← претходни дан | Минеј — Фебруар | следећи дан →
3 февраля: Святого праведного Симеона Богоприимца и святой Анны пророчицы
Мѣ́сѧца тогѡ́же въ г҃-й де́нь.
Ст҃а́гѡ и҆ пра́веднагѡ сѷмеѡ́на бг҃опрїи́мца и҆ а҆́нны проро́чицы.
И҆ равноапⷭ҇льнагѡ нїкола́ѧ а҆рхїепі́скопа токі́йскагѡ, а҆по́стола ꙗ҆по́нїи.
Слꙋ́жба є҆гѡ̀ пи́сана въ приложе́нїи.
На Гдⷭ҇и, воззва́хъ, стїхи̑ры пра́здника, г҃: и҆ ст҃а́гѡ, г҃.
Стїхи̑ры пра́здника, гла́съ а҃. Подо́бенъ: Нбⷭ҇ныхъ чинѡ́въ:
Творе́цъ всѧ́ческихъ и҆ и҆зба́витель на́шъ ꙳ мт҃рїю дв҃ою въ це́рковь прино́ситсѧ. ꙳ Тѣ́мже ста́рецъ сего̀ прїе́мъ, ꙳ съ ра́достїю взыва́ше: ꙳ ны́нѣ ѿпꙋща́еши раба̀ твоего̀, бла́же, съ ми́ромъ, ꙳ ꙗ҆́коже и҆зво́лилъ є҆сѝ.
Сѷмеѡ́нъ на рꙋ́ки ѿ дв҃ы прїе́мъ ꙳ пре́жде всѣ́хъ вѣ̑къ рожде́ннаго, ꙳ сп҃са ви́дѣхъ, вопїѧ́ше, ꙳ просвѣще́нїе твоеѧ̀ сла́вы концє́мъ: ꙳ ны́нѣ ѿпꙋща́еши раба̀ твоего̀, бла́же, съ ми́ромъ, ꙳ ꙗ҆́кѡ ви́дѣхъ тѧ̀ дне́сь.
Напослѣ́докъ вѣкѡ́въ рожде́на на спасе́нїе человѣ́кѡвъ, ꙳ сѷмеѡ́нъ понесы́й на рꙋка́хъ сп҃са, ꙳ ра́дꙋѧсѧ вопїѧ́ше: ꙳ ви́дѣхъ свѣ́тъ ꙗ҆зы́кѡвъ и҆ сла́вꙋ і҆и҃лѧ, ꙳ ны́нѣ ѿпꙋща́еши ꙗ҆́коже ре́клъ є҆сѝ ꙗ҆́кѡ бг҃ъ, ꙳ ѿ сꙋ́щихъ здѣ̀ велѣ́нїемъ твои́мъ.
И҆́ны стїхи̑ры ст҃а́гѡ, гла́съ д҃. Подо́бенъ: Да́лъ є҆сѝ зна́менїе:
Пра́веденъ и҆ соверше́нъ, ꙳ и҆ по всемꙋ̀ сла́венъ сы́й, бг҃одохнове́нне, ꙳ бг҃а є҆ди́наго соверше́нна, ꙳ во є҆́же ѡ҆правда́ти мі́ръ прише́дшаго, ꙳ под̾ѧ́лъ є҆сѝ рꙋка́ми воплоще́нна, ꙳ и҆ ѿрѣши́тисѧ тѣлесѐ вопїѧ̀ є҆мꙋ̀: ꙳ ны́нѣ ѿпꙋща́еши раба̀ твоего̀ ꙳ съ ми́ромъ, чл҃вѣколю́бче, ꙳ ꙗ҆́кѡ ви́дѣхъ тѧ̀ дне́сь.
Ю҆́ношствꙋѧ дꙋ́хомъ, ꙳ престарѣ́въ же тѣ́ломъ, сѷмеѡ́не, ꙳ ѡ҆бѣща́нїе прїѧ́лъ є҆сѝ не ви́дѣти сме́рти, ꙳ до́ндеже ᲂу҆ви́диши младе́нца ю҆́на, ꙳ пре́жде вѣ̑къ сꙋ́щаго творца̀ и҆ бг҃а всѧ́ческихъ, ꙳ пло́тїю ѡ҆бнища́вша: ꙳ ви́дѣвъ же взыгра́лъ є҆сѝ, ꙳ и҆ пло́ти разрѣше́нїе проси́лъ є҆сѝ, ꙳ къ бжⷭ҇твєннымъ селе́нїємъ преше́дъ ра́дꙋѧсѧ.
А҆́нна бг҃одохнове́ннаѧ ꙳ и҆ сѷмеѡ́нъ пребога́тый, ꙳ проро́чествїемъ сїѧ́ющїи, ꙳ въ зако́нѣ же непоро́чни ꙗ҆́вльшїисѧ, ꙳ зако́на да́телѧ, ꙳ младе́нца ꙗ҆́вльшасѧ по на́мъ ви́дѣвше, ꙳ томꙋ̀ ны́нѣ поклони́шасѧ. ꙳ тѣ́хъ па́мѧть дне́сь ра́достнѡ пра́зднꙋимъ, ꙳ по до́лгꙋ сла́вѧще і҆и҃са, чл҃вѣколю́бца.
Сла́ва, и҆ ны́нѣ, гла́съ є҃. Ге́рманово:
Ве́тхїй де́ньми млⷣнствовавъ пло́тїю, мт҃рїю дв҃ою въ це́рковь прино́ситсѧ, своегѡ̀ зако́на и҆сполнѧ́ѧ ѡ҆бѣща́нїе, є҆го́же сѷмеѡ́нъ прїи́мъ глаго́лаше: ны́нѣ ѿпꙋща́еши съ ми́ромъ, по глаго́лꙋ твоемꙋ̀, раба̀ твоего̀, ви́дѣша бо ѻ҆́чи моѝ спасе́нїе твоѐ, ст҃ы́й.
На стїхо́внѣ стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:
Бг҃оѧвле́нїѧ неизрече́ннагѡ ꙳ ны́нѣ пра́зднꙋемъ спаси́тельнꙋю благода́ть: ꙳ ѿ дв҃ы бо ѻ҆трокови́цы непрело́жнѡ младе́нствовавъ хрⷭ҇то́съ бг҃ъ, ꙳ въ це́рковь бг҃ꙋ и҆ ѻ҆ц҃ꙋ̀, ꙳ мт҃рїю ны́нѣ прино́ситсѧ, ꙳ є҆го́же прїе́мъ сѷмеѡ́нъ рꙋка́ми ѡ҆б̾ѧ́тъ.
Сті́хъ: Ны́нѣ ѿпꙋща́еши раба̀ твоего̀, влⷣко, по глаго́лꙋ твоемꙋ̀, съ ми́ромъ.
Во прⷪ҇ро́цѣхъ ви́дѣнъ бы́лъ є҆сѝ, ꙳ ꙗ҆́коже мо́щно бѧ́ше, і҆и҃се, ꙳ тебѐ ви́дѣти дре́вле, ꙳ но ны́нѣ, бж҃їй сло́ве, ꙳ пло́тїю всемꙋ̀ мі́рꙋ ꙗ҆ви́лсѧ є҆сѝ во́лею, ꙳ ѿ дв҃ы мр҃і́и, хрⷭ҇тѐ, ꙳ твоѐ спасе́нїе всѣ̑мъ ꙳ сꙋ́щымъ ѿ а҆да́ма ꙗ҆ви́лъ є҆сѝ, ꙳ ꙗ҆́кѡ чл҃вѣколю́бецъ.
Сті́хъ: Свѣ́тъ во ѿкрове́нїе ꙗ҆зы́кѡвъ, и҆ сла́вꙋ люде́й твои́хъ і҆зра́илѧ.
На сїна́йстѣй горѣ̀ ꙳ зако́нъ ᲂу҆чини́вый дре́вле, ꙳ ны́нѣ въ сїѡ́нѣ гра́дѣ и҆сполнѧ́ѧ закѡ́ннаѧ, ꙳ рꙋка́ми бцⷣы, ꙳ млⷣнецъ, хрⷭ҇тѐ, со всесожжє́нїи, ꙳ на рꙋка́хъ сѷмеѡ́на ꙳ во хра́мъ внести́сѧ восхотѣ́лъ є҆сѝ пло́тїю.
Сла́ва, и҆ ны́нѣ, гла́съ а҃. І҆ѡа́нна мона́ха:
Дне́сь дре́вле мѡѷсе́ю въ сїна́и зако́нъ пода́вый, закѡ́ннымъ повинꙋ́етсѧ велѣ́нїємъ, на́съ ра́ди ꙗ҆́кѡ милосе́рдъ по на́мъ бы́въ. Ны́нѣ чи́стый бг҃ъ, ꙗ҆́кѡ ѻ҆троча̀ ст҃о, ложесна̀ разве́рзъ чⷭ҇тыѧ, себѣ̀ самомꙋ̀ ꙗ҆́кѡ бг҃ъ прино́ситсѧ, зако́нныѧ клѧ́твы свобожда́ѧ, и҆ просвѣща́ѧ дꙋ́шы на́шѧ.
Тропа́рь пра́здника, гла́съ а҃:
Ра́дꙋйсѧ, бл҃года́тнаѧ бцⷣе дв҃о, и҆зъ тебє́ бо возсїѧ̀ сл҃нце пра́вды хрⷭ҇то́съ бг҃ъ на́шъ, просвѣща́ѧй сꙋ́щыѧ во тмѣ̀: весели́сѧ и҆ ты̀, ста́рче пра́ведный, прїе́мый во ѡ҆б̾ѧ̑тїѧ свободи́телѧ дꙋ́шъ на́шихъ, да́рꙋющаго на́мъ воскресе́нїе.
На ᲂу҆́трени, на Бг҃ъ гдⷭ҇ь, тропа́рь, три́жды.
По а҃-й стїхоло́гїи сѣда́ленъ, гла́съ а҃. Поⷣ: Ка́мени запеча́танꙋ:
Въ це́рковь прине́слсѧ є҆сѝ, жи́знь всѧ́ческихъ, менє̀ ра́ди младе́нствовавъ, подъ зако́номъ бы́лъ є҆сѝ, дре́вле начерта́въ на скрижа́лѣхъ зако́нъ на горѣ̀ сїна́йстѣй, да всѧ̑ и҆змѣни́ши ѿ зако́нныѧ дре́внїѧ рабо́ты: сла́ва бл҃гоꙋтро́бїю твоемꙋ̀, сп҃се, сла́ва црⷭ҇твїю твоемꙋ̀, сла́ва смотре́нїю твоемꙋ̀, є҆ди́не чл҃вѣколю́бче.
Сла́ва, и҆ ны́нѣ, то́йже.
По в҃-й стїхоло́гїи сѣда́ленъ, гла́съ є҃. Поⷣ: Собезнача́льное сло́во:
Во хра́мъ прине́слсѧ є҆сѝ, ѻ҆бы̑чнаѧ и҆сполнѧ́ѧ, творе́цъ и҆ влⷣка и҆ зако́на да́тель, сп҃се: и҆ на рꙋка́хъ сѷмеѡ́на бл҃говоле́нїемъ твои́мъ носи́тисѧ пло́тїю, и҆́же всѣ̑мъ стра́шный, и҆ всю̀ тва́рь содержа́й, восхотѣ́лъ є҆сѝ, є҆ди́не ще́дре, свѣ́тъ сво́й всѣ̑мъ ѿкры́ти на́мъ.
Сла́ва, и҆ ны́нѣ, то́йже.
Канѡ́нъ пра́здника со і҆рмосо́мъ на ѕ҃: И҆ ст҃а́гѡ на ѕ҃. Канѡ́нъ пра́здника.
Гла́съ г҃. Пѣ́снь а҃. І҆рмо́съ:
Сꙋ́шꙋ глꙋбороди́тельнꙋю зе́млю со́лнце наше́ствова и҆ногда̀, ꙗ҆́кѡ стѣна́ бо ѡ҆гꙋстѣ̀ ѻ҆бапо́лы вода̀, лю́демъ пѣшомореходѧ́щымъ и҆ бг҃оꙋго́днѡ пою́щымъ: пои́мъ гдⷭ҇еви, сла́внѡ бо просла́висѧ.
Да ка́плютъ во́дꙋ ѻ҆́блацы, сл҃нце бо на ѻ҆́блацѣ ле́гцѣ носи́мо наста́ло є҆́сть, на нетлѣ́ннꙋю рꙋкꙋ̀, хрⷭ҇то́съ въ це́ркви ꙗ҆́кѡ млⷣнецъ. тѣ́мже, вѣ́рнїи, возопїи́мъ: пои́мъ гдⷭ҇еви, сла́внѡ бо просла́висѧ.
Крѣпи́тесѧ, рꙋ́цѣ сѷмеѡ́ни, ста́ростїю ѡ҆сла́бленнїи, лы́ста же претрꙋждє́нна ста́рча пра́вѡ быстрѡ̀ дви́житасѧ хрⷭ҇тꙋ̀ на срѣ́тенїе, ли́къ со безпло́тными соста́вльше: пои́мъ гдⷭ҇еви, сла́внѡ бо просла́висѧ.
Ра́зꙋмомъ простє́ртаѧ нб҃са̀, весели́тесѧ, и҆ ра́дꙋйсѧ, землѐ: и҆зъ пребжⷭ҇твенныхъ бо нѣ́дръ хитре́цъ проше́дъ хрⷭ҇то́съ, мт҃рїю дв҃ою бг҃ꙋ ѻ҆ц҃ꙋ̀ прино́ситсѧ млⷣнецъ, и҆́же пре́жде всѣ́хъ: сла́внѡ бо просла́висѧ.
Канѡ́нъ ст҃а́гѡ, є҆гѡ́же краегране́сїе:
Прїимѝ пѣ́нїе, сѷмеѡ́не бг҃опрїи́мче. І҆ѡ́сифъ.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.
Въ пра́ведныхъ селе́нїихъ ра́достнѡ водворѧ́ѧсѧ пра́веднагѡ гдⷭ҇а, сѷмеѡ́не пра́ведный, и҆̀же бжⷭ҇твенное твоѐ соверша́ющыѧ преставле́нїе, ѡ҆правда́ти молѝ, преблаже́нне.
Въ зако́нѣ бы́въ, сщ҃еннодѣ́тель, сщ҃е́ннѣйше, є҆го́же зако́нъ проповѣ́да, млⷣнца ви́дѣлъ є҆сѝ: и҆ є҆стества̀ зако́номъ, бг҃опрїи́мче, ᲂу҆́меръ, къ безсме́ртнѣй ра́дꙋѧсѧ преше́лъ є҆сѝ жи́зни.
Рꙋка́ми держа́щаго вселе́нныѧ концы̀, дв҃и́ческими носи́ма рꙋка́ми ви́дѣлъ є҆сѝ, и҆ честны́ми твои́ми прїе́мъ ѡ҆б̾ѧ̑тїи, мѡѷсе́а вы́шшїй ꙗ҆ви́лсѧ є҆сѝ, пребога́те.
Бг҃оро́диченъ:
По́лный и҆стощава́етсѧ, превѣ́чный начина́етсѧ, сло́во ѡ҆дебелѣва́етъ, содѣ́тель зи́ждетсѧ, невмѣсти́мый вмѣща́етсѧ во чре́вѣ твое́мъ воплоща́емь, бг҃обл҃года́тнаѧ.
Пѣ́снь г҃. І҆рмо́съ:
Оу҆твержде́нїе на тѧ̀ надѣ́ющихсѧ, ᲂу҆твердѝ, гдⷭ҇и, цр҃ковь, ю҆́же стѧжа́лъ є҆сѝ честно́ю твое́ю кро́вїю.
Перворожде́нъ и҆зъ ѻ҆ц҃а̀ пре́жде вѣ̑къ, перворожде́нъ млⷣнецъ и҆зъ дв҃ы нетлѣ́нныѧ, а҆да́мꙋ рꙋ́кꙋ простира́ѧ ꙗ҆ви́сѧ.
Младоꙋ́мна бы́вша пре́лестїю первозда́ннаго, па́ки и҆справлѧ́ѧй бг҃ъ сло́во, младе́нствовавъ ꙗ҆ви́сѧ.
Землѝ и҆сча́дїе, па́ки поте́кшее въ ню̀, бжⷭ҇тва̀ соѻбра́зное є҆стество̀ зижди́тель, ꙗ҆́кѡ непрело́жнѣ, младе́нствовавъ ꙗ҆вѝ.
И҆́нъ. І҆рмо́съ:
Ꙗ҆́кѡ непло́ды родѝ ѿ ꙗ҆зы̑къ цр҃ковь, и҆ мно́гое въ ча́дѣхъ и҆знемо́же со́нмище, чꙋ́дномꙋ бг҃ꙋ на́шемꙋ возопїи́мъ: ст҃ъ є҆сѝ, гдⷭ҇и.
Возвы́сивсѧ дѣѧ́ньми сщ҃е́нными, бг҃оглаго́ливе, ꙗ҆́кѡ свѣтови́дѣнъ сто́лпъ высо́къ всест҃о́мꙋ дх҃ꙋ бы́лъ є҆сѝ, ᲂу҆твержда́ѧсѧ ꙗ҆́вѣ: тѣ́мже восхвалѧ́емъ тѧ̀.
Зако́нꙋ гдⷭ҇а, разве́рзшаго ложесна̀ дв҃и́ча, и҆ млⷣнца плотоно́сна, сѷмеѡ́не, бы́вша ви́дѣлъ є҆сѝ, да́рꙋющаго всѣ̑мъ и҆збавле́нїе.
Рꙋка́ми человѣ́ка созда́вый, вопло́щсѧ, рꙋка́ми твои́ми держи́мь є҆́сть, ѡ҆свѧща́ѧ тѧ̀ ꙗ҆́вѣ, и҆ къ жи́зни бꙋ́дꙋщей проси́вшасѧ, блаже́нне, ѿпꙋща́етъ тѧ̀.
Бг҃оро́диченъ:
Мы́сленнꙋю тѧ̀ клещꙋ̀, ᲂу҆́гль носѧ́щꙋ бжⷭ҇твенный, ѿ твои́хъ крове́й воплоще́нна па́че ᲂу҆ма̀, сѷмеѡ́нъ ꙗ҆́кѡ ви́дѣ, всенепоро́чнаѧ, ра́дꙋѧсѧ ᲂу҆блажа́ше.
Конда́къ ст҃а́гѡ сѷмеѡ́на, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Ста́рецъ дне́сь ѿрѣши́тисѧ ѿ ю҆́зъ молѧ́шесѧ, сегѡ̀ житїѧ̀ тлѣ́ннагѡ, хрⷭ҇та̀ воспрїѧ́тъ на рꙋ́ки, зижди́телѧ и҆ гдⷭ҇а.
Сѣда́ленъ, гла́съ г҃. Подо́бенъ: Красотѣ̀:
Ѿ дв҃ы тѧ̀ воплоще́нна, хрⷭ҇тѐ, ра́дꙋѧсѧ под̾ѧ́тъ сщ҃е́нный сѷмеѡ́нъ, ны́нѣ ѿпꙋща́еши, вопїѧ̀, раба̀ твоего̀, влⷣко: а҆́нна же непоро́чнаѧ прⷪ҇ро́чица и҆ сла́внаѧ ны́нѣ и҆сповѣ́данїе и҆ пѣ́нїе прино́ситъ тебѣ̀. мы́ же, жизнода́вче, вопїе́мъ тѝ: сла́ва та́кѡ бл҃говоли́вшемꙋ.
Сла́ва, и҆ ны́нѣ, то́йже.
Пѣ́снь д҃. І҆рмо́съ:
Покры́ла є҆́сть нб҃са̀ добродѣ́тель твоѧ̀, хрⷭ҇тѐ: и҆зъ кївѡ́та бо проше́дъ, ст҃ы́ни твоеѧ̀ нетлѣ́нныѧ мт҃ре, въ хра́мѣ сла́вы твоеѧ̀ ꙗ҆ви́лсѧ є҆сѝ, ꙗ҆́кѡ младе́нецъ рꙋконоси́мь: и҆ и҆спо́лнишасѧ всѧ̑ твоегѡ̀ хвале́нїѧ.
Ра́дꙋѧсѧ, сѷмеѡ́не, неизрече́нныхъ таи́нниче, бцⷣа вопїѧ́ше, є҆го́же ѿ ст҃а́гѡ дре́вле и҆звѣсти́сѧ тебѣ̀ дх҃а, младе́нствовавшаго сло́ва хрⷭ҇та̀ на рꙋ́ки прїимѝ, зовы́й є҆мꙋ̀: и҆спо́лнишасѧ всѧ̑ твоегѡ̀ хвале́нїѧ.
На него́же ᲂу҆пова́лъ є҆сѝ, сѷмеѡ́не, во́зрастъ дѣ́тищный, ра́дꙋѧсѧ под̾имѝ хрⷭ҇та̀, і҆и҃лѧ бжⷭ҇твеннагѡ ᲂу҆тѣше́нїе, зако́на творца̀ и҆ влⷣкꙋ, и҆сполнѧ́ющаго зако́на чи́нъ, зовы́й є҆мꙋ̀: и҆спо́лнишасѧ всѧ̑ твоегѡ̀ хвале́нїѧ.
Ви́дѧ сѷмеѡ́нъ сло́во безнача́льное, съ пло́тїю ꙗ҆́кѡ на прⷭ҇то́лѣ херꙋві́мстѣмъ дв҃ою носи́маго, вино́внаго є҆́же бы́ти всѧ́ческихъ, ꙗ҆́кѡ младе́нцꙋ дивѧ́сѧ, вопїѧ́ше є҆мꙋ̀: и҆спо́лнишасѧ всѧ̑ твоегѡ̀ хвале́нїѧ.
И҆́нъ. І҆рмо́съ:
Сѣдѧ́й въ сла́вѣ на прⷭ҇то́лѣ бж҃ества̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.
Престарѣ́лсѧ є҆сѝ въ ста́рости, вѣ́рою же ѡ҆бнови́лсѧ є҆сѝ, но́ва младе́нца хотѧ̀ ви́дѣти, сѷмеѡ́не, всесоверше́ннаго, ѡ҆бновлѧ́юща мі́ръ ѡ҆бетша́вшїй прило́гомъ ве́тхагѡ борца̀.
Оу҆блажи́мъ согла́снѡ сѷмеѡ́на блаже́ннаго, ꙗ҆́кѡ сподо́бльшасѧ ви́дѣти бг҃а блаже́ннаго, въ пло́ть ѡ҆бо́лкшасѧ, ꙗ҆́кѡ да сотвори́тъ блажє́нны, ѻ҆каѧ̑нны пре́жде бы́вшыѧ.
Законода́вца тѧ̀ вѣ́мъ, и҆ зако́нныхъ є҆стества̀ вопло́щшагосѧ кромѣ̀, зако́нъ же но́въ вве́дшаго, сѷмеѡ́нъ взыва́ше: є҆ди́не гдⷭ҇и, ны́нѣ ѿпꙋсти́ мѧ къ жи́зни нетлѣ́ннѣй.
Бг҃оро́диченъ:
И҆́же рꙋко́ю всѧ̑ носѧ́й, на рꙋка́хъ носи́мый приснодв҃ы, сїю̀ херꙋві̑мъ содѣ́ла и҆ серафі̑мъ вы́шшꙋ, ꙗ҆́кѡ роди́тельницꙋ: ю҆́же воспои́мъ и҆ благоче́стнѡ ᲂу҆блажи́мъ.
Пѣ́снь є҃. І҆рмо́съ:
Ꙗ҆́кѡ ви́дѣ и҆са́їа ѻ҆бра́знѡ на прⷭ҇то́лѣ превознесе́на бг҃а, ѿ а҆́гг҃лъ сла́вы дѡрѷноси́ма, ѽ ѻ҆каѧ́нный, вопїѧ́ше, а҆́зъ: прови́дѣхъ бо воплоща́ема бг҃а, свѣ́та невече́рнѧ, и҆ ми́ромъ влады́чествꙋюща.
Разꙋмѣ́въ бжⷭ҇твенный ста́рецъ проѧвле́ннꙋю дре́вле проро́кꙋ сла́вꙋ, рꙋка́ми сло́во зрѧ̀ мт҃рними держи́мо, ѽ ра́дꙋйсѧ, вопїѧ́ше, чⷭ҇таѧ, ꙗ҆́кѡ престо́лъ бо держи́ши бг҃а, свѣ́та невече́рнѧго, и҆ ми́ромъ влады́чествꙋюща.
Покло́нсѧ ста́рецъ, и҆ стопа́мъ бжⷭ҇твеннѣ прикоснꙋ́всѧ неискꙋсобра́чныѧ и҆ бг҃ома́тере, ѻ҆́гнь, речѐ, но́сиши, чⷭ҇таѧ: млⷣнца бою́сѧ ѡ҆б̾ѧ́ти бг҃а, свѣ́та невече́рнѧго, и҆ ми́ромъ влады́чествꙋюща.
Ѡ҆чища́етсѧ и҆са́їа ѿ серафі́ма, ᲂу҆́гль прїе́мъ, ста́рецъ вопїѧ́ше бг҃ома́тери: ты̀ ꙗ҆́коже клеща́ми рꙋка́ми просвѣща́еши мѧ̀, пода́вши, є҆го́же но́сиши, свѣ́та невече́рнѧго, и҆ ми́ромъ влады́чествꙋюща.
И҆́нъ. І҆рмо́съ:
Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Оу҆ма̀ чистото́ю бг҃ꙋ вседержи́телю ꙗ҆́кѡ а҆́гг҃лъ послꙋжи́въ, бл҃же́нне, кро́вными же́ртвами ѡ҆чи́стилъ є҆сѝ дре́вле лю́ди і҆и҃лєвы, кро́вь спаси́тельнꙋю предзна́менавъ ꙗ҆́снѡ.
Самого̀ себѐ сотвори́лъ є҆сѝ хра́мъ бг҃ꙋ всест҃ъ, дѣ́лы бжⷭ҇твенными, бг҃оглаго́ливе. тѣ́мже ꙗ҆́кѡ млⷣнца во ст҃ѣ́мъ хра́мѣ ви́дѣлъ є҆сѝ бг҃а съ пло́тїю, тѧ̀ преставлѧ́юща къ бжⷭ҇твєннымъ селе́нїємъ.
Воспои́мъ дне́сь дх҃о́внѡ ликꙋ́юще всѝ, сѷмеѡ́на бг҃опрїи́мца, и҆ съ ни́мъ а҆́ннꙋ цѣломꙋ́дрꙋю, прⷪ҇ро́ки сꙋ́щѧ бж҃їѧ, и҆ сего̀ ви́дѣвшыѧ, на́съ ра́ди млⷣнствовавшаго.
Бг҃оро́диченъ:
Не ѡ҆пали́въ ложе́снъ твои́хъ є҆стество́мъ неизмѣ́нный, є҆ди́на херꙋві̑мъ ст҃ѣ́йши, чл҃вѣ́къ ꙗ҆ви́сѧ и҆зъ тебє̀ ражда́емь, и҆ ѿриновє́нныѧ тлѣ́нїемъ, всѧ̑ совокꙋпѝ, бг҃ома́ти, рождество́мъ твои́мъ.
Пѣ́снь ѕ҃. І҆рмо́съ:
Возопѝ къ тебѣ̀ ви́дѣвъ ста́рецъ ѻ҆чи́ма спасе́нїе, є҆́же лю́демъ прїи́де ѿ бг҃а, хрⷭ҇тѐ, ты̀ бг҃ъ мо́й.
Сїѡ́нꙋ ты̀ ка́мень возложи́лсѧ є҆сѝ, непокори̑вымъ претыка́нїе и҆ собла́зна ка́мень, нерꙋши́мое вѣ́рныхъ спасе́нїе.
И҆звѣ́стнѣ носѧ̀ начерта́нїе, и҆́же пре́жде вѣ̑къ тѧ̀ и҆зрасти́вшаго, земны́хъ за милосе́рдїе ны́нѣ не́мощїю ѡ҆бложи́сѧ.
Сн҃ꙋ вы́шнѧгѡ, сн҃ꙋ дв҃ы, бг҃ꙋ ѻ҆троча́ти бы́вшемꙋ, покло́ншасѧ тебѣ̀ ны́нѣ ѿпꙋстѝ съ ми́ромъ.
И҆́нъ. І҆рмо́съ:
Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ, молѧ́сѧ: ѿ тлѝ и҆зба́ви мѧ̀, і҆и҃се, цр҃ю̀ си́лъ.
Возопи́лъ є҆сѝ, внегда̀ ви́дѣлъ є҆сѝ гдⷭ҇а, сѷмеѡ́не, ꙗ҆́кѡ ѡ҆бѣща́лсѧ є҆сѝ ны́нѣ раба̀ твоего̀, сп҃се, ѿпꙋстѝ, во а҆́дѣ сꙋ́щымъ всѣ̑мъ твоѐ бжⷭ҇твенное возвѣща́юща воплоще́нїе.
Оу҆краси́лсѧ є҆сѝ, и҆ мѡѷсе́а свѣтлѣ́йшїй бы́лъ є҆сѝ, на рꙋ́ки добро́тою кра́снаго прїи́мъ, сѷмеѡ́не ста́рче, на́съ ра́ди по на́мъ младе́нца бы́вша.
Во́дъ тѧ̀ и҆спо́лнена бж҃е́ственныхъ сꙋ́ща, и҆ во а҆́дѡва дѡ́льнаѧ мѣ̑ста сше́дша, ви́дѣвше та́мѡ сꙋ́щїи ᲂу҆́зницы, сѷмеѡ́не, бж҃е́ственныѧ росы̀ и҆спо́лнишасѧ.
Бг҃оро́диченъ:
Оу҆лови́ти мѧ̀ всегда̀ и҆́щетъ вселꙋка́вый: но тогѡ́ мѧ сѣ́тей и҆схи́ти, влⷣчце, и҆ бж҃е́ственнымъ кро́вомъ кри́лъ твои́хъ цѣ́ла соблюдѝ.
Конда́къ пра́здника, гла́съ а҃:
Оу҆тро́бꙋ дв҃и́чꙋ ѡ҆свѧти́вый ржⷭ҇тво́мъ твои́мъ, и҆ рꙋ́цѣ сѷмеѡ́нѣ бл҃гослови́вый, ꙗ҆́коже подоба́ше, предвари́въ, и҆ ны́нѣ спа́слъ є҆сѝ на́съ, хрⷭ҇тѐ бж҃е: но ᲂу҆мирѝ во бранѣ́хъ жи́тельство и҆ ᲂу҆крѣпѝ лю́ди, и҆́хже возлюби́лъ є҆сѝ, є҆ди́не чл҃вѣколю́бче.
І҆́косъ:
Къ бцⷣѣ притеце́мъ, хотѧ́щїи сн҃а є҆ѧ̀ ви́дѣти, къ сѷмеѡ́нꙋ носи́ма, є҆го́же съ нб҃сѐ безпло́тнїи ви́дѧще, дивлѧ́хꙋсѧ глаго́люще: чꙋ̑днаѧ зри́мъ ны́нѣ и҆ пресла̑внаѧ, непостижи̑маѧ, несказа̑ннаѧ: и҆́же бо а҆да́ма созда́вый но́ситсѧ, ꙗ҆́кѡ младе́нецъ, невмѣсти́мый вмѣща́етсѧ на рꙋка́хъ ста́рчихъ, и҆́же въ нѣ́дрѣхъ неѡпи́санныхъ сы́й ѻ҆ц҃а̀ своегѡ̀, во́лею ѡ҆писꙋ́етсѧ пло́тїю, а҆ не бжⷭ҇тво́мъ, є҆ди́нъ чл҃вѣколю́бецъ.
Пѣ́снь з҃. І҆рмо́съ:
Тебѐ во ѻ҆гнѝ ѡ҆роси́вшаго ѻ҆́троки бг҃осло́вившыѧ, и҆ въ дв҃ꙋ нетлѣ́ннꙋ все́льшагосѧ, бг҃а сло́ва пои́мъ, бл҃гоче́стнѡ пою́ще: бл҃гослове́нъ бг҃ъ ѻ҆тє́цъ на́шихъ.
А҆да́мꙋ и҆звѣсти́ти хотѧ́й, и҆дꙋ̀ во а҆́дѣ живꙋ́щꙋ, и҆ є҆́ѵѣ принестѝ бл҃говѣ́стїе, сѷмеѡ́нъ вопїѧ́ше, со прⷪ҇рѡ́ки ликꙋ́ѧ: бл҃гослове́нъ бг҃ъ ѻ҆тє́цъ на́шихъ.
Ро́да зе́мна и҆збавлѧ́ѧй бг҃ъ, да́же до а҆́да прїи́детъ: плѣ̑ннымъ же пода́стъ всѣ̑мъ ѡ҆ставле́нїе, и҆ прозрѣ́нїе слѣпы̑мъ, ꙗ҆́кѡ и҆ нѣмы̑мъ вопи́ти: бл҃гослове́нъ бг҃ъ ѻ҆тє́цъ на́шихъ.
И҆ твоѐ се́рдце, нетлѣ́ннаѧ, ѻ҆рꙋ́жїе про́йдетъ, сѷмеѡ́нъ бцⷣѣ провозгласѝ, на крⷭ҇тѣ̀ зрѧ́щи твоего̀ сн҃а, є҆мꙋ́же вопїе́мъ: бл҃гослове́нъ бг҃ъ ѻ҆тє́цъ на́шихъ.
И҆́нъ. І҆рмо́съ:
Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.
Зако́ннѡ гдⷭ҇ꙋ вседержи́телю ты̀ послꙋжи́лъ є҆сѝ, пра́веденъ ꙗ҆́кѡ и҆́стиннѡ, и҆ въ зако́нѣ непоро́ченъ, бл҃же́нне[[Исправлена очевидная опечатка оригинала: бж҃е́нне. Прим. orthlib]], бы́въ. тѣ́мже пое́ши: препѣ́тый ѻ҆тцє́въ гдⷭ҇и и҆ бг҃ъ, бл҃гослове́нъ є҆сѝ.
Ра́дость скорбѧ́щихъ прїи́де, и҆збавле́нїе і҆и҃лю вои́стиннꙋ ꙗ҆ви́сѧ, ꙗ҆́кѡ младе́нецъ въ хра́мѣ свое́мъ: ѿпꙋсти́ мѧ къ жи́зни бꙋ́дꙋщей, сѷмеѡ́нъ вопїѧ́ше ра́дꙋѧсѧ.
За милосе́рдїе щедро́тъ твои́хъ, претрꙋжде́на мѧ̀ зако́на пи́сменемъ, слѧ́чена мѧ̀ ста́ростїю, ѿпꙋстѝ, сп҃се, раба̀ твоего̀: ꙗ҆́кѡ ви́дѣхъ тѧ̀, сѷмеѡ́нъ взыва́ше, на землѝ носѧ́ща пло́ть.
Бг҃оро́диченъ:
Не и҆стощи́въ по́лный пречⷭ҇тыхъ нѣ́дръ ро́ждшагѡ ѻ҆ц҃а̀, въ твои́хъ нѣ́дрѣхъ, чⷭ҇таѧ, ꙗ҆́кѡ млⷣнецъ сѣди́тъ, ᲂу҆гото́ваѧ, и҆̀мже восхотѣ̀ ᲂу҆подо́битисѧ, пречⷭ҇таѧ[[Исправлена очевидная опечатка оригинала: пречⷭ҇та́ѧ. Прим. orthlib]], свѧще́нное ꙗ҆́вѣ сѣда́лище.
Пѣ́снь и҃. І҆рмо́съ:
Нестерпи́момꙋ ѻ҆гню̀ соедини́вшесѧ, бг҃оче́стїѧ предстоѧ́ще ю҆́ноши, пла́менемъ же невре́ждени, бжⷭ҇твеннꙋю пѣ́снь поѧ́хꙋ: благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.
Лю́дїе і҆зра́илєвы твою̀ сла́вꙋ є҆мманꙋ́ила, зрѧ́ще ѻ҆троча̀ и҆зъ дв҃ы, предъ лице́мъ бжⷭ҇твеннагѡ ковче́га ны́нѣ ликꙋ́йте: благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.
Сѐ, сѷмеѡ́нъ вопїѧ́ше, прерѣка́емое зна́менїе се́й бꙋ́детъ, бг҃ъ сы́й и҆ ѻ҆троча̀. семꙋ̀, вѣ́рнїи, возопїи́мъ: благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.
Живо́тъ сы́й, се́й бꙋ́детъ паде́нїе непокори̑вымъ, младе́нствовавъ бг҃ъ сло́во, ꙗ҆́кѡ воста́нїе всѣ̑мъ вѣ́рою пою́щымъ: благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.
И҆́нъ. І҆рмо́съ:
Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.
Ѡ҆вдовѣ́вшїй мі́ръ бжⷭ҇твенныѧ сла́вы, прише́дшаго невѣстоꙋкраси́ти пребжⷭ҇твеннаго, вдова̀ сꙋ́щи а҆́нна всехва́льнаѧ, и҆ прⷪ҇ро́чества бл҃года́тїю ѡ҆блиста́емаѧ просла́ви є҆го̀, и҆ бꙋ́дꙋщее всѣ̑мъ предстоѧ́щымъ показа́ше бжⷭ҇твенное и҆збавле́нїе.
Закѡ́нныѧ жє́ртвы приноси́лъ є҆сѝ, а҆́гнца за милосе́рдїе несказа́нное, кро́вь сп҃си́тельнꙋю провозвѣща́ѧ и҆здале́ча, бл҃же́нне свѧще́нниче: є҆го́же воплоще́нна прїе́мъ, сѷмеѡ́не, просла́вилсѧ є҆сѝ па́че мѡѷсе́а и҆ всѣ́хъ прⷪ҇рѡ́къ.
Ви́дѣвъ жела́емаго, разрѣше́нїе прїѧ́лъ є҆сѝ тѣле́сное, бг҃одохнове́нне, и҆ ꙗ҆́коже зрѣ́лаѧ пшени́ца преше́лъ є҆сѝ ко ѻ҆тцє́мъ, сла́вне, воспита́нъ въ ста́рости до́брѣй. Тѣ́мже твою̀ всепра́зднственнꙋю па́мѧть ра́достїю дꙋше́вною соверша́емъ.
Бг҃оро́диченъ:
Ꙗ҆́кѡ крі́нъ, ꙗ҆́кѡ бл҃гово́ненъ шипо́къ, ꙗ҆́кѡ бжⷭ҇твенное ѡ҆бонѧ́нїе ѡ҆брѣ́тъ тѧ̀ сло́во пребжⷭ҇твенное, пречⷭ҇таѧ бг҃оневѣ́сто, и҆ въ твою̀ ᲂу҆тро́бꙋ всели́сѧ, благоꙋха́ѧ на́ше є҆стество̀, ѕлосмра́дїѧ и҆спо́лншеесѧ, є҆́же ѿ грѣха̀, мр҃і́е бцⷣе.
Пѣ́снь ѳ҃. І҆рмо́съ:
Въ зако́нѣ сѣ́ни и҆ писа́нїй ѻ҆́бразъ ви́димъ, вѣ́рнїи, всѧ́къ мꙋ́жескїй по́лъ, ложесна̀ разверза́ѧ, ст҃ъ бг҃ꙋ. тѣ́мъ перворожде́нное сло́во ѻ҆ц҃а̀ безнача́льна, сн҃а первородѧ́щасѧ мт҃рїю неискꙋсомꙋ́жнѡ, велича́емъ.
И҆́же дрє́внимъ новорожде́нныхъ го́рличищъ сꙋпрꙋ́гъ, дво́ица же бѧ́ше птенцє́въ, въ ни́хже мѣ́сто бжⷭ҇твенный ста́рецъ и҆ цѣломꙋ́дреннаѧ а҆́нна прⷪ҇ро́чица ѿ дв҃ы рожде́нномꙋ и҆ сн҃ꙋ є҆диноро́дномꙋ ѻ҆́ч҃ꙋ, въ це́рковь приноси́мꙋ, слꙋ́жатъ велича́юще.
Возда́лъ є҆сѝ мнѣ̀, вопїѧ́ше сѷмеѡ́нъ, спасе́нїѧ твоегѡ̀, хрⷭ҇тѐ, ра́дованїе: воспрїимѝ твоего̀ слꙋжи́телѧ, сѣ́нїю претрꙋжде́ннаго, но́выѧ благода́ти сщ҃еннопроповѣ́дника та́йнаго, во хвале́нїи велича́юща.
Свѧщеннолѣ́пнѡ и҆сповѣ́дашесѧ а҆́нна прорица́ющи, цѣломꙋ́дреннаѧ и҆ преподо́бнаѧ и҆ ста́рица влⷣцѣ въ це́ркви ꙗ҆́вственнѡ: бцⷣꙋ же проповѣ́дающи всѣ́мъ сꙋ́щымъ, велича́ше.
И҆́нъ. І҆рмо́съ:
Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови благослове́нїе процвѣла̀ є҆сѝ. тѣ́мъ тѧ̀ всѝ велича́емъ.
Чє́стны рꙋ́цѣ твоѝ вои́стиннꙋ прикоснꙋ́вшыѧсѧ, бг҃опрїи́мче, бжⷭ҇твєннымъ ᲂу҆десє́мъ прикаса́ющагѡсѧ гора́мъ, ꙗ҆́коже пое́тъ дв҃дъ, и҆ дымѧ́тсѧ: бл҃же́нъ вои́стиннꙋ ты̀ бы́лъ є҆сѝ. тѣ́мже досто́йнѡ восхвалѧ́емъ тѧ̀.
Ра́ка твоѧ̀ и҆сточа́етъ вѣ̑рнымъ и҆сцѣлє́нїѧ, па́мѧть же блаже́ннаѧ сїѧ́ющи па́че со́лнца, и҆ всѣ́хъ дꙋ́шы просвѣща́ющи, и҆ мра́ка мы́сленнагѡ и҆схища́ющи, свѧщеннотаи́нниче всече́стне.
Просвѣща́ютъ сїѧ́нїемъ мы́сленнымъ ꙗ҆́кѡ со́лнце и҆ лꙋна̀ подсо́лнечнꙋю, а҆́нна цѣломꙋ́дреннаѧ и҆ прⷪ҇ро́чица, ста́рецъ же сѷмеѡ́нъ сла́вный: и҆́хже ра́ди на́съ, чл҃вѣколю́бче гдⷭ҇и, грѣхо́вныѧ тмы̀ и҆зба́ви.
Бг҃оро́диченъ:
Ꙗ҆́вльшꙋюсѧ тѧ̀ мт҃рь бж҃їю ꙗ҆́кѡ ви́дѣвъ, бцⷣе, ста́рецъ речѐ, ꙗ҆́коже прⷪ҇ро́къ: сѐ тво́й сн҃ъ на воста́нїе и҆ паде́нїе мно́гихъ лежи́тъ, влⷣчце, и҆ въ зна́менїе неꙋдобосказꙋ́емое.
Свѣти́ленъ. Подо́бенъ: Жєны̀ ᲂу҆слы́шите:
Непремѣ́ннѣ по ѵ҆поста́си въ тебѣ̀, бг҃ороди́тельнице, пло́тїю соедини́сѧ безсѣ́меннѡ, и҆ младе́нствова сло́во, є҆го́же на рꙋка́хъ носѧ́щи, херꙋві́мски ꙗ҆́кѡ прⷭ҇то́лъ, ны́нѣ бг҃ꙋ ѻ҆ц҃ꙋ̀ принесла̀ є҆сѝ, и҆ сѷмеѡ́нъ ста́рецъ ра́дꙋѧсѧ прїѧ́тъ того̀.
Сла́ва, и҆ ны́нѣ, пра́здника:
Дх҃омъ во ст҃и́лищи предста́въ ста́рецъ, на рꙋ́ки воспрїѧ́тъ зако́на влⷣкꙋ, вопїѧ̀: ны́нѣ соꙋ̑зъ мѧ̀ плотски́хъ разрѣшѝ, ꙗ҆́коже ре́клъ є҆сѝ, съ ми́ромъ: ви́дѣхъ бо ѻ҆чи́ма ѿкрове́нїе ꙗ҆зы́кѡвъ, и҆ і҆зра́илю спасе́нїе.
На стїхо́внѣ стїхи̑ры, гла́съ ѕ҃. Подо́бенъ: Тридне́венъ:
Воспрїимѝ, речѐ, сѷмеѡ́не, зижди́телѧ всѧ́ческихъ рꙋка́ма. ѽ ста́рче! под̾имѝ хрⷭ҇та̀, є҆го́же дв҃а ѻ҆трокови́ца родѝ безъ сѣ́мене, на ра́дость ро́дꙋ на́шемꙋ.
Сті́хъ: Ны́нѣ ѿпꙋща́еши раба̀ твоего̀, влⷣко, по глаго́лꙋ твоемꙋ̀, съ ми́ромъ.
Зако́нꙋ творца̀ и҆ бг҃а, є҆го́же трепе́щꙋтъ а҆́гг҃льскаѧ мнѡ́жества, соше́дшесѧ воспои́мъ, лю́дїе, є҆ди́наго бл҃годѣ́телѧ и҆ зако́нꙋ законода́телѧ, во спасе́нїе дꙋ́шъ на́шихъ.
Сті́хъ: Свѣ́тъ во ѿкрове́нїе ꙗ҆зы́кѡвъ, и҆ сла́вꙋ люде́й твои́хъ і҆и҃лѧ.
Ны́нѣ ѿпꙋща́еши, влⷣко, раба̀ твоего̀, ꙗ҆́коже ре́клъ є҆сѝ, съ ми́ромъ: ꙗ҆́кѡ ви́дѣхъ тѧ̀, хрⷭ҇тѐ, свѣ́та первовѣ́чнаго, соꙋ̑зъ мѧ̀ плотски́хъ, во ѿкрове́нїе ꙗ҆зы́кѡвъ и҆ і҆зра́илю.
Сла́ва, и҆ ны́нѣ, гла́съ в҃:
Сщ҃е́ннаго сщ҃е́ннаѧ дв҃а принесѐ во ст҃и́лище ст҃и́телю, просте́ръ же рꙋ́цѣ сѷмеѡ́нъ, прїѧ́тъ сего̀ ра́дꙋѧсѧ, и҆ возопѝ: ны́нѣ ѿпꙋща́еши раба̀ твоего̀, влⷣко, по глаго́лꙋ твоемꙋ̀, съ ми́ромъ, гдⷭ҇и.
На лїтꙋргі́и, Блажє́нна ѿ канѡ́на пра́здника, пѣ́снь а҃-ѧ: ст҃а́гѡ, пѣ́снь ѕ҃-ѧ. Прокі́менъ пра́здника: и҆ ст҃а́гѡ, гла́съ з҃: Возвесели́тсѧ првⷣникъ ѡ҆ гдⷭ҇ѣ, и҆ ᲂу҆пова́етъ на него̀. Сті́хъ: Оу҆слы́ши, бж҃е, гла́съ мо́й: А҆пⷭ҇лъ во є҆вре́ємъ, зача́ло тк҃а ѿ полꙋ̀. А҆ллилꙋ́їа, гла́съ ѕ҃: Свѣ́тъ возсїѧ̀ првⷣникꙋ, и҆ пра̑вымъ се́рдцемъ весе́лїе. Є҆ѵⷢ҇лїе лꙋкѝ, зача́ло и҃. Прича́стенъ пра́здника, и҆ ст҃а́гѡ: Въ па́мѧть вѣ́чнꙋю:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.