← претходни дан | Минеј — Јул | следећи дан →
4 июля: Святителя Андрея, архиепископа Критского. Преподобной Марфы, матери святого Симеона Дивногорца
Мѣ́сѧца тогѡ́же въ д҃-й де́нь.
И҆́же во ст҃ы́хъ ѻ҆тца̀ на́шегѡ а҆ндре́а, а҆рхїепі́скопа кри́тскагѡ і҆ерꙋсалѷмі́та:
И҆ прпⷣбныѧ ма́рѳы, ма́тере ст҃а́гѡ сѷмеѡ́на дивного́рца.
Стїхи̑ры а҆ндре́а трѝ, гла́съ а҃. Подо́бенъ: Нбⷭ҇ныхъ чинѡ́въ:
Вла̑сти зємны́ѧ возненави́дѣвъ тѣлесѐ, ꙳ чи́стымъ нра́вомъ ꙳ и҆ просты́мъ се́рдцемъ, ꙳ гдⷭ҇еви присво́илсѧ є҆сѝ, ꙳ ѻ҆́ч҃е мꙋ́дре,꙳ и҆ бг҃одохнове́ненъ ѻ҆рга́нъ[[Исправлена опечатка. В оригинале ѻ҆гра́нъ. Прим. orthlib]] ᲂу҆тѣ́шителѧ показа́лсѧ є҆сѝ, ꙳ пѣ́нїе на́мъ воспѣ́въ спаси́тельное.
Гдⷭ҇ню мт҃рь ѡ҆брѣ́тъ, ꙳ винꙋ̀ вели́кихъ похва́лъ, ꙳ медото́чными словесы̀ воспѣ́лъ є҆сѝ, а҆ндре́е, ꙳ свѧще́нныхъ а҆пⷭ҇лъ, и҆ мꙋ̑ченикъ же блаже́нныхъ сосло́вїе, ꙳ съ ни́миже на́съ чтꙋ́щихъ тѧ̀ помина́й.
Правосла́вїѧ тѧ̀ сто́лпъ, ѻ҆́ч҃е, зна́емъ, ꙳ ѻ҆́бразъ цѣломꙋ́дрїѧ, ꙳ и҆ кро́тости начерта́нїе, ꙳ и҆ бжⷭ҇твенна пѣснопи́сца, ꙳ хрⷭ҇тѡ́вы цр҃кви просвѣща́юща, ꙳ свѧщеннотаи́нниче а҆ндре́е: ꙳ тѣ́мже твоѐ пра́зднꙋемъ торжество̀.
И҆́ны стїхи̑ры ма́рѳы, трѝ, гла́съ д҃ Подо́бенъ: Ꙗ҆́кѡ до́блѧ:
Къ болѣ́зненномꙋ воздержа́нїю, ꙳ къ мꙋ́жєскимъ боре́нїємъ ꙳ проти́вꙋ врага̀ ѡ҆полче́нїю, ꙳ запе́ншагѡ є҆стество̀ человѣ́кѡвъ, ꙳ ѿлꙋчи́ласѧ є҆сѝ пощє́нїи и҆ слеза́ми, не пощадѣ́вши пло́ти ꙳ любвѐ ра́ди бжⷭ҇твенныѧ. ꙳ тѣ́мже под̾ѧ́ла є҆сѝ бжⷭ҇твєнныѧ по́двиги ꙳ смири́вши ра́зꙋмъ сопротивобо́рца, ꙳ ма́рѳо честна́ѧ и҆ пресла́внаѧ.
Два́жды.
Возгнꙋша́ласѧ є҆сѝ вре́менныхъ, ꙳ и҆ тлѣ́нныхъ любвѐ ѿбѣ́гла є҆сѝ, ꙳ и҆ жре́бїй возжелѣ́ла є҆сѝ нбⷭ҇ный, ꙳ пра́вєднымъ досто́йный вѣ́чнꙋющїй, ꙳ нетлѣ́нный, чи́стаѧ, ꙳ и҆ жи́знь непреста́ннꙋю. ꙳ тѣ́мже вѣ́рою твою̀ свѣ́тлꙋю и҆ свѣтоно́снꙋю соверша́юще па́мѧть, ꙳ пѣ́сньми бжⷭ҇твенными почита́емъ, ма́рѳо сла́внаѧ.
Сла́ва, гла́съ то́йже, самогла́сенъ:
Дꙋхо́вною бл҃года́тїю ѿе́млеши недꙋ́ги, ѿгонѧ́еши дꙋ́хи лꙋка̑выѧ, и҆ цѣли́ши стра̑сти, ма́рѳо всесла́внаѧ, и҆ просвѣща́еши вѣ̑рныѧ блиста̑нїи чꙋде́съ твои́хъ. тѣ́мже дне́сь гла́сы немо́лчными воспѣва́емъ свѣ́тлꙋю и҆ свѣтоно́снꙋю, и҆ досточꙋ́днꙋю па́мѧть твою̀.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ:
А҆́гнца и҆ па́стырѧ тѧ̀ ꙳ на дре́вѣ ꙗ҆́кѡ ви́дѣ, ꙳ а҆́гница ро́ждшаѧ рыда́ше, ꙳ и҆ мт҃рски тѝ вѣща́ше: ꙳ сн҃е возжелѣ́нне, ꙳ ка́кѡ на дре́вѣ крⷭ҇тнѣмъ повѣ́шенъ є҆сѝ, долготерпѣли́ве: ꙳ ка́кѡ рꙋ́цѣ и҆ но́зѣ твоѝ, сло́ве, ꙳ пригвозди́шасѧ ѿ беззако́нныхъ, ꙳ и҆ кро́вь твою̀ и҆злїѧ́лъ є҆сѝ, влⷣко;
На стїхо́внѣ ѻ҆ктѡ́иха. Сла́ва, гла́съ и҃:
Мона́хѡвъ мно́жества наста́вника тѧ̀ почита́емъ, ѻ҆́ч҃е на́шъ а҆ндре́е: твое́ю бо стезе́ю вои́стиннꙋ пра́вѡ ходи́ти позна́хомъ. блаже́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, преподо́бныхъ соприча́стниче и҆ пра́ведныхъ: съ ни́миже моли́сѧ гдⷭ҇еви поми́ловатисѧ дꙋша́мъ на́шымъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Подо́бенъ: Ѽ пресла́внагѡ чꙋдесѐ!
Ю҆́ница нескве́рнаѧ, ꙳ ю҆нца̀ ви́дѧщи на дре́вѣ ꙳ пригвожда́ема во́лею, ꙳ рыда́ющи жа́лостнѣ, ꙳ ᲂу҆вы̀ мнѣ̀, вопїѧ́ше, ꙳ люби́мѣйшее ча́до. ꙳ что́ ти со́нмъ воздадѐ безблагода́тный є҆вре́йскїй, ꙳ хотѧ́ мѧ ѡ҆безча́дствовати ꙳ ѿ тебє̀, вселюбе́зне;
Тропа́рь, гла́съ д҃:
Пра́вило вѣ́ры и҆ ѻ҆́бразъ кро́тости, воздержа́нїѧ ᲂу҆чи́телѧ ꙗ҆ви́ тѧ ста́дꙋ твоемꙋ̀, ꙗ҆́же веще́й и҆́стина. сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ, ѻ҆́ч҃е а҆ндре́е, молѝ хрⷭ҇та̀ бг҃а, спасти́сѧ дꙋша́мъ на́шымъ.
Дрꙋгі́й тропа́рь, гла́съ и҃:
Въ тебѣ̀, ма́ти, и҆звѣ́стнѡ спасе́сѧ, є҆́же по ѻ҆́бразꙋ: прїи́мши бо кре́стъ, послѣ́довала є҆сѝ хрⷭ҇тꙋ̀, и҆ дѣ́ющи ᲂу҆чи́ла є҆сѝ, презира́ти ᲂу҆́бѡ пло́ть, прехо́дитъ бо, прилѣжа́ти же ѡ҆ дꙋшѝ, ве́щи безсме́ртнѣй. тѣ́мже и҆ со а҆́гг҃лы сра́дꙋетсѧ, преподо́бнаѧ ма́рѳо, дх҃ъ тво́й.
Канѡ́нъ є҆ди́нъ ѻ҆ктѡ́иха, и҆ ст҃ы́хъ два̀. Канѡ́нъ ст҃а́гѡ а҆ндре́а, є҆гѡ́же краегране́сїе: Пѣ́сньми воспле́щемъ мꙋ́жескими а҆ндре́а.
Гла́съ є҃. Пѣ́снь а҃. І҆рмо́съ:
Конѧ̀ и҆ вса́дника въ мо́ре чермно́е, сокрꙋша́ѧй бра̑ни мы́шцею высо́кою, хрⷭ҇то́съ и҆стрѧсѐ, і҆и҃лѧ же спасѐ, побѣ́днꙋю пѣ́снь пою́ща.
Со́нъ ѿ вѣ́ждей ѿтрѧ́съ, тебѐ сама́го влⷣцѣ добродѣ́телїю ᲂу҆гото́валъ є҆сѝ свѣ́тлѡ жили́ще, бг҃оѧвле́нне преподо́бне, и҆ бжⷭ҇твенное поко́ище.
Пѣ́нїемъ всесли́чнымъ твою̀ цѣвни́цꙋ движѧ̀, хрⷭ҇то́вꙋ цр҃ковь пѣсносло́вѧ ᲂу҆ѧсни́лъ є҆сѝ, а҆ндре́е чꙋ́дне, ст҃а́гѡ дх҃а ѡ҆глаша́емь бжⷭ҇твенною бл҃года́тїю.
Зако́нꙋ бг҃опи́санномꙋ мꙋ́дрѣ повинꙋ́ѧсѧ, тѣлє́сныѧ стра̑сти по́стнически ᲂу҆мертви́лъ є҆сѝ: ᲂу҆́мъ же возвы́силъ є҆сѝ крѣ́пкимъ твои́мъ жела́нїемъ, поѧ̀ пѣ̑сни бж҃їѧ, всемꙋ́дре.
Бг҃оро́диченъ:
Ве́сь жела́нїе, и҆ пречи́сто наслажде́нїе, сн҃ъ и҆ бг҃ъ тво́й, благи́хъ и҆сполне́нїе є҆́сть, всенепоро́чнаѧ: є҆го́же молѝ и҆зба́вити вѣ́рою ны́нѣ къ тебѣ̀ притека́ющыѧ.
Канѡ́нъ преподо́бныѧ.
Гла́съ и҃. Пѣ́снь а҃. І҆рмо́съ:
И҆стрѧ́сшемꙋ въ мо́ри мꙋчи́тельство фараѡ́не, и҆ і҆и҃лѧ сꙋ́шею наста́вльшемꙋ, пои́мъ хрⷭ҇тꙋ̀, ꙗ҆́кѡ просла́висѧ во вѣ́ки.
Бжⷭ҇твеннымъ жела́нїемъ ᲂу҆ѧ́звена вѣ́чныхъ бла̑гъ, сла́вꙋ тлѣ́ннꙋю и҆ пи́щꙋ преѡби́дѣла є҆сѝ. тѣ́мже и҆ а҆́гг҃льское, преподо́бнаѧ, житїѐ пожила̀ є҆сѝ бжⷭ҇твеннѣ.
Распала́ема бжⷭ҇твеннымъ рве́нїемъ, бг҃омꙋ́жнѡ пожи́вши родила̀ є҆сѝ свѣти́льника вѣ̑рнымъ и҆ забра́ло, втора́го самꙋ́ила, и҆ пꙋсты́ни кра́сное воспита́нїе.
Прозѧбе́нїе ꙗ҆ви́сѧ воздержа́нїѧ, возсїѧ́вши на́мъ со́лнце многосвѣ́тлое, и҆ вели́ка цѣле́бника премꙋ́драго сѷмеѡ́на, и҆ восто́чнѣй странѣ̀ предста́телѧ же и҆ стѣ́нꙋ.
Бг҃оро́диченъ:
Землѝ и҆сча́дїе, бцⷣе, сы́нове бы́вше бж҃їи бл҃года́тїю бжⷭ҇твенною, и҆ неизрече́ннымъ ржⷭ҇тво́мъ твои́мъ, пое́мъ тѧ̀ прилѣ́жнѡ, є҆ди́нꙋ вино́внꙋ сꙋ́щагѡ спасе́нїѧ.
Пѣ́снь г҃. І҆рмо́съ:
Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ, хрⷭ҇тѐ, ка́мени за́повѣдей твои́хъ цр҃ковь твою̀ ᲂу҆твердѝ, є҆ди́не бла́же и҆ чл҃вѣколю́бче.
Оу҆пра́вилъ є҆сѝ добродѣ́телїю житїѐ твоѐ, прпⷣбне, и҆ бжⷭ҇твеннымъ жела́нїемъ бг҃ꙋ соединѧ́ѧсѧ, ѻ҆рга́нъ ꙗ҆ви́лсѧ є҆сѝ слове́сенъ, всю̀ вселе́ннꙋю ᲂу҆ѧснѧ́ѧ пѣ́сньми, бжⷭ҇твєннаѧ сокрѡ́вища почерпа́ѧ.
Премꙋ́дрости нбⷭ҇ныѧ бы́лъ є҆сѝ и҆спо́лненъ: дꙋшє́внаѧ бо ᲂу҆ста̀ разшири́въ, преподо́бне, всю̀ прїѧ́лъ є҆сѝ ꙗ҆́вѣ зарю̀ свѣтоно́снꙋю трисо́лнечныѧ свѣ́тлости, ꙗ҆́кѡ свѧщеннодѣ́йственникъ свѧще́ненъ.
Оу҆тверди́въ дꙋшє́вныѧ си̑лы твоѧ̑, преподо́бне, и҆ пло́ть ᲂу҆держа́въ воздержа́нїемъ, бы́лъ є҆сѝ ве́сь пресвѣ́тлаѧ ѕвѣзда̀, ᲂу҆краша́ѧ цр҃ковь правосла́вными твои́ми ᲂу҆чє́нїи и҆ пѣ́сненными пѣ̑нїи.
Бг҃оро́диченъ:
И҆зба́вити мѧ̀ стра́стнагѡ плѣне́нїѧ, ны́нѣ молю́ тѧ, мт҃и бж҃їѧ всенепоро́чнаѧ, и҆ грѣхѡ́вныѧ ꙗ҆́звы всѧ̑ ѡ҆чи́стити, грѣ́хъ взе́млющаго мі́ра пресла́внѡ ро́ждшаѧ.
И҆́нъ. І҆рмо́съ:
Нѣ́сть свѧ́тъ, ꙗ҆́кѡ гдⷭ҇ь, и҆ нѣ́сть пра́веденъ ꙗ҆́кѡ бг҃ъ на́шъ, є҆го́же пое́тъ всѧ̀ тва́рь: нѣ́сть пра́веденъ па́че тебє̀, гдⷭ҇и.
Пло́дъ прече́стенъ и҆зъ ᲂу҆тро́бы твоеѧ̀ влⷣцѣ прине́сши, же́ртвꙋ соверше́ннꙋ сама̀ себѐ воздержа́нїѧ ѻ҆гне́мъ принесла̀ є҆сѝ, ма́рѳо, пѣсносло́вѧщи є҆го̀.
Же́ртвꙋ благопрїѧ́тнꙋ и҆ присноживо́тнꙋ хрⷭ҇тꙋ̀ твоемꙋ̀ принесла̀ є҆сѝ, прозѧ́бшагѡ и҆зъ ложе́снъ твои́хъ, бг҃оно́сице прпⷣбнаѧ, вѣ́рныхъ ᲂу҆твержде́нїе, и҆ стѣ́нꙋ и҆ забра́ло.
Къ высотѣ̀ нбⷭ҇нѣй впери́ла є҆сѝ дꙋ́шꙋ съ тѣ́ломъ, и҆ была̀ є҆сѝ є҆диножи́тельница мꙋ̑дрымъ дѣ́вамъ, и҆ бжⷭ҇твенное и҆з̾ѡбраже́нїе, вѣ́рою притека́ющымъ къ бг҃ꙋ.
Бг҃оро́диченъ:
На ка́мени, пречⷭ҇таѧ, ᲂу҆пова́нїѧ моегѡ̀ дꙋшѝ моеѧ̀ восхо́ды поло́жь, недви́жимь при́снѡ пребыва́ѧ, хвалю̀ и҆ сла́влю тѧ̀, є҆ди́нꙋ застꙋ́пницꙋ мою̀.
Конда́къ ма́рѳы, гла́съ в҃. Подо́бенъ: Въ моли́твахъ:
Въ моли́твахъ гдⷭ҇еви предстоѧ́щи, пречⷭ҇тѣй дв҃ѣ бцⷣѣ, пѣ́нїе и҆ хвалы̑ приносѧ́щи, ма́рѳо честна́ѧ, породила̀ є҆сѝ свѧще́нное ѻ҆троча̀, сѷмеѡ́на преди́внаго, свѣти́льника всемі́рнаго: съ ни́мже молѝ при́снѡ ѡ҆ всѣ́хъ на́съ.
Та́же сѣда́ленъ а҆ндре́а, гла́съ д҃. Подо́бенъ: Ско́рѡ предварѝ:
Ꙗ҆́кѡ ка́менїемъ, словесы̀ твои́ми, цр҃ко́вный, премꙋ́дре, ᲂу҆краси́въ вѣне́цъ, свѧщеннодѣ́йственникъ свѧще́ненъ, а҆ндре́е, бы́лъ є҆сѝ. тѣ́мже по мно́гихъ въ житїѝ трꙋдѣ́хъ прїѧ́лъ є҆сѝ нестарѣ́емое црⷭ҇тво и҆ сла́вꙋ: въ не́мже помина́ющихъ тѧ̀, ѻ҆́ч҃е, помина́й.
Сла́ва, сѣда́ленъ ма́рѳы, гла́съ то́йже:
Непреста́ннѡ въ моли́твахъ бдѧ́щи, и҆ ми́лостынею бг҃ꙋ ᲂу҆гожда́ющи, въ бжⷭ҇твєнныѧ хра́мы, прехва́льнаѧ, ча́стѡ ходѧ́щи, ма́рѳо, слеза́ми и҆ посто́мъ и҆ вѣ́рою молѧ́щисѧ, прїѧ́ла є҆сѝ свѧще́нно ѻ҆троча̀: съ ни́мже моли́сѧ, спасти́сѧ ѿ бѣ́дъ на́мъ, любо́вїю чтꙋ́щымъ тѧ̀.
И҆ ны́нѣ, бг҃оро́диченъ:
Дв҃о всенепоро́чнаѧ, ꙗ҆́же пресꙋ́щнаго бг҃а ро́ждшаѧ, со безпло́тными того̀ непреста́ннѡ молѝ, ѡ҆ставле́нїе прегрѣше́нїй, и҆ и҆справле́нїе житїѧ̀ да́ти на́мъ пре́жде конца̀, и҆̀же вѣ́рою и҆ любо́вїю пою́щымъ тѧ̀ по до́лгꙋ, є҆ди́на всепѣ́таѧ.
Крⷭ҇тобг҃оро́диченъ:
Дв҃о пренепоро́чнаѧ, мт҃и хрⷭ҇та̀ бг҃а, ѻ҆рꙋ́жїе про́йде твою̀ прест҃ꙋ́ю дꙋ́шꙋ, є҆гда̀ распина́ема ви́дѣла є҆сѝ во́лею сн҃а и҆ бг҃а твоего̀: є҆го́же, бл҃гослове́ннаѧ, молѧ́щи не преста́й, проще́нїе прегрѣше́нїй на́мъ дарова́ти.
Пѣ́снь д҃. І҆рмо́съ:
Бжⷭ҇твенное твоѐ разꙋмѣ́въ и҆стоща́нїе прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во спасе́нїе люде́й твои́хъ, спастѝ пома̑занныѧ твоѧ̑ прише́лъ є҆сѝ.
Сло́во твоѐ житїе́мъ ᲂу҆кра́шено, бг҃осло́вїѧ и҆звѣ́стное пра́вило показа́лсѧ є҆сѝ, чꙋ́дне, препѣ́тыѧ трⷪ҇цы сла́вꙋ сказꙋ́ѧ ꙗ҆́снѡ.
Дѣѧ́нїемъ видѣ́нїѧ восхо́дъ показа́въ, мꙋ́дре, и҆ видѣ́нїемъ ѡ҆б̾е́мсѧ житїѧ̀ ѻ҆́бразомъ, а҆ндре́е бг҃огла́се, ᲂу҆подо́билсѧ є҆сѝ.
Ꙗ҆́кѡ бжⷭ҇твенъ ст҃и́тель, пребога́те, па́стырски побора́ѧ, ѿ цр҃кве ѿгна́лъ є҆сѝ львѡ́въ нашє́ствїѧ, а҆ндре́е, мꙋ́жествꙋ тезоимени́те.
Вели́кꙋ похвала́мъ винꙋ̀ бцⷣꙋ ѡ҆брѣ́тъ, тща́нїе показа́лъ є҆сѝ сꙋгꙋ́бо, превы́шшꙋю похва́лъ хвала́ми многоѻбра́зными почита́ѧ, мꙋ́дре.
Бг҃оро́диченъ:
Кромѣ̀ ᲂу҆́бѡ совокꙋпле́нїѧ зачала̀ є҆сѝ нетлѣ́ннѡ во ᲂу҆тро́бѣ, и҆ пре́жде болѣ́зни родила̀ є҆сѝ, и҆ по ржⷭ҇твѣ̀ дв҃ою, бг҃а пло́тїю ро́ждши, сохрани́ласѧ є҆сѝ.
И҆́нъ. І҆рмо́съ:
И҆зъ горы̀ приѡсѣне́нныѧ, сло́ве, прⷪ҇ро́къ, є҆ди́ныѧ бцⷣы, хотѧ́ща воплоти́тисѧ, бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.
И҆мꙋ́щи хрⷭ҇та̀ при́снѡ во тмѣ̀, любвѐ тлѣ́нныхъ и҆ жела́нїѧ возгнꙋша́ласѧ є҆сѝ. и҆ сегѡ̀ ра́ди дарова́нїѧ сподо́биласѧ є҆сѝ, ма́рѳо, того̀ просла́вльши.
Попали́вши страсте́й, ма́рѳо, треволне́нїе, ᲂу҆гаси́ла є҆сѝ ѕвѣре́й ди́вїихъ нашє́ствїѧ: мы́сленнагѡ же а҆мали́ка многоплетє́нныѧ сѣ̑ти посрами́ла є҆сѝ.
Была̀ є҆сѝ вѣ́рныхъ предгра́дїе и҆ стѣна̀, чи́стою любо́вїю тѧ̀ чтꙋ́щымъ, и҆ свѧтꙋ́ю твою̀ па́мѧть творѧ́щымъ, бг҃облаже́ннаѧ, вѣ́рныхъ помо́щнице.
Бг҃оро́диченъ:
Ꙗ҆ви́ласѧ є҆сѝ мы́сленный ѻ҆́блакъ, бцⷣе, носѧ́щи самаго̀ сл҃нца сла́вы съ пло́тїю, ѡ҆зарѧ́ющаго всю̀ тва́рь свѣ́томъ бжⷭ҇твенныѧ бл҃года́ти.
Пѣ́снь є҃. І҆рмо́съ:
Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю, хрⷭ҇тѐ, ꙗ҆́кѡ є҆ди́нъ благоꙋтро́бенъ.
Ны́нѣ красѧ́щїисѧ твои́ми ᲂу҆чє́нїи, и҆ пѣ́сньми бг҃одохнове́нными свѧще́ннѡ наслажда́ющесѧ, а҆ндре́е всеблаже́нне, па́мѧть твою̀ почита́емъ.
Заре́ю просвѣща́емь ꙗ҆́вѣ дꙋхо́вною, свѧты́хъ ликостоѧ̑нїѧ пресвѧ́тѡ похвали́лъ є҆сѝ: съ ни́миже ны́нѣ ра́дꙋешисѧ, а҆ндре́е всеблаже́нне.
Ны́нѣ не чꙋ́вствы тлѣ́ннагѡ тѣ́ла, ни мечта́ньми зри́ши бжⷭ҇твєннаѧ, ᲂу҆́мнѡ же, премꙋ́дре, дꙋше́вными дѣ́йствы, соединѧ́ѧсѧ лꙋ́чшымъ.
Бг҃оро́диченъ:
Со слеза́ми припа́даю тѝ, ѕѣлѡ̀ молѧ́сѧ, мои́хъ согрѣше́нїй ны́нѣ и҆зба́витисѧ, тобо́ю, всенепоро́чнаѧ, и҆ вѣ́чныѧ ра́дости сподо́битисѧ.
И҆́нъ. І҆рмо́съ:
Ѿ но́щи невѣ́дѣнїѧ, бг҃овѣ́дѣнїемъ просвѣти́вый концы̀, просвѣти́ мѧ ᲂу҆́тромъ чл҃вѣколю́бїѧ твоегѡ̀, гдⷭ҇и.
На нб҃о зрѧ́щи твоѐ прозѧбе́нїе, столпо́мъ вознесе́на, сегѡ̀ бжⷭ҇твенными дѣѧ̑нїи, ма́рѳо, вы́шнѧго воспѣва́ла є҆сѝ хрⷭ҇та̀.
Съ нб҃сѐ ѿвѣ́тъ, бг҃облаже́ннаѧ ма́рѳо, прїѧ́тъ ꙗ҆́вѣ, и҆ зачала̀ є҆сѝ ѿ бжⷭ҇твеннагѡ ѿкрове́нїѧ вели́каго слꙋжи́телѧ.
Твоѐ прозѧбе́нїе, прпⷣбнаѧ, а҆нтїохі́йскїй ᲂу҆́бѡ гра́дъ предлага́етъ те́пла предста́телѧ и҆ стѣ́нꙋ и҆ прибѣ́жище сꙋ́щымъ въ ско́рбехъ.
Бг҃оро́диченъ:
Же́злъ си́лы тѧ̀, надѣ́ющїисѧ на тѧ̀, бг҃оневѣ́сто, и҆мꙋ́ще, побѣжда́емъ сꙋпоста̑тныѧ полкѝ.
Пѣ́снь ѕ҃. І҆рмо́съ:
Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведи́ мѧ, ꙗ҆́кѡ благоꙋтро́бенъ.
Виті̑и ѡ҆бличи́лъ є҆сѝ безбѡ́жныѧ ᲂу҆сты̀ свѣ́тлыми: честны́хъ бо і҆кѡ́нъ ᲂу҆ѧсни́лъ є҆сѝ вои́стиннꙋ, свѧщеннотаи́нниче, поклоне́нїе.
Свѧще́ннѡ ᲂу҆краси́лъ є҆сѝ твою̀, ѻ҆́ч҃е сла́вне, жи́знь: стра́стное бо смꙋще́нїе ᲂу҆гаси́лъ є҆сѝ, и҆ къ жи́зни безстра́стїѧ прите́клъ є҆сѝ.
Добро́тами слове́съ твои́хъ и҆ ᲂу҆чє́нїи всѝ вѣ́рнїи благоче́стнѡ наслажда́ющесѧ ра́дꙋютсѧ, є҆реті̑къ ѧ҆зыкобѡ́лїѧ побѣжда́юще.
Бг҃оро́диченъ:
Ве́сь примѣша́етсѧ мѝ, и҆́же безнача́льнѡ возсїѧ́въ ѿ ѻ҆ц҃а̀, воплоще́нїемъ, пренепоро́чнаѧ, и҆зъ тебє̀ бы́вшимъ, бг҃оневѣ́сто.
И҆́нъ. І҆рмо́съ:
Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.
Всѧ́ческихъ цр҃и́цꙋ ѿ дꙋшѝ вожделѣ́вши, ᲂу҆краси́ласѧ є҆сѝ сама̀ чистото́ю, и҆ дарова̑нїѧ є҆ѧ̀ ра́ди, ма́рѳо, ᲂу҆лꙋчи́ла є҆сѝ.
Ста́рѣй мꙋ́дрости твое́й, честна́ѧ, ᲂу҆диви́шасѧ а҆́гг҃ли, и҆ человѣ́цы пою́тъ всѧ́ческихъ творца̀, тѧ̀ просла́вльшаго.
Ꙗ҆́кѡ дре́во благора́сленно же и҆ красно̀, себѐ ᲂу҆краси́ла є҆сѝ, и҆ зерца́ло была̀ є҆сѝ нескве́рно, ꙗ҆вле́нїемъ ст҃а́гѡ дх҃а.
Бг҃оро́диченъ:
Тишинꙋ́ тѧ въ бꙋ́ри страсте́й и҆ скорбе́й, влⷣчце, при́снѡ предзрѧ̀, во приста́нище спасе́нїѧ притека́ю.
Конда́къ, гла́съ в҃. Подо́бенъ: Вы́шнихъ и҆щѧ̀:
Вострꙋби́въ ꙗ҆́снѡ бжⷭ҇твєннаѧ сладкопѣ̑нїѧ, ꙗ҆ви́лсѧ є҆сѝ свѣти́льникъ мі́ра свѣтлѣ́йшїй, свѣ́томъ сїѧ́ѧ трⷪ҇цы, а҆ндре́е прпⷣбне. тѣ́мже всѝ вопїе́мъ тѝ: не преста́й молѧ́сѧ ѡ҆ всѣ́хъ на́съ.
І҆́косъ:
Восхвали́ти твоѐ, ѻ҆́ч҃е, житїѐ ѻ҆каѧ́нный хощꙋ̀, вѣ́дый ны́нѣ, и҆справле́нїй твои́хъ ра́ди, и҆щꙋ̀ ѿтꙋ́дꙋ ꙗ҆́коже дарова̑нїѧ, похвалы̑ прїѧ́ти твои́хъ ᲂу҆краше́нїй, и҆ честно́мꙋ верхꙋ̀ твоемꙋ̀, а҆ндре́е, и҆сплестѝ, є҆́же а҆́гг҃ли почита́ютъ, зовы́й: молѧ̀ не преста́й ѡ҆ всѣ́хъ на́съ.
Пѣ́снь з҃. І҆рмо́съ:
Превозноси́мый ѻ҆ц҃є́въ гдⷭ҇ь, пла́мень ᲂу҆гасѝ, ѻ҆́троки ѡ҆росѝ, согла́снѡ пою́щыѧ: бж҃е, бл҃гослове́нъ є҆сѝ.
Да свѣ́тлость ст҃ы́хъ, преподо́бне, ᲂу҆́зриши, свѣ́тлостїю дѣ́лъ просвѣти́лъ є҆сѝ житїѐ твоѐ, зовы́й: бж҃е, бл҃гослове́нъ є҆сѝ.
Тѣ́ломъ ѡ҆бложе́нъ, безпло́тныхъ чинѡ́мъ поревнова́лъ є҆сѝ, прпⷣбне, съ ни́миже согла́снѡ ра́дꙋѧсѧ взыва́еши: бж҃е, бл҃гослове́нъ є҆сѝ.
І҆ерꙋсали́мъ ны́нѣ свѣ́тлѡ весели́тсѧ, свѣти́льника многосвѣ́тла мі́рꙋ тѧ̀ возсїѧ́въ, блаже́нне, поѧ̀: бж҃е, бл҃гослове́нъ є҆сѝ.
Бг҃оро́диченъ:
И҆́же пре́жде ᲂу҆́бѡ безпло́тный воплоща́етсѧ, пречⷭ҇таѧ, за милосе́рдїе безчи́сленное, и҆зъ ложе́снъ твои́хъ ст҃ы́хъ. є҆мꙋ́же всѝ пое́мъ: бж҃е, бл҃гослове́нъ є҆сѝ.
И҆́нъ. І҆рмо́съ:
Въ нача́лѣ зе́млю ѡ҆снова́вый, и҆ нб҃са̀ сло́вомъ ᲂу҆тверди́вый, бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
Страстнꙋ́ю совле́кши ри́зꙋ, въ безстра́стнꙋю ѻ҆де́ждꙋ ѡ҆дѣ́ѧласѧ є҆сѝ, и҆ женихꙋ̀ чи́стѡ, преподо́бнаѧ, ѡ҆брꙋчи́ласѧ хрⷭ҇тꙋ̀, и҆ ᲂу҆годи́ла є҆сѝ.
Сто́лпъ ѻ҆́гненъ твоѐ прозѧбе́нїе ꙗ҆ви́сѧ, ма́рѳо честна́ѧ, просвѣща́ющъ мі́ръ, и҆ ꙗ҆̀же въ мі́рѣ ѡ҆чища́ѧ ѿ неразꙋ́мїѧ те́мнагѡ, и҆ всѧ́кагѡ и҆на́гѡ гнѣ́ва.
Плотска̑ѧ погаси́ла є҆сѝ возношє́нїѧ, и҆ мы́сленныхъ вра̑гъ кова́рствїѧ возгнꙋша́ласѧ є҆сѝ, прпⷣбнаѧ ма́рѳо, и҆ си́хъ сплетє́нїѧ на зе́млю низве́ргла є҆сѝ.
Бг҃оро́диченъ:
Ви́дѣти на́мъ сла́вꙋ сн҃а твоегѡ̀, и҆ чи́стѣ є҆ѧ̀ наслади́тисѧ, тѧ̀ жела́ющымъ и҆ воспѣва́ющымъ, моли́сѧ прилѣ́жнѡ, бг҃облагода́тнаѧ.
Пѣ́снь и҃. І҆рмо́съ:
Тебѣ̀ вседѣ́телю, въ пещѝ ѻ҆́троцы всемі́рный ли́къ спле́тше поѧ́хꙋ: дѣла̀ всѧ̑каѧ, гдⷭ҇а по́йте, и҆ превозноси́те во всѧ̑ вѣ́ки.
Но́вагѡ кївѡ́та цр҃ковь, ѻ҆́ч҃е, ꙗ҆́снѡ ѡ҆бвесели́лъ є҆сѝ, ли́ки соста́вль взыва́ѧ: всѧ̑ дѣла̀ гдⷭ҇нѧ, гдⷭ҇а по́йте, и҆ превозноси́те во всѧ̑ вѣ́ки.
Пѣ́нїе но́вое въ цр҃кви, блаже́нне, прпⷣбнѡ взыва́лъ є҆сѝ вседержи́телю: всѧ̑ дѣла̀ гдⷭ҇нѧ, гдⷭ҇а по́йте, и҆ превозноси́те во всѧ̑ вѣ́ки.
Даѧ̀ добродѣ́телїю бг҃олѣ́пнѡ дѣла̀, страда̑нїѧ воспѣ́лъ є҆сѝ, а҆ндре́е премꙋ́дре, всѣ́хъ ст҃ы́хъ, дре́вле ᲂу҆дивле́нныхъ и҆ соверше́нныхъ хрⷭ҇тꙋ̀ во вѣ́ки.
Бг҃оро́диченъ:
Прїиди́те, чⷭ҇тꙋю бг҃оѻтрокови́цꙋ воспое́мъ, глаго́люще, бжⷭ҇твенными пѣ́сньми: ра́дꙋйсѧ, дв҃о, є҆ѧ́же ра́ди ра́дость даде́сѧ є҆стествꙋ̀ человѣ́ческомꙋ, пребл҃гослове́ннаѧ.
И҆́нъ. І҆рмо́съ:
На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте и҆ превозноси́те во всѧ̑ вѣ́ки.
Нището́ю вре́менныхъ стѧжа́ла є҆сѝ бога́тство, ма́рѳо, вѣ́чное и҆ сла́вꙋ. и҆ сегѡ̀ ра́ди любо́вїю взыва́ла є҆сѝ: гдⷭ҇а по́йте, и҆ превозноси́те є҆го̀ во вѣ́ки.
Вѣ́дый бг҃ъ твоѐ се́рдце и҆ жела́нїе, є҆го́же родила̀ є҆сѝ, ѿ младе́нства, прпⷣбнаѧ ма́рѳо, вѣ́рою серде́чною вѣнча̀ бжⷭ҇твеннѣ, вѣ́рою вопїю́ща є҆мꙋ̀ во вѣ́ки всѧ̑.
Свѣ́тлый твоегѡ̀ пра́здника де́нь ѡ҆зарѧ́етъ вѣ́рныхъ мы̑сли, и҆ просвѣща́етъ всю̀ зе́млю, ꙗ҆́коже денни́ца, да́же до конє́цъ землѝ всесїѧ́ѧ.
Бг҃оро́диченъ:
И҆́же є҆стество̀ на́ше созда́вый, и҆зъ тебє̀ сїѐ ѡ҆бле́къ, бцⷣе, воѡбража́етъ, и҆ ѡ҆бновлѧ́етъ ꙗ҆́кѡ чл҃вѣколю́бецъ, тѧ̀ пѣсносло́вѧщыѧ и҆ славосло́вѧщыѧ вои́стиннꙋ бцⷣꙋ.
Пѣ́снь ѳ҃. І҆рмо́съ:
И҆са́їе, ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆бл҃жа́емъ.
Глагѡ́лъ твои́хъ вѣща́нїе всю̀ ѡ҆бтечѐ зе́млю, ᲂу҆че́нїй же красота̀ и҆ свѣ́тлость, а҆ндре́е блаже́нне: тѣ́мже хрⷭ҇то́съ, и҆́же всѣ́хъ цр҃ь, тѧ̀ вѣнча́лъ є҆́сть благолѣ́пїѧ вѣнце́мъ.
Соедине́нїемъ лꙋ́чшимъ наслажда́ѧсѧ зарѝ трисїѧ́нныѧ, а҆ндре́е таи́нниче, пачеесте́ственныхъ, любо́вїю творѧ́щихъ твою̀ свѧтꙋ́ю па́мѧть свѧще́ннѡ, ны́нѣ моли́твами твои́ми ѿ бѣ́дъ сохранѝ.
Со безпло́тными чи́нми весели́шисѧ ны́нѣ на нб҃сѣ́хъ: си́хъ бо на землѝ житїѐ неꙋкло́ннѡ ꙗ҆́кѡ пожи́въ, и҆ пра́выѧ вѣ́ры ꙗ҆́вльсѧ проповѣ́дникъ и҆зрѧ́денъ, бг҃оглаго́ливе досточꙋ́дне.
Бг҃оро́диченъ:
Приноси́мое ᲂу҆ста́вила є҆сѝ сме́рти неꙋста́вное стремле́нїе, ро́ждши пло́тски вои́стиннꙋ па́че ᲂу҆ма̀ жи́знь вѣ́чнꙋю: є҆́йже прирази́всѧ ᲂу҆сты̀ го́рькїй а҆́дъ ᲂу҆праздни́сѧ, прест҃а́ѧ дв҃о мт҃и.
И҆́нъ. І҆рмо́съ:
Велича́емъ тѧ̀ мт҃рь бж҃їю, и҆ сла́вимъ тѧ̀, бцⷣе дв҃о, ꙗ҆́кѡ сп҃са ро́ждшꙋю дꙋ́шъ на́шихъ.
Є҆диноѻбра́знѡ, ма́рѳо, ликꙋ́ющи съ сы́номъ, молѝ хрⷭ҇та̀ бг҃а на́шего ѡ҆ почита́ющихъ тѧ̀.
Благоче́стнѡ пожи́вши въ трꙋдѣ̀ мꙋ́жески подвиза́ласѧ є҆сѝ: ѿ негѡ́же сокры́ла є҆сѝ бога́тство нбⷭ҇ное.
Ѡ҆блобыза́емъ твои́хъ моще́й ра́кꙋ, ма́рѳо всечестна́ѧ, и҆зъ неѧ́же почерпа́емъ и҆сцѣле́нїй во́ды.
Бг҃оро́диченъ:
Па́че со́лнечныхъ лꙋ̑чъ моли́тва твоѧ̀ возсїѧ́вши, просвѣща́етъ, пречⷭ҇таѧ, тѧ̀ велича́ющыѧ.
Свѣти́ленъ. Подо́бенъ: Нб҃о ѕвѣзда́ми:
А҆́гг҃льскагѡ житїѧ̀ жела́ѧ, прпⷣбне, тѣ́мже покори́лъ є҆сѝ стра̑сти плотскі̑ѧ мꙋ́жески, равноа́гг҃ленъ бы́въ, бг҃оно́се ѻ҆́ч҃е.
Бг҃оро́диченъ:
Тѧ̀ предста́тельницꙋ и҆́мамы всѝ грѣ́шнїи, ѽ прест҃а́ѧ дв҃о! ты̀ благопремѣ́нна сотворѝ твоего̀ сн҃а, мт҃рними твои́ми моли́твами.
На стїхо́внѣ ѻ҆ктѡ́иха. Сла́ва, гла́съ ѕ҃:
Прпⷣбне ѻ҆́ч҃е а҆ндре́е, во всю̀ зе́млю и҆зы́де вѣща́нїе и҆справле́нїй твои́хъ: тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, дє́мѡнскїѧ погꙋби́лъ є҆сѝ полкѝ и҆ а҆́гг҃льскїѧ дости́глъ є҆сѝ чи́ны: и҆́хже житїю̀ безъ поро́ка поревнова́лъ є҆сѝ. дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Подо́бенъ: Тридне́венъ:
Зача́тїе твоѐ безсѣ́менное, и҆ ржⷭ҇тво̀ неизрече́нное помышлѧ́ющи, ᲂу҆дивлѧ́юсѧ ѕѣлѡ̀: ка́кѡ си́це, ꙗ҆́коже ѕлодѣ́й, благоволи́лъ є҆сѝ ᲂу҆мре́ти, сн҃е; пречⷭ҇таѧ пла́чꙋщи взыва́ше.
На лїтꙋргі́и, прокі́менъ, гла́съ з҃: Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ. Сті́хъ: Воспо́йте гдⷭ҇еви пѣ́снь но́вꙋ. А҆пⷭ҇лъ къ є҆вре́ємъ, зача́ло ти҃ї ѿ полꙋ̀. А҆ллилꙋ́їа, гла́съ в҃: Свѧще́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ. Є҆ѵⷢ҇лїе ѿ матѳе́а, зача́ло к҃а. Прича́стенъ: Въ па́мѧть вѣ́чнꙋю:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.