← претходни дан | Минеј — Јун | следећи дан →
15 июня: Пророка Амоса. Святителя Ионы, митрополита Московского и всея России
Мѣ́сѧца тогѡ́же въ є҃і-й де́нь.
Ст҃а́гѡ прⷪ҇ро́ка а҆мѡ́са.
А҆ллилꙋ́їа, и҆лѝ тропа́рь.
И҆ и҆́же во ст҃ы́хъ ѻ҆ц҃а̀ на́шегѡ і҆ѡ́ны, митрополі́та моско́вскагѡ и҆ всеѧ̀ рѡссі́и.
Слꙋ́жба є҆гѡ̀ пи́сана по се́й слꙋ́жбѣ.
Стїхи̑ры, гла́съ в҃. Подо́бенъ: Є҆гда̀ ѿ дре́ва:
Ѡ҆брѣ́те дꙋхо́внаѧ зарѧ̀ твоегѡ̀ ᲂу҆ма̀, прⷪ҇ро́че, чистотꙋ̀ сїѧ́ющꙋю ꙗ҆́коже зерца́ло ꙗ҆́вственнѡ, и҆ мі́ръ ѡ҆зарѝ, бг҃оразꙋ́мїѧ сїѧ́нїемъ блиста́ющꙋю, и҆ проѡбразꙋ́ющꙋю бжⷭ҇твенныхъ та̑инъ ѻ҆́бразы, благода́ть же всѣ̑мъ человѣ́кѡмъ хотѧ́щꙋю пода́тисѧ, пречꙋ́дне.
Оу҆ста̀ бы́въ бж҃їѧ, нече́стїѧ дѣ́латели ꙗ҆́вѣ ѡ҆бличи́лъ є҆сѝ, сꙋдо́мъ неизбѣ́жнымъ ты̑ѧ ѡ҆сꙋди́въ, пребога́те, пра́вєднымъ ᲂу҆че́нїємъ послѣ́дꙋѧ, и҆ бжⷭ҇твеннымъ сꙋдѡ́мъ. тѣ́мже премꙋ̑дрымъ твои̑мъ глаго́лѡмъ ви́дѧще возведе́нїе, блаже́нне, пѣ́сньми досто́йнѡ восхвалѧ́емъ тѧ̀.
Прⷭ҇то́лꙋ влⷣчню предстоѧ̀, и҆ неизрече́нныѧ и҆ бжⷭ҇твенныѧ сла́вы насыща́емь, добрѡ́ты же зрѧ̀ премі́рныѧ, и҆ свѣ́та наполнѧ́емь, а҆мѡ́се бг҃оглаго́ливе, всѧ̑ чтꙋ́щыѧ тѧ̀ вѣ́рою помина́й, си̑мъ дꙋше́вное спасе́нїе, разрѣше́нїѧ же согрѣше́нїй всѣ̑мъ просѧ̀, бг҃опрїѧ́тне.
И҆́ны стїхи̑ры бцⷣы, гла́съ и҆ подо́бенъ то́йже:
Ра́дꙋйсѧ, солнцезра́чнаѧ ѕвѣздо̀: ра́дꙋйсѧ, вино́внаѧ всѣ́хъ до́брыхъ, пренепоро́чнаѧ: ра́дꙋйсѧ, вмѣсти́вшаѧ бг҃а невмѣсти́маго, ꙗ҆́же кла́съ прозѧ́бшаѧ безсме́ртїѧ: ра́дꙋйсѧ, бжⷭ҇твенное носи́ло и҆ две́ре всесвѣ́тлаѧ: ра́дꙋйсѧ, клѧ́твы ᲂу҆бїе́нїе прароди́тельныѧ на́шеѧ, ѻ҆трокови́це, благи́хъ хода́таица сꙋ́щи.
Всѣ́хъ скорбѧ́щихъ ра́досте, и҆ ѡ҆би́димыхъ предста́тельнице, и҆ ᲂу҆бо́гихъ пита́тельнице, стра́нныхъ же ᲂу҆тѣше́нїе, и҆ же́зле слѣпы́хъ, немощны́хъ посѣще́нїе, трꙋжда́ющихсѧ покро́ве и҆ застꙋ́пнице, и҆ си́рыхъ помо́щнице, мт҃и бг҃а вы́шнѧгѡ, ты̀ є҆сѝ, пречⷭ҇таѧ, потщи́сѧ мо́лимсѧ, спасти́сѧ рабѡ́мъ твои̑мъ.
Покро́въ и҆ застꙋпле́нїе на́мъ хрⷭ҇тїа́нѡмъ ты̀ є҆сѝ, и҆ прибѣ́жище держа́вно мт҃и бг҃а вы́шнѧгѡ, но и҆ ны́нѣ ꙗ҆́кѡ при́снѡ, бо́дренною твое́ю моли́твою не преста́й молѧ́щи, спастѝ рабы̑ твоѧ̑ ѿ ѡ҆бстоѧ́нїй всѣ́хъ, ꙗ҆́кѡ тѧ̀ съ бг҃омъ и҆́мамы застꙋпле́нїе всѝ хрⷭ҇тїа́не, и҆ прибѣ́жище.
Сла́ва, и҆ ны́нѣ, бг҃оро́диченъ:
И҆на́гѡ держа́внагѡ прибѣ́жиша, и҆ крѣ́пости столпа̀ и҆ стѣны̀ неѡбори́мыѧ вои́стиннꙋ не стѧжа́хомъ, ра́звѣ тебє̀, пречⷭ҇таѧ: къ тебѣ̀ прибѣга́емъ, и҆ тебѣ̀ вопїе́мъ: влⷣчце, помозѝ, да не поги́бнемъ, покажѝ твою̀ благода́ть на ны̀, и҆ крѣ́пости сла́вꙋ, и҆ милосе́рдїѧ твоегѡ̀ вели́чество.
Крⷭ҇тобг҃оро́диченъ:
Є҆гда̀ нескве́рнаѧ а҆́гница ви́дѣ своего̀ а҆́гнца на заколе́нїе ꙗ҆́кѡ чл҃вѣ́ка во́лею влеко́ма, пла́чꙋщи глаго́лаше: безча́дствовати мѧ̀ ны́нѣ тщи́шисѧ, хрⷭ҇тѐ, ро́ждшꙋю тѧ̀. что̀ сїѐ сотвори́лъ є҆сѝ, и҆зба́вителю всѧ́ческихъ; ѻ҆ба́че воспѣва́ю и҆ сла́влю твою̀, ю҆́же па́че ᲂу҆ма̀ и҆ сло́ва, кра́йнюю бла́гость, чл҃вѣколю́бче.
Канѡ́нъ.
Гла́съ з҃. Пѣ́снь а҃. І҆рмо́съ:
И҆стрѧ́сшемꙋ бг҃ꙋ фараѡ́на въ мо́ри чермнѣ́мъ, пѣ́снь побѣ́днꙋю пои́мъ, ꙗ҆́кѡ просла́висѧ.
Ѡ҆чи́стивъ мо́й ᲂу҆́мъ ѿ страсте́й мра́чнагѡ по́мысла, прⷪ҇ро́ка твоего̀, влⷣко, а҆мѡ́са пѣ́ти ѡ҆зарѝ.
Таи́нникъ ꙗ҆́вльсѧ и҆́же па́че ᲂу҆ма̀ та̑инъ бж҃їихъ, сподо́билсѧ є҆сѝ прозрѣ́ти, сла́вне, быва́ємаѧ.
Ꙗ҆́кѡ нескве́рное бж҃їе и҆ чи́стое поко́ище ꙗ҆́вльсѧ, ꙗ҆́же дх҃а, а҆мѡ́се, прїѧ́лъ є҆сѝ бжⷭ҇твеннꙋю дѣ́тель.
Бг҃оро́диченъ:
Ты̀ па́дшꙋю а҆да́мовꙋ прⷪ҇ро́чески возста́вила є҆сѝ ски́нїю, сп҃са и҆ бг҃а, пречⷭ҇таѧ, во чре́вѣ носи́вши.
Пѣ́снь г҃. І҆рмо́съ:
Оу҆тверди́сѧ вѣ́рою хрⷭ҇то́ва цр҃ковь, и҆́бо непреста́ннѡ пѣ́сньми вопїе́тъ пою́щи: ст҃ъ є҆сѝ, гдⷭ҇и, и҆ тѧ̀ пое́тъ дꙋ́хъ мо́й.
Ты̀ беззакѡ́нныѧ ѡ҆блича́ѧ, а҆мѡ́се, гдⷭ҇ню пра́вдꙋ пока́зовалъ є҆сѝ, вопїѧ̀, бг҃оѧвле́нне: ст҃ъ є҆сѝ, гдⷭ҇и, спаса́ѧй дꙋ́шы на́шѧ.
Показа́лсѧ є҆сѝ сто́лпъ, прⷪ҇ро́че, но́вагѡ завѣ́та, ѿе́млѧ сегѡ̀ покро́въ, и҆ вѣ́рою зовы́й: ст҃ъ є҆сѝ, гдⷭ҇и, спаса́ѧй дꙋ́шы на́шѧ.
Навы́къ бжⷭ҇твєннаѧ, прⷪ҇ро́че бг҃оглаго́льниче, а҆мѡ́се бж҃е́ственне, просвѣща́ѧ лю́ди, вопїѧ́лъ є҆сѝ: ст҃ъ є҆сѝ, гдⷭ҇и, спаса́ѧй дꙋ́шы на́шѧ.
Бг҃оро́диченъ:
Оу҆тверди́хсѧ и҆сповѣ́давъ бжⷭ҇твенное твоѐ ржⷭ҇тво̀, и҆ предста́тельницꙋ тѧ̀, дв҃о, богатѣ́ѧ зовꙋ̀: ра́дꙋйсѧ, бг҃оневѣ́стнаѧ, наде́ждо моѧ̀ и҆ по́моще.
Сѣда́ленъ, гла́съ г҃. Подо́бенъ: Бжⷭ҇твенныѧ вѣ́ры:
Бжⷭ҇твенный ѻ҆рга́нъ ᲂу҆тѣ́шителевъ, подглаша́емь сегѡ̀, блаже́нне, благода́тїю всегда̀ ꙗ҆́снѡ, прⷪ҇ро́къ бы́лъ є҆сѝ: возглаша́еши бо безвѣ́стныхъ ꙗ҆вле́нїе, и҆ ѡ҆зарѧ́еши вѣ́рою притека́ющыѧ, а҆мѡ́се сла́вне, хрⷭ҇та̀ бг҃а молѝ, дарова́ти на́мъ ве́лїю ми́лость.
Сла́ва, и҆ ны́нѣ, пра́здника, и҆лѝ бг҃оро́диченъ:
Бжⷭ҇твеннагѡ є҆стества̀ не ѿлꙋ́чсѧ, пло́ть бы́въ во чре́вѣ твое́мъ, но бг҃ъ вочл҃вѣ́чсѧ и҆ пребы́сть, и҆́же по рождествѣ̀ мт҃рь тѧ̀ дв҃ꙋ, ꙗ҆́кѡ пре́жде рождества̀, сохрани́въ всенепоро́чнꙋ, є҆ди́нъ гдⷭ҇ь: того̀ прилѣ́жнѡ молѝ, дарова́ти на́мъ ве́лїю ми́лость.
Крⷭ҇тобг҃оро́диченъ:
Нескве́рнаѧ а҆́гница сло́ва, нетлѣ́ннаѧ дв҃а мт҃и, на крⷭ҇тѣ̀ зрѧ́щи повѣ́шена и҆зъ неѧ̀ безъ болѣ́зни прозѧ́бшаго, мт҃ерски подо́бнѡ рыда́ющи, вопїѧ́ше: ᲂу҆вы̀ мнѣ̀, ча́до моѐ, ка́кѡ стра́ждеши во́лею, хотѧ̀ и҆зба́вити ѿ страсте́й безче́стїѧ человѣ́ка;
Пѣ́снь д҃. І҆рмо́съ:
Оу҆слы́шахъ слꙋ́хъ тво́й, гдⷭ҇и, ꙗ҆́кѡ ꙗ҆ви́лсѧ є҆сѝ на землѝ, за є҆́же спасти́ ны. тѣ́мъ вопїе́мъ: сла́ва си́лѣ твое́й, гдⷭ҇и.
Слꙋжа́щыѧ глꙋхи̑мъ і҆́дѡлѡмъ ѡ҆бличи́лъ є҆сѝ лю́ди і҆и҃лєвы: тѣ́мъ плѣнє́ннымъ бы́ти си̑мъ, ре́клъ є҆сѝ, досточꙋ́дне.
Прⷪ҇ро́ка тѧ̀, и҆́же пе́рвѣе па́стырѧ показа̀ бг҃ъ, воспрїе́мъ, свѧщенноѧвле́нне а҆мѡ́се. тѣ́мъ тѧ̀ всѝ вѣ́рою ᲂу҆блажа́емъ.
Ꙗ҆́кѡ зерца́ло ст҃а́гѡ дх҃а прїе́мъ, блиста́нїемъ свѣтолꙋ̑чнаѧ, а҆мѡ́се, всѣ̑мъ проѧвлѧ́еши ра́дꙋѧсѧ благоче́стїе.
Бг҃оро́диченъ:
Сло́во въ тѧ̀ всели́сѧ, чⷭ҇таѧ, сꙋщество̀ моѐ воз̾ѡбразѝ, па́дшее пре́жде престꙋпле́нїемъ.
Пѣ́снь є҃. І҆рмо́съ:
Къ тебѣ̀ ᲂу҆́треннюю, и҆ тебѣ̀ вопїю̀, благоꙋтро́бне гдⷭ҇и: ѡ҆мраче́ннꙋю грѣхмѝ дꙋ́шꙋ мою̀, свѣ́томъ ѡ҆зари́въ за́повѣдей твои́хъ, наста́ви.
Оу҆мерщвле́нныѧ снѣ́дною стрѣло́ю, блаже́нне, ᲂу҆кори́лъ є҆сѝ, ꙗ҆́кѡ непщꙋ́ющымъ и҆спа́днꙋти внꙋ́трєннимъ, и҆ прело́жно бы́ти, и҆ тлѣ́нно наслажде́нїе.
Бога́тыми свѣтоли̑тїи ѡ҆сїѧ́емь ꙗ҆ви́лсѧ є҆сѝ бг҃оглаго́ливъ, и҆ собесѣ́дникъ бж҃їй, возвѣща́ѧ всѣ̑мъ благоче́стїѧ и҆́стинный пꙋ́ть.
И҆зба́вити всѧ̑, тѧ̀ пою́щыѧ, блаже́нне, молѝ, ѿ льще́нїй и҆ сѣ́тей вра́жїихъ, и҆ свѣ́томъ ѡ҆сїѧ́ти нбⷭ҇нымъ, црⷭ҇тва хрⷭ҇то́ва.
Бг҃оро́диченъ:
Бцⷣꙋ и҆сповѣ́дающїи тѧ̀, мт҃и дв҃о, непрее́мнагѡ црⷭ҇твїѧ и҆ пи́щи тобо́ю, бг҃омт҃и, полꙋчи́ти да сподо́бимсѧ.
Пѣ́снь ѕ҃. І҆рмо́съ:
І҆ѡ́на и҆зъ чре́ва а҆́дова вопїѧ́ше: возведѝ ѿ тлѝ живо́тъ мо́й. мы́ же тебѣ̀ вопїе́мъ: всеси́льне сп҃се, поми́лꙋй на́съ.
Свѣ́тлыми и҆́стины зарѧ́ми сїѧ́ѧ, заꙋши́лъ є҆сѝ лжѝ прⷪ҇ро́ка, крѣ́пкѡ ѡ҆блича́ѧ, и҆ предглаго́лѧ тогѡ̀ потребле́нїе.
Два́жды.
Ѡ҆мрачи́лъ є҆сѝ пре́лести пла́мень, прⷪ҇ро́че, ꙗ҆́кѡ со́лнце благоче́стїѧ зарю̀ всѣ̑мъ возсїѧ́ѧ, ꙗ҆́кѡ дх҃а сїѧ́нїе воспрїи́мъ.
Бг҃оро́диченъ:
Пречⷭ҇тагѡ твоегѡ̀ дѣ́вства пою̀, дв҃о, несказа́нное, и҆ честно́е рождество̀, и҆ сла́влю, пречⷭ҇таѧ, и҆́мже спаса́юсѧ тлѝ и҆ сме́рти.
Конда́къ, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Ѡ҆чи́стивъ дх҃омъ, прⷪ҇ро́че, твоѐ свѣтоза́рное се́рдце, сла́вный а҆мѡ́се, прⷪ҇ро́чествїѧ да́ръ свы́ше прїе́мь, возопи́лъ є҆сѝ велегла́снѡ во страна́хъ: сѐ бг҃ъ на́шъ, и҆ не приложи́тсѧ и҆́нъ къ немꙋ̀.
Пѣ́снь з҃. І҆рмо́съ:
Въ пе́щь ѻ҆́гненнꙋю вве́ржени преподо́бнїи ѻ҆́троцы, ѻ҆́гнь въ ро́сꙋ преложи́ша, воспѣва́нїемъ си́це вопїю́ще: благослове́нъ є҆сѝ, гдⷭ҇и, бж҃е ѻ҆тє́цъ на́шихъ.
Є҆́же предглаго́лалъ є҆сѝ бжⷭ҇твенное спасе́нїе ꙗ҆ви́сѧ, а҆мѡ́се прⷪ҇ро́че чꙋ́дне, просвѣщє́нїи благоче́стїѧ ѡ҆сїѧ́ѧ мі́ръ, вопїѧ́лъ є҆сѝ: благослове́нъ є҆сѝ, гдⷭ҇и, бж҃е ѻ҆тє́цъ на́шихъ.
Два́жды.
Вживлѧ́емь бжⷭ҇твенною си́лою, бг҃опроти́вными враги̑ неврежде́нъ бы́лъ є҆сѝ, терпѣли́внѡ ꙗ҆́коже а҆дама́нтъ пребы́лъ є҆сѝ, зовы́й: благослове́нъ є҆сѝ, гдⷭ҇и, бж҃е ѻ҆ц҃ъ на́шихъ.
Бг҃оро́диченъ:
Непостижи́мое рождество̀ дв҃ы славосло́вимъ, и҆́мже сме́рти и҆зба́вихомсѧ. є҆гѡ́же ра́ди ро́ждшисѧ въ нетлѣ́нїе, зове́мъ: благослове́нъ є҆сѝ, гдⷭ҇и, бж҃е ѻ҆тє́цъ на́шихъ.
Пѣ́снь и҃. І҆рмо́съ:
Є҆ди́наго безнача́льнаго цр҃ѧ̀ сла́вы, є҆го́же благословѧ́тъ нбⷭ҇ныѧ си̑лы, и҆ трепе́щꙋтъ чи́ни а҆́гг҃льстїи, по́йте, свѧще́нницы, лю́дїе, превозноси́те є҆го̀ во вѣ́ки.
Ве́сь восте́клъ є҆сѝ на го́рнюю высотꙋ̀, и҆ навы́клъ є҆сѝ неизрече́нныхъ ра́зꙋма, и҆ бы́лъ є҆сѝ сказа́тель сло́ва воплоще́нїѧ, а҆мѡ́се. тѣ́мже тѧ̀ воспѣва́емъ во всѧ̑ вѣ́ки.
Оу҆ма̀ ѻ҆строто́ю всѣ́хъ влⷣкꙋ разꙋмѣ́ти, ꙗ҆́коже є҆́сть мо́щно, сподо́билсѧ є҆сѝ, наꙋча́юща тѧ̀ неизрече́нныхъ ра́зꙋмꙋ, зовы́й: свѧще́нницы, по́йте, лю́дїе, превозноси́те во всѧ̑ вѣ́ки.
Блаже́нство и҆ ра́дость несказа́ннꙋю, и҆ црⷭ҇тво нбⷭ҇ное, ꙗ҆́кѡ прⷪ҇ро́къ полꙋчи́лъ є҆сѝ, нбⷭ҇ныхъ ви́дче, зовы́й благоче́стнѡ: лю́дїе, превозноси́те во всѧ̑ вѣ́ки.
Бг҃оро́диченъ:
Во двою̀ є҆стєствꙋ̀ ѿ трⷪ҇цы є҆ди́наго бг҃олѣ́пнѡ безъ сѣ́мене, бг҃омт҃и, родила̀ є҆сѝ сп҃са мі́ра: тѣ́мъ тѧ̀ вѣ́рнїи любо́вїю превозно́симъ во вѣ́ки.
Пѣ́снь ѳ҃. І҆рмо́съ:
Всепѣ́таѧ небе́съ превы́шшаѧ, безнача́льное сло́во безсѣ́меннѡ заче́ншаѧ, и҆ воплоще́ннаго бг҃а ро́ждшаѧ человѣ́кѡмъ: тѣ́мъ тѧ̀ всѝ велича́емъ.
Бы́въ прⷪ҇ро́ческимъ ꙗ҆вле́нїемъ бг҃одви́жимь ѧ҆зы́къ, бж҃е́ствєннаѧ вѣща́ющь, всѣ̑мъ возвѣсти́лъ є҆сѝ, а҆мѡ́се, бж҃е́ственное милосе́рдїе. тѣ́мже вси́ тѧ при́снѡ ᲂу҆блажа́емъ.
Два́жды.
Несказа́ннѡ прⷪ҇ро́ческое благосла́вїе: и҆́бо ст҃ы́й дх҃ъ въ си́хъ все́льсѧ, свѣтоли́тїѧ своегѡ̀ показа̀ прича́стники, ѿ ни́хже всѝ вѣ́рнїи просвѣща́емсѧ.
Бг҃оро́диченъ:
Ме́ртвости и҆ тлѝ мою̀ ри́зꙋ ѿѧ́ла є҆сѝ, дв҃о, спаси́тельнꙋю ри́зꙋ воплоще́ннаго бг҃а ро́ждши человѣ́кѡмъ. тѣ́мъ тѧ̀ всѝ при́снѡ велича́емъ.
Слꙋ́жба, и҆́же во ст҃ы́хъ, ѻ҆ц҃а̀ на́шегѡ і҆ѡ́ны, митрополи́та моско́вскагѡ и҆ всеѧ̀ рѡссі́и.
Стїхи̑ры на и҃, гла́съ д҃. Подо́бенъ: Зва́нный свы́ше:
Є҆гда̀ бжⷭ҇твенное ꙳ на́йде на тѧ̀ зва́нїе, ꙳ і҆ѡ́но бг҃омꙋ́дре, ꙳ тогда̀ мі́ръ, и҆ ꙗ҆̀же въ мі́рѣ ѡ҆ста́вилъ є҆сѝ, ꙳ и҆ хрⷭ҇тꙋ̀ послѣ́довалъ є҆сѝ ꙳ невозвра́тнымъ по́мысломъ. ꙳ ѿѻнꙋ́дꙋже всеви́дѧщее ѻ҆́ко, ꙳ ви́дѣвъ твоѐ до́брое произволе́нїе, ꙳ ст҃и́тельствомъ тебѐ ᲂу҆краша́етъ: ꙳ сего̀ молѝ, ꙳ и҆ томꙋ̀ помоли́сѧ ꙳ спастѝ и҆ просвѣти́ти дꙋ́шы на́шѧ.
Два́жды.
Є҆гда̀ бжⷭ҇твенное сїѧ́нїе ꙳ въ се́рдцы твое́мъ, ꙳ і҆ѡ́но ст҃и́телю, всели́сѧ, ꙳ тогда̀ ра́дость пресвѣ́тлꙋю, ꙳ и҆ пречестнꙋ́ю сла́вꙋ вопрїи́мъ. ꙳ ѿсю́дꙋ же всѧ̑ сꙋ̑щаѧ, ꙳ ꙗ҆́кѡ преходѧ̑щаѧ и҆мѣ́лъ є҆сѝ: ꙳ є҆ди́номꙋ же бг҃ꙋ ꙳ ѿ се́рдца прилѣпи́лсѧ є҆сѝ. ꙳ того̀ молѝ, ꙳ и҆ томꙋ̀ помоли́сѧ, ꙳ вели́кїй во а҆рхїере́ехъ, ꙳ спастѝ и҆ просвѣти́ти дꙋ́шы на́шѧ.
Є҆гда̀ бжⷭ҇твенное раче́нїе ꙳ на́йде на тѧ̀, ст҃и́телю, ꙳ тогда̀ ве́сь ѿ ю҆́ности себѐ ꙳ влⷣцѣ хрⷭ҇тꙋ̀ возложи́въ, ꙳ сегѡ̀ возжелѣ́лъ є҆сѝ, ꙳ и҆ всѧ́кихъ страсте́й ꙳ до́лꙋ влекꙋ́щихъ ѡ҆чи́щсѧ. ꙳ ѿсю́дꙋ же до́мъ и҆ жили́ще ꙳ прест҃а́гѡ дх҃а ꙗ҆ви́лсѧ є҆сѝ, ꙳ пресла̑внаѧ содѣва́ѧ чꙋдодѣ̑йства: ꙳ хрⷭ҇та̀ молѝ, ꙳ спастѝ и҆ просвѣти́ти дꙋ́шы на́шѧ.
И҆́ны стїхи̑ры, гла́съ то́йже. Подо́бенъ: Ꙗ҆́кѡ до́блѧ:
На землѝ ꙗ҆́кѡ а҆́гг҃лъ пожи́въ, ꙳ всеблаже́нне ст҃и́телю і҆ѡ́но, ꙳ надъ страстьмѝ воцари́лсѧ є҆сѝ, ꙳ хꙋ́ждшее покори́лъ є҆сѝ лꙋ́чшемꙋ. ꙳ тѣ́мже преше́дъ къ непреходѧ́щемꙋ црⷭ҇твїю, ꙳ моли́сѧ при́снѡ, ꙳ низпосла́ти вѣ́рнѡ чтꙋ́щымъ тѧ̀ ꙳ грѣхѡ́въ ѡ҆чище́нїе ꙳ и҆ ве́лїю ми́лость.
Два́жды.
Бг҃одарова́ннꙋю тѝ па́ствꙋ, ꙳ ст҃и́телю і҆ѡ́но, ꙳ твои́ми ᲂу҆чє́нїи до́брѣ ᲂу҆па́слъ є҆сѝ, ꙳ на ѕла́цѣхъ живо́тныхъ: ꙳ ны́нѣ же преше́дъ къ незаходи́момꙋ сїѧ́нїю, и҆ присносꙋ́щномꙋ весе́лїю, ꙳ помина́й, преблаже́нне, лю́ди ꙳ чтꙋ́щыѧ честно́е ᲂу҆спе́нїе твоѐ, ꙳ и҆ молѝ, спасти́сѧ дꙋша́мъ на́шымъ.
Вели́кагѡ а҆рхїере́а, ꙳ і҆ѡ́ны блаже́ннагѡ ꙳ свѧще́ннꙋю па́мѧть дне́сь соверша́юще, ꙳ бжⷭ҇твенными пѣ́сньми, прїиди́те, всѝ почти́мъ, ꙳ ѡ҆ на́съ всегда̀ молѧ́щасѧ, ꙳ низпосла́ти мно́жество щедро́тъ, ꙳ и҆ спасе́нїе дꙋша́мъ на́шымъ.
Сла́ва, гла́съ ѕ҃. Самогла́сенъ:
Благоꙋха́етъ бжⷭ҇твеннаѧ ра́ка моще́й твои́хъ, і҆ѡ́но ст҃и́телю, всѣ̑мъ вѣ̑рнымъ и҆сцѣле́нїе, дꙋша́мъ и҆ тѣлесє́мъ да́рꙋющи. тѣ́мже тѧ̀ мо́лимъ, бг҃одарова́нное твоѐ ста́до въ мі́рѣ соблюстѝ, ѻ҆те́чество же и҆ всѐ правосла́вїе: да всѝ тебѐ ꙗ҆́кѡ и҆́стиннаго па́стырѧ, и҆ моли́твенника къ бг҃ꙋ, непреста́ннѡ велича́емъ.
И҆ ны́нѣ, бг҃оро́диченъ: Кто̀ тебє̀ не ᲂу҆блажи́тъ:
Та́же вхо́дъ. Прокі́менъ днѐ. Парємїѝ.
При́тчей чте́нїе.
[Глава̀ г҃] Па́мѧть пра́веднагѡ съ похвала́ми, и҆ благослове́нїе гдⷭ҇не на главѣ̀ є҆гѡ̀. Блаже́нъ человѣ́къ, и҆́же ѡ҆брѣ́те премꙋ́дрость: и҆ сме́ртенъ, и҆́же ᲂу҆вѣ́дѣ ра́зꙋмъ. Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ: все́ же честно́е недосто́йно є҆ѧ̀ є҆́сть. Долгота́ бо дне́й, и҆ лѣ̑та живота̀ въ десни́цѣ є҆ѧ̀: въ шꙋ́ицѣ же є҆ѧ̀ бога́тство и҆ сла́ва: ѿ ᲂу҆́стъ є҆ѧ̀ и҆схо́дитъ пра́вда, зако́нъ же и҆ ми́лость на ѧ҆зы́цѣ но́ситъ. [и҃] Послꙋ́шайте ᲂу҆̀бо менє̀, ѽ ча̑да! честна̑ѧ бо рекꙋ̀: и҆ бл҃же́нъ человѣ́къ, и҆́же пꙋти̑ моѧ̑ сохрани́тъ: и҆схо́ди бо моѝ, и҆схо́ди живота̀, и҆ ᲂу҆готовлѧ́етсѧ хотѣ́нїе ѿ гдⷭ҇а. Сегѡ̀ ра́ди молю̀ ва́съ, и҆ предлага́ю мо́й гла́съ сыновѡ́мъ человѣ́чєскимъ: ꙗ҆́кѡ а҆́зъ премꙋ́дрость ᲂу҆стро́ихъ, совѣ́тъ и҆ ра́зꙋмъ, и҆ смы́слъ, а҆́зъ призва́хъ. Мо́й совѣ́тъ и҆ ᲂу҆твержде́нїе, мо́й ра́зꙋмъ, моѧ́ же крѣ́пость. А҆́зъ менѐ лю́бѧщыѧ люблю̀, и҆́щꙋщїи же менѐ ѡ҆брѧ́щꙋтъ бл҃года́ть. Разꙋмѣ́йте ᲂу҆́бѡ, неѕло́бивїи, кова́рство, ненака́заннїи же, прилага́йте сердца̀. Послꙋ́шайте менє̀ и҆ па́ки, честна̑ѧ бо рекꙋ̀: и҆ ѿве́рзꙋ ѿ ᲂу҆сте́нъ пра̑ваѧ, ꙗ҆́кѡ и҆́стинѣ поꙋчи́тсѧ горта́нь мо́й, мє́рзски же предо мно́ю ᲂу҆стны̀ лжи̑выѧ. Съ пра́вдою всѝ глаго́лы ᲂу҆́стъ мои́хъ: ничто́же въ ни́хъ стро́потно, нижѐ развраще́нно. Всѧ̑ пра̑ва сꙋ́ть разꙋмѣва́ющымъ, и҆ прѡ́ста ѡ҆брѣта́ющымъ ра́зꙋмъ. Наꙋча́ю бо ва́съ и҆́стинѣ, да бꙋ́детъ ѡ҆ гдⷭ҇ѣ наде́жда ва́ша, и҆ и҆спо́лнитесѧ дх҃а.
Премꙋ́дрости соломѡ́новы чте́нїе.
[Глава̀ і҃] Оу҆ста̀ првⷣнагѡ ка́плютъ премꙋ́дрость: ᲂу҆стнѣ́ же мꙋже́й мꙋ́дрыхъ вѣ́дѧтъ бл҃года́ть. Оу҆ста̀ мꙋ́дрыхъ поꙋча́тсѧ премꙋ́дрости, пра́вда же и҆збавлѧ́етъ и҆̀хъ ѿ сме́рти. Сконча́вшꙋсѧ мꙋ́жꙋ пра́веднꙋ, не поги́бнетъ наде́жда. Сы́нъ бо пра́веденъ ражда́етсѧ въ живо́тъ, и҆ во бл҃ги́хъ свои́хъ пло́дъ пра́вды ѡ҆б̾и́метъ. Свѣ́тъ пра́вєднымъ всегда̀, и҆ ѿ гдⷭ҇а ѡ҆брѧ́щꙋтъ бл҃года́ть и҆ сла́вꙋ. Ѧ҆зы́къ мꙋ́дрыхъ дѡ́браѧ свѣ́сть, и҆ въ се́рдцѣ и҆́хъ почі́етъ мꙋ́дрость. Лю́битъ гдⷭ҇ь преподѡ́бныѧ сердца̀, прїѧ́тни же є҆мꙋ̀ всѝ непоро́чнїи въ пꙋтѝ. Мꙋ́дрость гдⷭ҇нѧ просвѣща́етъ лицѐ разꙋ́мнагѡ. [ѕ҃] Постига́етъ бо жела́ющыѧ ю҆̀, пре́жде да́же разꙋмѣ́ти ю҆̀: и҆ ᲂу҆до́бь ᲂу҆́зритсѧ ѿ лю́бѧщихъ ю҆̀. Оу҆́треневавый къ не́й не ᲂу҆трꙋди́тсѧ: и҆ бдѧ́й є҆ѧ̀ ра́ди вско́рѣ безъ печа́ли бꙋ́детъ. Ꙗ҆́кѡ досто́йныхъ є҆ѧ̀ сама̀ ѡ҆бхо́дитъ и҆́щꙋщи, и҆ во стезѧ́хъ є҆ѧ̀ ꙗ҆влѧ́етсѧ и҆̀мъ благопрїе́мнѣ. Мꙋ́дрости никогда́же ѡ҆долѣ́етъ ѕло́ба. [и҃] Си́хъ ра́ди и҆ рачи́тель бы́хъ добро́ты є҆ѧ̀: и҆ возлюби́хъ ю҆̀, и҆ поиска́хъ ѿ ю҆́ности моеѧ̀: и҆ взыска́хъ невѣ́стꙋ привестѝ себѣ̀, ꙗ҆́кѡ всѣ́хъ влⷣка возлюбѝ ю҆̀: таи́нница бо є҆́сть бж҃їѧ хи́трости, и҆ ѡ҆брѣта́тельница дѣ́лъ є҆гѡ̀. Трꙋды̀ є҆ѧ̀ сꙋ́ть добродѣ́тєли: цѣломꙋ́дрїю же и҆ ра́зꙋмꙋ та̀ ᲂу҆чи́тъ, пра́вдѣ и҆ мꙋ́жествꙋ, и҆́хже потре́бнѣе ничто́же є҆́сть въ житїѝ человѣ́кѡмъ. А҆́ще же и҆ мно́гагѡ и҆скꙋ́сства жела́етъ кто̀, вѣ́сть дрє́внѧѧ, и҆ бы́ти хотѧ̑щаѧ разсмо́тритъ: свѣ́сть и҆зви̑тїѧ слове́съ, и҆ разрѣшє́нїѧ гада́нїй: зна́мєнїѧ и҆ чꙋдеса̀ проразꙋмѣ́етъ, и҆ сбытїѧ̑ време́нъ и҆ лѣ́тъ: и҆ всѣ̑мъ совѣ́тникъ є҆́сть бл҃гъ, ꙗ҆́кѡ безсме́ртїе є҆́сть въ не́й, и҆ бл҃госла́вїе во ѻ҆бще́нїи слове́съ є҆ѧ̀. Сегѡ̀ ра́ди бесѣ́довахъ ко гдⷭ҇ꙋ, и҆ помоли́хсѧ є҆мꙋ̀, и҆ рѣ́хъ ѿ всегѡ̀ се́рдца моегѡ̀: [ѳ҃] бж҃е ѻ҆ц҃є́въ, и҆ гдⷭ҇и ми́лости, сотвори́вый всѧ̑ сло́вомъ твои́мъ, и҆ мꙋ́дростїю твое́ю ᲂу҆стро́ивый человѣ́ка, да владѣ́етъ бы́вшими ѿ тебє̀ тварьмѝ, и҆ да ᲂу҆правлѧ́етъ мі́ръ въ преподо́бїи и҆ пра́вдѣ, да́ждь мѝ твои́хъ престо́лѡвъ присѣдѧ́щꙋю премꙋ́дрость, и҆ не ѿлꙋчѝ менє̀ ѿ ѻ҆́трѡкъ твои́хъ: ꙗ҆́кѡ а҆́зъ ра́бъ тво́й, и҆ сы́нъ рабы́ни твоеѧ̀. Послѝ ю҆̀ съ нб҃съ ѿ ст҃а́гѡ жили́ща твоегѡ̀, и҆ ѿ прⷭ҇то́ла сла́вы твоеѧ̀, да сꙋ́щи со мно́ю наꙋчи́тъ мѧ̀, что̀ бл҃гоꙋго́дно є҆́сть предъ тобо́ю: и҆ наста́витъ мѧ̀ въ ра́зꙋмъ, и҆ сохрани́тъ мѧ̀ въ сла́вѣ свое́й. Помышлє́нїѧ бо сме́ртныхъ всѧ̑ боѧзли̑ва, и҆ погрѣши́тєльна ᲂу҆мышлє́нїѧ и҆́хъ.
Премꙋ́дрости соломѡ́новы чте́нїе.
[Глава̀ д҃] Похвалѧ́емꙋ пра́ведникꙋ, возвеселѧ́тсѧ лю́дїе: безсме́ртїе бо є҆́сть па́мѧть є҆гѡ̀, ꙗ҆́кѡ ѿ гдⷭ҇а познава́етсѧ, и҆ ѿ человѣ̑къ: и҆ ᲂу҆го́дна гдⷭ҇еви дꙋша̀ є҆гѡ̀. [ѕ҃] Возлюби́те ᲂу҆̀бо, ѽ мꙋ́жїе, мꙋ́дрость, и҆ поживетѐ: восхощи́те є҆ѧ̀, и҆ нака́зани бꙋ́дете: нача́ло бо є҆ѧ̀ любы̀, и҆ соблюде́нїе зако́на. Почти́те премꙋ́дрость, да во вѣ́ки црⷭ҇твꙋете. Возвѣщꙋ̀ ва́мъ, и҆ не скры́ю ѿ ва́съ та̑инъ бж҃їихъ: [з҃] Ꙗ҆́кѡ то́й мꙋ́дрости наста́вникъ є҆́сть, и҆ мꙋ́дрыхъ и҆спра́витель, и҆ всѧ́комꙋ смы́слꙋ и҆ дѣ́лꙋ хитре́цъ. И҆ всѣ̑мъ смы́слѡмъ наꙋчи́тъ мꙋ́дрость: є҆́сть бо въ не́й дх҃ъ разꙋ́менъ и҆ ст҃ъ, и҆ сїѧ́нїе свѣ́та присносꙋ́щнагѡ, и҆ ѻ҆́бразъ бла́гости бж҃їѧ. Та̀ дрꙋ́ги бж҃їѧ и҆ прⷪ҇ро́ки ᲂу҆строѧ́етъ: бл҃голѣ́пнѣйши же є҆́сть со́лнца, и҆ па́че всѧ́кагѡ сотворе́нїѧ ѕвѣ́здъ, свѣ́тꙋ сосꙋжда́ема, ѡ҆брѣта́етсѧ пе́рвѣйши. Та̀ ᲂу҆гожда́ющихъ є҆́й ѿ болѣ́зней и҆зба́ви, и҆ наста́ви на стєзѝ пра̑выѧ. Дадѐ и҆̀мъ ра́зꙋмъ и҆мѣ́ти свѧ́тъ, и҆ сохранѝ ѧ҆̀ ѿ ловѧ́щихъ, и҆ по́двигъ крѣ́покъ подадѐ и҆̀мъ. Да разꙋмѣ́ютъ всѝ, ꙗ҆́кѡ си́льнѣйши всегѡ̀ є҆́сть бл҃гоче́стїе: и҆ никогда́же премо́жетъ ѕло́ба мꙋ́дрости, нижѐ пре́йдетъ ѕлы̑ѧ ѡ҆блича́ющи сꙋ́дъ. [в҃] Реко́ша же въ себѣ̀, помы́сливше непра́веднѡ: наси́льствꙋемъ пра́ведномꙋ, не пощади́мъ преподо́бства є҆гѡ̀, ни ᲂу҆срами́мсѧ сѣди́нъ ста́рости многолѣ́тны. Бꙋ́детъ бо на́мъ крѣ́пость зако́нъ: и҆ ᲂу҆лови́мъ пра́веднаго, ꙗ҆́кѡ неꙋго́денъ на́мъ є҆́сть, и҆ проти́витсѧ дѣлѡ́мъ на́шымъ, и҆ поно́ситъ на́мъ ѿпаде́нїе зако́на, и҆ ѡ҆блича́етъ на́мъ согрѣшє́нїѧ наказа́нїѧ на́шегѡ. Возвѣща́етъ на́мъ ра́зꙋмъ и҆мѣ́ти бж҃їй, и҆ ѻ҆́трока гдⷭ҇нѧ себѐ и҆менꙋ́етъ. Бы́сть на́мъ на ѡ҆бличе́нїе помышле́нїємъ на́шымъ, и҆ тѧ́жекъ на́мъ є҆́сть, и҆ ви́димъ, ꙗ҆́кѡ неподо́бно и҆ны̑мъ житїѐ є҆гѡ̀, и҆ и҆змѣнє́ны стези̑ є҆гѡ̀: въ порꙋга́нїе вмѣни́хомсѧ є҆мꙋ̀, и҆ ᲂу҆далѧ́етсѧ ѡ҆ пꙋте́й на́шихъ, ꙗ҆́кѡ ѿ нечисто́тъ, и҆ блажи́тъ послѣ̑днѧѧ пра́ведныхъ. Оу҆ви́димъ ᲂу҆́бѡ, а҆́ще словеса̀ є҆гѡ̀ и҆́стинна сꙋ́ть: и҆скꙋ́симъ, ꙗ҆̀же сбыва́ютсѧ є҆мꙋ̀. Рꙋга́нїемъ и҆ мꙋ́кою и҆стѧ́жемъ є҆го̀, да разꙋмѣ́емъ кро́тость є҆гѡ̀, и҆ и҆скꙋ́симъ безѕло́бство є҆гѡ̀: сме́ртїю без̾ѻбра́зною ѡ҆сꙋ́димъ є҆го̀, бꙋ́детъ бо посѣще́нїе ѿ слове́съ є҆гѡ̀. Сїѧ̑ помы́слиша, и҆ прельсти́шасѧ: ѡ҆слѣпи́ бо ѧ҆̀ ѕло́ба и҆̀хъ, и҆ не разꙋмѣ́ша та̑инъ бж҃їихъ, и҆ не разсꙋди́ша, ꙗ҆́кѡ ты̀ є҆сѝ бг҃ъ є҆ди́нъ, живота̀ и҆мѣ́ѧй и҆ сме́рти вла́сть, и҆ спаса́ѧй во вре́мѧ ско́рби, и҆ и҆збавлѧ́ѧй ѿ всѧ́кагѡ ѕла̀. Ще́дръ и҆ ми́лостивъ, и҆ даѧ́й преподѡ́бнымъ свои̑мъ бл҃года́ть, и҆ свое́ю мы́шцею гѡ́рдымъ противлѧ́ѧйсѧ.
На стїхо́внѣ стїхи̑ры, гла́съ а҃.
Подо́бенъ: Нбⷭ҇ныхъ чинѡ́въ:
Бг҃омꙋ́дре і҆ѡ́но ст҃и́телю, ꙳ ты̀ твои́ми моли́твами и҆ посто́мъ, ꙳ бдѣ́нїемъ же и҆ ми́лостынею бг҃ꙋ соедини́лсѧ є҆сѝ: ꙳ тѣ́мже дх҃а прест҃а́гѡ до́мъ и҆ жили́ще показа́лсѧ є҆сѝ. ꙳ ѿѻнꙋ́дꙋже и҆ а҆рхїере́й цр҃кве хрⷭ҇то́вы бы́лъ є҆сѝ, ꙳ молѝ, спасти́сѧ дꙋша́мъ на́шымъ.
Сті́хъ: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ.
Повинꙋ́ѧсѧ за́повѣди бг҃а вседержи́телѧ, ꙳ тѣ́мже ѿ ю҆́ности твоеѧ̀ тогѡ̀ стопа́мъ, ст҃и́телю, послѣ́довалъ є҆сѝ: ꙳ сегѡ̀ ра́ди ѿ негѡ̀ благода́ть прїѧ́лъ є҆сѝ, ꙳ дѣ́йствовати пресла̑внаѧ чꙋдеса̀, ꙳ и҆ дꙋ́хи прогони́ти лꙋка̑выѧ ѿ всѣ́хъ ꙳ любо́вїю чтꙋ́щихъ тѧ̀.
Сті́хъ: Оу҆слы́шите сїѧ̑, всѝ ꙗ҆зы́цы, внꙋши́те, всѝ живꙋ́щїи по вселе́ннѣй.
Кро́токъ и҆ неѕло́бивъ ꙳ во все́й жи́зни твое́й пребы́лъ є҆сѝ, ст҃и́телю і҆ѡ́но: ꙳ сегѡ̀ ра́ди ѡ҆брѣ́лъ є҆сѝ, ꙗ҆́коже возжелѣ́лъ є҆сѝ, ꙳ на нб҃сѣ́хъ со ст҃ы́ми поко́й. ꙳ тѣ́мже почита́емъ бж҃е́ственнꙋю па́мѧть твою̀, ꙳ вѣ́рою пра́зднꙋюще, ꙳ бг҃облаже́нне и҆ всече́стне.
Сла́ва, гла́съ д҃. Самогла́сенъ:
Є҆гда̀ ᲂу҆́бѡ, бг҃ꙋ поспѣшествꙋ́ющꙋ тѝ, ст҃и́телю, црⷭ҇твꙋющагѡ гра́да дости́глъ є҆сѝ, тогда̀ ѿ патрїа́рха че́стнѡ прїѧ́тъ бы́лъ є҆сѝ, и҆ ѿтꙋ́дꙋ па́ки къ рѡссі̑йскимъ страна́мъ посыла́емь быва́еши, ми́ръ и҆ бл҃гослове́нїе съ собо́ю носѧ̀. тѣ́мже и҆ рѡссі́йскаѧ страна̀ тебѐ съ любо́вїю ꙗ҆́кѡ ѻ҆ц҃а̀ воспрїе́млетъ: и҆ сꙋдо́мъ бж҃їимъ, и҆ самоде́ржца хотѣ́нїемъ, пресла́внѡ на а҆рхїере́йскїй престо́лъ возводи́мь быва́еши, на не́мже мнѡ́га лѣ̑та жи́въ, ко гдⷭ҇ꙋ ѿхо́диши. того̀ молѝ, спастѝ любо́вїю пою́щыѧ тѧ̀.
И҆ ны́нѣ, бг҃оро́диченъ. Тропа́рь, гла́съ д҃:
Ѿ ю҆́ности твоеѧ̀ ве́сь са́мъ себѐ гдⷭ҇еви возложи́въ, въ моли́твахъ и҆ трꙋдѣ́хъ и҆ въ постѣ́хъ, ѻ҆́бразъ бы́въ добродѣ́тели: ѿѻнꙋ́дꙋже ви́дѣвъ бг҃ъ твоѐ благо́е произволе́нїе, а҆рхїере́а тѧ̀ и҆ па́стырѧ цр҃кви свое́й ᲂу҆строѧ́етъ. тѣ́мже и҆ по преставле́нїи честно́е тѣ́ло твоѐ цѣ́ло и҆ нетлѣ́нно соблюде́сѧ, і҆ѡ́но ст҃и́телю: молѝ хрⷭ҇та̀ бг҃а, да спасе́тъ дꙋ́шы на́шѧ.
Сла́ва, и҆ ны́нѣ, бг҃оро́диченъ:
На ᲂу҆́трени. По а҃-й стїхоло́гїи, сѣда́ленъ, гла́съ а҃.
Подо́бенъ: Ка́мени запеча́танꙋ:
Оу҆че́ньми твои́ми и҆ дѣ́лы цр҃ковь хрⷭ҇то́вꙋ ᲂу҆краси́лъ є҆сѝ, і҆ѡ́но ст҃и́телю. ѿсю́дꙋ же въ мі́рѣ просїѧ̀ твоѐ добродѣ́тельное житїѐ, въ моли́твахъ и҆ поще́нїихъ, и҆ бдѣ́нїихъ, ѻ҆́бразъ цр҃кве бы́лъ є҆сѝ. тѣ́мже вопїе́мъ тѝ: сла́ва да́вшемꙋ тѝ крѣ́пость, сла́ва вѣнча́вшемꙋ тѧ̀, сла́ва даю́щемꙋ тобо́ю всѣ̑мъ и҆сцѣле́нїе.
Два́жды.
Сла́ва, и҆ ны́нѣ, бг҃оро́диченъ:
Оу҆пова́нїе хрⷭ҇тїа́нъ, прест҃а́ѧ дв҃о, є҆го́же родила̀ є҆сѝ бг҃а, па́че ᲂу҆ма́ же и҆ сло́ва, непреста́ннѡ молѝ съ вы́шними си́лами, пода́ти ѡ҆ставле́нїе грѣхѡ́въ на́шихъ всѣ́хъ, и҆ и҆справле́нїе житїѧ̀, вѣ́рою и҆ любо́вїю при́снѡ тѧ̀ сла́вѧщымъ.
По в҃-й стїхоло́гїи, сѣда́ленъ, гла́съ д҃. Подо́бенъ: Вознесы́йсѧ:
Смиреномꙋ́дрїе предпочита́ѧ бы́лъ є҆сѝ, і҆ѡ́но ст҃и́телю, и҆ ѿсю́дꙋ просла́вилсѧ є҆сѝ, ꙗ҆́кѡ бж҃е́ственный а҆рхїере́й, приносѧ̀ жє́ртвы поже́ршемꙋсѧ во́лею хрⷭ҇тꙋ̀ бг҃ꙋ на́шемꙋ: є҆го́же молѝ, спасти́сѧ дꙋша́мъ на́шымъ.
Два́жды.
Сла́ва, и҆ ны́нѣ, бг҃оро́диченъ:
Ѡ҆бнови́ла є҆сѝ, чⷭ҇таѧ, бжⷭ҇твеннымъ ржⷭ҇тво́мъ твои́мъ и҆стлѣ́вшее во страсте́хъ земноро́дныхъ ме́ртвенное сꙋщество̀, и҆ воздви́гла є҆сѝ всѧ̑ ѿ сме́рти къ животꙋ̀ нетлѣ́нїѧ. тѣ́мже тѧ̀ по до́лгꙋ бл҃жи́мъ всѝ, дв҃о препросла́вленнаѧ, ꙗ҆́коже прорекла̀ є҆сѝ.
По полѷеле́и, сѣда́ленъ, гла́съ и҃. Подо́бенъ: Премꙋ́дрости:
Ꙗ҆́кѡ добродѣ́теленъ и҆ кро́токъ, цр҃ковь хрⷭ҇то́вꙋ ᲂу҆ѧсни́лъ є҆сѝ, дѣ́лы соблю́дъ є҆́же по ѻ҆́бразꙋ бж҃їю, а҆рхїере́ю вели́кїй і҆ѡ́но: просїѧ́ бо добродѣ́тельное житїѐ твоѐ въ мі́рѣ, и҆ ѿ всѣ́хъ сла́витсѧ. тѣ́мже всѝ бл҃годарѧ́ще вопїе́мъ тѝ: бг҃облаже́нне ст҃и́телю, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю бжⷭ҇твеннꙋю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.
Степє́нна, а҃-й а҆нтїфѡ́нъ д҃-гѡ гла́са. Та́же, прокі́менъ: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ. Сті́хъ: Оу҆слы́шите сїѧ̑, всѝ ꙗ҆зы́цы, внꙋши́те, всѝ живꙋ́щїи по вселе́ннѣй. Є҆ѵⷢ҇лїе ст҃и́тельское.
По н҃-мъ ѱалмѣ̀ стїхи́ра, гла́съ ѕ҃:
Бл҃гоꙋха́етъ бж҃е́ственнаѧ ра́ка моще́й твои́хъ, і҆ѡ́но ст҃и́телю, всѣ̑мъ вѣ̑рнымъ и҆сцѣле́нїе, дꙋша́мъ и҆ тѣлесє́мъ да́рꙋющи. тѣ́мже тѧ̀ мо́лимъ, бг҃одарова́нное твоѐ ста́до въ ми́рѣ соблюстѝ, ѻ҆те́чество же и҆ всѐ правосла́вїе: да всѝ тебѐ ꙗ҆́кѡ и҆́стиннаго па́стырѧ, и҆ моли́твенника къ бг҃ꙋ, непреста́ннѡ велича́емъ.
Канѡ́нъ бцⷣы на ѕ҃, и҆ ст҃а́гѡ на и҃.
Канѡ́нъ прест҃ы́ѧ бцⷣы, є҆гѡ́же краегране́сїе:
Мт҃и бж҃їѧ, незави́стнꙋю мѝ да́ждь бл҃года́ть.
Гла́съ ѕ҃. Пѣ́снь а҃. І҆рмо́съ:
Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.
Прича́щшисѧ є҆́ѵа садꙋ̀ преслꙋша́ннагѡ бра́шна, клѧ́твꙋ введѐ: но сїю̀ разрѣши́ла є҆сѝ, чⷭ҇таѧ, бл҃гослове́нїѧ нача́токъ, хрⷭ҇та̀ ро́ждши.
Ꙗ҆́же би́сера ѿ бж҃е́ственныѧ мо́лнїи, хрⷭ҇та̀ ро́ждши, страсте́й мои́хъ мглꙋ̀, и҆ прегрѣше́нїй смꙋще́нїе, чⷭ҇таѧ, разженѝ свѣ́томъ твоеѧ̀ свѣ́тлости.
Ꙗ҆зы́кѡвъ ча́ѧнїе, і҆а́кѡвъ и҆зъ тебє̀ воплоща́емаго предзрѧ́ше та́йнѡ ᲂу҆́мныма ѻ҆чи́ма, бг҃а, и҆зба́вльшаго на́съ хода́тайствомъ твои́мъ.
Ѡ҆скꙋдѣ́вшымъ кнѧзє́мъ ѿ колѣ́на і҆ꙋ́дова, пречⷭ҇таѧ, сн҃ъ тво́й и҆ бг҃ъ, проше́дъ во́ждь, надъ концы̑ земны́ми ны́нѣ вои́стиннꙋ воцр҃и́сѧ.
Канѡ́нъ ст҃а́гѡ і҆ѡ́ны.
Гла́съ и҃. Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
И҆́же ѿ бг҃а дарова́нїѧ бжⷭ҇твеннагѡ наслажда́ѧсѧ, ко́еждо проше́нїе посѣща́ѧ чꙋдесы̀, ѿѻнꙋ́дꙋже, ѻ҆́ч҃е, и҆ мнѣ̀ пода́ждь си́лꙋ, во є҆́же пѣ́ти твоѐ сщ҃е́нное торжество̀.
Бл҃года́ть бжⷭ҇твеннаѧ и҆злїѧ́сѧ во ᲂу҆стна́хъ твои́хъ, ст҃и́телю і҆ѡ́но, и҆ бы́лъ є҆сѝ па́стырь хрⷭ҇то́вы цр҃кве: ᲂу҆краси́ бо тебѐ, бг҃ъ, є҆гѡ́же житїе́мъ твои́мъ просла́вилъ є҆сѝ.
Бл҃гоꙋха́етъ честна́ѧ ра́ка моще́й твои́хъ, и҆ и҆сточа́етъ здра̑вїѧ, недꙋ́зи же при́снѡ ѿ вѣ́рныхъ ѿгонѧ́ютсѧ, тѧ̀ бл҃гоче́стнѡ чтꙋ́щихъ, ст҃и́телю.
Стѣ́нꙋ тве́рдꙋ хрⷭ҇то́ва цр҃ковь стѧжа́вши тѧ̀, ст҃и́телю, при́снѡ пребыва́етъ хва́лѧщи своего̀ влⷣкꙋ, тебѐ просла́вльшаго.
Бг҃оро́диченъ:
Цр҃ковь бж҃їѧ бы́сть нескве́рнаѧ ѻ҆трокови́ца, все́льшемꙋсѧ па́че ᲂу҆ма̀ въ тѧ̀, бцⷣе, и҆ ле́сть ѿ дꙋ́шъ человѣ́ческихъ ѿгна́вшемꙋ.
Пѣ́снь г҃. І҆рмо́съ:
Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Тлѣ́ннꙋю мою̀ пло́ть и҆ сме́ртнꙋю, всечи́стаѧ бг҃омт҃и, и҆зъ чре́ва твоегѡ̀ несказа́ннѡ прїе́мъ бл҃гі́й, и҆ ѡ҆безтлѣ́нивъ сїю̀, вѣ́чнѣ себѣ̀ свѧза́лъ є҆́сть.
Бг҃а воплоща́ема и҆зъ тебє̀ зрѧ́ще, дв҃о, ᲂу҆жаса́хꙋсѧ стра́хомъ ли́цы а҆́гг҃льстїи: и҆ ꙗ҆́кѡ мт҃рь бж҃їю, немо́лчными пѣ́сньми тѧ̀ почита́ютъ.
Оу҆жасе́сѧ, го́рꙋ ᲂу҆́мнꙋю ви́дѣвъ тѧ̀ прⷪ҇ро́къ данїи́лъ, и҆зъ неѧ́же ка́мень ѿсѣче́сѧ кромѣ̀ рꙋ́къ, и҆ дє́мѡнскаѧ ка̑пища, бг҃ома́ти, крѣ́пкѡ сокрꙋшѝ.
Не мо́жетъ сло́во тѧ̀ человѣ́ческое, нижѐ ѧ҆зы́къ, дв҃о, похвали́ти досто́йнѡ: и҆зъ тебє́ бо безъ сѣ́мене жизнода́вецъ хрⷭ҇то́съ воплоти́тисѧ, пречⷭ҇таѧ, благоволѝ.
И҆́нъ. І҆рмо́съ:
Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
На высотꙋ̀ добродѣ́телей возше́лъ є҆сѝ, ст҃и́телю, и҆ прїи́мъ сщ҃еннопома́занїе высо́кагѡ твоегѡ̀ житїѧ̀, на сѣда́лищи высо́цѣ послꙋжи́лъ є҆сѝ бг҃ꙋ ꙗ҆́кѡ а҆рхїере́й вели́кїй.
Цр҃ковь хрⷭ҇то́ва свѣти́льника тѧ̀ стѧжа́вши, свѧти́телю, добродѣ́тельными твои́ми ᲂу҆чє́нїи, премꙋ́дре, просвѣща́етсѧ, глаго́лющи: ты̀ моѧ̀, гдⷭ҇и, крѣ́пость и҆ ᲂу҆твержде́нїе.
Бжⷭ҇твеннымъ жела́нїемъ всѐ плотско́е жела́нїе ѿри́нꙋвъ, соверше́ннымъ житїе́мъ просїѧ́лъ є҆сѝ. тѣ́мже ѿсю́дꙋ преста́вилсѧ є҆сѝ къ невече́рнемꙋ сїѧ́нїю.
Ꙗ҆́кѡ а҆рхїере́ємъ прее́мникъ бы́лъ є҆сѝ, свѧти́телю, потща́всѧ словесы̀ и҆ дѣ́лы, и҆ поꙋче́нїемъ пра́вымъ подо́бникъ ѻ҆́нѣмъ бы́ти. тѣ́мже почита́емъ тѧ̀, ꙗ҆́кѡ хрⷭ҇то́ва свѧти́телѧ.
Бг҃оро́диченъ:
Оу҆́глѧ бжⷭ҇твеннагѡ свѣтоза́рнаѧ клещѐ, кꙋпина̀ не ѡ҆пали́вшисѧ бжⷭ҇тва̀, сѣнѡ́вныѧ моѧ̑ попалѝ стра̑сти, и҆ ѻ҆гнѧ̀ и҆схи́ти вѣ́чнꙋющагѡ.
Сѣда́ленъ, гла́съ д҃. Подо́бенъ: Ско́рѡ предварѝ:
Свѣ́тло житїѐ твоѐ всѣ̑мъ ꙗ҆ви́сѧ, и҆ всепра́зднственнаѧ па́мѧть твоѧ̀, чꙋдесы̀ ѡ҆блиста́ющи, ᲂу҆дивлѧ́етъ вѣ̑рныѧ. тебѐ ᲂу҆̀бо ны́нѣ ра́достїю почита́емъ, а҆рхїере́євъ похвало̀, молѝ, спасти́сѧ дꙋша́мъ на́шымъ.
Два́жды.
Сла́ва, и҆ ны́нѣ, бг҃оро́диченъ:
Пое́мъ тѧ̀, бг҃оневѣ́сто, мт҃и хрⷭ҇та̀ бг҃а, сла́вѧще рождество̀ твоѐ непостижи́мое, и҆́мже и҆зба́вихомсѧ ѿ ле́сти дїа́воли, и҆ всѧ́кїѧ бѣды̀, бцⷣе влⷣчце, и҆ вѣ́рнѡ вопїе́мъ: поми́лꙋй ста́до твоѐ, є҆ди́на всепѣ́таѧ.
Пѣ́снь д҃. І҆рмо́съ:
Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.
Пое́мъ, пречⷭ҇таѧ, тебѐ всенепоро́чнꙋю, и҆̀же тобо́ю спа́сшїисѧ, и҆ благоче́стнѡ пою́ще взыва́емъ: благослове́нна ꙗ҆́же бг҃а, приснодв҃о, ро́ждшаѧ.
Свѣ́тъ незаходи́мый, дв҃о, родила̀ є҆сѝ, сꙋ́щымъ во тмѣ̀ житїѧ̀ пло́тїю свѣтѧ́щъ, всеблаже́ннаѧ: и҆ пою́щымъ тѧ̀ ра́дость, приснодв҃о, и҆сточи́ла є҆сѝ.
Благода́ть процвѣтѐ, зако́нъ преста̀ тобо́ю, всест҃а́ѧ: ты́ бо, чⷭ҇таѧ, родила̀ є҆сѝ гдⷭ҇а, подаю́щаго на́мъ, приснодв҃о, ѡ҆ставле́нїе.
Ме́ртва мѧ̀ показа̀ са́да вкꙋше́нїе: жи́зни же дре́во, и҆зъ тебє̀ ꙗ҆́вльшеесѧ, пречⷭ҇таѧ, воскресѝ, и҆ ра́йскїѧ сла́дости наслѣ́дника мѧ̀ ᲂу҆стро́и.
И҆́нъ. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Вели́кое свѣти́ло сїѧ̑нїи твои́хъ добродѣ́телей, и҆ свѣтлостьмѝ чꙋде́съ просвѣща́еши вѣ̑рныѧ, и҆́скреннѡ тебѐ пою́щыѧ, ст҃и́телю.
Ꙗ҆́кѡ прекра́снаѧ ма́слина, ѻ҆́ч҃е, насажде́нъ бы́въ, ст҃и́телю, въ домꙋ̀ гдⷭ҇ни, и҆ во дво́рѣхъ до́мꙋ бг҃а на́шегѡ процвѣ́лъ є҆сѝ, подава́ѧ здра́вїе дꙋша́мъ и҆ тѣлесє́мъ.
Всечестно́е тѣ́ло твоѐ, свѧти́телю і҆ѡ́но, до́мъ прест҃а́гѡ дх҃а бы́сть: во гро́бѣ бо лежѧ̀, дꙋ́хи лꙋка̑выѧ ѿ человѣ̑къ прогонѧ́етъ си́лою въ тебѣ̀ живꙋ́щагѡ.
Сло́вомъ и҆ дѣ́лы, и҆ простото́ю се́рдца, просїѧ́лъ є҆сѝ, і҆ѡ́но свѧти́телю, помина́й на́съ, чтꙋ́щихъ па́мѧть твою̀, преподо́бне.
Бг҃оро́диченъ:
И҆́же всѣ́ми невмѣсти́мый, пречⷭ҇таѧ, вмѣща́етсѧ во ᲂу҆тро́бꙋ твою̀, спаса́ѧ мѧ̀ бла́гостїю погрꙋже́ннаго грѣхи̑.
Пѣ́снь є҃. І҆рмо́съ:
Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Чистото́ю возсїѧ́вши свѣ́тлѡ, бжⷭ҇твенное пребыва́нїе влⷣки, всепѣ́таѧ, была̀ є҆сѝ, ты́ бо є҆ди́на мт҃и бж҃їѧ ꙗ҆ви́ласѧ є҆сѝ, во ѡ҆б̾ѧ́тїихъ ꙗ҆́кѡ младе́нца сего̀ носи́вши.
Носѧ́щи добро́тꙋ ᲂу҆́мнꙋю краснѣ́йшїѧ твоеѧ̀ дꙋшѝ, невѣ́ста бж҃їѧ была̀ є҆сѝ, запеча́тствована дѣ́вствомъ, чⷭ҇таѧ, и҆ свѣ́томъ чистоты̀ мі́ръ просвѣща́ющи.
Да рыда́етъ собра́нїе ѕлочести́выхъ, не проповѣ́дающихъ тѧ̀ ꙗ҆́вѣ чⷭ҇тꙋю бг҃омт҃ерь: ты́ бо врата̀ бж҃їѧ свѣ́та ꙗ҆ви́ласѧ є҆сѝ на́мъ, мра́къ прегрѣше́нїй разгонѧ́ющи.
И҆́нъ. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Чи́стъ ᲂу҆́мъ тво́й къ бг҃ꙋ и҆мѣ́ѧ, свѧти́телю, всегда̀, до́брѣ ᲂу҆пра́вилъ є҆сѝ хрⷭ҇то́во ста́до: тѣ́мже ᲂу҆̀бо и҆ непреходѧ́щее селе́нїе со а҆́гг҃лы и҆ а҆рхїерє́и наслѣ́дилъ є҆сѝ, преподо́бне, ѿѻнꙋ́дꙋже сїѧ́еши чꙋдесы̀.
Оу҆мо́мъ чистѣ́йшимъ разсмотрѧ́лъ є҆сѝ ᲂу҆ма̀ всѣ́хъ вино́внаго: сегѡ̀ ра́ди прїе́мь дарова̑нїѧ чꙋде́съ, ст҃и́телю, вѣ̑рныѧ ᲂу҆дивлѧ́еши любо́вїю тебѐ почита́ющыѧ, премꙋ́дре.
Ѿ ю҆́нагѡ во́зраста житїѐ твоѐ просїѧ̀, добродѣ́тельми ᲂу҆кра́шено, і҆ѡ́но свѧти́телю, и҆ чꙋдесы̀ высо́кими ᲂу҆до́брено, блаже́нне, є҆́же и҆ по преставле́нїи просла́ви тѧ̀ ꙗ҆вле́нна.
Сла́ва ст҃и́телей, и҆ вѣ́рныхъ люде́й застꙋ́пникъ, вои́стиннꙋ, ѻ҆́ч҃е, бы́лъ є҆сѝ красота̀ це́ркве, и҆ ѡ҆снова́нїе и҆ добродѣ́телей, благоче́стїѧ ᲂу҆твержде́нїе, достохва́льне.
Бг҃оро́диченъ:
Ви́дѣша бжⷭ҇твеннагѡ та́инства, бг҃ора́дованнаѧ, непостижи́мꙋю глꙋбинꙋ̀ честні́и прⷪ҇ро́цы чи́стагѡ рождества̀ твоегѡ̀, пречⷭ҇таѧ, разли́чными ѻ҆́бразы, ꙗ҆́коже вмѣсти́ша.
Пѣ́снь ѕ҃. І҆рмо́съ:
Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.
Вели́кїй преднаписа̀ во прⷪ҇ро́цѣхъ мѡѷсе́й тѧ̀ ковче́гъ, и҆ трапе́зꙋ, и҆ свѣ́щникъ, и҆ рꙋ́чкꙋ, ѻ҆бра́знѡ назна́менꙋѧ воплоще́нїе, є҆́же и҆зъ тебє̀ вы́шнѧгѡ, мт҃и дв҃о.
Оу҆мерщвлѧ́етсѧ сме́рть, и҆ тлѣ́нїе ᲂу҆пражднѧ́етсѧ а҆да́мова ѡ҆сꙋжде́нїѧ, ѽ влⷣчце, плодꙋ̀ твоемꙋ̀ прирази́вшеесѧ: жи́знь бо родила̀ є҆сѝ, ѿ и҆стлѣ́нїѧ и҆збавлѧ́ющꙋю пою́щыѧ тѧ̀.
Зако́нъ и҆знемо́же, и҆ сѣ́нь ми́мѡ и҆́де, па́че ᲂу҆ма̀ и҆ смы́сла ꙗ҆́вльшейсѧ мѝ благода́ти, є҆́же ѿ тебє̀, дв҃о, рождества̀, бг҃а и҆ сп҃са, многопѣ́таѧ.
И҆́нъ. І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Благолѣ́пїѧ вѣнце́мъ ᲂу҆кра́шенъ, сїѧ́еши ны́нѣ, свѧти́телю, ꙗ҆́кѡ и҆́стинный а҆рхїере́й, пра́вдою вои́стиннꙋ ѡ҆дѣ́ѧвсѧ, преда́нїе сп҃сово соблю́лъ є҆сѝ. тѣ́мже и҆ зва́нїю бжⷭ҇твенномꙋ вопїю́щꙋ тѝ: вни́ди въ ра́дость гдⷭ҇а твоегѡ̀.
Кро́токъ и҆ неѕло́бивъ, влⷣчнимъ стопа́мъ возслѣ́дꙋѧ, преподо́бне, и҆ преходѧ̀ ѿ тлѣ́нныхъ къ вѣ̑чнымъ: ѿѻнꙋ́дꙋже и҆ зе́млю кро́ткихъ со ст҃ы́ми дости́глъ є҆сѝ. сегѡ̀ ра́ди тѧ̀ собо́ри благочести́выхъ воспѣва́ютъ.
Твоегѡ̀ ра́ди житїѧ̀ вели́кагѡ и҆ чистоты̀, сн҃а тѧ̀ свѣ́та и҆ днѐ хрⷭ҇то́съ показа̀, и҆ а҆рхїере́а, и҆ па́стырѧ це́ркве своеѧ̀ содѣ́ла, и҆дѣ́же послꙋжи́въ ꙗ҆́кѡ па́стырь и҆зрѧ́денъ, ко ѻ҆би́телємъ нбⷭ҇нымъ восхо́диши.
Разсꙋжде́нїемъ ᲂу҆ма̀, и҆ жела́нїемъ дꙋхо́внымъ распала́емь, жи́знь твою̀, свѧти́телю, проходи́лъ є҆сѝ: и҆ не сꙋ̑щаѧ ꙗ҆́кѡ преходѧ̑щаѧ ми́мѡ текі́й, къ бжⷭ҇твєннымъ селе́нїємъ, ѻ҆́ч҃е і҆ѡ́но, преложи́лсѧ є҆сѝ.
Бг҃оро́диченъ:
Ѡ҆ст҃ѝ дꙋ́шꙋ мою̀, дв҃о, ꙗ҆́же ст҃о́е ро́ждши сло́во, вои́стиннꙋ во ст҃ы́хъ, ꙗ҆́кѡ пречи́сто почива́ющаго є҆ди́наго бг҃а на́шего, и҆ да́рꙋй мѝ, ꙗ҆́кѡ ми́лостива, ᲂу҆миле́нїѧ тꙋ́чꙋ, пренепоро́чнаѧ.
Конда́къ, гла́съ и҃. Подо́бенъ: Взбра́нной:
Ꙗ҆́кѡ ѿ младе́нства гдⷭ҇еви порабо́тивъ себѐ, мꙋ́дре, посто́мъ и҆ бдѣ́нїемъ тѣ́ло твоѐ ᲂу҆дрꙋча́ѧ. тѣ́мже сосꙋ́дъ чи́стъ и҆ до́мъ дх҃ꙋ прест҃о́мꙋ ꙗ҆ви́лсѧ є҆сѝ: сегѡ̀ ра́ди и҆ це́ркви свое́й тебѐ а҆рхїере́а и҆ па́стырѧ ᲂу҆строѧ́етъ, ю҆́же до́брѣ ᲂу҆па́съ, ко гдⷭ҇ꙋ ѿхо́диши, є҆го́же возлюби́лъ є҆сѝ. тѣ́мъ мо́лимъ тѧ̀: помина́й на́съ вѣ́рою чтꙋ́щихъ ст҃ꙋ́ю па́мѧть твою̀, да всѝ зове́мъ тѝ: ра́дꙋйсѧ, ѻ҆́ч҃е і҆ѡ́но, свѧти́телю всечестны́й.
І҆́косъ:
Человѣ́къ ᲂу҆́бѡ сы́й є҆стество́мъ, ѻ҆́ч҃е, но па́че человѣ́ка подвиза́лсѧ є҆сѝ въ постѣ́хъ и҆ бдѣ́нїихъ, и҆ моли́твахъ, и҆ трꙋдѣ́хъ, ꙗ҆́кѡ ѻ҆́бразъ бы́въ добродѣ́тели мнѡ́гимъ: сегѡ̀ ра́ди тѧ̀ бг҃ъ а҆рхїере́а и҆ па́стырѧ це́ркве своеѧ̀ ᲂу҆строѧ́етъ. ѿѻнꙋ́дꙋже тѧ̀ мо́лимъ: моли́сѧ благода́телю всѣ́хъ бг҃ꙋ, во є҆́же странѣ̀ на́шей чтꙋ́щей тѧ̀, дарова́ти побѣ́дꙋ на врагѝ, и҆ на́мъ ѡ҆брѣстѝ благода́ть и҆ ми́лость въ де́нь сꙋ́дный, да всѝ зове́мъ тѝ: ра́дꙋйсѧ, ѻ҆́ч҃е і҆ѡ́но, ст҃и́телю всечестны́й.
Пѣ́снь з҃. І҆рмо́съ:
Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.
Ю҆́ношъ трїе́хъ пе́щь не ѡ҆палѝ, рождество̀ проѡбразꙋ́ющихъ твоѐ: бжⷭ҇твенный бо ѻ҆́гнь тебѐ не ѡ҆пали́въ, всели́сѧ въ тѧ̀, и҆ всѧ̑ наꙋчѝ вопи́ти: благослове́нъ є҆сѝ, бж҃е ѻ҆тє́цъ на́шихъ.
Блажа́тъ концы̀ тѧ̀, всечⷭ҇таѧ мт҃и, ꙗ҆́коже прорекла̀ є҆сѝ, просвѣща́еми свѣтолꙋ́чными сїѧ́ньми твои́ми и҆ благода́тїю, пою́ще вопїю́тъ: благослове́нъ є҆сѝ, бж҃е ѻ҆тє́цъ на́шихъ.
Па̑гꙋбныѧ ᲂу҆́бѡ зꙋ́бы въ мѧ̀ вонзѐ ѕмі́й лꙋка́внѣйшїй, но са́мъ тво́й, бг҃омт҃и, сокрꙋшѝ сн҃ъ, крѣ́пость же мнѣ̀ дадѐ вопи́ти, благослове́нъ є҆сѝ, бж҃е ѻ҆тє́цъ на́шихъ.
Ѡ҆чисти́лище є҆стества̀ ты̀ є҆сѝ, є҆ди́на бг҃облаже́ннаѧ, на ра́мꙋ бо херꙋві́мскꙋ сѣдѧ́щаго бг҃а во ѡ҆б̾ѧ́тїихъ носѧ́щи, вопїе́ши: благослове́нъ є҆сѝ, бж҃е ѻ҆тє́цъ на́шихъ.
И҆́нъ. І҆рмо́съ:
Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆ц҃є́въ бж҃е, бл҃гослове́нъ є҆сѝ.
Ви́дѣвъ твоѐ благо́е произволе́нїе хрⷭ҇то́съ бг҃ъ, ꙗ҆́кѡ не себѣ̀ живе́ши, по дѣ́йствꙋющемꙋ въ тебѣ̀ гдⷭ҇ꙋ: тѣ́мъ ᲂу҆краша́етъ тѧ̀ чꙋде́съ и҆сцѣле́нїемъ.
Чи́стыми дѣ́лы и҆ и҆справле́ньми твои́ми просїѧ́въ, ꙗ҆́кѡ свѣти́ло, бг҃ода́ннꙋю тѝ це́рковь до́брѣ ᲂу҆па́слъ є҆сѝ, поѧ̀ хрⷭ҇тꙋ̀: ѻ҆тє́цъ на́шихъ бж҃е, благослове́нъ є҆сѝ.
Ꙗ҆́кѡ въ зако́нѣ гдⷭ҇ни поꙋча́ѧсѧ де́нь и҆ но́щь, свѧти́телю, за̑днѧѧ забыва́ѧ, на прє́днѧѧ же простира́ѧсѧ, творцꙋ̀ и҆ влⷣцѣ вопїѧ́лъ є҆сѝ, благослове́нъ є҆сѝ, гдⷭ҇и бж҃е ѻ҆тє́цъ на́шихъ.
И҆зрѧ́дно житїѐ твоѐ, свѧти́телю, всѣ́ми позна́но бы́сть, сегѡ̀ ра́ди и҆ по преставле́нїи прославлѧ́етъ тѧ̀ хрⷭ҇то́съ, є҆мꙋ́же ᲂу҆се́рднѡ послꙋжи́лъ є҆сѝ, і҆ѡ́но ѻ҆́ч҃е на́шъ, поѧ̀: ѻ҆тє́цъ на́шихъ бж҃е, благослове́нъ є҆сѝ.
Бг҃оро́диченъ:
Ѻ҆́гнь ника́коже тѧ̀ бжⷭ҇тва̀ ѡ҆палѝ, дв҃о: тѧ́ бо и҆ногда̀ кꙋпина̀ проѡбразова́ше въ горѣ̀ ѡ҆палѧ́ема, пречⷭ҇таѧ, и҆ ника́коже сгара́ема.
Пѣ́снь и҃. І҆рмо́съ:
И҆зъ пла́мене преподѡ́бнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. Тѧ̀ превозно́симъ во всѧ̑ вѣ́ки.
Позлаще́нною ри́зою ꙗ҆́коже цр҃и́цꙋ сн҃ъ тво́й просвѣти́въ заре́ю дх҃а, тебѐ ѡ҆деснꙋ́ю себє̀ поста́ви, пречⷭ҇таѧ, є҆го́же превозно́симъ во всѧ̑ вѣ́ки.
И҆́же хотѣ́нїемъ є҆ди́нымъ мі́ръ водрꙋзи́вый, ѿ пречи́стыѧ твоеѧ̀ ᲂу҆тро́бы пло́ть взе́млетъ, вы́ше сїю̀ назда́ти хотѧ̀: є҆го́же превозно́симъ во всѧ̑ вѣ́ки.
Счета́нїемъ сло́ва ко мнѣ̀ человѣ́кꙋ, бжⷭ҇твенное жили́ще была̀ є҆сѝ, пречⷭ҇таѧ, просїѧ́вши ꙗ҆́вѣ дѣ́вства свѣ́тлостїю: тѣ́мже тѧ̀ пое́мъ во всѧ̑ вѣ́ки.
Златоза́рный тѧ̀ свѣ́щникъ предвоѡбразѝ, прїе́мшꙋю несказа́ннѡ свѣ́тъ непристꙋ́пный, ра́зꙋмомъ свои́мъ ѡ҆зарѧ́ющь всѧ́чєскаѧ: тѣ́мже тѧ̀ пое́мъ, чⷭ҇таѧ, во вѣ́ки.
И҆́нъ. І҆рмо́съ:
Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.
А҆́гг҃льское житїѐ пожи́лъ є҆сѝ на землѝ, свѧти́телю, смире́нъ и҆ кро́токъ бы́въ: ѿѻнꙋ́дꙋже и҆ въ землѝ кро́ткихъ со ст҃ы́ми водворѧ́ешисѧ, хрⷭ҇тꙋ̀ поѧ̀: хвали́те и҆ превозноси́те є҆го̀ во вѣ́ки.
Хра́мъ ѡ҆свѧще́нїѧ всечестна́ѧ ра́ка моще́й твои́хъ, свѧти́телю, и҆зъ негѡ́же и҆сцѣле́нїе благода́ти почерпа́юще, влⷣкꙋ всѣ́хъ гдⷭ҇а пое́мъ, тебѐ цѣле́бника дарова́вшаго, и҆ превозно́симъ є҆го̀ во вѣ́ки.
Оу҆́мъ тво́й, свѧти́телю, манове́нїемъ бжⷭ҇твеннымъ ѡ҆божа́емь, до конца̀ плотски́хъ страсте́й ᲂу҆дали́сѧ, хрⷭ҇тꙋ̀ поѧ̀: хвали́те и҆ превозноси́те є҆го̀ во вѣ́ки.
По досто́инствꙋ почита́емъ вѣ́рнїи моще́й твои́хъ честнꙋ́ю ра́кꙋ, і҆ѡ́но свѧти́телю, ꙗ҆́кѡ мѵ́ро почерпа́юще вѣ̑рнымъ благоꙋха́нїе, влⷣцѣ хрⷭ҇тꙋ̀ вопїю́ще: всѧ̑ дѣла̀, хвали́те и҆ превозноси́те є҆го̀ во вѣ́ки.
Бг҃оро́диченъ:
И҆сцѣлѝ стра̑сти се́рдца моегѡ̀, безстра́стїѧ и҆сто́чникъ ро́ждшаѧ, и҆ къ животꙋ́ мѧ бжⷭ҇твенномꙋ наста́ви, да тѧ̀ сла́влю во всѧ̑ вѣ́ки.
Пѣ́снь ѳ҃. І҆рмо́съ:
Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно. є҆го́же велича́юще, съ нбⷭ҇ными вѡ́и, тѧ̀ ᲂу҆блажа́емъ.
Ѕвѣзда̀ сїѧ́ющи зарѧ́ми бжⷭ҇тва̀ ѿ і҆а́кѡва, ѿ мра́ка содержи̑мымъ возсїѧ̀: тобо́ю бо, всечⷭ҇таѧ, хрⷭ҇то́съ бг҃ъ сло́во воплоще́нно, и҆́мже просвѣща́еми, съ нбⷭ҇ными вѡ́и тѧ̀ ᲂу҆блажа́емъ.
Оу҆крѣ́пльсѧ си́лою твое́ю и҆ благода́тїю, тебѣ̀ пѣ́снь ᲂу҆се́рднѡ ѿ се́рдца возложи́хъ: но сїю̀ прїимѝ, дв҃о чⷭ҇таѧ, благода́ть воздаю́щи твою̀ многосвѣ́тлꙋю, ѿ нетлѣ́нныхъ сокро́вищь, бг҃облаже́ннаѧ.
Поста́въ показа́ласѧ є҆сѝ ꙗ҆́вѣ бжⷭ҇тва̀, въ не́мже ри́зꙋ тѣлесѐ сло́во и҆стка̀, бг҃осодѣ́лавъ мо́й, дв҃о, зра́къ: въ него́же ѡ҆бо́лксѧ, всѣ́хъ спасѐ, ѿ смы́сла чи́ста тебѐ велича́ющихъ.
Мє́ртвымъ воскресе́нїе ны́нѣ дарова́сѧ твои́мъ несказа́ннымъ и҆ неизрече́ннымъ рождество́мъ, бцⷣе всечⷭ҇таѧ: жи́знь бо и҆зъ тебє̀ пло́тїю ѡ҆бо́лкшисѧ, всѣ̑мъ возсїѧ̀, и҆ сме́ртнꙋю дрѧ́хлость ꙗ҆́вѣ разрꙋшѝ.
И҆́нъ. І҆рмо́съ:
Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.
Чи́стымъ се́рдцемъ и҆ бжⷭ҇твенными восхождє́нїи, ᲂу҆́мъ впери́лъ є҆сѝ, є҆ди́нагѡ бг҃а зрѣ́ти добрѡ́ты жела́ѧ: и҆ ѿтꙋ́дꙋ свѣтоли́тїемъ просвѣща́ешисѧ, бг҃омꙋ́дре ст҃и́телю.
Бг҃опре́даннꙋю па́ствꙋ твою̀, па́стырѧ тѧ̀ и҆мꙋ́щꙋю, тѧ́жкїѧ во́лки ѿгонѧ́юща ѿ всѣ́хъ вѣ́рныхъ, и҆ ста́до бл҃года́тїю хрⷭ҇то́вою соблюда́емо сохранѝ, і҆ѡ́но ст҃и́телю.
Ꙗ҆́коже пе́рвѣе цѣломꙋ́дреннагѡ і҆ѡ́сифа тѣ́ло і҆и҃ль прено́ситъ, та́кѡ и҆ ны́нѣ ра́кꙋ моще́й твои́хъ, і҆ѡ́но ст҃и́телю, вѣ́рнїи прїе́млюще, почита́ютъ любе́знѣ, хрⷭ҇та̀ велича́юще.
Дне́сь свѣ́тлаѧ па́мѧть твоѧ̀, ст҃и́телю, возсїѧ́вши, вѣ́рныхъ сердца̀ просвѣща́етъ: тѣ́мже и҆ пѣ́нїе сїѐ произве́дшемꙋ, молѝ хрⷭ҇та̀ бг҃а, сохрани́тисѧ ѿ лꙋка́вагѡ ловле́нїѧ, и҆ полꙋчи́ти ми́лость въ де́нь сꙋ́дный.
Бг҃оро́диченъ:
Свѣ́томъ покаѧ́нїѧ помраче́ннаго мѧ̀ лѣ́ностїю, всенепоро́чнаѧ, просвѣтѝ, да пою̀ и҆ велича́ю, и҆ сла́влю тѧ̀ пренепоро́чнꙋю влⷣчцꙋ.
Свѣти́ленъ. Подо́бенъ: Посѣти́лъ ны̀ є҆́сть:
Тезоимени́те цѣломꙋ́дрїѧ, ѿ ю҆́нагѡ воспита́нїѧ, ст҃и́телю, бы́въ, потща́лсѧ є҆сѝ тлѣ́нными нетлѣ̑ннаѧ стѧжа́ти: ѿѻнꙋ́дꙋже и҆ а҆рхїере́йствомъ почте́нъ бы́въ, при́снѡ ѡ҆ на́съ влⷣкꙋ молѝ, любо́вїю пою́щихъ тѧ̀.
Два́жды.
Сла́ва, и҆ ны́нѣ, бг҃оро́диченъ:
Щедрѡ́ты твоѧ̑, бж҃е, на лю́ди и҆ ста́до твоѐ низпослѝ, моли́твами пречⷭ҇тыѧ твоеѧ̀ мт҃ре, и҆ всѣ́хъ ст҃ы́хъ твои́хъ, и҆ на́мъ да́рꙋй вели́кꙋю твою̀ ми́лость.
На хвали́техъ стїхи̑ры, на д҃, гла́съ и҃. Поⷣ: Ѽ пресла́внагѡ чꙋдесѐ!
Ѻ҆́ч҃е бг҃омꙋ́дре і҆ѡ́но, ст҃и́телю, ꙳ ты̀ ѿ ю҆́ности воздержа́нїю поꙋча́ѧсѧ, ꙳ и҆ во бдѣ́нїихъ, и҆ въ моли́твахъ, и҆ постѣ́хъ, ꙳ гдⷭ҇еви приближа́ѧсѧ, ꙳ и҆ моли́твенницꙋ всегда̀ призыва́ѧ дв҃ꙋ бцⷣꙋ, ꙳ є҆ѧ́же ра́ди наде́жди не погрѣши́лъ є҆сѝ. ꙳ тѣ́мже а҆рхїере́а тѧ̀ и҆ па́стырѧ ꙳ цр҃кви свое́й хрⷭ҇то́съ ᲂу҆стро́и, ꙳ того̀ молѝ при́снѡ ѡ҆ дꙋша́хъ на́шихъ.
Два́жды.
Ѻ҆́ч҃е ст҃и́телю і҆ѡ́но бг҃омꙋ́дре, ꙳ ты̀ ѡ҆ млⷣнства мїрскі́й мѧте́жъ ѡ҆ста́вилъ є҆сѝ, ꙳ и҆ молвы̑ ѿтрѧ́слъ є҆сѝ, ꙳ ᲂу҆ма̀ чистото́ю бг҃ꙋ приближа́ѧсѧ: ꙳ сегѡ̀ ра́ди тѧ̀ бг҃ъ а҆рхїере́а цр҃кви, ꙳ и҆ лю́демъ по достоѧ́нїю бж҃е́ственнаго благода́телѧ поставлѧ́етъ. ꙳ всегда̀ молѝ ѡ҆ на́съ, ꙳ низпосла́ти дꙋша́мъ на́шымъ ꙳ ми́ръ и҆ ве́лїю ми́лость.
Ѻ҆́ч҃е бг҃омꙋ́дре ст҃и́телю і҆ѡ́но, ꙳ ты̀ и҆зъ мла́да хрⷭ҇та̀ возлюби́въ, ꙳ тогѡ̀ любвѝ прилѣпи́лсѧ є҆сѝ, ꙳ и҆ пресвѣ́тлагѡ дх҃а бж҃е́ственными зарѧ́ми се́рдце твоѐ просвѣти́въ, ꙳ свѣтови́дѣнъ ве́сь вои́стиннꙋ бы́лъ є҆сѝ. ꙳ тѣ́мже ко хра́мꙋ твоемꙋ̀ вѣ́рою притека́ющыѧ, ꙳ прошє́нїѧ ꙗ҆̀же ко спасе́нїю сподо́би, ꙳ и҆ молѝ хрⷭ҇та̀ бг҃а, спасти́сѧ дꙋша́мъ на́шымъ.
Сла́ва, гла́съ ѕ҃. Самогла́сенъ:
Нбⷭ҇нагѡ цр҃ѧ̀ и҆ влⷣки преизрѧ́дный слꙋжи́тель, ст҃и́телю і҆ѡ́но, бы́лъ є҆сѝ, чистотꙋ́ бо соблю́лъ є҆сѝ, безъ неѧ́же никто́же ᲂу҆́зритъ бг҃а. тѣ́мже и҆ возме́здїе по достоѧ́нїю прїѧ́лъ є҆сѝ: во гро́бѣ бо лежѧ̀ честно́е тѣ́ло твоѐ цѣ́ло и҆ нетлѣ́нно соблюде́сѧ, дꙋша́ же къ нбⷭ҇нымъ ликостоѧ́нїємъ пре́йде. сегѡ̀ ра́ди творцꙋ̀ всѣ́хъ моли́сѧ при́снѡ ѡ҆ всѣ́хъ чтꙋ́щихъ тѧ̀ любо́вїю, низпосла́ти ми́ръ и҆ ве́лїю ми́лость.
И҆ ны́нѣ, бг҃оро́диченъ:
На лїтꙋргі́и слꙋ́жба ст҃и́телємъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.