← претходни дан | Минеј — Јул | следећи дан →
23 июля: Мучеников Трофима, Феофила и других с ними
Мѣ́сѧца тогѡ́же въ к҃г-й де́нь.
Ст҃ы́хъ мꙋ́чєникъ, трофі́ма, ѳео́фїла, и҆ и҆̀же съ ни́ми.
И҆ пра́зднованїе прест҃ѣ́й бцⷣѣ, въ че́сть є҆ѧ̀ і҆кѡ́ны поча́евскїѧ.
Слꙋ́жба сїѧ̀ пи́сана въ приложе́нїи.
На Гдⷭ҇и, воззва́хъ, стїхи̑ры, гла́съ а҃. Поⷣ: Всехва́льнїи мꙋ́чєницы:
Вше́лъ є҆сѝ въ сꙋди́ще тве́рдѡ, ꙳ мꙋ́чениче, страда̑нїѧ и҆ терза̑нїѧ терпѣ́лъ є҆сѝ, ꙳ и҆ ᲂу҆ѧзви́лсѧ є҆сѝ, ꙳ ᲂу҆ѧзви́въ врага̀ борца̀, ꙳ и҆ побѣ́дꙋ взѧ́лъ є҆сѝ на него̀, трофі́ме. ꙳ тѣ́мже молѝ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Ли́къ мꙋ́чєникъ веды́й, мꙋ́дре, съ собо́ю, ꙳ пострада́лъ є҆сѝ: ꙳ и҆ съ тѣ́ми ра́дꙋѧсѧ, ꙳ нбⷭ҇наѧ бл҃га̑ѧ воспрїѧ́лъ є҆сѝ досто́йнѡ. ꙳ съ ни́миже на́съ помина́й, ꙳ вѣ́рою на землѝ восхвалѧ́ющихъ тѧ̀, ꙳ хрⷭ҇тꙋ̀ молѧ́сѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Трофі́ма и҆ ѳео́фїла вѣ́рнїи, ꙳ съ про́чими тремина́десѧте ꙳ восхва́лимъ мꙋ́ченики: ꙳ честны́ми бо кровьмѝ ꙳ ѻ҆́гнь пре́лести ᲂу҆жѐ ᲂу҆гаси́вше: ꙳ въ вы́шнѣмъ живꙋ́тъ црⷭ҇твїи, ꙳ при́снѡ просѧ́ще, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Сла́ва, и҆ ны́нѣ, бг҃оро́диченъ:
Оу҆вы̀ мнѣ̀, что̀ бꙋ́дꙋ; ꙳ ᲂу҆́мъ и҆ дш҃ꙋ и҆ тѣ́ло ꙳ ѡ҆скверни́въ прегрѣше́ньми, ꙳ что̀ сотворю̀; ꙳ ка́кѡ же и҆збѣжꙋ̀ пла́мене нестерпи́магѡ, ꙳ нерѣши́мыхъ ᲂу҆́зъ и҆ вѣ́чныхъ; ꙳ но, ѽ всенепоро́чнаѧ! ꙳ пре́жде конца̀ молѝ сн҃а твоего̀, ꙳ пода́ти мѝ ѡ҆ставле́нїе.
Крⷭ҇тобг҃оро́диченъ:
Дв҃а нескве́рнаѧ, ꙳ и҆ногда̀ на дре́вѣ ви́дѣвши, ꙳ є҆го́же родѝ и҆зъ безсѣ́менныѧ ᲂу҆тро́бы, ꙳ не терпѧ́щи ᲂу҆тро́бнагѡ ᲂу҆ѧзвле́нїѧ, ꙳ власы̀ терза́ющи, гл҃го́лаше: ꙳ ма́нїемъ содержа́й тва́рь всю̀, ꙳ ка́кѡ ꙗ҆́кѡ ѡ҆сꙋжде́нный, ꙳ на крⷭ҇тъ вознесе́нъ є҆сѝ, ꙳ всѧ́кѡ хотѧ́й спастѝ человѣ́чество;
Тропа́рь, гла́съ д҃:
Мꙋ́чєницы твоѝ, гдⷭ҇и, во страда́нїихъ свои́хъ вѣнцы̀ прїѧ́ша нетлѣ̑нныѧ ѿ тебє̀ бг҃а на́шегѡ: и҆мꙋ́ще бо крѣ́пость твою̀, мꙋчи́телей низложи́ша, сокрꙋши́ша и҆ де́мѡнѡвъ немѡщны́ѧ де́рзѡсти. тѣ́хъ моли́твами спасѝ дꙋ́шы на́шѧ.
Канѡ́нъ, творе́нїе а҆ндре́а кри́тскагѡ,
Гла́съ д҃. Пѣ́снь а҃. І҆рмо́съ:
Воспою̀ тебѣ̀, гдⷭ҇и бж҃е мо́й, ꙗ҆́кѡ и҆зве́лъ є҆сѝ лю́ди и҆зъ рабо́ты є҆гѵ́петскїѧ, покры́лъ же є҆сѝ колесни̑цы фараѡ́новы и҆ си́лꙋ.
Воспою̀ тебѣ̀, гдⷭ҇и бж҃е мо́й, ꙗ҆́кѡ возсїѧ́лъ є҆сѝ на́мъ де́нь весе́лїѧ, ле́сть разорѧ́ющь, па́мѧть мч҃никъ твои́хъ.
Со́лнце просїѧ́лъ є҆сѝ въ мі́рѣ, въ вѣ́рнѣй ꙗ҆́вльсѧ, мꙋ́чениче, тве́рди, въ не́йже ѡ҆блиста́лъ є҆сѝ страда́нїи твои́ми концы̀.
Кро́вїю твое́ю напои́сѧ, златы́ми стрꙋѧ́ми, воспита́вшее тѧ̀ ѻ҆те́чество, блаже́нне трофі́ме, пи́щею неиждивꙋ́щею, страда́нїи твои́ми пита́ющесѧ.
Трⷪ҇ченъ:
Трⷪ҇цꙋ просла́вимъ правосла́внѡ, со ѻ҆ц҃е́мъ сн҃а и҆ дх҃а ст҃а́го, є҆ди́но бж҃ество̀, є҆ди́ницꙋ трїѷпоста́снꙋю.
Бг҃оро́диченъ:
А҆́гг҃лъ вѣ́сть тебѣ̀ съ нб҃сѐ є҆́же къ бг҃ꙋ премѣне́нїѧ, дв҃о, принесѐ, и҆ мі́ръ собра̀ на ра́дость бл҃говѣ́щенїѧ.
Пѣ́снь г҃. І҆рмо́съ:
Въ гдⷭ҇ѣ бз҃ѣ мое́мъ се́рдце моѐ ᲂу҆тверди́сѧ: тѣ́мъ немощствꙋ́ющїи препоѧ́сашасѧ си́лою.
На сꙋди́щи мꙋ́ченикъ со стра́ждꙋщими съ ни́мъ ᲂу҆ранѧ́емь, ра́довашесѧ, прови́дѧ неизглаго́ланное мздовоздаѧ́нїе.
И҆ сте́кшаѧ твоѧ̀ кро́вь безбо́жїе попалѝ, теплотꙋ̀ бг҃оразꙋ́мїѧ всѣ̑мъ вже́гъ, трофі́ме.
Ꙗ҆́кѡ со́лнце ѕвѣ́здъ, посредѣ̀ и҆мꙋ́ще мч҃ника, ѡ҆мрачи́ша ле́сть, страда́льцы твоѝ, гдⷭ҇и.
Трⷪ҇ченъ:
Трїѷпоста́сномꙋ є҆стествꙋ̀, є҆ди́нагѡ црⷭ҇тва бж҃ествꙋ̀, ѻ҆ц҃ꙋ̀ поклони́мсѧ, сн҃ꙋ и҆ дх҃ꙋ ст҃о́мꙋ.
Бг҃оро́диченъ:
Въ мт҃рехъ дв҃а, и҆ въ дв҃ахъ мт҃и была̀ є҆сѝ, ѻ҆́нѣми же и҆ ᲂу҆дивлѧ́еши всѧ́кꙋ мы́сль, чⷭ҇таѧ.
Сѣда́ленъ, гла́съ а҃: Подо́бенъ: Ли́къ а҆́гг҃льскїй:
До́блественнымъ по́мысломъ проше́дъ мꙋ̑ки, и҆ побѣ́дꙋ на ни́хъ прїе́мь, бл҃же́нне, во́лка преложи́лъ є҆сѝ во а҆́гнѧ бжⷭ҇твенною благода́тїю, и҆ повинꙋ́лъ є҆сѝ страда́ти съ тобо́ю вѣ́рою. тѣ́мже всѝ ра́достнѡ тѧ̀ почита́емъ, пресла́вне трофі́ме.
Бг҃оро́диченъ:
Оу҆пова́нїе хрⷭ҇тїа́нъ, прест҃а́ѧ дв҃о, є҆го́же родила̀ є҆сѝ бг҃а, па́че ᲂу҆ма́ же и҆ сло́ва, непреста́ннѡ молѝ съ вы́шними си́лами, пода́ти ѡ҆ставле́нїе грѣхѡ́въ на́шихъ всѣ́хъ, и҆ и҆справле́нїе житїѧ̀; вѣ́рою и҆ любо́вїю при́снѡ тѧ̀ сла́вѧщымъ.
Крⷭ҇тобг҃оро́диченъ:
Нескве́рнаѧ а҆́гница а҆́гнца и҆ па́стырѧ повѣ́шена на дре́вѣ ме́ртва зрѧ́щи, пла́чꙋщи вѣща́ше, мт҃рски восклица́ющи: ка́кѡ претерплю̀ твоѐ є҆́же па́че сло́ва, сн҃е мо́й, сни́тїе, и҆ вѡ́льныѧ стрⷭ҇ти, бж҃е преблагі́й;
Пѣ́снь д҃. І҆рмо́съ:
Оу҆слы́шахъ, бж҃е, слꙋ́хъ тво́й, и҆ ᲂу҆боѧ́хсѧ: разꙋмѣ́хъ дѣла̀ твоѧ̑, и҆ ᲂу҆жасо́хсѧ, гдⷭ҇и: ꙗ҆́кѡ твоегѡ̀ хвале́нїѧ и҆спо́лнь землѧ̀.
Оу҆слы́шахъ, бж҃е, мꙋ́чєникъ тве́рдое мꙋ́жество, и҆́мже стра́ждꙋще показа́ша по любвѝ твое́й, и҆ ᲂу҆ди́вльсѧ сла́влю тѧ̀, є҆ди́не сп҃се.
Вѣ́ры щито́мъ ѡ҆гражде́нъ вели́кїй мꙋ́ченикъ, и҆ ме́чь дꙋхо́вный мы́сленнѡ и҆звле́къ, главы̑ ѿсѣчѐ нечести̑вымъ.
Красото́ю добродѣ́телей ᲂу҆кра́шенъ, вели́кїй мꙋ́чениче, и҆ сла́вою вѣнча́нъ, гони́телѧ посрами́лъ є҆сѝ, за хрⷭ҇та̀ прїи́мъ ѻ҆́гнь и҆ заколє́нїѧ.
Трⷪ҇ченъ:
Во є҆ди́номъ сꙋществѣ̀ пою̀ трѝ ѵ҆поста̑си бг҃онача́лїѧ, ѻ҆ц҃а̀, и҆ сн҃а, и҆ дх҃а, ꙗ҆́кѡ є҆ди́но сїѧ́нїе трисо́лнечнагѡ є҆стества̀, є҆ди́нъ бг҃ъ.
Бг҃оро́диченъ:
Дв҃о, ка́кѡ дои́ши; ка́кѡ ма́терними ражда́еши закѡ́ны; є҆го́же бо родила̀ є҆сѝ, вопло́щсѧ бг҃ъ є҆́сть ѡ҆бновлѧ́ѧ є҆стество̀, ꙗ҆́кѡ вѣ́сть са́мъ.
Пѣ́снь є҃. І҆рмо́съ:
Мра́къ разрѣшѝ грѣха̀ моегѡ̀, внегда̀ возсїѧ́ти тѝ ᲂу҆́тро свѣ́тлое за́повѣдей твои́хъ, гдⷭ҇и, непристꙋ́пный свѣ́те.
Мра́къ ѿгна́лъ є҆сѝ безбо́жїѧ свѣ́тлыми проповѣ́данїи: бг҃осїѧ́нными и҆сповѣ́данїи твои́ми врагѝ посрами́лъ є҆сѝ, трофі́ме, страда́льче хрⷭ҇то́въ.
Ꙗ҆́кѡ бг҃а возлюби́лъ є҆сѝ, мꙋ́ченице бг҃олю́бне: и҆меноно́снѡ показа́сѧ бг҃оме́рзскїѧ па́гꙋбы прогна́нїе, мꙋ́ченикъ хрⷭ҇то́въ и҆зрѧ́денъ бы́въ.
Ѿ ва́шеѧ кро́ве ѡ҆дѣ́ѧвше багрѧни́цꙋ по́честь, на небесѣ́хъ сца́рствꙋете бг҃ꙋ всѣ́хъ, мч҃ницы, ꙗ҆́кѡ томꙋ̀ подѡ́бницы.
Трⷪ҇ченъ:
Равносла́внаѧ, равноче́стнаѧ трⷪ҇це, безнача́льне ѻ҆́ч҃е нерожде́нне, рожде́нне сн҃е, и҆ дш҃е ст҃ы́й, ты̀ є҆сѝ бг҃ъ мо́й, гдⷭ҇и, непристꙋ́пный свѣ́те.
Бг҃оро́диченъ:
Въ дѣ́вахъ ро́ждшꙋю, и҆ въ мт҃рехъ тѧ̀ чⷭ҇тꙋю дв҃ꙋ пое́мъ, бж҃їй нескве́рный сосꙋ́дъ: и҆зъ негѡ́же про́йде гдⷭ҇ь, сп҃съ всѧ́ческихъ.
Пѣ́снь ѕ҃. І҆рмо́съ:
Бꙋ́рею грѣхо́вною погрꙋжа́емь, ꙗ҆́кѡ во чре́вѣ ки́товѣ содержи́мь, съ прⷪ҇ро́комъ зовꙋ́ ти: возведѝ ѿ тлѝ живо́тъ мо́й, гдⷭ҇и, и҆ спаси́ мѧ.
Ка́менїемъ и҆ дреко́лїемъ сокрꙋша́еми, ника́коже ѿстꙋпи́сте ѿ вѣ́ры, но потреби́тели, бл҃же́ннїи, бы́сте і҆дѡлонеи́стовства, взе́мше побѣ́ды по́чєсти.
Воздви́женъ на высотꙋ̀ и҆ стрꙋ́жемь, і҆́дѡльскꙋю ле́сть ѡ҆бличи́лъ є҆́сть бг҃осло́въ трофі́мъ, напита́въ вѣ́рныхъ сердца̀ ᲂу҆че́нїи досто́йнѡ пода́тельными.
Ѕвѣ́зды страда́нїи просїѧ́вше, невѣ́рїѧ мра́къ разори́сте. тѣ́мже де́нь ѡ҆зари́вше спаси́тельный, въ ѻ҆́ньже спасти́сѧ на́мъ моли́тесѧ, мч҃ницы гдⷭ҇ни.
Трⷪ҇ченъ:
Є҆диноца́рственнаѧ, соѻбра́знаѧ трⷪ҇це безнача́льнаѧ, равноче́стнаѧ, трїѷпоста́снаѧ, є҆ди́нице нераздѣ́льнаѧ, бж҃ество́мъ пресꙋ́щнаѧ, ѻ҆́ч҃е, и҆ сн҃е, и҆ ст҃ы́й дш҃е, тебє̀ пое́тъ всѧ̑ тва́рь.
Бг҃оро́диченъ:
Па́че є҆стества̀ твоѐ ржⷭ҇тво̀, ꙗ҆́кѡ безсѣ́меннѡ ма́терски подо́бнѡ па́ки ражда́еши, зако́номъ є҆стества̀, преи́стиннѡ ѻ҆боѧ̀, да ᲂу҆молча́тъ сквє́рныѧ є҆́рєси ѡ҆ тебѣ̀, бцⷣе чⷭ҇таѧ.
Пѣ́снь з҃. І҆рмо́съ:
Ѻ҆́гнь палѧ̀ пещѝ, и҆стрѧса́шесѧ, ѻ҆́троцы ѡ҆роша́хꙋсѧ, и҆ пою́ще глаго́лахꙋ: бл҃гослове́нъ є҆сѝ, є҆ди́нъ сы́й бж҃е ѻ҆ц҃ъ на́шихъ.
Пло́ть преѡби́дѧщымъ страда́льцємъ твои̑мъ а҆́гг҃ли ᲂу҆диви́шасѧ, и҆ земні́и взыва́хꙋ: бл҃гослове́нъ є҆сѝ, є҆ди́ный бг҃ъ ѻ҆тє́цъ на́шихъ.
Высока̀ мы́шца си́лы твоеѧ̀, сїѧ̀ сокрꙋшѝ врагѝ твоѧ̑, гдⷭ҇и, сконча́вшымсѧ въ вѣ́рѣ мꙋ́ченикѡмъ твои̑мъ, въ мꙋ́кахъ го́рькихъ.
Ѻ҆́вїи ᲂу҆́бѡ ка́менїемъ побива́ютсѧ стрⷭ҇тонѡ́сицы твоѝ, дрꙋзі́и же сжига́еми: съ ни́миже трофі́мъ скончава́шесѧ, тебѣ̀ воспѣва́ѧ сꙋ́щемꙋ бг҃ꙋ: ѻ҆тє́цъ на́шихъ бж҃е, бл҃гослове́нъ є҆сѝ.
Трⷪ҇ченъ:
Трисо́лнечное бж҃ество̀, є҆ди́но црⷭ҇твїе, безнача́льне, присносꙋ́щне, ѻ҆́ч҃е, и҆ сн҃е, и҆ дш҃е: бл҃гослове́нъ є҆ди́нъ сы́й бж҃е ѻ҆тє́цъ на́шихъ.
Бг҃оро́диченъ:
Ѽ стра́шнагѡ та́инства! ѽ стра́ннагѡ чꙋдесѐ! ка́кѡ и҆ мт҃и ꙗ҆ви́сѧ, и҆ дв҃ою пребы́сть, бл҃гослове́нна є҆ди́на, ро́ждшаѧ бг҃а ѻ҆тє́цъ на́шихъ.
Пѣ́снь и҃. І҆рмо́съ:
Всѧ̑ дѣла̀ бж҃їѧ, и҆ всѧ̀ тва́рь благослови́те гдⷭ҇а, прпⷣбнїи и҆ смире́ннїи се́рдцемъ по́йте є҆го̀, и҆ превозноси́те во всѧ̑ вѣ́ки.
Сто́лпъ ꙗ҆ви́лсѧ є҆сѝ мы́сленный, ᲂу҆твержда́ѧ стра́ждꙋщыѧ съ тобо́ю, трофі́ме, погꙋби́лъ є҆сѝ нечести́выхъ шата́нїе вѣ́рою хрⷭ҇то́вою, є҆го́же превозно́симъ во вѣ́ки.
Свѣ́тлымъ лице́мъ предста́въ на сꙋди́щи, беззакѡ́нныѧ ᲂу҆жаси́лъ є҆сѝ. показа́лъ є҆сѝ ра́достное твоѐ є҆́же за хрⷭ҇та̀ страда́нїе: є҆го́же превозно́симъ во вѣ́ки.
Нб҃о многоѕвѣ́здное ꙗ҆́вльсѧ, страда́льцєвъ бг҃оизбра́нный собо́ръ, ѡ҆зарѝ бг҃ови́днѡ сꙋ́щыѧ въ мі́рѣ вѣ́рою хрⷭ҇то́вою: є҆го́же превозно́симъ во вѣ́ки.
Трⷪ҇ченъ:
Безнача́льнаго ѻ҆ц҃а̀, и҆ сн҃а, со ст҃ы́мъ воспое́мъ дх҃омъ, трⷪ҇цꙋ є҆диносꙋ́щнꙋю, є҆ди́но нача́ло и҆ бжⷭ҇тво̀, хва́лѧще и҆ пою́ще є҆го̀ во вѣ́ки.
Бг҃оро́диченъ:
Всѧ́къ тѧ̀ ѧ҆зы́къ земноро́дныхъ пое́тъ, дв҃о, ꙗ҆́кѡ свѣ́тъ непристꙋ́пный возсїѧ́ла є҆сѝ, просвѣща́ющаго мі́ръ хрⷭ҇та̀ бг҃а: є҆го́же превозно́симъ во вѣ́ки.
Пѣ́снь ѳ҃. І҆рмо́съ:
Тѧ̀ неискꙋсобра́чнꙋю бцⷣꙋ, нбⷭ҇ный черто́гъ, ро́ждшꙋю нача́льника спасе́нїѧ на́шегѡ, пѣ́сньми велича́емъ.
Тѧ̀ проше́дшаго чꙋ́до страда́нїѧ тече́нїе, и҆ вѣне́цъ прїе́мша побѣди́тельнѡ ѿ хрⷭ҇та̀ бг҃а, страда́льче, пѣ́сньми велича́емъ.
Тѧ̀ бг҃оѧвле́нна страда́льца, ꙗ҆́кѡ вожда̀ ꙗ҆́вльшасѧ стра́ждꙋщихъ съ тобо́ю, мѡѷсе́йски къ нестарѣ́ющейсѧ жи́зни, пѣ́сньми велича́емъ.
Ли́че досто́инъ бг҃ꙋ мꙋ́ченическїй, ꙗ҆́кѡ побѣди́вшїй пре́лесть, и҆ вѣнцы̀ ѿ бг҃а прїи́мшїй свѣ́тлы, моли́тесѧ спасти́сѧ на́мъ.
Трⷪ҇ченъ:
Тѧ̀ трїѷпоста́снꙋю є҆ди́ницꙋ, и҆ нераздѣли́мое сꙋщество̀, ѻ҆ц҃а̀, и҆ сн҃а, и҆ ст҃а́го дх҃а, пѣ́сньми велича́емъ.
Бг҃оро́диченъ:
Тѧ̀ кꙋпинꙋ̀, ю҆́же мѡѷсе́й прови́дѣ, горѧ́щꙋ и҆ неѡпалѧ́емꙋ ѻ҆́гнь прїе́мшꙋ бж҃ества̀, пѣ́сньми велича́емъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.