← претходни дан | Минеј — Јул | следећи дан →
13 июля: Собор архангела Гавриила. Преподобного Стефана Сассаита
Мѣ́сѧца тогѡ́же въ г҃ї-й де́нь.
Собо́ръ ст҃а́гѡ а҆рха́гг҃ла гаврїи́ла:
И҆ прпⷣбнагѡ ѻ҆тца̀ на́шегѡ стефа́на савваі́та.
Стїхи̑ры а҆рха́гг҃ла, гла́съ д҃. Подо́бенъ: Да́лъ є҆сѝ зна́менїе:
Оу҆́мъ предвѣ́чный, ꙳ свѣ́тъ соста́вивый вторы́й, ꙳ гаврїи́ла тебѐ прича́стїѧми бжⷭ҇твенными, ꙳ просвѣща́ющаго всю̀ вселе́ннꙋю: ꙳ и҆ ю҆́же ѿ вѣ́ка ѿкрыва́ющаго на́мъ ꙳ бжⷭ҇твеннꙋю и҆ вели́кꙋю вои́стиннꙋ та́йнꙋ, ꙳ во ᲂу҆тро́бѣ воплоща́емагѡ дв҃и́честѣй, ꙳ сꙋ́ща безтѣле́снагѡ, и҆ бы́вша чл҃вѣ́ка, ꙳ во є҆́же спастѝ человѣ́ка.
Престо́лꙋ предстоѧ̀ трисо́лнечнагѡ бж҃ества̀, ꙳ и҆ бога́тнѡ просїѧва́ѧ бжⷭ҇твенными свѣтлостьмѝ, ꙳ и҆спꙋща́емыми непреста́ннѡ ѿтꙋ́дꙋ, ꙳ сꙋ́щыѧ на землѝ ра́достнѡ ликꙋ́ющыѧ, ꙳ и҆ восхвалѧ́ющыѧ тѧ̀, ꙳ страсте́й мглы̀ и҆зба́ви, ꙳ и҆ просвѣще́нїемъ ᲂу҆ѧснѝ, ꙳ гаврїи́ле а҆рхїстрати́же, ꙳ моли́твенниче ѡ҆ дꙋша́хъ на́шихъ.
Низложѝ шата̑нїѧ а҆га̑рѧнскаѧ, ꙳ на ста́до твоѐ ча́стѡ находѧ̑щаѧ: ꙳ ᲂу҆ста́ви раздо́ры цр҃кве: ꙳ ᲂу҆кротѝ бꙋ́рю безмѣ́рныхъ и҆скꙋше́нїй: ꙳ и҆зба́ви бѣ́дъ и҆ ѡ҆бстоѧ́нїй ꙳ любо́вїю чтꙋ́щыѧ тѧ̀, ꙳ и҆ подъ кро́въ тво́й прибѣга́ющыѧ, ꙳ гаврїи́ле а҆рхїстрати́же, ꙳ моли́твенниче ѡ҆ дꙋша́хъ на́шихъ.
И҆́ны стїхи̑ры прпⷣбнагѡ, гла́съ и҃. Подо́бенъ: Ѽ пресла́внагѡ чꙋдесѐ!
Ѻ҆́ч҃е бг҃оно́се стефа́не, ꙳ бжⷭ҇твенною мꙋ́дростїю ᲂу҆́мъ ᲂу҆крѣ́пль свѣ́тлѡ, ꙳ ꙗ҆́рость ᲂу҆́бѡ мꙋ́жествомъ, ꙳ цѣломꙋ́дрїемъ же жела́нїе, ꙳ пра́вдою же всю̀ си́лꙋ дꙋше́внꙋю ꙳ ᲂу҆пра́вилъ є҆сѝ любомꙋ́дреннѡ, ꙳ колесни́цꙋ краснꙋ̀ добродѣ́телей соста́вилъ є҆сѝ, ꙳ на ню́же всѣ́дъ, ра́дꙋѧсѧ возше́лъ є҆сѝ ꙳ къ высотѣ̀, сла́вне.
Ѻ҆́ч҃е бг҃огла́се стефа́не, ꙳ бг҃осло́вїемъ ᲂу҆́мъ просвѣти́лъ є҆сѝ, прпⷣбне, ꙳ ꙗ҆́коже копїѐ носѧ̀ ꙗ҆́рость, ꙳ просте́ртꙋ на хꙋ̑льныѧ, бл҃же́нне, є҆ретїкѝ, ꙳ жела́нїемъ пи́щи го́рнїѧ: ꙳ є҆ѧ́же сподо́билсѧ є҆сѝ причасти́тисѧ, чꙋ́дне, ꙳ предстоѧ̀ прⷭ҇то́лꙋ ꙳ всѣ́хъ цр҃ѧ̀ и҆ вседержи́телѧ.
Ѻ҆́ч҃е бг҃оглаго́ливе стефа́не, ꙳ воздержа́нїемъ ᲂу҆́мъ ѡ҆гради́въ всю́дꙋ, ꙳ къ первовино́вномꙋ востещѝ сотвори́лъ є҆сѝ, ꙳ и҆ ᲂу҆ти́шилъ є҆сѝ мїрскі́й мѧте́жъ, ꙳ и҆ молвꙋ̀ ѿтрѧ́съ, ꙳ ᲂу҆ма̀ чистото́ю ꙳ ᲂу҆держа́нъ бы́лъ є҆сѝ, премꙋ́дре, ꙳ жела́нїемъ вои́стиннꙋ кра́йнимъ, бг҃омꙋ́дре прпⷣбне.
Сла́ва, гла́съ ѕ҃. Вѷзанті́ево:
Сра́дꙋйтесѧ съ на́ми всѧ̑ а҆́гг҃льскаѧ чинонача̑лїѧ: предста́тель бо ва́шъ и҆ на́шъ застꙋ́пникъ, вели́кїй а҆рхїстрати́гъ въ дне́шнїй де́нь, въ честнѣ́мъ є҆гѡ̀ хра́мѣ, пресла́внѡ ꙗ҆влѧ́ѧсѧ ѡ҆свѧща́етъ. тѣ́мже по до́лгꙋ воспѣва́юще, томꙋ̀ возопїи́мъ: покры́й на́съ кро́вомъ крилꙋ̑ твоє́ю, вели́кїй гаврїи́ле а҆рха́гг҃ле.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Подо́бенъ: Тридне́венъ:
Всечⷭ҇таѧ ꙗ҆́кѡ ви́дѣ тебѐ на крⷭ҇тѣ̀ повѣ́шена, пла́чꙋщи вопїѧ́ше мт҃рски: сн҃е мо́й и҆ бж҃е мо́й, сладча́йшее моѐ ча́до, ка́кѡ терпи́ши стрⷭ҇ть поно́снꙋю;
На стїхо́внѣ ѻ҆ктѡ́иха. Сла́ва, и҆ ны́нѣ, гла́съ и҃.
І҆ѡа́нна мона́ха:
Ꙗ҆́кѡ чинонача́льникъ и҆ побо́рникъ, и҆ а҆́гг҃лѡвъ пе́рвый во́ждь, а҆рхїстрати́же, ѿ всѧ́кїѧ нꙋ́жды и҆ ско́рби, недꙋ̑гъ и҆ лю́тыхъ согрѣше́нїй свободѝ вѣ́рнѡ пою́щихъ и҆ молѧ́щихъ тѧ̀, сла́вне, ꙗ҆́вѣ ꙗ҆́кѡ невеще́ственъ невеще́ственнаго зрѧ̀, и҆ непристꙋ́пнымъ свѣ́томъ влⷣчнїѧ сла́вы ѡ҆сїѧва́емь. то́й бо чл҃вѣколю́бнѣ пло́ть на́съ ра́ди ѿ дв҃ы прїѧ́тъ, спастѝ восхотѣ́въ человѣ́чество.
Тропа́рь, гла́съ д҃:
Нбⷭ҇ныхъ во́инствъ а҆рхїстрати́же, мо́лимъ тѧ̀ при́снѡ мы̀ недосто́йнїи, да твои́ми моли́твами ѡ҆гради́ши на́съ кро́вомъ крилꙋ̑ невеще́ственныѧ твоеѧ̀ сла́вы, сохранѧ́ѧ на́съ припа́дающихъ прилѣ́жнѡ, и҆ вопїю́щихъ: ѿ бѣ́дъ и҆зба́ви на́съ, ꙗ҆́кѡ чинонача́льникъ вы́шнихъ си́лъ.
На ᲂу҆́трени є҆ди́нъ канѡ́нъ ѻ҆ктѡ́иха со і҆рмосо́мъ на д҃: и҆ а҆рха́гг҃ла на ѕ҃. Творе́нїе і҆ѡ́сифово, є҆гѡ́же краегране́сїе:
Ꙗ҆́кѡ всече́стна гаврїи́ла хвалю̀.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ чꙋдеса̀.
Ꙗ҆́кѡ свѣ́та сꙋ́ща, къ свѣ́тꙋ кра́йнемꙋ невеще́ственными причащє́нїи, бжⷭ҇твеннагѡ и҆ невеще́ственнагѡ, молю́ тѧ а҆рха́гг҃ле гдⷭ҇ень: ᲂу҆́мъ мо́й просвѣтѝ моли́твами твои́ми, ꙗ҆́кѡ да воспѣва́ю тѧ̀.
Соста́вимъ дне́сь ли́къ бжⷭ҇твенный веселѧ́щесѧ, пе́рваго почита́юще безпло́тныхъ ᲂу҆мѡ́въ, неизрече́ннꙋю ра́дость возвѣсти́вшаго, въ мі́ръ прише́дшꙋю за бла́гость.
Предста́телѧ тѧ̀ вели́ка и҆ къ бг҃ꙋ застꙋ́пника, и҆ стѣ́нꙋ и҆ ᲂу҆твержде́нїе, гаврїи́ле, и҆мꙋ́ще, лю́бѧщїи тѧ̀ и҆збавлѧ́емсѧ ѿ бѣ́дъ и҆ вре́да ѕмїи́на восхвалѧ́ющїи тѧ̀.
Бг҃оро́диченъ:
Чи́стꙋ тѧ̀ всенепоро́чнꙋю гаврїи́лъ ꙗ҆́кѡ ᲂу҆зрѣ̀: ра́дꙋйсѧ, тебѣ̀, влⷣчце, свѣ́тлѡ возопѝ, неискꙋсобра́чнаѧ, человѣ́кѡвъ спасе́нїе, а҆́гг҃лѡвъ похвала̀ и҆ честносло́вїе.
И҆́нъ канѡ́нъ прпⷣбнагѡ на д҃.
Гла́съ в҃. Пѣ́снь а҃. І҆рмо́съ:
Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.
Тебѣ̀ твоегѡ̀, преблаже́нне, ᲂу҆че́нїѧ до́лгъ приносѧ́ще, воздаѧ̑нїѧ простира́емъ, вѣне́цъ похва́лъ плетꙋ́ще: ты́ же ми́лостивъ ꙗ҆ви́сѧ, пребога́те, твои́ми мольба́ми бл҃года́ть мѝ пода́ждь дꙋхо́внꙋю.
Всегꙋби́тельное стремле́нїе страсте́й, ѻ҆́ч҃е, ᲂу҆вѧди́лъ є҆сѝ, слове́снымъ ѡ҆б̾ѧ́тъ бг҃омꙋ́дрїемъ: благопребы́тенъ бо бы́лъ є҆сѝ, благогла́сенъ, кро́токъ же и҆ смире́нъ, сло́вомъ же премꙋ́дрости, стефа́не, и҆ ра́зꙋма вѣнча́емь.
Свѧще́ннѡ ᲂу҆краси́лъ є҆сѝ себѐ, ѻ҆́ч҃е, ра́зꙋмомъ и҆ дѣ́тельнымъ дѣ́йствомъ благода́ти, бг҃оглаго́ливе стефа́не, жела́ѧ вѣнца̀ сла́вы хрⷭ҇то́вы, и҆ твоеѧ̀ наде́жди и҆зрѧ́днѡ, преблаже́нне не погрѣши́лъ є҆сѝ.
Цѣломꙋ́дрїе ᲂу҆держа́лъ є҆сѝ ꙗ҆́вѣ, кра́йнюю же кро́тость, и҆ высо́кое, бг҃оно́се, смире́нїе: и҆́миже возвыша́емь, трꙋдѡ́въ твои́хъ дѣ́йствомъ и҆ видѣ́нїемъ, ра́дꙋѧсѧ прине́слсѧ є҆сѝ, вѣне́цъ неꙋвѧда́емый прїе́мъ.
Бг҃оро́диченъ:
Тва́рей ꙗ҆ви́ласѧ є҆сѝ, чⷭ҇таѧ, всѣ́хъ ви́димыхъ и҆ неви́димыхъ превы́шши, всенепоро́чнаѧ: зижди́телѧ бо родила̀ є҆сѝ, ꙗ҆́коже и҆зво́ли воплоти́тисѧ во ᲂу҆тро́бѣ твое́й: є҆го́же со дерзнове́нїемъ молѝ, спастѝ пою́щыѧ тѧ̀.
Пѣ́снь г҃. І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дꙋхо́внѡ ᲂу҆твердѝ, въ бж҃е́ственнѣй твое́й сла́вѣ, вѣнцє́въ сла́вы сподо́би.
Прича́стїемъ свѣ́та невеще́ственнагѡ, ꙗ҆́кѡ невеще́ственъ вои́стиннꙋ, гаврїи́ле, невеще́ственнѡ просвѣща́емь, свѣ́тъ ви́дѣнъ бы́лъ є҆сѝ вторы́й, веще́ственныѧ всегда̀ человѣ́ки просвѣща́ѧ пою́щыѧ тѧ̀.
Вели́кагѡ благозва́нїѧ сподо́билсѧ є҆сѝ, вели́кое та́инство на́мъ ѿкры́въ, вели́кїй а҆́гг҃лѡвъ, и҆́мже взѧ́ти бы́хомъ ѿ землѝ къ велича́йшей высотѣ̀, вельмѝ чтꙋ́щїи тѧ̀.
Ꙗ҆ви́сѧ всѣ̑мъ съ нб҃сѐ, любо́вїю и҆́щꙋщымъ тѧ̀ при́снѡ, и҆ ᲂу҆ста́ви бꙋ́рю на ны̀ дви́жимꙋю, напа́стей же и҆ скорбе́й, ѽ гаврїи́ле а҆рхїстрати́же!
Бг҃оро́диченъ:
Сказꙋ́ѧ є҆́же дре́вле сокрове́нное та́инство, ѻ҆трокови́це, тебѣ̀ и҆ногда̀ гаврїи́лъ взыва́ше: ра́дꙋйсѧ, бж҃їѧ пала́то, въ ню́же всели́всѧ, всѧ̑ человѣ́ки ѡ҆божи́лъ є҆́сть, ꙗ҆́кѡ милосе́рдъ.
И҆́нъ. І҆рмо́съ:
Процвѣла̀ є҆́сть пꙋсты́нѧ, ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ цр҃ковь, прише́ствїемъ твои́мъ, въ не́йже ᲂу҆тверди́сѧ моѐ се́рдце.
Просїѧ̀ житїѐ твоѐ, бг҃оно́се стефа́не, всесвѣ́тло ꙗ҆́кѡ со́лнце въ мі́рѣ: и҆ просвѣтѝ къ тебѣ̀ вѣ́рою и҆ любо́вїю приходѧ́щыѧ.
Просвѣща́ютсѧ концы̀ ᲂу҆чє́нїи твои́ми, прпⷣбне: ꙗ҆́коже бо свѣти́льникъ просїѧ́лъ є҆сѝ, бг҃оно́се, цр҃кви хрⷭ҇то́вѣ, въ не́йже ᲂу҆тверди́сѧ моѐ се́рдце.
Непорабоще́ннꙋ соблю́лъ є҆сѝ дꙋ́шꙋ твою̀ страстьмѝ и҆ сластьмѝ тѣле́сными, бг҃оно́се стефа́не че́стне. тѣ́мже ны́нѣ по достоѧ́нїю восхвалѧ́емъ тѧ̀.
Бг҃оро́диченъ:
Ꙗ҆ви́ласѧ є҆сѝ чистото́ю ꙗ҆́кѡ крі́нъ, влⷣчце, посредѣ̀ те́рнїѧ просїѧ́вши лꙋча́ми дѣ́вства твоегѡ̀, бцⷣе пречⷭ҇таѧ.
Конда́къ, гла́съ в҃:
На нб҃сѣ́хъ зрѧ̀ бж҃їю сла́вꙋ, и҆ на землѝ съ высоты̀ подаѧ̀ благода́ть, нача́льниче а҆́гг҃лѡвъ, мꙋ́дре гаврїи́ле, бж҃їѧ сла́вы слꙋжи́телю, и҆ мі́ра бжⷭ҇твенный побо́рниче, спаса́й, соблюда́й вопїю́щыѧ тѝ: са́мъ бꙋ́ди помо́щникъ, и҆ никто́же на ны̀.
Сѣда́ленъ, гла́съ д҃. Подо́бенъ: Вознесы́йсѧ:
Безпло́тныхъ слꙋжи́телей ты̀ пе́рвенствꙋѧй, первовѣ́чное повелѣ́нное стра́шное та́инство тебѣ̀ є҆ди́номꙋ, гаврїи́ле сла́вне, ввѣрѧ́етсѧ, ржⷭ҇тво̀ неизрече́нное ст҃ы́ѧ дв҃ы: ра́дꙋйсѧ, провозглаша́ѧ є҆́й, ѡ҆бра́дованнаѧ: тѣ́мже тѧ̀ до́лжнѡ вѣ́рнїи съ весе́лїемъ при́снѡ ᲂу҆блажа́емъ.
Сла́ва, прпⷣбнагѡ, гла́съ г҃. Подо́бенъ: Красотѣ̀ дѣ́вства:
И҆справле́нїе житїѧ̀ твоегѡ̀ всѣ́хъ просвѣща́етъ стѡпы̀, стефа́не ѻ҆́ч҃е вои́стиннꙋ, вѣ́рою подо́бѧщихсѧ тебѣ̀. тѣ́мже любо́вїю тѧ̀ блажа́щыѧ всегда̀ спаса́й моли́твами твои́ми ѿ всѧ́кїѧ тѣсноты̀, хрⷭ҇та̀ бл҃га́го молѧ̀, прпⷣбне блаже́нне досточꙋ́дне.
И҆ ны́нѣ, бг҃оро́диченъ:
Ꙗ҆́кѡ невоздѣ́ланнаѧ, дв҃о, лоза̀, краснѣ́йшїй гро́здъ прозѧбла̀ є҆сѝ, и҆сточа́ющъ на́мъ вїно̀ спасе́нїѧ, всѣ́хъ веселѧ́щее дꙋ́шы же и҆ тѣлеса̀. тѣ́мже ꙗ҆́кѡ винꙋ́ тѧ до́брыхъ блажа́ще при́снѡ, со а҆́гг҃ломъ вопїе́мъ тѝ: ра́дꙋйсѧ, бл҃года́тнаѧ.
Крⷭ҇тобг҃оро́диченъ:
Неискꙋсобра́чнаѧ чⷭ҇таѧ и҆ мт҃и твоѧ̀, хрⷭ҇тѐ, ви́дѧщи тѧ̀ ме́ртва ви́сѧща на крⷭ҇тѣ̀, мт҃рски пла́чꙋщи гл҃го́лаше: что̀ тебѣ̀ воздадѐ є҆вре́йскїй беззако́нный собо́ръ и҆ неблагода́рный, и҆́же мно́гихъ и҆ вели́кихъ твои́хъ, сн҃е мо́й, дарѡ́въ наслади́выйсѧ; пою̀ твоѐ бжⷭ҇твенное снизхожде́нїе.
Пѣ́снь д҃. І҆рмо́съ:
Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ тебє̀ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и.
Стоѧ́лъ є҆сѝ прича́стїемъ бг҃онача́льнымъ, дре́вле гаврїи́ле досточꙋ́дне, просвѣща́ѧ прⷪ҇ро́ка данїи́ла, и҆ и҆зложи́въ ꙗ҆вле́нїе недовѣ́домыхъ дх҃омъ.
Оу҆сты̀ бре́нными тѧ̀ ра́достнѡ, ѻ҆́гненное є҆стество̀ сꙋ́ща восхвалѧ́емъ: и҆змѝ на́съ ѻ҆гнѧ̀ всегда̀ палѧ́щагѡ, бжⷭ҇твенными, гаврїи́ле, хода́тайствы твои́ми.
Па́че со́лнца въ бжⷭ҇твеннꙋю ѻ҆де́ждꙋ, сла́вою непристꙋ́пною блиста́ющꙋсѧ ѡ҆дѣва́емь, а҆рхїстрати́же слꙋжи́телей, цр҃ю̀ предстои́ши нбⷭ҇номꙋ веселѧ́сѧ.
Бг҃оро́диченъ:
Всю́ тѧ дх҃омъ гаврїи́лъ, преѡчище́нꙋ, всенепоро́чнаѧ, разꙋмѣ́въ, вопїе́тъ тебѣ̀ ꙗ҆́вственнѡ: ра́дꙋйсѧ, клѧ́твы и҆збавле́нїе, и҆ пра́ѻтцєвъ воззва́нїе.
И҆́нъ. І҆рмо́съ:
Прише́лъ є҆сѝ ѿ дв҃ы не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.
Ты̀, стефа́не, мона́шествꙋющихъ бы́лъ є҆сѝ вѣне́цъ, ꙗ҆́кѡ ка́менїемъ многоцѣ́ннымъ, добродѣ́тельми ѡ҆бложе́нъ: ꙗ҆ви́лсѧ бо є҆сѝ, блаже́нне, бг҃ора́дованно вои́стиннꙋ ᲂу҆краше́нїе.
Бжⷭ҇твеннꙋю, бг҃оно́се, премꙋ́дрость поче́лъ є҆сѝ: тѣ́мже дарова́нїй тѧ̀ сїѧ̀ вѣнцы̀ ᲂу҆ѧснѝ, сла́вꙋ вѣ́чнꙋю тебѣ̀ хода́тайствовавши, ѻ҆́ч҃е всече́стне.
Свѣ́тлостїю нра́вѡвъ твои́хъ, и҆ ѻ҆́бразы бла́гости, прпⷣбне стефа́не, подо́бнѣ пожи́лъ є҆сѝ: тѣ́мже пристꙋ́пенъ всѣ̑мъ бы́лъ є҆сѝ, всебл҃же́нне пречꙋ́дне.
Бг҃оро́диченъ:
Оу҆мерщвле́нїѧ пло́дъ мнѣ̀ є҆́ѵа принесѐ, жи́знь же ро́ждшаѧ ѵ҆поста́снꙋю, пречⷭ҇таѧ, а҆́бїе и҆спра́вила є҆сѝ. тѣ́мже зовꙋ́ ти: ра́дꙋйсѧ, приснодв҃о.
Пѣ́снь є҃. І҆рмо́съ:
Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Оу҆ма̀ прича́стїемъ пе́рвагѡ просвѣща́емь, вторы́й ви́дѣнъ бы́лъ є҆сѝ свѣ́тъ, зовы́й со безчи́сленными а҆́гг҃лъ чи́нми: ст҃ъ ѻ҆ц҃ъ вседѣ́тель, сн҃ъ собезнача́ленъ, и҆ дх҃ъ сопресто́ленъ.
Ви́дъ тво́й ѻ҆́гненъ, добро́та пречꙋ́дна, всѧ́кꙋ мы́сль ᲂу҆дивлѧ́ѧ, ве́лїѧ сла́ва, гаврїи́ле, вели́кїй бжⷭ҇твенныхъ безпло́тныхъ нача́льниче, всѣ́хъ ᲂу҆добре́нїе вѣ́рнѡ воспѣва́ющихъ тѧ̀.
Бжⷭ҇твенный ꙗ҆́кѡ ви́дѣ тѧ̀, во вре́мѧ кажде́нїѧ дре́вле стоѧ́ща, заха́рїа быва́етъ нѣ́мъ: не вѣ́рова бо твоемꙋ̀ возвѣще́нїю стра́шномꙋ, є҆го́же возгласи́лъ є҆сѝ, гаврїи́ле а҆рхїстрати́же.
Бг҃оро́диченъ:
Хра́мъ свѧще́нїѧ сꙋ́щи, пренепоро́чнаѧ, гла́сомъ гаврїи́ла а҆рха́гг҃ла, во ст҃ы́хъ почива́ющаго родила̀ є҆сѝ прест҃а́го бг҃а, всѧ̑ ѡ҆свѧща́ющаго, и҆ лю́тыхъ и҆з̾има́ющаго.
И҆́нъ. І҆рмо́съ:
Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ приведе́нїе и҆́мамы.
Стремле́нїе страсте́й безстра́стїѧ жела́нїемъ ᲂу҆гаси́лъ є҆сѝ, бг҃оно́се стефа́не: и҆ видѣ̑нїи и҆ дѣѧ̑нїи просвѣти́лъ є҆сѝ, ѻ҆́ч҃е, дꙋше́вное ᲂу҆строе́нїе.
Оу҆мо́мъ чи́стымъ писа̑нїи бесѣ́довалъ є҆сѝ дꙋхо́вными, бг҃оглаго́ливе стефа́не; и҆ видѣ́нїѧ и҆ дѣѧ́нїѧ собра́лъ є҆сѝ бога́тство бжⷭ҇твенно, ѻ҆́ч҃е препⷣбне.
Премꙋ́дрости глꙋбинꙋ̀ и҆спыта́въ, стефа́не, дости́глъ є҆сѝ ѡ҆брѣстѝ є҆ли́кѡ благопотре́бно: и҆ би́серъ многоцѣ́нный болѣ́зньми стѧжа́лъ є҆сѝ, преблаже́нне, ра́зꙋма.
Бг҃оро́диченъ:
Сѐ во чре́вѣ, бцⷣе пречⷭ҇таѧ, хрⷭ҇та̀ бг҃а па́че сло́ва и҆мѣ́ла є҆сѝ, ꙗ҆́коже и҆са́їа провозгласѝ: вы́ше є҆стества̀ сего̀, бг҃ороди́тельнице, родила̀ є҆сѝ.
Пѣ́снь ѕ҃. І҆рмо́съ:
Бжⷭ҇твенное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Земні́и ѧ҆зы́цы почести́ тѧ ᲂу҆ма̀ свѣтоза́рнаго и҆ нбⷭ҇наго не возмо́гꙋтъ, пресвѣ́тлѡ просвѣща́ема, па́че ᲂу҆ма̀ и҆ сло́ва, бжⷭ҇твенными свѣтлостьмѝ.
Зарѧ̀ сл҃нца многосвѣ́тлаѧ, ѻ҆́гненныхъ слꙋ́гъ нача́льниче, свѣтоно́сными твои́ми ко влⷣцѣ мольба́ми пою́щыѧ тѧ̀ тмы̀ страсте́й и҆схи́ти.
Совѣ́ты ꙗ҆зы́кѡвъ разорѝ, вѣ́рꙋ правосла́внꙋю ᲂу҆твердѝ, ᲂу҆ста́ви раздира̑нїѧ цр҃кѡ́внаѧ, а҆рха́гг҃ле, ко всѣ́хъ творцꙋ̀ твои́ми моли́твами.
Бг҃оро́диченъ:
Глаго́лѡвъ бжⷭ҇твенныхъ послꙋшли́ва, чⷭ҇таѧ, гаврїи́ловыхъ была̀ є҆сѝ, и҆ пребезнача́льнаго сло́ва пло́тїю родила̀ є҆сѝ, безслове́сїѧ мі́ръ и҆зба́вльшаго.
И҆́нъ. І҆рмо́съ:
Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
Вселе́ннѣй свѣти́ло пресвѣ́тлое, ѻ҆́ч҃е, ꙗ҆ви́лсѧ є҆сѝ, слове́съ свѣ́тлостїю просвѣща́ѧ, стефа́не, вѣ́рою и҆ любо́вїю къ тебѣ̀ притека́ющыѧ.
Бл҃же́нно житїѐ проше́лъ є҆сѝ, ᲂу҆спи́въ ᲂу҆́бѡ чꙋ̑вства, внѣ̀ бы́въ мїрска́гѡ мѧте́жа, и҆ бг҃ꙋ прибли́жилсѧ є҆сѝ стефа́не.
Ꙗ҆́кѡ до́бръ, ꙗ҆́кѡ красе́нъ вѣне́цъ, и҆́мже ны́нѣ вѣнча́лсѧ є҆сѝ, премꙋ́дре стефа́не, добродѣ́тельми вѣнча́емь, и҆ надъ страстьмѝ ца́рствовалъ є҆сѝ, преизрѧ́дне.
Бг҃оро́диченъ:
Вы́ше є҆стества̀, дв҃о, родила̀ є҆сѝ, и҆ вѣ́чнꙋеши дв҃ою, ꙗ҆́вльши и҆́стиннагѡ бжⷭ҇тва̀, сн҃а и҆ бг҃а твоегѡ̀ ѻ҆́бразы.
Конда́къ, гла́съ в҃. Подо́бенъ: Твє́рдыѧ:
А҆рхїстрати́же бж҃їй, слꙋжи́телю бж҃е́ственныѧ сла́вы, а҆́гг҃лѡвъ нача́льниче, и҆ человѣ́кѡвъ наста́вниче, поле́зное на́мъ просѝ, и҆ ве́лїю ми́лость, ꙗ҆́кѡ безпло́тныхъ а҆рхїстрати́гъ.
І҆́косъ:
Ре́клъ є҆сѝ, человѣколю́бче, въ писа́нїихъ твои́хъ, мно́жествꙋ ра́доватисѧ а҆́гг҃лъ на нб҃сѝ ѡ҆ человѣ́цѣ є҆ди́номъ ка́ющемсѧ, безсме́ртне. тѣ́мже мы̀, и҆̀же въ беззако́нїихъ, безгрѣ́шне є҆ди́не сердцевѣ́дче, тѧ̀ моли́ти всегда̀ дерза́емъ, ꙗ҆́кѡ бл҃гоꙋтро́бнаго, ᲂу҆ще́дрити, и҆ низпосла́ти недостѡ́йнымъ ᲂу҆миле́нїе, влⷣко, подаѧ́й на́мъ проще́нїе, ѡ҆ всѣ́хъ бо на́съ мо́литсѧ тебѣ̀ безпло́тныхъ а҆рхїстрати́гъ.
Пѣ́снь з҃. І҆рмо́съ:
Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.
І҆ѡа́нново ржⷭ҇тво̀, сла́вне, возвѣсти́лъ є҆сѝ заха́рїи, и҆ногда̀ внꙋ́трь бжⷭ҇твеннагѡ хра́ма предстоѧ́щꙋ, и҆ пою́щꙋ и҆зба́вителю и҆ бг҃ꙋ: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.
Пресла́вное хра́ма твоегѡ̀ благолѣ́пїе, пресвѣ́тлѡ, гаврїи́ле, ѡ҆свѧща́етъ дꙋ́шы вѣ́рныхъ, и҆ повелѣва́етъ велегла́снѡ вопи́ти: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.
Просвѣща́емь прича́стїемъ, а҆рхїстрати́же, пе́рвагѡ свѣ́та та́йнѡ, вторы́й свѣ́тъ вои́стиннꙋ ви́дѣнъ бы́лъ є҆сѝ, пою́щыѧ просвѣща́еши всегда̀: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.
Бг҃оро́диченъ:
По́сланъ бы́сть гаврїи́лъ а҆рхїстрати́гъ, ра́дость возвѣща́ѧ тебѣ̀, дв҃о мт҃и чⷭ҇таѧ, є҆ѧ́же ра́ди печа́ль преста̀, и҆ клѧ́тва вои́стиннꙋ непло́дна бы́сть, и҆ благослове́нїе процвѣтѐ вѣ̑рнымъ во вѣ́ки.
И҆́нъ. І҆рмо́съ:
Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.
Благово́нствꙋютъ, прпⷣбне, твои́хъ ᲂу҆че́нїй словеса̀, бл҃года́тїю дх҃а сїѧ́юще: бжⷭ҇тво́ бо є҆ди́но чествꙋ́ѧ въ тре́хъ ли́цахъ, сло́ва же воплоще́нїе поѧ̀, благово́нствꙋеши на́съ, пребога́те.
Оу҆ма̀ чистото́ю, и҆ ра́зꙋма, бг҃омꙋ́дре, свѣ́тлостїю житїѐ преше́лъ є҆сѝ, чистото́ю же тѣлесѐ, и҆ дѣ́вства сїѧ́нїемъ, и҆зрѧ́дно возложе́нїе ꙗ҆́вльсѧ всеви́дцꙋ, и҆ вседержи́телю.
Сло́во твоѐ со́лїю растворе́но, житїѐ твоѐ бл҃года́тїю, преблаже́нне, сїѧ́ѧ ꙗ҆ви́сѧ, пречꙋ́дне: тѣ́мже въ вы̑шнїѧ ѻ҆би́тєли всели́лсѧ є҆сѝ ра́дꙋѧсѧ хрⷭ҇тꙋ̀, со дерзнове́нїемъ ны́нѣ предстоѧ̀.
Бг҃оро́диченъ:
Оу҆правлѧ́ющи, пречⷭ҇таѧ, моѐ житїѐ, къ твоемꙋ̀ всети́хомꙋ приста́нищꙋ напра́ви, бг҃а ро́ждшаѧ благи́хъ и҆сто́чника, всѣ̑мъ подаю́щаго вѣ̑рнымъ и҆з̾ѻби́лїе бла́гости.
Пѣ́снь и҃. І҆рмо́съ:
Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀ и҆ превозноси́те є҆го̀ во всѧ̑ вѣ́ки.
Свѧщеннослѡ́вїи свѧще́нными тѧ̀ лю́дїе свѧще́ннїи пою́тъ веселѧ́щесѧ: ты́ бо всевино́вное сло́во воплоща́емо, є҆́же по на́мъ, а҆рха́гг҃ле, и҆ є҆́же ѿ на́съ провозглаша́еши дв҃ѣ, па́че ᲂу҆ма́ же и҆ сло́ва. тѣ́мже тѧ̀ почита́емъ во всѧ̑ вѣ́ки.
Оу҆мꙋ̀ вели́комꙋ же и҆ пе́рвомꙋ, невеще́ственнѡ, а҆рха́гг҃ле, соединѧ́ѧсѧ, ᲂу҆сты̀ ѻ҆́гненными твои́ми пое́ши пѣ́нїе стра́шное, є҆́же пою́тъ всѝ а҆́гг҃льстїи ли́цы: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Благолѣ́пїемъ ꙗ҆́вѣ и҆спещре́нъ бжⷭ҇твеннымъ, прохо́диши нбⷭ҇наѧ, та́же и҆ земна̑ѧ, соверша́ѧ свѧщє́ннаѧ хотѣ̑нїѧ хрⷭ҇та̀ всѣ́хъ бг҃а, а҆́гг҃лѡвъ нача́льниче гаврїи́ле, красота̀ вѣ́рою при́снѡ тѧ̀ хва́лѧщихъ.
Пло́тїю по ѵ҆поста́си сло́во человѣ́кѡмъ примѣси́тисѧ хотѧ̀, и҆мѣ́ тѧ предтекꙋ́ща и҆ проꙋготовлѧ́юща свѧще́ннꙋю пала́тꙋ, ѽ свѧще́нный гаврїи́ле! гдⷭ҇а по́йте, вопїю́ща, и҆ превозноси́те є҆го̀ во всѧ̑ вѣ́ки.
Бг҃оро́диченъ:
Ꙗ҆́кѡ престо́лъ красе́нъ цр҃е́въ, ꙗ҆́кѡ всѣ́хъ тва́рей преимꙋ́щꙋю, ꙗ҆́кѡ пресꙋ́щнаго є҆ди́нꙋ ѡ҆сꙋществова́вшꙋю, человѣ́ки ѡ҆божи́вшаго, соедине́нїемъ лꙋ́чшимъ ржⷭ҇тва̀ неизрече́ннагѡ и҆ стра́ннагѡ, бл҃гослове́ннꙋю воспое́мъ дв҃ꙋ.
И҆́нъ. І҆рмо́съ:
Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.
Вѣне́цъ благолѣ́пенъ хрⷭ҇то́съ жизнода́вецъ на ве́рхъ тво́й положѝ, тезоимени́те стефа́не, и҆́бо дѣѧ́ньми просїѧ́лъ є҆сѝ, и҆ видѣ̑нїи, ꙗ҆ви́лсѧ є҆сѝ зовы́й: благослови́те, всѧ̑ дѣла̀ гдⷭ҇нѧ, гдⷭ҇а.
Всѐ преше́дъ чꙋ́вство, преблаже́нне, ᲂу҆мꙋ̀ пе́рвомꙋ прибли́жилсѧ є҆сѝ дꙋшѝ чистото́ю, житїѧ́ же свѣ́тлостїю вѣне́цъ но́сиши, стефа́не, зовы́й: благослови́те, всѧ̑ дѣла̀ гдⷭ҇нѧ, гдⷭ҇а.
Жела́нїемъ ѕѣ́льнымъ, преблаже́нне, и҆зслѣ́дилъ є҆сѝ бг҃оно́снагѡ са́ввы, стефа́не, житїѐ бжⷭ҇твенное, жи́зни же свѣ́тлостїю поревнова́лъ є҆сѝ, прехва́льне, бы́въ ᲂу҆́бѡ ᲂу҆чени́къ сегѡ̀ вои́стиннꙋ и҆зрѧ́денъ.
Бг҃оро́диченъ:
Оу҆́мъ безстра́стный, во ᲂу҆тро́бѣ твое́й, соединѧ́етсѧ человѣ́ческомꙋ ᲂу҆мꙋ̀, пречⷭ҇таѧ, пло́ти же дебельство́мъ подъ лѣ́томъ бы́въ, лѣ́тъ превы́шшїй: тѣ́мъ тѧ̀, бцⷣе, вѣ́рою и҆ любо́вїю сла́вимъ.
Пѣ́снь ѳ҃. І҆рмо́съ:
Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.
Предстои́ши стра́шнѡ престо́лꙋ благода́ти слꙋжѧ̀, и҆ ѡ҆блиста́емь свѣтоли̑тїи є҆́же па́че ᲂу҆ма̀, и҆ свѧще́ннѡ ѡ҆божа́емь, и҆ свѣ́тъ зри́мь, и҆ просвѣща́ѧй вѣ́рою чтꙋ́щыѧ тѧ̀, свѧще́нне гаврїи́ле а҆рхїстрати́же.
Ꙗ҆́коже не́бо зри́шисѧ ѕвѣзда́ми ᲂу҆кра́шено, бжⷭ҇твенными свѣтлостьмѝ, и҆ ꙗ҆́коже воево́да рꙋка́ми держи́ши ски́птръ пресвѣ́тлый, и҆ прехо́диши всю̀ зе́млю, во́лю влⷣчню всегда̀ соверша́ѧ, и҆ лю́тыхъ вѣ̑рныѧ и҆зима́ѧ.
Оу҆ти́ши лю́тꙋю ва́рварскꙋю бꙋ́рю, воздви́жемꙋю всегда̀ на рабы̑ твоѧ̑, цр҃кѡ́вныѧ ᲂу҆ста́ви раздо́ры: пою́щымъ тѧ̀ пода́ждь прегрѣше́нїй и҆збавле́нїе: во́инствꙋ же да́рꙋй побѣди́тєльнаѧ, гаврїи́ле, те́плымъ предста́тельствомъ твои́мъ.
Предо́браѧ дво́ице и҆ пресла́внаѧ, мїхаи́ле и҆ гаврїи́ле, престо́лꙋ предстоѧ́ще бжⷭ҇твенныѧ сла́вы, всѣ̑мъ проси́те грѣхѡ́въ проще́нїѧ, и҆ ѕлы́хъ премѣне́нїѧ, ꙗ҆́кѡ предста́телїе, и҆ ꙗ҆́кѡ бла́гости влⷣчнѣй во все́мъ подо́бѧщесѧ.
Бг҃оро́диченъ:
Свѣ́тъ благода́ти ржⷭ҇тво́мъ твои́мъ возсїѧ̀, и҆ просвѣтѝ всю̀ подсо́лнечнꙋю, и҆ предста́телѧ тмы̀ погꙋбѝ, бг҃ороди́тельнице пречⷭ҇таѧ, а҆́гг҃лѡвъ похвало̀, и҆ человѣ́кѡвъ всѣ́хъ спасе́нїе, непреста́нными гла́сы восхвалѧ́ющихъ тѧ̀.
И҆́нъ. І҆рмо́съ:
Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. Тѣ́мъ всепѣ́тꙋю бцⷣꙋ велича́емъ.
Пречестны́й стефа́не, ны́нѣ чи́стѡ ᲂу҆слажда́ѧсѧ, и҆ пи́щꙋ прїе́млѧ па́че ᲂу҆́мныѧ, и҆дѣ́же ст҃ы́хъ собо́ри ѡ҆ бз҃ѣ ликꙋ́ютъ, блаже́нне, тѧ̀ ны́нѣ чтꙋ́щыѧ, хода́тайствꙋѧ къ себѣ̀ привлецы̀.
Пре́йде ра́дꙋѧсѧ къ жела́нїю кра́йнемꙋ, ко є҆ди́номꙋ сꙋ́щемꙋ ꙗ҆́вѣ блаже́нствꙋ, къ пребо́льшей добро́тѣ, къ жи́зни вои́стиннꙋ нестарѣ́емѣй, къ свѣ́тꙋ невече́рнемꙋ, бг҃оно́се ѻ҆́ч҃е стефа́не.
Ꙗ҆́кѡ со́лнце просїѧ́лъ є҆сѝ въ мона́шескихъ собо́рѣхъ, ѿ мѧ́гкихъ ногте́й ѡ҆свѧще́нъ, ꙗ҆́коже зарю̀ и҆спꙋща́ѧ, добродѣ́тєли твоегѡ̀ житїѧ̀, пресла́дкїй стефа́не, бг҃оно́се ѻ҆́ч҃е прпⷣбне.
Бг҃оро́диченъ:
Разꙋмѣ́вше и҆здале́ча прозорли́выма ѻ҆чи́ма, проро́цы тѧ̀ ꙗ҆́вѣ провозвѣсти́ша, хотѧ́щꙋ мт҃рь бы́ти вседѣ́телѧ и҆ всѣ́хъ влⷣки: тѣ́мже тѧ̀, всепѣ́таѧ, бцⷣꙋ и҆сповѣ́даемъ.
Свѣти́ленъ. Подо́бенъ: Посѣти́лъ ны̀:
А҆рхїстрати́же бж҃їй, въ кро́вѣ крилꙋ̑ твоє́ю ѡ҆полчи́всѧ, ѡ҆гради́ мѧ прибѣга́ющаго къ тебѣ̀, и҆ во и҆схо́дѣ и҆зба́ви мѧ̀ го́рькихъ и҆стѧза́телей, и҆ спаси́ мѧ мольба́ми твои́ми.
Бг҃оро́диченъ:
Бг҃ъ на́мъ, чⷭ҇таѧ, прибѣ́жище и҆ си́лꙋ, и҆ по́мощь тѧ̀ подадѐ, въ ско́рбехъ на́шихъ и҆ во ѡ҆бстоѧ́нїихъ: всѣ́хъ ᲂу҆̀бо на́съ и҆зба́ви ѿ бѣ́дъ на́шихъ.
На стїхо́внѣ ѻ҆ктѡ́иха. Сла́ва, гла́съ є҃:
И҆дѣ́же ѡ҆сѣнѧ́етъ благода́ть твоѧ̀, а҆рха́гг҃ле, ѿтꙋ́дꙋ дїа́волѧ прого́нитсѧ си́ла: не терпи́тъ бо свѣ́та твоегѡ̀ ви́дѣти, спады́й денни́ца. тѣ́мъ мо́лимъ тѧ̀: ѻ҆́гнєнныѧ є҆гѡ̀ стрѣ́лы, ꙗ҆̀же на ны̀ дви̑жимыѧ ᲂу҆гасѝ хода́тайствомъ твои́мъ, и҆збавлѧ́ѧ на́съ ѿ собла̑знъ є҆гѡ̀, достохва́льный гаврїи́ле а҆рхїстрати́же.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ:
Зрѧ́щи дре́вле а҆́гнца и҆ сн҃а своегѡ̀ дв҃а мт҃и и҆ всеблаже́ннаѧ ѻ҆трокови́ца, на крⷭ҇тъ воздви́жена, вопїѧ́ше слезѧ́щи: ᲂу҆вы̀ мнѣ̀, сн҃е мо́й, ка́кѡ ᲂу҆мира́еши, бг҃ъ є҆стество́мъ сы́й безсме́ртенъ;
На лїтꙋргі́и, Бл҃жє́нна ѻ҆ктѡ́иха, на д҃: И҆ а҆рха́гг҃ла пѣ́снь г҃, на д҃. Прокі́менъ, гла́съ д҃: Творѧ́й а҆́гг҃лы своѧ̑ дꙋ́хи: Сті́хъ: Благословѝ, дꙋшѐ моѧ̀, гдⷭ҇а: А҆пⷭ҇лъ къ є҆вре́ємъ, зача́ло т҃є. А҆ллилꙋ́їа, гла́съ є҃: Хвали́те гдⷭ҇а всѝ а҆́гг҃ли є҆гѡ̀: Сті́хъ: Ꙗ҆́кѡ то́й речѐ, и҆ бы́ша: Є҆ѵⷢ҇лїе лꙋкѝ, зача́ло н҃а. Прича́стенъ: Творѧ́й а҆́гг҃лы своѧ̑ дꙋ́хи:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.