Глас 4-й. Суббота.
Въ пѧто́къ ве́чера,
нача́ло сꙋббѡ́тныѧ слꙋ́жбы, и҆ всѐ возслѣ́дованїе вече́рни и҆ ᲂу҆́трени, и҆ ѡ҆ се́мъ пи́санъ ᲂу҆ка́зъ въ а҃-мъ гла́сѣ.
На Гдⷭ҇и воззва́хъ, стїхи̑ры ст҃ы̑мъ мч҃нкѡмъ, и҆ прпⷣбнымъ. Гла́съ д҃.
Подо́бенъ: Да́лъ є҆сѝ зна́менїе:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Хрⷭ҇та̀ чл҃вѣколю́бца стрⷭ҇те́мъ поревнова́вше стрⷭ҇тоте́рпцы, тѣлеса̀ ᲂу҆́бѡ на ра̑ны преда́сте, и҆ гѡ́рькимъ мꙋ́камъ, тьма́мъ же болѣ́знемъ, ꙗ҆́кѡ предзрѧ́ще при́снѡ раѧ̀ бж҃е́ственное наслажде́нїе, пи́щꙋ же неиждива́емꙋю и҆ вѣ́чнꙋющее бл҃госла́вїе, є҆́же полꙋчи́вше, моли́тесѧ ѡ҆ воспѣва́ющихъ ва́съ.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
И҆ па́ки глаго́ли тꙋ́южде стїхи́рꙋ:
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.
Па́стырїе всесщ҃е́ннїи, нача́льнагѡ па́стырѧ сла́внїи подо́бницы бы́вше хрⷭ҇та̀ всѣ́хъ цр҃ѧ̀, дꙋ́шы ᲂу҆се́рднѡ ѡ҆ ѻ҆вца́хъ положи́сте, бѣды̑ лю̑тыѧ претерпѣ́сте, ꙗ҆́кѡ бори́ми ѿ волкѡ́въ тѧ́жкихъ, достобл҃же́ннїи, сп҃са́ете невре́днѡ бг҃оизбра́нное ста́до.
И҆́ны стїхи̑ры мч҃ничны. Гла́съ и҆ подо́бенъ то́йже.
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Же́ртвы ѡ҆дꙋшевлє́нныѧ, всесожжє́нїѧ словє́снаѧ, мч҃нцы гдⷭ҇ни, заколє́нїѧ совершє́ннаѧ бг҃ꙋ, бг҃а зна̑юща, и҆ бг҃омъ зна́єма ѻ҆вча́та, и҆́хже ѡ҆гра́да волкѡ́мъ невходи́ма: моли́тесѧ и҆ ѡ҆ на́съ, ᲂу҆пасє́ннымъ бы́ти съ ва́ми на водѣ̀ ᲂу҆покое́нїѧ.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Честна̀ сме́рть ст҃ы́хъ твои́хъ гдⷭ҇и: мече́мъ бо и҆ ѻ҆гне́мъ, и҆ дꙋше́ю сокрꙋше́нною пролїѧ́ша крѡ́ви своѧ̑, ᲂу҆пова́нїе и҆мꙋ́ще на тѧ̀, воспрїѧ́ти трꙋдѡ́въ мздꙋ̀, и҆ претерпѣ́вше прїѧ́ша ѿ тебѐ сп҃се, ве́лїю млⷭ҇ть.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ и҆ и҆́стина гдⷭ҇нѧ пребыва́етъ во вѣ́къ.
И҆мꙋ́ще дерзнове́нїе ко сп҃сꙋ ст҃і́и, моли́те непреста́ннѡ за ны̀ грѣ̑шныѧ, ѡ҆ставле́нїѧ прегрѣше́нїй просѧ́ще, и҆ дꙋша́мъ на́шымъ ве́лїѧ млⷭ҇ти.
Сла́ва, и҆ ны́нѣ, бг҃оро́диченъ: И҆́же тебѐ ра́ди бг҃оѻте́цъ прⷪ҇ро́къ дв҃дъ, пѣ́сненнѡ ѡ҆ тебѣ̀ провозгласѝ, вели̑чїѧ тебѣ̀ сотво́ршемꙋ: предста̀ цр҃и́ца ѡ҆деснꙋ́ю тебѐ. тѧ́ бо мт҃рь хода́таицꙋ живота̀ показа̀, без̾ ѻ҆ц҃а̀ и҆з̾ тебѐ вочл҃вѣ́читисѧ бл҃говоли́вый бг҃ъ, да сво́й па́ки ѡ҆бнови́тъ ѡ҆́бразъ, и҆стлѣ́вшїй страстьмѝ, и҆ заблꙋ́ждшее горохи́щное ѡ҆брѣ́тъ ѻ҆вча̀, на ра́мо воспрїи́мъ, ко ѻ҆ц҃ꙋ̀ принесе́тъ и҆ своемꙋ̀ хотѣ́нїю, съ нбⷭ҇ными совокꙋпи́тъ си́лами, и҆ сп҃се́тъ бцⷣе мі́ръ, хрⷭ҇то́съ и҆мѣ́ѧй ве́лїю и҆ бога́тꙋю млⷭ҇ть.
Та́же, Свѣ́те ти́хїй: Прокі́менъ днѐ.
На стїхо́внѣ стїхи̑ры, мч҃нчны. Гла́съ д҃:
Прославлѧ́ѧйсѧ въ па́мѧтехъ ст҃ы́хъ твои́хъ, хрⷭ҇тѐ бж҃е, и҆ ѿ ни́хъ ᲂу҆моле́нъ быва́ѧ, низпослѝ на́мъ ве́лїю млⷭ҇ть.
И҆́же ст҃ы́хъ мч҃нкъ прїе́мый терпѣ́нїе, и҆ ѿ на́съ прїимѝ пѣ́нїе чл҃вѣколю́бче, да́рꙋй на́мъ тѣ́хъ мл҃твами ве́лїю млⷭ҇ть.
Ме́ртвенъ: Со дх҃и првⷣныхъ сконча́вшихсѧ дꙋ́шы ра̑бъ твои́хъ сп҃се ᲂу҆поко́й, сохранѧ́ѧ и҆̀хъ во бл҃же́ннѣй жи́зни, ꙗ҆́же ᲂу҆ тебѐ чл҃вѣколю́бче.
Сла́ва, и҆ ны́нѣ, бг҃оро́диченъ: Свѣщѐ неꙋгаси́маѧ, прⷭ҇то́ле пра́ведный, пречⷭ҇таѧ влⷣчце, молѝ сп҃сти́сѧ дꙋша́мъ на́шымъ.
Та́же, Ны́нѣ ѿпꙋща́еши: Трист҃о́е. По Ѻ҆́ч҃е на́шъ: тропа́рь, и҆ ѿпꙋ́стъ.
Въ пѧто́къ на повече́рїи,
канѡ́нъ прест҃ѣ́й бцⷣѣ. Гла́съ д҃.
Пѣ́снь а҃
І҆рмо́съ: Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀, дꙋшѝ трича́стное потопѝ, молю́сѧ, да тебѣ̀ ꙗ҆́кѡ въ тѷмпа́нѣ во ᲂу҆мерщвле́нїи тѣлесѐ, побѣ́дное воспою̀ пѣ́нїе.
Ѿ ка́ла страсте́й, ѿ помышле́нїй треволне́нїѧ, и҆ ѿ стрѣ́лъ лꙋка́вагѡ, и҆ ѿ всѧ́кагѡ прило́га сопроти́внагѡ сп҃сѝ дꙋ́шꙋ мою̀ ѻ҆каѧ́ннꙋю, пречⷭ҇таѧ бг҃ороди́тельнице, и҆ ѻ҆гнѧ̀ вѣ́чнагѡ и҆схити́ мѧ.
Возведи́ мѧ̀ чⷭ҇таѧ, и҆з̾ глꙋбины̀ прегрѣше́нїй, и҆ наста́ви къ свѣ́тꙋ бж҃е́ственныхъ за́повѣдей сп҃са хрⷭ҇та̀ и҆ бг҃а: возсїѧ́й мѝ покаѧ́нїѧ сп҃си́тельнꙋю зарю̀, и҆ пода́ждь жи́знь вѣ́чнꙋю.
Сла́ва: Въ ти́нꙋ лꙋка́вꙋю впа́дсѧ ѕѡ́лъ мои́хъ, ᲂу҆давлѧ́юсѧ вельмѝ дѣлесы̀ лꙋка́выми, и҆ нѣ́сть постоѧ́нїѧ: влⷣчце дв҃о мт҃и, твое́ю си́лою возведи́ мѧ, и҆ ѻ҆гнѧ̀ и҆ мꙋ́ки и҆зба́ви мѧ̀.
И҆ ны́нѣ: Сме́рть и҆ тлю̀ потреби́ла є҆сѝ, бцⷣе всепѣ́таѧ, нетлѣ́нїѧ и҆сто́чникъ ро́ждши хрⷭ҇та̀, безсме́ртїемъ ᲂу҆краси́вша и҆ бл҃года́тїю человѣ́ческое є҆стество̀ пренепоро́чнаѧ.
Пѣ́снь г҃
І҆рмо́съ: Не мꙋ́дростїю и҆ си́лою и҆ бога́тствомъ хва́лимсѧ, но тобо́ю ѻ҆́ч҃ею ѵ҆поста́сною мꙋ́дростїю хрⷭ҇тѐ: нѣ́сть бо ст҃ъ, па́че тебѐ чл҃вѣколю́бче.
Ꙗ҆́вльшисѧ, чⷭ҇таѧ дв҃о, дꙋшѝ моеѧ̀ тьмꙋ̀ ѿимѝ, и҆ грѣхѡ́вныѧ плени̑цы расто́ргни, и҆ сп҃си́ мѧ, молю́сѧ, застꙋпле́нїемъ твои́мъ.
Коле́блющеесѧ прило́ги стра́стными се́рдце моѐ въ стра́хъ бж҃їй чистѣ́йшїй ᲂу҆твердѝ, дв҃о пренепоро́чнаѧ, бл҃гоꙋтро́бїемъ твои́мъ.
Сла́ва: Ѿча́ѧвсѧ по́мощи всѧ́кїѧ, къ тебѣ̀ пренепоро́чнаѧ, держа́внѣй храни́тельницѣ, и҆ покро́вꙋ притеко́хъ: не ѿри́ни ᲂу҆́бѡ менѐ ѿ бж҃е́ственнагѡ покро́ва твоегѡ̀.
И҆ ны́нѣ: И҆спещре́на рѧ́снами златы́ми ꙗ҆́кѡ цр҃и́ца, цр҃ѧ̀ и҆ бг҃а ѡ҆деснꙋ́ю ны́нѣ предстои́ши, влⷣчце, молѧ́щи ѡ҆ рабѣ́хъ твои́хъ.
Пѣ́снь д҃
І҆рмо́съ: Сѣдѧ́й въ сла́вѣ на прⷭ҇то́лѣ бж҃ества̀, во ѻ҆́блацѣ ле́гцѣ прїи́де і҆и҃съ пребж҃е́ственный, нетлѣ́нною дла́нїю, и҆ сп҃сѐ зовꙋ́щыѧ: сла́ва хрⷭ҇тѐ си́лѣ твое́й.
Оу҆ны́нїемъ ѡ҆держи́ма мѧ̀, и҆ страсте́й ѡ҆мраче́нїемъ всего̀ потемне́на, и҆ грѣхѡ́мъ порабоще́на, бг҃обл҃же́ннаѧ ѻ҆трокови́це свободѝ, и҆ присво́й твоемꙋ̀ сн҃ꙋ и҆ бг҃ꙋ на́шемꙋ.
Оу҆мерщвле́на мѧ̀ ѕло́бою льсти́вагѡ, пренепоро́чнаѧ, ꙗ҆́кѡ жи́знь ро́ждшаѧ ѡ҆живѝ: къ тебѣ́ бо прибѣго́хъ, и҆ погрꙋже́нна во глꙋбинѣ̀ паде́жей возведѝ, ꙗ҆́кѡ млⷭ҇тива всенепоро́чнаѧ.
Сла́ва: Во гро́бѣ безмѣ́рныхъ сласте́й мои́хъ низлежꙋ̀, ᲂу҆ны́нїемъ и҆ лѣ́ностїю ѡ҆держи́мь є҆́смь: но ро́ждшаѧ всѣ́хъ возставле́нїе, ѡ҆живи́ мѧ бл҃га́ѧ, и҆ сп҃сѝ.
И҆ ны́нѣ: Сщ҃е́ннꙋю тѧ̀ дре́вле прⷪ҇ро́къ го́рꙋ бж҃е́ственнꙋю наречѐ дв҃о чⷭ҇таѧ, добродѣ́тельми всю̀ ѡ҆сѣне́нꙋ, и҆з̾ неѧ́же сп҃си́тельное сло́во ꙗ҆ви́сѧ, въ созда́нїе и҆ просвѣще́нїе дꙋ́шъ на́шихъ.
Пѣ́снь є҃
І҆рмо́съ: Нечести́вїи не ᲂу҆́зрѧтъ сла́вы твоеѧ̀ хрⷭ҇тѐ, но мы́ тѧ̀ є҆диноро́дне, ѻ҆ч҃ескїѧ сла́вы сїѧ́нїе бж҃ества̀, ѿ но́щи ᲂу҆́тренююще, воспѣва́емъ тѧ̀ чл҃вѣколю́бче.
Да возвесели́тсѧ влⷣчце, дꙋша̀ моѧ̀ смире́ннаѧ, боѧ́тисѧ твоегѡ̀ сн҃а, и҆ твори́ти повелѣ̑нїѧ є҆гѡ̀ ѿ се́рдца, всенепоро́чнаѧ пречⷭ҇таѧ, мл҃твами твои́ми наста́ви.
Всѣ́мъ се́рдцемъ мои́мъ влⷣчце бл҃га́ѧ, и҆сповѣ́датисѧ и҆зба́вителю сподо́би дꙋ́шꙋ мою̀ стра́стнꙋю, ѿгонѧ́щи невѣ́дѣнїе се́рдца моегѡ̀, всенепоро́чнаѧ.
Сла́ва: Дꙋ́шꙋ мою̀ сохранѝ ꙗ҆́кѡ зѣ́ницꙋ ѻ҆́ка, под̾ кро́вомъ крилꙋ̀ твоє́ю бл҃га́ѧ пречⷭ҇таѧ, и҆ дꙋхѡ́въ ѿ лꙋка́выхъ томле́нїѧ и҆ мꙋче́нїѧ и҆зба́ви.
И҆ ны́нѣ: И҆збавлѧ́ющи ꙗ҆ви́сѧ пречⷭ҇таѧ, ѿ страсте́й наведе́нїѧ, и҆ бѣсѡ́въ лꙋка́выхъ, твоего̀ раба̀, стѧжа́вшаго тѧ̀ держа́вное застꙋпле́нїе, и҆ предста́тельницꙋ непосты́днꙋю.
Пѣ́снь ѕ҃
І҆рмо́съ: Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се цр҃ю̀ си́лъ.
Низложѝ и҆̀же при́снѡ борю́щыѧ мѧ̀ влⷣчце, и҆ ѻ҆́блакъ лꙋка́выхъ помышле́нїй разорѝ, сл҃нца првⷣнагѡ сꙋ́щи две́рь бг҃омт҃и.
Возсїѧ́й мѝ покаѧ́нїѧ зарю̀ влⷣчце, и҆ ѻ҆́блаки ѕлы́хъ помышле́нїй мои́хъ разрꙋшѝ лю́тыми прельще́нїи привлеко́ма же и҆ растлѣва́ема.
Сла́ва: Оу҆толѝ страсте́й мои́хъ свирѣ́пꙋю во́лнꙋ, и҆ бꙋ́рю ѕлы́хъ помышле́нїй потребѝ, тве́рдаѧ всѣ́хъ предста́тельнице, и҆ покро́ве, пренепоро́чнаѧ.
И҆ ны́нѣ: Оу҆ мно́жишасѧ па́че песка̀ морска́гѡ прегрѣшє́нїѧ дꙋшѝ моеѧ̀, и҆ ꙗ҆́кѡ бре́мѧ тѧ́жкое низлага́етъ мѧ̀: но ты̀ дв҃о, пре́жде конца̀ ᲂу҆ще́дривши сп҃си́ мѧ.
Та́же, Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ,гла́съ д҃:
Те́плое застꙋпле́нїе, є҆́же въ бѣда́хъ, и҆ помо́щницꙋ на́шꙋ, и҆ къ бг҃ꙋ премѣне́нїе, є҆́юже тлѝ и҆зба́вихомсѧ, бцⷣꙋ вѣ́рнїи ᲂу҆бл҃жа́емъ.
Пѣ́снь з҃
І҆рмо́съ: А҆враа́мстїи и҆ногда̀ въ вавѷлѡ́нѣ ѻ҆́троцы, пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е бл҃гослове́нъ є҆сѝ.
Тѧ̀ бцⷣе чⷭ҇таѧ, призыва́ю вѣ́рнѡ: смире́нное моѐ соблюдѝ се́рдце, и҆ и҆зба́ви мѧ̀ пла́мене мꙋче́нїѧ, и҆ тьмы̀ вѣ́чныѧ.
Раздерѝ дв҃о чⷭ҇таѧ, сн҃а твоегѡ̀ копїе́мъ мои́хъ прегрѣше́нїй рꙋкописа́нїе, и҆ и҆зба́ви мѧ̀ молю́сѧ, ѡ҆держа́нїѧ всѧ́кагѡ, въ ча́съ кончи́ны моеѧ̀.
Сла́ва: Оу҆гасѝ, дв҃о чⷭ҇таѧ, мои́хъ сле́зъ стрꙋѧ́ми, и҆ твои́хъ щедро́тъ ѡ҆дожде́нїемъ пе́щь, ю҆́же мѝ и҆схода́таи ѕѡ́лъ мои́хъ мно́жество, бѣсо́вскимъ дѣ́йствомъ.
И҆ ны́нѣ: И҆зба́ви на́съ и҆скꙋше́нїй находѧ́щихъ, є҆ди́на сло́ва мт҃и приснодв҃о, и҆ всѧ́кагѡ мꙋче́нїѧ, вои́стиннꙋ тѧ̀ разꙋ́мнѡ пою́щихъ во всѧ̑ вѣ́ки.
Пѣ́снь и҃
І҆рмо́съ: И҆зба́вителю всѣ́хъ всеси́льне, посредѣ̀ пла́мене бл҃гоче́ствовавшыѧ, снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ бл҃гослови́те, по́йте гдⷭ҇а.
Дꙋ́шꙋ мою̀ болѧ́щꙋю и҆сцѣлѝ, и҆ ᲂу҆́мъ ѡ҆мраче́нный просвѣтѝ, и҆ ѻ҆гнѧ̀ и҆схитѝ, и҆ вѣ́чныхъ неизглаго́ланныхъ мꙋ́къ, бцⷣе дв҃о бг҃оневѣ́сто.
Прекло́ньсѧ безслове́сными страстьмѝ, во глꙋбинꙋ̀ поги́бели снидо́хъ, и҆ пла́меню сожже́нїе са́мъ сѧ̀ содѣ́лахъ, ѿ ни́хже мѧ̀ и҆зба́ви бцⷣе дв҃о, раба̀ твоего̀.
Сла́ва: Ѕѡ́лъ мои́хъ пꙋчи́нꙋ и҆зсꙋшѝ, милосе́рдїѧ ро́ждши пꙋчи́нꙋ и҆зба́вителѧ и҆ гдⷭ҇а, и҆ плени̑цы ѕѡ́лъ мои́хъ разрѣшѝ пре́жде кончи́ны, ꙗ҆́же сп҃са всѣ́хъ ро́ждшаѧ.
И҆ ны́нѣ: Вопло́щьсѧ ѿ ᲂу҆тро́бы твоеѧ̀ гдⷭ҇ь, гдⷭ҇ьствꙋѧй тва́рїю, и҆ тебѐ дв҃о гпⷭ҇жꙋ̀ показа̀, ви̑димымъ же всѣ̑мъ и҆ неви̑димымъ, ꙗ҆́кѡ мт҃рь прославлѧ́ѧ непоро́чнꙋю.
Пѣ́снь ѳ҃
І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же дв҃о бцⷣе, прозѧбе́нїемъ чревоноше́нїѧ мі́рови бл҃гослове́нїе процвѣла̀ є҆сѝ, тѣ́мъ тѧ̀ всѝ велича́емъ.
Непло́дное бы́вшее бж҃е́ственныхъ добродѣ́телей се́рдце моѐ, пречⷭ҇таѧ бцⷣе дв҃о, покажѝ плодоно́сно, ꙗ҆́же ѿ непло́дныѧ ро́ждшаѧсѧ, хотѣ́нїемъ всѧ̑ претворѧ́ющагѡ ма́нїемъ, да пою́ тѧ всепѣ́тꙋю.
Свѣ́томъ твои́мъ ѡ҆зари́ мѧ пренепоро́чнаѧ, ро́ждшаѧ свѣ́тъ непристꙋ́пный, разженѝ ѻ҆́блаки страсте́й мои́хъ, и҆ ѿ тьмы̀ несвѣ́тлыѧ и҆схити́ мѧ, и҆ бж҃е́ственнагѡ свѣ́та сподо́би: ꙗ҆́кѡ да пою̀ тѧ̀, мт҃и дв҃о.
Сла́ва: Кропле́нїемъ чⷭ҇таѧ, твои́хъ щедро́тъ ѡ҆мы́й гноє́нїѧ се́рдца моегѡ̀, и҆сточа́ти мѝ при́снѡ сподо́би стрꙋи̑ сле́зъ мои́хъ, пото́ки страсте́й ᲂу҆кроча́ющи, и҆ мꙋ́ки и҆збавлѧ́ющи.
И҆ ны́нѣ: Бл҃голюби́ваго бг҃а ро́ждши, бл҃голюби́ваѧ бцⷣе, любве́ мѧ плотскі́ѧ лꙋка́выѧ ны́нѣ вско́рѣ свободѝ влⷣчце, и҆ порабо́ти бж҃е́ственнѣй во́ли лѣ́ностїю погиба́ющаго.
Та́же, Досто́йно є҆́сть: и҆ покло́нъ до землѝ: Трист҃о́е. По Ѻ҆́ч҃е на́шъ: тропа́рь, и҆ про́чее ѻ҆бы́чно, и҆ ѿпꙋ́стъ.
Въ сꙋббѡ́тꙋ ᲂу҆́тра,
по а҃-мъ стїхосло́вїи, сѣда́льны мч҃нчны, гла́съ д҃:
Дне́сь а҆́гг҃льскаѧ вѡ́инства въ па́мѧть стрⷭ҇тоте́рпєцъ прїидо́ша, вѣ́рныхъ мы̑сли просвѣти́ти, и҆ вселе́ннꙋю бл҃года́тїю ᲂу҆ѧсни́ти: ѿ ни́хже бж҃е, ᲂу҆моле́нъ быва́ѧ, да́рꙋй на́мъ ве́лїю млⷭ҇ть.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Крⷭ҇то́мъ воѡрꙋжи́вшесѧ, стрⷭ҇тоте́рпцы твоѝ, хрⷭ҇тѐ бж҃е на́шъ, побѣди́ша кѡ́зни началоѕло́бнагѡ врага̀, возсїѧ́ша ꙗ҆́кѡ свѣти̑ла, человѣ́ки наставлѧ́юще, даю́тъ и҆сцѣлє́нїѧ вѣ́рою просѧ́щымъ. тѣ́хъ мольба́ми сп҃сѝ дꙋ́шы на́шѧ.
Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́ное, и҆ а҆́гг҃лѡмъ невѣ́домое та́инство, тобо́ю бцⷣе сꙋ́щымъ на землѝ ꙗ҆ви́сѧ бг҃ъ, въ несли́тномъ соедине́нїи воплоща́емь, и҆ крⷭ҇тъ во́лею на́съ ра́ди воспрїи́мъ, и҆́мже воскр҃си́въ первозда́ннаго, сп҃се ѿ сме́рти дꙋ́шы на́шѧ.
По в҃-мъ стїхосло́вїи сѣда́льны, гла́съ д҃:
Мч҃нцы твоѝ гдⷭ҇и, во страда́нїихъ свои́хъ вѣнцы̀ прїѧ́ша нетлѣ̑нныѧ ѿ тебѐ бг҃а на́шегѡ: и҆мꙋ́ще бо крѣ́пость твою̀, мꙋчи́телей низложи́ша, сокрꙋши́ша и҆ де́монѡвъ немѡщны́ѧ де́рзѡсти. тѣ́хъ мл҃твами сп҃сѝ дꙋ́шы на́шѧ.
Сті́хъ: Мнѡ́ги скѡ́рби пра́вєднымъ, и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь.
И҆̀же во все́мъ мі́рѣ мч҃нкъ твои́хъ, ꙗ҆́кѡ багрѧни́цею и҆ вѵ́ссомъ кровьмѝ цр҃ковь твоѧ̀ ᲂу҆краси́вшисѧ, тѣ́ми вопїе́тъ тѝ, хрⷭ҇тѐ бж҃е: лю́демъ твои̑мъ щедрѡ́ты твоѧ̑ низпослѝ, ми́ръ жи́тельствꙋ твоемꙋ̀ да́рꙋй, и҆ дꙋша́мъ на́шымъ ве́лїю млⷭ҇ть.
Сті́хъ: Бл҃же́ни, ꙗ҆̀же и҆збра́лъ, и҆ прїѧ́лъ є҆сѝ гдⷭ҇и, и҆ па́мѧть и҆́хъ въ ро́дъ и҆ ро́дъ.
Дꙋ́шы ꙗ҆́же преста́вилъ є҆сѝ сп҃се ѿ вре́менныхъ, ᲂу҆поко́й ꙗ҆́кѡ бл҃гоꙋтро́бенъ и҆ всеси́ленъ, и҆ є҆ди́нъ чл҃вѣколю́бецъ, простѝ ꙗ҆́кѡ ще́дръ содѣ̑ѧннаѧ и҆́ми: и҆ поми́лꙋй млⷭ҇тиве дѣла̀ рꙋ́къ твои́хъ, мл҃твами бцⷣы, є҆ди́не чл҃вѣколю́бче.
Сла́ва, и҆ ны́нѣ, бг҃оро́диченъ: Чⷭ҇таѧ всенепоро́чнаѧ и҆ неискꙋсомꙋ́жнаѧ: ꙗ҆́же є҆ди́на безлѣ́тнаго сн҃а и҆ сло́ва бж҃їѧ въ лѣ́то ро́ждшаѧ, сего̀ со ст҃ы́ми и҆ честны́ми патрїа́рхи, и҆ мч҃нки, и҆ прⷪ҇ро́ки, и҆ прпⷣбными молѝ, дарова́ти на́мъ ѡ҆чище́нїе и҆ ве́лїю млⷭ҇ть.
Канѡ́нъ ст҃ы̑мъ мч҃нкѡмъ, и҆ ст҃и́телємъ, и҆ прⷪ҇ро́кѡмъ, и҆ прпⷣбнымъ, [є҆гѡ́же краегране́сїе: Свѣ́тлѡ похвалѧ́ю бж҃е́ствєнныѧ хрⷭ҇тѡ́вы дрꙋ́ги.] Творе́нїе і҆ѡ́сифово. Гла́съ д҃.
Пѣ́снь а҃
І҆рмо́съ: Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀, дꙋшѝ трича́стное потопѝ, молю́сѧ, да тебѣ̀ ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе.
Свѣтлѣ́етсѧ при́снѡ честна́ѧ цр҃ковь, по́двиги свѣ́тлыми гдⷭ҇нихъ страда́лєцъ, и҆ хрⷭ҇та̀ возсїѧ́вшаго сл҃нца ѿ дв҃ы, и҆ тьмꙋ̀ разгна́вшаго пре́лести, сла́витъ почита́ющи.
Восхва́лимъ вѣ́рнѡ хрⷭ҇тѡ́вы ст҃и́тели, и҆зрѧ̑дныѧ лю́ди ᲂу҆па́сшыѧ до́брѣ, и҆ свѣ́тлѡ да похва́лимъ собо́ръ ве́сь преподо́бнѡ пожи́вшихъ, и҆ тѣлє́сныѧ сла̑сти ᲂу҆мертви́вшихъ дꙋ́хомъ.
Крѣ́пость ѿ бг҃а жена́мъ дарова́сѧ, въ постѣ̀ и҆ крѣ́пкомъ страда́нїи врага̀ попра́вшымъ бл҃года́тїю: тѣ́хъ мл҃твами гдⷭ҇и, и҆ прⷪ҇рѡ́къ ст҃ы́хъ твои́хъ млⷭ҇ти твоѧ̑ всѣ̑мъ низпослѝ.
Сла́ва: Ѡ҆правда́й хрⷭ҇тѐ, рабы̑ твоѧ̑, ꙗ҆̀же пра́веднымъ промышле́нїемъ, ѿ житїѧ̀ тлѣ́ннагѡ къ нетлѣ́ннѣй жи́зни преве́лъ є҆сѝ: со всѣ́ми же твои́ми пра́ведными ликовствова́ти сподо́би, тѣ́хъ презира́ѧ прегрѣшє́нїѧ.
Бг҃оро́диченъ: И҆збавлѧ́ѧ на́съ ѿ ѡ҆сꙋжде́нїѧ пе́рвагѡ, сн҃ъ бж҃їй, бл҃гоизво́ли чⷭ҇таѧ, и҆ сн҃ъ бы́ти тво́й. тѣ́мже и҆ всыни́вшесѧ тебѐ ра́ди нбⷭ҇наго бл҃гослови́мъ ѻ҆ц҃а̀, пою́ще тебѐ.
Дрꙋгі́й канѡ́нъ ᲂу҆со́пшымъ, є҆гѡ́же пое́мъ нарѧдꙋ̀, и҆дѣ́же нѣ́сть мине́и, [є҆гѡ́же краегране́сїе: Пра́вило четве́ртое, кончи́нꙋ воспомина́ѧ.] Гла́съ д҃.
Пѣ́снь а҃
І҆рмо́съ: Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Припѣ́въ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Держа́й за деснꙋ́ю рꙋ́кꙋ ра̑бъ твои́хъ, наста́ви и҆̀хъ на па́жить безсме́ртнꙋю сп҃се, на зрѣ́нїе добро́ты твоеѧ̀ стрⷭ҇тоно́сцы мч҃нки ᲂу҆моле́нъ быва́ѧ.
Припѣ́въ: Оу҆поко́й гдⷭ҇и, дꙋ́шы ᲂу҆со́пшихъ ра̑бъ твои́хъ.
Неизрече́ннꙋю и҆ бл҃же́ннꙋю сла́вꙋ твою̀, преста́вльшыѧсѧ вѣ́рою наслѣ́довати сподо́би хрⷭ҇тѐ, презира́ѧ прегрѣшє́нїѧ и҆́хъ, и҆ ѡ҆правда́й бл҃года́тїю, и҆злїѧ́нїемъ твоеѧ̀ кро́ве.
Сла́ва: Ме́ртвостїю твое́ю живоно́сною ᲂу҆мертви́телѧ. ᲂу҆мертви́лъ є҆сѝ, хрⷭ҇тѐ бж҃е, и҆̀хже прїѧ́тъ, и҆ и҆́мже твою̀ воздаѧ̀ жи́знь, са́мъ ны́нѣ ᲂу҆поко́й вѣ̑рныѧ рабы̑ твоѧ̑.
И҆ ны́нѣ: Красе́нъ превысоча́йшими добро́тами, ꙗ҆́кѡ бж҃їй сн҃ъ: а҆ ꙗ҆́кѡ и҆з̾ тебѐ дв҃о воплоти́выйсѧ и҆ на дре́вѣ повѣ́шенъ бы́въ добро́ты не и҆мѣ́ѧше, сме́рть за всѣ́хъ прїѧ́тъ.
Пѣ́снь г҃
І҆рмо́съ: Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.
Ꙗ҆́коже а҆́гнцы добропобѣ́днїи мч҃нцы, заколе́ни бы́вше, хрⷭ҇тꙋ̀ принесо́шасѧ, закла́вшемꙋсѧ а҆́гнцꙋ и҆ сло́вꙋ бж҃їю за всѣ́хъ и҆збавле́нїе.
Оу҆ста̀ бж҃їѧ бы́вше сщ҃еннотаи̑нницы, ѿ недосто́йныхъ и҆зведо́ша достѡ́йныѧ, ᲂу҆че́ньми сщ҃е́нными просвѣща́юще.
Ѡ҆брѣ́те прпⷣбныхъ сосло́вїе, воздержа́нїѧ ра́ди пи́щꙋ неиждива́емꙋю, наслади́вшесѧ зрѣ́ньми и҆ бж҃е́ственными восхожде́ньми.
Сла́ва: Всѧ̑ хрⷭ҇тѐ, ꙗ҆̀же въ вѣ́рѣ преста́вилъ є҆сѝ, мольба́ми всѣ́хъ ст҃ы́хъ твои́хъ, ᲂу҆поко́й, презрѣ́въ ꙗ҆̀же содѣ̑ѧннаѧ въ житїѝ тѣ́хъ прегрѣшє́нїѧ.
Бг҃оро́диченъ: Хвалꙋ̀ бг҃ꙋ принесе́мъ, ѿ дв҃ы ро́ждшемꙋсѧ пло́тїю, и҆ же́нъ ли́ки а҆́гг҃льскимъ ликѡ́мъ совокꙋ́пльшемꙋ.
И҆́нъ
І҆рмо́съ: Не мꙋ́дростїю и҆ си́лою, и҆ бога́тствомъ хва́лимсѧ, но тобо́ю ѻ҆́ч҃ею ѵ҆поста́сною мꙋ́дростїю хрⷭ҇тѐ: нѣ́сть бо ст҃ъ па́че тебѐ, чл҃вѣколю́бче.
Побѣди́вше і҆́дѡльскꙋю пре́лесть мч҃нцы, влⷣкꙋ и҆ бг҃а ны́нѣ мо́лѧтъ, дарова́ти пре́жде сконча́вшымсѧ бж҃е́ственный поко́й.
Ѡ҆браща́ющеесѧ ѻ҆рꙋ́жїе преминꙋ́ти бл҃говолѝ, и҆ дре́ва живо́тнагѡ подо́бно прича́стїе ᲂу҆лꙋчи́ти, ꙗ҆̀же преста́вилъ є҆сѝ рабы̑ твоѧ̑, влⷣко.
Сла́ва: Въ раѝ хрⷭ҇тѐ, пи́щи водвори́тисѧ рабѡ́мъ твои̑мъ сподо́би, и҆дѣ́же гла́съ чи́стъ пра́зднꙋющихъ, согрѣше́нїй ѡ҆ставле́нїе тѣ̑мъ да́рꙋѧ.
И҆ ны́нѣ: Бж҃е́ственномꙋ ржⷭ҇твꙋ̀ дв҃ство сочета́ла є҆сѝ пречⷭ҇таѧ: зижди́телѧ бо всѧ́ческихъ несказа́ннѡ родила̀ є҆сѝ, є҆гѡ́же хотѣ́нїю всѧ̑ повинꙋ́ютсѧ.
Пѣ́снь д҃
І҆рмо́съ: Сѣдѧ́й въ сла́вѣ на прⷭ҇то́лѣ бж҃ества̀, во ѻ҆́блацѣ ле́гцѣ прїи́де і҆и҃съ пребж҃е́ственный, нетлѣ́нною дла́нїю, и҆ сп҃сѐ зовꙋ́щыѧ: сла́ва хрⷭ҇тѐ си́лѣ твое́й.
Сщ҃е́ннѣйшее просла́висѧ мч҃нкѡвъ сосло́вїе, сщ҃е́ннѡ просла́виша ᲂу҆́ды свои́ми гдⷭ҇а, ѿ всѣ́хъ а҆́гг҃лъ сла́вимаго: и҆ мо́лѧтсѧ и҆зба́витисѧ на́мъ ѿ всѧ́кїѧ ско́рби.
Оу҆́мъ невеще́ственнагѡ свѣтозаре́нїѧ сїѧ́ющъ, и҆мꙋ́ще бж҃е́ственнїи ст҃и́телїе, но́щь всѧ́кїѧ пре́лести разрꙋши́сте, и҆ неле́стнымъ наставле́нїемъ наста́висте бг҃оизбра́нное ста́до хрⷭ҇то́во къ ра́зꙋмꙋ.
Оу҆краси́сѧ прпⷣбныхъ многочи́сленное мно́жество, и҆ возвели́чисѧ бж҃е́ственныхъ же́нъ є҆ди́нственное торжество̀, и҆ прⷪ҇рѡ́къ почте́сѧ собо́ръ ст҃ы́й, со а҆́гг҃льскими собо́ры соедини́всѧ ра́дꙋѧсѧ.
Сла́ва: А҆́гг҃лѡмъ согра́ждане бы́вше ст҃і́и мч҃нцы, ᲂу҆со́пшымъ всѣ̑мъ и҆спроси́те ѡ҆слабле́нїе, и҆ раѧ̀ бж҃е́ственнагѡ вселе́нїе, и҆ прегрѣше́нїй коне́чное и҆збавле́нїе.
Бг҃оро́диченъ: И҆́же дв҃ꙋ тѧ̀ сохрани́въ по ржⷭ҇твѣ̀ нетлѣ́ннꙋ, дв҃ы всѧ̑ тебѐ ѡ҆бстоѧ́щыѧ просла́ви: съ ни́миже непреста́ннѡ моли́сѧ, сп҃сти́сѧ ѿ всѧ́кїѧ ско́рби и҆ напа́сти дꙋша́мъ на́шымъ.
И҆́нъ
І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й гдⷭ҇и.
Ꙗ҆́вльшесѧ мч҃нцы ꙗ҆́кѡ свѣти̑льницы, не́бо просвѣща́ютъ цр҃ко́вное, и҆̀же и҆ ᲂу҆ сп҃са хрⷭ҇та̀ про́сѧтъ, дарова́ти ᲂу҆со́пшымъ ѡ҆слабле́нїе.
Же́злъ си́лы и҆мꙋ́ще крⷭ҇тъ тво́й рабѝ твоѝ, мїрско́е мо́ре проидо́ша: и҆̀хже вселѝ въ го́рꙋ твою̀ гдⷭ҇и, въ не́йже содѣ́лалъ є҆сѝ ст҃ы́ню.
Сла́ва: Въ селє́нїѧ вои́стиннꙋ возлю́блєннаѧ, ꙗ҆̀же и҆збра́лъ є҆сѝ влⷣко, и҆ ꙗ҆̀же прїѧ́лъ є҆сѝ рабы̑ твоѧ̑, бл҃говолѝ всели́тисѧ ꙗ҆́кѡ млⷭ҇рдъ, и҆дѣ́же првⷣныхъ дꙋ́си.
И҆ ны́нѣ: И҆́же ме́ртвыми и҆ живы́ми ѡ҆блада́ѧй, вопло́щьсѧ ꙗ҆́кѡ человѣ́къ и҆з̾ тебѐ бг҃омт҃и, сме́рть претерпѣ̀ пло́тїю безсме́ртный, разрꙋши́въ сме́рти си́лꙋ.
Пѣ́снь є҃
І҆рмо́съ: Ты̀ гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ, вѣ́рою воспѣва́ющыѧ тѧ̀.
Возноси́ми на крⷭ҇тъ и҆ колесы̀ сокрꙋша́еми, ссѣца́еми же на ᲂу҆́ды крѣ́пцыи мч҃нцы, бг҃ꙋ ꙗ҆ви́шасѧ не ѿсѣ́чени.
Спаси́телїе вѣ̑рнымъ, ст҃и́телїе бы́вше, приведо́сте а҆́гнцꙋ и҆ влⷣцѣ, и҆̀хже пастѝ преподо́бнѣ ввѣ́ристесѧ.
Мѧте́жей мїрски́хъ ѿлꙋчи́вшесѧ прпⷣбнїи, ᲂу҆мири́сте сердца̀ ѿ страсте́й, и҆ всѣ́хъ бг҃ꙋ сы́нове бы́сте.
Сла́ва: Бж҃е́ственнїи прⷪ҇ро́цы, и҆ же́нъ сосло́вїе бг҃ꙋ ᲂу҆годи́вшїи, пре́жде ᲂу҆со́пшымъ проси́те поко́й.
Бг҃оро́диченъ: Бг҃ъ въ тѧ̀ всели́всѧ пречⷭ҇таѧ дв҃о, содѣ́ла человѣ́ки своеѧ̀ сла́вы бж҃е́ствєннаѧ жили̑ща.
И҆́нъ І҆рмо́съ то́йже.
Ты̀ гдⷭ҇и, твоегѡ̀ влⷣчествїѧ просла́вилъ є҆сѝ мч҃нки: тѣ́хже ра́ди пре́жде ᲂу҆со́пшыѧ ᲂу҆поко́й, ꙗ҆́кѡ бл҃гоꙋтро́бенъ.
Нерѣши́мый живо́тъ, кра́сное ра́дованїе, и҆ непрестаю́щее весе́лїе, пре́жде ᲂу҆ме́ршымъ пода́ждь, многомлⷭ҇тиве.
Сла́ва: Є҆ди́не бл҃же, и҆ и҆сто́чниче бл҃гости, ᲂу҆поко́й и҆̀же въ вѣ́рѣ, и҆ твое́мъ позна́нїи житїѐ сконча́вшихъ.
И҆ ны́нѣ: Пое́мъ тѧ̀ бг҃омт҃и, є҆́юже сꙋ́щымъ во тьмѣ̀ возсїѧ̀ неизрече́нный и҆ непристꙋ́пный свѣ́тъ, и҆ любо́вїю бл҃жи́мъ.
Пѣ́снь ѕ҃
І҆рмо́съ: Прїидо́хъ во глꙋбины̑ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но ꙗ҆́кѡ бг҃ъ и҆з̾ глꙋбины̀ возведѝ живо́тъ мо́й, многомлⷭ҇тиве.
Ꙗ҆́кѡ прече́стно ка́менїе мч҃нцы, по землѝ премꙋ́дрѡ валѧ́ющесѧ, ѕлоче́стїѧ зда́нїе всѐ низверго́сте, и҆ хра́мы бж҃їѧ бы́сте.
Ѿ рꙋкѝ наси́льственныѧ сп҃са́ете подрꙋ́чники всѧ̑, ст҃и́телїе, првⷣнїи и҆ прпⷣбнїи, и҆̀же ѡ҆ хрⷭ҇тѣ̀ ста́до соблюда́юще: сегѡ̀ ра́ди ᲂу҆бл҃жа́етесѧ.
Рече́нїємъ прⷪ҇ро́чєскимъ послѣ́дꙋюще, же́нъ мно́жество, во страда́нїихъ же и҆ въ постѣ̀, ѿ жены̀ дв҃ы возсїѧ́вшемꙋ, бг҃ꙋ сло́вꙋ ᲂу҆годи́ша.
Сла́ва: Всѣ̑мъ животѐ ᲂу҆ме́ршымъ, ꙗ҆̀же ѿ на́съ въ вѣ́рѣ преше́дшыѧ къ тебѣ̀ зижди́телю, во свѣ́тѣ со ст҃ы́ми твои́ми многомлⷭ҇тиве, сподо́би.
Бг҃оро́диченъ: Оу҆сты̀, и҆ ѧ҆зы́комъ, и҆ се́рдцемъ и҆сповѣ́даю тѧ̀ ѻ҆трокови́це, бг҃а на́шегѡ чⷭ҇тꙋю мт҃рь: и҆ твои́мъ хода́тайствомъ и҆зба́ви мѧ̀ вѣ́чнагѡ ѡ҆сꙋжде́нїѧ.
И҆́нъ
І҆рмо́съ: Пожрꙋ́ ти со гла́сомъ хвале́нїѧ гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю.
Копїѐ бж҃е́ствєннаѧ твоѧ̑ ре́бра пробо́дшее, ѡ҆браща́ющеесѧ ѻ҆рꙋ́жїе ᲂу҆ви́дѣвше сп҃се, да ѿстꙋ́питъ ѿ ра̑бъ твои́хъ мольба́ми стрⷭ҇тоте́рпєцъ твои́хъ.
На дре́вѣ повѣ́шенъ бы́въ сп҃се мо́й, ра́й ѿве́рзлъ є҆сѝ: въ вѣ́рѣ ᲂу҆́бѡ преста́влєныѧ во́нь вселѝ, ꙗ҆́кѡ ще́дръ, и҆ твоеѧ̀ жи́зни прича́стники покажѝ.
Сла́ва: Па́жити живо́тныѧ сподо́би наслади́тисѧ, и҆̀же къ тебѣ̀ влⷣко бл҃гоче́стнѡ преходѧ́щыѧ сме́ртїю, и҆ съ првⷣными и҆̀же ѿ вѣ́ка сопричтѝ.
И҆ ны́нѣ: Сло́во ꙗ҆́кѡ бг҃ъ сы́й неви́димь, и҆ вопло́щьсѧ ви́димь бы́сть, ѿ дв҃ы ѻ҆трокови́цы неискꙋсомꙋ́жныѧ, и҆ сме́ртїю свое́ю сме́рть разрꙋшѝ.
Пѣ́снь з҃
І҆рмо́съ: А҆враа́мстїи и҆ногда̀ въ вавѷлѡ́нѣ ѻ҆́троцы пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е бл҃гослове́нъ є҆сѝ.
Влⷣки хрⷭ҇та̀ ѡ҆свѧщє́нныѧ сосꙋ́ды, цр҃кве забра̑ла и҆ столпы̀ гдⷭ҇ни мч҃нки въ весе́лїи дꙋшѝ воспои́мъ согла́снѡ.
Ст҃и́телїе хрⷭ҇тѡ́вы, и҆ прпⷣбныхъ всѣ́хъ ли́къ бж҃е́ственный ра́дꙋетсѧ съ вы́шними си́лами: тѣ́хъ мл҃твами хрⷭ҇тѐ, сп҃са́й пою́щыѧ тѧ̀.
Терпѣ́нїе бл҃го́е же́нъ преподо́бнѣ и҆ страда́льнѣ просїѧ́вшихъ и҆ вѣ́рою по́стничествовавшихъ, є҆́ѵꙋ послꙋша́нїемъ ᲂу҆ѧзви́вшаго низложѝ.
Сла́ва: Ты̀ и҆́же а҆́да разрꙋши́вый, и҆ сме́рть попра́вый, твое́ю сме́ртїю, ꙗ҆̀же преста́вилъ є҆сѝ въ вѣ́рѣ ᲂу҆поко́й, и҆ раѧ̀ покажѝ жи́тели.
Бг҃оро́диченъ: Пла́мень и҆́же кꙋпинꙋ̀ дре́вле не ѡ҆палѧ́ющїй, ви́дѧ законополо́жникъ, наꙋча́шесѧ ѡ҆́бразꙋ ржⷭ҇тва̀ твоегѡ̀, бг҃ороди́тельнице дв҃о, при́снѡ бл҃гослове́ннаѧ.
И҆́нъ
І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Терпѣ́нїе же и҆ пожда́нїе, и҆ крѡ́ви всѣ́хъ мч҃нкъ, и҆збавле́нїе прїе́мъ, бл҃гоче́стнѡ ᲂу҆со́пшыѧ ᲂу҆ тебѐ ᲂу҆поко́й, ꙗ҆́кѡ млⷭ҇тивъ и҆ бл҃гопремѣни́тель.
Причета́вый къ перворѡ́днымъ, и҆ првⷣнымъ твои̑мъ сп҃се, дꙋ́шы ра̑бъ твои́хъ къ тебѣ̀ преста́влєныѧ, сподо́би непреста́ннѡ тебѐ наслажда́тисѧ, всѣ́ми владꙋ́щагѡ.
Сла́ва: Съ весе́лїемъ и҆ со дерзнове́нїемъ и҆ свѣ́тлостїю сло́ве бж҃їй и҆зба́вителю, бл҃говолѝ ꙗ҆́кѡ бг҃ъ на ѻ҆́блацѣхъ срѣ́сти тѧ̀, и҆̀хже ты̀ прїѧ́лъ є҆сѝ ны́нѣ ꙗ҆́кѡ млⷭ҇тивъ.
И҆ ны́нѣ: Бл҃гослове́ннаѧ бг҃ороди́тельнице дв҃о мт҃и, ра́дꙋйсѧ: тебе́ бо ра́ди бы́сть вои́стиннꙋ сме́рти потребе́нїе, живо́тъ же неразори́мый ᲂу҆ме́ршымъ дарова́сѧ.
Пѣ́снь и҃
І҆рмо́съ: И҆зба́вителю всѣ́хъ всеси́льне, посредѣ̀ пла́мене бл҃гоче́ствовавшыѧ, снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ бл҃гослови́те, по́йте гдⷭ҇а.
Ст҃и́телїе, прⷪ҇ро́цы, и҆ мч҃нцы, сщ҃е́нный по́двигъ сконча́вшїи, сщ҃е́нное ᲂу҆лꙋчи́ша водворе́нїе со а҆́гг҃лы: съ ни́миже про́сѧтъ ѡ҆чище́нїѧ на́мъ всѣ̑мъ и҆ ве́лїѧ млⷭ҇ти.
Просвѣти́вшесѧ дꙋ́хомъ прпⷣбнїи, бѣсо́вскꙋю тьмꙋ̀ погꙋби́ша: съ ни́миже сщ҃енномч҃нцы, и҆ ст҃и́телїе, прⷪ҇ро́цы съ првⷣными, бг҃а во хвале́нїи сла́вѧтъ.
И҆́же пре́жде безꙋ́мїемъ хвалѧ́йсѧ погꙋби́ти зе́млю и҆ мо́ре, жена́ми всегда̀ попира́етсѧ, страда́нїемъ же и҆ посто́мъ послꙋжи́вшими бг҃ꙋ со ᲂу҆се́рдїемъ.
Сла́ва: Ѡ҆ всѣ́хъ хрⷭ҇тѐ, мо́лимсѧ тѝ, вѣ́рою ᲂу҆со́пшихъ, ꙗ҆́кѡ млⷭ҇рдъ си́хъ къ ликѡ́мъ причтѝ сп҃са́емыхъ, непреста́ннѡ вопїю́щихъ: всѧ̑ дѣла̀ бл҃гослови́те гдⷭ҇нѧ гдⷭ҇а.
Бг҃оро́диченъ: Млⷭ҇ти твоеѧ̀ сподо́би мѧ̀, бл҃гомлⷭ҇тивное сло́во ро́ждшаѧ, бг҃ороди́тельнице влⷣчце, и҆ вопїю́ща мѧ̀ сп҃сѝ: всѧ̑ дѣла̀ бл҃гослови́те гдⷭ҇нѧ гдⷭ҇а.
И҆́нъ
І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тели ѻ҆́троцы, взыва́юще: бл҃гослови́те всѧ̑ дѣла̀ гдⷭ҇нѧ гдⷭ҇а.
Мч҃нкѡвъ прїе́млѧ молє́нїѧ, и҆ ми́лованїе къ є҆диноплеме́нномꙋ, дꙋ́шы ᲂу҆поко́й влⷣко, въ вѣ́рѣ твое́й ᲂу҆со́пшихъ, грѣхѝ презрѧ̀ си́хъ вопїю́щихъ тѝ: всѧ̑ дѣла̀ бл҃гослови́те гдⷭ҇нѧ гдⷭ҇а.
Ме́ртвъ со беззако́нникома вмѣни́всѧ, мє́ртвымъ и҆сточи́лъ є҆сѝ жи́знь безсме́ртнꙋю, преста́влєныѧ ᲂу҆́бѡ рабы̑ твоѧ̑ ѡ҆ наде́жди воскрⷭ҇нїѧ, црⷭ҇твїе твоѐ ᲂу҆лꙋчи́ти сподо́би сп҃се, тебѣ̀ вопїю́щихъ: всѧ̑ дѣла̀ бл҃гослови́те гдⷭ҇нѧ гдⷭ҇а.
Сла́ва: Вои́стиннꙋ приснотекꙋ́щїй и҆сто́чниче бл҃гости, въ нбⷭ҇ныхъ селе́нїихъ сконча́вшыѧсѧ рабы̑ твоѧ̑, и҆ житїѐ тлѣ́нное ѡ҆ста́вльшыѧ, кро́ткѡ сп҃се, примирѝ, тебѣ̀ вопїю́щыѧ: всѧ̑ дѣла̀ бл҃гослови́те гдⷭ҇нѧ гдⷭ҇а.
И҆ ны́нѣ: Є҆ди́на ты̀ ꙗ҆ви́ласѧ є҆сѝ на землѝ дв҃о пречⷭ҇таѧ, и҆ мт҃и безмꙋ́жнаѧ: бг҃а бо родила̀ є҆сѝ влⷣчце па́че сло́ва и҆ смы́сла, и҆ вѣ́чнꙋю жи́знь мє́ртвымъ и҆сточи́ла є҆сѝ. тѣ́мже вси́ тѧ бл҃гослови́мъ, мр҃і́е бг҃оневѣ́сто.
Пѣ́снь ѳ҃
І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть, ты́ же дв҃о бцⷣе, прозѧбе́нїемъ чревоноше́нїѧ мі́рови бл҃гослове́нїе процвѣла̀ є҆сѝ: тѣ́мъ тѧ̀ всѝ велича́емъ.
Ви́дѣвше бж҃е́ствєнныѧ да́ры мч҃нцы, и҆ по́чєсти прїе́млюще вели́кихъ свои́хъ болѣ́зней, ра́дꙋютсѧ хрⷭ҇та̀ велича́юще, си́хъ вои́стиннꙋ возвели́чившаго, и҆ побѣдоно́сцы показа́вшаго.
Ꙗ҆́кѡ ст҃и́тельствꙋюще лю́демъ, поста́влени бы́вше ст҃и́телїе бг҃опроповѣ̑дницы, ꙗ҆́кѡ просвѣти́вшесѧ посто́мъ, со́лнца свѣтлѣ́йше прпⷣбнїи просїѧ́сте, вѣ́рныхъ ѡ҆зарѧ́юще дѣ́лъ вели́кихъ ꙗ҆вле́нїемъ.
Со сщ҃енномч҃нки кꙋ́пнѡ, и҆ со всѣ́ми прⷪ҇ро́ки, ᲂу҆бл҃жи́мъ всѧ̑ прпⷣбныѧ и҆ првⷣники, и҆ жєны̀ свѣ́тлѡ ᲂу҆годи́вшыѧ, тѣ́хъ мольба́ми хрⷭ҇тѐ, вопїю́ще: и҆зба́ви гее́нны дꙋ́шы на́шѧ.
Сла́ва: Є҆ѧ́же сподо́бишасѧ ра́дости ст҃і́и, и҆̀же до́брѣ тебѣ̀ хрⷭ҇тѐ ᲂу҆годи́вшїи, тоѧ̀ преста́вльшыѧсѧ къ тебѣ̀ вѣ́рою сподо́би, тѣ́хъ презира́ѧ согрѣшє́нїѧ, гдⷭ҇и є҆ди́не многомлⷭ҇тиве.
Бг҃оро́диченъ: Ꙗ҆́вльшисѧ вы́шнихъ херꙋві̑мъ всенепоро́чнаѧ превы́шши, ꙗ҆́кѡ ро́ждши содержи́телѧ всѧ́ческихъ, вы́шши ᲂу҆́мъ мо́й содѣ́лай, на стра̑сти плѡтскі́ѧ ᲂу҆крѣплѧ́ющи мѧ̀, влⷣчнѧѧ твори́ти хотѣ̑нїѧ.
И҆́нъ І҆рмо́съ то́йже.
Да́лъ є҆сѝ и҆́стиннымъ страда́льцємъ, и҆ мч҃нкѡмъ дерзнове́нїе моли́ти тѧ̀ гдⷭ҇и: да́ждь же вѣ́рою преста́вльшымсѧ, бж҃е́ственное тѣ́хъ ра́ди и҆збавле́нїе, въ мѣ́сто селе́нїѧ ст҃а́гѡ всели́тисѧ да́рꙋѧ.
Манове́нїемъ вседѣ́тельнымъ, и҆́же всѧ́чєскаѧ поле́знѣ содѣ́ловаѧ, живы́ми и҆мѣ́ѧ ѻ҆́бласть, и҆ ме́ртвыми гдⷭ҇ьствꙋѧ, ꙗ҆́кѡ всеси́ленъ, ᲂу҆чинѝ, ꙗ҆̀же преста́вилъ є҆сѝ рабы̑ твоѧ̑ на вода́хъ поко́йныхъ.
Сла́ва: И҆́же є҆стество́мъ сы́й ꙗ҆́кѡ бл҃гъ, и҆́же бога́тый въ ми́лостехъ и҆ въ бл҃гости, и҆зба́ви ѿ тьмы̀ кромѣ́шнїѧ, призыва́ющыѧ твоѐ и҆́мѧ, вѣ́рою ѡ҆правда́въ и҆ бл҃года́тїю, си́хъ просвѣтѝ, ꙗ҆́кѡ чл҃вѣколю́бецъ.
Бг҃оро́диченъ: Ѡ҆́бразы, всенепоро́чнаѧ, твоегѡ̀ ржⷭ҇тва̀ прⷪ҇ро́цы проповѣ́даша, и҆́накѡ же дрꙋзі́и пресла́внѡ тебѣ̀ нарица̑нїѧ слага́юще: живо́тъ бо во а҆́дѣ сꙋ́щымъ родила̀ є҆сѝ, держа́вꙋ сме́рти разрꙋша́ющїй.
Та́же, Досто́йно є҆́сть: И҆ покло́нъ, є҆ктенїа̀, и҆ свѣти́ленъ, и҆ ѱалмы̀ ѻ҆бы̑чныѧ.
На хвали́техъ стїхи̑ры мч҃нчны, гла́съ д҃:
Кто̀ не ᲂу҆жаса́етсѧ зрѧ̀, ст҃і́и мч҃нцы, по́двига до́брагѡ, и҆́мже подвиза́стесѧ; ка́кѡ во пло́ти сꙋ́ще, безпло́тнаго врага̀ побѣди́сте, хрⷭ҇та̀ и҆сповѣ́дающе, и҆ крⷭ҇то́мъ воѡрꙋжи́вшесѧ; тѣ́мже досто́йнѡ ꙗ҆ви́стесѧ бѣсѡ́въ прогони́тели, и҆ ва́рварѡвъ побѣди́тели, непреста́ннѡ молѧ́щесѧ сп҃сти́сѧ дꙋша́мъ на́шымъ.
А҆́гг҃лѡмъ соприча̑стницы бы́сте, ст҃і́и мч҃нцы, на сꙋди́щи хрⷭ҇та̀ мꙋ́жески проповѣ́давше: всѧ̑ бо ꙗ҆́же въ мі́рѣ ѡ҆ста́висте кра̑снаѧ ꙗ҆́кѡ не сꙋ̑ща, вѣ́рꙋ же ꙗ҆́кѡ наде́ждꙋ тве́рдꙋ ᲂу҆держа́сте, тѣ́мже и҆ ле́сть ѿгна́вше, и҆сточа́ете вѣ̑рнымъ и҆сцѣле́нїй дарова̑нїѧ, непреста́ннѡ молѧ́щесѧ сп҃сти́сѧ дꙋша́мъ на́шымъ.
Ка́кѡ ва́шымъ подвигѡ́мъ не ᲂу҆диви́мсѧ, ст҃і́и мч҃нцы; ꙗ҆́кѡ тѣ́ломъ ᲂу҆мира́ющимъ ѡ҆бложе́ни, безплѡ́тныѧ врагѝ побѣди́сте, не ᲂу҆страши́ша ва́съ мꙋчи́тєльскаѧ прещє́нїѧ, ни ᲂу҆жаси́ша ва́съ мꙋ́къ приложє́нїѧ, вои́стиннꙋ досто́йнѡ ѿ хрⷭ҇та̀ просла́вистесѧ.
Честна̀ сме́рть ст҃ы́хъ твои́хъ гдⷭ҇и, мече́мъ бо и҆ ѻ҆гне́мъ, и҆ дꙋше́ю сокрꙋше́нною пролїѧ́ша кро́вь свою̀, ᲂу҆пова́нїе и҆мꙋ́ще на тѧ̀, воспрїѧ́ти трꙋдѡ́въ мздꙋ̀: претерпѣ́ша бо и҆ прїѧ́ша ѿ тебѐ сп҃се, ве́лїю млⷭ҇ть.
Ме́ртвенъ: Въ поко́ищи твое́мъ гдⷭ҇и, и҆дѣ́же всѝ ст҃і́и твоѝ почива́ютъ, ᲂу҆со́пшыѧ рабы̑ твоѧ̑ поко́й, ꙗ҆́кѡ є҆ди́нъ сы́й чл҃вѣколю́бецъ.
Сла́ва: Гдѣ̀ є҆́сть мі́ра пристра́стїе; гдѣ̀ є҆́сть привре́менное мечта́нїе; гдѣ̀ є҆́сть зла́то и҆ сребро̀; гдѣ̀ є҆́сть рабѡ́въ мно́жество и҆ молва̀; всѧ̑ пра́хъ, всѧ̑ пе́пелъ, всѧ̑ сѣ́нь! но прїиди́те возопїи́мъ безсме́ртномꙋ цр҃ю̀: гдⷭ҇и, вѣ́чныхъ твои́хъ бла̑гъ сподо́би преста́вльшыѧсѧ ѿ на́съ, и҆ ᲂу҆поко́й ты̑ѧ въ нестарѣ́емомъ бл҃же́нствѣ.
И҆ ны́нѣ, бг҃оро́диченъ: Є҆ди́на чⷭ҇таѧ и҆ пречⷭ҇таѧ дв҃о, ꙗ҆́же бг҃а безсѣ́меннѡ ро́ждшаѧ, молѝ сп҃сти́сѧ дꙋша́мъ на́шымъ.
На стїхо́внѣ стїхи̑ры поко́йны, гла́съ д҃:
Подо́бенъ: Да́лъ є҆сѝ зна́менїе:
Вои́стиннꙋ стра́шно є҆́сть та́инство сме́ртное: ка́кѡ дꙋша̀ ѿ тѣ́ла нꙋ́ждею разлꙋча́етсѧ, ѿ соста̑въ и҆ сочета́нїѧ є҆сте́ственнагѡ соꙋ́за бж҃е́ственнымъ хотѣ́нїемъ раздѣлѧ́етсѧ; тѣ́мже тебѣ̀ мо́лимсѧ: преста́влєныѧ ᲂу҆поко́й въ кро́вѣ пра́ведныхъ твои́хъ, жизнода́вче чл҃вѣколю́бче.
Сті́хъ: Бл҃же́ни, ꙗ҆̀же и҆збра́лъ и҆ прїѧ́лъ є҆сѝ гдⷭ҇и.
Со́нъ ꙗ҆влѧ́етсѧ, вѣ́рꙋющымъ въ тѧ̀ сме́рть, тебѣ̀ положе́нꙋ во гро́бѣ, всѣ́ми владꙋ́щемꙋ, и҆ сме́ртнꙋю держа́вꙋ разо́ршемꙋ, и҆ ᲂу҆праздни́вшемꙋ є҆ѧ̀ наси́лїе многолѣ́тное. тѣ́мже тѝ мо́лимсѧ: преста́влєныѧ ᲂу҆чинѝ въ ра́дости ст҃ы́хъ твои́хъ, и҆ въ пра́ведныхъ свѣ́тлости.
Сті́хъ: Дꙋ́шы и҆́хъ во бл҃ги́хъ водворѧ́тсѧ.
Ты̀ пра́вда же и҆ ѡ҆свѧще́нїе на́мъ бы́лъ є҆сѝ, и҆ дꙋша́мъ и҆збавле́нїе: ѻ҆ц҃ꙋ́ бо приве́лъ є҆сѝ ѡ҆пра́вданы и҆ и҆зба́влены, воспрїе́мъ на́ше до́лжное запреще́нїе. и҆ ны́нѣ мо́лимъ тѧ̀: преста́влєныѧ ᲂу҆поко́й въ ра́дости и҆ свѣ́тлости ст҃ы́хъ твои́хъ, бл҃года́телю и҆ чл҃вѣколю́бче.
Сла́ва, и҆ ны́нѣ, бг҃оро́диченъ: Словесє́мъ послѣ́дꙋюще бг҃оглаго́ливыхъ прⷪ҇рѡ́къ, бцⷣꙋ тѧ̀ всенепоро́чнаѧ, мꙋ́дрствꙋемъ: бг҃а бо родила̀ є҆сѝ воплоти́вшагосѧ недомы́сленнѡ, и҆зба́вльшаго на́съ плѣне́нныхъ согрѣше́нїи. є҆го́же ны́нѣ молѝ пречⷭ҇таѧ, преста́влєныѧ рабы̑ твоѧ̑ свои́мъ просвѣти́ти ѡ҆заре́нїемъ.
Та́же, Бл҃го є҆́сть: Трист҃о́е. По Ѻ҆́ч҃е на́шъ: тропа́рь, є҆ктенїа̀, и҆ ча́съ а҃-й: ѱалмы̀ ѻ҆бы̑чныѧ, и҆ ѿпꙋ́стъ.
Въ сꙋббѡ́тꙋ бл҃жє́нны. Гла́съ д҃:
Дре́вомъ а҆да́мъ раѧ̀ бы́сть и҆зселе́нъ: дре́вомъ же крⷭ҇тнымъ разбо́йникъ въ ра́й всели́сѧ. ѻ҆́въ ᲂу҆́бѡ вкꙋ́шъ, за́повѣдь ѿве́рже сотво́ршагѡ: ѻ҆́въ же сраспина́емь, бг҃а и҆сповѣ́да таѧ́щагосѧ, помѧни́ мѧ вопїѧ̀, во црⷭ҇твїи твое́мъ.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Распала́ющесѧ хрⷭ҇то́вою любо́вїю, ст҃і́и мч҃нцы, ѕлоче́стїѧ ѻ҆́гнь ѡ҆роше́нїемъ пѡ́двигъ ᲂу҆гаси́сте, и҆ свѣти́льницы многосвѣ́тлїи цр҃кве ꙗ҆ви́стесѧ, ѿгонѧ́юще бл҃гостїю тьмꙋ̀ недꙋ́гѡвъ и҆ скорбе́й ѿ дꙋ́шъ на́шихъ. тѣ́мже до́лжнѡ похвалѧ́емъ ва́съ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ на вы̀ лжꙋ́ще менѐ ра́ди.
Ст҃и́телїе сщ҃е́ннїи, и҆ прⷪ҇рѡ́къ бж҃е́ственное сосло́вїе, и҆ прпⷣбныхъ ли́цы, и҆ же́нъ ст҃ы́хъ є҆ди́нственное торжество̀, бг҃ꙋ ᲂу҆годи́вше добродѣ́тельными дѣѧ́нїи, и҆ просла́вишасѧ. тѣ́хъ ᲂу҆бл҃жа́емъ, мольба́ми и҆́хъ молѧ́ще, полꙋчи́ти вѣ́чный живо́тъ и҆ просвѣще́нїе.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
И҆дѣ́же сїѧ́етъ тво́й свѣ́тъ, и҆ и҆дѣ́же ли́цы ст҃ы́хъ ра́дꙋютсѧ, ѿню́дꙋже ѿбѣжѐ воздыха́нїе и҆ болѣ́знь, ᲂу҆чинѝ рабы̑ твоѧ̑ пре́жде сконча́вшыѧсѧ, и҆ ѡ҆ста́вльшыѧ житїѐ многоболѣ́зненное, пѣ́ти твою̀ неизрече́ннꙋю хрⷭ҇тѐ бл҃госты́ню, презрѣ́въ и҆́хъ прегрѣшє́нїѧ, ꙗ҆̀же на землѝ содѣ́ѧша.
Сла́ва: Неразлꙋ́чнаѧ трⷪ҇це, ꙗ҆̀же во ѻ҆ц҃ѣ̀, и҆ сн҃ѣ, и҆ дх҃ѣ, соединѧ́ема всѧ́чески, неслива́ема со́бствы, є҆ди́нице трїѷпоста́снаѧ, ᲂу҆ме́ршыѧ вѣ́рнѡ ᲂу҆ тебѐ поко́й, мольба́ми ст҃ы́хъ твои́хъ мч҃нкъ, ѻ҆тє́цъ же и҆ чⷭ҇тны́хъ прⷪ҇рѡ́къ, подаю́щи ѡ҆чище́нїе дꙋша́мъ на́шымъ.
И҆ ны́нѣ: Є҆го́же родѝ ѻ҆ц҃ъ пре́жде денни́цы, сло́во зачала̀ є҆сѝ, и҆ родила̀ є҆сѝ пло́тїю, бы́вша человѣ́ка соверше́нна, двѣма̀ познава́ема дѣ́йствы, пречⷭ҇таѧ, и҆ во́лема. того̀ ᲂу҆́бѡ молѝ, ꙗ҆́кѡ зижди́телѧ и҆ гдⷭ҇а, ᲂу҆ще́дрити на́съ тебѐ пою́щихъ, ѻ҆трокови́це бг҃оневѣ́стнаѧ.
Коне́цъ четве́ртомꙋ гла́сꙋ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.