← претходни дан | Минеј — Јул | следећи дан →
5 июля: Преподобного Афанасия Афонского. Обретение мощей преподобного Сергия Радонежского
Мѣ́сѧца тогѡ́же въ є҃-й де́нь.
Прпⷣбнагѡ ѻ҆тца̀ на́шегѡ а҆ѳана́сїа а҆ѳѡ́нскагѡ:
И҆ ѡ҆брѣ́тенїе честны́хъ моще́й прпⷣбнагѡ и҆ бг҃оно́снагѡ ѻ҆тца̀ на́шегѡ и҆гꙋ́мена се́ргїа, ра́донежскагѡ чꙋдотво́рца.
Слꙋ́жба є҆гѡ̀ пи́сана по се́й слꙋ́жбѣ.
А҆ и҆дѣ́же хра́мъ а҆ѳана́сїа, твори́мъ бдѣ́нїе.
На ма́лѣй вече́рни стїхи̑ры на д҃, гла́съ а҃. Подо́бенъ: Всехва́льнїи мꙋ́ченицы:
Бжⷭ҇твеннагѡ ми́ра ꙳ те́плъ рачи́тель бы́въ, ꙳ си́мъ всѧ́кꙋ низложи́лъ є҆сѝ ꙳ де́мѡнѡвъ си́лꙋ, ꙳ и҆ кова́рствїѧ и҆́хъ ᲂу҆мꙋ́чилъ є҆сѝ, ꙳ и҆ всѧ́кꙋ добродѣ́тель соблю́лъ є҆сѝ, ꙳ безнавѣ́тнѡ ѿ ѻ҆́нѣхъ ꙳ хи́тростей ле́стныхъ, ꙳ ѻ҆́ч҃е а҆ѳана́сїе.
Премꙋ́дрости лꙋ́чшее ꙳ нача́ло стра́хꙋ предложи́въ, ꙳ ꙗ҆́коже ѡ҆снова́нїе непоколеби́мо, ꙳ и҆ ᲂу҆твержда́емо ѿ негѡ̀, ꙳ бжⷭ҇твєнныѧ за́пѡвѣди соблю́лъ є҆сѝ, ꙳ и҆ си́ми ѡ҆чи́щсѧ, ꙳ просвѣти́лъ є҆сѝ дꙋ́шꙋ, ꙳ неизрече́нныхъ же сподо́билсѧ є҆сѝ въ се́рдцѣ твое́мъ та̑инъ, ꙳ ѻ҆́ч҃е а҆ѳана́сїе.
Въ землѝ не скры́лъ є҆сѝ ꙳ тебѣ̀ да́ннагѡ свы́ше ꙳ ѿ бжⷭ҇твенныѧ благода́ти тала́нта: ꙳ но пре́далъ є҆сѝ ꙳ и҆ мнѡ́гимъ и҆нѣ̑мъ незави́стнѡ, ꙳ бога́тнѡ же бжⷭ҇твенныхъ дарѡ́въ, ꙳ и҆̀мже причасти́лсѧ є҆сѝ, ꙳ ꙗ҆́кѡ вѣ́ренъ строи́тель, ꙳ ꙗ҆ви́лсѧ є҆сѝ наслѣ́дникъ бж҃їй, а҆ѳана́сїе.
Сла́ва, гла́съ ѕ҃:
Безсме́ртїѧ тезоимени́таго всѝ восхва́лимъ, во а҆ѳѡ́нѣ мꙋ́жески и҆ до́блественнѣ пости́вшасѧ, и҆́же и҆ ста́до собра̀ сїѐ, и҆ хра́мъ гдⷭ҇еви воздви́же любо́вїю, и҆ мт҃ри бж҃їи возложѝ всѧ̑: є҆́йже и҆ мо́литсѧ ѡ҆ на́съ вѣ́рою соверша́ющихъ па́мѧть є҆гѡ̀.
И҆ ны́нѣ, бг҃оро́диченъ: Бцⷣе, ты̀ є҆сѝ лоза̀:
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Сни́демсѧ ли́цы ѻ҆тє́цъ, ꙳ и҆̀же во а҆ѳѡ́нѣ, ꙳ въ па́мѧть бжⷭ҇твеннагѡ ꙳ и҆ мꙋ́драгѡ а҆ѳана́сїа, ꙳ сла́вѧще гдⷭ҇а.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
Всѧ̑ ѿ дꙋшѝ ꙳ притека́ющыѧ, пребл҃же́нне, ꙳ къ бжⷭ҇твенномꙋ хра́мꙋ твоемꙋ̀, ꙳ спаса́й ѿ бѣ́дъ, ꙳ бг҃омꙋ́дре а҆ѳана́сїе.
Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Собо́ръ честны́й ꙳ ѻ҆тє́цъ собра́всѧ, ꙳ со ᲂу҆ченикѝ твои́ми, ꙳ ра́цѣ честнѣ́й твое́й ꙳ всѝ прикаса́емсѧ.
Сла́ва, и҆ ны́нѣ, бг҃оро́диченъ:
Горѣ́ тѧ ли́цы, ꙳ бцⷣе дв҃о, ꙳ пою́тъ съ до́льними, ꙳ сла́вѧще непреста́ннѡ ꙳ ржⷭ҇тво̀ твоѐ пречⷭ҇тое.
Тропа́рь, гла́съ г҃:
Є҆́же во пло́ти житїю̀ твоемꙋ̀ ᲂу҆диви́шасѧ а҆́гг҃льстїи чи́ни, ка́кѡ съ тѣ́ломъ къ неви̑димымъ сплете́нїємъ и҆зше́лъ є҆сѝ, присносла́вне, и҆ ᲂу҆ѧзви́лъ є҆сѝ дє́мѡнскїѧ полкѝ. ѿѻнꙋ́дꙋже, а҆ѳана́сїе, хрⷭ҇то́съ тебѣ̀ воздадѐ бога́тыми дарова́ньми: сегѡ̀ ра́ди, ѻ҆́ч҃е, молѝ спасти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ:
На вели́цѣй вече́рни пое́мъ, Блаже́нъ мꙋ́жъ, а҃-й а҆нтїфѡ́нъ.
На Гдⷭ҇и, воззва́хъ, стїхи̑ры на и҃, гла́съ в҃. Поⷣ: Кі́ими похва́льными:
Кі̑ѧ похва̑льныѧ по́чєсти принесе́мъ а҆ѳана́сїю, преиспещре́нномꙋ дѣѧ́ньми, и҆ и҆з̾ѻби́льномꙋ бл҃года́тьми, бг҃осїѧ́нна свѣтоли́тїѧ мече́мъ посѣ́кшемꙋ страсте́й стремлє́нїѧ, столпꙋ̀ бг҃овидѣ́ньми сїѧ́ющꙋ, воздержа́нїѧ свѣти́льникꙋ, на свѣ́щницѣ дꙋше́внѣмъ зарю̀ и҆спꙋща́ющꙋ бж҃їѧ велѣ́нїѧ, всѣ̑мъ жи́знь даю́щагѡ;
Кі́ими похва́льными вѣнцы̑ а҆ѳана́сїа вѣнча́емъ словесы̀, свѧще́ннагѡ тече́нїѧ рачи́телѧ, нбⷭ҇нымъ ᲂу҆че́нїемъ взѧ́таго бг҃овидѣ́нїѧ крилы̀ бжⷭ҇твенными, столпа̀ смире́нїѧ неѡбори́маго, стѣ́нꙋ разсꙋжде́нїѧ непоколеби́мꙋю, нра́вомъ ᲂу҆краше́нїѧ чⷭ҇тно́е бл҃голѣ́пїе, ѡ҆ ча́дѣхъ свои́хъ хрⷭ҇та̀ бг҃а молѧ́щаго, є҆ди́наго бл҃госе́рдаго;
Оу҆́тро присносвѣ́тлое, прпⷣбне, показа́лсѧ є҆сѝ, лꙋча́ми бл҃года́тными: страсте́й мгло́ю ѡ҆слѣпѣва́ющихъ приве́лъ є҆сѝ къ свѣ́тꙋ невече́рнемꙋ, ѻ҆́ч҃е а҆ѳана́сїе бг҃омꙋ́дре. ѿню́дꙋже ꙗ҆́кѡ возрасти́вша тала́нтъ, дꙋша́мъ тѧ̀ цѣли́телѧ хрⷭ҇то́съ предлага́етъ, неисцѣ̑льнымъ стрꙋпѡ́мъ согни́вшымъ, мече́мъ слове́съ посѣка́юща, и҆ здра́вїе при́снѡ и҆ спасе́нїе всѣ̑мъ подаю́ща.
Сла́ва, гла́съ ѕ҃:
Ꙗ҆́кѡ бжⷭ҇твеннаѧ жи́знь твоѧ̀, и҆ всеѡсвѧще́нный тво́й коне́цъ, ѻ҆́ч҃е а҆ѳана́сїе: въ то́й бо всеѧ̀ горы̀ мно́жество сне́мшесѧ, ꙗ҆́кѡ ви́дѣ безъ дыха́нїѧ на ѻ҆дрѣ́ тѧ, глагѡ́лы велегла́сными вопїѧ́ше: да́ждь коне́чное сло́во рабѡ́мъ твои̑мъ, свѧ́те. наꙋчѝ, гдѣ̀ ѡ҆ставлѧ́еши ча̑да твоѧ̑, ѻ҆́ч҃е, и҆̀хже ᲂу҆ще́дри ꙗ҆́кѡ ѻ҆тє́цъ, пои́стиннѣ ми́лостивъ и҆ любе́зенъ. ѻ҆ба́че а҆́ще и҆ здѣ̀ гро́бъ покрыва́етъ, на горѣ́ тѧ всѝ бога́тна и҆́мамы предста́телѧ и҆ моли́твенника къ бг҃ꙋ, любо́вїю чтꙋ́щїи тѧ̀.
И҆ ны́нѣ, бг҃оро́диченъ: Кто̀ тебѐ не ᲂу҆бл҃жи́тъ:
Вхо́дъ. Прокі́менъ днѐ. И҆ чтє́нїѧ трѝ.
Премꙋ́дрости соломѡ́ни чте́нїе.
[Глава̀ г҃] Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ: и҆ є҆́же ѿ на́съ ше́ствїе, сокрꙋше́нїе, ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено, и҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.
Премꙋ́дрости соломѡ́ни чте́нїе.
[Глава̀ є҃] Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе благолѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ: прїи́метъ щи́тъ непобѣди́мый преподо́бїе: поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ: по́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ благокрꙋ́гла лꙋ́ка ѻ҆блакѡ́въ на намѣ́ренїе полетѧ́тъ: и҆ ѿ каменоме́тныѧ ꙗ҆́рости, и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ: и҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. Внꙋши́те держа́щїи мно́жєства и҆ гордѧ́щїисѧ ѡ҆ наро́дѣхъ ꙗ҆зы̑къ: ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.
Премꙋ́дрости соломѡ́ни чте́нїе.
[Глава̀ д҃] Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Благоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.
На лїті́и стїхи̑ры, гла́съ а҃. Самогла̑сны:
Незаходи́маго свѣти́льника вселе́нныѧ, воспое́мъ всѝ а҆ѳана́сїа: па́че со́лнца бо возсїѧ̀ въ тверды́ни вѣ́ры, и҆ вѣ́рныхъ соста́вы къ добродѣ́тели наста́ви, ѻ҆́во ᲂу҆́бѡ бг҃одохнове́нными ᲂу҆чє́нїи, и҆ спаси́тельными глагѡ́лъ ввождє́нїи, и҆̀же незави́стными и҆ ѻ҆би́льными ѿ ᲂу҆сте́нъ и҆сточа́ше. ѻ҆́во же дѣ́телїю чꙋ́дною, и҆ равноа́гг҃льнымъ житїе́мъ, къ ре́вности привлача́ѧ, и҆ ѻ҆боѧ̀ житїѐ и҆ сло́во пресвѣ́тло, ꙗ҆́коже во́ждь и҆зрѧ́денъ бг҃оподо́бнѡ показꙋ́ѧ. тогѡ̀ моли́твами, хрⷭ҇тѐ бж҃е на́шъ, сїѐ ста́до соблюдѝ, и҆ правосла́вныхъ вѣ́рꙋ ᲂу҆твердѝ, ꙗ҆́кѡ чл҃вѣколю́бецъ.
Гла́съ в҃:
Хрⷭ҇то́ва рачи́телѧ тезоимени́таго безсме́ртїю, и҆́стиннаго таи́нника сп҃сова, и҆ красотꙋ̀ и҆ хвалꙋ̀ є҆диноѻбра̑знымъ всѣ̑мъ, и҆ наста́вникѡмъ, ѡ҆свѧще́ннаго ѿ младе́нства гдⷭ҇еви, ли́цы ѻ҆тє́цъ соше́дшесѧ восхва́лимъ: се́й бо жела́нїе бжⷭ҇твенное въ себѐ прїе́мъ, мїрскꙋ́ю ᲂу҆́бѡ ѡ҆ста́ви пре́лесть, взѧ́тъ же ꙗ҆ре́мъ хрⷭ҇то́въ на ра́мо, и҆ полкѝ бѣсѡ́въ побѣдѝ мꙋ́жески, показа́въ на́мъ дѣ́тельнѡ бжⷭ҇твенныѧ любвѐ и҆зрѧ́дный пꙋ́ть: и҆́бо и҆ то́й сі́й прете́къ во тща́нїи, пости́же свѣ́тъ и҆́стинный трⷪ҇цы вседѣ́тельныѧ. ѽ чꙋдесѐ ᲂу҆жа́снагѡ, и҆ ве́щи бг҃оподо́бныѧ! ꙗ҆́кѡ зе́менъ сы́й є҆стество́мъ, ра́венъ бы́сть мы́слєннымъ сꙋществѡ́мъ, сла́вꙋ и҆ че́сть бж҃їю воспрїе́млѧ, и҆ моли́твенникъ на́мъ быва́етъ: ꙗ҆́кѡ да ᲂу҆лꙋчи́мъ вѣ́чныхъ бла̑гъ въ де́нь сꙋ́дный.
Гла́съ д҃:
Оу҆дивѝ мы́сленныхъ, ᲂу҆жасѝ и҆ зємны́ѧ, пречꙋ́дны трꙋды̀ воздержа́нїѧ твоегѡ̀ житїѧ̀: ꙗ҆́коже бо безпло́тенъ ѿню́дъ, во пло́ти ста́ростнѣ, врагѝ неви̑димыѧ пребори́лъ є҆сѝ. ро́ди ᲂу҆́бѡ тѧ̀ всѝ пою́тъ благочести́выхъ, и҆зрѧ́днѣе же твоѐ честно́е ста́до, свѣ́тлость твои́хъ болѣ́зней столпописа́нїе, є҆́же показа́лъ є҆сѝ, ꙗ҆́кѡ гра́дъ въ пꙋсты́ни красе́нъ, и҆́же жили́ще собо́рѡмъ мона́шєскимъ бг҃оподо́бнѡ соста́вилъ є҆сѝ, и҆ є҆́же ꙗ҆́коже ѻ҆де́ждами многоче́стными твои́ми красꙋ́етсѧ чꙋдесы̀, и҆ до́блественными страда̑нїи: и҆ твои́ми мольба́ми, а҆ѳана́сїе, и҆ моли́твами и҆спроша́етъ, ко хрⷭ҇тꙋ̀ соблюсти́сѧ, и҆мꙋ́щемꙋ ве́лїю ми́лость.
Сла́ва, гла́съ є҃:
Вострꙋ́бимъ трꙋбо́ю пѣ́сней, благода́ть бо дх҃а, всѧ́кїѧ трꙋбы̀ благолѣ́пнѣйши, всѣ́хъ къ пѣ́нїю созыва́етъ бг҃оно́снагѡ ѻ҆тца̀: ца́рїе и҆ кнѧ́зи да чꙋдѧ́тсѧ всѣ́хъ цр҃ѧ̀ и҆́скреннемꙋ рабꙋ̀, и҆́же мїроде́ржца нача̑ла и҆ вла̑сти, дх҃а бжⷭ҇твеннагѡ всѣ́ми ѻ҆рꙋ̑жїи побѣди́вшагѡ. па́стырїе и҆ ᲂу҆чи́телїе, и҆зрѧ́днаго вои́стиннꙋ пра́вила же и҆ ѻ҆́браза па́ствѣ, да восхва́лѧтъ, и҆́же въ повелѣ́нїихъ свѣ́тлаго, и҆ въ вѣ́рѣ до́блѧго, и҆́же въ видѣ́нїихъ высо́каго, въ дѣѧ́нїихъ вы́ше ѻ҆́блакъ, во ᲂу҆че́нїихъ пи́щꙋ пото́ка, наста́вника заблꙋ́ждшымъ, подпо́рꙋ преклонє́ннымъ, всѣ́хъ болѧ́щихъ ми́лꙋющаго, а҆ѳѡ́нꙋ вели́кое ᲂу҆краше́нїе, похвалѧ́юще всѝ рце́мъ: ѻ҆тцє́мъ верхо́вне а҆ѳана́сїе, предста́ни твои̑мъ рабѡ́мъ всегда̀, ѻ҆́ч҃е на́шъ, и҆ спасѝ ста́до твоѐ моли́твами твои́ми.
И҆ ны́нѣ, бг҃оро́диченъ, гла́съ то́йже:
Вострꙋ́бимъ трꙋбо́ю пѣ́сней: прекло́ншибосѧ свы́ше всецр҃и́ца мт҃и дв҃а, бл҃гослове́ньми вѣнчава́етъ воспѣва́ющихъ ю҆̀. царѝ и҆ кнѧ́зи да стекꙋ́тсѧ, и҆ цр҃и́цѣ да воспле́щꙋтъ въ пѣ́снехъ, цр҃ѧ̀ ро́ждшей, сме́ртїю ѡ҆держи̑мыѧ пе́рвѣе, разрѣши́ти чл҃вѣколю́бнѡ благоизво́лившаго: па́стыри и҆ ᲂу҆чи́тели, до́брагѡ па́стырѧ пречⷭ҇тꙋю мт҃рь, соше́дшесѧ восхва́лимъ, свѣ́щникъ златоза́рный, свѣтоно́сный ѻ҆́блакъ, нб҃съ простра́ннѣйшꙋ, ѡ҆дꙋшевле́нный же кївѡ́тъ, ѻ҆гнезра́чный влⷣченъ прⷭ҇то́лъ, маннопрїе́мнꙋю златꙋ́ю ста́мнꙋ, затворе́ннꙋю сло́ва две́рь, всѣ́хъ хрⷭ҇тїа́нъ прибѣ́жище, пѣ́сньми бг҃огла́сными похвалѧ́юще, си́це рце́мъ: пала́то сло́ва, сподо́би смире́нныхъ на́съ небе́снагѡ црⷭ҇твїѧ, ничто́же бо невозмо́жно хода́тайствꙋ твоемꙋ̀.
На стїхо́внѣ, гла́съ є҃. Подо́бенъ: Ра́дꙋйсѧ:
Ра́дꙋйсѧ, а҆́гг҃льскимъ бесѣ́дꙋѧ ликостоѧ́нїємъ, а҆ѳана́сїе прпⷣбне: житїе́ бо сїѐ, ѻ҆́ч҃е, на землѝ вои́стиннꙋ, добродѣ́тель ᲂу҆держа́въ, пожи́лъ є҆сѝ: показа́лсѧ є҆сѝ чистоты̀ нескве́рное зерца́ло, лꙋчеза̑рныѧ мѡ́лнїи воспрїе́млѧ дх҃а ст҃а́гѡ, всесла́вне. ѿѻнꙋ́дꙋже ѡ҆зарѧ́емь, зрѣ́лъ є҆сѝ бꙋ̑дꙋщаѧ, всѧ̑ предглаго́лѧ, ѿ бжⷭ҇твеннагѡ свѣтоѧвле́нїѧ наꙋча́емь хрⷭ҇то́ва: є҆го́же молѝ дꙋша́мъ на́шымъ пода́ти ве́лїю ми́лость.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
Ра́дꙋйсѧ, по́стникѡвъ нача́льникъ бы́въ, и҆ непобѣди́мь побо́рникъ: страсте́й бо ѿсѣка́ѧ ко́рень, и҆ бѣсѡ́въ стремлє́нїѧ, предста́въ мꙋ́жески, а҆ѳана́сїе, тѣ́хъ посрами́лъ є҆сѝ дꙋшепа́гꙋбнꙋю пре́лесть. крⷭ҇та́ же сп҃сова дѣ́йство, и҆ непобѣди́мꙋю ꙗ҆ви́лъ є҆сѝ си́лꙋ, є҆́юже и҆ препоѧ́савсѧ, побѣди́лъ є҆сѝ всѧ̑ ѿмета́ющыѧ бж҃їе плотско́е ꙗ҆вле́нїе хрⷭ҇то́во: є҆го́же молѝ дарова́ти дꙋша́мъ на́шымъ ве́лїю ми́лость.
Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Сто́лпъ свѣтови́дѣнъ, добродѣ́телїю ᲂу҆твержде́нъ, и҆ ѻ҆́блакъ ѡ҆сѣнѧ́ющь, и҆́же во а҆ѳѡ́нѣ, ты̀ ꙗ҆ви́лсѧ є҆сѝ, ѻ҆́ч҃е, къ нб҃сѝ ѿ землѝ бг҃а зрѧ́щихъ предводѧ̀, крⷭ҇тною па́лицею страсте́й и҆скорени́лъ є҆сѝ мо́ре: мы́сленнаго же а҆мали́ка ѿри́нꙋвъ, непреткнове́нный нбⷭ҇ный восхо́дъ ѡ҆брѣ́лъ є҆сѝ, бг҃облаже́нне, и҆ жре́бїй непреминꙋ́ющь, со безпло́тными престо́лꙋ ра́дꙋѧсѧ предстоѧ̀ хрⷭ҇то́вꙋ: є҆го́же молѝ дꙋша́мъ на́шымъ пода́ти ве́лїю ми́лость.
Сла́ва, гла́съ ѕ҃:
Ѻ҆ч҃ескꙋю добро́тꙋ, по́стникѡвъ ᲂу҆краше́нїе, и҆сто́чника чꙋде́съ, и҆ къ бг҃ꙋ моли́твенника непосты́дна, сте́кшесѧ, ѽ празднолю́бцы, пѣ́сненными похвала́ми воспое́мъ, глаго́люще: ра́дꙋйсѧ, мона́шескагѡ житїѧ̀ пра́вило, и҆ ѻ҆́бразъ, и҆ печа́ть и҆звѣ́стнаѧ: ра́дꙋйсѧ, свѣти́льниче пресвѣ́тлый, ѡ҆зарѧ́ѧй всѧ́кꙋ добродѣ́тель свѣтлостьмѝ: ра́дꙋйсѧ, и҆́же въ бѣда́хъ вели́кїй ᲂу҆тѣ́шителю, и҆ те́плый застꙋ́пниче печа̑льнымъ. тѣ́мъ ᲂу҆́бѡ, а҆ѳана́сїе, не преста́й молѧ̀ хрⷭ҇та̀ бг҃а ѡ҆ ста́дѣ твое́мъ се́мъ, и҆ всѣ́хъ вѣ́рныхъ, почита́ющихъ всечестно́е твоѐ ᲂу҆спе́нїе.
И҆ ны́нѣ, гла́съ то́йже: Бцⷣе, ты̀ є҆сѝ лоза̀ и҆́стиннаѧ:
Тропа́рь, гла́съ г҃: Є҆́же во пло́ти житїю̀: пи́санъ на ма́лѣй вече́рни.
На ᲂу҆́трени, на Бг҃ъ гдⷭ҇ь, тропа́рь два́жды. Сла́ва, и҆ ны́нѣ, бг҃оро́диченъ: Тѧ̀ хода́тайствовавшꙋю:
По а҃-й стїхоло́гїи сѣда́ленъ, гла́съ а҃.
Подо́бенъ: Гро́бъ тво́й:
Многосвѣ́тлаѧ ѕвѣзда̀ мона́шествꙋющихъ показа́лсѧ є҆сѝ, и҆ степе́нь и҆звѣ́стенъ, воздержа́нїѧ же предѣ́лъ, пресвѣ́тлое зерца́ло разсꙋжде́нїѧ, прпⷣбне, па́мѧть твою̀ ра́достнѡ соверша́ющымъ разрѣше́нїѧ просѝ согрѣше́нїй, преблаже́нне, бг҃ꙋ предстоѧ̀.
Два́жды.
Сла́ва, и҆ ны́нѣ, бг҃оро́диченъ:
Наста́ви на́съ на пꙋ́ть покаѧ́нїѧ, ᲂу҆кло́ншыѧсѧ при́снѡ къ безпꙋ́тїємъ ѕѡ́лъ, и҆ преблага́го прогнѣ́вавшыѧ гдⷭ҇а, неискꙋсобра́чнаѧ бл҃гослове́ннаѧ марі́е, прибѣ́жище ѿча́ѧнныхъ человѣ́кѡвъ, бж҃їе жили́ще.
По в҃-й стїхоло́гїи сѣда́ленъ, гла́съ г҃. Подо́бенъ: Бжⷭ҇твенныѧ вѣ́ры:
Бжⷭ҇твеннымъ жела́нїемъ безсме́ртїѧ, а҆ѳана́сїе, ѡ҆держи́мь, и҆ крⷭ҇тъ на ра́мо взе́мъ, во а҆ѳѡ́нѣ и҆́же дре́вле жела́нїемъ, всели́лсѧ є҆сѝ, и҆дѣ́же, прпⷣбне, гдⷭ҇еви собра́лъ є҆сѝ ста́до. тѣ́мже и҆ моли́твенника тѧ̀ те́пла стѧжа́хомъ ко гдⷭ҇ꙋ.
Два́жды.
Сла́ва, и҆ ны́нѣ, бг҃оро́диченъ:
Бжⷭ҇твеннаѧ ски́нїѧ была̀ є҆сѝ сло́во, є҆ди́на пречⷭ҇таѧ мт҃и дв҃о, чистото́ю а҆́гг҃лы превозше́дшаѧ, па́че всѣ́хъ менѐ пе́рсть бы́вша, ѡ҆скверне́на плотски́ми прегрѣше́ньми, ѡ҆чи́сти моли́твъ твои́хъ бжⷭ҇твенными вода́ми, подаю́щи, чⷭ҇таѧ, ве́лїю ми́лость.
По полѷеле́и сѣда́ленъ, гла́съ и҃. Подо́бенъ: Премꙋ́дрости:
Видѣ́нїе и҆ дѣѧ́нїе воспрїи́мъ, чꙋ̑вствїѧ, прпⷣбне, ᲂу҆краша́ѧ, житїѐ напра́вилъ є҆сѝ къ бжⷭ҇твєннымъ повелѣ́нїємъ: мона́хѡмъ бо ꙗ҆ви́лсѧ є҆сѝ свѣти́льникъ свѣ́телъ, наставлѧ́ѧ и҆ просвѣща́ѧ на́съ къ позна́нїю. тѣ́мже восхвалѧ́юще велича́емъ любо́вїю и҆схо́днꙋю па́мѧть твою̀, бг҃оно́се а҆ѳана́сїе. сегѡ̀ ра́ди вопїе́мъ тѝ: молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Нбⷭ҇нꙋю две́рь и҆ кївѡ́тъ, прест҃ꙋ́ю го́рꙋ, свѣ́тлый ѻ҆́блакъ воспои́мъ, неѡпали́мꙋю кꙋпинꙋ̀, слове́сный ра́й, є҆́ѵы воззва́нїе, вселе́нныѧ всеѧ̀ вели́кое сокро́вище, ꙗ҆́кѡ спасе́нїе въ не́й содѣ́ласѧ мі́рꙋ, и҆ ѡ҆ставле́нїе дре́внихъ согрѣше́нїй. сегѡ̀ ра́ди вопїе́мъ є҆́й: моли́сѧ сн҃ꙋ твоемꙋ̀, прегрѣше́нїй ѡ҆ставле́нїе дарова́ти благоче́стнѡ покланѧ́ющымсѧ всест҃о́мꙋ ржⷭ҇твꙋ̀ твоемꙋ̀.
Та́же степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Є҆ѵⷢ҇лїе матѳе́а, зача́ло м҃г.
По н҃-мъ ѱалмѣ̀ стїхи́ра, гла́съ ѕ҃:
Безсме́ртїѧ тезоимени́таго всѝ восхва́лимъ, во а҆ѳѡ́нѣ мꙋ́жески и҆ до́блественнѣ пости́вшасѧ, и҆́же и҆ ста́до собра̀ сїѐ, и҆ хра́мъ гдⷭ҇еви воздви́же любо́вїю, и҆ мт҃ри бж҃їи возложѝ всѧ̑: є҆́йже и҆ мо́литсѧ ѡ҆ на́съ вѣ́рою соверша́ющихъ па́мѧть є҆гѡ̀.
Канѡ́нъ бцⷣы, на ѕ҃: И҆ ст҃а́гѡ, на и҃. Канѡ́нъ бцⷣы.
Гла́съ и҃. Пѣ́снь а҃. І҆рмо́съ:
Во́дꙋ проше́дъ, ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Мно́гими содержи́мь напа́стьми, къ тебѣ̀ прибѣга́ю спасе́нїѧ и҆скі́й: ѽ мт҃и сло́ва и҆ дв҃о! ѿ тѧ́жкихъ и҆ лю́тыхъ мѧ̀ спасѝ.
Страсте́й мѧ̀ смꙋща́ютъ прило́зи, мно́гагѡ ᲂу҆ны́нїѧ и҆спо́лнити мою̀ дꙋ́шꙋ: ᲂу҆мирѝ, ѻ҆трокови́це, тишино́ю сн҃а и҆ бг҃а твоегѡ̀, всенепоро́чнаѧ.
Сп҃са ро́ждшꙋю тѧ̀ и҆ бг҃а молю̀, дв҃о, и҆зба́витисѧ мѝ лю́тыхъ: къ тебѣ́ бо ны́нѣ прибѣга́ѧ, простира́ю и҆ дꙋ́шꙋ и҆ помышле́нїе.
Недꙋ́гꙋюща тѣ́ломъ и҆ дꙋше́ю, посѣще́нїѧ бжⷭ҇твеннагѡ и҆ промышле́нїѧ ѿ тебє̀ сподо́би, є҆ди́на бг҃ома́ти, ꙗ҆́кѡ бл҃га́ѧ, бл҃га́гѡ же роди́тельнице.
Канѡ́нъ ст҃а́гѡ.
Гла́съ то́йже. Пѣ́снь а҃. І҆рмо́съ:
Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща.
Безсме́ртїѧ бы́въ тезоимени́тъ, житїе́мъ сконча́всѧ, и҆́стиннагѡ ꙗ҆ви́лсѧ є҆сѝ, ѻ҆́ч҃е а҆ѳана́сїе, безсме́ртїѧ прїѧ́телище, преше́дъ ѿ вре́менныхъ: но хрⷭ҇тꙋ̀ предстоѧ̀, помѧнѝ на́съ помина́ющихъ тѧ̀.
Благочести́въ ѿ мѧ́гкихъ бы́въ ногте́й, прпⷣбне, къ добродѣ́тели стѧжа́нїю роди́телей лише́нїе тѧ̀ ника́коже возбранѝ: но всѐ жела́нїе все́ю си́лою, и҆ тща́нїе ѡ҆брати́лъ є҆сѝ къ є҆ди́номꙋ содѣ́телю.
Ѿ ᲂу҆сте́нъ скве́рныхъ хвалꙋ̀ дерзнꙋ́въ пою̀ тебѣ̀, и҆́же ѡ҆ тебѣ̀ жела́нїѧ прїе́мникъ бы́въ, и҆ любвѐ сою́зникъ: но, ѻ҆́ч҃е, ми́лостивъ бꙋ́ди, и҆ да́ждь по достоѧ́нїю тебѣ̀ сїю̀ принестѝ хвалꙋ̀.
Бг҃оро́диченъ:
Мла́до ѻ҆троча̀ па́че сло́ва родила̀ є҆сѝ, ве́тхаго де́ньми, но́вꙋ на землѝ стезю̀ добродѣ́тели показа́вша: є҆гѡ́же ᲂу҆го́дникъ тво́й при́сный а҆ѳана́сїй, ѻ҆трокови́це, любо́вїю снѣда́емь, се́й хра́мъ тебѣ̀ созда̀.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃. І҆рмо́съ:
Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Предста́тельство и҆ покро́въ жи́зни моеѧ̀ полага́ю тѧ̀, бг҃ороди́тельнице дв҃о, ты́ мѧ ѡ҆кормѝ ко приста́нищꙋ твоемꙋ̀, благи́хъ вино́вна, вѣ́рныхъ ᲂу҆твержде́нїе, є҆ди́на всепѣ́таѧ.
Молю̀, дв҃о, дꙋше́вное смꙋще́нїе, и҆ печа́ли моеѧ̀ бꙋ́рю разори́ти: ты́ бо, бг҃оневѣ́стнаѧ, нача́льника тишины̀ хрⷭ҇та̀ родила̀ є҆сѝ, є҆ди́на пречⷭ҇таѧ.
Бл҃годѣ́телѧ ро́ждши, до́брыхъ вино́внаго, благодѣѧ́нїѧ бога́тство всѣ̑мъ и҆сточѝ: всѧ̑ бо мо́жеши, ꙗ҆́кѡ си́льнаго въ крѣ́пости хрⷭ҇та̀ ро́ждши, бг҃облаже́ннаѧ.
Лю́тыми недꙋ́ги и҆ болѣ́зненными страстьмѝ и҆стѧза́емꙋ, дв҃о, ты́ ми помозѝ: и҆сцѣле́нїй бо неѡскꙋ́дное тѧ̀ зна́ю сокро́вище, пренепоро́чнаѧ, неиждива́емое.
И҆́нъ. І҆рмо́съ:
Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ. ꙗ҆́кѡ нѣ́сть свѧ́тъ па́че тебє̀, є҆ди́не чл҃вѣколю́бче.
Ѡ҆ дѣ́тства ᲂу҆жѐ къ бг҃ꙋ любо́вїю взѧ́тъ, свє́рстныѧ ѿ дѣте́й собира́ѧ, и҆ ли́къ составлѧ́ѧ, дꙋхо́внѡ вчита́лъ є҆сѝ, дѣ̑тскїѧ, премꙋ́дре, си́хъ ѻ҆бы̑чаи и҆зима́ѧ.
Премꙋ́дрости жела́нїемъ преше́дъ, ко благоразꙋ́мномꙋ гра́дꙋ кѡнстанті́ню, бг҃омꙋ́дре, доше́лъ є҆сѝ, ꙗ҆́коже пчела̀ мꙋ́драѧ, и҆ любодѣ́льнѡ чи̑стаѧ ѿ слове́съ совокꙋ́пль, неполє́знаѧ ѡ҆ста́вилъ є҆сѝ.
Вѣ́триломъ, ѻ҆́ч҃е, крⷭ҇та̀, дꙋше́вный тво́й кора́бль ѡ҆корми́въ, благоꙋти́шнѡ же и҆ легкѡ̀ жите́йскагѡ лю́тагѡ потопле́нїѧ и҆збѣ́глъ є҆сѝ, и҆ къ тишинѣ̀ бжⷭ҇твенныхъ и҆звле́клъ є҆сѝ приста́нищъ, ра́дꙋѧсѧ.
Бг҃оро́диченъ:
И҆́же пре́жде вѣ̑къ рожде́йсѧ ѿ ѻ҆ц҃а̀ неизрече́ннѡ, напослѣ́докъ и҆зъ ᲂу҆тро́бы твоеѧ̀ про́йде, и҆ ѡ҆божѝ на́ше є҆стество̀, мт҃и дв҃о, и҆́же прпⷣбныхъ ли́ки ꙗ҆́вѣ и҆зводѧ́й.
Сѣда́ленъ, гла́съ и҃. Подо́бенъ: Премꙋ́дрости:
Ѿ ю҆́ности всѧ̑ ѡ҆ста́вль житє́йскаѧ, кра̑снаѧ же и҆ лѣ́пѡтнаѧ, ᲂу҆се́рднѡ послѣ́довалъ є҆сѝ зва́вшемꙋ тѧ̀, прпⷣбне, и҆ на ра́мо взѧ́лъ є҆сѝ крⷭ҇тъ гдⷭ҇а твоегѡ̀, въ постѣ́хъ, ѻ҆́ч҃е, тѣ́ло и҆знꙋри́лъ є҆сѝ. тѣ́мъ и҆ па́стырѧ тѧ̀ свои̑мъ ѻ҆вца́мъ до́брѣ ᲂу҆строѧ́етъ всебл҃гі́й гдⷭ҇и, а҆ѳана́сїе блаже́нне: молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ.
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ бжⷭ҇твꙋ̀ твоемꙋ̀.
Пѣ́снь д҃. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.
Страсте́й мои́хъ смꙋще́нїе, ко́рмчїю ро́ждшаѧ гдⷭ҇а, и҆ бꙋ́рю ᲂу҆тишѝ мои́хъ прегрѣше́нїй, бг҃оневѣ́стнаѧ.
Милосе́рдїѧ твоегѡ̀ бе́зднꙋ призыва́ющꙋ пода́ждь мѝ, ꙗ҆́же благосе́рдаго ро́ждшаѧ, и҆ сп҃са всѣ́хъ пою́щихъ тѧ̀.
Наслажда́ющесѧ, пречⷭ҇таѧ, твои́хъ дарова́нїй, благода́рственное воспѣва́емъ пѣ́нїе, вѣ́дꙋще тѧ̀ бг҃ома́терь.
Наде́ждꙋ и҆ ᲂу҆твержде́нїе, и҆ спасе́нїѧ стѣ́нꙋ недви́жимꙋ и҆мꙋ́ще тѧ̀, всепѣ́таѧ, неꙋдо́бства всѧ́кагѡ и҆збавлѧ́емсѧ.
И҆́нъ. І҆рмо́съ:
Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. Тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Оу҆́мъ страсте́й влады́кꙋ творѧ̀, и҆ бжⷭ҇твенными закѡ́ны наставлѧ́емь, и҆ за́повѣдьми бж҃їими ᲂу҆вѣрѧ́емь, младе́нєцъ бесѣ́дѡванїѧ, и҆ скве́рныхъ сѡ́нмища, и҆ плѧса̑нїѧ бѣсѡ́въ, благоче́стнѡ возразѝ, ꙗ҆́кѡ премꙋ́дръ, лꙋ́чшее и҆збира́ѧ.
Прїе́мъ ле́гкое сп҃са и҆́го, и҆ бжⷭ҇твеннымъ стра́хомъ составлѧ́емь, и҆ ѡ҆чи́щъ тѣ́ло и҆ дꙋ́шꙋ, бы́лъ є҆сѝ чистоты̀ и҆ цѣломꙋ́дрїѧ вина̀, и҆ предѣ́лъ воздержа́нїѧ, и҆ печа́ть безстра́стїѧ, и҆ любвѐ ѻ҆́бразъ, а҆ѳана́сїе.
Проше́дъ є҆́же по на́съ, и҆ внѣ́шнее ты̀ наказа́нїе любомꙋ́дрїѧ, прозѧба́тельное и҆ рѣши́тельное, ко́еждо прохожда́лъ є҆сѝ, пра́вдою ѡ҆гражда́емь, мꙋ́дростїю и҆ разсꙋжде́нїемъ, смире́нїемъ и҆ ра́зꙋмомъ, и҆ и҆нѣ́ми кра́сными дарова̑нїи.
Бг҃оро́диченъ:
Плещмѝ херꙋві́мскими стра́шными носи́мь влⷣка, на прⷭ҇то́лѣ ꙗ҆́коже ѻ҆́гненнѣ, въ твою̀, чⷭ҇таѧ, всели́сѧ ᲂу҆тро́бꙋ, и҆ пло́ти прїѧ́тїемъ человѣ́ческое ѡ҆божѝ сꙋщество̀, ꙗ҆́кѡ ᲂу҆чи́тъ и҆зрѧ́дный въ прпⷣбныхъ а҆ѳана́сїй, є҆ди́на всепѣ́таѧ.
Пѣ́снь є҃. І҆рмо́съ:
Просвѣтѝ на́съ повелѣ̑нїи твои́ми, гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ, чл҃вѣколю́бче.
И҆спо́лни, чⷭ҇таѧ, весе́лїѧ се́рдце моѐ, твою̀ нетлѣ́ннꙋю даю́щи ра́дость, весе́лїѧ ро́ждшаѧ вино́внаго.
И҆зба́ви на́съ ѿ бѣ́дъ, бцⷣе чⷭ҇таѧ, вѣ́чное ро́ждши и҆збавле́нїе, и҆ ми́ръ всѧ́къ ᲂу҆́мъ преимꙋ́щїй.
Разрѣшѝ мглꙋ̀ прегрѣше́нїй мои́хъ, бг҃оневѣ́сто, просвѣще́нїемъ твоеѧ̀ свѣ́тлости, свѣ́тъ ро́ждшаѧ бжⷭ҇твенный и҆ превѣ́чный.
И҆сцѣлѝ, чⷭ҇таѧ, дꙋшѝ моеѧ̀ неможе́нїе, посѣще́нїѧ твоегѡ̀ сподо́бльшаѧ, и҆ здра́вїе моли́твами твои́ми пода́ждь мѝ.
И҆́нъ. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Ꙗ҆ви́лсѧ є҆сѝ ꙗ҆́коже магни́тъ, привлачѧ̀ сла́достїю, ѻ҆́ч҃е, слове́съ твои́хъ, къ наказа́нїю и҆ послꙋша́нїю ᲂу҆че́нїемъ, и҆́же рече́ннымъ непреста́ннѡ зрѣ́ти и҆ ви́дѣти честно́е твоѐ и҆ ра́достное лицѐ.
Зако́нѡмъ бж҃е́ствєннымъ послѣ́дꙋѧ, и҆ повелѣ́нїємъ повинꙋ́ѧсѧ сотво́ршагѡ, законополо́жникъ ꙗ҆ви́лсѧ є҆сѝ мона́хѡмъ, и҆ пра́вило и҆звѣ́стнѣйшее, наказа́тель безꙋ̑мнымъ, и҆ наста́вникъ заблꙋ́ждшымъ, и҆ свѣти́льникъ во тмѣ̀, пресла́вне.
Добродѣ́телей ѻ҆рга́нъ, и҆ благодарова́нїй прїѧ́телище дх҃а ст҃а́гѡ сы́й, свѧще́нно и҆ красно̀ жили́ще созда́лъ є҆сѝ, всѧ́ко житїѐ и҆ жи́знь прора́сленнѡ мона́хѡмъ предлага́ѧ.
Бг҃оро́диченъ:
Виті̑йскаѧ не мо́гꙋтъ ᲂу҆ста̀ по достоѧ́нїю тѧ̀ пѣ́ти, всепѣ́таѧ, вы́шшꙋ сꙋ́щꙋ херꙋві̑мъ, и҆ всѧ́кїѧ тва́ри. тѣ́мже съ бжⷭ҇твеннымъ а҆ѳана́сїемъ влⷣкꙋ ѡ҆ всѣ́хъ на́съ помолѝ.
Пѣ́снь ѕ҃. І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Сме́рти и҆ тлѝ ꙗ҆́кѡ спа́слъ є҆́сть, са́мъ сѧ̀ и҆зда́въ сме́рти, тлѣ́нїемъ и҆ сме́ртїю моѐ є҆стество̀ ꙗ҆́то бы́вшее, дв҃о, молѝ гдⷭ҇а и҆ сн҃а твоего̀, врагѡ́въ ѕлодѣ́йствїѧ мѧ̀ и҆зба́вити.
Предста́тельницꙋ тѧ̀ живота̀ вѣ́мъ, и҆ храни́тельницꙋ тве́рдꙋ, дв҃о, и҆ напа́стей рѣша́ющꙋ молвы̑, и҆ нало́ги бѣсѡ́въ ѿгонѧ́ющꙋ: и҆ молю́сѧ всегда̀, ѿ тлѝ страсте́й мои́хъ и҆зба́вити мѧ̀.
Ꙗ҆́кѡ стѣ́нꙋ прибѣ́жища стѧжа́хомъ, и҆ дꙋ́шъ всесоверше́нное спасе́нїе, и҆ простра́нство въ ско́рбехъ, ѻ҆трокови́це, и҆ просвѣще́нїемъ твои́мъ при́снѡ ра́дꙋемсѧ, ѽ влⷣчце! и҆ ны́нѣ на́съ ѿ страсте́й и҆ бѣ́дъ спасѝ.
На ѻ҆дрѣ̀ ны́нѣ немощствꙋ́ѧй лежꙋ̀, и҆ нѣ́сть и҆сцѣле́нїѧ пло́ти мое́й: но бг҃а и҆ сп҃са мі́рꙋ, и҆ и҆зба́вителѧ недꙋ́гѡвъ ро́ждшаѧ, тебѣ̀ молю́сѧ благо́й: ѿ тлѝ недꙋ̑гъ возста́ви мѧ̀.
И҆́нъ. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Оу҆мертви́лъ є҆сѝ плотскі̑ѧ по́хѡти воздержа́нїемъ мно́гимъ: распѧ́лъ є҆сѝ себѐ мі́рꙋ и҆ страсте́мъ, поще́ньми и҆ слеза́ми, моли́твами и҆ пѣ́сньми непреста́нными прилѣплѧ́ѧсѧ бг҃ꙋ.
Мона́шествꙋющихъ наста́вникъ сꙋ́щихъ въ горѣ̀ а҆ѳѡ́нстѣй, и҆ ѻ҆́бразъ начерта́нїе добродѣ́тельныхъ дѣѧ́нїй сы́й, ᲂу҆краси́лъ є҆сѝ ꙗ҆̀же та́мѡ всѧ̑ безсꙋпрꙋ́жныхъ пребыва̑нїѧ.
Сла́докъ, пра́въ и҆ бла́гъ, кро́токъ же и҆ смире́нъ, благопристꙋ́пенъ прибли́жникъ, ми́лостивъ бы́лъ є҆сѝ, ще́дръ и҆ благосе́рдъ, ти́хъ ѻ҆́бразы, хрⷭ҇то́въ подража́тель нра̑вы.
Бг҃оро́диченъ:
Но́въ ꙗ҆́коже мѡѷсе́й ꙗ҆́вльсѧ, ᲂу҆стро́илъ є҆сѝ ꙗ҆́коже дрꙋгꙋ́ю ски́нїю, ѡ҆гра́дꙋ, всече́стне: ю҆́же и҆ превозрасти́лъ є҆сѝ болѣ́зньми и҆ пѡ́ты, и҆ возложи́лъ є҆сѝ мт҃ри бж҃їей.
Конда́къ, гла́съ и҃. Подо́бенъ: Взбра́нной:
Ꙗ҆́кѡ невеще́ственныхъ сꙋще́ствъ зри́телѧ и҆зрѧ́дна, и҆ дѣ́ѧтельна сказа́телѧ всеи́стинна, взыва́етъ тѧ̀ ста́до твоѐ, бг҃оглаго́льниче: не ѡ҆скꙋдѣ́й молѧ̀ ѡ҆ рабѣ́хъ твои́хъ, и҆зба́витисѧ напа́стей и҆ ѡ҆бхожде́нїй, вопїю́щымъ тѝ: ра́дꙋйсѧ, ѻ҆́ч҃е а҆ѳана́сїе.
І҆́косъ:
Свы́ше твоѐ зва́нїе прїе́мъ пресла́внѡ, безсме́ртнꙋю жи́знь наслѣ́довалъ є҆сѝ: съ пло́тїю бо на землѝ безпло́тныхъ житїѐ проше́дъ, бы́лъ є҆сѝ страстьмѝ непрїѧ́тенъ. тѣ́мже тѧ̀ хва́лимъ, ѻ҆́ч҃е: ра́дꙋйсѧ, свѣ́тлаѧ мона́шествꙋющихъ сла́во: ра́дꙋйсѧ, ꙗ҆́сный цѣломꙋ́дрїѧ сто́лпе: ра́дꙋйсѧ, мꙋ́жества ꙗ҆́вѣ сказа́тельное позна́нїе: ра́дꙋйсѧ, премꙋ́драгѡ ра́зꙋма ꙗ҆вле́нїе: ра́дꙋйсѧ, пра́вило равностоѧ́тельное, пра́вды и҆звѣ́стїе: ра́дꙋйсѧ, сло́вомъ соверши́вшꙋ тѝ дѣѧ́нїємъ стремлє́нїѧ: ра́дꙋйсѧ, ᲂу҆́ме наслажда́ѧсѧ мы́слей неизрече́нныхъ: ра́дꙋйсѧ, всю̀ тва́рь благоче́стнѡ ᲂу҆ди́вль: ра́дꙋйсѧ, и҆́мже посрами́шасѧ де́мѡни: ра́дꙋйсѧ, и҆́мже всѧ́ка стра́сть ᲂу҆мертви́сѧ: ра́дꙋйсѧ, и҆сто́чниче живото́чныхъ во́дъ: ра́дꙋйсѧ, спаси́телю вѣ́рнѡ тѝ вопїю́щихъ: ра́дꙋйсѧ, ѻ҆́ч҃е а҆ѳана́сїе.
Пѣ́снь з҃. І҆рмо́съ:
Ѿ і҆ꙋде́и доше́дше ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆ц҃є́въ бж҃е, бл҃гослове́нъ є҆сѝ.
На́ше спасе́нїе ꙗ҆́коже восхотѣ́лъ є҆сѝ, сп҃се, ᲂу҆стро́ити, во ᲂу҆тро́бꙋ дв҃ыѧ всели́лсѧ є҆сѝ, ю҆́же мі́рꙋ предста́тельницꙋ показа́лъ є҆сѝ: ѻ҆тє́цъ на́шихъ бж҃е, бл҃гослове́нъ є҆сѝ.
Воли́телѧ ми́лости, є҆го́же родила̀ є҆сѝ, мт҃и чⷭ҇таѧ, ᲂу҆молѝ, и҆зба́витисѧ ѿ прегрѣше́нїй, и҆ дꙋше́вныхъ скве́рнъ, вѣ́рою зовꙋ́щымъ: ѻ҆тє́цъ на́шихъ бж҃е, бл҃гослове́нъ є҆сѝ.
Сокро́вище спасе́нїѧ, и҆ и҆сто́чникъ нетлѣ́нїѧ, тѧ̀ ро́ждшꙋю и҆ сто́лпъ ᲂу҆твержде́нїѧ, и҆ две́рь покаѧ́нїѧ, зовꙋ́щымъ показа́лъ є҆сѝ: ѻ҆тє́цъ на́шихъ бж҃е, бл҃гослове́нъ є҆сѝ.
Тѣлє́сныѧ сла́бѡсти, и҆ дꙋшє́вныѧ недꙋ́ги, бг҃ороди́тельнице, любо́вїю пристꙋпа́ющихъ къ кро́вꙋ твоемꙋ̀, дв҃о, и҆сцѣли́ти сподо́би, сп҃са хрⷭ҇та̀ на́мъ ро́ждшаѧ.
И҆́нъ. І҆рмо́съ:
Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.
Всю̀ ѡ҆бтечѐ ѿню́дъ тва́рь житїѧ̀ твоегѡ̀ и҆справле́нїй вѣща́нїе, ѻ҆́ч҃е: и҆ въ пресла́внꙋю дости́глъ є҆сѝ высотꙋ̀, бг҃ꙋ тѧ̀ просла́вльшꙋ, и҆ наро́чита всѣ̑мъ сотво́ршꙋ.
Ни́щихъ строи́тель, вдови́цъ предста́тель, промы́сленникъ си́рыхъ, печа́льныхъ ско́раѧ ᲂу҆тѣ́ха, потоплѧ́емыхъ приста́нище, ѡ҆би́димыхъ застꙋпле́нїе бы́лъ є҆сѝ, твоемꙋ̀, ѻ҆́ч҃е, подо́бѧсѧ ᲂу҆чи́телю.
Ѕвѣздꙋ̀ всемі́рнꙋ, и҆ мона́шествꙋющихъ свѣти́ло незаходи́мо, помо́щника въ бѣда́хъ, грѣ́шникѡвъ ве́лїе прибѣ́жище вѣ́дый, хода́таѧ и҆ моли́твенника предлага́ю влⷣцѣ хрⷭ҇тꙋ́ тѧ, всече́стне.
Бг҃оро́диченъ:
Ви́дѣти жела́ѧ тво́й ᲂу҆го́дникъ, твоегѡ̀ сн҃а и҆ бг҃а неизрече́ннꙋю сла́вꙋ, бг҃ороди́тельнице, сегѡ̀ честны́й крⷭ҇тъ на ра́мꙋ взе́мъ, послѣ́дова живонѡ́снымъ є҆гѡ̀ и҆ бжⷭ҇твєннымъ стопа́мъ.
Пѣ́снь и҃. І҆рмо́съ:
Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.
По́мощи, ꙗ҆́же ѿ тебє̀, тре́бꙋющыѧ, не пре́зри, дв҃о, пою́щыѧ и҆ превозносѧ́щыѧ тѧ̀ во вѣ́ки.
Неможе́нїе дꙋшѝ моеѧ̀ и҆сцѣлѧ́еши, и҆ тѣлє́сныѧ болѣ̑зни, дв҃о, да тѧ̀ просла́влю, чⷭ҇таѧ, во вѣ́ки.
И҆сцѣле́нїй бога́тство и҆злива́еши вѣ́рнѡ пою́щымъ тѧ̀, дв҃о, и҆ превозносѧ́щымъ неизрече́нное твоѐ ржⷭ҇тво̀.
Напа́стей ты̀ прило́ги ѿгонѧ́еши, и҆ страсте́й нахо́ды, дв҃о: тѣ́мже тѧ̀ пое́мъ во всѧ̑ вѣ́ки.
И҆́нъ. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Ю҆́ношески побѣжда́ѧ нача̑ла, а҆ѳана́сїе, и҆ вла̑сти тмы̀, вели́къ ᲂу҆чи́тель бы́лъ є҆сѝ, и҆ наста́вникъ спаси́тельный, навѣ́ты и҆ ла̑ѧнїѧ и҆ лє́сти тѣ́хъ ѿкрыва́ѧ, и҆ ста́до твоѐ всегѡ̀ де́мѡнѡвъ ѕлодѣ́йствїѧ невреди́мо соблюда́ѧ.
На землѝ ꙗ҆́кѡ человѣ́къ ходѧ̀, житїѐ на нб҃сѣ́хъ ꙗ҆́кѡ вои́стиннꙋ стѧжа́лъ є҆сѝ, а҆́гг҃лѡмъ собесѣ́дникъ ꙗ҆́вльсѧ, житїѐ и҆ жи́знь соверша́ѧ ѻ҆́нѣхъ, съ ни́миже воспѣва́еши ны́нѣ: свѧще́нницы благослови́те, лю́дїе превозноси́те хрⷭ҇та̀ во вѣ́ки.
Тѧ̀ соше́дшесѧ дне́сь досто́йнѡ хва́лимъ, и҆ моще́й твои́хъ чти́мъ ра́кꙋ, страсте́й и҆збавле́нїе, согрѣше́нїй ѡ҆ставле́нїе, всѧ́кїѧ напа́сти и҆ ѡ҆бстоѧ́нїѧ[[Исправлена опечатка оригинала: ѡ҆стоѧ́нїѧ. Прим. orthlib]] разрѣше́нїе, просѧ́ще моли́твами твои́ми, свѧтꙋ́ю твою̀ па́мѧть вѣ́рнѡ и҆ ра́достнѡ соверша́юще во вѣ́ки.
Бг҃оро́диченъ:
Ꙗ҆́коже и҆лїа̀ пе́рвѣе въ карми́лѣ всели́сѧ, та́кѡ и҆ ты̀ въ горѣ̀ а҆ѳѡ́нстѣй ᲂу҆пражнѧ́ѧсѧ, возжела́лъ є҆сѝ ѻ҆со́бь бы́ти съ бг҃омъ, и҆ бг҃онача́льными ѡ҆зари́всѧ видѣ̑нїи, ᲂу҆го́дникъ ꙗ҆ви́лсѧ є҆сѝ чⷭ҇тѣй бцⷣѣ, вопїѧ̀ є҆́й, ра́дꙋйсѧ, со а҆рха́гг҃ломъ.
Пѣ́снь ѳ҃. І҆рмо́съ:
Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.
То́ка сле́зъ мои́хъ не ѿврати́сѧ, ꙗ҆́же ѿ всѧ́кагѡ лица̀ всѧ́кꙋ сле́зꙋ ѿе́мшаго, дв҃о, хрⷭ҇та̀ ро́ждшаѧ.
Ра́дости моѐ се́рдце и҆спо́лни, дв҃о, ꙗ҆́же ра́дости прїе́мшаѧ и҆сполне́нїе, грѣхо́внꙋю печа́ль потреблѧ́ющи.
Свѣ́та твоегѡ̀ зарѧ́ми просвѣтѝ, дв҃о, мра́къ невѣ́дѣнїѧ ѿгонѧ́щи, благовѣ́рнѡ бцⷣꙋ тѧ̀ и҆сповѣ́дающихъ.
На мѣ́стѣ ѡ҆ѕлобле́нїѧ не́мѡщи смири́вшагѡсѧ, дв҃о, и҆сцѣлѝ, и҆зъ нездра́вїѧ во здра́вїе претворѧ́ющи.
И҆́нъ. І҆рмо́съ:
Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.
Въ чистотѣ̀ и҆ цѣломꙋ́дрїи, и҆ въ чи́стѣ пребыва́нїи, и҆ житїѝ нескве́рненѣ, ꙗ҆́кѡ безпло́тенъ на землѝ пожи́въ, восте́клъ є҆сѝ къ нбⷭ҇нымъ стезѧ́мъ, и҆ со всѣ́ми ра́дꙋешисѧ прпⷣбными и҆ првⷣными, молѧ̀ ѡ҆ всѣ́хъ хрⷭ҇та̀.
Вельмѝ возвели́чилъ є҆сѝ на землѝ твоего̀ влⷣкꙋ, и҆ ᲂу҆́ды твои́ми видѣ́нїемъ и҆ дѣ́телїю, сего̀ просла́вль пресла́внѡ, ꙗ҆ви́лсѧ є҆сѝ взо́ренъ всю́дꙋ, и҆ сла́венъ бы́лъ є҆сѝ, бг҃оно́се: добродѣ́тель бо вѣ́сть вои́стиннꙋ посрами́ти и҆ сꙋпоста́та.
Совокꙋпи́лсѧ є҆сѝ со безпло́тными вѡ́инствы, и҆ преподѡ́бнымъ ликѡ́мъ сочета́лсѧ є҆сѝ, и҆ со и҆збра́нными всѣ́ми ликꙋ́еши, прича́щсѧ и҆́стиннымъ ѡ҆боже́нїемъ, и҆ безсме́ртною, ѻ҆́ч҃е, жи́знїю. съ ни́миже ѡ҆ ста́дѣ твое́мъ непреста́ннѡ твоего̀ влⷣкꙋ молѝ.
Бг҃оро́диченъ:
Хра́мъ ѡ҆свѧще́нъ, вмѣ́стенъ є҆ди́номꙋ ѿ трⷪ҇цы сы́й, хра́мъ тво́й, влⷣчце, ᲂу҆го́дникъ че́стенъ а҆ѳана́сїй воздви́же въ сла́вꙋ твою̀ и҆ че́сть: въ не́мже непреста́ннѡ не преста́й да́рꙋющи по́мощь моли́твами твои́ми.
Свѣти́ленъ.
Ꙗ҆́кѡ и҆здале́ча возсїѧ́лъ є҆сѝ тє́мнымъ, сы́й свѣтоно́сенъ, и҆ мра̑чныѧ страны̑, а҆ѳана́сїе, просвѣти́лъ є҆сѝ твои́хъ добродѣ́телей свѣ́тлостїю: но не преста́й молѧ́сѧ ѡ҆ мі́рѣ гдⷭ҇еви.
Два́жды.
Сла́ва, и҆ ны́нѣ, бг҃оро́диченъ:
Оу҆моле́на бы́вши, всецр҃и́це, мольба́ми твоегѡ̀ честна́гѡ а҆ѳана́сїа, хранѝ ста́до твоѐ неприкоснове́ннѡ всѧ́кагѡ сꙋпроти́вства, всегда́ тѧ молѧ́щее предста́тельницꙋ мі́ра.
На хвали́техъ стїхи̑ры на д҃, гла́съ и҃. Поⷣ: Ѽ пресла́внагѡ чꙋдесѐ:
Честна̀ вои́стиннꙋ сме́рть ꙳ твоегѡ̀ прпⷣбнагѡ, хрⷭ҇тѐ, ꙳ предъ тобо́ю бы́сть. ꙳ се́ бо и҆сточѝ ѿ ногѝ ᲂу҆го́дникъ тво́й ꙳ и҆сто́чникъ кро́ве, ꙳ и҆ по сме́рти всѧ́къ недꙋ́гъ ѿгонѧ́щь, ꙳ и҆ прогонѧ́щь лꙋка́вствїѧ дꙋ́хи, ꙳ на нѧ́же є҆щѐ жи́въ ꙳ сопроти́въ ѡ҆полчи́сѧ да́же и҆ до кро́ве.
Два́жды.
И҆сто́чникъ чꙋде́съ показа̀, ꙳ и҆ рѣкꙋ̀ дарова́нїй, ꙳ ра́кꙋ моще́й твои́хъ человѣ́кѡмъ гдⷭ҇ь, ꙳ а҆ѳана́сїе премꙋ́дре: ꙳ слѣпы̑мъ є҆́же ви́дѣти сїѧ̑ дарова́сѧ, прокажє́ннымъ ѡ҆чище́нїе, ꙳ ѡ҆держи̑мыѧ нечи́стыми дꙋ̑хи ꙳ ѿ тѣ́хъ вла́сти и҆збавлѧ́етъ, ꙳ и҆ цѣломꙋ́дрити твори́тъ.
Ра́дꙋйсѧ, по́стникѡвъ свѣти́ло, ꙳ мона́шествꙋющихъ ѕвѣздо̀, ꙳ па́стырей похвало̀, ѻ҆́ч҃е а҆ѳана́сїе, ꙳ прпⷣбныхъ совсе́льниче: ꙳ ра́дꙋйсѧ, трⷪ҇цы жили́ще: ꙳ ра́дꙋйсѧ, любвѐ и҆ цѣломꙋ́дрїѧ и҆сто́чниче: ꙳ ра́дꙋйсѧ, пресвѣ́тлый свѣти́льниче разсꙋжде́нїѧ: ꙳ ра́дꙋйсѧ, пра́вило добродѣ́телей пра́вое, ꙳ и҆ сто́лпе ѡ҆дꙋшевле́нный.
Сла́ва, гла́съ и҃:
Мона́хѡвъ мно́жества наста́вника тѧ̀ почита́емъ, ѻ҆́ч҃е на́шъ а҆ѳана́сїе: твое́ю бо стезе́ю вои́стиннꙋ пра́вѡ ходи́ти позна́хомъ. блаже́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, и҆ прпⷣбныхъ соприча́стниче и҆ пра́ведныхъ: съ ни́миже моли́сѧ гдⷭ҇еви поми́ловатисѧ дꙋша́мъ на́шымъ.
И҆ ны́нѣ, бг҃оро́диченъ: Влⷣчце, прїимѝ моли̑твы ра̑бъ твои́хъ:
Славосло́вїе вели́кое. И҆ ѿпꙋ́стъ.
На лїтꙋргі́и: Бл҃жє́нна ѿ канѡ́на ст҃а́гѡ, пѣ́снь г҃-ѧ и҆ ѕ҃-ѧ. Прокі́менъ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇лъ къ гала́тѡмъ, зача́ло сг҃ї. А҆ллилꙋ́їа, гла́съ ѕ҃: Блаже́нъ мꙋ́жъ боѧ́йсѧ гдⷭ҇а: Сті́хъ: Си́льно на землѝ бꙋ́детъ сѣ́мѧ є҆гѡ̀. Є҆ѵⷢ҇лїе лꙋкѝ, зача́ло к҃д. Прича́стенъ: Въ па́мѧть вѣ́чнꙋю:
Слꙋ́жба ѡ҆брѣ́тенїю честны́хъ моще́й прпⷣбнагѡ и҆ бг҃оно́снагѡ ѻ҆тца̀ на́шегѡ се́ргїа и҆гꙋ́мена, ра́донежскагѡ чꙋдотво́рца.
На ма́лѣй вече́рни, стїхи̑ры на д҃, гла́съ а҃: Поⷣ: Нбⷭ҇ныхъ чинѡ́въ:
Нбⷭ҇ныхъ чинѡ́въ ра́дованїе, ꙳ и҆ на землѝ человѣ́кѡвъ весе́лїе, ꙳ въ наста́вшее ны́нѣ торжество̀ ꙳ честна́гѡ ѡ҆брѣ́тенїѧ чꙋдотво́рныхъ моще́й, ꙳ во ѻ҆тцѣ́хъ вели́кагѡ и҆ преподо́бнагѡ се́ргїа, ꙳ тогѡ̀ моли́твами, хрⷭ҇тѐ, спасѝ дꙋ́шы на́шѧ.
И҆́же на нб҃сѝ человѣ́ка бж҃їѧ, ꙳ и҆ на землѝ а҆́гг҃ла сꙋ́ща съ пло́тїю, ꙳ бг҃ꙋ ѿ чре́ва ма́тернѧ ѡ҆свѧще́ннагѡ блаже́ннагѡ се́ргїа ꙳ дне́сь наста̀ ѡ҆брѣ́тенїе чꙋдотво́рныхъ моще́й, ꙳ и҆ созыва́етъ всѐ цр҃ко́вное и҆сполне́нїе, ꙳ возсыла́ти сла́вꙋ хрⷭ҇тꙋ̀ бг҃ꙋ.
Вы́спрь на нб҃сѝ а҆́гг҃ли ра́дꙋютсѧ, ꙳ и҆ ни́зꙋ на землѝ человѣ́цы ликовствꙋ́ютъ ꙳ и҆ цр҃ковь бж҃їѧ ᲂу҆краша́ема весели́тсѧ ꙳ ѡ҆ пресла́вномъ пренесе́нїи честны́хъ моще́й твои́хъ, ꙳ ѻ҆́ч҃е се́ргїе, хрⷭ҇тꙋ̀ вопїю́щи: ꙳ ты́ ми держа́ва, хрⷭ҇тѐ, и҆ ᲂу҆твержде́нїе.
Сла́ва, гла́съ ѕ҃:
Прїиди́те, всѝ концы̀ земні́и ра́дꙋющесѧ, ѱалмы̑ и҆ пѣ́сньми дꙋхо́вными, честно́е пренесе́нїе застꙋ́пника на́шегѡ благоче́стнѣ восхва́лимъ, и҆ ѡ҆бстоѧ́ще честнꙋ́ю є҆гѡ̀ и҆ чꙋдотво́рнꙋю ра́кꙋ, на по́мощь того̀ призыва́емъ, си́це глаго́люще: пребл҃же́нне ѻ҆́ч҃е, се́ргїе, да́рꙋй ѻ҆те́чествꙋ на́шемꙋ и҆ дꙋхо́вномꙋ ста́дꙋ твоемꙋ̀ твои́ми моли́твами посо́бїе на врагѝ, и҆ ѻ҆те́чество ми́ромъ ѡ҆градѝ, и҆ вѡ́ѧ є҆гѡ̀ на сопроти̑вныѧ ᲂу҆крѣпѝ, и҆ спасѝ дꙋ́шы на́шѧ.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
До́мъ дх҃а прест҃а́гѡ ꙳ бы́лъ є҆сѝ, ѻ҆́ч҃е: и҆ на́съ моли́твами твои́ми, ꙳ вселе́нїе покажѝ ст҃ѣ́й трⷪ҇цѣ, бг҃омꙋ́дре се́ргїе и҆ пребога́те.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
Прїиди́те вѣ́рнїи ра́дꙋющесѧ, ꙳ и҆ вни́демъ въ цр҃ковь въ весе́лїи се́рдца, ꙳ ѡ҆блобыза́юще чєстны́ѧ мо́щи се́ргїа бг҃омꙋ́драгѡ, и҆сцѣле́нїе и҆ грѣхѡ́въ проще́нїе прїи́мемъ, ꙳ моли́твами є҆гѡ̀.
Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Прїимѝ пѣ́нїе ꙳ ча̑дъ твои́хъ, се́ргїе ѻ҆́ч҃е, ꙳ и҆ пою́щымъ ѡ҆брѣ́тенїе моще́й твои́хъ, ꙳ и҆ лю́бѧщымъ тѧ̀, ꙳ подава́й є҆́же на по́льзꙋ проше́нїе.
Сла́ва, и҆ ны́нѣ, бг҃оро́диченъ: гла́съ и҆ подо́бенъ то́йже:
Вы́шнїи ли́цы, ꙳ бцⷣе дв҃о, ꙳ пою́тъ съ ни́жними, ꙳ сла́вѧще непреста́ннѡ ꙳ ржⷭ҇тво̀ твоѐ пречи́стое.
Тропа́рь, пи́санъ на вели́цѣй вече́рни.
На вели́цѣй вече́рни, на Гдⷭ҇и, воззва́хъ, стїхи̑ры на и҃, гла́съ д҃.
Подо́бенъ: Зва́нный свы́ше:
Є҆гда̀ пре́жде ржⷭ҇тва̀ твоегѡ̀, ꙳ прїи́де заче́ншаѧ тѧ̀ въ цр҃ковь бж҃їю, ꙳ тогда̀ во чре́вѣ є҆ѧ̀ трикра́ты возгласи́лъ є҆сѝ, ꙳ трⷪ҇цꙋ прославлѧ́ѧ, бг҃омꙋ́дре ѻ҆́ч҃е се́ргїе. ꙳ пре́жде мїрска́гѡ позна́нїѧ бг҃а позна́лъ є҆сѝ, ꙳ па́че же бг҃омъ позна́нъ бы́лъ є҆сѝ, преблаже́нне, ꙳ проѧвлѧ́ѧ всѣ̑мъ хотѧ̑щаѧ бы́ти на тебѣ̀, ꙳ бж҃їѧ благода́ти сїѧ́нїе, ꙳ и҆ свѣтлостьмѝ лица̀ твоегѡ̀, ꙳ показꙋ́ѧ дꙋше́внꙋю и҆ тѣле́снꙋю чистотꙋ̀, ꙳ є҆ѧ́же ра́ди и҆збра́нный сосꙋ́дъ бы́въ хрⷭ҇та̀ бг҃а на́шегѡ: ꙳ є҆го́же молѝ, ꙳ спастѝ и҆ просвѣти́ти дꙋ́шы на́шѧ.
Є҆гда̀ бж҃їе раче́нїе на́йде на тѧ̀, ꙳ бг҃омꙋ́дре и҆ всеблаже́нне ѻ҆́ч҃е се́ргїе, ꙳ тогда̀ всѧ̑ сꙋ̑щаѧ въ мі́рѣ преѡби́дѣлъ є҆сѝ, ꙳ и҆ хрⷭ҇та̀ є҆ди́наго ѿ дꙋшѝ возлюби́въ, и҆ тогѡ̀ живонѡ́снымъ стопа́мъ послѣ́дꙋѧ, ꙳ пꙋсты́ню дости́глъ є҆сѝ: ꙳ и҆ сїю̀ насѣ́ѧвъ сѣ́менемъ трꙋдѡ́въ твои́хъ, ꙳ и҆ напои́въ тꙋ́чами сле́зъ твои́хъ, ꙳ ᲂу҆мно́жилъ є҆сѝ плоды̀ добродѣ́телей: ꙳ и҆ тѣ́ми напита́въ ча̑да, приве́лъ є҆сѝ ѧ҆̀ хрⷭ҇тꙋ̀ бг҃ꙋ. ꙳ є҆го́же молѝ, ꙳ спастѝ и҆ просвѣти́ти дꙋ́шы на́шѧ.
Є҆гда̀ бжⷭ҇твенный гла́съ ᲂу҆слы́шалъ є҆сѝ, бг҃омꙋ́дре, глаго́лющъ тѝ: сѐ пречи́стаѧ грѧде́тъ: ꙳ тогда̀ во мно́зѣ по́двизѣ прилѣ́жнѣ моли́лсѧ є҆сѝ, ꙗ҆́кѡ да сподо́бишисѧ ѻ҆́нагѡ стра́шнагѡ посѣще́нїѧ. ꙳ и҆ а҆́бїе пресвѣ́тлый па́че со́лнца свѣ́тъ ꙳ ѡ҆сїѧ́ тѧ, преподо́бне, ꙳ и҆ влⷣчцꙋ бг҃ома́терь разꙋ́мныма и҆ тѣле́сныма ѻ҆чи́ма ви́дѣти сподо́билсѧ є҆сѝ, ꙳ и҆ тоѧ̀ сла́дкїй гла́съ ᲂу҆ши́ма внꙋши́лъ є҆сѝ рече́нный: ꙳ неѿстꙋ́пна бꙋ́дꙋ ѿ мѣ́ста сегѡ̀, ꙳ и҆ не и҆́мать ѡ҆скꙋдѣ́ти ѻ҆би́тель твоѧ̀: ꙳ ю҆́же молѝ, ꙳ спастѝ и҆ просвѣти́ти дꙋ́шы на́шѧ.
Є҆гда̀ приспѣ̀ вре́мѧ ꙳ є҆́же къ бг҃ꙋ ѿше́ствїѧ твоегѡ̀, ꙳ тогда̀ ꙗ҆́кѡ ѕвѣзда̀ пресвѣ́тлаѧ восте́клъ є҆сѝ въ небє́сныѧ ѻ҆би́тєли, ꙳ и҆ та́мѡ съ ли́ки ст҃ы́хъ престо́лꙋ є҆диносꙋ́щныѧ трⷪ҇цы предстои́ши: ꙳ блаже́нное же и҆ честно́е тѣ́ло твоѐ, ꙳ на мнѡ́га лѣ̑та земле́ю покрове́но бы́вшее, ꙳ ны́нѣ ѿ землѝ и҆зда́вшесѧ чꙋде́съ зарю̀ и҆спꙋща́етъ, ꙳ чтꙋ́щымъ ѡ҆брѣ́тенїе твоѐ, бг҃омꙋ́дре се́ргїе. ꙳ ѻ҆те́чествꙋ на́шемꙋ на сопроти̑вныѧ побѣ̑ды да́рꙋй, ꙳ и҆ всѣ̑мъ вѣ̑рнымъ грѣхѡ́въ проще́нїе и҆спросѝ ᲂу҆ хрⷭ҇та̀ бг҃а на́шегѡ: ꙳ є҆го́же молѝ, ꙳ спастѝ и҆ просвѣти́ти дꙋ́шы на́шѧ.
Сла́ва, гла́съ и҃:
Прїиди́те, всѝ вѣ́рнїи рѡссі́йстїи собо́ри, и҆ наслади́мсѧ ны́нѣшнѧгѡ свѣ́тлагѡ торжества̀, прїиди́те свѧще́нныхъ и҆сполне́нїе, и҆ мона́хѡвъ сосло́вїе, и҆ ви́дите, ка́кѡ цр҃ковь бж҃їѧ ᲂу҆краша́етсѧ, ѱалмы̑ и҆ пѣ́сньми и҆ пѣ́ньми дх҃о́вными и҆сполнѧ́ема: честна́ѧ же и҆ сла́внаѧ ѻ҆би́тель бг҃облаже́ннагѡ ѻ҆тца̀ се́ргїа весе́лїѧ и҆ ра́дости и҆сполнѧ́ема: во ѡ҆брѣ́тенїи честны́хъ моще́й є҆гѡ̀, хва́лѧщисѧ вселе́ннꙋю созыва́етъ ра́достнѡ вопи́ти гдⷭ҇еви: ты̀ дарова́лъ є҆сѝ, влⷣко хрⷭ҇тѐ, ѻ҆те́чествꙋ на́шемꙋ крѣ́пкаго во́ина, и҆ непобѣди́мое ѻ҆рꙋ́жїе на неви̑димыѧ и҆ ви̑димыѧ врагѝ, и҆ хрⷭ҇тоимени̑тымъ лю́демъ сокро́вище неистощи́мо неисчерпа́емыхъ дарова́нїй. тогѡ̀ моли́твами пода́ждь дꙋша́мъ на́шымъ ве́лїю ми́лость.
И҆ ны́нѣ, бг҃оро́диченъ. Вхо́дъ. Чтє́нїѧ.
При́тчей чте́нїе.
[Глава̀ і҃] Па́мѧть пра́веднагѡ съ похвала́ми, и҆ благослове́нїе гдⷭ҇не на главѣ̀ є҆гѡ̀. Блаже́нъ человѣ́къ, и҆́же ѡ҆брѣ́те премꙋ́дрость: и҆ сме́ртенъ, и҆́же ᲂу҆вѣ́дѣ ра́зꙋмъ. [г҃] Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ: все́ же честно́е недосто́йно є҆ѧ̀ є҆́сть. Долгота́ бо дне́й, и҆ лѣ̑та живота̀ въ десни́цѣ є҆ѧ̀: въ шꙋ́ицѣ же є҆ѧ̀ бога́тство и҆ сла́ва: ѿ ᲂу҆́стъ є҆ѧ̀ и҆схо́дитъ пра́вда, зако́нъ же и҆ ми́лость на ѧ҆зы́цѣ но́ситъ. [и҃] Послꙋ́шайте ᲂу҆̀бо менє̀, ѽ ча̑да! честна̑ѧ бо рекꙋ̀: и҆ бл҃же́нъ человѣ́къ, и҆́же пꙋти̑ моѧ̑ сохрани́тъ: и҆схо́ди бо моѝ, и҆схо́ди живота̀, и҆ ᲂу҆готовлѧ́етсѧ хотѣ́нїе ѿ гдⷭ҇а. Сегѡ̀ ра́ди молю̀ ва́съ, и҆ предлага́ю мо́й гла́съ сыновѡ́мъ человѣ́чєскимъ: ꙗ҆́кѡ а҆́зъ премꙋ́дрость ᲂу҆стро́ихъ, совѣ́тъ и҆ ра́зꙋмъ и҆ смы́слъ а҆́зъ призва́хъ. Мо́й совѣ́тъ и҆ ᲂу҆твержде́нїе, мо́й ра́зꙋмъ, моѧ́ же крѣ́пость. А҆́зъ менѐ лю́бѧщыѧ люблю̀, и҆́щꙋщїи же менѐ ѡ҆брѧ́щꙋтъ бл҃года́ть. Разꙋмѣ́йте ᲂу҆́бѡ, неѕло́бивїи, кова́рство, ненака́заннїи же, прилага́йте сердца̀. Послꙋ́шайте менє̀ и҆ па́ки, честна̑ѧ бо рекꙋ̀: и҆ ѿве́рзꙋ ѿ ᲂу҆сте́нъ пра̑ваѧ, ꙗ҆́кѡ и҆́стинѣ поꙋчи́тсѧ горта́нь мо́й, мє́рзски же предо мно́ю ᲂу҆стны̀ лжи̑выѧ. Съ пра́вдою всѝ глаго́лы ᲂу҆́стъ мои́хъ: ничто́же въ ни́хъ стро́потно, нижѐ развраще́нно. Всѧ̑ пра̑ва сꙋ́ть разꙋмѣва́ющымъ, и҆ прѡ́ста ѡ҆брѣта́ющымъ ра́зꙋмъ. Наꙋча́ю бо ва́съ и҆́стинѣ, да бꙋ́детъ ѡ҆ гдⷭ҇ѣ наде́жда ва́ша, и҆ и҆спо́лнитесѧ дх҃а.
При́тчей чте́нїе.
[Глава̀ і҃] Оу҆ста̀ првⷣнагѡ ка́плютъ премꙋ́дрость, ѧ҆зы́къ же непра́веднагѡ поги́бнетъ. Оу҆стнѣ̀ мꙋже́й првⷣныхъ ка́плютъ бл҃года̑ти, ᲂу҆ста́ же нечести́выхъ развраща́ютсѧ. [а҃ї] Мѣ̑рила льсти̑ваѧ, ме́рзость предъ гдⷭ҇емъ, вѣ́съ же пра́ведный прїѧ́тенъ є҆мꙋ̀. И҆дѣ́же а҆́ще вни́детъ досажде́нїе, та́мѡ и҆ безче́стїе: ᲂу҆ста́ же смире́нныхъ поꙋча́ютсѧ премꙋ́дрости. Соверше́нїе пра́выхъ наста́витъ и҆̀хъ, и҆ поползнове́нїе ѿрица́ющихсѧ ᲂу҆пасе́тъ и҆̀хъ. не по́льзꙋютъ и҆мѣ̑нїѧ въ де́нь ꙗ҆́рости, пра́вда же и҆зба́витъ ѿ сме́рти. Оу҆́меръ првⷣный, ѡ҆ста́ви раска́ѧнїе: нарꙋ́чна же быва́етъ и҆ посмѣѧ́тельна нечести́выхъ па́гꙋба. Пра́вда непоро́чнагѡ и҆справлѧ́етъ пꙋти̑, въ нече́стїе же па́даетъ непра́вда. Пра́вда мꙋже́й пра́выхъ и҆зба́витъ и҆̀хъ: безсовѣ́тїемъ же плѣнѧ́ютсѧ беззако́ннїи. Сконча́вшꙋсѧ мꙋ́жꙋ пра́веднꙋ, не поги́бнетъ наде́жда: похвала́ же нечести́выхъ поги́бнетъ. Пра́ведникъ ѿ ло́ва ᲂу҆бѣ́гнетъ, въ негѡ́же мѣ́сто предае́тсѧ нечести́вый. Во ᲂу҆стѣ́хъ нечести́выхъ сѣ́ть гра́жданѡмъ, чꙋ́вство же пра́ведныхъ благоспѣ́шное. Во благи́хъ пра́ведныхъ и҆спра́витсѧ гра́дъ, и҆ въ поги́бели нечести́выхъ ра́дованїе. Во бл҃гослове́нїи пра́выхъ возвы́ситсѧ гра́дъ, ᲂу҆сты́ же нечести́выхъ раскопа́етсѧ. Рꙋга́етсѧ гра́жданѡмъ лише́нный ра́зꙋма, мꙋ́жъ же мꙋ́дрый безмо́лвїе во́дитъ.
Премꙋ́дрости соломѡ́ни чте́нїе.
[Глава̀ г҃] Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ: и҆ є҆́же ѿ на́съ ше́ствїе, сокрꙋше́нїе, ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено, и҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.
На лїті́и стїхи̑ры, гла́съ ѕ҃:
Прїиди́те, празднолю́бцы и҆ по́стникѡвъ сосло́вїе, вѣ́рою соше́дшесѧ, и҆́стиннаго по́стника почти́мъ дне́сь се́ргїа, съ весе́лїемъ ше́ствовавшаго по стопа́мъ влⷣки своегѡ̀ ᲂу҆́зкїй пꙋ́ть, и҆ безстра́стнꙋю жи́знь, и҆ вѣ́рою возопїи́мъ: ѽ всеблаже́нне! прпⷣбнымъ сожи́телю, и҆ по́стникѡмъ похвало̀, ѡ҆ на́съ моли́сѧ ко гдⷭ҇ꙋ, поми́ловатисѧ дꙋша́мъ на́шымъ.
Прпⷣбне и҆ бг҃оно́се се́ргїе, любвѐ ра́ди хрⷭ҇то́вы всѧ̑ ѡ҆ста́вилъ є҆сѝ, и҆ въ пꙋсты́ню вше́дъ, ника́коже ᲂу҆боѧ́лсѧ є҆сѝ неви́димыхъ вра̑гъ кова́рствїѧ: а҆́ще бо и҆ мно́гажды прїидо́ша на тѧ̀, скрежета́нїемъ зꙋбны́мъ ꙗ҆́рость показꙋ́юще, ты́ же моли́твами твои́ми, ꙗ҆́кѡ ды́мъ безъ вѣ́сти си́хъ сотвори́лъ є҆сѝ. ѽ непоро́чныѧ твоеѧ̀ дꙋшѝ, и҆ крѣ́пкагѡ терпѣ́нїѧ твоегѡ̀! хрⷭ҇та̀ непреста́ннѡ молѝ спасти́сѧ дꙋша́мъ на́шымъ.
Рѡссі́йскаѧ ᲂу҆́бѡ всеѡсвѧще́ннаѧ, и҆ вели́каѧ цр҃ковь, съ правосла́вными лю́ди, мона́си же и҆ прості́и, є҆ѵⷢ҇льскихъ и҆стѡ́чникъ стрꙋѧ́ми напои́вшесѧ, дꙋхо́внѡ весели́мсѧ, въ наро́читомъ пра́здницѣ, до́брагѡ па́стырѧ и҆ ᲂу҆чи́телѧ, и҆ цѣлє́бныѧ є҆гѡ̀ мо́щи ѡ҆бстоѧ́ще любе́знѡ ѡ҆блобыза́емъ, и҆ си́хъ ꙗ҆́кѡ цвѣ̑ты пѣ́сньми и҆ хвала́ми ᲂу҆вѧзе́мъ, рекꙋ́ще: ра́дꙋйсѧ, се́ргїе блаже́нне, нбⷭ҇ный человѣ́че, земны́й а҆́гг҃ле, и҆ дх҃а ст҃а́гѡ ѻ҆би́тель: ра́дꙋйсѧ, ꙗ҆́кѡ мно́гихъ ко спаси́тельномꙋ пꙋтѝ наста́вилъ є҆сѝ: ра́дꙋйсѧ, во́инствꙋ на́шемꙋ похвала̀ и҆ ᲂу҆твержде́нїе, прпⷣбне се́ргїе бг҃опрїѧ́тне, ѻ҆ч҃ествꙋ твоемꙋ̀ пресвѣ́тлый свѣти́льниче, и҆ моли́твенниче ѡ҆ дꙋша́хъ на́шихъ.
Гла́съ а҃:
Прїиди́те, свѧще́нныхъ собо́ри, и҆ правосла́вныхъ и҆сполне́нїе, прїиди́те мона́хѡвъ совокꙋпле́нїе, и҆ вни́демъ ра́дꙋющесѧ въ цр҃ковь бг҃а на́шегѡ, и҆ чꙋдотво́рнꙋю ра́кꙋ преподо́бнагѡ ѻ҆тца̀ се́ргїа ѡ҆б̾и́мемъ ра́достнѡ, ꙗ҆́кѡ чꙋде́съ сокро́вище неиз̾е́млемо: и҆ чєстны́ѧ є҆гѡ̀ мо́щи любо́вїю лобыза́юще, разли́чныхъ недꙋ̑гъ свободи́мсѧ, и҆ дꙋша́мъ спасе́нїе прїи́мемъ, вопїю́ще є҆мꙋ̀: ѽ всеблаже́нне ѻ҆́ч҃е се́ргїе! молѝ преблага́го бг҃а на́шего, дарова́ти посо́бїе на врагѝ ѻ҆те́чествꙋ на́шемꙋ, и҆ спастѝ дꙋ́шы на́шѧ.
Дне́сь весели́тсѧ нб҃о свы́ше, и҆ землѧ̀ ра́дꙋетсѧ съ человѣ́ки, и҆ да ликовствꙋ́ютъ новоизбра́ннїи рѡссі́йстїи собо́ри, и҆ свѣ́тлѡ торжествꙋ́ютъ мона́шєскаѧ совокꙋплє́нїѧ: ст҃а́ѧ же цр҃ковь бж҃їѧ, и҆ ди́внаѧ въ пра́вдꙋ, ꙗ҆́кѡ пресвѣ́тлыми зарѧ́ми просвѣща́ема, мно́гихъ чꙋде́съ наполнѧ́ющисѧ ѿ честны́хъ и҆ многоцѣле́бныхъ моще́й преподо́бнагѡ ѻ҆тца̀ се́ргїа, всю̀ вселе́ннꙋю созыва́етъ похвали́ти по́двиги є҆гѡ̀. тѣ́мъ всѝ соше́дшесѧ, тогѡ̀ ѡ҆брѣ́тенїе въ пѣ́снехъ и҆ пѣ́нїихъ ве́селѡ пра́зднꙋющїи, воспое́мъ хрⷭ҇та̀ бг҃а на́шего, да пода́стъ на́мъ моли́твами є҆гѡ̀ ми́ръ и҆ ве́лїю ми́лость.
Наста̀ дне́сь свѣ́тлое торжество̀ пренесе́нїѧ моще́й бг҃облаже́ннагѡ ѻ҆ц҃а̀ се́ргїа: прїиди́те, всѝ вѣ́рнїи, це́рковь бж҃їю пѣ́сньми вѣнча́емъ, и҆ въ не́й просла́вимъ въ трⷪ҇цѣ пѣва́емаго хрⷭ҇та̀ бг҃а на́шего, вопїю́ще и҆ глаго́люще: ты̀ дарова́лъ є҆сѝ, влⷣко хрⷭ҇тѐ, твоего̀ ᲂу҆го́дника гра́дꙋ на́шемꙋ москвѣ̀ тве́рдꙋю стѣ́нꙋ, и҆ всѣ̑мъ рѡссі̑йскимъ страна́мъ крѣ́пкаго предста́телѧ показа́лъ є҆сѝ, и҆ хрⷭ҇тоимени̑тымъ лю́демъ такова́го чꙋдесопода́телѧ, и҆ неисцѣ́льныхъ недꙋ̑гъ цѣли́телѧ, и҆ бѣсовѡ́мъ прогони́телѧ, и҆ моли́твенника ѡ҆ дꙋша́хъ на́шихъ.
Сла́ва, гла́съ ѕ҃:
Прїиди́те, мона́шествꙋющихъ мно́жество дне́сь, се́ргїа, благоче́стїѧ подража́телѧ, пѣ́сньми и҆ пѣ́ньми восхва́лимъ, и҆ честнꙋ́ю є҆гѡ̀ и҆ многоцѣле́бнꙋю ра́кꙋ ѡ҆бстоѧ́ще, любе́знѡ ѡ҆блобыза́емъ, глаго́люще: ра́дꙋйсѧ, пресла́вне се́ргїе, ѻ҆те́чествꙋ твоемꙋ̀ пресвѣ́тлый свѣти́льниче: ра́дꙋйсѧ, ꙗ҆́кѡ чи́стѣ чистѣ́йшемꙋ свѣ́тꙋ совокꙋ́пльсѧ: ра́дꙋйсѧ, ꙗ҆́кѡ трⷪ҇цѣ предстои́ши со а҆́гг҃лы, ю҆́же непреста́ннѡ молѝ, дарова́ти дꙋша́мъ на́шымъ ве́лїю ми́лость.
И҆ ны́нѣ, бг҃оро́диченъ:
На стїхо́внѣ стїхи̑ры, гла́съ д҃: Подо́бенъ: Да́лъ є҆сѝ зна́менїе:
Да́лъ є҆сѝ ᲂу҆краше́нїе цр҃кви твое́й, гдⷭ҇и, ꙳ чєстны́ѧ и҆ многоцѣлє́бныѧ мо́щи ꙳ прпⷣбнагѡ се́ргїа твоегѡ̀ ᲂу҆го́дника: ꙳ и҆ ꙗ҆́кѡ ᲂу҆́тварь ца́рскꙋю и҆мꙋ́щи красꙋ́етсѧ, ꙳ и҆ ꙗ҆́кѡ вѣне́цъ пресвѣ́тлый носѧ́щи весели́тсѧ, ꙳ созыва́ющи своѧ̑ ча̑да, и҆̀хже водо́ю и҆ дх҃омъ є҆ѵⷢ҇льски породѝ. ꙳ тѣ́мже твоѐ чл҃вѣколю́бное смотре́нїе сла́вимъ, ꙳ і҆и҃се чл҃вѣколю́бче, ꙳ и҆ сп҃се дꙋ́шъ на́шихъ.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
Да́лъ є҆сѝ держа́вꙋ неѡбори́мꙋ ꙳ ца́рствꙋющемꙋ гра́дꙋ москвѣ̀, гдⷭ҇и, ꙳ и҆ всѣ̑мъ рѡссі̑йскимъ страна́мъ ᲂу҆твержде́нїе: ꙳ честнѣ́й же ѻ҆би́тели твое́й тве́рдое ᲂу҆крѣпле́нїе ꙳ и҆ стѣ́нꙋ непоколеби́мꙋ, цѣльбонѡ́сныѧ и҆ ст҃ы̑ѧ мо́щы ꙳ пребл҃же́ннагѡ се́ргїа твоегѡ̀ рачи́телѧ. ꙳ тѣ́мъ твоѧ̑ чл҃вѣколю̑бныѧ щедрѡ́ты сла́вимъ, ꙳ і҆и҃се всеси́льне, ꙳ и҆ сп҃се дꙋ́шъ на́шихъ.
Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Да́лъ є҆сѝ рѡссі́йскомꙋ ѻ҆те́чествꙋ, гдⷭ҇и, ꙳ тве́рдое защище́нїе, и҆ ѻ҆рꙋ́жїе спасе́нїѧ, ꙳ и҆ во́ємъ є҆гѡ̀ вели́кое на сопроти̑вныѧ ѡ҆долѣ́нїе, ꙳ ст҃и́телємъ же честно́е ᲂу҆краше́нїе, и҆ всѣ̑мъ болѧ́щымъ врачевство̀ безме́здно, ꙳ ст҃ы̑ѧ мо́щи прпⷣбнагѡ и҆ требл҃же́ннагѡ се́ргїа, ꙳ и҆̀хже ны́нѣ ра́достнѡ ѡ҆блобыза́емъ, ꙳ и҆сцѣлє́нїѧ разли̑чнаѧ прїе́млюще, ꙳ твоѐ неизрече́нное милосе́рдїе сла́вимъ, ꙳ і҆и҃се бл҃госе́рде, и҆ сп҃се дꙋ́шъ на́шихъ.
Сла́ва, гла́съ и҃:
Мона́хѡвъ мно́жества наста́вника тѧ̀ почита́емъ, ѻ҆́ч҃е на́шъ се́ргїе: твое́ю бо стезе́ю вои́стиннꙋ пра́вѡ ходи́ти позна́хомъ. блаже́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, прпⷣбныхъ соприча́стниче и҆ пра́ведныхъ: съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ.
И҆ ны́нѣ, бг҃оро́диченъ: Безневѣ́стнаѧ дв҃о:
На благослове́нїи хлѣ́бѡвъ тропа́рь, гла́съ и҃:
Ѿ ю҆́ности воспрїѧ́лъ є҆сѝ хрⷭ҇та̀ въ дꙋшѝ твое́й, преподо́бне, и҆ па́че всегѡ̀ вожделѣ́лъ є҆сѝ мїрска́гѡ мѧте́жа ᲂу҆клони́тисѧ: мꙋ́жески въ пꙋсты́ню всели́лсѧ є҆сѝ, и҆ ча̑да послꙋша́шѧ въ не́й, плоды̀ смире́нїѧ возрасти́лъ є҆сѝ. тѣ́мъ бы́въ трⷪ҇цѣ вселе́нїе, чꙋдесы̀ твои́ми всѣ́хъ просвѣти́лъ є҆сѝ, приходѧ́щихъ къ тебѣ̀ вѣ́рою, и҆ и҆сцѣлє́нїѧ всѣ̑мъ подаѧ̀ ѻ҆би́льнѡ: ѻ҆́ч҃е на́шъ се́ргїе, молѝ хрⷭ҇та̀ бг҃а, да спасе́тъ дꙋ́шы на́шѧ.
На ᲂу҆́трени по а҃-й стїхоло́гїи сѣда́ленъ, гла́съ а҃.
Подо́бенъ: Ка́мени запеча́танꙋ:
Приспѣ̀ дне́сь па́мѧть твоѧ̀, ѻ҆́ч҃е се́ргїе прехва́льне, веселѧ́щи и҆збра́нное твоѐ ста́до: въ ню́же че́стнѡ пра́зднꙋемъ ѡ҆брѣ́тенїе ст҃ы́хъ твои́хъ моще́й, и҆ ра́достнѡ велича́емъ хрⷭ҇та̀ бг҃а, чꙋде́съ благода́ть тебѣ̀ дарова́вшаго, вопїю́ще: сла́ва да́вшемꙋ тѝ крѣ́пость: сла́ва вѣнча́вшемꙋ тѧ̀: сла́ва даю́щемꙋ тобо́ю всѣ̑мъ и҆сцѣле́нїе.
Два́жды.
Сла́ва, и҆ ны́нѣ, бг҃оро́диченъ:
Гаврїи́лꙋ вѣща́вшꙋ тебѣ̀, дв҃о, ра́дꙋйсѧ, со гла́сомъ воплоща́шесѧ всѣ́хъ влⷣка, въ тебѣ̀ ст҃ѣ́мъ кївѡ́тѣ, ꙗ҆́коже речѐ пра́ведный дв҃дъ: ꙗ҆ви́ласѧ є҆сѝ ши́ршаѧ нб҃съ, поноси́вши зижди́телѧ твоего̀. сла́ва все́льшемꙋсѧ въ тѧ̀: сла́ва проше́дшемꙋ и҆зъ тебє̀: сла́ва свободи́вшемꙋ на́съ ржⷭ҇тво́мъ твои́мъ.
По в҃-й стїхоло́гїи сѣда́ленъ, гла́съ а҃. Подо́бенъ: Гро́бъ тво́й:
Вели́кїй па́стырь на́шъ ны́нѣ да похва́литсѧ, мона́шескїй пресвѣ́тлый сто́лпъ да воспое́тсѧ пѣ́сньми, просвѣща́ѧй на́съ чꙋде́съ свѣтлостьмѝ, ѿ пречестны́хъ є҆гѡ̀ моще́й и҆сходѧ́щими, и҆ ꙗ҆́кѡ росода́тельный ѻ҆́блакъ, погаша́ѧй пла́мень страсте́й на́шихъ, и҆ ѡ҆роша́ѧй вѣ́рныхъ ра́зꙋмы, бжⷭ҇твенный се́ргїй.
Два́жды.
Сла́ва, и҆ ны́нѣ, бг҃оро́диченъ:
Оу҆пова́нїе хрⷭ҇тїа́нъ, прест҃а́ѧ дв҃о, є҆го́же родила̀ є҆сѝ бг҃а, па́че ᲂу҆ма́ же и҆ сло́ва, непреста́ннѡ молѝ съ вы́шними си́лами, пода́ти ѡ҆ставле́нїе грѣхѡ́въ на́шихъ всѣ́хъ, и҆ и҆справле́нїе житїѧ̀, вѣ́рою и҆ любо́вїю при́снѡ тѧ̀ сла́вѧщымъ.
По полѷеле́и сѣда́ленъ, гла́съ г҃. Подо́бенъ: Красотѣ̀ дѣ́вства:
Ми́лостивомꙋ хрⷭ҇то́вꙋ ᲂу҆го́дникꙋ, па́стырю на́шемꙋ и҆ ᲂу҆чи́телю, всѝ тебѣ̀ прилѣ́жнѡ мо́лимсѧ, и҆ любо́вїю ѡ҆блобыза́емъ мо́щи твоѧ̑ чєстны́ѧ, и҆ ра́достїю ѿ дꙋшѝ вопїе́мъ: разрꙋшѝ пога́ныхъ нашє́ствїѧ, и҆ покорѝ подъ но́зѣ во́инствꙋ на́шемꙋ, и҆ разорѝ ѻ҆́блакъ страсте́й на́шихъ, и҆ бѣсѡ́вскаѧ мечта̑нїѧ прогонѝ ѿ ста́да ᲂу҆чєни́къ твои́хъ, и҆ всѧ́ческихъ и҆зба́ви и҆скꙋше́нїй любо́вїю тѧ̀ пою́щихъ, се́ргїе прпⷣбне.
Два́жды.
Сла́ва, и҆ ны́нѣ, бг҃оро́диченъ:
Недомы́сленно и҆ непостижи́мо є҆́сть, влⷣчце бг҃ора́дованнаѧ, є҆́же содѣ́ѧнное на тебѣ̀ стра́шное бж҃їе та́инство: и҆́бо неѡб̾име́ннаго заче́нши родила̀ є҆сѝ, пло́тїю ѡ҆бложе́на ѿ пречⷭ҇тыхъ крове́й твои́хъ: є҆го́же всегда̀, чⷭ҇таѧ, ꙗ҆́кѡ сн҃а твоего̀ молѝ, спасти́сѧ дꙋша́мъ на́шымъ.
Степє́нна, а҃-й а҆нтїфѡ́нъ д҃-гѡ гла́са. Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Всѧ́кое дыха́нїе: Є҆ѵⷢ҇лїе матѳе́а, зача́ло м҃г.
По н҃-мъ ѱалмѣ̀ стїхи́ра, гла́съ и҃:
Прпⷣбне ѻ҆́ч҃е, мі́ра красоты̑ и҆ пи̑щи вре́мєнныѧ ѿню́дъ возненави́дѣлъ є҆сѝ, мона́шеское житїѐ па́че возлюби́въ, и҆ а҆́гг҃лѡмъ собесѣ́дникъ бы́ти сподо́билсѧ є҆сѝ, и҆ свѣти́льникъ многосвѣ́тлый рѡссі́йскїѧ землѝ, чꙋдесмѝ ꙗ҆́коже второ́е со́лнце сїѧ́ѧ: но всѣ́хъ на́съ помина́й, соверша́ющихъ свѧще́ннꙋю па́мѧть твою̀. мы́ бо ча̑да твоѧ̑, и҆ ѻ҆́вцы слове́сныхъ твои́хъ ᲂу҆че́нїй, и҆ тѧ̀ на по́мощь призыва́емъ, просѧ́ще тобо́ю прїѧ́ти ми́ръ и҆ ве́лїю ми́лость.
Канѡ́нъ бцⷣы со і҆рмосо́мъ на ѕ҃: И҆ прпⷣбнагѡ се́ргїа на и҃.
Гла́съ д҃. Пѣ́снь а҃. І҆рмо́съ:
Предѣли́въ пꙋчи́нꙋ чермнꙋ́ю бг҃ъ, фараѡ́на погрꙋзи́вый въ не́й, прове́дъ мѡѷсе́а немо́креннѡ въ пꙋсты́ню, и҆ ѡ҆дожди́въ ма́ннꙋ въ снѣ́дь лю́демъ і҆и҃лєвымъ, ꙗ҆́кѡ си́ленъ.
Свѣ́томъ твоегѡ̀ трисо́лнечнагѡ бж҃ества̀, содѣ́телю мо́й, просвѣтѝ помрачє́нныѧ ѻ҆́чи дꙋшѝ моеѧ̀, молю́тисѧ, и҆ ѡ҆чи́сти се́рдце моѐ, да возмогꙋ̀ пѣ́ти ѡ҆брѣ́тенїе честны́хъ моще́й прпⷣбнагѡ се́ргїа твоегѡ̀ рачи́телѧ.
Да́ждь мѝ сло́во, сло́ве бж҃їй, во ѿверзе́нїе ᲂу҆́стъ мои́хъ, и҆ ᲂу҆ѧсни́ ми ѧ҆зы́къ, ми́лостиве, и҆ не помина́й грѣхѡ́въ мои́хъ мно́жества, да твое́ю бл҃года́тїю наставлѧ́емь, возмогꙋ̀ пѣ́ти прпⷣбнаго твоего̀ се́ргїа.
Ꙗ҆́коже во чре́вѣ ма́терни проглаше́нїемъ трⷪ҇цꙋ проповѣ́далъ є҆сѝ, та́кѡ и҆ та̀ просла́ви тѧ̀: ка́кѡ на мнѡ́га лѣ̑та сокровє́ны земле́ю чєстны́ѧ мо́щи твоѧ̑ нетлѣ̑нны ѡ҆брѣто́шасѧ, благоꙋха́нїѧ вкꙋ́пѣ же и҆ чꙋде́съ вѣ́рныхъ и҆сполнѧ́юще.
Бг҃оро́диченъ:
Пречⷭ҇таѧ влⷣчце, нбⷭ҇ныхъ си́лъ превы́шшаѧ, поро́ждшаѧ сп҃са всѣ́хъ содѣ́телѧ, є҆диносꙋ́щна ѻ҆ц҃ꙋ̀ и҆ дх҃ꙋ, да́ждь на́мъ сло́во, препѣ́таѧ, ꙗ҆́кѡ да возмо́жемъ пѣ́ти тѧ̀, сꙋ́щꙋю застꙋ́пницꙋ ро́да на́шегѡ.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃. І҆рмо́съ:
Да не хва́литсѧ мꙋ́дръ хвалѧ́йсѧ, но ѡ҆ се́мъ, є҆́же разꙋмѣва́ти, ꙗ҆́кѡ нѣ́сть свѧ́тъ, ꙗ҆́кѡ бг҃ъ на́шъ, возносѧ́й ро́гъ на́шъ, даѧ́й крѣ́пость царє́мъ на́шымъ.
Крⷭ҇та̀ гдⷭ҇нѧ си́лою ᲂу҆крѣплѧ́ѧсѧ, стра̑сти дꙋшє́вныѧ и҆ плотско́е мꙋдрова́нїе дꙋ́хꙋ покори́лъ є҆сѝ: и҆ сегѡ̀ ра́ди дх҃ꙋ прест҃о́мꙋ прекра́снаѧ ѻ҆би́тель бы́въ, и҆ нераздѣ́льныѧ трⷪ҇цы и҆збра́нно поко́ище.
Житїе́мъ твои́мъ, є҆́же въ мі́рѣ се́мъ, ѻ҆́бразъ бы́въ всѣ̑мъ, ѿ дꙋшѝ хрⷭ҇тꙋ̀ порабо́тившымсѧ, чистото́ю же ꙗ҆́кѡ со́лнце просїѧ́лъ є҆сѝ: и҆ сегѡ̀ ра́ди стокра́тное возда́нїе ѿ рꙋкꙋ̀ вседержи́телѧ прїѧ́лъ є҆сѝ, бг҃омꙋ́дре се́ргїе. тѣ́мже тѧ̀ ра́достнѡ ᲂу҆блажа́емъ.
Прїиди́те, сни́демсѧ въ настоѧ́щее ны́нѣ торжество̀, ᲂу҆́зримъ и҆ ра́дости и҆спо́лнимсѧ, и҆ хрⷭ҇та̀ да просла́вимъ та́кѡ прославлѧ́юща є҆го̀ прославлѧ́ющихъ, и҆ на́мъ стѣ́нꙋ неѡбори́мꙋ и҆ чꙋде́съ пода́телѧ дарова́вшаго, бг҃облаже́ннаго се́ргїа.
Бг҃оро́диченъ:
Бл҃годаре́нїе, вкꙋ́пѣ же и҆ пѣ́нїе, бг҃ома́ти, ра́дꙋѧсѧ прино́симъ тѝ, ꙗ҆́кѡ родила̀ є҆сѝ пло́тїю бг҃а вседержи́телѧ, тве́рдꙋю предста́тельницꙋ тебѐ хрⷭ҇тїа́нѡмъ дарова́вшаго.
Сѣда́ленъ, гла́съ и҃:
Жите́йское мо́ре преплы́лъ є҆сѝ мно́гимъ воздержа́нїемъ, и҆ приста́лъ є҆сѝ въ ти́хое приста́нище, въ нбⷭ҇ныѧ ѻ҆би́тєли, ꙗ҆́кѡ ѕвѣзда̀ свѣтоза́рна сїѧ́еши, и҆ ꙗ҆́кѡ со́лнце незаходи́мое мо́лнїѧми чꙋде́съ твои́хъ вселе́ннꙋю всю̀ просвѣща́еши, и҆ ѡ҆зарѧ́еши стада̀ ᲂу҆чєни́къ твои́хъ: всѣ̑мъ вѣ̑рнымъ да́рꙋеши грѣхѡ́въ проще́нїе, и҆ житїѧ̀ и҆справле́нїе, и҆ є҆́же на сопроти̑вныѧ ѡ҆долѣ́нїе, ꙗ҆́кѡ да ра́достнѡ ѡ҆бстоѧ́ще честнꙋ́ю и҆ многоцѣле́бнꙋю ра́кꙋ, любе́знѡ лобыза́емъ ст҃ы̑ѧ мо́щи твоѧ̑, и҆ ꙗ҆́кѡ ѻ҆тцꙋ̀ чадолюби́вꙋ вопїе́мъ тѝ: бг҃омꙋ́дре и҆ пребл҃же́нне ѻ҆́ч҃е се́ргїе, молѝ ст҃ꙋ́ю трⷪ҇цꙋ, є҆́йже въ житїѝ се́мъ порабо́талъ є҆сѝ, грѣхѡ́въ ѡ҆ставле́нїе дарова́ти чтꙋ́щымъ любо́вїю ѡ҆брѣ́тенїе честны́хъ моще́й твои́хъ.
Два́жды.
Сла́ва, и҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.
Пѣ́снь д҃. І҆рмо́съ:
Нб҃са̀ добродѣ́тель твоѧ̀ покры́ла є҆́сть, и҆ землѧ̀ и҆спо́лнисѧ сла́вы твоеѧ̀, хрⷭ҇тѐ. тѣ́мже вѣ́рнѡ вопїе́мъ: сла́ва си́лѣ твое́й, гдⷭ҇и.
Ѿ ᲂу҆тро́бы мт҃рни бг҃ꙋ прилѣпи́лсѧ є҆сѝ, бл҃же́нне ѻ҆́ч҃е се́ргїе, и҆ зача́ло мꙋ́дрости стра́хъ бж҃їй въ се́рдцы твое́мъ и҆мѣ́лъ є҆сѝ, ко́рень и҆ ѡ҆снова́нїе всѣ́хъ благи́хъ, нищетꙋ̀ дꙋхо́внꙋю возлюби́въ. сегѡ̀ ра́ди влⷣка хрⷭ҇то́съ чꙋдесы̀ ѡ҆богати́лъ тѧ̀ є҆́сть.
Ꙗ҆́кѡ крі́нъ благово́нный, ѿ земны́хъ нѣ́дръ и҆зда́шасѧ чєстны́ѧ мо́щи твоѧ̑, преблаже́нне се́ргїе, и҆ ꙗ҆́кѡ сокро́вище, чꙋде́съ зарю̀ и҆спꙋща́ютъ, веселѧ́ще дꙋхѡ́внаѧ ча̑да твоѧ̑.
Дне́сь ра́дꙋетсѧ ца́рствꙋющїй гра́дъ москва̀, и҆ весе́лїѧ и҆сполнѧ́етсѧ всѧ̀ вселе́ннаѧ: честна́ѧ же ѻ҆би́тель твоѧ̀, бг҃облаже́нне се́ргїе, хва́лѧщисѧ ᲂу҆краша́етсѧ, и҆мѣ́ющи въ себѣ̀ чєстны́ѧ мо́щи твоѧ̑, ꙗ҆́кѡ сокро́вище неѡскꙋ́дное и҆ пречꙋ́дное.
Бг҃оро́диченъ:
Дв҃о гдⷭ҇оимени́таѧ, и҆ цр҃и́це всеѧ̀ тва́ри, мно́гими прⷪ҇рѡ́ки пронарече́ннаѧ ро́ждшаѧ цр҃ѧ̀ нбⷭ҇ныхъ си́лъ, да́ждь, гпⷭ҇жѐ, побѣ́дꙋ на врагѝ во́инствꙋ на́шемꙋ, и҆ црⷭ҇твїѧ нбⷭ҇нагѡ всѣ́хъ на́съ сподо́би моли́твами твои́ми.
Пѣ́снь є҃. І҆рмо́съ:
Ча́сть моѧ̀ є҆сѝ, гдⷭ҇и, и҆ сла́ва лица̀ моегѡ̀: ты́ бо мѧ̀ и҆зъ тмы̀ невѣ́дѣнїѧ є҆ди́нъ и҆зба́вилъ є҆сѝ бг҃оразꙋ́мїемъ. и҆ тебѣ̀ молю́сѧ, хрⷭ҇тѐ. да́рꙋй рабꙋ̀ твоемꙋ̀ ми́ръ, ꙗ҆́кѡ чл҃вѣколю́бецъ.
Ꙗ҆́же въ трⷪ҇цѣ бг҃а на́шегѡ ст҃а́ѧ цр҃ковь и҆ ди́внаѧ впра́вдꙋ, свѣ́тлѡ красꙋ́етсѧ: всенаро́дное мно́жество дꙋхо́внѣ ра́дꙋетсѧ, зрѧ́ще тѧ̀, бг҃омꙋ́дре се́ргїе, рꙋка́ма а҆рхїере́а бж҃їѧ че́стнѡ взе́млема, и҆ на плещꙋ̀ свѧще́нныхъ носи́ма.
Посѣще́нїѧ ра́ди бг҃ома́тере ра́дости и҆спо́лнивсѧ, свѣ́тъ бы́лъ є҆сѝ ста́дꙋ твоемꙋ̀, и҆ наста́вникъ но́вомꙋ і҆и҃лю, преводѧ̀ на́съ, ѻ҆́ч҃е, ѿ землѝ къ нбⷭ҇нымъ ѻ҆би́телемъ, и҆дѣ́же ны́нѣ наслажда́ешисѧ неизрече́нныѧ свѣ́тлости.
Ма́тернѧ ᲂу҆тро́ба ѡ҆свѧти́сѧ честны́мъ зача́тїемъ твои́мъ, сла́вный же гра́дъ росто́въ просвѣти́сѧ рождество́мъ твои́мъ: вели́каѧ же твоѧ̀ и҆ многосла́внаѧ ѻ҆би́тель просла́висѧ пѡ́двиги твои́ми, всѧ́ же вселе́ннаѧ напо́лнисѧ чꙋде́съ твои́хъ, прпⷣбне ѻ҆́ч҃е се́ргїе.
Бг҃оро́диченъ:
Мт҃и бж҃їѧ пречⷭ҇таѧ, тве́рдаѧ застꙋ́пнице на тѧ̀ надѣ́ющымсѧ, покро́ве и҆ стра́жъ гра́дꙋ на́шемꙋ, и҆ неѡбори́маѧ стѣно̀ свѧтѣ́й ѻ҆би́тели се́й, и҆ ѻ҆рꙋ́жїе спасе́нїѧ ѻ҆те́чествꙋ на́шемꙋ, спасѝ всѣ́хъ благоче́стнѡ покланѧ́ющихсѧ ст҃о́мꙋ ѻ҆́бразꙋ твоемꙋ̀.
Пѣ́снь ѕ҃. І҆рмо́съ:
Да не погрꙋзи́тъ менє̀ бꙋ́рѧ водна́ѧ, нижѐ пожре́тъ менѐ глꙋбина̀: ѿве́рженъ бо є҆́смь во глꙋбины̑ се́рдца морска́гѡ ѕѡ́лъ мои́хъ. тѣ́мъ зовꙋ̀, ꙗ҆́кѡ і҆ѡ́на: да взы́детъ ѿ тлѝ ѕѡ́лъ живо́тъ мо́й къ тебѣ̀, бж҃е.
Ѿ млада́гѡ во́зраста, ѻ҆́ч҃е се́ргїе, хрⷭ҇та̀ возлюби́въ, и҆ сегѡ̀ живонѡ́снымъ стопа́мъ послѣ́дꙋѧ, мі́ра всегѡ̀ и҆збѣ́глъ є҆сѝ, и҆ дости́глъ є҆сѝ въ незаходи́мый свѣ́тъ ра́зꙋма, и҆дѣ́же ны́нѣ дерзнове́ннѡ ст҃ѣ́й трⷪ҇цѣ предстои́ши: ю҆́же ѡ҆ всѣ́хъ на́съ ᲂу҆молѝ.
Оу҆диви́шасѧ во пло́ти житїю̀ твоемꙋ̀ безпло́тнїи чи́нове, и҆ ᲂу҆страши́шасѧ бѣсѡ́вскаѧ пѡ́лчища ѿ бг҃а да́нныѧ тебѣ̀ на ни́хъ побѣ́ды: мы́ же прославлѧ́емъ тѧ̀, преподо́бне се́ргїе, ѡ҆бстоѧ́ще ра́кꙋ честны́хъ моще́й твои́хъ, и҆ велича́емъ хрⷭ҇та̀, чꙋдесы̀ тѧ̀ просла́вльшаго.
И҆̀же любо́вїю и҆ чи́стою вѣ́рою чтꙋ́щымъ честно́е и҆ сла́вное ѡ҆брѣ́тенїе ст҃ы́хъ моще́й твои́хъ, и҆ пра́зднꙋющымъ свѣ́тлѡ свѧще́ннꙋю па́мѧть твою̀, ѻ҆́ч҃е преблаже́нне се́ргїе, моли́твами твои́ми всѣ̑мъ полє́знаѧ и҆спросѝ.
Бг҃оро́диченъ:
Безъ сѣ́мене во чре́вѣ твое́мъ заче́нши творца̀ всѣ́хъ и҆ сп҃си́телѧ, бг҃ома́ти влⷣчце, и҆ ро́ждши пло́тїю хрⷭ҇та̀ бг҃а: є҆го́же моли́твами твои́ми ми́лостива на́мъ сотворѝ, и҆ да сподо́бимсѧ всѝ ꙗ҆вле́нїѧ є҆гѡ̀ и҆ црⷭ҇твїѧ.
Конда́къ, гла́съ и҃. Подо́бенъ: Взбра́нной:
Дне́сь ꙗ҆́кѡ со́лнце пресвѣ́тло возсїѧ́вше ѿ землѝ чєстны́ѧ мо́щи твоѧ̑, нетлѣ̑нны ѡ҆брѣто́шасѧ, ꙗ҆́кѡ благоꙋха́нный цвѣ́тъ, мно́жествомъ чꙋде́съ сїѧ́юще, и҆ всѣ̑мъ вѣ̑рнымъ и҆сточа́юще разли̑чнаѧ и҆сцѣлє́нїѧ, и҆ веселѧ́ще и҆збра́нное твоѐ ста́до, є҆́же мꙋ́дрѣ собра́въ, до́брѣ па́ствилъ є҆сѝ. ѡ҆ ни́хже и҆ ны́нѣ трⷪ҇цѣ предстои́ши молѧ́сѧ, и҆ во́инствꙋ побѣди́тєльнаѧ на врагѝ дарова́ти, да всѝ вопїе́мъ тѝ: ра́дꙋйсѧ, се́ргїе бг҃омꙋ́дре.
І҆́косъ:
Сꙋ̑щаѧ въ мі́рѣ преѡби́дѣвъ, премі̑рнаѧ и҆ нетлѣ̑ннаѧ селє́нїѧ, ѻ҆́ч҃е бг҃омꙋ́дре, стѧжа́лъ є҆сѝ, и҆ незави́стными дармѝ ѿ вседержи́тельныѧ десни́цы по числꙋ̀ добродѣ́телей ѡ҆богати́всѧ, и҆ вѣнце́мъ по́чести ꙗ҆́кѡ побѣди́тель вѣнча́всѧ, чꙋдесы̀ всѣ́хъ ѡ҆богаща́еши, пою́щихъ тѝ си́це: ра́дꙋйсѧ, бг҃облаже́нне се́ргїе: ра́дꙋйсѧ, и҆́же пре́жде рожде́нїѧ твоегѡ̀ трикра́ты проглаше́нїемъ просла́вивый ст҃ꙋ́ю трⷪ҇цꙋ: ра́дꙋйсѧ, ꙗ҆́кѡ ѿ младе́нства твоегѡ̀ и҆збра́нный сосꙋ́дъ бы́въ прест҃о́мꙋ дх҃ꙋ: ра́дꙋйсѧ, мїрскꙋ́ю красотꙋ̀ и҆ сла́вꙋ ꙗ҆́кѡ ᲂу҆ме́ты вмѣни́лъ є҆сѝ: ра́дꙋйсѧ, ꙗ҆́кѡ всели́выйсѧ въ пꙋсты́ню: ра́дꙋйсѧ, ꙗ҆́кѡ гра́дъ сїю̀ сотвори́лъ є҆сѝ: ра́дꙋйсѧ, ꙗ҆́кѡ въ не́й хра́мъ прече́стенъ въ похвалꙋ̀ ст҃ы́ѧ трⷪ҇цы воздви́гнꙋвый: ра́дꙋйсѧ, ꙗ҆́кѡ сла́внꙋ и҆ превели́кꙋ ѻ҆би́тель въ сла́вꙋ бж҃їю созда́лъ є҆сѝ: ра́дꙋйсѧ, ꙗ҆́кѡ въ не́й мно́жєства мона́шествꙋющихъ собра́въ, гдⷭ҇еви приве́лъ є҆сѝ: ра́дꙋйсѧ, ꙗ҆́кѡ ми́лостивагѡ посѣще́нїѧ бг҃ома́тере сподо́билсѧ є҆сѝ, то́й бо во пло́ти ꙗ҆́кѡ а҆́гг҃лъ послꙋжи́въ: ра́дꙋйсѧ, ꙗ҆́кѡ гдⷭ҇еви мо́лишисѧ ѡ҆ чтꙋ́щихъ ѡ҆брѣ́тенїе честны́хъ моще́й твои́хъ: ра́дꙋйсѧ, наро́дꙋ на́шемꙋ ѻ҆рꙋ́жїе спасе́нїѧ, и҆ побѣди́тель на врагѝ, є҆го́же соблюда́й вы́нꙋ здра́ва и҆ ве́села, да всѝ твоѐ ѡ҆брѣ́тенїе свѣ́тлѡ пра́зднꙋемъ, ра́достнѡ вопїю́ще: ра́дꙋйсѧ, се́ргїе бг҃омꙋ́дре.
Пѣ́снь з҃. І҆рмо́съ:
Не преда́ждь на́съ до конца̀ и҆́мене твоегѡ̀ ра́ди, и҆ не разорѝ завѣ́та твоегѡ̀, и҆ не ѡ҆ста́ви ми́лости твоеѧ̀ ѿ на́съ, гдⷭ҇и бж҃е ѻ҆тє́цъ на́шихъ, препѣ́тый во вѣ́ки.
Бж҃їимъ хране́нїемъ соблюдено̀ бы́сть честно́е тѣ́ло твоѐ, бг҃омꙋ́дре се́ргїе, мно́гими лѣ́ты земле́ю покрове́но цѣ́ло, и҆ ничи́мже вреди́мо и҆зы́де. мы́ же ча̑да твоѧ̑ сїѐ зрѧ́ще, ра́достнѡ вопїе́мъ: бл҃гослове́нъ бг҃ъ ѻ҆тє́цъ на́шихъ.
Весе́лїѧ ри́зою ѡ҆блече́сѧ, ра́дости вѣнце́мъ вѣнча́сѧ честна́ѧ глава̀ твоѧ̀, свѣ́тлѡ вни́де въ небе́сный черто́гъ цр҃ѧ̀ хрⷭ҇та̀, по́честь прїе́млѧ трꙋдѡ́въ твои́хъ, поѧ̀ гдⷭ҇еви: бл҃гослове́нъ бг҃ъ ѻ҆тє́цъ на́шихъ.
Свѣ́тлымъ житїе́мъ твои́мъ сїѧ́ѧ, чꙋ́дне се́ргїе, въ жи́зни се́й, безпло́тныхъ чи́ны дости́глъ є҆сѝ, ны́нѣ же съ ни́ми ликꙋ́еши ᲂу҆ прⷭ҇то́ла всѣ́хъ бг҃а: просѝ грѣхѡ́въ ѡ҆ставле́нїе дарова́ти, соверша́ющымъ любо́вїю па́мѧть ѡ҆брѣ́тенїѧ честны́хъ моще́й твои́хъ.
Бг҃оро́диченъ:
Прострѝ моле́нїе, пречⷭ҇таѧ дв҃о влⷣчце, къ ро́ждшемꙋсѧ и҆зъ тебє̀ бг҃ꙋ на́шемꙋ, и҆ тобо́ю а҆да́ма назда́вшемꙋ, и҆ на́ше є҆стество̀ ѡ҆бнови́вшꙋ, да всѝ вопїе́мъ тѝ: бл҃гослове́нъ, пречⷭ҇таѧ, пло́дъ чре́ва твоегѡ̀.
Пѣ́снь и҃. І҆рмо́съ:
Всѧ́чєскаѧ, влⷣко, премꙋ́дростїю твое́ю соста́вилъ є҆сѝ, земли́ же па́ки ᲂу҆тверди́лъ є҆сѝ, ꙗ҆́коже вѣ́си, дно̀, ѡ҆снова́нїемъ водрꙋзи́вый на вода́хъ безмѣ́рныхъ. тѣ́мъ всѝ вопїе́мъ, воспѣва́юще: благослови́те, дѣла̀ гдⷭ҇нѧ, непреста́ннѡ гдⷭ҇а.
Весели́тсѧ дне́сь цр҃ковь бж҃їѧ, ꙗ҆́кѡ ца́рскою порфѵ́рою ѡ҆дѣва́ющисѧ: честна́ѧ же ѻ҆би́тель твоѧ̀, бг҃облаже́нне ѻ҆́ч҃е се́ргїе, ꙗ҆́кѡ многоцѣ́нно сокро́вище и҆мꙋ́щи честно́е тѣ́ло твоѐ, разли̑чна и҆сцѣлє́нїѧ подава́юще всѣ̑мъ, вѣ́рнѡ пою́щымъ: бл҃гослови́те всѧ̑ дѣла̀ гдⷭ҇нѧ непреста́ннѡ гдⷭ҇а.
Свѣ́томъ небе́снымъ просвѣща́етсѧ хра́мъ бж҃їй, и҆ въ не́мъ благочести́выхъ собо́ри ра́дꙋютсѧ, ви́дѧще тѧ̀, бг҃облаже́нне ѻ҆́ч҃е се́ргїе, а҆рхїере́йскима рꙋка́ма носи́ма и҆ ѿ всѣ́хъ вѣ́рныхъ покланѧ́ема, хрⷭ҇тꙋ̀ вопїю́щихъ, бл҃гослови́те всѧ̑ дѣла̀ гдⷭ҇нѧ непреста́ннѡ гдⷭ҇а.
Съ нбⷭ҇ными вѡ́инствы ны́нѣ трⷪ҇цѣ предстоѧ̀, и҆ съ ли́ки всѣ́хъ ст҃ы́хъ водворѧ́ѧсѧ, вѣ́рнѡ почита́ющымъ па́мѧть твою̀, грѣхѡ́въ проще́нїе и҆спросѝ: и҆ свѣ́тлѡ пра́зднꙋющымъ ѡ҆брѣ́тенїе честны́хъ моще́й твои́хъ, спасе́нїе на́мъ да́рꙋй, да ра́дꙋющесѧ пое́мъ: бл҃гослови́те всѧ̑ дѣла̀ гдⷭ҇нѧ непреста́ннѡ гдⷭ҇а.
Бг҃оро́диченъ:
Превѣ́чный во чре́вѣ твое́мъ, дв҃о чⷭ҇таѧ, зачина́етсѧ, и҆ соверше́нный бг҃ъ, и҆́же и҆зъ тебє̀ неискꙋсобра́чныѧ ѻ҆трокови́цы млⷣнецъ пло́тїю роди́всѧ, соверше́нъ бг҃ъ и҆ человѣ́къ, человѣ̑ки ви́дитсѧ, сопрⷭ҇то́ленъ сы́й ѻ҆ц҃ꙋ̀ и҆ дх҃ꙋ: є҆го́же превозно́симъ во вѣ́ки.
Пѣ́снь ѳ҃. І҆рмо́съ:
Мѡѷсе́й на горѣ̀ неѡпали́мꙋю кꙋпинꙋ̀ ви́дѣ, і҆ѡ́сифъ въ верте́пѣ неизрече́нное ржⷭ҇тво̀ слы́ша, нескве́рнаѧ дв҃о, безмꙋ́жнаѧ мт҃и, пѣ́сньми тѧ̀, бцⷣе, велича́емъ.
Взѧ́тсѧ къ высотѣ̀ нбⷭ҇нѣй добродѣ́тельми, бг҃омꙋ́дре ѻ҆́ч҃е се́ргїе, и҆ въ весе́лїи се́рдца предстои́ши прⷭ҇то́лꙋ ст҃ы́ѧ трⷪ҇цы, не забꙋ́ди ча̑дъ твои́хъ. Соверше́нно здра́вїе и҆ ди́внꙋ побѣ́дꙋ да́рꙋй на врагѝ во́инствꙋ на́шемꙋ, да вси́ тѧ пѣ́сньми непреста́ннѡ велича́емъ.
Пресла́внаѧ па́мѧть твоѧ̀, бг҃оно́се, па́че лꙋ̑чъ со́лнечныхъ, вѣ̑рныѧ просвѣща́етъ, благоче́стнѡ тѧ̀ почита́ющыѧ, и҆ вѣ́рою и҆ любо́вїю покланѧ́ющыѧсѧ ра́цѣ честны́хъ моще́й твои́хъ, и҆ въ пѣ́снехъ пою́щыѧ тѧ̀, бг҃омꙋ́дре се́ргїе.
Рꙋко́ю мое́ю недосто́йною, и҆ любо́вїю серде́чною приноси́мое тебѣ̀ ма́лое моле́нїе, прїимѝ, бг҃облаже́нне ѻ҆́ч҃е се́ргїе, дꙋша́мъ на́шымъ спасе́нїе, и҆ тѣлесє́мъ здра́вїе, и҆ мі́рꙋ ми́ръ моли́твами твои́ми да́рꙋй: да тѧ̀ мно́жае въ пѣ́снехъ велича́емъ.
Бг҃оро́диченъ:
Ѽ дв҃о влⷣчце всепѣ́таѧ, мт҃и хрⷭ҇та̀ бг҃а на́шегѡ! спасѝ всѧ̑ на тѧ̀ надѣ́ющыѧсѧ, и҆ къ твоемꙋ̀ застꙋпле́нїю притека́ющыѧ, и҆ благоче́стнѡ тѧ̀ сꙋ́щꙋю бцⷣꙋ въ пѣ́снехъ велича́ющыѧ.
Свѣти́ленъ. Подо́бенъ: Жєны̀ ᲂу҆слы́шите:
Дне́сь соше́дшесѧ нбⷭ҇наѧ со земны́ми ра́дꙋютсѧ, и҆ вѣ́рныхъ совокꙋплє́нїѧ со свѧще́нными, вкꙋ́пѣ же и҆ мона̑хи, весе́лїѧ дꙋхо́внагѡ и҆ дарѡ́въ чꙋде́съ твои́хъ и҆сполнѧ́ютсѧ, прпⷣбне се́ргїе, въ твоѐ ѡ҆брѣ́тенїе, сла́вѧще гдⷭ҇а.
Два́жды.
Сла́ва, и҆ ны́нѣ, бг҃оро́диченъ:
Премꙋ́дрость ѵ҆поста́снꙋю, сло́во ѻ҆́ч҃ее присносꙋ́щное, врача̀ человѣ́кѡмъ хрⷭ҇та̀ ро́ждшаѧ, дв҃о пречⷭ҇таѧ, ꙗ҆́звы и҆ стрꙋ́пы се́рдца моегѡ̀ и҆сцѣлѝ, лю̑тыѧ и҆ многовре́мєнныѧ, и҆ страстна̑ѧ взыгра̑нїѧ ᲂу҆ти́ши пло́ти моеѧ̀.
На хвали́техъ стїхи̑ры на д҃, гла́съ д҃. Подо́бенъ: Ꙗ҆́кѡ до́блѧ:
Ꙗ҆́кѡ ѕвѣзда̀ многосвѣ́тлаѧ ꙳ хрⷭ҇та̀ сл҃нца незаходи́магѡ, ꙳ зарѧ́ми твои́хъ добродѣ́телей ꙳ всѣ́хъ просвѣща́еши, ꙳ блиста́нїемъ чꙋде́съ всѧ̑ концы̀ ѡ҆зарѧ́еши, ꙳ бг҃облаже́нне и҆ бг҃омꙋ́дре ѻ҆́ч҃е се́ргїе, ꙳ вѣ́рою чтꙋ́щихъ свѧтꙋ́ю па́мѧть твою̀, ꙳ и҆ честно́е ѡ҆брѣ́тенїе моще́й твои́хъ, ꙳ въ пѣ́снехъ свѣ́тлѡ почита́ющихъ.
Два́жды.
Ꙗ҆́кѡ свѣти́льникъ многосвѣ́тлый, ꙳ и҆ болѧ́щымъ вра́чь преизрѧ́дный, ꙳ и҆ мона́шескїй па́стырь доброразсꙋ́дный показа́лсѧ є҆сѝ, ꙳ во́инствꙋ на́шемꙋ ѻ҆рꙋ́жїе спасе́нїѧ, ꙳ и҆ на врагѝ побѣ́да, ꙳ и҆ всеѧ̀ рѡссі́йскїѧ землѝ ᲂу҆добре́нїе, ꙳ и҆ моле́бникъ вѣ́ренъ ѡ҆ всѣ́хъ, ꙳ вѣ́рою и҆́мѧ твоѐ, се́ргїе, призыва́ющихъ, ꙳ и҆ любо́вїю пра́зднꙋющихъ ѡ҆брѣ́тенїе честны́хъ моще́й твои́хъ.
Ꙗ҆́кѡ цвѣ́тъ бл҃гово́ненъ, ꙳ и҆ кади́ло благоꙋха́нїѧ, ꙳ и҆ ꙗ҆́кѡ бжⷭ҇твеннаѧ мѷрополо́жница, ꙳ за́пахъ масте́й твои́хъ ꙳ во всѧ̑ страны̑ и҆спꙋща́еши, ꙳ и҆ мо́лнїѧми чꙋде́съ твои́хъ ꙳ лю́ди хрⷭ҇тоимєни́тыѧ просвѣща́еши, ꙳ вѣ́рою соверша́ющыѧ свѧще́ннꙋю па́мѧть твою̀, ꙳ прпⷣбне и҆ всеблаже́нне се́ргїе.
Сла́ва, гла́съ ѕ҃:
Дне́сь вѣ́рнїи хрⷭ҇тоимени́тїи наро́ди соше́дшесѧ, ра́дости и҆спо́лнимсѧ, и҆ ли́къ соста́вльше, дꙋхо́внѣ пра́зднꙋемъ, во благонаро́читое торжество̀ прпⷣбнагѡ ѻ҆тца̀, во ѱалмѣ́хъ и҆ пѣ́нїихъ хрⷭ҇тꙋ̀ вопїю́ще: ты̀ проѧви́лъ є҆сѝ, влⷣко хрⷭ҇тѐ, послѣ́днемꙋ ро́дꙋ на́шемꙋ, такова́го чꙋде́съ дарова́телѧ, вели́каго застꙋ́пника всеѧ̀ землѝ рѡссі́йскїѧ: но, ѽ прпⷣбне, и҆ бг҃омꙋ́дре ѻ҆́ч҃е се́ргїе! моли́сѧ прилѣ́жнѡ хрⷭ҇тꙋ̀ бг҃ꙋ на́шемꙋ за всѣ́хъ, вѣ́рою и҆ любо́вїю тѧ̀ почита́ющихъ.
И҆ ны́нѣ, бг҃оро́диченъ: Славосло́вїе вели́кое. И҆ ѿпꙋ́стъ.
На лїтꙋргі́и, бл҃жє́нна, ѿ канѡ́на прпⷣбнагѡ пѣ́снь г҃-ѧ и҆ ѕ҃-ѧ. Прокі́менъ, а҆пⷭ҇лъ и҆ а҆ллилꙋ́їа прпⷣбнагѡ. Є҆ѵⷢ҇лїе лꙋкѝ, зача́ло к҃д. Прича́стенъ: Въ па́мѧть вѣ́чнꙋю:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.