← претходни дан | Минеј — Јул | следећи дан →
15 июля: Равноапостольного великого князя Владимира, во святом крещении Василия
Мѣ́сѧца тогѡ́же въ є҃ї-й де́нь.
Ст҃ы́хъ мч҃никъ ки́рѷка и҆ і҆ꙋлі́тты.
Слꙋ́жба и҆́хъ предписа́сѧ вчера́шнѧгѡ днѐ.
И҆ ст҃а́гѡ равноапⷭ҇ла, вели́кагѡ кнѧ́зѧ влади́мїра, нарече́ннагѡ во ст҃о́мъ креще́нїи васі́лїа.
Ве́черъ, Бл҃же́нъ мꙋ́жъ: а҃-й а҆нтїфѡ́нъ. На Гдⷭ҇и, воззва́хъ, стїхи̑ры на ѕ҃, гла́съ д҃. Подо́бенъ: Ꙗ҆́кѡ до́блѧ:
Вторы́й ты̀ бы́лъ є҆сѝ кѡнстанті́нъ, ꙳ сло́вомъ и҆ дѣ́ломъ: ꙳ ѻ҆́нъ во хрⷭ҇тїа́нское вре́мѧ роди́сѧ, ꙳ и҆ мнѡ́га лѣ̑та во є҆́ллинствѣ сотвори́лъ є҆́сть. ꙳ ты́ же ѿ варѧ̑гъ роди́всѧ, ꙳ но возлюби́лъ є҆сѝ возлюби́вшаго тѧ̀ хрⷭ҇та̀, ꙳ къ немꙋ́же возше́лъ є҆сѝ ра́дꙋѧсѧ. ꙳ є҆го́же молѧ̀ не преста́й, ꙳ ѡ҆ чтꙋ́щихъ па́мѧть твою̀.
Весели́тсѧ вѣ́чнѡ свѣ́тлѡ сїѧ́ющи ꙳ гора̀ сїна́йскаѧ, ꙳ мѡѷсе́йскимъ ѡ҆свѧти́вшисѧ зако́номъ, ꙳ неви́димаго ви́дѣвши, ꙳ свѣ́тлѡ же сїѧ́ѧ весели́тсѧ и҆ ра́дꙋетсѧ ꙳ вели́кїй гра́дъ тво́й, васі́лїе: ꙳ не ꙗ҆́кѡ во мра́цѣ, ꙳ но ꙗ҆́кѡ въ дс҃ѣ сн҃а со ѻ҆ц҃е́мъ ви́дѧ въ себѣ̀ сла́вима. ꙳ є҆го́же молѝ, ꙳ спастѝ и҆ просвѣти́ти дꙋ́шы на́шѧ.
Ꙗ҆́коже ѻ҆тє́цъ дꙋхо́внѡ, ꙳ ца́рь же чꙋ́вственнѡ, ꙳ рѡссі̑йскимъ лю́демъ бы́лъ є҆сѝ, васі́лїе: ꙳ и҆́стинный же проповѣ́датель, ꙳ ꙗ҆́кѡ а҆пⷭ҇лъ хрⷭ҇то́въ, ꙳ провозвѣсти́лъ є҆сѝ спаси́тельное креще́нїе: ꙳ и҆ тѣ́мъ свѣ́тлѡ просвѣти́въ, ꙳ ѡ҆свѧти́лъ є҆сѝ лю́ди твоѧ̑ ꙳ во всѣ́хъ страна́хъ ца́рствїѧ твоегѡ̀, бл҃же́нне.
Ко́рень правовѣ́рїѧ ты̀ бы́лъ є҆сѝ, васі́лїе, ꙳ напое́нъ же дх҃омъ прест҃ы́мъ, ꙳ возрасти́вый на́мъ вѣ̑тви бг҃осаждє́нныѧ, ꙳ цвѣ́тъ благоꙋха́нїѧ и҆сточа́ющыѧ, ꙳ бори́са чꙋ́днаго ꙳ и҆ глѣ́ба, ревни́телѧ благоче́стїю, ꙳ кипѧ́щыѧ всѣ̑мъ вѣ̑рнымъ ѻ҆би́льнѡ чꙋдесы̀. ꙳ съ ни́ми же предстоѧ̀ хрⷭ҇тꙋ̀, ꙳ моли́сѧ, спастѝ и҆ просвѣти́ти дꙋ́шы на́шѧ.
Сла́ва, гла́съ и҃:
Прїиди́те, стеце́мсѧ всѝ въ честнѣ́й па́мѧти ѻ҆тца̀ рѡссі́йскагѡ, и҆ наста́вника на́шегѡ влади́мїра: се́й бо ѿ варѧ̑гъ роди́сѧ, и҆ возлю́би возлюби́вшаго є҆го̀ хрⷭ҇та̀, къ немꙋ́же взы́де ра́дꙋѧсѧ, съ прама́терїю свое́ю є҆ле́ною: всѧ̑ бо лю́ди своѧ̑ наꙋчѝ вѣ́ровати, и҆ покланѧ́тисѧ въ трⷪ҇цѣ є҆ди́номꙋ бг҃ꙋ, і҆́дѡлы же разрꙋши́въ, попра̀: и҆ и҆зрастѝ на́мъ своѝ честны̑ѧ лѣ́тѡрасли, рѡма́на и҆ даві́да. тѣ́мже и҆ мы̀ свѣ́тлѡ ны́нѣ пѣ́сньми па́мѧть и҆́хъ вѣ́рнѡ чтꙋ́ще, любо́вїю пра́зднꙋемъ: да мо́лѧтсѧ ѡ҆ на́съ ко гдⷭ҇ꙋ, во́инствꙋ же на́шемꙋ пода́ти побѣ̑ды на пога̑ныѧ врагѝ, и҆ ᲂу҆мири́ти ве́сь мі́ръ, и҆ спастѝ дꙋ́шы на́шѧ.
И҆ ны́нѣ, бг҃оро́диченъ: Цр҃ь небе́сный.
Вхо́дъ. Прокі́менъ днѐ. И҆ чтє́нїѧ.
Ца́рствъ тре́тїихъ чте́нїе.
[Глава̀ и҃] Ста̀ соломѡ́нъ предъ лице́мъ же́ртвенника гдⷭ҇нѧ, предъ всѣ́мъ собо́ромъ і҆и҃левымъ, и҆ воздѣ́въ рꙋ́цѣ своѝ на не́бо, и҆ речѐ: гдⷭ҇и бж҃е і҆и҃левъ, нѣ́сть бг҃ъ, ꙗ҆́коже ты̀ на нб҃сѝ горѣ̀, и҆ на землѝ до́лѣ. А҆́ще бо нб҃о, и҆ нб҃о нб҃сѐ не довлѣ́ютъ тебѣ̀, ка́кѡ до́мъ се́й, є҆го́же созда́хъ и҆́мени твоемꙋ̀; ѻ҆ба́че и҆ при́зриши на моли́твꙋ мою̀, гдⷭ҇и бж҃е і҆и҃левъ, ᲂу҆слы́шати молє́нїѧ и҆ моли́твꙋ, є҆́юже ра́бъ тво́й мо́литсѧ предъ тобо́ю, къ тебѣ̀ дне́сь. Да бꙋ́дꙋтъ ѻ҆́чи твоѝ ѿве́рсты на до́мъ се́й де́нь и҆ но́щь, на мѣ́сто сїѐ, ѡ҆ не́мже гл҃го́лалъ є҆сѝ: бꙋ́детъ и҆́мѧ моѐ та́мѡ, є҆́же ᲂу҆слы́шати моли́твꙋ, є҆́юже мо́литсѧ ра́бъ тво́й на мѣ́стѣ се́мъ, во дни̑ и҆ нѡ́щи: И҆ послꙋ́шати мольбы̑ раба̀ твоегѡ̀, и҆ люде́й твои́хъ і҆и҃лѧ. И҆ є҆ли̑ка а҆́ще помо́лѧтсѧ къ тебѣ̀ на мѣ́стѣ се́мъ, и҆ ты̀ ᲂу҆слы́шиши на мѣ́стѣ жили́ща твоегѡ̀ на нб҃сѝ: и҆ сотвори́ши, и҆ ми́лостивъ бꙋ́деши и҆̀мъ.
Проро́чества и҆са́їина чте́нїе.
[Глава̀ ѯ҃а] Да возра́дꙋетсѧ дꙋша̀ моѧ̀ ѡ҆ гдⷭ҇ѣ, ѡ҆блече́ бо мѧ̀ въ ри́зꙋ спасе́нїѧ, и҆ ѻ҆де́ждею весе́лїѧ ѡ҆дѣ́ѧ мѧ̀: ꙗ҆́кѡ женихꙋ̀ возложѝ мнѣ̀ вѣне́цъ, ꙗ҆́кѡ невѣ́стꙋ ᲂу҆краси́ мѧ красото́ю. и҆ ꙗ҆́кѡ землѧ̀ растѧ́щаѧ цвѣ́тъ сво́й, и҆ ꙗ҆́кѡ вертогра́дъ сѣ́мена своѧ̑ прозѧба́етъ: та́кѡ возсїѧ́етъ гдⷭ҇ь пра́вдꙋ, и҆ ра́дость предъ всѣ́ми ꙗ҆зы̑ки. [ѯ҃в] сїѡ́на ра́ди не ᲂу҆мо́лкнꙋ, и҆ і҆ерⷭ҇ли́ма ра́ди не попꙋщꙋ̀, до́ндеже ᲂу҆́бѡ и҆зы́детъ ꙗ҆́кѡ свѣ́тъ пра́вда моѧ̀, спасе́нїе же моѐ ꙗ҆́кѡ свѣща̀ разжже́тсѧ. и҆ ᲂу҆́зрѧтъ ꙗ҆зы́цы пра́вдꙋ твою̀, и҆ всѝ ца́рїе зе́мстїи сла́вꙋ твою̀, и҆ нарекꙋ́тсѧ и҆́менемъ твои́мъ но́вымъ, є҆́же гдⷭ҇ь и҆менꙋ́етъ є҆̀. и҆ бꙋ́деши вѣне́цъ добро́ты въ рꙋцѣ̀ гдⷭ҇ни, и҆ дїади́ма ца́рствїѧ въ рꙋцѣ̀ бг҃а твоегѡ̀. и҆ ктомꙋ̀ не нарече́шисѧ ѡ҆ста́вленъ, и҆ землѧ̀ твоѧ̀ ктомꙋ̀ не нарече́тсѧ пꙋста̀: тебѣ́ бо нарече́тсѧ во́лѧ моѧ̀, и҆ землѧ̀ твоѧ̀ вселе́ннаѧ, ꙗ҆́кѡ благоволи́тъ гдⷭ҇ь въ тебѣ̀, и҆ землѧ̀ твоѧ̀ насели́тсѧ. и҆ ꙗ҆́кѡ живы́й ю҆́ноша съ дѣ́вою, та́кѡ поживꙋ́тъ сы́нове твоѝ съ тобо́ю: и҆ бꙋ́детъ, и҆́мже ѻ҆́бразомъ возвесели́тсѧ жени́хъ ѡ҆ невѣ́стѣ, та́кѡ возвесели́тсѧ гдⷭ҇ь ѡ҆ тебѣ̀.
Проро́чества и҆са́їина чте́нїе.
[Глава̀ ѯ҃] Свѣти́сѧ, свѣти́сѧ, і҆ерⷭ҇ли́ме: прїи́де бо тво́й свѣ́тъ, и҆ сла́ва гдⷭ҇нѧ на тебѣ̀ возсїѧ̀. ꙗ҆́кѡ сѐ тма̀ покры́етъ зе́млю, и҆ мра́къ на ꙗ҆зы́ки: на тебѣ́ же ꙗ҆ви́тсѧ гдⷭ҇ь, и҆ сла́ва є҆гѡ̀ на тебѣ̀ ᲂу҆́зритсѧ. и҆ по́йдꙋтъ ца́рїе свѣ́томъ твои́мъ, и҆ ꙗ҆зы́цы свѣ́тлостїю восто́ка твоегѡ̀. Возведѝ ѻ҆́крестъ ѻ҆́чи твоѝ, и҆ ви́ждь сѡ́браннаѧ ча̑да твоѧ̑: прїи́дꙋтъ всѝ сы́нове твоѝ и҆здале́ча, и҆ дщє́ри твоѝ на ра́мѣхъ во́змꙋтсѧ. тогда̀ ᲂу҆́зриши, и҆ возра́дꙋешисѧ, и҆ ᲂу҆бои́шисѧ, и҆ ᲂу҆жа́снешисѧ се́рдцемъ, є҆гда̀ приложи́тъ на тѧ̀ бога́тство мо́рѧ, и҆ ꙗ҆зы̑къ, и҆ люде́й. и҆ прїи́дꙋтъ тѝ стада̀ велблꙋ̑дъ, и҆ покры́ютъ тѧ̀ велблꙋ́ды мадїа́мстїи и҆ гефа́рстїи, всѝ ѿ савы̀ прїи́дꙋтъ, носѧ́ще тебѣ̀ зла́то и҆ лїва́нъ, принесꙋ́тъ тебѣ̀ и҆ ка́мень че́стенъ, и҆ спасе́нїе ѿ гдⷭ҇а благовѣстѧ́тъ. и҆ всѧ̑ ѻ҆́вцы кѷда̑рскїѧ соберꙋ́тсѧ тебѣ̀, и҆ ѻ҆внѝ навеѡ́ѳстїи прїи́дꙋтъ тебѣ̀, и҆ вознесꙋ́тсѧ прїѧ̑тнаѧ на же́ртвенникъ мо́й, и҆ до́мъ моли́твы моеѧ̀ просла́витсѧ. Кі́и сꙋ́ть, и҆̀же ꙗ҆́кѡ ѻ҆́блацы лета́ютъ, и҆ ꙗ҆́кѡ го́лꙋбїе со птенцы̀ свои́ми; со мно́ю є҆́сть сїѡ́нъ, менє̀ ѻ҆́строви ѡ҆жида́ша, и҆ кораблѝ ѳарсі́йстїи въ пе́рвыхъ, є҆́же привестѝ ча̑да твоѧ̑ и҆здале́ча, и҆ сребро̀ и҆ зла́то и҆́хъ съ ни́ми, за и҆́мѧ гдⷭ҇не ст҃о́е, и҆ за є҆́же ст҃о́мꙋ і҆и҃левꙋ сла́внꙋ бы́ти. и҆ сози́ждꙋтъ сы́нове и҆норо́днїи стѣ́ны твоѧ̑, и҆ ца́рїе и҆́хъ предста́нꙋтъ тебѣ̀: за гнѣ́въ бо мо́й порази́хъ тѧ̀, и҆ за ми́лость мою̀ возлюби́хъ тѧ̀. и҆ ѿве́рзꙋтсѧ врата̀ твоѧ̑, і҆ерⷭ҇ли́ме, вы́нꙋ де́нь и҆ но́щь, и҆ не затворѧ́тсѧ, є҆́же ввестѝ къ тебѣ̀ си́лꙋ ꙗ҆зы́кѡвъ, и҆ царѝ и҆́хъ ведѡ́мыѧ. ꙗ҆зы́цы бо и҆ ца́рїе, и҆̀же тебѣ̀ не порабо́таютъ, поги́бнꙋтъ: и҆ ꙗ҆зы́цы запꙋстѣ́нїемъ запꙋстѣ́ютъ. и҆ сла́ва лїва́нова къ тебѣ̀ прїи́детъ въ кѷпарі́сѣ и҆ пе́ѵкѣ и҆ ке́дрѣ вкꙋ́пѣ, просла́вити мѣ́сто ст҃о́е моѐ, и҆ мѣ́сто но́гъ мои́хъ просла́влю. и҆ по́йдꙋтъ къ тебѣ̀ боѧ́щїисѧ, сы́нове смири́вшихъ тѧ̀, и҆ прогнѣ́вавшихъ тѧ̀, и҆ покло́нѧтсѧ слѣда́мъ но́гъ твои́хъ всѝ прогнѣ́вавшїи тѧ̀, и҆ нарече́шисѧ гра́дъ гдⷭ҇нь сїѡ́нъ ст҃а́гѡ і҆и҃лева. за є҆́же бы́ти тебѣ̀ ѡ҆ста́вленꙋ и҆ возненави́дѣнꙋ, и҆ не бѣ̀ помога́ѧй тебѣ̀: и҆ положꙋ́ тѧ въ ра́дость вѣ́чнꙋю, весе́лїе родѡ́мъ родѡ́въ. и҆ и҆ссе́ши млеко̀ ꙗ҆зы́кѡвъ, и҆ бога́тство царе́й снѣ́си, и҆ разꙋмѣ́еши, ꙗ҆́кѡ а҆́зъ гдⷭ҇ь спаса́ѧй тѧ̀, и҆ и҆збавлѧ́ѧй тѧ̀ бг҃ъ і҆и҃левъ.
На лїті́и стїхи́ра хра́ма, та́же, ст҃а́гѡ. Гла́съ в҃:
Дне́сь возсїѧ̀ благочести́вагѡ кнѧ́зѧ влади́мїра па́мѧть, ꙗ҆́кѡ мѵ́ро и҆злїѧ́нное: хрⷭ҇та́ бо возлюби́въ, і҆́дѡлы преѡби́дѣвъ цр҃кви распе́ншемꙋсѧ на́съ ра́ди на землѝ воздви́же, и҆ на нб҃сѣ́хъ прїѧ́тъ ца́рство и҆ вѣне́цъ.
Сла́ва, гла́съ ѕ҃:
Прїиди́те, стеце́мсѧ всѝ вѣ́рнѡ къ честнѣ́й па́мѧти ѻ҆тца̀ рѡссі́йскагѡ, наста́вника на́шегѡ васі́лїа: се́й бо, ѿне́лѣже рожде́нъ бы́сть, возлюбѝ возлю́бльшаго и҆ хрⷭ҇та̀: къ немꙋ́же и҆ взы́де ра́дꙋѧсѧ съ прама́терїю є҆ле́ною. тѣ́мъ и҆ мы̀ любе́знѡ пра́зднꙋемъ молѧ́щесѧ, моли́тисѧ ѡ҆ на́съ ко гдⷭ҇ꙋ, ᲂу҆мири́ти мі́ръ, и҆ спастѝ дꙋ́шы на́шѧ.
И҆ ны́нѣ, бг҃оро́диченъ: Творе́цъ и҆ и҆зба́витель:
На стїхо́внѣ стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ!
Ѽ пресла́внагѡ чꙋдесѐ! ꙳ велича́вый ра́зꙋмъ погꙋблѧ́етсѧ дне́сь, ꙳ и҆ рыда́ютъ всѧ̑ лꙋка̑ваѧ вѡ́инства, ꙳ ви́дѧще вѣ́тви сѣкꙋ́щыѧ вседи̑чныѧ, ꙳ си́лою бж҃їею, ꙳ и҆ бг҃онасажде́нна и҆ прославлѧ́ема, ꙳ и҆ свѣ́тлѡ вѣнчава́ема ѿ бг҃а, ꙳ вели́кагѡ васі́лїа, ꙳ на́шего вѣ́рнаго нача́льника.
Сті́хъ: Вознесо́хъ и҆збра́ннаго ѿ люде́й мои́хъ.
Ди́внаѧ чꙋде́съ пꙋчи́на, ꙳ жестосе́рдїѧ бо ра́зꙋмомъ, ꙳ и҆̀же вотщѐ шата́хꙋсѧ, ꙳ ѿ лица̀ дне́сь васі́лїева, ꙳ веселѧ́тсѧ въ честнѣ́й цр҃кви: ꙳ и҆ ца́рствꙋетъ хрⷭ҇то́съ бг҃ъ, ꙳ ѡ҆брѣ́тъ є҆го̀ ꙗ҆́кѡ па́ѵла пре́жде, ꙳ и҆ поста́ви кнѧ́зѧ вѣ́рна на землѝ свое́й, ꙳ просвѣти́вшаго лю́ди своѧ̑ честны́мъ креще́нїемъ.
Сті́хъ: Є҆ле́емъ ст҃ы́мъ мои́мъ пома́захъ є҆го̀.
Ра́дꙋйсѧ, рѡссі́йскаѧ похвало̀: ꙳ ра́дꙋйсѧ, вѣ̑рнымъ прави́телю: ꙳ ра́дꙋйсѧ, бжⷭ҇твенный влади́мїре, нача́льниче на́шъ: ꙳ ра́дꙋйсѧ, вѣ́ры забра́ло: ꙳ ра́дꙋйсѧ, чꙋ́до чꙋдесє́мъ пресла́вное, ꙳ и҆ притека́ющымъ приста́нище ти́хое: ꙳ ра́дꙋйсѧ, всест҃ы́й ка́меню вѣ́ры, ꙳ и҆ моле́бниче ѡ҆ пою́щихъ тѧ̀, и҆ велича́ющихъ вѣ́рнѡ.
Сла́ва, гла́съ и҃:
Нача́льника благоче́стїѧ и҆ проповѣ́дника вѣ́ры, и҆ кнѧзе́й рѡссі́йскихъ верхо́внаго, дне́сь рѡссі́йстїи собо́ри соше́дшесѧ восхва́лимъ вели́каго влади́мїра, а҆пⷭ҇лѡмъ ра́внаго, хвала́ми и҆ пѣ́сньми дꙋхо́вными вѣнча́емъ є҆го̀, глаго́люще: ра́дꙋйсѧ, хрⷭ҇то́въ во́ине прехра́брый, ꙗ҆́кѡ томи́телѧ врага̀ до конца̀ погꙋби́въ, и҆ на́съ ѿ ле́сти є҆гѡ̀ и҆зба́вивъ, приве́лъ є҆сѝ цр҃ю̀ хрⷭ҇тꙋ̀ бг҃ꙋ: но, ѽ преблаже́нне и҆ всехва́льне, ми́ръ молѝ пода́ти во́инствꙋ на́шемꙋ, и҆ на пога̑ныѧ побѣ̑ды, цр҃кви бл҃гостоѧ́нїе и҆ дꙋша́мъ на́шымъ ве́лїю ми́лость.
И҆ ны́нѣ, бг҃оро́диченъ: Влⷣчце, прїимѝ моли̑твы ра̑бъ твои́хъ:
Тропа́рь, гла́съ д҃:
Оу҆подо́билсѧ є҆сѝ кꙋпцꙋ̀, и҆́щꙋщемꙋ до́брагѡ би́сера, славнодержа́вный влади́мїре, на высотѣ̀ стола̀ сѣдѧ̀ ма́тере градѡ́въ, бг҃оспаса́емагѡ кі́ева: и҆спытꙋ́ѧ же и҆ посыла́ѧ къ ца́рскомꙋ гра́дꙋ ᲂу҆вѣ́дѣти правосла́внꙋю вѣ́рꙋ, и҆ ѡ҆брѣ́лъ є҆сѝ безцѣ́нный би́серъ хрⷭ҇та̀, и҆збра́вшаго тѧ̀ ꙗ҆́кѡ втора́го па́ѵла, и҆ ѿтрѧ́сшаго слѣпотꙋ̀ во свѧтѣ́й кꙋпѣ́ли дꙋше́внꙋю, вкꙋ́пѣ и҆ тѣле́снꙋю: тѣ́мже пра́зднꙋемъ твоѐ ᲂу҆спе́нїе лю́дїе твоѝ сꙋ́ще. молѝ спасти́сѧ держа́вы твоеѧ̀ рѡссі́йскїѧ нача́льникѡмъ и҆ мно́жествꙋ владо́мыхъ.
Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́нное:
На ᲂу҆́трени на Бг҃ъ гдⷭ҇ь, тропа́рь два́жды: и҆ бг҃оро́диченъ:
По а҃-й стїхоло́гїи сѣда́ленъ, гла́съ а҃:
Ꙗ҆́кѡ нача́льникꙋ и҆ ко́реню вѣ́ры, и҆ і҆́дѡлѡвъ разрꙋши́телю, блаже́нне кнѧ́же, равноапⷭ҇льне влади́мїре, вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Наста́ви на́съ на пꙋ́ть покаѧ́нїѧ, ᲂу҆кло́ншыѧсѧ при́снѡ къ безпꙋ́тїємъ ѕѡ́лъ, и҆ пребл҃га́го прогнѣ́вавшыѧ гдⷭ҇а, неискꙋсобра́чнаѧ бл҃гослове́ннаѧ марі́е, прибѣ́жище ѿча́ѧнныхъ человѣ́кѡвъ, бж҃їе жили́ще.
По в҃-й стїхоло́гїи сѣда́ленъ, гла́съ и҃:
Наꙋчи́всѧ неизрече́нною ѿ бг҃а вы́шнею мꙋ́дростїю, бога́тнѡ къ ра́зꙋмꙋ вѣ́ры є҆гѡ̀ дости́глъ є҆сѝ, и҆ къ добро́тѣ є҆гѡ̀ ско́рѡ прите́клъ є҆сѝ. тѣ́мже и҆з̾ѧсни́лъ є҆сѝ ᲂу҆́мныѧ твоѧ̑ ѻ҆́чи, къ ра́зꙋмꙋ возве́лъ є҆сѝ благоче́стїѧ вѣ́ры. тогѡ̀ ра́ди пра́зднꙋюще глаго́лемъ: благослове́нъ бг҃ъ, просвѣти́вый свѣ́томъ разꙋ́мнымъ се́рдце твоѐ, свѣти́льниче свѣ́тлый васі́лїе: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Грѣхо́вный мра́къ покрыва́етъ мѧ̀, и҆ стꙋ̑днаѧ моѧ̑ дѣла̀ безъ воздержа́нїѧ вы́нꙋ, и҆ со́вѣстное томле́нїе непреста́ннѡ мꙋ́читъ мѧ̀: ᲂу҆вы̀ мнѣ̀, гдѣ̀ ᲂу҆́бѡ ны́нѣ скры́юсѧ; къ комꙋ́ ли прите́къ па́ки ѡ҆брѧ́щꙋ по́мощь; то́кмѡ къ тебѣ̀ бг҃ома́тери припа́даю, и҆ молю́сѧ тѝ: молѝ вы́нꙋ спасти́сѧ дꙋша́мъ на́шымъ.
По полѷеле́и сѣда́ленъ, гла́съ д҃:
Ско́рое и҆ тве́рдое стѧжа́лъ є҆сѝ тща́нїе ко и҆́стиннѣй вѣ́рѣ хрⷭ҇то́вѣ, и҆ ѡ҆брѣ́тъ кꙋпѣ́ль бг҃омы́сленнꙋю и҆ дꙋхо́внꙋю, ско́рѡ прите́клъ є҆сѝ любо́вїю, скве́рнꙋ прегрѣше́нїй ѡ҆чи́стивъ, лю́ди твоѧ̑ ѡ҆свѧти́лъ є҆сѝ: моли́сѧ хрⷭ҇тꙋ̀ бг҃ꙋ, спасти́сѧ дꙋша́мъ на́шымъ.
Сла́ва:
Ско́рѡ предварѝ, кнѧ́же, вѣ́рныхъ наста́вниче: врази́ бо хꙋ́лѧтъ и҆ претѧ́тъ на́мъ, хрⷭ҇то́въ ᲂу҆го́дниче, погꙋбѝ вѣ́рою твое́ю борю́щыѧсѧ съ на́ми, да навы́кнꙋтъ и҆ ті́и сла́вити твою̀ па́мѧть: на́съ же пою́щихъ тѧ̀ спаса́й ѿ всѧ́кагѡ гнѣ́ва.
И҆ ны́нѣ, бг҃оро́диченъ:
Сло́во ѻ҆́ч҃ее хрⷭ҇та̀ бг҃а на́шего, ѿ тебє̀ воплоти́вшагосѧ позна́хомъ, бцⷣе дв҃о, є҆ди́на чⷭ҇таѧ, є҆ди́на бл҃гослове́ннаѧ: тѣ́мъ непреста́ннѡ тѧ̀ воспѣва́юще велича́емъ.
Та́же степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Вознесо́хъ и҆збра́ннаго ѿ люде́й мои́хъ. Сті́хъ: И҆́бо рꙋка̀ моѧ̀ застꙋ́питъ є҆го̀. Всѧ́кое дыха́нїе: Є҆ѵⷢ҇лїе і҆ѡа́нна, зача́ло л҃ѕ.
По н҃-мъ ѱалмѣ̀ стїхи́ра, гла́съ и҃:
А҆пⷭ҇лѡмъ ревни́телѧ влади́мїра, преблаже́ннаго ѻ҆тца̀ и҆ ᲂу҆чи́телѧ соше́дшесѧ восхва́лимъ, и҆́мже хрⷭ҇та̀ бг҃а позна́хомъ и҆ ѿ тмы̀ къ свѣ́тꙋ приближа́ющесѧ, ѻ҆́чи и҆ сердца̀ просвѣща́емъ, въ па́мѧть є҆гѡ̀ ликовствꙋ́юще, кꙋ́пнѡ весели́мсѧ, ѡ҆брѣ́тше є҆го̀ вожда̀ правовѣ́рна въ црⷭ҇твїе нбⷭ҇ное.
Канѡ́нъ бцⷣы, со і҆рмосо́мъ на ѕ҃: пи́санъ сегѡ̀ мцⷭ҇а въ є҃-й де́нь. И҆ ст҃а́гѡ канѡ́на два̀, на и҃.
Канѡ́нъ.
Гла́съ и҃. Пѣ́снь а҃. І҆рмо́съ:
Посѣ́ченный несѣко́маго пресѣчѐ, и҆ ви́дѣ со́лнце зе́млю, ю҆́же не ви́дѣ, лю́таго врага̀ вода̀ потопѝ, и҆ непроходи́мое про́йде і҆и҃ль, пѣ́снь же воспѣва́шесѧ: гдⷭ҇еви пои́мъ, сла́внѡ бо просла́висѧ.
Собезнача́льное сло́во бж҃їе, и҆́же дре́вле четы́ремъ стїхі́амъ творе́цъ, и҆ тѣ́ми ве́сь мі́ръ сотвори́вый, свѧ́заннꙋю страстьмѝ дꙋ́шꙋ мою̀ разрѣшѝ, ꙗ҆́кѡ да воспою̀ ликꙋ́ѧ сла́внаго кнѧ́зѧ васі́лїа.
Ѿ вы́спрь соше́дъ, влⷣко, невеще́ственнѡ на дꙋхо́внꙋю го́рꙋ, свы́ше просѧ́щымъ ѿ тебє̀ ѡ҆би́льнꙋ свѣ́тлость дꙋша́мъ послѝ, достодо́лжнѡ похвали́ти чꙋ́днаго кнѧ́зѧ васі́лїа.
Бг҃оро́диченъ:
Ма́теремъ и҆ дѣ́вамъ похвала̀ ты̀, влⷣчце, ро́ждшаѧ жи́знь творца̀ мі́рови, ма́терскихъ же болѣ́зней не ѡ҆щꙋти́ла є҆сѝ, но мт҃и ᲂу҆́бѡ, и҆ дв҃а пребыла̀ є҆сѝ. тѣ́мже хва́лѧще тѧ̀, ра́дꙋйсѧ, вопїе́мъ тѝ.
Дрꙋгі́й канѡ́нъ.
Гла́съ ѕ҃. Пѣ́снь а҃. І҆рмо́съ:
Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.
Прїиди́те вѣ́рнїи, пѣ́снь дꙋхо́внꙋю возопїе́мъ, и҆ просла́вимъ хрⷭ҇та̀, и҆́же свѣ́тлѡ просла́вилъ є҆́сть честна́го влади́мїра вели́каго кнѧ́зѧ.
И҆́же сѣ́мѧ сѣ́ющемꙋ да́рꙋѧ, ты̀ и҆ мнѣ̀ да́рꙋй сло́во, да́телю благи́хъ, разрѣша́ѧ мѝ соꙋ́зъ ѧ҆зы́ка, и҆ ѡ҆бновѝ, сп҃се, къ славословле́нїю вѣ́рнѡ.
И҆́же во́лею, а҆ не нꙋ́ждею къ тебѣ̀ всѣ́хъ призыва́еши, ꙗ҆́коже дре́вле мѡѷсе́а и҆ и҆са́їю: та́кожде и҆ ны́нѣ въ се́рдцѣ возгласи́лъ є҆сѝ вѣ́рнагѡ и҆ достохва́льнагѡ кнѧ́зѧ.
Бг҃оро́диченъ:
Оу҆кра́шена добро́тою добродѣ́телей, бг҃ома́ти чⷭ҇таѧ, бг҃а и҆́стиннаго зачала̀ є҆сѝ, на́съ бжⷭ҇твенными добродѣ́тельми просвѣти́вшаго.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃. І҆рмо́съ:
Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й въ бз҃ѣ мое́мъ, разшири́шасѧ на врагѝ моѧ̑ ᲂу҆ста̀ моѧ̑, возвесели́хсѧ ѡ҆ спасе́нїи твое́мъ.
Ꙗ҆́кѡ трꙋба̀ бг҃огла́снаѧ возгласѝ, ѧ҆зы́къ тво́й, блаже́нне, дꙋхо́вный, провозглаша́ющь всѣ̑мъ концє́мъ землѝ рѡссі́йскїѧ хрⷭ҇то́во правовѣ́рное креще́нїе, и҆́мже просвѣще́нъ бы́въ, мі́ръ ве́сь просвѣти́лъ є҆сѝ.
Сїѧ́етъ дне́сь, васі́лїе, пресла́внаѧ па́мѧть твоѧ̀, ю҆́же пра́зднꙋютъ хрⷭ҇тоимени́тїи лю́дїе, тебѐ похвалѧ́ѧ своего̀ пра́ѻтца, и҆̀хже къ свѣ́тꙋ разꙋ́мномꙋ приве́лъ є҆сѝ.
Бг҃оро́диченъ:
Сѣ́нь зако́на пре́йде ржⷭ҇тво́мъ твои́мъ, бцⷣе, благода́ти прише́дши, ѻ҆́ч҃ꙋ сло́вꙋ хрⷭ҇тꙋ̀ бг҃ꙋ на́шемꙋ: є҆го́же позна́въ сла́вный кнѧ́зь, цр҃ковь твою̀ свѣ́тлѡ ᲂу҆краси́лъ є҆́сть.
И҆́нъ. І҆рмо́съ:
Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
И҆́же па́ѵла просвѣти́вый, и҆ и҆збра́нна сотвори́вый, та́кѡ и҆ васі́лїа ны́нѣ ѻ҆тца̀ рѡссі́йскагѡ ѻ҆чны́й недꙋ́гъ ѿто́ргнꙋлъ є҆сѝ, ми́лостиве, твои́мъ креще́нїемъ.
Кѡнстанті́на вѣ́рнагѡ подо́бникъ ꙗ҆ви́лсѧ є҆сѝ, хрⷭ҇та̀ въ се́рдцы твое́мъ прїи́мъ, и҆ є҆гѡ̀ за́повѣдемъ ꙗ҆́коже ѻ҆те́цъ всю̀ зе́млю рѡссі́йскꙋю наꙋчи́лъ є҆сѝ.
Бжⷭ҇твенною си́лою ты̀ возмога́ѧ, безбо́жнаго перꙋ́на, кꙋ́чꙋ бѣсо́вскꙋю сокрꙋши́лъ є҆сѝ, и҆ ко ѻ҆́паши ко́нстѣй того̀ привѧза́въ, повелѣ́лъ є҆сѝ во́инѡмъ разби́ти і҆́дѡла.
Бг҃оро́диченъ:
Сѣ́нь ст҃ꙋ́ю ѡ҆брѣ́тъ мр҃і́ю дв҃ꙋ, бж҃їй сосꙋ́дъ влади́мїръ кнѧ́зь вели́кїй, а҆пⷭ҇ла па́ѵла ревни́тель, се́й цр҃ковь бжⷭ҇твеннꙋю въ тоѧ̀ и҆́мѧ воздви́глъ є҆́сть.
Сѣда́ленъ, гла́съ в҃:
Въ моли́твахъ бдѧ́й при́снѡ ра́достною дꙋше́ю, васі́лїе, тогѡ̀ ра́ди поче́рплъ є҆сѝ дꙋ́ха премꙋ́дрости ѿ и҆сто́чника, сходѧ́щагѡ свы́ше. тѣ́мъ вѣ́рою просїѧ́въ ꙗ҆́кѡ со́лнце, молѧ́сѧ хрⷭ҇тꙋ̀ непреста́ннѡ, ᲂу҆скорѝ ще́дрый, и҆ потщи́сѧ спастѝ ѿ прегрѣше́нїй мі́ръ.
Два́жды.
Сла́ва, и҆ ны́нѣ, бг҃оро́диченъ:
Бцⷣе безневѣ́стнаѧ чⷭ҇таѧ, ꙗ҆́же безъ сѣ́мене ро́ждшаѧ всѣ́хъ влⷣкꙋ, того̀ со а҆́гг҃лы молѝ и҆зба́витисѧ на́мъ ѿ всѧ́кагѡ недоꙋмѣ́нїѧ, и҆ да́ти ᲂу҆миле́нїе и҆ свѣ́тъ дꙋша́мъ на́шымъ, и҆ согрѣше́нїй ѡ҆чище́нїе, ꙗ҆́же є҆ди́на вско́рѣ застꙋпа́ющи.
Пѣ́снь д҃. І҆рмо́съ:
Прⷪ҇ро́къ а҆ввакꙋ́мъ ᲂу҆́мныма ѻ҆чи́ма прови́дѣ, гдⷭ҇и, прише́ствїе твоѐ, тѣ́мъ и҆ вопїѧ́ше: ѿ ю҆́га прїи́детъ бг҃ъ. сла́ва си́лѣ твое́й, сла́ва снизхожде́нїю твоемꙋ̀.
Свѣ́тло бы́сть и҆ сла́дко по ѻ҆́блацѣ, и҆́мже покрыва́шесѧ нбⷭ҇ное со́лнце: весела́ же и҆ ра́достна весна̀ по зи́мнѣй ско́рби: ты́ же по ѻ҆́блацѣ і҆́дѡльскагѡ мра́ка, креще́нїемъ ꙗ҆́кѡ со́лнце свѣ́тлое возсїѧ́лъ є҆сѝ на́мъ, васі́лїе.
Па́ѵелъ фарїсе́й къ дама́скꙋ грѧды́й, ма́лымъ блеща́нїемъ вели́кагѡ свѣ́та ѡ҆слѣпле́нъ, креще́нїемъ же просвѣти́сѧ: є҆мꙋ́же ты̀ подо́бникъ бы́лъ є҆сѝ, сла́вне, корсꙋ́нѧ доше́лъ ѻ҆чны́й мра́къ ѿгна́лъ є҆сѝ.
Бг҃оро́диченъ:
Ты̀ ꙗ҆ви́ласѧ є҆сѝ, дв҃о, ко́рень ненапое́нъ, прозѧба́ѧ ѿпꙋще́нїе, пло́дъ свѣтоно́сный ро́ждши хрⷭ҇та̀ бг҃а на́шего: дрѧ́хлꙋющꙋю страстьмѝ дꙋ́шꙋ мою̀ просвѣтѝ, и҆ и҆спросѝ грѣхѡ́въ ѡ҆ставле́нїе.
И҆́нъ. І҆рмо́съ:
Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ взыва́ющи, ѿ смы́сла чи́ста ѡ҆ гдⷭ҇ѣ пра́зднꙋющи.
Чꙋ́до стра́шное и҆ пресла́вное и҆ неизглаго́ланное соверша́етъ влⷣка хрⷭ҇то́съ: ѡ҆бновлѧ́етъ бо бжⷭ҇твеннымъ креще́нїемъ всю̀ рѡссі́йскꙋю зе́млю, и҆ просвѣща́етъ кнѧ́зѧ васі́лїа.
Свѣ́тлѡ прїиди́те, и҆ достолѣ́пнѡ возгласи́те, сы́нове рѡссі́йстїи, ко ѻ҆тцꙋ̀ на́шемꙋ влади́мїрꙋ, и҆ па́мѧть є҆гѡ̀ вѣ́рнѡ всѝ да пра́зднꙋемъ свѣ́тлѡ.
Ѻ҆́тчее нече́стїе ѿгна́лъ є҆сѝ, всечестны́ѧ же твоеѧ̀ прама́тере[[Исправлена опечатка оригинала: према́тере. Прим. orthlib]] правовѣ́рнꙋю вѣ́рꙋ возлюби́лъ є҆сѝ, ра́вне а҆пⷭ҇лѡмъ хрⷭ҇тѡ́вымъ кнѧ́же, вели́кїй влади́мїре.
Бг҃оро́диченъ:
Ꙗ҆́кѡ две́рь приводѧ́щꙋю къ бжⷭ҇твенномꙋ вхо́дꙋ раѧ̀ свѣ́тлагѡ, ꙗ҆́кѡ мы́сленное мѣ́стно свѧще́нїѧ, ꙗ҆́кѡ добро́тꙋ і҆а́кѡвлю, дв҃ꙋ ᲂу҆блажа́емъ.
Пѣ́снь є҃. І҆рмо́съ:
Гдⷭ҇и бж҃е на́шъ, ми́ръ да́ждь на́мъ, гдⷭ҇и бж҃е на́шъ, стѧжи́ ны, гдⷭ҇и, ра́звѣ тебє̀, и҆но́гѡ не вѣ́мы, и҆́мѧ твоѐ и҆менꙋ́емъ.
Ра́дꙋйсѧ и҆ красꙋ́йсѧ дꙋ́хомъ, рѡссі́йскїй царю̀ васі́лїе, и҆зрѧ̑дныѧ бо вѣ̑тви бг҃оса̑дныѧ ко хрⷭ҇тꙋ̀ прине́слъ є҆сѝ, бг҃оизрѧ́дный тво́й пло́дъ, бори́са сла́внаго, и҆ глѣ́ба благочести́ваго: съ ни́миже предстоѧ̀ хрⷭ҇тꙋ̀, ѡ҆ на́съ моли́сѧ.
Ди́вный проречѐ и҆са́їа на і҆ерꙋсали́мъ: бꙋ́детъ ꙗ҆́вѣ гора̀ гдⷭ҇нѧ, и҆ до́мъ на ве́рхъ го́ръ. пра́веднѣ же на тебѣ̀ разꙋмѣ́хомъ бл҃года́ть дх҃а: до́мъ бо влⷣцѣ созда́лъ є҆сѝ на версѣ́хъ го́ръ.
Бг҃оро́диченъ:
Проповѣ́дꙋетъ ѡ҆ тебѣ̀ чꙋ́дный и҆са́їа дх҃омъ, дв҃ою хотѧ́щꙋ роди́ти хрⷭ҇та̀ безъ сѣ́мене: дв҃дъ же тво́й пра́дѣдъ ди́внѡ провозвѣстѝ твоѧ̑ вели́чєствїѧ: спасе́ бо на́съ ꙗ҆́кѡ ми́лостивъ.
И҆́нъ. І҆рмо́съ:
Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Дне́сь а҆́гг҃ли бж҃їи ра́дꙋютсѧ свѣ́тлѡ на нб҃сѣ́хъ въ па́мѧть твою̀ свѧтꙋ́ю: спа́слъ бо є҆сѝ на́съ ѿ всѧ́кагѡ лꙋка́вства, и҆ же́ртвъ бѣсо́вскихъ лю́ди мнѡ́ги и҆зба́вилъ є҆сѝ, и҆ всю̀ зе́млю рѡссі́йскꙋю.
Рыда́етъ бѣсо́вское мно́жество и҆ те́мное собо́рище, ви́дѧще на землѝ попира́ємы і҆́дѡлы, и҆̀же на поги́бель воздви́жєнныѧ человѣ́кѡмъ: и҆́хже бж҃їимъ повелѣ́нїемъ, васі́лїе, сокрꙋши́лъ є҆сѝ.
Ра́дꙋйсѧ и҆ весели́сѧ, ра́бе хрⷭ҇то́въ, кнѧ́же вели́кїй и҆ мꙋ́дрый, моле́бниче ѡ҆ дꙋша́хъ на́шихъ: тобо́ю бо мы̀ всѝ и҆зба́влени є҆смы̀ бѣсо́вскїѧ ле́сти. тѣ́мже ра́дꙋйсѧ, вопїе́мъ тѝ.
Бг҃оро́диченъ:
Чистото́ю сїѧ́ющи и҆здале́ча, бжⷭ҇твенное ᲂу҆гото́ванїе влⷣчне, всепѣ́таѧ, бы́вши: ты́ бо є҆ди́на показа́ласѧ є҆сѝ мт҃и сꙋ́щи бг҃ꙋ, и҆ рꙋка́ми ꙗ҆́кѡ млⷣнца того̀ носи́вши.
Пѣ́снь ѕ҃. І҆рмо́съ:
Ꙗ҆́кѡ во́ды морскі̑ѧ, чл҃вѣколю́бче, волна́ми жите́йскими ѡ҆бꙋрева́юсѧ. тѣ́мже, ꙗ҆́кѡ і҆ѡ́на, та́кѡ вопїю́ ти: возведѝ ѿ тлѝ живо́тъ мо́й, бл҃гоꙋтро́бне гдⷭ҇и.
Благоче́стїѧ ревни́тель сла́внагѡ царѧ̀ кѡнстанті́на ты̀ бы́лъ є҆сѝ, васі́лїе, просвѣти́вшагѡ креще́нїемъ є҆́ллинскїй ро́дъ: ты́ же дꙋхо́вною ба́нею лю́ди твоѧ̑ пресвѣ́тлѡ ѡ҆бнови́лъ є҆сѝ.
Ѡ҆слади́въ любо́вїю хрⷭ҇то́вою дꙋ́шꙋ, и҆ разꙋ̑мныѧ прїе́мъ крилѣ̑, прелетѣ́лъ є҆сѝ і҆́дѡльскїй мра́къ, и҆ разгна́лъ є҆сѝ тмꙋ̀ ѕловѣ́рїѧ, бл҃же́нне, весели́всѧ въ черто́гъ сп҃са всѣ́хъ бг҃а.
Бг҃оро́диченъ:
Благодꙋ́шствꙋетъ цр҃ковь рѡссі́йскаѧ дне́сь, и҆ правовѣ́рныхъ собо́ри, въ па́мѧть пресвѣ́тлꙋю васі́лїа, ᲂу҆блажа́юще твоѐ безсѣ́менное ржⷭ҇тво̀, дв҃о, и҆ прилѣ́жнѡ сн҃ꙋ твоемꙋ̀ молѧ́щесѧ зовꙋ́тъ: тѧ̀ велича́емъ.
И҆́нъ. І҆рмо́съ:
Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.
Си́лою бж҃їею попра́нъ є҆́сть сатана̀ дꙋшегꙋ́бецъ, и҆ лє́стныѧ є҆гѡ̀ жє́ртвы: побѣ́дника бо ꙗ҆ви́лъ на́мъ є҆́сть хрⷭ҇то́съ, васі́лїа вѣ́рнаго кнѧ́зѧ, сокрꙋши́ти и҆ поврещѝ того̀ подъ но́ги на́шѧ.
Спасѐ пре́жде гдⷭ҇ь рꙋко́ю мѡѷсе́овою і҆и҃лѧ ѿ рабо́ты: то́йже и҆ ны́нѣ рꙋко́ю васі́лїа, вѣ́рнагѡ кнѧ́зѧ, всѣ́хъ на́съ ѿ ле́сти і҆́дѡльскїѧ спа́слъ є҆́сть.
Досто́йнѡ тѝ взыва́емъ, и҆ вопїе́мъ всѝ: ра́дꙋйсѧ, всече́стне пребл҃же́нне, тѧ́ бо и҆зба́вителѧ съ бг҃омъ, васі́лїе, и҆́мамы. не пре́зри рабѡ́въ твои́хъ, но при́снѡ сохранѧ́й на́съ.
Бг҃оро́диченъ:
Ѡ҆брѣто́хомъ, пречⷭ҇таѧ, тобо́ю спасе́нїе, дв҃о препѣ́таѧ: є҆го́же жела́ютъ а҆́гг҃ли на нб҃сѣ́хъ ви́дѣти, се́й ны́нѣ ви́дитсѧ въ нѣ́дрѣхъ твои́хъ млⷣнцъ, бг҃ъ на́шъ.
Конда́къ, гла́съ и҃:
Подо́бствовавъ вели́комꙋ а҆пⷭ҇лꙋ па́ѵлꙋ въ сѣди́нахъ, всесла́вне влади́мїре, всѧ̑ ꙗ҆́кѡ младе́нчєскаѧ мꙋдрова̑нїѧ, ꙗ҆̀же ѡ҆ і҆́дѡлѣхъ тща̑нїѧ ѡ҆ста́вль, ꙗ҆́кѡ мꙋ́жъ соверше́нный, ᲂу҆краси́лсѧ є҆сѝ бжⷭ҇твеннагѡ креще́нїѧ багрѧни́цею: и҆ ны́нѣ сп҃сꙋ хрⷭ҇тꙋ̀ въ весе́лїи предстоѧ̀, молѝ спасти́сѧ держа́вы рѡссі́йскїѧ нача́льникѡмъ, и҆ мно́жествꙋ владо́мыхъ.
І҆́косъ:
Просвѣти́вый дре́вле і҆и҃лѧ мѡѷсе́йскимъ зако́номъ, просвѣти́лъ же є҆сѝ мі́ръ ꙗ҆вле́нїемъ твоегѡ̀ прише́ствїѧ, хрⷭ҇тѐ бж҃е, бг҃огла̑сныѧ твоѧ̑ ᲂу҆ченикѝ посла́лъ є҆сѝ проповѣ́дати по страна́мъ, є҆́же ѿ дв҃ы безсѣ́менное ржⷭ҇тво̀ твоѐ: и҆ тѣ̑мъ повелѣ́лъ є҆сѝ крⷭ҇ти́ти, во и҆́мѧ ѻ҆ц҃а̀ и҆ сн҃а и҆ ст҃а́гѡ дх҃а. ѡ҆бветша́вшꙋ же ви́дѧ странꙋ̀ рѡссі́йскꙋю грѣхо́мъ, дх҃ъ тво́й посла́лъ є҆сѝ, въ крѣпкоразꙋ́мнагѡ дꙋ́шꙋ сла́внагѡ влади́мїра, позна́ти тебѐ є҆ди́наго ѿ трⷪ҇цы хрⷭ҇та̀ бг҃а, и҆ твои́мъ креще́нїемъ просвѣти́ти и҆збра̑нныѧ твоѧ̑, и҆ ѿ тебє̀ порꙋчє́нныѧ є҆мꙋ̀ лю́ди, и҆ привестѝ къ тебѣ̀ вѣ́рою вопїю́щыѧ: и҆зба́ви твоѐ достоѧ́нїе ѿ сопроти́вныхъ пога̑нъ, рѡссі́йскїѧ нача́льники, и҆ мно́жество владо́мыхъ.
Пѣ́снь з҃. І҆рмо́съ:
Халде́йскїѧ пе́щи всепа́гꙋбнꙋю си́лꙋ ᲂу҆гаси́вше, ѻ҆́бразомъ а҆́гг҃ла снизше́дшагѡ, зижди́телю ю҆́нѡши взыва́хꙋ: бл҃гослове́нъ є҆сѝ и҆ хва́льный бж҃е ѻ҆тє́цъ на́шихъ.
Пра́ѻтчи бг҃оистка́нныѧ мѧ̀ ри́зы вра́гъ дꙋшегꙋ́бецъ ѡ҆бнажи́лъ є҆́сть: і҆и҃съ же безнача́льный ꙗ҆вле́йсѧ пло́тїю, ѡ҆чи́стивъ водо́ю дх҃а, па́ки мнѣ̀ подадѐ ю҆̀, є҆го́же позна́въ, сла́вне влади́мїре, весели́шисѧ вопїѧ̀: бл҃гослове́нъ бг҃ъ ѻ҆тє́цъ на́шихъ.
Мѡѷсе́йскїй сохрани́въ зако́нъ, данїи́лъ бг҃овидѣ́нїѧ сподо́бисѧ: пра́ѻтеческїѧ же ты̀ попра́въ і҆́дѡлы, не ꙗ҆́кѡ во мра́цѣ, но въ бо́льшей сла́вѣ, разꙋ́мнѡ ᲂу҆зрѣ́лъ є҆сѝ хрⷭ҇та̀ со ѻ҆ц҃е́мъ и҆ дх҃омъ, креще́нїемъ же просвѣще́нъ, весели́шисѧ вопїѧ̀: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
Бжⷭ҇твенныѧ ѡ҆бнажѝ ѻ҆де́жды, вра́гъ прельсти́въ первозда́ннаго пра́дѣда твоего̀, дв҃о, и҆зъ бокꙋ́ же твоє́ю чⷭ҇тою и҆ неискꙋсобра́чною прише́дъ, сп҃съ сла́дкїй мо́й і҆и҃съ: на него́же поте́къ а҆́ки на а҆да́ма, но ѡ҆ бг҃а ѡ҆брази́сѧ, и҆ сокрꙋши́сѧ лю́тѣ. мы́ же сн҃ꙋ твоемꙋ̀ зове́мъ: бл҃гослове́нъ бг҃ъ ѻ҆тє́цъ на́шихъ.
И҆́нъ. І҆рмо́съ:
Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.
Є҆ле́ны ты̀ но́выѧ любо́вїю и҆звѣсти́лсѧ є҆сѝ, внꙋ́къ бы́въ преблаже́нныѧ ѻ҆́льги: кѡнстанті́нъ же вели́кїй но́вый ꙗ҆ви́лсѧ є҆сѝ, хрⷭ҇тꙋ̀, васі́лїе, вопїѧ̀: бл҃гослове́нъ є҆сѝ, бж҃е ѻ҆тє́цъ на́шихъ.
Лю́тый льсте́цъ двиза́шесѧ на хрⷭ҇тїа́ны воева́ти: превели́кїй же гдⷭ҇ь въ корсꙋ́нѣ тѧ̀ просвѣща́етъ, и҆ креще́нїю бжⷭ҇твенномꙋ сподоблѧ́етъ: и҆ црⷭ҇твїе нбⷭ҇ное тебѣ̀ дарова́лъ є҆́сть.
Ѡ҆бветша́вшꙋю ле́сть бѣсо́вскꙋю прогна́лъ є҆сѝ, ꙗ҆́кѡ вели́кїй хрⷭ҇то́въ ᲂу҆чени́къ, ѡ҆бнови́въ просвѣти́лъ є҆сѝ всѣ́хъ на́съ, вопи́ти гдⷭ҇еви немо́лчнѡ: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
Ѿ родѡ́въ тѧ̀ всѣ́хъ и҆збра́лъ є҆́сть бг҃ъ превѣ́чный пре́жде вѣ̑къ, и҆ въ послѣ̑днїѧ дни̑ пло́ть прїе́мъ ѿ тебє̀, соверше́нъ вкꙋ́пѣ ꙗ҆ви́сѧ бг҃ъ и҆ чл҃вѣ́къ, приснодв҃о.
Пѣ́снь и҃. І҆рмо́съ:
Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки.
Ро́дъ пра́ведныхъ благослови́тсѧ, бжⷭ҇твєнныѧ вѣща́ша ᲂу҆ста̀, є҆́же на тебѣ̀ сбы́стсѧ, блаже́нне: сѣ́мѧ бо ст҃олѣ́пное и҆ бг҃оизбра́нное прине́слъ є҆сѝ хрⷭ҇тꙋ̀, непобѣди̑мыѧ мч҃ники, и҆́миже просвѣти́лъ є҆сѝ зе́млю рѡссі́йскꙋю. и҆̀хже похвалѧ́юще съ тобо́ю, превозно́симъ хрⷭ҇та̀ во вѣ́ки.
Мт҃и всѣ́хъ градѡ́въ вои́стиннꙋ, ца́рства твоегѡ̀ гра́дъ ꙗ҆ви́сѧ кі́евъ, въ не́мже хрⷭ҇то́съ пре́жде со ѻ҆ц҃е́мъ и҆ дх҃омъ просла́висѧ, твое́ю прама́терїю и҆ тобо́ю, блаже́нне: и҆дѣ́же мꙋ́жественное твоѐ тѣ́ло лежи́тъ свѣ́тлѡ въ цр҃кви влⷣчцы: мы́ же лю́дїе твоѝ хва́лѧще пое́мъ хрⷭ҇та̀ во вѣ́ки.
Бг҃оро́диченъ:
Безнача́льное сїѧ́нїе и҆ сло́во ѻ҆́ч҃ее, проповѣ́даша нело́жнѡ прⷪ҇ро́честїи гла́си, и҆зъ тебє̀ хотѧ́щаго безъ тлѝ роди́тисѧ є҆мманꙋ́ила, бг҃а же и҆ чл҃вѣ́ка, крѣ́пкое ꙗ҆зы́кѡвъ ча́ѧнїе: є҆мꙋ́же, ꙗ҆́кѡ мт҃и, моли́сѧ спасти́сѧ на́мъ.
И҆́нъ. І҆рмо́съ:
И҆зъ пла́мене прпⷣбнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти, тѧ̀ превозно́симъ во всѧ̑ вѣ́ки.
Ѿ бездꙋ́шныхъ і҆́дѡлѡвъ всѣ́хъ на́съ и҆зба́вилъ є҆сѝ, ко хрⷭ҇тꙋ́ же бг҃ꙋ приве́лъ є҆сѝ, ѻ҆́ч҃е, вѣ́рныхъ кнѧзе́й, наказа́телѧ ста́дъ твои́хъ, хрⷭ҇та̀ пою́щихъ во вѣ́ки.
Кѡнстанті́нъ но́вый ты̀ и҆звѣсти́лсѧ є҆сѝ во все́й рѡссі́йстѣй землѝ, бл҃же́нне васі́лїе: ты́ бо и҆́мѧ хрⷭ҇то́во и҆з̾ѧсни́лъ є҆сѝ, є҆го́же превозно́симъ во вѣ́ки.
Цр҃ю̀ вѣ́чномꙋ ны́нѣ ты̀ предстои́ши, и҆ десни́цею є҆гѡ̀ вѣнча́нъ є҆сѝ: моли́сѧ є҆мꙋ̀ за недостѡ́йныѧ рабы̑ твоѧ̑, ꙗ҆́кѡ да пое́мъ є҆го̀, и҆ превозно́симъ во вѣ́ки.
Бг҃оро́диченъ:
Ѻ҆́блакъ сло́ва ты̀ є҆сѝ, препѣ́таѧ, и҆ свѣща̀ со́лнечнаѧ, колесни́ца многоцѣ́ннаѧ, дѣви́ческое возвыше́нїе, горо̀ тꙋ́чнаѧ и҆ ᲂу҆сыре́ннаѧ, пребыва́еши пречⷭ҇таѧ дв҃о гдⷭ҇оимени́таѧ.
Пѣ́снь ѳ҃. І҆рмо́съ:
Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.
Дв҃дъ ѡ҆брѣ́тесѧ пре́жде і҆и҃лю держа́вный ца́рь, и҆ лю́ди спасѐ, бо́ги и҆ноꙗзы̑чныѧ низложи́въ, дх҃омъ бж҃їѧ сн҃а проповѣ́да. ты́ же въ трⷪ҇цѣ позна́лъ є҆сѝ бг҃а, бл҃же́нне васі́лїе, є҆го́же велича́емъ.
Да торжествꙋ́ютъ дне́сь ве́селѡ па́мѧть твою̀, свѧтолѣ́пнѡ въ цр҃кви бж҃їѧ мт҃ре, бг҃оизбра́ннїи лю́дїе, ю҆́же любе́знѡ ᲂу҆краси́лъ є҆сѝ, въ па́мѧть вѣ́чнꙋю твоегѡ̀ преставле́нїѧ, не́бо земно́е: въ не́мже почива́ѧ, ѡ҆жида́еши всестра́шныѧ трꙋбы̀ а҆рха́гг҃ловы, бл҃же́нне. тѣ́мъ тѧ̀ при́снѡ велича́емъ.
Бг҃оро́диченъ:
Дх҃омъ бжⷭ҇твеннымъ распала́еми всѝ ро́ди, любо́вїю бл҃жи́мъ тѧ̀, бцⷣе: ты́ бо клѧ́твꙋ прама́тере разрꙋши́ла є҆сѝ. прилѣ́жнѡ же пое́мъ бж҃їѧ сло́ва: того́ бо неѡпа́льнѡ во чре́вѣ твое́мъ прїе́мши, родила̀ є҆сѝ пло́тїю. къ немꙋ́же моли́сѧ, и҆зба́витисѧ вѣ́рномꙋ твоемꙋ̀ ста́дꙋ ѿ всѧ́кїѧ нꙋ́жды и҆ печа́ли.
И҆́нъ. І҆рмо́съ:
Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно. є҆го́же велича́юще, съ нбⷭ҇ными вѡ́и, тѧ̀ ᲂу҆блажа́емъ.
Сла́докъ ꙗ҆́коже фі́нїѯъ, высо́къ и҆зраща́емь, и҆ цвѣ́тъ творѧ̀ ма́сличный, вѣ̑тви многоплѡ́дныѧ, ты̀ быва́еши ві́нное и҆зраще́нїе, ки́сти двѣ̀ созрѣ̑лы мꙋ́ченики приносѧ̀, рѡма́на и҆ даві́да честны̑ѧ.
Ли́цы кнѧзе́й ны́нѣ благоро́дныхъ предстоѧ́тъ, ѿ тебє̀ благоче́стїе носѧ́ще, съ людьмѝ вѣ́рными хва́лѧще тѧ̀: наста́вниче и҆ ско́рый застꙋ́пниче, помина́й всѣ́хъ на́съ, ꙗ҆́кѡ да въ ми́рѣ тобо́ю живо́тъ ѡ҆брѧ́щемъ.
Лю́дїе рѡссі́йстїи, прїиди́те, сни́дитесѧ въ чⷭ҇тнѣ́й цр҃кви влади́мїра ст҃а́гѡ, нарече́ннагѡ васі́лїа, пребл҃же́ннагѡ вели́кагѡ кнѧ́зѧ, ᲂу҆го́дника хрⷭ҇то́ва пресла́внагѡ, и҆ прїими́те живо́тъ и҆ спасе́нїе, бл҃года́ть и҆ ве́лїю ми́лость.
Бг҃оро́диченъ:
Бг҃а, дв҃о, ты̀ родила̀ є҆сѝ на землѝ, во пло́ти соедине́нїе бы́сть безпло́тное, во є҆ди́ной ѵ҆поста́си, и҆ во двою̀ є҆стєствꙋ̀: да спасе́тъ всѣ́хъ на́съ, кла́нѧющихсѧ вѣ́рнѡ, ꙗ҆́кѡ бцⷣѣ пречⷭ҇тѣй.
Свѣти́ленъ. Подо́бенъ: Жєны̀ ᲂу҆слы́шите:
Свѣти́льницы, просвѣти́вше вселе́ннꙋю всю̀ благоче́стїемъ и҆ вѣ́рою, вы̀ ꙗ҆ви́стесѧ вои́стиннꙋ, бг҃овѣнча́нне влади́мїре, съ прама́терїю є҆ле́ною сла́вною. ва́съ возлюби́вшаго хрⷭ҇та̀, и҆ мы̀ славосло́вимъ ди́внаго во ст҃ы́хъ.
Два́жды.
Сла́ва, и҆ ны́нѣ, бг҃оро́диченъ:
Во двою̀ вѡ́лю и҆ є҆стєствꙋ̀, пренепоро́чнаѧ, во є҆ди́ной же ѵ҆поста́си ражда́еши бг҃а неизрече́ннѡ, на́съ ра́ди ѡ҆бнища́вшаго до распѧ́тїѧ хотѣ́нїемъ, и҆ дарова́вшаго на́мъ[[Исправлена опечатка оригинала: ба́мъ. Прим. orthlib]] бога́тство бжⷭ҇твенное, бг҃ома́ти дв҃о.
На хвали́техъ стїхи̑ры на д҃, гла́съ д҃. Поⷣ: Да́лъ є҆сѝ зна́менїе:
Ѻ҆рꙋ́жїе крѣ́пкое ꙳ кнѧ́зю на́шемꙋ да́лъ є҆сѝ, гдⷭ҇и, ꙳ крⷭ҇тъ тво́й честны́й, ꙳ и҆́мже поживѐ на землѝ пра́веднѡ, ꙳ просїѧ́въ бл҃гоче́стїемъ, ꙳ и҆ црⷭ҇твꙋ нбⷭ҇номꙋ сподо́бисѧ милосе́рдїемъ твои́мъ. ꙳ тѣ́мже твоѐ человѣколю́бное смотре́нїемъ сла́вимъ, ꙳ і҆и҃се всеси́льне, ꙳ сп҃се дꙋ́шъ на́шихъ.
Два́жды.
Да́лъ є҆сѝ, чл҃вѣколю́бче, ꙳ благочести́вомꙋ твоемꙋ̀ ᲂу҆го́дникꙋ, ꙳ соломѡ́новꙋ мꙋ́дрость, ꙳ дв҃довꙋ кро́тость ꙳ и҆ а҆пⷭ҇льское правосла́вїе, ꙳ ꙗ҆́кѡ царе́й цр҃ь ꙳ и҆ госпо́дствꙋющихъ[[Исправлена опечатка оригинала госпо́дстꙋющихъ. Прим. orthlib]] всѣ́хъ гдⷭ҇ь. ꙳ тѣ́мже твоѐ чл҃вѣколю́бное смотре́нїе сла́вимъ, ꙳ і҆и҃се всеси́льне, ꙳ сп҃се дꙋ́шъ на́шихъ.
Пе́рвый повинꙋ́лъ є҆сѝ багрѧни́цꙋ, ꙳ приснопо́мнимый кнѧ́же, во́лею хрⷭ҇тꙋ̀, ꙳ того̀ позна́въ бг҃а, ꙳ и҆ ꙗ҆́кѡ цр҃ѧ̀ всѣ́хъ бл҃годѣ́телѧ, ꙳ побѣ̑ды творѧ̀ всѧ́комꙋ нача́лꙋ, ꙳ и҆ вла́сти належа́щымъ. ꙳ ѿсю́дꙋ тебѣ̀, хрⷭ҇толю́бче, ца́рство и҆спра́вилъ є҆́сть, ꙳ і҆и҃съ чл҃вѣколю́бецъ, ꙳ сп҃съ дꙋ́шъ на́шихъ.
Сла́ва, гла́съ в҃:
Не ѿ человѣ̑къ зва́нїе прїѧ́лъ є҆сѝ, но ꙗ҆́кѡ чꙋ́дный па́ѵелъ: прїѧ́лъ же па́че, сла́вне, сїѐ свы́ше, влади́мїре а҆пⷭ҇ле, ѿ хрⷭ҇та̀ бг҃а. и҆́бо зна́менїемъ крⷭ҇та̀ ѡ҆гради́всѧ, и҆ тѣ́мъ ᲂу҆ловле́нъ бы́въ, ꙗ҆́кѡ предо́браѧ лови́тва, си́мъ побѣди́тель на ви̑димыѧ и҆ неви̑димыѧ врагѝ ꙗ҆ви́лсѧ є҆сѝ непобѣди́мь. тѣ́мже мо́лимъ тѧ̀, ꙗ҆́кѡ моли́твенника те́пла земноро́днїи, по достоѧ́нїю па́мѧть твою̀ почита́юще, со дерзнове́нїемъ проси́ти на́мъ просвѣще́нїе, и҆ ѡ҆чище́нїе, и҆ ве́лїю ми́лость.
И҆ ны́нѣ, бг҃оро́диченъ: Славосло́вїе вели́кое. И҆ ѿпꙋ́стъ.
На лїтꙋргі́и, бл҃жє́нна, ѿ ѻ҆бою̀ канѡ́нѡвъ: а҃- гѡ пѣ́снь г҃, и҆ в҃-гѡ пѣ́снь ѕ҃. Прокі́менъ, гла́съ г҃: По́йте бг҃ꙋ на́шемꙋ, по́йте: Сті́хъ: Всѝ ꙗ҆зы́цы восплещи́те[[Исправлена опечатка оригинала воспещи́те. Прим. orthlib]] рꙋка́ми, воскли́кнете бг҃ꙋ гла́сомъ ра́дованїѧ. А҆пⷭ҇лъ къ гала́тѡмъ, зача́ло с҃. А҆ллилꙋ́їа, гла́съ ѕ҃: Вознесо́хъ и҆збра́ннаго ѿ люде́й мои́хъ. Сті́хъ: И҆́бо рꙋка̀ моѧ̀ застꙋ́питъ є҆го̀, и҆ мы́шца моѧ̀ ᲂу҆крѣпи́тъ є҆го̀. Є҆ѵⷢ҇лїе і҆ѡа́нна, зача́ло л҃є, ѿ полꙋ̀. Прича́стенъ: Въ па́мѧть вѣ́чнꙋю бꙋ́детъ првⷣникъ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.