← претходни дан | Минеј — Јул | следећи дан →
29 июля: Мученика Каллиника
Мѣ́сѧца тогѡ́же въ к҃ѳ-й де́нь.
Ст҃а́гѡ мꙋ́ченика каллїні́ка.
Стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ!
Мꙋ́чениче бг҃омꙋ́дре каллїні́че, ꙳ па́че є҆́же жи́ти, ꙳ ᲂу҆мре́ти благоче́стнѡ жела́ѧ, хрⷭ҇то́вꙋ сме́рть вои́стиннꙋ и҆з̾ѡбрази́лъ є҆сѝ, ꙳ ѿѻнꙋ́дꙋже безсме́ртїе полꙋчи́лъ є҆сѝ, ꙳ и҆ невече́рнее блаже́нство, ꙳ и҆дѣ́же чи́нове а҆́гг҃лѡвъ сꙋ́ть, ꙳ и҆ страда́лєцъ всѣ́хъ, ꙳ ра́дꙋѧсѧ всели́лсѧ є҆сѝ, сла́вне.
Цвѣ́тъ и҆сцѣле́нїѧ и҆спꙋща́етъ, ꙳ и҆ рѣка̀ нело́жныхъ дарова́нїй и҆спо́лнена, ꙳ врачева́нїе безме́здно, ковче́гъ свѧще́нїѧ, ꙳ твои́хъ моще́й ра́ка ꙗ҆ви́сѧ: ꙳ и҆зъ неѧ́же почерпа́емъ здра́вїе присноживо́тно, ꙳ приходѧ́щїи вѣ́рнѡ, мꙋ́чениче сла́вне, ꙳ тебѣ̀ ра́ди вои́стиннꙋ, ꙳ чꙋ́днаго бг҃а сла́вимъ.
Мч҃ниче пребл҃же́нне каллїні́че, ꙳ къ неви́димымъ врагѡ́мъ, ꙳ неви́димагѡ бг҃а ꙳ по́мощь непобѣди́мꙋ и҆мѣ́ѧ, ꙳ возста́вилъ є҆сѝ безсме́ртїѧ побѣ̑ды, ꙳ на и҆́же погꙋби́ти зе́млю и҆ мо́ре хва́лѧщагосѧ, ꙳ боре́нїемъ страда́нїй твои́хъ низло́жь, ꙳ и҆ крове́й твои́хъ потопи́лъ є҆сѝ тече́нїемъ.
Сла́ва, гла́съ то́йже:
Благоче́стїѧ побо́рника, и҆ гꙋби́телѧ вра́жїѧ, и҆ мꙋ́ченикѡвъ собесѣ́дника, и҆ хра́мъ дх҃а ст҃а́гѡ бы́вшаго, во́ина цр҃ѧ̀ хрⷭ҇та̀, и҆сцѣле́нїй неиждива́емое вои́стиннꙋ сокро́вище, вѣ́рныхъ ᲂу҆твержде́нїе, чꙋ́днаго дне́сь каллїні́ка пѣ́сньми почти́мъ.
И҆ ны́нѣ, бг҃оро́диченъ, гла́съ и҆ подо́бенъ то́йже:
Пло́ть ѿ крове́й твои́хъ прїе́мъ, ꙳ первовѣ́чный бг҃ъ ꙳ тѧ̀ предста́тельницꙋ показа̀ ꙳ человѣ́кѡмъ, чⷭ҇таѧ. ꙳ тѣ́мже и҆зба́ви рабы̑ твоѧ̑ ꙳ ѿ всѧ́кїѧ бѣды̀ и҆ ѡ҆бстоѧ́нїѧ, ꙳ и҆ сѣ́тей лꙋка́вагѡ врага̀: ꙳ и҆ сїѧ́нїѧ причасти́тисѧ сподо́би и҆збра́нныхъ ꙳ всѧ̑ сла́вѧщыѧ и҆ покланѧ́ющыѧсѧ тебѣ̀.
Крⷭ҇тобг҃оро́диченъ, гла́съ и҆ подо́бенъ то́йже:
Что̀ зри́мое видѣ́нїе, ꙳ є҆́же мои́ма ѻ҆чи́ма ви́дитсѧ, ѽ влⷣко! ꙳ содержа́й всю̀ тва́рь, ꙳ на дре́во воздви́женъ бы́въ, ꙳ и҆ ᲂу҆мира́еши всѣ̑мъ даѧ́й жи́знь; ꙳ бцⷣа пла́чꙋщисѧ глаго́лаше, ꙳ є҆гда̀ ᲂу҆зрѣ̀ на крⷭ҇тѣ̀ возноси́ма, ꙳ и҆зъ неѧ̀ неизрече́ннѡ возсїѧ́вшаго, ꙳ бг҃а и҆ чл҃вѣ́ка.
Тропа́рь, гла́съ д҃:
Мꙋ́ченикъ тво́й, гдⷭ҇и, каллїні́къ во страда́нїи свое́мъ вѣне́цъ прїѧ́тъ нетлѣ́нный ѿ тебє̀ бг҃а на́шегѡ: и҆мѣ́ѧй бо крѣ́пость твою̀, мꙋчи́телей низложѝ, сокрꙋшѝ и҆ де́мѡнѡвъ немощны̑ѧ де́рзѡсти. тогѡ̀ моли́твами спасѝ дꙋ́шы на́шѧ.
Канѡ́нъ.
Гла́съ д҃. Пѣ́снь а҃. І҆рмо́съ:
Колєсни́цы фараѡ́новы, и҆ си́лꙋ є҆гѡ̀ вве́рже въ мо́ре крѣ́пкїй во бране́хъ: воспое́мъ пѣ́снь но́вꙋю, ꙗ҆́кѡ просла́висѧ.
На колесни́цꙋ мы́сленнꙋю всѣ́дъ, ꙗ҆́кѡ вои́стиннꙋ трїста́ты потопи́лъ є҆сѝ мы́сленнагѡ є҆гѵ́пта во стрꙋѧ́хъ кро́ви твоеѧ̀, мꙋ́ченикѡвъ похвало̀ каллїні́че.
Бжⷭ҇твенною ѻ҆де́ждею ѡ҆дѣ́ѧвсѧ, мꙋ́дре, ѻ҆де́жды земны́ѧ совле́клсѧ є҆сѝ, преблаже́нне, и҆ къ по́двигꙋ поте́клъ є҆сѝ, и҆ врага̀ посрами́лъ є҆сѝ.
Разори́въ вра̑жїѧ многоплетє́нныѧ кѡ́зни, ᲂу҆́зами страда́нїй твои́хъ, и҆ недѣ́йственна сего̀ пове́рглъ є҆сѝ на зе́млю, каллїні́че, и҆ нога́ми твои́ми попра́лъ є҆сѝ.
Бг҃оро́диченъ:
Є҆́же прⷪ҇ро́ческїй прови́дѣ ли́къ, ꙗ҆́кѡ две́рь нбⷭ҇нꙋю, и҆ неѡпали́мꙋю кꙋпинꙋ̀, тѧ̀, дв҃о мт҃и чⷭ҇таѧ, бг҃а ро́ждшꙋю позна́хомъ.
Пѣ́снь г҃. І҆рмо́съ:
Оу҆твержда́ѧй гро́мъ, и҆ созида́ѧй дꙋ́хъ, ᲂу҆твердѝ менѐ, гдⷭ҇и, да тѧ̀ пою̀ и҆́стиннѡ, и҆ творю̀ во́лю твою̀, ꙗ҆́кѡ нѣ́сть свѧ́тъ, ꙗ҆́кѡ ты̀, бж҃е на́шъ.
Хрⷭ҇то́вою любо́вїю ᲂу҆ѧзвлѧ́емь, мꙋ́ченикъ взыва́ше, въ по́двизѣхъ претерпѣва́ѧ: во благово́нїе текꙋ̀ мѵ́ра, послѣ́дꙋѧ стрⷭ҇ти твое́й, страда́нїемъ кро́ве.
Безъ навѣ́та соблю́лсѧ є҆сѝ ѿ стрѣ́лъ ѕмїи́ныхъ: твою́ бо пѧ́тꙋ мꙋдре́цъ въ ра́нахъ прете́ръ, главꙋ́ же свою̀ сокрꙋшѝ, каллїні́че, во страда́нїихъ твои́хъ.
Посѣ́къ пре́лести те́рнїе мече́мъ дꙋхо́внымъ, хрⷭ҇то́вы вѣ́ры неле́стнѡ пло́дъ прине́слъ є҆сѝ, всеблаже́нне, стори́чный болѣ́зней твои́хъ влⷣцѣ твоемꙋ̀.
Бг҃оро́диченъ:
Несказа́нна ржⷭ҇тва̀ рожде́нїѧ ты̀ є҆ди́на мт҃и была̀ є҆сѝ, во ᲂу҆тро́бѣ твое́й заче́нши, и҆́же пре́жде тебє̀ бг҃а сло́ва, и҆ млеко́мъ пита́ла є҆сѝ, пречⷭ҇таѧ, ꙗ҆́кѡ млⷣнца безнача́льнаго.
Сѣда́ленъ, гла́съ г҃. Подо́бенъ: Бжⷭ҇твенныѧ вѣ́ры:
Ре́вность бжⷭ҇твеннꙋю въ дꙋшѝ твое́й и҆мѣ́ѧ, сла́вне, беззако́ннꙋющыѧ всꙋ́е терпѣли́внѡ ѡ҆бличи́лъ є҆сѝ, и҆ прибли́живсѧ мꙋ́камъ, проше́лъ є҆сѝ тво́й по́двигъ до́блимъ ᲂу҆мо́мъ, мꙋ́чениче каллїні́че, хрⷭ҇та̀ бг҃а молѝ, дарова́ти на́мъ ве́лїю ми́лость.
Сла́ва, и҆ ны́нѣ, бг҃оро́диченъ:
Бжⷭ҇твеннагѡ є҆стества̀ не ѿлꙋ́чсѧ, пло́ть бы́въ во чре́вѣ твое́мъ: но бг҃ъ вочл҃вѣ́чсѧ и҆ пребы́сть, и҆́же по ржⷭ҇твѣ̀ мт҃рь тѧ̀ дв҃ꙋ, ꙗ҆́кѡ пре́жде ржⷭ҇тва̀ сохрани́въ всенепоро́чнꙋ, є҆ди́нъ гдⷭ҇ь: того̀ прилѣ́жнѡ молѝ, дарова́ти на́мъ ве́лїю ми́лость.
Крⷭ҇тобг҃оро́диченъ:
Несве́рнаѧ а҆́гница сло́ва, нетлѣ́ннаѧ дв҃а мт҃и, на крⷭ҇тѣ̀ зрѧ́щи повѣ́шена, и҆зъ неѧ̀ безъ болѣ́зни прозѧ́бшаго, мт҃рски подо́бнѡ рыда́ющи, вопїѧ́ше: ᲂу҆вы̀ мнѣ̀, ча́до моѐ, ка́кѡ стра́ждеши во́лею, хотѧ̀ и҆зба́вити ѿ страсте́й безче́стїѧ человѣ́ка;
Пѣ́снь д҃. І҆рмо́съ:
Оу҆слы́шахъ, бж҃е, слꙋ́хъ тво́й, и҆ ᲂу҆боѧ́хсѧ: разꙋмѣ́хъ дѣла̀ твоѧ̑, и҆ ᲂу҆жасо́хсѧ, гдⷭ҇и: ꙗ҆́кѡ твоегѡ̀ хвале́нїѧ и҆спо́лнь землѧ̀.
Ѡ҆мыва́ѧсѧ въ стрꙋѧ́хъ твои́хъ крове́й, преблаже́нне, ꙗ҆ви́лсѧ є҆сѝ чистѣ́йшїй дꙋ́хомъ, и҆ въ наслажде́нїе дости́глъ є҆сѝ безпло́тныхъ, мꙋ́чениче каллїні́че.
Ка́мень че́стенъ вои́стиннꙋ назда́лсѧ є҆сѝ цр҃кви, и҆ хра́мы і҆́дѡльскїѧ стрѧ́слъ є҆сѝ, и҆ на зе́млю низложи́лъ є҆сѝ, неꙋкло́ннымъ сопротивле́нїемъ страда́нїй твои́хъ.
Смертонѡ́снаѧ врагѡ́въ ласка̑нїѧ, вои́стиннꙋ ѿри́нꙋлъ є҆сѝ, мꙋ́чениче, словесы̀ дꙋхо́вными: и҆ дꙋше́ю ᲂу҆крѣплѧ́емь, на пре́лесть поста́вилъ є҆сѝ побѣ́дꙋ.
Бг҃оро́диченъ:
Ны́нѣ тѧ̀ кꙋпинꙋ̀, ю҆́же въ сїна́и, прописꙋ́ѧ мѡѷсе́й вели́кїй, неѡпа́льнꙋ ви́дѧше, ѻ҆́гнь во ᲂу҆тро́бѣ носѧ́щꙋ, чⷭ҇таѧ.
Пѣ́снь є҃. І҆рмо́съ:
Возсїѧ́й мѝ, гдⷭ҇и, свѣ́тъ повелѣ́нїй твои́хъ, ꙗ҆́кѡ къ тебѣ̀ дꙋ́хъ мо́й ᲂу҆́тренюетъ и҆ пое́тъ тѧ̀: ты́ бо є҆сѝ бг҃ъ на́шъ, и҆ къ тебѣ̀ прибѣга́ю, цр҃ю̀ ми́ра.
Въ ти́нꙋ попо́лзсѧ непостоѧ́ннꙋю, гдⷭ҇и, и҆ во глꙋбинꙋ̀ грѣхѡ́въ мои́хъ, и҆ въ бꙋ́рю лю́тыхъ мои́хъ дѣѧ́нїй впа́дъ, зовꙋ́ ти: ты̀ бꙋ́ди мѝ помо́щникъ.
Стопа́ми пригвожде́нъ но́гъ, мꙋ́чениче, пѣ́лъ є҆сѝ: въ пꙋтѝ свидѣ́нїй твои́хъ бога́тнѡ наслади́хсѧ, влⷣко, терпѧ̀ ра̑ны, страстополо́жниче, наде́ждею воздаѧ́нїй.
Ми́лостїю ты̀ є҆ле́а, до́брѣ кꙋ́плю содѣ́лавъ мꙋче́нїѧ, свѣщꙋ̀ твою̀ ᲂу҆ѧсни́лъ є҆сѝ, пребл҃же́не: тѣ́мже ве́сь бы́лъ є҆сѝ же́ртва непоро́чнаѧ, всесожже́нїе прїѧ́тно.
Бг҃оро́диченъ:
Прⷪ҇ро́кѡвъ проповѣ́данїе, и҆ а҆пⷭ҇лѡвъ похвало̀, и҆ мꙋ́ченикѡвъ ᲂу҆добре́нїе, ты̀ є҆сѝ, бцⷣе, бжⷭ҇твенное сло́во носѧ́щи, па́че сло́ва, пречⷭ҇таѧ, є҆́же пре́жде вѣ̑къ и҆зъ ѻ҆ц҃а̀.
Пѣ́снь ѕ҃. І҆рмо́съ:
Бꙋ́рею грѣхо́вною погрꙋжа́емь, ꙗ҆́кѡ во чре́вѣ ки́товѣ содержи́мь, съ прⷪ҇ро́комъ зовꙋ́ ти: возведѝ ѿ тлѝ живо́тъ мо́й, гдⷭ҇и, и҆ спаси́ мѧ.
Ста́да твоегѡ̀ ѡ҆гра́да невре́дна ѿ ѕвѣре́й соблюде́сѧ є҆ресе́й: твои́хъ бо страда́нїй держа́щи, сла́вне, тве́рдꙋ па́лицꙋ, волкѡ́въ ꙗ҆ви́сѧ ѿгони́тельница.
Но́щь ѿбѣжѐ пре́лести страда́нїемъ твои́мъ, и҆ вѣ́ры добро́та возсїѧ̀, во и҆сповѣ́данїи твое́мъ, пресла́вне, трⷪ҇цы побо́рниче, ꙗ҆́кѡ со́лнце въ концѣ́хъ.
Ꙗ҆́кѡ вѣ́ры проповѣ́дникъ и҆звѣ́стенъ, беззако́ннꙋющемꙋ вопїѧ́ше гото́вѡ: что̀ прети́ши и҆мꙋ́щемꙋ не ᲂу҆мѧгче́нꙋ дꙋше́внꙋю тве́рдость; стрѣ́лы бо безбо́жныхъ легкѝ.
Бг҃оро́диченъ:
Пребыва́еши по ржⷭ҇твѣ̀ неискꙋсобра́чнаѧ, ꙗ҆́кѡ пре́жде ржⷭ҇тва̀ дв҃а, и҆ нетлѣ́ннаѧ: и҆́бо є҆́же въ тебѣ̀ та́инство, бг҃оневѣ́сто, па́че ᲂу҆ма̀ всѧ́кагѡ, и҆ всегѡ̀ сло́ва познава́етсѧ.
Конда́къ, гла́съ в҃. Подо́бенъ: Вы́шнихъ и҆щѧ̀:
Гѡ́рнѧѧ кра̑снаѧ досто́йнѡ ны́нѣ наслѣ́довалъ є҆сѝ: хрⷭ҇то́вою бо ѕѣлѡ̀ любо́вїю разже́гсѧ на ѻ҆́гнь, каллїні́че. тѣ́мъ мꙋ́жественнѡ дерзнꙋ́лъ є҆сѝ: є҆мꙋ́же и҆ ны́нѣ предстоѧ̀, не преста́й молѧ̀ ѡ҆ всѣ́хъ на́съ.
Пѣ́снь з҃. І҆рмо́съ:
Ѻ҆́гнь палѧ̀ въ пещѝ, и҆стрѧса́шесѧ, ѻ҆́троцы ѡ҆роша́хꙋсѧ, и҆ пою́ще глаго́лахꙋ: бл҃гослове́нъ є҆сѝ, є҆ди́нъ сы́й бж҃е ѻ҆ц҃ъ на́шихъ.
Сла̑сти мнѣ̀ хода́тайственна мꙋ́камъ, сꙋ́ть страши̑лища: ни бо̀ ѻ҆́гнь, ни ра̑ны, и҆́стиннагѡ рачи́телѧ моегѡ̀, мч҃никъ вопїѧ́ше, разлꙋча́тъ мѧ̀.
Вжилѧ́емь, сла́вне, посо́бїемъ хрⷭ҇то́вымъ, на зе́млю сопротивоборца̀ побори́въ низве́рглъ є҆сѝ, и҆ тезоимени́тъ ꙗ҆ви́лсѧ є҆сѝ, на мꙋчи́телѧ добропобѣ́дникъ.
Дїа́вола посрами́лъ є҆сѝ, и҆ а҆́гг҃лы возвесели́лъ є҆сѝ, страда̑нїи твои́ми, сла́вне, и҆ хрⷭ҇тꙋ̀ взыва́лъ є҆сѝ: бл҃гослове́нъ є҆сѝ, є҆ди́нъ сы́й бж҃е ѻ҆тє́цъ на́шихъ.
Бг҃оро́диченъ:
Разрѣши́ла є҆сѝ ржⷭ҇тво́мъ твои́мъ, дв҃о пречⷭ҇таѧ, є҆́ѵы прама́тере клѧ́твꙋ: мт҃и бо є҆сѝ всѣ́хъ влⷣки, ꙗ҆́же всѣ̑мъ ра́дость и҆схода́таивши.
Пѣ́снь и҃. І҆рмо́съ:
Всѧ́чєскаѧ, влⷣко, премꙋ́дростїю твое́ю соста́вилъ є҆сѝ, земли́ же па́ки ᲂу҆тверди́лъ є҆сѝ, ꙗ҆́коже вѣ́си, дно̀, ѡ҆снова́нїемъ водрꙋзи́вый на вода́хъ безмѣ́рныхъ. тѣ́мъ всѝ вопїе́мъ, воспѣва́юще: благослови́те дѣла̀ гдⷭ҇нѧ непреста́ннѡ гдⷭ҇а.
Ра́дꙋйсѧ, наслажде́нїе страда́льцєвъ и҆́стинныхъ: ра́дꙋйсѧ, ᲂу҆добре́нїе вѣ́ры и҆ ᲂу҆краше́нїе. ра́дꙋйсѧ, пресвѣ́тлый мꙋ́ченикѡвъ свѣтоно́сецъ, и҆́же ле́сть разори́въ страда́нїемъ твои́мъ, и҆ свѣ́тъ просїѧ́вый мі́рꙋ, каллїни́че премꙋ́дре.
Мꙋчи́тель посрами́сѧ пѡ́двиги твоегѡ̀ противле́нїѧ, побѣжде́ни бы́ша ѕлодѣ́и ра́нами твои́ми, блаже́нне, гвоздьмѝ пѧ́ты твоѧ̑ ᲂу҆ѧзви́шасѧ: пре́лесть же попали́сѧ всѧ̑, и҆ потреби́шасѧ і҆́дѡльстїи хра́ми, бг҃омꙋ́дре, ѻ҆гне́мъ страда́нїѧ твоегѡ̀.
Ѡ҆ чтꙋ́щихъ тѧ̀ къ бг҃ꙋ твои́мъ дерзнове́нїемъ, каллїні́че, прекло́нсѧ, молѝ непреста́ннѡ: ста́дꙋ твоемꙋ̀ предста́ни, и҆зима́ѧ сїѐ ѿ разли́чныхъ сѣ́тей льсти́вагѡ, и҆ ᲂу҆твердѝ вѣ́рою: тобо́ю бо расте́тъ и҆ крѣпи́тсѧ.
Бг҃оро́диченъ:
Дх҃омъ прⷪ҇ро́цы тѧ̀ дв҃ꙋ проѡбрази́ша, сѣ́нь же и҆ трапе́зꙋ и҆ рꙋ́чкꙋ и҆ свѣ́щникъ, и҆ го́рꙋ прест҃ꙋ́ю, и҆ ѻ҆́блакъ и҆ скрижа̑ли, ковче́гъ же и҆ же́злъ, и҆ две́рь бжⷭ҇твеннꙋ, є҆́юже всѣ̑мъ человѣ́кѡмъ ѿве́рзесѧ дре́внїй ра́й.
Пѣ́снь ѳ҃. І҆рмо́съ:
Безсѣ́менное ржⷭ҇тво̀ твоѐ, бцⷣе чи́стаѧ, хрⷭ҇та̀ бг҃а на́шегѡ пѣ́сньми немо́лчными велича́емъ.
И҆стка́сѧ тебѣ̀ свы́ше ри́за вѣ́ры, є҆́юже ѡ҆бнажи́лъ є҆сѝ врага̀ на сꙋди́щи, мꙋ́чениче сла́вне.
Непщева́ше мꙋчи́тель прельсти́ти ласка́ньми мꙋ́ченика, но то́й въ вѣ́рѣ ᲂу҆твержда́шесѧ.
Чи́сто всесожже́нїе и҆ прїѧ́тна же́ртва, каллїні́че сла́вне, ѻ҆гне́мъ по́двигѡвъ прине́слсѧ є҆сѝ бг҃ꙋ.
Красны̀ но́ги твоѝ, страда́льче каллїні́че, гвоздьмѝ пригвожде́ны, и҆ къ проповѣ́данїю бжⷭ҇твенномꙋ и҆дꙋ́щи.
Бг҃оро́диченъ:
Покро́въ тѧ̀ стѧжа́хомъ, и҆ приста́нище, чⷭ҇таѧ, и҆ ѻ҆рꙋ́жїе и҆ забра́ло, и҆ тве́рдꙋ наде́ждꙋ въ бѣда́хъ при́снѡ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.