← претходни дан | Минеј — Јул | следећи дан →
30 июля: Предпразднество происхождения честного Креста Господня. Праведного Евдокима
Мѣ́сѧца тогѡ́же въ л҃а-й де́нь.
Предпра́зднство происхожде́нїѧ честна́гѡ и҆ животворѧ́щагѡ крⷭ҇та̀ гдⷭ҇нѧ.
И҆ ст҃а́гѡ и҆ пра́веднагѡ є҆ѵдокі́ма.
Стїхи̑ры, крⷭ҇та̀, гла́съ а҃. Подо́бенъ: Нбⷭ҇ныхъ чинѡ́въ:
Всѧ́кое є҆стество̀ человѣ́ческое ꙳ ны́нѣ предпра́зднꙋѧ, ра́достнѡ да и҆гра́етъ: ꙳ крⷭ҇тное бо дре́во хо́щетъ предположи́тисѧ, ꙳ всѣ̑мъ вѣ̑рнымъ врачевство̀ неиждива́емое, ꙳ и҆ недꙋ́гѡвъ рѣши́тельно и҆ страсте́й, ꙳ и҆ всѧ́кагѡ ѡ҆ѕлобле́нїѧ.
Прїиди́те, ви́димъ вѣ́рнїи стра́нное чꙋ́до, ꙳ ка́кѡ крⷭ҇тное дре́во ꙳ ᲂу҆ставлѧ́етъ ѡ҆пале́нїе всѧ́кагѡ недꙋ́га, ꙳ и҆ страсте́й зно́й ᲂу҆гаша́етъ, ꙳ предпра́зднꙋющихъ вѣ́рою, ꙳ и҆ тогѡ̀ почита́ющихъ торжество̀.
Живꙋ́щїи вкꙋ́пѣ, ꙳ и҆ ᲂу҆ме́ршїи предпра́зднꙋйте: ꙳ жи́зни бо дре́во є҆́же а҆́да ᲂу҆мори́вшее, ꙳ храни́тель человѣ́кѡвъ, ꙳ ме́ртвыхъ воскресе́нїе ꙳ грѧде́тъ всѣ̑мъ незави́стнꙋю бл҃года́ть ꙳ ны́нѣ пода́ти, ꙳ человѣ́кѡмъ и҆сцѣлє́нїѧ.
И҆́ны стїхи̑ры ст҃а́гѡ, гла́съ и҃. Подо́бенъ: Ѽ пресла́внагѡ чꙋдесѐ:
Бл҃же́нне бг҃омꙋ́дре є҆ѵдокі́ме, ꙳ чи́стаѧ твоѧ̀ дꙋша̀, ꙳ правовѣ́рнымъ смы́сломъ сїѧ́ющи, ꙳ ѡ҆блиста́ѧ добродѣ́телей свѣ́тлостїю, ꙳ и҆ ѡ҆зарѧ́етъ вѣ́рныхъ и҆сполне́нїе, ꙳ бѣсѡ́въ тмꙋ̀ ѿгонѧ́ющи. ꙳ тѣ́мже, ꙗ҆́кѡ прича́стника невече́рнїѧ благода́ти, ꙳ тѧ̀ благоче́стнѡ всѝ ꙳ почита́емъ, досточꙋ́дне.
И҆мѣ́ѧ дꙋ́шꙋ ми́лостивꙋ, и҆ чи́стъ по́мыслъ, ꙳ и҆ се́рдце бо́дрое, ꙳ вѣ́рꙋ небла́зненнꙋю, ꙳ и҆ любо́вь вои́стиннꙋ нелицемѣ́рнꙋю, ꙳ ѿ землѝ преста́вилсѧ є҆сѝ къ нбⷭ҇нымъ, ꙳ и҆ съ ли́ки пра́ведныхъ водворѧ́ешисѧ. ꙳ тѣ́мже чти́мъ тѧ̀ свѧще́нными пѣ́сньми, ꙳ и҆ благочести́внѡ всѝ ᲂу҆блажа́емъ, ꙳ блаже́нне є҆ѵдокі́ме.
Бжⷭ҇твенными ᲂу҆че́нїи ᲂу҆крѣплѧ́ѧсѧ, ꙳ стра̑сти плотскі́ѧ ѿ дꙋшѝ ѿгна́лъ є҆сѝ, ꙳ и҆ ст҃ы́ѧ трⷪ҇цы селе́нїе чи́сто бы́лъ є҆сѝ. ꙳ тѣ́мже къ бжⷭ҇твенномꙋ наслажде́нїю ѿше́лъ є҆сѝ, ꙳ бг҃ꙋ соблюда́ющꙋ ны́нѣ нерꙋши́мо ꙳ твоѐ, бл҃же́нне, тѣ́ло, ꙳ бжⷭ҇твенными сꙋдьба́ми, ꙳ и҆́миже са́мъ вѣ́сть, ꙳ прославлѧ́ѧй тѧ̀ ꙗ҆́вѣ, є҆ѵдокі́ме.
Сла́ва, гла́съ а҃.
Ка́кѡ не диви́мсѧ благоꙋ́мїю твоемꙋ̀; и҆лѝ не похва́лимъ, прпⷣбне є҆ѵдокі́ме, житїѐ твоѐ равноа́гг҃льное; по́мысла цѣломꙋ́дрїю, кро́тости твое́й, и҆ смире́нїю, и҆ безмо́лвїю, и҆ ми́лостыни непреста́ннѣй; всѣ́ми бо добродѣ́тельми ᲂу҆краси́лсѧ є҆сѝ, бл҃же́нне: тѣ́мже жде́тъ тебѐ неизглаго́ланнаѧ ра́дость, и҆ нбⷭ҇ное црⷭ҇твїе.
И҆ ны́нѣ, гла́съ то́йже:
Дне́сь ꙗ҆́кѡ вои́стиннꙋ свѧтовѣща́нный глаго́лъ дв҃довъ коне́цъ прїѧ́тъ: се́ бо ꙗ҆́вѣ пречⷭ҇тыхъ но́гъ твои́хъ покланѧ́емсѧ подно́жїю, и҆ на сѣ́нь крилꙋ̀ твоє́ю надѣ́ющесѧ, всеще́дрый, вопїе́мъ тѝ: да зна́менаетсѧ на на́съ свѣ́тъ лица̀ твоегѡ̀. правосла́вныхъ люде́й твои́хъ ро́гъ вознесѝ честна́гѡ крⷭ҇та̀ твоегѡ̀ воздви́женїемъ, хрⷭ҇тѐ многоми́лостиве.
На стїхо́внѣ ѻ҆ктѡ́иха. Сла́ва, и҆ ны́нѣ, гла́съ в҃: Самогла́сенъ:
Ты́ ми покро́въ держа́венъ є҆сѝ, трича́стный крⷭ҇те хрⷭ҇то́въ: ѡ҆свѧти́ мѧ си́лою твое́ю, ꙗ҆́кѡ да вѣ́рою и҆ любо́вїю покланѧ́юсѧ и҆ сла́влю тѧ̀.
Тропа́рь ст҃а́гѡ, гла́съ д҃:
Ѿ землѝ воззва́вый тѧ̀ къ нбⷭ҇нымъ селе́нїємъ, соблюда́етъ и҆ по сме́рти невреди́мо тѣ́ло твоѐ, свѧ́те є҆ѵдокі́ме: ты́ бо въ цѣломꙋ́дрїи, и҆ чи́стомъ жи́тельствѣ, блаже́нне, жи́тельствовалъ є҆сѝ, не ѡ҆скверни́въ пло́ти. тѣ́мже со дерзнове́нїемъ молѝ хрⷭ҇та̀ бг҃а, спасти́сѧ на́мъ.
Сла́ва, и҆ ны́нѣ, тропа́рь креста̀, гла́съ а҃:
Спасѝ, гдⷭ҇и, лю́ди твоѧ̑, и҆ благословѝ достоѧ́нїе твоѐ, побѣ̑ды на сопроти̑вныѧ да́рꙋѧ, и҆ твоѐ сохранѧ́ѧ кресто́мъ твои́мъ жи́тельство.
На ᲂу҆́трени на Бг҃ъ гдⷭ҇ь тропа́рь креста̀ два́жды: Сла́ва, ст҃а́гѡ: И҆ ны́нѣ, креста̀. Канѡ́нъ ѻ҆ктѡ́иха є҆ди́нъ: и҆ креста̀ на д҃ и҆ ст҃а́гѡ на д҃ Канѡ́нъ крⷭ҇та̀.
Гла́съ а҃. Пѣ́снь а҃. І҆рмо́съ:
Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ спа́сшемꙋ і҆и҃лѧ, ꙗ҆́кѡ просла́висѧ.
Крⷭ҇тъ предгрѧды́й бжⷭ҇твенный, и҆спꙋща́етъ зарю̀ бл҃года́ти, и҆ просвѣща́етъ всѧ̑ покланѧ́ющыѧсѧ є҆мꙋ̀, и҆ воспѣва́ющыѧ благоче́стнѡ распе́ншагосѧ хрⷭ҇та̀.
Крⷭ҇та̀ покланѧ́нїе возвыша́етъ любо́вїю и҆ вѣ́рою сла́вѧщыѧ, ꙗ҆́кѡ бг҃а и҆ гдⷭ҇а пострада́вшаго пло́тїю, и҆ назда́вшаго на́съ бжⷭ҇твенными страда́нїи.
Крⷭ҇та̀ покланѧ́нїе и҆сточа́етъ благово́нїе дарова́нїй, и҆ всѧ̑ ꙗ҆̀же хрⷭ҇та̀ сла́вѧщыѧ ѡ҆б̾юха́етъ при́снѡ, и҆ смра́дъ дꙋ́шъ ѿе́млетъ ве́сь.
Бг҃оро́диченъ:
Позна́вше гдⷭ҇и, вопло́щшагосѧ и҆зъ тебє̀, бг҃оневѣ́сто, и҆ крⷭ҇тъ и҆ сме́рть прїе́мша, пое́мъ є҆го̀ и҆зба́вителѧ, тѧ̀ ᲂу҆блажа́юще.
Канѡ́нъ ст҃а́гѡ.
Гла́съ в҃. Пѣ́снь а҃. І҆рмо́съ:
Во глꙋбинѣ̀ посла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.
Высоко̀ житїѐ и҆мѣ́ѧ, и҆ восхожде́нїи бжⷭ҇твенными ве́сь свѣ́телъ бы́въ, просвѣще́нїе мѝ и҆спросѝ, восхвалѧ́ющемꙋ честны́ѧ твоѧ̑ по́двиги: и҆́миже до́брѣ пожи́въ, полꙋчи́лъ є҆сѝ, є҆ѵдокі́ме, и҆́хже надѣ́ѧлсѧ є҆сѝ.
Мѷровѡ́ннаѧ любѧ̀ ᲂу҆чє́нїѧ, и҆ во чте́нїи свѧще́нныхъ писа́нїй ᲂу҆пражнѧ́ѧсѧ, сласте́й ᲂу҆клони́лсѧ є҆сѝ, всебл҃же́нне, смра́дныхъ и҆ безче́стныхъ, и҆ ѡ҆благово́нилсѧ є҆сѝ, бжⷭ҇твенными дарова̑нїи ᲂу҆краша́емь.
Дрема́нїе ѻ҆́чїю ѿ дꙋшѝ, блаже́нне, ѿгна́лъ є҆сѝ, бдѧ̀ и҆ бг҃ꙋ приединѧ́ѧсѧ, всено́щными стоѧ̑нїи, непрекло́ненъ нꙋ́ждами є҆стества̀: тѣ́мже ко дню̀ невече́рнемꙋ дости́глъ є҆сѝ.
Бг҃оро́диченъ:
Ꙗ҆́кѡ черто́гъ ѡ҆дꙋшевле́нъ бж҃їй, и҆ кади́льницꙋ мы́сленнагѡ и҆ свѣтоно́снагѡ ᲂу҆́глѧ, при́снѡ благода́тнꙋю ᲂу҆блажа́емъ бцⷣꙋ, зовꙋ́ще: ра́дꙋйсѧ, хода́таице спаси́тельнагѡ воскресе́нїѧ.
Пѣ́снь г҃. І҆рмо́съ:
Да ᲂу҆тверди́тсѧ се́рдце моѐ, въ во́ли твое́й, хрⷭ҇тѐ бж҃е, и҆́же надъ вода́ми не́бо ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне.
И҆́же во ѻ҆́бразѣхъ проначерта́емый соверша́ѧ пресла́внаѧ чꙋдеса̀, ны́нѣ покланѧ́емый крⷭ҇тъ, дѣ́йствꙋетъ чꙋ̑днѣйшаѧ, ѡ҆свѧща́ѧ и҆ просвѣща́ѧ, зижди́телѧ сла́вѧщыѧ.
И҆́же во бране́хъ бжⷭ҇твеннаѧ побѣ́да, крⷭ҇тъ хрⷭ҇то́въ покланѧ́емь, ѡ҆полчє́нїѧ врагѡ́въ побѣжда́ѧй, подава́етъ лю́демъ правосла̑внымъ крѣ̑пкїѧ побѣ̑ды.
Же́злъ гдⷭ҇ень предположе́нный крⷭ҇тъ во хра́мѣхъ и҆ жили́щахъ, ѡ҆снова̑нїѧ незы́блєма си́хъ соблюда́етъ, и҆ всѧ́къ прило́гъ и҆ кова́рство сопроти́вныхъ побѣжда́етъ.
И҆́же гдⷭ҇ень покланѧ́емый крⷭ҇тъ благоче́стнѡ, бжⷭ҇твенныѧ бл҃года́ти, и҆ каже́нїѧ мы́сленна и҆сполнѧ́етъ покланѧ́ющыѧсѧ є҆мꙋ̀, и҆ ѻ҆́блаки напа́стей ѿе́млетъ и҆ скорбе́й.
Бг҃оро́диченъ:
Ѿ глꙋбины̀ ле́стныѧ и҆звлечѐ человѣ́чество, и҆зъ тебє̀ рожде́йсѧ, дре́вомъ крⷭ҇тнымъ, бцⷣе, и҆ возвы́си къ разꙋмѣ́нїю своемꙋ̀, благоче́стнѡ тѧ̀ сла́вѧщыѧ.
И҆́нъ. І҆рмо́съ:
На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.
Глаго́лѡмъ животѡ́чнымъ внима́ѧ, и҆спи́лъ є҆сѝ во́дꙋ спасе́нїѧ, возгнꙋша́всѧ го́рькагѡ грѣха̀, и҆ поѧ̀ глаго́лалъ є҆сѝ бг҃ꙋ, є҆ѵдокі́ме: ꙗ҆́кѡ нѣ́сть свѧ́тъ па́че тебє̀, гдⷭ҇и.
Ми́лованїе стѧжа́лъ є҆сѝ хрⷭ҇топодража́тельное, разда́лъ є҆сѝ бога́тство тре́бꙋющымъ, небе́сное же бога́тство хода́тайствꙋющее тебѣ̀ полꙋчи́лъ є҆сѝ, вопїѧ̀, є҆ѵдокі́ме: ꙗ҆́кѡ нѣ́сть свѧ́тъ па́че тебє̀, гдⷭ҇и.
Присво́ивсѧ зижди́телю любо́вїю бжⷭ҇твенною, прїѧ́лъ є҆сѝ нбⷭ҇ное наслѣ́дїе, и҆ дре́ва живо́тнагѡ прича́стникъ є҆сѝ, ѻ҆бще́нїемъ ѡ҆божа́емь, и҆ поѧ̀, сла́вне, глаго́лалъ є҆сѝ: ꙗ҆́кѡ нѣ́сть свѧ́тъ па́че тебє̀, гдⷭ҇и.
Бг҃оро́диченъ:
Сꙋ́щи а҆́гг҃лъ честнѣ́йши, зижди́телѧ а҆́гг҃лѡвъ во ᲂу҆тро́бѣ носи́ла є҆сѝ, и҆ родила̀ є҆сѝ неизрече́ннѡ. є҆мꙋ́же всѝ пое́мъ: ты̀ є҆сѝ бг҃ъ на́шъ, и҆ нѣ́сть свѧ́тъ па́че тебє̀, гдⷭ҇и.
Сѣда́ленъ ст҃а́гѡ, гла́съ д҃:
Благоволи́въ благи́ми дѣѧ́нїи и҆скꙋси́лсѧ є҆сѝ ꙗ҆́кѡ зла́то въ пещѝ, напа́стьми, є҆ѵдокі́ме сла́вне. тѣ́мже и҆ по сме́рти и҆сточа́еши бога́тнѡ чꙋдеса̀ ꙗ҆́кѡ во́ды, и҆ недꙋ́ги ᲂу҆ставлѧ́еши, ѡ҆ на́съ при́снѡ молѧ́сѧ, ꙗ҆́кѡ да согрѣше́нїй проще́нїе прїи́мемъ.
Сла́ва, и҆ ны́нѣ, крⷭ҇та̀, гла́съ д҃: Подо́бенъ: Вознесы́йсѧ:
Свѣ́тло нб҃о показꙋ́етсѧ па́че со́лнца, свѣ́томъ кре́стнымъ просвѣща́етъ всѧ́чєскаѧ заре́ю свое́ю: тѣ́мже ты̀, чл҃вѣколю́бче, сп҃се всѧ́ческихъ, просвѣтѝ ᲂу҆́мъ на́шъ є҆гѡ̀ ра́ди и҆ чꙋ̑вства: мы́ бо и҆́мамы того̀, ѻ҆рꙋ́жїе мі́рꙋ, непобѣди́мꙋю побѣ́дꙋ.
Пѣ́снь д҃. І҆рмо́съ:
Дх҃омъ прови́дѧ, прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ, вопїѧ̀: внегда̀ прибли́житисѧ лѣ́тѡмъ, позна́ешисѧ, внегда̀ прїитѝ вре́мени, пока́жешисѧ. сла́ва си́лѣ твое́й, гдⷭ҇и.
Воѡбража́емь бжⷭ҇твенный и҆ честны́й крⷭ҇тъ, тмы̀ нача́льника ѿгонѧ́етъ тве́рдѡ ѿ воздꙋ́ха, и҆ благода́ти лꙋчы̀ воѡбража́ющымъ простира́етъ, и҆ ѡ҆зарѧ́етъ си́хъ пою́щыѧ хрⷭ҇та̀ бг҃а.
Воѡбража́емь бжⷭ҇твенный и҆ пречестны́й крⷭ҇тъ въ сердца́хъ, мо́ре ᲂу҆тиша́етъ страсте́й, и҆ ᲂу҆ставлѧ́етъ бѣ́дъ треволнє́нїѧ, и҆ въ тишинꙋ̀ прево́дитъ пра́вости, всѧ̑ любо́вїю воѡбража́ющыѧ того̀.
Ꙗ҆́коже ᲂу҆́глїе и҆спꙋща́ѧ чⷭ҇тны́й крⷭ҇тъ, дѣ̑йствїѧ всѧ̀ попалѧ́етъ вра̑жїѧ, и҆ ѿго́нитъ си́лꙋ, и҆ ѡ҆блегча́етъ мнѡ́гїѧ въ вѣ́рѣ, хва́лѧщыѧ и҆ пою́щыѧ любо́вїю, на не́мъ пригво́ждшагосѧ хрⷭ҇та̀.
Всечестны́й и҆ бжⷭ҇твенный крⷭ҇тъ вѣ́рою покланѧ́емь, и҆сточа́етъ стрꙋи̑ мы́слєнныѧ дарова́нїй и҆ во́ды и҆сцѣле́нїй, и҆ напаѧ́етъ непреста́ннѡ семꙋ̀ покланѧ́ющыѧсѧ и҆ чтꙋ́щыѧ.
Бг҃оро́диченъ:
Ꙗ҆́кѡ всѣ́хъ цр҃и́цꙋ и҆ влⷣчцꙋ на́шꙋ, тѧ̀ любо́вїю сла́вимъ, прест҃а́ѧ чⷭ҇таѧ, просвѣ́щшїисѧ стрⷭ҇тьмѝ сн҃а твоегѡ̀, и҆ позна́вшїи сего̀ всѣ̑мъ бл҃годѣ́телѧ: сла́ва бл҃года́ти є҆гѡ̀.
И҆́нъ. І҆рмо́съ:
Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.
Оу҆чє́нїѧ ѻ҆те́чєскаѧ хранѧ̀ невреди́мѡ правосла́внымъ мꙋдрова́нїемъ, ты̀ ѿ младе́нства и҆мѣ́лъ є҆сѝ житїѐ нескве́рное, и҆ ми́лостивенъ нра́въ, досточꙋ́дне.
Ни молва̀ мїрска́ѧ, ни вла́сти держа́нїе, ни сла́ва вре́меннаѧ, твоегѡ̀ къ бг҃ꙋ жела́нїѧ превратѝ, є҆ѵдокі́ме: но благоволи́лъ є҆сѝ вои́стиннꙋ бжⷭ҇твеннымъ дѣѧ́нїемъ.
Возвыша́емь бжⷭ҇твенными поꙋче́нїи всегда̀, врага̀ смири́лъ є҆сѝ, и҆сцѣле́нїй дѣ́йство прїѧ́лъ є҆сѝ, є҆ѵдокі́ме, сꙋдо́мъ првⷣнымъ всѧ̑ ᲂу҆правлѧ́ющагѡ.
И҆ска́пающи сла́дость ра́ка моще́й твои́хъ бога́тыхъ и҆сцѣле́нїй, стра̑сти ѿгонѧ́етъ, є҆ѵдокі́ме, вѣ́рою чтꙋ́щихъ тѧ̀, и҆ попалѧ́етъ бѣсѡ́въ всѧ̑ полкѝ.
Бг҃оро́диченъ:
Всепѣ́таѧ, во́инствы го́рними пѣва́емаго, бг҃а родила̀ є҆сѝ, чл҃вѣ́ка вои́стиннꙋ бы́вша: є҆го́же ѡ҆ рабѣ́хъ твои́хъ молѧ́щи не преста́й, приснодв҃о.
Пѣ́снь є҃. І҆рмо́съ:
Свѣ́тлый на́мъ возсїѧ́й свѣ́тъ присносꙋ́щный, ᲂу҆́тренюющымъ ѡ҆ сꙋдьба́хъ за́повѣдей твои́хъ, влⷣко чл҃вѣколю́бче, хрⷭ҇тѐ бж҃е на́шъ.
Держа́вномꙋ на́шемꙋ, и҆ недви́жимомꙋ ѻ҆рꙋ́жїю предлежа́щꙋ, ны́нѣ покланѧ́ющесѧ, пресвѧто́мꙋ крⷭ҇тꙋ̀ вѣ́рою, си́лꙋ непобѣди́мꙋ на врагѝ прїе́млемъ.
Воѡбража́емаго и҆ несѣко́маго ка́мене, сотво́рша во́дꙋ и҆сточи́ти, ны́нѣ держа́ще, и҆ покланѧ́ющесѧ честно́мꙋ крⷭ҇тꙋ̀, и҆сто́чникъ дарова́нїй прїе́млемъ.
Златосїѧ́ненъ на́мъ крⷭ҇тъ хрⷭ҇то́въ ꙗ҆влѧ́ѧсѧ, дарова̑нїѧ дꙋша́мъ подава́етъ благода́тїю, покланѧ́ющымсѧ є҆мꙋ̀, и҆ гдⷭ҇а и҆ бг҃а пою́щымъ при́снѡ.
Бг҃оро́диченъ:
Же́злъ си́лы, бг҃оневѣ́сто, вѣ́рою держа́ще, сн҃а твоегѡ̀ и҆ бг҃а на́шегѡ крⷭ҇тъ, пое́мъ тѧ̀ цр҃и́цꙋ всѣ́хъ ᲂу҆блажа́юще.
И҆́нъ. І҆рмо́съ:
Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й: къ тебѣ̀ ᲂу҆́тренюю, цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо ра́звѣ тебє̀ бг҃а не зна́ю.
Заре́ю чи́стѡ ст҃ы́ѧ трⷪ҇цы просвѣще́нъ, зако́номъ же сеѧ̀ ѡ҆гражде́нъ, но́щь житїѧ̀ непреткнове́ннѡ преминꙋ́лъ є҆сѝ, видѣ́нїи бжⷭ҇твенными ѡ҆крилѧ́емь, блаже́нне, и҆ въ бжⷭ҇твеннꙋю жи́знь всели́лсѧ є҆сѝ.
Ны́нѣ на тебѣ̀ чꙋ́до ве́лїе зри́тсѧ, и҆ ᲂу҆́жаса и҆спо́лнено, ка́кѡ по погребе́нїи вои́стиннꙋ мно́гѡ лѣ́тъ соблюде́сѧ, нерꙋши́мо, бл҃же́нне, твоѐ тѣ́ло во гро́бѣ лежа́щее, сꙋдьба́ми, и҆́миже вѣ́сть са́мъ прославлѧ́ѧй тѧ̀.
Бла́гоже твоемꙋ̀ къ бг҃ꙋ дерзнове́нїю, бла́гоже жела́нїю, є҆́же въ се́рдцы къ немꙋ̀ и҆мѣ́лъ є҆сѝ, бла́гѡ пожи́въ тезоиме́ннѡ, просїѧ́лъ є҆сѝ пресла́внѡ бжⷭ҇твенными свѣтлостьмѝ, и҆ ᲂу҆ѧсни́лъ є҆сѝ вѣ́рныхъ совокꙋплє́нїѧ.
Бг҃оро́диченъ:
Ѡ҆ на́съ и҆зъ тебє̀ воплоще́ннаго, дв҃о мт҃и, всегда̀ молѝ, благоче́стнѡ тѧ̀ блажа́щихъ, и҆зба́витисѧ бѣ́дъ, и҆ дꙋшетлѣ́нныхъ страсте́й и҆ печа́лей, и҆ вѣ́чнꙋющагѡ пла́мене мꙋче́нїѧ.
Пѣ́снь ѕ҃. І҆рмо́съ:
Прⷪ҇ро́ка і҆ѡ́нꙋ подража́ѧ, вопїю̀: живо́тъ мо́й, бл҃же, свободѝ и҆зъ тлѝ, и҆ спаси́ мѧ, сп҃се мі́ра, зовꙋ́ща: сла́ва тебѣ̀.
Пречестны́й крⷭ҇тъ покланѧ́емый ны́нѣ, воскресе́нїѧ ра́дость провозвѣща́етъ хрⷭ҇то́ва, и҆ сме́рть ѕлонача́льника благовѣствꙋ́етсѧ.
Водрꙋзи́лъ є҆сѝ на землѝ честны́й крⷭ҇тъ, лѣ́ствица быва́етъ вѣ̑рнымъ мы́сленна къ небесѝ, и҆ возше́ствїе покланѧ́ющымсѧ є҆мꙋ̀ и҆ чтꙋ́щымъ.
И҆́же посредѣ̀ землѝ насади́выйсѧ честны́й крⷭ҇тъ, и҆ ны́нѣ вѣ̑тви простира́етъ дарова́нїй въ себѣ̀, и҆ всѧ̑ ѡ҆сѣнѧ́етъ покланѧ́ющыѧсѧ є҆мꙋ̀.
Пресѣкі́й чермно́е прописꙋ́емь крⷭ҇тъ, покланѧ́емь ны́нѣ, бѣ́дъ и҆ страсте́й мо́ре пресѣка́етъ, и҆ спаса́етъ покланѧ́ющыѧсѧ є҆мꙋ̀.
Бг҃оро́диченъ:
Ѿ землѝ привлечѐ на́съ сн҃ъ тво́й и҆ бг҃ъ къ нбⷭ҇нѣй жи́зни, возше́дъ на крⷭ҇тъ, любо́вїю тѧ̀ мт҃рь сегѡ̀ вои́стиннꙋ чтꙋ́щихъ.
И҆́нъ. І҆рмо́съ:
Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
Течє́нїѧ сла̑дкаѧ и҆ска́пахꙋ, блаже́нне, по́тове твоѝ и҆ ра́дѡванїѧ, и҆сцѣле́нїй сїѧ́нїе, во хвалꙋ̀ хрⷭ҇та̀ бг҃а на́шегѡ.
Во дво́рѣхъ бж҃їихъ процвѣ́лъ є҆сѝ, вїногра́дъ многопло́денъ прозѧбы́й, и҆ добродѣ́телей гро́здїе, дѣ́лателю дꙋша́мъ ѻ҆би́льнѡ пода́въ.
Црⷭ҇тва бж҃їѧ возжелѣ́лъ є҆сѝ, и҆ надъ страстьмѝ ца́рствовавъ, є҆ѵдокі́ме, по благоволе́нїю лꙋ́чшемꙋ, ра́дость пра́ведныхъ полꙋчи́лъ є҆сѝ.
Бг҃оро́диченъ:
И҆збра́нна бг҃ꙋ бы́вши, ꙗ҆́кѡ кра́сное село̀ и҆ простра́нное, семꙋ̀, дв҃о, была̀ є҆сѝ, и҆ черто́гъ и҆ свѣ́щникъ и҆ трапе́за.
Конда́къ, гла́съ в҃:
Вы́шнихъ жела́ѧ, съ вы́шними совокꙋплѧ́ѧсѧ, и҆ колесни́цꙋ ѻ҆́гненнꙋю, бжⷭ҇твенными восхожде́ньми добродѣ́телей, соверши́лъ є҆сѝ дꙋ́шꙋ, преблаже́нне є҆ѵдокі́ме: на землѝ пожи́въ ꙗ҆́кѡ безпло́тенъ, зижди́телю всѣ́хъ благоꙋгоди́лъ є҆сѝ.
І҆́косъ:
Житїѐ сꙋгꙋ́бо показа́лъ є҆сѝ пра́вою, бл҃же́нне, вѣ́рою, во ѻ҆бое́мъ бг҃ꙋ бл҃гоꙋгоди́въ, є҆ѵдокі́ме. тѣ́мже ѡ҆брѣ́лъ є҆сѝ нбⷭ҇нагѡ црⷭ҇твїѧ наслѣ́дїе, и҆ со ст҃ы́ми ны́нѣ живы́й, влⷣцѣ всѣ́хъ предстои́ши, твое́ же тѣ́ло скве́рны соблю́лъ є҆сѝ кромѣ̀, и҆ нерꙋши́мое любо́вїю чтꙋ́щымъ тѧ̀ ѡ҆ста́вилъ є҆сѝ. чи́стѡ бо пожи́въ, сла́вне, зижди́телю, всѣ́хъ благоꙋгоди́лъ є҆сѝ.
Пѣ́снь з҃. І҆рмо́съ:
Сꙋ́щымъ въ пещѝ ѻ҆трокѡ́мъ твои̑мъ, сп҃се, не прикоснꙋ́сѧ, нижѐ стꙋжѝ ѻ҆́гнь. тогда̀ трїѐ, ꙗ҆́кѡ є҆ди́нѣми ᲂу҆сты̑, поѧ́хꙋ и҆ благословлѧ́хꙋ, глаго́люще: бл҃гослове́нъ бг҃ъ ѻ҆тє́цъ на́шихъ.
И҆́же честно́ю кро́вїю хрⷭ҇то́вою, крⷭ҇тъ є҆гѡ̀ напои́всѧ, и҆сточа́етъ рѣ́ки сїѧ́нїи мы́сленныхъ дарова́нїй, и҆ напаѧ́етъ всѧ̑ покланѧ́ющыѧсѧ и҆ воспѣва́ющыѧ є҆го̀ вѣ́рнѡ.
И҆́же сме́рть, и҆ врага̀ низло́жь крⷭ҇тъ хрⷭ҇то́въ, и҆ верєѝ сокрꙋшѝ мы́слєнныѧ. и҆ ны́нѣ томꙋ̀ чи́стою вѣ́рою и҆ любо́вїю покланѧ́ющымсѧ, всѣ̑мъ двє́ри ѿверза́етъ жи́зни и҆ нетлѣ́нныѧ пи́щи.
И҆́же покланѧ́ющесѧ любо́вїю крⷭ҇тꙋ̀, ѡ҆гражда́ютсѧ си́лою сегѡ̀, и҆ врагѝ мы́слєнныѧ и҆ ви̑димыѧ ѿго́нѧтъ, и҆ невреди́мы соблюда́ютсѧ, пѣсносло́вѧщїи хрⷭ҇та̀.
Бг҃оро́диченъ:
Крѣ́пость на́мъ и҆ держа́ва, на врагѝ дарова́сѧ крⷭ҇тъ хрⷭ҇та̀ сн҃а твоегѡ̀, прїѧ́тнымъ и҆ мт҃рнимъ твои́мъ дерзнове́нїемъ, и҆́мже, бг҃оневѣ́сто, прило́ги вра́жїѧ побѣжда́емъ.
И҆́нъ. І҆рмо́съ:
Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.
Крѣ́постїю вжили́всѧ живода́вца, пло́ти ᲂу҆держа́лъ є҆сѝ жела̑нїѧ, пребога́те, и҆ ᲂу҆́мъ впери́лъ є҆сѝ къ нбⷭ҇нымъ, поѧ̀ крѣ́пкѡ: сы́й бл҃гослове́нъ бг҃ъ и҆ препросла́вленъ.
Са́мъ сѧ̀ неблагоро́денъ сотво́рь, благоро́дны нра́вы стѧжа́въ ᲂу҆ма̀ цѣ́лостїю, поꙋче́нїемъ же ᲂу҆пражнѧ́ѧсѧ бг҃одохнове́нныхъ писа́нїй, всѐ твоѐ жела́нїе на бг҃а всеви́дца, бл҃же́нне, возложи́лъ є҆сѝ.
Вы́шнѧгѡ црⷭ҇тва, вы́шнѧгѡ же гра́да, бж҃їѧ раѧ̀, пра́ведныхъ наслажде́нїѧ, пи́щи нетлѣ́нныѧ, и҆ бога́тства некра́домагѡ, свѣ́та невече́рнѧгѡ сподо́билсѧ є҆сѝ, бл҃же́нне є҆ѵдокі́ме.
Бг҃оро́диченъ:
Є҆го́же родила̀ є҆сѝ, влⷣчце, при́снѡ молѝ, ѿ рабо́ты и҆зба́вити мѧ̀ страсте́й и҆ ѡ҆сꙋжде́нїѧ, и҆ стꙋжа́ющагѡ мѝ лю́тагѡ ѿча́ѧнїѧ, и҆ ѿ ѡ҆скорблѧ́ющихъ мѧ̀, чⷭ҇таѧ, ѡ҆держа́нїѧ, бг҃ора́дованнаѧ.
Пѣ́снь и҃. І҆рмо́съ:
Є҆гѡ́же ᲂу҆жаса́ютсѧ а҆́гг҃ли и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте свѧще́нницы, просла́вите ѻ҆́троцы, благослови́те лю́дїе, и҆ превозноси́те во всѧ̑ вѣ́ки.
Є҆го́же водрꙋзѝ сме́рть, поста́вленный крⷭ҇тъ, ны́нѣ покланѧ́ема зрѧ́ще, мы́слєннаѧ вра̑жїѧ ѡ҆полчє́нїѧ скрыва́ютсѧ подъ земле́ю, и҆ покланѧ́ющїисѧ є҆мꙋ̀ ѡ҆бновлѧ́ютсѧ.
Є҆го́же дре́вле проѡбразꙋ́ема, на высотѣ̀ нбⷭ҇нѣй хрⷭ҇то́съ показа̀, пресвѣ́тлаго крⷭ҇та̀. ны́нѣ покланѧ́ющесѧ благоче́стнѡ вѣ́рнїи возвыша́ютсѧ, и҆ сегѡ̀ ᲂу҆ѧснѧ́ютсѧ заре́ю.
Є҆го́же дре́вле проповѣ́даша прⷪ҇ро́цы нело́жнѡ, є҆́же хрⷭ҇то́вꙋ подно́жїю ꙗ҆ви́тисѧ крⷭ҇та̀. є҆мꙋ́же ны́нѣ мы̀ и҆́стиннѡ покланѧ́ющесѧ вѣ́рнѡ, тогѡ̀ бога́тыхъ дарѡ́въ наслажда́емсѧ.
Бг҃оро́диченъ:
И҆́же стра́стїю безстра́стїе и҆сточи́въ земны̑мъ, сн҃ъ тво́й и҆ гдⷭ҇ь, дв҃о, тобо́ю на́съ тѧ̀ любо́вїю пою́щыѧ при́снѡ ѡ҆бновлѧ́етъ, ꙗ҆́кѡ бл҃годѣ́тель.
И҆́нъ. І҆рмо́съ:
Въ пещѝ ѻ҆́трочестѣй проѡбрази́лъ є҆сѝ и҆ногда̀ твою̀ мт҃рь, гдⷭ҇и, ѻ҆́бразъ же сїѧ̀ и҆зъ ѻ҆гнѧ̀ и҆з̾има́ше, неѡпа́льнѡ входѧ́щыѧ: ю҆́же пое́мъ ꙗ҆́вльшꙋюсѧ тобо́ю концє́мъ дне́сь, и҆ превозно́симъ во всѧ̑ вѣ́ки.
Ѻ҆́гнь помышлѧ́ѧ стра́шный, предъ прⷭ҇то́ломъ хрⷭ҇то́вымъ, хотѧ́щъ и҆зы́ти, ᲂу҆миле́нїемъ се́рдца те́плы и҆злива́еши ка̑пли сле́зъ, погаша́ющыѧ тебѣ̀ страсте́й пе́щи, є҆ѵдокі́ме бг҃омꙋ́дре.
Всѐ приложи́лъ є҆сѝ къ бг҃ꙋ мꙋ́дре, дꙋше́вное ѻ҆́ко, и҆ томꙋ̀ прилѣпи́лсѧ є҆сѝ, вопїѧ̀ ѱало́мски: хрⷭ҇тѐ мо́й, ка́ла мѧ̀ и҆зба́ви, и҆ смертоно́сныхъ страсте́й во вѣ́ки.
Терпѣ́нїемъ пожда́тель, и҆ се́рдцемъ смире́нъ ты̀ бы́лъ є҆сѝ, ми́лостивъ тре́бꙋющымъ, и҆ ѻ҆бы́чай приносѧ̀ бла́гъ, и҆ нра́вы добродѣ́тельны, всече́стне, въ ни́хже до́брѣ пожи́въ, чꙋде́съ то́чиши благода́ть.
Ра́зꙋмъ и҆мѣ́ѧ бжⷭ҇твенъ, и҆спо́лнитель влⷣчнихъ ꙗ҆ви́лсѧ є҆сѝ слове́съ, десны́ѧ любѧ̀ стєзѝ, лѣ́выхъ ꙗ҆́вѣ ᲂу҆клонѧ́ѧсѧ ꙗ҆́кѡ бл҃гоꙋ́менъ и҆ мꙋ́дръ. тѣ́мже тѧ̀ почита́емъ бг҃омꙋ́дре во вѣ́ки.
Бг҃оро́диченъ:
А҆да́мовъ содѣ́тель ѿ крове́й твои́хъ чⷭ҇тыхъ зи́ждетсѧ, и҆ млеко́мъ пита́етсѧ, пита́ѧй всѧ́кое дыха́нїе, дв҃о бцⷣе. тѣ́мже ꙗ҆́кѡ бж҃їю тѧ̀ сла́вимъ мт҃рь.
Пѣ́снь ѳ҃. І҆рмо́съ:
Свѣтоно́сный ѻ҆́блакъ, въ ѻ҆́ньже всѣ́хъ влⷣка, ꙗ҆́кѡ до́ждь съ нб҃сѐ на рꙋно̀ сни́де, и҆ воплоти́сѧ на́съ ра́ди, бы́въ чл҃вѣ́къ, безнача́льный: велича́емъ всѝ ꙗ҆́кѡ мт҃рь бг҃а на́шегѡ чⷭ҇тꙋю.
Безсме́ртїѧ то́читъ, и҆ нетлѣ́нїѧ незави́стны ка̑пли, честны́й крⷭ҇тъ кла́нѧющымсѧ є҆мꙋ̀: ѡ҆живлѧ́етъ, ѡ҆чища́етъ, и҆ ѡ҆бновлѧ́етъ, и҆ сла́вы лꙋ́чшїѧ и҆ благода́ти сподоблѧ́етъ воспѣва́ющыѧ на то́мъ пригво́ждшагосѧ і҆и҃са.
Дѣ̑йства и҆спꙋща́ѧ, ꙗ҆́коже пресвѣ́тлы зари̑, всечестны́й крⷭ҇тъ, томꙋ̀ покланѧ́ющыѧсѧ любо́вїю и҆ вѣ́рою чи́стою, къ свѣ́тꙋ непристꙋ́пномꙋ и҆ невеще́ственномꙋ, ѡ҆зарѧ́ѧ направлѧ́етъ, воспѣва́ющыѧ всѣ́хъ творца̀.
Ѡ҆ст҃и́вый дре́во прест҃а́гѡ крⷭ҇та̀ твоегѡ̀, честно́ю кро́вїю твое́ю, пребл҃гі́й сло́ве, дѣ́йствомъ є҆гѡ̀ на́съ просвѣтѝ, и҆ ѡ҆ст҃ѝ томꙋ̀ кла́нѧющыѧсѧ, и҆ воспѣва́ющыѧ влⷣкꙋ всѧ́ческихъ.
Бг҃оро́диченъ:
Па́че сл҃нца всѣ̑мъ просїѧ́вшаѧ бл҃года́ть, ѻ҆́блаки бѣ́дъ и҆ страсте́й ѿго́нитъ, дв҃о, и҆ бг҃оразꙋ́мїѧ свѣ́томъ просвѣща́етъ, любо́вїю тѧ̀ сла́вѧщыѧ, и҆ пою́щыѧ непреста́ннѡ сн҃а твоего̀, ꙗ҆́кѡ влⷣкꙋ всѣ́хъ.
И҆́нъ. І҆рмо́съ:
Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.
Ви́дѣти жела́ѧ сла́вꙋ бг҃а на́шегѡ, добродѣ́тельми бг҃оразꙋ́мїѧ тебѐ ᲂу҆добри́лъ є҆сѝ: и҆ свѣщено́сецъ во свѣ́тлый черто́гъ вше́лъ є҆сѝ, со а҆́гг҃лы живы́й, и҆ ꙗ҆снѣ́е наслажда́ешисѧ бг҃овидѣ́нїѧ.
Ꙗ҆́кѡ ᲂу҆́тро, ꙗ҆́кѡ со́лнце возсїѧ̀ па́мѧть твоѧ̀, сꙋ́щаѧ во мра́цѣ сердца̀ просвѣща́ющи: ты́ бо и҆ свѣ́та и҆ днѐ вои́стиннꙋ сы́нъ ꙗ҆ви́лсѧ є҆сѝ, бг҃омꙋ́дре є҆ѵдокі́ме. сегѡ̀ ра́ди тѧ̀ почита́емъ.
Мꙋ́дростїю ᲂу҆краша́емь, и҆ ра́зꙋмомъ просвѣще́нъ, смире́нїемъ се́рдца ᲂу҆добре́нъ, высото́ю житїѧ̀ сїѧ́ѧ, къ мы́слєннымъ преше́лъ є҆сѝ дворѡ́мъ: и҆дѣ́же на́съ помѧнѝ почита́ющихъ тѧ̀, є҆ѵдокі́ме.
Де́нь пра́зднественный и҆ по́льзы хода́тайственный честны́й тво́й соверша́емъ, ѿ землѝ преставле́нїѧ: ты́ бо гдⷭ҇ень ᲂу҆го́дникъ, и҆ тогѡ̀ за́повѣдей дѣ́латель ꙗ҆ви́лсѧ є҆сѝ непосты́денъ, досточꙋ́дне є҆ѵдокі́ме.
Бг҃оро́диченъ:
Свѣ́та прїѧ́телище ᲂу҆тро́ба твоѧ̀ бы́сть, просвѣ́щшагѡ мі́ръ, бг҃ора́дованнаѧ: тѣ́мже молю́ тѧ ѻ҆каѧ́нный, свѣ́тлы зари̑ мѝ пода́ждь, мольба́ми, бг҃оневѣ́сто, є҆ѵдокі́ма бг҃омꙋ́драгѡ.
Свѣти́ленъ ѻ҆ктѡ́иха. Сла́ва, ст҃а́гѡ:
Ꙗ҆́коже со́лнце блиста́ѧ, зари̑ и҆спꙋща́еши чꙋде́съ, просвѣща́ѧ всѣ́хъ сердца̀, твою̀ сла́внꙋю па́мѧть творѧ́щихъ вѣ́рнѡ, треблаже́нне, и҆ спаса́еши, є҆ѵдокі́ме.
И҆ ны́нѣ крⷭ҇та̀. Подо́бенъ: Жєны̀ ᲂу҆слы́шите:
Крⷭ҇тъ предпра́зднꙋетсѧ, и҆ мі́ръ ѡ҆свѧща́етсѧ, чи́ни а҆́гг҃льстїю пою́тъ на́съ ра́ди распе́ншагосѧ, и҆ торжествꙋ́ютъ съ на́ми и҆ сра́дꙋютсѧ, дв҃дски зовꙋ́ще: содѣ́ла спасе́нїе посредѣ̀ землѝ, влⷣко.
На стїхо́внѣ ѻ҆ктѡ́иха. Сла́ва, гла́съ а҃:
Ка́кѡ не диви́мсѧ благоꙋ́мїю твоемꙋ̀; и҆лѝ не похва́лимъ, прпⷣбне є҆ѵдокі́ме, житїѐ твоѐ равноа́гг҃льное, по́мысла цѣломꙋ́дрїю, кро́тости твое́й, и҆ смире́нїю, и҆ безмо́лвїю, и҆ ми́лостыни непреста́ннѣй; всѣ́ми бо добродѣ́тельми ᲂу҆краси́лсѧ є҆сѝ, блаже́нне: тѣ́мже жде́тъ тебѐ неизглаго́ланнаѧ ра́дость, нбⷭ҇ное црⷭ҇твїе.
И҆ ны́нѣ, крⷭ҇та̀, гла́съ ѕ҃:
Прⷪ҇ро́честїи гла́си дре́во ст҃о́е провозвѣсти́ша, и҆́мже дре́внїѧ клѧ́твы сме́ртныѧ свободи́сѧ а҆да́мъ: тва́рь же дне́сь возноси́мꙋ томꙋ̀ совозвыша́етъ гла́съ, ꙗ҆́же ѿ бг҃а просѧ́щи бога́тыѧ ми́лости. но є҆ди́ный въ благоꙋтро́бїи безмѣ́рный влⷣко, ѡ҆чище́нїе бꙋ́ди на́мъ, и҆ спасѝ дꙋ́шы на́шѧ.
На лїтꙋргі́и, Прокі́менъ, гла́съ з҃: Честна̀ предъ гдⷭ҇емъ сме́рть преподо́бныхъ є҆гѡ̀. Сті́хъ: Что̀ возда́мъ гдⷭ҇еви: А҆пⷭ҇лъ къ гала́тѡмъ, зача́ло сг҃ї. А҆ллилꙋ́їа, гла́съ ѕ҃: Блаже́нъ мꙋ́жъ боѧ́йсѧ гдⷭ҇а. Сті́хъ: Си́льно на землѝ бꙋ́детъ сѣ́мѧ є҆гѡ̀. Є҆ѵⷢ҇лїе матѳе́а, зача́ло м҃г. Прича́стенъ: Въ па́мѧть вѣ́чнꙋю:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.