← претходни дан | Минеј — Децембар | следећи дан →
15 декабря: Святого священномученика Елевферия. Преподобного Павла, в Латре. Святителя Стефана исповедника, архиепископа Сурожского.
Мѣ́сѧца тогѡ́же въ є҃і-й де́нь.
Ст҃а́гѡ свѧщенномꙋ́ченика є҆леѵѳе́рїа:
И҆ прпⷣбнагѡ ѻ҆ц҃а̀ на́шегѡ па́ѵла, и҆́же въ ла́трѣ:
И҆ и҆́же во ст҃ы́хъ, ѻ҆ц҃а̀ на́шегѡ стефа́на и҆сповѣ́дника, а҆рхїепі́скопа сꙋро́жскагѡ.
Слꙋ́жба є҆гѡ̀ пи́сана по се́й слꙋ́жбѣ. А҆́ще и҆зво́лиши, по́й а҆ллилꙋ́їа.
На Гдⷭ҇и, воззва́хъ, стїхи̑ры свѧщенномꙋ́ченика г҃: и҆ прпⷣбнагѡ г҃. Стїхи̑ры свѧщенномꙋ́ченика, гла́съ д҃.
Подо́бенъ: Да́лъ є҆сѝ зна́менїе:
Сосꙋ́дъ свѧще́ннѣйшїй ꙳ дх҃а бжⷭ҇твеннагѡ бы́лъ є҆сѝ, ꙳ дꙋ́шꙋ ѡ҆чи́стивъ ѿ страсте́й, свѧще́ннѣйше. ꙳ Ѿсю́дꙋ бжⷭ҇твенное пома́занїе ст҃о́е прїѧ́лъ є҆сѝ, ꙳ а҆рхїере́й бы́въ, и҆ наста́вникъ люде́й бг҃омꙋ́дрый, ꙳ и҆ мꙋ́ченикъ непобѣди́мь, ꙳ на́съ ра́ди стрⷭ҇ти претерпѣ́вшагѡ, ꙳ и҆ безстра́стїе и҆сточи́вшагѡ, ꙳ страда́льче є҆леѵѳе́рїе.
До́брѣ по́двигъ тѧ̀ ви́дѣвши сконча́вша, ꙳ ꙗ҆́же до́брѣ тѧ̀ ро́джшаѧ, ꙳ ра́вное жела́ющи тебѣ̀ ꙳ проитѝ тече́нїе, ꙳ тебѐ ѡ҆б̾е́мши посредѣ̀ три́знища, мꙋ́дре, ꙳ ꙗ҆́коже ю҆́ница закала́етсѧ. ꙳ съ не́юже мо́лимъ тѧ̀, ꙳ ѡ҆ на́съ, є҆леѵѳе́рїе, сп҃са и҆ гдⷭ҇а ᲂу҆молѝ, преблаже́нне.
Тѣ́ло преѡби́дѣлъ є҆сѝ, ꙳ ᲂу҆ранѧ́емо бїе́ньми, ꙳ и҆ ѻ҆гню̀ приближа́ющеесѧ: ꙳ ᲂу҆́мъ бо впери́лъ є҆сѝ непобѣди́мымъ жела́нїемъ, краснѣ́йшею добро́тою бжⷭ҇твеннагѡ рачи́телѧ. ꙳ є҆гѡ́же сла́дкимъ ᲂу҆ѧзви́лсѧ є҆сѝ жела́нїемъ, ꙳ мч҃никѡвъ ᲂу҆добре́нїе, ꙳ а҆рхїере́євъ ᲂу҆краше́нїе, ꙳ страда́льче є҆леѵѳе́рїе, а҆́гг҃лѡвъ собесѣ́дниче.
Стїхи̑ры прпⷣбнагѡ, гла́съ в҃. Поⷣ: Є҆гда̀ ѿ дре́ва:
Па́ѵле, мона́шествꙋющихъ добро́та, прозѧбе́нїе кра́сное пꙋсты́ни, прпⷣбныхъ хвала̀, ла́тра честносло́вїе, вѣ́рныхъ тве́рдь, любо́вїю соверша́ющыѧ твою̀ всечестнꙋ́ю па́мѧть, и҆ моще́й твои́хъ ѡ҆блобыза́ющыѧ ра́кꙋ, и҆зба́ви ѡ҆бстоѧ́нїѧ всѧ́кагѡ, и҆ ѻ҆́гненнагѡ ѡ҆сꙋжде́нїѧ, ко влⷣцѣ твои́ми моли́твами.
Хра́мъ трⷪ҇цы тебѐ сама́го содѣ́лавъ, ѻ҆́ч҃е бг҃облаже́нне, хра́мъ во и҆́мени сеѧ̀ воздви́глъ є҆сѝ, въ пꙋсты̑ни же непрохѡ́дныѧ ла́трскїѧ вше́дъ, ꙗ҆́кѡ мѡѷсе́й въ сїна́йскꙋю го́рꙋ, всели́лсѧ є҆сѝ: и҆дѣ́же прїе́мъ бжⷭ҇твенный зако́нъ, мона́шествꙋющихъ мно́жєства и҆́стиннѡ наꙋча́еши и҆зрѧ́днѣйшымъ, всечꙋ́дне.
И҆мѣ́ѧ дерзнове́нїе къ бг҃ꙋ, па́ствѣ, ю҆́же соста́вилъ є҆сѝ мно́гими пѡ́ты, прпⷣбне, молѝ сохрани́тисѧ ѿ и҆скꙋше́нїй врага̀, и҆ ꙗ҆зы́ческихъ нахожде́нїй, ѻ҆гнѧ́ же и҆ меча̀, и҆ всѧ́кагѡ прило́га навѣ́та лꙋка́вагѡ: тебе́ бо градоде́ржца и҆ покро́въ и҆мꙋ́ще, на тѧ̀ наде́ждꙋ съ бг҃омъ стѧжа́хомъ, блаже́нне.
Сла́ва, и҆ ны́нѣ, бг҃оро́диченъ. Подо́бенъ: то́йже:
Є҆ди́на невмѣсти́маго бг҃а, нетѣсномѣ́стнѡ во чре́вѣ носи́ла є҆сѝ, чл҃вѣ́ка бы́вша за бла́гость, прест҃а́ѧ бг҃оневѣ́сто. тѣ́мже молю́ тѧ: ᲂу҆тѣснѧ́ющихъ мѧ̀ страсте́й и҆змѣнѝ, ꙗ҆́кѡ да, тѣ́снꙋю и҆ пра́вꙋю стезю̀ ше́ствовавъ, дости́гнꙋ ю҆́же къ жи́зни, дв҃о, водѧ́щꙋю.
Крⷭ҇тобг҃оро́диченъ:
Є҆гда̀ нескве́рнаѧ а҆́гница ви́дѣ своего̀ а҆́гнца на заколе́нїе, ꙗ҆́кѡ чл҃вѣ́ка, во́лею влеко́ма, пла́чꙋщи глаго́лаше: безча́дствовати мѧ̀ ны́нѣ тщи́шисѧ, хрⷭ҇тѐ, ро́ждшꙋю тѧ̀, что̀ сїѐ сотвори́лъ є҆сѝ и҆зба́вителю всѧ́ческихъ, ѻ҆ба́че воспѣва́ю и҆ сла́вꙋ твою̀, ю҆́же па́че ᲂу҆ма̀ и҆ сло́ва кра́йнюю бл҃гость, чл҃вѣколю́бче.
Тропа́рь, гла́съ д҃:
И҆ нра́вѡмъ прича́стникъ, и҆ прⷭ҇то́лѡмъ намѣ́стникъ, а҆по́столѡмъ бы́въ, дѣѧ́нїе ѡ҆брѣ́лъ є҆сѝ, бг҃одохнове́нне, въ видѣ́нїѧ восхо́дъ: сегѡ̀ ра́ди сло́во и҆́стины и҆справлѧ́ѧ, и҆ вѣ́ры ра́ди пострада́лъ є҆сѝ да́же до кро́ве, сщ҃енномꙋ́чениче є҆леѵѳе́рїе, молѝ хрⷭ҇та̀ бг҃а, спасти́сѧ дꙋша́мъ на́шымъ.
Сла́ва, прпⷣбнагѡ, гла́съ то́йже:
Ꙗ҆́кѡ безпло́тныхъ є҆диновсе́льника, и҆ всѣ̑мъ прпⷣбнымъ соѻ́бщника, всесла́вне па́ѵле, пое́мъ тѧ̀, и҆ мо́лимъ тѧ̀: моли́сѧ всегда̀ ѡ҆ на́съ, ꙗ҆́кѡ да ѡ҆брѧ́щемъ ми́лость.
И҆ ны́нѣ, бг҃оро́диченъ:
На ᲂу҆́трени є҆ди́нъ канѡ́нъ ѻ҆ктѡ́иха: И҆ ст҃ы́хъ два̀.
Канѡ́нъ свѧщенномꙋ́ченика. Є҆гѡ́же краегране́сїе: Страсте́й свобо́дна мѧ̀ покажѝ, всебл҃же́нне. І҆ѡ́сифъ:
Гла́съ а҃. Пѣ́снь а҃. І҆рмо́съ:
Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ спа́сшемꙋ і҆и҃лѧ, ꙗ҆́кѡ просла́висѧ.
Страсте́й ѡ҆мраче́нїемъ порабоще́ннаго свѣ́тлыми моли́твами твои́ми, мꙋ́чениче є҆леѵѳе́рїе, ны́нѣ свободѝ: да ꙗ҆́кѡ раба́ тѧ хрⷭ҇то́ва бжⷭ҇твенными воспою̀ пѣ́сньми.
Страда́нїѧ возсїѧ́лъ є҆сѝ чистѣ́йшими зарѧ́ми, свѧще́ннѣйше, ѡ҆багри́лъ є҆сѝ кро́вїю свѧще́ннꙋю твою̀ ѻ҆де́ждꙋ, и҆ бы́лъ є҆сѝ свѣтови́дѣнъ дꙋ́хомъ.
Бг҃ꙋ прилѣплѧ́ѧсѧ чистѣ́йшимъ ᲂу҆мо́мъ ѿ ю҆́ности, плотска́гѡ мꙋдрова́нїѧ дꙋ́шꙋ ᲂу҆дали́лъ є҆сѝ, и҆ чꙋде́съ ѻ҆би́льною благода́тїю ѡ҆богати́лсѧ є҆сѝ.
Бг҃оро́диченъ:
Ꙗ҆́кѡ прⷭ҇то́лъ ѻ҆гнезра́ченъ но́сиши зижди́телѧ, ꙗ҆́кѡ ѡ҆дꙋшевле́нъ черто́гъ, и҆ красна̀ пала́та цр҃ѧ̀ вмѣща́еши, бы́вшаго є҆́же є҆смы̀, кромѣ̀ преложе́нїѧ и҆ смѣше́нїѧ.
И҆́нъ канѡ́нъ прпⷣбнагѡ, гла́съ то́йже.
Пѣ́снь а҃. І҆рмо́съ:
Хрⷭ҇то́съ ражда́етсѧ, сла́вите. хрⷭ҇то́съ съ нб҃съ срѧ́щите. хрⷭ҇то́съ на землѝ, возноси́тесѧ. по́йте гдⷭ҇еви всѧ̀ землѧ̀, и҆ весе́лїемъ воспо́йте лю́дїе, ꙗ҆́кѡ просла́висѧ.
Но́вое тебѣ̀ пѣ́нїе похва́льное привнестѝ во ѿверзе́нїе ᲂу҆́стъ, па́ѵле бг҃оно́се, тща́щꙋсѧ, пода́ждь мѝ глаго́лати твои́ми моли́твами, прпⷣбне, благода́ть, ꙗ҆́кѡ да по́двиги твоѧ̑ честны̑ѧ проповѣ́мъ.
Ѿ ю҆́ности, прпⷣбне, ꙗ҆ре́мъ гдⷭ҇ень воспрїе́мь, и҆ въ бразда́хъ твоегѡ̀ се́рдца пшени́цꙋ сѣ́ѧвъ дꙋхо́внꙋю, кла́съ пожа́лъ є҆сѝ, ᲂу҆твержда́ющь дꙋ́шы, бг҃облаже́нне.
Пѡ́ты мно́жайшими воспрїѧ́лъ є҆сѝ вы́шнее црⷭ҇тво, ꙗ҆́кѡ безпло́тенъ на землѝ жи́въ, и҆ тѣ́ломъ пожи́въ а҆́гг҃льское житїѐ. и҆ ны́нѣ ᲂу҆́бѡ въ высоча́йшихъ трⷪ҇цѣ предстоѧ̀, на́съ помина́й.
Бг҃оро́диченъ:
Тлѣ́ннꙋю мою̀ пло́ть, бг҃оневѣ́сто, прїе́мъ ѿ твои́хъ крове́й безпло́тный, и҆ въ ꙗ҆́слехъ возлегі́й во́лею, сїю̀, ю҆́же прїѧ́тъ, ѡ҆божа́етъ пло́ть, бг҃ома́ти, ѿ соедине́нїѧ є҆ѧ̀ пребл҃гі́й.
Пѣ́снь г҃. І҆рмо́съ:
Да ᲂу҆тверди́тсѧ се́рдце моѐ въ во́ли твое́й, хрⷭ҇тѐ бж҃е, и҆́же надъ вода́ми не́бо ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне.
За хрⷭ҇та̀ страда́ти и҆зво́ливый, ꙗ҆́звы терпи́ши тѣлє́сныѧ, ᲂу҆слажда́ѧсѧ, мꙋ́дре, болѣ́зньми и҆ скорбьмѝ: сегѡ̀ ра́ди неболѣ́зненнꙋ жи́знь ны́нѣ воспрїѧ́лъ є҆сѝ.
Те́плымъ жела́нїемъ сотво́ршагѡ, страда́льче бг҃омꙋ́дре, держи́мь, разжже́ннѣй тебѐ сама́го поверга́еши хи́трости, ѡ҆роша́емь дх҃а ѻ҆гне́мъ, є҆леѵѳе́рїе.
Въ свѧще́нницѣхъ свѧще́ннѣйшїй и҆ въ мч҃ницѣхъ мꙋ́ченикъ твердѣ́йшїй ꙗ҆́вльсѧ, вѣне́цъ сꙋгꙋ́бъ прїѧ́лъ є҆сѝ, блаже́нне, лицѐ бж҃їе вы́нꙋ ви́дѧ.
Бг҃оро́диченъ:
Же́злъ крѣ́пости прозѧбла̀ є҆сѝ хрⷭ҇та̀, и҆́мже ᲂу҆твержда́емсѧ: тѧ́ бо воѡбража́ше а҆арѡ́новъ же́злъ и҆ногда̀ прозѧ́бшїй, недѣ́ланнаѧ землѐ, чⷭ҇таѧ голꙋби́це приснодв҃о.
И҆́нъ. І҆рмо́съ:
Пре́жде вѣ̑къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ, гдⷭ҇и.
Ѽ твоегѡ̀ мꙋ́жества! ѽ дꙋше́вныѧ до́блести, сла́вне! ты́ бо членѡ́вныѧ львѡ́въ сокрꙋши́ти неви́димыхъ жела́ѧ, два̀ ка́менѧ носи́лъ є҆сѝ превели́ка во вре́мѧ но́щи, тѧготꙋ̀ на ра́менахъ.
Кто̀ твоѧ̑ по́двиги и҆зрещѝ по достоѧ́нїю возмо́жетъ; ты́ бо пꙋти̑ жестѡ́кїѧ въ пꙋсты́ни ше́ствꙋѧ, сꙋрѡ́выѧ же́лꙋди ѣ҆́лъ є҆сѝ, вкꙋше́нїе навыца́ѧ твоѐ ᲂу҆слажда́ти болѣ́зньми воздержа́нїѧ.
Бг҃ови́децъ дре́вле мѡѷсе́й въ кꙋпинѣ̀ сподо́бисѧ та́инственнагѡ видѣ́нїѧ: всечестны́й же па́ѵелъ, ѻ҆гню̀ ꙗ҆́вльшꙋсѧ свы́ше, са́мъ позна̀ ꙗ҆́вѣ себѐ сама́го, неѡпа́льнѡ распалѧ́ема.
Бг҃оро́диченъ:
Безнача́ленъ сы́й є҆стество́мъ ꙗ҆́кѡ бг҃ъ, и҆ ѻ҆ц҃ꙋ̀ сло́во равноче́стное, є҆́же по́дъ лѣ́томъ прїѧ́лъ є҆сѝ ро́ждсѧ ѿ дв҃ы нача́ло, є҆стество́мъ ꙗ҆́вльсѧ чл҃вѣ́къ, и҆ младе́нствовавъ, ꙗ҆́кѡ ѻ҆троча̀ ты̀, хрⷭ҇тѐ, ꙗ҆ви́лсѧ є҆сѝ пелена́ми пови́тъ.
Конда́къ прпⷣбнагѡ, гла́съ и҃. Подо́бенъ: Взбра́нной:
Ѿ ю҆́ности, мꙋ́дре, ꙗ҆̀же па́че смы́сла вожделѣ́лъ є҆сѝ мꙋ́жески, мїрскі́й мѧте́жъ ѡ҆ста́вилъ є҆сѝ, и҆ бы́лъ є҆сѝ бжⷭ҇твеннагѡ ра́ди жи́тельства трⷪ҇цы жили́ще и҆ просвѣти́лъ є҆сѝ вѣ́рою пристꙋпа́ющыѧ тебѣ̀. тѣ́мъ зове́мъ: ра́дꙋйсѧ, па́ѵле пребога́те.
Сѣда́ленъ сщ҃енномꙋ́ченика, гла́съ а҃. Поⷣ: Гро́бъ тво́й, сп҃се.
Свобо́денъ ᲂу҆́мъ ѿ страсте́й стѧжа́въ, бы́лъ є҆сѝ бж҃їй и҆́скреннѣйшїй ра́бъ, и҆ ѿ ле́сти свободи́лъ є҆сѝ до́брѣ послꙋ́шавшыѧ тебѐ: пострада́въ же, ꙗ҆́кѡ і҆ере́й и҆ мꙋ́ченикъ, є҆леѵѳе́рїе, сꙋгꙋ́бъ прїѧ́лъ є҆сѝ вѣне́цъ: молѝ спасти́сѧ на́мъ.
Сла́ва, прпⷣбнагѡ, гла́съ и҃. Подо́бенъ: Премꙋ́дрости:
Ѡ҆кормлѧ́емь си́лою вседѣ́тельною, и҆ вѣ́триломъ вкрилѧ́емь крⷭ҇тнымъ, легкѡ̀ преплы́лъ є҆сѝ жите́йскꙋю бꙋ́рю, и҆ къ бжⷭ҇твєннымъ и҆́стиннѡ приста́нищємъ дости́глъ є҆сѝ, добродѣ́телей кꙋ́плю мно́гꙋ стѧжа́въ, ю҆́же влⷣцѣ всѣ́хъ прине́слъ є҆сѝ, и҆ є҆́же благі́й ра́бе, слы́шалъ є҆сѝ, и҆ си̑мъ послѣ̑дꙋющаѧ. тѣ́мже па́ѵле блаже́нне, молѝ хрⷭ҇та̀ бг҃а грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.
И҆ ны́нѣ, бг҃оро́диченъ:
Въ напа̑сти многоплетє́нныѧ впа́дъ, ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ, и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бл҃гости. тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти воспѣва́ющымъ досто́йнѡ сла́вꙋ твою̀.
Крⷭ҇тобг҃оро́диченъ:
Дв҃а и҆ мт҃и и҆зба́вителѧ, крⷭ҇тꙋ̀ предстоѧ́ще, болѣ́зненнѡ со слеза́ми рыда́ющи, мт҃рски вопїѧ́ше, что̀ стра́нное сїѐ и҆ пресла́вное, сн҃е; и҆сточа́ѧй всѣ̑мъ человѣ́кѡмъ безстра́стїе, посредѣ̀ ѡ҆сꙋждє́нною на крⷭ҇тѣ̀ распѧ́тсѧ, въ ре́бра пробода́емь, и҆ же́лчїю напоѧ́емь ѿ рꙋ́къ, ꙗ҆̀же созда́лъ є҆сѝ. но воста́ни, и҆ да́рꙋй прегрѣше́нїй ѡ҆ставле́нїе вѣ́рою пою́щымъ бжⷭ҇твєннаѧ твоѧ̑ страда̑нїѧ.
Пѣ́снь д҃. І҆рмо́съ:
Дх҃омъ прови́дѧ, прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ, вопїѧ̀: внегда̀ прибли́житисѧ лѣ́тѡмъ, позна́ешисѧ, внегда̀ прїитѝ вре́мени, пока́жешисѧ. сла́ва си́лѣ твое́й, гдⷭ҇и.
Ни зїѧ̑нїѧ львѡ́въ, ни врѣ̑нїѧ ѻ҆гнѧ̀, ни лю́тыхъ прещє́нїѧ, крѣ́пости твоегѡ̀, свѧщеннотаи́нниче, разсла́биша терпѣ́нїѧ: но ꙗ҆́кѡ а҆дама́нтъ, мꙋ́ками ᲂу҆слажда́лсѧ є҆сѝ, ре́вностїю бжⷭ҇твенною распалѧ́емь.
Во́дъ живото́чныхъ ᲂу҆ста̀ твоѧ̑ и҆спо́лнєна, рѣ́ки и҆сточи́ша бжⷭ҇твенныхъ ᲂу҆че́нїй, свѧщенномꙋ́чениче, потоплѧ́ющыѧ беззако́ннꙋющихъ рꙋга̑нїѧ, и҆ напаѧ́ющыѧ сердца̀ позна́вшихъ хрⷭ҇та̀ бг҃а.
Вельми́ тѧ прославлѧ́ѧ тво́й содѣ́тель, за него́же ᲂу҆се́рдствовалъ є҆сѝ страда́ти, страстоте́рпче, го́лꙋбѧ тебѣ̀ посыла́етъ приноша́юща пи́щꙋ а҆́гг҃льскꙋю, равноа́гг҃льнꙋ бы́вшꙋ страда́нїй свѣтлѣ́йшими сїѧ́ньми.
Бг҃оро́диченъ:
Оу҆жасо́шасѧ зрѧ́ще а҆́гг҃льскаѧ вѡ́инства, ка́кѡ неви́димый зра́комъ сꙋ́щимъ по на́мъ и҆зъ тебє̀ ви́дѣнъ бы́сть, дв҃о бг҃ороди́тельнице: є҆го́же молѝ, спасе́нїѧ сподо́бити всѧ̑, вѣ́рнѡ тѧ̀ сла́вѧщыѧ.
И҆́нъ. І҆рмо́съ:
Же́злъ и҆зъ ко́рене і҆ессе́ова, и҆ цвѣ́тъ ѿ негѡ̀, хрⷭ҇тѐ, ѿ дв҃ы прозѧ́блъ є҆сѝ, и҆зъ горы̀ хва́льный, приѡсѣне́нныѧ ча́щи, прише́лъ є҆сѝ вопло́щсѧ ѿ неискꙋсомꙋ́жныѧ, невеще́ственный и҆ бж҃е, сла́ва си́лѣ твое́й, гдⷭ҇и.
Сно́мъ побѣди́вшꙋсѧ тебѣ̀ и҆ногда̀ во вре́мѧ ю҆́ности, и҆ ко всено́щномꙋ ѡ҆сла́бившꙋсѧ стоѧ́нїю, тво́й ви́дѣвъ честны́й ᲂу҆чи́тель пе́тръ, по лицꙋ̀, ѻ҆́ч҃е, ᲂу҆дарѧ́етъ: и҆ тебѣ̀ заꙋше́нїе да́въ, дае́тъ а҆́бїе и҆сцѣле́нїе.
Бг҃ꙋ ѻ҆со́бь бесѣ́дꙋѧ, и҆ семꙋ̀ прибли́живсѧ несре́дственнѣ па́ѵелъ, ѻ҆ц҃ъ на́шъ, никогда́же побѣди́всѧ ѿ сна̀ пребы́сть по ꙗ҆́звѣ ᲂу҆чи́телевѣ: но ꙗ҆́коже безпло́тенъ сы́й, бо́дръ при́снѡ бы́сть.
Сосꙋ́дъ свѧще́ннѣйшїй ꙗ҆́вльсѧ, мѵ́ро нбⷭ҇ное хрⷭ҇та̀ прїѧ́лъ є҆сѝ се́рдцемъ твои́мъ, и҆ свѣщꙋ̀ твоегѡ̀ терпѣли́внагѡ воздержа́нїѧ жи́тельствомъ добродѣ́тельнымъ вже́гъ свѣ́тлѡ, къ невѣ́стникꙋ бжⷭ҇твенномꙋ восте́клъ є҆сѝ.
Бг҃оро́диченъ:
И҆мѣ́ѧ, сло́ве, прⷭ҇то́лъ нб҃о, зе́млю же подно́жїе, въ ложесна̀ дв҃ы воплоща́ѧсѧ вше́лъ є҆сѝ, и҆ во ᲂу҆бо́гъ верте́пъ всели́лсѧ є҆сѝ: ѿ волхвѡ́въ же, царе́й персі́дскихъ, ꙗ҆́кѡ цр҃ь да́ры и҆ бг҃очеловѣ́къ прїѧ́лъ є҆сѝ.
Пѣ́снь є҃. І҆рмо́съ:
Тво́й ми́ръ да́ждь на́мъ, сн҃е бж҃їй: и҆но́гѡ бо, ра́звѣ тебє̀, бо́га не зна́емъ, и҆́мѧ твоѐ и҆менꙋ́емъ, ꙗ҆́кѡ бг҃ъ живы́хъ и҆ ме́ртвыхъ є҆сѝ.
Ле́стными ᲂу҆хищрѧ́ѧй ᲂу҆кра́сти тѧ̀ словесы̀, мꙋ́чениче, вра́гъ вселꙋка́вый, смѣ́хъ зри́тсѧ, мꙋ́дростїю твое́ю мꙋдре́цъ ѕло́бы прехищрѧ́емь.
На колесни́цѣ взима́емь бжⷭ҇твенныхъ добродѣ́телей, сла́вне, высотꙋ̀ дости́глъ є҆сѝ мꙋче́нїѧ, и҆ низложи́лъ є҆сѝ лꙋка́выхъ бѣсѡ́въ превознесе́ннꙋю горды́ню.
Ви́дѣти красотꙋ̀ жела́ѧ і҆и҃совꙋ, прпⷣбне, тебѐ сама́го ᲂу҆краси́лъ є҆сѝ мꙋче́нїѧ красото́ю: и҆ къ немꙋ̀ прише́лъ є҆сѝ, вѣнча́всѧ свѣ́тлымъ вѣнце́мъ.
Бг҃оро́диченъ:
Оу҆дивлѧ́етъ всѧ́къ ᲂу҆́мъ чꙋ́до твоѐ, чⷭ҇таѧ: ражда́еши бо бг҃а пло́тїю, и҆ пита́телѧ пита́еши млеко́мъ, и҆скꙋше́нїѧ мꙋ́жеска не позна́вши, са́мъ ꙗ҆́кѡ вѣ́сть є҆ди́нъ.
И҆́нъ. І҆рмо́съ:
Бг҃ъ сы́й мі́ра, ѻ҆ц҃ъ щедро́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща, посла́лъ є҆сѝ на́мъ. тѣ́мъ бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче.
Ѿ ка́ла страсте́й ѡ҆чи́стивъ ᲂу҆́мъ, нескве́рно зерца́ло бы́лъ є҆сѝ, ѡ҆сїѧ́нїѧ дх҃а прїе́мъ при́снѡ. тѣ́мже тебѣ̀ и҆скꙋси́тель посрами́сѧ прирази́всѧ, и҆́же сада̀ ѕло́бы не́мощь и҆з̾ꙋчи́вый.
Мꙋ́дрость сꙋ́щѡ, хрⷭ҇та̀ бг҃а во твое́мъ се́рдцы стѧжа́въ ѡ҆бита́ющꙋю, немꙋ́драго низложи́лъ є҆сѝ ѕло́бы мꙋдреца̀, нога́ми твои́ми кра́сными, мꙋдростьмѝ разли́чными прельсти́ти тѧ̀, па́ѵле бг҃омꙋ́дре, покꙋша́ющасѧ.
Свѣ́та сы́й прїѧ́телище, днѐ сы́нъ, тмы̀ прельсти́лъ є҆сѝ нача́льника ꙗ҆́коже льва̀, на тѧ̀ навѣ́тꙋюща, земны́ми трꙋ́сы и҆ колеба̑нїи ка́менїй, безстꙋ́дїемъ ᲂу҆страша́юща, па́ѵле, и҆ мечта̑нїи свирѣ́пствꙋюща.
Бг҃оро́диченъ:
И҆зве́рженна пе́рваго а҆да́ма и҆зъ є҆де́ма, приснодв҃о ѻ҆трокови́це бг҃оневѣ́сто, сло́во пребезнача́льное и҆зъ тебє̀ вопло́щсѧ, и҆ въ ꙗ҆́сли безслове́сныхъ восклони́всѧ, ꙗ҆́кѡ млⷣнецъ, на́шъ ро́дъ ѿ безслове́сїѧ и҆зба́ви.
Пѣ́снь ѕ҃. І҆рмо́съ:
Прⷪ҇ро́ка і҆ѡ́нꙋ подража́ѧ, вопїю̀: живо́тъ мо́й, бл҃же, свободѝ и҆зъ тлѝ, и҆ спаси́ мѧ, сп҃се мі́ра, зовꙋ́ща: сла́ва тебѣ̀.
Наро́читый ѻ҆ве́нъ па́ствъ хрⷭ҇то́выхъ, па́стырь слове́снѣйшїй, по́двигѡвъ стезѧ̀ прославлѧ́етсѧ, бг҃а просла́вивъ свои́ми ᲂу҆десы̀.
Вжи́ливсѧ къ бг҃ꙋ воззрѣ̑нїи, мꙋ́дре, ѡ҆безжи́лилъ є҆сѝ врага̀ многоко́зненнаго тве́рдѡ, приснопа́мѧтне, мꙋ́ченикѡвъ сла́во, свѧще́нства пра́вило.
Къ ра́намъ терпѧ̀, ко ѻ҆гню̀ самоидѧ̀, ᲂу҆спи́лъ є҆сѝ ѕвѣре́й свирѣ́пыхъ стремлє́нїѧ, неꙋсы́пнꙋ къ зижди́телю и҆мѣ́ѧ любо́вь.
Бг҃оро́диченъ:
Свѧще́нїѧ сѣ́нь ꙗ҆́вльшисѧ, марі́е, ѡ҆скверне́ннꙋю сластьмѝ ѻ҆каѧ́ннꙋю мою̀ дꙋ́шꙋ ѡ҆свѧтѝ, и҆ бжⷭ҇твенныѧ сла́вы прича́стницꙋ сотворѝ.
И҆́нъ. І҆рмо́съ:
И҆зъ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее про́йде сохра́ншее нетлѣ́ннꙋ. є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ.
Ꙗ҆́коже сп҃съ, хрⷭ҇то́съ бг҃ъ на́шъ ма́лыми хлѣ̑бы наро́дъ насы́ти многочи́сленъ, та́кожде и҆ па́ѵелъ таи́нникъ хрⷭ҇то́въ, скꙋде́ла малѣ́йшагѡ ма́лою водо́ю мно́жєства до сы́тости возвеселѝ: и҆ сы́тость ꙗ҆влѧ́етъ ѻ҆би́лїе.
Оу҆ставлѧ́еши зно́й моли́твами твои́ми, чꙋ́дне, и҆ рѣши́ши гла́дъ прети́мый: вода́ми же свы́ше пролїѧ́вшимисѧ ᲂу҆паѧ́еши зе́млю, и҆ напаѧ́еши сꙋхі̑ѧ сеѧ̀ бразды̑, прозѧба́ѧ и҆ богатѧ̀ дарова̑нїи, и҆ ᲂу҆множа́ѧй сеѧ̀ дѣ́ланїе.
Неболѣ́зненнꙋю жи́знь въ болѣ́знехъ воспрїѧ́лъ є҆сѝ, и҆ болѣ́зней лю́тыхъ ᲂу҆ставлѧ́еши ѡ҆ѕлобле́нїе, вѣ́рою просѧ́щымъ прїѧ́ти врачева̑нїѧ ѿ тебє̀, всече́стне, ѻ҆тцє́въ добро́то. тѣ́мже разрѣшѝ болѣ̑зни моѧ̑ дꙋшє́вныѧ и҆ тѣлє́сныѧ, молю́сѧ.
Бг҃оро́диченъ:
Сло́во ѻ҆́ч҃ее, сн҃е бж҃їй безлѣ́тне, и҆ порожде́нїе мт҃ре чⷭ҇тыѧ бг҃оѻтрокови́цы превѣ́чное, ꙗ҆́кѡ бг҃ъ, и҆ ꙗ҆́кѡ человѣ́къ млⷣнецъ сы́й, въ верте́пѣ вмѣсти́сѧ невмѣсти́мый. тѣ́мже всѝ дивѧ́щесѧ покланѧ́емсѧ вели́комꙋ та́инствꙋ.
Конда́къ свѧщенномꙋ́ченикꙋ, гла́съ в҃. Подо́бенъ: Твє́рдыѧ:
Ꙗ҆́кѡ ᲂу҆добре́нїе свѧще́нникѡвъ, прпⷣбне, и҆ пред̾ꙋвѣща́нїе страстоте́рпцєвъ всѝ восхвалѧ́емъ, и҆ про́симъ тѧ̀, свѧщенномꙋ́чениче є҆леѵѳе́рїе: любо́вїю па́мѧть твою̀ пра́зднꙋющыѧ бѣ́дъ многоѻбра́зныхъ свободѝ, молѧ̀ непреста́ннѡ ѡ҆ всѣ́хъ на́съ.
І҆́косъ:
Пре́зри, бл҃гоꙋтро́бне жизнода́вче, ꙗ҆́кѡ чл҃вѣколю́бецъ є҆ди́нъ и҆ ще́дрый бг҃ъ, дꙋшѝ моеѧ̀ ѡ҆мраче́нїе, и҆ всемо́щною десни́цею твое́ю, сло́ве, страсте́й свободѝ стꙋже́нїѧ, ꙗ҆́кѡ да твоего̀ і҆ера́рха воспою̀ є҆леѵѳе́рїѧ, то́й бо и҆́стиннѡ и҆зъ ᲂу҆тро́бы позна́сѧ тебѣ̀, и҆ ѡ҆свѧти́сѧ, и҆ возложе́нъ бы́сть ꙗ҆́кѡ самꙋи́лъ, ѿ ма́тере свѧще́нныѧ тебѣ̀ зижди́телю, молѧ̀ непреста́ннѡ ѡ҆ всѣ́хъ на́съ.
Пѣ́снь з҃. І҆рмо́съ:
Сꙋ́щымъ въ пещѝ ѻ҆трокѡ́мъ твои̑мъ, сп҃се, не прикоснꙋ́сѧ, нижѐ стꙋжѝ ѻ҆́гнь. тогда̀ трїѐ, ꙗ҆́кѡ є҆ди́нѣми ᲂу҆сты̀, поѧ́хꙋ, и҆ бл҃гословлѧ́хꙋ, глаго́люще: бл҃гослове́нъ бг҃ъ ѻ҆ц҃ъ на́шихъ.
Да велича́етсѧ, взыва́лъ є҆сѝ, мꙋ́дре, раздроблѧ́емь, ны́нѣ во пло́ти мое́й хрⷭ҇то́съ, не ᲂу҆жаса́юсѧ распале́нїй коно́бѡвъ, не бою́сѧ сме́рти, ни ѕвѣре́й стремле́нїй, сꙋ́щїѧ ра́ди жи́зни.
Є҆ди́нагѡ бг҃а добро́ты и҆скі́й, є҆ди́нꙋ тогѡ̀ сла́вꙋ полꙋчи́ти жела́ю: да раздроблѧ́етсѧ и҆ ѡ҆палѧ́етсѧ всѐ тѣ́ло моѐ, взыва́лъ є҆сѝ, сла́вне: свобожде́нїѧ и҆щꙋ̀, порабоща́ющагѡ хрⷭ҇тꙋ̀.
Смотрѧ́ѧ бꙋ́дꙋщꙋю жи́знь, блаже́нне, мі́рꙋ ᲂу҆мертви́лсѧ є҆сѝ и҆́стиннѡ, и҆ ꙗ҆́кѡ зла́то, ꙗ҆́звенными и҆скꙋшє́нїи разже́гсѧ, просїѧ́лъ є҆сѝ, и҆ положи́лсѧ є҆сѝ въ сокро́вищахъ нбⷭ҇ныхъ ѻ҆би́телей.
Бг҃оро́диченъ:
Чистѣ́йшꙋ тѧ̀ є҆ди́нꙋ ѡ҆брѣ́тъ, всенепоро́чнаѧ, сло́во чистѣ́йшее бж҃їе, и҆зъ чре́ва твоегѡ̀ роди́всѧ, вѣ̑рныѧ ѡ҆чища́етъ ѡ҆сквернє́нїѧ, бг҃оневѣ́сто, прибы̑вшаѧ на́мъ ѿ неꙋдержа́нїѧ страсте́й.
И҆́нъ. І҆рмо́съ:
Ѻ҆́троцы благоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѣ̀ пла́мене стоѧ́ще поѧ́хꙋ: ѻ҆тцє́въ бж҃е, бл҃гослове́нъ є҆сѝ.
Ꙗ҆́кѡ со́лнце возсїѧ́въ, восто́къ а҆́бїе просвѣти́лъ є҆сѝ, на сто́лпъ же возше́дъ, ꙗ҆́кѡ посредѣ̀ нб҃сѐ стоѧ̀, вселе́ннꙋю всю̀ ᲂу҆чє́нїи возвесели́лъ є҆сѝ, ѻ҆тцє́въ, вопїѧ̀, бж҃е, бл҃гослове́нъ є҆сѝ.
Оу҆дали́лсѧ є҆сѝ, бѣ́гаѧ мїрски́хъ во́лнъ, и҆ въ пꙋсты́ни ѱало́мски водвори́всѧ, бг҃облаже́нне, прїѧ́лъ є҆сѝ бг҃а въ се́рдцы твое́мъ, а҆́гг҃льскимъ хране́нїемъ тебѐ соблюда́юща.
Зрѣ́лъ є҆сѝ мꙋчє́нїѧ та́мѡшнѧѧ мы́сленными ѻ҆чесы̀, и҆ чл҃вѣколю́бною твое́ю дꙋше́ю се́рдцемъ болѣ́знꙋѧ, слеза́ми себѐ при́снѡ ѡ҆мака́лъ є҆сѝ, не ꙗ҆́кѡ дв҃дъ во вре́мѧ но́щи посте́лю.
Бг҃оро́диченъ:
Безпло́тный воплоща́етсѧ, и҆ безлѣ́тный въ лѣ́то быва́етъ, и҆ пелена́ми повива́етсѧ на́съ ра́ди, и҆́же зе́млю повива́ѧй гдⷭ҇ь мгло́ю, пло́ть са́мъ па́че постиже́нїѧ неизмѣ́ннѡ ꙗ҆ви́всѧ ѿ неискꙋсомꙋ́жныѧ.
Пѣ́снь и҃. І҆рмо́съ:
Є҆гѡ́же ᲂу҆жаса́ютсѧ а҆́гг҃ли и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте сщ҃е́нницы, просла́вите, ѻ҆́троцы, бл҃гослови́те лю́дїе и҆ превозноси́те во всѧ̑ вѣ́ки.
Процвѣ́тъ, прозѧ́блъ є҆сѝ са́дъ красе́нъ мꙋче́нїй свѣ́тлостьми, мꙋ́ченикѡвъ добро́то, и҆ ны́нѣ раѧ̀ цвѣ́ти ꙗ҆ви́стесѧ, бжⷭ҇твенно благово́нїе и҆спꙋща́юще бжⷭ҇твеннѣ.
Кропле́ньми крове́й твои́хъ, рожде́ннаго и҆зъ неѧ̀, кро́вь свою̀ ма́ти приѡбща́етъ: твоемꙋ́ бо тѣлесѝ ѡ҆б̾е́мшисѧ, мꙋ́дре, мече́мъ скончава́етсѧ, и҆ живе́тъ во вѣ́ки.
И҆сцѣле́нїй во́ды, чꙋде́съ рѣ́ки и҆злива́етъ тре́бꙋющымъ ра́ка твоѧ̀, мꙋ́дре, ѿмыва́юще сквє́рны дꙋшетлѣ́нныхъ страсте́й, мꙋ́чениче і҆ера́рше, во всѧ̑ вѣ́ки.
Бг҃оро́диченъ:
Ꙗ҆́кѡ до́ждь, во ᲂу҆тро́бꙋ твою̀ сни́де хрⷭ҇то́съ, и҆ всю̀ напоѝ тва́рь вои́стиннꙋ, и҆зсꙋши́въ, дв҃о, мꙋ̑тныѧ рѣ́ки і҆дѡлонеи́стовства, є҆ди́нъ бл҃годѣ́тель.
И҆́нъ. І҆рмо́съ:
Чꙋ́да преесте́ственнагѡ росода́тельнаѧ и҆з̾ѡбразѝ пе́щь ѻ҆́бразъ: не бо̀, ꙗ҆̀же прїѧ́тъ, пали́тъ ю҆́ныѧ, ꙗ҆́кѡ нижѐ ѻ҆́гнь бжⷭ҇тва̀ дв҃ы, въ ню́же вни́де ᲂу҆тро́бꙋ. тѣ́мъ, воспѣва́юще, воспое́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.
Спротѧже́нꙋ съ дв҃домъ благогла́снꙋ пѣ́снь всестро́йнꙋ пѣ́лъ є҆сѝ, глаго́лѧ: ꙗ҆́кѡ ᲂу҆тѣшє́нїѧ твоѧ̑ дꙋ́шꙋ мою̀ бг҃олѣ́пнѡ чл҃вѣколю́бнымъ манове́нїемъ, всецр҃ю̀, возвесели́ша. тѣ́мже ра́дꙋѧсѧ взыва́лъ є҆сѝ: да благослови́тъ тва́рь всѧ̀ гдⷭ҇а, и҆ превозно́ситъ є҆го̀ во вѣ́ки.
Подава́ѧй тебѣ̀ ꙗ҆̀же проти́вꙋ любвѝ зижди́тель, ѿ ю҆́ности соблюда́ѧ тѧ̀ десни́цею, и҆ тремѝ пита́етъ тѧ̀ сала́тами бг҃олѣ́пнѡ, ꙗ҆́кѡ ѿ младе́нства всѧ́ко похотѣ́нїе попра́вша: рꙋко́ю же а҆́гг҃ла сїѧ̑ дае́тъ, ꙗ҆́кѡ а҆́гг҃льскомꙋ житїю̀ ревнꙋ́ющꙋ, препросла́вленномꙋ тебѣ̀, па́ѵле бг҃оно́се.
Возмого́ша ᲂу҆бѣжа́ти ѡ҆сꙋжде́нїѧ трїѐ ѡ҆сꙋжде́ннїи свѧ́зани мꙋ́жїе, ꙗ҆́кѡ ᲂу҆кло́ншесѧ слꙋже́нїѧ ѻ҆́бщагѡ: ᲂу҆́зъ бо неви́димѡ и҆́менемъ разрѣ́шшесѧ твои́мъ, ѻ҆́ч҃е всесла́вне, свѧ́занныхъ ѿ бѣ́дъ и҆зба́ви, и҆ є҆ди́ною носи́мы рꙋко́ю содержа́щагѡ.
Бг҃оро́диченъ:
Сл҃нце пра́вды ро́ждшаѧ, ѕвѣздо́ю созыва́етъ волхвы̀ со зла́томъ, и҆ смѵ́рною же и҆ лїва́номъ, новолѣ́пнѡ покланѧ́ющесѧ невра́щнѡ млⷣнствовавшемꙋ: є҆го́же па́стырїе возвели́чиша, и҆ а҆́гг҃лъ мно́жество воспѣ́ша сла́вѧще, ꙗ҆́кѡ и҆ по сꙋществꙋ̀ бг҃а, и҆ чл҃вѣ́ка є҆стество́мъ.
Пѣ́снь ѳ҃. І҆рмо́съ:
Живопрїе́мный и҆сто́чникъ приснотекꙋ́щїй, свѣтоно́сный свѣти́льникъ бл҃года́ти, хра́мъ ѡ҆дꙋшевле́нный, сѣ́нь пречⷭ҇тꙋю, нб҃сѐ и҆ землѝ простра́ннѣйшꙋю, бцⷣꙋ, вѣ́рнїи велича́емъ.
Оу҆ста̀ бж҃їѧ бы́въ, ѿ ᲂу҆́стъ чꙋжда́гѡ лю́ди сꙋемꙋ́дрєнныѧ восхи́тивъ, показа́лъ є҆сѝ наслѣ́дники благода́ти, и҆ пострада́въ крѣ́пкѡ, со і҆ерє́и и҆ страда̑льцы живе́ши, є҆леѵѳе́рїе.
Чи́стаѧ мѷрополо́жница дх҃а, добродѣ́телей кра́сное жили́ще, а҆́гнецъ неѕло́бивый, свѣти́льникъ незаходи́мый, і҆ера́рхѡвъ степе́нь и҆ мч҃никѡвъ, да восхва́литсѧ вѣ́рнѡ є҆леѵѳе́рїй.
Во свѣ́тѣ живе́ши и҆́стиннѡ невече́рнѣмъ, свѣ́тъ бы́въ со́лнца свѣтлѣ́йшїй. тѣ́мъ па́мѧть твою̀ свѣтоно́снꙋю дне́сь соверша́ющыѧ, страсте́й мглы̀ и҆зба́ви къ бг҃ꙋ твои́ми моли́твами, є҆леѵѳе́рїе.
Бг҃оро́диченъ:
Пощадѝ на́съ пою́щихъ твоѐ, гдⷭ҇и, є҆́же и҆зъ дв҃ы, неизрече́нное ржⷭ҇тво̀, ѿ напа́стей и҆збавлѧ́ѧ и҆ страсте́й и҆ скорбе́й, мольба́ми є҆ѧ̀ твоѧ̑ рабы̑, ꙗ҆́кѡ бл҃годѣ́тель, и҆ є҆ди́нъ чл҃вѣколю́бецъ.
И҆́нъ. І҆рмо́съ:
Та́инство стра́нное ви́жꙋ и҆ пресла́вное: нб҃о, верте́пъ: престо́лъ херꙋві́мскїй, дв҃ꙋ: ꙗ҆́сли, вмѣсти́лище, въ ни́хже возлежѐ невмѣсти́мый хрⷭ҇то́съ бг҃ъ, є҆го́же воспѣва́юще, велича́емъ.
Повѣ́дꙋетъ є҆́же къ бг҃ꙋ дерзнове́нїе твоѐ, и҆ ꙗ҆̀же соверши́лъ є҆сѝ, по є҆́же къ немꙋ̀ ѿше́ствїи, чꙋ̑днаѧ дѣла̀: мно́гихъ бо є҆ле́емъ твоегѡ̀ свѣтовожде́нїѧ, ѿ недꙋ̑гъ разли́чныхъ свободи́лъ є҆сѝ.
Всесвѣ́тлꙋ твою̀ дꙋ́шꙋ и҆мѣ́ѧ, прпⷣбне, ꙗ҆́кѡ мѵ́ромъ благода́ти ве́сь напои́всѧ, є҆ле́емъ де́мѡны ѿго́ниши, прокажє́нныѧ ѡ҆чища́ѧ и҆ ᲂу҆грызє́нныѧ главы̑, и҆ кра́стъ лю́тыхъ ᲂу҆ставлѧ́ѧ болѣ̑зни.
Распа́дсѧ па́даетъ сатана̀ вселꙋка́вый, ѻ҆́бразомъ всесвирѣ́па ѕвѣ́рѧ, зрѧ̀ просте́рша тебѐ є҆ле́й канди́ла твоегѡ̀, ꙗ҆́кѡ мѵ́ро, на и҆сцѣле́нїе разли́чныхъ недꙋ́гѡвъ, и҆ стра́хомъ ѡ҆держи́мь и҆счезѐ.
Бг҃оро́диченъ:
Зачала̀ є҆сѝ въ послѣ̑днѧѧ лѣ̑та въ ложесна́хъ твои́хъ, є҆го́же ѻ҆ц҃ъ родѝ сн҃а пре́жде вѣ̑къ нетлѣ́ннѡ, неискꙋсомꙋ́жнаѧ мт҃и. сего̀ ѕвѣздо́ю небеса̀ показꙋ́ютъ, и҆ землѧ̀ пеще́рою земно́ю.
Свѣти́ленъ ѻ҆ктѡ́иха: Сла́ва, прпⷣбнагѡ. Поⷣ: Со ᲂу҆ченики̑ взы́демъ:
Дв҃дски процвѣ́лъ є҆сѝ въ домꙋ̀ гдⷭ҇ни, ꙗ҆́кѡ фі́нїѯъ, ѻ҆́ч҃е прпⷣбне, плоды̀ твои́хъ трꙋдѡ́въ во сто̀ ны́нѣ ᲂу҆мно́живъ. тѣ́мже по́лкъ де́мѡнѡвъ тꙋ́чами сле́зъ твои́хъ, па́ѵле блаже́нне, погрꙋ́жь, ѿ хрⷭ҇та̀ по́честь и҆ вѣне́цъ побѣ́ды прїѧ́лъ є҆сѝ, и҆ чꙋде́съ, премꙋ́дре, независтнобога́тꙋю бл҃года́ть.
И҆ ны́нѣ, бг҃оро́диченъ:
И҆́же горѣ̀ сла́вимый бж҃ески ѿ а҆́гг҃лъ, нѣ́дръ ѻ҆те́ческихъ не ѿстꙋпи́въ, чⷭ҇таѧ, неизрече́ннѡ, съ до́льними поживѐ: ты́ же сегѡ̀ была̀ є҆сѝ спасе́нїѧ вино́вна, ѿ чⷭ҇тыхъ твои́хъ крове́й семꙋ̀, чⷭ҇таѧ, па́че сло́ва пло́ть заимода́вши. є҆го́же молѝ, рабѡ́мъ твои̑мъ и҆збавле́нїе да́ти прегрѣше́нїй.
На стїхо́внѣ ѻ҆ктѡ́иха.
Слꙋ́жба ст҃и́телѧ стефа́на и҆сповѣ́дника, а҆рхїепⷭ҇копа сꙋро́жскагѡ.
Ве́черъ, Блаже́нъ мꙋ́жъ:
На Гдⷭ҇и, воззва́хъ, поста́вимъ стїхѡ́въ ѕ҃, и҆ пое́мъ стїхи̑ры, гла́съ д҃. Подо́бенъ: Да́лъ є҆сѝ зна́менїе:
Житїѐ непоро́чно ꙳ ꙗ҆ви́лъ є҆сѝ, стефа́не, ꙳ къ прⷭ҇то́лꙋ гдⷭ҇ню, ꙳ прехва́льне, доше́лъ є҆сѝ, ꙳ а҆рхїере́йскимъ мѵ́ромъ пома́завсѧ, ꙳ на сме́рть предаѧ́сѧ по содѣ́телю созда́нїе: ꙳ и҆ ны́нѣ на нб҃сѣ́хъ всели́всѧ ꙳ въ же́ртвенникъ гдⷭ҇е́нь, сла́вне, ꙳ молѝ ѡ҆ пою́щихъ тѧ̀.
Зна̑менїи и҆ чꙋдесы̀ ꙳ тебѐ влⷣка просла́ви, ꙳ треблаже́нне стефа́не: ꙳ прого́ниши бо дꙋ́хи, ꙳ и҆ врачꙋ́еши стра̑сти, ꙳ дꙋ́шы просвѣща́еши вѣ́рныхъ, ꙳ приходѧ́щихъ ко ст҃о́мꙋ твоемꙋ̀ гро́бꙋ: ꙳ а҆́гг҃лѡвъ равностоѧ́телю, ꙳ а҆рхїере́євъ сопресто́льне, ꙳ а҆пⷭ҇лѡвъ є҆динонра́вне, ꙳ благовѣ́рїѧ побо́рниче.
Пога́ныхъ преще́нїѧ не ᲂу҆страши́всѧ, бл҃же́нне, ꙳ благобоѧ́зненнымъ ᲂу҆мо́мъ, ꙳ хрⷭ҇то́вѣ благолѣ́пнѡ честнѣ́й і҆кѡ́нѣ, ꙳ наꙋчи́лъ є҆сѝ всѣ́хъ непосра́мленнѡ покланѧ́тисѧ, ꙳ и҆ те́плою вѣ́рою цѣлова́ти: ꙳ и҆ ѡ҆ не́й претерпѣ́лъ є҆сѝ ꙳ бїє́нїѧ, ѻ҆́ч҃е стефа́не, и҆ темни̑цы, ꙳ прови́дѧ бꙋ́дꙋщїѧ ра́дости воспрїѧ́тїе.
И҆́ны стїхи̑ры, гла́съ в҃. Подо́бенъ: Кі́ими похва́льными:
Кі́ими похва́льными вѣнцы̑ ᲂу҆вѧзе́мъ ст҃и́телѧ; свѧще́нствꙋ вѣнца̀, благоче́стїѧ ᲂу҆правле́нїе, цр҃кви свѣ́тлое ᲂу҆краше́нїе, и҆сто́чника бжⷭ҇твенныхъ и҆сцѣле́нїй неисчерпа́емаго, проли́тїе дарова́нїй дх҃о́вныхъ, рѣкꙋ̀ мно́гихъ чꙋде́съ, ѻ҆́трасли сꙋро́жскїѧ веселѧ́ща тече́ньми, стефа́на, те́плаго предста́телѧ на́шегѡ и҆ храни́телѧ.
Кі́ими смире́нными ᲂу҆стна́ми воспои́мъ ст҃и́телѧ; ди́внаго въ чꙋдесѣ́хъ, и҆ безплѡ́тнымъ сожи́телѧ, ѡ҆свѧще́ннаго ѿ пеле́нъ, столпа̀ цр҃кве недви́жима, весе́лїе землѝ сꙋро́жской, царю̀ нечести́вомꙋ ѡ҆бличи́телѧ, и҆ правосла́вїю и҆сповѣ́дника, и҆ хрⷭ҇та̀ ра́ди ѿ беззако́нныхъ заꙋша́ема, и҆мꙋ́ща ве́лїю ми́лость.
Прїиди́те, сꙋро́жстїи собо́ри, ѱало́мски воспле́щемъ рꙋка́ми, печа̑льнымъ ᲂу҆тѣ́хꙋ, и҆ ѿча̑ѧннымъ застꙋ́пника, бл҃же́ннаго стефа́на воспѣва́юще, бжⷭ҇твеннаго хрⷭ҇то́ва смире́нїѧ ревни́телѧ, похвалꙋ̀ землѝ сꙋро́жской, и҆ все́й то́й странѣ̀ ᲂу҆краше́нїе, ро́дꙋ же на́шемꙋ вездѣ̀ промы́сленника, подаю́щаго мі́рꙋ ве́лїю ми́лость.
Сла́ва, гла́съ д҃:
Подоба́етъ сꙋро́жскомꙋ ро́дꙋ стефа́на вездѣ̀ и҆мѣ́ти а҆рхїере́а, ꙗ҆́кѡ нѣ́кꙋю ᲂу҆́тварь ца́рскꙋю, и҆ сокро́вище некра́домо, всѣ̑мъ даю́що бога́тство, спаси́тельное проповѣ́данїе, и҆ всѧ̑ собира́юща къ соедине́нїю пѣ́сней бг҃олѣ́пныхъ. къ немꙋ́же возопїе́мъ: і҆ера́рше и҆ и҆сповѣ́дниче стефа́не, хрⷭ҇та̀ бг҃а молѝ ѡ҆ дꙋша́хъ на́шихъ.
И҆ ны́нѣ, бг҃оро́диченъ, гла́съ то́йже: И҆́же тебє̀ ра́ди:
Вхо́дъ. Прокі́менъ днѐ.
И҆ чтє́нїѧ г҃, пи́саны сегѡ̀ мцⷭ҇а въ ѕ҃-й де́нь.
На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ:
Ра́дꙋйсѧ, свѧще́ннаѧ главо̀, ѿ пеле́нъ ѡ҆чи́стившаѧсѧ дх҃омъ, и҆ семꙋ̀ соꙋмно́жившисѧ, и҆ воспита́вшисѧ до́брѣ въ мѣ́рꙋ бжⷭ҇твеннагѡ наставле́нїѧ, ѿ негѡ́же всѧ́ко движе́нїе, всѧ́ко дѣѧ́нїе, всѧ́къ ра́зꙋмъ, и҆ всѧ́ко сло́во, возвѣща́ѧ до́бльственнѣ, кра́йнѧгѡ жела́нїѧ дости́глъ є҆сѝ! и҆дѣ́же сра́дꙋешисѧ, всебл҃же́нне стефа́не, ликостоѧ́нїю а҆́гг҃льскомꙋ, и҆ а҆рхїере́йскомꙋ собо́рꙋ, со всѣ́ми ст҃ы́ми ᲂу҆молѧ́й сп҃са, поми́ловати на́съ.
Сті́хъ: Свѧще́нницы твоѝ ѡ҆блекꙋ́тсѧ пра́вдою, и҆ прпⷣбнїи твоѝ возра́дꙋютсѧ.
Ра́дꙋйсѧ ѿ среды̀ тмы̀ мно́гїѧ возсїѧ́вый, ꙗ҆́кѡ ѕвѣзда̀ всесвѣ́тлаѧ, всю̀ вселе́ннꙋю просвѣща́еши свѣ́тлѡ, зарѧ́ми, ѻ҆́ч҃е, дѣ́лъ твои́хъ: тѣ́мъ всѧ̑ влече́ши къ непосты́дномꙋ раче́нїю, и҆ бжⷭ҇твенною любо́вїю взерца́тисѧ всегда̀ лица̀ твоегѡ̀ неразсꙋ́днагѡ зра́ка. и҆́мже и҆ по сме́рти взѧ́тисѧ, свѧ́те, прїе́мшаѧ тѧ̀ сла́ва ꙗ҆́вственнѡ плодоносѧ́щи: є҆ѧ́же ны́нѣ воспрїе́млѧ, ᲂу҆молѧ́й сп҃са, поми́ловати на́съ.
Сті́хъ: Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ.
Ра́дꙋйсѧ, честны́й ᲂу҆́ме, трⷪ҇цѣ чи́стый сосꙋ́де, сто́лпе цр҃ко́вный, вѣ̑рнымъ ᲂу҆твержде́нїе, побѣжда́ємымъ по́мощь, ѕвѣздо̀, и҆́же сїѧ̑нїи бг҃опрїѧ́тныхъ твои́хъ моли́твъ, разорѧ́ѧ напа́стей же и҆ скорбе́й тмꙋ̀ всегда̀, стефа́не, приста́нище ти́хое, въ не́же притека́юще и҆̀же треволне́ньми житїѧ̀ ѡ҆держи́мїи спаса́ютсѧ. хрⷭ҇та̀ молѝ дꙋша́мъ на́шымъ да́ти ве́лїю ми́лость.
Сла́ва, гла́съ то́йже:
Вострꙋ́бимъ трꙋбо́ю пѣ́сней, стеце́мсѧ, правосла́внїи, и҆ ᲂу҆́зримъ побѣди́тєльства пастыренача́льника сꙋро́жскагѡ, и҆ ᲂу҆чи́телѧ на́шегѡ. ца́рїе и҆ кнѧ́зи посрами́шасѧ ѿ стефа́нова стра́шнагѡ ꙗ҆вле́нїѧ: царѧ́ бо ѡ҆бличѝ, ѻ҆́бразꙋ хрⷭ҇та̀ бг҃а на́шегѡ не восхотѣ́вшаго покланѧ́тисѧ. па́стырїе и҆ ᲂу҆чи́телїе правосла́вныѧ па́ствы, хрⷭ҇то́ва пастыренача́льника, прїиди́те, восхва́лимъ, а҆́гг҃лѡвъ сожи́тельника, и҆ мꙋ́ченикѡвъ похвалꙋ̀, а҆рхїере́євъ сла́вꙋ, и҆ по вѣ́рѣ побо́рника, и҆ на́шегѡ те́плаго застꙋ́пника, пꙋтьше́ствꙋющымъ спꙋтеше́ственника, и҆ пла́вающымъ ѡ҆корми́телѧ, вездѣ̀ те́плаго предста́телѧ, первопресто́льника сꙋро́жскаго восхвалѧ́юще, та́кѡ рце́мъ: всесвѧ́те стефа́не, предварѝ, и҆ и҆зба́ви на́съ и҆скꙋше́нїѧ всѧ́кагѡ, и҆ спасѝ па́ствꙋ сїю̀ моли́твами твои́ми.
И҆ ны́нѣ, бг҃оро́диченъ, гла́съ то́йже:
Вострꙋ́бимъ трꙋбо́ю пѣ́сней: прекло́ншисѧ бо свы́ше всецр҃и́ца мт҃и дв҃а, бл҃гослове́ньми вѣнчава́етъ воспѣва́ющихъ ю҆̀. лю́дїе да стекꙋ́тсѧ, и҆ цр҃и́цѣ да воспле́щꙋтъ въ пѣ́снехъ цр҃ѧ̀ ро́ждшей, и҆̀же сме́ртїю ѡ҆держи̑мыѧ пе́рвѣе, разрѣши́ти чл҃вѣколю́бнѡ бл҃гоизво́лившаго: па́стырїе и҆ ᲂу҆чи́телїе, до́брагѡ па́стырѧ пречⷭ҇тꙋю мт҃рь соше́дшесѧ восхва́лимъ: свѣ́щникъ златоза́рный, свѣтоно́сный ѻ҆́блакъ, нб҃съ простра́ннѣйшꙋ, ѡ҆дꙋшевле́нный же кївѡ́тъ, ѻ҆гнезра́чный влⷣчень прⷭ҇то́лъ, маннопрїе́мнꙋю златꙋ́ю ста́мнꙋ, заключе́ннꙋю сло́ва две́рь, всѣ́хъ хрⷭ҇тїа́нъ прибѣ́жище, пѣ́сньми бг҃огла́сными похвалѧ́юще, си́це рце́мъ: пала́то сло́ва, сподо́би смире́нныхъ на́съ нбⷭ҇нагѡ црⷭ҇твїѧ, ничто́же бо невозмо́жно хода́тайствꙋ твоемꙋ̀.
Тропа́рь, гла́съ д҃:
Ꙗ҆́кѡ ст҃и́тель со безпло́тными є҆диножи́тель бы́въ, свѧщенномꙋ́чениче стефа́не: воспрїе́мъ бо крⷭ҇тъ, ꙗ҆́кѡ ѻ҆рꙋ́жїе: и҆ ста́въ крѣ́пкѡ сопроти́въ і҆кѡноꙋкори́телѧ, и҆ дꙋхобо́рцєвъ, не покланѧ́ющихсѧ пречⷭ҇томꙋ ѻ҆́бразꙋ хрⷭ҇та̀ бг҃а на́шегѡ, и҆ ѿсѣ́клъ є҆сѝ всѧ́кꙋ є҆́ресь лꙋка́выхъ. тогѡ̀ ра́ди прїе́мъ мꙋче́нїѧ вѣне́цъ, и҆зба́вилъ є҆сѝ гра́дъ тво́й сꙋро́жъ ѿ всѧ́кїѧ непрїѧ́зни. и҆ ны́нѣ мо́лимъ тѧ̀, свѧ́те, да и҆зба́виши на́съ ѿ всѧ́кихъ ѕлы́хъ и҆скꙋше́нїй и҆ бѣ́дъ и҆ вѣ́чныѧ мꙋ́ки.
Сла́ва, и҆ ны́нѣ, бг҃оро́диченъ: Є҆́же ѿ вѣ́ка:
На ᲂу҆́трени, на Бг҃ъ гдⷭ҇ь, тропа́рь ст҃а́гѡ, два́жды. Сла́ва, и҆ ны́нѣ, бг҃оро́диченъ:
По а҃-й каѳі́смѣ, сѣда́ленъ, гла́съ г҃. Подо́бенъ: Бжⷭ҇твенныѧ вѣ́ры:
Бжⷭ҇твеннымъ дх҃омъ просвѣще́нъ, проповѣ́далъ є҆сѝ со дерзнове́нїемъ правосла́вїѧ преда́нїе, всебл҃же́нне стефа́не, и҆ мꙋчи́телѧ беззако́нна посрами́лъ є҆сѝ, въ заточе́нїе непра́веднѡ ѿсыла́емь. ѻ҆́ч҃е прпⷣбне, хрⷭ҇та̀ бг҃а молѝ, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Нбⷭ҇наѧ любо́вїю веселѧ́хꙋсѧ, и҆ земна̑ѧ тре́петомъ ᲂу҆жаса́хꙋсѧ, є҆гда̀ пречⷭ҇тый гла́съ на́йде на тѧ̀, бцⷣе: є҆ди́но бо торжество̀ ѻ҆бои̑мъ возсїѧ̀, є҆гда̀ безпло́тный ра́дость тебѣ̀ принесѐ. тѣ́мже со а҆́гг҃ломъ тебѣ̀ вопїе́мъ: ра́дꙋйсѧ, чⷭ҇таѧ, бж҃їе жили́ще.
По в҃-й каѳі́смѣ, сѣда́ленъ, гла́съ и҆ подо́бенъ то́йже:
Бжⷭ҇твєннаѧ повелѣ̑нїѧ ᲂу҆мно́живъ, вѣ́рꙋ соблю́лъ є҆сѝ правосла́вїѧ, бѣды̑ прїе́мъ за ню̀, стефа́не, въ заточе́нїи пострада́въ ра́нами, въ темни́цахъ претерпѣ́въ ѡ҆ѕлоблє́нїѧ, ѻ҆́ч҃е прпⷣбне: хрⷭ҇та̀ бг҃а молѝ дарова́ти на́мъ ве́лїю ми́лость.
Два́жды.
Сла́ва, и҆ ны́нѣ, бг҃оро́диченъ:
Бжⷭ҇твеннаѧ ски́нїѧ была̀ є҆сѝ сло́ва, є҆ди́на пречⷭ҇таѧ мт҃и дв҃о, чⷭ҇тото́ю а҆́гг҃лы превозше́дшаѧ, па́че всѣ́хъ менѐ пе́рсть бы́вша, ѡ҆скверне́на плотски́ми прегрѣше́ньми, ѡ҆чи́сти моли́твъ твои́хъ бжⷭ҇твенными вода́ми, подаю́щи, чⷭ҇таѧ, ве́лїю ми́лость.
По полѷеле́и сѣда́ленъ, гла́съ д҃. Подо́бенъ: Ско́рѡ предварѝ:
Хрⷭ҇тꙋ̀ послѣ́довавъ, мі́ръ ѡ҆ста́вилъ є҆сѝ, и҆ пло́ть покори́въ воздержа́нїемъ ꙗ҆́вѣ, пребл҃же́нне стефа́не. ѿню́дꙋже свѧще́нїѧ пома́занїе и҆мѣ́лъ є҆сѝ: ны́нѣ же къ невеще́ствєннымъ преста́вилсѧ є҆сѝ ликѡ́мъ, молѧ̀ ѡ҆ всѣ́хъ на́съ восхвалѧ́ющихъ тѧ̀.
Два́жды.
Сла́ва, и҆ ны́нѣ, бг҃оро́диченъ:
Є҆ди́на ро́ждшаѧ творца̀ всемꙋ̀, є҆ди́на ᲂу҆краси́вшаѧ человѣ́чество ржⷭ҇тво́мъ твои́мъ, бг҃оневѣ́сто, и҆зба́ви мѧ̀ ѿ сѣ́ти льсти́вагѡ стрѣльца̀, и҆ поста́ви мѧ̀ на ка́мени хрⷭ҇то́выхъ хотѣ́нїй: того̀ молѧ́щи прилѣ́жнѡ, є҆го́же воплоти́ла є҆сѝ.
Та́же степє́нна, а҃ а҆нтїфѡ́нъ д҃-гѡ гла́са. Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Всѧ́кое дыха́нїе: Є҆ѵⷢ҇лїе і҆ѡа́нна, зача́ло л҃є, ѿ полꙋ̀. По н҃-мъ ѱалмѣ̀ стїхи́ра, гла́съ д҃:
Подоба́етъ сꙋро́жскомꙋ ро́дꙋ стефа́на вездѣ̀ и҆мѣ́ти а҆рхїере́а, ꙗ҆́кѡ нѣ́кꙋю ᲂу҆́тварь ца́рскꙋю, и҆ сокро́вище некра́домо, всѣ̑мъ даю́що бога́тство, спаси́тельное проповѣ́данїе, и҆ всѧ̑ собира́юща къ соедине́нїю пѣ́сней бг҃олѣ́пныхъ, къ немꙋ́же возопїе́мъ: ст҃и́телю и҆ и҆сповѣ́дниче стефа́не, хрⷭ҇та̀ бг҃а молѝ ѡ҆ дꙋша́хъ на́шихъ.
Канѡ́нъ бцⷣы на ѕ҃: и҆ ст҃а́гѡ два̀, на и҃.
Канѡ́нъ.
Гла́съ ѕ҃. Пѣ́снь а҃. І҆рмо́съ:
Волно́ю морско́ю скры́вшаго дре́вле, гони́телѧ, мꙋчи́телѧ, подъ земле́ю скры́ша спасе́нныхъ ѻ҆́троцы: но мы̀, ꙗ҆́кѡ ѻ҆трокови̑цы, гдⷭ҇еви пои́мъ: сла́внѡ бо просла́висѧ.
Прїиди́те, соше́дшесѧ, воспои́мъ всѝ свѧще́ннаго на́шего стефа́на, и҆ почти́мъ сꙋро́жꙋ ᲂу҆твержде́нїе, застꙋ́пника дꙋша́мъ на́шымъ, и҆ гра́дꙋ на́шемꙋ храни́телѧ неѡбори́ма.
Преклонѝ сердца̀ на̑ша, бг҃оно́сче, во спаси́тєльныѧ хрⷭ҇тѡ́вы за́пѡвѣди, не помышлѧ́ти жите́йскихъ, но да, дꙋше́вныхъ дости́гше добро́тъ, свѣ́тлѡ вни́демъ въ черто́гъ хрⷭ҇то́въ.
Стефа́не бг҃омꙋ́дре, верхо́вный ѻ҆́ч҃е, а҆́гг҃лѡмъ ра́вне, сꙋро́жꙋ ᲂу҆твержде́нїе, не ѿве́ржи, но пѣ́сненнѡ прїимѝ, ꙗ҆́кѡ кади́ло ѿ ᲂу҆бо́жества моегѡ̀, є҆́же тѝ принесо́хъ не досто́йный.
Бг҃оро́диченъ:
Возопі́й, недосто́йнаѧ дꙋшѐ, пре́жде сме́рти къ бг҃ома́тери, въ по́мыслѣхъ те́плѣ со слеза́ми вопїю́щи: пречⷭ҇таѧ гпⷭ҇жѐ, сн҃а твоего̀ моли́твами твои́ми ми́лостива мнѣ̀ сотворѝ.
Дрꙋгі́й канѡ́нъ.
Гла́съ а҃. Пѣ́снь а҃. І҆рмо́съ:
Хрⷭ҇то́съ ражда́етсѧ, сла́вите. хрⷭ҇то́съ съ нб҃съ, срѧ́щите. хрⷭ҇то́съ на землѝ, возноси́тесѧ. по́йте гдⷭ҇еви всѧ̀ землѧ̀, и҆ весе́лїемъ воспо́йте, лю́дїе, ꙗ҆́кѡ просла́висѧ.
Бл҃года́ть дх҃а прїе́мъ, ѻ҆́ч҃е, въ се́рдцы твое́мъ, хрⷭ҇то́въ ст҃и́телю, ѡ҆чи́сти ѧ҆зы́къ же и҆ се́рдце твои́хъ пѣвє́цъ, ꙗ҆́кѡ да твою̀ па́мѧть воспѣва́емъ свѣ́тлѡ, стефа́не и҆сповѣ́дниче.
Вели́кїй ны́нѣ стефа́нъ, па́стырь цр҃кве сꙋро́жскїѧ, па́стырѧ вкꙋ́пѣ и҆ ста́до и҆ ве́сь сꙋро́жъ свѣ́тлѡ призыва́етъ: прїиди́те, собра́вшесѧ, ꙗ҆́кѡ ѻ҆́бщемꙋ ѻ҆тцꙋ̀ свѣ́тлѡ торжествꙋ́емъ.
Побѣжда́ютъ твоѧ̑ и҆справлє́нїѧ и҆ словеса̀ и҆ вє́щи, стефа́не, є҆гѡ́же ра́ди дꙋше́вное предложе́нїе прїе́мли со благоꙋвѣ́тїемъ, достоди́вный, є҆́же бо по досто́инствꙋ пѣ́снь тебѣ̀ плестѝ всѣ̑мъ невозмо́жно.
Бг҃оро́диченъ:
Безмѣ́рна бе́здна твоегѡ̀ непостижи́магѡ ржⷭ҇тва̀, всечⷭ҇таѧ, сегѡ̀ ра́ди вѣ́рнїи несомнѣ́ннѡ ᲂу҆́бѡ чи́стѣ припа́даемъ тѝ, глаго́люще: ра́дꙋйсѧ, бцⷣе дв҃о, мт҃и неневѣ́стнаѧ.
Катава́сїа: Хрⷭ҇то́съ ражда́етсѧ:
Гла́съ г҃. І҆рмо́съ:
Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Кто̀ тебѐ не ᲂу҆блажи́тъ, пребл҃же́нне стефа́не бг҃оно́сче, то́й ме́ртвъ є҆́сть дꙋше́ю и҆ тѣ́ломъ пре́жде сме́рти, и҆ пре́жде сꙋда̀ во ѡ҆сꙋжде́нїе низпадѐ.
Сокрꙋшѝ сꙋпоста́ты, преподо́бне, и҆ си́лꙋ и҆́хъ воѡрꙋже́ннꙋю, покорѝ на́мъ подъ но́ги вско́рѣ ви́димꙋю ра́ть: рабы̑ твоѧ̑ ᲂу҆твердѝ, и҆ держа́вꙋ да́рꙋй твое́й па́ствѣ, блаже́нне и҆ свѧще́нне.
Покры́й гра́дъ тво́й, ѻ҆́ч҃е на́шъ стефа́не бг҃оно́сче, ѿ сынѡ́въ а҆га̑рѧнъ. се́ бо скреже́щꙋтъ зꙋбы̀ свои́ми на ны̀, пожре́ти ны̀ разже́гшесѧ, ꙗ҆́кѡ ѕвѣ́рїе ди́вїи: но сокрꙋшѝ зꙋ́бы и҆́хъ.
Бг҃оро́диченъ:
Лѣ́ствицꙋ тѧ̀ прови́дѣ, препѣ́таѧ мт҃и, і҆а́кѡвъ во снѣ̀, нб҃сѐ досѧза́ющꙋ, въ ню́же сло́во всели́сѧ, и҆ человѣ́ки возведѐ, ѿ человѣкогꙋби́тельнагѡ ѕмі́ѧ и҆збавлѧ́ѧй.
И҆́нъ. І҆рмо́съ:
Пре́жде вѣ̑къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ, гдⷭ҇и.
Позна̀ тебѐ ѿ чре́ва, бг҃оно́се, всевѣ́дый бг҃ъ, пре́жде возвѣща́етъ тебѣ̀ а҆́гг҃ломъ: ѡ҆свѧща́етъ тебѐ пꙋтеводи́телѧ дꙋша́мъ, и҆ па́стырѧ вели́каго, ꙗ҆́коже петрꙋ̀, и҆ тебѣ̀ ввѣрѧ́етъ своѐ ста́до.
Жезло́мъ воздержа́нїѧ страсте́й мо́ре раздѣли́лъ є҆сѝ, блаже́нне, ꙗ҆́коже мѡѷсе́й, и҆ на безстра́стїѧ го́рꙋ вше́лъ є҆сѝ, прїе́мъ разꙋ̑мныѧ скрижа̑ли, цр҃ковь наꙋчи́лъ є҆сѝ хрⷭ҇то́вꙋ зако́нꙋ дꙋхо́вномꙋ.
Смире́нъ ꙗ҆ви́лсѧ є҆сѝ, кро́токъ же и҆ ти́хъ, стефа́не, ѿню́дꙋже дꙋхо́внаѧ бл҃года́ть дово́льнѣ и҆злїѧ́вшисѧ въ тебѣ̀, вели́ка показа́ тѧ, чꙋде́съ лꙋча́ми зе́млю сꙋро́жскꙋю ѡ҆сїѧва́юща.
Бг҃оро́диченъ:
Тѧ̀ запеча́таннꙋю и҆́стиннѡ, ли́къ прⷪ҇ро́ческїй, и҆ заключе́ннꙋю и҆сто́чника две́рь наречѐ, дѣ́вства твоегѡ̀, всепѣ́таѧ, и҆здале́ча ѻ҆́бразы на́мъ пи́шꙋщь тѧ̀, ю҆́же соблюдѐ и҆ по ржⷭ҇твѣ̀.
Сѣда́ленъ, гла́съ а҃. Подо́бенъ: Гро́бъ тво́й, сп҃се.
Вели́кїй ст҃и́тель хрⷭ҇то́въ да воспое́тсѧ, сто́лпъ свѣ́тлый, просвѣща́ѧй на́съ чꙋде́съ свѣ́тлостьми, и҆ ѻ҆́блакъ ро́сный, пла́мень страсте́й погаша́ющь, и҆ ѡ҆роша́ющь вѣ́рныхъ мы̑сли, бжⷭ҇твенный стефа́нъ.
Два́жды.
Сла́ва, и҆ ны́нѣ, бг҃оро́диченъ:
Свѣ́тлый свѣти́льниче, бжⷭ҇твеннаѧ трапе́зо, кади́льнице злата́ѧ, ста́мно, ма́ннꙋ носѧ́щаѧ живоно́снꙋю, вѣ́рныхъ мы̑сли ᲂу҆слажда́ющи, ꙗ҆́коже прⷪ҇ро́цы тебѐ, дв҃о, провозвѣсти́ша.
Пѣ́снь д҃. І҆рмо́съ:
На крⷭ҇тѣ̀ твоѐ бжⷭ҇твенное и҆стоща́нїе прови́дѧ а҆ввакꙋ́мъ, ᲂу҆жа́ссѧ вопїѧ́ше: ты̀ си́льныхъ пресѣ́клъ є҆сѝ держа́вꙋ, бл҃же, приѡбща́ѧсѧ сꙋ́щымъ во а҆́дѣ, ꙗ҆́кѡ всеси́ленъ.
Ѿлꙋчи́хсѧ ѿ бг҃а грѣ́шный, и҆ ᲂу҆дали́хсѧ а҆́зъ блꙋ́дный, и҆ногда̀ во странꙋ̀ всели́хсѧ дале́че, ѻ҆́ч҃е, ѡ҆бнажи́хсѧ, послꙋ́шавъ лестца̀, неиспра́вленный.
Ты̀ пра́веднѣ ѡ҆зари́лсѧ є҆сѝ трисо́лнечнымъ свѣ́томъ несозда́нныѧ трⷪ҇цы: того̀ на́мъ послѝ пою́щымъ є҆го̀, и҆ на нб҃сѝ того̀ сподо́би на́съ въ трⷪ҇цѣ воспѣва́ти, блаже́нный ѻ҆́ч҃е, бг҃оно́сный стефа́не.
Ѻ҆́ч҃е ѻ҆тцє́въ бг҃оно́сный стефа́не, сꙋро́жꙋ ᲂу҆твержде́нїе, сы́нъ правовѣ́рїѧ, рабы̑ своѧ̑ соблюдѝ ѿ всѧ́кагѡ прегрѣше́нїѧ, и҆ ѿ безбо́жныхъ ва̑рваръ, ви́димыхъ же вра̑гъ и҆ неви́димыхъ.
Бг҃оро́диченъ:
Го́рестныхъ сле́зъ мои́хъ не забꙋ́ди, и҆ стена́нїѧ дꙋшѝ моеѧ̀ не пре́зри, дв҃о чи́стаѧ и҆ непоро́чнаѧ, ꙗ҆вѝ на мнѣ̀ ми́лость и҆ чл҃вѣколю́бїе сн҃а и҆ бг҃а твоегѡ̀.
И҆́нъ. І҆рмо́съ:
Же́злъ и҆зъ ко́рене і҆ессе́ева и҆ цвѣ́тъ ѿ негѡ̀, хрⷭ҇тѐ, ѿ дв҃ы прозѧ́блъ є҆сѝ, и҆зъ горы̀, хва́льный, приѡсѣне́нныѧ ча́щи, прише́лъ є҆сѝ вопло́щсѧ ѿ неискꙋсомꙋ́жныѧ, невеще́ственный и҆ бж҃е, сла́ва си́лѣ твое́й, гдⷭ҇и.
Зако́нѡмъ ѿ сосє́цъ ма́тернихъ подклони́всѧ дꙋхѡ́внымъ, закѡ́нъ плотски́хъ превше́лъ є҆сѝ, прпⷣбне, ꙗ҆̀же пре́жде вре́мене ᲂу҆мертви́лъ є҆сѝ, тѧ́жкихъ грѣхо́вныхъ: сегѡ̀ ра́ди невѣ́рнаго царѧ̀ ѡ҆бличи́лъ є҆сѝ, и҆сповѣ́дникъ вели́кїй ꙗ҆́вльсѧ, стефа́не.
Сна̀ ѻ҆чесє́мъ твои̑мъ и҆ дрема́нїѧ вѣ́ждѡмъ не да́лъ є҆сѝ, до́ндеже ѡ҆брѣ́лъ є҆сѝ мѣ́сто досто́йно всѣ́хъ блаже́нныхъ, ѻ҆́ч҃е, се́рдце твоѐ ѡ҆чи́стивъ досто́йнѣ. тѣ́мже показа̀ тебѐ жили́ще своѐ цр҃ь сла́вы и҆ бг҃ъ вѣ́чный.
Оу҆мертвѝ мꙋдрова́нїе, мꙋ́дре, пло́ти на́шеѧ неисцѣ́льное, и҆ къ бжⷭ҇твєннымъ наста́ви ны̀ стезѧ́мъ, ꙗ҆́кѡ крѣ́покъ и҆ си́ленъ, и҆ зако́нѡмъ благи̑мъ повинѝ, блаже́нне, и҆ рабы̑ покажѝ хрⷭ҇тѡ́вы, порабощє́нныѧ страстьмѝ лю́тыми.
Бг҃оро́диченъ:
Пое́мъ вели́кое и҆ стра́шное твоѐ та́инство, є҆́же премі́рныхъ ᲂу҆́бѡ ᲂу҆таи́всѧ, возвѣстѝ тебѣ̀ чинонача́льникъ, на тѧ̀ сы́й сни́де, ꙗ҆́кѡ до́ждь на рꙋно̀, всепѣ́таѧ, на спасе́нїе на́ше и҆ ѡ҆бновле́нїе.
Пѣ́снь є҃. І҆рмо́съ:
Сою́зомъ любвѐ свѧзꙋ́еми а҆пⷭ҇ли, влⷣчествꙋющемꙋ всѣ́ми себѐ хрⷭ҇тꙋ̀ возло́жше, кра́сны но́ги ѡ҆чища́хꙋ, благовѣствꙋ́юще всѣ̑мъ ми́ръ.
Дꙋ́шꙋ мою̀ ѡ҆черни́хъ неподо́бными дѣ́лы а҆́зъ ни́щїй, къ тебѣ̀ вопїю̀ застꙋ́пникꙋ моемꙋ̀ те́пломꙋ: не ѡ҆ста́ви менѐ, прече́стне стефа́не, но моли́твꙋ сотворѝ ко сп҃сꙋ.
Мольбы̑ твоегѡ̀ раба̀ не забꙋ́ди, ѻ҆́ч҃е люби́мый: но прїимѝ сїѧ̑, и҆ ко гдⷭ҇ꙋ те́плѣ принесѝ, да и҆збꙋ́демъ нꙋ́жды и҆ ѻ҆гнѧ̀ негаси́магѡ.
Ѡ҆тѧгче́нꙋ во грѣсѣ́хъ, и҆ на землѝ лежа́щꙋ, по́мощь твою̀, ѻ҆́ч҃е, послѝ мнѣ̀ рабꙋ̀ твоемꙋ̀, и҆ возста́ви мѧ̀, да стою̀ пра́вѣ, и҆ хождꙋ̀ въ пꙋте́хъ бж҃їихъ.
Бг҃оро́диченъ:
Ра́дꙋйсѧ, є҆ди́на бцⷣе, ра́дость ро́ждшаѧ, а҆́гг҃льскаѧ красото̀, и҆ человѣ́кѡвъ вели́кое прибѣ́жище, грѣ́шныхъ просты́не, волнꙋ́ющихсѧ приста́нище, дв҃о.
И҆́нъ. І҆рмо́съ:
Бг҃ъ сы́й ми́ра, ѻ҆ц҃ъ щедро́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща, посла́лъ є҆сѝ на́мъ: тѣ́мъ, бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче.
Ꙗ҆́кѡ вели́кое бога́тство твои́хъ щедро́тъ ꙗ҆ви́сѧ сꙋро́жскомꙋ ро́дꙋ, безчи́сленно проли́тїе ми́лости твоеѧ̀, слꙋго̀ хрⷭ҇то́въ. ты́ бо просѧ́щымъ сꙋ̑щаѧ подава́ѧ, и҆ тѣ́хъ насы́тити тща́лсѧ є҆сѝ твои́мъ предложе́нїемъ, бл҃же́нне.
Кро́токъ ꙗ҆ви́всѧ и҆ смире́нъ вкꙋ́пѣ, дѣ́ломъ же и҆ сло́вомъ и҆ мы́слїю, си́мъ всѧ̑ къ себѣ̀ привле́клъ є҆сѝ, любо́вїю и҆ до́брыми дѣ́лы. царѧ́ же ѕлосла́внаго ѡ҆бличи́въ, сердца̀ вѣ́рныхъ возвесели́лъ є҆сѝ, ᲂу҆крѣплѧ́емыхъ твои́мъ и҆сповѣ́данїемъ.
Вели́кїй па́стырь всѣ́хъ хрⷭ҇то́съ, ѻ҆ве́цъ тѧ̀, бл҃же́нне, показа̀ свои́хъ па́стырѧ и҆ ᲂу҆чи́телѧ слове́сныхъ. тѣ́мже заблꙋжда́емыхъ на́съ на гора́хъ поги́бельныхъ, ꙗ҆́кѡ па́стырь чл҃вѣколюби́въ, ны́нѣ твои́хъ ѻ҆ве́цъ взыщѝ.
Бг҃оро́диченъ:
Ст҃ы́хъ ст҃а́ѧ дв҃о чⷭ҇таѧ, ст҃ы́хъ ст҃а́го родила̀ є҆сѝ, всѧ́чєскаѧ ѡ҆сщ҃а́ющаго, хрⷭ҇та̀ и҆зба́вителѧ. тѣ́мже тѧ̀, цр҃и́цꙋ и҆ влⷣчцꙋ всѣ́хъ, ꙗ҆́кѡ мт҃рь зижди́телѧ тва́рей, велича́емъ.
Пѣ́снь ѕ҃. І҆рмо́съ:
Бе́здна послѣ́днѧѧ грѣхѡ́въ ѡ҆бы́де мѧ̀, и҆ волне́нїѧ не ктомꙋ̀ терпѧ̀, ꙗ҆́кѡ і҆ѡ́на, влⷣцѣ вопїю́ ти: ѿ тли́ мѧ возведѝ.
И҆мꙋ́ще тѧ̀ твоѝ рабѝ застꙋ́пника те́пла, не ᲂу҆бои́мсѧ сꙋпоста́тныхъ си́лъ, но побѣжда́емъ ты̑ѧ, крⷭ҇то́мъ хрⷭ҇то́вымъ ᲂу҆крѣплѧ́еми.
Сохранѝ гра́дъ тво́й, ѻ҆́тче прпⷣбне стефа́не, и҆ ѿ безбо́жныхъ и҆новѣ́рныхъ нахо́да, и҆ ѿ ᲂу҆со́бныѧ ра́ти, и҆ всѧ́кагѡ стра́ха и҆ мꙋ́ки и҆зба́ви.
Дадѐ на́мъ хрⷭ҇то́съ честна́го стефа́на, посѣка́ти проти̑внаѧ всѧ̑ ви̑димаѧ вѡ́инства, и҆ и҆справлѧ́ти благовѣ́рное своѐ ста́до.
Бг҃оро́диченъ:
Ст҃ъ є҆сѝ є҆ди́нъ, во ст҃ы́хъ почива́ѧй, свѣ́томъ свои́мъ мѧ̀ ѡ҆сїѧ́въ, ѡ҆свѧтѝ дꙋ́шꙋ мою̀ покаѧ́нїемъ, моли́твами мт҃ре твоеѧ̀.
И҆́нъ. І҆рмо́съ:
И҆зъ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее, про́йде сохра́ншее нетлѣ́ннꙋ. є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ.
Ты̀ сꙋро́жꙋ бы́въ просвѣти́тель, и҆ живꙋ́щихъ въ не́мъ вездѣ̀ застꙋ́пникъ, ѡ҆бꙋрева́емыхъ же въ ско́рбехъ ти́хое приста́нище, вра́чь дꙋше́вныхъ страсте́й вкꙋ́пѣ и҆ тѣле́сныхъ, ѿню́дꙋже всѝ вкꙋ́пѣ вѣща́ютъ и҆ призыва́ютъ твоѐ и҆́мѧ.
А҆рхїере́и и҆ свѧще́нницы сра́дꙋютсѧ на́мъ дне́сь, сꙋро́жскомꙋ ѻ҆тцꙋ̀ пра́зднꙋюще: согласꙋ́ютъ же и҆ воспѣва́ютъ вкꙋ́пѣ ѻ҆́бщїи и҆́стиннїи безмо́лвницы, и҆ прості́и всѝ на́шемꙋ тебѣ̀ воспѣва́ютъ предста́телю вкꙋ́пѣ и҆ ᲂу҆чи́телю.
Ча́до поро́чное а҆́зъ є҆ди́нъ бы́хъ, ѻ҆́ч҃е, страстьмѝ скве́рными, вои́стиннꙋ недосто́инъ до́брагѡ твоегѡ̀, сла́вне, и҆ кра́снагѡ пра́зднованїѧ: но ты̀ ѡ҆чи́стивъ мою̀ скве́рнꙋ, прпⷣбне, дꙋше́внꙋю, покажи́ мѧ ве́чери твое́й досто́йна.
Бг҃оро́диченъ:
Нѣ́дръ не ѿстꙋ́пль безнача́льна роди́телѧ, въ нѣ́дрѣхъ чⷭ҇тыѧ ѻ҆трокови́цы водворѧ́етсѧ, и҆ быва́етъ безма́теренъ пре́жде, ны́нѣ безъ ѻ҆тца̀ воплоща́етсѧ, и҆́же при́снѡ црⷭ҇твꙋѧй хрⷭ҇то́съ: сегѡ̀ неисче́тенъ и҆ стра́шенъ ро́дъ и҆ неизрече́ненъ.
Конда́къ, гла́съ г҃:
Вы́шнѧгѡ си́лою, свѧще́нне, ᲂу҆крѣпи́всѧ, царє́ва низложи́лъ є҆сѝ і҆кѡнобѡ́рнаѧ шата̑нїѧ: дне́сь сꙋро́жꙋ и҆ на́мъ вѣ̑рнымъ предлежа́тъ, сла́ва и҆ бога́тство, ст҃ы̑ѧ твоѧ̑ мо́щи, и҆̀хже свы́ше дароно́сѧтъ а҆́гг҃льстїи чи́нове: пѣ́сньми и҆ пѣ́нїемъ славосло́вѧтъ тѧ̀, вели́кїй свѧще́нный стефа́не.
І҆́косъ:
Твоегѡ̀ чи́стагѡ и҆ непоро́чнагѡ житїѧ̀ кі́й ѧ҆зы́къ человѣ́ческїй восхвали́ти когда̀ и҆ воспѣ́ти, прпⷣбне стефа́не, возмо́жетъ, вѣ́рою и҆ ра́зꙋмомъ и҆ и҆́стиною; и҆́бо во всѣ́хъ по́двизѣхъ до́блественъ показа́лсѧ є҆сѝ: ты́ бо, всеблаже́нне, лю́таго царѧ̀ посрами́лъ є҆сѝ, че́сть же і҆кѡ́ны восходи́ти на первоѻбра́зїе наꙋчи́лъ є҆сѝ, свѧ́те, и҆ ѻ҆тцє́въ догма́ты, всемꙋ́дре, и҆сповѣ́далъ є҆сѝ: сегѡ̀ ра́ди тѧ̀ ᲂу҆блажа́емъ, вели́кїй свѧще́нный стефа́не.
Пѣ́снь з҃. І҆рмо́съ:
Неизрече́нное чꙋ́до, въ пещѝ и҆зба́вивый прпⷣбныѧ ѻ҆́троки и҆зъ пла́мене, во гро́бѣ ме́ртвъ бездыха́ненъ полага́етсѧ, во спасе́нїе на́съ пою́щихъ: и҆зба́вителю бж҃е, бл҃гослове́нъ є҆сѝ.
Ѿве́рзи мѝ двє́ри покаѧ́нїѧ, прпⷣбне стефа́не, и҆ всѧ́къ мра́къ ѿженѝ ѿ моеѧ̀ дꙋшѝ, и҆ тѣла̀ моегѡ̀ всѧ̑ сквє́рны ѡ҆чи́сти, да приношꙋ́ ти пѣ́снь, и҆ зовꙋ̀: и҆зба́вителю бж҃е, бл҃гослове́нъ є҆сѝ.
Предста́ни дꙋшѝ моеѧ̀ во и҆схо́дѣ, стефа́не прече́стне, и҆ ѿ лꙋка́вствїѧ сатанина̀ и҆зба́ви мѧ̀, ꙗ҆́кѡ да сла́влю тѧ̀ вѣ́рнѡ і҆ера́рха вели́каго, поѧ̀ бг҃ꙋ: и҆зба́вителю бж҃е, бл҃гослове́нъ є҆сѝ.
І҆ера́рше, твоѧ̑ лю́ди ᲂу҆па́стви, сохранѧ́ѧ на́съ, стефа́не мꙋ́дре, и҆ на нб҃сѣ́хъ сподо́би съ тобо́ю трⷪ҇цѣ безпреста́ннѡ воспѣва́ти: и҆зба́вителю бж҃е, бл҃гослове́нъ є҆сѝ.
Бг҃оро́диченъ:
До́ждь пода́ждь мѝ сле́зъ, влⷣчце, стрꙋ́пы дꙋшє́вныѧ и҆ пло́тнꙋю че́рность ѡ҆мыва́ющи мѝ ѡ҆чи́сти, и҆ приведѝ къ содѣ́телю, и҆ мꙋче́нїѧ всѧ́кагѡ и҆зба́ви мѧ̀.
И҆́нъ. І҆рмо́съ:
Ѻ҆́троцы, благоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѝ пла́мене, стоѧ́ще, поѧ́хꙋ: ѻ҆тцє́въ бж҃е, бл҃гослове́нъ є҆сѝ.
Землѧ̀ сꙋро́жскаѧ и҆ страны̑, ѻ҆́ч҃е, чꙋдеса̀ твоѧ̑ возвѣща́ютъ ᲂу҆́бѡ, и҆ воспѣва́ютъ всю́дꙋ, ᲂу҆ча́щесѧ пѣ́ти ра́достнѡ: ѻ҆тцє́въ бж҃е, бл҃гослове́нъ є҆сѝ.
Жени́хъ кра́сный па́че всѣ́хъ сынѡ́въ человѣ́ческихъ, ꙗ҆́коже є҆́сть пи́сано, невѣ́стѣ, блаже́нне, свое́й цр҃кви, краснѣ́йша тѧ̀ показа̀ жениха̀, тогѡ̀ носѧ́ща ѻ҆́бразы подо́бїѧ, ѻ҆тцє́въ бг҃а и҆ препросла́вленна.
Оу҆краси́въ твоѐ житїѐ ми́лостынею, и҆ кро́тостїю, и҆ любо́вїю, свѣтлоподо́бникъ показа́лсѧ є҆сѝ и҆зрѧ́дный, па́стырѧ до́брагѡ, и҆збра́въ тогѡ̀ добродѣ́тєли до́брѣ. є҆мꙋ́же пое́мъ: ѻ҆тцє́въ бж҃е, бл҃гослове́нъ є҆сѝ.
Бг҃оро́диченъ:
Тѧ̀ і҆а́кѡвъ, бцⷣе, лѣ́ствицꙋ прⷪ҇ро́чески разꙋмѣва́етъ, тебє́ бо ра́ди превозноси́мый на землѝ ꙗ҆ви́сѧ, и҆ съ человѣ̑ки поживѐ, ꙗ҆́коже благоволѝ, воспѣ́тый ѻ҆тцє́въ бг҃ъ и҆ препросла́вленъ.
Пѣ́снь и҃. І҆рмо́съ:
За зако́ны ѻ҆ч҃єскїѧ блаже́ннїи въ вавѷлѡ́нѣ ю҆́ношы предбѣ́дствꙋюще, царю́ющагѡ ѡ҆плева́ша повелѣ́нїе безꙋ́мное, и҆ совокꙋ́плени, и҆́мже не свари́шасѧ, ѻ҆гне́мъ, держа́вствꙋющемꙋ досто́йнꙋю воспѣва́хꙋ пѣ́снь: гдⷭ҇а по́йте дѣла̀, и҆ превозноси́те во всѧ̑ вѣ́ки.
Согрѣши́хъ ве́сь грѣ́шный па́че всѣ́хъ человѣ̑къ, и҆ нѣ́сть грѣха̀, є҆гѡ́же не сотвори́хъ, ни ѕла̀, нижѐ клеветы̀, и҆́хже не содѣ́ѧхъ: но вѣ́рою прихождꙋ̀ къ тебѣ̀, хрⷭ҇тѐ, ꙗ҆́коже манассі́ю ѻ҆́наго, поми́лꙋй мѧ̀.
Ѻ҆́ч҃е ѻ҆тцє́въ ст҃ы́й стефа́не, правовѣ́рїѧ сто́лпъ, сы́нъ вѣ́ры, рабы̑ твоѧ̑ спаса́й ѿ всѧ́кїѧ бѣды̀, возмꙋщє́нныѧ ѿ человѣкоꙋбі́йцы дїа́вола, не пре́зри молѧ́щихсѧ тебѣ̀ и҆́стиннымъ се́рдцемъ и҆ пою́щихъ: гдⷭ҇а воспѣва́йте дѣла̀, и҆ превозноси́те є҆го̀ во вѣ́ки.
Сы́нове а҆га́рѧни воѡрꙋжа́ютсѧ на смирє́нныѧ лю́ди твоѧ̑, стефа́не прече́стне: но сокрꙋшѝ и҆̀хъ неви́димѡ, лꙋ́къ и҆ стрѣ́лы и҆́хъ и҆ мечѝ вонзѝ въ сердца̀ и҆́хъ, да ра́достїю воспое́мъ пѣ́снь многогла́снꙋю: гдⷭ҇а по́йте дѣла̀, и҆ превозноси́те є҆го̀ во вѣ́ки.
Бг҃оро́диченъ:
Ѡ҆держи́ма прегрѣшє́нїи, и҆ въ по́хотехъ жите́йскихъ погрꙋже́на, свободѝ и҆ спаси́ мѧ, ст҃а́ѧ бцⷣе, и҆ стена̑нїѧ сердє́чнаѧ ᲂу҆слы́ши: ꙗ҆́коже блꙋдни́цы сле́зы, и҆ менѐ пока́ѧвшасѧ, дв҃и́це, и҆ со слеза́ми припа́дающа прїимѝ.
И҆́нъ. І҆рмо́съ:
Чꙋ́да преесте́ственнагѡ, росода́тельнаѧ и҆з̾ѡбразѝ пе́щь ѻ҆́бразъ: не бо̀, ꙗ҆̀же прїѧ́тъ, пали́тъ ю҆́ныѧ, ꙗ҆́кѡ нижѐ ѻ҆́гнь бжⷭ҇тва̀ дв҃ы, въ ню́же вни́де ᲂу҆тро́бꙋ. тѣ́мъ, воспѣва́юще, воспое́мъ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.
Ѡ҆кормѝ моли́твою твое́ю цр҃ковь твою̀ многочеловѣ́чнꙋю, и҆ бꙋ̑ри вѣ̑тръ проти́вныхъ чꙋ́вственныхъ и҆ мы́сленныхъ ᲂу҆ста́ми твои́ми моли́твами, и҆ запретѝ, и҆ и҆зба́ви всѧ́кихъ и҆скꙋше́нїй и҆ смꙋще́нїй, и҆ да́же до конца̀ неврежде́ннꙋю соблюдѝ.
Падо́ша востаю́щїи на ны̀, ѻ҆́ч҃е, твои́ми моли́твами побѣжда́еми, а҆га́рѧни внꙋ́цы, хотѧ́щїи достоѧ́нїе твоѐ ѡ҆ѕло́бити, и҆ смѣ́хъ ᲂу҆́бѡ бы́ша и҆ рꙋга́нїе, паде́нїѧ своегѡ̀ пла́чꙋще: мы́ же воспѣва́емъ ра́достнѡ твою̀ сщ҃е́ннꙋю па́мѧть.
Неизрече́нно твоѐ чадолю́бїе, ѻ҆́ч҃е, превосходѧ́ще ѻ҆те́ческꙋю любо́вь: всегда̀ ᲂу҆́бѡ прирадѣ́еши, неви́димѡ на́съ посѣща́ѧ бо́дренными твои́ми моли́твами, спасе́нїе на́мъ всегда̀ содѣва́ѧ, и҆ подава́ѧ на́мъ съ ти́хостїю, стефа́не, ра́дѡстнаѧ.
Бг҃оро́диченъ:
Всего́ мѧ ѿпа́дша, бцⷣе дв҃о, и҆ сокрꙋши́вша є҆́же по ѻ҆́бразꙋ, чⷭ҇таѧ, бг҃ъ своегѡ̀ созда́нїѧ не презрѣ̀, но тобо́ю всего́ мѧ ѡ҆бновѝ. сегѡ̀ ра́ди тѧ̀ винꙋ̀ спасе́нїѧ на́шегѡ всѧ̀ тва́рь воспѣва́етъ, зовꙋ́щи: бл҃гослове́на ты̀ въ жена́хъ є҆сѝ, всенепоро́чнаѧ.
Пѣ́снь ѳ҃. І҆рмо́съ:
Не рыда́й менє̀, мт҃и, зрѧ́щи во гро́бѣ, є҆го́же во чре́вѣ безъ сѣ́мене зачала̀ є҆сѝ сн҃а: воста́нꙋ бо и҆ просла́влюсѧ, и҆ вознесꙋ̀ со сла́вою непреста́ннѡ, ꙗ҆́кѡ бг҃ъ, вѣ́рою и҆ любо́вїю тѧ̀ велича́ющыѧ.
Вельмѝ ра́дꙋетсѧ при́снѡ гра́дъ тво́й твои́ми чꙋдесы̀, и҆ мы̀ во всѧ̑ка времена̀ насыща́емсѧ во вѣ́ки ѿ свѧще́нныхъ моще́й твои́хъ. и҆ ны́нѣ не ѿходѝ ѿ на́съ, моли́твꙋ творѧ̀ ко гдⷭ҇ꙋ, ꙗ҆́кѡ да ѿ безбо́жныхъ ва̑рваръ на́съ и҆зба́витъ.
Сꙋро́жстїи наро́ди, прїиди́те, собери́тесѧ всѝ къ бжⷭ҇твеннѣй ра́цѣ ѻ҆тца̀ на́шегѡ стефа́на прпⷣбнагѡ, и҆ со слеза́ми воззови́те: и҆зба́ви лю́ди своѧ̑, не да́ждь достоѧ́нїѧ твоегѡ̀ ро́дꙋ і҆сма́ильтескомꙋ, да достодо́лжнѡ воспое́мъ ми́лость твою̀, ст҃и́телю.
Бг҃оро́диченъ:
Ꙗ҆́кѡ разбо́йникъ, ꙗ҆́кѡ блꙋдни́ца, вопїю́ ти ѿ се́рдца: согрѣши́вша ѡ҆живи́ мѧ, ст҃а́ѧ бцⷣе, не разгнѣ́вайсѧ на мѧ̀, не ѿве́ржи менє̀ ѿ лица̀ твоегѡ̀, неразꙋ́мна сꙋ́ща и҆ ѿча́ѧнна.
И҆́нъ. І҆рмо́съ:
Та́инство стра́нное ви́жꙋ и҆ пресла́вное: не́бо, верте́пъ: престо́лъ херꙋві́мскїй, дв҃ꙋ: ꙗ҆́сли, вмѣсти́лище, въ ни́хже возлежѐ невмѣсти́мый хрⷭ҇то́съ бг҃ъ: є҆го́же, воспѣва́юще, велича́емъ.
Сла́вꙋ твою̀ воспѣ́ти по досто́инствꙋ невозмо́жно: чꙋдеса́ бо твоѧ̑ мнѡ́га, и҆ и҆сцѣлє́нїѧ безчи́слєнна незави́стнѡ подае́ши съ те́плою вѣ́рою приходѧ́щымъ, стефа́не ст҃и́телю, похвало̀ ро́да сꙋро́жскагѡ.
Поста́ви тебѐ цр҃кви свое́й ѡ҆снова́нїе хрⷭ҇то́съ, столпа̀ крѣ́пка и҆ неподви́жна во вѣ́ки, соблюда́юща и҆ назира́юща гра́дъ сво́й незы́бленъ, и҆ во вѣ́ки вѣ́ка ненавѣ́тꙋемь, и҆ ѿ всѧ́кихъ и҆збавлѧ́юща напа́данїй, вѣ́рою соверша́ющихъ свѧще́ннꙋю твою̀ па́мѧть.
А҆рхїере́и ᲂу҆́бѡ, сщ҃е́нницы же и҆ мона́си, и҆ всѝ лю́дїе, мꙋ́жїе и҆ жєны̀, и҆ ѻ҆трокови̑цы, ста́рцы со младє́нцы, и҆ всѧ́къ во́зрастъ, и҆ всѧ́ко достоѧ́нїе, ст҃и́телю стефа́нꙋ сꙋро́жскомꙋ свѣ́тлѡ пра́зднꙋемъ.
Бг҃оро́диченъ:
Неизрече́нно дв҃ы та́инство: та́ бо престо́лъ херꙋві́мскїй, и҆ свѣтоно́сный черто́гъ показа́сѧ вседержи́телѧ хрⷭ҇та̀ бг҃а. ю҆́же благоче́стнѡ, ꙗ҆́кѡ бцⷣꙋ, велича́емъ.
Свѣти́ленъ.
Дв҃дски процвѣ́лъ є҆сѝ въ домꙋ̀ гдⷭ҇ни, ꙗ҆́кѡ фі́нїѯъ, ѻ҆́ч҃е прпⷣбне, пло́дъ твои́хъ трꙋдѡ́въ стокра́тнѡ ны́нѣ ᲂу҆мно́жилъ є҆сѝ. тѣ́мже ѻ҆́блакъ де́мѡнѡвъ тꙋ́чами сле́зъ твои́хъ, блаже́нне, погрꙋзи́въ, ѿ хрⷭ҇та̀ по́честь и҆ вѣне́цъ побѣ́ды прїѧ́лъ є҆сѝ, и҆ чꙋде́съ, премꙋ́дре, незави́стнѡ бога́тꙋю ми́лость.
Два́жды.
Бг҃оро́диченъ: Подо́бенъ: Со ᲂу҆ченики̑ взы́демъ:
Хрⷭ҇то́вꙋ ны́нѣ престо́лꙋ предстоѧ̀, ст҃и́телю, съ бг҃омт҃рїю и҆ пречⷭ҇тою дв҃ою молѧ́сѧ не преста́й, побѣ̑ды на ва́рвары странѣ̀ на́шей дарова́ти, и҆ ми́ръ мі́рꙋ, и҆ дꙋша́мъ спасе́нїе, премꙋ́дре, соверша́ющымъ, ѽ стефа́не, па́мѧть твою̀, ст҃и́телємъ красото̀.
На хвали́техъ стїхи̑ры, на д҃, гла́съ д҃:
Стефа́не пресла́вне ѻ҆́ч҃е, а҆рхїере́ю хрⷭ҇то́въ, ᲂу҆тѣше́нїе стра́нныхъ, вра́чь недꙋ́жныхъ, не ѿходѝ ѿ на́съ, молѧ̀ за пою́щыѧ тѧ̀.
Два́жды.
Ѻ҆́бразъ соблю́лъ є҆сѝ, прпⷣбне ѻ҆́ч҃е, по хрⷭ҇то́вѣ і҆кѡ́нѣ ста́лъ є҆сѝ мꙋ́жески, не ᲂу҆страши́всѧ гноете́знагѡ преще́нїѧ, но дꙋхо́внымъ мече́мъ того̀ ᲂу҆мертви́лъ є҆сѝ. тѣ́мъ дерзнове́нїе и҆́маши ко гдⷭ҇ꙋ, спасѝ па́ствꙋ твою̀ ѿ є҆́реси всѧ́кїѧ, стефа́не многострада́льне.
Гла́съ и҃:
До́блестей твои́хъ, прпⷣбне ѻ҆́ч҃е, пло́дъ ᲂу҆ѧснѝ вѣ́рныхъ сердца̀: кто́ бо слы́ша безмѣ́рное твоѐ смире́нїе, и҆ терпѣ́нїю не ᲂу҆диви́тсѧ, є҆́же къ ни́щымъ ти́хость, къ скорбѧ́щымъ ми́лованїе; всѧ̑ бг҃олѣ́пнѡ наꙋчи́лъ є҆сѝ, ст҃и́телю стефа́не. и҆ ны́нѣ неꙋвѧда́емымъ вѣнце́мъ ᲂу҆вѧ́злсѧ є҆сѝ, молѝ спасти́сѧ дꙋша́мъ на́шымъ.
Сла́ва, гла́съ ѕ҃:
Прпⷣбне требл҃же́нне, свѧще́нный ѻ҆́ч҃е, па́стырю до́брый, первопа́стырѧ хрⷭ҇та̀ ᲂу҆ченичѐ, положи́вый дꙋ́шꙋ твою̀ за сꙋро́жь: ты̀ и҆ ны́нѣ, стефа́не ст҃и́телю, просѝ моли́твами твои́ми дарова́ти на́мъ ве́лїю ми́лость.
И҆ ны́нѣ, бг҃оро́диченъ: Бцⷣе, ты̀ є҆сѝ лоза̀ и҆́стиннаѧ:
Славосло́вїе вели́кое и҆ ѿпꙋ́стъ.
На лїтꙋргі́и бл҃жє́нна, пе́рвагѡ канѡ́на пѣ́снь г҃-ѧ, на д҃: и҆ в҃-гѡ пѣ́снь ѕ҃, на д҃. Прокі́менъ, гла́съ а҃: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ.Сті́хъ: Оу҆слы́шите сїѧ̑ всѝ ꙗ҆зы́цы: А҆пⷭ҇лъ ко є҆вре́ємъ, зача́ло ти҃і. А҆ллилꙋ́їа, гла́съ в҃: Оу҆ста̀ пра́веднагѡ поꙋча́тсѧ премꙋ́дрости, и҆ ѧ҆зы́къ є҆гѡ̀ возглаго́летъ сꙋ́дъ. Сті́хъ: Зако́нъ бг҃а є҆гѡ̀ въ се́рдцѣ є҆гѡ̀, и҆ не за́пнꙋтсѧ стѡпы̀ є҆гѡ̀. Є҆ѵⷢ҇лїе матѳе́а, зача́ло а҃і. Прича́стенъ: Въ па́мѧть вѣ́чнꙋю бꙋ́детъ пра́ведникъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.