← претходни дан | Минеј — Јул | следећи дан →
14 июля: Апостола Акилы. Мучеников Кирика и Иулитты
Мѣ́сѧца тогѡ́же въ д҃ї-й де́нь.
Ст҃а́гѡ а҆пⷭ҇ла а҆кѵ́лы.
Сегѡ́ же днѐ пое́тсѧ слꙋ́жба ки́рѷка и҆ і҆ꙋлі́тты вкꙋ́пѣ со а҆пⷭ҇ломъ.
Стїхи̑ры а҆пⷭ҇ла г҃, гла́съ а҃. Подо́бенъ: Нбⷭ҇ныхъ чинѡ́въ:
Па́ѵелъ вели́кїй, бг҃омꙋ́дре, ꙳ мі́ра со́лнце, ꙳ ꙗ҆́коже свѣ́тлꙋю лꙋчꙋ̀ во вселе́ннꙋю, ꙳ тебѐ, блаже́нне, пꙋстѝ, ꙳ свѣ́тлыми твои́хъ слове́съ сїѧ̑нїи просвѣти́ти ꙳ дре́вле въ нощѝ невѣ́дѣнїѧ бѣ́дствꙋющыѧ.
Чи́стое твоѐ се́рдце, ꙳ бжⷭ҇твеннагѡ дх҃а свѣ́тлыми зарѧ́ми ꙳ ѡ҆зари́вшисѧ бога́тнѡ, а҆кѵ́ло бг҃огла́се, ꙳ свѣтови́дно вои́стиннꙋ ꙗ҆ви́сѧ, ꙳ и҆ є҆́ллинѡвъ тмꙋ̀ лю́тꙋю ꙳ бжⷭ҇твенною благода́тїю разорѝ.
И҆̀же хра́мꙋ твоемꙋ̀ бжⷭ҇твенномꙋ притека́ющїи, ꙳ и҆ въ не́мъ тѧ̀ вѣ́рою молѧ́ще, а҆кѵ́ло, ꙳ и҆збавлѧ́ютсѧ недꙋ́гѡвъ всѧ́ческихъ, ꙳ и҆ бѣ́дъ и҆ скорбе́й, ꙳ свѧще́нными твои́ми мольба́ми, ꙳ и҆ къ бг҃ꙋ хода́тайствы, свѧще́нне.
И҆́ны стїхи̑ры мч҃никѡвъ, г҃, гла́съ д҃. Подо́бенъ: Ꙗ҆́кѡ до́блѧ:
Младоꙋ́мнаго мꙋчи́телѧ, соверше́ннымъ ᲂу҆мо́мъ, ꙳ несоверше́ннымъ же тѣ́ломъ, мꙋ́чениче ки́рѷче, ꙳ мꙋжемꙋ́дреннѡ посрами́лъ є҆сѝ. тѣ́мже на сꙋди́щи тѧ̀ тѧ́жкѡ и҆стѧзꙋ́ѧ, ꙳ налага́етъ сме́рть тебѣ̀, ꙳ помина́ющꙋ жи́знь нестарѣ́емꙋю, ꙳ въ ню́же вше́лъ є҆сѝ, неꙋсѣ́ченною на лѣ̑та ꙳ ѡ҆роша́емь кро́вїю.
Ꙗ҆́кѡ плодови́тъ вїногра́дъ, ꙳ напоє́нїи дꙋхо́вными, ꙳ і҆ꙋлі́тта сла́внаѧ, ꙳ ѿ бокꙋ̀ твоє́ю прозѧ́бша ки́рѷка, ꙳ приво́диши закала́ема, ꙳ и҆ точи́лы мꙋ́ченическими вои́стиннꙋ и҆згнете́на, ꙳ съ ни́мже и҆сточи́вше ᲂу҆миле́нїѧ вїно̀, ꙳ сердца̀ веселитѐ, ꙳ вѣ́рою творѧ́щихъ па́мѧть ва́шꙋ.
Ра́намъ прибли́жившисѧ, ꙳ и҆ строга́нїе тѣлесѐ, ꙳ вои́стиннꙋ претерпѣ́ла є҆сѝ, досточꙋ́днаѧ, ꙳ ѻ҆чи́ма же зрѧ́щи сыно́вне сконча́нїе, ꙳ мꙋче́нїе сꙋгꙋ́бо, і҆ꙋлі́тто, прошла̀ є҆сѝ: ꙳ тѣ́мже дае́тъ тѝ ꙳ и҆ сꙋгꙋ́бы вѣнцы̀ подвигополо́жникъ, ꙳ побѣ́дꙋ стра́ждꙋщымъ ꙳ всеси́льнѡ да́рꙋѧ.
Сла́ва, гла́съ ѕ҃:
Прїиди́те, и҆ ᲂу҆́зрите всѝ стра́нное видѣ́нїе и҆ пресла́вное: кто̀ ви́дѣ младе́нца трилѣ́тна сꙋ́ща, мꙋчи́телѧ посрами́вша; ѽ чꙋдесѐ! ма́терь сса́ше, и҆ млекопита́тельницѣ вопїѧ́ше: не бо́йсѧ, ма́ти моѧ̀, мꙋ́къ лю́тагѡ мїроде́ржца, хрⷭ҇то́съ бо є҆́сть крѣ́пость вѣ́рꙋющымъ въ него̀.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Подо́бенъ: Тридне́венъ:
Лю́ди беззако́ннѣйшїи, безъ пра́вды пригвожда́ющѧ тѧ̀ на дре́вѣ, дв҃а и҆ чⷭ҇таѧ мт҃и твоѧ̀ зрѧ́щи, ꙗ҆́коже сѷмеѡ́нъ проречѐ, ᲂу҆тро́бою, сп҃се, ᲂу҆ѧзвлѧ́шесѧ.
На стїхо́внѣ ѻ҆ктѡ́иха. Сла́ва, гла́съ и҃:
Трилѣ́тенъ трⷪ҇цꙋ проповѣ́даше, и҆ млеко̀ ссы́й, мт҃рь ᲂу҆твержда́ше, преста́ни, ѽ ма́ти моѧ̀, ѿ сле́зъ пла́чꙋщи, свы́ше зижди́тель зри́тъ, и҆ спасе́тъ дꙋ́шы на́шѧ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Что̀ ва́съ нарече́мъ:
Не терплю̀, ча́до, ви́дѧщи тѧ̀ ꙳ на дре́вѣ ᲂу҆снꙋ́вша, ꙳ бо́дрость всѣ̑мъ подаю́щаго ꙳ ꙗ҆́кѡ да и҆́же дре́вле престꙋпле́нїѧ плодо́мъ, ꙳ сно́мъ поги́бельнымъ ᲂу҆снꙋ́вшымъ, ꙳ бжⷭ҇твеннꙋю и҆ спаси́тельнꙋю бо́дрость пода́си, ꙳ дв҃а глаго́лаше пла́чꙋщисѧ, ꙳ ю҆́же велича́емъ.
Тропа́рь, гла́съ г҃:
А҆пⷭ҇ле ст҃ы́й а҆кѵ́ло, молѝ ми́лостиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.
Сла́ва, мч҃никѡвъ, гла́съ д҃:
Мꙋ́чєницы твоѝ, гдⷭ҇и, во страда́нїихъ свои́хъ вѣнцы̀ прїѧ́ша нетлѣ̑нныѧ ѿ тебє̀ бг҃а на́шегѡ: и҆мꙋ́ще бо крѣ́пость твою̀, мꙋчи́телей низложи́ша, сокрꙋши́ша и҆ де́мѡнѡвъ немѡщны́ѧ де́рзѡсти. тѣ́хъ моли́твами спасѝ дꙋ́шы на́шѧ.
На ᲂу҆́трени, канѡ́нъ ѻ҆ктѡ́иха є҆ди́нъ: и҆ а҆пⷭ҇ла на д҃, є҆гѡ́же краегране́сїе: Сла́внаго воспое́мъ а҆кѵ́лꙋ любо́вїю: Творе́нїе і҆ѡ́сифово.
Гла́съ в҃. Пѣ́снь а҃. І҆рмо́съ:
Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.
Свѧще́ннаго свѧще́нными воспои́мъ а҆кѵ́лꙋ пѣ́сньми, и҆ возопїе́мъ: тогѡ̀ моли́твами, ще́дре, всѧ̑ спасѝ, ꙗ҆́кѡ пребла́гъ.
Ве́сь себѐ, бл҃же́нне, прїѧ́телище дх҃а свѣтови́дно сотвори́лъ є҆сѝ, ѡ҆сїѧ́емь тогѡ̀ свѣ́тлыми зарѧ́ми: тѣ́мъ сꙋ́щыѧ бо тмѣ̀ просвѣти́лъ є҆сѝ.
Зако́номъ хрⷭ҇то́вымъ ѡ҆гради́въ ᲂу҆́мъ тво́й, беззако́нныхъ шата́нїе всѐ низложи́лъ є҆сѝ, и҆ і҆́дѡльскїѧ хра́мы всѧ̑ разори́лъ є҆сѝ, пострада́въ, бг҃облаже́нне.
Бг҃оро́диченъ:
Сло́вомъ, чⷭ҇таѧ, сло́во во ᲂу҆тро́бѣ зачала̀ є҆сѝ, сло́вомъ всѧ̑ содѣ́лавшаго. сегѡ̀ ра́ди тѧ̀ словесы̀ бжⷭ҇твенными воспѣва́емъ, бг҃ора́дованнаѧ.
И҆́нъ канѡ́нъ мч҃никѡвъ на д҃, є҆гѡ́же краегране́сїе:
Ки́рѷка пою̀ съ ро́ждшею мꙋ́дреннѡ. Творе́нїе і҆ѡ́сифово.
Гла́съ и҃. Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Проповѣ́давше сло́ва, ѿ ѻ҆ц҃а̀ ꙗ҆́вѣ рожде́нна, воплоще́на же ѿ мт҃ре, свидѣ́тели сегѡ̀ страсте́й, страстьмѝ и҆ сме́ртїю бы́сте.
Сла́внаѧ мч҃ница, ꙗ҆́кѡ свѣтоза́рнаѧ лꙋна̀, совокꙋ́пльшисѧ съ со́лнцемъ, и҆зъ неѧ̀ рожде́ннымъ ки́рѷкомъ, всю̀ тва́рь чꙋде́сными зарѧ́ми просвѣща́ютъ.
Текꙋ́щими и҆змѣни́ла є҆сѝ, ꙗ҆̀же ника́коже дви̑жима, мꙋ́ченице, и҆ на рꙋка́хъ твоего̀ сы́на носѧ́щи, съ си́мъ беззако́нныхъ и҆ дїа́волю ле́сть ѡ҆мрачи́ла є҆сѝ.
Сꙋ́щи ѿ ро́да сла́вна, мꙋче́нїемъ же и҆ страда̑нїи многови́дными, мꙋ́ченице і҆ꙋлі́тто, цр҃ѧ̀ безсме́ртнагѡ дщѝ была̀ є҆сѝ.
Бг҃оро́диченъ:
Оу҆праздни́сѧ сме́рть тебє̀ ра́ди, и҆ а҆́дово жа́ло потреби́сѧ, мт҃и чⷭ҇таѧ: ты́ бо безсме́ртнаго влⷣкꙋ, ᲂу҆мерщвле́на пло́тїю, родила̀ є҆сѝ.
Пѣ́снь г҃. І҆рмо́съ:
Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.
Возжела́лъ є҆сѝ бг҃а, ꙗ҆́кѡ прпⷣбенъ, сла́вне, є҆ди́наго влⷣкꙋ и҆ цр҃ѧ̀: и҆ тогѡ̀ бжⷭ҇твенное хотѣ́нїе несꙋмнѣ́ннымъ се́рдцемъ и҆спо́лнилъ є҆сѝ.
Крѣ́постїю честна́гѡ и҆ бжⷭ҇твеннагѡ дх҃а, а҆кѵ́ло прехва́льне, лꙋка́вагѡ крѣ́пость всю̀ низложи́лъ є҆сѝ, пострада́въ до́блественнѣ, свѧще́ннѣйше.
Оу҆мо́мъ твои́мъ чи́стымъ созерца́ѧ сла́вꙋ гдⷭ҇ню, тоѧ̀ причасти́лсѧ є҆сѝ соверше́ннѡ, бл҃же́нне, ѿше́дъ ѿ вре́менныхъ къ пребыва́ющымъ.
Бг҃оро́диченъ:
Є҆ди́нъ чи́стый, є҆ди́нъ гдⷭ҇ь, тѧ̀ є҆ди́нꙋ ꙗ҆́кѡ позна̀ чистѣ́йшꙋю всеѧ̀ тва́ри, пренепоро́чнаѧ, ѿ чⷭ҇тыхъ твои́хъ крове́й воплоти́сѧ.
И҆́нъ. І҆рмо́съ:
Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе є҆ди́не чл҃вѣколю́бче.
Нбⷭ҇ныхъ черто́гѡвъ, и҆ свѣтоза́рнагѡ поко́ѧ, вѣ́чнꙋющїѧ же сла́вы сподо́бистесѧ, мꙋ́ченицы сла́внїи, дїа́волѧ жа̑ла болѣ́зньми страда́нїѧ потре́бльше.
Птене́цъ ꙗ҆́кѡ красе́нъ, голꙋби́цѣ цѣломꙋ́дреннѣй се́й подо́билсѧ є҆сѝ, льсти́вомꙋ проти́вѧсѧ, сла́вне ки́рѷче, льсти́внѡ пристꙋ́пльшꙋ, и҆ ᲂу҆кра́сти тща́щꙋсѧ тѧ̀ непобѣди́маго.
Го́рдаго ѕмі́ѧ, на не́бо положи́вша ᲂу҆ста̀, и҆ зе́млю потреби́ти хва́лѧщагосѧ, младе́нецъ неѕло́бивъ крⷭ҇тнымъ всеѻрꙋ́жїемъ до конца̀ низложѝ и҆ потребѝ.
Бг҃оро́диченъ:
Не и҆стощи́въ нѣ́дръ ѻ҆ч҃ескихъ, пречⷭ҇таѧ, сло́во всѧ̑ ѡ҆сꙋществова́вшее, во твою̀, пренепоро́чнаѧ, ᲂу҆тро́бꙋ всели́сѧ, и҆ пло́ть непремѣ́нна бы́сть, и҆ человѣ́ки ѡ҆божѝ пресꙋ́щественный.
Конда́къ а҆пⷭ҇ла, гла́съ д҃:
Ꙗ҆́кѡ ве́лїе со́лнце, цр҃ковь тѧ̀ стѧжа́вши, сла́вне а҆кѵ́ло, свѣтлостьмѝ ᲂу҆че́нїѧ твоегѡ̀, просвѣща́етъ вѣ́рнѡ чтꙋ́щыѧ тѧ̀, гдⷭ҇ень а҆пⷭ҇ле.
Та́же сѣда́ленъ, гла́съ д҃: Подо́бенъ: Ско́рѡ предварѝ:
Па́ѵла глагѡ́лы ѡ҆зари́въ твою̀ дꙋ́шꙋ, ꙗ҆́кѡ со́лнце просїѧ́лъ є҆сѝ бг҃оразꙋ́мїѧ свѣ́томъ, а҆кѵ́ло блаже́нне: вѣне́цъ же мꙋче́нїѧ и҆спле́лъ є҆сѝ зако́ннѡ. тѣ́мже и҆сточа́еши рѣ́ки и҆сцѣле́нїй, вѣ́рою пра́зднꙋющымъ, блаже́нне, па́мѧть твою̀.
Сла́ва, мч҃никѡвъ гла́съ то́йже. Подо́бенъ: Оу҆диви́сѧ і҆ѡ́сифъ:
Тезоиме́ннѡ, страда́льче, проповѣ́дникъ ꙗ҆ви́лсѧ є҆сѝ и҆́стиненъ, пострада́въ съ ма́терїю, ки́рѷче сла́вне хрⷭ҇то́въ, благоче́стїѧ тече́нїе сконча́въ, и҆ бы́лъ є҆сѝ на́мъ мꙋ́жество вѣ́ры, попра́въ вра́жїю всю̀ си́лꙋ, и҆ съ нб҃сѐ прїѧ́лъ є҆сѝ вѣне́цъ, съ ма́терїю твое́ю, сла́вне, хрⷭ҇та̀ моли́те, спасти́сѧ всѣ̑мъ творѧ́щымъ па́мѧть ва́шꙋ.
И҆ ны́нѣ, бг҃оро́диченъ:
Треволнє́нїи страстны́ми безсо́вѣстный а҆́зъ ѡ҆бꙋрева́емь, чⷭ҇таѧ, призыва́ю тѧ̀ те́плѣ: да не пре́зриши менѐ ѻ҆каѧ́ннаго поги́бнꙋти, бе́зднꙋ милосе́рдїѧ ро́ждши, ра́звѣ бо тебє̀, наде́жды не и҆́мамъ. да не врагѡ́мъ ᲂу҆́бѡ ѡ҆бра́дованїе и҆ смѣ́хъ, надѣ́ѧвсѧ на тѧ̀, ꙗ҆влю́сѧ: и҆́бо мо́жеши, є҆ли́кѡ хо́щеши, ꙗ҆́кѡ мт҃и сꙋ́щи всѣ́хъ бг҃а.
Крⷭ҇тобг҃оро́диченъ:
Дв҃а и҆ а҆́гница ви́дѣвши на крⷭ҇тѣ̀, безъ сѣ́мене и҆зъ неѧ̀ а҆́гнца ро́ждшагосѧ, и҆ копїе́мъ прободе́на, печа́ли ᲂу҆ѧ́звена стрѣла́ми, вопїѧ́ше болѣ́зненнѡ восклица́ющи: что̀ но́вое та́инство; ка́кѡ ᲂу҆мира́еши, и҆́же живота̀ є҆ди́нъ гдⷭ҇ь; тѣ́мже воскреснѝ, па́дшаго воздвиза́ѧ пра́ѻтца.
Пѣ́снь д҃. І҆рмо́съ:
Оу҆слы́шахъ, гдⷭ҇и, слꙋ́хъ твоегѡ̀ смотре́нїѧ, и҆ просла́вихъ тѧ̀, є҆ди́не чл҃вѣколю́бче.
Дрема́нїемъ спѧ́щыѧ лꙋка́вагѡ, а҆кѵ́ло, ѕлоче́стїѧ, ко благоче́стїѧ свѣ́тꙋ воздви́глъ є҆сѝ.
Го́рдое свирѣ́пство врага̀ низложи́лъ є҆сѝ, а҆кѵ́ло, смире́нїемъ бжⷭ҇твеннымъ воѡрꙋжи́всѧ.
Блаже́ннѡ пострада́лъ є҆сѝ, за хрⷭ҇та̀ кро́вь твою̀ и҆злїѧ́въ, свѧще́нникъ и҆ свидѣ́тель страда́нїй є҆гѡ̀.
Бг҃оро́диченъ:
Мы́сленнꙋ тѧ̀ пала́тꙋ, и҆ высо́кїй престо́лъ цр҃ѧ̀, бцⷣе влⷣчце, и҆менꙋ́емъ.
И҆́нъ. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.
Младе́нствꙋѧ тѣ́ломъ, и҆ соверше́ннымъ, мꙋ́чениче, ᲂу҆мо́мъ, ѕлонача́льнаго низложи́лъ є҆сѝ, лꙋка́вство ѕлосотво́ршаго.
Ꙗ҆́кѡ плодови́та лоза̀, мꙋ́ченице і҆ꙋлі́тто, гро́здъ и҆зрасти́ла є҆сѝ, до́блѧго вои́стиннꙋ ки́рѷка, мꙋче́нїѧ сла́дость и҆ска́пающа.
Ми́лостивнѡ взира́ющи, ꙗ҆́коже а҆́гница на а҆́гнца мꙋ́ченика, і҆ꙋлі́тта досточꙋ́днаѧ, закала́ема ᲂу҆се́рднѡ.
Бг҃оро́диченъ:
Зако́ны є҆стества̀, пречⷭ҇таѧ, па́че є҆стества̀ въ ржⷭ҇твѣ̀ твое́мъ, и҆змѣнѧ́ютсѧ: содѣ́телѧ бо па́че ᲂу҆ма̀ и҆ сло́ва породила̀ є҆сѝ.
Пѣ́снь є҃. І҆рмо́съ:
Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀ и҆но́гѡ бо́га не зна́емъ.
Сла́дко сло́во при́снѡ и҆сточа́ѧ благоче́стїѧ, премꙋ́дре, го́рькою пре́лестїю ѡ҆дебелѣ́вшыѧ ᲂу҆слади́лъ є҆сѝ дꙋ́шы, ꙗ҆́кѡ свѧщеннотаи́нникъ, а҆кѵ́ло прехва́льне.
Твоѧ̑ похвалы̑ лꙋка̀ бг҃огла́сный вои́стиннꙋ написа̀, свѧще́ннагѡ бо па́ѵла ᲂу҆чени́къ, и҆ бжⷭ҇твенъ странново́децъ бы́въ, бжⷭ҇твєннымъ ꙗ҆́вѣ наказꙋ́ѧ.
Ꙗ҆́коже ѕвѣздꙋ̀ ꙗ҆́снꙋ, свѣ́тлы лꙋчы̀ и҆спꙋща́ющꙋ, честно́е проповѣ́данїе, свѧще́ннаго ѡ҆брѣ́тъ па́ѵла, ѿ тогѡ̀ зарѝ прїѧ́лъ є҆сѝ словеса̀, и҆ свѣ́тъ бы́лъ є҆сѝ.
Бг҃оро́диченъ:
Мт҃и и҆ раба̀ хрⷭ҇та̀ вопло́щшагѡсѧ на́съ ра́ди была̀ є҆сѝ, є҆го́же прилѣ́жнѡ всегда̀ молѝ, є҆́же спастѝ на́съ, бцⷣꙋ тѧ̀ чⷭ҇тꙋю и҆менꙋ́ющихъ.
И҆́нъ. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Терза́емꙋ, бг҃омꙋ́драѧ, ра́нами тѣ́лꙋ твоемꙋ̀, и҆ раздроблѧ́емꙋ, тлѣ́нїѧ дебельство̀ совлекла̀ є҆сѝ: во ѻ҆де́ждꙋ же ѡ҆блекла́сѧ є҆сѝ, ю҆́же ѿ дв҃ы є҆диноро́дный пло́ть поне́съ, человѣ́ки ѡ҆божи́въ ѡ҆блечѐ.
Ѡ҆бнажи́ласѧ є҆сѝ тѣ́ломъ, мꙋ́ченице всесла́внаѧ, преѡби́дѣвши плотскі́й стꙋ́дъ: и҆ врага̀, є҆́ѵꙋ ѡ҆бнажа́вшаго, і҆ꙋлі́тто, дре́вле, терпѣли́внѡ вмꙋжи́вшисѧ, въ вѣ́чный стꙋ́дъ ѡ҆дѣ́ѧла є҆сѝ.
Во главꙋ̀ ᲂу҆сѣ́чена бы́вши, главꙋ̀ ѕмі́ѧ, мꙋ́ченице, сокрꙋши́ла є҆сѝ: лише́на бы́вши бога́тства, нбⷭ҇ное бога́тство наслѣ́довала є҆сѝ, недви́жимое прїи́мши црⷭ҇тво со всѣ́ми мꙋ́чєники, прехва́льнаѧ.
Бг҃оро́диченъ:
Бж҃їе бг҃ъ сло́во пло́ть прїѧ́тъ, мы́сленнꙋ и҆ ѡ҆дꙋшевле́нꙋ, ѿ тебє̀, пречⷭ҇таѧ: и҆ за милосе́рдїе бы́сть чл҃вѣ́къ, и҆ ѡ҆божи́ мѧ, престꙋпле́нїемъ ѿринове́на. є҆го́же молѝ спастѝ всѧ́чєскаѧ.
Пѣ́снь ѕ҃. І҆рмо́съ:
Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
И҆злїѧ́сѧ бл҃года́ть во ᲂу҆стнꙋ̀ твоє́ю, бл҃же́нне свѧще́нне: тѣ́мже бл҃гослови́ тѧ всѣ́хъ гдⷭ҇ь во вѣ́ки, а҆кѵ́ло бг҃одохнове́нне.
Недꙋ́гѡмъ разли̑чнымъ и҆змѣне́нїе, и҆ согрѣша́ющымъ дꙋша́мъ ѡ҆чисти́лище, твоѧ̀ моли́тва бы́сть, бг҃оно́се а҆кѵ́ло блаже́нне.
Шє́ствїѧ твоѧ̑ бжⷭ҇твеннѡ сотворѧ́єма, и҆ къ пꙋтє́мъ бж҃їимъ направлѧ́єма, блꙋдѧ́щымъ ꙗ҆ви́шасѧ наставле́нїе, и҆ стезѧ̀ спаси́тельнаѧ.
Бг҃оро́диченъ:
Господоиме́ннаѧ дв҃о всенепоро́чнаѧ, ꙗ҆́же бл҃ги́хъ пода́телѧ бг҃а ро́ждшаѧ, тѧ̀ пою́щыѧ всегда̀ ѿ напа́стей многоѻбра́зныхъ спасѝ.
И҆́нъ. І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Преплы́вше безмѣ́рныхъ мꙋ́къ, прехва́льнїи, непостоѧ́ннꙋю во́дꙋ, кре́стнымъ ѡ҆кормле́нїемъ, и҆ ко приста́нищꙋ ти́хомꙋ ꙗ҆́вѣ доидо́ша, погрꙋзи́вше фараѡ́на неви́димаго кро́вными стрꙋѧ́ми.
И҆гра́етъ і҆коні́йскїй гра́дъ тебѐ воспита́вый, и҆ краси́тсѧ па́мѧтїю твое́ю честно́ю та́рсъ, і҆ꙋлі́тто: мꙋче́нїе бо въ то́мъ сконча́ла є҆сѝ съ сы́номъ твои́мъ, и҆ вѣнцє́въ побѣ́ды сподо́биласѧ є҆сѝ.
Презрѣ́ла є҆сѝ многоплетє́нныѧ мꙋ̑ки, и҆ го́рлица прекра́снаѧ ꙗ҆ви́ласѧ є҆сѝ, со птенце́мъ возлетѣ́вши, и҆ надъ всѣ́ми возвы́сившисѧ сѣтьмѝ ѕмі́ѧ, всехва́льнаѧ, и҆ во ѻ҆би́телехъ нбⷭ҇ныхъ премꙋ́дрѡ почи́ла є҆сѝ.
Бг҃оро́диченъ:
Кореносѣка́тельнымъ серпо́мъ твоеѧ̀ моли́твы посѣцы̀, ѻ҆трокови́це, лꙋка̑ваѧ помышлє́нїѧ дꙋшѝ моеѧ̀, и҆ плодоно́снꙋ покажѝ, молю́сѧ: всѣ́хъ бо содѣ́телѧ бг҃а и҆ сп҃са родила̀ є҆сѝ.
Конда́къ мч҃никѡвъ, гла́съ д҃. Подо́бенъ: Ꙗ҆ви́лсѧ є҆сѝ:
Во ѡ҆б̾ѧ́тїѧхъ носѧ́щи хрⷭ҇томꙋ́ченица і҆ꙋлі́тта ки́рѷка, на по́двизѣ мꙋ́жески веселѧ́щисѧ, взыва́ше: хрⷭ҇то́съ є҆́сть мꙋ́ченикѡвъ похвала̀.
І҆́косъ:
Оу҆́мъ мо́й просвѣтѝ, хрⷭ҇тѐ, свѣ́томъ за́повѣдей твои́хъ, ꙗ҆́кѡ да возмогꙋ̀ воспѣ́ти ст҃ы̑ѧ, и҆ по́двиги и҆зрещѝ: кі́й же ѧ҆зы́къ и҆зглаго́лати возмо́жетъ страда̑нїѧ, ꙗ҆̀же претерпѣ́ша; тѣ́мъ припа́даю тебѣ̀, чл҃вѣколю́бче, ѡ҆ставле́нїе пода́ждь дꙋшѝ мое́й ѻ҆каѧ́ннѣй: да́рꙋй мѝ вре́мѧ покаѧ́нїѧ, на се́ бо во́лею воспрїѧ́лъ є҆сѝ пло́ть, да всѧ̑ на живо́тъ возведе́ши, є҆гѡ́же страда́льцы полꙋчи́вше непреста́ннѡ пою́тъ: хрⷭ҇то́съ є҆́сть мꙋ́ченикѡвъ похвала̀.
Пѣ́снь з҃. І҆рмо́съ:
Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆ц҃ъ на́шихъ.
И҆стка́въ себѣ̀ нетлѣ́нїѧ ѻ҆де́ждꙋ бжⷭ҇твеннымъ дх҃омъ, ве́сь красе́нъ бы́лъ є҆сѝ, и҆ врага̀ ѡ҆бнажи́лъ є҆сѝ, и҆̀же ѿ негѡ̀, а҆кѵ́ло, ѡ҆бнажє́нныѧ ѡ҆дѣ́ѧлъ є҆сѝ во ѻ҆де́ждꙋ свѣтови́днꙋ, и҆ свѣ́тъ спаси́тельный.
Гла́домъ мы́сленнымъ ѡ҆держи̑мыѧ лю́ди, и҆ бѣ́дствꙋющыѧ, хлѣ́бомъ слове́съ, досточꙋ́дне, бг҃омꙋ́дре, напита́лъ є҆сѝ, и҆ небе́сныѧ трапе́зы прича́стники сотвори́лъ є҆сѝ, свѧщеннотаи́нникъ бы́въ бг҃ови́денъ.
Ст҃о́мꙋ хра́мꙋ твоемꙋ̀ притека́ющїи здра́вїе прїе́млютъ, и҆ страсте́й разрѣша́ютсѧ, и҆ ѿ недꙋ̑гъ ѡ҆чища́ютсѧ, воспѣва́юще тѧ̀ любо́вїю, и҆ вопїю́ще, прехва́льне: благослове́нъ є҆сѝ, бж҃е ѻ҆тє́цъ на́шихъ.
Бг҃оро́диченъ:
Оу҆мертви́сѧ пе́рвѣе а҆да́мъ тлетво́рною снѣ́дїю, всенепоро́чнаѧ: ты́ же ро́ждши живо́тъ на́шъ, сего̀, дв҃о, ѡ҆живи́ла є҆сѝ. тѣ́мъ ꙗ҆́кѡ до́брыхъ тѧ̀ вино́внꙋ, воспѣва́юще вопїе́мъ: бл҃гослове́нна є҆сѝ, ꙗ҆́же бг҃а пло́тїю ро́ждши.
И҆́нъ. І҆рмо́съ:
Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Па́лицами сокрꙋша́етъ твоѐ тѣ́ло беззако́нный, бг҃омꙋ́драѧ і҆ꙋлі́тто, по́мысла крѣ́пость ника́коже подви́же: же́злъ бо си́лы крⷭ҇тъ хрⷭ҇то́въ держа́ла є҆сѝ.
Тꙋ́чами кро́вныхъ наводне́нїй погаси́ша ѻ҆́гнь безбо́жїѧ хрⷭ҇тѡ́вы страда́льцы, зовꙋ́ще ᲂу҆се́рднѡ: бл҃гослове́нъ є҆сѝ, гдⷭ҇и бж҃е, во вѣ́ки.
Носѧ́щи на рꙋкꙋ̀, мꙋ́ченице, є҆го́же родила̀ є҆сѝ, предста́ла сꙋди́щꙋ, и҆ сꙋгꙋ́бъ до́брый сконча́ла є҆сѝ по́двигъ, вопїю́щи: бл҃гослове́нъ є҆сѝ, гдⷭ҇и бж҃е, во вѣ́ки.
Бг҃оро́диченъ:
Глаго́лѡмъ твои̑мъ послѣ́дꙋюще, блажи́мъ тѧ̀ ро́ди всѝ, ѻ҆трокови́це, бл҃же́ннагѡ бг҃а мт҃рь ꙗ҆́вльшꙋюсѧ, въ него̀ вѣ́рꙋющыѧ блажє́нны содѣ́лавшагѡ.
Пѣ́снь и҃. І҆рмо́съ:
Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Ра́достнѡ на небесѣ́хъ съ бжⷭ҇твенными ᲂу҆ченикѝ и҆ слꙋги̑, и҆ самови́дцы сло́ва, ꙗ҆́кѡ ᲂу҆чени́къ живы́й, а҆кѵ́ло, и҆ бжⷭ҇твеннѣ ѡ҆божа́емь, помина́й вѣ́рою и҆ любо́вїю тѧ̀ пою́щыѧ.
По́тѡвъ твои́хъ то́ки рѣ́ки всѣ̑мъ на́мъ бжⷭ҇твенныхъ чꙋде́съ и҆сточа́ютъ, бл҃же́нне: и҆ то́ки страсте́й безмѣ́стныхъ и҆зсꙋша́ютъ всегда̀, и҆ ѡ҆полчє́нїѧ погрꙋжа́ютъ льсти́вагѡ.
Пристꙋпле́нїемъ ѡ҆божа́емь при́снѡ, ꙗ҆́кѡ приближа́ѧсѧ бг҃ꙋ ᲂу҆мо́мъ невеще́ственнымъ, ве́сь свѣ́тъ є҆сѝ, ѿрѣши́всѧ ѿ пло́ти, и҆ ви́диши, ꙗ҆̀же ви́дѧтъ а҆́гг҃ли, сла́вне а҆кѵ́ло, хрⷭ҇то́въ свѧщенномꙋ́чениче.
Бг҃оро́диченъ:
Ꙗ҆́кѡ всѣ́хъ вино́внаго бг҃а, вы́шше всѧ́кїѧ вои́стиннꙋ, чⷭ҇таѧ, вины̀ во ᲂу҆тро́бѣ заче́нши, и҆ на́съ ра́ди по на́мъ ꙗ҆́вльшасѧ, ро́ждшаѧ пренепоро́чнаѧ, сего̀ молѝ ѡ҆ пою́щихъ тѧ̀.
И҆́нъ. І҆рмо́съ:
Побѣди́тели мꙋчи́телѧ и҆ пла́мене благода́тїю твое́ю бы́вше за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: благослови́те, всѧ̑ дѣла̀ гдⷭ҇нѧ, гдⷭ҇а.
Свѣ̑тлыѧ ѕвѣ́зды, ꙗ҆̀же на тве́рди цр҃ко́внѣй неле́стнѡ водрꙋзи́вшесѧ, и҆ зе́млю чꙋдесы̀ просвѣ́щше, бл҃гоче́стнѡ чтꙋ́тсѧ ѿ всѣ́хъ дне́сь, пѣсносло́вѧщихъ хрⷭ҇та̀ во вѣ́ки.
Ꙗ҆́коже нова̀ вѣ́твь ко́рене бг҃онасажде́нна сꙋ́щи бг҃омꙋ́драѧ, честна́го твоего̀ сы́на носѧ́щи, ᲂу҆вѧди́ла є҆сѝ нече́стїѧ сады̀, вопїю́щи съ ни́мъ и҆ глаго́лющи: тѧ̀ превозно́симъ, хрⷭ҇тѐ, во вѣ́ки.
Ꙗ҆́коже тельца̀ ю҆́на ю҆́ница сꙋ́щи прекра́сна, і҆ꙋлі́тто, но́сиши ки́рѷка сла́внаго, же́ртвꙋ жи́вꙋ ѿ дв҃ы а҆́гнцꙋ возсїѧ́вшемꙋ, и҆ заколе́номꙋ за кра́йнее милосе́рдїе.
Бг҃оро́диченъ:
Вопло́щсѧ сло́во ѿ пречⷭ҇тыхъ твои́хъ крове́й, ѻ҆трокови́це, прини́кшыѧ къ безсловє́снымъ плотски̑мъ страсте́мъ, позна́нїемъ бжⷭ҇твеннымъ ѡ҆божѝ, чⷭ҇таѧ: є҆го́же превозно́симъ во всѧ̑ вѣ́ки.
Пѣ́снь ѳ҃. І҆рмо́съ:
Ѿ бг҃а бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.
Свѧще́нными тѧ̀ пѣ́сньми свѧще́нна бы́вша сосꙋ́да сло́ва и҆ че́стна, сего̀ и҆ премꙋ́дра проповѣ́дника, и҆ мі́ра свѣти́льника, и҆ ᲂу҆твержде́нїе вѣ́ры на́шеѧ, соше́дшесѧ, а҆кѵ́ло, согла́снѡ ᲂу҆блажа́емъ.
Ꙗ҆́кѡ потреби́тель ле́сти, и҆ ꙗ҆зы́кѡвъ наста́вникъ, и҆ бжⷭ҇твенный сп҃са страда́лецъ, и҆ сограждани́нъ, и҆ ссе́льникъ ст҃ы́хъ а҆́гг҃лѡвъ, а҆кѵ́ло бг҃огла́се: съ ни́ми влⷣкꙋ ᲂу҆молѝ спастѝ дꙋ́шы на́шѧ.
Тѧ̀ ᲂу҆ченика̀ ᲂу҆́бѡ па́ѵлꙋ ᲂу҆вѣ́дѣвше, а҆кѵ́ло, мі́рови же свѣти́льника неле́стна, и҆ свѧще́ннаго мч҃ника, потреби́телѧ і҆́дѡлѡвъ, и҆ ра́зꙋма бж҃їѧ вводи́телѧ, благоче́стною мы́слїю, бг҃омꙋ́дре, ᲂу҆блажа́емъ.
Всесвѧта́ѧ твоѧ̀ па́мѧть возсїѧ́вши мі́рꙋ, ꙗ҆́кѡ со́лнце просвѣща́етъ дꙋ́шы благоче́стнѡ пою́щихъ тѧ̀: въ не́йже моли́сѧ, бл҃же́нне, да́ти ѡ҆чище́нїе грѣхѡ́въ, и҆ ми́ръ глꙋбо́къ, и҆ ве́лїю всѣ̑мъ ми́лость.
Бг҃оро́диченъ:
Свѣ́телъ тѧ̀ свѣ́щникъ прозрѧ́ше прⷪ҇ро́къ, свѣ́та возсїѧ́вшаго ѿ свѣ́та, дв҃о мт҃и, носѧ́щꙋ, просвѣща́ющаго бога́тнѡ пе́рвѣе ѡ҆мрачє́нныѧ, зарѧ́ми несказа́ннагѡ своегѡ̀, пренепоро́чнаѧ, бжⷭ҇тва̀.
И҆́нъ. І҆рмо́съ:
Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ. тѣ́мже пречⷭ҇тꙋю бцⷣꙋ, вѣ́рнїи, велича́емъ.
И҆сцѣле́нїе приноша́етъ ра́ка сла́вныхъ страда́лєцъ, благода́тїю бжⷭ҇твеннагѡ дх҃а напаѧ́емаѧ: прїиди́те, почерпи́те, и҆ ѡ҆свѧти́те дꙋ́шы, и҆ ѿ недꙋ̑гъ ѡ҆чи́ститесѧ мꙋчениколю́бцы, да́телѧ до́брыхъ велича́юще.
Ꙗ҆́коже ши́покъ мч҃ническими прозѧбо́сте ᲂу҆дѡ́лїи, всеблаже́ннїи, ꙗ҆́коже крі́нъ благово́ненъ, ꙗ҆́кѡ раѧ̀ бжⷭ҇твенное прозѧбе́нїе, мѵ́рно ꙗ҆́кѡ вои́стиннꙋ и҆ска́пающе ᲂу҆краше́нїе, и҆ вѣ́рныхъ дꙋ́шы благово́нїемъ та́йнымъ веселитѐ.
Ра́нами мч҃ническими ᲂу҆краси́стесѧ, добропобѣ́днїи мꙋ́чєницы, и҆ а҆́гг҃лѡмъ ꙗ҆́вѣ ᲂу҆подо́бльшесѧ, бг҃ꙋ предстоитѐ, побѣ́днымъ вѣнце́мъ свѣ́тлѡ ѡ҆бложе́ни, и҆ чтꙋ́щымъ ва́съ ѡ҆чище́нїе грѣхѡ́въ просѧ́ще.
Мч҃ница ꙗ҆́коже а҆́гница, ꙗ҆́кѡ а҆́гнца сы́на своего̀ носѧ́щи, посредѣ̀ волкѡ́въ невре́днѡ про́йде, и҆ въ небе́снꙋю ѡ҆гра́дꙋ всели́сѧ: при́снѡ си́хъ моли́твами, гдⷭ҇и, спаси́ ны, тѣ́хъ свѧще́ннꙋю па́мѧть чтꙋ́щыѧ.
Бг҃оро́диченъ:
Просвѣтѝ, две́ре свѣ́та, ѡ҆слѣпле́ннꙋю дꙋ́шꙋ мою̀ страстьмѝ и҆ ѕлы́ми пѡ́мыслы ѡ҆мраче́ннꙋю, и҆ бѣ́дствꙋющꙋю, и҆ и҆зми́ мѧ ѿ напа́стей, и҆ бѣ́дъ, и҆ скорбе́й: да сла́влю тѧ̀, ᲂу҆пова́нїе вѣ́рныхъ и҆ ᲂу҆твержде́нїе.
Свѣти́ленъ ѻ҆ктѡ́иха. Сла́ва, мч҃никѡвъ. Подо́бенъ: Жєны̀ ᲂу҆слы́шите:
Ра́дꙋйсѧ, красꙋ́йсѧ и҆ ликꙋ́й, свѣ́тлѡ торжествꙋ́ѧ, і҆коні́йскїй гра́де, ꙗ҆́кѡ и҆зъ тебє̀ возсїѧ́ша два̀ свѣти̑льника премꙋ̑дра, і҆ꙋлі́тта сла́внаѧ и҆ бг҃омꙋ́дрый ки́рѷкъ, зако́ннѡ бо пострада́вше, вѣне́цъ прїѧ́ша сла́вы.
И҆ ны́нѣ, бг҃оро́диченъ:
Мт҃рь и҆ дв҃ꙋ тѧ̀ пое́мъ, всенепоро́чнаѧ: ты́ бо бг҃а всѣ́хъ во чре́вѣ носи́ла є҆сѝ. є҆гѡ́же совокꙋпле́нїе проповѣ́дающе, непрело́жнѡ по ѵ҆поста́си, тѧ̀ бцⷣꙋ влⷣчцꙋ и҆сповѣ́даемъ вои́стиннꙋ, и҆̀же тебє̀ ра́ди спаса́емїи.
На хвали́техъ стїхи̑ры, на д҃, гла́съ а҃: Самогла́сны. Ге́рманово:
До́блѧго страда́льца, и҆ проповѣ́дника вѣ́ры, съ ма́терїю бг҃омꙋ́дрою досто́йнѡ восхва́лимъ: сі́и бо терпѣли́внѡ пострада́вше, ѕлонача́льнаго врага̀ си́лою крⷭ҇та̀ мꙋ́жески низложи́ша. тѣ́мже вѣнцы̀ прїѧ́ша ѿ подвигополо́жника бг҃а, и҆ мо́лѧтъ є҆го̀ со дерзнове́нїемъ непреста́ннѡ, спастѝ вѣ́рою творѧ́щихъ свѧще́нное и҆́хъ страда́нїе.
Два́жды.
Гла́съ в҃:
И҆́же ѿ пеле́нъ и҆спо́лненъ бл҃года́ти, и҆мѣ́ѧй сѣ́дъ ра́зꙋмъ, въ побѣ́дѣ подвигѡ́въ твои́хъ, мꙋ́чениче ки́рѷче, моли́сѧ съ ма́терїю твое́ю хрⷭ҇тꙋ̀ бг҃ꙋ дарова́ти ми́ръ мі́рꙋ, ꙗ҆́кѡ трⷪ҇цы ве́лїй и҆сповѣ́дникъ.
Младе́нецъ ꙗ҆ви́лсѧ є҆сѝ въ мꙋ́ченицѣхъ, соверше́нъ же показа́лсѧ є҆сѝ ра́зꙋмомъ: ѿне́лѣже безнача́льное сло́во прїѧ́тъ, всехва́льне, ѻ҆гнѧ̀ не ᲂу҆страши́лсѧ є҆сѝ беззако́нныхъ, съ ма́терїю твое́ю зижди́телѧ молѝ, да спасе́тъ ꙗ҆́кѡ сп҃съ дꙋ́шы на́шѧ.
Сла́ва, гла́съ то́йже. Вѷзанті́ево:
Прїиди́те, вѣ́рнїи, хвала́ми, соше́дшесѧ, вѣнча́емъ дво́ицꙋ всест҃ꙋ́ю, трⷪ҇цѣ че́сть держа́щꙋю: і҆́дѡльскꙋю бо пре́лесть, и҆ мꙋчи́телей ᲂу҆мышле́нїе свои́ми нога́ми попра́ша. си́хъ восхвалѧ́юще, вѣ́рнїи взыва́емъ, глаго́люще: ра́дꙋйсѧ, і҆ꙋлі́тто всечестна́ѧ, ꙗ҆́же же́нскꙋю не́мощь ѿве́ргши, и҆ мꙋ́жески подви́гшисѧ: ра́дꙋйсѧ, ки́рѷче всеблаже́нне, и҆́же трилѣ́тенъ тѣ́ломъ, и҆ многоко́зненнаго врага̀ низло́жь: ра́дꙋйтесѧ, на́ша похвала̀ и҆ сла́ва, вѣ́рою пра́зднꙋющихъ свѧще́нное ва́ше страда́нїе. є҆́юже мо́лимъ, моли́ти при́снѡ всѣ́хъ гдⷭ҇а, мі́рꙋ дарова́ти ми́ръ, и҆ дꙋша́мъ на́шымъ ве́лїю ми́лость.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Є҆гда̀ ѿ дре́ва:
Дре́вꙋ крⷭ҇тномꙋ тѧ̀, і҆и҃се, пригвожде́на зрѧ́щи неискꙋсобра́чнаѧ, пла́чꙋщи гл҃го́лаше: ча́до сла́дкое, почто̀ ѡ҆ста́вилъ є҆сѝ менѐ ро́ждшꙋю тѧ̀ є҆ди́нꙋ, свѣ́те непристꙋ́пный пребезнача́льнагѡ ѻ҆ц҃а̀; потщи́сѧ и҆ просла́висѧ, ꙗ҆́кѡ да сла́вꙋ полꙋча́тъ бжⷭ҇твеннꙋю, и҆̀же бжⷭ҇твєнныѧ стра̑сти твоѧ̑ сла́вѧщїи.
На стїхо́внѣ ѻ҆ктѡ́иха. Сла́ва, гла́съ д҃. А҆нато́лїево:
Ра́дꙋйсѧ, красꙋ́йсѧ и҆ весели́сѧ, і҆коні́йскїй гра́де, ꙗ҆́кѡ и҆зъ тебє̀ прозѧбѐ пло́дъ сла́венъ, і҆ꙋлі́тта прекра́снаѧ, и҆ добропобѣ́днаѧ мч҃ница, и҆ и҆зъ неѧ̀ честны́й ѻ҆́трокъ ки́рѷкъ тезоимени́тый: все́ бо кова́рство мꙋчи́телѧ врага̀ мꙋ́жески попра́вше, вѣнцы̀ побѣ́ды досто́йнѡ прїѧ́ша, проповѣ́давше лю́демъ, честѝ и҆ покланѧ́тисѧ прест҃ѣ́й трⷪ҇цѣ. тѣ́мже и҆ мы̀ со дерзнове́нїемъ возопїе́мъ си́хъ просла́вльшемꙋ хрⷭ҇тꙋ̀ бг҃ꙋ на́шемꙋ, ᲂу҆мири́ти мі́ръ и҆ спастѝ дꙋ́шы на́шѧ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: Поⷣ: Ꙗ҆́кѡ до́блѧ:
А҆́гнца и҆ па́стырѧ тѧ̀ ꙳ на дре́вѣ ꙗ҆́кѡ ви́дѣ, ꙳ а҆́гница ро́ждшаѧ рыда́ше, ꙳ и҆ мт҃рски тѝ вѣща́ше: ꙳ сн҃е возжелѣ́нне, ꙳ ка́кѡ на дре́вѣ крⷭ҇тнѣмъ повѣ́шенъ є҆сѝ, долготерпѣли́ве; ꙳ ка́кѡ рꙋ́цѣ и҆ но́зѣ твоѝ, сло́ве, ꙳ пригвозди́шасѧ ѿ беззако́нныхъ, ꙳ и҆ кро́вь твою̀ и҆злїѧ́лъ є҆сѝ, влⷣко;
На лїтꙋргі́и: бл҃жє́нна ѻ҆ктѡ́иха, и҆ мч҃никѡвъ пѣ́снь г҃, на д҃. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. Сті́хъ: Въ цр҃квахъ благослови́те бг҃а, гдⷭ҇а ѿ и҆стѡ́чникъ і҆и҃левыхъ. А҆пⷭ҇лъ къ корі́нѳѧнѡмъ, зача́ло рн҃д, ѿ полꙋ̀. А҆ллилꙋ́їа, гла́съ з҃: И҆зъ ᲂу҆́стъ младе́нєцъ и҆ ссꙋ́щихъ соверши́лъ є҆сѝ хвалꙋ̀. Є҆ѵⷢ҇лїе лꙋкѝ, зача́ло н҃а, ѿ полꙋ̀. Прича́стенъ: Ра́дꙋйтесѧ, пра́веднїи ѡ҆ гдⷭ҇ѣ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.