆ и҆зба́ви безче́стїѧ страсте́й, ꙗ҆́кѡ да при́снѡ сла́влю тѧ̀.
И҆ ны́нѣ: Грѣха̀ лю́тыѧ бꙋ́ри и҆зба́ви мѧ̀ бг҃ороди́тельнице, ѿ неѧ́же ве́сь скве́рненъ є҆́смь. тѣ́мже тѝ притека́ю, ѡ҆блегчѝ мѝ ны́нѣ тѧготꙋ̀ прегрѣше́нїй мои́хъ.
Пѣ́снь г҃
І҆рмо́съ: Оу҆твердѝ гдⷭ҇и, на ка́мени за́повѣдей твои́хъ, подви́гшеесѧ се́рдце моѐ, ꙗ҆́кѡ є҆ди́нъ ст҃ъ є҆сѝ и҆ гдⷭ҇ь.
Состарѣ́вшасѧ страстьмѝ безче́стными грѣха̀, мла́да сотвори́ мѧ пренепоро́чнаѧ, соꙋ́зы прегрѣше́нїй ѡ҆блегча́ющи.
Ѿ бре́нїѧ мѧ̀ ѡ҆чи́сти, и҆ ти́ны грѣхо́вныѧ: и҆ хра́мъ мѧ̀ бж҃е́ственный сотворѝ бцⷣе, чи́стѣ къ тебѣ̀ прибѣга́ющаго.
Сла́ва: Возни́кни ѻ҆каѧ́нныѧ дꙋшѐ, ѿ сна̀ ᲂу҆ны́нїѧ: ѻ҆чи́ма же воззрѝ къ є҆ди́нѣй сп҃са́ющей тѧ̀ ѻ҆трокови́цѣ бг҃оневѣ́стнѣй.
И҆ ны́нѣ: Прихождꙋ̀ влⷣчце, ѿча́ѧнъ и҆ сокрꙋше́нъ, и҆ къ мл҃твѣ твоеѧ̀ те́плѣй прибѣга́ю: сп҃си́ мѧ чⷭ҇таѧ, раба̀ твоего̀.
Пѣ́снь д҃
І҆рмо́съ: Оу҆слы́ша прⷪ҇ро́къ прише́ствїе твоѐ гдⷭ҇и, и҆ ᲂу҆боѧ́сѧ, ꙗ҆́кѡ хо́щеши ѿ дв҃ы роди́тисѧ и҆ человѣ́кѡмъ ꙗ҆ви́тисѧ, и҆ глаго́лаше: ᲂу҆слы́шахъ слꙋ́хъ тво́й, и҆ ᲂу҆боѧ́хсѧ, сла́ва си́лѣ твое́й гдⷭ҇и.
Глагѡ́лъ же и҆ веще́й, пра́во хощꙋ̀ сꙋди́тисѧ бг҃ороди́тельнице, къ твоемꙋ̀ сн҃ꙋ пренепоро́чнаѧ, да ѡ҆брѧ́щꙋ тѧ̀ тогда̀ прибѣ́жище, и҆ застꙋпле́нїе держа́внѣйшее, мꙋ́къ всѣ́хъ и҆збавлѧ́ющее мѧ̀.
Житїѐ моѐ ѡ҆калѧ́но, нечи́стъ же нра́въ грѣха́ми, ве́сь стра́стенъ бы́хъ, чⷭ҇таѧ: ѡ҆чи́сти мѧ̀ ѿ скве́рны прегрѣше́нїй, и҆ ᲂу҆бѣлѝ ꙗ҆́кѡ снѣ́гъ твои́мъ хода́тайствомъ къ бг҃ꙋ бл҃госе́рдомꙋ.
Сла́ва: Плени́цами мои́хъ согрѣше́нїй стѧ́гнꙋтъ є҆́смь ѿвсю́дꙋ, къ покаѧ̑ннымъ пꙋтє́мъ ᲂу҆клонѧ́тисѧ не могі́й: простри́ ми рꙋ́кꙋ пренепоро́чнаѧ, ᲂу҆пра́ви же мѝ стезю̀ къ сп҃се́нїѧ пꙋтѝ наставлѧ́ющꙋю мѧ̀.
И҆ ны́нѣ: Лю́тыхъ мѧ̀ мꙋ́къ, и҆ тьмы̀ кромѣ́шнїѧ, и҆ гее́нны твои́ми мл҃твами свободѝ дв҃о: и҆́маши бо во́лю и҆ си́лꙋ, гдⷭ҇а ро́ждшаѧ є҆ди́наго пребл҃га́го.
Пѣ́снь є҃
І҆рмо́съ: Ѿ но́щи ᲂу҆́тренююща, чл҃вѣколю́бче, просвѣтѝ молю́сѧ, и҆ наста́ви и҆ менѐ на повелѣ̑нїѧ твоѧ̑, и҆ наꙋчи́ мѧ сп҃се, твори́ти во́лю твою̀.
Въ де́нь сꙋда̀ ꙗ҆ви́сѧ влⷣчце, и҆ предста́ни мѝ, мꙋ́ки и҆ ѻ҆гнѧ̀ свобожда́ющи: да сп҃ссѧ воспою̀ твою̀ неѡбори́мꙋю бл҃года́ть.
Оу҆стра́ншасѧ влⷣчце, кро́ва твоегѡ̀, вра́гъ ви́дѧ мѧ̀ ври́нꙋ во глꙋбинꙋ̀ прегрѣше́нїй дꙋ́шꙋ мою̀, и҆ зрѧ́ мѧ смѣе́тсѧ: но помози́ ми.
Сла́ва: Возни́кнꙋти сотворѝ чⷭ҇таѧ, ѻ҆каѧ́ннꙋю и҆ стра́стнꙋю мою̀ дꙋ́шꙋ, молю́ тѧ пренепоро́чнаѧ, и҆ и҆змѝ тѧготы̀ є҆ѧ̀, мно́гихъ грѣхѡ́въ.
И҆ ны́нѣ: Мольбꙋ̀ приношꙋ́ ти пренепоро́чнаѧ, ѿ скве́рныхъ и҆ ѻ҆каѧ́нныхъ и҆ нечи́стыхъ мои́хъ ᲂу҆сте́нъ: ᲂу҆ще́дри мѧ̀ твое́ю мл҃твою, молю́ тѧ.
Пѣ́снь ѕ҃
І҆рмо́съ: Возопи́хъ всѣ́мъ се́рдцемъ мои́мъ къ ще́дромꙋ бг҃ꙋ, и҆ ᲂу҆слы́ша мѧ̀ ѿ а҆́да преиспо́днѧгѡ, и҆ возведѐ ѿ тлѝ живо́тъ мо́й.
Блꙋ́днаго менѐ и҆ преѻкаѧ́ннаго прїимѝ влⷣко хрⷭ҇тѐ, и҆ мꙋ́ки и҆зба́ви, мольба́ми тебѐ ро́ждшїѧ, и҆ шꙋ́їѧ ча́сти и҆зба́ви мѧ̀.
Те́мный а҆́да ѡ҆держи́тъ мѧ̀ стра́хъ, чⷭ҇таѧ, и҆ ко́злищъ ча́сть смꙋща́етъ мѧ̀: є҆ѧ́же и҆зба́ви мѧ̀ пречⷭ҇таѧ бцⷣе, молю́ тѧ.
Сла́ва: Оу҆мертви́вши пло́ти моеѧ̀ стра́стное, влⷣчце бцⷣе, ѡ҆животворѝ мою̀, чⷭ҇таѧ, дꙋ́шꙋ преѻкаѧ́ннꙋю, и҆ на пꙋ́ть пра́вый наста́ви мѧ̀.
И҆ ны́нѣ: Ра́бское приноша́ю тѝ моле́нїе, неразꙋ́мный а҆́зъ, и҆ къ твоемꙋ̀ прибѣга́ю бл҃гоꙋтро́бномꙋ млⷭ҇рдїю: не возвратѝ менѐ чⷭ҇таѧ, посра́млена.
Та́же: Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ,гла́съ ѕ҃:
Ѿ се́рдца стена́нїе, и҆ ѿ ᲂу҆тро́бы приноша́ю тѝ, пренепоро́чнаѧ, твоегѡ̀ просѧ̀ бл҃гопребы́тнагѡ застꙋпле́нїѧ: поми́лꙋй всестра́стнꙋю мою̀ дꙋ́шꙋ: ᲂу҆млⷭ҇рди многомлⷭ҇тиваго бг҃а, и҆зба́вити мѧ̀ сꙋда̀ и҆ є҆́зера ѻ҆́гненнагѡ, є҆ди́на бл҃гослове́ннаѧ.
Пѣ́снь з҃
І҆рмо́съ: Согрѣши́хомъ, беззако́нновахомъ, непра́вдовахомъ пред̾ тобо́ю: нижѐ соблюдо́хомъ, нижѐ сотвори́хомъ, ꙗ҆́коже заповѣ́далъ є҆сѝ на́мъ: но не преда́ждь на́съ до конца̀, ѻ҆тцє́въ бж҃е.
Ꙗ҆́кѡ млⷭ҇тивꙋ, ꙗ҆́кѡ бл҃голюби́вꙋ дв҃ꙋ мт҃рь, всю́ тѧ ꙗ҆́кѡ чⷭ҇тꙋю свѣ́дый, прибѣга́ю а҆́зъ ѻ҆каѧ́нный: но не ѿвратѝ менѐ всенепоро́чнаѧ, посра́млена ѿ тебѐ.
Возни́кни, ѽ стра́стнаѧ дꙋшѐ, и҆ воста́ни ѻ҆каѧ́ннаѧ: бі́й и҆з̾ глꙋбины̀ въ пє́рси, и҆ и҆спꙋстѝ сле́зъ и҆сто́чники, да тѧ̀ поми́лꙋетъ ѻ҆каѧ́ннꙋю млⷭ҇рдїѧ мт҃и хрⷭ҇та̀ и҆ бг҃а.
Сла́ва: Хра́мъ бж҃їй бы́въ, ѿ креще́нїѧ бж҃е́ственнагѡ дре́вле, ве́сь ѡ҆скверни́хсѧ ѻ҆каѧ́нный, и҆ низлежꙋ̀ ᲂу҆жа́снѡ паде́нїемъ лю́тѣ: но ты́ мѧ возста́ви пренепоро́чнаѧ, ѿча́ѧнныхъ наде́жда.
И҆ ны́нѣ: Ѻ҆́блакъ тѧ́жекъ покры̀ преѻкаѧ́нное моѐ се́рдце: тьма̀ и҆ мра́къ на́йде на стра́стнꙋю мою̀ дꙋ́шꙋ, бг҃оневѣ́сто: покаѧ́нїѧ лꙋча́ми ѡ҆зари́ мѧ, да сла́влю тѧ̀.
Пѣ́снь и҃
І҆рмо́съ: Є҆го́же вѡ́инства нбⷭ҇наѧ сла́вѧтъ, и҆ трепе́щꙋтъ херꙋві́ми и҆ серафі́ми, всѧ́ко дыха́нїе и҆ тва́рь, по́йте, бл҃гослови́те, и҆ превозноси́те во всѧ̑ вѣ́ки.
Рѣка̀ ѻ҆́гненнаѧ смꙋща́етъ, и҆ мра́къ несвѣти́мый всего́ мѧ коле́блетъ, че́рвь мѧ̀ ᲂу҆жаса́етъ и҆ скре́жетъ зꙋбны́й, дв҃о: да ѡ҆брѧ́щꙋ тѧ̀ тогда̀ застꙋ́пницꙋ держа́внꙋ.
Возгнѣще́нїе ѻ҆гню̀ да не бꙋ́дꙋ гдⷭ҇и, ни да ᲂу҆слы́шꙋ гла́съ преще́нїѧ твоегѡ̀, и҆мѣ́ѧ молѧ́щꙋю тѧ̀, твою̀ чⷭ҇тꙋю мт҃рь: є҆ѧ́же мольба́ми поми́лꙋй мѧ̀, взыва́ю тѝ.
Сла́ва: Бж҃е́ственнагѡ гла́са ᲂу҆слы́шати сотвори́ мѧ, и҆ стоѧ́нїѧ и҆збра́нныхъ покажи́ мѧ хрⷭ҇тѐ, прича́стника: да не плаче́вное мѣ́сто мѧ̀ прїи́метъ, и҆мꙋ́ща молѧ́щꙋю тѧ̀ ѡ҆ се́мъ бцⷣꙋ.
И҆ ны́нѣ: Стрꙋи̑ сле́зъ ны́нѣ низпосли́ ми, и҆ стена́нїе ѿ дꙋшѝ сотворѝ во мнѣ̀ чⷭ҇таѧ, всегда̀ припа́дати твоемꙋ̀ покро́вꙋ, ꙗ҆́кѡ да ѡ҆брѧ́щꙋ разрѣше́нїе грѣхѡ́въ мои́хъ твое́ю мл҃твою.
Пѣ́снь ѳ҃
І҆рмо́съ: Безсѣ́меннагѡ зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ: бж҃їе бо рожде́нїе ѡ҆бновлѧ́етъ є҆стєства̀. тѣ́мже тѧ̀ всѝ ро́ди ꙗ҆́кѡ бг҃оневѣ́стнꙋю мт҃рь, правосла́внѡ велича́емъ.
Де́нь сꙋда̀ стра́шный смꙋща́етъ мѧ̀ дв҃о, скре́жетъ зꙋбѡ́въ тли́тъ се́рдце моѐ, стоѧ́нїе ко́злищъ ᲂу҆жаса́етъ мѧ̀: но по́мощь въ лю́тыхъ да ѡ҆брѧ́щꙋ тѧ̀ бцⷣꙋ, є҆гда̀ хощꙋ̀ ѡ҆сꙋди́тисѧ.
Ны́нѣ тре́петъ содержи́тъ мѧ̀: и҆ стра́хъ смꙋща́етъ мѧ̀ гее́нскїй. и҆ что̀ содѣ́ѧти, не вѣ́мъ ѻ҆каѧ́нный и҆ ѡ҆сꙋжде́нный: тѣ́мже притека́ю къ тебѣ̀, и҆ те́плымъ ᲂу҆миле́нїемъ вопїю́ ти: не пре́зри менѐ пречⷭ҇таѧ.
Сла́ва: Зрѧ̀ сꙋди́ще, и҆ помышлѧ́ѧ сꙋ́дъ тво́й хрⷭ҇тѐ мо́й, въ не́мже хощꙋ̀ сꙋди́тисѧ пра́веднѡ ѡ҆ дѣ́лѣхъ ѡ҆сꙋжде́нный. но и҆́мамъ моле́бницꙋ тогда̀, къ щедро́тамъ твои̑мъ мнѡ́гимъ, молѧ́щꙋю бг҃оневѣ́стнꙋю мт҃рь твою̀.
И҆ ны́нѣ: Мы́сленнѡ прикаса́ѧсѧ твои̑мъ стопа́мъ всенепоро́чнаѧ, молю̀ тѧ̀: прїимѝ рыда́нїе моѐ, пѣ́нїе внꙋшѝ, и҆ прегрѣше́нїй разрѣше́нїе пода́ждь мѝ, вопїю́ ти, мл҃твами твои́ми дв҃о, да любо́вїю тѧ̀ велича́ю.
Та́же, Досто́йно є҆́сть: Трист҃о́е. По Ѻ҆́ч҃е на́шъ: тропа́рь, и҆ про́чее ѻ҆бы́чно, и҆ ѿпꙋ́стъ.
Въ четверто́къ ᲂу҆́тра,
по а҃-мъ стїхосло́вїи, сѣда́льны. а҆пⷭ҇льски, гла́съ ѕ҃:
Ꙗ҆́кѡ посредѣ̀ ᲂу҆ч҃нкѡ́въ твои́хъ, прише́лъ є҆сѝ сп҃се, ми́ръ тво́й даѧ̀ и҆̀мъ: прїидѝ и҆ къ на́мъ, и҆ сп҃сѝ на́съ.
Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.
Оу҆ченикѡ́въ твои́хъ ли́къ вселе́ннꙋю просвѣтѝ: бы́вше бо и҆ногда̀ ловцы̀ ры́бъ, ны́нѣ же человѣ́кѡвъ бы́ша: тѣ́хъ ра́ди бж҃е, поми́лꙋй на́съ.
Сла́ва, и҆ ны́нѣ, бг҃оро́диченъ: Мнѡ́гаѧ мно́жєства мои́хъ бцⷣе, прегрѣше́нїй, къ тебѣ̀ прибѣго́хъ чⷭ҇таѧ, сп҃се́нїѧ тре́бꙋѧ: посѣтѝ немощствꙋ́ющꙋю мою̀ дꙋ́шꙋ, и҆ молѝ сн҃а твоего̀, и҆ бг҃а на́шего, да́ти мѝ ѡ҆ставле́нїе, ꙗ҆̀же содѣ́ѧхъ лю́тыхъ, є҆ди́на бл҃гослове́ннаѧ.
По в҃-мъ стїхосло́вїи сѣда́льны, гла́съ ѕ҃:
Оу҆ч҃нцы̀ твоѝ, сп҃се, въ концы̀ землѝ посыла́еми, ꙗ҆зы́ки бл҃гоче́стнѡ ꙗ҆́кѡ ры̑бы ᲂу҆лови́вше, приведо́ша твое́й бл҃гости. тѣ́хъ ра́ди ᲂу҆̀бо вопїе́мъ тѝ хрⷭ҇тѐ: лю́демъ твои̑мъ пода́ждь ве́лїю млⷭ҇ть.
Сті́хъ: И҆сповѣ́дѧтъ нб҃са̀ чꙋдеса̀ твоѧ̑ гдⷭ҇и.
Двоенадесѧ́тица а҆пⷭ҇лъ, гдⷭ҇и, двоенадесѧтолꙋ́чнаѧ ꙗ҆́кѡ со́лнце ꙗ҆ви́сѧ землѝ: тѣ́хъ бо ра́ди ᲂу҆вѧди́лъ є҆сѝ пре́лести и҆зрасти́телѧ: тѣ́хъ ра́ди ѡ҆зарѧ́еши дꙋ́шы твои́хъ рабѡ́въ: и҆ на́съ и҆́хъ ра́ди сп҃са́й, ꙗ҆́кѡ бл҃гоꙋтро́бенъ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мч҃нченъ: Гдⷭ҇и, ст҃ы́хъ твои́хъ па́мѧть дне́сь ꙗ҆ви́сѧ, ꙗ҆́кѡ ра́й, и҆́же во є҆де́мѣ: въ не́й бо ра́дꙋетсѧ всѧ̀ тва́рь, и҆ подае́ши на́мъ тѣ́хъ мл҃твами ми́ръ и҆ ве́лїю млⷭ҇ть.
Сла́ва, и҆ ны́нѣ, бг҃оро́диченъ: Всест҃а́ѧ бцⷣе, во вре́мѧ живота̀ моегѡ̀ не ѡ҆ста́ви менѐ: человѣ́ческомꙋ предста́тельствꙋ не ввѣ́ри мѧ̀: но сама̀ застꙋпѝ, и҆ поми́лꙋй мѧ̀.
По г҃-мъ стїхосло́вїи, сѣда́льны, гла́съ ѕ҃:
Подо́бенъ: Всю̀ ѿложи́вше:
Во всю̀ зе́млю ꙗ҆́кѡ мо́лнїѧ премꙋ́дрыхъ ᲂу҆ченикѡ́въ твои́хъ, влⷣко хрⷭ҇тѐ, и҆зы́де сп҃си́тельное вѣща́нїе, и҆ ѡ҆зарѝ сꙋ́щыѧ во тьмѣ̀ и҆ лю́тыхъ, сы́ны днѐ и҆ свѣ́та на́съ содѣ́лавшее. тѣ́мже тѧ̀ всѧ̀ тва́рь бл҃гоче́стнѡ сла́витъ.
Мре́жею бж҃е́ственныѧ вѣ́ры лю́дїе преврати́вше ры́барїе, и҆з̾ глꙋбины̀ сꙋ́етства и҆звлеко́ша всѣ́хъ, и҆ преда́ша и҆́хъ бг҃ꙋ, бл҃гоче́ствꙋющихъ, и҆ того̀ при́снѡ велича́ющихъ.
Сла́ва, и҆ ны́нѣ, бг҃оро́диченъ: Ст҃а́ѧ влⷣчце, хрⷭ҇та̀ бг҃а на́шегѡ мт҃и, ꙗ҆́кѡ всѣ́хъ творца̀ неизрече́ннѡ ро́ждшаѧ, молѝ со а҆пⷭ҇лы сщ҃е́нными всегда̀ бл҃гость є҆гѡ̀, страсте́й на́съ и҆зба́вити, и҆ ѡ҆ставле́нїе на́мъ да́ти грѣхѡ́въ.
Канѡ́нъ ст҃ы̑мъ сла̑внымъ и҆ всехва̑льнымъ а҆пⷭ҇лѡмъ. Творе́нїе ѳеофа́ново, гла́съ ѕ҃:
Пѣ́снь а҃
І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.
Свѣ́тъ бы́вше мі́рꙋ бг҃оглаго́ливїи, свѣ́тлыми блиста́ньми ѡ҆зари́те на́съ: и҆ страсте́й и҆зба́вите но́щи, и҆ мглы̀ и҆скꙋше́нїй, бг҃обл҃же́ннїи. [Два́жды.]
Кнѧ́зи честны̑ѧ по все́й землѝ дх҃ъ ва́съ че́стнѡ поста́ви, гдⷭ҇ни ᲂу҆ч҃нцы̀: тѣ́мже воздꙋ́шнаго кнѧ́зѧ побѣди́вше, вѣ̑рныѧ и҆збавлѧ́ете.
Ѿ ѻ҆гнѧ̀ невеще́ственнагѡ, ꙗ҆́кѡ свѣтоза́рное разже́гшесѧ ᲂу҆́глїе, веще́ствєнныѧ моѧ̑ премꙋ́дрїи, стра̑сти попали́те, къ свѣ́тꙋ безстра́стїѧ и҆ живота̀ наставлѧ́юще мѧ̀.
Бг҃оро́диченъ: А҆пⷭ҇лъ мл҃твами, прⷪ҇рѡ́къ, и҆ мч҃нкъ, и҆ ро́ждшїѧ тѧ̀ чⷭ҇тыѧ, гдⷭ҇и і҆и҃се, всѣ́хъ цр҃ю̀, ᲂу҆ще́дри лю́ди согрѣши́вшыѧ тѝ.
Дрꙋгі́й канѡ́нъ ст҃о́мꙋ чꙋдотво́рцꙋ нїкола́ю, [є҆го́же краегране́сїе. Шесто́е пѣ́нїе нїко́лае прїимѝ] Творе́нїе і҆ѡ́сифово. Гла́съ ѕ҃.
І҆рмо́съ: Чꙋ́вственный фараѡ́нъ пото́пленъ бы́сть со всево́инствомъ: і҆и҃ль же проше́дъ посредѣ̀ мо́рѧ, вопїѧ́ше: гдⷭ҇еви бг҃ꙋ на́шемꙋ пои́мъ, ꙗ҆́кѡ просла́висѧ.
На нб҃сѣ́хъ живы́й ра́достнѡ ѻ҆́тче премꙋ́дре, на землѝ вѣ́рою согла́снѡ тебѐ пою́щихъ, всѧ́кꙋю ско́рбь се́рдца лꙋка́вꙋю разженѝ хода́тайствомъ твои́мъ.
На стра̑сти врє́дныѧ, на врагѝ тлетвѡ́рныѧ, на всѧ́кꙋю льсти́вагѡ ѕло́бꙋ, ᲂу҆крѣпѝ ны́нѣ ѻ҆́тче нїко́лае, къ покро́вꙋ твоемꙋ̀ ст҃о́мꙋ вѣ́рою притека́ющыѧ.
Оу҆ѧ́звленныхъ на́съ ѿ неви́димыхъ стрѣлє́цъ, врачевство́мъ твоеѧ̀ нїко́лае, мл҃твы претворѝ, ꙗ҆́кѡ да здра́вѡ ходи́ти на́мъ по пꙋтє́мъ гдⷭ҇нимъ.
Бг҃оро́диченъ: И҆́же сы́й со ѻ҆ц҃е́мъ соприсносꙋ́щный сн҃ъ, напослѣ́докъ восхотѣ́въ всели́сѧ въ ложесна̀ твоѧ̑ на на́ше бцⷣе, вѣ́рныхъ ѿрожде́нїе: тѣ́мже воспѣва́емъ тѧ̀.
Пѣ́снь г҃
І҆рмо́съ: Нѣ́сть ст҃ъ, ꙗ҆́коже ты̀ гдⷭ҇и бж҃е мо́й, вознесы́й ро́гъ вѣ́рныхъ твои́хъ бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Бж҃е́ственный дх҃ъ ва́шѧ ѧ҆зы́ки и҆звари́въ наше́ствїемъ стра́шнымъ, сокрꙋшє́нныѧ человѣ́ки къ животꙋ̀ ѡ҆бновлѧ́етъ ва́ми, сла́внїи а҆пⷭ҇ли. [Два́жды.]
Въ ра́зꙋмѣ согрѣша́ѧй, ко́е ѡ҆брѧ́щꙋ поми́лованїе сло́ве, въ де́нь сꙋ́дный; сегѡ̀ ра́ди вопїю́ ти: твои́хъ ра́ди ᲂу҆чєни́къ ᲂу҆ще́дри мѧ̀ самоѡсꙋжде́ннаго.
Оу҆подо́бльшїисѧ хрⷭ҇тѡ́вымъ сп҃си́тєльнымъ страсте́мъ, дꙋшѝ моеѧ̀ стра̑сти лѣ̑тныѧ и҆ лю̑тыѧ и҆сцѣли́те, вра́чеве сꙋ́ще сла́внїи а҆пⷭ҇ли.
Бг҃оро́диченъ: Согрѣши́вшаго мѧ̀ хрⷭ҇тѐ, бцⷣы ра́ди и҆ твои́хъ а҆пⷭ҇лъ, ѡ҆брати́въ ꙗ҆́кѡ бг҃ъ поми́лꙋй, и҆ ѻ҆гнѧ̀ вѣ́чнагѡ сп҃се, свободѝ.
И҆́нъ
І҆рмо́съ: На тве́рдѣмъ вѣ́ры твоеѧ̀ ка́мени помышле́нїе ᲂу҆тверди́въ дꙋшѝ моеѧ̀, ᲂу҆твердѝ гдⷭ҇и: тѧ́ бо и҆́мамъ бл҃же, прибѣ́жище и҆ ᲂу҆твержде́нїе.
Побѣ̑ды ꙗ҆́вѣ на дꙋшетлѣ̑нныѧ стра̑сти прїѧ́лъ є҆сѝ, нїко́лае всебл҃же́нне: ѿ ни́хже ѕлѣ̀ всегда̀ побѣжда́емыхъ на́съ твои́ми мл҃твами и҆зба́ви.
Оу҆́ды плѡтскі́ѧ ᲂу҆мертви́въ воздержа́нїемъ, къ жи́зни преше́лъ є҆сѝ нестарѣ́ющейсѧ, ю҆́же и҆ на́мъ воспрїѧ́ти моли́сѧ, мꙋ́дре, ра́достнѡ восхвалѧ́ющымъ тѧ̀.
Посѣща́ти на́съ ѿ нбⷭ҇ныѧ высоты̀ не преста́й ст҃и́телю, ѿгонѧ̀ всю̀ жите́йскꙋю тѣснотꙋ̀, къ бг҃ꙋ твои́ми мл҃твами.
Бг҃оро́диченъ: Разрѣше́нїе на́мъ грѣхѡ́въ да́ти чⷭ҇таѧ и҆зба́вителѧ ᲂу҆молѝ, помраче́нїе всѐ ѿ дꙋ́шъ на́шихъ при́снѡ твои́ми мл҃твами разгонѧ́ющи.
Пѣ́снь д҃
І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ взыва́ющи, ѿ смы́сла чи́ста ѡ҆ гдⷭ҇ѣ пра́зднꙋющи.
Приста̑нища бл҃гоꙋти̑шнаѧ, приста̑нища небꙋ̑рнаѧ, къ ти́хомꙋ мѧ̀ приста́нищꙋ доведи́те, прегрѣше́нїй лю́тыхъ треволне́нїемъ ѡ҆бꙋрева́ема. [Два́жды.]
Дꙋшѐ моѧ̀, воздохнѝ, дꙋшѐ моѧ̀, прослези́сѧ: смире́нное се́рдце моѐ бл҃го́мꙋ ѿню́дъ прилѣпи́сѧ, ꙗ҆́кѡ да бꙋ́дꙋщагѡ тѧ̀ пла́мене и҆ мꙋ́ки и҆зба́витъ бг҃ъ.
Сп҃са гдⷭ҇а моли́те, сп҃си́телїе сꙋ́ще человѣ́кѡвъ всеблаже́ннїи а҆пⷭ҇ли: да на́съ сп҃се́тъ ѿ и҆скꙋше́нїй ѕлы́хъ ꙗ҆́кѡ чл҃вѣколю́бецъ.
Бг҃оро́диченъ: Дв҃о пречⷭ҇таѧ, дв҃о непоро́чнаѧ, со а҆пⷭ҇лы ѡ҆ на́съ мольбꙋ̀ сотворѝ: ꙗ҆́кѡ да и҆зба́вимсѧ лю́тыхъ и҆скꙋше́нїй и҆ бѣ́дъ.
И҆́нъ
І҆рмо́съ: Оу҆слы́шахъ слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̑, и҆ ᲂу҆жасо́хсѧ: сла́ва си́лѣ твое́й гдⷭ҇и.
Оу҆врачꙋ́й свѧ́те, ᲂу҆ѧ́звленое ѿ льсти́вагѡ неиспра́вленое се́рдце моѐ, ᲂу҆моли́въ бл҃года́вца бг҃а на́шего, нїко́лае.
Сокрꙋши́лъ є҆сѝ ка̑пища поги́бели, хрⷭ҇то́въ ᲂу҆го́дниче: тѣ́мже вѣ́рою молю́ тѧ нїко́лае, ᲂу҆ма̀ моегѡ̀ ѕлѡ́бныѧ кꙋмі́ры потребѝ.
Мѷродохнове́ненъ бы́лъ є҆сѝ првⷣными дѣлесы̀ бг҃омꙋ́дре, и҆ въ мѵ́рѣхъ ᲂу҆краси́лъ є҆сѝ прⷭ҇то́лъ, ѻ҆́тче ст҃и́телю нїко́лае.
Бг҃оро́диченъ: Безневѣ́стнаѧ влⷣчце, бл҃гослове́ннаѧ бг҃ороди́тельнице, пою́щыѧ тѧ̀ сп҃са́й ѿ всѧ́кагѡ вре́да, є҆ди́на человѣ́кѡвъ помо́щнице.
Пѣ́снь є҃
І҆рмо́съ: Бж҃їимъ свѣ́томъ твои́мъ бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Пꙋ́ть вводѧ́щїй въ живо́тъ, ѕѣлѡ̀ тѣснѣ́йшимъ ше́ствїемъ и҆скꙋше́нїй и҆ скорбе́й, ᲂу҆ченицы̀ сло́ва ꙗ҆́вѣ ходи́вшїи, стезю̀ дꙋшѝ моеѧ̀ ᲂу҆гла́дите. [Два́жды.]
Свѣти́льницы бж҃е́ственнагѡ восто́ка, и҆зба́вите мѧ̀ ѿ тьмы̀ страсте́й, и҆ сласте́й помраче́нїѧ, и҆ напа́стей, и҆ ѡ҆бстоѧ́нїй, и҆ бꙋ́ри, и҆ бѣ́дъ, хрⷭ҇тѡ́вы а҆пⷭ҇ли.
Сви́тцы сло́ва бг҃озра́чнїи, въ кни́зѣ мѧ̀ живо́тнѣй написа́тисѧ моли́те, а҆пⷭ҇ли, грѣхѡ́въ мои́хъ ѕло́е растерза́юще писа́нїе мл҃твами ва́шими.
Бг҃оро́диченъ: Сп҃се́нїе моѐ и҆ ᲂу҆пова́нїе, сп҃си́ мѧ ᲂу҆пова́ющаго на тѧ̀, всѣ́хъ ᲂу҆пова́нїе непосты́дное, ꙗ҆́же къ сн҃ꙋ твоемꙋ̀ мольба́ми, и҆ бж҃е́ственныхъ ᲂу҆чєни́къ, ѻ҆трокови́це є҆ди́на всепѣ́таѧ.
И҆́нъ
І҆рмо́съ: Свѣ́тъ возсїѧ́вый мі́рꙋ хрⷭ҇тѐ, просвѣтѝ се́рдце моѐ ѿ но́щи тебѣ̀ зовꙋ́ща, и҆ сп҃си́ мѧ.
Дрема́нїемъ лѣ́ности ѡ҆держи́ма, ᲂу҆се́рднѡ мѧ̀ ᲂу҆стро́й сщ҃е́нными хода́тайствы твои́ми, нїко́лае.
І҆и҃са сп҃са ᲂу҆молѝ, ст҃и́телю нїко́лае, вѣ́чнагѡ мѧ̀ и҆зба́вити мꙋче́нїѧ.
Мїрски́хъ мѧ̀ собла̑знъ соблюдѝ, и҆ ѿ бѣсо́вскагѡ ѡ҆ѕлобле́нїѧ, мл҃твами твои́ми, ст҃и́телю нїко́лае.
Бг҃оро́диченъ: Є҆́же бы́ти на́мъ подава́ѧй, въ твою̀ ᲂу҆тро́бꙋ всели́сѧ бцⷣе: є҆го́же молѝ сп҃стѝ на́съ.
Пѣ́снь ѕ҃
І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многомлⷭ҇тиве.
Ꙗ҆́кѡ скрижа̑ли бг҃опи̑саннаѧ дх҃а, ꙗ҆́вѣ честна̑ѧ законоположє́нїѧ сла́внїи, въ дꙋша́хъ и҆мѣ́сте нело́жнѡ: и҆́миже въ писа́нїихъ ᲂу҆праздни́сте зако́нъ, мі́ръ сп҃сше. [Два́жды.]
Дꙋшѐ согрѣша́ющи, ѻ҆бы́чаємъ же ѕлы̑мъ ᲂу҆мовре́днѡ рабо́тающи, ѡ҆браще́нїемъ ѡ҆брати́сѧ, и҆ гдⷭ҇еви ще́дромꙋ возопі́й: а҆пⷭ҇лъ ра́ди сло́ве, сп҃си́ мѧ.
Ѻ҆вца́мъ дєсны́мъ сочета́й мѧ̀, во ᲂу҆жа́сномъ и҆ стра́шномъ прише́ствїи твое́мъ, и҆збра̑ннымъ твои̑мъ, моли́твами бж҃е́ственныхъ проповѣ̑дникъ твои́хъ, закла́выйсѧ за всѣ́хъ а҆́гнче неѕло́бивый.
Бг҃оро́диченъ: Ли́къ мо́литъ тѧ̀ безпло́тныхъ слꙋ́гъ, сн҃е бж҃їй пребезнача́льне, мо́литъ тѧ̀ собо́ръ ᲂу҆ченикѡ́въ съ ро́ждшею тѧ̀, лю́демъ твои̑мъ пода́ждь млⷭ҇ти твоѧ̑.
И҆́нъ
І҆рмо́съ: Ки́томъ пожре́нъ грѣхо́внымъ, вопїю̀ тебѣ̀ хрⷭ҇тѐ: ꙗ҆́кѡ прⷪ҇ро́ка и҆з̾ и҆стлѣ́нїѧ мѧ̀ свободѝ.
Свѣти́льника тѧ̀ разꙋ́мнаго и҆мꙋ́щи тва́рь нїко́лае, просвѣща́етсѧ зарѧ́ми неисче́тныхъ чꙋде́съ твои́хъ.
Недрема́нный мл҃твенниче, къ тебѣ̀ притека́ющымъ нїко́лае, ѿ сна̀ ѕла́гѡ лѣ́ности и҆зба́ви мѧ̀.
И҆зба́вилъ є҆сѝ дре́вле мꙋ́дре, хотѧ́щыѧ непра́веднѡ ᲂу҆мре́ти: та́кожде и҆ менѐ и҆зба́ви ѿ бѣ́дъ и҆ прегрѣше́нїй, нїко́лае.
Бг҃оро́диченъ: Дв҃о є҆ди́на чⷭ҇таѧ ѡ҆бра́дованнаѧ, помози́ ми, при́снѡ ѡ҆бꙋрева́емꙋ жите́йскими напа́стьми.
Пѣ́снь з҃
І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ бж҃е ѻ҆тє́цъ на́шихъ.
Оу҆́дицею сло́ва а҆пⷭ҇ли, и҆звле́кше всѣ́хъ и҆з̾ глꙋбины̀ пре́лести, приведо́сте къ закла́вшемꙋсѧ сло́вꙋ на́съ ра́ди, пою́ще є҆мꙋ̀: бл҃гослове́нъ бг҃ъ ѻ҆тє́цъ на́шихъ. [Два́жды.]
Ꙗ҆́вльшемꙋсѧ ве́щїю тѣле́сною а҆пⷭ҇ли, нехода́тайственнѣ бесѣ́довавше, просвѣти́стесѧ свѣтода́тельными блиста́ньми є҆гѡ̀. тѣ́мже мѧ̀ просвѣти́те вопїю́ща: бл҃гослове́нъ бг҃ъ ѻ҆тє́цъ на́шихъ.
Па́стырѧ до́браго ᲂу҆моли́те бж҃е́ственнїи ᲂу҆ч҃нцы̀, въ гора́хъ мѧ̀ заблꙋ́ждшаго престꙋпле́нїѧ взыска́ти, и҆ сп҃стѝ вопїю́щаго прилѣ́жнѡ: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ: Со прⷪ҇ро́ки, а҆пⷭ҇лы же и҆ мч҃нки, дв҃о, є҆го́же родила̀ є҆сѝ, молѝ, земны́хъ мѧ̀ и҆зба́вити ѕѡ́лъ, и҆ прича́стника нбⷭ҇ныхъ бла̑гъ бы́ти мѧ̀ сподо́би влⷣчце.
И҆́нъ
І҆рмо́съ: Прпⷣбныхъ твои́хъ ѻ҆трокѡ́въ мл҃твꙋ ᲂу҆слы́шавый, и҆ пе́щь горѧ́щꙋю ѡ҆роси́вый, бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Си́лою бж҃їею пребл҃же́нне, є҆реті́чествꙋющихъ полкѝ попра́лъ є҆сѝ, и҆ ѿ тѣ́хъ пре́лести ста́до твоѐ сп҃слъ є҆сѝ, нїко́лае.
Ꙗ҆вле́йсѧ пла́вающымъ, и҆ тво́й гра́дъ препита́лъ є҆сѝ стра́ждꙋщъ: дꙋшетлѣ́ннагѡ мѧ̀ гла́да и҆зба́ви, мл҃твами твои́ми, ѻ҆́тче нїко́лае.
Оу҆твердѝ ѻ҆́тче, мл҃твами твои́ми тебѐ призыва́ющыѧ на по́мощь нїко́лае, ᲂу҆тиша́ѧ бѣсо́вскꙋю лꙋка́вꙋю бꙋ́рю.
Бг҃оро́диченъ: Влⷣчце всѣ́хъ человѣ̑къ, ст҃а́ѧ бцⷣе, рабо́ты мѧ̀ стра́стныѧ твои́ми мл҃твами до конца̀ свободѝ.
Пѣ́снь и҃
І҆рмо́съ: И҆з̾ пла́мене прпⷣбнымъ ро́сꙋ и҆сточи́лъ є҆сѝ, и҆ првⷣнагѡ же́ртвꙋ водо́ю попали́лъ є҆сѝ: всѧ̑ бо твори́ши хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.
Мл҃твъ серпо́мъ ѡ҆чи́стите пле́велы всѧ̑ мы́сли моеѧ̀, бж҃е́ственнїи дѣ́латели сп҃сѡвы а҆пⷭ҇ли: ꙗ҆́кѡ да сп҃си́тельнагѡ плода̀ принесꙋ̀ кла́съ. [Два́жды.]
Ѡ҆лѧденѣ̑вшаѧ сердца̀ ѡ҆бнови́сте ра́ломъ сло́ва, и҆ всѣ́ѧвше ᲂу҆че́нїе честно́е, кла́съ стори́чествꙋющъ спа́сшихсѧ пожа́сте, бг҃ови́дцы.
Вра́жїю ѕло́бꙋ ᲂу҆спи́вше, ᲂу҆снꙋ́ли є҆стѐ сно́мъ пра́ведныхъ подо́бнымъ, неꙋсы́пнїи ѡ҆ на́съ мл҃твєнницы бы́вше ᲂу҆ч҃нцы̀ сло́ва, во всѧ̑ вѣ́ки.
Бг҃оро́диченъ: Ѻ҆гнѧ̀ негаси́магѡ и҆зба́ви мѧ̀ гдⷭ҇и, прⷪ҇рѡ́къ, и҆ мч҃нкъ, и҆ а҆пⷭ҇лъ твои́хъ, и҆ во ᲂу҆тро́бꙋ вмѣсти́вшїѧ тѧ̀ неизрече́ннѡ, дв҃ы неискꙋсомꙋ́жныѧ, ще́дре, мл҃твами.
И҆́нъ
І҆рмо́съ: Прпⷣбнїи твоѝ ѻ҆́троцы въ пещѝ херꙋві́мы подража́хꙋ, трист҃ꙋ́ю пѣ́снь воспѣва́юще: бл҃гослови́те, по́йте, и҆ превозноси́те во всѧ̑ вѣ́ки.
На высотꙋ̀ житїѧ̀ свѣтлѣ́йшагѡ восте́къ ꙗ҆ви́лсѧ є҆сѝ, и҆ зна́емь вселе́ннѣй бг҃оно́сне, чꙋдодѣѧ́нїи разли́чными просвѣща́ѧ сꙋ́щихъ во тьмѣ̀, нїко́лае.
Ѡ҆бл҃годатѝ бж҃е́ственнѣ бо́дрствꙋющыѧ, тѧ̀ чтꙋ́щыѧ нїко́лае: ᲂу҆спѝ ѕло́бꙋ враждꙋ́ющихъ человѣ̑къ, на на́съ находѧ́щихъ, бл҃же́нне.
И҆́же всѧ̑ сѣ̑ти вра̑жїѧ крѣ́постїю сокрꙋши́въ дꙋхо́вною, ѿ тѣ́хъ и҆зба́ви мѧ̀ твои́ми мл҃твами, ѡ҆кормлѧ́ѧ живо́тъ мо́й бг҃омꙋ́дре, ст҃и́телю нїко́лае.
Бг҃оро́диченъ: Пое́мъ тѧ̀ дв҃о бг҃ороди́тельнице, є҆ѧ́же ра́ди клѧ́тва непло́дна бы́сть и҆ бл҃гослове́нїе всѣ̑мъ прїи́де, вѣ́дꙋщымъ тѧ̀ є҆ди́нꙋ мт҃рь бг҃а на́шегѡ безмꙋ́жнꙋю.
Та́же пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а: съ припѣ́вы, и҆ покло́ны.
Пѣ́снь ѳ҃
І҆рмо́съ: Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю же всечⷭ҇таѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и тѧ̀ ᲂу҆бл҃жа́емъ.
Бг҃а человѣ́кѡмъ прїѡбщи́вшасѧ, и҆ ме́ртвенное совокꙋпле́нїемъ без̾ сравне́нїѧ ѡ҆божи́вшаго, во все́мъ мі́рѣ проповѣ́давше, всѣ́хъ безбо́жныѧ пре́лести свободи́сте: тѣ́мже ᲂу҆бл҃жа́еми є҆стѐ при́снѡ бж҃е́ственнїи а҆пⷭ҇ли. [Два́жды.]
Хрⷭ҇то́вꙋ стрⷭ҇ть и҆з̾ѡбрази́вше а҆пⷭ҇ли, страстьмѝ тѣлесѐ разли́чными, пло́ти моеѧ̀ стра̑сти ᲂу҆мертви́те: и҆ и҆знемо́гшꙋю, и҆ бѣ́дствꙋющꙋю, и҆ ᲂу҆мерщвле́нꙋю мою̀ дꙋ́шꙋ ѡ҆животвори́те.
Пꙋ́ть бꙋ́ди мѝ наставлѧ́ющїй мѧ̀ къ незаблꙋ́дномꙋ пꙋтѝ за́повѣдей твои́хъ чл҃вѣколю́бче, въ про́пасть грѣхо́внꙋю впа́дшемꙋ: и҆ заблꙋжда́ющꙋ, и҆ ᲂу҆кло́ншꙋсѧ къ пꙋтє́мъ лꙋка̑вымъ, и҆ бѣ́дствꙋющꙋ.
Бг҃оро́диченъ: Ли́ки а҆́гг҃лъ и҆ а҆рха̑гг҃лъ же, вла̑сти и҆ си̑лы, нача̑ла, гдⷭ҇ствїѧ, херꙋві́ми и҆ серафі́ми и҆ прⷭ҇то́ли, хрⷭ҇тѐ, собо́ръ а҆пⷭ҇лъ, съ ро́ждшею тѧ̀, мо́лѧтсѧ тебѣ̀ є҆ди́не цр҃ю̀, сп҃сѝ рабы̑ твоѧ̑.
И҆́нъ
І҆рмо́съ: Є҆́же ра́дꙋйсѧ ѿ а҆́гг҃ла прїи́мшаѧ, и҆ ро́ждшаѧ созда́телѧ твоего̀, дв҃о, сп҃си́ тѧ велича́ющыѧ.
Ст҃и́телей ᲂу҆добре́нїе, чꙋде́съ и҆сто́чниче нїко́лае, ᲂу҆молѝ бг҃а чл҃вѣколю́бца, ѡ҆брѣстѝ на́мъ грѣхѡ́въ ѡ҆ставле́нїе.
Ꙗ҆́коже дре́вле ᲂу҆́зники и҆зба́вилъ є҆сѝ ѿ сме́рти: та́кѡ и҆ на́съ и҆зба́ви и҆скꙋше́нїй жите́йскихъ, нїко́лае.
Ты̀ въ мѵ́рѣхъ лѷкі́йскихъ погребе́нъ бы́лъ є҆сѝ, мѵ́ро то́чиши всегда̀ нїко́лае, ѕловѡ́нїѧ страсте́й ѿгонѧ́ѧ при́снѡ.
Зижди́телѧ прише́ствїе при две́рехъ, не лѣни́сѧ дꙋшѐ моѧ̀, но возопі́й: нїкола́а мл҃твами хрⷭ҇тѐ, сп҃си́ мѧ.
Бг҃оро́диченъ: Свѣ́тъ ро́ждшаѧ всепѣ́таѧ, се́рдца моегѡ̀ зѣ́ницꙋ ѡ҆слѣ́пшꙋю просвѣтѝ: да пою́ тѧ и҆́же тебѐ ра́ди сп҃са́емь.
Та́же, Досто́йно є҆́сть: и҆ покло́нъ. Є҆ктенїа̀, свѣти́ленъ и҆ ѱалмы̀ ѻ҆бы̑чныѧ.
На стїхо́внѣ стїхи̑ры а҆пⷭ҇лѡмъ, гла́съ ѕ҃:
Бꙋ́рю ᲂу҆тиши́вше ле́сти бѣсо́вскїѧ мꙋ́дрѣ въ тишинꙋ̀ а҆пⷭ҇ли хрⷭ҇то́ви, ве́сь мі́ръ наста́висте въ вѣ́рꙋ правосла́внꙋю, и҆ ны́нѣ моли́тесѧ ѡ҆ дꙋша́хъ на́шихъ.
Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ: во всѧ̑ дни̑ на́шѧ возвесели́хомсѧ, за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ, и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.
Па́мѧть премꙋ́дрыхъ ᲂу҆чєни́къ хрⷭ҇та̀ цр҃ѧ̀ на́шегѡ, досто́йнѡ пѣ́сньми почти́мъ вѣ́рнїи: ті́и бо трⷪ҇ческꙋю вѣ́рꙋ въ мі́рѣ проповѣ́даша.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Мч҃нченъ: И҆збра̑нныѧ ᲂу҆дивѝ и҆ ст҃ы̑ѧ бг҃ъ на́шъ. ра́дꙋйтесѧ и҆ весели́тесѧ всѝ рабѝ є҆гѡ̀, ва́мъ бо ᲂу҆гото́ва вѣнцы̀ и҆ црⷭ҇твїе своѐ: но мо́лимъ вы̀, и҆ на́съ не забꙋ́дите.
Сла́ва, и҆ ны́нѣ, бг҃оро́диченъ: Преложе́нїе скорбѧ́щихъ, премѣне́нїе болѧ́щихъ є҆сѝ бцⷣе всепѣ́таѧ, сп҃сѝ гра́дъ и҆ лю́ди, бори́мыхъ ᲂу҆мире́нїе, ѡ҆бꙋрева́емыхъ тишина̀, є҆ди́на предста́тельнице вѣ́рныхъ.
Та́же, Бл҃го є҆́сть: И҆ Трист҃о́е. По Ѻ҆́ч҃е на́шъ: Тропарѝ, и҆ є҆ктенїа̀: и҆ ча́съ пе́рвый, и҆ ѱалмы̀ ѻ҆бы̑чныѧ, и҆ про́чее, и҆ ѿпꙋ́стъ.
Въ четверто́къ бл҃жє́нны, гла́съ ѕ҃:
Помѧни́ мѧ бж҃е сп҃се мо́й, є҆гда̀ прїи́деши во црⷭ҇твїи твое́мъ, и҆ сп҃си́ мѧ, ꙗ҆́кѡ є҆ди́нъ чл҃вѣколю́бецъ.
Сті́хъ: Бл҃же́ни и҆́згнани пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Ꙗ҆́кѡ лꙋчы̀ та̑йныѧ, проте́кше въ мі́рѣ а҆пⷭ҇ли сла́внїи, человѣ́ческїй ро́дъ вѣ́рою просвѣти́ли є҆стѐ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
Ꙗ҆́кѡ ѻ҆́блацы ѡ҆кропи́ли є҆стѐ во́дꙋ въ мі́рѣ, бж҃е́ственнагѡ ра́зꙋма, просвѣще́ннїи гдⷭ҇ни а҆пⷭ҇ли.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Мꙋче́нїѧ ѻ҆гню̀ приближа́ющесѧ, бж҃е́ственнꙋю ро́сꙋ прохлажда́ющꙋю ва́съ, ѿ бг҃а воспрїѧ́сте мч҃нцы.
Сла́ва: Ст҃ѣ́й и҆ чⷭ҇тнѣ́й трⷪ҇цѣ, вѣ́рнїи покланѧ́ющесѧ, согла́снѡ возопїи́мъ: а҆пⷭ҇лъ мольба́ми сп҃сѝ всѣ́хъ на́съ.
И҆ ны́нѣ: Ро́ждшаѧ сло́во па́че словесѐ бцⷣе, ѻ҆ц҃ꙋ̀ собезнача́льнаго, того̀ молѝ сп҃сти́сѧ дꙋша́мъ на́шымъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.