← претходни дан | Минеј — Јул | следећи дан →
21 июля: Преподобных Симеона, Христа ради юродивого, и Иоанна, спостника его. Пророка Иезекиила
Мѣ́сѧца тогѡ́же въ к҃а-й де́нь.
Прпⷣбныхъ ѻ҆тє́цъ на́шихъ, сѷмеѡ́на хрⷭ҇та̀ ра́ди ю҆ро́дивагѡ, и҆ і҆ѡа́нна спо́стника є҆гѡ̀:
И҆ ст҃а́гѡ прⷪ҇ро́ка і҆езекі́илѧ.
Стїхи̑ры прпⷣбныхъ, гла́съ д҃. Подо́бенъ: Да́лъ є҆сѝ зна́менїе:
Въ пꙋсты́ню все́льшесѧ ꙳ є҆диномы́слїемъ бл҃же́ннїи, ꙳ плѡтска́ѧ двиза̑нїѧ посто́мъ и҆ моли́твами, ꙳ и҆ видѣ́нїи свѣ́тлыми ᲂу҆вѧди́сте ꙗ҆́вѣ, ꙳ сердца́ же ᲂу҆ѧсни́сте, ꙳ прїѧ́тнѡ содѣ́лавше дꙋхѡ́внымъ преда́нїємъ, ꙳ сѷмеѡ́не и҆ і҆ѡа́нне, ꙳ мона́шествꙋющихъ ᲂу҆твержде́нїе.
Бꙋ́ими притворе́нїи ꙳ мꙋдреца̀ ѕло́бы ѡ҆безꙋ́милъ є҆сѝ, блаже́нне, ꙳ соверша́ѧ пресла̑внаѧ, ꙳ дѣ́йствꙋѧ зна́менїѧ, ꙳ де́мѡны ѿгонѧ̀, ꙳ просвѣща́ѧ сꙋ́щыѧ въ нощѝ грѣхо́внѣй, ѻ҆́ч҃е. и҆ ᲂу҆́мъ несмꙋще́нъ ꙳ посредѣ̀ пли́щей соблю́лъ є҆сѝ, сѷмеѡ́не, ꙳ безстра́стїе ѿ бг҃а прїе́мь.
Смире́нъ мꙋдрова́нїемъ, и҆ ми́лостивъ ꙳ и҆ бг҃олюби́въ, и҆ любвѐ и҆спо́лненъ, ꙳ ꙗ҆ви́лсѧ є҆сѝ, бг҃одохнове́нне, ꙳ ᲂу҆миле́нъ и҆ кро́токъ, ꙳ ꙗ҆́коже а҆́гг҃лъ по землѝ ѡ҆бходѧ̀, ꙳ и҆ житїѐ и҆мѣ́ѧ небе́сное: ꙳ тѣ́мже почѝ на тебѣ̀, ꙳ ꙗ҆́коже на чистотѣ̀, блаже́нне сѷмеѡ́не, ꙳ ѻ҆ц҃ъ, и҆ сн҃ъ, и҆ дх҃ъ ст҃ы́й.
И҆́ны стїхи̑ры прⷪ҇ро́ка, гла́съ и҃. Подо́бенъ: Ѽ пресла́внагѡ чꙋдесѐ!
І҆езекі́иле чꙋ́дне, ꙳ ю҆́же па́че ᲂу҆ма̀ мо́лнїю, ꙳ и҆ сла́вꙋ неизрече́ннꙋю гдⷭ҇ню, премꙋ́дре, ꙳ херꙋві́мы бжⷭ҇твенными носи́мꙋ и҆ восходѧ́щꙋ, ꙳ и҆ пѣва́емꙋ тма́ми ᲂу҆́стъ, ꙳ ᲂу҆ма̀ чистото́ю, ꙳ ᲂу҆́мнѡ ви́дѣлъ є҆сѝ, ꙳ пред̾ѡчи́стивъ дꙋ́шꙋ и҆ тѣ́ло, бг҃облаже́нне.
І҆езекі́иле бг҃опрїѧ́тне, ꙳ ꙗ҆́кѡ хрⷭ҇то́въ подо́бникъ, ꙳ чꙋжда́гѡ до́лга томи́тельство претерпѣ́лъ є҆сѝ, ꙳ лю́тѣ и҆стѧза́емь, ꙳ преднаписꙋ́ѧ хотѧ́щее ꙳ честна́гѡ ра́ди крⷭ҇та̀, ꙳ бы́ти мі́рꙋ спасе́нїе, бг҃оѧвле́нне, и҆ и҆збавле́нїе. ꙳ є҆гѡ́же причасти́тисѧ всѣ̑мъ ны́нѣ ᲂу҆молѝ ꙳ воспѣва́ющымъ тѧ̀.
І҆езекі́иле бг҃одохнове́нне, ꙳ сви́токъ прїе́мь, ꙳ и҆зъ рꙋкѝ вседержи́телѧ, ꙳ ꙗ҆́вѣ ме́да сладча́йши ᲂу҆стѡ́мъ, ꙳ свѧщенноѧвле́ненъ, бг҃ови́дѣнъ, ꙳ и҆ бг҃осло́въ бг҃озри́теленъ ты̀ бы́лъ є҆сѝ, ꙳ прогнѣ́вающемꙋ собо́рꙋ ꙳ ѿ бг҃а, сла́вне, ꙳ ра́зꙋмъ пода́въ.
Сла́ва, и҆ ны́нѣ, бг҃оро́диченъ:
Ра́дꙋйсѧ, дꙋша́мъ просвѣще́нїе, ꙳ согрѣша́ющымъ проще́нїе, ꙳ неради̑вымъ и҆справле́нїе: ꙳ ра́дꙋйсѧ, ᲂу҆тѣше́нїе и҆ ра́дость, ꙳ скорбѧ́щихъ помо́щнице: ꙳ ра́дꙋйсѧ, бл҃га́ѧ, ꙳ немощны́хъ дꙋ́шъ и҆сцѣле́нїе: ꙳ ра́дꙋйсѧ, примире́нїе къ бг҃ꙋ и҆ хода́таице, ꙳ серафі̑мъ всѣ́хъ ꙗ҆́кѡ сꙋ́щи ст҃ѣ́йши, чⷭ҇таѧ.
Крⷭ҇тобг҃оро́диченъ:
Что̀ зри́мое видѣ́нїе, ꙳ є҆́же мои́ма ѻ҆чи́ма ви́дитсѧ, ѽ влⷣко; ꙳ содержа́й всю̀ тва́рь, ꙳ на дре́во воздви́женъ бы́въ, ꙳ и҆ ᲂу҆мира́еши всѣ̑мъ даѧ́й жи́знь, ꙳ бцⷣа пла́чꙋщисѧ глаго́лаше, ꙳ є҆гда̀ ᲂу҆зрѣ̀ на крⷭ҇тѣ̀ возноси́ма, ꙳ и҆зъ неѧ̀ неизрече́ннѡ возсїѧ́вшаго ꙳ бг҃а и҆ чл҃вѣ́ка.
Тропа́рь, гла́съ д҃:
Бж҃е ѻ҆тє́цъ на́шихъ, творѧ́й при́снѡ съ на́ми по твое́й кро́тости, не ѿста́ви ми́лость твою̀ ѿ на́съ: но моли́твами и҆́хъ въ ми́рѣ ᲂу҆пра́ви живо́тъ на́шъ.
Тропа́рь, прⷪ҇ро́ка, гла́съ в҃:
Прⷪ҇ро́ка твоегѡ̀ і҆езекі́илѧ па́мѧть, гдⷭ҇и, пра́зднꙋюще, тѣ́мъ тѧ̀ мо́лимъ, спасѝ дꙋ́шы на́шѧ.
Канѡ́нъ прпⷣбныхъ. Творе́нїе ѳеофа́ново.
Гла́съ д҃. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Прича́стїемъ є҆́же къ бг҃ꙋ, преподо́бне, свѣ́тъ бы́лъ є҆сѝ, и҆ къ немꙋ̀ ѿлꙋчи́лсѧ є҆сѝ, сѷмеѡ́не, жела́нїемъ кра́йнимъ: благи̑мъ наде́ждамъ твои̑мъ, ѻ҆́ч҃е, и҆сполне́нїе прїѧ́лъ є҆сѝ.
Жела́нїемъ є҆́же къ бг҃ꙋ распала́емь, мі́ръ ѡ҆ста́вилъ є҆сѝ, спꙋ́тника, ѻ҆́ч҃е, ѡ҆брѣ́тъ і҆ѡа́нна сла́внаго, съ ни́мже стезю̀ проше́лъ є҆сѝ спаси́тельнꙋю, ра́дꙋѧсѧ.
Ѡ҆богати́тисѧ ника́коже и҆стоща́емыми вожделѣ́вше, бога́тство и҆ сла́вꙋ вре́меннꙋю мꙋ́дрїи, и҆ пи́щꙋ мимотекꙋ́щꙋю, и҆ мїрско́е достоѧ́нїе доблемꙋ́дреннѣ ѿри́нꙋсте.
Бг҃оро́диченъ:
Краснꙋ̀ и҆ и҆збра́ннꙋ и҆ всече́стнꙋ разꙋмѣ́въ тѧ̀, бж҃їй, пренепоро́чнаѧ, сн҃ъ, тво́й сы́нъ бы́сть, сы́ны сотворѝ бл҃года́тїю, бцⷣꙋ тѧ̀ чтꙋ́щыѧ.
И҆́нъ канѡ́нъ прⷪ҇ро́ка.
Гла́съ и҃. Пѣ́снь а҃. І҆рмо́съ:
Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.
Хотѧ́щꙋ восхвали́ти і҆езекі́илѧ прⷪ҇ро́ка твоего̀, дарова́нїе мѝ пода́ждь, благодѣ́телю, и҆ бл҃года́ть дꙋхо́внꙋю.
И҆мѣ́ѧ восхождє́нїѧ і҆езекі́иль свѧще́нный, неизглаго́ланныхъ самови́децъ, гдⷭ҇нею сла́вою ѡ҆зарѧ́етсѧ.
Оу҆пра́вивъ твоѐ житїѐ, и҆ по́мыслꙋ взыгра̑нїѧ плотска̑ѧ повинꙋ́въ, прⷪ҇ро́къ ꙗ҆ви́лсѧ є҆сѝ бг҃опрїѧ́тный.
Бг҃оро́диченъ:
Ве́сь просвѣще́нъ, къ восто́кѡмъ многопѣ́тꙋю ѡ҆браще́ннꙋю две́рь прⷪ҇ро́чествꙋеши дв҃ꙋ, бг҃одохнове́нне.
Пѣ́снь г҃. І҆рмо́съ:
Весели́тсѧ ѡ҆ тебѣ̀ цр҃ковь твоѧ̑, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.
Оу҆се́рднѡ къ мы́слєннымъ совле́клсѧ є҆сѝ дѣ́ланїємъ, сѷмеѡ́не, побѣжда́ѧ вра́жїѧ полкѝ бж҃е́ственнымъ посо́бїемъ дх҃а.
Ра́нами моли́твенными, и҆ воздержа́нїѧ бїе́нїи, прпⷣбне, страсте́й є҆гѵ́петъ, ѻ҆́ч҃е і҆ѡа́нне, ᲂу҆ѧзви́лъ є҆сѝ.
Оу҆мори́ша врага̀ пѡ́стницы твоѝ, і҆и҃се, ᲂу҆мерщвле́нїе ра́достнѡ, влⷣко, твоѐ живоно́сное возжела́вше.
Бг҃оро́диченъ:
И҆збавлѧ́ющаго человѣ́ки преслꙋша́нїѧ лю́тагѡ паде́нїѧ, всемꙋ̀ вино́внаго, чⷭ҇таѧ всенепоро́чнаѧ, родила̀ є҆сѝ.
И҆́нъ. І҆рмо́съ:
Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Оу҆мерщвле́нїе стѧжа́въ страстно́е, зри́ши, сла́вне, ме́ртвыхъ пронапи́санное ꙗ҆́кѡ прⷪ҇ро́къ воста́нїе.
Ми́лостивъ быва́ѧ своемꙋ̀ бг҃ъ созда́нїю, бжⷭ҇твенъ ра́зꙋмъ тѧ̀ заблꙋждє́ннымъ, бг҃оѧвле́нне, показа̀.
Оу҆ѧсни́ тѧ, сла́вне, бжⷭ҇тва̀ сїѧ́нїе, и҆́же на херꙋві́мѣхъ сѣдѧ́щее, бг҃оглаго́ливе, тебѣ̀ ꙗ҆́вльшеесѧ.
Бг҃оро́диченъ:
Ни́вꙋ прⷪ҇ро́къ тво́й прозорли́выма чⷭ҇тꙋю зри́тъ ѻ҆чи́ма, дѣ́вства соблюде́нный, бл҃годѣ́телю, тебѣ̀ вхо́дъ.
Конда́къ прⷪ҇ро́ка, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Бж҃їй ꙗ҆ви́лсѧ є҆сѝ прⷪ҇ро́къ, і҆езекі́иле чꙋ́дне, воплоще́нїе гдⷭ҇не всѣ̑мъ провозвѣсти́лъ є҆сѝ, сего̀ а҆́гнца и҆ зижди́телѧ сн҃а бж҃їѧ ꙗ҆́вльшасѧ во вѣ́ки.
Сѣда́ленъ прпⷣбныхъ, гла́съ є҃: Подо́бенъ: Собезнача́льное сло́во:
Согла́сїемъ бжⷭ҇твеннымъ ѡ҆зарѧ́еми, въ пꙋти̑ ведꙋ́щыѧ къ бжⷭ҇твєннымъ сїѧ́нїємъ ходи́сте вѣ́рнѡ, ѻ҆тцы̀ прпⷣбнїи, и҆ врагѡ́въ ѿбѣ́гше прило́гѡвъ, сы́нове свѣ́та и҆ днѐ ꙗ҆ви́стесѧ, і҆ѡа́нне и҆ сѷмеѡ́не бг҃облаже́ннїи.
Сла́ва, прⷪ҇ро́ка, гла́съ г҃. Подо́бенъ: Красотѣ̀ дѣ́вства:
Сло́ва воплоще́нїе пред̾ꙋѧсни́лъ є҆сѝ, бжⷭ҇твеннымъ дх҃омъ ѡ҆зарѧ́емь, вели́кїй въ бжⷭ҇твенныхъ прⷪ҇ро́цѣхъ і҆езекі́иле бг҃одохнове́нне. тѣ́мже ꙗ҆́кѡ прⷪ҇ро́ка тѧ̀ свѧще́ннѡ ᲂу҆блажа́емъ, и҆ торжествꙋ́емъ па́мѧть твою̀ дне́сь, согла́снѡ вопїю́ще тѝ, мꙋ́дре: моли́сѧ хрⷭ҇тꙋ̀, спастѝ дꙋ́шы на́шѧ.
И҆ ны́нѣ, бг҃оро́диченъ:
Недомы́сленно и҆ непостижи́мо є҆́сть, влⷣчце бг҃ора́дованнаѧ, є҆́же содѣ́ланное ѡ҆ тебѣ̀ стра́шное бж҃їе та́инство: и҆́бо неѡб̾име́ннаго заче́нши родила̀ є҆сѝ, пло́тїю ѡ҆бложе́на ѿ пречⷭ҇тыхъ крове́й твои́хъ. є҆го́же всегда̀, чⷭ҇таѧ, ꙗ҆́кѡ сн҃а твоего̀ молѝ, спасти́сѧ дꙋша́мъ на́шымъ.
Крⷭ҇тобг҃оро́диченъ:
Неискꙋсобра́чнаѧ чⷭ҇таѧ и҆ мт҃и твоѧ̀, хрⷭ҇тѐ, ви́дѧще тѧ̀ ме́ртва ви́сѧща на крⷭ҇тѣ̀, мт҃рски пла́чꙋщи гл҃го́лаше. что̀ тебѣ̀ воздадѐ є҆вре́йскїй беззако́нный собо́ръ и҆ неблагода́рный, и҆́же мно́гихъ и҆ вели́кихъ твои́хъ, сн҃е мо́й, дарѡ́въ наслади́выйсѧ; пою̀ твоѐ бжⷭ҇твенное снизхожде́нїе.
Пѣ́снь д҃. І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Соедини́вшесѧ къ стезѣ̀ пра́вды, бг҃оно́снагѡ ні́кѡна въ бжⷭ҇твенныѧ ѻ҆гра̑ды внидо́сте, преподо́бнїи, спаси́тельнымъ сїѧ́нїемъ, сегѡ̀ наказа́нїи ѡ҆богати́стесѧ.
Є҆диноѻбра́зныхъ, и҆ прпⷣбнѡ смы́слѧщихъ, бг҃оно́сный и҆ прпⷣбный ви́дѣвъ ва́ю, бжⷭ҇твенными повѣстьмѝ, и҆ бжⷭ҇твенною ѻ҆де́ждою мона́шескою ᲂу҆красѝ.
Се́рдце твоѐ скрижа́ль ѡ҆чище́нꙋ, ст҃а́гѡ дх҃а благода́ть ѡ҆брѣ́тши, ѻ҆́ч҃е, написа̀ соверше́нно безстра́стїе, вѣ́рꙋ и҆ любо́вь нелицемѣ́рнꙋ.
Бг҃оро́диченъ:
Сѣдѧ́й на престо́лѣ превознесе́ннѣ, херꙋві́мстѣмъ, ꙗ҆́кѡ престо́лъ тѧ̀ и҆мѣ̀, на ѡ҆б̾ѧ́тїѧхъ твои́хъ почи́въ, марі́е бг҃оневѣ́сто, препросла́вленный бг҃ъ на́шъ.
И҆́нъ. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.
На тебѣ̀ рꙋка̀ бы́сть твоегѡ̀ влⷣки и҆ вседержи́телѧ, неизглагѡ́ланнаѧ ᲂу҆ча́щи, и҆ просвѣща́ющи тѧ̀ бжⷭ҇твенными велѣ́ньми.
Ви́дѣти ꙗ҆́кѡ сподо́билсѧ є҆сѝ ᲂу҆жа́снѡ бжⷭ҇твєннаѧ видѣ̑нїѧ, на лицы̀ па́лъ є҆сѝ, и҆ гла́съ ᲂу҆слы́шалъ є҆сѝ бжⷭ҇твеннагѡ дх҃а.
Да́нный твои̑мъ ᲂу҆стѡ́мъ и҆зъ рꙋкѝ гдⷭ҇ни сви́токъ, и҆зрѧ́дне, се́рдце твоѐ ᲂу҆сладѝ, и҆ прⷪ҇ро́ка бжⷭ҇твенна совершѝ.
Бг҃оро́диченъ:
Сїѧ́ющꙋ ви́дѣ і҆езекі́иль две́рь бжⷭ҇твеннꙋ, є҆́юже про́йде гдⷭ҇ь, затворе́ннꙋ сїю̀ сохранѝ.
Пѣ́снь є҃. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.
Пресвѣ́тлꙋ зарю̀, і҆ѡа́нне, прїи́мъ, ꙗ҆́кѡ со́лнце ꙗ҆ви́лсѧ є҆сѝ, де́мѡнскꙋю тмꙋ̀ ѿгна́въ, достосла́вне.
Твои́мъ жела́нїемъ, хрⷭ҇тѐ, ѡ҆крили́вшесѧ прпⷣбнїи, жела̑нїѧ тѣлє́снаѧ, ꙗ҆́коже пѣ́нꙋ морскꙋ́ю, мꙋ́дреннѡ ѿтрѧсо́ша.
Си́лою бжⷭ҇твенною дꙋ́шы ᲂу҆крѣпи́вше, въ пꙋсты́ню всели́стесѧ, ѡ҆пꙋстѣва́юще стра̑сти, ѻ҆тцы̀ бг҃омꙋ́дрїи.
Бг҃оро́диченъ:
Тече́нїе преста̀ тлѣ́нное, дв҃а бо нетлѣ́ннѡ породѝ бг҃а сло́ва, вы́ше є҆стества̀ и҆ сло́ва, дв҃ою пребы́вши.
И҆́нъ. І҆рмо́съ:
Оу҆́тренююще, вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.
І҆езекі́иле бл҃же́нне бг҃опрїѧ́тне, ѡ҆браща́тисѧ всѣ́хъ согрѣша́ющихъ наста́вилъ є҆сѝ словесы̀ твои́ми.
Во все́мъ подо́бѧщесѧ гдⷭ҇еви прⷪ҇ро́къ: ѡ҆ чꙋжди́хъ бо согрѣше́нїихъ молѧ́шесѧ.
Виті́йстїи тѧ̀ ѧ҆зы́цы не мо́гꙋтъ восхвали́ти: пренбⷭ҇ною бо ᲂу҆краси́лсѧ є҆сѝ свѣ́тлостїю.
Бг҃оро́диченъ:
Бжⷭ҇твенный зрѧ́ше тѧ̀ две́рь і҆езекі́иль, є҆́юже на́мъ возсїѧ̀ свѣтода́вецъ и҆ гдⷭ҇ь.
Пѣ́снь ѕ҃. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости, ѿ ре́бръ твои́хъ и҆сте́кшею кро́вїю.
Оу҆́мъ тво́й ве́сь къ бг҃ꙋ простира́ѧ, непреста́нными поꙋче́нїи плотскі́ѧ любвѐ не пощадѣ́лъ є҆сѝ, благи́хъ тебѣ̀ хода́тайствꙋѧ, сѷмеѡ́не, присвое́нїе.
Ни скве́рны, ни вра́ски прїѧ́лъ є҆сѝ, бл҃же́нне, посредѣ̀ мі́ра живы́й, чи́стыми же па́че моли́твами ѡ҆чища́еши дꙋшє́вныѧ сквє́рны притека́ющымъ тѝ.
Сы́й плотски́хъ мꙋдрова́нїй вы́шши, по́мысломъ не ᲂу҆ѧзви́лсѧ є҆сѝ, посредѣ̀ же́нъ ѡ҆бнажа́ѧсѧ: безстра́стїѧ бо ѻ҆де́ждею, сѷмеѡ́не, ѡ҆бле́клсѧ є҆сѝ.
Бг҃оро́диченъ:
Оу҆сты̀ и҆ по́мысломъ и҆ се́рдцемъ, пречⷭ҇таѧ, тѧ̀ бцⷣꙋ проповѣ́дꙋемъ: тобо́ю бо бг҃ꙋ примири́хомсѧ ѿринове́ннїи престꙋпле́нїемъ пе́рвѣе пра́ѻтца.
И҆́нъ. І҆рмо́съ:
Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.
Ви́дѣти сподо́билсѧ є҆сѝ бг҃а, прⷪ҇ро́че чꙋ́дный, всѧ́кагѡ ꙗ҆вле́нїѧ веще́ственна ѡ҆чи́щсѧ, преблаже́нне.
Пло́ти превы́ше бы́въ, взѧ́тсѧ превысо́кою си́лою дх҃а, и҆ свѣ́та чи́стагѡ ꙗ҆ви́лсѧ є҆сѝ и҆спо́лненъ.
Прече́стно житїѐ и҆мы́й, ликова́нїе нбⷭ҇ное, пѣ̑нїѧ и҆спꙋща́ющее, зри́ши херꙋві́мскаго вседержи́телѧ.
Бг҃оро́диченъ:
Мт҃рь и҆ дв҃ꙋ вои́стиннꙋ, во ѻ҆́бразѣ ви́дѣлъ є҆сѝ две́рь многосвѣ́тлꙋю, бг҃ꙋ и҆ человѣ́кѡмъ хода́таицꙋ.
Конда́къ прпⷣбныхъ, гла́съ в҃. Подо́бенъ: Твє́рдыѧ:
Во пло́ти ꙗ҆́вльшасѧ безпло́тнаго, и҆ добродѣ́тельми премі́рнѡ просїѧ́вшаго, сѷмеѡ́на равноа́гг҃льнаго и҆ бг҃оно́снаго восхва́лимъ, съ ни́мже і҆ѡа́нна приснопа́мѧтнаго, вѣ́рою и҆ любо́вїю, ꙗ҆́кѡ молѧ́щыѧсѧ гдⷭ҇ꙋ непреста́ннѡ ѡ҆ всѣ́хъ на́съ.
Пѣ́снь з҃. І҆рмо́съ:
Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Ѡ҆держи́мь хрⷭ҇топодо́бною, ѻ҆́ч҃е, бжⷭ҇твенною любо́вїю, дрꙋги́хъ спастѝ, ра́достнѡ ве́сь са́мъ вопїѧ̀ и҆зда́лсѧ є҆сѝ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Ѿ нб҃сѐ тебѣ̀ по́даннꙋю, ѻ҆́ч҃е, прїе́млеши пи́щꙋ: се́ю препитава́еши всѧ̑ благопоко́рнѡ прїе́млющыѧ твоѧ̑ повелѣ̑нїѧ, и҆ до́лꙋ влекꙋ́щїй грѣ́хъ ѡ҆ставлѧ́ющыѧ, бл҃же́нне.
Послѣ́довавъ ѻ҆те́чєскимъ преда́нїємъ, ѻ҆́ч҃е мꙋ́дре, па́гꙋбы ѻ҆рїге́новы бѣ́гати ѕлочести́выѧ заповѣ́далъ є҆сѝ зовꙋ́щымъ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Бг҃оро́диченъ:
Вы́шнѧгѡ ѡ҆свѧще́нное бжⷭ҇твенное селе́нїе, ра́дꙋйсѧ, тобо́ю бо даде́сѧ ра́дость, бцⷣе, зовꙋ́щымъ: бл҃гослове́на ты̀ въ жена́хъ є҆сѝ, всенепоро́чнаѧ влⷣчце.
И҆́нъ. І҆рмо́съ:
Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.
Хра́мъ ѡ҆дꙋшевле́нъ ꙗ҆ви́лсѧ є҆сѝ бж҃їй, бг҃оно́се ѽ всеблаже́нне! и҆ церко́внымъ мѣ́риломъ мы́сленнѡ наꙋчи́лсѧ є҆сѝ, воспѣва́ѧ дꙋ́хомъ: ѻ҆тє́цъ на́шихъ бж҃е, бл҃гослове́нъ є҆сѝ.
Ве́сь сы́й во ᲂу҆́жасѣ, преложе́нъ во гра́дъ ст҃ы́й и҆ногда̀, и҆ бжⷭ҇твенныхъ та̑инъ наꙋчи́сѧ ꙗ҆вле́нїемъ, пѣ́ти поꙋча́ѧсѧ: ѻ҆тє́цъ на́шихъ бж҃е, бл҃гослове́нъ є҆сѝ.
Свѧще́нникъ ꙗ҆́вльсѧ бг҃а вы́шнѧгѡ, досточꙋ́дне, жє́ртвы и҆ мѡльбы̀ прино́сиши влⷣцѣ, лю́демъ предстоѧ́щымъ и҆ пою́щымъ: ѻ҆тє́цъ на́шихъ бж҃е, бл҃гослове́нъ є҆сѝ.
Бг҃оро́диченъ:
Спастѝ восхотѣ̀ человѣ́ческое сꙋщество̀, сло́во пребжⷭ҇твенное, дѣ́вственнꙋю две́рь проше́дъ, пло́тїю и҆зъ неѧ̀ ѡ҆дѣ́ѧвыйсѧ, ѻ҆тє́цъ на́шихъ бж҃е, бл҃гослове́нъ є҆сѝ.
Пѣ́снь и҃. І҆рмо́съ:
Рꙋ́цѣ распросте́ръ, данїи́лъ львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.
Всесвѣ́тлаѧ ты̀ бы́лъ є҆сѝ ѕвѣзда̀, сꙋ́щыѧ въ ти́нѣ страсте́й приводѧ̀ къ животꙋ̀: твори́ши бо жєны̀ нечи̑стыѧ цѣломꙋ́дреннѡ жи́ти, и҆ ѿго́ниши лю̑тыѧ недꙋ́ги, вопїѧ̀: благослови́те, всѧ̑ дѣла̀ гдⷭ҇нѧ, гдⷭ҇а.
Сы́й цѣ́лъ ᲂу҆мо́мъ, въ скро́вѣ мꙋ́дрыхъ чꙋде́съ, преподо́бне, мнѡ́гїѧ ᲂу҆лови́лъ є҆сѝ ю҆ро́дствовати гдⷭ҇а ра́ди, вѣ́дый нарꙋга́ннымъ бы́ти, вопїѧ̀ чистѣ́йшею дꙋше́ю: благослови́те, всѧ̑ дѣла̀ гдⷭ҇нѧ, гдⷭ҇а.
Соверше́ннѡ є҆ди́ный и҆́же свои́хъ сѝ по достоѧ́нїю сла́вы гдⷭ҇и, и҆зноси́ма, прпⷣбне, и҆ гро́бꙋ посыла́ема, а҆́гг҃льскими свѣтлословле́нїи почита́етъ, вопїю́ща: благослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
И҆збавлѧ́ѧй на́съ возсїѧ̀ и҆зъ тебє̀ гдⷭ҇и, дв҃о чⷭ҇таѧ, є҆го́же молѝ, влⷣчце, просвѣти́ти пою́щыѧ тѧ̀, и҆ ѡ҆бстоѧ́нїѧ на́съ и҆зба́вити, вопїю́щихъ: благослови́те, всѧ̑ дѣла̀ гдⷭ҇нѧ, гдⷭ҇а.
И҆́нъ. І҆рмо́съ:
Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.
Свѧще́нствомъ прⷪ҇ро́ческимъ, прⷪ҇ро́чествїѧ свѧще́ннѡ ᲂу҆краша́емь, сїѧ́еши, прⷪ҇ро́че, хрⷭ҇та̀ жизнода́вца поѧ̀ во всѧ̑ вѣ́ки.
На колѣ́нꙋ преклонѧ́ющасѧ, ꙗ҆́кѡ бла́гъ, ѡ҆ мі́рѣ зри́телѧ прїимѝ твоеѧ̀ сла́вы, і҆езекі́илѧ, ꙗ҆́кѡ да тѧ̀ пое́мъ во всѧ̑ вѣ́ки.
Жела́нїемъ бжⷭ҇твеннымъ разже́гсѧ, наꙋчи́лсѧ є҆сѝ па́че ᲂу҆ма̀ та́йнамъ, і҆езекі́иле, вопїѧ̀: тѧ̀, хрⷭ҇тѐ, превозно́симъ во вѣ́ки.
Бг҃оро́диченъ:
Стрꙋю̀ ѡ҆ставле́нїѧ, и҆зъ но́щи ᲂу҆́тренюѧ, дѣ́вства зрѧ̀ і҆езекі́иль, гдⷭ҇еви вопїѧ́ше: тѧ̀ превозно́симъ во вѣ́ки.
Пѣ́снь ѳ҃. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.
Всѣ́мъ се́рдцемъ трⷪ҇цѣ ᲂу҆се́рднѡ возложи́вшесѧ, и҆ и҆́же ѿ неѧ̀ лꙋчѝ благодѣ́тельнѡ прїе́мше, свѣтови́дни бы́сте, и҆ со а҆́гг҃лы ликꙋ́ете.
Жела́нїемъ бжⷭ҇твеннымъ приедини́вшесѧ, и҆ воздержа́нїемъ просвѣ́щшесѧ, ча́емыхъ бла̑гъ въ прича́стїи ᲂу҆жѐ бы́сте, и҆ блаже́нное ѡ҆брѣто́сте, бг҃облаже́ннїи, наслажде́нїе.
Ва́шѧ прїѧ́тъ болѣ̑зни и҆ по́ты, весе́лїе конца̀ ника́коже и҆мꙋ́щее, въ не́мже пита́ющесѧ, сѷмеѡ́не прпⷣбне и҆ і҆ѡа́нне сла́вне, на́съ непреста́ннѡ помина́йте.
Бг҃оро́диченъ:
Спаси́ мѧ всѣ́хъ ро́ждшаѧ и҆зба́вителѧ и҆ бл҃годѣ́телѧ, разорѝ дꙋшѝ моеѧ̀ ѻ҆́блаки, свѣ́та ѻ҆́блаче, ст҃а́ѧ влⷣчце, и҆ си́льна содѣ́лай на стра̑сти борю́щыѧ мѧ̀.
И҆́нъ. І҆рмо́съ:
Проѧвле́нное на горѣ̀ законополо́жникꙋ во ѻ҆гнѝ и҆ кꙋпинѣ̀, рождество̀ приснодв҃ы, въ на́ше вѣ́рныхъ спасе́нїе, пѣ́сньми немо́лчными велича́емъ.
Заре́ю сїѧ́ѧ, прⷪ҇ро́че, благоче́стїѧ, во ѻ҆гнѝ и҆ кꙋпинѣ̀ дре́вле мѡѷсе́ю ꙗ҆́вльшасѧ, и҆ са́мъ ви́дѣти сподо́билсѧ є҆сѝ, тѧ̀ та́йнѡ наꙋча́юща неизглагѡ́ланнымъ.
Свѧще́нникъ показа́лсѧ є҆сѝ, и҆ таи́нникъ, и҆ законоположи́тель, и҆ прⷪ҇ро́къ премꙋ́дръ, и҆ подо́бникъ влⷣцѣ, и҆ страсте́й прича́стникъ бы́въ, ны́нѣ снаслѣ́дникъ ꙗ҆ви́лсѧ є҆сѝ.
Ѽ неизглаго́ланнагѡ и҆ бжⷭ҇твеннагѡ свѣтоѧвле́нїѧ! є҆гѡ́же ны́нѣ наслажда́ешисѧ, блаже́нне, и҆здале́ча зри́ши во ѻ҆ц҃ѣ̀ сн҃а и҆ дх҃а, трѝ ѵ҆поста̑си бж҃ества̀.
Бг҃оро́диченъ:
Ты̀ є҆сѝ, бцⷣе, ѻ҆рꙋ́жїе на́ше и҆ стѣна̀, ты̀ є҆сѝ застꙋпле́нїе на тѧ̀ надѣ́ющымсѧ: тебѐ и҆ ны́нѣ на моли́твꙋ подвиза́емъ, да и҆зба́вимсѧ ѿ вра̑гъ на́шихъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.