Глас 3-й. Вторник.
Въ понедѣ́льникъ ве́чера,
на Гдⷭ҇и воззва́хъ, стїхи̑ры, гла́съ г҃,
Подо́бенъ: Крⷭ҇тоѡбра́знѡ:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Ю҆́же во мнѣ̀ многоѡбра́зный ѕмі́й, ᲂу҆ви́дѣвъ лѣ́ность къ полє́знымъ дѣлѡ́мъ, и҆ манове́нїемъ ко ѕлы́мъ и҆ го́ршымъ преѡбразꙋ́етсѧ, показꙋ́ѧ грѣха̀ сла́дость, свое́ же го́рькое дѣ́ланїе, и҆ сопроти́вное бж҃е́ственнымъ за́повѣдемъ. тѣ́мже и҆ порѣва́етъ мѧ̀ нра́вомъ, ꙗ҆́кѡ дѡ́браѧ, ѕла̑ѧ прїима́ти лꙋка́вымъ, хрⷭ҇тѐ.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Всѧ́къ пꙋ́ть беззако́нїѧ и҆ грѣхо́вный ше́ствовавъ ᲂу҆се́рднѡ, ѡ҆ста́вивъ пра́вый до конца̀, ны́нѣ ко вратѡ́мъ смє́ртнымъ прибли́жихсѧ, ᲂу҆тѣснѧ́емь зовꙋ̀: живота̀ на́шегѡ пꙋтю̀, і҆и҃се мо́й пребл҃гі́й, къ широтѣ̀ покаѧ́нїѧ и҆́стиннагѡ ѡ҆брати́въ сп҃сѝ, да́ждь мѝ и҆справле́нїе: и҆ пре́жде сме́рти, проще́нїѧ бж҃е́ственнагѡ сподо́би мѧ̀.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.
Оу҆мертви́хсѧ грѣхѝ разли́чными, и҆ прегрѣше́нїй мно́жествы, и҆ безмѣ́стїемъ вели́кимъ, лежꙋ̀ ме́ртвъ, безпо́мощенъ вои́стиннꙋ. є҆ди́на же живе́тъ наде́жда моѧ̀, ꙗ҆́же къ твоемꙋ̀ бл҃гоꙋтро́бїю: мє́ртвымъ дыха́нїе вкꙋ́пѣ и҆ живо́тъ подава́ѧ хрⷭ҇тѐ, и҆ ᲂу҆мерщвлѧ́ѧй стра̑сти на́съ ᲂу҆мертви́вшыѧ, тѣ́мже предвари́въ, вѣ́чныѧ сме́рти и҆схити́ мѧ.
Та́же, стїхи̑ры мине́и: Сла́ва, ст҃о́мꙋ, а҆́ще и҆́мать: И҆ ны́нѣ, бг҃оро́диченъ. А҆́ще ли нѣ́сть мине́и, и҆́ны стїхи̑ры ст҃о́мꙋ и҆ вели́комꙋ і҆ѡа́ннꙋ прⷣте́чи.
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе: и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
И҆́же мт҃рнее безча́дїе, и҆ ѻ҆́ч҃ее безгла́сїе въ рождествѣ̀ твое́мъ предте́че разрѣши́вый, моегѡ̀ се́рдца безча́дїе, и҆ дꙋшѝ безслове́сїе, разрѣшѝ мл҃твами твои́ми бл҃гопрїѧ́тными, къ млⷭ҇рдомꙋ ѻ҆́ч҃ꙋ сн҃ꙋ, всѣ́хъ влⷣцѣ и҆ бг҃ꙋ, є҆го́же ꙗ҆́кѡ сло́ва ᲂу҆́мъ безстра́стнѡ родѝ: и҆ любє́знаѧ томꙋ̀ и҆ глаго́лати и҆ твори́ти ᲂу҆крѣпи́ мѧ.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
И҆́же хрⷭ҇тꙋ̀ ᲂу҆гото́вавъ стєзѝ, и҆ шє́ствїѧ и҆спра́вивъ, пред̾ є҆гѡ́же лице́мъ по́сланъ бы́сть, и҆ моѐ се́рдце бл҃гоше́ственно томꙋ̀ покажѝ, мл҃твами твои́ми и҆ помощьмѝ проѧвле́нными: и҆́же нога́мъ є҆гѡ̀ честны́мъ досто́инъ ꙗ҆ви́лсѧ є҆сѝ, нбⷭ҇ныѧ мѧ̀ землѝ ходи́ти сподо́би, є҆́юже ше́ствꙋютъ кро́ткихъ но́зѣ, да любо́вїю ꙗ҆́кѡ хода́таѧ почита́ю тѧ̀.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Житїю̀ а҆́гг҃льскомꙋ поревнова́лъ є҆сѝ на землѝ, прⷪ҇ро́ческое соверше́нїе, и҆ но́вагѡ завѣ́та первомч҃нче, и҆́же сꙋ́щымъ под̾ земле́ю пе́рвый проповѣ́дниче бж҃е́ственнагѡ сло́ва та́мѡ соше́ствїѧ, ѿ хрⷭ҇та̀ свидѣ́тельствованный: дрꙋ́же а҆́гнца, и҆ и҆зба́вителѧ, ѿ всѧ́кихъ собла̑знъ вра́жїихъ, и҆ многоплете́нныхъ и҆скꙋше́нїй є҆гѡ̀, твоего̀ раба̀ и҆зба́ви крⷭ҇ти́телю і҆ѡа́нне, мл҃твами твои́ми.
Сла́ва, и҆ ны́нѣ, бг҃оро́диченъ: Ꙗ҆́же свѣ́та незаходи́магѡ ѻ҆́блаче, бг҃ора́дованнаѧ ѻ҆трокови́це, бл҃гослове́ннаѧ мр҃і́е, возсїѧ́й мѝ свѣ́тъ покаѧ́нїѧ во тьмѣ̀ грѣхо́внѣй безꙋ́мнѡ содержи́мꙋ: и҆ и҆зба́ви мольба́ми твои́ми ѻ҆гнѧ̀ гее́нскагѡ, и҆ тьмы̀ несвѣти́мыѧ, и҆ днѐ невече́рнѧгѡ ꙗ҆вѝ прича́стника дв҃о, прибѣга́ющаго под̾ кро́въ тво́й пречⷭ҇таѧ.
Та́же, Свѣ́те ти́хїй: Прокі́менъ днѐ:
На стїхо́внѣ стїхи̑ры, гла́съ г҃:
Вече́рнюю пѣ́снь прино́симъ тѝ хрⷭ҇тѐ, съ кади́ломъ и҆ пѣ́сньми дх҃о́вными, поми́лꙋй сп҃се дꙋ́шы на́шѧ.
Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
Сп҃си́ мѧ гдⷭ҇и бж҃е мо́й, ты́ бо всѣ̑мъ є҆сѝ сп҃се́нїе: бꙋ́рѧ мѧ̀ страсте́й смꙋща́етъ, и҆ бре́мѧ беззако́нїѧ погрꙋжа́етъ мѧ̀. да́ждь мѝ рꙋ́кꙋ по́мощи, и҆ возведи́ мѧ къ свѣ́тꙋ покаѧ́нїѧ, ꙗ҆́кѡ є҆ди́нъ бл҃гоꙋтро́бенъ и҆ чл҃вѣколю́бецъ.
Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.
Ве́лїѧ мч҃нкъ твои́хъ хрⷭ҇тѐ си́ла: во гробѣ́хъ бо лежа́ще дꙋ́хи прого́нѧтъ, и҆ ᲂу҆праздни́ша вра́жїю вла́сть, вѣ́рою трⷪ҇ческою подви́гшесѧ ѡ҆ бл҃гоче́стїи.
Сла́ва, и҆ ны́нѣ, бг҃оро́диченъ: Въ жена́хъ ст҃а́ѧ бцⷣе, мт҃и безневѣ́стнаѧ, молѝ, є҆го́же родила̀ є҆сѝ, цр҃ѧ̀ и҆ бг҃а, да сп҃се́тъ на́съ ꙗ҆́кѡ чл҃вѣколю́бецъ.
Та́же, Ны́нѣ ѿпꙋща́еши: Трист҃о́е. И҆ по Ѻ҆́ч҃е на́шъ: тропа́рь, и҆ ѿпꙋ́стъ. ==
Въ понедѣ́льникъ на повече́рїи,,
канѡ́нъ прест҃ѣ́й бцⷣѣ. Гла́съ г҃.
Пѣ́снь а҃
І҆рмо́съ: Во́ды дре́вле, ма́нїемъ бж҃е́ственнымъ, во є҆ди́но со́нмище совокꙋпи́вый, и҆ раздѣли́вый мо́ре і҆и҃льтєскимъ лю́демъ, се́й бг҃ъ на́шъ препросла́вленъ є҆́сть: томꙋ̀ є҆ди́номꙋ пои́мъ, ꙗ҆́кѡ просла́висѧ.
Въ лѣ́ности житїѐ сконча́въ, прибли́жихсѧ къ концꙋ̀ житїѧ̀ моегѡ̀: но сама̀ пречⷭ҇таѧ, понѐ въ послѣ́днее вре́мѧ, да́ждь мѝ ᲂу҆миле́нїе, молю́сѧ, ꙗ҆́кѡ да пла́чꙋсѧ го́рькѡ ѡ҆ безмѣ́рныхъ мои́хъ прегрѣше́нїихъ.
Ѡ҆скверни́въ безꙋ́мнѡ, ю҆́же по ѡ҆́бразꙋ, красотꙋ̀ страстьмѝ пло́ти моеѧ̀ дв҃о, бж҃їѧгѡ ᲂу҆страши́хсѧ негодова́нїѧ, и҆ ᲂу҆жа́снагѡ ѻ҆́гненнагѡ преще́нїѧ: но сама̀ поми́лꙋй мѧ̀ прибѣга́ющаго къ тебѣ̀.
Сла́ва: Колѣ̑на преклони́въ ѻ҆каѧ́нный, твою̀ прошꙋ̀ по́мощь прест҃а́ѧ дв҃о: но ты̀ ᲂу҆слы́ши болѧ́щꙋю дꙋ́шꙋ, и҆ належа́щїй ѻ҆́блакъ печа́ли моеѧ̀ разорѝ заре́ю твои́хъ мл҃твъ.
И҆ ны́нѣ: Напои́тисѧ бога́тнѡ слеза́ми да́ждь, бразда́мъ стра́стныѧ моеѧ̀ дꙋшѝ, и҆ пло́дъ принести́ ми стори́чный влⷣчце сподо́би, и҆ се́рдце моѐ всѧ́кагѡ весе́лїѧ и҆спо́лни, да сла́влю тѧ̀.
Пѣ́снь г҃
І҆рмо́съ: И҆́же ѿ не сꙋ́щихъ всѧ̑ приведы́й, сло́вомъ созида́ємаѧ, соверша́ємаѧ дх҃омъ, вседержи́телю вы́шнїй, въ любвѝ твое́й ᲂу҆твердѝ менѐ.
Сле́зъ тꙋ́чꙋ пода́ждь мѝ бл҃га́ѧ бцⷣе, и҆ си́ми ᲂу҆гасѝ страсте́й мои́хъ пе́щь, и҆ всѧ́кїѧ ѡ҆мы́й дꙋшє́вныѧ моѧ̑ сквє́рны.
Въ беззако́нїихъ ѡ҆скверни́хъ бл҃горо́дїе дꙋшѝ пречⷭ҇таѧ, и҆ трепе́щꙋ и҆стѧза́нїѧ, є҆гда̀ и҆стѧ́жетъ мѧ̀ ѡ҆́браза достоѧ́нїѧ, сло́во.
Сла́ва: Бꙋ́рѧ прегрѣше́нїй ѡ҆б̾е́мши мѧ̀ ны́нѣ, во глꙋбинꙋ̀ ѿча́ѧнїѧ сведѐ: но да́ждь мѝ рꙋ́кꙋ чⷭ҇таѧ, и҆ на покаѧ́нїе мѧ̀ наста́ви.
И҆ ны́нѣ: И҆зба́ви гее́нны и҆ всѧ́кагѡ и҆на́гѡ преще́нїѧ въ ча́съ сꙋда̀, раба̀ твоего̀ пренепоро́чнаѧ, и҆ прича́стника сотворѝ сн҃а и҆ бг҃а твоегѡ̀ ца́рствїю.
Пѣ́снь д҃
І҆рмо́съ: Положи́лъ є҆сѝ къ на́мъ тве́рдꙋю любо́вь гдⷭ҇и, є҆диноро́днаго бо твоего̀ сн҃а за ны̀ на сме́рть да́лъ є҆сѝ. тѣ́мже тѝ зове́мъ бл҃годарѧ́ще: сла́ва си́лѣ твое́й гдⷭ҇и.
Прїидо́ша чⷭ҇таѧ, безмѣ́стныхъ дѣ́лъ во́ды, до ѻ҆каѧ́нныѧ моеѧ̀ дꙋшѝ. тѣ́мже по́мыслы бре́нїѧ ѡ҆держи́мь, вопїю̀ съ болѣ́знїю: не пре́зри менѐ влⷣчце раба̀ твоегѡ̀.
Ѕвѣ́рїе мы́сленнїи, ны́нѣ неми́лостивнѡ ѡ҆быдо́ша мѧ̀, тща́щесѧ восхи́тити неща́днѡ смире́ннꙋю мою̀ дꙋ́шꙋ, всенепоро́чнаѧ: но сн҃омъ пречⷭ҇таѧ сокрꙋшѝ дꙋшетлѣ̑нныѧ чє́люсти.
Сла́ва: Млⷭ҇тива бꙋ́ди твоемꙋ̀ рабꙋ̀ влⷣчце, молю́сѧ, и҆ ча́емагѡ преще́нїѧ лю́ди твоѧ̑ и҆схитѝ всечⷭ҇таѧ, да зове́мъ тѝ бл҃годарѧ́ще: сла́ва тебѣ̀ всѣ́хъ цр҃и́це.
И҆ ны́нѣ: Є҆гда̀ въ нощѝ жени́хъ прїи́детъ сꙋди́ти землѝ, тогда̀ во срѣ́тенїе є҆гѡ̀ со свѣ́тлою свѣще́ю бл҃говолѝ пречⷭ҇таѧ и҆зы́ти мѝ, и҆ поклони́тисѧ тогѡ̀ прише́ствїю.
Пѣ́снь є҃
І҆рмо́съ: На землѝ неви́димый ꙗ҆ви́лсѧ є҆сѝ, и҆ человѣ́кѡмъ во́лею сожи́лъ є҆сѝ непостижи́мый, и҆ къ тебѣ̀ ᲂу҆́тренююще, воспѣва́емъ тѧ̀ чл҃вѣколю́бче.
Псѝ мно́зи ѡ҆держа́ша мѧ̀ вои́стиннꙋ, со́нмъ лꙋка́выхъ дх҃ѡ́въ ѡ҆бы́де мѧ̀: но си́хъ пречⷭ҇таѧ совѣ́ты ны́нѣ разорѝ.
Ро́въ мнѣ̀ ны́нѣ лꙋка́вый и҆зры́въ, воврещи́ мѧ во́нь покꙋша́етсѧ: но твое́ю десни́цею влⷣчце, да впаде́тъ въ ꙗ҆́мꙋ, ю҆́же сотворѝ.
Сла́ва: Да не ꙗ҆́ростїю сн҃а твоегѡ̀ ѡ҆бличе́нъ бꙋ́дꙋ, во вре́мѧ прише́ствїѧ є҆гѡ̀, ни гнѣ́вомъ є҆гѡ̀ накажꙋ́сѧ всепѣ́таѧ: но сп҃си́ мѧ мольба́ми твои́ми.
И҆ ны́нѣ: Ви́ждь чⷭ҇таѧ не́мощь, ви́ждь смире́нїе ѻ҆каѧ́нныѧ моеѧ̀ дꙋшѝ, и҆ безпло́тныхъ вра̑гъ воста́нїе: и҆ си́хъ вре́да и҆зба́ви мѧ̀.
Пѣ́снь ѕ҃
І҆рмо́съ: Бе́здна послѣ́днѧѧ грѣхѡ́въ ѡ҆бы́де мѧ̀, и҆ и҆счеза́етъ дꙋ́хъ мо́й: но простры́й влⷣко высо́кꙋю твою̀ мы́шцꙋ, ꙗ҆́кѡ петра́ мѧ ᲂу҆пра́вителю сп҃сѝ.
Ма́нїемъ всѣ́хъ зижди́телѧ, є҆гда̀ хо́щетъ дꙋша̀ моѧ̀ разлꙋчи́тисѧ ѿ пло́ти, всенепоро́чнаѧ, свободи́ мѧ рꙋкѝ ненави́дѧщихъ мѧ̀, бцⷣе всепѣ́таѧ.
И҆зсꙋшѝ мꙋ̑тныѧ рѣ́ки бг҃ороди́тельнице, лꙋка́выхъ мои́хъ дѣѧ́нїй стрꙋѧ́ми ᲂу҆миле́нїѧ, и҆ напра́ви къ водѣ̀ ѡ҆сла́бы въ де́нь сꙋда̀.
Сла́ва: Вѣ́си мою̀ не́мощь дꙋше́внꙋю, и҆ ᲂу҆ма̀ моегѡ̀ некрѣ́пость пречⷭ҇таѧ, и҆ пло́ти неможе́нїе. тѣ́мже сп҃сѝ раба̀ твоего̀: тѧ́ бо стѧжа́хъ застꙋ́пницꙋ непобѣди́мꙋю.
И҆ ны́нѣ: Стрꙋи̑ мнѣ̀ сле́зъ дх҃о́вныхъ пода́ждь ѻ҆трокови́це, и҆́миже и҆змы́ю ти́нꙋ прегрѣше́нїй мои́хъ, и҆ страсте́й молвꙋ̀ пренепоро́чнаѧ, и҆ сквє́рны тѣлє́сныѧ.
Та́же, Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ: Подо́бенъ: Красотѣ̀ двⷭ҇тва:
Млⷭ҇тиваго во чре́вѣ носи́вшаѧ, прибѣга́ющаго под̾ кро́въ тво́й, и҆ просѧ́ща ѿ дꙋшѝ бж҃е́ственнꙋю твою̀ по́мощь, влⷣчце ᲂу҆ще́дри, и҆ млⷭ҇ти сподо́би, є҆гда̀ предста́немъ влⷣцѣ тва́ри, и҆зба́ви чⷭ҇таѧ ѻ҆гнѧ̀ вѣ́чнагѡ, и҆ всѧ́кагѡ ѡ҆сꙋжде́нїѧ.
Пѣ́снь з҃
І҆рмо́съ: Пре́жде ѡ҆́бразꙋ злато́мꙋ, персі́дскомꙋ чти́лищꙋ, ѻ҆́троцы не поклони́шасѧ, трїѐ пою́ще посредѣ̀ пе́щи: ѻ҆тцє́въ бж҃е бл҃гослове́нъ є҆сѝ.
И҆злїѧ́шасѧ на мѧ̀ чⷭ҇таѧ, прегрѣше́нїй во́ды до дꙋшѝ моеѧ̀, бе́здна же ѡ҆бы́де мѧ̀ послѣ́днѧѧ: но сего̀ и҆змѝ треволне́нїѧ.
Ѡ҆кропи́ мѧ чⷭ҇таѧ, кро́вїю и҆з̾ ре́бръ ржⷭ҇тва̀ твоегѡ̀, мно́жествомъ млⷭ҇ти твоеѧ̀: ѡ҆мы́й же мѧ̀ сле́зными стрꙋѧ́ми, и҆ ѡ҆чи́сти мѧ̀ ѿ всѧ́кїѧ скве́рны.
Сла́ва: Сокрꙋше́нїе мое́й дꙋшѝ, смире́нїе же се́рдцꙋ да́ждь всечⷭ҇таѧ, ꙗ҆́кѡ да всѧ́кагѡ и҆зба́влюсѧ кова́рства, при́снѡ мѧ̀ неща́днѡ ловѧ́щихъ.
И҆ ны́нѣ: Ꙗ҆́кѡ млⷭ҇тива мт҃и бж҃їѧ, рабы̑ твоѧ̑ влⷣчце, млⷭ҇ти сподо́би, и҆̀же вѣ́рою сн҃ꙋ твоемꙋ̀ вопїю́щыѧ: ѻ҆тцє́въ бж҃е бл҃гослове́нъ є҆сѝ.
Пѣ́снь и҃
І҆рмо́съ: Нестерпи́момꙋ ѻ҆гню̀ соедини́вшесѧ, бг҃оче́стїѧ предстоѧ́ще ю҆́нѡши, пла́менемъ же неврежде́ни, бж҃е́ственнꙋю пѣ́снь поѧ́хꙋ: бл҃гослови́те всѧ̑ дѣла̀ гдⷭ҇нѧ гдⷭ҇а, и҆ превозноси́те во всѧ̑ вѣ́ки.
Стрѣ́лы стрѣльца̀ сокрꙋшѝ чⷭ҇таѧ, держа́вою сн҃а твоегѡ̀, и҆ сегѡ̀ непра́вда ны́нѣ да сни́детъ на ве́рхъ є҆гѡ̀, да воспою̀: всѧ̑ дѣла̀ гдⷭ҇нѧ гдⷭ҇а по́йте и҆ превозноси́те є҆го̀ во вѣ́ки.
Свѣ́томъ твои́мъ ѡ҆зарѝ ѻ҆трокови́це, ѡ҆мраче́ное моѐ се́рдце, и҆ ѻ҆рꙋ́жїемъ свѣ́та свѣ́тꙋ двє́ри ѿве́рзи мѝ зовꙋ́щꙋ: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки.
Сла́ва: Оу҆снꙋ́въ въ сме́рти, лежꙋ̀ во гро́бѣ ѿча́ѧнїѧ, но сама́ мѧ возста́ви дв҃о, и҆ бо́дреннѡ пѣ́ти сподо́би: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки.
И҆ ны́нѣ: Не преста́й чⷭ҇таѧ, молѧ́щи ѡ҆ чтꙋ́щихъ тѧ̀ во ᲂу҆миле́нїи, и҆зба́витисѧ сѣте́й дїа́вольскихъ, сн҃ꙋ твоемꙋ̀ вопїю́щихъ: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки.
Пѣ́снь ѳ҃
І҆рмо́съ: Въ зако́нѣ сѣ́ни и҆ писа́нїй ѡ҆́бразъ ви́димъ вѣ́рнїи: всѧ́къ мꙋ́жескїй по́лъ ложесна̀ разверза́ѧ, ст҃ъ бг҃ꙋ: тѣ́мъ перворожде́нное сло́во, ѻ҆ц҃а̀ безнача́льна, сн҃а первородѧ́щасѧ мт҃рїю неискꙋсомꙋ́жнѡ, велича́емъ.
Ѡ҆бꙋрева́етъ страсте́й волне́нїе, и҆ смꙋще́нїе скве́рныхъ помышле́нїй дꙋ́шꙋ мою̀, и҆ лꙋка́выхъ человѣ̑къ бꙋ́рѧ при́снѡ мѧ̀ смꙋща́етъ: но ꙗ҆́кѡ чл҃вѣколюби́ва дв҃о, ѡ҆держи́мыѧ нꙋ́жды вско́рѣ мѧ̀ и҆зба́ви.
Дꙋшѐ смире́ннаѧ, ѿстꙋпѝ лꙋка́выхъ твои́хъ дѣѧ́нїй, и҆ преста́ни ѿ ѕло́бы, и҆ є҆́же прогнѣ́вати бг҃а, воспрїими́ же ᲂу҆се́рднѡ за́пѡвѣди є҆гѡ̀: бцⷣꙋ бо и҆́маши пꙋти̑ твоѧ̑ направлѧ́ющꙋю.
Сла́ва: Ꙗ҆́кѡ ро́ждшаѧ всѣ́хъ гдⷭ҇а, страсте́й мѧ̀ свободѝ, и҆ лю́тыхъ грѣхѡ́въ, и҆ всего́ мѧ дѣ́лы бл҃ги́ми за мно́гое млⷭ҇рдїе твоѐ ѡ҆богатѝ: да ра́дꙋѧсѧ любо́вїю велича́ю тѧ̀ всенепоро́чнаѧ.
И҆ ны́нѣ: Приближа́етсѧ дꙋшѐ коне́цъ, при две́рехъ сꙋди́ще, ѿстꙋпѝ дѣ́лъ стꙋ́дныхъ, и҆ прїими́сѧ за бл҃го́е житїѐ: и҆́маши бо побо́рницꙋ бцⷣꙋ, и҆збавлѧ́ющꙋю тѧ̀ ѿ всѧ́кагѡ ѡ҆ѕлобле́нїѧ.
Та́же, Досто́йно є҆́сть: И҆ покло́нъ. Трист҃о́е. По Ѻ҆́ч҃е на́шъ: тропа́рь, и҆ про́чее ѻ҆бы́чно, и҆ ѿпꙋ́стъ.
Во вто́рникъ ᲂу҆́тра,
по а҃-мъ стїхосло́вїи сѣда́льны ᲂу҆мили́тельны, Гла́съ г҃:
Прише́льствꙋющи на землѝ дꙋшѐ моѧ̀, пока́йсѧ, пе́рсть бо во гро́бѣ не пое́тъ, ни ѿ прегрѣше́нїй и҆збавлѧ́етъ. возопі́й хрⷭ҇тꙋ̀ бг҃ꙋ: сердцевѣ́дче, согрѣши́хъ тѝ, пре́жде да́же не ѡ҆сꙋ́диши менѐ, пощадѝ мѧ̀ бж҃е и҆ поми́лꙋй мѧ̀.
Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.
Доко́лѣ дꙋшѐ моѧ̀ пребыва́еши въ согрѣше́нїихъ; доко́лѣ прїе́млеши покаѧ́нїѧ ѿложе́нїе; прїимѝ во ᲂу҆мѣ̀ сꙋ́дъ грѧдꙋ́щїй, возопі́й хрⷭ҇тꙋ̀ бг҃ꙋ: сердцевѣ́дче, согрѣши́хъ, безгрѣ́шне гдⷭ҇и, поми́лꙋй мѧ̀.
Сла́ва, и҆ ны́нѣ, бг҃оро́диченъ: Прибѣ́жище и҆ си́ло на́ша бцⷣе, крѣ́пкаѧ помо́щнице мі́ра, мл҃твами твои́ми покры́й рабы̑ твоѧ̑ ѿ всѧ́кїѧ нꙋ́жды, є҆ди́на бл҃гослове́ннаѧ.
По в҃-мъ стїхосло́вїи сѣда́льны, гла́съ г҃:
На стра́шнѣмъ сꙋди́щи без̾ сопє́рникъ ѡ҆блича́юсѧ, и҆ без̾ свидѣ́телей ѡ҆сꙋжда́юсѧ: кни̑ги бо сѡ́вѣстныѧ разгиба́ютсѧ, и҆ дѣла̀ сокровє́ннаѧ ѿкрыва́ютсѧ. пре́жде да́же ᲂу҆́бѡ во ѻ҆́номъ всенаро́дномъ позо́рищи хо́щеши и҆стѧза́ти, ꙗ҆̀же мно́ю содѣ̑ѧннаѧ, бж҃е, ѡ҆чи́сти мѧ̀, и҆ сп҃си́ мѧ.
Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.
Глꙋбинꙋ̀ согрѣше́нїй мои́хъ ты̀ вѣ́си гдⷭ҇и: да́ждь мѝ рꙋ́кꙋ по́мощи ꙗ҆́кѡ петрꙋ̀, и҆ сп҃си́ мѧ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мч҃нченъ: Сїѧ́ете вѣ́рою пресвѣ̑тлаѧ свѣти̑ла ст҃і́и, немощствꙋ́ющихъ вра́чеве, страстоте́рпцы прехва́льнїи: мꙋчи́телей бо ра̑нъ не ᲂу҆боѧ́стесѧ, і҆́дѡльское ѕлоче́стїе низложи́сте, побѣ́дꙋ и҆мꙋ́ще непобѣди́мꙋю крⷭ҇тъ и҆́стинный.
Сла́ва, и҆ ны́нѣ, бг҃оро́диченъ: Прїимѝ влⷣчце вѣ́рою притека́ющаго под̾ кро́въ тво́й, и҆ не возненави́ждь менѐ, нижѐ пре́зри бл҃га́ѧ покаѧ́нїемъ молѧ́щагосѧ. прїимѝ ꙗ҆́же ѿ ᲂу҆́стъ недосто́йныхъ мои́хъ мольбꙋ̀, и҆ хода́тайствомъ твои́мъ ѿ сѣте́й и҆зба́ви мѧ̀, да со дерзнове́нїемъ вопїю́ ти: ра́дꙋйсѧ ѡ҆бра́дованнаѧ.
По г҃-мъ стїхосло́вїи сѣда́льны, гла́съ г҃:
Подо́бенъ: Красотѣ̀ двⷭ҇тва:
Под̾ кро́въ тво́й прибѣ́гше, вѣ́рою зове́мъ и҆з̾ глꙋбины̀ дꙋше́вныѧ: бг҃обл҃же́нне прⷪ҇ро́че и҆ предте́че, напа́стей и҆ бѣ́дъ смꙋщє́нїѧ, и҆ недꙋ́гѡвъ волнє́нїѧ ᲂу҆тишѝ, и҆ сꙋ́етны сотворѝ врагѡ́въ ѕлохи̑трыѧ совѣ́ты, просѧ̀ на́мъ ве́лїѧ млⷭ҇ти.
Оу҆ны́нїе твоѐ дꙋшѐ ѻ҆каѧ́ннаѧ, пре́жде и҆схо́да твоегѡ̀ ѿтрѧ́сши покаѧ́нїемъ, и҆ съ пла́чемъ ѡ҆брати́сѧ зовꙋ́щи къ неѕло́бивомꙋ і҆и҃сꙋ чл҃вѣколю́бцꙋ: согрѣши́хъ тѝ влⷣко, но ꙗ҆́кѡ млⷭ҇рдъ сп҃си́ мѧ, мл҃твами ст҃а́гѡ предте́чи, и҆́же є҆ди́нъ сы́й безгрѣ́шенъ.
Сла́ва, и҆ ны́нѣ, бг҃оро́диченъ: Недомы́сленно и҆ непостижи́мо є҆́сть влⷣчце бг҃ора́дованнаѧ, є҆́же содѣ́ланное ѡ҆ тебѣ̀ стра́шное бж҃їе та́инство: и҆́бо неѡб̾име́ннаго заче́нши родила̀ є҆сѝ, пло́тїю ѡ҆бложе́на ѿ пречⷭ҇тыхъ крове́й твои́хъ: є҆го́же всегда̀ чⷭ҇таѧ съ прⷣте́чею молѝ, сп҃сти́сѧ дꙋша́мъ на́шымъ.
Канѡ́нъ ᲂу҆мили́теленъ ко гдⷭ҇ꙋ на́шемꙋ і҆и҃сꙋ хрⷭ҇тꙋ̀, и҆ ст҃ы̑мъ є҆гѡ̀ мч҃нкѡмъ, [є҆гѡ́же краегране́сїе: Мои́мъ стена́нїємъ вонмѝ бж҃їй сло́ве.] Творе́нїе і҆ѡ́сифово. Гла́съ г҃.
Пѣ́снь а҃
І҆рмо́съ: Ди́внѡ, сла́внѡ творѧ́й чꙋдеса̀, ты̀ є҆сѝ бж҃е, бе́зднꙋ ѡ҆землени́вый, и҆ колєсни́цы потопи́вый, и҆ лю́ди сп҃сы́й пою́щыѧ тебѣ̀, ꙗ҆́кѡ цр҃ю̀ на́шемꙋ и҆ бг҃ꙋ.
Са́ми себѐ пре́жде конца̀ вѣ́рнїи пла́чимъ ѿ всеѧ̀ дꙋшѝ: приближа́етсѧ жени́хъ, возжже́мъ дѣѧ̑нїѧ ꙗ҆́коже свѣ̑тлыѧ свѣщы̀, ꙗ҆́кѡ да бж҃е́ственный черто́гъ ᲂу҆лꙋчи́мъ вкꙋ́пѣ.
Пока́ѧвсѧ дре́вле манассі́а ѿ всеѧ̀ дꙋшѝ, сп҃се́сѧ: возопи́ бо ѿ среды̀ ᲂу҆́зъ свѧ́занъ ко є҆ди́номꙋ влⷣцѣ. томꙋ̀ ревнꙋ́й дꙋшѐ, и҆ сп҃се́шисѧ ᲂу҆до́бь.
Мч҃нченъ: Ѻ҆че́съ слѣпотꙋ̀, рꙋ́къ лише́нїе, ѧ҆зы́ка ᲂу҆рѣ́занїе, но́гъ же ѿѧ́тїе, бе́дръ и҆ мы́шцей сокрꙋше́нїе, претерпѣ́ша бж҃е́ственнїи страда́льцы, бл҃годарѧ́ще і҆и҃сꙋ хрⷭ҇тꙋ̀.
Мч҃нченъ: Враче́бница ꙗ҆ви́сѧ на́мъ ра́ка моще́й ва́шихъ, ст҃і́и мч҃нцы всѣ̑мъ вѣ̑рнымъ: и҆з̾ неѧ́же почерпа́емъ и҆сцѣлє́нїѧ, дꙋ́шъ же и҆ тѣле́съ, по до́лгꙋ ва́съ чтꙋ́щїи при́снѡ.
Бг҃оро́диченъ: Безсме́ртїѧ ма́ннꙋ хрⷭ҇та̀ носѧ́щи, ста́мно слове́снаѧ, го́рести дꙋшетлѣ́нныхъ страсте́й и҆зба́ви мѧ̀ всепѣ́таѧ дв҃о: ꙗ҆́кѡ да вѣ́рою тѧ̀ славосло́влю бл҃гоче́стнѡ.
Дрꙋгі́й канѡ́нъ предте́чи і҆ѡа́ннꙋ.
І҆рмо́съ: Во́ды дре́вле, ма́нїемъ бж҃е́ственнымъ, во є҆ди́но со́нмище совокꙋпи́вый, и҆ раздѣли́вый мо́ре і҆и҃льтєскимъ лю́демъ, се́й бг҃ъ на́шъ, препросла́вленъ є҆́сть: томꙋ̀ є҆ди́номꙋ пои́мъ, ꙗ҆́кѡ просла́висѧ.
Непло́дныѧ ᲂу҆тро́бы бж҃е́ственное прозѧбе́нїе, плоды́ ми добродѣ́телей прозѧба́ти, бг҃ꙋ моли́сѧ, грѣха̀ моегѡ̀ разрѣша́ѧ непло́дїе, и҆ ѿгонѧ́ѧ мра́къ ѿ ᲂу҆ма̀ моегѡ̀, гдⷭ҇ень предте́че.
Сл҃нца сла́вы ве́лїй, ꙗ҆́коже предтекꙋ́щаѧ ѕвѣзда̀, вѣ́рою на землѝ ꙗ҆ви́лсѧ є҆сѝ, зе́млю всю̀ просвѣ́щшагѡ: того̀ ᲂу҆́бѡ молѝ, ѡ҆мрачи́вшꙋюсѧ дꙋ́шꙋ мою̀ ѕлы́ми помышле́ньми просвѣти́ти предте́че.
И҆́же живо́тъ сꙋ́щымъ во а҆́дѣ, дх҃омъ бж҃е́ственнымъ приближа́ющсѧ, предвозвѣсти́лъ є҆сѝ прⷪ҇ро́че, мою̀ ᲂу҆мерщвле́ннꙋю дꙋ́шꙋ ѡ҆живѝ твои́ми мольба́ми: и҆ ꙗ҆́кѡ ѿ гро́ба прегрѣше́нїй возста́ви, молю́сѧ, сла́вный предте́че.
Бг҃оро́диченъ: Со а҆рха́гг҃лы и҆ а҆́гг҃лы дв҃о, и҆ со ст҃ы́ми всѣ́ми, и҆з̾ тебѐ гдⷭ҇а ꙗ҆́вльшагосѧ на́мъ молѝ, мо́лимсѧ, и҆́стиннꙋю бцⷣꙋ и҆сповѣ́дающымъ тѧ̀ ѿ бѣ́дъ и҆зба́витисѧ.
Пѣ́снь г҃
І҆рмо́съ: Непло́днаѧ дꙋшѐ и҆ безча́днаѧ, стѧжѝ пло́дъ благосла́вный, веселѧ́щисѧ возопі́й: ᲂу҆тверди́хсѧ тобо́ю бж҃е, нѣ́сть ст҃ъ, нѣ́сть првⷣенъ, па́че тебѐ гдⷭ҇и.
Зако́нъ бж҃їй ѿверго́хъ несмы́сленнѡ, и҆ ѡ҆сꙋжде́нъ бы́ти и҆́мамъ: и҆ что̀ сотворю̀, не вѣ́мъ. сꙋдїѐ пра́веднѣйшїй, ᲂу҆ще́дривъ сп҃си́ мѧ млⷭ҇рдїемъ твои́мъ.
Восто́къ чл҃вѣколю́бче сы́й восто́кѡвъ, возсїѧ́й мѝ, молю́сѧ, пра́вды свѣ́тъ, и҆з̾има́ѧ мѧ̀ страсте́й ѡ҆мраче́нїѧ, и҆ тьмы̀ мꙋче́нїѧ, многомлⷭ҇тиве.
Мч҃нченъ: Землѝ мы́сленныѧ жи́телїе, древеса̀ плодѡви́таѧ ра̑йскаѧ, ст҃і́и мч҃нцы, и҆сто́чницы, и҆̀же бж҃е́ственнꙋю во́дꙋ и҆мꙋ́щїи, ча́шы пролива́ющїи питїѐ ст҃о́е ꙗ҆ви́стесѧ.
Мч҃нченъ: Є҆ди́нъ во мно́гихъ тѣлесѣ́хъ нра́въ носѧ́ще, стрⷭ҇тоте́рпцы мч҃нцы, тьмы̀ побѣди́сте врага̀ мїроде́ржца, трⷪ҇цꙋ нераздѣли́мꙋю проповѣ́дающе.
Бг҃оро́диченъ: Дв҃о мт҃и пречⷭ҇таѧ, ка́ющымсѧ на́мъ и҆ ко хрⷭ҇тꙋ̀ притека́ющымъ, и҆ прегрѣше́нїй разрѣше́нїе хотѧ́щымъ прїѧ́ти, млⷭ҇тива сего̀ всѣ̑мъ содѣ́лай всѣ́хъ влⷣчце.
И҆́нъ
І҆рмо́съ: И҆́же ѿ не сꙋ́щихъ всѧ̑ приведы́й, сло́вомъ созида́ємаѧ, соверша́ємаѧ дх҃омъ, вседержи́телю вы́шнїй, въ любвѝ твое́й ᲂу҆твердѝ менѐ.
Гла́съ сло́ва бы́въ крⷭ҇ти́телю, гла́сы чтꙋ́щихъ тѧ̀ къ немꙋ̀ ны́нѣ и҆спра́ви, и҆ прегрѣше́нїй ѡ҆ставле́нїе хода́тайствомъ твои́мъ на́мъ пода́ждь.
Согрѣши́хъ тебѣ̀ и҆ беззако́нновахъ, и҆ лю́тѣ сп҃се прегрѣши́хъ, и҆ дꙋ́шꙋ ѡ҆скверни́хъ: сегѡ̀ ра́ди молю́сѧ тѝ, твоегѡ̀ ра́ди крⷭ҇ти́телѧ ᲂу҆ще́дри мѧ̀.
Въ пꙋсты́ни заблꙋ́ждша сластьмѝ, пꙋсты́нное воспита́нїе и҆ наста́вника но́выхъ люде́й молю́ тѧ предте́че, къ покаѧ́нїѧ пꙋтѝ наста́ви мѧ̀.
Бг҃оро́диченъ: Со а҆пⷭ҇лы, и҆ прⷪ҇ро́ки сщ҃е́нными, съ мч҃нки пречⷭ҇таѧ, и҆ съ вы́шними си́лами сн҃а твоего̀ молѝ, ᲂу҆ще́дрити на́съ тебѐ пою́щихъ.
Пѣ́снь д҃
І҆рмо́съ: Прїѡсѣне́ннꙋю го́рꙋ а҆ввакꙋ́мъ прозрѧ́ше, пречⷭ҇тꙋю твою̀ ᲂу҆тро́бꙋ чⷭ҇таѧ, тѣ́мъ взыва́ше: ѿ ю҆́га прїи́детъ бг҃ъ, и҆ ст҃ы́й ѿ горы̀ прїѡсѣне́нныѧ ча́щи.
И҆́же и҆сточи́вый и҆з̾ ка́мене дре́вле лю́демъ непокѡри́вымъ хрⷭ҇тѐ, и҆ прерѣка́ющымъ, во́дꙋ жа́жды и҆сцѣле́нїѧ, ѿ невла́жныѧ дꙋшѝ моеѧ̀ бж҃е, ᲂу҆миле́нїѧ ка́плю и҆змыва́ющꙋю мѧ̀ и҆сточѝ.
Врачꙋ̀ болѧ́щихъ, се́рдца моегѡ̀ стра̑сти и҆сцѣлѝ благоꙋтро́бнымъ твои́мъ манове́нїемъ, покаѧ́нїѧ семꙋ̀ сп҃се прилага́ѧ пла́стырь, ꙗ҆́кѡ бл҃гъ, бж҃е́ственнагѡ бы́лїѧ, ꙗ҆́кѡ да вѣ́рою славосло́влю тѧ̀.
Мч҃нченъ: Млⷭ҇тивнѡ страстоно́сцы, ꙗ҆́же къ тѣ́лꙋ дрꙋ́жбы, распрѧ́гше помышле́нїе, мꙋ́чити ва́съ хотѧ́щымъ преда́сте са́ми себѐ. тѣ́мже бли́жнїи зижди́телю бы́сте дрꙋ́зи.
Мч҃нченъ: Многоболѣ̑зненныѧ стрꙋ́пы ѿ многови́дныхъ мꙋ́къ под̾ѧ́сте страда́льцы хрⷭ҇тѡ́вы, и҆ бл҃года́ть прїѧ́сте ѿ дх҃о́вныхъ дарѡ́въ, страсте́й на́шихъ прогонѧ́юще многолѣ́тныѧ болѣ́зни.
Бг҃оро́диченъ: Многоимени́таѧ ѻ҆трокови́це ра́дꙋйсѧ, и҆з̾ неѧ́же бг҃ъ сло́во роди́сѧ, ѿ безслове́сныхъ на́съ разрѣша́ѧ, и҆ безмѣ́стныхъ дѣѧ́нїй: ра́дꙋйсѧ ѻ҆́блаче свѣ́тлый, разгонѧ́ющїй ѻ҆́блаки на́шегѡ ᲂу҆ны́нїѧ.
И҆́нъ
І҆рмо́съ: Положи́лъ є҆сѝ къ на́мъ тве́рдꙋю любо́вь гдⷭ҇и, є҆диноро́днаго бо твоего̀ сн҃а за ны̀ на сме́рть да́лъ є҆сѝ. тѣ́мже тѝ зове́мъ бл҃годарѧ́ще: сла́ва си́лѣ твое́й гдⷭ҇и.
Сло́ва тѧ̀ гла́съ пло́тїю ꙗ҆́вльшагосѧ сꙋ́ща, предте́че гдⷭ҇ень молю̀, безслове́сныхъ мѧ̀ и҆зба́ви дѣѧ́нїй, словесы̀ чтꙋ́щаго тѧ̀, и҆ по до́лгꙋ вѣ́рою блажа́щаго.
Воздохнѝ ѽ дꙋшѐ, и҆ бг҃ꙋ зижди́телю твоемꙋ̀ возопі́й: согрѣши́хъ, ѡ҆чи́сти мѧ̀ хрⷭ҇тѐ, и҆ и҆зба́ви мѧ̀ стра́шныѧ мꙋ́ки, бѣ́дъ же и҆ скорбе́й, мольба́ми бж҃е́ственнагѡ предте́чи.
Волна́ми мно́гими лю́тыхъ страсте́й потоплѧ́ема, и҆ бꙋ́рею лю́тѣ содержи́ма, и҆ при́снѡ погрꙋжа́ема, крⷭ҇ти́телю и҆схитѝ, и҆ къ покаѧ́нїѧ приста́нищꙋ наста́ви мѧ̀.
Бг҃оро́диченъ: Мт҃и бж҃їѧ, херꙋві̑мъ превы́шшаѧ, колесни́це, съ невеще́ственными слꙋжи́тели, и҆ со ст҃ы́ми всѣ́ми молѝ хрⷭ҇та̀, є҆го́же родила̀ є҆сѝ всенепоро́чнаѧ, сп҃сти́ мѧ ѿча́ѧннаго.
Пѣ́снь є҃
І҆рмо́съ: Оу҆́тренююще воспѣва́емъ тѧ̀ сло́ве, сн҃е бж҃їй є҆диноро́дне: тво́й ми́ръ да́ждь на́мъ, и҆ поми́лꙋй ны̀ пою́щыѧ тѧ̀, и҆ вѣ́рнѡ покланѧ́ющыѧсѧ.
Ѡ҆кропи́въ мѧ̀ покаѧ́нїѧ ѵ҆ссѡ́помъ, ѡ҆чи́сти ѿ скве́рнъ страсте́й, да ꙗ҆влю́сѧ тебѣ̀ чи́стъ, є҆гда̀ хо́щеши і҆и҃се, сꙋди́ти всѧ́чєскимъ, пра́веднымъ твои́мъ сꙋдо́мъ.
Ра̑ны согни́шасѧ сп҃се преѻкаѧ́нныѧ моеѧ̀ дꙋшѝ: и҆сцѣли́телю болѧ́щихъ, и҆ да́телю бл҃ги́хъ, и҆сцѣли́въ сп҃си́ мѧ, мно́гїѧ ра́ди твоеѧ̀ млⷭ҇ти.
Мч҃нченъ: Сокрꙋши́шасѧ сосꙋ́ди скꙋде́льнїи страстоте́рпцєвъ на землѝ: но крѣ́пость дꙋше́внаѧ ᲂу҆крѣпи́сѧ мно́жае, и҆ просвѣти́сѧ хрⷭ҇то́вою си́лою.
Мч҃нченъ: Пролива́емаѧ ст҃ы́хъ кро́вь всю̀ зе́млю ѡ҆ст҃ѝ, и҆ напоѝ вѣ́рныхъ дꙋ́шы, и҆ и҆зсꙋшѝ ꙗ҆́вѣ сꙋ́етства мꙋ̑тныѧ пото́ки.
Бг҃оро́диченъ: Ржⷭ҇тво́мъ твои́мъ ѡ҆непло́дствила є҆сѝ ѻ҆трокови́це пра́дѣднюю клѧ́твꙋ: и҆ и҆сточи́ла є҆сѝ на́мъ бл҃гослове́нїѧ рѣ́ки, бл҃госло́вѧщымъ тѧ̀, и҆ сла́вѧщымъ вѣ́рою.
И҆́нъ
І҆рмо́съ: На землѝ неви́димый ꙗ҆ви́лсѧ є҆сѝ, и҆ человѣ́кѡмъ во́лею сожи́лъ є҆сѝ непостижи́мый, и҆ къ тебѣ̀ ᲂу҆́тренююще, воспѣва́емъ тѧ̀ чл҃вѣколю́бче.
На землѝ ꙗ҆́коже а҆́гг҃лъ бл҃же́нне, съ пло́тїю ꙗ҆́вѣ пожи́лъ є҆сѝ. тѣ́мже молю́сѧ тѝ: плотски́хъ мꙋдрова́нїй дꙋ́шꙋ мою̀ свободѝ.
Во глꙋбинꙋ̀ грѣхо́внꙋю впа́дшаго, и҆ сластьмѝ дꙋ́шꙋ ѡ҆скверни́вшаго, и҆ бѣ́дствꙋющаго, гдⷭ҇ень предте́че, сп҃си́ мѧ къ тебѣ̀ прибѣга́ющаго.
Ты̀ прⷪ҇ро́кѡвъ превы́шши ꙗ҆ви́лсѧ є҆сѝ, и҆́бо са́мъ ви́дѣлъ є҆сѝ прⷪ҇ро́че проповѣ́даннаго: є҆го́же непреста́ннѡ молѝ, просвѣти́ти дꙋ́шы на́шѧ.
Бг҃оро́диченъ: Нб҃съ простра́ннѣйши ꙗ҆́вльшисѧ, є҆́же въ тѧ̀ вселе́нїемъ сло́ва бг҃ора́дованнаѧ, ᲂу҆тѣснѧ́ющихъ мѧ̀ грѣхѡ́въ свободѝ.
Пѣ́снь ѕ҃
І҆рмо́съ: Глꙋбина̀ страсте́й воста̀ на мѧ̀, и҆ бꙋ́рѧ проти́вныхъ вѣ́трѡвъ: но предвари́въ мѧ̀ ты̀ сп҃сѝ сп҃се, и҆ и҆зба́ви ѿ тлѝ ꙗ҆́кѡ сп҃слъ є҆сѝ ѿ ѕвѣ́рѧ прⷪ҇ро́ка.
Ѿмрачи́хсѧ грѣха̀ мгло́ю, и҆ лежꙋ̀ недѣ́йственъ ве́сь: и҆́же ᲂу҆ѧзви́выйсѧ менѐ ра́ди копїе́мъ и҆ногда̀, хрⷭ҇тѐ бж҃е, ᲂу҆ще́дри мѧ̀ твои́мъ млⷭ҇рдїемъ.
Стеню̀, и҆ въ ѕлы́хъ пребыва́ю: слезю̀, и҆ сꙋда̀ не трепе́щꙋ, нечꙋ́вствїемъ болю̀: сло́ве бж҃їй, ᲂу҆ще́дри мѧ̀ и҆ сп҃сѝ, бл҃ги́ми сꙋдьба́ми твои́ми.
Мч҃нченъ: Ꙗ҆́коже а҆́гнцы не вопїю́ще ѿню́дъ, ни сло́во, ни гла́съ и҆спꙋща́юще, всесла́внїи страда́льцы, къ заколе́нїю и҆ ра́намъ приводи́ми бы́сте, хрⷭ҇та̀ воспѣва́юще.
Мч҃нченъ: Ѕвѣрє́мъ пре́дани бы́сте на снѣ́дь, морскі́ѧ глꙋбины̀ причасти́стесѧ ра́достною дꙋше́ю. тѣ́мже ва́съ хрⷭ҇то́съ, страда́льцы, вѣнцы̀ нетлѣ́нными ᲂу҆красѝ.
Бг҃оро́диченъ: Две́ре вѣ́рнѡ спаса́емыхъ, врата̀, и҆́миже є҆ди́нъ про́йде вопло́щьсѧ за ны̀, врата̀ на́мъ пра́вды ѿве́рзи, вѣ́рою тѧ̀ пою́щымъ.
И҆́нъ
І҆рмо́съ: Бе́здна послѣ́днѧѧ грѣхѡ́въ ѡ҆бы́де мѧ̀ и҆ и҆счеза́етъ дх҃ъ мо́й: но простры́й влⷣко высо́кꙋю твою̀ мы́шцꙋ, ꙗ҆́кѡ петра́ мѧ ᲂу҆пра́вителю сп҃сѝ.
Вода́ми, пото́ка сла́дости, прикло́ншагосѧ под̾ рꙋ́кꙋ твою̀ крести́лъ є҆сѝ: того̀ молѝ, низпосла́ти мѝ во́дꙋ мꙋ́дре ᲂу҆миле́нїѧ, мно́гѡ согрѣши́вшемꙋ.
Бе́зднꙋ млⷭ҇рдїѧ въ рѣцѣ̀ предте́че ѡ҆мы́лъ є҆сѝ, превы́спрєннѧѧ небеса̀ вода́ми покрыва́ющагѡ, і҆и҃са чл҃вѣколю́бца: є҆го́же молѝ и҆сточи́ти мѝ ѡ҆ставле́нїе.
Прибли́жисѧ црⷭ҇тво нбⷭ҇ное, пока́йтесѧ, взыва́лъ є҆сѝ предте́че: є҆гѡ́же ᲂу҆лꙋчи́ти сподо́би любо́вїю тѧ̀ чтꙋ́щихъ, и҆ под̾ кро́въ честны́й прибѣга́ющихъ.
Бг҃оро́диченъ: Пречⷭ҇таѧ, ꙗ҆́же пло́ть свою̀ созда́телю взаи́мъ да́вши, съ вы́шними си́лами, и҆ со прⷪ҇ро́ки всѣ́ми, а҆пⷭ҇лы же и҆ мч҃нки, того̀ молѝ ᲂу҆ще́дрити и҆ сп҃сти́ мѧ.
Пѣ́снь з҃
І҆рмо́съ: Пла́мень ѡ҆роси́вый пе́щный, и҆ ѻ҆́троки неѡпали́мы сп҃сы́й, бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
Ѡ҆бнажи́хсѧ ѿ ри́зъ нетлѣ́нїѧ, ѡ҆блеко́хсѧ же въ дѣла̀ безче́стїѧ. тѣ́мже вопїю́ ти: бж҃е ще́дрый, добродѣ́телей мѧ̀ ѻ҆де́ждами просвѣтѝ.
Ѻ҆чи́ма блꙋ́дныма ѡ҆калѧ́хсѧ, и҆ ѡ҆сѧза́нїемъ невоздержа́нїѧ ѡ҆скверни́хсѧ, и҆ ме́рзокъ бы́хъ пред̾ тобо́ю і҆и҃се, ꙗ҆́кѡ блꙋ́днаго прїими́ мѧ.
Мч҃нченъ: Вы́шнюю жи́знь возлюби́вше, мнѡ́гїѧ претерпѣ́сте болѣ̑зни, хрⷭ҇тѡ́вы ѻ҆рꙋ́жницы, свѣти́льницы бж҃е́ственнїи: сегѡ̀ ра́ди вѣ́рнѡ ᲂу҆блажа́еми є҆стѐ.
Мч҃нченъ: Просвѣти́вшесѧ заре́ю мꙋче́нїѧ, ѡ҆блиста́ете мно́жае со́лнца, и҆ всѧ́къ мра́къ безбо́жїѧ ѿгна́сте ст҃і́и мч҃нцы.
Бг҃оро́диченъ: Ꙗ҆́кѡ ро́ждши всѣ́хъ содержи́телѧ, ѿ содержа́щагѡ мра́ка невѣ́дѣнїѧ, и҆ ѿ грѣха̀ и҆зба́ви мѧ̀, бцⷣе чⷭ҇таѧ приснодв҃о.
И҆́нъ
І҆рмо́съ: Трїѐ ѻ҆́троцы въ пещѝ трⷪ҇цꙋ проѡбрази́вше, преще́нїе ѻ҆́гненное попра́ша, и҆ пою́ще вопїѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Свѣти́льникъ со́лнца, дꙋ́шꙋ мою̀ лѣ́ностїю ѡ҆мраче́нꙋю ѡ҆зарѝ и҆ ѡ҆слѣпле́ннꙋю, къ покаѧ́нїѧ стезѣ̀ направлѧ́ѧ мѧ̀, крⷭ҇ти́телю хрⷭ҇то́въ предте́че.
Сꙋ́дный ча́съ помышлѧ́ѧ, ве́сь ᲂу҆страша́юсѧ, слежꙋ̀ во мно́жествѣ безмѣ́стныхъ дѣѧ́нїй, крести́телю гдⷭ҇ень, предста́въ и҆зба́ви мѧ̀ ѻ҆гнѧ̀ предлежа́щаго мѝ.
Предста́телю живота̀ моегѡ̀, застꙋ́пниче мо́й предте́че, ѿ врагѡ́въ мѧ̀ ви́димыхъ и҆ неви́димыхъ сохранѝ, и҆ покры́й, и҆ црⷭ҇твїѧ нбⷭ҇нагѡ прича́стника сотворѝ.
Бг҃оро́диченъ: Дв҃о бцⷣе, сн҃а твоего̀ молѝ, со прⷪ҇ро́ки, а҆пⷭ҇лы же и҆ мч҃ники, бꙋ́дꙋщїѧ нꙋ́жды и҆зба́вити ны̀, тебѐ чтꙋ́щыѧ при́снѡ.
Пѣ́снь и҃
І҆рмо́съ: А҆́гг҃льми немо́лчнѡ въ вы́шнихъ сла́вимаго бг҃а, нб҃са̀ нб҃съ, землѧ̀, и҆ го́ры, и҆ хо́лми, и҆ глꙋбина̀, и҆ ве́сь ро́дъ человѣ́ческїй, пѣ́сньми того̀ ꙗ҆́кѡ созда́телѧ и҆ и҆зба́вителѧ бл҃гослови́те, и҆ превозноси́те во всѧ̑ вѣ́ки.
Ꙗ҆́кѡ стра́ха твоегѡ̀ не и҆мѣ́хъ живꙋ́щагѡ въ се́рдцѣ мое́мъ, всю̀ сконча́хъ плотскꙋ́ю сла́сть безсо́вѣстный, и҆ трепе́щꙋ твоегѡ̀ сꙋда̀ всѣ́хъ цр҃ю̀: не возгнꙋша́йсѧ менѐ ны́нѣ ка́ющагѡсѧ.
На зе́млю ст҃ꙋ́ю мѧ̀ прейтѝ, многомлⷭ҇тиве сподо́би, на не́йже живꙋ́тъ кро́тцыи, покаѧ́нїемъ и҆змы́въ мѧ̀ земна́гѡ грѣха̀, и҆́же на землѝ безгрѣ́шнѡ рожде́йсѧ ѿ дв҃ы.
Мч҃нченъ: Въ свое́й ва́мъ кро́ви ѡ҆червлени́шасѧ но́ги ва́шѧ, запина́юще врагꙋ̀, и҆ ше́ствїе къ нбⷭ҇нымъ творѧ́ще прпⷣбнѡ, всесла́внїи хрⷭ҇та̀ всѣ́хъ бг҃а стрⷭ҇тоте́рпцы.
Мч҃нченъ: Совлеко́стесѧ ко страда́нїємъ ᲂу҆се́рднѡ, и҆ къ вели̑кимъ боре́нїємъ, ѡ҆бнажи́сте врага̀, и҆ въ стꙋ́дъ ѡ҆блеко́сте: тѣ́мже на нб҃сѣ́хъ вѣнцено́сцы ликꙋ́ете, сла́внїи стрⷭ҇тоте́рпцы.
Бг҃оро́диченъ: І҆а́кѡвлю тѧ̀ добро́тꙋ, и҆́же кра́сный добро́тою гдⷭ҇ь возлюби́въ, во твоѐ чре́во всенепоро́чнаѧ всели́сѧ, чл҃вѣ́ческое сꙋщество̀ добро́тами просвѣти́въ, па́че ᲂу҆ма̀ дарова́ньми.
И҆́нъ
І҆рмо́съ: Нестерпи́момꙋ ѻ҆гню̀ соедини́вшесѧ, бг҃оче́стїѧ предстоѧ́ще ю҆́нѡши, пла́менемъ же неврежде́ни, бж҃е́ственнꙋю пѣ́снь поѧ́хꙋ: бл҃гослови́те всѧ̑ дѣла̀ гдⷭ҇нѧ гдⷭ҇а, и҆ превозноси́те во всѧ̑ вѣ́ки.
А҆́гнца бж҃їѧ проповѣ́далъ є҆сѝ, грѣхѝ человѣ́кѡвъ взе́млющаго, і҆ѡа́нне бж҃е́ственный предте́че: того̀ молѝ бре́мѧ разрѣши́ти грѣхѡ́въ мои́хъ, и҆ сп҃са́емыхъ ча́сти сподо́бити мѧ̀.
Пе́щи пла́мене горѧ́щагѡ, тьмы̀ несвѣти́мыѧ кромѣ́шнїѧ и҆зба́ви мѧ̀, во тьмѣ̀ ѕлы́хъ дѣ́лъ всего̀ содержи́ма, молю́ тѧ сло́ве бж҃їй пребезнача́льный, сла́внагѡ ра́ди бж҃е́ственнагѡ крⷭ҇ти́телѧ твоегѡ̀.
Пꙋсты́мъ дꙋша́мъ и҆ безплѡ́днымъ, покаѧ́нїемъ благопло́дїе проповѣ́давый, гдⷭ҇ень бж҃е́ственный прⷪ҇ро́че, терноно́снꙋю дꙋ́шꙋ мою̀ ѿ всѣ́хъ сласте́й ѡ҆чи́сти: ꙗ҆́кѡ да возращꙋ̀ бл҃ги́хъ дѣ́лъ кла́съ.
Бг҃оро́диченъ: Ꙗ҆́кѡ мт҃и бж҃їѧ, молѝ со ст҃ы́ми а҆́гг҃лы и҆ прⷪ҇ро́ки, а҆пⷭ҇лы же и҆ мч҃нки, бѣ́дъ же и҆ скорбе́й, и҆ бꙋ́дꙋщихъ всѣ́хъ мꙋ́къ и҆зба́вити, тебѐ бцⷣꙋ при́снѡ и҆сповѣ́дающихъ.
Пѣ́снь ѳ҃
І҆рмо́съ: Бл҃гослове́нъ гдⷭ҇ь бг҃ъ і҆и҃левъ, воздви́гнꙋвый ро́гъ сп҃се́нїѧ на́мъ, въ домꙋ̀ дв҃да ѻ҆́трока своегѡ̀, млⷭ҇рдїѧ ра́ди млⷭ҇ти, въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.
Сѐ вре́мѧ благопрїѧ́тно, и҆ де́нь ѡ҆чище́нїѧ: ѡ҆брати́тисѧ восхощѝ про́чее, ѽ дꙋшѐ, твори́ти плоды̀ покаѧ́нїѧ: да не безпло́днꙋ тѧ̀ ѡ҆брѧ́щетъ сме́ртнаѧ сѣки́ра стра́шнаѧ, и҆ ꙗ҆́кѡ смоко́вницꙋ дре́внюю посѣ́кши, ѻ҆гню̀ та́мошнемꙋ по́слетъ.
Ꙗ҆́коже и҆ногда̀ бога́тый веселю́сѧ въ сла́достехъ, немилосе́рдїе мно́гое и҆мы́й къ бли́жнемꙋ, и҆ ѻ҆гнѧ̀ не ᲂу҆страша́юсѧ неꙋгаси́магѡ. тѣ́мже влⷣко, ᲂу҆мѧгчи́ ми ѡ҆камене́нїе дꙋшѝ, ꙗ҆́кѡ да понѐ наконе́цъ млⷭ҇рдїемъ просвѣщꙋ́сѧ ѡ҆мраче́нный.
Мч҃нченъ: Зна́менавшесѧ мч҃нцы бж҃е́ственною кро́вїю хрⷭ҇то́вою, и҆ зна́меньми вѣ́рою стра́ждꙋще крѣ́пкѡ, невѣ̑рныѧ врагѝ низложи́сте, и҆ ѿ пре́лести скве́рныѧ мнѡ́гїѧ лю́ди и҆схити́сте, премѣне́нїи бж҃е́ственными, просвѣти́вше свѣ́томъ бг҃оразꙋ́мїѧ.
Мч҃нченъ: И҆з̾ѡщре́ни ꙗ҆ви́стесѧ мечѝ, сѣкꙋ́ще вра̑жїѧ ѡ҆полчє́нїѧ, бж҃е́ственнїи хрⷭ҇то́вы мч҃нцы: и҆ сосꙋ́ди вмѣсти́вше зарю̀ ст҃ы́ѧ трⷪ҇цы, и҆ свѣ́щницы свѣтѧ́щыѧ вѣ̑рнымъ свѣ́тъ бл҃гоче́стїѧ, и҆ сїѡ́на мы́сленнагѡ и҆́стиннїи ѻ҆рꙋ́жницы.
Бг҃оро́диченъ: Свѣтови́дна тѧ̀ ѻ҆́блака прⷪ҇ро́къ предзри́тъ, и҆з̾ негѡ́же вели́кое со́лнце ꙗ҆ви́сѧ на́мъ хрⷭ҇то́съ бг҃ъ, и҆ просвѣтѝ ꙗ҆̀же пе́рвѣе ѡ҆мрачє́нныѧ: того̀ ᲂу҆молѝ бл҃га́ѧ, страсте́й мои́хъ ѻ҆́блаки ѿгна́ти, и҆ свѣ́томъ бж҃е́ственнымъ просвѣти́ти.
И҆́нъ
І҆рмо́съ: Въ зако́нѣ сѣ́ни и҆ писа́нїй ѡ҆́бразъ ви́димъ вѣ́рнїи, всѧ́къ мꙋ́жескїй по́лъ ложесна̀ разверза́ѧ, свѧ́тъ бг҃ꙋ: тѣ́мъ перворожде́нное сло́во, ѻ҆ц҃а̀ безнача́льна, сн҃а первородѧ́щасѧ мт҃рїю неискꙋсомꙋ́жнѡ, велича́емъ.
Въ зако́ннꙋю сѣ́нь прини́къ, зарю̀ бж҃е́ственныѧ бл҃года́ти бога́тнѡ ᲂу҆зрѣ́лъ є҆сѝ, зємны́ѧ концы̀ мꙋ́дре просвѣща́ѧ, и҆ тьмꙋ̀ прогонѧ́ѧ неразꙋ́мїѧ, прⷪ҇ро́че: сегѡ̀ ра́ди тѧ̀ чти́мъ.
Ꙗ҆́кѡ мч҃нкъ хрⷭ҇то́въ, ꙗ҆́кѡ бж҃е́ственный крⷭ҇ти́тель, ꙗ҆́кѡ покаѧ́нїѧ свѣти́льникъ, и҆ ꙗ҆́кѡ ᲂу҆́тро бл҃гоче́стїѧ, ве́тхомꙋ хода́тай и҆ но́вомꙋ: ѡ҆бетша́вшꙋю ѕло́бою смире́ннꙋю мою̀ дꙋ́шꙋ, разꙋмѣ́нїемъ бж҃е́ственнымъ ѡ҆бнови́въ, просвѣтѝ.
Въ ча́съ ᲂу҆жа́сный, въ ча́съ стра́шный, въ ча́съ ѡ҆сꙋжде́нїѧ, ѡ҆сꙋжда́ема мѧ̀ и҆зба́ви мꙋ́дре, преще́нїѧ ждꙋ́щагѡ мѧ̀ та́мѡ: послꙋ́шающаго и҆мѣ́ѧ твоѧ̑ мольбы̑, ꙗ҆́коже дрꙋ́гъ жениха̀, сп҃си́телѧ дꙋ́шъ на́шихъ.
Бг҃оро́диченъ: Ꙗ҆́кѡ мт҃и бж҃їѧ, ꙗ҆́кѡ мт҃и и҆з̾ тебѐ пло́тїю ро́ждшагѡсѧ сло́ва бж҃їѧ чⷭ҇таѧ, со безпло́тными, а҆пⷭ҇лы же и҆ прⷪ҇ро́ки, со ст҃и́тели и҆ мч҃нки, того̀ молѝ при́снѡ, ᲂу҆мири́ти мі́ръ, пречⷭ҇таѧ мт҃и дв҃о.
Та́же, Досто́йно є҆́сть: Є҆ктенїа̀ и҆ свѣти́ленъ, и҆ ѱалмы̀ ѻ҆бы̑чныѧ.
На стїхо́внѣ стїхи̑ры ᲂу҆мили́тельны, гла́съ г҃:
Разсѣ́ѧнный мо́й ᲂу҆́мъ соберѝ гдⷭ҇и, и҆ ѡ҆лѧденѣ́вшее се́рдце моѐ ѡ҆чи́сти, ꙗ҆́кѡ петрꙋ̀ даѧ́ ми покаѧ́нїе, ꙗ҆́кѡ мытарю̀ воздыха́нїе, и҆ ꙗ҆́коже блꙋдни́цѣ сле́зы, да ве́лїимъ гла́сомъ взыва́ю тѝ: бж҃е сп҃си́ мѧ, ꙗ҆́кѡ є҆ди́нъ млⷭ҇рдъ и҆ чл҃вѣколю́бецъ.
И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ, во всѧ̑ дни̑ на́шѧ возвесели́хомсѧ, за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ, и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.
Мно́жицею пѣ̑нїѧ содѣва́ѧ, ѡ҆брѣто́хсѧ грѣхѝ соверша́ѧ, ѧ҆зы́комъ ᲂу҆́бѡ пѣ̑нїѧ вѣща́ѧ, дꙋше́ю же невмѣ̑стнаѧ мы́шлю: но ѻ҆боѐ и҆спра́ви хрⷭ҇тѐ бж҃е покаѧ́нїемъ, и҆ поми́лꙋй мѧ̀.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Царе́й и҆ мꙋчи́телей стра́хъ ѿри́нꙋша хрⷭ҇то́вы во́ини, и҆ бл҃годерзнове́ннѡ, и҆ мꙋ́жески того̀ и҆сповѣ́даша, всѧ́ческихъ гдⷭ҇а бг҃а, и҆ цр҃ѧ̀ на́шего, и҆ мо́лѧтсѧ ѡ҆ дꙋша́хъ на́шихъ.
Сла́ва, и҆ ны́нѣ, бг҃оро́диченъ: Без̾ сѣ́мене зачала̀ є҆сѝ ѿ дх҃а ст҃а́гѡ, и҆ славосло́вѧще воспѣва́емъ тѧ̀: ра́дꙋйсѧ прест҃а́ѧ дв҃о.
Та́же, Бл҃го є҆́сть и҆сповѣ́датисѧ гдⷭ҇еви: Трист҃о́е. По Ѻ҆́ч҃е на́шъ: тропа́рь, и҆ є҆ктенїа̀, и҆ ча́съ а҃-й, и҆ ѿпꙋ́стъ.
Во вто́рникъ бл҃жє́нны, гла́съ г҃:
Ѿве́ргша хрⷭ҇тѐ, за́повѣдь твою̀, пра́ѻтца а҆да́ма и҆з̾ раѧ̀ и҆згна́лъ є҆сѝ: разбо́йника же ще́дре, и҆сповѣ́давша тѧ̀ на крⷭ҇тѣ̀, во́нь всели́лъ є҆сѝ, зовꙋ́ща: помѧни́ мѧ сп҃се во црⷭ҇твїи твое́мъ.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Жите́йскими сластьмѝ ѡ҆скверне́нꙋ притѧжа́хъ дꙋ́шꙋ, къ щедро́тамъ твои̑мъ прихождꙋ̀ ненача́емь ве́сь, и҆ прилѣ́жнѡ зовꙋ́ ти хрⷭ҇тѐ, свѣ́дꙋщемꙋ є҆ди́номꙋ та̑йнаѧ: ѡ҆чи́сти мѧ̀ твои́мъ млⷭ҇рдїемъ гдⷭ҇и.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
Ꙗ҆́кѡ хода́тай ве́тхагѡ и҆ но́вагѡ бы́въ бжⷭ҇твенный крⷭ҇ти́телю, ѡ҆бетша́вшаго мѧ̀ прегрѣше́ньми ѡ҆бнови́въ, да́ждь твои́ми мольба́ми всехва́льне, ходи́ти непреткнове́ннѡ по стезѧ́мъ покаѧ́нїѧ, вводѧ́щымъ до́брѣ во црⷭ҇тво хрⷭ҇то́во.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
По́двигомъ до́брымъ подвиза́вшесѧ до́блїи страда́льцы, безчи́слєнныѧ тьмы̑ болѣ́зней под̾ѧ́сте, и҆ сегѡ̀ ра́ди всѣ́хъ болѣ̑зни ѡ҆блегча́ете при́снѡ, и҆ дꙋхѡ́въ вреждє́нїѧ прого́ните: тѣ́мже вѣ́рою ва́съ ст҃і́и сла́вимъ.
Сла́ва: Свѣ́тъ и҆ живо́тъ, и҆ вседѣ́тель, трїѷпоста́снаѧ є҆ди́ница, ꙗ҆́кѡ вои́стиннꙋ є҆́сть, ю҆́же сла́вимъ: ѻ҆ц҃ъ бо, и҆ сн҃ъ, и҆ дх҃ъ, є҆ди́ница и҆ содержа́щаѧ всѧ̑, влⷣка и҆ гдⷭ҇ь є҆ди́нъ бг҃ъ въ трїе́хъ ли́цахъ познава́етсѧ.
И҆ ны́нѣ: Согрѣша́ющаго при́снѡ, и҆ прогнѣ́вающаго бг҃а бл҃га́го, дв҃о мт҃и ᲂу҆ще́дри и҆ покаѧ́нїѧ ѡ҆́бразы ꙗ҆́кѡ бл҃га́ѧ, ᲂу҆тверди́ мѧ ны́нѣ, ꙗ҆́кѡ да бꙋ́дꙋщихъ мꙋ́къ и҆збѣ́гнꙋвъ, воспѣва́ю прилѣ́жнѡ ѻ҆трокови́це, мл҃твꙋ твою̀.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.