Глас 4-й. Понедельник.
Въ недѣ́лю ве́чера,
на Гдⷭ҇и воззва́хъ, стїхи̑ры покаѧ́нны, гла́съ д҃.
Подо́бенъ: Да́лъ є҆сѝ зна́менїе:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Согрѣши́хъ къ тебѣ̀ чл҃вѣколю́бче, не по є҆стествꙋ̀ ꙗ҆́кѡ человѣ́къ, да и҆спрошꙋ̀ проще́нїе: но па́че человѣ́ка, и҆ вы́ше є҆стества̀, и҆ па́че проще́нїѧ. но и҆́же вы́ше є҆сте́ственныхъ ᲂу҆ста̑въ, и҆ па́че постиже́нїѧ мы́сли, чл҃вѣ́къ сп҃се мо́й бы́въ, и҆ па́че ᲂу҆ма̀ чл҃вѣколю́бное и҆мы́й, поми́лꙋй мѧ̀ къ тебѣ̀ ѡ҆браща́ющагосѧ.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Положи́лъ є҆сѝ покаѧ́нїе согрѣша́ющымъ хрⷭ҇тѐ, а҆ не пра́вєднымъ: ѡ҆́бразъ ᲂу҆́бѡ и҆́мамъ разбо́йника же и҆ блꙋ́днагѡ, манассі́и и҆ блꙋдни́цы, гони́телѧ, мытарѧ̀, и҆ ѿме́тника, неꙋдо́бь ѿчаѧва́юсѧ, твое́ бо чл҃вѣколю́бное, и҆ пребл҃го́е вѣ́дый сп҃се мо́й, ѡ҆браща́юсѧ же и҆ слезю̀, и҆ бл҃гонаде́жденъ быва́ю ꙗ҆́кѡ прїи́меши мѧ̀.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.
Да́ждь мѝ ᲂу҆миле́нїе, и҆ ѕлы́хъ ѿчꙋжде́нїе, и҆ соверше́нное и҆справле́нїе, въ страсте́хъ тѣле́сныхъ ны́нѣ погрꙋже́номꙋ, и҆ ᲂу҆дале́номꙋ ѿ тебѐ бж҃е всѣ́хъ цр҃ю̀, и҆ ника́коже наде́ждꙋ и҆мꙋ́ща, сп҃си́ мѧ блꙋ́днаго, мно́гїѧ ра́ди бл҃гости, і҆и҃се всеси́льне, сп҃се дꙋ́шъ на́шихъ.
Та́же въ мине́и стїхи̑ры ст҃о́мꙋ, а҆́ще и҆́мать. А҆́ще ли нѣ́сть мине́и, и҆́ны стїхи̑ры безплѡ́тнымъ ст҃ы̑мъ а҆́гг҃лѡмъ. Гла́съ д҃.
Подо́бенъ: Ꙗ҆́кѡ до́блѧ:
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Бж҃е́ственныѧ свѣ́тлости прїѧ̑тнаѧ жили̑ща, и҆ прїѧ́тєлища всечестна̑ѧ, ᲂу҆тверди́лъ є҆сѝ а҆́гг҃льскаѧ вѡ́инства безсме́ртне: и҆ бж҃е́ственнымъ составле́нїемъ, зри́тели и҆ слꙋжи́тели твоеѧ̀ сла́вы сїѧ̑ положи́въ, въ крѣ́пости скончава́ти твоѐ сло́во, и҆ хотѣ́нїе и҆сполнѧ́ти вседѣ́тельное и҆ прест҃о́е.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Бл҃гости пꙋчи́нꙋ ꙗ҆ви́ти восхотѣ́въ, бл҃гъ сы́й безнача́льне, пе́рвѣе созда́лъ є҆сѝ всеси́льнымъ твои́мъ манове́нїемъ, и҆ бж҃е́ственнымъ повелѣ́нїемъ, а҆́гг҃льскїѧ ли́ки, и҆ си́ламъ чи́ны: вои́стиннꙋ бо подоба́ше бл҃го́мꙋ и҆злїѧ́тисѧ, и҆ походи́ти, да и҆ мнѡ́зѣмъ бы́ти дарова́нїємъ влⷣко.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Серафі́ми шестокрила́тїи, херꙋві́ми многоѻчи́тїи съ превысо́кими прⷭ҇то́лы, тебѐ ѡ҆бстоѧ́тъ, вседѣ́тельнагѡ твоегѡ̀ сїѧ́нїѧ непосре́дственнѣ прїѡбща́ющесѧ, гдⷭ҇ьствїѧ, нача̑ла, вла̑сти, а҆рха́гг҃ли, а҆́гг҃ли и҆ си̑лы бж҃е́ствєнныѧ: твою̀ сла́вꙋ вседержи́телю хва́лѧще, ѡ҆ на́съ мо́лѧтсѧ тебѣ̀.
Сла́ва, и҆ ны́нѣ, бг҃оро́диченъ: Превозше́дши чи́ны а҆́гг҃льскїѧ всенепоро́чнаѧ, со а҆́гг҃лы всегда̀ молѝ а҆́гг҃лы влⷣчествꙋющаго, и҆ все́ю тва́рїю, дарова́ти на́мъ прегрѣше́нїй ѡ҆ставле́нїе, и҆ и҆зба́витисѧ страсте́й, и҆ достѡ́йны сотвори́ти на́съ тогда̀ пѣвцы̀ сла́вы є҆гѡ̀, и҆ наслѣ́дники нетлѣ́нныѧ пи́щи.
Та́же, Свѣ́те ти́хїй: Прокі́менъ днѐ: и҆ Сподо́би гдⷭ҇и въ ве́черъ се́й:
На стїхо́внѣ стїхи̑ры покаѧ́нны, гла́съ д҃:
Хотѣ́хъ слеза́ми ѡ҆мы́ти мои́хъ прегрѣше́нїй рꙋкописа́нїе гдⷭ҇и, и҆ про́чее живота̀ моегѡ̀ покаѧ́нїемъ бл҃гоꙋгоди́ти тебѣ̀, но вра́гъ льсти́тъ мѧ̀, и҆ бо́ретъ дꙋ́шꙋ мою̀: гдⷭ҇и, пре́жде да́же до конца̀ не поги́бнꙋ, сп҃си́ мѧ.
Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
Кто̀ ѡ҆бꙋрева́емь, и҆ притека́ѧ ко приста́нищꙋ твоемꙋ̀ гдⷭ҇и, не сп҃се́тсѧ; и҆лѝ кто̀ недꙋ́гꙋѧ, и҆ припа́даѧ ко врачевствꙋ̀ твоемꙋ̀ не ᲂу҆врачꙋ́етсѧ, содѣ́телю всѧ́ческихъ, и҆ врачꙋ̀ недꙋ́жныхъ; гдⷭ҇и, пре́жде да́же до конца̀ не поги́бнꙋ, сп҃си́ мѧ.
Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ и҆ ᲂу҆ничиже́нїѧ го́рдыхъ.
Прославлѧ́ѧйсѧ въ па́мѧтехъ ст҃ы́хъ твои́хъ хрⷭ҇тѐ бж҃е, и҆ ѿ ни́хъ ᲂу҆моле́нъ быва́ѧ, низпослѝ на́мъ ве́лїю млⷭ҇ть.
Сла́ва, и҆ ны́нѣ, бг҃оро́диченъ: Ра́дꙋйсѧ, свѣ́та ѻ҆́блаче. ра́дꙋйсѧ, свѣ́щниче свѣ́тлый. ра́дꙋйсѧ рꙋ́чко, въ не́йже ма́нна. ра́дꙋйсѧ, же́зле а҆арѡ́новъ. ра́дꙋйсѧ, кꙋпино̀ неѡпали́маѧ. ра́дꙋйсѧ, черто́же. ра́дꙋйсѧ, прⷭ҇то́ле. ра́дꙋйсѧ, горо̀ ст҃а́ѧ. ра́дꙋйсѧ, прибѣ́жище. ра́дꙋйсѧ, бж҃е́ственнаѧ трапе́зо. ра́дꙋйсѧ, две́ре та́йнаѧ. ра́дꙋйсѧ, всѣ́хъ ра́досте.
Та́же, Ны́нѣ ѿпꙋща́еши: Трист҃о́е. По Ѻ҆́ч҃е на́шъ: тропа́рь и҆ є҆ктенїа̀, и҆ ѿпꙋ́стъ.
Въ недѣ́лю на повече́рїи,
канѡ́нъ прест҃ѣ́й бцⷣѣ. Гла́съ д҃.
Пѣ́снь а҃
І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Прїимѝ є҆́же ѿ дꙋшѝ моле́нїе моѐ пречⷭ҇таѧ влⷣчце, ꙗ҆́же бг҃а ро́ждши пло́тїю: къ тебѣ́ бо прибѣго́хъ къ держа́внѣй по́мощи, да не погрѣшꙋ̀ наде́жды моеѧ̀.
Припа́даю раболѣ́пнѡ къ тебѣ̀ пречⷭ҇таѧ бг҃ороди́тельнице, ꙗ҆́кѡ дерзнове́нїе и҆мꙋ́щи мно́го, ѿ всѧ́кихъ мѧ̀ скорбе́й твои́ми мл҃твами и҆зба́ви, къ сн҃ꙋ твоемꙋ̀ хода́тайствꙋющи.
Сла́ва: Мо́рѧ жите́йскагѡ волна́ми потоплѧ́емь, и҆ напа́стьми лю́тыми ѡ҆держи́мь, ко приста́нищꙋ ᲂу҆стреми́хсѧ невла́емомꙋ, покро́вꙋ твоемꙋ̀: тѣ́мже мѧ̀ и҆зба́ви бцⷣе, ѿ лю́тыхъ.
И҆ ны́нѣ: Бл҃гоꙋтро́бнымъ и҆ ти́химъ твои́мъ ѻ҆́комъ воззрѝ на раба̀ твоего̀, и҆ ᲂу҆слы́шати потщи́сѧ, бл҃га́ѧ, и҆сполнѧ́ющи мольбꙋ̀ твоегѡ̀ раба̀ пречⷭ҇таѧ, и҆ разорѧ́ющи совѣ́ты лꙋка̑выѧ.
Пѣ́снь г҃
І҆рмо́съ: Весели́тсѧ ѡ҆ тебѣ̀ цр҃ковь твоѧ̀ хрⷭ҇тѐ, зовꙋ́щи: ты̀ моѧ̀ крѣ́пость гдⷭ҇и, и҆ прибѣ́жище и҆ ᲂу҆твержде́нїе.
Помо́щница на врагѝ, и҆ въ бра́нехъ побо́рница влⷣчце, ты̀ вѣ̑рнымъ є҆сѝ, и҆ прибѣ́жище сꙋ́щымъ въ печа́лехъ.
Є҆го́же родила̀ є҆сѝ пло́тїю бг҃а всѣ́хъ, ꙗ҆́кѡ сн҃а молѝ, разрѣше́нїе ѕѡ́лъ мои́хъ да́ти мѝ ѿ жите́йскихъ настоѧ́нїй.
Сла́ва: При́зри ми́лостивнѡ на смире́нїе на́ше влⷣчце, во є҆́же гнѣ́ва належа́щагѡ и҆зба́витисѧ рабѡ́мъ твои̑мъ.
И҆ ны́нѣ: Кро́вомъ твои́мъ влⷣчце бл҃га́ѧ, сп҃са́еми при́снѡ ѿ всѧ́кихъ скорбе́й, хвалꙋ̀ сн҃ꙋ твоемꙋ̀ приноша́емъ.
Пѣ́снь д҃
І҆рмо́съ: Оу҆слы́шахъ слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̑, и҆ ᲂу҆жасо́хсѧ гдⷭ҇и.
Ꙗ҆́кѡ и҆мꙋ́щи дерзнове́нїе чⷭ҇таѧ бг҃ороди́тельнице, къ сн҃ꙋ твоемꙋ̀, настоѧ́щагѡ мѧ̀ премѣнѝ и҆скꙋше́нїѧ, разрꙋша́ющи совѣ́ты ча̑стыѧ врагѡ́въ при́снѡ борю́щихъ мѧ̀.
Ли́цы вы́шнихъ чинѡ́въ, мч҃нцы и҆ првⷣницы, со а҆пⷭ҇лы, прⷪ҇рѡ́къ бж҃е́ственныхъ собо́ръ, и҆ прпⷣбныхъ съ бцⷣею и҆ мт҃рїю ѡ҆ на́съ хрⷭ҇та̀ моли́те.
Сла́ва: Пресла́внꙋю твою̀ мт҃рь хрⷭ҇тѐ, прїимѝ молѧ́щꙋюсѧ ѡ҆ мі́рѣ, млⷭ҇тивнѡ тебѣ̀ зовꙋ́щꙋю: сн҃е мо́й, прїимѝ мольбꙋ̀ мою̀, и҆ ᲂу҆тишѝ гнѣ́въ належа́щїй землѝ.
И҆ ны́нѣ: Припа́даю тѝ бцⷣе, и҆ молю́сѧ и҆з̾ глꙋбины̀ се́рдца моегѡ̀: настоѧ́щагѡ мѧ̀ премѣнѝ и҆скꙋше́нїѧ, ꙗ҆́кѡ да и҆зба́вльсѧ ѿ лю́тыхъ, пѣ́снь принесꙋ̀ твое́й свѣ́тлости.
Пѣ́снь є҃
І҆рмо́съ: Нечести́вїи не ᲂу҆́зрѧтъ сла́вы твоеѧ̀ хрⷭ҇тѐ, но мы́ тѧ є҆диноро́дне, ѻ҆ч҃ескїѧ сла́вы сїѧ́нїе бж҃ества̀, ѿ но́щи ᲂу҆́тренююще, воспѣва́емъ тѧ̀ чл҃вѣколю́бче.
Оу҆пова́нїе земны̑мъ, и҆ застꙋпле́нїе чⷭ҇таѧ, ᲂу҆млⷭ҇рдисѧ на на́ше смире́нїе, мо́лимсѧ, и҆ настоѧ́щагѡ гнѣ́ва свободѝ на́съ.
Стѣ́нꙋ неѡбори́мꙋ чⷭ҇таѧ, мл҃твꙋ твою̀ держа́ще вопїе́мъ тѝ: ᲂу҆млⷭ҇рдисѧ ѽ влⷣчце, и҆ ви̑димыѧ врагѝ проженѝ.
Сла́ва: Хва́лѧщїисѧ при́снѡ ᲂу҆пова́нїемъ є҆́же къ тебѣ̀ пречⷭ҇таѧ, да не постыди́мсѧ, мо́лимсѧ со слеза́ми, и҆ покланѧ́емсѧ твое́й бл҃гости.
И҆ ны́нѣ: Пречⷭ҇тою твое́ю рꙋко́ю препѣ́таѧ разженѝ врагѝ, на ны̀ востаю́щыѧ: и҆ да разꙋмѣ́ютъ ѻ҆каѧ́ннїи, ꙗ҆́кѡ на тѧ̀ ᲂу҆пова́нїе возложи́хомъ.
Пѣ́снь ѕ҃
І҆рмо́съ: Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се цр҃ю̀ си́лъ.
Ѡ҆чи́сти на́шѧ грѣхѝ чл҃вѣколю́бче, мо́лимсѧ, мл҃твами без̾ сѣ́мене ро́ждшїѧ тѧ̀: на́съ бо ра́ди сло́ве, твою̀ честнꙋ́ю кро́вь пролїѧ́лъ є҆сѝ.
Собо́рище на ны̀ лꙋка́вное собра́сѧ непра́веднѡ борю́щихъ на́съ, бг҃оневѣ́сто: но си́хъ низложѝ, ꙗ҆́кѡ сі́мѡна волхва̀ дре́вле.
Сла́ва: Оу҆слы́ши на́шꙋ мольбꙋ̀ влⷣчце, мо́лимсѧ, и҆ бꙋ́ри вѡ́лны ᲂу҆тишѝ разли́чныхъ болѣ́зней, и҆́миже вразѝ на ны̀ собра́шасѧ.
И҆ ны́нѣ: Печа́ль мою̀ на ра́дость преложѝ, ꙗ҆́кѡ ще́дръ, и҆ пла́чь въ весе́лїе премѣнѝ, и҆ ᲂу҆млⷭ҇рдисѧ бцⷣы ра́ди, и҆́же во́дꙋ въ вїно̀ въ ка́нѣ галїле́йстѣй претвори́вый хрⷭ҇тѐ.
Та́же, Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ, гла́съ д҃:
Мно́гими прегрѣше́нїи а҆́зъ блꙋ́дный ᲂу҆́мъ помрачи́въ, вопїю̀ твоемꙋ̀ крѣ́пкомꙋ застꙋпле́нїю, бцⷣе: просвѣтѝ дꙋшѝ моеѧ̀ зѣ̑ницы, и҆ возсїѧ́й мѝ покаѧ́нїѧ свѣ́тлꙋю зарю̀, и҆ ѡ҆блецы́ мѧ во ѻ҆рꙋ́жїе свѣ́та бг҃ороди́тельнице чⷭ҇таѧ.
Пѣ́снь з҃
І҆рмо́съ: Не преда́ждь на́съ до конца̀ и҆́мене твоегѡ̀ ра́ди, и҆ не разорѝ завѣ́та твоегѡ̀, и҆ не ѿста́ви млⷭ҇ти твоеѧ̀ ѿ на́съ, гдⷭ҇и бж҃е ѻ҆тє́цъ на́шихъ, препѣ́тый во вѣ́ки.
И҆́же въ разли́чныхъ напа́стехъ и҆ ско́рбехъ сы́й, къ тебѣ̀ чⷭ҇таѧ, сп҃се́нїю моемꙋ̀ ны́нѣ прибѣго́хъ, вопїю̀, да не возвращꙋ́сѧ посра́мленъ ѿ ча́ѧнїѧ моегѡ̀: но ᲂу҆слы́ши, и҆ и҆зба́ви мѧ̀ сѣ́тей ловѧ́щихъ.
Раболѣ́пнѡ вы́ю преклонѧ́ю ѻ҆каѧ́нный, и҆ ѿ се́рдца моегѡ̀ вопїю̀, рꙋ́цѣ просте́ръ, колѣ̑на преклонѧ́ю, и҆ молю́ тѧ пречⷭ҇тꙋю дв҃ꙋ, и҆зба́витисѧ скорбе́й. при́снѡ находѧ́щихъ мнѣ̀ ѿ навѣ́та чꙋжда́гѡ.
Сла́ва: Пресла́внаѧ чⷭ҇таѧ мр҃і́е, земны́хъ похвало̀, мо́лимсѧ, пода́ждь твою̀ по́мощь на́мъ, молѧ́щымсѧ и҆ кла́нѧющымсѧ бл҃гоче́стнѡ, ржⷭ҇твꙋ̀ твоемꙋ̀, ꙗ҆́кѡ и҆ны́ѧ не стѧжа́хомъ наде́жды и҆ застꙋ́пницы ра́звѣ тебѐ.
И҆ ны́нѣ: Ꙗ҆́же па́че ᲂу҆ма̀ бг҃а ро́ждши неискꙋсомꙋ́жнаѧ мр҃і́е, и҆ па́че всѧ́кагѡ є҆стества̀, застꙋ́пнице вѣ́рныхъ, напра́сныхъ и҆скꙋше́нїй чтꙋ́щыѧ тѧ̀ и҆зба́ви чи́сты, и҆ без̾ вре́да ѿ вра̑гъ всѧ́ческихъ, ви́димыхъ и҆ неви́димыхъ.
Пѣ́снь и҃
І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тели ѻ҆́троцы, взыва́юще: бл҃гослови́те всѧ̑ дѣла̀ гдⷭ҇нѧ гдⷭ҇а.
Рꙋ́цѣ воздѣ́ти не смѣ́ю къ сн҃ꙋ твоемꙋ̀ чⷭ҇таѧ, ве́сь бо є҆́смь ѡ҆скверне́нъ: тѣ́мже дерза́ю къ тебѣ̀ влⷣчце прибѣ́гнꙋти, хода́тайствꙋй къ ще́дромꙋ бг҃ꙋ и҆ бл҃гопремѣ́нномꙋ, и҆зба́витисѧ на́мъ сопроти́вныхъ вра̑гъ ѡ҆скорблѧ́ющихъ на́съ.
Ѻ҆́чи и҆ се́рдце и҆ дꙋ́шꙋ на тѧ̀ пречⷭ҇таѧ, возложи́хъ: тѣ́мже ᲂу҆млⷭ҇рдисѧ влⷣчце чⷭ҇таѧ, ще́дромꙋ припа́дающи ѡ҆ мнѣ̀ хꙋдѣ́мъ и҆ нетерпѣли́вѣмъ, да сп҃се́тъ мѧ̀ ѿ всѧ́кїѧ нꙋ́жды, и҆ ꙗ҆́зи, и҆ печа́ли.
Сла́ва: Ѻ҆рꙋ́жїемъ твои́мъ, ꙗ҆́кѡ си́ленъ, борю́щыѧ на́съ поперѝ гдⷭ҇и, и҆ побѣ́дꙋ да́рꙋй влⷣко, вѣ́рою надѣ́ющымсѧ на тѧ̀, бцⷣа мо́литсѧ съ прⷣте́чею і҆ѡа́нномъ, и҆ а҆пⷭ҇льскїй ли́къ и҆ мч҃нкъ твои́хъ.
И҆ ны́нѣ: Ра́дость бл҃говѣ́щенїѧ и҆ногда̀ гаврїи́лъ тебѣ̀ чⷭ҇таѧ дв҃о, принесѐ, и҆ прама́тернее сѣ́тованїе разрꙋши́сѧ ржⷭ҇тво́мъ твои́мъ: тѣ́мже сама̀ и҆ моеѧ̀ дꙋшѝ ᲂу҆ны́нїе ѡ҆чи́стивши, покажи́ мѧ мл҃твами твои́ми непосра́млена.
Пѣ́снь ѳ҃
І҆рмо́съ: Ка́мень нерꙋкосѣ́чный, ѿ несѣко́мыѧ горы̀ тебѐ дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀: тѣ́мъ веселѧ́щесѧ, тѧ̀ бцⷣе велича́емъ.
Ꙗ҆вѝ бцⷣе дв҃о, твою̀ по́мощь вско́рѣ: приклони́ же ᲂу҆се́рднѡ ᲂу҆́хо твоѐ, и҆ вопїю́щихъ те́плѣ ᲂу҆слы́ши, и҆ лю́тыхъ и҆змѣнѝ, и҆збавлѧ́ющи на́съ мл҃твами твои́ми.
Ве́сь лѣ́ностїю ѡ҆держи́мь, и҆ во ѿча́ѧнїи є҆́смь глꙋбины̀ мои́хъ прегрѣше́нїй: тѣ́мже мѝ дв҃о мт҃и, рꙋ́кꙋ прострѝ, ꙗ҆́кѡ петрꙋ̀ хрⷭ҇то́съ, и҆ и҆з̾ глꙋбины̀ прегрѣше́нїй и҆зба́ви мѧ̀.
Сла́ва: Ѧ҆зы́къ неѡбꙋзда́нъ и҆ велерѣ́чивъ ᲂу҆кротѝ дв҃о, и҆з̾ѡщре́нный ꙗ҆́кѡ стрѣла̀, ᲂу҆стрѣли́ти хотѧ́щь и҆ ᲂу҆мори́ти мѧ̀, ꙗ҆́кѡ во́скъ разле́й, и҆ совѣ́тъ є҆гѡ̀ сꙋ́етенъ сотворѝ.
И҆ ны́нѣ: Разрꙋшѝ совѣ́ты всѧ̑, ꙗ҆̀же на ны̀ воѡрꙋже́нныхъ, мт҃и бг҃а вы́шнѧгѡ, ра́дости же и҆спо́лни ᲂу҆пова́ющихъ на тѧ̀: да ᲂу҆се́рднѡ всѝ твоѐ проповѣ́мы застꙋпле́нїе.
Та́же, Досто́йно є҆́сть: И҆ покло́нъ до землѝ. Трист҃о́е, по Ѻ҆́ч҃е на́шъ: тропарѝ, и҆ про́чее ѻ҆бы́чно, и҆ ѿпꙋ́стъ.
Въ понедѣ́льникъ ᲂу҆́тра,
по а҃-мъ стїхосло́вїи, сѣда́льны покаѧ́нны. Гла́съ д҃
Смире́ннꙋю мою̀ дꙋ́шꙋ посѣтѝ гдⷭ҇и, во грѣсѣ́хъ всѐ житїѐ и҆жди́вшꙋю: ꙗ҆́коже блꙋдни́цꙋ прїимѝ менѐ, и҆ сп҃си́ мѧ.
Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.
Препла́ваѧ пꙋчи́нꙋ настоѧ́щагѡ житїѧ̀, помышлѧ́ю бе́зднꙋ мно́гихъ мои́хъ ѕѡ́лъ, и҆ не и҆мѣ́ѧй ѡ҆корми́телѧ помышле́нїй, петро́въ провѣщава́ю тѝ гла́съ: сп҃си́ мѧ хрⷭ҇тѐ, сп҃си́ мѧ бж҃е, ꙗ҆́кѡ чл҃вѣколю́бецъ.
Сла́ва, и҆ ны́нѣ, бг҃оро́диченъ: Стѣна̀ непобѣди́маѧ на́мъ хрⷭ҇тїа́нѡмъ є҆сѝ бцⷣе дв҃о: къ тебѣ́ бо прибѣга́юще невреди́ми пребыва́емъ, и҆ па́ки согрѣша́юще, и҆́мамы тѧ̀ мл҃твенницꙋ. тѣ́мъ бл҃года́рственнѡ вопїе́мъ тѝ: ра́дꙋйсѧ бл҃года́тнаѧ, гдⷭ҇ь съ тобо́ю.
По в҃-мъ стїхосло́вїи сѣда́льны, Гла́съ д҃
Ско́рѡ совни́демъ въ невѣ́стникъ хрⷭ҇то́въ, да всѝ ᲂу҆слы́шимъ бж҃е́ственный гла́съ хрⷭ҇та̀ бг҃а на́шегѡ: прїиди́те лю́бѧщїи нбⷭ҇нꙋю сла́вꙋ, и҆ прїими́те сїю̀ вкꙋ́пѣ съ мꙋ́дрыми дѣ́вами, просвѣти́вше свѣщы̀ своѧ̑ вѣ́рою.
Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.
Мно́жествомъ прегрѣше́нїй мои́хъ ѡ҆сꙋжда́емь, и҆ стра́хомъ мꙋче́нїѧ смꙋща́емь є҆́смь. хрⷭ҇тѐ бж҃е на́шъ сле́зы покаѧ́нїѧ ѿ се́рдца приношꙋ̀ тебѣ̀, и҆мꙋ́щемꙋ вла́сть живота̀, и҆ сме́рти, и҆ зовꙋ́ ти во ᲂу҆миле́нїи: согрѣши́хъ, гдⷭ҇и, сп҃си́ мѧ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Дне́сь а҆́гг҃льскаѧ вѡ́инства, въ па́мѧть стрⷭ҇тоте́рпєцъ прїидо́ша, вѣ́рныхъ мы̑сли просвѣти́ти, и҆ вселе́ннꙋю бл҃года́тїю ᲂу҆ѧсни́ти: тѣ́ми бж҃е ᲂу҆моле́нъ быва́ѧ, да́рꙋй на́мъ ве́лїю млⷭ҇ть.
Сла́ва, и҆ ны́нѣ, бг҃оро́диченъ: Є҆́же ѿ а҆́гг҃ла сло́во прїе́мши дв҃о, во ᲂу҆тро́бѣ твое́й, и҆ ро́ждши воплоще́нна хрⷭ҇та̀ бг҃а є҆мманꙋ́ила, бцⷣе, молѝ ѡ҆ дꙋша́хъ на́шихъ.
По г҃-мъ стїхосло́вїи сѣда́льны, гла́съ д҃:
Подо́бенъ: Ско́рѡ предварѝ:
Невеще́ственными ᲂу҆сты̀, трⷪ҇це пребж҃е́ственнаѧ, непреста́ннѡ пою́тъ тѧ̀ безпло́тныхъ ли́цы, и҆ со стра́хомъ предстоѧ́тъ, ст҃ъ, взыва́юще, трїѷпоста́сное є҆стество̀: поми́лꙋй рꙋ́къ твои́хъ созда́нїе твоѐ, тѣ́хъ мольба́ми, є҆ди́не чл҃вѣколю́бче.
А҆́гг҃льстїи чи́ни со стра́хомъ предстоѧ́тъ прⷭ҇то́лꙋ твоемꙋ̀ влⷣко, и҆ є҆́же ѿѻнꙋ́дꙋ зарѧ́ми при́снѡ просвѣща́еми, пѣ́снь тебѣ̀ немо́лчнѡ побѣ́днꙋю воспѣва́ютъ гдⷭ҇и: и҆́хже сщ҃е́нными мл҃твами, ми́ръ мі́рꙋ, и҆ ѡ҆ставле́нїе прегрѣше́нїй на́шихъ да́рꙋй.
Сла́ва, и҆ ны́нѣ, бг҃оро́диченъ: Дв҃о всенепоро́чнаѧ, ꙗ҆́же пресꙋ́щнаго бг҃а ро́ждши, со безпло́тными того̀ непреста́ннѡ молѝ, ѡ҆ставле́нїе прегрѣше́нїй, и҆ и҆справле́нїе житїѧ̀ да́ти на́мъ пре́жде конца̀, вѣ́рою и҆ любо́вїю пою́щымъ тѧ̀ по до́лгꙋ, є҆ди́на всепѣ́таѧ.
Канѡ́нъ покаѧ́ненъ ко гдⷭ҇ꙋ на́шемꙋ і҆и҃сꙋ хрⷭ҇тꙋ̀ и҆ ст҃ы̑мъ є҆гѡ̀ мч҃нкѡмъ, [є҆гѡ́же краестро́чїе: Сп҃си́ мѧ сп҃се, ꙗ҆́коже блꙋ́днаго дре́вле.] Гла́съ д҃.
Пѣ́снь а҃
І҆рмо́съ: Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀, дꙋшѝ трича́стное потопѝ, молю́сѧ, да тебѣ̀ ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе.
Сп҃се мо́й і҆и҃се, и҆́же блꙋ́днаго сп҃сы́й, и҆ и҆́же блꙋдни́цы пла́чь прїе́мый, и҆́же мытарѧ̀ воздохнꙋ́вша, манове́нїемъ свои́мъ ѡ҆правда́вый, и҆ менѐ без̾ числа̀ согрѣши́вшаго, и҆ ѡ҆браща́ющасѧ прїимѝ, и҆ сп҃си́ мѧ.
Ꙗ҆́кѡ ве́щь снѣда́етъ дꙋ́шꙋ мою̀ ѕло́бный ѻ҆́гнь, и҆ пла́меню твори́тъ подгнѣще́нїе бꙋ́дꙋщемꙋ: чл҃вѣколю́бче, ᲂу҆гасѝ того̀, ѡ҆роше́нїемъ твои́хъ млⷭ҇тей долготерпѣли́ве, пода́въ мѝ сле́зы покаѧ́нїѧ.
Мч҃нченъ: Ра́зꙋма мно́га и҆спо́лненъ ли́къ ст҃ы́хъ страда́лєцъ, неразꙋ́менъ совѣ́тъ и҆ сопроти́вное мꙋдрова́нїе всѣ́хъ законопрестꙋ́пныхъ, цѣломꙋ́дреннѡ ᲂу҆клонѝ, и҆ бж҃е́ственныхъ по́честей полꙋчѝ.
Мч҃нченъ: И҆̀же мі́ра презрѣ́вше кра̑снаѧ вѣ́рою, и҆ премі́рнꙋю жи́знь наслѣ́довасте мꙋ́дрїи стрⷭ҇тоте́рпцы прехва́льнїи, всѧ́кагѡ мѧ̀ ᲂу҆́бѡ и҆зба́вите мїрска́гѡ смѣше́нїѧ, и҆́скреннѡ ва́съ бл҃жа́щаго.
Бг҃оро́диченъ: Пресвѣ́тлаѧ свѣщѐ со́лнца сла́вы, дꙋшѝ моеѧ̀ ѻ҆́гнь ᲂу҆ны́нїемъ ᲂу҆гаше́нный возжзѝ пречⷭ҇таѧ, при́снѡ бж҃е́ственныхъ дѣ́лъ є҆ле́емъ напоѧ́ющи, да вѣ́рою и҆ любо́вїю сла́влю тѧ̀.
Дрꙋгі́й канѡ́нъ безплѡ́тнымъ ст҃ы̑мъ а҆́гг҃лѡмъ. Гла́съ д҃.
І҆рмо́съ то́йже.
Ꙗ҆́кѡ ᲂу҆́ми чⷭ҇тїи, а҆́гг҃ли, вели́комꙋ и҆ пе́рвомꙋ предстоѧ́ще ᲂу҆мꙋ̀, и҆ бж҃е́ственнагѡ сїѧ́нїѧ насыща́еми, лꙋче́ю мѧ̀ ва́шею ѡ҆зари́те, пою́ще всевино́внаго сло́ва пресла́внїи. [Два́жды.]
Ѿню́дъ къ бг҃ꙋ прекло́ньшесѧ любо́вїю, и҆ бж҃е́ственными добро́тами воѡбража́еми ꙗ҆́вѣ, ѽ а҆рха́гг҃ли сла́внїи, стоѧ́нїемъ прилѣ́жнымъ ѡ҆бстоитѐ, зовꙋ́ще побѣ́днꙋю пѣ́снь зижди́телю.
Бг҃оро́диченъ: Ꙗ҆́же є҆ди́на во чре́вѣ прїе́мши сло́во, є҆го́же а҆́гг҃льскаѧ вѡ́инства сла́вѧтъ при́снѡ, дꙋ́шꙋ мою̀ ѡ҆зарѝ, рѣша́щи грѣхо́вное мра́чное ѕломышле́нїе всенепоро́чнаѧ, и҆ просвѣща́ющи ра́зꙋмомъ ржⷭ҇тва̀ твоегѡ̀.
Пѣ́снь г҃
І҆рмо́съ: Съ высоты̀ снизше́лъ є҆сѝ во́лею на зе́млю, превы́ше всѧ́кагѡ нача́ла, и҆ смире́нное возне́слъ є҆сѝ и҆з̾ а҆́да преиспо́днѧгѡ є҆стество̀ человѣ́ческое: нѣ́сть бо ст҃ъ па́че тебѐ, чл҃вѣколю́бче.
Но́щїю мѧ̀ житїѧ̀ тьма̀ страсте́й ѡ҆б̾ѧ́ла є҆́сть, хрⷭ҇тѐ бж҃е, свѣ́тъ сы́й незаходи́мый, лꙋча́ми покаѧ́нїѧ ѡ҆зари́въ мѧ̀ сп҃сѝ, ꙗ҆́кѡ чл҃вѣколю́бецъ, да сла́влю тѧ̀.
Ча́сти мѧ̀ покажѝ хрⷭ҇тѐ, и҆збра́нныхъ наслѣ́дника, сопроти́вныѧ ча́сти ѿлꙋчи́въ сп҃се, слеза́ми и҆ млⷭ҇тынею ѡ҆чище́на, ꙗ҆́кѡ да во хвале́нїи тѧ̀ сла́влю всегда̀.
Мч҃нченъ: Ѡ҆червлени́шасѧ вои́стиннꙋ кро́вїю ва́ши но́ги, и҆ быстрѣ́йше къ нб҃сѝ потеко́ша, со грѣхо́мъ зе́млю ѡ҆ста́вльше, мч҃нцы, собесѣ̑дницы бж҃є́ственнымъ си́ламъ.
Мч҃нченъ: Оу҆дрꙋча́емо тѣ́ло ва́ше ра́нами раста́ѧшесѧ, хрⷭ҇тѡ́вы страда́льцы: дꙋше́внаѧ же ᲂу҆крѣплѧ́шесѧ си́ла, любо́вїю привѧзꙋ́ема нерѣши́мѡ къ созда́вшемꙋ всѧ́чєскаѧ хотѣ́нїемъ.
Бг҃оро́диченъ: Мр҃і́е гпⷭ҇жѐ, ꙗ҆́кѡ сꙋ́щи всѣ̑мъ гдⷭ҇а ро́ждши, ѡ҆блада́ема страстьмѝ ᲂу҆ма̀ моегѡ̀, и҆ ѕло́бою ѡ҆черне́на, свобо́дна сотворѝ и҆ просвѣтѝ.
И҆́нъ. І҆рмо́съ то́йже
И҆́же премі́рными ли́ки воспѣва́емый хрⷭ҇тѐ, чи́номъ тѣ́хъ вѣ́рныхъ составлє́нїѧ воспѣва́ти бг҃омꙋ́дреннѡ сотворѝ, сло́ве: нѣ́сть бо ст҃ъ па́че тебѐ чл҃вѣколю́бче. [Два́жды.]
Любо́вїю те́плою, привѧза́нїемъ рачи́тельнымъ причаща́ющесѧ пе́рвомꙋ и҆сто́чникꙋ слꙋжи́тельнѣ предстоитѐ, пою́ще немо́лчнѡ, є҆ди́но сꙋщество̀ бж҃ества̀ безнача́льнагѡ, бж҃е́ственнїи а҆рха́гг҃ли.
Бг҃оро́диченъ: Є҆́ѵинꙋ дре́внюю клѧ́твꙋ, хрⷭ҇та̀ ро́ждши мт҃и чⷭ҇таѧ, пресвѣ́тлѡ разрѣши́ла є҆сѝ, всѣ́хъ вѣнча́ющаго бл҃гослове́ньми: нѣ́сть бо пречⷭ҇таѧ, ра́звѣ тебѐ помо́щницы.
Пѣ́снь д҃
І҆рмо́съ: Сѣдѧ́й въ сла́вѣ на прⷭ҇то́лѣ бж҃ества̀, во ѻ҆́блацѣ ле́гцѣ прїи́де і҆и҃съ пребж҃е́ственный, нетлѣ́нною дла́нїю, и҆ сп҃сѐ зовꙋ́щыѧ: сла́ва хрⷭ҇тѐ си́лѣ твое́й.
Ꙗ҆́кѡ сꙋдїѝ пра́веднѣйшемꙋ ны́нѣ припа́даю тѝ гдⷭ҇и, ѡ҆сꙋжде́нна и҆ ѿча́ѧннаго мѧ̀ ᲂу҆ще́дри, и҆ пра́веднагѡ твоегѡ̀ и҆зба́ви и҆зрече́нїѧ, и҆ стоѧ́нїѧ и҆збра́нныхъ сподо́би.
Въ разбо́йники впа́дша неꙋкроти̑мыѧ чл҃вѣколю́бче, и҆ ᲂу҆ѧ́звлена бы́вша и҆сцѣлѝ хрⷭ҇тѐ, возлива́ѧ на мѧ̀ покаѧ́нїѧ вїно̀ и҆ є҆ле́й и҆ ѡ҆дѣва́ѧ мѧ̀ ѻ҆де́ждою сп҃се́нїѧ моегѡ̀.
Мч҃нченъ: Ѡ҆блеко́стесѧ свы́ше ри́зою сп҃се́нїѧ, въ совлече́нїи тѣле́снѣмъ всехва́льнїи мч҃нцы, и҆ совле́кшаго пре́жде пра́ѻтца ѡ҆бнажи́сте, без̾ дыха́нїѧ ме́ртва сотво́рше.
Мч҃нченъ: Виті́йствꙋюще пред̾ беззако́нными мч҃нцы, бж҃їѧ сло́ва ра́зꙋмомъ бл҃гоче́стїѧ ᲂу҆краша́еми, мꙋдрецы̀ и҆ виті̑и всѧ̑ посрами́сте нече́ствꙋющыѧ, и҆ врага̀ ᲂу҆мертви́вше.
Бг҃оро́диченъ: На тѧ̀ ꙗ҆́коже до́ждь, премꙋ́дрости бе́здна і҆и҃съ сни́де, є҆ди́нꙋ чⷭ҇тꙋю тебѐ ѡ҆брѣ́тъ бг҃ороди́тельнице дв҃о, и҆ заградѝ нече́стїѧ пото́ки лю̑тыѧ, бж҃е́ственною бл҃года́тїю.
И҆́нъ. І҆рмо́съ то́йже
Непостижи́мою си́лою ѿ небытїѧ̀ приве́лъ є҆сѝ нбⷭ҇ныѧ ᲂу҆мы̀, сло́ве бж҃їй пресꙋ́щественный, и҆ неизрече́нною твое́ю сла́вою ᲂу҆краси́лъ є҆сѝ, зовꙋ́щыѧ: сла́ва хрⷭ҇тѐ си́лѣ твое́й.
Оу҆правлѧ́еми вы́шнїѧ си̑лы дх҃омъ, и҆ брозда́ми є҆гѡ̀, и҆ бж҃е́ственными зарѧ́ми ѡ҆блиста́еми, неѿпа́дающыѧ чи́ны наслѣ́доваша, є҆ди́но чтꙋ́ще всѣ́хъ нача́ло и҆ бж҃ество̀.
Лица̀ твоегѡ̀ добро́тꙋ кра́снꙋю зрѣ́ти, сподо́бишасѧ слꙋжи́тєльныѧ твоѧ̑ свѣ́тлѡсти, и҆ ѿѻнꙋ́дꙋ разꙋмѣ̑нїѧ воспрїе́млюще, тебѣ̀ вопїю́тъ: сла́ва хрⷭ҇тѐ си́лѣ твое́й.
Бг҃оро́диченъ: Цр҃и́ца дв҃о, злато́ю ѻ҆де́ждою ᲂу҆кра́шена, сн҃ꙋ цр҃ю̀ ны́нѣ предстои́тъ, ꙗ҆́же без̾ сравне́нїѧ а҆́гг҃лъ превы́шши, зовꙋ́щихъ: сла́ва хрⷭ҇тѐ си́лѣ твое́й.
Пѣ́снь є҃
І҆рмо́съ: Ны́нѣ воста́нꙋ, прⷪ҇ро́чески речѐ бг҃ъ, ны́нѣ просла́влюсѧ, ны́нѣ вознесꙋ́сѧ, па́дшаго прїе́мъ ѿ дв҃ы, и҆ къ свѣ́тꙋ ᲂу҆́мномꙋ возносѧ́й моегѡ̀ бж҃ества̀.
Ѽ ка́кѡ ѡ҆сꙋжде́нъ хощꙋ̀ предста́ти тебѣ̀, сꙋдїѝ бг҃ꙋ всѣ́хъ, и҆ ѡ҆бличе́нъ бы́ти ѡ҆ всѣ́хъ ѕлы́хъ, и҆̀хже без̾ ᲂу҆ма̀ согрѣши́хъ во́лею, и҆ всего̀ себѐ непотре́бна сотвори́хъ!
Сп҃си́ мѧ гдⷭ҇и, ꙗ҆́кѡ ѕѡ́лъ и҆спо́лнихсѧ мно́гихъ, и҆ молю́сѧ: и҆сцѣлѝ грѣхѝ моѧ̑ и҆ гноє́нїѧ лю̑таѧ, и҆ не ѡ҆ста́ви поги́бнꙋти мѧ̀ є҆ди́наго і҆и҃се мо́й, мно́гѡ тѝ согрѣши́вшаго.
Мч҃нченъ: Кончи́нꙋ бл҃же́ннꙋ ѡ҆брѣ́тше страда́льцы ꙗ҆́вѣ, сла́вꙋ ᲂу҆лꙋчи́ша, хрⷭ҇та̀ прославлѧ́юще свои́ми ᲂу҆́ды, стрⷭ҇тоположи́телѧ, ꙗ҆́звамъ и҆ ра́намъ причаща́тисѧ мꙋ́жески предразсꙋжда́юще.
Мч҃нченъ: Бога́тство нбⷭ҇ное, житїе́мъ бж҃е́ственнымъ и҆ кра́снымъ, вѣне́цъ неꙋвѧда́емый, и҆ свѣ́тъ невече́рнїй, и҆ жили́ще ника́коже ѡ҆бетша́емое нерꙋкотворе́нно наслѣ́довасте, страда́льцы хрⷭ҇тѡ́вы бл҃же́ннїи.
Бг҃оро́диченъ: Твоѧ̑ чꙋдеса̀ прⷪ҇ро́честїи прореко́ша гла́си, го́рꙋ нарица́юще тѧ̀ пречⷭ҇таѧ, и҆ две́рь, и҆ свѣти́льникъ свѣ́телъ: и҆з̾ негѡ́же вои́стиннꙋ свѣ́тъ чꙋ́дный просвѣща́етъ чⷭ҇таѧ, мі́ръ ве́сь.
И҆́нъ. І҆рмо́съ то́йже
Тре́петнѡ сла́вѧтъ херꙋві́ми, и҆ серафі́ми, со прⷭ҇то́лы, и҆ бж҃е́ственнїи а҆рха́гг҃ли, и҆ гдⷭ҇ьствїѧ, и҆ си̑лы, и҆ нача̑ла, и҆ вла̑сти со а҆́гг҃лы, честно́е є҆ди́но и҆ трⷪ҇ческое бж҃ество̀. [Два́жды.]
Ꙗ҆ви́шасѧ а҆́гг҃ли свѣтови́днѡ сїѧ́юще хрⷭ҇тѐ, твоѐ воскрⷭ҇нїе проповѣ́дающе въ мі́рѣ прпⷣбнымъ жена́мъ, и҆ врагѡ́въ твои́хъ сотрѧса́юще ᲂу҆́мъ блиста́ньми твоегѡ̀ бж҃ества̀.
Бг҃оро́диченъ: Ны́нѣ сохранѝ ѡ҆полче́нїе а҆рха́гг҃льскими цр҃ковь твою̀, тебѐ сла́вѧщꙋю правосла́вными гла́сы, и҆́же ѿ дв҃ы неизрече́ннѡ рожде́йсѧ, и҆ человѣ́ки ѿ тлѝ и҆збавлѧ́ѧй.
Пѣ́снь ѕ҃
І҆рмо́съ: Прїидо́хъ во глꙋбины̑ мѡрскі́ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но ꙗ҆́кѡ бг҃ъ и҆з̾ глꙋбины̀ возведѝ живо́тъ мо́й, многомлⷭ҇тиве.
Ме́ртвъ сы́й не разꙋмѣ́ю, не чꙋ́вствꙋѧ ѻ҆каѧ́нный, и҆ со́вѣсть ѡ҆скверне́нꙋ носѧ̀ при́снѡ: бж҃е созда́телю мо́й, да не до конца̀ погꙋби́ши менѐ.
Дѣѧ̑нїѧ моѧ̑ ꙗ҆́коже вразѝ ѡ҆клевета́ти мѧ̀ хотѧ́тъ на сꙋди́щи твое́мъ, ще́дре: ѿ ни́хже ско́рѡ и҆зба́ви хрⷭ҇тѐ, наставлѧ́ѧ мѧ̀ къ покаѧ́нїю.
Мч҃нченъ: Сокрꙋшѝ кѡ́сти страстоно́сєцъ, собо́ръ законопрестꙋ́пныхъ, но не сокрꙋшѝ тѣ́хъ вѣ́рꙋ, є҆ѧ́же ра́ди наслѣ̑дницы ꙗ҆ви́шасѧ бг҃ꙋ, и҆ сп҃сꙋ дꙋ́шъ на́шихъ.
Мч҃нченъ: Ꙗ҆́кѡ честно́е ка́менїе, на ка́мени непоколе́блемѣ наде́жди бг҃омꙋ́дреннѡ назда́шасѧ стрⷭ҇тоно́сцы, и҆ ꙗ҆́кѡ хра́мы ст҃а́гѡ дх҃а, въ хра́мъ бж҃їй всели́шасѧ.
Бг҃оро́диченъ: Ѡ҆мрачи́вшеесѧ се́рдце моѐ те́мными наи̑тїи грѣха̀, свѣ́томъ и҆́же въ тебѣ̀ бг҃оневѣ́стнаѧ ѡ҆зарѝ, ꙗ҆́кѡ сл҃нце хрⷭ҇та̀ ро́ждшаѧ.
И҆́нъ. І҆рмо́съ то́йже
Ѻ҆́крестъ влⷣки предстоѧ́ще а҆́гг҃льскаѧ вѡ́инства, и҆ чи́стѣ наслажда́ющесѧ сїѧ́нїемъ нача́ла свѣ́тлагѡ, просвѣти́те вѣ́рою ва́съ пою́щихъ. [Два́жды.]
Премꙋ́дростїю твое́ю сотвори́вый а҆́гг҃льскїѧ ли́ки, гдⷭ҇ьствїѧ же и҆ си̑лы, и҆ серафі́мы, ꙗ҆́кѡ влⷣка показа́лъ є҆сѝ, хвала́ми тѧ̀ чтꙋ́щыѧ.
Бг҃оро́диченъ: Ꙗ҆́кѡ на престо́лѣхъ превознесе́нныхъ, хрⷭ҇тѐ, почива́ѧй, и҆ всѧ́чєскаѧ бж҃е́ственнымъ про́мысломъ соблюда́ѧй, на рꙋкꙋ̀ дв҃и́чєскꙋю влⷣко почи́лъ є҆сѝ.
Пѣ́снь з҃
І҆рмо́съ: Ю҆́нѡши трѝ въ вавѷлѡ́нѣ, велѣ́нїе мꙋчи́телево на бꙋ́йство прело́жше, посредѣ̀ пла́мене вопїѧ́хꙋ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Комꙋ́ тѧ ᲂу҆подо́блю, дꙋшѐ моѧ̀ ѻ҆каѧ́ннаѧ, ᲂу҆вы̀ мнѣ̀, лю́бѧщꙋю безмѣ̑стнаѧ, а҆ не дѡ́браѧ взыскꙋ́ющꙋю; тѣ́мже пре́жде конца̀ потщи́сѧ ѡ҆́бразы бл҃гі̑ѧ показа́ти.
Тꙋ́чꙋ мѝ хрⷭ҇тѐ сле́зъ да́ждь, ꙗ҆́кѡ да ѿ лю́тыхъ мои́хъ и҆змы́юсѧ, и҆ не ѡ҆ста́ви менѐ сп҃се, ны́нѣ поги́бнꙋти, согрѣши́вшаго тѝ мно́гѡ па́че человѣ̑къ.
Мч҃нченъ: Ме́ртвость ᲂу҆мерщвле́ннагѡ сло́ва носѧ́ще на тѣ́лѣ свое́мъ, пре́лесть ᲂу҆мертви́сте: живете́ же и҆ ᲂу҆ме́рше сла́внїи, и҆ ᲂу҆мерщвлє́нныѧ страстьмѝ страда́льцы врачꙋ́ете.
Мч҃нченъ: Ко́е мѣ́сто ны́нѣ не и҆́мать ва́съ мч҃нцы просвѣти́тели, и҆ предгра́дїе; ка́ѧ страна̀ не ѡ҆свѧща́етсѧ ва́шими страда́ньми сла́внїи, и҆ восто́ками и҆сцѣле́нїй;
Бг҃оро́диченъ: Є҆ди́на пребыва́еши по ржⷭ҇твѣ̀ влⷣчце, дѣ́вственною добро́тою сїѧ́ющи, є҆ди́на мт҃рнихъ и҆збѣ́гла є҆сѝ болѣ́зней: бг҃а бо є҆ди́на родила̀ є҆сѝ, и҆зба́вителѧ дꙋ́шъ на́шихъ.
И҆́нъ. І҆рмо́съ то́йже
Свидѣ́тели содѣ̑ѧннымъ и҆мꙋ́ще мы́слєнныѧ а҆́гг҃лы, и҆збере́мъ чи́стое житїѐ дꙋшѐ моѧ̀, вопїю́ще: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ. [Два́жды.]
Оу҆́глемъ ѡ҆чище́нный, престо́лꙋ твоемꙋ̀ предстоѧ́щыѧ зри́тъ серафі́мы, бж҃е́ственный вопїѧ̀ и҆са́їа: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Бг҃оро́диченъ: Чи́ны всѣ́хъ безпло́тныхъ, дв҃о, ꙗ҆́вѣ превосхо́диши, ꙗ҆́кѡ творца̀ ро́ждши и҆ гдⷭ҇а: бл҃гослове́нъ пречⷭ҇таѧ, пло́дъ твоегѡ̀ чре́ва.
Пѣ́снь и҃
І҆рмо́съ: И҆зба́вителю всѣ́хъ всеси́льне, посредѣ̀ пла́мене бл҃гоче́ствовавшыѧ, снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ бл҃гослови́те, по́йте гдⷭ҇а.
Ꙗ҆ви́хсѧ скотѡ́мъ подо́бенъ безсловє́снымъ, подклони́всѧ страсте́мъ. сло́ве бж҃їй пребезнача́льне, ѡ҆брати́въ мѧ̀, сп҃сѝ вопїю́ща: бл҃гослови́те всѧ̑ дѣла̀ гдⷭ҇нѧ гдⷭ҇а.
Ѡ҆зоба̀ ве́прь, позоба̀ є҆ди́нокъ мѧ̀ сп҃се, ꙗ҆́коже вїногра́дъ воздѣ́ланный дх҃омъ: ѿ негѡ́же и҆зба́ви мѧ̀ сло́ве, и҆ плодоно́сна добродѣ́тельми а҆́бїе тебѣ̀ покажѝ.
Мч҃нченъ: Ѡ҆брощє́нїѧ крѡ́внаѧ ѡ҆червлени́ша багрѧни́цꙋ ва́мъ бг҃отка́ннꙋю, є҆́юже ᲂу҆краси́стесѧ мч҃нцы, вѣнцы̀ носѧ́ще побѣ́ды, и҆̀же въ вы́шнихъ цр҃ю̀ вѣ́чномꙋ предстоитѐ.
Мч҃нченъ: Сщ҃е́нное мч҃нкѡвъ сосло́вїе несвѧще́нное разрꙋшѝ согла́сїе, беззако́нновати повелѣва́ющее, и҆ зако́ннѡ пострада́въ, ѿ влⷣки всѣ́хъ зако́ннѡ вѣнча́сѧ.
Бг҃оро́диченъ: Бл҃гослови́тъ всѧ̀ тва́рь ржⷭ҇тво̀ твоѐ, бл҃гослове́ньми на́съ вѣнча́вшее, и҆ ѿ клѧ́твы и҆з̾е́мшее, всебл҃гослове́ннаѧ є҆ди́на, и҆ препросла́вленнаѧ, ꙗ҆́же ро́дъ на́шъ ѡ҆бл҃года́тившаѧ.
И҆́нъ. І҆рмо́съ то́йже
Ꙗ҆́кѡ сы́й живо́тъ безсме́ртный, безсме́ртномꙋ животꙋ̀ причаща́тисѧ зижди́тельнѣ сотвори́лъ є҆сѝ а҆́гг҃лы, и҆ наꙋчи́лъ є҆сѝ пѣ́ти: бл҃гослови́те, по́йте гдⷭ҇а. [Два́жды.]
Мы́сленнѡ ѡ҆бстоѧ́ще тѧ̀ а҆рха́гг҃ли, непреста́нными гла́сы воспѣва́ютъ, бг҃олѣ́пнѡ чтꙋ́ще тѧ̀ ꙗ҆́кѡ влⷣкꙋ всѣ́хъ: бл҃гослови́те, по́йте гдⷭ҇а.
Бг҃оро́диченъ: Зако́ннїи ѡ҆́брази проѡбража́хꙋ тѧ̀ всеблаже́ннаѧ, ро́ждшꙋю бг҃а, ве́щи пло́тстѣй соединѧ́ема, пре́жде невеще́ственна сꙋ́ща бж҃е́ственнымъ є҆стество́мъ: бл҃гослови́мъ дв҃о, ржⷭ҇тво̀ твоѐ.
Та́же, пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а.
Пѣ́снь ѳ҃
І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же дв҃о бцⷣе, прозѧбе́нїемъ чревоноше́нїѧ, мі́рови бл҃гослове́нїе процвѣла̀ є҆́сть: тѣ́мъ тѧ̀ всѝ велича́емъ.
Сѐ покаѧ́нїѧ вре́мѧ, что̀ лѣни́мсѧ, что̀ сно́мъ погрꙋжа́емсѧ; ᲂу҆ны́нїѧ да ѿстꙋ́пимъ, ᲂу҆краси́мъ свѣщы̀, ꙗ҆́коже пи́шетъ, є҆ле́емъ бл҃готворе́нїѧ: да не ѡ҆ста́немъ внѣꙋ́дꙋ двере́й рыда́ющи.
До́ндеже є҆́сть вре́мѧ пока́ѧтисѧ, ѡ҆брати́сѧ ѿ ѕѡ́лъ твои́хъ дꙋшѐ моѧ̀, ꙗ҆̀же содѣ́ла є҆сѝ вѣ́дѣнїемъ и҆ невѣ́дѣнїемъ, и҆ возопі́й къ вѣ́дꙋщемꙋ всѧ̑: согрѣши́хъ тѝ, простѝ влⷣко, и҆ не гнꙋша́йсѧ менѐ недосто́йнагѡ.
Мч҃нченъ: Собра̀ хрⷭ҇то́съ страда́вшыѧ ст҃ы̑ѧ ꙗ҆вле́ннѣйше, ѿ всѧ́кїѧ страны̀ и҆ гра́да на мѣ́ста сла̑внаѧ, въ чєстна́ѧ покѡ́ища, и҆ ны́нѣ перворо́дныхъ цр҃ковь просвѣща́ютъ веселѧ́щесѧ.
Мч҃нченъ: Всечестна́ѧ ра́ка честны́хъ мч҃нкъ твои́хъ гдⷭ҇и, лꙋча́ми бж҃е́ственнагѡ дх҃а ѡ҆зарѧ́ема, пресла́внѣ и҆сцѣле́нїѧ и҆спꙋща́етъ свѣ́тлость, и҆ разорѧ́етъ недꙋ́гѡвъ болѣ̑зни, є҆ди́не многомлⷭ҇тиве.
Бг҃оро́диченъ: Ѿ свѣ́та и҆́же въ тебѣ̀ бг҃оневѣ́сто, зарѧ́ми дꙋ́шꙋ мою̀ просвѣтѝ, лежа́щꙋю въ ро́вѣ поги́бели возста́ви, врагѝ сокрꙋша́ющи, ѡ҆скорблѧ́ющыѧ се́рдце моѐ при́снѡ, и҆ къ страсте́мъ порѣва́ющыѧ мѧ̀.
И҆́нъ
І҆рмо́съ: Сокрове́нное бж҃їе неизрече́нное въ тебѣ̀ соверша́етсѧ, ꙗ҆́вственное та́инство, дв҃о пречⷭ҇таѧ: и҆́бо бг҃ъ и҆з̾ тебѐ воплоти́сѧ за млⷭ҇рдїе. тѣ́мже тѧ̀ ꙗ҆́кѡ бцⷣꙋ велича́емъ.
И҆̀же ᲂу҆ма̀ роди́телѧ, и҆ предложи́телѧ сн҃ꙋ и҆ дх҃ꙋ пою́ще а҆́гг҃ли, ны́нѣ къ на́мъ бж҃е́ственныѧ бл҃года́ти подаѧ̑нїѧ, прилѣ́жнѡ прїе́мше посыла́ти ᲂу҆се́рдствꙋйте.
Краснѡ̀ ᲂу҆добрѧ́еми нетлѣ́нїѧ да́ромъ и҆ бл҃года́тїю, бж҃е́ственнїи а҆рха́гг҃ли, тебѐ и҆сто́чника хрⷭ҇тѐ присносꙋ́щна нетлѣ́нїѧ, пою́ще ꙗ҆́кѡ бл҃года́телѧ велича́ютъ.
Бг҃оро́диченъ: Невѣ́стникъ воплоще́нїѧ неизрече́ннагѡ, и҆ черто́гъ ѡ҆дꙋшевле́нный, и҆ ковче́гъ зако́на бл҃года́ти тѧ̀ бг҃омт҃и, вѣ́рнїи свѣ́мы: тѣ́мже тѧ̀ непреста́ннѡ велича́емъ.
Та́же, Досто́йно є҆́сть: и҆ покло́нъ. Є҆ктенїа̀, и҆ свѣти́ленъ. и҆ ѱалмы̀ ѻ҆бы́чны.
На стїхо́внѣ, стїхи̑ры покаѧ́нны, гла́съ д҃:
Ѡ҆мы́й мѧ̀ слеза́ми мои́ми сп҃се, ꙗ҆́кѡ ѡ҆скверни́хсѧ мно́гими грѣхѝ. тѣ́мже и҆ припа́даю тѝ: согрѣши́хъ бж҃е, поми́лꙋй мѧ̀.
Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ и҆ возвесели́хомсѧ: во всѧ̑ дни̑ на́шѧ возвесели́хомсѧ: за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.
Ѻ҆вча̀ є҆́смь слове́снагѡ твоегѡ̀ ста́да, и҆ къ тебѣ̀ прибѣга́ю па́стырю до́бромꙋ: взыщѝ менѐ заблꙋ́ждшаго, бж҃е, и҆ поми́лꙋй мѧ̀.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Мч҃нченъ: Кто̀ не ᲂу҆жаса́етсѧ зрѧ̀, ст҃і́и мч҃нцы, по́двига до́брагѡ ва́шегѡ, и҆́мже подвиза́стесѧ; ка́кѡ во пло́ти сꙋ́ще, безпло́тнаго врага̀ побѣди́сте, хрⷭ҇та̀ и҆сповѣ́дающе, и҆ крⷭ҇то́мъ воѡрꙋжи́вшесѧ! тѣ́мже досто́йнѡ ꙗ҆ви́стесѧ бѣсѡ́въ прогони́телїе, и҆ ва́рварѡвъ сопротивобо́рцы, непреста́ннѡ молѧ́щесѧ, сп҃сти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ: Бцⷣе всѣ́хъ цр҃и́це, правосла́вныхъ похвало̀, є҆реті́чествꙋющихъ шата̑нїѧ разорѝ, и҆ ли́ца и҆́хъ посрамѝ, не кла́нѧющихсѧ, нижѐ чтꙋ́щихъ пречⷭ҇таѧ, чⷭ҇тны́й тво́й ѡ҆́бразъ.
Та́же, Бл҃го є҆́сть и҆сповѣ́датисѧ гдⷭ҇еви: И҆ трист҃о́е. По Ѻ҆́ч҃е на́шъ: тропарѝ, и҆ є҆ктєнїѝ. Та́же ча́съ а҃-й, ѱалмы̀ ѻ҆бы́чны, и҆ про́чее: и҆ ѿпꙋ́стъ.
Въ понедѣ́льникъ бл҃жє́нны, гла́съ д҃:
Дре́вомъ а҆да́мъ раѧ̀ бы́сть и҆зселе́нъ, дре́вомъ же кре́стнымъ разбо́йникъ въ ра́й всели́сѧ: ѻ҆́въ ᲂу҆́бѡ вкꙋ́шъ за́повѣдь ѿве́рже сотво́ршагѡ: ѻ҆́въ же сраспина́емь, бг҃а и҆сповѣ́да таѧ́щагосѧ, помѧни́ мѧ, вопїѧ̀, во црⷭ҇твїи твое́мъ.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Па́че всѣ́хъ человѣ̑къ на землѝ а҆́зъ согрѣши́хъ, и҆ бою́сѧ та́мѡ нелицемѣ́рнагѡ сꙋди́ща пребл҃гі́й: на не́мже неѡсꙋжде́на мѧ̀ соблюдѝ тогда̀, и҆ ѿ мꙋ́ки и҆зба́ви, подаѧ́ ми покаѧ́нїе, ѡ҆мыва́ющее всѧ̑кїѧ сквє́рны, ꙗ҆́кѡ чл҃вѣколю́бецъ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ на вы̀ лжꙋ́ще менѐ ра́ди.
Херꙋві́ми, и҆ серафі́ми, вла̑сти, престо́ли, а҆рха́гг҃ли, гдⷭ҇ьствїѧ вкꙋ́пѣ и҆ си̑лы, ст҃і́и а҆́гг҃ли, нача̑ла высоча̑йшаѧ, влⷣцѣ всѣ́хъ ны́нѣ предстоѧ́ще, согрѣше́нїй ѡ҆ставлє́нїѧ и҆ житїѧ̀ и҆справлє́нїѧ и҆спроси́те всѣ̑мъ вопїю́щымъ вѣ́рнѡ: помѧнѝ на́съ во црⷭ҇твїи твое́мъ.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Примѣша́ющесѧ ѻ҆гню̀, хвра́стнꙋю пре́лесть попали́сте стрⷭ҇тоно́сцы хрⷭ҇тѡ́вы: и҆ мно́жествомъ ва́шеѧ кро́ве, глꙋби́ннаго ѕмі́ѧ ѿню́дъ потопи́сте всехва́льнїи, побѣ́дꙋ взе́мше, съ вы́шними во́инствы ра́дꙋетесѧ, молѧ́щесѧ прилѣ́жнѡ сп҃сти́сѧ на́мъ.
Сла́ва: Трисо́лнечнаѧ зарѐ, ꙗ҆́же въ мїрски́хъ сїѧ́ющаѧ и҆сполне́нїихъ, дꙋшѝ моеѧ̀ лю̑тыѧ ѿгна́вши стра̑сти, низпослѝ мнѣ̀ свѣ́та сїѧ́нїе, и҆ ѡ҆чище́нїе согрѣше́нїй, вѣ́рою ны́нѣ зовꙋ́щꙋ тѝ безнача́льномꙋ ѻ҆ц҃ꙋ̀, сн҃ꙋ сопресто́льнꙋ, и҆ дх҃ꙋ: трⷪ҇це, вседѣ́тельнаѧ си́ло, сп҃сѝ на́съ.
И҆ ны́нѣ: Согрѣша́ющаго при́снѡ, и҆ лѣ́ностїю весьма̀ содержи́ма, ᲂу҆ще́дри чⷭ҇таѧ и҆ покаѧ́нїѧ ѡ҆́бразы ᲂу҆добрѝ, даю́щи ᲂу҆миле́нїе недоꙋмѣ́ннѣй дꙋшѝ мое́й, пречⷭ҇таѧ, наде́ждо непосты́днаѧ: любо́вїю воспѣва́ющихъ тѧ̀, и҆ вопїю́щихъ вѣ́рнѡ, помѧнѝ и҆ на́съ дв҃о всепѣ́таѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.