← претходни дан | Минеј — Децембар | следећи дан →
14 декабря: Святых мучеников Фирса, Левкия, Филимона и других.
Мѣ́сѧца тогѡ́же въ д҃і-й де́нь.
Ст҃ы́хъ мꙋ́чєникъ, ѳѵ́рса, леѵкі́а, фїлимо́на, и҆ и҆̀же съ ни́ми.
А҆ллилꙋ́їа.
На Гдⷭ҇и, воззва́хъ, стїхи̑ры, гла́съ д҃. Поⷣ: Да́лъ є҆сѝ зна́менїе:
Ѳѵ́рсъ чꙋ́дный, ꙳ и҆ бг҃омꙋ́дрый каллїні́къ, ꙳ и҆ сла́вный леѵкі́й, ꙳ трⷪ҇цꙋ несозда́ннꙋю и҆сповѣ́дающе, ꙳ болѣ̑зни тѧжча́йшыѧ и҆ неѡсла̑бныѧ мꙋ̑ки ꙳ мꙋ́жественнѣйшимъ нра́вомъ претерпѣ́ша ꙳ и҆ побѣ́ды вѣнцы̀, ꙗ҆́кѡ побѣдоно́сцы, прїѧ́ша, ꙳ согра́ждане бы́вше ꙳ невеще́ственныхъ си́лъ.
Фїлимо́нъ вели́кїй, ꙳ а҆рїа́нъ пребога́тый, ꙳ мꙋ́дрый а҆поллѡ́нїй, ꙳ крове́й тече́ньми многобо́жїѧ ᲂу҆гаси́ша пла́мень ꙳, всю̀ напои́ша зе́млю ꙳ бг҃озна́нїѧ бжⷭ҇твенными стрꙋѧ́ми, ꙳ и҆ тꙋ́чами врачева́нїй страсте́й и҆зсꙋша́ютъ рѣ́ки ꙳ бжⷭ҇твенною бл҃года́тїю, ꙳ ꙗ҆́кѡ те́плїи защи́тницы.
Цвѣ́ти краснѣ́йшїи ꙳ въ цвѣ́тницѣ процвѣто́ша, ꙳ мꙋ́чєницы сла́внїи, ꙳ дх҃а и҆спꙋща́юще бжⷭ҇твенное благово́нїе, ꙳ и҆ мы̑сли благоꙋха́юще вѣ́рнѡ, ꙳ лѣ́тнюю па́мѧть и҆́хъ чтꙋ́щихъ, ꙳ страда̑нїѧ и҆ борє́нїѧ, ꙳ и҆ блаже́нное сконча́нїе. ꙳ є҆гѡ́же ра́ди во свѣ́тѣ невече́рнѣмъ ѡ҆бита́ютъ ра́дꙋющесѧ.
И҆́ны стїхи̑ры прест҃ѣ́й бцⷣѣ, гла́съ и҆ подо́бенъ то́йже:
Ѡ҆дождѝ мнѣ̀, влⷣчце ꙳, твоеѧ̀ ми́лости бе́зднꙋ ꙳, и҆ ѡ҆пали́вшеесѧ зно́емъ страсте́й се́рдце моѐ ꙳, ꙗ҆́кѡ ми́лостива напо́й, ѻ҆трокови́це ꙳: и҆ ᲂу҆миле́нїѧ ка̑пли точи́ти ꙳ непреста́ннѡ сотворѝ, молю́сѧ, ꙳, и҆́миже ᲂу҆тѣше́нїѧ сподо́блюсѧ, чⷭ҇таѧ, ꙳ є҆́же полꙋчи́ти и҆́мꙋтъ, ꙳ и҆̀же и҆́скреннѡ пла́кавшїисѧ.
Де́мѡнскими коле́блема прилѡ́ги, ꙳ и҆ въ ро́въ поги́бели вве́ржена ᲂу҆ще́дри, влⷣчце, ꙳ и҆ ᲂу҆тверди́ мѧ на ка́мени добродѣ́телей: ꙳ и҆ совѣ́ты врагѡ́въ разори́вши, ꙳ сподо́би мѧ̀ твори́ти повелѣ̑нїѧ ꙳ сн҃а твоегѡ̀, и҆ бг҃а на́шегѡ, ꙳ ꙗ҆́кѡ да полꙋчꙋ̀ ѡ҆ставле́нїе ꙳ въ де́нь сꙋда̀.
Въ разбо́йники впадо́хъ ꙳ скверноꙋбі́йствєнныѧ, всенепоро́чнаѧ, ꙳ и҆ нетлѣ́нныѧ ѻ҆де́жды вы́шнїѧ свѣ́тлости ꙳ си́хъ нахожде́ньми совлече́нъ бы́хъ, ѻ҆трокови́це, ꙳ и҆ ѿ ни́хъ неми́лостивнѡ ᲂу҆ѧзви́хсѧ, ꙳ и҆ низве́рженъ бы́хъ ꙳ въ мѣ́сто ѡ҆ѕлобле́нїѧ є҆́ле жи́въ: ꙳ но предварѝ, и҆ рꙋ́кꙋ твою̀ прострѝ, ꙳ и҆ воздви́гни мѧ̀, молю́сѧ.
Сла́ва, и҆ ны́нѣ, гла́съ и҆ подо́бенъ то́йже.
На ѻ҆дрѣ̀ низлежꙋ̀ ᲂу҆ны́нїѧ, всенепоро́чнаѧ, ꙳ и҆ лѣ́ностнѡ прохождꙋ̀ житїѐ, ꙳ и҆ ᲂу҆жаса́юсѧ конца̀ моегѡ̀ вре́мене, бцⷣе: ꙳ да не ꙗ҆́коже ле́въ неща́днѡ расто́ргнетъ ꙳ смире́ннꙋю мою̀ дꙋ́шꙋ ꙳ ѕмі́й вселꙋка́вый. ꙳ тѣ́мже твое́ю бл҃гостїю ꙳ пре́жде конца̀ предвари́вши, ꙳ къ покаѧ́нїю мѧ̀ воздви́гни.
Крⷭ҇тобг҃оро́диченъ. Подо́бенъ: Ꙗ҆́кѡ до́блѧ:
Распина́ема хрⷭ҇та̀ чл҃вѣколю́бца ви́дѧщи, пречⷭ҇таѧ, ꙳ и҆ рє́бра и҆скопова́ема копїе́мъ, ꙳ пла́чꙋщи вопїѧ́ше: что̀ сїѐ, сн҃е мо́й; ꙳ что́ ти безблагода́тнїи лю́дїе возда́ша, ꙳ за ꙗ҆̀же сотвори́лъ є҆сѝ дѡ́браѧ и҆̀мъ, ꙳ и҆ тщи́шисѧ безча́дствовати мѧ̀, вселюбе́знѣйшїй; ꙳ ᲂу҆дивлѧ́юсѧ, бл҃гоꙋтро́бне, ꙳ твоемꙋ̀ во́льномꙋ распѧ́тїю.
На стїхо́внѣ, ѻ҆ктѡ́иха.
На ᲂу҆́трени ѻ҆́ба канѡ́на ѻ҆ктѡ́иха, и҆ ст҃ы́хъ канѡ́нъ на д҃.
Ѳеофа́ново.
Гла́съ ѕ҃. Пѣ́снь а҃. І҆рмо́съ:
Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.
Мч҃ническими красота́ми бжⷭ҇твенномꙋ прⷭ҇то́лꙋ предстоѧ́ще, и҆ бжⷭ҇твенными блиста̑нїи, страстоте́рпцы, сїѧ́юще, на́съ пою́щихъ ва́шꙋ па́мѧть просвѣти́те.
Добро́ты бжⷭ҇твенныѧ жела́юще, житїѧ̀ кра̑снаѧ въ ничто́же вмѣни́сте, страстоте́рпцы хрⷭ҇то́вы: и҆ ᲂу҆ме́рше тѣ́ломъ, жи́знь безконе́чнꙋю ѡ҆брѣстѝ сподо́бистесѧ.
Безбо́жїѧ ле́сть бг҃олѣ́пнѡ, страстоте́рпцы мꙋ́чєницы, ѡ҆бличи́вше, мно́гихъ болѣ́зней претерпѣ́сте разжже́нїе, и҆ безболѣ́зненнꙋю жи́знь ны́нѣ воспрїѧ́сте.
Бг҃оро́диченъ:
Неѡпи́санное сло́во, ѡ҆пи́сано бы́вшее тѣ́ломъ породила̀ є҆сѝ, чⷭ҇таѧ: є҆го́же молѝ и҆зба́витисѧ тлѝ, и҆ страсте́й наведе́нїѧ, тѧ̀ сла́вѧщымъ.
Пѣ́снь г҃. І҆рмо́съ:
Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Тѣ́ло стрꙋ́жꙋще лю́тѣ тмы̀ предста́телїе, по́мысла твоегѡ̀ крѣ́пости не ѡ҆сла́биша, любо́вїю бжⷭ҇твенною си́льне въ любвѝ, ѳѵ́рсе, ᲂу҆крѣплѧ́емагѡ.
Бы́сть, мч҃ниче чꙋ́дне, внеза́пнаѧ твоѧ̀ вои́стиннꙋ ко гдⷭ҇ꙋ вѣ́ра, є҆́юже посрами́лъ є҆сѝ врагѡ́въ ѕловѣ́рїе, вопїѧ̀, ѽ фїлимо́не! ра́бъ є҆́смь хрⷭ҇то́въ.
Къ боре́нїю, мꙋ́чениче, врага̀ де́рзостнѣ и҆зше́лъ є҆сѝ, не щито́мъ, ни копїе́мъ, но вѣ́рою тве́рдою бжⷭ҇твеннѣ защити́всѧ, и҆ мꙋ́жески сего̀ на зе́млю низве́рглъ є҆сѝ.
Бг҃оро́диченъ:
Въ двꙋ́хъ є҆стества́хъ є҆ди́нъ ст҃ы́ѧ трⷪ҇цы, и҆зъ чⷭ҇тыхъ твои́хъ крове́й воплоти́всѧ, бг҃олѣ́пнѡ про́йде, сꙋ́щыѧ и҆зъ а҆да́ма спаса́ѧ, всечⷭ҇таѧ, бла́гостїю.
Сѣда́ленъ, гла́съ д҃. Подо́бенъ: Оу҆диви́сѧ і҆ѡ́сифъ:
Благоче́стїѧ щито́мъ покрыва́еми до́брѣ, и҆ ѻ҆рꙋ́жїемъ крⷭ҇та̀ ѡ҆дѣ́ѧвшесѧ тве́рдѡ, ѡ҆полчє́нїѧ низложи́ша мꙋчи́телѧ, мч҃ницы хрⷭ҇то́вы досточꙋ́днїи, и҆ вѣнце́мъ ѿ негѡ̀ ᲂу҆вѧ́зшесѧ побѣ́ды, ликꙋ́ютъ непреста́ннѡ съ го́рними си́лами, и҆ сп҃са мо́лѧтъ, спастѝ дꙋ́шы на́шѧ.
Сла́ва, и҆ ны́нѣ, бг҃оро́диченъ:
Треволнє́нїи страстны́ми безсо́вѣстный а҆́зъ ѡ҆бꙋрева́емь, чⷭ҇таѧ, призыва́ю тѧ̀ те́плѣ: да не пре́зриши менє̀ ѻ҆каѧ́ннагѡ поги́бнꙋти, бе́зднꙋ милосе́рдїѧ ро́ждшаѧ, ра́звѣ бо тебє̀ наде́жди не и҆́мамъ. да не врагѡ́мъ ᲂу҆́бѡ ѡ҆бра́дованїе и҆ смѣ́хъ надѣ́ѧвыйсѧ на тѧ̀, ꙗ҆влю́сѧ: и҆́бо мо́жеши, є҆ли̑ка хо́щеши, ꙗ҆́кѡ мт҃и сꙋ́щи всѣ́хъ бг҃а.
Крⷭ҇тобг҃оро́диченъ:
Дв҃а и҆ а҆́гница ви́дѣвши на крⷭ҇тѣ̀, безъ сѣ́мене и҆зъ неѧ̀ а҆́гнца ро́ждшагосѧ, и҆ копїе́мъ прободе́на, печа́ли ᲂу҆ѧ́звена стрѣла́ми, вопїѧ́ше, болѣ́зненнѡ восклица́ющи: что̀ но́вое та́инство; ка́кѡ ᲂу҆мира́еши, и҆́же живота̀ є҆ди́нъ гдⷭ҇ь; тѣ́мже воскреснѝ, па́дшаго воздвиза́ѧ пра́ѻтца.
Пѣ́снь д҃. І҆рмо́съ:
Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.
Є҆ди́наго благоꙋтро́бнаго, є҆ди́наго гдⷭ҇а и҆ бг҃а всѣ́хъ и҆сповѣ́дати мꙋ́чєницы возжелѣ́вше, чрезъ мꙋ̑ки тогѡ̀ црⷭ҇тво прїѧ́сте.
Строга̑нїѧ тѣлє́снаѧ, ѻ҆́гнєннаѧ стремлє́нїѧ, и҆ ѕвѣре́й и҆ мо́рѧ, ю҆́ношески под̾ѧ́лъ є҆сѝ, пребога́те, си́лою креста̀, мꙋ́чениче ѳѵ́рсе, ᲂу҆крѣплѧ́емь.
Подвигѡ́въ ра́нами ᲂу҆добрѧ́ѧсѧ, дꙋ́шꙋ свѣтлѣ́йшꙋ со́лнечнагѡ сїѧ́нїѧ содѣ́лалъ є҆сѝ, ꙗ҆́кѡ во́инъ хрⷭ҇то́въ, страстоте́рпче мꙋ́чениче леѵкі́е.
Бг҃оро́диченъ:
Мт҃рь безмꙋ́жнꙋ, дв҃ꙋ непоро́чнꙋ, нерастлѣ́ннꙋ ѻ҆трокови́цꙋ, въ жена́хъ є҆ди́нꙋ тѧ̀ зна́емъ: бл҃гослове́ннаѧ марі́е, человѣ́кѡвъ и҆справле́нїе.
Пѣ́снь є҃. І҆рмо́съ:
Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Бжⷭ҇твеннѣйшими бг҃осїѧ́ннѡ, мꙋ́чєницы всехва́льнїи, зарѧ́ми ѡ҆свѧще́ни, преидо́сте безбо́жїѧ непостоѧ́ннꙋю пꙋчи́нꙋ, и҆ къ бжⷭ҇твеннѣй тишинѣ̀ преминꙋ́сте.
Влачи́ми по землѝ мч҃ницы всехва́льнїи лю́тѣ, и҆ мꙋ́ками ᲂу҆ранѧ́еми, нбⷭ҇ныхъ чє́сти полꙋчи́сте, а҆́гг҃лѡвъ согра́ждане ны́нѣ бы́вше.
Любѧ̀ ᲂу҆мре́ти за хрⷭ҇та̀ возлю́бльшаго тѧ̀ ꙗ҆́вѣ, мꙋ́чениче фїлимо́не, вмѣни́лъ є҆сѝ приноси̑мыѧ ꙗ҆́звы тѣлесѝ твоемꙋ̀, младе́нцєвъ стрѣлѧ́нїѧ, бг҃облаже́нне.
Бг҃оро́диченъ:
Бцⷣꙋ тѧ̀ ѿ дꙋшѝ, влⷣчце мі́ра блага́ѧ, и҆сповѣ́дающыѧ спаса́й: тѧ́ бо предста́тельницꙋ непобѣди́мꙋ стѧжа́хомъ, сꙋ́щꙋю бг҃ороди́тельницꙋ.
Пѣ́снь ѕ҃. І҆рмо́съ:
Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.
Вѣ́тры дви́жими бжⷭ҇твеннагѡ дх҃а, мꙋ́дрїи, дꙋшє́внаѧ вождє́нїѧ во ᲂу҆́мнаѧ приста̑нища прера́достнѡ спасо́сте, мꙋ́чєницы, наслажда́ющесѧ кꙋ́пнѡ ѡ҆боже́нїѧ.
На колесни́цꙋ пла́меннꙋ всѣ́дше, страда́льцы, и҆злїѧ́нною кро́вїю къ нб҃се́мъ восхи́тистесѧ, и҆ бж҃їю сла́вꙋ полꙋчи́сте, ѿ негѡ̀ вѣнцы̀ побѣ́ды прїи́мше.
Фїлимо́нъ и҆ леѵкі́й, а҆поллѡ́нїй кꙋ́пнѡ и҆ ѳѵ́рсъ приснопа́мѧтный четвери́ца бжⷭ҇твеннаѧ и҆ свѣтоза́рнаѧ, трⷪ҇ческое ѡ҆сїѧ́нїе, прича́стїемъ невеще́ственнымъ ѡ҆богати́шасѧ.
Бг҃оро́диченъ:
И҆́же всѧ́кїѧ превы́шши, мы́сленныѧ, ꙗ҆́кѡ бг҃ъ, и҆ ви́димыѧ тва́ри, вопло́щсѧ про́йде и҆зъ твоегѡ̀ чре́ва, соблю́дъ тѧ̀ нетлѣ́ннꙋ, ꙗ҆́коже была̀ є҆сѝ пре́жде ржⷭ҇тва̀, мт҃и дв҃о.
Конда́къ гла́съ в҃. Подо́бенъ: Твє́рдыѧ.
Благоче́стїѧ вѣ́ры побѡ́рницы ѕлочести́ваго мꙋчи́телѧ ѡ҆плева́вше, ѡ҆бличи́сте ѕвѣроѻбра́зное є҆гѡ̀ кровопроли́тїе: и҆ побѣди́сте тогѡ̀ ꙗ҆́ростное противле́нїе, хрⷭ҇то́вою по́мощїю ᲂу҆крѣплѧ́еми, ѳѵ́рсе и҆ леѵкі́е, съ пострада́вшими ѡ҆ на́съ моли́тесѧ.
Пѣ́снь з҃. І҆рмо́съ:
Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.
Ѡ҆дождє́нїи бжⷭ҇твенными ᲂу҆гаси́сте многобо́жїѧ пе́щь, разже́гшесѧ бжⷭ҇твенною любо́вїю прера́достнѡ, и҆ ны́нѣ пѣснопое́те, страда́льцы: бл҃гослове́нъ є҆сѝ, бж҃е ѻ҆те́цъ на́шихъ.
Гонѧ́щаго бжⷭ҇твенною ᲂу҆лови́вше мре́жею, досточꙋ́днїи, и҆звлеко́сте и҆зъ глꙋбины̀ ле́стныѧ, и҆ хрⷭ҇тꙋ̀ приведо́сте, пою́ще те́плѣ: бл҃гослове́нъ є҆сѝ, бж҃е ѻ҆тє́цъ на́шихъ.
Поколеба́сте ле́сти ѡ҆снова̑нїѧ неколебле́нно произволе́нїе показꙋ́юще, и҆ мꙋ́жественъ ра́зꙋмъ, страда́льцы, и҆ ны́нѣ пѣснопое́те благоче́стнѡ: бл҃гослове́нъ є҆сѝ, бж҃е ѻ҆тє́цъ на́шихъ.
Бг҃оро́диченъ:
Па́че сло́ва твоѐ зача́тїе, бг҃оневѣ́сто, бг҃а бо сло́ва родила̀ є҆сѝ, и҆збавлѧ́ющаго безслове́сїѧ всѧ́кагѡ человѣ́ка, и҆ сло́во подаю́щи вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.
Пѣ́снь и҃. І҆рмо́съ:
И҆зъ пла́мене прпⷣбнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.
Щито́мъ благоче́стїѧ защити́всѧ, и҆ крⷭ҇тъ, ꙗ҆́коже копїѐ, воспрїе́мъ, полкѝ вра̑гъ неви́димыхъ ссѣ́клъ є҆сѝ, ѳѵ́рсе доблемꙋ́дренне, мꙋ́ченикѡвъ бжⷭ҇твеннаѧ сла́во.
Разжига́емь любо́вїю вседержи́телѧ, вше́лъ є҆сѝ мꙋ́жественнѡ въ мꙋ́ченическое сꙋди́ще, и҆ терпѣли́внѡ пострада́въ, расто́рглъ є҆сѝ ѕмі́ѧ вели́каго, фїлимо́не страда́льче.
Погрꙋже́нꙋ показа́въ вра́жїю си́лꙋ, глꙋбино́ю мꙋ́жества и҆ терпѣ́нїѧ твоегѡ̀, ѽ а҆рїа́не, црⷭ҇твїѧ сподо́билсѧ є҆сѝ, неподви́жимагѡ во всѧ̑ вѣ́ки.
Бг҃оро́диченъ:
И҆́стиннꙋю бцⷣꙋ и҆сповѣ́дающе тѧ̀, ꙗ҆́кѡ а҆́гг҃лъ, ра́дꙋйсѧ, вопїе́мъ тѝ: є҆ди́на бо ра́дость на землѝ родила̀ є҆сѝ, ѽ ѡ҆бра́дованнаѧ чⷭ҇таѧ бл҃гослове́ннаѧ.
Пѣ́снь ѳ҃. І҆рмо́съ:
Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и тѧ̀ ᲂу҆блажа́емъ.
Хрⷭ҇то́вꙋ стрⷭ҇ть и҆з̾ѡбража́юще, и҆скꙋше́нїе мно́гихъ мꙋ́къ претерпѣ́сте, блаже́ннїи: глава́ми же ᲂу҆сѣ́чени бы́вше, сопричто́стесѧ чинѡ́мъ нбⷭ҇нымъ, сла́вою ѡ҆блиста́юще, и҆ бжⷭ҇твенными лꙋча́ми ᲂу҆краша́еми.
Твои́ми кровьмѝ багрѧни́цꙋ ѡ҆мочи́лъ є҆сѝ, ѳѵ́рсе мꙋ́дре, и҆ въ сїю̀ сла́внѡ ѡ҆дѣ́ѧвсѧ: и҆ ꙗ҆́кѡ ски́птръ бжⷭ҇твенный, держѧ̀ крⷭ҇тъ, со всѣ́ми страстоно́сцы ра́дꙋѧсѧ, ны́нѣ сцрⷭ҇твꙋеши хрⷭ҇тꙋ̀, бг҃облаже́нне.
Ва́шымъ, блаже́ннїи, ᲂу҆диви́шасѧ а҆́гг҃льскїѧ си̑лы подвигѡ́мъ, ра́намъ, противле́нїємъ, нꙋ́жднѣй сме́рти: съ ни́миже живꙋ́ще, воспомина́нїе сотвори́те ѡ҆ соверша́ющихъ ва́шꙋ па́мѧть, всехва́льнїи.
Бг҃оро́диченъ:
Въ подо́бїи человѣ́чи пло́ти, и҆зъ твоегѡ̀ чре́ва сло́во ꙗ҆ви́сѧ ражда́емое, и҆ мч҃никѡвъ мно́жество привлечѐ, стрⷭ҇ти претерпѣ́въ, пребл҃гі́й, чⷭ҇таѧ дв҃о марі́е бг҃ора́дованнаѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.