← претходни дан | Минеј — Јун | следећи дан →
29 июня: Первоверховных апостолов Петра и Павла
Мѣ́сѧца тогѡ́же въ к҃ѳ-й де́нь.
Ст҃ы́хъ сла́вныхъ и҆ всехва́льныхъ и҆ первоверхо́вныхъ а҆пⷭ҇лъ, петра̀ и҆ па́ѵла.
Твори́мъ бдѣ́нїе. На ма́лѣй вече́рни,
На Гдⷭ҇и, воззва́хъ, стїхи̑ры на д҃, гла́съ д҃. Поⷣ: Да́лъ є҆сѝ зна́менїе:
Да́лъ є҆сѝ хвале́нїе ꙳ цр҃кви твое́й, гдⷭ҇и, ꙳ честны́ѧ а҆пⷭ҇лы твоѧ̑. ꙳ въ не́йже просїѧва́ютъ мы́сленнїи свѣти́льницы, ꙳ пе́тръ же и҆ па́ѵелъ, ꙳ ꙗ҆́коже ѕвѣ́зды словє́сныѧ, ꙳ вселе́ннꙋю ѡ҆зарѧ́юще, ꙳ и҆́миже просвѣти́лъ є҆сѝ за́падный мра́къ, ꙳ і҆и҃се всеси́льне, ꙳ сп҃се дꙋ́шъ на́шихъ.
Два́жды.
Да́лъ є҆сѝ ᲂу҆твержде́нїе ꙳ цр҃кви твое́й, гдⷭ҇и, ꙳ петро́вꙋ тве́рдость, ꙳ и҆ па́ѵловъ ра́зꙋмъ, ꙳ и҆ свѣ́тлꙋю мꙋ́дрость, ꙳ и҆ ѻ҆бои́хъ бг҃огла́сїе и҆́стинное, ꙳ є҆́ллинскꙋю пре́лесть ѿгонѧ́щее: ꙳ тѣ́мже тайноводи́ми ѿ ѻ҆бои́хъ, пое́мъ тѧ̀, ꙳ і҆и҃се всеси́льне, ꙳ сп҃се дꙋ́шъ на́шихъ.
Да́лъ є҆сѝ ѻ҆́бразъ ѡ҆браще́нїѧ согрѣша́ющымъ, ꙳ ѻ҆́ба а҆пⷭ҇лы твоѧ̑, ѻ҆́ваго ᲂу҆́бѡ ѿве́ргшагосѧ тебє̀ во вре́мѧ стрⷭ҇ти, ꙳ и҆ пока́ѧвшасѧ: ꙳ ѻ҆́ваго же про́повѣди твое́й сопротивлѧ́ющасѧ, ꙳ и҆ вѣ́ровавша: ꙳ и҆ ѻ҆бою̀ собѡ́рꙋ первостоѧ́тельствꙋющихъ дрꙋгѡ́въ твои́хъ, ꙳ і҆и҃се всеси́льне, ꙳ сп҃се дꙋ́шъ на́шъ.
Сла́ва, гла́съ и҃. І҆ѡа́нна мона́ха:
Досади́тель и҆ гони́тель цр҃кве бы́лъ є҆сѝ, па́ѵле всебл҃же́нне, съ нб҃се́ же зва́нъ бы́въ, защити́лъ є҆сѝ сїю̀ пресла́внѡ: є҆́йже ны́нѣ молѝ, и҆зба́витисѧ ѿ бѣ́дъ, и҆ спасти́сѧ дꙋша́мъ на́шымъ.
И҆ ны́нѣ, бг҃оро́диченъ:
Про́въ тво́й, бцⷣе дв҃о, врачевство̀ є҆́сть дꙋхо́вное: въ ѻ҆́нь бо прибѣга́юще, ѿ дꙋше́вныхъ недꙋ̑гъ и҆збавлѧ́емсѧ.
Прокі́менъ днѐ.
На стїхо́внѣ стїхи̑ры, гла́съ в҃. Подо́бенъ: Є҆гда̀ ѿ дре́ва:
Пе́тре а҆пⷭ҇лѡвъ ѡ҆снова́нїе, ка́меню хрⷭ҇то́вы цр҃кве, хрⷭ҇тїа́нѡвъ нача́ло, пасѝ ѻ҆́вцы твоегѡ̀ двора̀ сла́внѡ: а҆́гнцы твоѧ̑ сохранѝ ѿ волкѡ́въ льсти́выхъ, и҆зба́ви ста́до твоѐ ѿ напа́стей лю́тыхъ: тѧ́ бо моли́твенника къ бг҃ꙋ неꙋсы́пна стѧжа́хомъ вои́стиннꙋ, и҆ ѡ҆ тебѣ̀ хва́лѧщесѧ спаса́емсѧ всѝ.
Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.
Па́ѵле, ꙗ҆зы́кѡвъ ло́вче, хрⷭ҇тїа́нъ предста́телю, вселе́нныѧ свѣти́льниче, ᲂу҆ста̀ немѡ́лчна хрⷭ҇та̀ жива́гѡ бг҃а, ѡ҆бтекі́й ꙗ҆́коже со́лнце концы̀ всѧ̑, проповѣ́данїемъ бжⷭ҇твенныѧ вѣ́ры, разрѣшѝ ѿ ᲂу҆́зъ грѣхо́вныхъ всѧ̑ восхвалѧ́ющыѧ тѧ̀, и҆ красѧ́щыѧсѧ моли́твами твои́ми.
Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.
Пе́тре верхо́вный ᲂу҆ч҃ничѐ, па́ѵле а҆пⷭ҇лѡвъ и҆сполне́нїе, пе́рвїи проповѣ́дницы, ны́нѣ со дерзнове́нїемъ моли́тесѧ къ бг҃ꙋ прилѣ́жнѡ, и҆ ско́рꙋю по́мощь, и҆ разрѣше́нїе бѣ́дъ вкꙋ́пѣ низпосли́те скорбѧ́щымъ на́мъ, ꙗ҆́кѡ да похва́лимсѧ вѣ́рою, и҆ ны́нѣ въ сѣ́ни ва́шей, дѣ́лы проѧвлѧ́юще покро́въ ва́шъ.
Сла́ва, гла́съ д҃. І҆ѡа́нна мона́ха:
Хрⷭ҇то́съ тѧ̀ пе́рваго и҆збра́въ, пе́тре ѡ҆снова́нїе вѣ́ры, вѣнча́ тѧ, и҆́же всѣ́хъ влⷣка тебѣ̀ предречѐ: бл҃же́нъ є҆сѝ, сі́мѡне ва́ръ і҆ѡ́на, ꙗ҆́кѡ пло́ть и҆ кро́вь не ꙗ҆вѝ, свѧщеннопроповѣ́дника моего̀ сотвори́ тѧ: но ѻ҆ц҃ъ мо́й, и҆́же є҆́сть на нб҃сѣ́хъ. того̀ молѝ, бг҃облаже́нне а҆пⷭ҇ле, дарова́ти на́мъ ве́лїю ми́лость.
И҆ ны́нѣ, бг҃оро́диченъ: И҆зба́ви на́съ ѿ бѣ́дъ:
Тропа́рь, гла́съ д҃:
А҆пⷭ҇лѡвъ первопресто́льницы, и҆ вселе́нныѧ ᲂу҆чи́телїе, влⷣкꙋ всѣ́хъ моли́те, ми́ръ вселе́ннѣй дарова́ти, и҆ дꙋша́мъ на́шымъ ве́лїю ми́лость.
Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́нное:
На вели́цѣй вече́рни, по ѻ҆бы́чномъ ѱалмѣ̀ пое́мъ: Бл҃же́нъ мꙋ́жъ, а҃-й а҆нтїфѡ́нъ.
На Гдⷭ҇и, воззва́хъ, стїхи̑ры на и҃, гла́съ в҃.
Самоподо́бенъ, а҆ндре́а пѵ́рскагѡ:
Кі́ими похва́льными вѣнцы̑ ᲂу҆вѧзе́мъ петра̀ и҆ па́ѵла, раздѣлє́ныѧ тѣлесы̀, и҆ совокꙋ́плєныѧ дꙋ́хомъ, бг҃опроповѣ́дникѡвъ первостоѧ́тели; ѻ҆́ваго ᲂу҆́бѡ ꙗ҆́кѡ а҆пⷭ҇лѡвъ преднача́льника: ѻ҆́ваго же ꙗ҆́кѡ па́че и҆нѣ́хъ трꙋди́вшасѧ. си́хъ бо вои́стиннꙋ досто́йнѡ безсме́ртныѧ сла́вы вѣнцы̀ вѣнча́етъ хрⷭ҇то́съ бг҃ъ на́шъ, и҆мѣ́ѧй ве́лїю ми́лость.
Три́жды.
Кі́ими пѣ́сненными добро́тами воспое́мъ петра̀ и҆ па́ѵла; бг҃оразꙋ́мїѧ крилѣ̑, прелетѣ́вшыѧ концы̀, и҆ къ небесѝ возне́сшыѧсѧ, рꙋ́цѣ є҆ѵⷢ҇лїа бл҃года́ти, но́зѣ и҆́стиннагѡ проповѣ́данїѧ, рѣ́ки премꙋ́дрости, крⷭ҇тныѧ ро́ги, и҆́миже де́мѡнѡвъ бро́вь хрⷭ҇то́съ низложѝ, и҆мѣ́ѧй ве́лїю ми́лость.
Три́жды.
Кі́ими дꙋхо́вными пѣ́сньми похва́лимъ петра̀ и҆ па́ѵла; безбо́жїѧ закла́вшыѧ незатыка́ємаѧ ᲂу҆ста̀; стра̑шныѧ дꙋ́ха мечѝ, ри́ма свѣ̑тлаѧ ᲂу҆добрє́нїѧ, всеѧ̀ вселе́нныѧ пита́тели, но́вагѡ завѣ́та бг҃опи̑санныѧ скрижа̑ли мы́слєнныѧ, ꙗ҆̀же въ сїѡ́нѣ хрⷭ҇то́съ возгласѝ, и҆мѣ́ѧй ве́лїю ми́лость.
Два́жды.
Сла́ва, гла́съ д҃. І҆ѡа́нна мона́ха:
Трикра́тнымъ вопроше́нїемъ, є҆́же, пе́тре, лю́биши ли мѧ̀, трикра́тное ѿверже́нїе хрⷭ҇то́съ и҆спра́вилъ є҆́сть. тѣ́мже и҆ къ тайновѣ́дцꙋ сі́мѡнъ: гдⷭ҇и, всѧ̑ вѣ́си, всѧ̑ зна́еши: ты̀ вѣ́си, ꙗ҆́кѡ люблю́ тѧ. тѣ́мже къ немꙋ̀ сп҃съ: пасѝ ѻ҆́вцы моѧ̑, пасѝ и҆збра̑нныѧ моѧ̑, пасѝ а҆́гнцы моѧ̑, ꙗ҆̀же мое́ю кро́вїю снабдѣ́хъ во спасе́нїе. того̀ молѝ, бг҃облаже́нне а҆пⷭ҇ле, дарова́ти на́мъ ве́лїю ми́лость.
И҆ ны́нѣ, бг҃оро́диченъ: И҆́же тебє̀ ра́ди:
Вхо́дъ. Прокі́менъ днѐ.
Собо́рнагѡ посла́нїѧ петро́ва чте́нїе.
[Глава̀ а҃] Бра́тїе, бл҃гослове́нъ бг҃ъ и҆ ѻ҆ц҃ъ гдⷭ҇а на́шегѡ і҆и҃са хрⷭ҇та̀, и҆́же по мно́зѣй свое́й ми́лости порожде́й на́съ во ᲂу҆пова́нїе жи́во, воскрⷭ҇нїемъ і҆и҃съ хрⷭ҇то́вымъ ѿ ме́ртвыхъ, Въ наслѣ́дїе нетлѣ́нно, и҆ нескве́рно, и҆ неꙋвѧда́емо, соблюде́но на нб҃сѣ́хъ ва́съ ра́ди. И҆̀же си́лою бж҃їею соблюде́ни вѣ́рою во спасе́нїе, гото́вое ꙗ҆ви́тисѧ во вре́мѧ послѣ́днее. Ѡ҆ не́мже ра́дꙋйтесѧ ма́лѡ ны́нѣ, а҆́ще лѣ́по є҆́сть, приско́рбни бы́вше въ разли́чныхъ напа́стехъ: Да и҆скꙋше́нїе ва́шеѧ вѣ́ры, многочестнѣ́йше зла́та ги́бнꙋща, ѻ҆гне́мъ же и҆скꙋше́на, ѡ҆брѧ́щетсѧ въ похвалꙋ̀ и҆ че́сть и҆ сла́вꙋ, во ѿкрове́нїи і҆и҃съ хрⷭ҇то́вѣ: то́же не ви́дѣвше лю́бите: и҆ на него́же ны́нѣ не зрѧ́ще, вѣ́рꙋюще же, ра́дꙋетесѧ ра́достїю неизглаго́ланною и҆ просла́вленною, прїе́млюще кончи́нꙋ вѣ́рѣ ва́шей, спасе́нїе дꙋша́мъ.
Собо́рнагѡ посла́нїѧ петро́ва чте́нїе.
[Глава̀ а҃] Возлю́бленнїи, препоѧ́савше чрє́сла помышле́нїѧ ва́шегѡ, трезвѧ́щесѧ соверше́ннѣ, ᲂу҆пова́йте на приноси́мꙋю ва́мъ бл҃года́ть, ѿкрове́нїемъ і҆и҃съ хрⷭ҇то́вымъ: Ꙗ҆́кѡ ча̑да послꙋша́нїѧ, не преѡбразꙋ́ющесѧ пе́рвыми невѣ́дѣнїѧ ва́шегѡ похотѣ̑нїи: Но по зва́вшемꙋ вы̀ ст҃о́мꙋ, и҆ са́ми свѧ́ти во все́мъ житїѝ бꙋ́дите. Занѐ пи́сано є҆́сть: свѧ́ти бꙋ́дите, ꙗ҆́кѡ а҆́зъ свѧ́тъ є҆́смь. И҆ а҆́ще ѻ҆ц҃а̀ называ́ете нелицемѣ́рнѡ сꙋдѧ́ща комꙋ́ждо по дѣ́лꙋ, со стра́хомъ житїѧ̀ ва́шегѡ вре́мѧ жи́тельствꙋйте. Вѣ́дѧще, ꙗ҆́кѡ не и҆стлѣ́ннымъ сребро́мъ, и҆лѝ зла́томъ и҆зба́вистесѧ ѿ сꙋ́етнагѡ ва́шегѡ житїѧ̀ ѻ҆тцы̀ пре́даннагѡ: Но честно́ю кро́вїю, ꙗ҆́кѡ а҆́гнца непоро́чна и҆ пречⷭ҇та хрⷭ҇та̀.
Собо́рнагѡ посла́нїѧ петро́ва чте́нїе.
[Глава̀ в҃] Возлю́бленнїи, молю̀ ꙗ҆́кѡ прише́льцы и҆ стра́нники, ѡ҆греба́тисѧ ѿ плотски́хъ похоте́й, ꙗ҆̀же вою́ютъ на дꙋ́шꙋ, житїѐ ва́ше и҆мꙋ́ще добро̀ во ꙗ҆зы́цѣхъ: да ѡ҆ не́мже клеве́щꙋтъ ва́съ а҆́ки ѕлодѣ́євъ, ѿ до́брыхъ дѣ́лъ ви́дѣвше, просла́вѧтъ бг҃а въ де́нь посѣще́нїѧ. Повини́тесѧ ᲂу҆̀бо всѧ́комꙋ человѣ́чꙋ созда́нїю, гдⷭ҇а ра́ди: а҆́ще царю̀, ꙗ҆́кѡ преѡблада́ющꙋ: А҆́ще ли же кнѧзє́мъ, ꙗ҆́кѡ ѿ негѡ̀ пѡ́сланнымъ, во ѿмще́нїе ᲂу҆́бѡ ѕлодѣ́ємъ, въ похвалꙋ́ же благотво́рцємъ. Ꙗ҆́кѡ та́кѡ є҆́сть во́лѧ бж҃їѧ, благотворѧ́щымъ ѡ҆бꙋздова́ти безꙋ́мныхъ человѣ̑къ невѣ́жество: Ꙗ҆́кѡ свобо́дни, а҆ не ꙗ҆́кѡ прикрове́нїе и҆мꙋ́ще ѕло́бы свобо́дꙋ, но ꙗ҆́кѡ рабѝ бж҃їи. Всѣ́хъ почита́йте: бра́тство возлюби́те: бг҃а бо́йтесѧ: царѧ̀ чти́те. Рабѝ, повинꙋ́йтесѧ во всѧ́комъ стра́сѣ влады́камъ, не то́кмѡ благи̑мъ и҆ крѡ́ткимъ, но и҆ стропти̑вымъ. Се́ бо є҆́сть ᲂу҆го́дно предъ бг҃омъ, а҆́ще со́вѣсти ра́ди бж҃їѧ терпи́тъ кто̀ скѡ́рби, стражда̀ безъ пра́вды. Ка́ѧ бо похвала̀, а҆́ще согрѣша́юще мꙋ́чими терпитѐ; но а҆́ще добро̀ творѧ́ще, и҆ стра́ждꙋще терпитѐ, сїѐ ᲂу҆го́дно предъ бг҃омъ: На сїе́ бо и҆ зва́ни бы́сте. Занѐ и҆ хрⷭ҇то́съ пострада̀ по на́съ, на́мъ ѡ҆ста́вль ѻ҆́бразъ, да послѣ́дꙋемъ стопа́мъ є҆гѡ̀. И҆́же грѣха̀ не сотворѝ, ни ѡ҆брѣ́тесѧ ле́сть во ᲂу҆стѣ́хъ є҆гѡ̀: И҆́же ᲂу҆корѧ́емь, проти́вꙋ неꙋкорѧ́ше: стражда̀, не преща́ше: предаѧ́ше же сꙋдѧ́щемꙋ пра́веднѡ: И҆́же грѣхѝ на́шѧ са́мъ вознесѐ на тѣ́лѣ свое́мъ на дре́во, да ѿ грѣ̑хъ и҆збы́вше, пра́вдою поживе́мъ.
На лїті́и стїхи̑ры, гла́съ в҃. Самогла́сны. А҆ндре́а і҆ерꙋсалими́ты:
Грѧди́те собо́ри дне́сь вѣ́рныхъ, благохва́льное и҆ кра́сное собра́нїе, благода́ти и҆збра́нныѧ хитрецы̀, петра̀ и҆ па́ѵла, подо́бными хвала́ми вѣнча́емъ, ꙗ҆́кѡ незави́стнѡ всѣ̑мъ сло́во всѣ́ѧвше: съ си́ми и҆ бл҃года́ть дх҃а ѡ҆богати́ша, и҆ и҆́стиннагѡ вїногра́да сꙋ́ще ло́зїе, гро́здъ зрѣ́лъ на́мъ воздѣ́лаша, веселѧ́щь сердца̀ на̑ша. къ ни̑мже ѿкрове́ннымъ лице́мъ и҆ чи́стою со́вѣстїю возопїе́мъ, глаго́люще: ра́дꙋйтесѧ, розори́тели безслове́сныхъ, и҆ слꙋжи́тели слове́сныхъ: ра́дꙋйтесѧ, всѣ́хъ творца̀ и҆ строи́телѧ и҆збра̑нїѧ кра̑снаѧ: ра́дꙋйтесѧ, хода́таи благи́хъ, и҆ ѿгони́телїе ле́стныхъ, и҆̀хже да ᲂу҆мо́лимъ, моли́тисѧ при́снѡ къ зижди́телю и҆ ᲂу҆ч҃телю, ми́ръ крѣпкостоѧ́теленъ мі́рꙋ дарова́ти, и҆ дꙋша́мъ на́шымъ ве́лїю ми́лость.
А҆рсе́нїево:
Оу҆ч҃никѝ хрⷭ҇тѡ́вы, и҆ ѡ҆снова̑нїѧ цр҃кве, и҆́стинныѧ столпѝ и҆ стѣ́ны, и҆ трꙋ́бы бжⷭ҇твєнныѧ хрⷭ҇то́выхъ ᲂу҆че́нїй и҆ страда́нїй, верхѡ́вныѧ петра̀ и҆ па́ѵла, ꙗ҆́кѡ всегѡ̀ мі́ра предста́тели восхва́лимъ: сі́и бо ѡ҆бте́кше широтꙋ̀ всеѧ̀ землѝ, ꙗ҆́коже ра́ломъ всѣ́ѧвше вѣ́рꙋ, и҆ всѣ̑мъ бг҃оразꙋ́мїе всади́ша, трⷪ҇ческое ꙗ҆влѧ́юще сло́во. ѽ пе́тре, ка́меню и҆ ѡ҆снова́нїе, и҆ па́ѵле сосꙋ́де и҆збра́нный! и҆̀же и҆ сопрѧже́ннїи волы̀ хрⷭ҇то́вы, всѧ̑ привлеко́ша къ бг҃оразꙋ́мїю: ꙗ҆зы́ки, гра́ды же и҆ ѻ҆́стровы, є҆вре́и же па́ки ко хрⷭ҇тꙋ̀ возведо́ша, и҆ мо́лѧтъ спасти́сѧ дꙋша́мъ на́шымъ.
Ге́рманово:
Пе́тре верхо́вне сла́вныхъ а҆пⷭ҇тѡлъ, ка́меню вѣ́ры, и҆ па́ѵле чꙋ́дне, ст҃ы́хъ цр҃кве́й виті́а и҆ свѣти́льниче, бжⷭ҇твенномꙋ прⷭ҇то́лꙋ предстоѧ́ще, ѡ҆ на́съ хрⷭ҇тꙋ̀ моли́тесѧ.
Па́ѵле, ᲂу҆ста̀ гдⷭ҇нѧ, ѡ҆снова́нїе ᲂу҆че́нїй, и҆ногда̀ ᲂу҆́бѡ гони́тель і҆и҃са сп҃са, ны́нѣ же и҆ первопресто́льникъ а҆пⷭ҇лѡвъ бы́въ, блаже́нне. тѣ́мже неизглагѡ́ланнаѧ ви́дѣлъ є҆сѝ, мꙋ́дре, да́же до тре́тїѧгѡ нб҃сѐ возше́дъ, и҆ взыва́лъ є҆сѝ: прїиди́те со мно́ю, и҆ благи́хъ не лиши́мсѧ.
Гла́съ г҃. І҆ѡа́нна мона́ха:
Вы́шнѧгѡ і҆ерⷭ҇ли́ма гра́ждане, ка́мень вѣ́ры, виті́а цр҃кве хрⷭ҇то́вы, трⷪ҇ческаѧ дво́ица, мі́ра ловцы̀, ѡ҆ста́вльше дне́сь ꙗ҆̀же на землѝ, ѿидо́ша страда́нїемъ къ бг҃ꙋ, и҆ мо́лѧтсѧ є҆мꙋ̀ со дерзнове́нїемъ, спасти́сѧ дꙋша́мъ на́шымъ.
Сла́ва, гла́съ є҃. Вѷзанті́ево:
Премꙋ́дрость бж҃їѧ, соприсносꙋ́щное сло́во ѻ҆́ч҃ее, ꙗ҆́коже въ є҆ѵⷢ҇лїахъ предречѐ, многоплѡ́дныѧ ло́зы вы̀ є҆стѐ, всехва́льнїи а҆пⷭ҇ли, и҆̀же гро́здъ зрѣ́лъ и҆ кра́сенъ во вѣ́твехъ ва́шихъ носѧ́щи, є҆го́же вѣ́рнїи ꙗ҆дꙋ́ще, ᲂу҆слажда́емъ вкꙋ́съ къ весе́лїю. пе́тре, ка́меню вѣ́ры, и҆ па́ѵле, похвало̀ вселе́нныѧ, ᲂу҆тверди́те ста́до, є҆́же стѧжа́сте ᲂу҆че́ньми ва́шими.
И҆ ны́нѣ, бг҃оро́диченъ: Блажи́мъ тѧ̀, бцⷣе:
На стїхо́внѣ стїхи̑ры самогла̑сны, гла́съ а҃. А҆ндре́а кри́тскагѡ:
Ꙗ҆̀же по всѧ̑ гра́ды ᲂу҆́зы и҆ скѡ́рби твоѧ̑ кто̀ ска́жетъ, сла́вне а҆пⷭ҇ле па́ѵле; трꙋды̀, болѣ̑зни и҆ бдѣ̑нїѧ, ꙗ҆̀же во а҆́лчбѣ и҆ жа́ждѣ ѕлостра̑стїѧ, ꙗ҆̀же въ зимѣ̀ и҆ наготѣ̀, ко́шницꙋ и҆ жезлобїє́нїѧ, каменомєта́нїѧ и҆ ѡ҆бхождє́нїѧ, глꙋбины̀ и҆стоплє́нїѧ: позо́ръ бы́сть а҆́гг҃лѡвъ и҆ человѣ́кѡвъ. всѧ̑ ᲂу҆́бѡ претерпѣ́лъ є҆сѝ ѡ҆ ᲂу҆крѣплѧ́ющемъ тѧ̀ хрⷭ҇тѣ̀, да мі́ръ приѡбрѧ́щеши, ѡ҆ хрⷭ҇тѣ̀ і҆и҃сѣ гдⷭ҇ѣ твое́мъ. тѣ́мже мо́лимъ тѧ̀, творѧ́щїи па́мѧть твою̀ вѣ́рнѡ: непреста́ннѡ молѝ, спасти́сѧ дꙋша́мъ на́шымъ.
Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.
Ꙗ҆̀же по всѧ̀ гра́ды вѧза̑нїѧ и҆ скѡ́рби твоѧ̑ кто̀ и҆сповѣ́сть, сла́вне а҆пⷭ҇ле; и҆лѝ кто̀ предста́витъ по́двиги и҆ трꙋды̀ твоѧ̑, и҆́миже трꙋди́лсѧ є҆сѝ во є҆ѵⷢ҇лїи хрⷭ҇то́вѣ, да всѧ̑ приѡбрѧ́щеши, и҆ хрⷭ҇тꙋ̀ приведе́ши цр҃ковь; но сїю̀ просѝ сохрани́ти до́брое твоѐ и҆сповѣ́данїе, да́же до коне́чнагѡ и҆здыха́нїѧ, па́ѵле а҆пⷭ҇ле и҆ ᲂу҆чи́телю цр҃квей.
Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.
Свѣти́льники вели́кїѧ цр҃кве, петра̀ и҆ па́ѵла восхва́лимъ: па́че бо со́лнца возсїѧ́ша на тве́рди вѣ́ры, и҆ ꙗ҆зы́ки зарѧ́ми проповѣ́данїѧ ѿ невѣ́дѣнїѧ возведо́ша. ѻ҆́въ ᲂу҆́бѡ на крⷭ҇тѣ̀ пригво́ждсѧ, къ нб҃сѝ ше́ствїе творѧ̀, и҆дѣ́же црⷭ҇твїѧ ключѝ ѿ хрⷭ҇та̀ прїѧ́тъ: ѻ҆́въ же мече́мъ ᲂу҆сѣ́ченъ бы́въ, ко сп҃сꙋ ѿше́дъ, по достоѧ́нїю ᲂу҆блажа́ютсѧ, и҆ ѻ҆́ба і҆и҃лю возвѣща́ютъ ꙗ҆́кѡ на самаго̀ гдⷭ҇а непра́веднѡ рꙋ́цѣ просте́рша. тѣ́мже моли́твами и҆́хъ, хрⷭ҇тѐ бж҃е на́шъ, на ны̀ шата́ющыѧсѧ низложѝ, и҆ правосла́вныхъ вѣ́рꙋ ᲂу҆твердѝ, ꙗ҆́кѡ чл҃вѣколю́бецъ.
Сла́ва, гла́съ ѕ҃ Є҆фре́ма карѵ́а:
Пра́здникъ ра́достенъ возсїѧ̀ концє́мъ дне́сь, всечестна́ѧ па́мѧть премꙋ́дрыхъ а҆пⷭ҇лъ и҆ верхо́вныхъ, петра̀ и҆ па́ѵла, тѣ́мже и҆ ри́мъ сра́дꙋетсѧ ликовствꙋ́ѧ въ пѣ́снехъ и҆ пѣ́нїихъ. пра́зднꙋемъ и҆ мы̀, бра́тїе, всечестны́й се́й де́нь соверши́вше: ра́дꙋйсѧ, пе́тре а҆пⷭ҇ле, и҆́скреннїй дрꙋ́же твоегѡ̀ ᲂу҆ч҃телѧ, хрⷭ҇та̀ бг҃а на́шегѡ. ра́дꙋйсѧ, па́ѵле вселюбе́знѣйшїй, и҆ проповѣ́дниче вѣ́ры, и҆ ᲂу҆чи́телю вселе́нныѧ: ꙗ҆́кѡ и҆мѣ́ѧ дерзнове́нїе, сꙋпрꙋ́же свѧтоизбра́нный, хрⷭ҇та̀ бг҃а на́шего моли́те, спасти́сѧ дꙋша́мъ на́шымъ.
И҆ ны́нѣ, бг҃оро́диченъ: Творе́цъ и҆ и҆зба́витель мо́й:
На благослове́нїи хлѣ́бѡвъ тропа́рь, гла́съ д҃, два́жды, пи́санъ на ма́лѣй вече́рни. И҆ Бцⷣе дв҃о, є҆ди́ножды: и҆ чте́нїе.
На ᲂу҆́трени, на Бг҃ъ гдⷭ҇ь, тропа́рь а҆пⷭ҇лѡвъ, два́жды.
Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́ное:
По а҃-й каѳі́смѣ сѣда́ленъ, гла́съ и҃. Подо́бенъ: Премꙋ́дрости:
Глꙋбинꙋ̀ ловле́нїѧ ѡ҆ста́вль, съ нб҃сѐ прїе́мь ѿ ѻ҆ц҃а̀ бжⷭ҇твенное ѿкрове́нїе сло́ва воплоще́нїѧ, и҆ со дерзнове́нїемъ вѣ́рнѡ вопїѧ́лъ є҆сѝ зижди́телю твоемꙋ̀: бж҃їѧ тѧ̀ вѣ́мъ сн҃а є҆диносꙋ́щна. тѣ́мже по достоѧ́нїю вои́стиннꙋ показа́лсѧ є҆сѝ ка́мень вѣ́ры, и҆ ключа́рь благода́ти, пе́тре а҆пⷭ҇ле, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть твою̀.
Сла́ва, гла́съ а҃. Подо́бенъ: Ка́мени запеча́танꙋ:
Цр҃ко́внаго ка́менѧ, всехва́льнаго петра̀, и҆ побо́рника па́ѵла, мїрскꙋ́ю мре́жꙋ, досто́йнѡ восхва́лимъ вѣ́рнїи, ꙗ҆́кѡ и҆мꙋ́ща ключѝ нбⷭ҇ныѧ: ѿ ни́хъ бо просвѣти́сѧ вселе́ннаѧ вѣ́рою трⷪ҇ческою. сла́ва просла́вльшемꙋ ва́съ: сла́ва ᲂу҆крѣ́пльшемꙋ вы̀: сла́ва дарова́вшемꙋ ва́съ ра́ди жи́знь вѣ́чнꙋю.
И҆ ны́нѣ, бг҃оро́диченъ:
Рꙋ́цѣ твоѝ бжⷭ҇твеннїи, и҆́миже созда́телѧ понесла̀ є҆сѝ, дв҃о прест҃а́ѧ, вопло́щшагосѧ благосты́нею, просте́рши ᲂу҆молѝ є҆го̀, и҆зба́вити на́съ ѿ и҆скꙋше́нїй и҆ страсте́й и҆ бѣ́дъ, хва́лѧщихъ тѧ̀ любо́вїю, и҆ вопїю́щихъ: сла́ва все́льшемꙋсѧ въ тѧ̀, сла́ва проше́дшемꙋ и҆зъ тебє̀, сла́ва и҆зба́вльшемꙋ на́съ ржⷭ҇тво́мъ твои́мъ.
По в҃-й каѳі́смѣ сѣда́ленъ, гла́съ и҃. Подо́бенъ: Премꙋ́дрости:
Съ нб҃сѐ зва́нїе ѿ хрⷭ҇та̀ прїи́мъ, ꙗ҆ви́лсѧ є҆сѝ проповѣ́дникъ свѣ́та, всѣ́хъ бл҃года́ти ѡ҆зари́лъ є҆сѝ ᲂу҆че́ньми: зако́на бо слꙋже́нїе пи́смене и҆стрꙋга́въ, вѣ̑рнымъ ѡ҆блиста́лъ є҆сѝ ра́зꙋмъ дꙋ́ха. тѣ́мже и҆ въ тре́тїе нб҃о досто́йнѣ взѧ́тсѧ превы́спреннѡ, и҆ въ ра́й дости́глъ є҆сѝ, па́ѵле а҆пⷭ҇ле: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть твою̀.
Сла́ва, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Свѣтолꙋ́чными сїѧ̑нїи, ꙗ҆́коже ѕвѣ́зды зємны́ѧ концы̀ просвѣща́ете ᲂу҆чє́нїи ст҃ы́ѧ про́повѣди, нбⷭ҇нїи таи́нницы, гдⷭ҇ни а҆пⷭ҇ли.
И҆ ны́нѣ, бг҃оро́диченъ:
Те́плое застꙋпле́нїе сꙋ́щымъ въ бѣда́хъ, и҆ помо́щницꙋ на́шꙋ, и҆ къ бг҃ꙋ премѣне́нїе, є҆́юже тлѝ и҆зба́вихомсѧ, бцⷣꙋ вѣ́рнїи ᲂу҆блажа́емъ.
По полѷеле́и сѣда́ленъ, гла́съ и҃. Подо́бенъ: Премꙋ́дрости:
Верхѡ́вныѧ ꙗ҆́вльшыѧсѧ ѿ ᲂу҆ч҃ни̑къ, вєли́кїѧ свѣти́льники и҆ свѣ̑тлыѧ, петра̀ да восхва́лимъ и҆ премꙋ́драго па́ѵла: ѻ҆гне́мъ бо бжⷭ҇твеннагѡ просїѧ́вшыѧ дх҃а, мглꙋ̀ пре́лести попали́ша всю̀: тѣ́мже и҆ вы́шнѧгѡ црⷭ҇твїѧ ѻ҆рꙋ̑жницы досто́йнѣ показа́шасѧ, и҆ бл҃года́ти сопрестѡ́льницы. сегѡ̀ ра́ди вопїе́мъ: а҆пⷭ҇ли хрⷭ҇та̀ бг҃а, прегрѣше́нїй ѡ҆ставле́нїе и҆спроси́те пра́зднꙋющымъ любо́вїю свѧтꙋ́ю па́мѧть ва́шꙋ.
Два́жды.
Сла́ва, и҆ ны́нѣ, бг҃оро́диченъ:
Ꙗ҆́кѡ всенепоро́чнаѧ невѣ́сто творцꙋ̀, ꙗ҆́кѡ неискꙋсомꙋ́жнаѧ мт҃и и҆зба́вителѧ, прїѧ́телище ꙗ҆́кѡ сꙋ́щи ᲂу҆тѣ́шителѧ, препѣ́таѧ, беззако́нїю мѧ̀ сꙋ́ща скве́рное ѻ҆би́телище, и҆ бѣсѡ́мъ и҆гра́лище въ ра́зꙋмѣ бы́вша, потщи́сѧ ѿ тѣ́хъ ѕлодѣ́йства мѧ̀ и҆зба́вити, и҆ свѣ́тлое жили́ще добродѣ́телей совершѝ, свѣтоно́снаѧ, нетлѣ́ннаѧ: ѿженѝ ѻ҆́блакъ страсте́й, и҆ вы́шнѧгѡ прича́стїѧ сподо́би, и҆ свѣ́та невече́рнѧгѡ, моли́твами твои́ми.
Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ. Сті́хъ: Небеса̀ повѣ́даютъ сла́вꙋ бж҃їю: Всѧ́кое дыха́нїе: Сті́хъ: Хвали́те бг҃а во ст҃ы́хъ є҆гѡ̀: Є҆ѵⷢ҇лїе і҆ѡа́нна, зача́ло ѯ҃з.
По н҃-мъ ѱалмѣ̀ стїхи́ра, гла́съ ѕ҃. Самогла́сна:
Благоче́стїѧ и҆́стинныѧ проповѣ́дники, и҆ цр҃кве пресвѣ́тлыѧ ѕвѣ́зды, пѣ́сньми похва́льными почти́мъ, петра̀ ка́менѧ вѣ́ры, и҆ па́ѵла и҆́стиннаго ᲂу҆чи́телѧ, и҆ таи́нника хрⷭ҇то́ва. сі́и бо и҆́стинное сло́во всѣ́ѧвше въ сердца̀ вѣ́рныхъ, всѣ̑мъ плодоно́сїе да́рꙋюща, и҆ мо́лѧтъ хрⷭ҇та̀ бг҃а, спасти́сѧ дꙋша́мъ на́шымъ.
Канѡ́на два̀. Творе́нїе і҆ѡа́нна дамаскина̀. Пе́рвый ст҃а́гѡ а҆пⷭ҇ла петра̀, гла́съ д҃, со і҆рмосо́мъ на и҃. І҆рмо́съ по два́жды: тропарѝ на ѕ҃:
Пѣ́снь а҃. І҆рмо́съ:
Нѣ́сть тебѣ̀ подо́бенъ, препросла́вленный гдⷭ҇и, рꙋко́ю бо крѣ́пкою и҆зба́вилъ є҆сѝ лю́ди, ꙗ҆̀же стѧжа́лъ є҆сѝ, чл҃вѣколю́бче.
Верхо́внѣйшаго а҆пⷭ҇лѡвъ дне́сь, ꙗ҆́кѡ первозва́ннаго хрⷭ҇то́ва, бг҃одохнове́нными пѣ́сньми досто́йнѡ воспои́мъ.
Тѧ̀ предвѣ́чный проꙋвѣ́дѣвъ пред̾ꙋста́ви, всебл҃же́нне пе́тре, ꙗ҆́кѡ предста́телѧ своеѧ̀ цр҃кве, и҆ первопресто́льника.
Ни пло́ть, нижѐ кро́вь тебѣ̀, но ѻ҆ц҃ъ вдохнꙋ̀, хрⷭ҇та̀ бг҃осло́вити сн҃а и҆́стиннаго бг҃а вы́шнѧгѡ, а҆пⷭ҇ле.
Бг҃оро́диченъ:
Го́рꙋ ст҃ꙋ́ю, превы́шнее носи́ло, мт҃рь бж҃їю и҆ дв҃ꙋ и҆́стиннꙋю по ржⷭ҇твѣ̀, воспое́мъ.
И҆́нъ канѡ́нъ ст҃а́гѡ а҆пⷭ҇ла па́ѵла, тропарѝ на ѕ҃.
Гла́съ и҃. Пѣ́снь а҃. І҆рмо́съ:
Посѣ́ченный несѣко́маго пресѣчѐ, и҆ ви́дѣ со́лнце зе́млю, ю҆́же не ви́дѣ, лю́таго врага̀ вода̀ потопѝ, и҆ непроходи́мое про́йде і҆и҃ль, пѣ́снь же воспѣва́шесѧ: гдⷭ҇еви пои́мъ, сла́внѡ бо просла́висѧ.
Ꙗ҆́коже сꙋ̑щаѧ нарица́ѧ не сꙋ̑щаѧ, хрⷭ҇то́съ бжⷭ҇твеннымъ ра́зꙋмомъ, па́ѵле всебл҃же́нне: то́й и҆зъ ма́тернѧ чре́ва тѧ̀ и҆збра̀, понестѝ предъ ꙗ҆зы́ки бжⷭ҇твенное є҆гѡ̀ и҆́мѧ, є҆́же па́че всѧ́кагѡ и҆́мене: сла́внѡ бо просла́висѧ.
Бꙋ́дꙋщее возвѣща́ѧ тебѣ̀ сїѧ́нїе благоче́стїѧ, па́ѵле, и҆ ле́сти ѡ҆чище́нїе, хрⷭ҇то́съ ꙗ҆́вльсѧ на горѣ̀ молнїезра́ченъ, ѻ҆́чи ᲂу҆́бѡ помрача́етъ плотскі̑ѧ, дꙋшє́вныѧ же вразꙋмлѧ́етъ трⷪ҇ческимъ ра́зꙋмомъ: сла́внѡ бо просла́висѧ.
Ѡ҆брѣ́занїе ᲂу҆́бѡ соверша́ѧ ѻ҆смодне́вное, и҆ ревни́тель ѻ҆те́ческихъ, па́ѵле, преда́нїй, ѿ сѣ́мене є҆вре́йска, колѣ́на венїами́нова, по зако́нꙋ же фарїсе́й ꙗ҆́вльсѧ, вмѣни́лъ є҆сѝ всѧ̑ ᲂу҆ме́ты, и҆ хрⷭ҇та̀ приѡбрѣ́лъ є҆сѝ: сла́внѡ бо просла́висѧ.
Бг҃оро́диченъ:
Чтⷭ҇аѧ мт҃и бг҃а вседержи́телѧ, ѿ ца́рскагѡ колѣ́на, влⷣчце, и҆зра́стши, и҆ є҆ди́на бг҃а всѣ́ми ца́рствꙋющаго, ро́ждшаѧ пло́тїю па́че є҆стества̀, ѿ бѣ́дъ мѧ̀ спасѝ, сн҃ꙋ твоемꙋ̀ пою́ща: сла́внѡ бо просла́висѧ.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃. І҆рмо́съ:
Не мꙋ́дростїю и҆ си́лою, и҆ бога́тствомъ хва́лимсѧ, но тобо́ю, ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо свѧ́тъ, па́че тебє̀, чл҃вѣколю́бче.
Тѧ̀ блаже́нна, сла̑дкаѧ ᲂу҆ста̀ хрⷭ҇та̀ бг҃а, и҆ сокро́вище тве́рдо црⷭ҇твїѧ показа́ша. тѣ́мже воспѣва́емъ тѧ̀, пе́тре а҆пⷭ҇толе.
На ка́мени твоегѡ̀ бг҃осло́вїѧ водрꙋзѝ влⷣка і҆и҃съ це́рковь непрекло́ннꙋ, въ не́йже тѧ̀, а҆пⷭ҇ле пе́тре, сла́вимъ.
Ꙗ҆́кѡ пребо́льши а҆́гг҃лъ пе́тръ въ тѣлесѝ: во свѣ́тломъ бо прише́ствїи сего̀ хрⷭ҇то́съ бг҃ъ сꙋдїю́ же и҆ сосѣда́телѧ бы́ти речѐ.
Бг҃оро́диченъ:
Неискꙋсобра́чнаѧ бг҃а пло́тїю ро́ждшаѧ, страстны́ми прилѡ́ги преклоне́на мѧ̀ ᲂу҆твердѝ: нѣ́сть бо, чⷭ҇таѧ, ра́звѣ тебє̀ помо́щницы.
И҆́нъ. І҆рмо́съ:
Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Ты̀ ка́мень ѡ҆снова́нїѧ вѣ̑рнымъ дꙋша́мъ положи́лсѧ є҆сѝ многоцѣ́ненъ, краеꙋго́ленъ сп҃са и҆ гдⷭ҇а.
Па́ѵле всеблаже́нне, на ѡ҆снова́нїи твое́мъ, моли́сѧ, добродѣ́телей всехва́льныхъ назда́тисѧ свѣ́тлости.
Всегда̀ ме́ртвость і҆и҃совꙋ на твое́мъ тѣ́лѣ соверше́ннѡ, па́ѵле, ѡ҆бносѧ́й, сподо́билсѧ є҆сѝ и҆́стинныѧ жи́зни.
Бг҃оро́диченъ:
Тѧ̀ всѝ стѧжа́хомъ прибѣ́жище, и҆ стѣ́нꙋ на́шꙋ хрⷭ҇тїа́не: тѧ̀ славосло́вимъ немо́лчнѡ, безневѣ́стнаѧ.
Ѵ҆пакоѝ, гла́съ и҃:
Ка́ѧ темни́ца не и҆мѣ̀ тебѐ ю҆́зника; ка́ѧ же цр҃ковь не и҆́мать тѧ̀ виті́ю; дама́скъ великомꙋ́дрствꙋетъ ѡ҆ тебѣ̀, па́ѵле, вѣ́дѣ бо тѧ̀ запѧ́та свѣ́томъ: ри́мъ твою̀ кро́вь прїе́мый, и҆ то́й хва́литсѧ: но и҆ та́рсъ мно́жае ра́дꙋетсѧ, и҆ лю́битъ, почита́ѧ твоѧ̑ пелєны̀. пе́тре, вѣ́ры ка́меню, па́ѵле, похвало̀ вселе́нныѧ, ѿ ри́ма соше́дшесѧ ᲂу҆тверди́те на́съ.
Пѣ́снь д҃. І҆рмо́съ:
Се́й бг҃ъ на́шъ, ѿ дв҃ы вопло́щсѧ, и҆ є҆стество̀ ѡ҆божи́въ, є҆го́же воспѣва́юще воспои́мъ: сла́ва си́лѣ твое́й, гдⷭ҇и.
Человѣ́кѡмъ ловца́ тѧ, ꙗ҆́коже ѡ҆бѣща̀ хрⷭ҇то́съ, содѣ́ла бжⷭ҇твенна своеѧ̀ цр҃кве, пе́рвомꙋ врꙋчи́въ корми̑ла.
Тобо́ю ᲂу҆молѧ́емь жизнода́вецъ і҆и҃съ, вѧза́ти же и҆ рѣши́ти да́вый тебѣ̀ вла́сть, пе́тре, да бꙋ́детъ мѝ ми́лостивъ.
Хрⷭ҇то́во црⷭ҇твїе ѿве́рсти, прилѣ́жнѡ моли́сѧ, пе́тре, бжⷭ҇твеннꙋю твою̀ па́мѧть вѣ́рою несꙋмнѣ́нною чтꙋ́щымъ.
Бг҃оро́диченъ:
Гпⷭ҇жѐ всепѣ́таѧ бг҃ороди́тельнице, моѧ̑ помышлє́нїѧ твои́ми моли́твами ѡ҆чи́стивши, покажи́ мѧ благопло́дна, мт҃и всѣ́хъ бг҃а.
И҆́нъ. І҆рмо́съ:
Всѣ́лъ є҆сѝ на ко́ни, а҆пⷭ҇лы твоѧ̑, гдⷭ҇и, и҆ прїѧ́лъ є҆сѝ рꙋка́ма твои́ма ᲂу҆зды̑ и҆́хъ, и҆ спасе́нїе бы́сть ѣ҆жде́нїе твоѐ вѣ́рнѡ пою́щымъ: сла́ва си́лѣ твое́й, гдⷭ҇и.
Всѣ́де ꙗ҆́коже ле́въ, ꙗ҆рови́днѡ погꙋблѧ́ѧ хрⷭ҇то́вꙋ цр҃ковь, са́ѵлъ и҆ногда̀: ꙗ҆́тъ же бы́въ бжⷭ҇твеннымъ гла́сомъ а҆́гнца бж҃їѧ, є҆го́же гонѧ́ше, ста́до ꙗ҆́кѡ па́стырю врꙋча́етъ.
Хотѧ́й просвѣти́ти вселе́ннꙋю ѡ҆мрача́етсѧ: а҆на́нїа же къ семꙋ̀ посла́сѧ, дꙋше́вное же просвѣще́нїе даѧ́й и҆ тѣле́сное, ѿ бжⷭ҇твеннагѡ ꙗ҆вле́нїѧ, сосꙋ́дъ и҆збра́нъ показа́въ того̀.
Па́ѵломъ досто́йнѡ дама́скъ напоѧ́етсѧ: ѿ сегѡ́ бо ꙗ҆́коже ѿ раѧ̀ и҆ногда̀ во́дъ бжⷭ҇твенныхъ се́й произы́де вели́кїй и҆сто́чникъ, и҆ ᲂу҆поѝ всю̀ бг҃оразꙋ́мїемъ незави́стнѡ зе́млю.
Бг҃оро́диченъ:
Низложѝ си̑льныѧ со престѡ́лъ гдⷭ҇ь, дв҃а и҆ мт҃и ꙗ҆́коже речѐ, а҆́лчꙋщыѧ же бжⷭ҇твенныхъ бла̑гъ и҆спо́лни, вѣ́рою зовꙋ́щыѧ: сла́ва си́лѣ твое́й, гдⷭ҇и.
Пѣ́снь є҃. І҆рмо́съ:
Стѧжа́вый ны̀ и҆збра̑нныѧ лю́ди кро́вїю твое́ю, гдⷭ҇и, тво́й ми́ръ да́ждь на́мъ, во є҆диномы́слїи сохранѧ́ѧ ста́до твоѐ.
И҆́же ѿ любвѐ прїи́мъ дерзнове́нїе къ бг҃ꙋ, досто́йнѡ чꙋди́мь быва́ше, лове́цъ и҆ невѣ́жда, чꙋдодѣ́йствꙋѧ пресла́внѡ благода́тїю.
Не зла́то тебє̀ ра́ди, ни сребро̀, хрⷭ҇тѐ, бжⷭ҇твенный тво́й а҆пⷭ҇толъ, но добродѣ́тель стѧжа́въ, чꙋде́съ ѡ҆богати́сѧ си́лою.
И҆справлѧ́хꙋсѧ стѡпы̀, и҆ гле́знѣ хромы́хъ, дѣ́йственнымъ твои́мъ глаго́ломъ: бжⷭ҇твеннымъ бо дх҃омъ соверша́хꙋсѧ пресла̑вныѧ вє́щи.
Бг҃оро́диченъ:
Воплоти́сѧ бг҃ъ по ѵ҆поста́си, чⷭ҇таѧ, и҆зъ тебє̀ пло́тїю соединѧ́емь, пребы́въ неизмѣ́ненъ, по бжⷭ҇твенномꙋ сꙋществꙋ̀ безпло́тенъ.
И҆́нъ. І҆рмо́съ:
Просвѣтѝ на́съ повелѣ́нїи твои́ми, гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ, чл҃вѣколю́бче.
Ты̀ и҆́стиннꙋю и҆збра́лъ є҆сѝ, па́ѵле, похвалꙋ̀, крⷭ҇тъ цр҃ѧ̀ хрⷭ҇та̀ при́снѡ носѧ̀, ꙗ҆́коже побѣ́дꙋ, а҆пⷭ҇ле.
Тебѣ̀ є҆́же жи́ти, хрⷭ҇то́съ, и҆ є҆́же ᲂу҆мре́ти, приѡбрѣ́тенїе и҆зрѧ́дно: любо́вїю бо сраспѧ́лсѧ є҆сѝ распе́ншемꙋсѧ на́съ ра́ди, па́ѵле пресла́вне.
Ра́дꙋешисѧ вои́стиннꙋ ѡ҆ гдⷭ҇ѣ, па́ѵле честны́й, и҆зше́дъ и҆зъ тѣлесѐ, и҆ ѿше́дъ ко хрⷭ҇тꙋ̀ жизнода́вцꙋ бг҃ꙋ.
Бг҃оро́диченъ:
Молѝ при́снѡ сн҃а твоего̀ и҆ бг҃а на́шего, неискꙋсобра́чнаѧ марі́е чⷭ҇таѧ, посла́ти на́мъ вѣ̑рнымъ ми́лость.
Пѣ́снь ѕ҃. І҆рмо́съ:
Въ ки́тѣ, хрⷭ҇тѐ, тридне́вновавъ і҆ѡ́на, прописа́ тѧ безсме́ртнаго, ꙗ҆́кѡ ме́ртва во́лею, въ се́рдцѣ земнѣ́мъ тридне́вновавша.
Ꙗ҆́коже дре́вле, хрⷭ҇тѐ, десни́цею твое́ю по водѣ̀ пѣ́ша ходѧ́ща петра̀ спа́слъ є҆сѝ: и҆ менѐ потоплѧ́ема бꙋ́рею лю́тыхъ напа́стей спасѝ, ꙗ҆́кѡ милосе́рдъ.
Ѡ҆ста́вилъ є҆сѝ, ѽ пе́тре, не сꙋ̑щаѧ, и҆ сꙋ̑щаѧ дости́глъ є҆сѝ, ꙗ҆́коже нѣ́кїй кꙋпе́цъ, и҆ ꙗ҆́вѣ ᲂу҆лови́лъ є҆сѝ би́серъ, хрⷭ҇та̀, многоцѣ́нный.
И҆скꙋша́ти безꙋ́мнѡ покꙋси́вшыѧсѧ дх҃а прест҃а́го, пе́тре, ᲂу҆мертви́лъ є҆сѝ: є҆го́же бг҃осло́вилъ є҆сѝ ты̀ пе́рвѣе, ꙗ҆́вѣ и҆сповѣ́давъ бг҃а, всеблаже́нне.
Бг҃оро́диченъ:
Всѧ́кагѡ вы́шша сꙋщества̀ сло́во бж҃їе родила̀ є҆сѝ воплоще́нно на́мъ: тѣ́мже бцⷣꙋ тѧ̀ ᲂу҆стна́ми же и҆ дꙋше́ю проповѣ́дꙋемъ.
И҆́нъ. І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑ ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Всѧ̑ пренебре́гъ кра̑снаѧ мі́ра, ᲂу҆ѧ́звенъ влⷣчнею любо́вїю и҆ ѻ҆́бщагѡ спасе́нїѧ жела́нїемъ, свидѣ́тельствовати томꙋ̀ и҆зво́ливъ, ѽ па́ѵле блаже́нне, и҆ ны́нѣ ѡ҆ вселе́ннѣй моли́сѧ.
Ꙗ҆́кѡ и҆зрѧ́дный влⷣцѣ подо́бникъ, и҆ въ того̀ ѡ҆дѣ́ѧнъ, па́ѵле, вои́стиннꙋ всѣ̑мъ бы́лъ є҆сѝ всѧ́къ, да всѧ̑ приѡбрѧ́щеши и҆ спасе́ши лю́ди: и҆ спа́слъ є҆сѝ ꙗ҆́кѡ вои́стиннꙋ, хрⷭ҇тꙋ̀ ᲂу҆лови́въ концы̀.
Досто́йнѡ тебѣ̀ дарова̀ хрⷭ҇то́съ житїѐ, а҆пⷭ҇ле па́ѵле, на нб҃сѣ́хъ: пребыва́ющагѡ бо здѣ̀ не возжела́лъ є҆сѝ гра́да, бл҃же́нне, вѣ́ренъ слꙋжи́тель бы́въ, и҆ строи́тель та̑инъ є҆гѡ̀.
Бг҃оро́диченъ:
Призрѣ̀ на тѧ̀ гдⷭ҇и, моѐ ѡ҆бновлѧ́ѧ сꙋщество̀ ꙗ҆́кѡ си́ленъ, вели̑чїѧ сотво́рь, бг҃ороди́тельнице, ꙗ҆́коже рекла̀ є҆сѝ, всенепоро́чнаѧ, и҆ спасе́ мѧ тобо́ю и҆зъ тлѝ бг҃ъ мо́й, ꙗ҆́кѡ милосе́рдъ.
Конда́къ, гла́съ в҃:
Твє́рдыѧ и҆ бг҃овѣща̑нныѧ проповѣ́датели, ве́рхъ а҆пⷭ҇толѡвъ твои́хъ, гдⷭ҇и, прїѧ́лъ є҆сѝ въ наслажде́нїе благи́хъ твои́хъ и҆ поко́й: болѣ̑зни бо ѻ҆́нѣхъ и҆ сме́рть прїѧ́лъ є҆сѝ па́че всѧ́кагѡ всепло́дїѧ, є҆ди́не свѣ́дый сердє́чнаѧ.
І҆́косъ:
Оу҆ѧснѝ мо́й ѧ҆зы́къ, сп҃се мо́й, разшири́въ моѧ̑ ᲂу҆ста̀, и҆ и҆спо́лнивъ ѧ҆̀, ᲂу҆милѝ се́рдце моѐ, да ꙗ҆̀же глаго́лю, послѣ́дꙋю, и҆ ꙗ҆̀же ᲂу҆́бѡ ᲂу҆чꙋ̀, сотворю̀ пе́рвѣе: всѧ́къ бо творѧ̀ и҆ ᲂу҆ча̀, речѐ, се́й вели́къ є҆́сть. а҆́ще бо глаго́лю, и҆ не творю̀, ꙗ҆́кѡ мѣ́дь звенѧ́щаѧ вмѣню́сѧ: тѣ́мже рещи́ ми подѡ́бнаѧ, и҆ твори́ти полє́знаѧ да́рꙋй, є҆ди́не свѣ́дый сердє́чнаѧ.
Пѣ́снь з҃. І҆рмо́съ:
Въ нача́лѣ безнача́льное сло́во, со ѻ҆ц҃е́мъ и҆ дх҃омъ, сн҃ъ є҆диноро́дный, бл҃гослове́нъ є҆сѝ и҆ превозноси́мый, бж҃е ѻ҆тє́цъ на́шихъ.
Ми́лостивномꙋ бжⷭ҇твеннымъ про́мысломъ хрⷭ҇то́вымъ наказꙋ́емь, подо́битисѧ попꙋще́нъ бы́лъ є҆сѝ, пре́жде стрⷭ҇ти, пе́тре, ѿверже́нїѧ подпа́сти волне́нїю.
Тебѣ̀ хрⷭ҇то́съ первозва́нномꙋ, и҆ ѕѣлѡ̀ возлю́бленномꙋ, ꙗ҆́кѡ предсѣда́телю благосла́внꙋ а҆пⷭ҇лѡвъ пе́рвомꙋ ꙗ҆влѧ́етсѧ, воскр҃съ ѿ гро́ба.
Твоѐ трикра́тное, є҆́же пре́жде стрⷭ҇ти, и҆сцѣлѧ́ѧ ѿверже́нїе влⷣка, трикра́тнымъ бг҃овѣща́ннымъ, пе́тре, вопроше́нїемъ ᲂу҆твержда́етъ любо́вь.
Є҆́же ко хрⷭ҇тꙋ̀, пе́тре, любле́нїѧ предлага́лъ є҆сѝ свидѣ́телѧ, и҆ всеви́дѧщаго ꙗ҆́кѡ бг҃а сло́ва: тѣ́мже и҆ люби́мое врꙋча́етъ тебѣ̀ ста́до.
Бг҃оро́диченъ:
Ꙗ҆́же во ᲂу҆тро́бѣ превѣ́чное ѿ ѻ҆ц҃а̀ возсїѧ́вша бг҃а сло́ва, пло́тїю заче́ншꙋю, всѝ ᲂу҆блажа́емъ, ꙗ҆́кѡ мт҃рь всѣ́хъ бг҃а.
И҆́нъ. І҆рмо́съ:
На по́лѣ деи́рѣ и҆ногда̀ мꙋчи́тель пе́щь поста́ви на мꙋче́нїе бг҃оно́сныхъ, въ не́йже трѝ ѻ҆́троки пѣсносло́вѧхꙋ є҆ди́наго бг҃а, тро́ичнѡ воспѣва́хꙋ глаго́люще: ѻ҆тє́цъ бж҃е, благослове́нъ є҆сѝ.
Бы́сть, хрⷭ҇тѐ, печа́ть и҆ вѣне́цъ а҆пⷭ҇лѡвъ твои́хъ, и҆́же напослѣ́докъ зва́нный време́нъ, тща́нїемъ же всѣ́хъ превозше́дъ. съ ни́мже лю́дїе цр҃ко́внїи пою́тъ тебѣ̀: ѻ҆тє́цъ на́шихъ бж҃е, бл҃гослове́нъ є҆сѝ.
А҆́ще и҆ гони́въ пе́рвѣе цр҃ковь твою̀ па́ѵелъ ᲂу҆́зникъ, но преминꙋ̀ дре́внюю де́рзость твое́ю ре́вностїю послѣдѝ. собра́ бо, хрⷭ҇тѐ, ꙗ҆зы́ки зовꙋ́щыѧ: ѻ҆тє́цъ на́шихъ бж҃е, бл҃гослове́нъ є҆сѝ.
Ты̀ и҆зъ і҆ерꙋсали́ма проповѣ́давъ всѣ̑мъ є҆ѵⷢ҇лїе, ѡ҆б̾ѧ́тъ же ѻ҆́крестъ всю̀ зе́млю, па́ѵле, да́же до конє́цъ і҆ллѷрі́ка ᲂу҆чѧ̀, взыва́лъ є҆сѝ: ѻ҆тє́цъ на́шихъ бж҃е, бл҃гослове́нъ є҆сѝ.
Во ᲂу҆́жасѣ взѧ́тъ бы́въ, тре́тїе дости́глъ є҆сѝ нб҃о, пребога́те, и҆ ᲂу҆слы́шавъ неизглагѡ́ланнаѧ словеса̀, вопїе́ши: сла́ва превы́шнемꙋ ѻ҆ц҃ꙋ̀, и҆ сн҃ꙋ: сїѧ́нїе же сопресто́льно и҆спыта́ющагѡ ꙗ҆́вѣ дх҃а бж҃їѧ глꙋбины̑.
Бг҃оро́диченъ:
Ꙗ҆́коже на рꙋно̀ до́ждь, на тѧ̀ сни́де, дв҃о, хрⷭ҇то́съ бг҃ъ, и҆ плотоно́сецъ и҆зъ тебє̀ про́йде, соединѧ́ѧ пре́жде разстоѧ̑щаѧ, ми́ръ на землѝ и҆ на нб҃сѝ да́рꙋѧ: ѻ҆тє́цъ на́шихъ бж҃е, бл҃гослове́нъ є҆сѝ.
Пѣ́снь и҃. І҆рмо́съ:
Всѧ́чєскаѧ носѧ́й непристꙋ́пною твое́ю си́лою, хрⷭ҇тѐ, преподѡ́бныѧ твоѧ̑ ѻ҆́троки въ пла́мени ѡ҆роси́лъ є҆сѝ, зовꙋ́щыѧ: благослови́те всѧ̑ дѣла̀ гдⷭ҇нѧ гдⷭ҇а.
Воздѣ́жꙋтъ твоѝ рꙋ́цѣ, и҆ ко крⷭ҇тꙋ́ тѧ препоѧ́шꙋтъ, влⷣка предре́къ, пе́тре, повелѣва́етъ послѣ́довати зовꙋ́щꙋ: благослови́те, всѧ̑ дѣла̀ гдⷭ҇нѧ, гдⷭ҇а.
Благода́ти сло́вомъ є҆не́а ᲂу҆́бѡ разсла́блена лю́тѣ, таві́ѳꙋ же ᲂу҆ме́ршꙋю чꙋдодѣ́йствꙋѧ, воскреси́лъ є҆сѝ, зовꙋ́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.
И҆́же петрꙋ̀ ꙗ҆зы́ки ѡ҆чище́ны повѣ́давъ, хрⷭ҇тѐ, дꙋхо́вною заре́ю и҆ мнѣ̀ помышлє́нїѧ ѡ҆чи́сти, зовꙋ́щꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Всест҃а́ѧ дв҃о, ꙗ҆́же бг҃а сло́ва ро́ждшаѧ пло́тїю, дꙋшѝ моеѧ̀ мра́къ, твои́ми моли́твами ѿгна́вши, просвѣтѝ, взыва́юща: бл҃гослови́те, всѧ̑ дѣла̀ гдⷭ҇нѧ, гдⷭ҇а.
И҆́нъ. І҆рмо́съ:
На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте, и҆ превозноси́те во всѧ̑ вѣ́ки.
Сраствори́сѧ любо́вїю твое́ю па́ѵелъ, до́брымъ же и҆змѣне́нїемъ и҆зстꙋпѝ: не себѣ́ бо живѧ́ше сла́вный, и҆мѧ́ше же, ще́дре, живꙋ́ща тѧ̀ въ себѣ̀ во всѧ̑ вѣ́ки.
Ты̀ ѡ҆брꙋчи́лъ є҆сѝ, ꙗ҆́коже невѣ́стꙋ предста́вити женихꙋ̀ хрⷭ҇тꙋ̀ цр҃ковь: невѣстово́ждь бо сеѧ̀ показа́лсѧ є҆сѝ, па́ѵле бг҃оно́се. тѣ́мже тѧ̀ сла́витъ во всѧ̑ вѣ́ки.
Подвиза́лсѧ є҆сѝ до́брымъ по́двигомъ, и҆ сконча́въ тече́нїе твоѐ зако́ннѡ, сокро́вище вѣ́ры соблю́лъ є҆сѝ. тѣ́мже вѣнцє́въ, па́ѵле, сподо́билсѧ є҆сѝ пра́вды.
Бг҃оро́диченъ:
Ра́дꙋйсѧ, прⷭ҇то́ле ѻ҆гнезра́чный гдⷭ҇ень: ра́дꙋйсѧ, невѣ́сто неневѣ́стнаѧ, дв҃о: ра́дꙋйсѧ, ѻ҆́блаче сл҃нца возсїѧ́вшаѧ пра́вды. є҆го́же превозно́симъ во всѧ̑ вѣ́ки.
Пѣ́снь ѳ҃. І҆рмо́съ:
Тѧ̀ пресла́внꙋю невѣ́стꙋ, и҆ всест҃ꙋ́ю бцⷣꙋ, зижди́телѧ ро́ждшꙋю неви́димыхъ же и҆ всѣ́хъ ви́димыхъ, пѣ́сньми велича́емъ.
Твоѧ̀ преизѧ́щнаѧ бл҃года́ть сла́витсѧ досто́йнѡ, сѣ́ни бо твое́й стра̑сти немощны́хъ, пе́тре, ѿгонѧ́ющей. тѣ́мже тѧ̀ велича́емъ.
Мечта́нми сі́мѡна волхва̀ бг҃обо́рца взѧ́та къ воздꙋ́шнѣй высотѣ̀ низложи́въ неизглаго́ланною бжⷭ҇твенною си́лою, пе́тръ ᲂу҆блажа́етсѧ.
Согрѣше́нїй разрѣше́нїе моли́твами твои́ми пода́ждь, просвѣще́нїе же се́рдца, и҆ весе́лїе дꙋ́ха, пою́щымъ па́мѧть твою̀, а҆пⷭ҇ле.
Твоѧ̑ всѧ̑ и҆спо́лнєна сла́вы, ѡ҆свѧще́нїѧ же и҆ чꙋде́съ, словеса̀, мо́щи, пе́рсть, и҆ вѣ́рою, пе́тре, покланѧ́ємымъ и҆ любо́вїю бжⷭ҇твєннымъ вери́гамъ.
Бг҃оро́диченъ:
Твоѐ и҆́мѧ пло́дъ чре́ва, содѣ́ѧ лико́вника пѣ́снь пѣ́ти тебѣ̀, и҆́же ра́дость ро́ждши, велегла́снѡ ра́дꙋйсѧ, провѣщава́юща.
И҆́нъ. І҆рмо́съ:
Оу҆ста́вы прешла̀ є҆сѝ є҆стества̀, содѣ́телѧ заче́нши и҆ гдⷭ҇а, и҆ две́рь спасе́нїѧ мі́рови была̀ є҆сѝ: тѣ́мъ тѧ̀, бцⷣе, непреста́ннѡ велича́емъ.
Твои̑мъ покланѧ́емсѧ вери́гамъ, ꙗ҆̀же за хрⷭ҇та̀ ꙗ҆́кѡ ѕлодѣ́й носи́лъ є҆сѝ: ꙗ҆́звы же, па́ѵле, ѡ҆блобыза́емъ, ꙗ҆̀же на сла́внѣмъ твое́мъ и҆ побѣдоно́снѣмъ но́сиши тѣлесѝ.
Ны́нѣ разрѣши́лсѧ є҆сѝ, а҆пⷭ҇ле, ко и҆́же тобо́ю непреста́ннѡ жела́емомꙋ: съ ни́мже ꙗ҆́кѡ слꙋжи́тель водворѧ́ѧсѧ, непреста́нными мольба́ми твоѧ̑ рабы̑ къ себѣ̀ привлецы̀.
Ны́нѣ ника́коже въ гада́нїихъ, нижѐ въ зерца́лѣ хрⷭ҇то́съ тебѣ̀ зри́мь є҆́сть, лице́мъ же па́че зри́тсѧ къ лицꙋ̀, соверше́ннѣ тебѣ̀ ра́зꙋмъ ѿкрыва́ѧ бж҃ества̀.
Бг҃оро́диченъ:
Ты̀, прест҃а́ѧ бг҃ома́ти, похвала̀ хрⷭ҇то́выхъ а҆пⷭ҇толѡвъ была̀ є҆сѝ, мꙋ́ченикѡвъ же сла́ва, и҆ прⷪ҇ро́кѡвъ ѡ҆снова́нїе: тѣ́мже вѣ́рнїи тѧ̀ всѝ достодо́лжнѡ велича́емъ.
Свѣти́ленъ. Подо́бенъ: Жєны̀ ᲂу҆слы́шите:
А҆пⷭ҇лѡвъ всѝ ве́рхъ воспое́мъ, петра̀ и҆ па́ѵла бжⷭ҇твєнныѧ, вселе́нныѧ свѣти́льники, проповѣ́дники вѣ́ры, бг҃ослѡ́вныѧ трꙋбы̑, ᲂу҆че́нїй сказа́тели, цр҃кѡ́вныѧ столпы̀ и҆ разори́тели ле́сти.
Два́жды.
Сла́ва, и҆ ны́нѣ, бг҃оро́диченъ:
Вели́ко и҆ пресла́вно ржⷭ҇тва̀ твоегѡ̀ та́инство, бг҃ора́дованнаѧ ѻ҆трокови́це, и҆ бг҃ома́ти дв҃о, прⷪ҇ро́цы проповѣ́даша, а҆пⷭ҇ли наꙋчи́ша, мꙋ́чєницы и҆сповѣ́даша: а҆́гг҃ли же воспѣва́ютъ, и҆ человѣ́цы покланѧ́ютсѧ.
На хвали́техъ стїхи̑ры на д҃, гла́съ д҃. Подо́бенъ: Зва́нный свы́ше:
Съ нб҃сѐ бл҃года́ть прїе́мь, ꙳ є҆гда̀ вопроше́нїе ᲂу҆ч҃никѡ́мъ сп҃съ ꙳ дванадесѧточи́слєннымъ речѐ а҆пⷭ҇лѡмъ: ꙳ кого́ мѧ глаго́лютъ человѣ́цы бы́ти; ꙳ тогда̀ ᲂу҆́бѡ лꙋ́чшїй а҆пⷭ҇лѡвъ пе́тръ, ꙳ бг҃осло́вствꙋѧ ѿвѣща̀, ꙳ ꙗ҆́снѡ возопи́въ: ꙳ ты̀ є҆сѝ хрⷭ҇то́съ, жива́гѡ бг҃а сн҃ъ. тѣ́мже досто́йнѡ ᲂу҆блажа́етсѧ, ꙳ ꙗ҆́кѡ свы́ше прїе́мь ѿкрове́нїе, ꙳ вѧза́ти же и҆ рѣши́ти ꙳ пра́веднѡ прїе́мь.
И҆́же ѿ ѻ҆ц҃а̀ ꙗ҆́вльсѧ бж҃їе сло́во, ꙳ кого́ мѧ непщꙋ́ете, вопроша́ющꙋ хрⷭ҇тꙋ̀; ꙳ ты̀ жива́гѡ ѻ҆ц҃а̀ сн҃ъ, ꙳ ꙗ҆́кѡ всѣ̑мъ ᲂу҆ста̀ бг҃огласꙋ́ѧ, ꙳ а҆́бїе возопи́лъ є҆сѝ: ꙳ тѣ́мже и҆ бл҃же́нъ є҆сѝ, сі́мѡне ва́ръ і҆ѡ́на, ꙳ возме́здїе прїѧ́лъ є҆сѝ. ꙳ и҆́бо сла́витъ бг҃ъ ꙳ сего̀ вѣ́рнѡ сла́вѧщыѧ, ꙳ и҆ къ воспрїѧ́тїю бога́тнѡ призыва́етъ, ꙳ и҆ ка́менѧ тебѐ непосты́дна, ꙳ цр҃кви водрꙋже́нїе и҆ ѡ҆снова́нїе положѝ.
Свы́ше зва́нъ бы́въ, ꙳ а҆ не ѿ человѣ̑къ, ꙳ є҆гда̀ земна́ѧ тма̀ ꙳ помрачѝ ѻ҆́чи тѣлє́сныѧ, ꙳ нече́стїѧ ѡ҆блича́ѧ сѣ́тованїе, ꙳ тогда̀ нбⷭ҇ный свѣ́тъ ѡ҆блиста̀ ꙳ мы́сленнїи ѻ҆́чи, ꙳ благоче́стїѧ ѿкрыва́ѧ красотꙋ̀. ꙳ тѣ́мже позна́лъ є҆сѝ и҆зводѧ́щаго свѣ́тъ и҆зъ тмы̀, ꙳ хрⷭ҇та̀ бг҃а на́шего: ꙳ є҆го́же молѝ, ꙳ спастѝ и҆ просвѣти́ти дꙋ́шы на́шѧ.
Хрⷭ҇топроповѣ́дникъ сы́й, ꙳ крⷭ҇тнꙋю похвалꙋ̀ носѧ́й, ꙳ ты̀ многорачи́тельнꙋю бж҃е́ственнꙋю любо́вь, ꙳ ꙗ҆́кѡ зрѧ́щихъ свѧзꙋ́ющꙋю къ жела́емомꙋ ꙳ вои́стиннꙋ па́че всѣ́хъ проразсꙋди́лъ є҆сѝ. ꙳ тѣ́мже и҆ ᲂу҆́зникъ прозва́лсѧ є҆сѝ хрⷭ҇то́въ, ꙳ напа́стей неꙋдо́бство, ꙳ ꙗ҆́кѡ сладча́йшее пи́щи всѧ́кїѧ и҆зво́ливый, ꙳ и҆ честны́ѧ кончи́ны разрѣше́нїѧ сподо́билсѧ є҆сѝ, ꙳ живы́й влⷣцѣ твоемꙋ̀: ꙳ є҆го́же молѝ, ꙳ спастѝ и҆ просвѣти́ти дꙋ́шы на́шѧ.
Сла́ва, гла́съ ѕ҃: Космы̀ мона́ха:
Всечестны́й а҆пⷭ҇лѡвъ приспѣ̀ пра́здникъ цр҃кви хрⷭ҇то́вѣ, хода́тайствꙋющїй спасе́нїе всѣ̑мъ на́мъ. Та́йнѡ ᲂу҆́бѡ восплеска́вше, къ си̑мъ рце́мъ: ра́дꙋйтесѧ, свѣти́льницы сꙋ́щымъ во тмѣ̀, мы́сленнагѡ сл҃нца зари̑ ѡ҆блиста́ющїи: ра́дꙋйтесѧ, пе́тре и҆ па́ѵле, ᲂу҆че́нїй бжⷭ҇твенныхъ ѡ҆снова̑нїѧ незы́блєма, дрꙋ́зи хрⷭ҇тѡ́вы, сосꙋ́ди честні́и: прїиди́те посредѝ на́съ неви́димѡ, сподоблѧ́юще дарѡ́въ невеще́ственныхъ ва́шъ пра́здникъ восхвалѧ́ющихъ пѣ́сньми.
И҆ ны́нѣ, бг҃оро́диченъ: Бцⷣе, ты̀ є҆сѝ лоза̀ и҆́стиннаѧ:
Славосло́вїе вели́кое. И҆ ѿпꙋ́стъ.
На лїтꙋргі́и: бл҃жє́нна ѿ канѡ́на а҆пⷭ҇ла петра̀, пѣ́снь г҃-ѧ, на д҃: И҆ па́ѵла, пѣ́снь ѕ҃, на д҃. Прокі́менъ, гла́съ и҃: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ. Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь. А҆пⷭ҇лъ къ корі́нѳѧнѡмъ, зача́ло рч҃г. А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̑, гдⷭ҇и. Є҆ѵⷢ҇лїе матѳе́а, зача́ло ѯ҃з. Прича́стенъ: Во всю̀ зе́млю: Рѧдовы́й а҆пⷭ҇лъ, и҆ є҆ѵⷢ҇лїе вычита́емъ пре́жде.
На трапе́зѣ ᲂу҆тѣше́нїе бра́тїи вели́кое.
А҆́ще слꙋчи́тсѧ се́й пра́здникъ ст҃ы́хъ а҆пⷭ҇лъ въ сре́дꙋ, и҆лѝ въ пѧто́къ, ꙗ҆́мы ры́бꙋ, и҆ пїе́мъ вїно̀.
Подоба́етъ вѣ́дати: Ꙗ҆́кѡ а҆́ще слꙋчи́тсѧ пра́здникъ ст҃ы́хъ а҆пⷭ҇лъ въ недѣ́лю, предварѧ́ютсѧ всѧ̑ воскрє́снаѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.