Глас 1-й. Четверг.
Въ сре́дꙋ ве́чера,
на Гдⷭ҇и воззва́хъ, стїхи̑ры ст҃ы̑мъ а҆пⷭ҇лѡмъ. Гла́съ а҃.
Подо́бенъ: Прехва́льнїи мч҃нцы:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
А҆пⷭ҇ли сла́внїи, хрⷭ҇тѡ́вы ᲂу҆ч҃нцы̀ бг҃озва́ннїи, вселе́нныѧ ᲂу҆чи́телїе, ѡ҆брѣ́тше гдⷭ҇а бг҃а, и҆ человѣ́кѡвъ хода́таѧ сꙋ́ща, томꙋ̀ бг҃олѣ́пнѡ прилѣпи́стесѧ: и҆ ꙗ҆́кѡ бг҃а того̀, и҆ ꙗ҆́кѡ человѣ́ка всесоверше́нна, въ мі́рѣ ꙗ҆́вѣ проповѣ́дасте.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
А҆пⷭ҇ли всемꙋ́дрїи, хрⷭ҇тѡ́вы ᲂу҆ч҃нцы̀ бг҃озва́ннїи, вселе́нныѧ ᲂу҆чи́телїе, ва́шими мл҃твами, бж҃е́ствєннымъ ᲂу҆че́нїємъ внима́ти ᲂу҆крѣпи́те мѧ̀, и҆ стезе́ю тѣ́сною помога́йте ходи́ти мѝ всегда̀, ꙗ҆́кѡ да доспѣ́ю въ пребыва́нїе ра́йское простра́ннѣйшее.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а.
Петра̀ первопресто́льнаго воспѣва́ю, па́ѵла, і҆а́кѡва, а҆ндре́а же и҆ фїлі́ппа, сі́мѡна, варѳоломе́а же и҆ ѳѡмꙋ̀, матѳе́а же и҆ і҆ѡа́нна, ма́рка же и҆ лꙋкꙋ̀, бл҃говѣ́стїѧ списа́вшихъ, ли́къ бг҃оизбра́нный, со и҆ны́ми седмїю́десѧтьми, ꙗ҆́кѡ сло́ва самови́дцы и҆ проповѣ́дники.
И҆́ны стїхи̑ры вели́комꙋ ст҃и́телю и҆ чꙋдотво́рцꙋ нїкола́ю. Гла́съ а҃.
Подо́бенъ: Нбⷭ҇ныхъ чинѡ́въ:
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Цр҃кѡ́вныѧ цвѣ́ты прелета́ѧй: ꙗ҆́коже птене́цъ вы́шнѧгѡ гнѣзда̀ а҆́гг҃льскагѡ, нїко́лае требл҃же́нне, зове́ши при́снѡ къ бг҃ꙋ ѡ҆ всѣ́хъ лю́дехъ, и҆̀же въ нꙋ́ждныхъ бѣда́хъ и҆ и҆скꙋше́нїихъ, и҆ и҆збавлѧ́еши мл҃твами твои́ми.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Нбⷭ҇ныѧ добрѡ́ты проходѧ́й, стра́шнꙋю ѻ҆́нꙋ разꙋмѣ́лъ є҆сѝ сла́вꙋ, ст҃ꙋ́ю ст҃ы́хъ. тѣ́мже и҆ на́мъ нбⷭ҇наѧ словеса̀, при́снѡ живо́тныхъ ѻ҆́нѣхъ зрѣ́нїй ꙗ҆влѧ́еши, сщ҃е́ннѣйшїй ѻ҆́тче.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Сщ҃е́нныѧ ѻ҆де́жды ᲂу҆краше́нїе, дѣ́лательными содѣ́лалъ є҆сѝ добродѣ́тельми свѣтлѣ́йшо, ѻ҆́тче бг҃оно́се. тѣ́мже и҆ на́мъ сщ҃еннодѣ́йствꙋеши ди̑внаѧ сла́вныхъ чꙋде́съ хрⷭ҇та̀ ра́ди лю́тыхъ на́съ и҆збавлѧ́ѧ.
Сла́ва, и҆ ны́нѣ, бг҃оро́диченъ: Прегрѣше́нїй пꙋчи́ною ѡ҆бꙋрева́емь, къ ти́хомꙋ приста́нищꙋ прибѣ́гъ, пречⷭ҇тѣй мл҃твѣ твое́й, бг҃ороди́тельнице, взыва́ю тѝ: сп҃си́ мѧ, крѣ́пкꙋю твою̀ десни́цꙋ просте́рши рабꙋ̀ твоемꙋ̀, всенепоро́чнаѧ.
Та́же, Свѣ́те ти́хїй: Прокі́менъ днѐ. Посе́мъ: Сподо́би гдⷭ҇и въ ве́черъ се́й:
На стїхо́внѣ стїхи̑ры а҆пⷭ҇лѡмъ. Гла́съ а҃:
А҆пⷭ҇льскаѧ всесли́чнаѧ цѣвни́ца, ст҃ы́мъ дх҃омъ дви́жима, мє́рзкїѧ бѣсѡ́въ жє́ртвы ᲂу҆праздни́ла є҆́сть, и҆ є҆ди́наго гдⷭ҇а проповѣ́давши, ꙗ҆зы́ки и҆зба́ви ѿ пре́лести і҆́дѡльскїѧ, и҆ покланѧ́тисѧ наꙋчѝ трⷪ҇цѣ є҆диносꙋ́щнѣй.
Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ, сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀, та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
Петра̀ и҆ па́ѵла согла́снѡ похва́лимъ, лꙋкꙋ̀, матѳе́а, ма́рка, і҆ѡа́нна, а҆ндре́а, ѳѡмꙋ̀, варѳоломе́а, сі́мѡна канані́та, і҆а́кѡва и҆ фїлі́ппа, и҆ ве́сь ли́къ ᲂу҆ч҃нческїй досто́йнѡ да восхва́лимъ.
Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.
Подо́бенъ, мч҃нченъ: Прехва́льнїи мч҃нцы, ва́съ ни землѧ̀ потаи́ла є҆́сть, но не́бо прїѧ́тъ вы̀, и҆ ѿверзо́шасѧ ва́мъ ра̑йскїѧ двє́ри, и҆ внꙋ́трь бы́вше, дре́ва живо́тнагѡ наслажда́етесѧ, хрⷭ҇то́ви моли́тесѧ, дарова́ти дꙋша́мъ на́шымъ ми́ръ и҆ ве́лїю млⷭ҇ть.
Сла́ва, и҆ ны́нѣ, бг҃оро́диченъ: Ра́дꙋйсѧ ра́досте пра́дѣдѡвъ, а҆пⷭ҇лѡвъ и҆ мч҃никѡвъ весе́лїе, и҆ покро́въ на́съ дв҃о, твои́хъ рабѡ́въ.
Та́же: Ны́нѣ ѿпꙋща́еши раба̀ твоего̀: Трист҃о́е, и҆ по Ѻ҆́ч҃е на́шъ: тропа́рь, и҆ ѿпꙋ́стъ.
Въ сре́дꙋ на повече́рїи,
канѡ́нъ прест҃ѣ́й бцⷣѣ. Гла́съ а҃.
Пѣ́снь а҃
І҆рмо́съ: Пѣ́снь послѣ́днюю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ сп҃сшемꙋ і҆и҃лѧ, ꙗ҆́кѡ просла́висѧ.
Кꙋпина́ тѧ воѡбража́ше бг҃ороди́тельнице: ѻ҆́гнь бо носи́ла є҆сѝ вои́стиннꙋ непостоѧ́нный, пребы́вши неѡпа́льна. тѣ́мже тѧ̀ вѣ́рными гла́сы пѣсносло́вимъ при́снѡ.
Ѡ҆бо́лксѧ въ чл҃вѣ́ка бг҃ъ сло́во, и҆з̾ тебѐ па́че смы́сла воплоти́сѧ, пречⷭ҇таѧ. тѣ́мъ тѧ̀ всѧ́кое дыха́нїе славосло́витъ, и҆ покланѧ́етсѧ тебѣ̀, и҆ по до́лгꙋ чти́тъ.
Сла́ва: Зачала̀ є҆сѝ пречⷭ҇таѧ, неизрече́нное сло́во, всѧ̑ содержа́щее земны̑ѧ концы̀, и҆ сїѐ родила̀ є҆сѝ: є҆го́же молѝ прилѣ́жнѡ, поми́ловати на́съ.
И҆ ны́нѣ: Ꙗ҆́же є҆ди́на безлѣ́тнаго бг҃а въ лѣ́то ро́ждши воплоще́нна, пречⷭ҇таѧ влⷣчце, стра́стныѧ моеѧ̀ дꙋшѝ вселѣ́тныѧ стра̑сти и҆сцѣлѝ.
Пѣ́снь г҃
І҆рмо́съ: Да ᲂу҆тверди́тсѧ се́рдце моѐ въ во́ли твое́й хрⷭ҇тѐ бж҃е, и҆́же над̾ вода́ми нб҃о ᲂу҆твержде́й второ́е, и҆ ѡ҆снова́вый на вода́хъ зе́млю всеси́льне.
Да ѡ҆божи́тъ человѣ́чество, бг҃ъ бы́сть чл҃вѣ́къ, и҆з̾ тебѐ дв҃о чⷭ҇таѧ, па́че сло́ва и҆ смы́сла: сегѡ̀ ра́ди тѧ̀ согла́снѡ вѣ́рнїи ᲂу҆бл҃жа́емъ.
И҆́же є҆стество́мъ неѡпи́санный, вопло́щьсѧ и҆з̾ тебѐ написа́сѧ, бг҃обл҃года́тнаѧ чⷭ҇таѧ: є҆го́же непреста́ннѡ молѝ, ᲂу҆ще́дрити, и҆ просвѣти́ти дꙋ́шы бл҃жа́щихъ тѧ̀.
Сла́ва: Непло́дствовавшїѧ мы́сли моеѧ̀ неплѡ́дїѧ всѧ̑ ѿженѝ, и҆ плодоно́снꙋ добродѣ́тельми дꙋ́шꙋ мою̀ покажѝ, прест҃а́ѧ бцⷣе, вѣ́рныхъ помо́щнице.
И҆ ны́нѣ: И҆зба́ви мѧ̀ пренепоро́чнаѧ всѧ́кагѡ ѡ҆бстоѧ́нїѧ, и҆ мно́гихъ собла̑знъ ѕмїе́выхъ, вѣ́чнꙋющагѡ ѻ҆гнѧ̀ и҆ тьмы̀, ꙗ҆́же свѣ́тъ ро́ждшаѧ на́мъ невече́рнїй.
Пѣ́снь д҃
І҆рмо́съ: Дх҃омъ прови́дѧ прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ вопїѧ̀: внегда̀ прибли́житисѧ лѣ́тѡмъ, позна́ешисѧ, внегда̀ прїитѝ вре́мени, пока́жешисѧ: сла́ва си́лѣ твое́й гдⷭ҇и.
Въ пречⷭ҇тое твоѐ чре́во всели́сѧ хрⷭ҇то́съ, всест҃а́ѧ влⷣчце, ѡ҆божѝ на́съ, пло́ть прїе́мъ ѡ҆дꙋшевле́ннꙋ. тѣ́мъ тѧ̀ чⷭ҇тꙋю мт҃рь правосла́внѡ воспѣва́емъ, влⷣчце, мі́рꙋ помо́щнице.
Ст҃а́ѧ бцⷣе, ѡ҆свѧтѝ на́съ, ꙗ҆́же прест҃а́го ро́ждшаѧ пло́тїю, ᲂу҆подо́битисѧ хотѣ́вша человѣ́кѡмъ: и҆ нбⷭ҇нагѡ црⷭ҇твїѧ всѣ́хъ ꙗ҆вѝ, пречⷭ҇таѧ, прича́стники мл҃твами твои́ми.
Сла́ва: Дв҃о бцⷣе, нескве́рнаѧ сѣ́не, ѡ҆скве́рншагосѧ прегрѣше́ньми ѡ҆чи́сти мѧ̀ ны́нѣ щедро́тъ твои́хъ чи́стыми зарѧ́ми, и҆ да́ждь мѝ рꙋ́кꙋ по́мощи, да зовꙋ̀: сла́ва си́лѣ твое́й гдⷭ҇и.
И҆ ны́нѣ: Цр҃ковь ѡ҆сщ҃е́ннаѧ бг҃ови ꙗ҆ви́ласѧ є҆сѝ, въ тѧ̀ все́льшемꙋсѧ дв҃о па́че ᲂу҆ма̀: того̀ молѝ, грѣхѡ́въ на́шихъ скве́рнꙋ ѡ҆чи́стити: ꙗ҆́кѡ да хра́мы пока́жемсѧ, и҆ жили̑ща дх҃ꙋ.
Пѣ́снь є҃
І҆рмо́съ: Тво́й ми́ръ да́ждь на́мъ сн҃е бж҃їй, и҆но́гѡ бо ра́звѣ тебѐ бг҃а не зна́емъ, и҆́мѧ твоѐ и҆менꙋ́емъ, ꙗ҆́кѡ бг҃ъ живы́хъ и҆ ме́ртвыхъ є҆сѝ.
Ме́ртва мѧ̀ содѣ́ла и҆ногда̀ во є҆де́мѣ вкꙋше́нїе лꙋка́вое: живо́тъ же ро́ждши чⷭ҇таѧ, и҆́же дре́вомъ дре́вле ᲂу҆мерщвле́ннаго ѡ҆животворѝ, да тѧ̀ славосло́вѧ воспѣва́ю.
Сп҃си́ мѧ всечⷭ҇таѧ, ѿ бѣ́дъ лю́тыхъ: воздви́гни ѿ страсте́й гно́йныхъ, и҆ и҆зба́ви мѧ̀ плѣне́нїѧ и҆ ѡ҆ѕлобле́нїѧ лꙋка́выхъ бѣсѡ́въ, любо́вїю чтꙋ́щаго тѧ̀.
Сла́ва: Ѻ҆́блакъ и҆ ра́й, и҆ две́рь свѣ́та, трапе́зꙋ и҆ рꙋно̀ зна́емъ тѧ̀, и҆ ста́мнꙋ внꙋ́трь ма́ннꙋ носѧ́щꙋ, сла́дость мі́ра, чⷭ҇таѧ дв҃о мт҃и.
И҆ ны́нѣ: Ро́ждши пренепоро́чнаѧ бг҃а є҆мманꙋ́ила, человѣ́ка ꙗ҆́вѣ за млⷭ҇рдїе бы́вшаго: сего̀ молѝ ꙗ҆́кѡ чл҃вѣколю́бца чⷭ҇таѧ, ᲂу҆ще́дрити лю́ди согрѣ́шшыѧ.
Пѣ́снь ѕ҃
І҆рмо́съ: Ꙗ҆́кѡ і҆ѡ́нꙋ прⷪ҇ро́ка, возведѝ хрⷭ҇тѐ бж҃е живо́тъ мо́й ѿ тлѝ, вопїю́ ти чл҃вѣколю́бче, ꙗ҆́кѡ жи́знь ᲂу҆ тебѐ є҆́сть, и҆ нетлѣ́нїе, и҆ си́ла.
Ѡ҆скверне́ннаго мѧ̀ мно́гими грѣхѝ, молю́ тѧ сꙋ́щꙋю бл҃гꙋ́ю и҆ нескве́рнꙋю ски́нїю: ѡ҆мы́й ѿ всѧ́кїѧ скве́рны, хода́тайствомъ твои́мъ.
Ѡ҆кормле́нїе мѝ бꙋ́ди чⷭ҇таѧ, въ лю́тѣй пꙋчи́нѣ жите́йскихъ напа́стей ѡ҆бꙋрева́емомꙋ, и҆ наста́ви къ сп҃си́тельномꙋ приста́нищꙋ, и҆ сп҃си́ мѧ.
Сла́ва: Треволнє́нїѧ пѡ́мыслъ, и҆ страсте́й наведє́нїѧ, и҆ глꙋбина̀ грѣхѡ́въ, ѡ҆каѧ́ннꙋю мою̀ дꙋ́шꙋ ѡ҆бꙋрева́ютъ: помози́ ми ст҃а́ѧ влⷣчце.
И҆ ны́нѣ: Свѧще́нїѧ сѣ́нь пронарече́ннаѧ мр҃і́е, ѡ҆скверне́ннꙋю сластьмѝ ѡ҆каѧ́ннꙋю мою̀ дꙋ́шꙋ ѡ҆свѧтѝ, и҆ бж҃е́ственныѧ сла́вы прича́стника мѧ̀ сотворѝ.
Та́же: Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ, гла́съ а҃. Подо́бенъ: Гро́бъ тво́й:
Дв҃о и҆ пита́тельнице є҆ди́номꙋ ѿ трⷪ҇цы, раю̀ кра́сный, земны́хъ сп҃се́нїе, покро́вомъ твои́мъ сп҃са́й бл҃гоче́стнѡ воспѣва́ющихъ тѧ̀: ты́ бо родила̀ є҆сѝ во прⷪ҇ро́цѣхъ глаго́лавшаго, ты̀ носи́ла є҆сѝ содержа́щаго всѧ́чєскаѧ, ꙗ҆́кѡ мт҃и хрⷭ҇та̀ бг҃а.
Пѣ́снь з҃
І҆рмо́съ: Сꙋ́щымъ въ пещѝ ѻ҆трокѡ́мъ твои̑мъ сп҃се, не прикоснꙋ́сѧ, нижѐ стꙋжѝ ѻ҆́гнь. тогда̀ трїѐ ꙗ҆́кѡ є҆ди́нѣми ᲂу҆сты̀ поѧ́хꙋ и҆ бл҃гословлѧ́хꙋ, глаго́люще: бл҃гослове́нъ бг҃ъ ѻ҆тє́цъ на́шихъ.
Безнача́льнагѡ ѻ҆ц҃а̀ сн҃ъ во чре́во твоѐ всели́сѧ, прїи́мъ нача́ло: ꙗ҆́кѡ да на́съ и҆зба́витъ ꙗ҆́кѡ бг҃ъ, ѿ лꙋка́выхъ нача̑лъ тьмы̀, бг҃ороди́тельнице чⷭ҇таѧ, кла́нѧющихсѧ є҆мꙋ̀.
И҆спещре́на бж҃е́ственными добродѣ́тельми, чⷭ҇таѧ дв҃о, родила̀ є҆сѝ сло́во, собезнача́льное ѻ҆ц҃ꙋ̀, добродѣ́тельми небеса̀ вои́стиннꙋ покры́вшее: є҆го́же молѝ при́снѡ ᲂу҆ще́дрити на́съ.
Сла́ва: Ѡ҆свѧтѝ на̑ша помышлє́нїѧ, ᲂу҆твердѝ всѣ́хъ дꙋ́шы мт҃и бж҃їѧ, твори́ти до́брѣ ѡ҆правда̑нїѧ, за милосе́рдїе неизрече́нное, воплоще́ннагѡ и҆з̾ тебѐ дв҃о сло́ва безнача́льнагѡ ѻ҆ц҃а̀.
И҆ ны́нѣ: Оу҆мерщвле́нный страстьмѝ мно́гими пренепоро́чнаѧ, ѡ҆живѝ ᲂу҆́мъ мо́й, и҆ бг҃оꙋгѡ́днаѧ твори́ти ᲂу҆крѣпи́ мѧ, да велича́ю тѧ̀ ꙗ҆́кѡ застꙋ́пницꙋ при́снѡ хрⷭ҇тїа́нъ и҆ ᲂу҆пова́нїе.
Пѣ́снь и҃
І҆рмо́съ: Є҆гѡ́же ᲂу҆жаса́ютсѧ а҆́гг҃ли, и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте сщ҃е́нницы, просла́вите ѻ҆́троцы, бл҃гослови́те лю́дїе, и҆ превозноси́те во всѧ̑ вѣ́ки.
И҆збавлѧ́емсѧ пренепоро́чнаѧ, твои́ми къ бг҃ꙋ бдѣ́нными мл҃твами всѧ́ческихъ и҆скꙋше́нїй, тѧ̀ бцⷣꙋ зна́ющїи бл҃гослове́ннꙋю и҆ прера́дованнꙋю.
Воплоща́етсѧ безпло́тный и҆з̾ тебѐ бг҃олѣ́пнѡ: є҆го́же молѝ пречⷭ҇таѧ, стра̑сти пло́ти моеѧ̀ ᲂу҆мертви́ти, и҆ ѡ҆живи́ти мою̀ дꙋ́шꙋ ᲂу҆мерщвле́нꙋю грѣхѝ.
Сла́ва: И҆сцѣли́вшаго сокрꙋше́нїе а҆да́ма пе́рстнаго сп҃са ро́ждшаѧ пречⷭ҇таѧ и҆ бг҃а: є҆го́же молѝ, ꙗ҆́звы дꙋшѝ моеѧ̀ и҆сцѣли́ти, неисцѣ́льнѡ болѧ́щыѧ.
И҆ ны́нѣ: Возста́ви лежа́щаго во глꙋбинѣ̀ ѕѡ́лъ, и҆ ꙗ҆́же ны́нѣ борю́щыѧ мѧ̀ побѣдѝ врагѝ, снѣ́дшыѧ безмѣ́стными сластьмѝ дꙋ́шꙋ мою̀: не пре́зри менѐ чⷭ҇таѧ, но ᲂу҆ще́дри и҆ сп҃си́ мѧ.
Пѣ́снь ѳ҃
І҆рмо́съ: Свѣтоно́сный ѻ҆́блакъ, во́ньже всѣ́хъ влⷣка, ꙗ҆́кѡ до́ждь съ нб҃сѐ на рꙋно̀ сни́де, и҆ воплоти́сѧ на́съ ра́ди, бы́въ чл҃вѣ́къ, безнача́льный, велича́емъ всѝ ꙗ҆́кѡ мт҃рь бг҃а на́шегѡ чи́стꙋю.
Свѣ́тъ бж҃е́ственный ро́ждшаѧ, пренепоро́чнаѧ, ѿ ѻ҆ц҃а̀ возсїѧ́вшїй, ѡ҆мраче́ннꙋю мою̀ дꙋ́шꙋ лестьмѝ житїѧ̀, и҆ бы́вшꙋю врагѡ́мъ посмѣ́хъ, ᲂу҆ще́дри, и҆ свѣ́тꙋ покаѧ́нїѧ сп҃си́тельнагѡ сподо́би, чⷭ҇таѧ.
Свѣтови́дный тѧ̀ ѻ҆́блакъ, пренепоро́чнаѧ, и҆са́їа зрѧ́ше, и҆з̾ негѡ́же возсїѧ̀ на́мъ сл҃нце пра́ведное: та́йнѡ тва́рь просвѣтѝ: сегѡ̀ ра́ди тѧ̀ вѣ́рою воспѣва́емъ до́брꙋю въ жена́хъ.
Сла́ва: Грѣхолюби́въ сы́й въ лѣ́ности живꙋ̀, и҆ сꙋди́ща, чⷭ҇таѧ, неꙋмы́тнагѡ трепе́щꙋ, на не́мже мѧ̀ соблюдѝ, твои́ми ст҃ы́ми мольба́ми, дв҃о бг҃оневѣ́сто, неѡсꙋжде́наго: да ꙗ҆́кѡ застꙋ́пницꙋ ᲂу҆бл҃жа́ю тѧ̀ при́снѡ.
И҆ ны́нѣ: Трепе́щꙋ сꙋди́ща дв҃о, и҆ незабы́тнагѡ ѻ҆чесѐ твоегѡ̀ сн҃а, содѣ́лавъ мнѡ́ги грѣхѝ на землѝ. и҆ сегѡ̀ ра́ди тебѣ̀ вопїю̀: всеми́лостиваѧ влⷣчце, помози́ ми, и҆ тогда́шнїѧ мѧ̀ нꙋ́жды и҆змѝ неѡсꙋжде́ннаго чⷭ҇таѧ.
Та́же, Досто́йно є҆́сть: И҆ покло́нъ. Та́же Трист҃о́е. И҆ по Ѻ҆́ч҃е на́шъ: тропарѝ, и҆ про́чее ѻ҆бы́чное, и҆ ѿпꙋ́стъ.
Въ четверто́къ ᲂу҆́тра,
по а҃-мъ стїхосло́вїи сѣда́льны а҆пⷭ҇льски. Гла́съ а҃:
Премꙋ́дрїи вселе́нныѧ ловцы̀, ѿ бг҃а прїе́мшїи млⷭ҇тивное, моли́те и҆ ны́нѣ ѡ҆ на́съ вопїю́щихъ: гдⷭ҇и, сп҃сѝ гра́дъ тво́й, и҆ ѿ ѡ҆держа́щихъ ѕѡ́лъ свободѝ а҆пⷭ҇лъ ра́ди дꙋ́шы на́шѧ.
Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.
Трꙋбы̑ хрⷭ҇тѡ́вы бл҃гогла̑сныѧ, въ пѣ́снехъ да почти́мъ вѣ́рнїи премꙋ̑дрыѧ а҆пⷭ҇лы, ко́ни, возмꙋти́вшыѧ безбо́жїѧ мо́ре, и҆ привле́кшыѧ ꙗ҆́кѡ и҆з̾ глꙋбины̀ человѣ́ки, къ бж҃е́ственномꙋ сп҃се́нїѧ приста́нищꙋ, бл҃года́тїю дх҃а.
Сла́ва, и҆ ны́нѣ, бг҃оро́диченъ: Неѡбори́мꙋю стѣ́нꙋ стѧжа́вше вѣ́рнїи бцⷣꙋ мр҃і́ю, прїиди́те поклони́мсѧ и҆ припаде́мъ къ не́й: дерзнове́нїе бо и҆́мать къ ро́ждшемꙋсѧ и҆з̾ неѧ̀, и҆ мо́литсѧ, и҆ сп҃са́етъ ѿ гнѣ́ва и҆ сме́рти дꙋ́шы на́шѧ.
По в҃-мъ стїхосло́вїи, сѣда́льны, гла́съ а҃:
Мре́жею слове́сною плетє́нїѧ ри́тѡрскаѧ, ры́барїе тро́стїю кре́стною разве́ргше, просвѣти́ша ꙗ҆зы́ки, бл҃гоче́стнѡ сла́вити тѧ̀ бг҃а и҆́стиннаго, тѣ́мже тѝ пѣ́снь ᲂу҆крѣ́пльшемꙋ и҆̀хъ вопїе́мъ: сла́ва ѻ҆ц҃ꙋ̀, и҆ сн҃ꙋ, сла́ва є҆диносꙋ́щномꙋ дх҃ꙋ, сла́ва тѣ́ми просвѣти́вшемꙋ мі́ръ.
Сті́хъ: И҆сповѣ́дѧтъ нб҃са̀ чꙋдеса̀ твоѧ̑ гдⷭ҇и.
Свѣ́тъ ѿ свѣ́та безлѣ́тнѡ просїѧ́въ, въ лѣ́то пло́тїю на землѝ ꙗ҆ви́сѧ, и҆ мі́ръ просвѣтѝ, ва́ми всебл҃же́ннїи. тѣ́мже всѝ ᲂу҆че́ньми ва́шими бж҃е́ственными просвѣ́щшесѧ, свѧще́ннꙋю ва́шꙋ па́мѧть почита́емъ а҆по́столи.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мч҃нченъ: Мч҃ники хрⷭ҇тѡ́вы мо́лимъ всѝ ѿ любвѐ прише́дше къ ни̑мъ съ вѣ́рою: сі́и бо ѡ҆ на́шемъ сп҃се́нїи про́сѧтъ, сі́и и҆сточа́ютъ и҆сцѣле́нїй бл҃года́ть, сі́и полкѝ ѿгонѧ́ютъ бѣсѡ́вскїѧ, ꙗ҆́кѡ сохра̑нницы вѣ́ры.
Сла́ва, и҆ ны́нѣ, бг҃оро́диченъ: Оу҆пова́нїе хрⷭ҇тїа́нъ, прест҃а́ѧ дв҃о, є҆го́же родила̀ є҆сѝ бг҃а, па́че ᲂу҆ма̀ и҆ сло́ва, непреста́ннѡ молѝ ѡ҆ воспѣва́ющихъ тѧ̀, пода́ти ѡ҆ставле́нїе грѣхѡ́въ на́шихъ всѣ́хъ и҆ и҆справле́нїе житїѧ̀, вѣ́рою и҆ любо́вїю при́снѡ сла́вѧщымъ тѧ̀.
По г҃-мъ стїхосло́вїи сѣда́льны. Гла́съ а҃:
Свѣти̑ла мы́слєннаѧ ᲂу҆ч҃нцы̀ сп҃сѡвы свѣ́тлїи, ꙗ҆́кѡ ѻ҆́гнь ѡ҆зари́сте всеѧ̀ землѝ и҆сполне́нїе бж҃е́ственными ᲂу҆че́нїи: тѣ́мже молю́сѧ, ꙗ҆́же во тьмѣ̀ дꙋ́шꙋ мою̀ просвѣти́те, свѣтоза́рными лꙋча́ми ва́шими всебл҃же́ннїи.
Въ мѵ́рѣхъ живы́й чꙋ́вственнѡ ст҃и́телю, ꙗ҆́кѡ мѵ́ромъ разꙋ́мнѡ дх҃о́внымъ ꙗ҆ви́лсѧ є҆сѝ пома́занъ ѻ҆́тче нїко́лае, и҆ мѵ́ры чꙋде́съ твои́хъ ѡ҆благоꙋха́лъ є҆сѝ, мѵ́ро приснотекꙋ́щее пролива́ѧ, мѵ́рными твои́ми бл҃гоꙋха́еми пѣ́сньми, и҆ па́мѧтїю твое́ю.
Сла́ва, и҆ ны́нѣ, бг҃оро́диченъ: Прⷪ҇ро́цы тѧ̀ ꙗ҆́снѡ провозвѣсти́ша ѻ҆трокови́це, мт҃рь бж҃їю: и҆ а҆пⷭ҇ли бж҃е́ственнїи въ мі́рѣ проповѣ́даша, и҆ мы̀ вѣ́ровахомъ. тѣ́мже всѝ бл҃гочестномꙋ́дреннѣ почита́юще воспѣва́емъ тѧ̀, и҆ бцⷣꙋ вои́стиннꙋ при́снѡ и҆менꙋ́емъ.
Канѡ́нъ ст҃ы́мъ а҆пⷭ҇лѡмъ. Творе́нїе ѳеофа́ново. Гла́съ а҃.
Пѣ́снь а҃
І҆рмо́съ: Твоѧ̀ побѣди́тельнаѧ десни́ца бг҃олѣ́пнѡ въ крѣ́пости просла́висѧ: та̀ во безсме́ртне, ꙗ҆́кѡ всемогꙋ́щаѧ, проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ.
Бж҃е́ственными просвѣти́вшесѧ зарѧ́ми трисо́лнечнагѡ сїѧ́нїѧ сла́внїи, положе́нїемъ нареко́стесѧ вои́стиннꙋ бо́зи, свѣтови́днїи а҆пⷭ҇ли: тѣ́мже по до́лгꙋ ва́съ вѣ́рою почита́емъ. [Два́жды.]
Сло́ва ꙗ҆́вльшагѡсѧ на землѝ за млⷭ҇рдїе дебельство́мъ пло́ти, ᲂу҆го́днїи слꙋжи́телїе, и҆ є҆гѡ̀ всѣ́хъ повелѣ́нїй и҆сполни́телїе вѣ́рою бы́сте, при́снѡ почита́етесѧ а҆пⷭ҇ли.
Свѣ́тлыми лꙋча́ми прест҃а́гѡ дх҃а при́снѡ бл҃же́ннїи, всего́ мѧ просвѣти́те, грѣхѡ́въ тьмо́ю покрыва́емаго, и҆ къ покаѧ́нїѧ пꙋтѝ ꙗ҆́вѣ наста́вите.
Бг҃оро́диченъ: Ꙗ҆́же а҆пⷭ҇лѡвъ ра́дость бг҃ороди́тельнице всенепоро́чнаѧ влⷣчце, ꙗ҆́кѡ мт҃и бы́вши въ тѣ́хъ бг҃олѣ́пнѡ глаго́лавшемꙋ, съ ни́миже моли́сѧ, ѻ҆гнѧ̀ гее́нны и҆зба́вити мѧ̀.
И҆́нъ канѡ́нъ во ст҃ы́хъ ѻ҆тцꙋ̀ на́шемꙋ нїкола́ю чꙋдотво́рцꙋ, є҆гѡ́же краегране́сїе: Тебѣ̀ нїко́лае пе́рвое и҆зношꙋ̀ пѣ́нїе а҆́зъ. Творе́нїе і҆ѡ́сифово. Гла́съ а҃.
Пѣ́снь а҃
І҆рмо́съ: Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ сп҃сшемꙋ і҆и҃лѧ, ꙗ҆́кѡ просла́висѧ.
Вѣнцы̀ ᲂу҆краша́емь првⷣными, и҆ прⷭ҇то́лꙋ бл҃года́ти предстоѧ̀ нїко́лае, и҆̀же пѣ́сньми тѧ̀ ны́нѣ вѣнчава́ющыѧ вѣ́рнѡ, при́снѡ сп҃са́й мл҃твами твои́ми.
И҆́же бл҃года́ть прїе́мъ и҆сцѣле́нїй всебл҃же́нне нїко́лае, дꙋшѝ моеѧ̀ ꙗ҆́звы мл҃твами твои́ми и҆сцѣлѝ, и҆ находѧ́щихъ и҆скꙋше́нїй и҆зба́ви мѧ̀, молю́сѧ.
Крѣ́пкою нїко́лае твое́ю мл҃твою, всеразсла́бленнꙋю дꙋ́шꙋ мою̀ прегрѣше́ньми и҆сцѣлѝ, и҆ житїѧ̀ ѕлолю́тыхъ и҆зба́ви мѧ̀, молю́сѧ.
Бг҃оро́диченъ: Оу҆ма̀ моегѡ̀ ѡ҆мраче́нїе, всенепоро́чнаѧ, свѣ́томъ твои́мъ ѿженѝ, и҆ тьмы̀ вѣ́чнꙋющїѧ и҆зба́ви мѧ̀, ꙗ҆́кѡ да пою̀ всегда̀ вели̑чїѧ твоѧ̑.
Пѣ́снь г҃
І҆рмо́съ: Є҆ди́не вѣ́дый человѣ́ческагѡ сꙋщества̀ не́мощь, и҆ ми́лостивнѡ въ нѐ воѡбра́жьсѧ, препоѧ́ши мѧ̀ съ высоты̀ си́лою, є҆́же вопи́ти тебѣ̀ ст҃ы́й: ѡ҆дꙋшевле́нный хра́ме неизрече́нныѧ сла́вы твоеѧ̀ чл҃вѣколю́бче.
И҆́же є҆ди́нъ неви́димый бг҃ъ, ви́димь бы́сть воплоща́емь, и҆ ᲂу҆ч҃нкѝ ва́съ и҆збра́въ во все́мъ мі́рѣ, є҆гѡ̀ и҆́мѧ и҆ превосходѧ́щꙋю сла́вꙋ проповѣ́дающихъ, пребл҃же́ннїи бж҃е́ственнїи а҆пⷭ҇ли. [Два́жды.]
Тебѣ̀ є҆ди́номꙋ согрѣши́хъ хрⷭ҇тѐ, тебѣ̀ є҆ди́номꙋ беззако́нновахъ, и҆ дꙋ́шꙋ ѕлы́ми ѡ҆скверни́хъ: твое́ю млⷭ҇тїю ѡ҆чи́сти и҆ сп҃си́ мѧ, и҆мѣ́ѧй молѧ́щыѧ тѧ̀, є҆ди́не бл҃гопремѣни́телю і҆и҃се, премꙋ̑дрыѧ а҆пⷭ҇лы твоѧ̑.
Го́рестей стра́стныхъ скве́рнъ, и҆ го́рести грѣхо́вныѧ и҆зба́вите мѧ̀ ꙗ҆́кѡ млⷭ҇тивїи а҆пⷭ҇ли, и҆ покаѧ́нїемъ ѡ҆слажда́юще мою̀ мы́сль, ꙗ҆́кѡ бж҃е́ственнꙋю носѧ́ще сла́дость въ се́рдцы всехва́льнїи.
Бг҃оро́диченъ: Съ невеще́ственными слꙋжи́тели, дв҃о неискꙋсобра́чнаѧ, со всѣ́ми вы́шними си́лами, съ мч҃нки и҆ а҆пⷭ҇лы, хрⷭ҇та̀, є҆го́же воплоти́ла є҆сѝ ѿ чⷭ҇тыхъ крове́й твои́хъ: ᲂу҆молѝ сп҃сти́сѧ рабѡ́мъ твои̑мъ.
И҆́нъ
І҆рмо́съ: Да ᲂу҆тверди́тсѧ се́рдце моѐ въ во́ли твое́й хрⷭ҇тѐ бж҃е, и҆́же над̾ вода́ми нб҃о ᲂу҆твержде́й второ́е, и҆ ѡ҆снова́вый на вода́хъ зе́млю всеси́льне.
Первосвѧще́нникѡвъ ᲂу҆добре́нїе, бл҃гоꙋха́нїе бж҃е́ственнагѡ дх҃а, мѷрово́нными твои́ми мл҃твами ѕлосмра̑дныѧ стра̑сти ѿженѝ се́рдца моегѡ̀, нїко́лае мꙋ́дре, любо́вїю молю́сѧ.
Въ лѣ́ности скончава́ю мою̀ жи́знь ѻ҆каѧ́нный, и҆ бою́сѧ стра́шнагѡ твоегѡ̀ сꙋди́ща хрⷭ҇тѐ: на не́мже не посрамѝ менѐ, нїкола́а хода́тайствы сщ҃е́нными ᲂу҆моле́нъ быва́ѧ.
Преиспещре́нъ бж҃е́ственною бл҃года́тїю, ст҃и́телю нїко́лае ѻ҆́тче, ѿ разли́чныхъ и҆скꙋше́нїй и҆ бѣ́дъ сп҃сѝ, прибѣга́ющыѧ въ кро́въ тво́й при́снѡ всеблаже́нне.
Бг҃оро́диченъ: И҆зба́ви мѧ̀ ѿ всѣ́хъ напа́стей, и҆ ѿ мно́гихъ собла̑знъ ѕмі́евыхъ, и҆ ѿ вѣ́чнагѡ ѻ҆гнѧ̀ и҆ тьмы̀, всенепоро́чнаѧ, ꙗ҆́же свѣ́тъ ро́ждшаѧ на́мъ невече́рнїй.
Пѣ́снь д҃
І҆рмо́съ: Го́рꙋ тѧ̀ бл҃года́тїю бж҃їею прїѡсѣне́ннꙋю, прозорли́выма а҆ввакꙋ́мъ ᲂу҆смотри́въ ѻ҆чи́ма, и҆з̾ тебѐ и҆зы́ти і҆и҃левꙋ провозглаша́ше ст҃о́мꙋ, во сп҃се́нїе на́ше и҆ ѡ҆бновле́нїе.
Мо́ре безбо́жїѧ и҆ невѣ́рства возмꙋти́вше, ꙗ҆жде́нїемъ ва́шимъ, ко́ни бг҃оизбра́ннїи хрⷭ҇тѡ́вы а҆пⷭ҇ли: врага̀ потопи́сте мы́сленнаго, и҆ потоплє́нныѧ человѣ́ки и҆звлеко́сте ко сп҃се́нїю. [Два́жды.]
Прїѧ́телище дх҃а бж҃е́ственныхъ сїѧ́нїй а҆пⷭ҇ли, ѡ҆мраче́ннꙋю мою̀ дꙋ́шꙋ, и҆ прїѧ́тнꙋ всѧ́ческихъ страсте́й бы́вшꙋю, свѣ́томъ покаѧ́нїѧ просвѣти́те бг҃обл҃же́ннїи бж҃е́ственнїи а҆пⷭ҇ли.
Ѻ҆́блацы, и҆̀же во́дꙋ живо́тнꙋю ѡ҆дожди́вшїи, и҆зсо́хшꙋю мою̀ дꙋ́шꙋ бездо́ждїемъ страсте́й бж҃е́ственнѣ напо́йте, и҆ добродѣ́телей возрасти́ти кла́сы сотвори́те сп҃се́нїѧ, а҆пⷭ҇ли всехва́льнїи.
Бг҃оро́диченъ: Прⷪ҇ро́цы, а҆пⷭ҇ли прехва́льнїи, мч҃нцы, съ мт҃рїю и҆зба́вителевою моли́тесѧ прилѣ́жнѡ, ꙗ҆́кѡ да и҆зба́вимсѧ ѿ грѣхѡ́въ, и҆ вѣ́чныѧ мꙋ́ки, и҆ и҆скꙋше́нїй, и҆ бѣ́дъ, и҆ скорбе́й.
И҆́нъ
І҆рмо́съ: Дх҃омъ прови́дѧ прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ вопїѧ̀: внегда̀ прибли́житисѧ лѣ́тѡмъ, позна́ешисѧ, внегда̀ прїитѝ вре́мени, пока́жешисѧ: сла́ва си́лѣ твое́й гдⷭ҇и.
Ꙗ҆́кѡ всѣ́хъ повелѣ́нїй бж҃їихъ и҆спо́лнитель, ѻ҆́тче ст҃и́телю нїко́лае, соблюда́ти поспѣшѝ на́мъ мл҃твами твои́ми, ꙗ҆̀же на землѝ законоположє́нїѧ ко сп҃се́нїю ведꙋ̑щаѧ, и҆ и҆зба́ви всѣ́хъ напа́стей находѧ́щихъ.
Тече́нїе твоѐ сконча́въ преподо́бнѡ ѡ҆ хрⷭ҇тѣ̀, пꙋти̑ на́шѧ и҆спра́ви, ꙗ҆́же къ немꙋ̀ ѻ҆́тче бг҃оно́сне нїко́лае, ꙗ҆́кѡ да ᲂу҆бѣжа́вше безпꙋ́тнагѡ блꙋже́нїѧ, ко сп҃си́тельномꙋ дости́гнемъ соверше́нїю.
И҆́же всѧ̑ кѡ́зни вра̑жїѧ ᲂу҆спи́въ, бж҃е́ственными бодростьмѝ, нїко́лае премꙋ́дре, бдѧ́щихъ, и҆ бг҃а воспѣва́ющихъ, и҆ тебѐ хода́таѧ къ немꙋ̀ предлага́ющихъ, всѣ́хъ на́съ ѻ҆́тче ѡ҆благодатѝ.
Бг҃оро́диченъ: Разꙋмѣ́въ прⷪ҇ро́къ дх҃омъ бж҃їимъ, го́рꙋ тѧ̀ прїѡсѣне́ннꙋю преднаписа́въ чⷭ҇таѧ, и҆ста́ѧвшыѧ зно́емъ мно́гихъ прегрѣше́нїй, твои́ми бл҃гопрїѧ́тными хода́тайствы бцⷣе ны́нѣ прохладѝ, и҆ бл҃года́тїю.
Пѣ́снь є҃
І҆рмо́съ: Просвѣти́вый сїѧ́нїемъ прише́ствїѧ твоегѡ̀ хрⷭ҇тѐ, и҆ ѡ҆свѣти́вый крⷭ҇то́мъ твои́мъ мі́ра концы̀, сердца̀ просвѣтѝ свѣ́томъ твоегѡ̀ бг҃оразꙋ́мїѧ, правосла́внѡ пою́щихъ тѧ̀.
Ка́плющыѧ сла́дость и҆ кра́сное весе́лїе, ꙗ҆ви́стесѧ го́ры всесла́внїи а҆по́столи, го́ресть всю̀ вра́жїю ѿе́млюще, и҆ вѣ̑рныѧ наслажда́юще. [Два́жды.]
Прише́дша стра́нна хрⷭ҇та̀ во своѧ̑ разꙋмѣ́сте, и҆ и҆́скреннѡ томꙋ̀ прилѣпи́стесѧ. тѣ́мже ѿ чꙋжда́гѡ мѧ̀ и҆зба́вите вре́да, бж҃е́ственнїи сло́ва а҆пⷭ҇ли.
Та̑йныѧ дꙋшѝ моеѧ̀ и҆сцѣлѝ ꙗ҆́звы, мл҃твами сщ҃е́ннѡ въ мі́рѣ проповѣ́давшихъ бж҃е́ственное твоѐ прише́ствїе, и҆ стра̑сти ще́дре, и҆ є҆́же и҆з̾ гро́ба воскрⷭ҇нїе.
Бг҃оро́диченъ: Со всѣ́ми безпло́тными, є҆го́же воплоти́ла є҆сѝ бг҃а сло́во, па́че сло́ва, бцⷣе дв҃о молѝ, ѿ безслове́сныхъ дѣѧ́нїй и҆ плотски́хъ страсте́й свободи́тисѧ рабѡ́мъ твои̑мъ.
И҆́нъ
І҆рмо́съ: Свѣ́тлый на́мъ возсїѧ́й свѣ́тъ присносꙋ́щный, ᲂу҆́тренюющымъ ѡ҆ сꙋдьба́хъ за́повѣдей твои́хъ, влⷣко чл҃вѣколю́бче хрⷭ҇тѐ бж҃е на́шъ.
Во дворѣ́хъ гдⷭ҇нихъ насажде́нъ ст҃и́телю ѻ҆́тче нїко́лае, и҆ ꙗ҆́кѡ плодови́таѧ ма́слина, бл҃года́тїю ᲂу҆маща́еши ны́нѣ всѣ́хъ ли́ца, є҆ле́емъ трꙋдѡ́въ твои́хъ.
Мольбꙋ̀ ны́нѣ сотворѝ ѻ҆́тче нїко́лае, ѡ҆ рабѣ́хъ твои́хъ: ꙗ҆́кѡ да ѡ҆ставле́нїе согрѣше́нїй прїи́мемъ, и҆ ѿ ѡ҆держа́щїѧ ско́рби и҆зба́вимсѧ, и҆ всѧ́кїѧ тѣсноты̀.
Тебѐ мо́лимъ нїко́лае, бл҃га́го хода́таѧ ко гдⷭ҇ꙋ: не ѡ҆ста́ви на́съ ст҃е без̾ застꙋпле́нїѧ. но ѻ҆бы́чною твое́ю мл҃твою сп҃са́й.
Бг҃оро́диченъ: Свѣтови́дный хрⷭ҇то́въ хра́ме, ѻ҆трокови́це бг҃обл҃года́тнаѧ, мл҃твами твои́ми, ѻ҆ц҃ꙋ̀, и҆ сн҃ꙋ, и҆ дх҃ꙋ, и҆ на́съ хра́мы сотворѝ, прпⷣбнаѧ содѣва́ющихъ.
Пѣ́снь ѕ҃
І҆рмо́съ: Ѡ҆бы́де на́съ послѣ́днѧѧ бе́здна, нѣ́сть и҆збавлѧ́ѧй, вмѣни́хомсѧ ꙗ҆́кѡ ѻ҆́вцы заколе́нїѧ, сп҃сѝ лю́ди твоѧ̑, бж҃е на́шъ: ты́ бо крѣ́пость немощствꙋ́ющихъ и҆ и҆справле́нїе.
Мре́жами слове́сными ᲂу҆лови́сте ꙗ҆зы́ки, къ ра́зꙋмꙋ ꙗ҆вле́ннагѡ назда́нїѧ человѣ́кѡвъ, ѽ бг҃обл҃же́ннїи а҆по́столи: є҆го́же прилѣ́жнѡ ѡ҆ мі́рѣ моли́те. [Два́жды.]
Дꙋшѐ моѧ̀ смире́ннаѧ, дꙋшѐ ѻ҆каѧ́ннаѧ, дꙋшѐ непока́ѧннаѧ, пока́йсѧ, и҆ возопі́й хрⷭ҇тꙋ̀: согрѣши́хъ, ѡ҆чи́сти мѧ̀ влⷣко чл҃вѣколю́бче, мл҃твами а҆пⷭ҇лъ твои́хъ, ꙗ҆́кѡ преблагі́й.
И҆́же дре́вле і҆и҃лю и҆сточи́вый во́дꙋ и҆з̾ ка́мене всеси́льне, разрѣши́ ми ѡ҆мраче́нїе хрⷭ҇тѐ, и҆ приноси́ти то́ки сле́зъ сотворѝ, мл҃твами а҆пⷭ҇лъ твои́хъ, ꙗ҆́кѡ многоми́лостивъ, да воспѣва́ю и҆ велича́ю твоѐ бл҃гоꙋтро́бїе.
Бг҃оро́диченъ: Дв҃о, и҆з̾ тебѐ за бл҃гость роди́тисѧ бл҃гоизво́лившаго ᲂу҆молѝ, ꙗ҆́кѡ творца̀ и҆ бг҃а, сп҃стѝ ѿ и҆скꙋше́нїи и҆ напа́стей, на тѧ̀ прест҃а́ѧ, всегда̀ ᲂу҆пова́нїе и҆мꙋ́щихъ.
И҆́нъ
І҆рмо́съ: Прⷪ҇ро́ка і҆ѡ́нꙋ подража́ѧ вопїю̀: живо́тъ мо́й бл҃же, свободѝ и҆з̾ тлѝ, и҆ сп҃си́ мѧ, сп҃се мі́ра, зовꙋ́ща: сла́ва тебѣ̀.
И҆мѣ́ѧй мно́жество щедро́тъ хрⷭ҇тѐ, мно́жество мои́хъ ѕѡ́лъ ѿженѝ мл҃твами нїкола́а, ѡ҆кормлѧ́ѧ мою̀ жи́знь, волна́ми грѣха̀ ѡ҆бꙋрева́емꙋю при́снѡ.
Крѣ́пкѡ врага̀ попра́лъ є҆сѝ мꙋ́дре, є҆го́же сокрꙋша́ти и҆ на́съ твои́ми мл҃твами ᲂу҆крѣпѝ нїко́лае, тобо́ю предста́телемъ бж҃е́ственнымъ ѡ҆богати́вшихсѧ.
И҆́же мѵ́рѧнѡмъ бы́въ первост҃и́тель и҆́стинный, ѡ҆благоꙋха́й на̑ша чꙋ̑вства дꙋшє́внаѧ ѻ҆́тче нїко́лае, и҆ враждꙋ́ющыѧ на ны̀ ѕлосмра̑дныѧ стра̑сти ѿгонѧ́й при́снѡ.
Бг҃оро́диченъ: Вели̑чїѧ тебѣ̀ чⷭ҇таѧ, сотворѝ хрⷭ҇то́съ: є҆го́же молѝ при́снѡ, возвели́чити въ на́съ бога̑тыѧ є҆гѡ̀ млⷭ҇ти, бг҃обл҃года́тнаѧ.
Пѣ́снь з҃
І҆рмо́съ: Тебѐ ᲂу҆́мнꙋю бцⷣе, пе́щь разсмотрѧ́емъ вѣ́рнїи: ꙗ҆́коже бо ѻ҆́троки сп҃сѐ трѝ превозноси́мый, мі́ръ ѡ҆бновѝ, во чре́вѣ твое́мъ всецѣ́лъ, хва́льный ѻ҆тцє́въ бг҃ъ, и҆ препросла́вленъ.
И҆сто́чникъ живота̀ і҆и҃съ гдⷭ҇ь сы́й, ва́съ ѡ҆ста́ви ᲂу҆ченикѝ ꙗ҆́коже рѣ́ки, вода́ми напаѧ́ющыѧ бг҃оразꙋ́мїѧ всю̀ подсо́лнечнꙋю, и҆ пою́щыѧ: хва́льный ѻ҆тцє́въ бг҃ъ и҆ препросла́вленъ. [Два́жды.]
Ѻ҆́гнь мы́сленный въ се́рдцы носѧ́ще, бж҃е́ственнꙋю бл҃года́ть хрⷭ҇то́вꙋ, пожго́сте ᲂу҆ч҃нцы̀ ве́щь безбо́жїѧ. тѣ́мже вє́щныѧ моѧ̑ стра̑сти попали́те вопїю́щагѡ: хва́льный ѻ҆тцє́въ бг҃ъ, и҆ препросла́вленъ.
Ѻ҆́гненнагѡ мꙋче́нїѧ и҆зба́ви мѧ̀ бж҃е, мл҃твами сла́вныхъ твои́хъ ᲂу҆чени̑къ, и҆ не ѿве́ржи менѐ ѿ лица̀ твоегѡ̀ гдⷭ҇и, въ покаѧ́нїи взыва́юща: хва́льный ѻ҆тцє́въ бг҃ъ, и҆ препросла́вленъ.
Бг҃оро́диченъ: Тлетво́рныхъ грѣхѡ́въ и҆ страсте́й и҆зми́ мѧ гдⷭ҇и, и҆́же нетлѣ́ннѡ роди́выйсѧ ѿ дв҃ы бг҃ома́тере, всѣ̑мъ же нетлѣ́нїе да́рꙋѧ, пѣ́сненнѡ пою́щымъ: хва́льный ѻ҆тцє́въ бг҃ъ, и҆ препросла́вленъ.
И҆́нъ
І҆рмо́съ: Сꙋ́щымъ въ пещѝ ѻ҆трокѡ́мъ твои̑мъ сп҃се, не прикоснꙋ́сѧ, нижѐ стꙋжѝ ѻ҆́гнь. тогда̀ трїѐ, ꙗ҆́кѡ є҆ди́нѣми ᲂу҆сты̀ поѧ́хꙋ и҆ бл҃гословлѧ́хꙋ, глаго́люще: бл҃гослове́нъ бг҃ъ ѻ҆тє́цъ на́шихъ.
Рачи́тельною мл҃твою твое́ю мꙋ́дре, се́рдца моегѡ̀ ᲂу҆твердѝ гле́знѣ и҆звѣ́стнѡ, на ка́мени бж҃їихъ за́повѣдей пресвѣ́тлыхъ, сп҃са́ѧ непремѣ́ннѡ нїко́лае, ѿ кова́рствъ па́костныхъ ѕлонача́льнагѡ врага̀.
Разрѣше́нїе на́мъ мно́гихъ грѣхѡ́въ и҆спросѝ, сѣ́тей жите́йскихъ и҆ нꙋ́ждныхъ, и҆ и҆скꙋше́нїй всѧ́ческихъ находѧ́щихъ, свѧще́нне нїко́лае, всѣ́хъ вѣ́рныхъ застꙋ́пниче, и҆ свѧти́телей ѡ҆снова́нїе.
И҆́же сокры́вый ра́бъ лꙋка́вый тала́нтъ, є҆го́же въ дѣ́ланїе бл҃говоспрїе́мъ а҆́зъ є҆́смь: и҆ бою́сѧ та́мошнѧгѡ сꙋди́ща, на не́мже сꙋдїѐ бж҃е всѣ́хъ, не ѡ҆сꙋдѝ менѐ, моле́нїѧ ра́ди свѧта́гѡ нїкола́а.
Бг҃оро́диченъ: Тебѐ всест҃а́ѧ, пречⷭ҇таѧ, рабѝ твоѝ всегда̀, во днѝ и҆ въ нощѝ мо́лимъ сокрꙋше́нною мы́слїю, просѧ́ще и҆збавле́нїѧ грѣхѡ́въ на́шихъ, да́ти твои́ми мл҃твами, чⷭ҇таѧ.
Пѣ́снь и҃
І҆рмо́съ: Въ пещѝ ѻ҆́троцы і҆и҃лєвы, ꙗ҆́коже въ горни́лѣ, добро́тою бл҃гоче́стїѧ чистѣ́е зла́та блеща́хꙋсѧ, глаго́люще: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те во всѧ̑ вѣ́ки.
Ꙗ҆́кѡ лꙋчы̀ со́лнце вели́кое ва́съ прострѐ во всю̀ вселе́ннꙋю, ѡ҆зарѧ́ѧ вѣ́рою пою́щихъ а҆пⷭ҇ли: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки. [Два́жды.]
Ꙗ҆́кѡ па́стырїе сꙋ́ще слове́снїи, ꙗ҆́кѡ а҆́гнцы па́стырѧ, ꙗ҆́кѡ ѻ҆́вцы а҆́гнца и҆зба́вителѧ на́шегѡ хрⷭ҇та̀, бг҃ови́дцы а҆пⷭ҇ли моли́те непреста́ннѡ, ѿ мы́сленнагѡ мѧ̀ во́лка и҆зба́вити, и҆ сп҃са́емыхъ ча́сти сподо́бити мѧ̀.
Преѻкаѧ́ннаѧ дꙋшѐ, стенѝ и҆ возопі́й гдⷭ҇еви: согрѣши́хъ па́че всѣ́хъ, и҆ беззако́нновахъ лю́тѣ: ѡ҆чи́сти и҆ сп҃си́ мѧ ꙗ҆́кѡ блꙋдни́цꙋ, ꙗ҆́кѡ мытарѧ̀, ꙗ҆́коже разбо́йника ще́дре, а҆пⷭ҇лѡвъ мл҃твами бл҃гопрїѧ́тными.
Бг҃оро́диченъ: Со а҆́гг҃лы мт҃и бж҃їѧ, со а҆пⷭ҇лы, и҆ мч҃нки, и҆ со прⷪ҇ро́ки ᲂу҆молѝ хрⷭ҇та̀, сп҃стѝ взыва́ющыѧ: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки.
И҆́нъ
І҆рмо́съ: Є҆гѡ́же ᲂу҆жаса́ютсѧ а҆́гг҃ли, и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте сщ҃е́нницы, просла́вите ѻ҆́троцы, бл҃гослови́те лю́дїе, и҆ превозноси́те во всѧ̑ вѣ́ки.
На горѣ̀ стоѧ̀ бж҃е́ственныхъ добродѣ́телей, концє́мъ зна́емь чꙋде́съ высо́кихъ, нїко́лае, ꙗ҆ви́лсѧ є҆сѝ показа́ньми: тѣ́мже всѧ́къ ꙗ҆зы́къ почита́етъ тѧ̀ во всѧ̑ вѣ́ки.
Вкꙋси́въ прпⷣбне бж҃е́ственныѧ сла́дости, го́ресть возненави́дѣлъ є҆сѝ страсте́й и҆ сласте́й: ѿ ни́хже на́съ и҆зба́ви молѧ̀ хрⷭ҇та̀, востаю́щыѧ бѣды̀ ᲂу҆толи́ти.
Ꙗ҆́кѡ сто́лпъ непоколеби́мь, и҆ ᲂу҆твержде́нїе вѣ́рныхъ, при́снѡ мѧ̀ коле́блема жите́йскими ѕло́бами, и҆ бѣсо́вскими дохнове́нїи, ᲂу҆крѣпѝ всебл҃же́нне нїко́лае, моли́твами твои́ми.
Бг҃оро́диченъ: Оу҆врачꙋ́й пречⷭ҇таѧ стра̑сти се́рдца моегѡ̀, ро́ждшаѧ всѣ́хъ врача̀, и҆ првⷣныхъ ча́сти ꙗ҆ви́ мѧ прича́стника, дв҃о, хрⷭ҇та̀ ᲂу҆моли́вши.
Та́же пое́мъ пѣ́снь бцⷣѣ: Вели́читъ дꙋша̀ моѧ̀ гдⷭ҇а: И҆ покло́ны.
Пѣ́снь ѳ҃
І҆рмо́съ: Ѡ҆́бразъ чи́стагѡ ржⷭ҇тва̀ твоегѡ̀, ѻ҆гнепали́маѧ кꙋпина̀ показа̀ неѡпа́льнаѧ: и҆ ны́нѣ на на́съ напа́стей свирѣ́пѣющꙋю ᲂу҆гаси́ти мо́лимсѧ пе́щь, да тѧ̀ бцⷣе непреста́ннѡ велича́емъ.
Бж҃е́ственнїи ст҃а́гѡ дх҃а, и҆ свѣтоза́рнїи свѣти́льницы показа́стесѧ, свѣтозаре́нїемъ честна́гѡ и҆ премꙋ́драгѡ проповѣ́данїѧ бл҃же́ннїи, просвѣти́сте всю̀ вселе́ннꙋю, тьмꙋ̀ і҆́дѡльскꙋю ѿгна́вше. [Два́жды.]
Бж҃е́ственнагѡ мы́сленнагѡ вїногра́да ло́зїе бы́вше, бж҃е́ственное гро́здїе возрасти́сте, и҆сточа́юще сп҃си́тельное вїно̀ сла́внїи а҆пⷭ҇ли. тѣ́мже мѧ̀ ѿ пїѧ́нства сласте́й и҆зба́вите.
Трепе́щꙋ ѻ҆каѧ́нный помышлѧ́ѧ стра́шное ѻ҆́но хрⷭ҇тѐ мо́й сꙋди́ще твоѐ, дѣѧ́ньми бо стꙋ́дными и҆ скве́рными ны́нѣ ѡ҆бложе́нъ є҆́смь, и҆ пре́жде сꙋда̀ ѡ҆сꙋжде́нъ: тѣ́мже мѧ̀ а҆пⷭ҇лъ твои́хъ мл҃твами ᲂу҆ще́дри.
Бг҃оро́диченъ: Є҆ди́на человѣ́ки ѡ҆божи́ла є҆сѝ, воплоще́нно сло́во поро́ждши: є҆го́же молѝ со а҆пⷭ҇лы и҆ мч҃нки пречⷭ҇таѧ, дв҃о всенепоро́чнаѧ, ѡ҆ на́съ вѣ́рою ᲂу҆бл҃жа́ющихъ и҆ чтꙋ́щихъ тѧ̀.
И҆́нъ
І҆рмо́съ: Свѣтоно́сный ѻ҆́блакъ, во́ньже всѣ́хъ влⷣка, ꙗ҆́кѡ до́ждь съ нб҃сѐ на рꙋно̀ сни́де, и҆ воплоти́сѧ на́съ ра́ди, бы́въ чл҃вѣ́къ, безнача́льный, велича́емъ всѝ ꙗ҆́кѡ мт҃рь бг҃а на́шегѡ чи́стꙋю.
Ꙗ҆́кѡ хрⷭ҇то́ва ст҃и́телѧ, ꙗ҆́кѡ свѣтоза́рнꙋю ѕвѣздꙋ̀, ꙗ҆́кѡ чꙋде́съ самодѣ́йственника, ꙗ҆́кѡ и҆сто́чника и҆сцѣле́нїй, ꙗ҆́кѡ сꙋ́щымъ въ ско́рбехъ помо́щника, ꙗ҆́кѡ и҆зба́вителѧ теплѣ́йша призыва́ющымъ тѧ̀ въ бѣда́хъ ѻ҆́тче, восхвалѧ́емъ пѣ́сньми сщ҃е́нными.
Тѧ̀ па́стырѧ вели́каго, и҆ подража́телѧ во все́мъ нача́льнагѡ па́стырѧ хрⷭ҇та̀, прилѣ́жнѡ мо́лимъ нїко́лае: ѿ высо́тъ сщ҃е́нныхъ ᲂу҆пасѝ рабы̑ твоѧ̑, и҆ и҆збавлѧ́й ѿ всѣ́хъ жите́йскихъ напа́стей всегда̀.
Оу҆жѐ коне́цъ приближа́етсѧ, что̀ лѣни́шисѧ, ѽ дꙋшѐ моѧ̀; почто̀ не тщи́шисѧ бг҃ови бл҃гоꙋго́днѡ пожи́ти; потщи́сѧ и҆ возни́кни про́чее, и҆ возопі́й: чл҃вѣколю́бче, ᲂу҆ще́дри мѧ̀, нїкола́а мл҃твами ѡ҆кормлѧ́ѧ мою̀ жи́знь, ꙗ҆́кѡ бл҃гъ.
Бг҃оро́диченъ: Ꙗ҆́же свѣ́тъ ро́ждшаѧ бж҃е́ственный, ѡ҆мраче́наго мѧ̀ всѣ́ми прило́ги лꙋка́вагѡ, и҆ во ᲂу҆ны́нїи живꙋ́ща, и҆ прогнѣ́вающа бг҃а, просвѣтѝ всенепоро́чнаѧ, и҆ наста́ви къ дѡ́брымъ дѣ́ланїємъ, ꙗ҆́кѡ вина̀ сꙋ́щи всѣ́хъ до́брыхъ.
Та́же, Досто́йно є҆́сть: И҆ покло́нъ. Є҆ктенїа̀ ма́лаѧ, и҆ свѣти́ленъ, и҆ ѱалмы̀ ѻ҆бы́чны.
На стїхо́внѣ стїхи̑ры а҆по́стольски. Гла́съ а҃:
А҆пⷭ҇ли сла́внїи, просвѣти́вше вселе́ннꙋю, при́снѡ бг҃а моли́те, сп҃сти́сѧ дꙋша́мъ на́шымъ.
Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ, во всѧ̑ дни̑ на́шѧ возвесели́хомсѧ, за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.
Петра̀ и҆ па́ѵла согла́снѡ похва́лимъ: лꙋкꙋ̀, матѳе́а, ма́рка, і҆ѡа́нна, а҆ндре́а, ѳѡмꙋ̀, варѳоломе́а, сі́мѡна канані́та, і҆а́кѡва и҆ фїлі́ппа, и҆ ве́сь ли́къ ᲂу҆чени́ческїй досто́йнѡ да восхва́лимъ.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Мч҃нченъ: Весели́тесѧ мч҃нцы ѡ҆ гдⷭ҇ѣ, ꙗ҆́кѡ по́двигомъ до́брымъ подвиза́стесѧ: проти́вистесѧ царє́мъ, и҆ мꙋчи́телей побѣди́сте: ѻ҆гнѧ̀ и҆ меча̀ не ᲂу҆страши́стесѧ, и҆ ѕвѣре́й ди́вїихъ снѣда́ющихъ тѣлеса̀ ва̑ша: хрⷭ҇тꙋ̀ со а҆́гг҃лы пѣ́снь возсыла́юще, съ нб҃сѐ вѣнцы̀ прїѧ́сте: проси́те дарова́ти мі́рꙋ ми́ръ, и҆ дꙋша́мъ на́шымъ ве́лїю млⷭ҇ть.
Сла́ва, и҆ ны́нѣ, бг҃оро́диченъ: Ра́дꙋйсѧ бцⷣе дв҃о, ра́дꙋйсѧ похвало̀ всеѧ̀ вселе́нныѧ, ра́дꙋйсѧ пречⷭ҇таѧ мт҃и бж҃їѧ бл҃гослове́ннаѧ.
Та́же, Бл҃го є҆́сть и҆сповѣ́датисѧ гдⷭ҇еви: Трист҃о́е и҆ по Ѻ҆́ч҃е на́шъ: тропа́рь. Посе́мъ є҆ктенїа̀, и҆ ѿпꙋ́стъ. Та́же ча́съ пе́рвый, и҆ ѱалмы̀ ѻ҆бы̑чныѧ, и҆ коне́чный ѿпꙋ́стъ.
Въ четверто́къ бл҃жє́нны. Гла́съ а҃:
Снѣ́дїю и҆зведѐ и҆з̾ раѧ̀ вра́гъ а҆да́ма: крⷭ҇то́мъ же введѐ хрⷭ҇то́съ во́нь разбо́йника, помѧни́ мѧ гдⷭ҇и, вопїю́ща, є҆гда̀ прїи́деши во црⷭ҇твїи твое́мъ.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Концы̀ просвѣти́вше бж҃е́ственными лꙋча́ми ᲂу҆че́нїй ва́шихъ, ѡ҆мраче́нїе лю́тагѡ безбо́жїѧ разори́ли є҆стѐ, и҆ къ свѣ́тꙋ незаходи́момꙋ прише́дше, при́снѡ бл҃жи́ми є҆стѐ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ на вы̀ лжꙋ́ще менѐ ра́ди.
Ѻ҆́ч҃ескꙋю ѵ҆поста́снꙋю и҆мѣ́вше премꙋ́дрость, ᲂу҆ч҃нцы̀ хрⷭ҇тѡ́вы, всѣ́хъ ва́съ ᲂу҆мꙋдрѧ́ющꙋю, бꙋ́йствомъ проповѣ́данїѧ мі́ръ ᲂу҆мꙋдри́ли є҆стѐ, и҆ къ ра́зꙋмꙋ бж҃е́ственномꙋ приведо́сте.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Мч҃нченъ: Мꙋ́ки претерпѣ́вше, ꙗ҆́коже безпло́тнїи хрⷭ҇тѡ́вы страда́льцы, и҆ всѧ̑ безплѡ́тныѧ врагѝ крѣ́пкѡ побѣди́ли є҆стѐ. тѣ́мъ бл҃жи́ми є҆стѐ во вѣ́ки досто́йнѡ, всехва́льнїи.
Сла́ва: Трⷪ҇цѣ поклони́мсѧ, со ѻ҆ц҃е́мъ сн҃ꙋ, и҆ дх҃ꙋ пра́вомꙋ вѣ́рнїи, нераздѣ́льнѣй, и҆ неразлꙋ́чнѣй, и҆ сопресто́льнѣй є҆ди́ницѣ, вопїю́ще: ст҃ъ, ст҃ъ, ст҃ъ є҆сѝ, трⷪ҇це всечестна́ѧ.
И҆ ны́нѣ: Бл҃жи́мъ тѧ̀ пречⷭ҇таѧ, ꙗ҆́коже прорекла̀ є҆сѝ, бг҃а во во пло́ти родила̀ є҆сѝ, є҆го́же проповѣ́да ли́къ а҆по́стольскїй: съ ни́миже и҆спросѝ на́мъ прегрѣше́нїй разрѣше́нїе, всепѣ́таѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.