Глас 5-й. Суббота.
Въ пѧто́къ ве́чера,
На Гдⷭ҇и воззва́хъ, стїхи̑ры ст҃ы̑мъ мч҃нкѡмъ, и҆ ст҃и́телємъ и҆ прпⷣбнымъ, гла́съ є҃: Подо́бенъ: Ра́дꙋйсѧ:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Пла́мень нече́стїѧ лю́тагѡ стрⷭ҇тоте́рпцы ᲂу҆гаси́ша крове́й свои́хъ тече́ньми, бл҃гоче́стїѧ свѣ́тлость въ ми́рѣ всѣ̑мъ возже́гше мч҃нцы, бо́ги же лжеимени̑тыѧ, и҆ тѣ́хъ ѕловѡ́нїѧ, и҆ хра́мы до конца̀ попали́ша: свѣ́тъ возсїѧ́ша сꙋ́щымъ на землѝ чистѣ́йшїй, и҆́мже и҆ просвѣща́еми, тьмы̀ и҆збѣга́емъ безбо́жїѧ, и҆ пре́лести і҆́дѡльскїѧ ᲂу҆клонѧ́емсѧ, хрⷭ҇тꙋ̀ покланѧ́ющесѧ, подаю́щемꙋ мі́рови ве́лїю млⷭ҇ть.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Словеса̀ є҆реті̑къ ѕлочести́выхъ, и҆ ловлє́нїѧ ᲂу҆до́бь разрꙋши́вше, ѻ҆рꙋ́жницы ѻ҆ц҃а̀ безнача́льнагѡ, сн҃а собезнача́льнагѡ, и҆ ст҃а́гѡ дх҃а бы́сте, въ трїе́хъ ли́цѣхъ є҆ди́нствꙋ бж҃ества̀, бл҃гочестномꙋ́дреннѣ вѣ́рныхъ наꙋча́юще и҆ ᲂу҆твержда́юще правосла́внꙋю про́повѣдь. тѣ́мже и҆ бл҃жи́ми є҆стѐ, па́стырїе всесщ҃е́ннїи: ꙗ҆́кѡ на па́житехъ живоно́сныхъ хрⷭ҇то́во ста́до ᲂу҆пасо́сте, за него́же всѧ̑ болѣ̑зни и҆ напа̑сти многоѡбра̑зныѧ претерпѣ́сте.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а.
Стра̑сти плѡтскі́ѧ ᲂу҆до́бь до конца̀ попра̀, подви́гшеесѧ прпⷣбныхъ сосло́вїе, властели́на ᲂу҆ма̀ дѣѧ́нїемъ добродѣ́телей прїе́мше: и҆́мже бѣсѡ́вскїѧ всѧ̑ кѡ́зни побѣди́ша до́блественнѣ, и҆ а҆́гг҃лѡмъ собесѣ̑дницы ꙗ҆ви́шасѧ, ꙗ҆́кѡ безпло́тнїи пожи́вше. и҆̀мже и҆ ны́нѣ сра́дꙋютсѧ въ вы́шнихъ ѻ҆би́телехъ, свѣ́тлѡ живꙋ́ще, и҆ хрⷭ҇тꙋ̀ предстоѧ́тъ, ѿ негѡ̀ просѧ́ще дꙋша́мъ на́шымъ дарова́ти ве́лїю млⷭ҇ть.
И҆́ны стїхи̑ры мч҃нкѡмъ, гла́съ то́йже.
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Щито́мъ вѣ́ры ѡ҆бо́лкшесѧ, и҆ зна́менїемъ крⷭ҇тнымъ себѐ ᲂу҆крѣ́пльше, къ мꙋ́камъ мꙋ́жески вда́шасѧ, и҆ дїа́волю горды́ню и҆ ле́сть ᲂу҆праздни́ша ст҃і́и твоѝ, гдⷭ҇и, тѣ́хъ мл҃твами ꙗ҆́кѡ всеси́льный бг҃ъ, мі́рꙋ ми́ръ низпослѝ, и҆ дꙋша́мъ на́шымъ ве́лїю млⷭ҇ть.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
И҆ па́ки глаго́ли: Щито́мъ вѣ́ры:
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Ѡ҆ земны́хъ всѣ́хъ небре́гше, и҆ на мꙋ̑ки мꙋ́жески дерзнꙋ́вше, бл҃же́нныхъ наде́ждъ не погрѣши́сте, но нбⷭ҇номꙋ црⷭ҇твїю наслѣ̑дницы бы́сте, прехва́льнїи мч҃нцы: и҆мꙋ́ще дерзнове́нїе къ чл҃вѣколю́бцꙋ бг҃ꙋ, мі́рꙋ ми́ръ проси́те, и҆ дꙋша́мъ на́шымъ ве́лїю млⷭ҇ть.
Сла́ва, и҆ ны́нѣ, бг҃оро́диченъ: Въ чермнѣ́мъ мо́ри, неискꙋсобра́чныѧ невѣ́сты ѡ҆́бразъ написа́сѧ и҆ногда̀. та́мѡ мѡѷсе́й, раздѣли́тель воды̀ здѣ́ же гаврїи́лъ, слꙋжи́тель чꙋдесѐ. тогда̀ глꙋбинꙋ̀ ше́ствова немо́креннѡ і҆и҃ль: ны́нѣ же хрⷭ҇та̀ родѝ безсѣ́меннѡ дв҃а. мо́ре по проше́ствїи і҆и҃левѣ пребы́сть непрохо́дно: непоро́чнаѧ по ржⷭ҇твѣ̀ є҆мманꙋ́илевѣ пребы́сть нетлѣ́нна. сы́й, и҆ пре́жде сы́й, ꙗ҆вле́йсѧ ꙗ҆́кѡ чл҃вѣ́къ, бж҃е поми́лꙋй на́съ.
Та́же, Свѣ́те ти́хїй: Прокі́менъ днѐ. Посе́мъ: Сподо́би гдⷭ҇и въ ве́черъ се́й:
На стїхо́внѣ стїхи̑ры, гла́съ є҃:
Моли́те за ны̀ ст҃і́и мч҃нцы, да и҆зба́вимсѧ ѿ беззако́нїй на́шихъ: ва́мъ бо дана̀ бы́сть бл҃года́ть моли́тисѧ ѡ҆ на́съ.
Несы́тною любо́вїю дꙋшѝ, хрⷭ҇та̀ не ѿверго́стесѧ ст҃і́и мч҃нцы: лю̑тыѧ и҆ разли̑чныѧ ра̑ны страсте́й претерпѣ́сте, мꙋчи́телей горды́ню низложи́сте: непрекло́ннꙋ и҆ невреди́мꙋ вѣ́рꙋ сохра́ньше, на нб҃са̀ преста́вистесѧ. тѣ́мже и҆ дерзнове́нїе и҆мꙋ́ще къ немꙋ̀, проси́те дарова́ти на́мъ ве́лїю млⷭ҇ть.
Ме́ртвенъ: Помѧнꙋ́хъ прⷪ҇ро́къ вопїю́ща: а҆́зъ є҆́смь землѧ̀ и҆ пе́пелъ, и҆ па́ки разсмотри́хъ во гробѣ́хъ, и҆ ви́дѣхъ кѡ́сти ѡ҆бнажє́нныѧ, и҆ рѣ́хъ ᲂу҆́бѡ: кто̀ є҆́сть ца́рь, и҆лѝ во́инъ, и҆лѝ бога́тъ, и҆лѝ ни́щъ, и҆лѝ пра́ведникъ, и҆лѝ грѣ́шникъ; но ᲂу҆поко́й гдⷭ҇и съ пра́ведными рабы̑ твоѧ̑, ꙗ҆́кѡ чл҃вѣколю́бецъ.
Сла́ва, и҆ ны́нѣ, бг҃оро́диченъ: Ѡ҆бра́дованнаѧ, хода́тайствꙋй твои́ми мл҃твами, и҆ и҆спросѝ дꙋша́мъ на́шымъ мно́жество щедро́тъ, и҆ ѡ҆чище́нїе мно́гихъ прегрѣше́нїй мо́лимсѧ.
Та́же, Ны́нѣ ѿпꙋща́еши: Трист҃о́е. По Ѻ҆́ч҃е на́шъ: И҆ ѿпꙋ́стъ.
Въ пѧто́къ на повече́рїи,
канѡ́нъ моле́бный прест҃ѣ́й бцⷣѣ. Гла́съ є҃:
Пѣ́снь а҃
І҆рмо́съ: Конѧ̀ и҆ вса́дника въ мо́ре чермно́е, сокрꙋша́ѧй бра̑ни, мы́шцею высо́кою, хрⷭ҇то́съ и҆стрѧсѐ: і҆и҃лѧ же сп҃сѐ, побѣ́днꙋю пѣ́снь пою́ща.
Вси́ тѧ человѣ́честїи ро́ди хва́лѧтъ, ꙗ҆́кѡ дре́вле дв҃о, прⷪ҇ро́чески прорекла̀ є҆сѝ: и҆ менѐ ᲂу҆̀бо прїимѝ пою́ща тѧ̀ влⷣчце, и҆ просвѣтѝ, и҆ вразꙋмѝ.
Притꙋпи́ла є҆сѝ сме́рти жа́ло, и҆ мїрскі́й грѣ́хъ дв҃о, и҆́стиннꙋю ро́ждши жи́знь, є҆ѧ́же ра́ди влⷣчце, притꙋпѝ страсте́й мои́хъ ѻ҆́стрыѧ стрѣ́лы вско́рѣ.
Сла́ва: Є҆ди́на и҆спещре́на дв҃и́ческими рѧ́снами ѿ вѣ́ка ꙗ҆́вльшисѧ, смоко́внꙋю ри́зꙋ а҆да́мовꙋ ты̀ расто́ргнꙋла є҆сѝ: тѣ́мже мѧ̀ ны́нѣ ѡ҆блецы̀ цѣломꙋ́дрїѧ ѻ҆де́ждею мл҃твами твои́ми.
И҆ ны́нѣ: Бога́тство и҆ бж҃е́ственнꙋю сла́вꙋ стѧжа́ша ᲂу҆̀бо мнѡ́ги дщє́ри пре́жде ꙗ҆́вѣ, но без̾ сравне́нїѧ влⷣчце, ты̀ всѣ́хъ превозшла̀ є҆сѝ. тѣ́мже мѧ̀ ны́нѣ ѡ҆богатѝ нбⷭ҇ными и҆ бж҃е́ственными бл҃года́тьми.
Пѣ́снь г҃
І҆рмо́съ: Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ хрⷭ҇тѐ, ка́мени за́повѣдей твои́хъ, цр҃ковь твою̀, ᲂу҆твердѝ, є҆ди́не бл҃же и҆ чл҃вѣколю́бче.
Глꙋбина̀ и҆ высота̀ въ тебѣ̀ познава́шесѧ дв҃о пречⷭ҇таѧ, бж҃їей мꙋ́дрости непостижи́мѣй, ѿ твои́хъ ложе́снъ ро́ждшейсѧ: є҆́юже глꙋбины̀ се́рдце моѐ и҆зба́ви мꙋдрова́нїй ѕмїи́ныхъ.
И҆́же пре́жде перна̑тыѧ, и҆ га́ды, ѿ воды̀ соста́вилъ є҆сѝ сло́вомъ, не сꙋ́щыѧ пре́жде: ты̀ а҆́бїе хрⷭ҇тѐ ѿ кро́ве чⷭ҇тыѧ дв҃ы, бж҃е́ственнагѡ твоегѡ̀ воплоще́нїѧ ѻ҆де́ждꙋ стра́ннꙋ ᲂу҆стро́илъ є҆сѝ.
Сла́ва: Ты̀ є҆ди́на ѡ҆чище́нїе ꙗ҆ви́ласѧ є҆сѝ є҆стествꙋ̀, пречⷭ҇таѧ, въ ню́же ѻ҆́гнь бж҃е́ственный неѡпа́льнѡ все́льсѧ, сїѐ ѡ҆чи́сти ꙗ҆́вѣ: ты̀ ᲂу҆́бѡ согрѣше́нїй и҆ страсте́й мои́хъ скве́рнꙋ ѡ҆чи́сти, и҆ твои́ми мл҃твами просвѣти́ мѧ.
И҆ ны́нѣ: Ча́шꙋ но́вагѡ вїногра́да ро́ждїѧ, напоѧ́ющꙋю ꙗ҆́вѣ вѣ̑рныѧ во ѡ҆ставле́нїе согрѣше́нїй, тѧ̀ пречⷭ҇таѧ вѣ́дый, молю̀: и҆спꙋще́нїемъ бж҃е́ственныѧ воды̀ напо́й се́рдце моѐ.
Пѣ́снь д҃
І҆рмо́съ: Бж҃е́ственное твоѐ разꙋмѣ́въ и҆стоща́нїе, прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во сп҃се́нїе люде́й твои́хъ, сп҃стѝ пома̑занныѧ твоѧ̑ прише́лъ є҆сѝ.
Неѡра́на ты̀ ꙗ҆ви́ласѧ є҆сѝ бразда̀, несѣ́ѧнный бж҃е́ственный прозѧ́бшаѧ кла́съ, и҆́мже а҆́лчꙋща мѧ̀ накормѝ бж҃е́ственными дарова́ньми же и҆ бл҃года́тьми.
Болѧ́ща мѧ̀ и҆́скреннѡ сме́ртнѣ, и҆ дꙋше́вныхъ страсте́й ѻ҆гне́мъ содержи́ма влⷣчце, мл҃твъ твои́хъ водо́ю напои́вши, вско́рѣ возста́ви.
Сла́ва: Ꙗ҆́кѡ сꙋ́щїй бж҃їй гра́дъ ѡ҆дꙋшевле́нъ, є҆го́же рѣ́ки мы́слєнныѧ веселѧ́тъ стремлє́нїѧ, мл҃твъ твои́хъ столпо́мъ дꙋшѝ моеѧ̀ хра́минꙋ ᲂу҆твердѝ.
И҆ ны́нѣ: Ѻ҆́блакъ тѧ̀ вѣ́дый, ѡ҆дожди́вшїй пра́вдꙋ и҆́стиннꙋю, молю̀ пречⷭ҇таѧ влⷣчце, ѿ всѣ́хъ ѡ҆би́дѧщихъ мѧ̀ и҆зба́вити раба̀ твоего̀ вско́рѣ.
Пѣ́снь є҃
І҆рмо́съ: Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю хрⷭ҇тѐ, ꙗ҆́кѡ є҆ди́нъ бл҃гоꙋтро́бенъ.
Возмꙋще́нїе и҆ во́лнꙋ грѣха̀, и҆ страсте́й мои́хъ дв҃о влⷣчце, до конца̀ ᲂу҆тишѝ, безстра́стїѧ ро́ждши вино́внаго.
Поста́въ сы́й свы́ше хрⷭ҇то́въ ꙗ҆ви́сѧ, бл҃голѣ́пїѧ ѻ҆де́жды бж҃е́ственныѧ, добродѣ́телей ѻ҆де́ждею чⷭ҇таѧ, ѡ҆бнаже́ннꙋю дꙋ́шꙋ мою̀ ѡ҆блецы̀.
Сла́ва: Ѡ҆чище́нїе мѝ да́рꙋй согрѣше́нїй, твои́ми мольба́ми чⷭ҇таѧ дв҃о, ꙗ҆́же ѡ҆чище́нїе бж҃е́ственное ро́ждшаѧ на́мъ хрⷭ҇та̀ и҆ гдⷭ҇а.
И҆ ны́нѣ: Стрꙋ́пы, ꙗ҆́звы и҆ гноє́нїѧ грѣхѡ́внаѧ, рꙋкодѣ̑йствїѧ, мл҃твами потреби́ ми дв҃о, и҆ си́лꙋ рабꙋ̀ твоемꙋ̀ пода́ждь.
Пѣ́снь ѕ҃
І҆рмо́съ: Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведѝ мѧ̀, ꙗ҆́кѡ бл҃гоꙋтро́бенъ.
Ꙗ҆́же свѣ́тъ ро́ждшаѧ свѣти́ламъ твори́тельный, дꙋ́шꙋ мою̀ ны́нѣ просвѣтѝ, и҆ и҆зба́ви ѿ страсте́й ѡ҆мраче́нїѧ, всесвѣ́тлаѧ.
Ме́рры ᲂу҆слади́вшаго во́ды пре́жде бцⷣе, твоего̀ сн҃а молѝ, и҆зба́вити мѧ̀ стра́сти лю́тыѧ, и҆ го́рести вско́рѣ.
Сла́ва: Возмꙋща́етъ пото́къ страсте́й дꙋ́шꙋ мою̀, пречⷭ҇таѧ: но сего̀ и҆зсꙋшѝ мл҃твами твои́ми, и҆ по́мыслы лꙋка̑выѧ потребѝ.
И҆ ны́нѣ: Хрⷭ҇то́съ и҆збавлѧ́ѧ человѣ́ки прїи́де ѿ сїѡ́на, и҆з̾ чре́ва твоегѡ̀ влⷣчце пренепоро́чнаѧ: и҆́мже и҆ менѐ ѿ напа́стей и҆зба́ви и҆ скорбе́й.
Та́же, Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ,гла́съ є҃:
Вскꙋ́ю ᲂу҆ныва́ющи дꙋшѐ стра́стнаѧ, забы́ла є҆сѝ бг҃а твоего̀ ми́лꙋющаго тѧ̀; и҆ повелѣ̑нїѧ є҆гѡ̀ преѡби́дѣвши, въ блꙋдѣ̀ житїѐ скончава́еши ᲂу҆мовре́днѡ: ѿстꙋпѝ ѿ ѕло́бы, бцⷣѣ вопїю́щи: ѿча́ѧннꙋю дꙋ́шꙋ мою̀ поми́лꙋй.
Пѣ́снь з҃
І҆рмо́съ: Превозноси́мый ѻ҆тцє́въ гдⷭ҇ь пла́мень ᲂу҆гасѝ, ѻ҆́троки ѡ҆росѝ, согла́снѡ пою́щыѧ: бж҃е, бл҃гослове́нъ є҆сѝ.
Оу҆жаса́ютсѧ и҆ трепе́щꙋтъ твоегѡ̀ призыва́нїѧ пречⷭ҇таѧ, бѣсо́встїи полцы̀: ѿ ни́хже и҆збавлѧ́ющи мѧ̀ сп҃сѝ, и҆ соблюдѝ, покрыва́ющи ѿ всѧ́кагѡ вре́да.
Неизглаго́ланнаѧ сла́ва твоѧ̀ дв҃о, сла́вы бо гдⷭ҇а родила̀ є҆сѝ: тѣ́мже мѧ̀ сподо́би сла́вы сн҃а твоегѡ̀ и҆ бг҃а моегѡ̀, твои́ми мл҃твами.
Сла́ва: Преклони́сѧ къ мольба́мъ твоегѡ̀ раба̀ влⷣчце, и҆ и҆зба́ви мѧ̀ вско́рѣ бѣ́дъ и҆ скорбе́й, и҆ всѧ́кихъ и҆скꙋше́нїй, ви́димыхъ и҆ неви́димыхъ.
И҆ ны́нѣ: Всего̀ мѧ̀ страстьмѝ стꙋда̀ пречⷭ҇таѧ, ѡ҆калѧ́вшасѧ и҆ ѡ҆скверни́вшасѧ, чистото́ю ѡ҆мы́й, и҆ ᲂу҆ѧснѝ дв҃о, мл҃твами твои́хъ ѡ҆кропле́нїй.
Пѣ́снь и҃
І҆рмо́съ: Тебѣ̀ вседѣ́телю въ пещѝ ѻ҆́троцы, всемі́рный ли́къ спле́тше, поѧ́хꙋ: дѣла̀ всѧ̑каѧ гдⷭ҇а по́йте, и҆ превозноси́те во всѧ̑ вѣ́ки.
Вода̀ непло́дствїѧ стра́стна, дꙋшѝ моеѧ̀ ложесна̀ непло́дна сотворѝ, и҆ и҆зсꙋшѝ: ѡ҆дожди́ ми ле́гкїй ѻ҆́блаче, бж҃е́ственнꙋю ро́сꙋ, ꙗ҆́кѡ да возращꙋ̀ плоды̀ покаѧ́нїѧ.
Во́лнꙋ помышле́нїй стра́стныхъ и҆ бꙋ́рю ᲂу҆тишѝ пречⷭ҇таѧ, твои́ми мл҃твами: напра́ви же мѧ̀ къ тече́нїю безстра́стїѧ, да тѧ̀ сла́влю те́плѣ во вѣ́ки всѧ̑.
Сла́ва: Две́ре мы́сленнаѧ, и҆ затворє́наѧ врата̀, и҆́миже є҆ди́нъ про́йде бг҃ъ, двє́ри заградѝ и҆ заключѝ страсте́й мои́хъ, и҆ ᲂу҆пова́нїѧ ѿве́рзи мѝ врата̀.
И҆ ны́нѣ: Возмѝ ѿ менѐ прегрѣше́нїй бре́мѧ, мт҃и дв҃о, ꙗ҆́же є҆ди́на взе́млющаго мі́ра всегѡ̀ ве́сь грѣ́хъ, ро́ждшаѧ неска́заннѡ а҆́гнца бж҃їѧ и҆ сло́ва.
Пѣ́снь ѳ҃
І҆рмо́съ: И҆са́їе ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ человѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆бл҃жа́емъ.
Ѡ҆скверни́въ ꙗ҆́кѡ человѣ́къ дꙋ́шꙋ мою̀ прегрѣше́ньми мно́гими, и҆ страстьмѝ плотски́ми ѡ҆калѧ́всѧ, тѧ̀ молю̀ ны́нѣ прилѣ́жнѡ, и҆ ми́лъ сѧ̀ дѣ́ю: ѡ҆чи́сти мѧ̀ чⷭ҇таѧ, твои́ми мл҃твами ѿ всѧ́кїѧ ѕло́бы.
Воли́телѧ млⷭ҇ти родила̀ є҆сѝ, щедро́тъ чл҃вѣколю́бца бг҃а, є҆ди́наго бл҃га́го, долготерпѣли́ваго и҆ бл҃гоꙋтро́бнаго: є҆го́же бл҃гопремѣ́нна покажи́ ми чⷭ҇таѧ, твои́ми мольба́ми, и҆ согрѣше́нїй разрѣше́нїе пода́ждь.
Сла́ва: Дрема́нїемъ ѡ҆держи́ма ᲂу҆ны́нїѧ, и҆ сластьмѝ спѧ́ща мѧ̀ ны́нѣ, влⷣчце, раба̀ твоего̀ воздви́гни къ добродѣ́телемъ дѣѧ́нїй бл҃ги́хъ, неꙋсы́пными твои́ми ма́терними мл҃твами.
И҆ ны́нѣ: Бл҃гословѧ̀ бл҃гословлю́ тѧ пречⷭ҇таѧ, и҆ велича́ю те́плѣ: бл҃гослови́ мѧ ᲂу҆́бѡ твоего̀ пѣвца̀, и҆ всѧ́ческихъ нꙋ́ждныхъ и҆ печа́льныхъ и҆зба́ви, и҆ сохранѝ твои́ма дла́ньма непобѣди́ма.
Та́же, Досто́йно є҆́сть: Покло́нъ. И҆ Трист҃о́е. По Ѻ҆́ч҃е на́шъ: тропарѝ и҆ про́чее ѻ҆бы́чно, и҆ ѿпꙋ́стъ.
Въ сꙋббѡ́тꙋ ᲂу҆́тра,
по а҃-мъ стїхосло́вїи сѣда́льны мч҃нчны, гла́съ є҃:
Сїѧ́етъ дне́сь па́мѧть стрⷭ҇тоте́рпєцъ, и҆́мать бо и҆ ѿ нб҃съ зарю̀: ли́къ а҆́гг҃льскїй торжествꙋ́етъ, и҆ ро́дъ человѣ́ческїй спра́зднꙋетъ. тѣ́мже мо́лѧтсѧ гдⷭ҇еви, поми́ловатисѧ дꙋша́мъ на́шымъ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Чꙋдеса̀ ст҃ы́хъ твои́хъ мч҃нкъ стѣ́нꙋ неразори́мꙋ на́мъ дарова́лъ є҆сѝ, хрⷭ҇тѐ бж҃е: тѣ́хъ моли́твами вѣ̑рныѧ лю́ди твоѧ̑ ᲂу҆твердѝ, ꙗ҆́кѡ є҆ди́нъ бл҃гъ и҆ человѣколю́бецъ.
Сла́ва, и҆ ны́нѣ, бг҃оро́диченъ: Ра́дꙋйсѧ, две́ре гдⷭ҇нѧ непроходи́маѧ, ра́дꙋйсѧ, стѣно̀ и҆ покро́ве притека́ющихъ къ тебѣ̀, ра́дꙋйсѧ, неѡбꙋрева́емое приста́нище, и҆ неискꙋсобра́чнаѧ, ро́ждшаѧ пло́тїю творца̀ твоего̀ и҆ бг҃а: молѧ́щи не ѡ҆скꙋдѣва́й ѡ҆ воспѣва́ющихъ, и҆ кла́нѧющихсѧ ржⷭ҇твꙋ̀ твоемꙋ̀.
По в҃-мъ стїхосло́вїи сѣда́льны, мч҃нчны, гла́съ є҃:
Гдⷭ҇и, ча́шѣ страсте́й твои́хъ стрⷭ҇тоте́рпцы твоѝ поревнова́вше, ѡ҆ста́виша жите́йскꙋю красотꙋ̀, и҆ бы́ша а҆́гг҃лѡмъ соприча̑стницы: тѣ́хъ мольба́ми пода́ждь дꙋша́мъ на́шымъ ми́ръ хрⷭ҇тѐ бж҃е, и҆ ве́лїю млⷭ҇ть.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Ст҃ы́хъ мч҃нкъ и҆справле́нїємъ нбⷭ҇ныѧ си̑лы преꙋдиви́шасѧ, ка́кѡ въ тѣ́лѣ ме́ртвеннѣмъ подви́гшесѧ до́брѣ, безпло́тнаго врага̀ си́лою крⷭ҇тною побѣди́ша неви́димѡ: и҆ мо́лѧтсѧ гдⷭ҇еви, поми́ловатисѧ дꙋша́мъ на́шымъ.
Сті́хъ: Бл҃же́ни, ꙗ҆̀же и҆збра́лъ и҆ прїѧ́лъ є҆сѝ гдⷭ҇и, и҆ па́мѧть и҆́хъ въ ро́дъ и҆ ро́дъ.
Та́же сѣда́ленъ, поко́инъ:
Поко́й сп҃се на́шъ съ пра́ведными рабы̑ твоѧ̑, и҆ тѣ́хъ вселѝ во дворы̀ твоѧ̑, ꙗ҆́коже пи́сано є҆́сть, презира́ѧ всѧ̑ согрѣшє́нїѧ и҆́хъ, ꙗ҆́кѡ бл҃гъ, вѡ́льнаѧ и҆ невѡ́льнаѧ, и҆ всѧ̑ ꙗ҆̀же въ вѣ́дѣнїи и҆ не въ вѣ́дѣнїи, чл҃вѣколю́бче.
Сла́ва, и҆ ны́нѣ, бг҃оро́диченъ: Ѿ дв҃ы возсїѧ́вый мі́рꙋ хрⷭ҇тѐ бж҃е, сы́ны свѣ́та то́ю показа́вый, поми́лꙋй на́съ.
Канѡ́нъ ст҃ы̑мъ мч҃нкѡмъ,и҆ ст҃и́телємъ, и҆ прпⷣбнымъ, и҆ ᲂу҆со́пшымъ. Творе́нїе і҆ѡ́сифово, [є҆го́же краестро́чїе: Твои̑мъ хрⷭ҇тѐ, рабѡ́мъ сїѧ̑ пѣ̑сни приношꙋ̀.] Гла́съ є҃:
Пѣ́снь а҃
І҆рмо́съ: Зе́млю, на ню́же не возсїѧ̀, ни ви́дѣ со́лнце когда̀: бе́зднꙋ, ю҆́же не ви́дѣ на́гꙋ широта̀ нбⷭ҇наѧ, і҆и҃ль про́йде невла́жнѡ гдⷭ҇и, и҆ вве́лъ є҆сѝ є҆го̀ въ го́рꙋ ст҃ы́ни твоеѧ̀, хва́лѧща и҆ пою́ща побѣ́днꙋю пѣ́снь.
Мч҃нченъ: Тѣлеса̀ предаю́ще некрѡ́ткимъ сꙋдїѧ́мъ, претерпѣ́сте нестерпи̑мыѧ ра̑ны до́блїи страда́льцы, ча́юще прїѧ́ти по́чєсти свы́ше: и҆ введѐ ва́съ хрⷭ҇то́съ въ вѣ̑чныѧ ѻ҆би́тєли, ра́дꙋющихсѧ и҆ пою́щихъ побѣ́днꙋю пѣ́снь,
Ст҃и́телємъ: Прпⷣбнїи и҆ пра́веднїи, и҆ ст҃и́телїе, бл҃госла́внїи соверши́вше повелѣ̑нїѧ бж҃їѧ, ᲂу҆пасо́ша лю́ди, и҆ до́брѣ наста́виша къ водѣ̀ ра́зꙋма: и҆ пото́ки сла́дости досто́йнѡ воспрїѧ́ша, и҆сточа́юще бл҃года́тїю и҆сцѣле́нїй рѣ́ки.
Напра́ви мѧ̀ гдⷭ҇и, къ приста́нищємъ живота̀, мл҃твами прⷪ҇рѡ́къ пресла́вныхъ, премꙋ́дрыхъ первост҃и́телей, и҆ сщ҃е́нныхъ же́нъ пострада́вшихъ крѣ́пкѡ, и҆ посто́мъ врага̀ попра́вшихъ, мꙋ́жескимъ ᲂу҆мо́мъ, бж҃е́ственною тебѐ бл҃года́тїю ꙗ҆́вльшагѡсѧ на землѝ.
Сла́ва, поко́инъ: Тебѐ мо́лимъ бл҃гопремѣ́ннаго бг҃а: ᲂу҆поко́й въ нѣ́дрѣхъ а҆враа́мовыхъ рабы̑ твоѧ̑ хрⷭ҇тѐ, ꙗ҆̀же къ тебѣ̀ преста́вилъ є҆сѝ ѿ жите́йскагѡ мѧте́жа, и҆ сподо́би и҆́хъ свѣ́та вѣ́чнагѡ, тѣ́хъ согрѣшє́нїѧ презира́ѧ ꙗ҆́кѡ бл҃гъ.
И҆ ны́нѣ: Ра́дꙋйсѧ, тебѣ̀ зове́мъ, ро́ждшей ра́дость всепѣ́таѧ: просвѣтѝ на́шѧ ᲂу҆мы̀ и҆ дꙋ́шы, и҆ къ стезѧ́мъ ра́зꙋма всѣ́хъ напра́ви, и҆ прегрѣше́нїй всѣ̑мъ ѡ҆чище́нїе да́ти молѝ є҆ди́на бг҃оневѣ́сто, сн҃а твоего̀ и҆ бг҃а.
И҆́нъ канѡ́нъ ᲂу҆со́пшымъ, пое́мый на рѧдꙋ̀, и҆дѣ́же нѣ́сть мине́и, [є҆го́же краегране́сїе: Ѳеофа́новъ пѧ́тый над̾ ме́ртвыми канѡ́нъ.] Гла́съ є҃.
Пѣ́снь а҃
І҆рмо́съ: Сп҃си́телю бг҃ꙋ, въ мо́ри лю́ди немо́крыми нога́ми наста́вльшемꙋ, и҆ фараѡ́на со всево́инствомъ пото́пльшемꙋ, томꙋ̀ є҆ди́номꙋ пои́мъ, ꙗ҆́кѡ просла́висѧ.
Припѣ́въ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Бж҃е́ственною любо́вїю стрⷭ҇тоте́рпцы хрⷭ҇тѡ́вы мꙋчи́телей горды́ню попра́ша: преста́влєннымъ же вѣ́рою млⷭ҇тивное про́сѧтъ ѡ҆ставле́нїе и҆ поко́й.
Припѣ́въ: Оу҆поко́й гдⷭ҇и дꙋ́шы ра̑бъ твои́хъ.
Во ст҃ы́хъ селе́нїихъ, во дво́рѣхъ твои́хъ хрⷭ҇тѐ, преста́влєнныѧ вселѝ! и҆́же до́лгъ за ни́хъ пролїѧ́вый кро́вь твою̀ влⷣко, пречⷭ҇тнѣ́йшꙋю.
Сла́ва: Премꙋ́дрость бж҃їѧ, и҆́же и҆звѣ́стно начерта́нїе всѐ носѧ́й роди́телево: и҆̀хже прїѧ́тъ ще́дре, са́мъ ᲂу҆поко́й, подава́ѧ и҆̀мъ присносꙋ́щное бл҃же́нство.
И҆ ны́нѣ: Свѣтоно́снаѧ сѣ́нь, златови́дный ковче́гъ, бж҃е́ственное сло́во ѡ҆бдержа́щи воплоще́нное на́съ ра́ди, и҆ разори́вшее сме́ртнꙋю си́лꙋ, ꙗ҆ви́ласѧ є҆сѝ всенепоро́чнаѧ.
Пѣ́снь г҃
І҆рмо́съ: Дви́жимое се́рдце моѐ гдⷭ҇и, волна́ми жите́йскими, ᲂу҆твердѝ, въ приста́нище ти́хое наставлѧ́ѧ ꙗ҆́кѡ бг҃ъ.
Па́лицами бїе́мо не пощадѣ́сте тѣ́ло, и҆ мечѝ сѣко́мо всехва́льнїи ѻ҆рꙋ́жницы, ᲂу҆крѣплѧ́еми наде́ждею мч҃нцы вѣ́чныхъ красо́тъ.
Ст҃и́тельства ѻ҆де́ждꙋ просвѣти́сте, ви́ды добродѣ́тельными ᲂу҆па́сше хрⷭ҇то́во ста́до на па́житехъ живо́тныхъ.
Пло́ть ᲂу҆мерщвлѧ́юще воздержа́нїемъ прпⷣбнїи, жи́зни бж҃е́ственнѣй причасти́шасѧ: тѣ́хъ хрⷭ҇тѐ сщ҃е́нными мл҃твами ѿ бѣ́дъ и҆зба́ви на́съ.
Сла́ва: Оу҆со́пшымъ та́мошнїй поко́й чл҃вѣколю́бче пода́ждь, ꙗ҆̀же содѣ́ѧша на землѝ, до́лги ѿпꙋща́ѧ ꙗ҆́кѡ бл҃гъ.
И҆ ны́нѣ: Бл҃гослове́ннꙋю въ жена́хъ тѧ̀ ꙗ҆́кѡ ви́дѣ, сосло́вїе же́нское пострада̀, и҆ твоемꙋ̀ сн҃ꙋ, дв҃о мт҃и, приведе́сѧ.
И҆́нъ
І҆рмо́съ: Оу҆твердѝ ны̀ бж҃е сп҃се, твое́ю си́лою, и҆ воздви́гни ро́гъ твоеѧ̀ цр҃кве, правовѣ́рнѡ хва́лѧщихъ тѧ̀.
Мꙋ́жески подви́гшесѧ страда́льцы, мꙋчи́тельскимъ стремле́нїємъ проти́вꙋ ста́ша, и҆ мо́лѧтсѧ ѡ҆ ᲂу҆со́пшихъ хрⷭ҇тꙋ̀.
Зако́ны твои́ми воспита́вшихсѧ, преста́вльшихсѧ пребл҃гі́й, въ свѣ́тлыхъ твои́хъ селе́нїихъ прїе́мь, ᲂу҆поко́й.
Сла́ва: Млⷭ҇тивый є҆ди́не бж҃е, ꙗ҆̀же и҆збра́лъ є҆сѝ, сподо́би ст҃ы́хъ свѣ́тлостей, презира́ѧ тѣ́хъ согрѣшє́нїѧ.
И҆ ны́нѣ: Пое́мъ твоѐ ржⷭ҇тво̀ чⷭ҇таѧ, и҆́мже пе́рвагѡ ѡ҆сꙋжде́нїѧ и҆ клѧ́твы и҆зба́вихомсѧ, и҆ ѿ сме́рти свободи́хомсѧ.
Пѣ́снь д҃
І҆рмо́съ: Оу҆слы́шахъ гдⷭ҇и слꙋ́хъ тво́й, и҆ ᲂу҆боѧ́хсѧ, разꙋмѣ́хъ смотре́нїе твоѐ, и҆ просла́вихъ тѧ̀ є҆ди́не чл҃вѣколю́бче.
Си́лою твое́ю гдⷭ҇и, стрⷭ҇тоте́рпцы вра́жїю си́лꙋ попра́ша, и҆ крѣ́пость бы́ша вѣ̑рнымъ, и҆ вели́кое ᲂу҆твержде́нїе.
Прпⷣбнїи всѝ ра́достїю ра́дꙋютсѧ, и҆ ѡ҆дѣва́ютсѧ сщ҃е́нницы бж҃е́ственнїи въ пра́вдꙋ, ꙗ҆́коже въ ри́зꙋ.
Воспои́мъ всѝ бг҃оглагѡ́ливыѧ бж҃їѧ прⷪ҇ро́ки, и҆ почти́мъ же́нъ сосло́вїе, ꙗ҆̀же до́брѣ тече́нїе сконча́вшыѧ.
Сла́ва: Къ приста́нищꙋ твоегѡ̀ црⷭ҇твїѧ влⷣко, ᲂу҆стреми́въ, ᲂу҆поко́й, и҆̀хже преста́вилъ є҆сѝ ѿ мѧте́жа и҆ бꙋ́ри настоѧ́щагѡ житїѧ̀.
И҆ ны́нѣ: Безлѣ́тный бы́сть ны́нѣ под̾ лѣ́томъ и҆з̾ тебѐ дв҃о: того̀ молѝ разрꙋши́ти всѧ̑ дꙋшѝ моеѧ̀ лѣ̑тнаѧ прегрѣшє́нїѧ.
И҆́нъ
І҆рмо́съ: Оу҆слы́шахъ гдⷭ҇и, и҆з̾ гро́ба твоѐ воста́нїе, и҆ просла́вихъ твою̀ непобѣди́мꙋю си́лꙋ.
Соприсносꙋ́щна тѧ̀ ѻ҆ц҃ꙋ̀ и҆сповѣ́давше бл҃гоче́стнѡ мч҃нцы хрⷭ҇тѐ, ᲂу҆бїе́ни бы́ша, и҆ вопїю́тъ тѝ: и҆зба́ви и҆̀хже прїѧ́лъ є҆сѝ рабы̑ твоѧ̑.
И҆́же въ мертвецѣ́хъ бы́вый є҆ди́нъ свобо́дь мертве́цъ хрⷭ҇тѐ, и҆ мертвецє́мъ жи́знь вѣ́чнꙋю да́рꙋѧ, поко́й да́ждь ны́нѣ преста́влєнымъ рабѡ́мъ твои̑мъ.
Сла́ва: Прише́дый во є҆́же сп҃стѝ заблꙋ́ждшыѧ хрⷭ҇тѐ, ра́йскагѡ сподо́би вселе́нїѧ, ꙗ҆̀же преста́вилъ є҆сѝ въ вѣ́рѣ, ѡ҆правда́вый бл҃года́тїю.
И҆ ны́нѣ: Ѡ҆сѣни́ тѧ вы́шнѧгѡ ѻ҆трокови́це си́ла, въ тебѣ̀ ра́й содѣ́ла живо́тный, дре́во и҆мꙋ́щїй посредѣ̀, хода́таѧ и҆ гдⷭ҇а.
Пѣ́снь є҃
І҆рмо́съ: Ѻ҆каѧ́ннꙋю дꙋ́шꙋ мою̀, нощеборю́щꙋюсѧ со тьмо́ю страсте́й, предвари́въ ᲂу҆ще́дри, и҆ возсїѧ́й мы́сленное сл҃нце днесвѣ́тлыѧ ѕвѣзды̀ во мнѣ̀, во є҆́же раздѣли́ти но́щь ѿ свѣ́та.
И҆сцѣле́нїе недꙋ́гꙋющымъ и҆сточа́ютъ кѡ́сти мч҃нкъ: не сокрꙋши́вшесѧ бо ѕло́бою, и҆ на̑ша ѡ҆бновлѧ́ютъ сокрꙋшє́нїѧ: всѧ̑ же кѡ́сти ѕлоче́стїѧ ꙗ҆́кѡ пра́хъ и҆стни́ша.
Зако́ны твоѧ̑ соблюда́юще ст҃и́телїе ᲂу҆пасо́ша лю́ди, и҆ наста́виша ще́дре, къ животꙋ̀ бꙋ́дꙋщемꙋ: прпⷣбнїи же ᲂу҆мертви́ша страсте́й мꙋчи́тельство соверше́ннымъ ᲂу҆мо́мъ.
Да почтꙋ́тсѧ прⷪ҇ро́цы, и҆ съ ни́ми всѝ пра́вєдницы вѣ́рою, и҆ да похва́лѧтсѧ прпⷣбнѡ пожи́вшїи, и҆ мꙋ́ками просвѣти́вшїисѧ на землѝ бж҃е́ствєнныѧ жєны̀, ꙗ҆́кѡ рабы̑ хрⷭ҇тѡ́вы.
Сла́ва, поко́инъ: Ꙗ҆̀же ѿ землѝ прїѧ́тъ, въ нбⷭ҇ныхъ ᲂу҆чинѝ селе́нїихъ вѣ̑рныѧ рабы̑ твоѧ̑, тѣ́хъ презира́ѧ прегрѣшє́нїѧ, за премно́гꙋю бл҃гость хрⷭ҇тѐ, воплоще́йсѧ на́съ ра́ди земны́хъ.
И҆ ны́нѣ, бг҃оро́диченъ: Пое́мъ тѧ̀ дв҃о, є҆ѧ́же ра́ди ꙗ҆ви́сѧ бг҃ъ сꙋ́щымъ на землѝ, человѣ́къ бы́въ, вопїю́ще: ра́дꙋйсѧ, землѐ бл҃гоплодови́таѧ, плодоносѧ́щаѧ кла́съ та́йны, пита́ющъ всѧ́кое дыха́нїе.
И҆́нъ
І҆рмо́съ: Оу҆́тренююще вопїе́мъ тѝ гдⷭ҇и, сп҃си́ ны, ты́ бо є҆сѝ бг҃ъ на́шъ, ра́звѣ бо тебѐ и҆но́гѡ не зна́емъ.
Мч҃нкъпрїе́мъ гдⷭ҇и, молє́нїѧ, дꙋ́шы, ꙗ҆̀же преста́вилъ є҆сѝ, со и҆збра́нными тѝ причтѝ.
Предре́клъ є҆сѝ, не ᲂу҆зрѣ́ти сме́рти вѣ́рꙋющымъ въ тѧ̀: тѣ́мже влⷣко ᲂу҆со́пшыѧ ᲂу҆поко́й.
Сла́ва: Красоты̀ до́мꙋ твоегѡ̀ гдⷭ҇и, твоѧ̑ рабы̑ ᲂу҆лꙋчи́ти сподо́би, и҆ сла́дкагѡ прича́стїѧ.
И҆ ны́нѣ: Сло́во, є҆́же ѻ҆ц҃ꙋ̀ соприсносꙋ́щное, ѿ дв҃ы вопло́щьсѧ, ᲂу҆мертвѝ сме́ртїю сме́рть.
Пѣ́снь ѕ҃
І҆рмо́съ: Ꙗ҆́коже прⷪ҇ро́ка ѿ ѕвѣ́рѧ и҆зба́вилъ є҆сѝ гдⷭ҇и, и҆ менѐ и҆з̾ глꙋбины̀ несодержи́мыхъ страсте́й возведѝ, молю́сѧ: да приложꙋ̀ призрѣ́ти мѝ къ хра́мꙋ ст҃о́мꙋ твоемꙋ̀.
Тѣлеса̀ преда́вше на ра̑ны бж҃е́ственнїи мч҃нцы, мꙋчи́телей рꙋка́мъ, веселѧ́хꙋсѧ дꙋше́ю: бж҃е́ственное бо зрѧ́хꙋ вои́стиннꙋ, присносꙋ́щное ра́дованїе и҆ бж҃е́ствєннаѧ воздаѧ̑нїѧ.
Сла́ва премꙋ́дрымъ ст҃и́телємъ и҆ прпⷣбнымъ ты̀ є҆сѝ хрⷭ҇тѐ: мл҃твами и҆́хъ твоѧ̑ лю́ди ᲂу҆ще́дри, и҆̀хже свое́ю кро́вїю стѧжа́лъ є҆сѝ, ꙗ҆́кѡ чл҃вѣколю́бецъ.
Ѿ тебѐ гдⷭ҇и, просвѣща́ющесѧ ᲂу҆мо́мъ прⷪ҇ро́цы, проѧвлѧ́ютъ ꙗ҆́снѡ да̑льнѧѧ ꙗ҆́коже бли́зъ: жєны́ же си́лою твое́ю держа́вꙋ вра́жїю разрꙋши́ша, страда́нїемъ и҆ посто́мъ.
Сла́ва: Преста́влєныѧ ѿ на́съ вѣ̑рныѧ рабы̑ твоѧ̑, ликѡ́мъ и҆збра́нныхъ сопричта́въ бл҃же, ᲂу҆поко́й гдⷭ҇и, всѧ̑ тѣ́хъ согрѣшє́нїѧ презира́ѧ за млⷭ҇рдїе.
Бг҃оро́диченъ: Созда́вый въ нача́тцѣ є҆́ѵꙋ гдⷭ҇и, дв҃ы въ ложесна̀ вше́дъ, на́ше содѣ́ловаеши ѡ҆бновле́нїе въ ра́бїй ѡ҆́бразъ ѡ҆бо́лксѧ, и҆́же влⷣка всѧ́ческихъ.
И҆́нъ
І҆рмо́съ: Ѡ҆бы́де мѧ̀ бе́здна, гро́бъ мнѣ̀ ки́тъ бы́сть: а҆́зъ же возопи́хъ къ тебѣ̀ чл҃вѣколю́бцꙋ, и҆ сп҃се́ мѧ десни́ца твоѧ̀ гдⷭ҇и.
Во́инство мч҃нкъ твои́хъ, вы̑шнимъ си́ламъ подо́бѧщесѧ, хрⷭ҇тѐ, мо́лѧтъ тѧ̀, пода́ждь чл҃вѣколю́бче, преста́влєнымъ є҆́же ѿ тебѐ наслажде́нїе.
Въ мѣ́стѣхъ прохлажде́нїѧ, въ мѣ́стѣхъ ст҃ы́хъ свѣ́тлости, въ мѣ́стѣхъ ѡ҆слабле́нїѧ хрⷭ҇тѐ, ꙗ҆́кѡ чл҃вѣколю́бецъ, и҆̀хже прїѧ́лъ є҆сѝ, ᲂу҆чинѝ рабы̑ твоѧ̑.
Сла́ва: Ѡ҆чи́сти рабы̑ твоѧ̑, и҆ тѣ̑мъ согрѣше́нїй проще́нїе пода́ждь чл҃вѣколю́бче, и҆ жи́зни сподо́би нетлѣ́ннѣй, и҆ бл҃же́нномꙋ наслѣ́дїю.
Бг҃оро́диченъ: Зача́тїѧ безсѣ́меннагѡ твоегѡ̀, кто̀ сло́вомъ и҆зрещѝ мо́жетъ чꙋдесѐ, всенепоро́чнаѧ: бг҃а во родила̀ є҆сѝ, за млⷭ҇рдїе къ на́мъ прише́дша.
Пѣ́снь з҃
І҆рмо́съ: Ѻ҆гнѧ̀ гаси́лище ѻ҆трокѡ́въ мл҃тва, ѡ҆роша́ющаѧ пе́щь, проповѣ́дница чꙋдесѐ, не ѡ҆палѧ́ющи, нижѐ сожига́ющи пѣсносло́вцы бг҃а ѻ҆тє́цъ на́шихъ.
Вы̀ разжиза́еми лю́тыхъ мꙋче́нїй ѻ҆гне́мъ, любле́нїе теплѣ́йшее мч҃нцы сла́внїи показа́сте ко гдⷭ҇ꙋ, прохлажда́юще ва́съ по́мысломъ бл҃гочести́вымъ.
Премꙋ́дростїю дх҃а ᲂу҆краси́вшесѧ премꙋ́дрїи, и҆ свѣ́тлѡ пожи́сте, сщ҃еннодѣ́йствꙋюще бл҃года́ти є҆ѵⷢ҇лїа, и҆ ꙗ҆́кѡ бж҃їѧ слꙋжи́тели похвалѧ́емъ ва́съ.
Вы̀ ᲂу҆мертви́вше пло́ть болѣ́зньми мно́гими, жи́зни сподо́бистесѧ бꙋ́дꙋщїѧ прпⷣбнїи, молѧ́щесѧ сїю̀ полꙋчи́ти на́мъ ᲂу҆мерщвлє́нымъ страсте́й приложе́ньми.
Бл҃же́нный ли́къ бж҃їихъ прⷪ҇рѡ́къ, и҆ же́нъ собо́ръ, подви́гшыѧсѧ посто́мъ, и҆ страда́нїемъ низложи́вшыѧ врага̀, да похва́лѧтсѧ вѣ́рнѡ.
Сла́ва: Мє́ртвымъ прїѡбщи́всѧ всѣ́хъ жи́знь сло́ве, ны́нѣ ѡ҆ста́вльшихъ житїѧ̀ мѧте́жъ, ко приста́нищꙋ твоемꙋ̀ бж҃е́ственномꙋ ᲂу҆пра́ви, согрѣшє́нїѧ и҆́хъ презира́ѧ бл҃же.
И҆ ны́нѣ: И҆̀же бцⷣꙋ тѧ̀ мꙋ́дрствꙋющїи ра́зꙋмомъ пра́вымъ, ѻ҆гнѧ̀ вѣ́чнагѡ и҆ тьмы̀ да и҆зба́вимсѧ хода́тайствомъ твои́мъ влⷣчце, и҆ неви́димыхъ вра̑гъ борю́щихъ на́съ.
И҆́нъ
І҆рмо́съ: Въ пещѝ ѻ҆́гненнѣй пѣсносло́вцы сп҃сы́й ѻ҆́троки, бл҃гослове́нъ бг҃ъ ѻ҆тє́цъ на́шихъ.
Ны́нѣ непристꙋ́пнагѡ свѣ́та насы́титисѧ, пода́ждь сп҃се, преста́влєнымъ, мольба́ми стрⷭ҇тоте́рпєцъ твои́хъ.
Въ цр҃кви пе́рвенєцъ хрⷭ҇тѐ, въ вѣ́рѣ сконча́вшихсѧ, ще́дре, сопричтѝ.
Сла́ва: Оу҆кра́шены ѻ҆де́ждами нетлѣ́нїѧ твоѧ̑ рабы̑, преста́влєныѧ къ тебѣ̀ сп҃се, ᲂу҆поко́й.
И҆ ны́нѣ: То́къ сме́ртнагѡ сꙋщества̀ ѿсѣкла̀ є҆сѝ пречⷭ҇таѧ, жи́знь без̾ сѣ́мене заче́нши, всенепоро́чнаѧ.
Пѣ́снь и҃
І҆рмо́съ: А҆́гг҃лѡвъ со́нмъ, человѣ́кѡвъ собо́ръ, цр҃ѧ̀ и҆ зижди́телѧ всѣ́хъ, сщ҃е́нницы по́йте, бл҃гослови́те леѵі́ти, лю́дїе превозноси́те во всѧ̑ вѣ́ки.
Преплы́вше мꙋче́нїй пꙋчи́нꙋ ѡ҆кормле́нїемъ сло́ва, страда́льцы крове́й тече́нїемъ погрꙋзи́сте всѧ̑ полкѝ льсти́вагѡ, и҆ живетѐ во вѣ́ки.
Премꙋ́дрїи бы́вше сщ҃еннодѣ́лателїе, сщ҃е́ннѡ на водѣ̀ правосла́вїѧ ва́мъ ввѣ́ренное ста́до препита́сте: вои́стиннꙋ сла́дости кра́сныхъ пото́кѡвъ наслажда́етесѧ во вѣ́ки.
Свѣти̑ла прпⷣбнїи вѣ̑рнымъ ꙗ҆ви́стесѧ, ꙗ҆́кѡ соверши́вше дѣла̀ свѣ́та, и҆ къ бж҃е́ственнѣй свѣ́тлости преста́вистесѧ: тьмы̀ на́съ свободи́ти моли́тесѧ влⷣцѣ.
Весели́сѧ сосло́вїе же́нское, по́честей и҆сполне́нїе всѧ́кихъ прїе́мшее ра́нами, и҆ ли́къ ра́дꙋйсѧ прⷪ҇ро́ческїй, и҆ пра́ведныхъ, ᲂу҆годи́вшихъ хрⷭ҇тꙋ̀ во вѣ́ки.
Сла́ва: Ѻ҆рꙋ́жїе ѡ҆браща́ющеесѧ ны́нѣ, да́ждь влⷣко невозбра́ннѡ проитѝ, преста́влєнымъ ѿ житїѧ̀ рабѡ́мъ твои̑мъ: внꙋ́трь раѧ̀ тѣ́хъ вселѧ́ѧ, ꙗ҆́кѡ є҆ди́нъ млⷭ҇тивъ.
Бг҃оро́диченъ: Ꙗ҆́кѡ врата̀ вводѧ̑щаѧ къ бж҃е́ственномꙋ вхо́дꙋ, ꙗ҆́кѡ добровосхо́днꙋю лѣ́ствицꙋ бж҃їю, ꙗ҆́кѡ спаса́ющымсѧ незаблꙋ́днꙋю наста́вницꙋ, ѡ҆бра́дованнꙋю воспои́мъ дв҃ꙋ мр҃і́ю.
И҆́нъ
І҆рмо́съ: И҆з̾ ѻ҆ц҃а̀ пре́жде вѣ̑къ рожде́ннаго сн҃а и҆ бг҃а, и҆ въ послѣ̑днѧѧ лѣ̑та воплоще́ннаго ѿ дв҃ы мт҃ре, сщ҃е́нницы по́йте, лю́дїе превозноси́те во всѧ̑ вѣ́ки.
И҆́же ст҃ы́хъ мч҃нкъ по́двиги прїе́мый, и҆ тѣ́хъ ра́ди ᲂу҆покоѧ́ѧй въ вѣ́рѣ твое́й ᲂу҆со́пшыѧ, тебѐ сп҃се пое́мъ, и҆ превозно́симъ во всѧ̑ вѣ́ки.
Премі́рныѧ твоеѧ̀ сла́вы сїѧ́нїемъ ѡ҆зарѧ́тисѧ, ꙗ҆̀же ѿ на́съ преста́влєныѧ сподо́би, ꙗ҆́кѡ бл҃гоꙋтро́бенъ, тебѐ сп҃се пою́щыѧ, и҆ превозносѧ́щыѧ во всѧ̑ вѣ́ки.
Сла́ва: Съ ли́ки ст҃ы́хъ, и҆̀хже преста́вилъ є҆сѝ, ᲂу҆чинѝ, и҆ а҆враа́мꙋ, въ нѣ́дрѣхъ съ ла́заремъ причтѝ тебѐ сп҃се пою́щихъ, и҆ превозносѧ́щихъ во всѧ̑ вѣ́ки.
Бг҃оро́диченъ: Оу҆кра́шена добро́тою чистоты̀, дв҃о мт҃и, добротво́рнагѡ бл҃голѣ́пїѧ жили́ще бы́вши: тѣ́мже тѧ̀ пое́мъ, и҆ превозно́симъ чⷭ҇тꙋю во всѧ̑ вѣ́ки.
Та́же, пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а:
Пѣ́снь ѳ҃
І҆рмо́съ: Ꙗ҆́кѡ сотворѝ тебѣ̀ вели̑чїѧ си́льный, дв҃ꙋ ꙗ҆́вль тѧ̀ чи́стꙋ по ржⷭ҇твѣ̀, ꙗ҆́кѡ ро́ждшꙋю без̾ сѣ́мене своего̀ творца̀: тѣ́мъ тѧ̀ бцⷣꙋ велича́емъ.
Сщ҃еннодѣ́йственнїи па́стырїе прⷪ҇рѡ́къ ст҃ы́хъ ли́къ, пра́ведныхъ неизче́тное мно́жество: мч҃нкѡвъ собо́ръ, сщ҃е́нными пѣ́сньми да ᲂу҆бл҃жа́ютсѧ: молѧ́щесѧ сп҃сти́сѧ дꙋша́мъ на́шымъ.
Ꙗ҆́кѡ чꙋ́дный по́стничествовавъ прпⷣбныхъ собо́ръ премꙋ́дреннѡ, чꙋде́съ показа́ньми мно́гими ны́нѣ ᲂу҆диви́сѧ: тѣ́хъ мольба́ми ди́вный гдⷭ҇и, ᲂу҆дивѝ на всѣ́хъ млⷭ҇ти твоѧ̑.
Со сщ҃енномч҃нки сконча́вшими тече́нїе до́брѣ, же́нъ безчи́сленное мно́жество пострада́вшее и҆ пости́вшеесѧ, любо́вїю да ᲂу҆бл҃жа́етсѧ вѣ́рнѡ, со а҆́гг҃льскими ли́ки пребыва́ющее.
Сла́ва: Ст҃ы́хъ всѣ́хъ мно́жество мо́литъ тѧ̀ сло́ве: ᲂу҆поко́й мно́жєства ꙗ҆̀же въ вѣ́рѣ ѿ землѝ преста́влєныѧ, за мно́жество млⷭ҇ти, ꙗ҆̀же содѣ̑ѧнаѧ и҆́ми въ житїѝ, презира́ѧ согрѣшє́нїѧ.
Бг҃оро́диченъ: Оу҆мовре́днѡ грѣхѝ содѣ́ѧхъ мнѡ́ги дв҃о, мꙋче́нїѧ ѡ҆жида́ю про́чее, ѿ негѡ́же мѧ̀ и҆зба́ви, несꙋмнѣ́ннымъ се́рдцемъ къ тебѣ̀ приходѧ́щаго, и҆ бж҃е́ственный покро́въ тво́й призыва́юща.
И҆́нъ
І҆рмо́съ: Тѧ̀ па́че ᲂу҆ма̀ и҆ словесѐ мт҃рь бж҃їю, въ лѣ́то безлѣ́тнаго неизрече́ннѡ ро́ждшꙋю, вѣ́рнїи є҆диномꙋ́дреннѡ велича́емъ.
Страда́нїй сщ҃е́нныхъ мч҃нцы, воздаѧ̑нїѧ прїе́мше, дарова́ти тѧ̀ ны́нѣ мо́лѧтъ, вѣ́рою преста́влєнымъ сп҃се, ѡ҆слабле́нїе.
Оу҆мерщвле́нїе претерпѣ́лъ є҆сѝ є҆ди́не сп҃се безсме́ртне, и҆́же воскрⷭ҇нїе мє́ртвымъ подаѧ̀ ꙗ҆́кѡ бл҃гоꙋтро́бенъ, и҆ безсме́ртїѧ свѣ́тлость.
Сла́ва: И҆спра́вилъ є҆сѝ на́съ па́дшихъ въ сме́рть, и҆ на живо́тъ вѣ́чный надѣ́ѧтисѧ наꙋчи́лъ є҆сѝ, є҆го́же ᲂу҆лꙋчи́ти твои̑мъ рабѡ́мъ сп҃се, да́рꙋй.
Бг҃оро́диченъ: Зако́на сѣ̑ни преидо́ша ржⷭ҇тво́мъ твои́мъ, и҆́стина возсїѧ̀, бл҃года́ть дарова́сѧ бцⷣе: тѣ́мже тѧ̀ велича́емъ.
Та́же, Досто́йно є҆́сть: И҆ покло́нъ. Посе́мъ є҆ктенїа̀, и҆ свѣти́ленъ, и҆ ѱалмы̀ ѻ҆бы̑чны.
На хвали́техъ стїхи̑ры мч҃нчны, гла́съ є҃:
Бл҃гослове́но во́инство нбⷭ҇нагѡ цр҃ѧ̀: а҆́ще бо и҆ земноро́дни бѣ́ша стрⷭ҇тоте́рпцы, но а҆́гг҃льскїй са́нъ тща́хꙋсѧ дости́гнꙋти, ѡ҆ тѣлесѣ́хъ неради́вше, и҆ страсте́й ра́ди безпло́тныхъ сподо́бишасѧ че́сти. тѣ́мже мл҃твами и҆́хъ гдⷭ҇и, сп҃сѝ дꙋ́шы на́шѧ.
Стрⷭ҇тоно́сцы твоѝ гдⷭ҇и, чинѡ́мъ а҆́гг҃льскимъ ᲂу҆подо́бльшесѧ, ꙗ҆́кѡ безпло́тнїи, мꙋ̑ки претерпѣ́ша, и҆ є҆диномы́сленно ᲂу҆пова́нїе и҆мꙋ́ще, ѡ҆бѣща́нныхъ бл҃гъ наслажде́нїе. мл҃твами и҆́хъ хрⷭ҇тѐ бж҃е, поми́лꙋй на́съ.
Ст҃і́и мч҃нцы, на землѝ подви́гшесѧ, мра́зъ претерпѣ́ша, и҆ ѻ҆гню̀ преда́шасѧ, вода̀ и҆́хъ прїѧ́тъ. тѣ́хъ є҆́сть гла́съ: проидо́хомъ сквозѣ̀ ѻ҆́гнь и҆ во́дꙋ, и҆ и҆зведѐ ны̀ въ поко́й. тѣ́хъ мл҃твами бж҃е, поми́лꙋй на́съ.
Въ мꙋ́кахъ сꙋ́ще ст҃і́и, ра́дꙋющесѧ вопїѧ́хꙋ: кꙋ́плѧ на́мъ сꙋ́ть сїѧ̑ ко влⷣцѣ. вмѣ́стѡ быва́ющихъ ра́нъ на тѣлесѣ́хъ, свѣ́тлое ѡ҆дѣѧ́нїе въ воскрⷭ҇нїе процвѣте́тъ на́мъ, за безче́стїе вѣнцы̀, за ᲂу҆́зы темни̑чныѧ ра́й: и҆ за є҆́же со ѕлодѣ́и ѡ҆сꙋжде́нїе, є҆́же со а҆́гг҃лы житїѐ. мл҃твами и҆́хъ гдⷭ҇и, сп҃сѝ дꙋ́шы на́шѧ.
Ты̀ созда́вый мѧ̀ гдⷭ҇и, и҆ положѝ на мнѣ̀ рꙋ́кꙋ твою̀, и҆ заповѣ́давъ мѝ ре́клъ є҆сѝ: въ зе́млю па́ки по́йдеши. наста́ви мѧ̀ на пра́вый пꙋ́ть тво́й, проща́ѧ мнѣ̀ прегрѣшє́нїѧ. ѡ҆сла́би мѝ, и҆ сп҃си́ мѧ, молю́сѧ, ꙗ҆́кѡ чл҃вѣколю́бецъ.
Сла́ва, и҆ ны́нѣ, бг҃оро́диченъ: Ѽле ѻ҆каѧ́ннаѧ дꙋшѐ! кі́й ѿвѣ́тъ и҆́маши рещѝ сꙋдїѝ во ѻ҆́нъ ча́съ, є҆гда̀ прⷭ҇то́ли поста́вѧтсѧ на сꙋдѣ̀, и҆ сꙋдїѧ̀ прїи́детъ ѿ нб҃съ, соше́дъ со тьма́ми а҆́гг҃льскими; є҆гда̀ сѧ́детъ на сꙋди́щи, прю̀ сотвори́ти съ рабы̑ непотре́бными, подо́бными мнѣ̀, что̀ ѿвѣща́ти и҆́маши; что́же принестѝ тогда̀; пои́стиннѣ ничто́же, ᲂу҆́мъ и҆ тѣ́ло ѡ҆скверни́вши твоѐ. тѣ́мже припадѝ къ дв҃ѣ, и҆ зовѝ непреста́ннѡ, пода́ти тебѣ̀ бога́тнѡ грѣхѡ́въ проще́нїе.
На стїхо́внѣ стїхи̑ры поко́йны, гла́съ є҃:
Подо́бенъ: Ра́дꙋйсѧ:
Свѣ́томъ лица̀ твоегѡ̀ хрⷭ҇тѐ, преста́влєныѧ ꙗ҆́кѡ ще́дръ просвѣтѝ. вселѝ ѧ҆̀ въ мѣ́сто ѕла́чно, при вода́хъ твоегѡ̀ чⷭ҇тагѡ и҆ бж҃е́ственнагѡ поко́ѧ, въ жела́емыхъ нѣ́дрѣхъ а҆враа́ма пра́ѻтца, и҆дѣ́же свѣ́тъ тво́й чи́стѣ сїѧ́етъ, и҆ пролива́ютсѧ и҆сто́чницы бл҃госты́ни: и҆дѣ́же ликꙋ́ютъ ꙗ҆́снѡ веселѧ́щесѧ пра́ведныхъ всѣ́хъ собо́ри ѡ҆ твое́й бл҃гости. съ ни́миже ᲂу҆чинѝ рабы̑ твоѧ̑, подаѧ̀ и҆̀мъ ве́лїю млⷭ҇ть.
Сті́хъ: Бл҃же́ни, ꙗ҆̀же и҆збра́лъ и҆ прїѧ́лъ є҆сѝ гдⷭ҇и.
Пѣ́ти всесоста́вными гла́сы, славосло́вити же твою̀ держа́вꙋ, бл҃говолѝ ще́дре, преста́вльшыѧсѧ ѿ привре́менныхъ къ тебѣ̀ влⷣцѣ всѣ́хъ и҆ бг҃ꙋ на́шемꙋ, подаѧ̀ красото́ю твое́ю ѡ҆свѣща́тисѧ, и҆ сла́дкагѡ и҆ кра́снагѡ прича́стїѧ твоегѡ̀, воспрїѧ́ти же и҆ наслажда́тисѧ чⷭ҇тѣ́йше: и҆дѣ́же ѻ҆́крестъ прⷭ҇то́ла твоегѡ̀ ликꙋ́ютъ а҆́гг҃ли, и҆ ст҃ы́хъ ли́цы ра́достнѡ ѡ҆бстоѧ́тъ. съ ни́миже твои̑мъ рабѡ́мъ поко́й пода́ждь, и҆ ве́лїю млⷭ҇ть.
Сті́хъ: Дꙋ́шы и҆́хъ во бл҃ги́хъ водворѧ́тсѧ.
И҆дѣ́же прⷪ҇ро́кѡвъ ли́къ, а҆пⷭ҇лѡвъ и҆ мч҃нкѡвъ чи́нове, и҆ всѝ и҆̀же ѿ вѣ́ка ѡ҆правди́вшїисѧ твое́ю сп҃си́тельною стра́стїю и҆ кро́вїю, є҆́юже и҆скꙋпи́лъ є҆сѝ плѣне́наго человѣ́ка, та́мѡ вѣ́рою ᲂу҆со́пшыѧ ᲂу҆поко́й, ꙗ҆́кѡ чл҃вѣколю́бецъ, проща́ѧй согрѣшє́нїѧ: є҆ди́нъ бо безгрѣ́шенъ на землѝ пожи́лъ є҆сѝ ст҃ъ вои́стиннꙋ, є҆ди́нъ во ᲂу҆ме́ршихъ свобо́дь. тѣ́мже твои̑мъ рабѡ́мъ поко́й пода́ждь, и҆ ве́лїю млⷭ҇ть.
Сла́ва, и҆ ны́нѣ, бг҃оро́диченъ: Зако́номъ грѣхо́внымъ на́съ порабоще́нныхъ свободи́ла є҆сѝ влⷣчце, въ ложесна́хъ законода́вца и҆ цр҃ѧ̀ хрⷭ҇та̀ заче́нши є҆ди́на дв҃о мт҃и, и҆́мже ѡ҆правда́емсѧ тꙋ́не, и҆ бл҃года́тїю: є҆го́же ны́нѣ молѝ, дꙋ́шы вѣ́дꙋщихъ тѧ̀ бг҃омт҃рь, написа́ти въ кни́зѣ живо́тнѣй, ꙗ҆́кѡ да хода́тайствомъ твои́мъ спа́сшесѧ всенепоро́чнаѧ, сн҃а твоегѡ̀ любе́зное и҆збавле́нїе полꙋ́чимъ, томꙋ̀ покланѧ́ющесѧ, подаю́щемꙋ мі́рови ве́лїю млⷭ҇ть.
Въ сꙋббѡ́тꙋ бл҃жє́нны, гла́съ є҃:
Разбо́йникъ на крⷭ҇тѣ̀ бг҃а тѧ̀ бы́ти вѣ́ровавъ, хрⷭ҇тѐ, и҆сповѣ́да тѧ̀ чи́стѣ ѿ се́рдца, помѧни́ мѧ гдⷭ҇и, вопїѧ̀, во црⷭ҇твїи твое́мъ.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Началоѕло́бнаго врага̀, ᲂу҆ме́рше мч҃нцы, погꙋби́сте, и҆ взыдо́сте къ вы̑шнимъ, вѣнча́вшесѧ бж҃е́ственными побѣ́дами, и҆ цр҃ю̀ всѣ́хъ бг҃ꙋ предста́сте.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
Сщ҃е́нства свѣ́томъ ст҃и́телїе просвѣща́еми просла́вишасѧ, и҆ прпⷣбныхъ мно́жество присносꙋ́щный полꙋчи́ша живо́тъ: тѣ́мже ᲂу҆бл҃жа́еми сꙋ́ть.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Съ ли́ки и҆збра́нныхъ на мѣ́стѣ влⷣко ѡ҆слабле́нїѧ, и҆̀хже преста́вилъ є҆сѝ, вселѝ сло́ве, презрѣ́въ хрⷭ҇тѐ, ꙗ҆̀же на землѝ тѣ́хъ согрѣшє́нїѧ.
Сла́ва: Ѽ трⷪ҇це чⷭ҇тна́ѧ! ст҃и́телей и҆ мч҃нкъ чⷭ҇тны́хъ по́двиги ᲂу҆моле́на бꙋ́ди: вѣ́рою ᲂу҆ме́ршихъ дꙋша́мъ сп҃се́нїе да́рꙋй, и҆ ве́лїю млⷭ҇ть.
И҆ ны́нѣ: Ꙗ҆́же невмѣсти́маго всѣ́ми, бг҃ора́дованнаѧ вмѣсти́ла є҆сѝ, и҆ ро́ждши па́че є҆стества̀ и҆ сло́ва, того̀ млⷭ҇тива бы́ти всѣ̑мъ влⷣчце ᲂу҆молѝ.
Коне́цъ пѧ́томꙋ гла́сꙋ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.