← претходни дан | Минеј — Јул | следећи дан →
17 июля: Великомученицы Марины
Мѣ́сѧца тогѡ́же въ з҃ї-й де́нь.
Ст҃ы́ѧ великомꙋ́ченицы марі́ны.
На Гдⷭ҇и, воззва́хъ, стїхи̑ры на ѕ҃, гла́съ и҃. Подо́бенъ: Ѽ пресла́внагѡ чꙋдесѐ!
Ѽ пресла́внагѡ чꙋдесѐ! ꙳ превознесе́ннꙋю горды́ню, ꙳ зе́млю и҆ мо́ре потреби́ти ре́кшаго, къ землѝ смири́ла є҆́сть, ꙳ млада̀ ѻ҆трокови́ца и҆ всенепоро́чнаѧ, ꙳ кова̑рствїѧ є҆гѡ̀ побѣди́вши. ꙳ ѽ си́лы крⷭ҇та̀ и҆ благода́ти! ꙳ ꙗ҆́же на́мъ всю̀ ꙳ ᲂу҆твердѝ ꙗ҆́вѣ не́мощь.
Мꙋ́ченице марі́но прехва́льнаѧ, ꙳ ни мꙋче́нїѧ тѧ̀ ѻ҆́гнь, ꙳ ни пи́щи наслажде́нїе, ꙳ ни мїрскі́ѧ ра́дѡсти, ꙳ ни красота̀ ю҆́ности, ꙳ ꙗ҆́же ко хрⷭ҇тꙋ̀ любвѐ ѿлꙋчѝ, ꙳ жела́ющꙋю красоты̀, ю҆́же па́че ᲂу҆ма̀, ꙳ честна́гѡ жениха̀ твоегѡ̀ полꙋчи́ти, ꙳ є҆ѧ́же сподо́биласѧ є҆сѝ, бг҃облаже́ннаѧ.
Мꙋ́ченице марі́но всесла́внаѧ, ꙳ въ нбⷭ҇ныхъ ѻ҆би́телехъ всели́вшисѧ досто́йнѡ, ꙳ съ дѣви́ческими чи́нми, ꙳ и҆ мч҃никъ во́инствы, ꙳ творѧ́щихъ вѣ́рою па́мѧть твою̀, ꙳ и҆ пристꙋпа́ющихъ вѣ́рнѡ покро́вꙋ твоемꙋ̀, ꙳ спаса́й моли́твами твои́ми: ꙳ и҆ согрѣше́нїй ѡ҆ставле́нїе ᲂу҆ бг҃а и҆спросѝ, и҆ и҆збавле́нїе, ꙳ и҆ ве́лїю ми́лость.
Сла́ва, гла́съ в҃:
Во гра́дѣ бг҃а на́шегѡ, въ горѣ̀ ст҃ѣ́й є҆гѡ̀, тꙋ̀ всели́сѧ ст҃а́ѧ, свѣщꙋ̀ неꙋгаси́мꙋ соблю́дши, ᲂу҆слы́шимъ дѣ́выѧ похвалꙋ̀. ѽ дѣ́вство, цр҃кви бж҃їѧ, ѽ дѣ́вство, мч҃никѡмъ сла́ва! ѽ дѣ́вство, а҆́гг҃лѡмъ соприча́стниче!
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: Поⷣ: Є҆гда̀ ѿ дре́ва:
Дре́вꙋ крⷭ҇тномꙋ тѧ̀, і҆и҃се, пригвожде́на зрѧ́щи неискꙋсобра́чнаѧ, пла́чꙋщи гл҃го́лаше: ча́до сла́дкое, почто̀ ѡ҆ста́вилъ є҆сѝ менѐ ро́ждшꙋю тѧ̀ є҆ди́нꙋ, свѣ́те непристꙋ́пный пребезнача́льнагѡ ѻ҆ц҃а̀; потщи́сѧ и҆ просла́висѧ, ꙗ҆́кѡ да сла́вꙋ полꙋча́тъ бжⷭ҇твеннꙋю, и҆̀же бжⷭ҇твєнныѧ стра̑сти твоѧ̑ сла́вѧщыѧ.
На стїхо́внѣ ѻ҆ктѡ́иха. Сла́ва, гла́съ в҃:
Во гла́сѣ ра́дованїѧ, и҆ во ѱалмѣ́хъ восклица́нїѧ, воспои́мъ марі́нꙋ мꙋ́ченицꙋ: ꙗ҆́кѡ низложѝ на зе́млю і҆́дѡльскꙋю пре́лесть, и҆ сопроти́внаго врага̀ мꙋ́жески подъ но́зѣ своѝ подложѝ. тѣ́мже и҆ сконча́вшисѧ на нб҃са̀ возлетѣ̀, на главѣ̀ вѣне́цъ носѧ́щи и҆ взыва́ющи: тебѐ, женишѐ мо́й, жела́ю, и҆ жела́нїѧ любо́вь и҆мꙋ́щи, за тѧ̀ пло́ть мою̀ ѻ҆гню̀ преда́хъ, да вселю́сѧ ᲂу҆́бѡ въ вѣ̑чныѧ твоѧ̑ ѻ҆би́тєли, и҆дѣ́же є҆́сть веселѧ́щихсѧ жили́ще.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Є҆гда̀ ѿ дре́ва:
Є҆гда̀ нескве́рнаѧ а҆́гница ви́дѣ своего̀ а҆́гнца, на заколе́нїе ꙗ҆́кѡ чл҃вѣ́ка во́лею влеко́ма, пла́чꙋщи гл҃го́лаше: безча́дствовати мѧ̀ ны́нѣ тщи́шисѧ, хрⷭ҇тѐ, ро́ждшꙋю тѧ̀, что̀ сїѐ сотвори́лъ є҆сѝ, и҆зба́вителю всѧ́ческихъ; ѻ҆ба́че воспѣва́ю и҆ сла́влю твою̀, ю҆́же па́че ᲂу҆ма̀ и҆ сло́ва, кра́йнюю бл҃гость, чл҃вѣколю́бче.
Тропа́рь, гла́съ д҃:
А҆́гница твоѧ̀, і҆и҃се, марі́на зове́тъ ве́лїимъ гла́сомъ: тебѐ, женишѐ мо́й, люблю̀, и҆ тебѐ и҆́щꙋщи страда́льчествꙋю, и҆ сраспина́юсѧ и҆ спогреба́юсѧ креще́нїю твоемꙋ̀, и҆ страждꙋ̀ тебє̀ ра́ди, ꙗ҆́кѡ да црⷭ҇твꙋю въ тебѣ̀, и҆ ᲂу҆мира́ю за тѧ̀, да и҆ живꙋ̀ съ тобо́ю: но ꙗ҆́кѡ же́ртвꙋ непоро́чнꙋю прїими́ мѧ, съ любо́вїю поже́ршꙋюсѧ тебѣ̀: тоѧ̀ моли́твами, ꙗ҆́кѡ ми́лостивъ спасѝ дꙋ́шы на́шѧ.
На ᲂу҆́трени канѡ́на ѻ҆́ба ѻ҆ктѡ́иха безъ мч҃никѡвъ, и҆ ст҃ы́ѧ на ѕ҃, є҆гѡ́же краегране́сїе:
Хрⷭ҇то́вꙋ дѣ́вꙋ мꙋ́ченицꙋ невѣ́стꙋ пѣ́сньми пою̀:
Гла́съ и҃. Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Ликꙋ́ющи, мч҃нице, ѡ҆ бз҃ѣ, и҆ лꙋча́ми и҆сполнѧ́ема ѿ негѡ̀, зарю̀ мнѣ̀ пода́ждь свѣтоно́снꙋ твои́ми моли́твами, до́браѧ дѣ́во.
Текꙋ́щихъ и҆ нестоѧ́тельное и҆ тлѣ́нное, мꙋ́дрымъ ᲂу҆мо́мъ ѡ҆бложе́на, мꙋ́ченице хрⷭ҇то́ва, презрѣ́ла є҆сѝ разꙋ́мнѡ: и҆ пра́ведныхъ сподо́биласѧ є҆сѝ вы́шнїѧ свѣ́тлости.
Ра́бски прихождꙋ̀ къ тебѣ̀, честна́ѧ, твои́ми мольба́ми жите́йскихъ мѧ̀ бѣ́дъ спасѝ, мꙋ́ченице страстоно́сице, и҆ страсте́й мои́хъ ᲂу҆тишѝ смꙋще́нїе.
Мꙋ́дростїю и҆ бл҃года́тїю просвѣ́щсѧ ᲂу҆́мъ тво́й, марі́но, мꙋчи́телей преще́нїѧ не ᲂу҆страши́ласѧ є҆сѝ, мч҃нице сп҃сова, бжⷭ҇твенною си́лою ᲂу҆крѣпѧ́ема.
Бг҃оро́диченъ:
Стезю̀ показа́ла є҆сѝ жи́зни, жи́знь сꙋ́щꙋю заче́нши, и҆ пло́тски ро́ждши сїю̀, бг҃ома́ти, и҆ ᲂу҆́зы смє́ртныѧ расто́ргла є҆сѝ.
Пѣ́снь г҃. І҆рмо́съ:
Нѣ́сть свѧ́тъ, ꙗ҆́кѡ гдⷭ҇ь, и҆ нѣ́сть пра́веденъ ꙗ҆́кѡ бг҃ъ на́шъ, є҆го́же пое́тъ всѧ̀ тва́рь: нѣ́сть пра́веденъ па́че тебє̀, гдⷭ҇и.
Ни ѻ҆́гнь, нижѐ ра̑ны, ни ме́чное сѣче́нїе, ни мꙋчи́телей сꙋровство̀, ни сме́рть же, ни ѕвѣре́й свирѣ́пство, бжⷭ҇твенныѧ ѿлꙋчи́ тѧ любвѐ, прехва́льнаѧ.
Была̀ є҆сѝ непоколеби́мь и҆ непреклони́мь, во вре́мѧ ѡ҆бстоѧ́нїѧ, сто́лпъ, всесла́внаѧ: благоче́стїѧ ѡ҆снова́нїе положе́но вѣ́ры на ка́мени, преблаже́ннаѧ.
Дѣ́ва въ мꙋ́ченицахъ была̀ є҆сѝ, въ дѣ́вахъ непобѣди́ма мꙋ́ченица была̀ є҆сѝ ты̀, хрⷭ҇тꙋ̀ ᲂу҆невѣ́стившисѧ, сꙋгꙋ́бъ тебѣ̀ подаю́щꙋ вѣне́цъ, всенепоро́чнаѧ.
Ст҃ы́хъ крове́й твои́хъ, до́браѧ дѣ́во, то́ки и҆злива́емы всю̀ ᲂу҆гаси́ша і҆́дѡльскꙋю ле́сть: и҆ собо́ръ привела̀ є҆сѝ мꙋ́чєникъ женихꙋ̀ твоемꙋ̀.
Бг҃оро́диченъ:
Оу҆крѣ́пльшесѧ бл҃года́тїю, бцⷣꙋ тѧ̀ є҆диномꙋ́дреннѡ сла́вимъ, пло́ть бы́вшаго, є҆́же бы́ти всѣ̑мъ даю́щаго родила̀ є҆сѝ, и҆ мі́ръ ѡ҆бнови́ла є҆сѝ.
Сѣда́ленъ, гла́съ д҃: Подо́бенъ: Ско́рѡ предварѝ:
Наста̀ празднолю́бцы свѣ́тло торжество̀, па́мѧть сла́вныѧ страстоно́сицы хрⷭ҇то́вы, веселѧ́щи всѧ́чєскаѧ, сїѧ́ющи зарѧ́ми чꙋде́съ въ мі́рѣ, носѧ́щи человѣ́кѡмъ непреста́ннꙋю бл҃года́ть: тоѧ̀ моли́твами, хрⷭ҇тѐ, спасѝ дꙋ́шы на́шѧ.
Два́жды.
Сла́ва, и҆ ны́нѣ, бг҃оро́диченъ:
Дв҃о всенепоро́чнаѧ, ꙗ҆́же пресꙋ́щнаго бг҃а ро́ждшаѧ, со безпло́тными того̀ непреста́ннѡ молѝ, ѡ҆ставле́нїе прегрѣше́нїй, и҆ и҆справле́нїе житїѧ̀ да́ти на́мъ пре́жде конца̀, вѣ́рою и҆ любо́вїю пою́щымъ тѧ̀ по до́лгꙋ, є҆ди́на всепѣ́таѧ.
Крⷭ҇тобг҃оро́диченъ:
На крⷭ҇тѣ́ тѧ возвы́шена ꙗ҆́кѡ ᲂу҆зрѣ̀ пречⷭ҇таѧ мт҃и твоѧ̀, сло́ве бж҃їй, мт҃рски рыда́ющи вѣща́ше: что̀ но́вое и҆ стра́нное сїѐ чꙋ́до, сн҃е мо́й; ка́кѡ жи́знь всѣ́хъ вкꙋша́еши сме́рти, ѡ҆живи́ти мє́ртвыѧ хотѧ̀, ꙗ҆́кѡ милосе́рдъ;
Пѣ́снь д҃. І҆рмо́съ:
Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. Тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Бг҃олѣ́пно бы́сть вои́стиннꙋ житїѐ твоѐ, а҆́гг҃лѡмъ ꙗ҆ви́сѧ любе́зно, де́мѡнскомꙋ же во́инствꙋ, и҆ слꙋга́мъ и҆́хъ свирѣ́пствꙋ непристꙋ́пно показа́сѧ. хрⷭ҇тꙋ́ бо вопїѧ́ла є҆сѝ: си́лѣ твое́й сла́ва, чл҃вѣколю́бче.
На землѝ подвиза́вшисѧ, всебога́таѧ, и҆ вре́менныѧ болѣ̑зни претерпѣ́вши, на нб҃сѣ́хъ ны́нѣ воздаѧ̑нїѧ ѿ влⷣки прїе́млеши, мꙋ́ченице непобѣди́маѧ, во вѣ́ки безконє́чныѧ, со а҆́гг҃лы вопїю́щи: си́лѣ твое́й сла́ва, чл҃вѣколю́бче.
Ны́нѣ ѡ҆ тебѣ̀ ра́дꙋетсѧ дѣви́ческїй ли́къ, ны́нѣ мꙋ́чєникъ собо́ръ весели́тсѧ, ны́нѣ и҆ мно́жество благочести́выхъ собра́вшесѧ ликꙋ́ютъ ра́дꙋющесѧ, влⷣцѣ вопїю́ще гла́сы немо́лчными: си́лѣ твое́й сла́ва, чл҃вѣколю́бче.
Всѧ̀ добра̀ є҆сѝ, дѣ́во и҆ нескве́рнаѧ, ꙗ҆ви́ласѧ є҆сѝ невѣ́ста всенепоро́чнаѧ, дꙋша́мъ добро́ты рачи́тельна, мꙋчи́тельными разжже́нїи, всеблаже́ннаѧ, ꙗ҆ви́ласѧ є҆сѝ свѣтлѣ́йши, хрⷭ҇тꙋ̀ пою́щи: си́лѣ твое́й сла́ва, чл҃вѣколю́бче.
Бг҃оро́диченъ:
Є҆ди́на чиста̀ и҆ по ржⷭ҇твѣ̀ пребыла̀ є҆сѝ: ты́ бо є҆ди́на, сло́во ѵ҆поста́сное ѻ҆ц҃ꙋ̀ сопресто́льна сн҃а, и҆зъ тебє̀ воплоще́нна родила̀ є҆сѝ, бг҃оневѣ́сто, и҆ но́сиши на рꙋкꙋ̀ невмѣсти́маго всѣ́ми, и҆ всѧ̑ концы̀ содержа́щаго.
Пѣ́снь є҃. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ, но ѡ҆брати́ мѧ, и҆ къ свѣ́тꙋ за́повѣдей твои́хъ, пꙋти̑ моѧ̑ напра́ви, молю́сѧ.
На сꙋди́щи страда́лєцъ тече́нїе крѣ́пкѡ, ѻ҆трокови́це, прешла̀ є҆сѝ. бжⷭ҇твенное бо жела́нїе же́нскꙋю не́мощь ᲂу҆крѣпѝ, проѧвле́ннѡ показꙋ́ѧ, промышле́нїемъ страда́нїѧ, самодержа́вна[[Исправлена опечатка оригинала сомодержа́вна. Прим. orthlib]] мꙋ́ченица сꙋ́щи.
Ка̑пли твои́хъ крове́й, мꙋ́ченице, и҆ска́пающе, багрѧни́цꙋ многоцѣ́ннꙋ, и҆ нетлѣ́ннагѡ весе́лїѧ ри́зꙋ и҆стка́ша: є҆́юже ны́нѣ бг҃омꙋ́драѧ на нб҃сѣ́хъ ѡ҆дѣ́ѧна, ᲂу҆́мнѡ женихꙋ̀ предстои́ши.
Оу҆́зами моли́твъ твои́хъ, ѻ҆трокови́це, велехва́льнаго ѕмі́ѧ свѧза́вши, горды́ню пе́рвѣе превознесе́ннꙋю къ землѝ смири́ла є҆сѝ: и҆спо́лнити бо вѣ́сть ꙗ҆́кѡ бл҃гъ всевѣ́децъ, тогѡ̀ боѧ́щихсѧ во́лю.
Превозноси́мыѧ тѧ̀ сла́вы бжⷭ҇твенными вѣнцы̀ вои́стиннꙋ ᲂу҆красѝ жени́хъ сло́во, є҆гѡ̀ ра́ди страда́вшꙋю ѡ҆божа́ѧ, и҆ ѻ҆гнѧ̀ пла́мень, и҆ бїе́нїѧ ра́нъ терпѣли́внѡ претерпѣ́вшꙋю, сла́внаѧ.
Бг҃оро́диченъ:
Ѡ҆чища́емо зрѧ́ще дѣ́вства твоегѡ̀ ржⷭ҇тво́мъ, всенепоро́чнаѧ, земны́хъ є҆стество̀ ѿ пе́рвыѧ клѧ́твы, сла́вимъ и҆зъ тебє̀ рожде́ннаго, є҆диноча́даго за милосе́рдїе. є҆го́же молѝ, дв҃о, спастѝ на́съ.
Пѣ́снь ѕ҃. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Возложе́на хрⷭ҇тꙋ̀ ꙗ҆ви́ласѧ є҆сѝ добра̀ и҆ нескве́рна, и҆ ꙗ҆́кѡ и҆сто́чникъ чи́стъ и҆ вертогра́дъ многопло́денъ, марі́но всесла́внаѧ, и҆ бли́жнѧѧ невѣ́сто, и҆ ра́й неѡкра́домъ.
Ѻ҆трокови́ца всеблаголѣ́пна въ слѣ́дъ тебє̀ послѣ́дова, текꙋ́щи ко благово́нїю мѵ́ра твоегѡ̀, влⷣко, пречⷭ҇тѣй стрⷭ҇ти твое́й терпѣ́нїемъ подо́бѧщисѧ и҆ пречестнѣ́й.
Претерпѣ́ла є҆сѝ мꙋ́жески по́двиги, мꙋ́ченице многострада́льнаѧ, и҆ пе́рвѣе ᲂу҆мовре́днѡ вельмѝ хва́лѧщагосѧ съ шꙋ́момъ погꙋби́ла є҆сѝ крⷭ҇тною си́лою, ѽ марі́но господоимени́таѧ!
Бг҃оро́диченъ:
Марі́е, чⷭ҇тый и҆ пречⷭ҇тый сосꙋ́де всѣ́хъ содѣ́телѧ, дꙋшѝ ѡ҆чисти́лище пода́ждь мѝ сле́зы, и҆ ᲂу҆слы́ши мольбꙋ̀ мою̀, всенепоро́чнаѧ.
Конда́къ, гла́съ г҃. Подо́бенъ: Дв҃а дне́сь:
Дѣ́вства добро́тами преиспещре́на, дѣ́во, нетлѣ́нными вѣнцы̑ вѣнча́ласѧ є҆сѝ, марі́но: кровьми́ же мꙋ́ченичества ѡ҆багре́на, чꙋдесы̀ просвѣти́вшисѧ и҆сцѣле́нїй, благоче́стнѡ, мꙋ́ченице, прїѧ́ла є҆сѝ по́честь побѣ́ды твоегѡ̀ страда́нїѧ.
І҆́косъ:
Женихꙋ̀ хрⷭ҇тꙋ̀ раче́нїемъ се́рдца твоегѡ̀ ѿ младе́нства честна́ѧ разже́гшисѧ потекла̀ є҆сѝ, ꙗ҆́кѡ є҆ле́нь жа́ждꙋщи и҆сто́чникѡмъ приснотекꙋ́щымъ, дѣвомꙋ́ченица, страда́нїемъ же тебѐ самꙋ́ю соблю́дши, въ нетлѣ́нномъ сꙋ́щнѡ зижди́телѧ твоегѡ̀, невѣ́сто благосла́внаѧ, въ черто́зѣ дости́гла є҆сѝ, ᲂу҆кра́шена и҆ ᲂу҆пещре́на: вѣнцено́сица побѣди́тельнаѧ, свѣщено́сица благоцвѣтꙋ́щаѧ, нетлѣ́ннаго невѣ́стника полꙋчи́вши и҆ прїе́мши ꙗ҆́кѡ зла́то, по́честь побѣ́ды твоегѡ̀ страда́нїѧ.
Пѣ́снь з҃. І҆рмо́съ:
Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Свѣ́тъ непристꙋ́пный, марі́но, просвѣтѝ досто́йнѡ дꙋ́шꙋ твою̀, и҆ свѣща́ми свѣ́тлыми ѡ҆зарѝ пою́щыѧ: бл҃гослове́нъ є҆сѝ, гдⷭ҇и бж҃е во вѣ́ки.
Взѧ́тсѧ къ бжⷭ҇твеннѣй вои́стиннꙋ высотѣ̀, высо́къ бо ты̀ стѧжа́ла є҆сѝ ра́зꙋмъ, и҆ въ черто́гъ свѣ́телъ всели́ласѧ є҆сѝ, вопїю́щи: бл҃гослове́нъ є҆сѝ, гдⷭ҇и бж҃е во вѣ́ки.
Невѣ́ста бли́жнѧѧ влⷣцѣ показа́ласѧ є҆сѝ, марі́но бг҃оно́снаѧ, и҆ ꙗ҆́кѡ мꙋ́ченица непобѣди́ма томꙋ̀ зове́ши: бл҃гослове́нъ є҆сѝ, гдⷭ҇и бж҃е во вѣ́ки.
Бг҃оро́диченъ:
Кнѧ́зь не ктомꙋ̀ ѿ і҆ꙋ́ды ѡ҆скꙋдѣ̀, и҆зъ тебє́ бо влⷣка, ꙗ҆зы́кѡвъ наде́жда, возсїѧ̀ несказа́ннѡ: бл҃гослове́нъ, пречⷭ҇таѧ, пло́дъ твоегѡ̀ чре́ва.
Пѣ́снь и҃. І҆рмо́съ:
Мꙋсїкі̑йскимъ ѻ҆рга́нѡмъ согласꙋ́ющымъ, и҆ лю́демъ безчи́слєннымъ покланѧ́ющымсѧ ѻ҆́бразꙋ въ деи́рѣ, трѝ ѻ҆́троцы не повинꙋ́вшесѧ, гдⷭ҇а воспѣва́хꙋ, и҆ славосло́вѧхꙋ во всѧ̑ вѣ́ки.
Тве́рдъ нра́въ стѧжа́вши, тве́рдѡ страда̑нїѧ терпѧ́ше, и҆ вѣнцы̑ побѣ́дными вѣнча́сѧ пою́щи: гдⷭ҇а по́йте, и҆ превозноси́те є҆го̀ во вѣ́ки.
Та́йный, марі́но, тебѣ̀ черто́гъ, дꙋ́шъ жени́хъ бг҃ъ сло́во, ᲂу҆гото́ва на нб҃сѣ́хъ, є҆го́же ви́дѧщи зове́ши: гдⷭ҇а по́йте, и҆ превозноси́те є҆го̀ во вѣ́ки.
Добродѣ́тельми разли́чными ᲂу҆кра́шена, дарѡ́въ мно́жайшихъ сподо́бисѧ, кра́йнее жела́нїй зрѧ́щи, и҆ вопїю́щи: гдⷭ҇а по́йте, и҆ превозноси́те є҆го̀ во вѣ́ки.
Спасе́нїѧ ꙗ҆ви́ласѧ є҆сѝ, страстоте́рпице, мнѡ́гимъ вина̀, и҆ мꙋ́чєникъ собо́ры хрⷭ҇тꙋ̀ привела̀ є҆сѝ, согла́снѡ вопїю́щи: гдⷭ҇а по́йте, и҆ превозноси́те є҆го̀ во вѣ́ки.
Бг҃оро́диченъ:
Ѡ҆чище́нїе на́мъ, бг҃ороди́тельнице, тобо́ю даде́сѧ: ты́ бо є҆ди́на ѿдала̀ є҆сѝ до́лгъ, всѣ́хъ заче́нши гдⷭ҇а, дв҃о: є҆го́же превозно́симъ во вѣ́ки.
Пѣ́снь ѳ҃. І҆рмо́съ:
Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти ѿ дв҃и́ческагѡ чре́ва бы́въ чл҃вѣ́къ. тѣ́мже пречи́стꙋю бцⷣꙋ вѣ́рнїи велича́емъ.
Марі́но мꙋ́ченице хрⷭ҇то́ва, жи́знь вѣ́чнꙋю и҆ неги́бнꙋщꙋю въ ра́йстѣй пи́щи прилѣ́жнѡ вои́стиннꙋ ѡ҆б̾ѧ́ла є҆сѝ: ѡ҆браща́ющеесѧ бо безъ вре́да ѻ҆рꙋ́жїе преминꙋ́ла є҆сѝ, мꙋ́ченическими кровьмѝ сїѧ́ющи и҆здале́ча, до́браѧ дв҃о.
Попалѝ всеве́щнꙋю и҆ любомїрскꙋ́ю, дв҃о, мы́сль, жела́нїе бжⷭ҇твенное, и҆ твердѣ́йшꙋ показа̀ мꙋ́ченицꙋ, дѣ́вственными сїѧ́ньми, пе́рвѣе сїѧ́ющꙋю, марі́но всемꙋ́драѧ. тѣ́мже вси́ тѧ вѣ́рнїи ᲂу҆блажа́емъ.
Разрѣши́ ми, невѣ́сто и҆збра́ннаѧ, согрѣше́нїй плени̑цы моли́твами твои́ми, и҆ рꙋкописа́нїе грѣхо́вное расто́ргни, мꙋ́ченице, предстоѧ́щи благолѣ́пнѡ хрⷭ҇тꙋ̀ женихꙋ̀ твоемꙋ̀ всеще́дромꙋ, и҆ страсте́й мои́хъ мглꙋ̀ разорѝ.
Преста̀ шата́нїе лю́тое льсти́вагѡ, се́ бо ѻ҆трокови́ца забыва́ющи же́нское є҆стество̀ пострада̀, и҆ на него̀ свѣ́тлѡ побѣ́дꙋ взе́мши, и҆ ны́нѣ прама́тернее назда̀ ꙗ҆́вѣ паде́нїе.
Бг҃оро́диченъ:
Зрѣ́лꙋ пожина́ю жи́знь, невреди́мь дре́вомъ ра́зꙋма: ты́ бо, прест҃а́ѧ, жи́зни дре́во хрⷭ҇та̀ прозѧбла̀ є҆сѝ, вхо́ды жи́зни всѣ̑мъ показа́вшаго. тѣ́мже тѧ̀, всечⷭ҇таѧ, благоче́стнѡ бцⷣꙋ проповѣ́даемъ.
Свѣти́ленъ. Подо́бенъ: Жєны̀ ᲂу҆слы́шите:
Оу҆крѣ́пльшисѧ, до́браѧ дѣ́во, крⷭ҇то́мъ гдⷭ҇а твоегѡ̀, мꙋчи́телей погꙋби́ла є҆сѝ горды́ню, пострада́вши, мч҃нице, мꙋ́жески, и҆ ѿ хрⷭ҇та̀ прїѧ́ла є҆сѝ по́чєсти побѣ́ды, всемꙋ́драѧ марі́но, господоимени́таѧ, ѡ҆ на́съ молѧ́щи, тѧ̀ почита́ющихъ любо́вїю.
Бг҃оро́диченъ:
Стоѧ́ще ѻ҆́крестъ тебє̀ дѣ̑вы бг҃омꙋ́дрыѧ, бг҃ороди́тельнице марі́е, ꙗ҆́кѡ цр҃и́цѣ ро́да, твоемꙋ̀ сн҃ꙋ приведо́шасѧ, женихолѣ́пнѡ, пречⷭ҇таѧ, ꙗ҆́кѡ цр҃ю̀ всѧ́ческихъ: є҆го́же, мт҃и дв҃о ѻ҆трокови́це, ѡ҆ на́съ ᲂу҆молѝ.
На стїхо́внѣ ѻ҆ктѡ́иха. Сла́ва, гла́съ а҃:
Ꙗ҆́кѡ на ка́мени тве́рдѣ и҆сповѣ́данїѧ бж҃їѧ ᲂу҆тве́рждшисѧ, марі́но прехва́льнаѧ, ᲂу҆бі́йцꙋ врага̀ въ про́пасть потопи́ла є҆сѝ, и҆ вѣне́цъ побѣ́дный досто́йнѡ прїѧ́ла є҆сѝ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Подо́бенъ: Всехва́льнїи мꙋ́чєницы:
Своего̀ а҆́гнца, ꙳ а҆́гница и҆ непоро́чнаѧ влⷣчца, ꙳ на крⷭ҇тѣ̀ ꙗ҆́кѡ ви́дѣ зра́ка не и҆мꙋ́ща, ꙳ нижѐ добро́ты, ꙳ ᲂу҆вы̀ мнѣ̀, рыда́ющи гл҃го́лаше: ꙳ гдѣ̀ добро́та твоѧ̀ за́йде, сладча́йшїй; ꙳ гдѣ̀ благолѣ́пїе; ꙳ гдѣ̀ благода́ть блиста́ющаѧ ꙳ ѻ҆́браза твоегѡ̀, ꙳ сн҃е мо́й любе́знѣйшїй;
На лїтꙋргі́и: Бл҃жє́нна ѻ҆ктѡ́иха, на д҃: И҆ ст҃ы́ѧ пѣ́снь г҃, на д҃. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. Сті́хъ: Въ цр҃квахъ благослови́те бг҃а, гдⷭ҇а ѿ и҆стѡ́чникъ і҆и҃левыхъ. А҆пⷭ҇лъ къ корі́нѳѧнѡмъ зача́ло рп҃а. А҆ллилꙋ́їа, гла́съ а҃. Терпѧ̀ потерпѣ́хъ гдⷭ҇а, и҆ внѧ́тъ мѝ. Є҆ѵⷢ҇лїе лꙋкѝ, зача́ло л҃г. Прича́стенъ: Въ па́мѧть вѣ́чнꙋю бꙋ́детъ пра́ведникъ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.