← претходни дан | Минеј — Децембар | следећи дан →
16 декабря: Святого пророка Аггея.
Мѣ́сѧца тогѡ́же въ ѕ҃і-й де́нь.
Ст҃а́гѡ прⷪ҇ро́ка а҆гге́а.
На Гдⷭ҇и, воззва́хъ, стїхи̑ры, гла́съ и҃. Поⷣ: Мч҃ницы твоѝ, гдⷭ҇и:
Селе́нїе гдⷭ҇а твоегѡ̀ и҆ хра́мъ ѡ҆дꙋшевле́нъ бы́въ житїѧ̀ свѣ́тлостїю и҆ пребыва́нїемъ, бездꙋ́шный воздви́глъ є҆сѝ хра́мъ, дре́вле па́дшїй, всече́стне, вселе́нныѧ црⷭ҇твꙋющемꙋ: того̀ твои́ми моли́твами молѝ всѣ̑мъ дарова́ти ве́лїю ми́лость.
Сосꙋ́дъ ꙗ҆ви́лсѧ є҆сѝ дх҃а, съ нб҃съ тебѣ̀ подає́маѧ прїе́млѧ свѣтоли̑тїѧ, и҆ сїѧ́нїй прїѧ́тенъ. тѣ́мъ прорица́еши спаси́тельное всѣ̑мъ человѣ́кѡмъ и҆збавле́нїе: того̀ твои́ми мл҃твами ᲂу҆молѝ всѣ̑мъ дарова́ти ве́лїю ми́лость.
Заре́ю лꙋчено́сною ѡ҆блїѧ́емь, и҆ видѣ́нїѧ сподоблѧ́емь, и҆ чистѣ́йшагѡ и҆ невече́рнѧгѡ просвѣще́нїѧ ꙗ҆́вльсѧ, блаже́нне, и҆спо́лненъ, тѧ̀ воспѣва́ющыѧ соблюдѝ, молѧ̀ є҆ди́наго гдⷭ҇а всѣ̑мъ да́ти ве́лїю ми́лость.
И҆́ны стїхи̑ры прест҃ѣ́й бцⷣѣ, гла́съ и҆ подо́бенъ то́йже:
И҆схити́ мѧ, влⷣчце, и҆зъ рꙋкѝ ѕмі́ѧ человѣкоꙋбі́йцы, борю́щагѡ мѧ̀ ле́стїю пожре́ти до конца̀, сокрꙋшѝ чє́люсти сегѡ̀, молю́сѧ, и҆ кова̑рствїѧ разорѝ, ꙗ҆́кѡ да, и҆зба́вльсѧ сегѡ̀ ногте́й, велича́ю си́лꙋ твою̀.
А҆́зъ є҆́смь дре́во непло́дное, всенепоро́чнаѧ, неплодѧ́щее плода̀ спасе́ннагѡ: тѣ́мже и҆ трепе́щꙋ посѣче́нїѧ, да не ка́кѡ вве́рженъ бꙋ́дꙋ во ѻ҆́гнь негаси́мый, ѻ҆каѧ́нный. тѣ́мже тѝ припа́даю: сегѡ̀ и҆зба́ви мѧ̀, и҆ плодоно́сна покажѝ, чⷭ҇таѧ, сн҃ꙋ твоемꙋ̀, хода́тайствомъ твои́мъ.
Помышлє́нїѧ нечи̑ста, и҆ ᲂу҆ста̀ льсти̑ва, дѣла́ же моѧ̑ всѧ̑ ѡ҆сквернє́на, и҆ что̀ сотворю̀; ка́кѡ ᲂу҆срѧ́щꙋ сꙋдїю̀; влⷣчце дв҃о, молѝ сн҃а твоего̀ и҆ зижди́телѧ и҆ гдⷭ҇а, ꙗ҆́кѡ да въ покаѧ́нїи прїи́метъ дꙋ́хъ мо́й, ꙗ҆́кѡ є҆ди́нъ бл҃гоꙋтро́бенъ.
Сла́ва, и҆ ны́нѣ, бг҃оро́диченъ:
Го́ре прогнѣ́вавшемꙋ своего̀ бг҃а, ᲂу҆вы̀ мнѣ̀, въ невѣ́дѣнїи, и҆ пребыва́ющꙋ во ᲂу҆ны́нїи и҆ лѣ́ности, ꙗ҆́коже а҆́зъ. влⷣчце дв҃о! ты̀ помози́ ми ѡ҆мраче́нномꙋ, и҆ моли́сѧ твоемꙋ̀ сн҃ꙋ и҆ содѣ́телю да́ти мѝ согрѣше́нїй проще́нїе.
Крⷭ҇тобг҃оро́диченъ:
Ю҆́ница нескве́рнаѧ ю҆нца̀ ви́дѧщи на дре́вѣ пригвожда́ема во́лею, рыда́ющи жа́лостнѣ, ᲂу҆вы̀ мнѣ̀, вопїѧ́ше, люби́мѣйшее ча́до! что́ ти со́нмъ воздадѐ безблагода́тный є҆вре́йскїй, хотѧ́ мѧ ѡ҆безча́дствовати ѿ тебє̀, вселюбе́зне;
На ᲂу҆́трени ѻ҆́ба канѡ́на ѻ҆ктѡ́иха: и҆ прⷪ҇ро́ка на д҃: є҆гѡ́же краегране́сїе: Бг҃ода̑ннаѧ пое́мъ а҆гге́єва словеса̀. Ѳеофа́ново.
Гла́съ з҃. Пѣ́снь а҃. І҆рмо́съ:
И҆змѣ́ншемꙋ бг҃ꙋ і҆и҃лѧ ѿ мо́рѧ чермна́гѡ, побѣ́днꙋю пѣ́снь пои́мъ, ꙗ҆́кѡ просла́висѧ.
Бг҃ови́днѣйшїй бг҃ꙋ предстоѧ̀, ꙗ҆́кѡ прⷪ҇ро́къ и҆́стиненъ, пою́щихъ честнꙋ́ю па́мѧть твою̀, блаже́нне, помина́й.
На ѡ҆снова́нїи тве́рдѣмъ добродѣ́телей тебѐ сама́го назда́въ, возложи́ласѧ є҆сѝ хра́мъ ѡ҆дꙋшевле́нъ, бг҃обл҃же́нне.
Чистѣ́йшїй тво́й ᲂу҆́мъ при́снѡ зрѧ̀ бг҃а, ꙗ҆́кѡ мо́щно, та́мошними далечесїѧ́тельнѡ дарова̑нїи, бл҃же́нне, ѡ҆блиста̀.
Бг҃оро́диченъ:
Тѧ̀ безмт҃рнѧ пе́рвѣе, сло́во бж҃їе, дв҃а, во ᲂу҆тро́бѣ заче́нши пло́тски, родила̀ є҆́сть сн҃а без̾ѻ́тча.
Пѣ́снь г҃. І҆рмо́съ:
Оу҆тверди́сѧ вѣ́рою хрⷭ҇то́ва цр҃ковь: и҆́бо непреста́ннѡ пѣ́сньми вопїе́тъ пою́щи: ст҃ъ є҆сѝ, гдⷭ҇и, и҆ тѧ̀ пое́тъ дꙋ́хъ мо́й.
Си́лою бжⷭ҇твенною де́мѡнскагѡ лю́тагѡ плѣне́нїѧ на́съ разрѣши́въ, хра́мы твоѧ̑ че́стны, сп҃се, покажѝ, ст҃ъ є҆сѝ, зовꙋ́щыѧ, спаса́ѧй дꙋ́шы на́шѧ.
Въ высоча́йшихъ ѡ҆бита́ѧй, и҆ и҆сполнѧ́ѧ вселе́ннꙋю свѧты́ни, прⷪ҇ро́че, хра́мъ тѧ̀ показꙋ́етъ, ст҃ъ є҆сѝ, зовꙋ́ща, спаса́ѧй дꙋ́шы на́шѧ.
Бжⷭ҇твенный дх҃ъ всѣ̑мъ бл҃года́ть раздава́ѧй, къ твоѐ се́рдце всели́всѧ, вопи́ти тѧ̀ наꙋча́етъ: ст҃ъ є҆сѝ, гдⷭ҇и, спаса́ѧй дꙋ́шы на́шѧ.
Бг҃оро́диченъ:
Сло́вомъ всю̀ тва́рь мꙋ́дрѣ содѣ́тельствовавый, содѣ́тельствꙋетсѧ и҆зъ тебє̀ по на́мъ, бцⷣе, чл҃вѣ́къ бы́въ за милосе́рдїе, чл҃вѣколю́бецъ.
Сѣда́ленъ, гла́съ г҃. Подо́бенъ: Бжⷭ҇твенныѧ вѣ́ры:
Бжⷭ҇твеннымъ дх҃омъ просвѣще́нꙋ мы́сль и҆мѣ́ѧ, прⷪ҇ро́че, бж҃їѧ прорица́еши та̑инства, ѿкрыва́ѧ бꙋ́дꙋщихъ ꙗ҆вле́нїе, и҆ сказꙋ́ѧ веще́й сбытїѐ, а҆гге́е всеблаже́нне: хрⷭ҇та̀ бг҃а молѝ, дарова́ти на́мъ ве́лїю ми́лость.
Сла́ва, и҆ ны́нѣ, бг҃оро́диченъ:
Бжⷭ҇твеннагѡ є҆стества̀ не ѿлꙋ́чсѧ, пло́ть бы́въ во чре́вѣ твое́мъ: но бг҃ъ вочл҃вѣ́чсѧ и҆ пребы́сть, и҆́же по ржⷭ҇твѣ̀ мт҃рь тѧ̀ дв҃ꙋ, ꙗ҆́кѡ пре́жде ржⷭ҇тва̀ сохрани́въ всенепоро́чнꙋ, є҆ди́нъ гдⷭ҇ь: того̀ прилѣ́жнѡ молѝ, дарова́ти на́мъ ве́лїю ми́лость.
Крⷭ҇тобг҃оро́диченъ:
Нескве́рнаѧ а҆́гница сло́ва, нетлѣ́ннаѧ дв҃а мт҃и, на крⷭ҇тѣ̀ зрѧ́щи повѣ́шена, и҆зъ неѧ̀ безъ болѣ́зни прозѧ́бшаго, мт҃рски подо́бнѡ рыда́ющи, вопїѧ́ше: ᲂу҆вы̀ мнѣ̀, ча́до моѐ, ка́кѡ стра́ждеши во́лею, хотѧ̀ и҆зба́вити ѿ страсте́й безче́стїѧ человѣ́ка;
Пѣ́снь д҃. І҆рмо́съ:
Оу҆слы́шахъ слꙋ́хъ тво́й, гдⷭ҇и, ꙗ҆́кѡ ꙗ҆ви́лсѧ є҆сѝ на землѝ, за є҆́же спасти́ ны. тѣ́мъ вопїе́мъ: сла́ва си́лѣ твое́й, гдⷭ҇и.
Показа́лъ є҆сѝ, и҆зъ дв҃ы ѡ҆дꙋшевле́нный прїѧ́тый тебѣ̀ до́мъ, твоемꙋ̀ прⷪ҇ро́кꙋ, хрⷭ҇тѐ: съ ни́мже вопїе́мъ: сла́ва си́лѣ твое́й, гдⷭ҇и.
Собра́лъ є҆сѝ ѿриновє́нныѧ, гдⷭ҇и, рабо́ты вра́жїѧ свобожде́й на́съ, ꙗ҆́коже прⷪ҇ро́къ глаго́летъ бг҃опрїѧ́тный.
Ꙗ҆ви́лъ є҆сѝ бꙋ́дꙋщее послѣдѝ спасе́нїе ꙗ҆зы́кѡвъ твоемꙋ̀ прⷪ҇ро́кꙋ, хрⷭ҇тѐ, тебѣ̀ вопїю́щꙋ: сла́ва си́лѣ твое́й, гдⷭ҇и.
Бг҃оро́диченъ:
Преложи́ла є҆сѝ на бл҃гослове́нїе, влⷣчце, проклѧ́тство а҆да́мово, на́мъ ро́ждши хрⷭ҇та̀. къ немꙋ́же вопїе́мъ: сла́ва си́лѣ твое́й, гдⷭ҇и.
Пѣ́снь є҃. І҆рмо́съ:
Къ тебѣ̀ ᲂу҆́тренюю, и҆ тебѣ̀ вопїю̀, бл҃гоꙋтро́бне гдⷭ҇и: ѡ҆мраче́ннꙋю грѣхмѝ дꙋ́шꙋ мою̀, свѣ́томъ ѡ҆зари́въ за́повѣдей твои́хъ, наста́ви.
Хра́мы бы́ти бг҃а жива́гѡ, блаже́нне, сподо́би, свѣтоно́сный тво́й соверша́ющыѧ пра́здникъ, на ка́мени ᲂу҆тверди́въ твои́хъ догма́тѡвъ моли́твами твои́ми.
Ꙗ҆́кѡ бл҃годѣ́тель, тво́й ми́ръ да́ждь на́мъ, гдⷭ҇и, ꙗ҆́же на ᲂу҆стро́енїе, ми́ръ дꙋше́вный, є҆го́же бжⷭ҇твенный а҆гге́й дх҃омъ бжⷭ҇твеннымъ предглаго́ла.
Вели́ко бꙋ́детъ цр҃кве и҆́стиннѡ благосла́вїе, па́че пе́рвагѡ і҆и҃лева со́нмища, вопло́щшагосѧ сло́ва, и҆ человѣ́кѡмъ приѡбщи́вшасѧ.
Бг҃оро́диченъ:
Бл҃гослове́ннаѧ препросла́вленнаѧ мт҃и неискꙋсомꙋ́жнаѧ, ᲂу҆мерщвле́ннꙋю грѣхмѝ дꙋ́шꙋ мою̀, и҆ страстьмѝ невоздержа́нїѧ погребе́ннꙋю ѡ҆животворѝ.
Пѣ́снь ѕ҃. І҆рмо́съ:
І҆ѡ́на и҆зъ чре́ва а҆́дова вопїѧ́ше: возведѝ ѿ тлѝ живо́тъ мо́й. мы́ же тебѣ̀ вопїе́мъ: всеси́льне сп҃се, поми́лꙋй на́съ.
Ю҆́ношески благоче́стїю, блаже́нне, ᲂу҆чѧ̀, воздви́глъ є҆сѝ влⷣцѣ всѣ́хъ хра́мъ ѡ҆свѧще́нъ, ѻ҆би́лїе благи́хъ ѡ҆бѣща́ѧ.
Возве́лъ є҆сѝ ѿ да́льнѧгѡ, сп҃се, плѣне́нїѧ человѣ́ка, и҆зъ глꙋбины̀ до́льнѣйшїѧ, и҆ къ го́рнемꙋ гра́дꙋ возве́лъ є҆сѝ є҆го̀, ꙗ҆́кѡ чл҃вѣколю́бецъ.
Ра́дꙋѧсѧ, дх҃а заре́ю, прⷪ҇ро́че, проре́клъ є҆сѝ дѣ́ѧтельныхъ словеса̀, и҆ благоче́стїѧ наказа́лъ є҆сѝ на́съ ѡ҆правда́нїемъ.
Бг҃оро́диченъ:
Хотѣ́нїемъ па́дъ, и҆згна́сѧ а҆да́мъ и҆зъ раѧ̀, сло́во же вопло́щсѧ и҆зъ дв҃ы, сего̀ взыва́етъ, и҆ къ го́рнѣй сла́дости возво́дитъ.
Пѣ́снь з҃. І҆рмо́съ:
Въ пе́щь ѻ҆́гненнꙋю вве́ржени прпⷣбнїи ѻ҆́троцы, ѻ҆́гнь въ ро́сꙋ преложи́ша, воспѣва́нїемъ си́це вопїю́ще: бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ.
Ѡ҆чи́стивъ тво́й ᲂу҆́мъ, воспрїѧ́лъ є҆сѝ сїѧ̑нїѧ ꙗ҆́вѣ, проро́че, дх҃а, свѣ́тлѡ прорица́ѧ, и҆ взыва́ѧ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.
Свѧще́ннѣйшꙋю тѧ̀ жи́знь проходѧ́ща ви́дѣвъ бг҃ъ, проро́ка предлага́етъ своегѡ̀ прише́ствїѧ, всѣ̑мъ вопїю́ща: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.
Бг҃оро́диченъ:
Въ пещѝ ѻ҆́гненнѣй трѝ ѻ҆́троки спасы́й, дв҃о, то́й всели́всѧ во ᲂу҆тро́бꙋ твою̀, на того̀ надѣ́ющыѧсѧ спаса́етъ вопїю́щыѧ: бл҃гослове́нъ, всечⷭ҇таѧ, пло́дъ чре́ва твоегѡ̀.
Пѣ́снь и҃. І҆рмо́съ:
Є҆ди́наго безнача́льнаго цр҃ѧ̀ сла́вы, є҆го́же благосло́вѧтъ нбⷭ҇ныѧ си̑лы, и҆ трепе́щꙋтъ чи́ни а҆́гг҃льстїи, по́йте, свѧще́нницы, лю́дїе, превозноси́те є҆го̀ во вѣ́ки.
Пѣсносло́вимъ тѧ̀ всѣ́хъ влⷣкꙋ, є҆го́же прⷪ҇ро́къ бг҃ови́децъ а҆гге́й показа̀, покланѧ́тисѧ же и҆ пѣ́ти: по́йте, свѧще́нницы, лю́дїе, превозноси́те є҆го̀ во вѣ́ки.
Сло́вꙋ безнача́льномꙋ въ послѣ́днихъ временѣ́хъ ꙗ҆ви́тисѧ, бг҃ови́дче прⷪ҇ро́че, провозвѣсти́лъ є҆сѝ ꙗ҆вле́ннѡ взыва́ѧ: по́йте свѧще́нницы, лю́дїе, превозноси́те є҆го̀ во вѣ́ки.
Бг҃оро́диченъ:
Пре́жде неви́дѣнный и҆ невмѣсти́мый є҆стество́мъ, во чре́во твоѐ вмѣ́щсѧ ви́дѣнъ бы́сть, всечⷭ҇таѧ: є҆мꙋ́же вѣ́рнѡ вопїе́мъ: по́йте, свѧще́нницы, лю́дїе, превозноси́те є҆го̀ во вѣ́ки.
Пѣ́снь ѳ҃. І҆рмо́съ:
Всепѣ́таѧ, нб҃съ превы́шшаѧ, безнача́льное сло́во безсѣ́меннѡ заче́ншаѧ, и҆ воплоще́ннаго бг҃а ро́ждшаѧ человѣ́кѡмъ. тѣ́мъ тѧ̀ всѝ велича́емъ.
Вкꙋси́въ є҆́же па́че сло́ва бг҃овидѣ́нїѧ, ѿтрѧ́слъ є҆сѝ, прⷪ҇ро́че, попечє́нїѧ земна̑ѧ, и҆ препросла́вленномꙋ бг҃ꙋ предста́лъ є҆сѝ досто́йнѡ. тѣ́мже вси́ тѧ вѣ́рнїи ᲂу҆блажа́емъ.
Бжⷭ҇твенное и҆ чꙋ́дное твоѐ, блаже́нне, житїѐ, предста́телѧ тѧ̀ бг҃ꙋ показа̀, бг҃омꙋ́дре, и҆ со безпло́тными ли̑ки весели́шисѧ вѣ́чнѡ. тѣ́мже вси́ тѧ при́снѡ ᲂу҆блажа́емъ.
Подоба́ше тебѣ̀, ꙗ҆́кѡ благоче́стїѧ ᲂу҆чи́телю, съ бг҃омъ бы́ти, и҆ сегѡ̀ сраствори́тисѧ пречи́стѣйшемꙋ свѣ́тꙋ, є҆го́же, блаже́нне, ны́нѣ молѝ и҆зба́вити и҆скꙋше́нїй дꙋ́шы на́шѧ.
Бг҃оро́диченъ:
Ты̀ была̀ є҆сѝ преесте́ственнѡ, бг҃ороди́тельнице, жили́ще и҆́стиннѡ всѣ́хъ цр҃ѧ̀, и҆ златови́дный ковче́гъ, є҆ди́нагѡ законода́вца внꙋ́трь и҆мѣ́ѧ хрⷭ҇та̀ воплоща́ема.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.