← претходни дан | Минеј — Јул | следећи дан →
22 июля: Равноапостольной Марии Магдалины. Возвращение мощей священномученика Фоки
Мѣ́сѧца тогѡ́же въ к҃в-й де́нь.
Свѧты́ѧ мѷроно́сицы и҆ равноапо́стольныѧ марі́и магдали́ны:
И҆ возвраще́нїе моще́й ст҃а́гѡ свѧщенномч҃ника фѡ́ки.
Стїхи̑ры ст҃ы́ѧ, гла́съ и҃. Подо́бенъ: Ѽ пресла́внагѡ чꙋдесѐ!
Мѵ́ро со слеза́ми носѧ́щи, ꙳ магдали́ни марі́е, ꙳ бжⷭ҇твеннагѡ гро́ба дости́гши, ꙳ и҆ сла́вы а҆́гг҃ла ᲂу҆зрѣ́ла є҆сѝ, ꙳ возвѣща́ющаго животода́вца бж҃е́ственное воста́нїе, ꙳ и҆ всѣ́хъ и҆збавле́нїе. тѣ́мже є҆динона́дєсѧтимъ возвѣсти́ти потща́ласѧ є҆сѝ, ꙳ ра́достнѡ глаго́лющи: ꙳ взыгра́йте, хрⷭ҇то́съ воста́лъ є҆́сть.
Слꙋжа́щи прехва́льнаѧ, ꙳ на́съ ра́ди по на́мъ бы́вшемꙋ хрⷭ҇тꙋ̀ бг҃ꙋ, ꙳ и҆ непреста́нными сїѧ́нїи ꙳ дꙋ́шꙋ и҆ мы́сль разже́гши, ꙳ свѣ́тъ была̀ є҆сѝ. ꙳ є҆го́же ви́дѣвши на крⷭ҇тѣ̀ ви́сѧща, ꙳ стра́нное видѣ́нїе, глаго́лала є҆сѝ слезѧ́щи: ꙳ ка́кѡ жи́знь сме́рть во́льнꙋю ꙳ ны́нѣ прїе́млетъ;
Па́мѧть твою̀ свѧще́ннꙋю соверша́емъ, ꙳ ᲂу҆чи́вшаѧсѧ ᲂу҆ хрⷭ҇та̀, ꙳ и҆ тогѡ̀ повелѣ̑нїѧ ꙳ проповѣ́давшаѧ всесла́внаѧ, ꙳ дꙋша́мъ на и҆збавле́нїе: ꙳ и҆ моще́й твои́хъ ра́кꙋ, марі́е, ꙳ вѣ́рою ѡ҆блобыза́емъ, ꙳ и҆сточа́ющꙋю бл҃года́ть неѡскꙋ́днꙋю и҆ просвѣще́нїе, ꙳ любо́вїю притека́ющымъ, ꙳ бг҃облаже́ннаѧ.
И҆́ны стїхи̑ры ст҃а́гѡ, гла́съ д҃. Подо́бенъ: Да́лъ є҆сѝ зна́менїе:
Ве́сь возложи́лсѧ є҆сѝ ꙳ тебє̀ ра́ди претерпѣ́вшемꙋ ꙳ спаси́тельнꙋю стрⷭ҇ть, ꙳ са́мъ себѐ, прехва́льне, ꙳ мꙋче́нїѧ кро́вїю ᲂу҆се́рднѡ благоꙋгоди́ти, ꙳ и҆ томꙋ̀ прилѣпи́тисѧ, ѻ҆́ч҃е, потща́лсѧ є҆сѝ: ꙳ ѿсю́дꙋ и҆ просла́вилсѧ є҆сѝ ꙳ и҆ чꙋде́съ ѡ҆богати́лсѧ є҆сѝ дѣ́йствомъ, премꙋ́дре, ꙳ ѿ негѡ̀ вѣнча́емь.
Беззако́нныхъ шата̑нїѧ, ꙳ и҆ де́мѡнскаѧ слꙋжє́нїѧ, ꙳ страда́нїй тве́рдостїю, ꙳ фѡ́ко, низложи́лъ є҆сѝ, ꙳ сп҃са всѣ́хъ ꙗ҆́снѡ возвѣща́ѧ, ꙳ и҆ вѣ́рныхъ просвѣща́ѧ мы̑сли, бг҃облаже́нне, ꙳ и҆ мра́къ ѿгонѧ̀ і҆́дѡльскагѡ сꙋ́етства, ꙳ просвѣще́нїемъ чꙋде́съ твои́хъ, ꙳ и҆ подвигѡ́въ свѣ́тлостїю.
Приста́нище спаси́тельное ꙳ бѣ́дствꙋющїи и҆мꙋ́ще тѧ̀, ꙳ фѡ́ко пресла́вне, ꙳ житїѧ̀ волна́ми, и҆ глꙋбино́ю прегрѣше́нїй, ꙳ и҆ печа́лей бꙋ́рею ѡ҆держи́ми, мо́лимсѧ вѣ́рнѡ, твои́ми моли́твами на́съ спаса́й, ꙳ ѿ всѧ́ческихъ ѡ҆бстоѧ́нїй, ꙳ твою̀ па́мѧть чтꙋ́щихъ, ꙳ молѧ̀ чл҃вѣколю́бца и҆ влⷣкꙋ и҆ гдⷭ҇а.
Сла́ва, гла́съ ѕ҃. А҆нато́лїево:
Пе́рвѣе ви́дѣвши бжⷭ҇твенное воскресе́нїе, марі́е магдали́ни, пе́рвагѡ благи́хъ вино́вника, на́ше благосе́рднѡ є҆стество̀ ѡ҆божи́вшагѡ, пе́рваѧ и҆ благовѣ́стница ꙗ҆ви́ласѧ є҆сѝ, вопїю́щи а҆пⷭ҇лѡмъ: печа́ль ѿложи́вше, благодꙋ́шїе воспрїими́те, и҆ прїиди́те, ᲂу҆зри́те хрⷭ҇та̀ воскрⷭ҇шаго, и҆ мі́рꙋ подаю́щаго ве́лїю ми́лость.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Всѐ ѿло́жше:
А҆́гнца своего̀ ꙳ а҆́гница нескве́рнаѧ дре́вле ꙳ и҆ непоро́чнаѧ влⷣчца ꙳ на дре́вѣ крⷭ҇тнѣмъ ꙗ҆́кѡ ᲂу҆зрѣ̀, ꙳ мт҃рски восклица́ше, ꙳ и҆ дивѧ́щисѧ вопїѧ́ше: ꙳ ча́до сладча́йшее, ꙳ что̀ зрѣ́нїе сїѐ но́вое и҆ пресла́вное; ꙳ ка́кѡ со́нмъ безбл҃года́тный ꙳ сꙋди́щꙋ пїла́товꙋ предаде́ тѧ, ꙳ и҆ ѡ҆сꙋжда́етъ на сме́рть живота̀ всѧ́ческихъ; ꙳ но воспѣва́ю твоѐ неизрече́нное, ꙳ сло́ве, снизхожде́нїе.
На стїхо́внѣ ѻ҆ктѡ́иха. Сла́ва, гла́съ и҃. Вѷзанті́ево:
Во́лею ѡ҆бнища́вшемꙋ нището́ю мое́ю, премно́гимъ бл҃гоꙋтро́бїемъ хрⷭ҇тꙋ̀ бг҃ꙋ, магдали́ни марі́а, ꙗ҆́кѡ ᲂу҆чени́ца вѣ́рнѡ послꙋжи́вши, на дре́вѣ просте́рта и҆ во гро́бѣ затворе́на ви́дѣвши, вопїѧ́ше сле́зы точа́щи: что̀ стра́нное видѣ́нїе, и҆́же мє́ртвыѧ животворѧ́й, ка́кѡ ме́ртвъ вмѣнѧ́етсѧ; кі̑ѧ мѵ́ры принесꙋ̀ и҆змѣни́вшемꙋ мѧ̀ смра́да де́мѡнскагѡ; кі̑ѧ сле́зы пролїю̀ ѿ сле́зъ и҆змѣни́вшемꙋ мою̀ прама́терь; но, ѽ всѧ́ческихъ цр҃ю̀! ꙗ҆́коже вертогра́да храни́тель ꙗ҆ви́лсѧ є҆сѝ, росо́ю твои́хъ глагѡ́лъ ва́ръ ѿе́мъ, ре́къ къ не́й: къ мои̑мъ бра́тїѧмъ ше́дши, благовѣ́щенїѧ ра́дость возопі́й: восхождꙋ́ бо ко ѻ҆ц҃ꙋ̀, и҆ бг҃ꙋ моемꙋ̀, и҆ бг҃ꙋ ва́шемꙋ, ꙗ҆́кѡ да пода́мъ мі́рꙋ ве́лїю ми́лость.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Подо́бенъ: Ѽ пресла́внагѡ чꙋдесѐ!
Тѧ̀ ви́дѧщи пригвожда́ема на крⷭ҇тѣ̀, і҆и҃се, ꙳ и҆ стрⷭ҇ти прїе́млюща во́лею, ꙳ дв҃а и҆ мт҃и твоѧ̀, влⷣко, ꙳ ᲂу҆вы̀ мнѣ̀, вопїѧ́ше, ча́до сла́дкое, ꙳ ра̑ны непра́веднѡ ка́кѡ терпи́ши, ꙳ врачꙋ̀, и҆сцѣли́вый человѣ́ческое неможе́нїе, ꙳ и҆ ѿ тлѝ всѣ́хъ и҆зба́вивый ꙳ милосе́рдїемъ твои́мъ;
Тропа́рь ст҃ы́ѧ, гла́съ а҃:
Хрⷭ҇тꙋ̀, на́съ ра́ди ѿ дв҃ы ро́ждшемꙋсѧ, честна́ѧ магдали́на марі́а послѣ́довала є҆сѝ, тогѡ̀ ѡ҆правда̑нїѧ и҆ зако́ны хранѧ́щи: тѣ́мже дне́сь всесвѧтꙋ́ю твою̀ па́мѧть пра́зднꙋюще, грѣхѡ́въ разрѣше́нїе моли́твами твои́ми прїе́млемъ.
И҆ ст҃а́гѡ, гла́съ д҃:
И҆ нра́вѡмъ прича́стникъ, и҆ престо́лѡмъ намѣ́стникъ а҆пⷭ҇лѡмъ бы́въ, дѣѧ́нїе ѡ҆брѣ́лъ є҆сѝ, бг҃одꙋхнове́нне, въ видѣ́нїѧ восхо́дъ: сегѡ̀ ра́ди сло́во и҆́стины и҆справлѧ́ѧ, и҆ вѣ́ры ра́ди пострада́лъ є҆сѝ да́же до кро́ве, свѧщенномꙋ́чениче фѡ́ко, молѝ хрⷭ҇та̀ бг҃а, спасти́сѧ дꙋша́мъ на́шымъ.
Канѡ́нъ ѻ҆ктѡ́иха є҆ди́нъ, и҆ ст҃ы́хъ два̀.
Канѡ́нъ ст҃ы́ѧ, творе́нїе ѳеофа́ново, є҆гѡ́же краегране́сїе:
Магдали́нꙋ марі́ю пою̀ любо́вїю.
Гла́съ и҃. Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Бжⷭ҇твенными ᲂу҆кра́шена добро́тами, и҆ свѣтоли́тїи сїѧ́ющи бжⷭ҇твенными, ѡ҆чернѣ́вшее моѐ се́рдце твои́ми моли́твами, марі́е, ѡ҆зарѝ,
Ѡ҆свѧти́ тѧ сло́во ѻ҆́ч҃ее, ѿ дꙋхѡ́въ ѕло́бы и҆зба́вивъ ꙗ҆́вѣ: є҆мꙋ́же ᲂу҆чени́ца бы́вши, дарова́нїй ст҃а́гѡ дх҃а и҆спо́лниласѧ є҆сѝ.
Во́дъ и҆спо́лншисѧ животво́рныхъ ѿ и҆сто́чника незави́стнагѡ, за милосе́рдїе на землѝ ꙗ҆́вльшагѡсѧ влⷣки, грѣха̀ мꙋ̑тныѧ и҆зсꙋши́ла є҆сѝ то́ки.
Бг҃оро́диченъ:
Мт҃рь є҆стество́мъ содѣ́телѧ пое́мъ тѧ̀, ѻ҆трокови́це, примири́вшꙋю бг҃ꙋ ѿпа́дшее є҆стество̀ человѣ́ческое, бг҃ороди́тельнице всенепоро́чнаѧ влⷣчце.
И҆́нъ канѡ́нъ ст҃а́гѡ.
Гла́съ то́йже. І҆рмо́съ:
Сокрꙋши́вшемꙋ бра̑ни мы́шцею свое́ю, и҆ прове́дшемꙋ і҆и҃лѧ сквозѣ̀ чермно́е мо́ре, пои́мъ є҆мꙋ̀, ꙗ҆́кѡ и҆зба́вителю на́шемꙋ бг҃ꙋ, ꙗ҆́кѡ просла́висѧ.
Свѣ́тꙋ непристꙋ́пномꙋ предстоѧ̀, фѡ́ко, просвѣтѝ мо́й по́мыслъ, молю́сѧ, мꙋ́дре, и҆ се́рдце, восхвали́ти дне́сь свѧто́е твоѐ страда́нїе.
Оу҆краси́лсѧ є҆сѝ ѿ дѣ́тстка, бжⷭ҇твенъ ра́зꙋмъ, фѡ́ко, и҆мѣ́ѧ, и҆ благода́ти сподо́бивсѧ твори́ти зна́мєнїѧ, и҆ ѿгонѧ́ти лꙋка̑выѧ дꙋ́хи, премꙋ́дре.
И҆спо́лненъ сы́й благода́ти, и҆спо́лненъ ра́зꙋма бж҃їѧ, и҆мѣ́лъ є҆сѝ живꙋ́щꙋю въ тебѣ̀ дх҃а бжⷭ҇твеннагѡ си́лꙋ, бг҃омꙋ́дре: є҆ѧ́же ра́ди ꙗ҆́кѡ со́лнце просїѧ́лъ є҆сѝ, просвѣща́ѧ вѣ̑рныѧ.
Бг҃оро́диченъ:
Неискꙋсомꙋ́жнѡ во ᲂу҆тро́бѣ твое́й невмѣсти́маго бг҃а и҆мѣ́ла є҆сѝ вмѣ́стна, бг҃ороди́тельнице, нетѣ́снѡ, є҆го́же ѡ҆ на́съ, бг҃ора́дованнаѧ, при́снѡ молѝ.
Пѣ́снь г҃. І҆рмо́съ:
Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Возлюби́вши пе́рвѣе благи́хъ вино́вника, на́ше благосе́рднѡ є҆стество̀ ѡ҆божи́вшаго, послѣ́довала є҆сѝ є҆мꙋ̀ ᲂу҆се́рднѡ, марі́е, того̀ повинꙋ́вшисѧ бжⷭ҇твєннымъ велѣ́нїємъ.
Рыда́ющи, гро́ба и҆зба́вителева дости́гла є҆сѝ, пе́рвѣе ви́дѣвши бжⷭ҇твенное, ѻ҆трокови́це, воскресе́нїе. тѣ́мже благовѣ́стница ꙗ҆ви́ласѧ є҆сѝ вопїю́щи: хрⷭ҇то́съ воста̀, рꙋка́ми восплещи́те.
Бг҃оро́диченъ:
Спаса́етъ мѧ̀ сло́во вопло́щшеесѧ, пречⷭ҇таѧ, ѿ твои́хъ пречⷭ҇тыхъ крове́й, бога́тствомъ бла́гости, разрѣша́ѧ ѡ҆сꙋжде́нїе пе́рвагѡ паде́нїѧ: є҆го́же непреста́ннѡ молѝ, спастѝ ста́до твоѐ.
И҆́нъ. І҆рмо́съ:
Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й въ бз҃ѣ мое́мъ, разшири́шасѧ на врагѝ моѧ̑ ᲂу҆ста̀ моѧ̑, возвесели́хсѧ ѡ҆ спасе́нїи твое́мъ.
Свѧще́нъ и҆зъ мла́да ра́зꙋмъ и҆мѣ́лъ є҆сѝ, и҆ да́же до ста́рости же и҆ престарѣ́нїѧ, бг҃оно́се, бг҃ꙋ ᲂу҆годи́лъ є҆сѝ, ѿтꙋ́дꙋ сла́вꙋ полꙋчи́лъ є҆сѝ.
Твоегѡ̀ вели́кагѡ преще́нїѧ, бг҃оно́се, не терпѣ̀ де́мѡнъ, и҆́же въ кораблѝ, ѿбѣга́етъ: и҆ хрⷭ҇то́съ велича́етсѧ дѣ́лы твои́ми, чꙋ́дне.
И҆̀же во гра́дѣхъ до́блєсти твоѧ̑, по́двиги же и҆ течє́нїѧ, и҆ благодѣѧ̑нїѧ, кто̀ досто́йнѡ восхва́литъ, чꙋ́дне, мꙋ́ченикѡвъ ᲂу҆краше́нїе и҆ похвало̀;
Бг҃оро́диченъ:
Ꙗ҆́кѡ вы́шши а҆́гг҃лъ, прїѧ́ла є҆сѝ въ ложесна̀, пречⷭ҇таѧ, влⷣкꙋ а҆́гг҃лѡвъ и҆ всеѧ̀ тва́ри: тѣ́мже тѧ̀ вѣ́рнѡ почита́емъ.
Конда́къ ст҃а́гѡ, гла́съ ѕ҃: Подо́бенъ: Є҆́же ѡ҆ на́съ:
Ꙗ҆́кѡ свѧти́тель приносѧ̀, ѻ҆́ч҃е, жє́ртвы, на коне́цъ себѐ прине́слъ є҆сѝ же́ртвꙋ жи́вꙋ, свидѣ́тельствовавъ зако́ннѡ ѡ҆ хрⷭ҇тѣ̀ бз҃ѣ, ѿ а҆́гг҃лъ ᲂу҆крѣплѧ́емый и҆ сме́рть и҆зволѧ́ѧ, сы́й съ вопїю́щими тебѣ̀: прїидѝ, фѡ́ко, съ на́ми, и҆ никто́же на ны̀.
І҆́косъ:
Жи́зни нбⷭ҇ныѧ жела́юще, пи́щꙋ же на землѝ попира́юще, ᲂу҆стнѣ̀ ѡ҆чи́стимъ, и҆ ѧ҆зы́ки та́кожде, пѣ̑нїѧ и҆ пѣ̑сни ꙗ҆́кѡ плетꙋ́ще досто́йнѡ фѡ́кѣ свѧще́нникꙋ: и҆́бо въ небе́снꙋю две́рь вше́дъ, невозбра́ннѡ ѡ҆брѣ́те є҆́же внꙋ́трь ше́ствїе, и҆ взира́етъ на жела́емаго, ѿ а҆́гг҃лъ сла́вима. ѿтꙋ́дꙋ бо и҆ мо́жетъ ѡ҆ на́съ моли́ти є҆ди́наго ми́лостиваго, дꙋше́вныхъ недꙋ́гѡвъ цѣли́телѧ, ꙗ҆́кѡ мꙋ̑ки прїѧ́тъ за него̀. воспое́мъ ᲂу҆̀бо того̀, и҆ возопїе́мъ є҆мꙋ̀: призира́ѧ на ны̀, прїидѝ, фѡ́ко, съ на́ми, и҆ никто́же на ны̀.
Сѣда́ленъ ст҃ы́ѧ, гла́съ и҃. Подо́бенъ: Премꙋ́дрости:
Ѡ҆бнища́вшемꙋ сло́вꙋ, премно́гимъ милосе́рдїемъ, марі́е магдали́ни, ꙗ҆́вѣ ꙗ҆́кѡ ᲂу҆чени́ца и҆́стиннѡ послꙋжи́ла є҆сѝ: зрѧ́щи же сего̀ на крⷭ҇тѣ̀ вознесе́на, и҆ во гро́бѣ положе́на, рыда́ла є҆сѝ слезѧ́щи. тѣ́мже тѧ̀ почита́емъ, и҆ твоѐ соверша́емъ вѣ́рою торжество̀, мѷроно́сице сла́внаѧ: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.
Сла́ва, ст҃а́гѡ, гла́съ д҃: Подо́бенъ: Ско́рѡ предварѝ:
Наста̀ празднолю́бцы свѣ́тло торжество̀, па́мѧть бг҃омꙋ́драгѡ и҆ ст҃и́телѧ фѡ́ки, веселѧ́щи концы̀, сїѧ́ющи зарѧ́ми чꙋде́съ въ мі́рѣ, носѧ́щи человѣ́кѡмъ нескꙋ́днꙋю благода́ть: мо́литсѧ бо гдⷭ҇еви, спастѝ ро́дъ на́шъ.
И҆ ны́нѣ, бг҃оро́диченъ:
Ѡ҆бнови́ла є҆сѝ, чⷭ҇таѧ, бжⷭ҇твеннымъ ржⷭ҇тво́мъ твои́мъ, и҆стлѣ́вшее во страсте́хъ земноро́дныхъ ме́ртвенное сꙋщество̀: и҆ воздви́гла є҆сѝ всѧ̑ ѿ сме́рти къ животꙋ̀ нетлѣ́нїѧ. тѣ́мже тѧ̀ по до́лгꙋ блажи́мъ всѝ, дв҃о препросла́вленнаѧ, ꙗ҆́коже прорекла̀ є҆сѝ.
Крⷭ҇тобг҃оро́диченъ:
Дв҃о пренепоро́чнаѧ, мт҃и хрⷭ҇та̀ бг҃а, ѻ҆рꙋ́жїе про́йде твою̀ пресвѧтꙋ́ю дꙋ́шꙋ, є҆гда̀ распина́ема ви́дѣла є҆сѝ во́лею сн҃а и҆ бг҃а твоего̀: є҆го́же, бл҃гослове́ннаѧ, молѧ́щи не преста́й, проще́нїе прегрѣше́нїй на́мъ дарова́ти.
Пѣ́снь д҃. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Безъ смꙋще́нїѧ и҆мꙋ́щи мїрска́гѡ сꙋ́етства мы́сль, прише́дшемꙋ мі́ръ ве́сь спастѝ ѿ ле́сти послꙋжи́ла є҆сѝ.
Мы́ющисѧ слеза́ми, гро́ба живоно́снагѡ дости́гши, а҆́гг҃ла ᲂу҆зрѣ́ла є҆сѝ, возвѣща́юща хрⷭ҇то́во, марі́е, воскрⷭ҇нїе.
Се́рдце твоѐ непоро́чное во ѡ҆правда́нїихъ хрⷭ҇то́выхъ бы́сть: и҆ того̀ є҆ди́наго вожделѣ́ла є҆сѝ: кра́снаго добро́тою, достосла́внаѧ.
Бг҃оро́диченъ:
Дрема́нїемъ лѣ́ности мѧ̀ со́нъ грѣхо́вный, ѻ҆трокови́це, пости́же: бо́дренною моли́твою твое́ю возста́ви мѧ̀ къ покаѧ́нїю.
И҆́нъ. І҆рмо́съ:
Оу҆слы́шахъ, гдⷭ҇и, слꙋ́хъ тво́й и҆ ᲂу҆боѧ́хсѧ, ꙗ҆́кѡ неизрече́ннымъ совѣ́томъ, бг҃ъ сы́й присносꙋ́щный, ѿ дв҃ы проше́лъ є҆сѝ вопло́щсѧ. сла́ва снизхожде́нїю твоемꙋ̀, хрⷭ҇тѐ, сла́ва си́лѣ твое́й.
Свѣти́льника тѧ̀ сїѧ́юща пра́вды зна́емъ, дѣ́лы и҆ мꙋче́нїемъ, при́снѡ свѣтолꙋ́чными сїѧ́нїи, просвѣща́юща сердца̀ вѣ́рныхъ, и҆ недꙋ́гѡвъ мглꙋ̀, сла́вне, ѿгонѧ́ща.
Красе́нъ въ добро́тахъ мꙋче́нїѧ, фѡ́ко, ꙗ҆ви́лсѧ є҆сѝ: го́лꙋбь бо бж҃їй на версѣ̀ твое́мъ честнѣ́мъ сѣ́де, сказа̀, мꙋ́дре, страсте́мъ прича́стникꙋ бы́ти дх҃омъ.
Ѡ҆кормле́нїе и҆мꙋ́щїи, и҆̀же въ мо́ри, бг҃оно́се, твою̀ моли́твꙋ при́снѡ, тѧ́жкїѧ бꙋ́ри и҆збавлѧ́ютсѧ, пою́ще, тебє̀ ра́ди подаю́щаго и҆̀мъ и҆збавле́нїе спаси́тельное.
Бг҃оро́диченъ:
Нескве́рнаѧ, небла́знаѧ, ѡ҆скверне́ное моѐ се́рдце вре́дными помышле́ньми, и҆ престꙋпле́ньми ѡ҆калѧ́ное, ѡ҆чи́сти твои́ми къ пребл҃га́гѡ бг҃а бжⷭ҇твенными ᲂу҆тѣше́нїи.
Пѣ́снь є҃. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ; но ѡ҆брати́ мѧ, и҆ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Пра́баба, сїю̀ словесы̀ прельсти́вшаго, и҆ и҆згна́вшаго ѿ раѧ̀ дре́вле, зрѧ́щи нога́ми попира́ема чи́стыхъ же́нъ нра́въ мꙋ́жескїй стѧжа́вшихъ, съ ни́ми вѣ́чнѡ ра́дꙋетсѧ.
Оу҆ме́ршагѡ, и҆ во гро́бѣ затворе́ннагѡ, всѣ̑мъ жи́знь вдыха́ющагѡ, ᲂу҆ѧзвлѧ́ема любо́вїю: сла́дцѣй є҆гѡ̀ любвѝ приноша́еши мѵ́ро, магдали́на, честна́ѧ марі́е, и҆ слє́зныѧ пролива́еши а҆рѡма́ты.
По стрⷭ҇ти бжⷭ҇твеннѣй, по стра́шнѣмъ сп҃совѣ вознесе́нїи, прехо́диши сло́во всю́дꙋ честно́е возвѣща́ющи и҆ мнѡ́ги ᲂу҆ловлѧ́ющи прельща́ющыѧсѧ невѣ́дѣнїемъ, ꙗ҆́кѡ сло́ва ᲂу҆чени́ца сла́внаѧ.
Бг҃оро́диченъ:
И҆збавлѧ́етъ мѧ̀ па́дшаго къ грѣхѡ́внымъ многоплетє́ннымъ паде́жємъ, и҆́же и҆зъ тебє̀ роди́тисѧ благоизво́ливый за безмѣ́рнꙋю ми́лость, прест҃а́ѧ ѻ҆трокови́це: є҆го́же ᲂу҆молѝ всѧ́кагѡ вре́да и҆зба́витисѧ, вѣ́рою пою́щымъ тѧ̀.
И҆́нъ. І҆рмо́съ:
Гдⷭ҇и бж҃е на́шъ, ми́ръ да́ждь на́мъ, гдⷭ҇и бж҃е на́шъ, стѧжи́ ны, гдⷭ҇и, ра́звѣ тебє̀, и҆но́гѡ не вѣ́мы, и҆́мѧ твоѐ и҆менꙋ́емъ.
Ꙗ҆́коже че́стенъ ка́мень, проходѧ̀, прпⷣбне, слꙋжа́щыѧ ка́менїю лю́ди, къ бж҃їей вѣ́рѣ приве́лъ є҆сѝ словесы̀ твои́ми, и҆ чꙋде́сными ꙗ҆вле́нми.
Прпⷣбенъ въ прпⷣбныхъ показа́лсѧ є҆сѝ, сла́вне, и҆ въ мꙋ́ченицѣхъ свѣ́телъ, чꙋ́днѡ пострада́въ, и҆ борца̀ побѣди́въ, фѡ́ко чꙋ́дне.
Воспѣ́ша а҆́гг҃льскаѧ вѡ́инства, ви́дѧще пострада́вша тѧ̀, мч҃ниче, тве́рдѡ, и҆ безплѡ́тныѧ побѣжда́юща де́мѡны въ тлѣ́ннѣмъ твое́мъ, бл҃же́нне, тѣлесѝ.
Бг҃оро́диченъ:
Спаси́ мѧ волнꙋ́ющасѧ житїѧ̀ страстьмѝ, пречⷭ҇таѧ, и҆ ѡ҆кормѝ къ ти́химъ безстра́стїѧ приста́нищємъ, всѣ́хъ по́моще хрⷭ҇тїа́нъ, бг҃облагода́тнаѧ.
Пѣ́снь ѕ҃. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Глагѡ́лъ твои́хъ ѡ҆роше́нїе, печа́ли ва́ръ ѿѧ́тъ ᲂу҆ченикѡ́въ, честна́ѧ, ꙗ҆́коже возопи́ла є҆сѝ: хрⷭ҇то́съ воста̀, живо́тъ ꙗ҆ви́сѧ, ꙗ҆́сное ѡ҆блиста̀ со́лнце.
Сѐ твоѧ̀ свѣтоза́рнаѧ па́мѧть возсїѧ̀, просвѣща́ющи вѣ̑рныѧ, въ не́й пою́щыѧ тѧ̀, и҆ тмꙋ̀ ѿгонѧ́щи лꙋка́выхъ бѣсѡ́въ и҆скꙋше́нїѧ, досточꙋ́днаѧ.
Бг҃оро́диченъ:
Свѧще́нства мы́сленное, и҆ неприкоснове́нное ѡ҆чисти́лище, свѣ́щникъ свѣтови́дѣнъ ꙗ҆ви́ласѧ є҆сѝ, и҆ мо́стъ къ бг҃ꙋ преводѧ́й, и҆сповѣ́дающымъ тѧ̀ бцⷣꙋ, пренепоро́чнаѧ.
И҆́нъ. І҆рмо́съ:
Ꙗ҆́коже прⷪ҇ро́ка и҆зба́вилъ є҆сѝ и҆зъ глꙋбины̀ преиспо́днїѧ, хрⷭ҇тѐ бж҃е, и҆ менѐ ѿ грѣхѡ́въ мои́хъ и҆зба́ви, ꙗ҆́кѡ чл҃вѣколю́бецъ, и҆ ᲂу҆пра́ви живо́тъ мо́й, молю́сѧ.
Возвѣща́етъ тѝ хотѧ̑щаѧ бы́ти, человѣ́ческимъ гла́сомъ, пресла́вне, ча́шꙋ глаго́лѧ пи́ти тебѣ̀ спаси́тельнꙋю, по́сланный тѝ го́лꙋбь свы́ше.
По премно́гихъ по́тѣхъ, по болѣ́знехъ неизмѣ́рныхъ тѣ́ла, мечꙋ̀ свѧтꙋ́ю твою̀ главꙋ̀ преклони́лъ є҆сѝ, и҆ кровьмѝ зе́млю ѡ҆свѧти́лъ є҆сѝ.
Мє́ртвымъ ка́пищємъ не послꙋжи́въ, пребога́те, сме́рть претерпѣ́лъ є҆сѝ, и҆ живе́ши по сме́рти: сегѡ̀ ра́ди тѧ̀, фѡ́ко, ᲂу҆блажа́емъ.
Бг҃оро́диченъ:
Живы́й въ вы́шнихъ, во ст҃ꙋ́ю твою̀ ᲂу҆тро́бꙋ всели́сѧ, пло́ти подо́бїемъ мі́рови ꙗ҆влѧ́ѧсѧ: сегѡ̀ ра́ди тѧ̀, чⷭ҇таѧ, сла́вимъ.
Конда́къ ст҃ы́ѧ, гла́съ г҃. Подо́бенъ: Дв҃а дне́сь:
Предстоѧ́щи пресла́внаѧ ᲂу҆ крⷭ҇та̀ сп҃сова, со и҆ны́ми мно́гими, и҆ мт҃ри гдⷭ҇ни состра́ждꙋщи, и҆ сле́зы точа́щи, сїѐ въ похвалꙋ̀ приноша́ше, глаго́лющи: что̀ сїѐ є҆́сть стра́нное чꙋ́до, содержа́й всю̀ тва́рь, пострада́ти и҆зво́ли; сла́ва держа́вѣ твое́й.
І҆́косъ:
Влⷣка хрⷭ҇то́съ и҆ цр҃ь созда́нїѧ, не ѡ҆ста́вль нб҃са̀, сни́де, ꙗ҆́коже и҆зво́ли, и҆ пло́ть тлѣ́ннꙋю воспрїѧ́тъ во́лею: є҆го́же ви́дѣвши мт҃и непоро́чнаѧ на крⷭ҇тѣ̀ пригвожда́ема, съ дѣ́вами честны́ми предстоѧ́щи, и҆ магдали́на марі́а пла́чꙋщи. то́й бо та́мѡ сꙋ́щей, и҆ теплѣ́йшꙋю вѣ́рꙋ показꙋ́ющей при́снѡ послѣ́доваше хрⷭ҇тꙋ̀, и҆ гро́бъ зрѧ́ше, ѡ҆жида́ющи и҆ вопїю́щи: пострада́ти и҆зво́лилъ є҆сѝ, сла́ва держа́вѣ твое́й.
Пѣ́снь з҃. І҆рмо́съ:
Ѿтроцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Недꙋ́ги ѿгна́ла є҆сѝ разли̑чныѧ, споспѣшествꙋ́ющаго тебѣ̀ сло́ва и҆мꙋ́щи, є҆мꙋ́же предстои́ши ны́нѣ, вопїю́щи, мѷроно́сице: бл҃гослове́нъ є҆сѝ, гдⷭ҇и бж҃е, во вѣ́ки.
Є҆ди́на ви́дѣла є҆сѝ пре́жде и҆нѣ́хъ, живота̀ на́шего хрⷭ҇та̀ воста́вша, вертогра́дарѧ же того̀ непщева́ла є҆сѝ, вопїю́щи: бл҃гослове́нъ є҆сѝ, гдⷭ҇и бж҃е, во вѣ́ки.
Бг҃оро́диченъ:
Оу҆ста́вила є҆сѝ тече́нїе сме́ртное, безсме́ртнаго бг҃а ꙗ҆́кѡ заче́нши, и҆ ро́ждши, чⷭ҇таѧ, є҆мꙋ́же всѝ пои́мъ: бл҃гослове́нъ є҆сѝ, гдⷭ҇и бж҃е, во вѣ́ки.
И҆́нъ. І҆рмо́съ:
А҆́гг҃ломъ ѻ҆́троки и҆зъ ѻ҆гнѧ̀ спасы́й, и҆ гремѧ́щꙋю пе́щь преложивы́й на ро́сꙋ, бл҃гослове́нъ є҆сѝ, бж҃е ѻ҆тє́цъ на́шихъ.
Проше́дъ сквозѣ̀ пла́мень, ꙗ҆́коже трѝ ю҆́нѡши, неѡпале́нъ, мꙋ́чениче, пребы́лъ є҆сѝ, хрⷭ҇то́вою си́лою, пожи́вшагѡ въ тебѣ̀ па́че ᲂу҆ма̀.
Ты̀ ѻ҆гне́мъ бжⷭ҇твенныѧ любвѐ, мꙋ́чениче, внꙋ́трь распалѧ́емь, фѡ́ко, ѻ҆гню̀ ве́щномꙋ примѣша́ѧсѧ, пребыва́еши, мꙋ́дре, неѡпали́мь.
И҆спещре́нъ бжⷭ҇твенными добро́тами ꙗ҆́звенными, къ бг҃ꙋ восте́клъ є҆сѝ, твоемꙋ̀ подвигополо́жникꙋ, побѣ́ды вѣне́цъ ѿ негѡ̀ прїе́мь.
Бг҃оро́диченъ:
И҆збавлѧ́еми всѧ́кагѡ ѡ҆сꙋжде́нїѧ, дв҃о, чꙋ́днымъ рождество́мъ твои́мъ, гла́сы ра́достными пѣсносло́вимъ тѧ̀, приснобл҃же́ннаѧ.
Пѣ́снь и҃. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Свѣ́тло ꙗ҆ви́сѧ житїѐ твоѐ, зарѧ́ми ѡ҆блиста̀, ѽ магдали́но! добродѣ́тельныхъ дѣѧ́нїй, бжⷭ҇твеннагѡ проповѣ́данїѧ, є҆́же къ бж҃їю манове́нїю, и҆ лꙋча́ми ꙗ҆̀же къ зижди́телю любвѐ, є҆мꙋ́же пое́ши со а҆́гг҃лы: свѧще́нницы по́йте, лю́дїе превозноси́те є҆го̀ во вѣ́ки.
Оу҆ крⷭ҇та̀ предстоѧ́ла є҆сѝ, зрѧ́щи непра́ведное, сла́внаѧ, заколе́нїе, себѐ и҆злїѧ́вшагѡ, за неизрече́ннꙋю ми́лость, и҆ стена́нїи и҆ слеза́ми ѡ҆блива́ема, что̀ стра́нное, вопїѧ́ла є҆сѝ, марі́е, чꙋ́до; ка́кѡ ᲂу҆мерщвлѧ́етсѧ и҆ ᲂу҆мира́етъ, сме́рть ᲂу҆мертви́вый, живо́тъ сы́й є҆стество́мъ;
Бг҃оро́диченъ:
Ꙗ҆́кѡ бж҃їю мт҃рь тѧ̀ є҆диномꙋ́дреннѡ сла́вимъ, и҆ тва́ри вы́шшꙋю, чⷭ҇таѧ: ѡ҆ тебѣ́ бо ѡ҆сꙋжде́нїе є҆́же ѡ҆ а҆да́ма потреби́сѧ, и҆ ѿстꙋ́пльшее присво́исѧ человѣ́кѡвъ сꙋщество̀, пою́щее: свѧще́нницы благослови́те, лю́дїе превозноси́те є҆го̀ во вѣ́ки.
И҆́нъ. І҆рмо́съ:
Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки.
Ѿ пеле́нъ ѡ҆свѧти́ тѧ всѣ́хъ содѣ́тель бг҃ъ, и҆ въ мѣ́рꙋ дости́гъ во́зраста страда́нїй хрⷭ҇то́выхъ, пострада́лъ є҆сѝ, и҆ побѣди́лъ є҆сѝ нача̑ла си́лы вра́жїѧ, и҆ вѣнцено́сецъ дости́глъ є҆сѝ вы́шнихъ ѻ҆би́телей жили́ще.
Ко́рмчїѧ тѧ̀ и҆зрѧ́дна призыва́ютъ при́снѡ пла́вающїи, мꙋ́чениче, и҆ морски́хъ и҆збавлѧ́ютсѧ, мꙋ́дре, бѣ́дъ, благопрїѧ́тными твои́ми, сла́вне, моли́твами, воспѣва́юще всѣ́хъ цр҃ѧ̀ и҆ содѣ́телѧ и҆ бг҃а во вѣ́ки.
Ꙗ҆́кѡ а҆́гнца тѧ̀ неѕло́бива гдⷭ҇ни вразѝ ᲂу҆мерщвлѧ́ютъ, фѡ́ко, во глꙋбо́цѣй и҆ честнѣ́й ста́рости, врага̀, сла́вне, ѕлꙋ̀ нача́льника, мече́мъ ᲂу҆морѧ́ющаго, и҆сповѣ́данїѧ и҆ дерзнове́нїѧ твоегѡ̀ во вѣ́ки.
Бг҃оро́диченъ:
Ѡ҆чище́нїе была̀ є҆сѝ па́дшемꙋ на́шемꙋ тлѣ́нномꙋ є҆стествꙋ̀, поро́ждши а҆́гнца бж҃їѧ, взе́млющаго согрѣшє́нїѧ человѣ́кѡвъ, коне́чнымъ милосе́рдїемъ: тѣ́мже тѧ̀ пое́мъ ра́достнѡ, дв҃о бцⷣе.
Пѣ́снь ѳ҃. І҆рмо́съ:
Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.
Къ бжⷭ҇твеннѣй преложи́ласѧ є҆сѝ ны́нѣ ра́дости, къ ра́йстѣй широтѣ̀ простра́ннѣй, къ мы́слєннымъ и҆ премі̑рнымъ ѻ҆би́телемъ, и҆дѣ́же преподо́бныхъ чи́нове: и҆дѣ́же є҆́сть гла́съ чи́стъ свѣ́тлѡ пра́зднꙋющихъ, марі́е бг҃оно́снаѧ. тѣ́мже тѧ̀ всѝ ᲂу҆блажа́емъ.
Ничто́же предпочла̀ є҆сѝ сꙋ́щихъ на землѝ па́че любвѐ хрⷭ҇та̀ бг҃а, но тогѡ̀ є҆ди́нагѡ снѣда́ема добро́тами, и҆ непосре́дственнѡ, всечестна́ѧ, посыла́емыми лꙋча́ми, стопа́мъ сегѡ̀, вопїѧ́ла є҆сѝ, послѣ́дꙋющи: тѧ̀ велича́ю, многоми́лостиве.
Ѡ҆боже́нїе полꙋчи́вши бг҃отво́рное, и҆ пото́ка напи́вшисѧ благода́ти, и҆ мзды̀ болѣ́зней прїе́мши бг҃онача́льнѡ, и҆ а҆пⷭ҇льскимъ чинѡ́мъ счета́ема, магдали́но, ᲂу҆чени́ца сло́ва, любо́вїю чтꙋ́щыѧ тѧ̀ твои́ми моли́твами сохранѝ.
Бг҃оро́диченъ:
Ꙗ҆́кѡ мт҃и пострада́вшагѡ за ны̀, дꙋшетлѣ́нныхъ страсте́й мѧ̀ и҆зба́ви: ꙗ҆́кѡ ми́лостива, разрѣшѝ согрѣше́нїй мои́хъ плени̑цы: ꙗ҆́кѡ блага̀, ᲂу҆блажѝ ны́нѣ ѡ҆ѕло́бленнꙋю мою̀ дꙋ́шꙋ бѣсо́вскими и҆скꙋше́нїи, дв҃о бцⷣе,
И҆́нъ. І҆рмо́съ:
Бл҃гослове́нъ гдⷭ҇ь бг҃ъ і҆и҃левъ, воздви́гнꙋвый ро́гъ спасе́нїѧ на́мъ, въ домꙋ̀ дв҃довѣ ѻ҆́трока своегѡ̀: въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.
Ꙗ҆́кѡ нб҃о ѕвѣ́здно, бїе́нїй добро́тами чꙋде́съ, мꙋ́чениче, позна́лсѧ є҆сѝ, фѡ́ко, просвѣща́ѧ при́снѡ подсо́лнечнꙋю, и҆ рѣшѧ̀ тмꙋ̀ страсте́й, и҆ всѧ́кагѡ ѕлоче́стїѧ: сегѡ̀ ра́ди вѣ́рою тѧ̀ воспѣва́емъ.
Ты̀ тѣ́сный ше́ствовалъ є҆сѝ на землѝ, мꙋ́чениче, пꙋ́ть, наде́ждами вѣ́чнꙋющихъ красѡ́тъ, фѡ́ко, благоче́стнѡ разширѧ́ѧсѧ, и҆ всѧ̑ ᲂу҆тѣсни́лъ є҆сѝ вра̑жїѧ лю̑таѧ кова̑рства.
Свѧще́нное торжество̀, и҆ честны́й тво́й пра́здникъ ны́нѣ наста̀, носѧ́щь на́мъ ра́дость соверше́нꙋ. въ се́й сла́вѧтсѧ твоѧ̑ до́блєсти вои́стиннꙋ и҆ борє́нїѧ: въ не́йже помина́й на́съ, страстоно́сче и҆ мꙋ́чениче.
Бг҃оро́диченъ:
Но́сиши моѐ подо́бїе, ѻ҆те́ческїй и҆мѣ́ѧ зра́къ, ѽ сн҃е мо́й! хо́щеши бо земны́хъ лю́тое ꙗ҆́вѣ безѻбра́зїе и҆сцѣли́ти, вопїѧ́ше пречⷭ҇таѧ, рꙋка́ми хрⷭ҇та̀ носѧ́щи, ю҆́же пѣсносло́вимъ гла̑сы немо́лчными.
Свѣти́ленъ. Подо́бенъ: Свѣ́те неизмѣ́нный:
Со́лнце незаходи́мое, ѻ҆трокови́це, є҆́же ѿ ѻ҆ц҃а̀ пре́жде вѣ̑къ возсїѧ́вшее, во гро́бѣ є҆вре́йскїй со́нмъ запеча́та: по воскре́сшаго ви́дѣла є҆сѝ пе́рвѣе, марі́е, и҆ ᲂу҆ч҃никѡ́мъ возвѣсти́ла є҆сѝ.
Сла́ва, ст҃а́гѡ:
Ст҃и́телей ᲂу҆краше́нїе, и҆ ни́щихъ застꙋ́пникъ, ты̀ ꙗ҆ви́лсѧ є҆сѝ, бг҃омꙋ́дре ѻ҆́ч҃е, и҆ сто́лпъ добродѣ́телей: тѣ́мже помина́й всѧ̑ пою́щыѧ тѧ̀, фѡ́ко.
Бг҃оро́диченъ:
Данїи́лъ преднаписꙋ́етъ тѧ̀ несѣко́мꙋю го́рꙋ, и҆зъ неѧ́же чⷭ҇тны́й ка́мень ѿсѣче́сѧ, и҆ и҆стнѝ і҆́дѡльскїѧ хра́мы, бг҃ороди́тельнице марі́е.
На стїхо́внѣ ѻ҆ктѡ́иха. Сла́ва, гла́съ д҃:
Ѿ младе́нства бы́лъ є҆сѝ гдⷭ҇еви рачи́тель, фѡ́ко всеблаже́нне мꙋ́дре: и҆́бо ѻ҆рꙋ́жїе крⷭ҇та̀ на ра́мо взе́мъ, неꙋкло́ннѡ ше́ствовалъ є҆сѝ пꙋте́мъ и҆́стины, и҆́мже а҆́гг҃лѡмъ люби́мь бы́лъ є҆сѝ, бѣсѡ́мъ сопроти́вникъ, и҆ мі́рови моли́твенникъ ꙗ҆́вльсѧ и҆зрѧ́денъ.
И҆ ны́нѣ, гла́съ и҃:
Во́лею ѡ҆бнища́вшемꙋ нището́ю мое́ю, премно́гимъ благоꙋтро́бїемъ хрⷭ҇тꙋ̀ бг҃ꙋ, магдали́на мр҃і́а, ꙗ҆́кѡ ᲂу҆чени́ца вѣ́рнѡ послꙋжи́вши, на дре́вѣ просте́рта, и҆ во гро́бѣ затворе́на ви́дѣвши, вопїѧ́ше, сле́зы точа́щи: что̀ стра́нное видѣ́нїе, и҆́же мє́ртвыѧ животворѧ́й, ка́кѡ ме́ртвъ вмѣнѧ́етсѧ; кі̑ѧ мѵ́ры принесꙋ̀ и҆змѣни́вшемꙋ мѧ̀ смра́да де́мѡнскагѡ; кі̑ѧ сле́зы пролїю̀ ѿ сле́зъ и҆змѣни́вшемꙋ мою̀ прама́терь; но, ѽ всѧ́ческихъ цр҃ю̀! ꙗ҆́коже вертогра́да храни́тель ꙗ҆ви́лсѧ є҆сѝ, росо́ю твои́хъ гл҃гѡ́лъ ва́ръ ѿе́млеши, ре́къ къ не́й: къ мои̑мъ бра́тїѧмъ ше́дше, бл҃говѣ́щенїѧ ра́дость возопі́й: восхождꙋ́ бо ко ѻ҆ц҃ꙋ̀, и҆ бг҃ꙋ моемꙋ̀ и҆ бг҃ꙋ ва́шемꙋ, ꙗ҆́кѡ да пода́мъ мі́рови ве́лїю ми́лость.
На лїтꙋргі́и, бл҃жє́нна ѻ҆ктѡ́иха, и҆ ст҃ы́ѧ, пѣ́снь г҃, на д҃. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. Сті́хъ: Въ цр҃квахъ благослови́те бг҃а, гдⷭ҇а ѿ и҆стѡ́чникъ і҆и҃левыхъ. А҆пⷭ҇лъ къ корі́нѳѧнѡмъ, зача́ло рм҃а. А҆ллилꙋ́їа, гла́съ а҃: Терпѧ̀ потерпѣ́хъ гдⷭ҇а, и҆ внѧ́тъ мѝ. Є҆ѵⷢ҇лїе лꙋкѝ, зача́ло л҃д. Прича́стенъ: Ра́дꙋйтесѧ, пра́веднїи:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.