Глас 2-й. Четверг.
Въ сре́дꙋ ве́чера,
на Гдⷭ҇и воззва́хъ, стїхи̑ры ст҃ы̑мъ а҆пⷭ҇лѡмъ, гла́съ в҃.
Подо́бенъ: Є҆гда̀ ѿ дре́ва тѧ̀:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Всю̀ напои́сте зе́млю, ꙗ҆́коже рѣ́ки раздѣ́льшесѧ дх҃ѡ́вныѧ и҆з̾ є҆де́ма, ю҆́же и҆ поѡра́вше всѣ́ѧсте сп҃си́тельное проповѣ́данїе, и҆ кла́съ бл҃гопло́денъ пожа́сте мꙋ́дрїи, дꙋ́шы сп҃се́нныхъ, си́хъ въ мы́сленныхъ сокро́вищахъ сокрыва́юще ᲂу҆ч҃нцы̀ гдⷭ҇ни, ꙗ҆́кѡ многоцѣ́нное бога́тство.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Ѿ тьмы̀ страсте́й и҆ сласте́й многостра́стное моѐ се́рдце свободи́те, свѣти́льницы сꙋ́ще восто́ка мы́сленнагѡ, и҆ просвѣти́телїе пресвѣ́тлїи со́лнца, всѣ̑мъ возвѣща́юще разо́ршаго ле́сть но́щи ѕловѣ́рїѧ: є҆го́же ᲂу҆моли́те и҆ на́шѧ просвѣти́ти смы́слы, ꙗ҆́кѡ самови́дцы сегѡ̀.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а.
Но́выѧ вои́стиннꙋ бл҃года́ти вы̀ скрижа́ли бг҃оначерта́нныѧ, таи́нницы и҆ сви́тцы ѡ҆дꙋшевле́ннїи ꙗ҆ви́стесѧ, сло́во сп҃си́тельное носѧ́ще напи́санное дх҃омъ, ѻ҆́ч҃имъ пе́рстомъ: тѣ́мже проидо́сте всѧ̑ концы̀, вѣ́рꙋ правосла́внꙋю, и҆ къ нб҃снымъ стезю̀ ведꙋ́щꙋю, всѣ̑мъ человѣ́кѡмъ ꙗ҆́вѣ показꙋ́юще.
Та́же стїхи̑ры мине́и ст҃о́мꙋ, а҆́ще и҆́мать.
А҆́ще ли нѝ, и҆́ны стїхи̑ры ст҃о́мꙋ, и҆ вели́комꙋ чꙋдотво́рцꙋ нїкола́ю, гла́съ и҆ подо́бенъ то́йже.
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Въ мѵ́рѣхъ пожи́въ чꙋ́вственнѣ, мѵ́ро вои́стиннꙋ ꙗ҆ви́лсѧ є҆сѝ: мѵ́ромъ пома́занъ бы́въ ᲂу҆́мнымъ, свѧ́те нїко́лае ст҃и́телю хрⷭ҇то́въ, ѡ҆бл҃гоꙋха́еши безсме́ртнꙋю воню̀ бл҃гоꙋха́нїѧ, вѣ́рою притека́ющымъ под̾ кро́въ тво́й, разрѣша́ѧ си́хъ ѿ напа́стей и҆ бѣ́дъ и҆ скорбе́й ѻ҆́тче, ко гдⷭ҇ꙋ твои́ми мл҃твами.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Мно́жествомъ и҆скꙋше́нїй содержи́мь, и҆ треволне́нїемъ жите́йскимъ ѡ҆бходи́мь, волна́ми же потоплѧ́емь ѡ҆бстоѧ́нїй, и҆ печа́льми ѡ҆блага́емь, на тѧ̀ наде́ждꙋ мою̀ всю̀ возлага́ю ѻ҆́тче нїко́лае, всѣ́хъ лю́тыхъ пода́ждь мѝ разрѣше́нїе мл҃твами твои́ми, бл҃же́нне, є҆́же ко влⷣцѣ и҆ бг҃ꙋ на́шемꙋ.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Мра́комъ и҆ потемнѣ́нїемъ помышле́нїй и҆ бѣсо́вскими лестьмѝ ѡ҆бноси́ма, и҆ плотски́ми страстьмѝ ѡ҆бꙋрева́ема, и҆ зако́номъ побѣжда́ема грѣхо́внымъ, пости́гнꙋвъ мѧ̀ ѡ҆зарѝ свѣ́томъ бл҃года́ти: свѣ́тъ бо є҆сѝ въ мі́рѣ, бж҃е́ственною просвѣща́емь заре́ю, достобл҃же́нне нїко́лае.
Сла́ва, и҆ ны́нѣ, бг҃оро́диченъ: Сло́во, є҆́же ѻ҆ц҃ꙋ̀, и҆ ст҃о́мꙋ дх҃ꙋ равноче́стное сы́й ꙗ҆́кѡ вели́кое со́лнце, и҆з̾ дв҃ы бг҃оѻтрокови́цы возсїѧ́вшее на землѝ въ послѣ̑днѧѧ, посла̀ на́съ ꙗ҆́кѡ зарѝ, сла́внїи а҆пⷭ҇ли, свѣ́томъ вѣ́ры просвѣща́ющихъ всѧ̑ человѣ́ки, во мра́цѣ пре́лести, и҆ тѣ́хъ къ не́й ᲂу҆че́ньми бж҃е́ственными приводѧ́щихъ.
Та́же, Свѣ́те ти́хїй: Прокі́менъ днѐ: Бж҃е во и҆́мѧ твоѐ сп҃си́ мѧ, и҆ въ си́лѣ твое́й сꙋди́ ми. Сті́хъ: Бж҃е, ᲂу҆слы́ши мл҃твꙋ мою̀, внꙋшѝ глаго́лы ᲂу҆́стъ мои́хъ.
На стїхо́внѣ стїхи̑ры а҆пⷭ҇тольскїѧ, гла́съ в҃:
Возвели́чилъ є҆сѝ сп҃се, во вселе́ннѣй верхо́вныхъ а҆пⷭ҇лъ и҆мена̀: навыко́ша бо нбⷭ҇нымъ, и҆ неизрече́нна да́ша земны̑мъ и҆сцѣлє́нїѧ: и҆ сѣ́ни и҆́хъ є҆ди́ны недꙋ́ги ᲂу҆врачева́хꙋ, и҆̀же ѿ ры́барей чꙋдотворѧ́ще, и҆ и҆̀же ѿ і҆ꙋдє́й бг҃осло́вѧще бл҃года́ти ᲂу҆чє́нїѧ: и҆́хже ра́ди млⷭ҇рде, да́ждь на́мъ ве́лїю млⷭ҇ть.
Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ, сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
И҆̀же ѿ непра́ведныхъ дѣѧ́нїй всегда̀ бори́ми, и҆ къ тебѣ̀ прибѣга́юще вои́стиннꙋ сꙋ́щемꙋ бг҃ꙋ, гла́съ твои́хъ ᲂу҆чєни́къ прино́симъ тѝ, глаго́люще: сп҃си́ ны наста́вниче, погиба́емъ. покажѝ и҆ ны́нѣ врагѡ́мъ на́шымъ, мо́лимсѧ ꙗ҆́кѡ покрыва́еши лю́ди, и҆ сп҃са́еши ѿ бѣ́дъ, мл҃твами а҆пⷭ҇лъ, презира́ѧ грѣхѝ, за мно́гꙋю бл҃госты́ню, гдⷭ҇и сла́ва тебѣ̀.
Сті́хъ: Поми́лꙋй на́съ гдⷭ҇и, поми́лꙋй на́съ: ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ, наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.
Ве́лїѧ сла́ва ю҆́же стѧжа́сте ст҃і́и вѣ́рою: не то́кмѡ бо во страда́нїихъ врага̀ побѣди́ли є҆стѐ, но и҆ по сме́рти дꙋ́хи прогонѧ́ете, недꙋ̑жныѧ и҆сцѣлѧ́ете, дꙋ́шъ и҆ тѣле́съ вра́чеве, моли́тесѧ ко гдⷭ҇ꙋ, поми́ловатисѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ: Ꙗ҆́кѡ плодови́та ма́слина, дв҃а и҆зрастѝ тебѐ плода̀ живо́тнаго, плодоноси́ти мі́рꙋ ве́лїю и҆ бога́тꙋю млⷭ҇ть.
Та́же, Ны́нѣ ѿпꙋща́еши: Трист҃о́е. Тропа́рь, и҆ ѿпꙋ́стъ.
Въ сре́дꙋ на повече́рїи,
канѡ́нъ моле́бный прест҃ѣ́й бцⷣѣ. Гла́съ в҃.
Пѣ́снь а҃
І҆рмо́съ: Грѧди́те лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.
И҆́же бл҃гоче́стнѡ тѧ̀ чⷭ҇таѧ, сꙋ́щꙋю бцⷣꙋ и҆сповѣ́дающаго дꙋше́ю и҆ ᲂу҆сты̑, ѿ лю́тыхъ бѣ́дъ, и҆ недꙋ̑гъ и҆ прегрѣше́нїй ны́нѣ сп҃сѝ пречⷭ҇таѧ.
Всю̀ въ тебѣ̀ бл҃года́тей бе́зднꙋ лежа́щꙋ ᲂу҆вѣ́дѣхомъ: тѣ́мже прибѣга́юще бцⷣе ᲂу҆се́рднѡ къ покро́вꙋ твоемꙋ̀ бж҃е́ственномꙋ, спаса́емсѧ.
Сла́ва: Ѡ҆ на́съ тѧ̀ пою́щихъ пречⷭ҇таѧ, молѝ воплоще́ннаго ѿ пречⷭ҇тыхъ твои́хъ и҆ честны́хъ крове́й, и҆зба́витисѧ ѿ прегрѣше́нїй, и҆ болѣ́зней го́рькихъ.
И҆ ны́нѣ: Тѧ̀ похвалꙋ̀ вѣ́рнїи всѝ стѧжа́хомъ, прибѣ́жище и҆ ᲂу҆твержде́нїе и҆ ра́дованїе, и҆ дꙋша́мъ сп҃се́нїе, наде́ждꙋ же и҆ стѣ́нꙋ, бг҃обл҃года́тнаѧ.
Пѣ́снь г҃
І҆рмо́съ: Оу҆твердѝ на́съ въ тебѣ̀ гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.
Мл҃твами твои́ми чⷭ҇таѧ, бг҃а є҆го́же родила̀ є҆сѝ, пода́ждь благопремѣ́нна твои̑мъ рабѡ́мъ, притека́ющымъ къ покро́вꙋ твоемꙋ̀, и҆ вѣ́рнѡ кла́нѧющымсѧ твоемꙋ̀ ржⷭ҇твꙋ̀.
Глаго́лы моеѧ̀ мл҃твы ᲂу҆слы́ши дв҃о, и҆з̾ глꙋбины̀ моегѡ̀ се́рдца, ꙗ҆̀же приношꙋ́ ти препѣ́таѧ, и҆ ѿ страсте́й и҆ напа́стей сп҃си́ мѧ.
Сла́ва: Всю̀ мою̀ жи́знь ѡ҆кормѝ дв҃о, ᲂу҆пова́нїе моѐ и҆ предста́тельнице, и҆скꙋше́нїй и҆ наи́тїѧ и҆збавлѧ́ющи, и҆ нꙋ́жныхъ бг҃оневѣ́сто.
И҆ ны́нѣ: Премꙋ́дрость бж҃їю ѵ҆поста́снꙋю на рꙋкꙋ̀ ꙗ҆́кѡ носи́вши бг҃омт҃и, ѿ невѣ́дѣнїѧ и҆ заблꙋжде́нїѧ и҆зба́витисѧ на́мъ, моли́сѧ.
Пѣ́снь д҃
І҆рмо́съ: Оу҆слы́шахъ гдⷭ҇и, сла́вное твоѐ смотре́нїе, и҆ просла́вихъ чл҃вѣколю́бче непостижи́мꙋю твою̀ си́лꙋ.
Ꙗ҆́звамъ мои̑мъ дꙋшє́внымъ, и҆ плѡтски́мъ скве́рнамъ, ꙗ҆́же бг҃а ро́ждшаѧ влⷣчце, разрѣше́нїе пода́ждь.
Ѡ҆скверне́ннаго мѧ̀ страстьмѝ, и҆ помышле́нїи, и҆ житїѧ̀ треволне́нїи, ᲂу҆пова́нїемъ дв҃о, и҆ вѣ́рою ᲂу҆твердѝ.
Сла́ва: Ѿ наи́тїѧ и҆зба́ви мѧ̀ мт҃и бж҃їѧ, и҆ бꙋ́ри, и҆ бѣ́дъ твои́ми мл҃твами, є҆ди́на препѣ́таѧ.
И҆ ны́нѣ: Ѡ҆бꙋрева́ема волна́ми жите́йскими, и҆схитѝ дв҃о, къ твоемꙋ̀ приста́нищꙋ наставлѧ́ющи мѧ̀.
Пѣ́снь є҃
І҆рмо́съ: Свѣ́та пода́телю, и҆ вѣкѡ́въ тво́рче гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебѐ и҆но́гѡ бг҃а не зна́емъ.
Ѻ҆рꙋ́жїе непобѣди́мое и҆мꙋ́ще, на разли̑чнаѧ и҆скꙋшє́нїѧ вра̑жїѧ, всѧ́кагѡ ѡ҆ѕлобле́нїѧ и҆збавлѧ́емсѧ ꙗ҆́вѣ, и҆̀же тѧ̀ бцⷣꙋ чⷭ҇тꙋю вѣ́дꙋщїи.
Зако́на и҆сполне́нїе, вы́шшаѧ херꙋві̑мъ, родила̀ є҆сѝ бж҃їѧ сло́ва воплоще́нна, сн҃а є҆диноро́дна: є҆го́же ѡ҆ рабѣ́хъ твои́хъ ᲂу҆молѝ.
Сла́ва: Всѧ́ческихъ творца̀ на рꙋкꙋ̀ твоє́ю чⷭ҇таѧ носѧ́щи, сего̀ на́мъ твои́ми мл҃твами благопремѣ́нна дава́й, ны́нѣ всѣ́мъ се́рдцемъ къ тебѣ̀ прибѣга́ющымъ.
И҆ ны́нѣ: Ѿ ᲂу҆тѣсне́нїѧ и҆ болѣ́зни дꙋ́ши, мольбꙋ̀ приношꙋ́ ти ѻ҆каѧ́нный: щедро́тъ є҆ди́на ро́ждшаѧ вино́вное сло́во, ᲂу҆ще́дривъ сп҃си́ мѧ.
Пѣ́снь ѕ҃
І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ бж҃е мѧ̀ возведѝ.
Сп҃се́нїѧ приста́нище вѣ́дый тѧ̀, пла́ваѧ многопеча́льнагѡ житїѧ̀ мо́ре, призыва́ю влⷣчце: ѡ҆корми́тельница дꙋшѝ мое́й бꙋ́ди.
Ѡ҆бнажи́хсѧ ѻ҆де́жды цѣломꙋ́дрїѧ моегѡ̀, ѡ҆ѕло́бленъ бы́въ, но мт҃и приснодв҃о бг҃а ро́ждшаѧ, ра́дости ѻ҆де́ждꙋ пода́ждь мѝ.
Сла́ва: Чи́стагѡ житїѧ̀ ѿпадо́хъ, къ лѣ́ности жи́въ стра́стный: но возведѝ бл҃гослове́ннаѧ влⷣчце, повелѣ́нїємъ сн҃а твоегѡ̀ сочта́вши.
И҆ ны́нѣ: Млⷭ҇ти твоеѧ̀ бцⷣе сподо́би мѧ̀, премлⷭ҇тиваго сло́ва поро́ждшаѧ, свое́ю кро́вїю ѿ тлѝ человѣ́ки и҆зба́вльшаго.
Та́же, Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ, гла́съ в҃. Подо́бенъ: Бж҃е́ственнагѡ бы́хомъ:
Бж҃е́ственнагѡ мѧ̀ вхо́да чⷭ҇таѧ сподо́би, мл҃твами твои́ми приснодв҃о, и҆ соꙋ́зы лю́тыхъ страсте́й расто́ргши, пла́мене бꙋ́дꙋщагѡ мѧ̀ свободѝ.
Пѣ́снь з҃
І҆рмо́съ: Ѡ҆́бразꙋ злато́мꙋ на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ: посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
На крⷭ҇тѣ̀ приго́ждьсѧ, и҆́же и҆з̾ тебѐ воплоти́выйсѧ бг҃ороди́тельнице, а҆да́мово раздра̀ рꙋкописа́нїе: є҆го́же ны́нѣ дв҃о молѝ, всѧ́кїѧ ѕло́бы и҆зба́витисѧ вѣ́рою зовꙋ́щымъ: бл҃гослове́ннаѧ, ꙗ҆́же бг҃а пло́тїю ро́ждшаѧ.
Наде́жда бл҃га́ѧ, застꙋ́пница же вѣ́рныхъ є҆сѝ влⷣчце: и҆ ны́нѣ мо́лимсѧ тебѣ̀, дарова́ти млⷭ҇ти пꙋчи́нꙋ всѣ̑мъ на тѧ̀ надѣ́ющымсѧ, и҆ зовꙋ́щымъ тѝ: бл҃гослове́ннаѧ, ꙗ҆́же бг҃а пло́тїю ро́ждшаѧ.
Сла́ва: Тьмо́ю лю́тою житїѧ̀ ѡ҆б̾ѧ́тъ бы́въ, соскорбѧ́щагѡ и҆ сболѣ́знꙋющагѡ не ѡ҆брѣто́хъ: твое́ю дв҃о свѣ́тлостїю разрѣшѝ тьмꙋ̀ прегрѣше́нїй, и҆ ѡ҆зарѝ пѣ́ти тебѐ бл҃гослове́ннаѧ, ꙗ҆́же бг҃а пло́тїю ро́ждшаѧ.
И҆ ны́нѣ: Въ кра́снꙋю ѻ҆де́ждꙋ сп҃си́тельныхъ за́повѣдей креще́нїемъ ѡ҆дѣ́ѧвсѧ, ѡ҆черни́хъ лѣ́ностїю ѻ҆каѧ́нный, ны́нѣ же къ тебѣ̀ притека́ю дв҃о, во ѻ҆де́ждꙋ просѧ̀ сп҃се́нїѧ тобо́ю па́ки ѡ҆блещи́сѧ.
Пѣ́снь и҃
І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀ ꙗ҆́кѡ гдⷭ҇а, и҆ превозноси́те во всѧ̑ вѣ́ки.
И҆знемога́етъ мо́й ны́нѣ ᲂу҆́мъ, во глꙋбинꙋ̀ впа́дъ безче́стїѧ, ꙗ҆́кѡ ѿвсю́дꙋ разли́чными ѡ҆б̾ѧ́тъ є҆́смь ѕлы́ми: но ты̀ дв҃о и҆сцѣлѝ, безстра́стїѧ свѣ́томъ ѡ҆дѣ́ѧвши.
Сто́лпъ крѣ́пости тве́рдъ, и҆ степе́нь, и҆ храни́тельницꙋ, и҆ застꙋ́пницꙋ стѧжа́вше тѧ̀ вѣ́рою, спаса́емсѧ ны́нѣ, пою́ще ржⷭ҇тво̀ твоѐ пречⷭ҇таѧ, и҆ превозносѧ́ще є҆го̀ во всѧ̑ вѣ́ки.
Сла́ва: Безсме́ртїѧ зарю̀, и҆ и҆сто́чникъ вѣ́мы тѧ̀ бцⷣе, ꙗ҆́кѡ ро́ждшꙋю сло́во безсме́ртнагѡ ѻ҆ц҃а̀, всѧ̑ ѿ сме́рти и҆збавлѧ́ющее, превозносѧ́щыѧ є҆го̀ во всѧ̑ вѣ́ки.
И҆ ны́нѣ: Стрꙋи̑ и҆сцѣле́нїй на́мъ всегда̀ вѣ̑рнымъ чⷭ҇таѧ и҆сточа́еши, є҆гѡ́же незави́стнꙋю бл҃года́ть взе́млюще, воспѣва́емъ ржⷭ҇тво̀ твоѐ чⷭ҇таѧ, и҆ превозно́симъ во всѧ̑ вѣ́ки.
Пѣ́снь ѳ҃
І҆рмо́съ: Ѿ бг҃а бг҃а сло́ва неизрече́нною мꙋ́дростїю, прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.
Бг҃обл҃же́ннаѧ ѻ҆трокови́це, наде́ждꙋ мою̀ всю̀ ᲂу҆се́рднѡ возложи́хъ на тѧ̀: сп҃си́ мѧ мт҃и и҆́стиннагѡ живота̀, и҆ пи́щи присносꙋ́щныѧ насы́титисѧ, молѝ чⷭ҇таѧ, вѣ́рою тѧ̀ и҆ любо́вїю пѣ́сньми велича́ющемꙋ.
Ꙗ҆́вльшисѧ дв҃о две́рь бж҃е́ственнагѡ свѣ́та, дꙋшѝ моеѧ̀ мглꙋ̀ свѣ́томъ твои́мъ невеще́ственнымъ и҆ блиста́нїи ѡ҆зарѝ, и҆ ѿ вѣ́чнагѡ ѻ҆гнѧ̀ и҆зба́витисѧ мѝ сподо́би чⷭ҇таѧ, хода́тайствы твои́ми: ꙗ҆́кѡ да непреста́ннѡ велича́ю тѧ̀.
Сла́ва: Болѧ́щыѧ зрѧ́щи дꙋше́ю и҆ тѣ́ломъ, и҆ вве́ржєныѧ въ стра̑сти лю̑тыѧ, бл҃гоꙋтро́бїемъ твои́мъ влⷣчце и҆сцѣли́вши разрѣшѝ, и҆̀же ны́нѣ стꙋжа́ємыѧ печа́льми: да вѣ́рою и҆ любо́вїю тѧ̀ пѣ́сньми велича́ютъ.
И҆ ны́нѣ: Во чре́во твоѐ всели́сѧ, є҆го́же и҆з̾ чре́ва превѣ́чный ѻ҆ц҃ъ родѝ сн҃а, соверше́нъ бы́сть человѣ́къ, и҆ и҆сто́чникъ бл҃года́тей тѧ̀ бг҃омт҃и показа̀ на́мъ, вѣ́рнѡ кла́нѧющымсѧ несказа́нномꙋ твоемꙋ̀ ржⷭ҇твꙋ̀.
Та́же, Досто́йно є҆́сть: И҆ покло́нъ. И҆ про́чее ѻ҆бы́чно, и҆ ѿпꙋ́стъ.
Въ четверто́къ ᲂу҆́тра,
по а҃-мъ стїхосло́вїи сѣда́льны а҆пⷭ҇льскїѧ, гла́съ в҃:
И҆́же ᲂу҆мꙋдри́вый ловцы̀ па́че ри́торѡвъ, и҆ посла́вый ꙗ҆́коже проповѣ́дники по все́й землѝ, неизглаго́ланнымъ чл҃вѣколю́бїемъ твои́мъ хрⷭ҇тѐ бж҃е: тѣ́хъ ра́ди ᲂу҆твердѝ цр҃ковь твою̀, и҆ вѣ̑рнымъ низпослѝ бл҃гослове́нїе твоѐ, є҆ди́не во ст҃ы́хъ почива́ѧй.
Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.
Премꙋ́дрости бж҃їѧ сꙋ́ще ᲂу҆ч҃нцы̀ и҆ самови́дцы, премꙋ́дрыхъ и҆ ри́торѡвъ ꙗ҆́кѡ немꙋ́дрꙋю мꙋ́дрость ѡ҆хꙋди́ша, простото́ю про́повѣди ꙗ҆зы́ки ᲂу҆мꙋдри́вше бж҃е́ственнїи а҆пⷭ҇ли, правосла́внѡ воспѣва́ти содѣ́телѧ є҆ди́наго и҆ гдⷭ҇а.
Сла́ва, и҆ ны́нѣ, бг҃оро́диченъ: Тебѐ велича́емъ бцⷣе, вопїю́ще: ра́дꙋйсѧ незаходи́магѡ свѣ́та ѻ҆́блаче: того́ бо носи́ла є҆сѝ въ нѣ́дрѣхъ твои́хъ, сла́вы гдⷭ҇а.
По в҃-мъ стїхосло́вїи, сѣда́ленъ, гла́съ в҃:
Оу҆лови́вше ловцы̀ ꙗ҆зы́ки мре́жею дх҃а, и҆ наꙋчи́ша концы̀ земны̑ѧ тебѣ̀ кла́нѧтисѧ со ѻ҆ц҃е́мъ, и҆ дх҃омъ хрⷭ҇тѐ бж҃е: тѣ́хъ ра́ди ᲂу҆твердѝ цр҃ковь твою̀, и҆ вѣ̑рнымъ низпослѝ бл҃гослове́нїе твоѐ, и҆́же є҆ди́не млⷭ҇тиве и҆ чл҃вѣколю́бче.
Сті́хъ: И҆сповѣ́дѧтъ нб҃са̀ чꙋдеса̀ твоѧ̑ гдⷭ҇и. И҆ па́ки глаго́ли то́йже сѣда́ленъ.
Посе́мъ, Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мч҃нченъ: Страстоно́сцы гдⷭ҇ни, бл҃же́нна землѧ̀ напи́вшаѧсѧ кро́ве ва́шеѧ, и҆ ст҃и хра́ми прїе́мшїи тѣлеса̀ ва̑ша: на сꙋди́щи бо врага̀ ѡ҆бличи́сте, и҆ хрⷭ҇та̀ со дерзнове́нїемъ проповѣ́дасте. того̀ ꙗ҆́кѡ бл҃га моли́те сп҃сти́сѧ, мо́лимсѧ, дꙋша́мъ на́шымъ.
Сла́ва, и҆ ны́нѣ, бг҃оро́диченъ: Бж҃е́ственнагѡ є҆стества̀ ѻ҆́бщницы бы́хомъ, тобо́ю бцⷣе приснодв҃о: бг҃а бо на́мъ воплоще́нна родила̀ є҆сѝ. тѣ́мже тѧ̀ по до́лгꙋ всѝ бл҃гоче́стнѡ велича́емъ.
По г҃-мъ стїхосло́вїи, сѣда́льны, гла́съ в҃.
Подо́бенъ: Млⷭ҇рдїѧ сꙋ́щи и҆сто́чникъ:
И҆́же свѣти̑ла свѣ̑тлаѧ, ст҃ы̑ѧ твоѧ̑ ᲂу҆ч҃нкѝ сло́ве въ мі́ръ посла́въ, и҆ просвѣти́лъ є҆сѝ подсо́лнечнꙋю, тьмы̀ неразꙋ́мїѧ и҆збавлѧ́ѧ всѣ́хъ человѣ̑къ. тѣ́хъ мл҃твами при́снѡ ᲂу҆моле́нъ быва́ѧ, ю҆́же во тьмѣ̀ дꙋ́шꙋ мою̀ просвѣтѝ чл҃вѣколю́бче, и҆ сп҃си́ мѧ.
Лꙋча́ми чꙋде́съ нїко́лае, просвѣща́еши подсо́лнечнꙋю всю̀, и҆ разрѣша́еши мра́къ скорбе́й, и҆ бѣ́дъ ѿгонѧ́еши наше́ствїе, предста́тель сы́й теплѣ́йшїй.
Сла́ва, и҆ ны́нѣ, бг҃оро́диченъ: Неискꙋсобра́чнаѧ пречⷭ҇таѧ, ст҃а́ѧ бцⷣе безневѣ́стнаѧ, сн҃а твоего̀, є҆го́же па́че є҆стества̀ пло́тїю родила̀ є҆сѝ, со а҆пⷭ҇лы при́снѡ молѝ согрѣше́нїй проще́нїе, и҆ житїѧ̀ и҆справле́нїе, и҆ страсте́й премѣне́нїе дарова́ти всѣ̑мъ пою́щымъ тѧ̀.
Канѡ́нъ ст҃ы̑мъ а҆пⷭ҇лѡмъ, творе́нїе ѳеофа́ново. Гла́съ в҃.
Пѣ́снь а҃
І҆рмо́съ: Во глꙋбинѣ̀ постла̀ и҆ногда̀, фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ.
Свѣ́та бж҃е́ственнагѡ мо́лнїѧ вѣ́рою бы́вше, свѣтови́днїи сп҃сѡвы а҆пⷭ҇ли, всего́ мѧ просвѣти́те ѡ҆мрача́ема сласте́й че́рностїю, и҆ въ лѣ́ности всѐ моѐ житїѐ проше́дша. [Два́жды.]
Оу҆ч҃нцы̀ и҆ дрꙋ́зи хрⷭ҇тѡ́вы, дрꙋ́га мѧ̀ бы́вша врагꙋ̀, ѕлы́хъ ра́ди присвое́нїѧ, ѿ сегѡ́ мѧ и҆збавлѧ́йте сподви́жꙋще мою̀ дꙋ́шꙋ къ любвѝ, возлюби́вшагѡ ро́дъ человѣ́чь бл҃госты́ни ра́ди.
Смире́ннаѧ дꙋшѐ моѧ̀, пре́жде сме́рти потщи́сѧ пока́ѧтисѧ, и҆ себѐ ᲂу҆мерщвле́ннꙋю пла́чи: да ꙗ҆́кѡ ла́зарѧ четверодне́внаго воскр҃си́вый ꙗ҆́кѡ милосе́рдъ, и҆ тебѐ воскреси́тъ а҆пⷭ҇тѡлъ мольба́ми.
Бг҃оро́диченъ: Бл҃га́го ро́ждши бг҃а, пречⷭ҇таѧ, всѣ́хъ бл҃готворѧ́щаго, тлѣ́нїемъ содержи́мыхъ, того̀ молѝ пренепоро́чнаѧ, со прⷪ҇ро́ки, и҆ мч҃нки, и҆ а҆пⷭ҇лы, всѣ́хъ и҆зба́вити ѿ напа́стей.
И҆́нъ канѡ́нъ ст҃о́мꙋ и҆ вели́комꙋ чꙋдотво́рцꙋ мѷроточи́вомꙋ нїкола́ю, [є҆гѡ́же краегране́сїе: Мольбꙋ̀ любе́знꙋ нїко́лае прїимѝ.] Творе́нїе і҆ѡ́сифово. Гла́съ в҃.
І҆рмо́съ: Грѧди́те лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.
Всегда̀ бж҃е́ственномꙋ прⷭ҇то́лꙋ бл҃года́ти предстоѧ̀ нїко́лае, бл҃года́ть и҆ млⷭ҇ть дарова́ти моли́сѧ, тебѐ призыва́ющымъ вѣ́рою рабѡ́мъ твои̑мъ.
На землѝ вели́ка предста́телѧ тѧ̀ показа̀ бг҃ъ бѣ́дствꙋющымъ: тѣ́мже мѝ предста́ни въ нощѝ и҆ во днѝ, сохранѧ́ѧ мѧ̀ ѿ собла̑знъ борца̀.
Ꙗ҆́коже дневнꙋ́ю ѕвѣздꙋ̀ ᲂу҆вѣ́дѣвъ тѧ̀, твои́ми свѣтоза́рными лꙋча́ми тьмы̀ да и҆зба́влюсѧ и҆скꙋше́нїй, и҆ бѣ́дъ и҆ всѧ́кагѡ грѣха̀, ѻ҆́тче нїко́лае.
Бг҃оро́диченъ: Тѣле́сныхъ болѣ́зней и҆зба́ви мѧ̀, и҆ дꙋшѝ моеѧ̀ и҆сцѣлѝ недовѣ́дѡмыѧ стрꙋ́пы, и҆ ѻ҆гнѧ̀ вѣ́чнагѡ и҆схити́ мѧ, є҆ди́на бг҃обл҃года́тнаѧ.
Пѣ́снь г҃
І҆рмо́съ: Процвѣла̀ є҆́сть пꙋсты́нѧ, ꙗ҆́кѡ крі́нъ гдⷭ҇и, ꙗ҆зы́ческаѧ неплодѧ́щаѧ цр҃ковь, прише́ствїемъ твои́мъ, въ не́йже ᲂу҆тверди́сѧ моѐ се́рдце.
Оу҆ч҃тлѧ стѧжа́вше ст҃і́и премⷣрость ѻ҆́ч҃ꙋю дх҃омъ, є҆́ллинскꙋю ѡ҆бꙋи́сте премⷣрость, бг҃ови́дцы досточꙋ́днїи.
Непло́дїе дꙋшѝ моеѧ̀ разрѣши́те всехва́льнїи, и҆ бл҃гоча́дїе дѣѧ́нїй, въ добродѣ́телехъ приноси́ти сотвори́те, ꙗ҆́кѡ сло́ва самови́дцы достобл҃же́ннїи.
Лю́тѣ мѧ̀ ᲂу҆ѧде́на ны́нѣ ꙗ҆дови́тымъ ᲂу҆грызе́нїемъ вра́жїимъ, и҆сцѣлѝ мольба́ми а҆пⷭ҇тѡлъ твои́хъ, бл҃годѣ́телю всѣ́хъ многомлⷭ҇тиве.
Бг҃оро́диченъ: Бг҃а пребл҃га́го ᲂу҆молѝ пречⷭ҇таѧ, со а҆пⷭ҇лы всѣ́ми, ѿ всѧ́кагѡ вре́да, и҆ ѡ҆бстоѧ́нїѧ, и҆ бѣ́дъ и҆зба́витисѧ чтꙋ́щымъ тѧ̀.
И҆́нъ
І҆рмо́съ: Оу҆твердѝ на́съ въ тебѣ̀ гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.
И҆сцѣле́нїй и҆сто́чникъ сы́й ст҃е, стра̑сти ᲂу҆врачꙋ́й дꙋшѝ моеѧ̀, и҆ жи́знь мою̀ соблюдѝ, невре́дна мѧ̀ сохранѧ́ѧ раба̀ твоего̀.
Оу҆ма̀ моегѡ̀ побѣжде́нїе и҆справлѧ́ѧ, ѿ вре́да ви́димыхъ и҆ неви́димыхъ борю́щихъ мѧ̀ сп҃са́й, ꙗ҆́кѡ предста́тель мо́й вели́кїй нїко́лае.
И҆́же є҆ди́нъ бл҃гі́й тѧ̀ бл҃га застꙋ́пника человѣ́кѡмъ дадѐ бл҃же́нне, сегѡ̀ ра́ди молю̀ тѧ̀: ѿ всѧ́кихъ мѧ̀ ѕѡ́лъ свободѝ.
Бг҃оро́диченъ: Крѣ́пость моѧ̀ и҆ ра́дость и҆ весе́лїе, и҆ стѣна̀ тве́рдаѧ и҆ предста́тельнице, ты̀ є҆сѝ всенепоро́чнаѧ, и҆скꙋше́нїй и҆ бѣ́дъ и҆збавлѧ́ющи мѧ̀.
Пѣ́снь д҃
І҆рмо́съ: Прише́лъ є҆сѝ ѿ дв҃ы, не хода́тай ни а҆́гг҃лъ, но са́мъ гдⷭ҇и вопло́щьсѧ, и҆ сп҃слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й гдⷭ҇и.
А҆́лчꙋща мѧ̀ всегда̀, и҆ гла́домъ и҆ста́ема, сп҃се́нїѧ снѣ́дьми насы́ти є҆ди́не чл҃вѣколю́бче, бж҃е́ственными мольба́ми а҆пⷭ҇тѡлъ, во все́мъ мі́рѣ проповѣ́давшихъ тѧ̀. [Два́жды.]
На мо́ре мїрско́е наве́лъ є҆сѝ всѣ́хъ, ꙗ҆́кѡ ко́ни чл҃вѣколю́бче, сла̑вныѧ а҆пⷭ҇лы твоѧ̑, тогѡ̀ возмꙋща́ющыѧ сла̑ныѧ невѣ́рствїѧ го́рькїѧ во́ды.
Сл҃нца хрⷭ҇та̀ сꙋ́щымъ во тьмѣ̀ возвѣсти́вше, во тьмѣ́ мѧ лежа́ща грѣхо́внѣй просвѣти́те а҆пⷭ҇толи прехва́льнїи, возбранѧ́юще лꙋка̑вымъ помыслѡ́мъ се́рдца моегѡ̀.
Бг҃оро́диченъ: Всепѣ́таѧ, ꙗ҆́же бг҃а препѣ́таго ро́ждшаѧ, ѡ҆ пою́щихъ тѧ̀ со а҆пⷭ҇лы молѝ, ꙗ҆́кѡ да и҆зба́вимсѧ ѿ грѣхѡ́въ, и҆ бѣ́дъ и҆ ѡ҆ѕлобле́нїѧ.
И҆́нъ
І҆рмо́съ: Пою́ тѧ, слꙋ́хомъ бо гдⷭ҇и ᲂу҆слы́шахъ, и҆ ᲂу҆жасо́хсѧ: до мене́ бо и҆́деши, менѐ и҆щѧ̀ заблꙋ́ждшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю многомлⷭ҇тиве.
Оу҆краси́въ прⷭ҇то́лъ добродѣ́тельми нїко́лае, ᲂу҆краше́нїе ꙗ҆ви́лсѧ є҆сѝ ст҃и́телємъ честно́е. тѣ́мже тѧ̀ молю̀: нелѣ́потꙋ дꙋшѝ моеѧ̀ ᲂу҆красѝ, и҆ ѿ мїрски́хъ собла̑знъ сп҃си́ мѧ.
Стезю̀ та́мѡ ведꙋ́щꙋю ᲂу҆гла́ди мѝ пребл҃же́нне: ѿ жите́йскихъ во́лнъ ѡ҆блегчи́ мѧ, и҆ ко приста́нищꙋ жи́зни возведѝ нїко́лае, ѿ тебѐ предста́телѧ вели́кагѡ ѡ҆богати́вшасѧ.
Глагѡ́лъ бж҃е́ственныхъ послꙋ́шателю, ᲂу҆слы́шавъ моѧ̑ глаго́лы, и҆зба́ви мѧ̀ ѿ бѣсо́вскихъ собла̑знъ, и҆ беззако́нныхъ мꙋже́й, и҆ всѧ́кихъ ѡ҆бстоѧ́нїй находѧ́щихъ, вели́кїй нїко́лае.
Бг҃оро́диченъ: Ста́ѧ бцⷣе влⷣчце, въ нощи́ мѧ и҆ во днѝ ѡ҆свѧтѝ, и҆ сохранѝ, и҆ наста́ви ко сп҃се́нїю мно́гими грѣхѝ па́дающа, и҆ прило́гми бѣсо́вскими низрѣ́ема.
Пѣ́снь є҃
І҆рмо́съ: Хода́тай бг҃ꙋ и҆ человѣ́кѡмъ бы́лъ є҆сѝ хрⷭ҇тѐ бж҃е: тобо́ю бо влⷣко къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ приведе́нїе и҆́мамы.
Вели́кїй па́стырь посредѣ̀ волкѡ́въ посла̀ ꙗ҆́кѡ ѻ҆́вцы, бж҃е́ствєнныѧ ᲂу҆ченикѝ своѧ̑, тѣ́хъ претворѧ́ющѧ бж҃їею си́лою креще́нїѧ, и҆ добро́тою слове́съ. [Два́жды.]
Бж҃е́ственнымъ свѣ́томъ, ꙗ҆̀же во тьмѣ̀ пре́лести просвѣти́сте а҆пⷭ҇ли сердца̀. тѣ́мже молю̀ вы̀, ѡ҆темне́наго мѧ̀ сластьмѝ мра́чными, просвѣти́те бг҃облаже́ннїи.
Ѻ҆каѧ́ннаѧ дꙋшѐ, пре́жде конца̀ потщи́сѧ и҆ пока́йсѧ, гдⷭ҇еви зовꙋ́щи: согрѣши́хъ тѝ влⷣко, простѝ а҆пⷭ҇тѡлъ ра́ди, и҆ сп҃си́ мѧ ꙗ҆́кѡ милосе́рдъ.
Бг҃оро́диченъ: Свѣ́томъ твои́мъ ѡ҆зарѝ во тьмѣ̀ лежа́ща мѧ̀, свѣ́та жили́ще, и҆ со а҆пⷭ҇лы моли́сѧ пренепоро́чнаѧ, ѿ всѧ́кїѧ нꙋ́жды и҆зба́вити мѧ̀ твои́ми мл҃твами.
И҆́нъ
І҆рмо́съ: Свѣ́та пода́телю, и҆ вѣкѡ́въ тво́рче гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебѐ и҆но́гѡ бг҃а не зна́емъ.
Зако́на бж҃їѧ и҆спо́лнителю, молѝ бл҃га́го бг҃а, зако́ны бж҃е́ствєнныѧ мѝ соблюда́ти, и҆ беззако́ннꙋющихъ вра̑гъ и҆зми́ мѧ, и҆ бѣсо́вскагѡ вре́да, всебл҃же́нне нїко́лае.
Ꙗ҆́коже дре́вле предста́въ ст҃е, и҆збавлѧ́ѧ ю҆́ношы трѝ: си́це и҆ менѐ ѿ всѧ́кагѡ грѣха̀ и҆зба́ви твои́ми къ бг҃ꙋ мл҃твами, бг҃омꙋ́дре нїко́лае.
Сщ҃еннодѣ́лателю хрⷭ҇то́въ, грѣ́шникѡмъ и҆спорꙋ́чниче, вели́кїй чꙋдотво́рче, бл҃года́вца молѝ бг҃а, да не посрами́тъ менѐ въ ча́съ сꙋ́дный.
Бг҃оро́диченъ: Гдⷭ҇ороди́тельнице чⷭ҇таѧ, ѡ҆блада́ема мѧ̀ мно́гими страстьмѝ, ꙗ҆́кѡ бл҃га̀ предста́вши и҆зба́ви ѿ си́хъ: ꙗ҆́кѡ да тѧ̀ воспѣва́ю дꙋше́ю и҆ се́рдцемъ и҆ ѧ҆зы́комъ, сп҃са́емь.
Пѣ́снь ѕ҃
І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ бж҃е мѧ̀ возведѝ.
И҆̀же во́дꙋ живо́тнꙋю носѧ́ще, та́емꙋю дꙋ́шꙋ мою̀ зно́емъ грѣхо́внымъ молю́сѧ, ᲂу҆ч҃нцы̀ сп҃сѡвы напо́йте.
Нб҃са̀ мы́слєннаѧ бы́вше, бг҃оза́рнїи а҆пⷭ҇толи, сла́вꙋ бж҃їю и҆сповѣ́дасте неизрече́ннꙋю, ю҆́же ᲂу҆лꙋчи́ти на́мъ всѣ̑мъ моли́тесѧ.
Въ пꙋчи́нѣ лю́тѣ волнꙋ́ющїйсѧ, къ тебѣ̀ хрⷭ҇тѐ, и҆́же всѣ́хъ ѡ҆корми́телю прихождꙋ̀, ра́ди а҆пⷭ҇тѡлъ твои́хъ, ко сп҃си́тельномꙋ приста́нищꙋ ᲂу҆пра́ви мѧ̀.
Бг҃оро́диченъ: Со всѣ́ми вы́шними си́лами, со прⷪ҇ро́ки, и҆ а҆пⷭ҇лы, и҆ мч҃нки, ѡ҆ на́съ молѝ сн҃а твоего̀ бг҃оневѣ́сто.
И҆́нъ. І҆рмо́съ то́йже
И҆́же мѵ́рѧнѡмъ бы́въ первопресто́льникъ нїко́лае, и҆ ѡ҆благоꙋха́лъ є҆сѝ вѣ́рныхъ составлє́нїѧ бл҃ги́ми твои́ми дѣѧ́нїи: ѿ ѕлосмра́дна прегрѣше́нїѧ и҆зба́ви мѧ̀.
Свѣтлѣ́йше со́лнца стѧжа́въ ѻ҆́тче се́рдце, всего́ мѧ просвѣтѝ, и҆скꙋше́нїй и҆ скорбе́й ѿгонѧ́ѧ тьмꙋ̀ нїко́лае.
Ѿ всѧ́кїѧ и҆зба́ви мѧ̀ тѣсноты̀, простра́нство ꙗ҆́кѡ и҆мѣ́ѧ млⷭ҇ти нїко́лае, тѣ́снымъ ше́ствовати мѧ̀ ᲂу҆крѣпѝ пꙋте́мъ ко гдⷭ҇ꙋ.
Бг҃оро́диченъ: На всѧ́ко вре́мѧ тебѐ призыва́ю пречⷭ҇таѧ, да ѡ҆брѧ́щꙋ тѧ̀ помо́щницꙋ, и҆з̾има́ющꙋю мѧ̀ ѿ всѧ́кагѡ ѡ҆ѕлобле́нїѧ и҆ стра́шныхъ мꙋ́къ.
Пѣ́снь з҃
І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.
Ѻ҆гне́мъ бж҃е́ственнагѡ дх҃а предвозжже́ни бы́вше а҆пⷭ҇ли, пре́лести ᲂу҆́глїе ᲂу҆гаси́сте, бж҃їе же раче́нїе во ᲂу҆мѣ́хъ всѣ́хъ вѣ́рныхъ воспали́сте: тѣ́мже велегла́снѡ ва́съ чти́мъ. [Два́жды.]
Мі́ръ возненави́дѣсте, и҆ ꙗ҆̀же въ мі́рѣ, хрⷭ҇та̀ возлюби́сте, въ мі́рѣ пло́тїю человѣ́кѡмъ примѣси́вшасѧ: є҆го́же моли́те бж҃е́ственнїи а҆пⷭ҇толи, ꙗ҆̀же въ житїи́ мѧ всѣ́хъ лю́тыхъ свободи́ти.
Сꙋдїѐ пра́ведне сердцевѣ́дче, и҆́же є҆ди́нъ сокровє́ннаѧ вѣ́дый моѧ̑ согрѣшє́нїѧ, въ ча́съ сꙋда̀ не ѡ҆сꙋдѝ менѐ, нижѐ ѿсле́ши мѧ̀ во ѻ҆́гнь, мл҃твами а҆пⷭ҇тѡлъ твои́хъ.
Бг҃оро́диченъ: Ѻ҆гне́мъ бж҃ества̀ не ѡ҆пали́ласѧ є҆сѝ, неизрече́ннѡ ро́ждши дв҃о, бра́кꙋ неискꙋ́сна бы́вши. тѣ́мже со а҆пⷭ҇лы моли́сѧ чⷭ҇таѧ, вѣ́чнагѡ мѧ̀ пла́мене свободи́ти, тебѐ сла́вѧщаго.
И҆́нъ
І҆рмо́съ: Ѡ҆́бразꙋ злато́мꙋ на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ: посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Ѻ҆гню̀ и҆скꙋше́нїй на всѧ́къ де́нь примѣша́юсѧ, ѻ҆́тче нїко́лае, посредѣ̀ сѣ́тей мимохождꙋ̀, ꙗ҆́коже пти́ца, под̾ тво́й ще́дрый покро́въ притека́ю: невре́дна мѧ̀ сохранѝ, бл҃га́го молѧ̀ бг҃а и҆ гдⷭ҇а.
Глаго́лы моѧ̑ ᲂу҆слы́шавъ спѣ́шнѡ, ѻ҆́тче нїко́лае, потщи́сѧ прїити́ ми на по́мощь, ѡ҆бꙋрева́емꙋ скорбьмѝ и҆ нꙋ́ждами жите́йскими. и҆ бѣсо́вскими ѡ҆ѕлобле́нїи: ꙗ҆́кѡ да сп҃са́емь пою̀ предста́тельство твоѐ.
И҆́же дре́вле ꙗ҆́вльсѧ во снѣ̀ царю̀, непови̑нныѧ и҆мꙋ́щыѧ ᲂу҆мре́ти и҆збавлѧ́ѧ, напа́стей мѧ̀ и҆зба́ви находѧ́щихъ всегда̀, и҆ недꙋ̑гъ тѣле́сныхъ, и҆ дꙋше́вныхъ болѣ́зней, ѻ҆́тче нїко́лае.
Бг҃оро́диченъ: Тебѐ є҆ди́нꙋ пречⷭ҇таѧ и҆мѣ́ю помо́щницꙋ, тебѐ написꙋ́ю мнѣ̀ всѣ́хъ житїѧ̀ храни́тельницꙋ, не пре́зри менѐ раба̀ твоегѡ̀, є҆ди́на предста́тельнице мі́ра, но сп҃си́ мѧ пою́ща: бл҃гослове́нъ бг҃ъ ѻ҆тє́цъ на́шихъ.
Пѣ́снь и҃
І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: бл҃гослови́те всѧ̑ дѣла̀ гдⷭ҇нѧ гдⷭ҇а.
Тѣлови́днѡ на ва́съ наше́дъ во ѻ҆́гненномъ ви́дѣ прест҃ы́й дх҃ъ, содѣ́ла ꙗ҆́кѡ свѣти̑ла, попалѧ́юща ᲂу҆́бѡ безбо́жїе, просвѣща̑юща же всѧ̑ бл҃гоче́ствꙋющыѧ, бж҃е́ственнїи сло́ва а҆пⷭ҇ли. [Два́жды.]
Страстьмѝ лю́тѣ ѡ҆бꙋрева́емое неиспра́вленное се́рдце моѐ и҆сцѣлѝ ще́дре, молю́сѧ: дꙋ́шꙋ мою̀ просвѣтѝ, и҆ ᲂу҆́мъ мо́й напра́ви прекло́ншїйсѧ въ ѕло́бꙋ, ᲂу҆ч҃нкѡ́въ твои́хъ мольба́ми.
Воздохнѝ дꙋшѐ моѧ̀, и҆ прослези́сѧ прилѣ́жнѡ, и҆ себѐ пре́жде конца̀ воспла́чи, пре́жде да́же не пости́гнетъ тебѐ пла́чь неꙋтѣ́шимый, и҆ возопі́й гдⷭ҇еви: сп҃си́ мѧ млⷭ҇тиве, мл҃твами а҆пⷭ҇лъ твои́хъ.
Бг҃оро́диченъ: Пе́щь и҆ногда̀ неѡпа́льшаѧ дѣте́й, твоѐ ржⷭ҇тво̀ проѡбража́ше дв҃о всенепоро́чнаѧ. сегѡ̀ ра́ди молю́ тѧ: со а҆пⷭ҇лы моли́сѧ, со всѣ́ми прⷪ҇ро́ки, ѻ҆гнѧ̀ гее́нны и҆зба́вити мѧ̀.
И҆́нъ
І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀ ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Вѧза́ти и҆ рѣша́ти прїи́мъ вла́сть ѿ бг҃а, ѻ҆́тче бг҃омꙋ́дре нїко́лае, ѕѡ́лъ мои́хъ соꙋ́зы разрѣшѝ твои́ми мл҃твами: и҆ бж҃е́ственнѣй мѧ̀ привѧжѝ любвѝ вочл҃вѣ́читисѧ восхотѣ́вшагѡ влⷣки.
Посѣще́нїемъ твои́мъ бж҃е́ственнымъ во днѝ и҆ въ нощѝ посѣща́й мѧ̀, ᲂу҆глажда́ѧ стезю̀ смире́ннѣй мое́й дꙋшѝ, и҆ сохранѧ́й мѧ̀ ст҃е нїко́лае, неꙋѧ́звлена ѿ находѧ́щихъ лꙋка́вагѡ собла̑знъ.
Рꙋ́кꙋ мѝ пода́ждь къ бж҃їей по́мощи нїко́лае, и҆ сохранѝ ѿ лю́тагѡ вра́жїѧ ча́ѧнїѧ, и҆́же ю҆́ношы и҆ногда̀ сме́рти го́рькїѧ и҆зба́вилъ є҆сѝ: да почита́ю тѧ̀ ꙗ҆́кѡ бл҃га́го предста́телѧ.
Є҆гда̀ сѧ́деши бж҃е, на престо́лѣ стра́шнѣмъ сꙋди́ти мі́рꙋ, не вни́ди въ сꙋ́дъ съ рабо́мъ твои́мъ: но ча́сти сподо́би сп҃са́емыхъ, мл҃твами нїкола́а.
Бг҃оро́диченъ: Па́че є҆стества̀ твои́мъ ржⷭ҇тво́мъ бг҃ороди́тельнице возвели́чила є҆сѝ на́съ ᲂу҆ма́ленныхъ вели́кими неисче́тными ѕлы́ми. тѣ́мже мо́лимсѧ тѝ пречⷭ҇таѧ: возвели́чи въ на́съ бога̑тыѧ твоѧ̑ млⷭ҇ти.
Пѣ́снь ѳ҃
І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щьсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ: тѣ́мъ всепѣ́тꙋю бцⷣꙋ велича́емъ.
А҆пⷭ҇ли сла́внїи, а҆пⷭ҇ли бл҃же́ннїи, ᲂу҆ч҃нцы̀ сп҃сѡвы, проповѣ́дницы всемꙋ́дрїи, ѿ всѧ́кагѡ мѧ̀ и҆зба́вите вре́да, всѧ́кагѡ гнѣ́ва, всѧ́кагѡ грѣха̀, всѧ́кагѡ ѡ҆бстоѧ́нїѧ, и҆ разли́чныхъ напа́стей. [Два́жды.]
Менѐ ѡ҆сꙋжде́ннаго, менѐ неиспра́вленнаго, твоѧ̑ повелѣ̑нїѧ небре́гшаго, и҆ бѣсѡ́вскимъ прельще́нїємъ ᲂу҆мовре́днѡ послѣ́довавша, возвратѝ гдⷭ҇и, мл҃твами а҆пⷭ҇тѡлъ твои́хъ.
Дꙋ́шꙋ неиспра́вленꙋ приношꙋ̀, и҆ со́вѣсть погребе́нꙋю съ вещмѝ прегрѣше́нїй, и҆ ѡ҆скверне́нное се́рдце, и҆ по́мыслъ ѡ҆калѧ́нъ, вопїю́ ти чл҃вѣколю́бче: а҆пⷭ҇тѡлъ ра́ди ᲂу҆ще́дри мѧ̀ млⷭ҇тїю твое́ю.
Бг҃оро́диченъ: А҆пⷭ҇ли пречⷭ҇таѧ, твоего̀ сн҃а проповѣ́даша во все́мъ мі́рѣ, бг҃а и҆ человѣ́ка. тѣ́мже съ ни́ми моли́сѧ, во стра́шномъ днѝ сꙋда̀ и҆зба́витисѧ мꙋ́къ, вѣ́рою тебѐ велича́ющымъ.
И҆́нъ
І҆рмо́съ: Ѿ бг҃а бг҃а сло́ва, неизрече́нною мꙋ́дростїю, прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.
Сщ҃е́нства пра́вило, и҆ кро́тости ѡ҆́бразъ, вѣ́мъ тѧ̀ нїко́лае мꙋ́дре: на мѧ̀ возстаю́щꙋю бꙋ́рю по всѧ̑ дни̑ страсте́й и҆ бѣ́дъ, ᲂу҆кротѝ мл҃твами твои́ми, и҆ соблюди́ мѧ неврежде́нна сщ҃е́ннѣйшїй ѻ҆́тче.
Ꙗ҆́кѡ сщ҃е́ннѣйшїй сосꙋ́дъ прїѧ́тенъ бж҃е́ственнагѡ мѵ́ра, млⷭ҇тивнѡ и҆злїѧ́вшагѡсѧ на зе́млю, всѣ́хъ на́съ ѡ҆бл҃гоꙋха́й сердца̀, мѵ́рѧнѡмъ бы́въ мꙋ́дре первост҃и́тель, и҆скꙋше́нїѧ ѕлово́нїе ѿгонѧ̀ мл҃твами твои́ми.
Ты̀ мою̀ ᲂу҆тѣ́ши ѻ҆́тче дꙋ́шꙋ, неви́димѡ мно́жествомъ ѡ҆ѕло́бленнꙋю лю́тѣ: ты̀ безмѣ̑рнаѧ мѝ ᲂу҆кротѝ и҆скꙋшє́нїѧ, ꙗ҆̀же льсти́вый подви́жетъ мѝ во днѝ и҆ въ нощѝ, ꙗ҆́кѡ бл҃гі́й мо́й предста́тель ꙗ҆влѧ́ѧсѧ нїко́лае.
Стра́шный влⷣчнїй де́нь при две́рехъ приближа́етсѧ, что̀ сотвори́ши ѽ дꙋшѐ, грѣхѡ́въ мно́жество и҆мꙋ́щи; потщи́сѧ ᲂу҆́бѡ пре́жде конца̀, и҆ возопі́й гдⷭ҇ꙋ прилѣ́жнѡ: мл҃твами нїкола́а ст҃и́телѧ твоегѡ̀ сп҃си́ мѧ.
Бг҃оро́диченъ: Пощади́ мѧ гдⷭ҇и, пощадѝ, є҆гда̀ хо́щеши сꙋди́ти и҆ не ѡ҆сꙋдѝ менѐ во ѻ҆́гнь, нижѐ ꙗ҆́ростїю твое́ю ѡ҆бличѝ менѐ: мо́литъ тѧ̀ дв҃а ро́ждшаѧ тѧ̀ хрⷭ҇тѐ, и҆ а҆пⷭ҇лъ мно́жество, и҆ сла́вный нїкола́й.
Та́же: Досто́йно є҆́сть: и҆ покло́нъ. Є҆ктенїа̀ ма́лаѧ, и҆ свѣти́ленъ, и҆ ѱалмы̀ ѻ҆бы̑чныѧ. ==
На стїхо́внѣ стїхи̑ры а҆пⷭ҇льскїѧ, гла́съ в҃:
Возвели́чилъ є҆сѝ сп҃се, во вселе́ннѣй верхо́вныхъ а҆пⷭ҇лъ и҆мена̀, навыко́ша нбⷭ҇нымъ, неизрече́нна да́ша зємны́мъ и҆сцѣлє́нїѧ, и҆ сѣ́ни и҆́хъ є҆ди́ны недꙋ́ги ᲂу҆врачева́хꙋ: и҆́бо ѿ ры́барей чꙋдотворѧ́ще, и҆ и҆̀же ѡ҆ і҆ꙋдє́й бг҃осло́вѧще бл҃года́ти ᲂу҆чє́нїѧ, и҆́хже ра́ди бл҃гоꙋтро́бне, да́ждь на́мъ ве́лїю млⷭ҇ть.
Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ: во всѧ̑ дни̑ на́шѧ возвесели́хомсѧ: за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ, и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.
И҆̀же ѿ непра́ведныхъ дѣѧ́нїй всегда̀ бори́ми, и҆ къ тебѣ̀ прибѣга́юще вои́стиннꙋ сꙋ́щемꙋ бг҃ꙋ, гла́съ твои́хъ ᲂу҆чени̑къ прино́симъ тѝ, глаго́люще: сп҃си́ ны наста́вниче, погиба́емъ. покажѝ и҆ ны́нѣ врагѡ́мъ на́шымъ, мо́лимсѧ, ꙗ҆́кѡ покрыва́еши лю́ди, и҆ сп҃са́еши ѿ бѣ́дъ, мл҃твами а҆пⷭ҇лъ презира́ѧ грѣхѝ, за мно́гꙋю бл҃госты́ню, гдⷭ҇и сла́ва тебѣ̀.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Ст҃ы́хъ твои́хъ мно́жество, мо́литъ тѧ̀ хрⷭ҇тѐ: поми́лꙋй и҆ сп҃сѝ на́съ ꙗ҆́кѡ чл҃вѣколю́бецъ.
Сла́ва, и҆ ны́нѣ, бг҃оро́диченъ: Всѐ ᲂу҆пова́нїе моѐ на тѧ̀ возлага́ю, мт҃и бж҃їѧ, сохрани́ мѧ под̾ кро́вомъ твои́мъ.
Та́же, Бл҃го є҆́сть и҆сповѣ́датисѧ гдⷭ҇еви: И҆ Трист҃о́е. По Ѻ҆́ч҃е на́шъ: тропарѝ и҆ є҆ктєнїѝ. Та́же ча́съ а҃-й, ѱалмы̀ ѻ҆бы́чны, и҆ ѿпꙋ́стъ.
Въ четверто́къ бл҃жє́нны, гла́съ в҃:
Гла́съ тѝ прино́симъ разбо́йничь, и҆ мо́лимсѧ: помѧнѝ на́съ сп҃се, во црⷭ҇твїи твое́мъ.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Мїрскі̑ѧ концы̀ проше́дше а҆пⷭ҇ли, ѿ тьмы̀ пре́лести и҆ ѕлоче́стїѧ человѣ́ки и҆зба́вили є҆стѐ премꙋ́дрїи.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕѡ́лъ глаго́лъ, на вы̀ лжꙋ́ще менѐ ра́ди.
Мре́жею бл҃года́ти и҆з̾ глꙋбины̀ сꙋ́етства, всѣ́хъ человѣ̑къ, ᲂу҆ч҃нцы̀ сп҃сѡвы мꙋ́дре возвелѝ є҆стѐ.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
И҆̀же тече́нїе сконча́вшыѧ, и҆ вѣ́рꙋ соблю́дшыѧ, стрⷭ҇тоте́рпцы гдⷭ҇ни, согла́снѡ вѣ́рнїи воспои́мъ.
Сла́ва: Равнодѣ́тельна роди́телю сн҃а, со дх҃омъ проповѣ́давше, воспои́мъ трⷪ҇цꙋ несозда́ннꙋю.
И҆ ны́нѣ: А҆пⷭ҇лѡвъ похвала̀, страда́льцєвъ ᲂу҆добре́нїе, ты̀ є҆сѝ пречⷭ҇таѧ дв҃о, и҆ мі́ра сп҃се́нїе.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.