Глас 4-й. Среда.
Во вто́рникъ ве́чера,
на Гдⷭ҇и воззва́хъ, стїхи̑ры крⷭ҇тны, гла́съ д҃.
Подо́бенъ: Ꙗ҆́кѡ до́блѧ:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
На крⷭ҇тъ воздвиза́емь, и҆ копїе́мъ пробода́емь, и҆ пе́рсты ѡ҆кровавлѧ́емь влⷣко, свобожде́нїе подписа́лъ є҆сѝ на́мъ пребл҃гі́й, и҆ рꙋкописа́нїе а҆да́ма прароди́телѧ растерза́въ, свободи́лъ є҆сѝ человѣ́ческое сꙋщество̀. сегѡ̀ ра́ди воспѣва́емъ ще́дре, ю҆́же па́че ᲂу҆ма̀ твою̀ бл҃госты́ню.
Сті́хъИ҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Воспѣва́емъ твоѧ̑ страда̑нїѧ влⷣко і҆и҃се: крⷭ҇тъ, копїе́ же и҆ тро́сть, гꙋ́бꙋ и҆ гвѡ́здїѧ, бїє́нїѧ, багрѧни́цꙋ, и҆ вѣне́цъ ѿ те́рнїѧ, ѡ҆плева̑нїѧ же и҆ порꙋга̑нїѧ, ꙗ҆̀же претерпѣ́лъ є҆сѝ во́лею. велича́ю твоѐ неѕло́биве є҆ди́не жизнода́вче долготерпѣ́нїе, и҆ вѣ́рою славосло́влю тѧ̀ чл҃вѣколю́бче.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.
Крⷭ҇тꙋ̀ твоемꙋ̀ чⷭ҇тно́мꙋ покланѧ́юсѧ пребл҃гі́й, любо́вїю ѡ҆блобыза́ѧ, и҆ сла́влю твоѐ є҆́же па́че ᲂу҆ма̀ соше́ствїе, безмѣ́рнꙋю млⷭ҇ть и҆ неизречє́нныѧ щедрѡ́ты, и҆ бога́тꙋю бл҃госты́ню, є҆ѧ́же ра́ди сп҃слъ є҆сѝ человѣ́ческое є҆стество̀, содержи́мо бы́вшее во тьмѣ̀ прегрѣше́нїй. сла́ва хрⷭ҇тѐ распѧ́тїю твоемꙋ̀.
Та́же въ мине́и стїхи̑ры ст҃о́мꙋ, а҆́ще и҆́мать: а҆́ще ли нѣ́сть мине́и, и҆́ны стїхи̑ры прест҃ѣ́й бцⷣѣ, гла́съ и҆ подо́бенъ то́йже.
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе: и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
На крⷭ҇тѣ̀ ꙗ҆́кѡ ᲂу҆зрѣ̀ пригвожда́ема тѧ̀ гдⷭ҇и, а҆́гница и҆ мт҃и твоѧ̀ дивлѧ́шесѧ. что̀ видѣ́нїе сїѐ, взыва́ше, сн҃е вожделѣ́нный; сїѧ̑ тѝ непокори́вый со́нмъ воздае́тъ беззако́нный, и҆́же мно́гихъ твои́хъ чꙋде́съ наслажде́йсѧ; но сла́ва неизрече́нномꙋ схожде́нїю твоемꙋ̀ влⷣко.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
А҆́гнца и҆ па́стырѧ тѧ̀ на дре́вѣ ꙗ҆́кѡ ви́дѣ, а҆́гница ро́ждшаѧ рыда́ше, и҆ ма́терски тебѣ̀ вѣща́ше: сн҃е любе́знѣйшїй, ка́кѡ на дре́во крⷭ҇тное воздви́глсѧ є҆сѝ долготерпѣли́ве; ка́кѡ рꙋ́цѣ и҆ но́зѣ твоѝ сло́ве, пригвозди́шасѧ ѿ беззако́нныхъ, и҆ кро́вь твою̀ и҆злїѧ́лъ є҆сѝ влⷣко;
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Ꙗ҆́кѡ ви́дѣ тѧ̀ гдⷭ҇и дв҃а и҆ мт҃и твоѧ̀ на крⷭ҇тѣ̀ повѣ́шена дивлѧ́шесѧ, и҆ взира́ющи глаго́лаше: что́ ти возда́ша, и҆̀же мно́гихъ твои́хъ дарѡ́въ насла́ждшїисѧ влⷣко; но молю́сѧ, не ѡ҆ста́ви мѧ̀ є҆ди́нꙋ въ мі́рѣ, но потщи́сѧ воскрⷭ҇нꙋ́ти, совозставлѧ́ѧ пра́ѻтца.
Сла́ва, и҆ ны́нѣ: крⷭ҇тобг҃оро́диченъ:
Подо́бенъ: Зва́нный свы́ше:
Не рыда́й менѐ мт҃и, зрѧ́щи на дре́вѣ повѣ́шена твоего̀ сн҃а и҆ бг҃а, на вода́хъ повѣ́сившаго зе́млю неѡдержи́мѡ, и҆ всю̀ тва́рь созда́вшаго: и҆́бо воскрⷭ҇нꙋ̀, и҆ просла́влюсѧ, и҆ а҆́дѡва ца̑рствїѧ сокрꙋшꙋ̀ крѣ́постїю, и҆ погꙋблю̀ тогѡ̀ си́лꙋ, и҆ свѧ̑занныѧ и҆зба́влю ѿ ѕлодѣ́йства є҆гѡ̀, ꙗ҆́кѡ бл҃гоꙋтро́бенъ, и҆ ѻ҆ц҃ꙋ̀ моемꙋ̀ приведꙋ̀, ꙗ҆́кѡ чл҃вѣколю́бецъ.
Та́же, Свѣ́те ти́хїй: Прокі́менъ днѐ. И҆ Сподо́би гдⷭ҇и въ ве́черъ се́й:
На стїхо́внѣ стїхи̑ры крⷭ҇тны, гла́съ д҃:
Ѻ҆рꙋ́жїе непобѣди́мое хрⷭ҇тѐ, крⷭ҇тъ тво́й да́лъ є҆сѝ на́мъ: и҆ си́мъ побѣжда́емъ прило́ги чꙋжда́гѡ.
Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
Всегда̀ и҆мꙋ́ще хрⷭ҇тѐ, крⷭ҇тъ тво́й на по́мощь, сѣ̑ти вра̑жїѧ ᲂу҆до́бь попира́емъ.
Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.
И҆мꙋ́ще дерзнове́нїе ко сп҃сꙋ ст҃і́и, моли́те непреста́ннѡ за ны̀ грѣ̑шныѧ, ѡ҆ставле́нїе прегрѣше́нїй просѧ́ще, и҆ дꙋша́мъ на́шымъ ве́лїю млⷭ҇ть.
Сла́ва, и҆ ны́нѣ, крⷭ҇тобг҃оро́диченъ: Распина́ема хрⷭ҇та̀ чл҃вѣколю́бца ви́дѧщи пречⷭ҇таѧ, и҆ ре́бра и҆скопова́єма копїе́мъ, пла́чꙋщи вопїѧ́ше: что̀ сїѐ сн҃е мо́й; что̀ тѝ безблагода́тнїи лю́дїе возда́ша, за ꙗ҆̀же сотвори́лъ є҆сѝ дѡ́браѧ и҆̀мъ, и҆ тщи́шисѧ безча́дствовати мѧ̀ вселюбе́знѣйшїй; ᲂу҆дивлѧ́юсѧ бл҃гоꙋтро́бне, твоемꙋ̀ во́льномꙋ распѧ́тїю.
Та́же, Ны́нѣ ѿпꙋща́еши раба̀ твоего̀: Трист҃о́е, по Ѻ҆́ч҃е на́шъ: тропа́рь, є҆ктенїа̀, и҆ ѿпꙋ́стъ.
Во вто́рникъ на повече́рїи,
канѡ́нъ прест҃ѣ́й бцⷣѣ. Гла́съ д҃.
Пѣ́снь а҃
І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.
Неизмѣ́рнꙋю бж҃їю мꙋ́дрость и҆ си́лꙋ ро́ждши пренепоро́чнаѧ, хрⷭ҇та̀ без̾ сѣ́мене пло́тїю, держа́вꙋ крѣ́пости, и҆ бж҃е́ственное вели́чїе стѧжа́ла є҆сѝ ржⷭ҇тво́мъ твои́мъ, бг҃ороди́тельнице.
Ѽ па́че ᲂу҆ма̀ ржⷭ҇тва̀ твоегѡ̀ пречⷭ҇таѧ, и҆́мже ѡ҆богати́сѧ земны́хъ мно́жество нетлѣ́нїемъ, и҆ тѧ̀ ны́нѣ бл҃жи́тъ досто́йнѡ, хода́таицꙋ ѡ҆бновле́нїѧ.
Сла́ва: Болѧ́щаго и҆сцѣлѝ дꙋше́ю и҆ тѣ́ломъ дв҃о, раба̀ твоего̀ ѡ҆сѣне́нїемъ твои́мъ: тѧ́ бо предста́тельницꙋ всѣ̑мъ сꙋ́щымъ въ печа́ли позна́хъ, ꙗ҆́кѡ ро́ждшꙋю сп҃се́нїе на́ше.
И҆ ны́нѣ: Лю́тѣ погрꙋжа́емꙋ въ пꙋчи́нѣ скорбе́й, и҆ бꙋ́рею безмѣ́рныхъ ѡ҆бстоѧ́нїй, сп҃се́нїѧ просте́рши мѝ рꙋ́кꙋ, и҆зведѝ влⷣчце и҆з̾ глꙋбины̀ ѕѡ́лъ.
Пѣ́снь г҃
І҆рмо́съ: Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дх҃о́внѡ ᲂу҆твердѝ въ бж҃е́ственнѣй твое́й сла́вѣ, вѣнцє́въ сла́вы сподо́би.
Кропи́ши и҆сцѣле́нїй стрꙋи̑ болѧ́щымъ дв҃о, всю́дꙋ: тѧ́ бо и҆сто́чника показа̀ млⷭ҇рдїѧ влⷣчце, и҆́же млⷭ҇ти гдⷭ҇ь и҆з̾ тебѐ рожде́йсѧ па́че ᲂу҆ма̀.
Красе́нъ черто́гъ бж҃е́ственномꙋ сло́вꙋ, и҆ бж҃е́ственный невѣ́стникъ вы́ше є҆стества̀, дв҃о мт҃и была̀ є҆сѝ: тѣ́мже млⷭ҇ти твои́хъ щедро́тъ ѿве́рзи мѝ, ко сп҃се́нїю возводѧ́щи.
Сла́ва: Оу҆мертви́сѧ всѧ̀ крѣ́пость моѧ̀ ѿ мно́жества безмѣ́рныхъ ѕѡ́лъ: мно́гими ᲂу҆́бѡ скорбьмѝ ѿча́ѧхсѧ. помозѝ мѝ гпⷭ҇жѐ, ꙗ҆́же жи́знь ро́ждшаѧ, и҆ пла́чꙋщымъ ᲂу҆тѣше́нїе.
И҆ ны́нѣ: Поми́лꙋй є҆ди́на бг҃ома́ти, поми́лꙋй и҆ ᲂу҆ще́дри дꙋ́шꙋ мою̀ ѻ҆каѧ́ннꙋю, потоплѧ́емꙋю бѣ́сы лꙋка́выми и҆ страстьмѝ и҆ пре́жде вре́мене сме́рти моеѧ̀, сїю̀ ѡ҆чи́стити ᲂу҆млⷭ҇рдисѧ.
Пѣ́снь д҃
І҆рмо́съ: Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ тебѐ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ зовѧ́ше: сла́ва си́лѣ твое́й гдⷭ҇и.
Ко́рене и҆ чре́слъ тѧ̀ ца́рскихъ, всѣ́хъ цр҃ь ꙗ҆́кѡ сꙋ́щꙋ вожделѣ́въ, вы́шшꙋ херꙋві̑мъ и҆ серафі̑мъ содѣ́ла, ве́сь бцⷣе все́льсѧ въ тѧ̀.
Человѣ́ческагѡ ра́ди порожде́нїѧ, содѣ́тель воплоща́емь, и҆з̾ тебѐ роди́сѧ и҆ предста́тельницꙋ нело́жнꙋ хрⷭ҇тїа́нѡмъ тѧ̀ показа̀: тѣ́мже къ твоемꙋ̀ кро́вꙋ прибѣга́ю, чⷭ҇таѧ.
Сла́ва: Кро́въ, и҆ застꙋпле́нїе, и҆ прибѣ́жище бꙋ́ди мѝ дв҃о рабꙋ̀ твоемꙋ̀, и҆ и҆сцѣли́ мѧ ѿ безмѣ́рныхъ ѕѡ́лъ, воспѣва́ти тѧ̀ пречⷭ҇таѧ: сла́ва неизрече́нномꙋ ржⷭ҇твꙋ̀ твоемꙋ̀.
И҆ ны́нѣ: Недоꙋмѣ́юсѧ, и҆ слезю̀, и҆ стеню̀ ѿ стра́стныхъ мои́хъ помышле́нїй, и҆ тѧ̀ молю̀: ꙗ҆́кѡ є҆сѝ и҆сто́чникъ млⷭ҇ти, ѿ болѣ́зней мои́хъ и҆зба́ви мѧ̀, ведꙋ́щи къ бж҃е́ственномꙋ ᲂу҆миле́нїю.
Пѣ́снь є҃
І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
И҆сцѣле́нїй во́ды то́чиши при́снѡ дв҃о всѣ̑мъ болѧ́щымъ ꙗ҆́кѡ ѻ҆́блакъ ѡ҆дꙋшевле́нъ сы́й цр҃ѧ̀ хрⷭ҇та̀. тѣ́мже молю́ тѧ прилѣ́жнѡ: ро́сꙋ и҆сцѣле́нїѧ мнѣ̀ болѧ́щемꙋ низпослѝ.
Не преста́й молѧ́щи, є҆го́же родила̀ є҆сѝ бг҃оневѣ́сто дв҃о, ꙗ҆́кѡ сп҃са и҆ влⷣкꙋ, разрѣше́нїе мѝ да́ждь скорбе́й и҆ болѣ́зней, и҆ къ ра́дости нетлѣ́ннѣй мѧ̀ возведѝ, проща́ѧ мѝ прегрѣшє́нїѧ.
Сла́ва: Оу҆пова́нїе мѝ є҆сѝ пречⷭ҇таѧ, и҆ сп҃се́нїю похвала̀. тѣ́мже прибѣга́ю къ твоемꙋ̀ покро́вꙋ: не гнꙋша́йсѧ менѐ, грѣхѝ мно́гими и҆ болѣ́зньми ско́рбными ны́нѣ поглоще́ннагѡ, но предварѝ и҆ сп҃сѝ мѧ̀.
И҆ ны́нѣ: Гро́здъ зрѣ́лый, ка́кѡ на дре́вѣ ви́сиши; сл҃нце сла́вы, ка́кѡ воздви́глсѧ є҆сѝ, свѣ́тъ со́лнца помрачи́вый въ стрⷭ҇ти твое́й; сп҃се, ро́ждшаѧ тѧ̀ а҆́гница дре́вле вопїѧ́ше тѝ, мт҃рски восклица́ющи.
Пѣ́снь ѕ҃
І҆рмо́съ: Прїидо́хъ во глꙋбины̑ мѡрскі́ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но ꙗ҆́кѡ бг҃ъ и҆з̾ глꙋбины̀ возведѝ живо́тъ мо́й многомлⷭ҇тиве.
Зра́къ воспрїѧ́тъ ра́бїй ѿ тебѐ дв҃о, всѣ́хъ цр҃ь и҆ бг҃ъ на́шъ, и҆ вы́шшꙋ тѧ̀ ꙗ҆́кѡ бцⷣꙋ показа̀ херꙋві̑мъ и҆ стра́шныхъ серафі̑мъ.
Ꙗ҆́же є҆ди́на ро́ждши бж҃їю жи́знь, и҆ всѣ̑мъ сп҃се́нїе даю́щаго, ѿча́ѧнна мѧ̀ сꙋ́ща сп҃се́нїю сподо́би, и҆ страсте́й мои́хъ воста́нїе пресѣцы̀.
Сла́ва: Твою̀ пода́ждь по́мощь, и҆ и҆зба́ви мѧ̀ бѣ́дъ и҆ скорбе́й, и҆збавлѧ́ющи мѧ̀ напа́стей и҆ прегрѣше́нїй мои́хъ, ꙗ҆́же всѣ́хъ ро́ждшаѧ и҆збавле́нїе.
И҆ ны́нѣ: Ѡ҆ тебѣ̀ дв҃о, хва́лимсѧ, и҆ тобо́ю лю́тыхъ и҆збавлѧ́емсѧ: надѣ́ющесѧ на тѧ̀ нахожде́нїѧ не бои́мсѧ ѕлочести́выхъ ва̑рваръ, воспѣва́ющїи тѧ̀.
Та́же, Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ,гла́съ д҃:
Дв҃о пренепоро́чнаѧ мт҃и хрⷭ҇та̀ бг҃а, ѻ҆рꙋ́жїе про́йде твою̀ прест҃ꙋ́ю дꙋ́шꙋ, є҆гда̀ распина́ема ви́дѣла є҆сѝ во́лею сн҃а и҆ бг҃а твоего̀: є҆го́же пребл҃гослове́ннаѧ молѧ́щи не преста́й, проще́нїе прегрѣше́нїй на́мъ дарова́ти.
Пѣ́снь з҃
І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.
И҆́зсше ꙗ҆́кѡ скꙋде́ль страстьмѝ всѧ̀ крѣ́пость моѧ̀, и҆ сѐ а҆́дꙋ прибли́жихсѧ, ѿ ᲂу҆́зъ всепа́гꙋбныхъ предварѝ мт҃и бж҃їѧ, и҆ и҆схитѝ ѿ ѡ҆держа́щихъ печа́лей рꙋко́ю ми́лости твоеѧ̀.
Растерза́емѣ ᲂу҆тро́бѣ мое́й ѿ ѕло́бъ многоѡбра́зныхъ, и҆ є҆́же жи́ти растерза́юсѧ мно́жествомъ прегрѣше́нїй и҆ болѣ́зней мои́хъ: но и҆зба́ви мѧ̀ ѿ ѻ҆бои́хъ пречⷭ҇таѧ, жи́знь на́мъ ро́ждшаѧ.
Сла́ва: Црⷭ҇тва хрⷭ҇то́ва всеще́драгѡ, дв҃о пречⷭ҇таѧ, ѿве́рсти мѝ ꙗ҆́кѡ бл҃га́ѧ сподо́би, и҆ болѣ́зней дꙋшетлѣ́нныхъ и҆ нахожде́нїй и҆зба́вити, твои́ми мл҃твами бл҃гослове́ннаѧ.
И҆ ны́нѣ: Ѡ҆бощре́ны болѣ̑зни ра́намъ мои̑мъ ѿ безмѣ́рныхъ мои́хъ прегрѣше́нїй, ведꙋ́тъ въ сме́рть дꙋше́внꙋю и҆ тѣле́снꙋю: но и҆схити́ мѧ влⷣчце, ꙗ҆́кѡ си́льна, ѿ всѧ́кихъ скорбе́й и҆ недꙋ́гѡвъ.
Пѣ́снь и҃
І҆рмо́съ: Ѻ҆́троки бл҃гочести̑выѧ въ пещѝ, ржⷭ҇тво̀ бг҃оро́дичо сп҃сло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Ве́щь страсте́й терноно́сныхъ стѧжа́хъ, и҆ жа́ломъ си́хъ пробода́емь є҆́смь: тѣ́мже ѿча́ѧхсѧ, ᲂу҆́зами подавлѧ́емь є҆́смь и҆ напа́стьми, пречⷭ҇таѧ мт҃и хрⷭ҇та̀ бг҃а: ѿ ни́хже мѧ̀ и҆збавлѧ́ющи, пода́ждь всѣ́хъ прегрѣше́нїй проще́нїе твои́ми мл҃твами.
Свѣ́щнице свѣ́та трисо́лнечнагѡ сꙋ́щи, заре́ю бл҃гоꙋтро́бїѧ твоегѡ̀ тьмꙋ̀ ѿимѝ прегрѣше́нїй мои́хъ бг҃ороди́тельнице, и҆збавле́нїе нꙋ́ждныхъ болѣ́зней подаю́щи, вѣ́рою пою́щемꙋ и҆ превозносѧ́щемꙋ пречⷭ҇тое твоѐ ржⷭ҇тво̀.
Сла́ва: Ве́сь все́льсѧ во чре́во твоѐ, неизглаго́ланнѡ воплоти́сѧ пресꙋ́щный бг҃ъ приснодв҃о, мі́рꙋ застꙋ́пницꙋ тѧ̀, и҆ ѻ҆́бщꙋю по́мощь содѣ́лавъ: тѣ́мже молю̀ тѧ̀, и҆зба́витисѧ лю́тыхъ страсте́й мои́хъ, и҆ ᲂу҆́зъ прегрѣше́нїй.
И҆ ны́нѣ: Въ ча́съ дв҃о, кончи́ны моеѧ̀, рꙋкѝ бѣсо́вскїѧ, и҆ ѡ҆сꙋжде́нїѧ, и҆ ѿвѣ́та и҆ стра́шнагѡ и҆спыта́нїѧ, и҆ мыта́рствъ го́рькихъ, и҆ кнѧ́зѧ лю́тагѡ, и҆ ѻ҆гнѧ̀ вѣ́чнагѡ и҆схити́ мѧ бг҃омт҃и.
Пѣ́снь ѳ҃
І҆рмо́съ: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃ома́тере, и҆ да вопїе́тъ: ра́дꙋйсѧ всебл҃же́ннаѧ бцⷣе, чⷭ҇таѧ приснодв҃о.
Ро́дъ земны́й вознесе́сѧ ржⷭ҇тво́мъ твои́мъ, сыноположе́нїе взе́мъ бж҃е́ственнымъ совокꙋпле́нїемъ: и҆ сликꙋ́етъ нбⷭ҇ное мно́жество со земны́ми, пою́ще тѧ̀ достодо́лжнѡ чⷭ҇таѧ, ꙗ҆́кѡ мт҃рь сꙋ́щꙋ бг҃а на́шегѡ, и҆ мі́рꙋ всемꙋ̀ прибѣ́жище.
Ве́сь бы́въ ѿню́дъ стѧ́гнꙋвъ грѣхѝ мои́ми, ѿ безмѣ́рныхъ ра́нъ и҆ болѣ́зней, твою̀ по́мощь призыва́ю влⷣчце, и҆ застꙋпле́нїе, є҆́же пода́ждь всѣ́хъ и҆збавлѧ́ющи мѧ̀ лю́тыхъ бѣ́дъ и҆ скорбе́й.
Сла́ва: Пѣ́нїе съ пѣ́снею и҆ хвале́нїе сплете́нїѧ ны́нѣ ѿ болѣ́зненныѧ дꙋшѝ приноша́ю съ любо́вїю, тебѣ̀ ро́ждшей є҆стество́мъ хрⷭ҇та̀ бг҃а, є҆го́же бл҃гопребы́тна прїи́мши, и҆ прошє́нїѧ моѧ̑ бцⷣе всѧ̑ и҆спо́лнши, мл҃твами твои́ми соблюдѝ.
И҆ ны́нѣ: Просвѣтѝ, чⷭ҇таѧ бг҃ороди́тельнице, дꙋ́ши моеѧ̀ ѻ҆́чи, да не пости́гнетъ менѐ грѣхо́внаѧ тьма̀ тѧ́жкаѧ, нижѐ глꙋбина̀ покры́етъ мѧ̀ ѿча́ѧнїѧ: но сама̀ мѧ̀ сп҃сѝ, и҆ ѡ҆кормѝ, предста́тельнице вѣ́рныхъ непосты́днаѧ.
Та́же, Досто́йно є҆́сть: И҆ покло́нъ до землѝ. Трист҃о́е, и҆ по Ѻ҆́ч҃е на́шъ: тропарѝ. И҆ про́чее ѻ҆бы́чно, и҆ ѿпꙋ́стъ.
Въ сре́дꙋ ᲂу҆́тра,
по а҃-мъ стїхосло́вїи, сѣда́льны крⷭ҇тны. Гла́съ д҃:
И҆скꙋпи́лъ ны̀ є҆сѝ ѿ клѧ́твы зако́нныѧ честно́ю твое́ю кро́вїю, на крⷭ҇тѣ̀ пригвозди́всѧ, и҆ копїе́мъ пробо́дьсѧ, безсме́ртїе и҆сточи́лъ є҆сѝ человѣ́кѡмъ: сп҃се на́шъ сла́ва тебѣ̀.
Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть.
На крⷭ҇тѣ́ тѧ сп҃се, пригвозди́ша і҆ꙋдє́и, и҆́мже ѿ ꙗ҆зы̑къ на́съ призва́лъ є҆сѝ хрⷭ҇тѐ бж҃е на́шъ: просте́рлъ є҆сѝ дла̑ни на не́мъ во́лею твое́ю, копїе́мъ же въ ре́бра твоѧ̑ прїѧ́лъ є҆сѝ пробости́сѧ мно́жествомъ щедро́тъ твои́хъ, є҆ди́не чл҃вѣколю́бче.
Сла́ва, и҆ ны́нѣ, крⷭ҇тобг҃оро́диченъ: Безневѣ́стнаѧ мт҃и твоѧ̀ хрⷭ҇тѐ, ꙗ҆́кѡ ᲂу҆зрѣ̀ на крⷭ҇тѣ́ тѧ возвыша́ема, рыда́ющи ма́терски такова̑ѧ вѣща́ше: что̀ но́вое, и҆ стра́нное сїѐ чꙋ́до, сн҃е мо́й; ка́кѡ беззако́нный со́нмъ ко крⷭ҇тꙋ́ тѧ пригвожда́етъ всѣ́хъ жизнода́вца, свѣ́те мо́й сладча́йшїй;
По в҃-мъ стїхосло́вїи сѣда́ленъ, гла́съ д҃:
Ско́рѡ предварѝ, пре́жде да́же не поработи́мсѧ врагѡ́мъ хꙋ́лѧщымъ тѧ̀, и҆ претѧ́щымъ на́мъ хрⷭ҇тѐ бж҃е на́шъ: погꙋбѝ крⷭ҇то́мъ твои́мъ борю́щыѧ на́съ, да ᲂу҆разꙋмѣ́ютъ, ка́кѡ мо́жетъ правосла́вныхъ вѣ́ра, мл҃твами бцⷣы, є҆ди́не чл҃вѣколю́бче.
Сті́хъ: Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ.
На крⷭ҇тѣ̀ пригво́ждьсѧ на ло́бнѣмъ во́лею свое́ю, мою̀ дре́внюю ꙗ҆́звꙋ грѣхо́внꙋю и҆сцѣли́лъ є҆сѝ влⷣко, мно́гїѧ ра́ди бл҃госты́ни: ꙗ҆́кѡ положи́лсѧ є҆сѝ хотѣ́нїемъ чл҃вѣколю́бче сп҃се на́шъ, за ро́дъ человѣ́ческїй, и҆ ѿ ре́бръ твои́хъ и҆ска́палъ є҆сѝ кро́вь и҆ во́дꙋ, вѣ́рою пою́щымъ тѧ̀.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Си́лою крⷭ҇тною подви́гшесѧ до́брѣ, сопоста́та врага̀ низложи́сте крѣ́пкѡ, терпѣ́нїемъ ва́шимъ ст҃і́и стрⷭ҇тоно́сцы: тѣ́мже чєстны́ѧ соверша́юще вѣ́рнѡ па̑мѧти ва́шѧ, ѡ҆свѧща́емсѧ дѣ́йствомъ, и҆ бл҃года́тїю дх҃а всест҃а́гѡ мл҃твами ва́шими, сщ҃е́ннїи хрⷭ҇тѡ́вы ѻ҆рꙋ́жницы, ѡ҆ мі́рѣ сп҃сꙋ̀ моли́тесѧ.
Сла́ва, и҆ ны́нѣ, крⷭ҇тобг҃оро́диченъ: Дв҃а и҆ а҆́гница ви́дѣвши на крⷭ҇тѣ̀, без̾ сѣ́мене и҆з̾ неѧ̀ а҆́гнца ро́ждшагосѧ, и҆ копїе́мъ прободе́на, печа́ли ᲂу҆ѧ́звена стрѣла́ми вопїѧ́ше, болѣ́зненнѡ восклица́ющи: что̀ но́вое та́инство; ка́кѡ ᲂу҆мира́еши, и҆́же живота̀ є҆ди́нъ гдⷭ҇ь; тѣ́мже воскреснѝ, па́дшаго совоздвиза́ѧ пра́ѻтца.
По г҃-мъ стїхосло́вїи сѣда́льны, гла́съ д҃:
Въ раи́ мѧ лю́тѣ па́дшаго, человѣкоꙋбі́йцы го́рькимъ совѣ́томъ, на кра́нїевомъ мѣ́стѣ па́ки воздви́глъ є҆сѝ хрⷭ҇тѐ, дре́вомъ ᲂу҆врачева́въ ю҆́же ѿ дре́ва клѧ́твꙋ, ᲂу҆би́вый ле́стїю ᲂу҆мертви́вшаго мѧ̀ ѕмі́ѧ, и҆ дарова́лъ мѝ є҆сѝ бж҃е́ственнꙋю жи́знь. сла́ва бж҃е́ственномꙋ распѧ́тїю твоемꙋ̀ гдⷭ҇и.
На дре́вѣ разꙋмѣ́въ тѧ̀, повѣ́шена сл҃нца пра́веднаго хрⷭ҇тѐ, со́лнце свѣ́тъ помрачѝ, тва́рь же подвиза́шесѧ, и҆ ме́ртвїи ꙗ҆́кѡ ѿ сна̀ ско́рѡ и҆з̾ гробѡ́въ воста́хꙋ сло́ве, бж҃е́ственнꙋю пѣсносло́вѧще держа́вꙋ сла́вы твоеѧ̀.
Сла́ва, и҆ ны́нѣ, крⷭ҇тобг҃оро́диченъ: Дв҃о пренепоро́чнаѧ мт҃и хрⷭ҇та̀ бг҃а, ѻ҆рꙋ́жїе про́йде твою̀ прест҃ꙋ́ю дш҃ꙋ, є҆гда̀ распина́ема ви́дѣла є҆сѝ во́лею, сн҃а твоего̀ и҆ бг҃а: є҆го́же пребл҃гослове́ннаѧ молѧ́щи не преста́й, проще́нїе прегрѣше́нїй на́мъ дарова́ти.
Канѡ́нъ чⷭ҇тно́мꙋ и҆ животворѧ́щемꙋ крⷭ҇тꙋ̀, и҆ ст҃ы̑мъ мч҃нкѡмъ. Творе́нїе і҆ѡ́сифово, [є҆гѡ́же краегране́сїе сицево̀: Крⷭ҇тъ є҆́сть ѻ҆рꙋ́жїе во сп҃се́нїе.] Гла́съ д҃.
Пѣ́снь а҃
І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Пропны́й нб҃о, распросте́рлъ є҆сѝ і҆и҃се дла̑ни своѧ̑, ꙗ҆зы́ки дале́че сꙋ́щыѧ ѿ тебѐ, ꙗ҆́кѡ бл҃гъ и҆ млⷭ҇рдъ, свѣ́тлѡ къ себѣ̀ призыва́ѧ.
Крⷭ҇то́мъ твои́мъ хрⷭ҇тѐ мо́й сло́ве, ѡ҆гради́ мѧ, ꙗ҆́кѡ да не бꙋ́дꙋ ᲂу҆ловле́нїе во́лкꙋ, моеѧ̀ и҆́щꙋщꙋ поги́бели, и҆ по всѧ̑ дни̑ сѣ̑ти мнѣ̀, и҆ ловлє́нїѧ гото́вѧщꙋ.
Мч҃нченъ: Болѣ́зньми свои́ми мч҃нцы, болѣ́знемъ всѣ̑мъ хода́таѧ низложи́сте, и҆ ны́нѣ наслѣ́довасте неболѣ́зненнꙋю жи́знь, и҆ всѧ́кꙋ болѣ́знь ѡ҆блегчева́ете бл҃же́ннїи, всегда̀ ѿ дꙋ́шъ и҆ тѣле́съ на́шихъ.
Мч҃нченъ: Нерѣши́мыми ᲂу҆́зами, вы̀ ст҃і́и свѧза́сте многоко́зненнаго, за хрⷭ҇та̀ вѧ́жеми мꙋ́дрїи, свѧза́вшагосѧ во́лею, и҆ всѧ́кꙋю пре́лесть разрꙋши́вша: тѣ́мже досто́йнѡ ᲂу҆бл҃жа́етесѧ
Бг҃оро́диченъ: Дв҃а по ржⷭ҇твѣ̀, пребыла̀ є҆сѝ, бг҃а бо родила̀ є҆сѝ пречⷭ҇таѧ воздви́жена на крⷭ҇тѣ̀ и҆ земны̑ѧ совоздви́гшаго. тѣ́мже тѧ̀ всѝ вѣ́рнїи велегла́снѡ ᲂу҆бл҃жа́емъ.
Дрꙋгі́й канѡ́нъ прест҃ѣ́й бцⷣѣ, [є҆гѡ́же краегране́сїе сицево̀: Бцⷣѣ дв҃ѣ мольбꙋ̀ приноша́ю]. Гла́съ д҃.
Пѣ́снь а҃
І҆рмо́съто́йже.
Ꙗ҆́кѡ сꙋ́щи чистѣ́йшаѧ пречⷭ҇таѧ всѧ́кїѧ тва́ри, є҆́же нечи́стыми страстьмѝ, лю́тѣ ѻ҆скверне́нное се́рдце моѐ, чи́стою мл҃твою твое́ю бг҃ороди́тельнице, ѡ҆чи́сти. [Два́жды.]
Сле́зъ и҆ воздыха́нїй и҆зба́ви мѧ̀, предлежа́щихъ мѝ въ бꙋ́дꙋщемъ стра́шнѣмъ сꙋдѣ̀, бг҃опрїѧ́тными мл҃твами твои́ми, дв҃о мт҃и пречⷭ҇таѧ, ꙗ҆̀же къ зижди́телю и҆ бг҃ꙋ на́шемꙋ.
Ꙗ҆́же є҆ди́на па́че ᲂу҆ма̀, ржⷭ҇тво́мъ твои́мъ свободи́ла є҆сѝ ѿ клѧ́твы ро́дъ человѣ́ческїй, плотски́ми страстьмѝ порабоще́на мѧ̀, пречⷭ҇таѧ, твои́ми мольба́ми свободѝ.
Пѣ́снь г҃
І҆рмо́съ: Весели́тсѧ ѡ҆ тебѣ̀ цр҃ковь твоѧ̀ хрⷭ҇тѐ, зовꙋ́щи: ты̀ моѧ̀ крѣ́пость гдⷭ҇и, и҆ прибѣ́жище и҆ ᲂу҆твержде́нїе.
Воздвиза́емь на крⷭ҇тъ, низве́ржєныѧ во тлю̀ возне́слъ є҆сѝ хрⷭ҇тѐ бж҃е на́шъ, и҆ врага̀ све́рглъ є҆сѝ влⷣко.
Мечѝ вра̑жїѧ притꙋпи́шасѧ, тебѣ̀ прободе́нꙋ въ ре́бра сло́во ѻ҆́ч҃ее ѵ҆поста́сное, и҆ є҆де́мъ ѿве́рзесѧ.
Мч҃нченъ: Ѻ҆́гненными рѣка́ми прелє́стныѧ рѣ́ки ᲂу҆кроти́ша мч҃нцы, и҆ пла́мень ᲂу҆гаси́ша многобо́жїѧ.
Мч҃нченъ: Распина́еми, и҆ ноготьмѝ стрꙋ́жеми хрⷭ҇тѡ́вы мч҃нцы, врагѡ́въ и҆ ѕмі́ѧ мече́мъ терпѣ́нїѧ закла́сте.
Бг҃оро́диченъ: Непоро́чнаѧ а҆́гница, ви́дѧщи тѧ̀ влⷣко, воздви́жена на крⷭ҇тѣ̀, плаче́внѡ рыда́ющи, поѧ́ше держа́вꙋ твою̀.
И҆́нъ
І҆рмо́съ: Не мꙋ́дростїю, и҆ си́лою, и҆ бога́тствомъ хва́лимсѧ, но тобо́ю ѻ҆́ч҃ею ѵ҆поста́сною мꙋ́дростїю хрⷭ҇тѐ: нѣ́сть бо ст҃ъ, па́че тебѐ чл҃вѣколю́бче.
Превы́шшꙋю херꙋві̑мъ молю́ тѧ влⷣчце, низпа́дшїй мо́й ᲂу҆́мъ напа́стьми ѕмі́евыми, страсте́й тѣле́сныхъ покажѝ вы́шшїй. [Два́жды.]
Во и҆спыта́нїи стра́шнѣмъ, є҆гда̀ хо́щетъ мѧ̀ гдⷭ҇ь ѡ҆сꙋди́ти многосогрѣши́вшаго, да ѡ҆брѧ́щꙋ тѧ̀ всенепоро́чнаѧ, и҆збавлѧ́ющꙋю мѧ̀ ѡ҆сꙋжде́нїѧ.
Щедро́тами твои́ми немилосє́рдныѧ моѧ̑ нра́вы преложѝ, ми́лостїю твое́ю хрⷭ҇тѐ, и҆ неми́лостива мѧ̀ сꙋ́ща сп҃сѝ, мольба́ми ро́ждшїѧ тѧ̀.
Пѣ́снь д҃
І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й гдⷭ҇и.
Воздви́жена тѧ̀ на дре́во хотѣ́нїемъ сл҃нца сла́вы, смотрѧ́ѧ со́лнце тьмо́ю ѡ҆блече́сѧ, и҆ ка́менїе распада́шесѧ, и҆ цр҃ко́внаѧ завѣ́са раздра́сѧ.
Распина́емꙋ тебѣ̀ сп҃се, и҆ копїе́мъ пробода́емꙋ, ѡ҆браща́ющеесѧ ѻ҆рꙋ́жїе даѧ́ше плещы̀, повелѣ́нїемъ твои́мъ гдⷭ҇и, разбо́йникꙋ бл҃гонра́вномꙋ, пѣсносло́вѧщꙋ держа́вꙋ твою̀.
Мч҃нченъ: Ѡ҆гражда́еми ѻ҆рꙋ́жїемъ крⷭ҇та̀ твоегѡ̀ стрⷭ҇тоте́рпцы твоѝ гдⷭ҇и, не ᲂу҆ѧ́звлени ꙗ҆ви́шасѧ стрѣло́ю ѕло́бы, и҆ стѣ́ны разори́ша і҆дѡлобѣ́сїѧ неꙋтверждє́ныѧ.
Мч҃нченъ: Ꙗ҆́коже свѧщє́нїѧ непорѡ́чнаѧ, и҆ жє́ртвы, и҆ приношє́нїѧ всесожже́нїѧ цѣ́лы, за млⷭ҇рдїе ѡ҆бнища́вшемꙋ гдⷭ҇еви, мч҃нцы приведо́стесѧ, болѣ́знемъ воздаѧ̑нїѧ прїе́млюще.
Бг҃оро́диченъ: Ꙗ҆́же безлѣ́тнаго въ лѣ́то поро́ждши, и҆ дв҃ство непоро́чно є҆ди́на стѧжа́вши, на дре́во воздви́жена ꙗ҆́кѡ ви́дѣвши гдⷭ҇а, болѣ́зньми дꙋ́шꙋ свою̀ раздѣлѧ́ше.
И҆́нъ
І҆рмо́съто́йже.
Свѧще́нїѧ сꙋ́щи бж҃е́ственный до́мъ, и҆сточи́вшагѡсѧ на бл҃годѣѧ̑нїѧ своегѡ̀ созда́нїѧ пречⷭ҇таѧ, дꙋ́шꙋ мою̀ ѡ҆ст҃ѝ, и҆ помышлє́нїѧ просвѣтѝ. [Два́жды.]
Вѣ́емо вѣ́тромъ ѕло́бы помышле́нїе моѐ, и҆ лѣ́ностїю всѐ погрꙋжа́емо, мл҃твами твои́ми ᲂу҆твердѝ влⷣчце, и҆ ѿ нападе́нїѧ и҆схитѝ.
Пала́тꙋ цр҃е́вꙋ нбⷭ҇нꙋю ѡ҆дꙋшевле́ннꙋю, ны́нѣ молю́ тѧ дв҃о: до́мъ ст҃ы́ѧ трⷪ҇цы, мл҃твами твои́ми покажи́ мѧ, верте́пъ разбо́йникѡмъ пребыва́ющаго.
Пѣ́снь є҃
І҆рмо́съ: Ты̀ гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й ѡ҆браща́ѧй и҆з̾ мра́чна невѣ́дѣнїѧ, вѣ́рою воспѣва́ющыѧ тѧ̀.
Прободє́нымъ твои̑мъ ре́брѡмъ, нетлѣ́нїѧ и҆сточа́еши мнѣ̀ стрꙋи̑ бж҃е́ствєнныѧ, ѽ влⷣко, ребра̀ престꙋпле́нїемъ, въ тлѣ́нїе попо́лзшемꙋсѧ.
Чⷭ҇тны́й крⷭ҇тъ тво́й, на врагѝ є҆́сть побѣ́да: є҆го́же да́лъ є҆сѝ на́мъ сло́ве, дꙋша́мъ во сп҃се́нїе, вѣ́рою воспѣва́ющымъ тѧ̀.
Мч҃нченъ: Со ѻ҆́гненными слꙋжи́тельми ме́ртвїи ны́нѣ совокꙋпи́шасѧ, ѻ҆́гнь веще́ственный проше́дше вели́кихъ мꙋ́къ, ꙗ҆́кѡ мч҃нцы пресвѣ́тлїи.
Мч҃нченъ: Рꙋши́мѣ пло́ти мно́гими страда́ньми, неразрꙋше́нна къ зижди́телю дꙋше́внаѧ ᲂу҆твержда́шесѧ мч҃нкѡвъ любо́вь.
Бг҃оро́диченъ: И҆́же є҆ди́нъ бл҃гі́й, вше́дый во чре́во твоѐ нетлѣ́нное пречⷭ҇таѧ, воплоща́емь ꙗ҆ви́сѧ и҆ ра́спѧтъ: ꙗ҆́кѡ да ѿ и҆стлѣ́нїѧ на́съ и҆зба́витъ.
И҆́нъ
І҆рмо́съ: Нечести́вїи не ᲂу҆́зрѧтъ сла́вы твоеѧ̀ хрⷭ҇тѐ, но мы̀ тѧ̀ є҆диноро́дне, ѻ҆ч҃ескїѧ сла́вы сїѧ́нїе бж҃ества̀, ѿ но́щи ᲂу҆́тренююще, воспѣва́емъ тѧ̀ чл҃вѣколю́бче.
А҆́гница, ро́ждшаѧ а҆́гнца бж҃їѧ, дꙋ́шꙋ мою̀ взыщѝ прельще́ннꙋю навѣ́томъ ѕмїи́нымъ, и҆ на гора́хъ влⷣчце, заблꙋжда́емꙋю престꙋпле́нїемъ.
Те́плою мл҃твою твое́ю, мра́зомъ лю́тымъ померза́емꙋю дꙋ́шꙋ мою̀, къ теплотѣ̀ зижди́телѧ бж҃е́ственныѧ любвѐ, бл҃гоче́стнѡ сподви́гни бцⷣе приснодв҃о.
Ꙗ҆́же до́браѧ и҆ непоро́чнаѧ въ жена́хъ чⷭ҇таѧ, ѻ҆каѧ́ннꙋю мою̀ дꙋ́шꙋ стра́стнагѡ поро́ка ны́нѣ свободѝ, и҆ чи́стѣ пожи́ти мѝ, мл҃твами твои́ми ᲂу҆стро́й.
Дꙋ́шꙋ мою̀ сохранѝ ꙗ҆́кѡ зѣ́ницꙋ ѻ҆́ка, под̾ кро́вомъ крилꙋ̀ твоє́ю бл҃га́ѧ пречⷭ҇таѧ, и҆ ѿ дꙋхѡ́въ лꙋка́вствїѧ, томле́нїѧ и҆ мꙋче́нїѧ и҆зба́ви мѧ̀.
Пѣ́снь ѕ҃
І҆рмо́съ: Пожрꙋ́ ти со гла́сомъ хвале́нїѧ гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Всѧ́кїѧ вы́ше че́сти пребо́льшїй сы́й, ѡ҆безче́ститисѧ претерпѣ́лъ є҆сѝ, ꙗ҆́кѡ да мѧ̀ ѕлѣ̀ ѡ҆безче́стившагосѧ почти́ши, и҆ крⷭ҇то́мъ сп҃се́ши чл҃вѣколю́бче.
На дре́во возноси́мь и҆ ме́ртвъ ᲂу҆́бѡ бы́лъ є҆сѝ гдⷭ҇и, ᲂу҆мертви́телѧ же сотвори́въ ме́ртва дꙋшѝ моеѧ̀, и҆ всѧ́кагѡ и҆спо́лнена стꙋда̀: и҆ ны́нѣ тво́рче мо́й, пою̀ твою̀ си́лꙋ.
Мч҃нченъ: Оу҆ѧ́звенъ бы́сть ᲂу҆ѧзви́вый ва́съ вселꙋка́вый, неисцѣ́льными мꙋ́ками, и҆ нога́ми ва́шими мч҃нцы, низложи́сѧ, и҆ зри́мь є҆́сть ѿ всѣ́хъ нарꙋга́емь.
Мч҃нченъ: И҆сцѣлє́нїѧ и҆сточа́етъ мч҃нческихъ моще́й пра́хъ лежа́щїй во гро́бѣ, и҆ ꙗ҆́коже пра́хъ бѣ́сы разрꙋша́етъ, и҆ разли̑чныѧ и҆сцѣлѧ́етъ человѣ́кѡвъ бѡлѣ́зни.
Бг҃оро́диченъ: Гвоздьми́ тѧ законопрестꙋ́пныхъ собо́ръ пригвоздѝ на крⷭ҇тѣ̀, и҆ печа́ли ны́нѣ ѻ҆рꙋ́жїемъ моѐ се́рдце растерза́ю, ѽ сн҃е мо́й! дв҃а вопїѧ́ше слезѧ́щи.
И҆́нъ І҆рмо́съ то́йже.
Сме́рти потреби́тель бы́сть ржⷭ҇тво̀ твоѐ дв҃о, ᲂу҆мира́ющымъ же живо́тъ и҆ и҆збавле́нїе. сегѡ̀ ра́ди молю́ тѧ: дꙋ́шꙋ мою̀ ᲂу҆мерщвле́ннꙋю воскр҃сѝ.
Прострѝ мнѣ̀ по́мощи рꙋ́кꙋ чл҃вѣколю́бче, въ пꙋчи́нѣ жите́йстѣй ѡ҆бꙋрева́емꙋ, мольба́ми мт҃ре твоеѧ̀, и҆ вы́шнихъ неизче́тныхъ си́лъ.
Село̀ є҆́же бж҃е́ственный возраста́вшее кла́съ, ѡ҆сла́бленнꙋю дꙋ́шꙋ мою̀, и҆ гла́домъ бж҃е́ственныхъ дѣѧ́нїй и҆ста́емꙋю не пре́зри, но напита́й сн҃а твоегѡ̀ бж҃е́ственною бл҃года́тїю.
Оу҆спѝ стра̑стнаѧ двиза̑нїѧ тѣлесѐ и҆ взыгра̑нїѧ моѧ̑ плотска̑ѧ ᲂу҆мꙋ̀ повинѝ ꙗ҆́коже жребѧ̀, ᲂу҆спи́вши чⷭ҇таѧ, сно́мъ твои́хъ мл҃твъ.
Пѣ́снь з҃
І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Распѧ́тсѧ хотѧ́й на дре́вѣ на́гъ, є҆ди́не безсме́ртный, ѡ҆блача́ѧй нб҃о ѻ҆́блаки, и҆ и҆́же дре́вле пра́ѻтца ѡ҆бнажи́вшаго, ѡ҆бле́клъ є҆сѝ въ стꙋ́дъ вѣ́чный.
На крⷭ҇тъ возне́слсѧ є҆сѝ, и҆ пады́й а҆да́мъ возста́лъ є҆́сть: копїе́мъ прободе́нъ бы́лъ є҆сѝ въ ре́бра влⷣко, и҆ ꙗ҆́звꙋ сме́ртнꙋю прїѧ́тъ многоко́зненный, бл҃гослове́на держа́ва твоѧ̀ гдⷭ҇и.
Мч҃нченъ: Краснѣ́йше краснѣ́йшемꙋ сло́вꙋ соединѧ́еми, всехва́льнїи страда́льцы, и҆ мі́ра ѿню́дъ ѿлꙋчи́стесѧ, вѧ́жеми и҆ сокрꙋша́еми, и҆ врагꙋ̀ при́снѡ запина́юще.
Мч҃нченъ: Стѣ́ны пре́лести ᲂу҆твержде́нїѧ низложи́сте бж҃е́ственными страда́ньми вои́стиннꙋ сла́внїи страда́льцы, и҆ вѣ̑рнымъ стѣна̀ ꙗ҆ви́стесѧ, и҆ храни̑лища, ва́съ бл҃гоче́стнѡ бл҃жа́щымъ.
Бг҃оро́диченъ: Въ пещѝ ро́сꙋ ꙗ҆́вльшаго хрⷭ҇та̀ бг҃а, ѻ҆трокови́це, ника́коже ѡ҆па́льша чре́во твоѐ, ви́дѧщи повѣ́шена на дре́вѣ, сла́влѧше є҆́же па́че ᲂу҆ма̀ твоегѡ̀ соше́ствїе.
И҆́нъ І҆рмо́съ то́йже.
Бж҃е́ственнаѧ горо̀ ѻ҆трокови́це, ѿ неѧ́же ка́мень ѿсѣче́сѧ, сокрꙋши́вый столпы̀ і҆́дѡльскїѧ, дꙋшѝ моеѧ̀ и҆стꙋка̑ннаѧ, и҆ се́рдца моегѡ̀ ѡ҆камене́нное ѿженѝ недоꙋмѣ́нїе.
Не поколеба́сѧ ѻ҆трокови́це, ꙗ҆́коже прїе́мшаѧ во ᲂу҆тро́бѣ твое́й, презрѣ́нїемъ коле́блющаго зе́млю, и҆ ꙗ҆̀же на не́й, є҆гда̀ хо́щетъ: тѣ́мже ᲂу҆тверди́ мѧ, прило́ги вра́жїими коле́блемаго.
Низлага́ющи мѝ плѡтска́ѧ мꙋдрова̑нїѧ, всего́ мѧ бцⷣе, покажѝ дх҃о́вна добродѣ́тельми ᲂу҆кра́шена, є҆го́же вселꙋка́вый сластьмѝ некрасото́ю помрачѝ.
Бж҃е́ственный ѻ҆крі́не милосе́рдїѧ и҆ бл҃гости и҆сточи́ ми ѡ҆би́льнѡ бога́тство твои́хъ щедро́тъ, скве́рнꙋ прегрѣше́нїй мои́хъ ѡ҆мыва́ющи, и҆ плотско́е ᲂу҆гасѝ разжже́нїе.
Пѣ́снь и҃
І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́сашесѧ, бл҃гоче́стїѧ рачи́тели ѻ҆́троцы, взыва́ше: бл҃гослови́те всѧ̑ дѣла̀ гдⷭ҇нѧ гдⷭ҇а.
Просте́ръ дла̑ни на крⷭ҇тѣ̀ влⷣко, рꙋкѝ неꙋдержа́нныѧ хотѧ̀ и҆сцѣли́ти прегрѣшє́нїѧ: гвоздьми́ же пригвозди́лсѧ є҆сѝ гдⷭ҇и, ве́сь ра́зꙋмъ первозда́ннагѡ ѿе́млѧ стра́стный, пою́ща: бл҃гослови́те всѧ̑ дѣла̀ гдⷭ҇нѧ гдⷭ҇а.
Раздира́етсѧ рꙋкописа́нїе первозда́ннагѡ а҆да́ма, прободе́нїемъ бж҃е́ственныхъ ре́бръ твои́хъ: ка́плѧми же кро́ве влⷣко, ѡ҆свѧща́етсѧ всѧ̀ землѧ̀, во гла́сѣхъ бл҃годаре́нїѧ при́снѡ зовꙋ́щи: бл҃гослови́те всѧ̑ дѣла̀ гдⷭ҇нѧ гдⷭ҇а.
Мч҃нченъ: Стоѧ́хꙋ посредѣ̀ ѻ҆гнѧ̀, ꙗ҆́коже ѡ҆роша́еми, и҆ неѡпалѧ́еми всесла́внїи мч҃нцы, и҆ ѻ҆́троческꙋю воспѣва́юще въ согла́сїи та́йнѣмъ, вои́стиннꙋ бж҃е́ственнꙋю пѣ́снь: бл҃гослови́те всѧ̑ дѣла̀ гдⷭ҇нѧ гдⷭ҇а.
Мч҃нченъ: Непостоѧ́нный терпѧ́ще ѻ҆́гнь произволе́нїемъ, тьмо́ю мꙋ́къ не приложи́стесѧ къ сꙋетѣ̀ мч҃нцы, но ѡ҆ бз҃ѣ ᲂу҆крѣплѧ́еми, притеко́сте къ свѣ́тꙋ незаходи́момꙋ, вопїю́ще: бл҃гослови́те всѧ̑ дѣла̀ гдⷭ҇нѧ гдⷭ҇а.
Бг҃оро́диченъ: Оу҆мерщвлѧ́ема зрѧ́щи хрⷭ҇та̀, многопѣ́таѧ влⷣчца, и҆ ᲂу҆мертви́вшаго человѣ́ки ᲂу҆мерщвлѧ́юща врага̀, ꙗ҆́кѡ влⷣкꙋ поѧ́ше пла́чꙋщи, и҆ долготерпѣ́нїю є҆гѡ̀ дивѧ́щисѧ вопїѧ́ше: бл҃гослови́те всѧ̑ дѣла̀ гдⷭ҇нѧ гдⷭ҇а.
И҆́нъ І҆рмо́съ то́йже.
Зрѣ́лъ пло́дъ родила̀ є҆сѝ влⷣчце, ѿ негѡ́же сме́рть ꙗ҆́дши поги́бе. тѣ́мже зовꙋ́ ти, плодо́мъ грѣха̀ ᲂу҆мерщвле́наго мѧ̀ льсти́внѡ, ѡ҆живѝ пою́ща: бл҃гослови́те всѧ̑ дѣла̀ гдⷭ҇нѧ гдⷭ҇а.
Оу҆спѝ движе́нїе стра́стное мы́сли моеѧ̀, неꙋсы́пною твое́ю мл҃твою, пречⷭ҇таѧ влⷣчце, и҆ возста́ви мѧ̀ ѡ҆ сна̀ лѣ́ностнагѡ пѣ́ти въ бо́дрости дꙋшѝ: бл҃гослови́те всѧ̑ дѣла̀ гдⷭ҇нѧ гдⷭ҇а.
Расто́ргни прегрѣше́нїй мои́хъ плени́цꙋ, и҆ тѣлє́сныѧ воста̑нїѧ ᲂу҆тишѝ бцⷣе: лꙋка̑ваѧ же посѣцы̀ ᲂу҆мышлє́нїѧ, и҆ ѡ҆чи́сти ѿ та́йныхъ помышле́нїй ско́рѡ раба̀ твоего̀, всѣ́хъ вѣ́рныхъ предста́тельнице и҆ и҆збавле́нїе.
Не бои́шисѧ ли, ѻ҆каѧ́ннаѧ дꙋшѐ, та́мѡ клеветни̑къ клеве́щꙋщихъ твоѧ̑ ѕла̑ѧ дѣѧ̑нїѧ безчи́слєннаѧ; сегѡ̀ ра́ди пока́йсѧ ко пребл҃го́мꙋ, и҆ спосо́бницꙋ є҆ди́нꙋ пречⷭ҇тꙋю прїимѝ: та́ бо є҆́сть человѣ́кѡмъ прибѣ́жище.
Пѣ́снь ѳ҃
І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебѐ дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ тѧ̀ бцⷣе велича́емъ.
Сѐ жи́знь повѣ́шена на крⷭ҇тѣ̀ всѣ̑мъ ꙗ҆ви́сѧ: со́лнце же тогѡ̀ не терпѧ́щи лꙋчы̀ ѡ҆ставлѧ́етъ, и҆ землѧ̀ коле́блетсѧ, и҆ помышлє́нїѧ ᲂу҆твержда́ютсѧ на бл҃гоче́стїи и҆ чистотѣ̀.
Ѽ ка́кѡ тѧ̀ законода́вца беззако́нный собо́ръ ѡ҆сꙋжда́етъ і҆и҃се мо́й, на дре́вѣ ᲂу҆мре́ти, живота̀ всѣ́хъ сꙋ́ща и҆ гдⷭ҇а, и҆ ра́ди страсте́й всѣ̑мъ человѣ́кѡмъ и҆сточа́юща безсме́ртїе;
Мч҃нченъ: Оу҆сты̀ ва́шими бг҃осло́вными проповѣ́дасте всемꙋ́дреннѡ воплоще́нїе сло́ва бж҃їѧ, посредѣ̀ законопрестꙋ́пныхъ вра̑гъ всехва́льнїи: и҆ сщ҃е́ннѡ пострада́вше, побѣ́ды вѣнцы̀ вѣнча́стесѧ.
Мч҃нченъ: Ꙗ҆́кѡ свѣтлоднє́вныѧ ѕвѣ́зды, всю̀ тва́рь ѡ҆зарѧ́ете страда́нїй сщ҃е́нныхъ блиста́ньми, и҆ и҆сцѣле́нїй бж҃е́ственными свѣтлостьмѝ, и҆ страсте́й разорѧ́ете но́щь глꙋбо́кꙋю бж҃е́ственнїи мч҃нцы.
Бг҃оро́диченъ: Просвѣтѝ чⷭ҇таѧ дꙋ́шꙋ мою̀ ѿ грѣхѡ́въ ѡ҆мраче́нꙋю, и҆ ѿженѝ ѕѡ́лъ мои́хъ ѻ҆́блаки, свѣ́та ѻ҆́блаче, ꙗ҆́же помрачи́вшеесѧ со́лнце дре́вле ви́дѣвши внегда̀ распѧ́тисѧ безсме́ртномꙋ.
И҆́нъ І҆рмо́съ то́йже.
Расто́ргни соꙋ́зъ ѕѡ́лъ мои́хъ бж҃е́ственнымъ копїе́мъ сн҃а твоегѡ̀, и҆ разрѣшѝ ѻ҆каѧ́ннꙋю мою̀ дꙋ́шꙋ, ѡ҆кова́ннꙋю и҆ бѣ́дствꙋющꙋю, и҆ къ любвѝ привѧжѝ, дв҃о мт҃и бг҃а на́шегѡ.
Ꙗ҆́же нб҃съ ши́ршаѧ дв҃о, ᲂу҆тѣсне́ное моѐ се́рдце всѧ́кимъ прило́гомъ сопроти́внымъ, въ широтѣ̀ безстра́стїѧ возведѝ тѣ́сною стезе́ю ходи́ти мѧ̀ ᲂу҆крѣплѧ́ющи всегда̀.
Да тѧ̀ сла́влю дв҃о вои́стиннꙋ препросла́вленнꙋю, всѧ́кагѡ безслове́сїѧ грѣхо́внагѡ и҆зба́ви мѧ̀, и҆ сла́вы нбⷭ҇ныѧ прича́стника сотворѝ прибѣга́ющаго къ млⷭ҇ти твое́й.
Оу҆ста́ви совѣ́ты всѧ̑, ꙗ҆̀же на ны̀ воѡрꙋже́нныхъ мт҃и бг҃а вы́шнѧгѡ, ра́дости же и҆спо́лни ᲂу҆пова́ющихъ на тѧ̀ да ᲂу҆се́рднѡ всѝ твоѐ проповѣ́мы застꙋпле́нїе.
Та́же, Досто́йно є҆́сть: И҆ покло́нъ до землѝ: є҆ктенїа̀, и҆ свѣти́ленъ, и҆ ѱалмы̀ ѻ҆бы̑чныѧ.
На стїхо́внѣ стїхи̑ры крⷭ҇тны, гла́съ д҃. Самогла́сенъ:
Стѣна̀ бꙋ́ди на́мъ крⷭ҇тъ тво́й, і҆и҃се сп҃се на́шъ: и҆но́гѡ бо ᲂу҆пова́нїѧ вѣ́рнїи не и҆́мамы, то́чїю тебѐ на не́мъ пло́тїю пригво́ждшагосѧ, и҆ подаю́ща на́мъ ве́лїю млⷭ҇ть.
Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ: во всѧ̑ дни̑ на́шѧ возвесели́хомсѧ, за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.
Да́лъ є҆сѝ зна́менїе боѧ́щымсѧ тебѐ гдⷭ҇и, крⷭ҇тъ тво́й чⷭ҇тны́й, и҆́мже посрами́лъ є҆сѝ нача̑ла тьмы̀ и҆ вла̑сти, и҆ возве́лъ є҆сѝ на́съ на пе́рвое бл҃же́нство. тѣ́мже твоѐ чл҃вѣколю́бное смотре́нїе сла́вимъ, і҆и҃се всеси́льне, сп҃се дꙋ́шъ на́шихъ.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Мч҃нченъ: Ка́кѡ ва́шымъ не ᲂу҆диви́мсѧ подвигѡ́мъ, ст҃і́и мч҃нцы, ꙗ҆́кѡ тѣ́ломъ ᲂу҆мира́ющимъ ѡ҆бложе́ни, безплѡ́тныѧ врагѝ побѣди́сте; не ᲂу҆страши́ша ва́съ мꙋчи́тєльскаѧ прещє́нїѧ, не ᲂу҆жаси́ша ва́съ мꙋ́къ приложє́нїѧ: вои́стиннꙋ досто́йнѡ ѿ хрⷭ҇та̀ просла́вистесѧ, и҆ дꙋша́мъ на́шымъ проси́те ве́лїѧ млⷭ҇ти.
Сла́ва, и҆ ны́нѣ, крⷭ҇тобг҃оро́диченъ:
Подо́бенъ: Ꙗ҆́кѡ до́блѧ:
Оу҆мерщвлѧ́ема ви́дѧщи хрⷭ҇та̀ пречⷭ҇таѧ влⷣчца, ᲂу҆мерщвлѧ́юща льсти́ваго, восклица́ше го́рцѣ взыва́ющи, и҆з̾ ᲂу҆тро́бы тоѧ̀ произше́дшемꙋ, и҆ долготерпѣ́нїю є҆гѡ̀ чꙋдѧ́щисѧ взыва́ше: ча́до моѐ любе́знѣйшее, не забꙋ́ди рабꙋ̀ твою̀, не закоснѝ чл҃вѣколю́бче, моѐ ᲂу҆тѣше́нїе.
Та́же, Бл҃го є҆́сть и҆сповѣ́датисѧ гдⷭ҇еви: Трист҃о́е. По Ѻ҆́ч҃е на́шъ: тропа́рь, є҆ктенїа̀, и҆ ча́съ а҃-й, ѱалмы̀ ѻ҆бы́чны, и҆ ѿпꙋ́стъ.
Въ сре́дꙋ бл҃жє́нны, гла́съ д҃:
Дре́вомъ а҆да́мъ раѧ̀ бы́сть и҆зселе́нъ: дре́вомъ же крⷭ҇тнымъ разбо́йникъ въ ра́й всели́сѧ. ѻ҆́въ ᲂу҆́бѡ вкꙋ́шъ, за́повѣдь ѿве́рже сотво́ршагѡ: ѻ҆́въ же сраспина́емь, бг҃а и҆сповѣ́да таѧ́щагосѧ, помѧни́ мѧ, вопїѧ̀, во црⷭ҇твїи твое́мъ.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Пригвозди́лсѧ є҆сѝ на крⷭ҇тѣ̀, мно́гїѧ ра́ди хрⷭ҇тѐ бл҃гости, прободе́нъ бы́лъ є҆сѝ въ ре́бра, два̀ и҆стѡ́чника и҆сточи́вый ѡ҆ставле́нїѧ: землѧ́ же не терпѧ́щи зрѣ́ти дерзнове́нїѧ трѧса́шесѧ, ка́менїе распада́шесѧ, ᲂу҆гаса́ше со́лнце, колеба́хꙋсѧ го́ры и҆ хо́лми, стра́хомъ держа́вы твоеѧ̀.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
Простє́ртыѧ дре́вле неꙋдержа́ннѡ къ дре́вꙋ разꙋмѣ́нїѧ пра́ѻтчи рꙋ́ки, и҆справлѧ́ѧ хрⷭ҇тѐ поползне́нїе, распросте́рлсѧ є҆сѝ во́лею, и҆ твоѝ пригвозди́лъ є҆сѝ рꙋ́цѣ долготерпѣли́ве, созда́вый человѣ́ка рꙋко́ю, за безмѣ́рнꙋю бл҃госты́ню. сла́ва па́че ᲂу҆ма̀ сло́ве, бл҃гоꙋтро́бїю твоемꙋ̀.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Ѡ҆нб҃си́вше зе́млю ст҃і́и пресвѣ́тлыми сїѧ́нїи по́двигѡвъ честны́хъ, и҆́миже тьмꙋ̀ всю̀ разори́сте сꙋ́етства, и҆ къ свѣ́тꙋ незаходи́момꙋ всели́стесѧ прича́стїемъ ѡ҆божа́еми, и҆ всѣ̑мъ ѡ҆зарѧ́ете свѣ́тъ разꙋмѣ́нїѧ, ва́съ по до́лгꙋ ᲂу҆бл҃жа́ющымъ.
Сла́ва: Похвалꙋ̀ и҆ сла́вꙋ и҆ че́сть, всевино́внѣй трⷪ҇цѣ подае́мъ, и҆ трист҃ы́ми гла́сы а҆́гг҃льскꙋю пѣ́снь приносѧ́ще ѻ҆ц҃ꙋ̀ безнача́льнꙋ, и҆ сн҃ꙋ, и҆ дх҃ꙋ, взыва́емъ разбо́йника бл҃горазꙋ́мнагѡ гла́съ, воспѣва́юще и҆ вопїю́ще: помѧнѝ на́съ во црⷭ҇твїи твое́мъ.
И҆ ны́нѣ: Воздви́жена на крⷭ҇тѣ̀ во́лею ви́дѧщи пречⷭ҇таѧ, сн҃а своего̀ и҆ бг҃а, дивѧ́щисѧ пла́чꙋщи глаго́лаше, всѧ́чєскаѧ ᲂу҆добри́вшемꙋ: гдѣ̀ за́йде добро́та твоѧ̀ гдⷭ҇и; что̀ сїѧ̑ неблагода́рный тебѣ̀ воздадѐ собо́ръ, вмѣ́стѡ бл҃ги́хъ; пою̀ па́че ᲂу҆ма̀ твою̀ бл҃госты́ню.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.