← претходни дан | Минеј — Децембар | следећи дан →
7 декабря: Святителя Амвросия. епископа Медиоланского. Преподобного Антония Сийского. Преподобного Нила Столобенского.
Мѣ́сѧца тогѡ́же въ з҃-й де́нь.
И҆́же во ст҃ы́хъ ѻ҆тца̀ на́шегѡ а҆мвро́сїа, є҆пі́скопа медїола́нскагѡ:
И҆ прпⷣбнагѡ ѻ҆ц҃а̀ на́шегѡ а҆нтѡ́нїа, сі́йскагѡ чꙋдотво́рца:
И҆ преставле́нїе прпⷣбнагѡ ѻ҆тца̀ на́шегѡ ні́ла, и҆̀же на є҆́зерѣ селиге́рѣ, на ѻ҆́стровѣ, зово́момъ столобно́е, но́вагѡ чꙋдотво́рца.
Слꙋ́жбы и҆́хъ пи̑саны по се́й слꙋ́жбѣ. А҆ллилꙋ́їа, и҆лѝ тропа́рь.
На Гдⷭ҇и, воззва́хъ, стїхи̑ры а҆мвро́сїа, гла́съ а҃. Поⷣ: Нбⷭ҇ныхъ чинѡ́въ:
Влⷣчества престо́лъ ᲂу҆краша́ѧ добродѣ́тельми, ꙳ ѿ вдохнове́нїѧ бжⷭ҇твенна ꙳ свѧщеннонача́лїе подо́бнѣ прїѧ́лъ є҆сѝ: ꙳ тѣ́мже вѣ́ренъ строи́тель благода́ти ꙳ во ѻ҆бои́хъ, а҆мвро́сїе, бы́въ, ꙳ сꙋгꙋ́бъ вѣне́цъ наслѣ́довалъ є҆сѝ.
Въ воздержа́нїи и҆ болѣ́знехъ, и҆ во бдѣ́нїихъ мно́зѣхъ, ꙳ и҆ моли́твахъ спротѧже́нныхъ, ꙳ дꙋ́шꙋ и҆ тѣ́ло ѡ҆чи́стилъ є҆сѝ, бг҃омꙋ́дре: ꙳ сосꙋ́дъ про́чее и҆збра́нъ ꙗ҆ви́всѧ хрⷭ҇тꙋ̀ бг҃ꙋ, ꙳ а҆пⷭ҇лѡмъ ра́венъ ꙗ҆́вльсѧ, ꙳ воспрїѧ́лъ є҆сѝ дарова̑нїѧ.
Благочести́ваго царѧ̀, согрѣши́вша и҆ногда̀, ꙳ ꙗ҆́кѡ дв҃да наѳа́нъ, дерзнове́нїемъ ѡ҆бличи́лъ є҆сѝ, ꙳ а҆мвро́сїе всеблаже́нне, ꙳ сего̀ ꙗ҆́вѣ ѿлꙋче́нїю подложи́лъ є҆сѝ, ꙳ и҆ покаѧ́нїемъ наказа́въ бг҃олѣ́пнѡ, ꙳ сочи́слилъ є҆сѝ па́ствѣ твое́й.
И҆́ны стїхи̑ры бцⷣы, гла́съ и҆ подо́бенъ то́йже:
(А҆́ще А҆ллилꙋ́їа, сі́и стїхи̑ры пою́тсѧ пре́жде.)
Жезло́мъ твоегѡ̀ предста́тельства, ꙳ бг҃ороди́тельнице чⷭ҇таѧ, ꙳ ѕвѣри̑ныѧ стра̑сти ѻ҆каѧ́нныѧ дꙋшѝ моеѧ̀ ѿженѝ: ꙳ и҆ ѿвсю́дꙋ ми́рнѡ къ жи́зни мѧ̀ ᲂу҆правлѧ́ющи: ꙳ ст҃о́мꙋ ста́дꙋ ꙳ и҆збра́нныхъ твои́хъ ѻ҆ве́цъ причтѝ.
Ꙗ҆́кѡ помо́щница ты̀ є҆сѝ безпомо́щныхъ человѣ́кѡвъ, ꙳ ꙗ҆́кѡ наде́жда є҆сѝ всѣ́хъ ненаде́жныхъ, ꙳ рѣше́нїе, бцⷣе, въ лю́тыхъ, ꙳ и҆ по́мощь мнѣ̀ бꙋ́ди, ꙳ грѣхѡ́въ и҆ бѣ́дъ, ꙗ҆́кѡ ми́лостива, ꙳ и҆збавлѧ́ющи мѧ̀, пречⷭ҇таѧ.
Всегꙋби́тельныхъ страсте́й мои́хъ ѻ҆гнепа̑льнаѧ стремлє́нїѧ, росо́ю бжⷭ҇твенною, ꙳ во́льнымъ ѡ҆дожде́нїемъ твои́мъ ᲂу҆гасѝ, дв҃о: ꙳ да и҆ а҆́зъ, ꙗ҆́коже ѻ҆́троцы, ꙳ бг҃а, и҆зъ тебє̀ рожде́ннаго, благодарю̀, ꙳ и҆ сла́влю и҆ благословлю̀ бл҃года́ть твою̀, влⷣчце.
Сла́ва, и҆ ны́нѣ, бг҃оро́диченъ, гла́съ и҆ подо́бенъ то́йже:
Нра́вомъ гнилы́мъ попо́лзсѧ, ни́цъ лежꙋ̀, ꙳ и҆ къ твое́й, дв҃о, притека́ю тишинѣ̀, ꙳ ѿ бꙋ́ри сопроти́вныѧ ꙳ и҆ и҆скꙋше́нїй многоѻбра́зныхъ мѧ̀ и҆зба́ви: ꙳ да пою̀ твою̀ бл҃года́ть непреста́ннѡ, ꙳ бцⷣе мт҃и, приснодв҃о.
Крⷭ҇тобг҃оро́диченъ. Подо́бенъ: то́йже.
Оу҆ крⷭ҇та̀ предстоѧ́щи сн҃а и҆ бг҃а твоегѡ̀, ꙳ и҆ долготерпѣ́нїе тогѡ̀ смотрѧ́ющи, ꙳ глаго́лаше: пла́чꙋщи, мт҃и чⷭ҇таѧ: ꙳ ᲂу҆вы̀ мнѣ̀, ча́до сладча́йшее, ꙳ что̀ сїѧ̑ стра́ждеши непра́веднѡ, сло́ве бж҃їй, ꙳ да спасе́ши человѣ́чество;
На стїхо́внѣ, ѻ҆ктѡ́иха. Тропа́рь, гла́съ д҃:
Пра́вило вѣ́ры и҆ ѻ҆́бразъ кро́тости, воздержа́нїѧ ᲂу҆чи́телѧ ꙗ҆ви́ тѧ ста́дꙋ твоемꙋ̀ ꙗ҆́же веще́й и҆́стина. сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ: ѻ҆́ч҃е а҆мвро́сїе, молѝ хрⷭ҇та̀ бг҃а, спасти́сѧ дꙋша́мъ на́шымъ.
На ᲂу҆́трени ѻ҆́ба канѡ́на ѻ҆ктѡ́иха: И҆ ст҃а́гѡ канѡ́нъ на д҃, є҆гѡ́же краегране́сїе: Всевели́каго а҆мвро́сїа восхвалю̀.
Творе́нїе і҆ѡ́сифово.
Гла́съ д҃. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Бжⷭ҇твенными свѣтоли̑тїи, прпⷣбне, ѡ҆блиста́емь, свѣ́тлое и҆ свѣтоно́сное и҆ ст҃о́е твоѐ ᲂу҆спе́нїе благоче́стнѡ чтꙋ́щыѧ твои́ми моли́твами просвѣтѝ.
Сло́во бж҃їе премꙋ́дрости тебѣ̀ сло́во дарова̀, ᲂу҆кра́шенное зна́нїемъ и҆́стиннымъ, і҆ера́рше а҆мвро́сїе, є҆реті́чествꙋющихъ безслове́сное ѿража́ѧ ѕломы́слїе.
Оу҆ма̀ твоегѡ̀ зри́тельное, пребога́те, пред̾ѡчи́стивъ ѿ стра́стныѧ мглы̀, прїѧ́тно чи́стыхъ блиста́нїй всест҃а́гѡ дх҃а содѣ́лалъ є҆сѝ, всеблаже́нне.
Всемꙋ́дрыми и҆ свѧще́нными твои́ми догма̑ты а҆рїемꙋ́дрственнꙋю ѿгна́въ па́гꙋбꙋ, ꙗ҆́кѡ па́стырь, на ѕла́цѣ ᲂу҆па́слъ є҆сѝ правосла́вїѧ, всемꙋ́дре, словє́сныѧ твоѧ̑ вѣ́рою ѻ҆́вцы.
Бг҃оро́диченъ:
Безсѣ́меннѡ ѻ҆́ч҃ею во́лею, ѿ бжⷭ҇твеннагѡ дх҃а бж҃їѧ зачала̀ є҆сѝ сн҃а, и҆ пло́тїю родила̀ є҆сѝ и҆зъ ѻ҆ц҃а̀ безма́тернѧ, и҆ на́съ ра́ди и҆зъ тебє̀ без̾ѻ́тча.
Пѣ́снь г҃. І҆рмо́съ:
Не мꙋ́дростїю, и҆ си́лою, и҆ бога́тствомъ хва́лимсѧ, но тобо́ю, ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо свѧ́тъ, па́че тебє̀, чл҃вѣколю́бче.
Велича́йшꙋ бл҃года́ть ѿ бг҃а прїе́мъ и҆ си́лꙋ, твои́мъ чꙋ́вственнымъ прикоснове́нїемъ разли̑чныѧ стра̑сти, ѻ҆́ч҃е а҆мвро́сїе, и҆сцѣлѧ́лъ є҆сѝ приходѧ́щихъ къ тебѣ̀.
Наꙋче́нъ, ꙗ҆́кѡ і҆ера́рхъ бжⷭ҇твенный, прпⷣбне, всѧ́кое разꙋмѣ́нїе писа́нїѧ, невѣ́дꙋщымъ, ѻ҆́ч҃е а҆мвро́сїе, неꙋдобопости̑жнаѧ ꙗ҆́вѣ ᲂу҆ѧсни́лъ є҆сѝ.
Тебѣ̀, мꙋ́дростїю дꙋхо́вною сїѧ́ющꙋ, несмы́сленнѡ прибли́житисѧ де́рзостнѡ сквернѣ́йшꙋю ᲂу҆стре́мльшꙋюсѧ скорѣ́йше ᲂу҆мертви́лъ є҆сѝ бжⷭ҇твеннымъ приглаго́ланїемъ.
Бг҃оро́диченъ:
Ро́дъ человѣ́ческїй ѡ҆бнови́ла є҆сѝ є҆ди́на, ро́ждши є҆стества̀ на́шегѡ содѣ́телѧ же и҆ гдⷭ҇а: тѣ́мже тѧ̀ сла́вимъ, бг҃ора́дованнаѧ.
Сѣда́ленъ, гла́съ и҃. Подо́бенъ: Премꙋ́дрости:
Прⷪ҇ро́ка и҆лїю̀ ревноѡбразꙋ́ѧ, и҆ і҆ѡа́нна та́кожде крⷭ҇ти́телѧ, мꙋ́жески ѡ҆бличи́лъ є҆сѝ царѧ̀ беззако́нновавша, і҆ера́рше: прⷭ҇то́лъ бжⷭ҇твеннѣ ᲂу҆краси́лъ є҆сѝ, и҆ чꙋде́съ мно́жествомъ мі́ръ ѡ҆богати́лъ є҆сѝ. тѣ́мже и҆ бжⷭ҇твенными писа̑нїи наꙋче́нъ, вѣ̑рныѧ ᲂу҆тверди́лъ є҆сѝ, и҆ невѣ̑рныѧ ѡ҆брати́лъ є҆сѝ, і҆ера́рше а҆мвро́сїе, молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти пра́зднꙋющымъ любо́вїю ст҃ꙋ́ю па́мѧть твою̀.
Сла́ва, и҆ ны́нѣ, бг҃оро́диченъ:
Помышле́ньми поползо́хсѧ лꙋка́выми, во глꙋбинꙋ̀ впадо́хъ грѣхо́внꙋю, и҆ стенѧ̀ взыва́ю тѝ ѿ се́рдца, пречⷭ҇таѧ: на мнѣ̀ ᲂу҆дивѝ бога́тꙋю ми́лость, и҆ твоегѡ̀ милосе́рдїѧ неизмѣ́рнꙋю пꙋчи́нꙋ, и҆ щедро́тъ твои́хъ неизче́тное бога́тство: и҆ да́ждь мѝ покаѧ́нїе, и҆ прегрѣше́нїй проще́нїе, да любо́вїю взыва́ю тебѣ̀: молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти мѝ: тѧ́ бо наде́ждꙋ и҆мѣ́ю ра́бъ тво́й.
Крⷭ҇тобг҃оро́диченъ:
А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве, гдⷭ҇и, ми́лости бе́здно и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стра̑сти твоѧ̑.
Пѣ́снь д҃. І҆рмо́съ:
Любвѐ ра́ди, ще́дре, твоегѡ̀ ѻ҆́браза, на крⷭ҇тѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ, чл҃вѣколю́бче, крѣ́пость моѧ̀ и҆ хвале́нїе.
І҆ера́рхъ показа́лсѧ є҆сѝ, пома́завсѧ мѵ́ромъ свѧще́нства, соверша́ѧ свѧще́нники, всѣ̑мъ спаси́тельное да́рꙋѧ ѡ҆чище́нїе.
Соблю́лъ є҆сѝ па́ствꙋ твою̀ ѿ всѧ́кагѡ вре́да проти́вныхъ, бл҃же́нне, и҆ а҆́рїевꙋ ле́сть всю̀ ѡ҆мрачи́лъ є҆сѝ сїѧ́нїемъ слове́съ твои́хъ.
Дх҃а си́лою ѡ҆гражде́нъ, лꙋка́выѧ ѿгонѧ́еши ѕло́бы, всебл҃же́нне, дꙋ́хи, не терпѧ́щыѧ твоегѡ̀ запреще́нїѧ.
Бг҃оро́диченъ:
Всѧ̑ во́лею содѣ́тельствовавый содѣ́тельствꙋетсѧ хотѧ̀ ѿ чⷭ҇тыхъ твои́хъ крове́й, спаса́ѧ вѣ́дꙋщыѧ тѧ̀, чⷭ҇тꙋю бг҃ома́терь.
Пѣ́снь є҃. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.
Оу҆́мъ, сїѧ́ющъ свѣ́томъ невеще́ственнымъ, стѧжа́въ ѡ҆блиста́лъ є҆сѝ врачева́нїй и҆ чꙋде́съ зари̑, а҆мвро́сїе бл҃же́нне.
Воздви́глъ є҆сѝ тебѐ сама́го, сщ҃е́нное жили́ще дх҃а, разори́лъ є҆сѝ хра́мы і҆́дѡльскїѧ, а҆мвро́сїе бг҃одохнове́нне.
Велича́йшихъ добродѣ́телей свѣтозаре́нїемъ сїѧ́юща, постыдѣ́шасѧ ца́рїе тебє̀, и҆ предѣ́ла ѧ҆зы́ка твоегѡ̀ не поколеба́ша.
Бг҃оро́диченъ:
Хотѣ́нїемъ всѐ мꙋ́дрѣ содѣ́ловаѧ, хотѧ̀ ѡ҆бнови́ти человѣ́ки, дв҃о, въ твою̀ ᲂу҆тро́бꙋ всели́сѧ.
Пѣ́снь ѕ҃. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Ри́мъ твоѧ̑ честна̑ѧ благохва́литъ и҆справлє́нїѧ: ꙗ҆́кѡ бо ѕвѣзда̀ свѣтови́дна, всю́дꙋ лꙋчы̀ чꙋде́съ твои́хъ, і҆ера́рше, и҆спꙋсти́лъ є҆сѝ, вѣ́рнѡ ᲂу҆дивлѧ́емь.
Оу҆́треневавъ ко хрⷭ҇тꙋ̀, та́мѡ сꙋ́щими свѣтлостьмѝ ѡ҆зари́лсѧ є҆сѝ бога́тнѡ, и҆ свѣ́та напо́лнилсѧ є҆сѝ бжⷭ҇твеннѣйшагѡ, и҆ просвѣща́еши вѣ́рнѡ чтꙋ́щыѧ тѧ̀ всегда̀.
Тѣ́ло и҆ дꙋ́шꙋ твою̀ бг҃ꙋ ѡ҆свѧти́въ, и҆ прїѧ́тнѡ содѣ́лалъ є҆сѝ дарова́нїй, ѻ҆́ч҃е, твоѐ се́рдце, непреста́ннѡ вне́млющее сла́дкомꙋ жела́нїю.
Бг҃оро́диченъ:
И҆сцѣлѝ дꙋшѝ моеѧ̀, дв҃о, ꙗ҆́звы, ѡ҆сѣне́нїемъ твои́мъ бжⷭ҇твеннымъ, и҆ ᲂу҆́мъ мо́й просвѣтѝ, ѡ҆мраче́нный лѣ́ностїю и҆ ѕло́бою врага̀ борца̀.
Конда́къ, гла́съ г҃. Подо́бенъ: Бжⷭ҇твенныѧ вѣ́ры:
Бжⷭ҇твенными догма̑ты ѡ҆блиста́ѧ, помрачи́лъ є҆сѝ а҆́рїевꙋ пре́лесть, свѧщеннотаи́нниче и҆ па́стырю а҆мвро́сїе: чꙋдодѣ́йствꙋѧ же си́лою дх҃а, стра̑сти разли̑чныѧ ꙗ҆́вѣ и҆сцѣли́лъ є҆сѝ, ѻ҆́ч҃е прпⷣбне, хрⷭ҇та̀ бг҃а молѝ, спасти́сѧ дꙋша́мъ на́шымъ.
Пѣ́снь з҃. І҆рмо́съ:
Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Бжⷭ҇твенное вѣща́нїе твои́хъ догма́тѡвъ, ѻ҆́ч҃е всемꙋ́дре, ꙗ҆́коже мо́лнїѧ, про́йде всю̀ зе́млю: и҆ чꙋде́съ показа́ньми, ꙗ҆́кѡ свѣ́тъ ѡ҆блиста̀, ꙗ҆̀же во мра́цѣ сердца̀ просвѣща́ющее.
Законоположе́нїємъ сп҃са ты̀ послѣ́дꙋѧ, ѻ҆́ч҃е, да́нный тебѣ̀ тала́нтъ, ꙗ҆́кѡ ра́бъ блажа́йшїй, тща́тельнѡ ᲂу҆многосꙋгꙋ́билъ є҆сѝ, влⷣчнїѧ сподоблѧ́емь ра́дости.
И҆з̾ѡстри́въ бг҃осло́вный тво́й ᲂу҆́мъ, стрꙋи̑ свѧще́нныхъ догма́тѡвъ, ꙗ҆́кѡ рѣкꙋ̀, и҆спꙋсти́лъ є҆сѝ напоѧ́ѧ вѣ́рныхъ и҆сполне́нїе, свѧщеннотаи́нниче ѻ҆́ч҃е а҆мвро́сїе.
Бг҃оро́диченъ:
Сѐ, дв҃о, во ᲂу҆тро́бѣ твое́й зачала̀ є҆сѝ сло́во, ѻ҆ц҃ꙋ̀ собезнача́льно: и҆ пло́тїю породила̀ є҆сѝ да́рꙋющее всѣ̑мъ воззва́нїе, сꙋ́щымъ и҆зъ а҆да́ма па́дшымъ, всенепоро́чнаѧ.
Пѣ́снь и҃. І҆рмо́съ:
Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Оу҆мертви́въ ᲂу҆́ды и҆ ме́ртво плотско́е мꙋдрова́нїе содѣ́лавъ, дꙋ́шꙋ ѡ҆живи́лъ є҆сѝ, прпⷣбне, и҆ и҆сто́чникъ чꙋде́съ и҆сточи́лъ є҆сѝ ᲂу҆мерщвлє́ннымъ ѿ страсте́й, жи́знь подаю́щи вопїю́щымъ: благослови́те, всѧ̑ дѣла̀ гдⷭ҇нѧ, гдⷭ҇а.
Оу҆вѣ́дѣлъ є҆сѝ преставле́нїе, мꙋ́дре, є҆́же ѿ тѣлесѐ, бжⷭ҇твеннымъ дх҃омъ: прⷪ҇ро́чески бо сїѐ сꙋ́щымъ съ тобо́ю сказа́лъ є҆сѝ, и҆ ра́достнѡ на нб҃са̀ вопїѧ̀ восте́клъ є҆сѝ: благослови́те, всѧ̑ дѣла̀ гдⷭ҇нѧ, гдⷭ҇а.
Тѣ́ло, и҆ се́рдце, и҆ ᲂу҆́мъ пред̾ѡчи́стивъ ѿ страсте́й смѣше́нїѧ, ѻ҆гнено́снꙋ лꙋчꙋ̀ свы́ше прїѧ́лъ є҆сѝ дх҃а, ꙗ҆́коже бжⷭ҇твеннїи ᲂу҆ч҃ницы̀ вопїѧ̀, а҆мвро́сїе: благослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Ꙗ҆ви́ласѧ є҆сѝ превы́шши нб҃съ, бг҃а нбⷭ҇наго поро́ждши, земна̑ѧ, пречⷭ҇таѧ, нбⷭ҇нымъ совокꙋ́пльшаго, и҆ позна́нїе своѐ всѣ̑мъ подаю́щаго, вопїю́щымъ: благослови́те, всѧ̑ дѣла̀ гдⷭ҇нѧ, гдⷭ҇а.
Пѣ́снь ѳ҃. І҆рмо́съ:
Ка́мень нерꙋкосѣ́чный ѿ несѣко́мыѧ горы̀, тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀: тѣ́мъ, веселѧ́щесѧ, тѧ̀, бцⷣе, велича́емъ.
Ви́дѣлъ є҆сѝ, во и҆зстꙋпле́нїи бы́въ, вѣ̑чныѧ ст҃ы̑мъ, ѻ҆́ч҃е, лежа́щыѧ по́чєсти: къ ни́мже преше́лъ є҆сѝ, воспрїе́мъ твои́хъ трꙋдѡ́въ, сла́вне, воздаѧ̑нїѧ, веселѧ́сѧ.
Ꙗ҆́кѡ гро́здъ зрѣ́лъ, бг҃омꙋ́дре, въ точи́лѣхъ го́рнихъ досто́йнѡ сокро́вищствовалсѧ є҆сѝ, и҆сточа́ѧ безсме́ртїѧ вїно̀, а҆мвро́сїе, и҆ врачева́нїй дарова̑нїѧ благоче́стнѡ къ тебѣ̀ притека́ющымъ.
Тѧ̀, златоза́рный, ѻ҆́ч҃е, бжⷭ҇твеннагѡ дх҃а свѣти́льникъ, свѣ́тъ благочести́выхъ ᲂу҆че́нїй, и҆ врачева́нїй лꙋчꙋ̀ и҆спꙋща́ющъ, и҆ вѣ̑рныѧ просвѣща́ющъ, велегла́снѡ ᲂу҆блажа́емъ.
Днесвѣ́тлꙋю тѧ̀ ѕвѣздꙋ̀ цр҃ковь стѧжа́вши, тмы̀ и҆збѣга́етъ всѧ́кїѧ, всеблаже́нне, льстѝ, и҆ свѣ́тлостьми сщ҃е́нныхъ твои́хъ догма́тѡвъ ѡ҆зарѧ́ема, блажи́тъ тѧ̀.
Бг҃оро́диченъ:
Гла́съ тебѣ̀ вопїе́мъ, дв҃о, ра́достнѣ а҆рха́гг҃ловъ: ра́дꙋйсѧ, проклѧ́тства разрѣше́нїе, лю́тыхъ всѣ́хъ, ра́дꙋйсѧ, и҆збавле́нїе, земны̑ѧ ѡ҆божи́вшаѧ па́че ᲂу҆ма̀ рождество́мъ твои́мъ.
Слꙋ́жба прпⷣбнагѡ а҆нтѡ́нїа сі́йскагѡ.
На ма́лѣй вече́рни стїхи̑ры, гла́съ а҃. Поⷣ: Всехва́льнїи мꙋ́чєницы:
Жела́ѧ ᲂу҆лꙋчи́ти, а҆нтѡ́нїе блаже́нне, нбⷭ҇нꙋю добро́тꙋ, ꙳ земна̑ѧ всѧ̑ преминꙋ́лъ є҆сѝ, ꙳ и҆ ꙗ҆́кѡ безпло́тенъ подвиза́всѧ въ маловре́меннѣй жи́зни се́й, ꙳ мы́слєнныѧ врагѝ крѣ́пкѡ побѣди́лъ є҆сѝ и҆ мꙋ́жески, ꙳ и҆мѣ́ѧ посо́бїе ѻ҆рꙋ́жїе непобѣди́мое, ꙳ ра́дꙋѧсѧ восте́клъ є҆сѝ къ присножела́емомꙋ тебѣ̀ блаже́нствꙋ. ꙳ тѣ́мже моли́сѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Мїрска́гѡ пристра́стїѧ возгнꙋша́всѧ, ꙳ сꙋ̑щаѧ мі́ра, ꙗ҆́кѡ не сꙋ̑щаѧ, вмѣни́лъ є҆сѝ, ꙳ и҆ сегѡ̀ ра́ди ѿ всѣ́хъ ᲂу҆праздни́всѧ, ꙳ безмо́лвнѡ жи́ти и҆збра́лъ є҆сѝ, ꙳ несмꙋ́тнымъ ᲂу҆мо́мъ и҆ немѧте́жнымъ се́рдцемъ вы́нꙋ слꙋжа̀ бг҃ꙋ: ꙳ ѿѻнꙋ́дꙋже и҆ сосꙋ́дъ ст҃а́гѡ дх҃а ѡ҆брѣ́лсѧ є҆сѝ, ꙳ чистоты̀ ра́ди дꙋшѝ твоеѧ̀, ꙳ є҆мꙋ́же моли́сѧ, ꙳ поми́ловати дꙋ́шы на́шѧ.
Бжⷭ҇твенныѧ ра́дости и҆ весе́лїѧ дꙋхо́внагѡ ꙳ и҆спо́лнена ꙗ҆ви́сѧ свѣтоно́снаѧ твоѧ̀ па́мѧть, ѻ҆́ч҃е а҆нтѡ́нїе: ꙳ ѿѻнꙋ́дꙋже дꙋхѡ́внаѧ твоѧ̑ ча̑да, ꙳ ра́достнѣ соше́дшесѧ, свѣ́тлѡ пра́зднꙋемъ, ꙳ бг҃олѣ́пнꙋ сла́вꙋ воздаю́ще ꙳ прославлѧ́ющемꙋ тѧ̀ бг҃ꙋ, ꙳ вѣ́дꙋщемꙋ прославлѧ́ти ст҃ы̑ѧ своѧ̑ ᲂу҆го́дники, ꙳ є҆мꙋ́же моли́сѧ, ꙳ спастѝ дꙋ́шы на́шѧ.
Сла́ва, гла́съ и҃:
Прїиди́те, ѻ҆тцы̀ и҆ бра́тїѧ, честно́е мона́шеское собра́нїе, дне́сь ѡ҆бстоѧ́ще всечестнꙋ́ю ра́кꙋ любе́знагѡ ѻ҆тца̀, благоче́стнѣ лобза́емъ: и҆ ра́достнѡ пою́ще ѱалѡ́мскаѧ пѣ̑нїѧ, во ᲂу҆стѣ́хъ и҆мꙋ́ще дꙋхѡ́внаѧ словеса̀, любо́вїю принесе́мъ є҆мꙋ̀, ꙗ҆́кѡ вои́стиннꙋ мона́шескомꙋ ᲂу҆добре́нїю и҆ прпⷣбныхъ сожи́телю. и҆ свѣ́тлѡ всепра́зднствєннаѧ сотворѧ́юще, си́це рце́мъ: ра́дꙋйсѧ, свѣти́льниче многосвѣ́тлый, возводѧ̀ ко хрⷭ҇тꙋ̀ мона́хѡвъ мно́жество: ра́дꙋйсѧ, похвало̀ на́ша и҆ ᲂу҆твержде́нїе, и҆ всѣ̑мъ вѣ̑рнымъ благоꙋти́шное приста́нище спасе́нїѧ, болѧ́щихъ цѣли́телю, а҆нтѡ́нїе, всечестны́й ѻ҆́ч҃е на́шъ, не ѡ҆ста́ви на́съ си́рыхъ, но пребꙋ́ди съ на́ми ча̑ды твои́ми, ꙗ҆́коже ѡ҆бѣща́лсѧ є҆сѝ: и҆ не преста́й молѧ́сѧ прест҃ѣ́й трⷪ҇цѣ, ꙗ҆́кѡ да ми́лостива бꙋ́детъ на́мъ ѡ҆ грѣсѣ́хъ на́шихъ, и҆ спасе́тъ дꙋ́шы на́шѧ.
И҆ ны́нѣ, бг҃оро́диченъ: Влⷣчце, прїимѝ моли̑твы ра̑бъ твои́хъ:
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Пи́щи ра́йскїѧ наслади́тисѧ возжелѣ́лъ є҆сѝ, ꙳ гла́домъ и҆ жа́ждею и҆ста́илъ є҆сѝ пло́ть твою̀, ꙳ и҆ сла́вою ѿ бг҃а вѣнча́нъ бы́ти восхотѣ́въ, ꙳ земнꙋ́ю сла́вꙋ преѡби́дѣлъ є҆сѝ: ꙳ ѿ негѡ́же и҆ просла́вилсѧ є҆сѝ, всебл҃же́нне.
Сті́хъ: Блаже́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Любо́вїю бж҃їею ᲂу҆крѣ́пльсѧ, бл҃же́нне а҆нтѡ́нїе, жела́нїе пло́ти ᲂу҆мертви́лъ є҆сѝ: ꙳ дꙋше́вное же ѻ҆́ко ѿ помы́сленныхъ прилѡ́гъ ꙳ свобо́днѡ къ бг҃ꙋ возве́лъ є҆сѝ, ꙳ и҆ всего̀ себѐ чи́ста ꙳ предста́вилъ є҆сѝ бг҃ꙋ.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
Свѣти́ло вели́кое ꙗ҆ви́сѧ на́мъ дне́сь, ꙳ ст҃а́ѧ твоѧ̀ па́мѧть, прпⷣбне а҆нтѡ́нїе, ꙳ мі́ръ ве́сь просвѣща́ющи зарѧ́ми ꙳ и҆зрѧ́дныхъ чꙋде́съ твои́хъ, ꙳ любо́вїю пра́зднꙋющымъ и҆сцѣлє́нїѧ неѡскꙋ́днѡ подава́ющи.
Сла́ва, и҆ ны́нѣ, бг҃оро́диченъ, гла́съ и҆ подо́бенъ то́йже:
Го́рнїи тѧ̀ ли́цы, ꙳ бцⷣе дв҃о, ꙳ пою́тъ съ до́льными, ꙳ славосло́вѧще непреста́ннѡ ꙳ ржⷭ҇тво̀ твоѐ пречⷭ҇тое.
Тропа́рь, гла́съ а҃:
Жела́нїемъ дꙋхо́внымъ распали́всѧ, и҆ мѧте́жи мїрскі̑ѧ ѿри́нꙋвъ, ко є҆ди́номꙋ же бг҃ꙋ любо́вїю прилѣпи́лсѧ є҆сѝ, и҆ тогѡ̀ вседꙋ́шнѣ взыскꙋ́ѧ, во внꙋ́треннюю пꙋсты́ню ѿше́лъ є҆сѝ, при вода́хъ всели́всѧ. и҆дѣ́же во слеза́хъ и҆ трꙋдѣ́хъ пребыва́ѧ многолѣ́тное вре́мѧ, въ терпѣ́нїи мно́зѣмъ житїѐ а҆́гг҃льское проходи́лъ є҆сѝ, въ наставле́нїи бжⷭ҇твеннагѡ ра́зꙋма: и҆ мно́жество мона́хѡвъ собра́лъ є҆сѝ, мꙋ́дре, и҆̀хже посѣща́ѧ не ѡ҆ста́ви, а҆нтѡ́нїе прпⷣбне, ѻ҆́ч҃е на́шъ, прест҃ѣ́й трⷪ҇цѣ молѧ́сѧ ѿ ѕѡ́лъ всѧ́ческихъ и҆зба́вити и҆ спастѝ дꙋ́шы на́шѧ.
Сла́ва, и҆ ны́нѣ, бг҃оро́диченъ: Гаврїи́лꙋ вѣща́вшꙋ:
На вели́цѣй вече́рни пое́мъ: Бл҃же́нъ мꙋ́жъ, а҃-й а҆нтїфѡ́нъ.
На Гдⷭ҇и, воззва́хъ, стїхи̑ры, гла́съ ѕ҃. Подо́бенъ: Всѐ ѿло́жше:
Всѧ̑ ѡ҆ста́вилъ є҆сѝ, ꙳ къ нбⷭ҇нымъ возложи́въ ᲂу҆́мъ тво́й, ꙳ хрⷭ҇та̀ є҆ди́нагѡ въ слѣ́дъ ходи́ти возлюби́лъ є҆сѝ. ꙳ сегѡ̀ ра́ди безмо́лвнѡ жи́ти взыска́лъ є҆сѝ, ꙳ ᲂу҆клони́всѧ въ пꙋсты́ню, ꙳ въ не́йже подвиза́всѧ, ꙳ житїѐ а҆́гг҃льское притѧжа́лъ є҆сѝ, ꙳ къ боре́нїю льсти́вагѡ посто́мъ и҆ моли́твами воѡрꙋжи́въ себѐ, ꙳ и҆скꙋшє́нїѧ мнѡ́га претерпѣ́лъ є҆сѝ, ꙳ и҆ вѣнцы̑ нетлѣ́нными ѡ҆богати́лсѧ є҆сѝ. ꙳ бл҃года́ть прїе́мъ ѿ бг҃а, ꙳ и҆сцѣлѧ́еши недꙋ́ги разли̑чныѧ: ꙳ тѣ́мъ прест҃о́мꙋ дх҃ꙋ, а҆нтѡ́нїе прпⷣбне, моли́сѧ, ꙳ поми́ловатисѧ дꙋша́мъ на́шымъ.
Ве́сь ѡ҆свѧще́нъ, ꙳ бг҃оно́сецъ показа́лсѧ є҆сѝ, ꙳ дре́внѧгѡ человѣ́ка совле́ксѧ съ похотьмѝ, ꙳ и҆ во хрⷭ҇та̀ вои́стиннꙋ ѡ҆бле́къ себѐ, ꙳ дꙋхо́внꙋю хра́минꙋ нерꙋкотворе́ннꙋю назда́лъ є҆сѝ, ꙳ положи́въ ѡ҆снова́нїе добродѣ́телей: ꙳ къ высотѣ̀ безстра́стїѧ дости́глъ є҆сѝ, ꙳ ᲂу҆ма̀ высо́кое смире́нїемъ возве́лъ є҆сѝ бг҃ꙋ, ꙳ ѿ негѡ́же зна́нїѧ глꙋбо́кое воспрїѧ́лъ є҆сѝ, ꙳ проразꙋмѣва́ти бꙋ̑дꙋщаѧ, ꙗ҆́кѡ настоѧ̑щаѧ, ꙳ и҆ ᲂу҆ма̀ сокровє́ннаѧ человѣ́кѡмъ пред̾глаго́лати. ꙳ и҆ ны́нѣ прест҃ѣ́й трⷪ҇цѣ, бл҃же́нне, моли́сѧ ꙳ ѡ҆ дꙋша́хъ на́шихъ.
Зрѣ́ти жела́ѧ мы́сленнꙋю добро́тꙋ, ꙳ чꙋ́вствєннаѧ всѧ̑ преминꙋ́лъ є҆сѝ, ꙳ въ слеза́хъ и҆ воздыха́нїихъ живѧ̀ дни̑ своѧ̑, ꙳ ѡ҆горчева́лъ є҆сѝ пло́ть твою̀ всено́щными бдѣ̑нїи и҆ ча́стыми колѣнопреклонє́нїи. ꙳ и҆ сегѡ̀ ра́ди всѧ́къ ви́дъ добродѣ́телей проходи́лъ є҆сѝ, ꙳ немощна̑ѧ ѡ҆полчє́нїѧ вра̑жїѧ ѡ҆бличи́въ, ꙳ крѣпкодꙋ́шнымъ терпѣ́нїемъ, ꙳ многоболѣ́зненнымъ страда́нїемъ къ неболѣ́знєннымъ дости́глъ є҆сѝ, ꙳ и҆дѣ́же свѣ́тъ невече́рнїй и҆ а҆́гг҃лъ ликостоѧ́нїе. ꙳ съ ни́миже, прпⷣбне, хрⷭ҇тꙋ̀ со дерзнове́нїемъ моли́сѧ ꙳ ѡ҆ спасе́нїи дꙋ́шъ на́шихъ.
И҆́ны стїхи̑ры, гла́съ д҃. Подо́бенъ: Зва́нный свы́ше:
Є҆гда̀ бжⷭ҇твенное раче́нїе ꙳ на́йде на тѧ̀, пребога́те, ꙳ тогда̀ тѧ́жесть мі́ра ѿ дꙋшѝ твоеѧ̀ ѿри́нꙋвъ, ꙳ вѣ́трило ᲂу҆ма̀ ꙗ҆́кѡ легко̀ къ бг҃ꙋ впери́лъ є҆сѝ, ꙳ кора́бль тво́й направлѧ́ѧ въ ти́хое приста́нище, ꙳ и҆дѣ́же и҆ сподо́билсѧ є҆сѝ ст҃а́гѡ ѻ҆́браза мона́шескагѡ благоꙋкраше́нїѧ, ꙳ и҆ та́мѡ ᲂу҆чи́телемъ твои́мъ наставлѧ́емь, ꙳ ѻ҆́бразы благоче́стїѧ сїѧ́ѧ, ꙳ благи́ми нра̑вы ᲂу҆краша́ѧсѧ, ꙳ свѧще́нства, ꙗ҆́кѡ сосꙋ́дъ и҆збра́нъ, сподо́билсѧ є҆сѝ. ꙳ тѣ́мъ хрⷭ҇тꙋ̀ бг҃ꙋ моли́сѧ, ꙳ спастѝ и҆ просвѣти́ти дꙋ́шы на́шѧ.
Є҆гда̀ любо́вь бж҃їѧ ꙳ двиза́шесѧ въ се́рдцы твое́мъ, преблаже́нне, ꙳ тогда̀ мі́ра сегѡ̀ сꙋетꙋ̀ ꙳ и҆ преле́стное мꙋдрова́нїе въ ничто́же вмѣни́лъ є҆сѝ: ꙳ въ пꙋсты́ню пресели́всѧ, ꙳ и҆ въ не́й, ꙗ҆́кѡ безпло́тенъ, ꙳ до́брымъ по́двигомъ подвиза́всѧ, ꙳ неви́димыхъ врагѡ́въ ѡ҆полчє́нїѧ ꙳ терпѣ́нїемъ твои́мъ всѧ̑ побѣди́лъ є҆сѝ. ꙳ но є҆мꙋ́же ѿ ю҆́ности твоеѧ̀ послꙋжи́лъ є҆сѝ, ꙳ хрⷭ҇тꙋ̀ бг҃ꙋ моли́сѧ, ꙳ спастѝ и҆ просвѣти́ти дꙋ́шы на́шѧ.
Є҆гда̀ бжⷭ҇твеннымъ манове́нїемъ ꙳ пока́заннаго тебѣ̀ въ видѣ́нїи ᲂу҆зрѣ́въ, ꙳ крⷭ҇тнымъ зна́менїемъ воѡрꙋжа́юща тебѐ, ꙳ тогда̀, прпⷣбне а҆нтѡ́нїе, ꙳ и҆ ты̀, крⷭ҇то́мъ воѡрꙋжи́въ себѐ, ꙳ вседꙋ́шнѡ хрⷭ҇тꙋ̀ послѣ́довалъ є҆сѝ, ꙳ и҆ тогѡ̀ любо́вїю простира́ѧсѧ, ꙳ кро́тость и҆ неѕло́бїе стѧжа́лъ є҆сѝ. ꙳ тѣ́мъ и҆ кро́ткихъ зе́млю наслѣ́довалъ є҆сѝ, ꙳ ѿѻнꙋ́дꙋже и҆сто́чникъ цѣле́нїй пролива́еши приходѧ́щымъ тѝ съ вѣ́рою, ꙳ прест҃ѣ́й трⷪ҇цѣ молѧ́сѧ, ꙳ ю҆́же молѝ ꙳ спастѝ и҆ просвѣти́ти дꙋ́шы на́шѧ.
Сла́ва, гла́съ и҃:
Прпⷣбне ѻ҆́ч҃е бг҃облаже́нне а҆нтѡ́нїе, жесто́кое твоѐ житїѐ и҆ трꙋды̀, ꙗ҆̀же по бг҃ꙋ, въ безмо́лвнѣмъ се́мъ ᲂу҆едине́нїи, ꙗ҆́кѡ прїѧ́то бы́сть бг҃ꙋ: тогда̀ вседѣ́йствїемъ прест҃а́гѡ дх҃а стезѧ́ми пра́выми и҆справлѧ́лъ є҆сѝ жи́знь твою̀, и҆́миже дости́глъ є҆сѝ ѡ҆брѣстѝ бг҃ода́ненъ да́ръ свѣтолѣ́пный, свѧще́ннꙋю мздꙋ̀ трꙋдѡ́въ твои́хъ премꙋ́дрое сниска́нїе, пречꙋ́дный ѻ҆́бразъ є҆диносꙋ́щныѧ трⷪ҇цы: къ не́йже хода́тайствы твои́ми моли́твенными, дꙋше́внымъ ѻ҆́комъ взира́ѧ къ бжⷭ҇твꙋ̀ трисвѣ́тломꙋ, зарѧ́ми чꙋде́съ, па́че со́лнца, ве́сь мі́ръ ѡ҆зари́лъ є҆сѝ, тмꙋ̀ де́мѡнѡвъ дале́че прогонѧ́ѧ. дне́сь же, и҆ по твое́мъ преставле́нїи бг҃ꙋ хотѧ́щꙋ наипа́че просла́вити тѧ̀, ѻ҆би́льна и҆сцѣлє́нїѧ и҆сточа́етъ съ вѣ́рою приходѧ́щымъ къ цѣльбоно́сномꙋ твоемꙋ̀ гро́бꙋ, благоꙋха́нїе подаѧ̀ прест҃а́гѡ дх҃а. тѣ́мже, ꙗ҆́кѡ и҆мѣ́ѧ дерзнове́нїе, прилѣ́жнѡ моли́сѧ прест҃ѣ́й трⷪ҇цѣ, цр҃квамъ є҆диномышле́нїе и҆ правосла́вномꙋ наро́дꙋ на́шемꙋ здра́вїе неѡскꙋ́дное дарова́ти, и҆ на врагѝ крѣ́пкое ѡ҆долѣ́нїе и҆ спасе́нїе и҆спроси́ти дꙋша́мъ на́шымъ.
И҆ ны́нѣ, бг҃оро́диченъ: Цр҃ь нбⷭ҇ный за чл҃вѣколю́бїе:
Вхо́дъ, прокі́менъ днѐ, чтє́нїѧ г҃, пи́саны сегѡ̀ мѣ́сѧца въ є҃ де́нь.
На лїті́и стїхи̑ры самогла́сны, гла́съ в҃:
Стезе́ю присноживо́тною при́снѡ ходи́ти возжелѣ́лъ є҆сѝ бꙋ́дꙋщїѧ ра́ди ѻ҆́ныѧ присноблаже́нныѧ сла́вы: тогѡ̀ ра́ди, въ пꙋсты́нѧхъ пребыва́ѧ, слꙋжи́лъ є҆сѝ бг҃ꙋ, подо́бѧсѧ свѣти́лꙋ ѻ҆́номꙋ, вели́комꙋ а҆нтѡ́нїю: ꙗ҆́коже бо ѻ҆́нъ вели́кїй въ пꙋсты́нѧхъ є҆гѵ́петскихъ безмо́лвїѧ ра́ди всели́сѧ, та́коже и҆ ты̀, всеблаже́нне, дꙋше́внагѡ ра́ди безмо́лвїѧ, тѣлє́снаѧ чꙋ̑вства во внꙋ́треннихъ пꙋсты́нѧхъ си́хъ неисхо́днѣ затвори́лъ є҆сѝ. но ѻ҆́нъ ᲂу҆́бѡ дре́внихъ ст҃ы́хъ ѻ҆тцє́въ, въ постѣ̀ просїѧ́вшихъ, ѻ҆тє́цъ и҆ нача́льникъ бы́сть: ты́ же, прпⷣбне, въ послѣ̑днїѧ ро́ды сїѧ̑ возсїѧ́лъ є҆сѝ бг҃оꙋго́днымъ житїе́мъ твои́мъ, ѻ҆те́цъ, и҆ нача́льникъ бы́въ мона́хѡмъ. є҆мꙋ́же бо въ житїѝ се́мъ наслѣ́дникъ и҆ ревни́тель бы́лъ є҆сѝ, си́це тогѡ̀ и҆ и҆менова́нїе ѿ дѣ́лъ прїе́мъ, съ ни́мже прест҃ѣ́й трⷪ҇цѣ моли́сѧ, спасти́сѧ дꙋша́мъ на́шымъ.
Прїиди́те, бг҃олюбе́зное ста́до, мона́шеское собра́нїе, съ празднолюбе́зными чи́нми хрⷭ҇тїа́нскагѡ мно́жества бг҃оимени́тыхъ люде́й бж҃їихъ, дне́сь восхва́лимъ хрⷭ҇то́ва рачи́телѧ, граждани́на пꙋсты́ннаго, мона́хѡмъ премꙋ́драго наста́вника, пꙋсты́нникѡвъ похвалꙋ̀ свѧтолѣ́пнꙋю, бжⷭ҇твєнныѧ пѣ̑сни принесе́мъ є҆мꙋ̀. се́й бо ре́вность бжⷭ҇твеннꙋю въ се́рдцы прїе́мъ, мїрскꙋ́ю пре́лесть всю̀ ѡ҆ста́вивъ, хрⷭ҇тꙋ̀ послѣ́дова, трꙋды̑ по́стническими простира́ѧсѧ, де́мѡнскїѧ па̑гꙋбы побѣдѝ мꙋ́жески, дх҃а ст҃а́гѡ ѻ҆рꙋ́жїи непобѣди́мыми. тѣ́мже, возше́дъ на лѣ́ствицꙋ добродѣ́телей, дости́же крꙋгѡ́въ ѻ҆́ныхъ нбⷭ҇ныхъ, и҆дѣ́же бг҃онача́льнымъ свѣ́томъ со а҆́гг҃льскими ли̑ки просвѣща́ѧсѧ, моли́твенникъ непреста́ненъ быва́етъ за дꙋ́шы на́шѧ.
Въ ти́хое и҆ небꙋ́рное приста́нище безмо́лвїѧ вше́дъ, во ѿхо́днꙋю пꙋсты́ню бг҃олюбе́знꙋю, и҆дѣ́же съ бг҃омъ є҆ди́нъ безмо́лвствовалъ є҆сѝ, тѣ́снымъ пꙋте́мъ и҆ приско́рбнымъ присноше́ствовавъ, та́мѡ житїѐ а҆́гг҃льско проходи́лъ є҆сѝ, неꙋдобопокори́вое пло́ти возрази́въ воздержа́нїемъ, наꙋчи́въ сего̀ повинова́тисѧ благо́мꙋ по́мыслꙋ въ хотѣ̑нїѧ бж҃їѧ. тѣ́мже свѣ́тъ безстра́стїѧ возсїѧ̀ тебѣ̀, въ не́мже ᲂу҆зрѣ́лъ є҆сѝ присносꙋ́щнаго свѣ́та, хрⷭ҇та̀, бг҃а на́шего. є҆го́же непреста́ннѡ моли́ти мо́лимсѧ, ѿ всѧ́кихъ ѕѡ́лъ на́съ и҆зба́вити, всечестно́е твоѐ ᲂу҆спе́нїе пра́зднꙋющыѧ, и҆ спастѝ дꙋ́шы на́шѧ.
Сла́ва, гла́съ ѕ҃:
Ра́дꙋйтесѧ и҆ весели́тесѧ ѡ҆ гдⷭ҇ѣ, бг҃оизбра́нное ста́до бл҃же́нное, дꙋхѡ́внаѧ ча̑да преподо́бнагѡ, ꙗ҆́кѡ такова́го свѣти́льника ѻ҆тца̀ себѣ̀ и҆мꙋ́ще, и҆ ча̑да нареко́стесѧ, пресвѣ́тлымъ житїе́мъ свои́мъ ве́сь мі́ръ ѡ҆зари́вшаго: є҆го́же просла́ви бг҃ъ зна́мєнїи же и҆ чꙋдесы̀ свои́ми пресла́вными, ѻ҆би̑льна и҆сцѣлє́нїѧ неѡскꙋ́днѡ да́рꙋюща приходѧ́щымъ къ немꙋ̀ съ вѣ́рою. тѣ́мже, ѡ҆бстоѧ́ще всечестнꙋ́ю ра́кꙋ є҆гѡ̀, мо́лимсѧ є҆мꙋ̀, глаго́люще: ѽ всебл҃же́нне а҆нтѡ́нїе, ѻ҆́ч҃е на́шъ, непреста́ннѡ молѝ всест҃ꙋ́ю трⷪ҇цꙋ, ста́до твоѐ спастѝ и҆ вѣ́рнѡ чтꙋ́щихъ пресвѧтꙋ́ю па́мѧть твою̀, и҆ трꙋды̀ твоѧ̑ и҆ терпѣ̑нїѧ любоче́стнѣ и҆мѣ́ющихъ, ꙗ҆̀же за хрⷭ҇та̀ под̾ѧ́лъ є҆сѝ, ꙗ҆́кѡ да то́й ми́лостивъ бꙋ́детъ на́мъ ѡ҆ грѣсѣ́хъ на́шихъ въ де́нь сꙋ́дный, и҆ спасе́тъ дꙋ́шы на́шѧ.
И҆ ны́нѣ, бг҃оро́диченъ: Творе́цъ и҆ и҆зба́витель:
На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ.
Ра́дꙋйсѧ, всесвѧще́ннаѧ главо̀, прпⷣбне ѻ҆́ч҃е на́шъ а҆нтѡ́нїе, ᲂу҆го́дниче хрⷭ҇то́въ присножела́нный, вы́шнихъ си́лъ ревни́телю и҆ собесѣ́дниче а҆́гг҃лѡвъ. на земли́ бо, въ пло́ти сы́й, безпло́тныхъ житїѐ проходи́лъ є҆сѝ, подо́бѧсѧ тѣ́хъ житїю́ же и҆ нра́вꙋ: съ ни́миже ны́нѣ въ присноблаже́ннѣмъ свѣ́тѣ пребыва́ѧ, наслажда́ѧсѧ зрѣ́нїй бжⷭ҇твенныхъ, хрⷭ҇тꙋ̀ бг҃ꙋ моли́сѧ, ми́ръ вселе́ннѣй дарова́ти, и҆ дꙋша́мъ на́шымъ ве́лїю ми́лость.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
Ра́дꙋйсѧ, свѧще́нный ве́рше предо́брый, прпⷣбнымъ и҆ пра́вєднымъ совсе́льниче є҆динонра́вный. тѣ́хъ бо житїю̀ послѣ́дствовавъ, страсте́й и҆гра̑нїѧ, ꙗ҆́кѡ сѣ́чивомъ, крⷭ҇та̀ зна́менїемъ посѣ́клъ є҆сѝ, свѣ́томъ пресвѣ́тлымъ, дх҃омъ ст҃ы́мъ ѡ҆зарѧ́емь, на свѣ́щницѣ добродѣ́телей всѧ̑ ѡ҆свѣща́еши, бл҃гоче́стїѧ ве́рше преизѧ́щный, ᲂу҆кра́шенный дарова̑нїи бжⷭ҇твенными. тѣ́мже хрⷭ҇тꙋ̀ бг҃ꙋ моли́сѧ, дарова́ти дꙋша́мъ на́шымъ ми́ръ и҆ ве́лїю ми́лость.
Сті́хъ: Блаже́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Ра́дꙋйсѧ, свѧще́нный на́шъ наста́вниче, главо̀ предо́браѧ, ᲂу҆ч҃ни̑къ твои́хъ ста́до и҆збра́нное, и҆̀хже бг҃олю́бнѣ въ пꙋсты́ни се́й собра́лъ є҆сѝ мꙋ́дрѣ, ѡ҆ ни́хже трꙋды̀ и҆ по́ты простира́ѧ, дꙋ́шꙋ твою̀ положи́лъ є҆сѝ: не ѡ҆ста́ви посѣща́ѧ, и҆ ѡ҆ и҆̀же вѣ́рою соверша́ющихъ па́мѧть твою̀ свѧтꙋ́ю, и҆ любоче́стнѣ почита́ющихъ всечестны̑ѧ твоѧ̑ мо́щи ст҃ы̑ѧ, хрⷭ҇тꙋ̀ моли́сѧ, и҆зба́вити всѣ́хъ на́съ всѧ́кагѡ гнѣ́ва и҆ томле́нїѧ, и҆ спасе́нїе дарова́ти дꙋша́мъ на́шымъ.
Сла́ва, гла́съ и҃:
Пꙋсты́нѧ, пре́жде непло́дствꙋющи, ны́нѣ же весели́тсѧ, зрѧ́щи въ себѣ̀ ста́до мона́хѡвъ, ѡ҆бстоѧ́щихъ всечестны́й гро́бъ пречꙋ́днагѡ ѻ҆тца̀ сегѡ̀ и҆ дꙋхо́внѡ веселѧ́щихсѧ, и҆̀же пра́зднствєннаѧ торжествꙋ́ютъ, глаго́лющи: ра́дꙋйсѧ, свѣти́льниче пресвѣ́тлый, и҆́же, чꙋдесы̀ сїѧ́ѧ, ѡ҆зарѧ́еши дꙋ́шы вѣ́рныхъ. ра́дꙋйсѧ, ѻ҆́ч҃е всеблагі́й, ᲂу҆мно́живый ча̑да въ пꙋсты́ни дꙋхо́вныхъ жела́нїй, ѡ҆ ни́хже, трꙋды̀ и҆ по́ты полага́ѧ, дꙋ́шꙋ твою̀ пре́далъ є҆сѝ бг҃ꙋ, є҆мꙋ́же моли́сѧ, свѧ́те а҆нтѡ́нїе, ѡ҆ на́съ, ча́дахъ твои́хъ, бл҃гоче́стнѣ па́мѧть твою̀ пра́зднꙋющихъ, и҆зба́вити ѿ навѣ̑тъ вра́жїихъ: ꙗ҆́кѡ да, до́брѣ сконча́вше жи́знь свою̀, дерзнове́нїе полꙋчи́мъ въ де́нь стра́шнагѡ и҆спыта́нїѧ.
И҆ ны́нѣ: Безневѣ́стнаѧ дв҃о:
Тропа́рь, и҆ бг҃оро́диченъ, пи́саны на ма́лѣй вече́рни.
На ᲂу҆́трени, на Бг҃ъ гдⷭ҇ь, тропа́рь ст҃а́гѡ, два́жды. Сла́ва, и҆ ны́нѣ, бг҃оро́диченъ:
По а҃-мъ стїхосло́вїи, сѣда́ленъ, гла́съ и҃:
Мно́гимъ воздержа́нїемъ, прпⷣбне, жи́знь твою̀ ᲂу҆краси́въ, пꙋ́ть показа́лъ є҆сѝ, ведꙋ́щїй въ жи́знь добродѣ́тели смире́нїемъ: мі́ра бо ѿве́ргсѧ, и҆ всѧ̑, ꙗ҆̀же въ мі́рѣ кра̑снаѧ, преѡби́дѣвъ, є҆ѵⷢ҇льскимъ ᲂу҆че́нїємъ послѣ́довалъ є҆сѝ: жесто́кимъ же житїе́мъ пло́ть твою̀ и҆знꙋрѧ́ѧ, го́рдаго ѕмі́ѧ воздержа́нїемъ ᲂу҆би́лъ є҆сѝ. тѣ́мже, на нб҃сѣ́хъ водворѧ́ѧсѧ, трисо́лнечномꙋ бжⷭ҇твꙋ̀ предстои́ши, прпⷣбне а҆нтѡ́нїе, молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Нбⷭ҇нꙋю две́рь и҆ кївѡ́тъ, прест҃ꙋ́ю го́рꙋ, свѣ́тлый ѻ҆́блакъ воспои́мъ, неѡпали́мꙋю кꙋпинꙋ̀, слове́сный ра́й, є҆́ѵы воззва́нїе, вселе́нныѧ всеѧ̀ вели́кое сокро́вище, ꙗ҆́кѡ спасе́нїе въ не́й содѣ́ласѧ мі́рꙋ и҆ ѡ҆ставле́нїе дре́внихъ согрѣше́нїй. сегѡ̀ ра́ди вопїе́мъ є҆́й: моли́сѧ сн҃ꙋ твоемꙋ̀, прегрѣше́нїй ѡ҆ставле́нїе дарова́ти бл҃гоче́стнѡ покланѧ́ющымсѧ всест҃о́мꙋ ржⷭ҇твꙋ̀ твоемꙋ̀.
По в҃-мъ стїхосло́вїи, сѣда́ленъ, гла́съ д҃:
Ѿ ю҆́ности взе́мъ тво́й крⷭ҇тъ, бл҃гоче́стнѡ хрⷭ҇тꙋ̀ послѣ́довалъ є҆сѝ, ᲂу҆вѧди́въ плотско́е мꙋдрова́нїе воздержа́нїемъ и҆ побѣ́дꙋ взе́мъ на дїа́вола, надъ страстьмѝ тѣле́сными воцари́лсѧ є҆сѝ. тѣ́мже и҆ по кончи́нѣ и҆сточа́еши и҆сцѣлє́нїѧ вѣ́рою приходѧ́щымъ къ чꙋдотво́рномꙋ ѻ҆́бразꙋ всест҃ы́ѧ трⷪ҇цы и҆ къ твоемꙋ̀ цѣльбоно́сномꙋ гро́бꙋ: а҆нтѡ́нїе всече́стне, и҆спросѝ на́мъ ве́лїю ми́лость.
Два́жды.
Сла́ва, и҆ ны́нѣ, бг҃оро́диченъ:
Безневѣ́стнаѧ, чⷭ҇таѧ бцⷣе дв҃о, є҆ди́на предста́тельнице вѣ́рныхъ и҆ покро́въ, бѣ́дъ и҆ скорбе́й и҆ лю́тыхъ ѡ҆бстоѧ́нїй всѧ̑ и҆зба́ви, и҆̀же на тѧ̀ ᲂу҆пова́нїе и҆мꙋ́щыѧ, ѻ҆трокови́це, и҆ дꙋ́шы на́шѧ спасѝ бжⷭ҇твенными мольба́ми твои́ми.
По полѷеле́и сѣда́ленъ, гла́съ и҃:
Въ пꙋсты́ню, пребл҃же́нне, всели́лсѧ є҆сѝ, и҆ въ не́й проходѧ̀ жесто́кое жи́тельство, ꙗ҆́коже безпло́тенъ, жи́знь и҆справлѧ́ѧ, пло́ть твою̀ ᲂу҆мертви́лъ є҆сѝ, и҆ поревнова́въ а҆нтѡ́нїа вели́кагѡ и҆зрѧ́дномꙋ жи́тельствꙋ, трⷪ҇цы слꙋжи́тель показа́лсѧ є҆сѝ преизѧ́щный. тѣ́мже къ ре́вности тоѧ̀ бжⷭ҇твеннѣй ли́къ мона́шествꙋющихъ, сла́вне, совокꙋпи́лъ є҆сѝ, бг҃оно́се ѻ҆́ч҃е на́шъ а҆нтѡ́нїе: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀, безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ, ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ младе́нца, дои́ши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ досто́йнѡ сла́вимъ прест҃о́е рождество̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.
Степє́нна, а҃-й а҆нтїфѡ́нъ д҃-гѡ гла́са. Прокі́менъ: Честна̀ пред̾ гдⷭ҇емъ сме́рть прпⷣбныхъ є҆гѡ̀. Всѧ́кое дыха́нїе: Сті́хъ: Хвали́те бг҃а во ст҃ы́хъ є҆гѡ̀. Є҆ѵⷢ҇лїе матѳе́а, зача́ло м҃г.
По н҃-мъ ѱалмѣ̀ стїхи́ра, гла́съ ѕ҃:
Пребл҃же́нне ѻ҆́ч҃е на́шъ а҆нтѡ́нїе, є҆гда̀ къ бг҃ꙋ во ѿше́ствїи твое́мъ ѿсю́дꙋ бг҃олюбе́зное собра́нїе ᲂу҆чени̑къ твои́хъ нака́зовалъ є҆сѝ, ꙗ҆́кѡ ѻ҆ц҃ъ чадолюби́въ, вели́кꙋю глави́знꙋ соблюда́ти и҆ и҆спо́лнити бжⷭ҇твенныхъ прⷪ҇рѡ́къ и҆ зако́на, глаго́лѧ: пребыва́йте, ча̑да, въ соверше́нїи дх҃о́внагѡ ва́шегѡ и҆сполне́нїѧ, любо́вь и҆мѣ́ти и҆̀мъ къ бг҃ꙋ и҆ бли́жнемꙋ, и҆ є҆ли́ка си́ла, подвиза́тисѧ на ѻ҆́бщаго врага̀, внима́ющымъ своемꙋ̀ спасе́нїю, да полꙋча́тъ бꙋ́дꙋщее присноблаже́нствїе. но ᲂу҆́бѡ, всеблаже́нне, не преста́й молѧ́сѧ прест҃ѣ́й трⷪ҇цѣ, и҆ на́съ, чтꙋ́щихъ тѧ̀, сохрани́ти въ любвѝ тоѧ̀, ꙗ҆́кѡ да полꙋчи́мъ ѿ неѧ̀ вели́кꙋю ми́лость.
Канѡ́нъ бцⷣѣ со і҆рмосо́мъ на ѕ҃. И҆ ст҃а́гѡ два̀ канѡ́на на и҃.
Пе́рвый канѡ́нъ:
Гла́съ в҃. Пѣ́снь а҃. І҆рмо́съ:
Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.
Ѽ трⷪ҇це всемилосе́рдаѧ, бж҃е пребл҃гі́й, ѻ҆́ч҃е, и҆ сн҃е, и҆ ст҃ы́й дш҃е, трист҃о́е є҆стество̀, немꙋ́дрыхъ наказа́телю! пода́ждь просвѣще́нїе моемꙋ̀ неразꙋ́мїю, пѣ́снь воспѣ́ти твоемꙋ̀ слꙋжи́телю, въ наставле́нїи бжⷭ҇твеннагѡ твоегѡ̀ просвѣще́нїѧ.
Ѿ ма́тернѧ чре́ва прилѣпи́лсѧ є҆сѝ къ бг҃ꙋ, прпⷣбне, сегѡ̀ ра́ди жи́знь сїю̀ въ ничто́же вмѣни́въ, крⷭ҇тъ гдⷭ҇ень и҆зъ ю҆́ности твоеѧ̀ возжелѣ́лъ є҆сѝ носи́ти, и҆ всѧ̑ земна̑ѧ возненави́дѣвъ, въ нбⷭ҇наѧ приснѡблажє́нствїѧ взира́лъ є҆сѝ.
Ди́внѡ житїѐ твоѐ, бл҃же́нне, кꙋ́пнѡ же и҆ смире́нїе, є҆́же ѿ ю҆́ности стѧжа́лъ є҆сѝ. и҆ сегѡ̀ ра́ди ѿ всегѡ̀ мі́ра ѿлꙋчи́въ себѐ, и҆ а҆́гг҃льскимъ ѻ҆́бразомъ ѡ҆бле́ксѧ, бы́лъ є҆сѝ мона́хъ преди́венъ, цвѣтѧ̀ въ добродѣ́телехъ.
Бг҃оро́диченъ:
Вопло́щсѧ и҆зъ пречⷭ҇тыхъ ложе́снъ твои́хъ, дв҃о всечⷭ҇таѧ, бж҃їе сло́во, всѣ̑мъ и҆з̾ѧснѝ бг҃оразꙋ́мїѧ любо́вь: человѣ́ческое торжество̀ ли́кꙋ а҆́гг҃льскомꙋ совокꙋпи́въ, въ нбⷭ҇наѧ возведѐ.
Дрꙋгі́й канѡ́нъ прпⷣбномꙋ.
Гла́съ и҃. І҆рмо́съ:
Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ, и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща.
Ве́сь вседержи́телю бг҃ꙋ возложи́въ себѐ, бг҃омꙋ́дре, и҆ къ томꙋ̀ жела́нїемъ и҆ любо́вїю ᲂу҆́мъ тво́й впери́въ: тогѡ̀ ра́ди безмѡ́лвнаѧ и҆ ᲂу҆единє́ннаѧ мѣ̑ста возлюби́лъ є҆сѝ, да со хрⷭ҇то́мъ пребыва́ѧ, жи́знь вѣ́чнꙋю наслѣ́диши.
Оу҆пова́нїемъ на бг҃а всебл҃га́го ᲂу҆крѣплѧ́емь, блаже́нне а҆нтѡ́нїе, къ бꙋ́дꙋщымъ благи̑мъ простира́лсѧ є҆сѝ, и҆ твое́й пло́ти неми́лостивъ, ѻ҆́ч҃е, бы́лъ є҆сѝ.
Лꙋка́вый вра́гъ, ѻ҆па́снѡ вѣ́дый ꙗ҆́кѡ хо́щетъ тобо́ю и҆згна́нъ бы́ти ѿ мѣ́ста сегѡ̀ ст҃а́гѡ, сегѡ̀ ра́ди непра́вєдныѧ человѣ́ки воздвиза́етъ на тѧ̀: но сі́и ᲂу҆́бѡ, ничто́же сотво́рше, вспѧ́ть бѣжа́ша, лꙋка́вый же побѣжде́нъ бы́сть ѻ҆рꙋ́жїемъ моли́твъ твои́хъ: бг҃ъ бо снабдѣва́ше тѧ̀.
Бг҃оро́диченъ:
Неискꙋсомꙋ́жнѡ хрⷭ҇та̀ родила̀ є҆сѝ, сꙋ́ща по на́мъ на́съ ра́ди, непремѣ́нна є҆стество́мъ, пречⷭ҇таѧ, и҆ невра́щна во ѻ҆бои́хъ пребы́вша. є҆го́же молѝ непреста́ннѡ, грѣхѡ́въ мои́хъ дарова́ти и҆ напа́стей и҆збавле́нїе.
Катава́сїа: Хрⷭ҇то́съ ражда́етсѧ:
Пѣ́снь г҃. І҆рмо́съ:
Процвѣла̀ є҆́сть пꙋсты́нѧ, ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ цр҃ковь, прише́ствїемъ твои́мъ, въ не́йже ᲂу҆тверди́сѧ моѐ се́рдце.
Вели́ко къ бг҃ꙋ дерзнове́нїе стѧжа́лъ є҆сѝ, преподо́бне, присносꙋ́щныѧ трⷪ҇цы ст҃о́мꙋ ѻ҆́бразꙋ, стѧжа̑нїи трꙋдѡ́въ твои́хъ, бл҃года́ть и҆спросѝ прест҃а́гѡ дх҃а: є҆го́же и҆зъ пла́мене пресла́внѡ и҆зы́ти сотвори́лъ є҆сѝ моли́твами твои́ми.
Въ нача́лѣ ѡ҆снова́нїе добродѣ́телей, блаже́нне, положи́лъ є҆сѝ въ дꙋшѝ твое́й стра́хъ бж҃їй, и҆ на се́мъ ѡ҆снова́нїи назда́лъ є҆сѝ чи̑стыѧ добродѣ́тєли сохране́нїемъ бж҃їихъ за́повѣдей. и҆ сегѡ̀ ра́ди всели́лсѧ є҆сѝ въ вѣ̑чнаѧ блага̑ѧ, ꙗ҆̀же ᲂу҆гото́ва бг҃ъ боѧ́щымсѧ є҆гѡ̀.
Вре́менныхъ и҆ до́льныхъ возгнꙋша́всѧ, высѡ́каѧ при́снѡ пребыва̑ющаѧ возлюби́лъ є҆сѝ, бжⷭ҇твеннымъ раче́нїемъ распала́ѧ благолюби́вꙋю твою̀ дꙋ́шꙋ, и҆ тогѡ̀ сотвори́въ живꙋ́щагѡ бг҃а во́лю, воспрїѧ́лъ є҆сѝ блага̑ѧ нбⷭ҇наѧ.
Бг҃оро́диченъ:
Сказꙋ́ѧ и҆ногда̀ сокрове́нное та́инство, ѻ҆трокови́це, тебѣ̀ дре́вле гаврїи́лъ, зовѧ́ше: ра́дꙋйсѧ, бж҃їѧ пала́то, въ ню́же всели́всѧ, ѡ҆божѝ всѧ̑ человѣ́ки, ꙗ҆́кѡ милосе́рдъ.
И҆́нъ. І҆рмо́съ:
Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Оу҆тверди́въ твоѧ̑ помышлє́нїѧ, блаже́нне, ᲂу҆пова́нїемъ на бг҃а, вра́жїихъ навѣ́тѡвъ ника́коже ᲂу҆боѧ́сѧ, но мы́сленныхъ рѣ́къ стремлє́нїѧ, къ дꙋше́внѣй твое́й хра́минѣ приража̑ющаѧсѧ, возрази́лъ є҆сѝ ѡ҆ ка́мень терпѣ́нїѧ.
Жела́ѧ, прпⷣбне, насыща́тисѧ приснопребыва́ющїѧ сла́дости, бы̑лїи самора́сленными трилѣ́тное вре́мѧ проводи́лъ є҆сѝ жи́зни твоеѧ̀: тѣ́мже и҆ ны́нѣ полꙋчи́лъ є҆сѝ трапе́зꙋ ѻ҆́нꙋ неги́бнꙋщїѧ ꙗ҆́ди, но при́снѡ пребыва́ющїѧ въ жи́зни вѣ́чнѣй.
Во ᲂу҆́мъ прїе́мъ црⷭ҇твїѧ нбⷭ҇нагѡ вѣ́чное наслажде́нїе, земна̑ѧ всѧ̑ пренебре́глъ є҆сѝ: и҆ сегѡ̀ ра́ди скѡ́рбнаѧ нашє́ствїѧ мнѡ́га, и҆ и҆згна̑нїѧ въ жи́зни се́й претерпѣ́лъ є҆сѝ, но ѿ всѣ́хъ си́хъ свободи́ тѧ тебѣ̀ жи́знь вѣ́чнꙋю дарова́вый.
Бг҃оро́диченъ:
Твою̀ по́мощь пода́ждь мѝ, рабꙋ̀ твоемꙋ̀ недосто́йномꙋ, дв҃о влⷣчце, и҆ вразꙋми́вши бжⷭ҇твенное сїѐ начина́нїе, сотворѝ ѿ недосто́йнагѡ достѡ́йнаѧ, и҆ и҆зба́ви бѣ́дъ и҆ скорбе́й и҆ прегрѣше́нїй мно́гихъ, ꙗ҆́кѡ ро́ждши всѣ́хъ и҆збавле́нїе.
Сѣда́ленъ, гла́съ г҃:
Многомѧте́жїе мі́ра и҆ непостоѧ́ннꙋю сꙋетꙋ̀, ꙗ҆́кѡ пра́хъ, вмѣни́въ, къ премі̑рнымъ возве́лъ є҆сѝ ᲂу҆́мъ тво́й, затво́ромъ безмо́лвїѧ воздержа́въ тѣлє́снаѧ чꙋ̑вства, и҆ стѧжа́въ жи́знь а҆́гг҃льскꙋ, бг҃ꙋ ᲂу҆годи́лъ є҆сѝ, де́мѡнѡвъ па́гꙋбникъ, страсте́й и҆скорени́тель, человѣ́кѡвъ спаси́тель нело́женъ бы́лъ є҆сѝ. тѣ́мже и҆ на́съ ѿ тлетво́рныхъ страсте́й и҆зба́ви, мо́лимсѧ, твою̀ па́мѧть при́снѡ въ пѣ́снехъ почита́ющихъ, блаже́нне а҆нтѡ́нїе, ѻ҆́ч҃е на́шъ.
Два́жды.
Сла́ва, и҆ ны́нѣ, бг҃оро́диченъ:
Ꙗ҆́кѡ невоздѣ́ланнаѧ, дв҃о, лоза̀, краснѣ́йшїй гро́здъ прозѧбла̀ є҆сѝ, и҆сточа́ющъ на́мъ вїно̀ спасе́нїѧ, всѣ́хъ веселѧ́щее дꙋ́шы же и҆ тѣлеса̀. тѣ́мже ꙗ҆́кѡ винꙋ́ тѧ до́брыхъ блажа́ще, при́снѡ со а҆́гг҃ломъ вопїе́мъ тѝ: ра́дꙋйсѧ, ѡ҆бра́дованнаѧ.
Пѣ́снь д҃. І҆рмо́съ:
Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ: до менє́ бо и҆́деши, менѐ и҆щѧ̀ заблꙋ́ждшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многоми́лостиве.
Ко́ль бла́гѡ положи́лъ є҆сѝ во ᲂу҆мѣ̀ твое́мъ, є҆́же прилѣплѧ́тисѧ бг҃ꙋ на́шемꙋ: сегѡ̀ ра́ди ѡ҆ста́вивъ всѧ̑, на землѝ сꙋ̑щаѧ, ᲂу҆́мъ тво́й вседꙋ́шнѡ возложи́лъ є҆сѝ къ нбⷭ҇нымъ ѡ҆би́телемъ, въ безмо́лвїи мно́зѣ препровожда́лъ жи́знь твою̀: да никогда́же ѿто́ргнешисѧ сладча́йшагѡ твоегѡ̀ і҆и҃са.
Сме́рть, па́че всегѡ̀ житїѧ̀ сегѡ̀, и҆збра́лъ є҆сѝ, да хрⷭ҇тꙋ̀ жи́ти бꙋ́деши, сегѡ̀ ра́ди въ ме́ртвость повседне́внꙋю вдаѧ́лсѧ є҆сѝ, трꙋды̑ по́стническими ᲂу҆мерщвлѧ́лъ є҆сѝ всѧ̑ ᲂу҆́ды своѧ̑, и҆стни́въ пло́ть свою̀ посты̑ мно́гими.
Помина́ѧй, прпⷣбне, послѣ́днїй де́нь жи́зни сеѧ̀, прише́льца вмѣнѧ́лъ є҆сѝ себѐ въ мі́рѣ се́мъ бы́ти, на всѧ́къ де́нь гото́вилсѧ є҆сѝ ко и҆схожде́нїю, благи́ми дѣ́лы ᲂу҆краша́ѧ дꙋ́шꙋ твою̀, ѡ҆жида́ѧ прише́ствїѧ влⷣки твоегѡ̀.
Бг҃оро́диченъ:
Бг҃овидѣ́нїемъ просвѣ́щсѧ прⷪ҇ро́къ, ꙗ҆вле́ннѡ зри́тъ го́рꙋ бж҃їю бл҃гослове́ннꙋю, земны̑мъ ᲂу҆краше́нїе, нбⷭ҇нымъ славосло́вїе бг҃олѣ́пное, є҆ди́нꙋ всепѣ́тꙋю.
И҆́нъ. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Потѡ́ки сле́зными пꙋсты̑ни напои́лъ є҆сѝ, блаже́нне, сѣ́мѧ трꙋдѡ́въ твои́хъ сѣ́ѧ въ ни́хъ. тѣ́мже и҆ стори́чный пло́дъ ра́достнѣ пожа́лъ є҆сѝ, вопїѧ̀: сла́ва си́лѣ твое́й, гдⷭ҇и.
Стена́нїемъ се́рдца и҆ ᲂу҆миле́нїемъ мно́зѣмъ житїѧ̀ по́прище преше́дъ, мꙋ́дре, и҆ въ странꙋ̀ безстра́стїѧ преселѝ себѐ, въ не́йже свѣ́тъ прїе́мъ въ се́рдцы твое́мъ, непреста́ннѡ весели́шисѧ, неизрече́ннагѡ свѣ́та хрⷭ҇та̀ наслажда́ѧсѧ.
Молѧ́сѧ не преста́й, ѻ҆́ч҃е, ѡ҆ ста́дѣ твое́мъ, є҆го́же мно́гими трꙋды̑ и҆ пѡ́ты стѧжа́лъ є҆сѝ, и҆збавле́нїѧ просѧ̀ ѕлы́хъ ѡ҆бстоѧ́нїй и҆ скорбе́й всѧ́ческихъ: да тѧ̀ всѝ, ꙗ҆́кѡ ѻ҆ц҃а̀ чадолюби́ва, непреста́ннѡ воспѣва́емъ.
Бг҃оро́диченъ:
Ко́рень и҆зъ чре́слъ ца́рскихъ, цр҃ь всѣ́хъ, ꙗ҆́кѡ сꙋ́щꙋ возлюби́въ, и҆ вы́шшꙋ херꙋві̑мъ и҆ серафі̑мъ показа̀, ве́сь, бцⷣе, всели́сѧ въ тѧ̀.
Пѣ́снь є҃. І҆рмо́съ:
Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ приведе́нїе и҆́мамы.
Ꙗ҆́кѡ дре́во благора́сленно, при и҆схо́дищахъ мно́гихъ во́дъ насажде́нъ бы́въ, ѻ҆́ч҃е, вѣ̑тви добродѣ́телей мнѡ́ги и҆зрасти́лъ є҆сѝ, подъ сѣ́нь твою̀ всѧ̑ прїе́млѧ, хотѧ́щыѧ спасе́нїѧ.
Пꙋчи́ною сле́зъ твои́хъ мо́ре грѣхо́вное потопи́лъ є҆сѝ, погрꙋжа́ѧ ᲂу҆́мъ сво́й во глꙋбинꙋ̀ видѣ́нїй бжⷭ҇твенныхъ, и҆дѣ́же сокрове́нныхъ та̑инъ ꙗ҆́снѡ зри́тель бы́въ, проре́клъ є҆сѝ комꙋ́ждо напослѣ́докъ хотѧ̑щаѧ бы́ти и҆̀мъ.
Моли́твенникъ ꙗ҆́кѡ те́плъ въ жи́зни се́й прест҃ѣ́й трⷪ҇цѣ бы́лъ є҆сѝ, бл҃же́нне, хода̑тайствы твои́ми здра́вїе всѣ̑мъ подава́ѧ нескꙋ́дное. тѣ́мъ и҆ ны́нѣ па́че въ моли́твꙋ предлага́емъ тѧ̀, просѧ́ще тобо́ю прїѧ́ти ми́лѡсти и҆ грѣхѡ́въ ѡ҆ставлє́нїѧ.
Бг҃оро́диченъ:
Мои́хъ прегрѣше́нїй плени́цꙋ, влⷣчце, расто́ргни, твоего̀ сн҃а и҆ бг҃а молѧ́щи, и҆ томѧ́щїй грѣ́хъ, приснодв҃о, низложѝ: ꙗ҆́кѡ да пою́ тѧ всегда̀, всенепоро́чнаѧ, тобо́ю спаса́емь.
И҆́нъ. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго. но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Пи́щи малопрїѧ́тїемъ скꙋ́днымъ ѕѣлѡ̀ жела́нїе пло́ти ѡ҆бꙋзда́лъ є҆сѝ, во всено́щныхъ же славосло́вїихъ бжⷭ҇твенныхъ слове́съ дш҃ѝ слове́сное непоро́чнѡ бг҃ꙋ соблю́лъ є҆сѝ.
Црⷭ҇тво нбⷭ҇ное стѧжа́въ нището́ю самово́льною, ѿѻнꙋ́дꙋже и҆сточа́еши ѡ҆би̑льнаѧ дарова̑нїѧ дꙋхо́вныхъ и҆сцѣле́нїй вѣ́рнѡ почита́ющымъ всест҃ꙋ́ю твою̀ па́мѧть.
Свѣщꙋ̀ твою̀ дх҃о́внꙋю, чистоты̀ свѣти́ло вже́глъ є҆сѝ, бл҃же́нне, є҆ле́емъ ми́лости напоѧ́ѧ непреста́ннѡ. тѣ́мъ дости́глъ є҆сѝ черто́га нбⷭ҇нагѡ, и҆дѣ́же є҆́сть жени́хъ ѻ҆́нъ, є҆го́же и҆змла́да возжелѣ́лъ є҆сѝ.
Бг҃оро́диченъ:
Хра́мъ ꙗ҆ви́ласѧ є҆сѝ че́стенъ, дв҃о мт҃и мр҃і́е, всѧ́чєскаѧ всеси́льнѡ и҆ премꙋ́дрѡ соста́вльшагѡ хрⷭ҇та̀, и҆ ѡ҆чи́стивша и҆ носѧ́ща: є҆го́же на́мъ ми́лостива сотворѝ ма́терними твои́ми мольба́ми.
Пѣ́снь ѕ҃. І҆рмо́съ:
Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
Честно́е тѣ́ло твоѐ, прпⷣбне, мнѡ́га и҆сцѣлє́нїѧ, ꙗ҆́кѡ и҆сто́чникъ при́снѡ кипѧ́щь, и҆сточа́етъ вѣ́рою приходѧ́щымъ къ чꙋдотво́рномꙋ ѻ҆́бразꙋ всест҃ы́ѧ трⷪ҇цы и҆ къ цѣльбоно́сномꙋ твоемꙋ̀ гро́бꙋ.
Непреста́нными твои́ми къ бг҃ꙋ, ѻ҆́ч҃е, моли́твами, крꙋгѡ́въ нбⷭ҇ныхъ дости́глъ є҆сѝ, и҆дѣ́же є҆́сть свѣ́тъ неизрече́нный и҆ наслажде́нїе првⷣныхъ, съ ни́миже предстои́ши трⷪ҇цѣ всѣ́хъ бг҃ꙋ, ѿѻнꙋ́дными свѣтлостьмѝ просвѣща́ѧсѧ.
А҆нтѡ́нїе прпⷣбне, а҆́ще и҆ напослѣ́докъ лѣ́тъ ѿ землѝ, ꙗ҆́кѡ сл҃нце, возсїѧ́лъ є҆сѝ, но дре́внихъ ѻ҆тє́цъ, пре́жде тебє̀ бы́вшихъ, че́сти и҆ да́ра ѿ бг҃а сподо́билсѧ є҆сѝ: бꙋ́дꙋтъ бо, речѐ гдⷭ҇ь, послѣ́дни пе́рвїи.
Бг҃оро́диченъ:
Возсїѧ̀ и҆зъ тебє̀ мы́сленное сл҃нце, и҆ свѣ̑тлыѧ лꙋчѝ своегѡ̀ бж҃ества̀ всѣ̑мъ прострѐ, бцⷣе влⷣчце: тѣ́мъ тѧ̀ всѝ непреста́нными пѣ̑нїи велича́емъ.
И҆́нъ. І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Въ пꙋсты́нѧхъ, ꙗ҆́кѡ пти́чищь, возгнѣзди́лсѧ є҆сѝ, прпⷣбне, ѿ всѣ́хъ хотѧ̀ є҆ди́номꙋ бг҃ꙋ є҆ди́нствовати: но, ꙗ҆́кѡ на свѣ́щницѣ, ꙗ҆́вѣ бы́ша всѣ̑мъ твоѧ̑ и҆справлє́нїѧ, бг҃ꙋ тѧ̀ прославлѧ́ющꙋ.
Но́щь тебѣ̀, ꙗ҆́кѡ де́нь, бл҃же́нне, вмѣнѧ́шесѧ, и҆ де́нь, ꙗ҆́кѡ но́щь. не да́лъ є҆сѝ поко́ѧ тѣлесѝ твоемꙋ̀, ни сна̀ ѻ҆чесє́мъ, ни вѣ́ждѡмъ дрема́нїѧ, до́ндеже дости́глъ є҆сѝ поко́ѧ нбⷭ҇нагѡ.
Со́нъ и҆ сѣ́нь житїѐ сїѐ, прпⷣбне вмѣни́лъ є҆сѝ, тѣ́мъ, и҆ на ничто́же ѡ҆браща́лсѧ є҆сѝ сꙋ́щихъ въ не́мъ: но всѐ твоѐ помышле́нїе и҆ дꙋ́шꙋ къ бꙋ́дꙋщымъ просте́рлъ є҆сѝ, и҆дѣ́же съ преподо́бными всѣ́ми ны́нѣ весели́шисѧ.
Бг҃оро́диченъ:
Расто́ргни мои́хъ прегрѣше́нїй рꙋкописа́нїе, ѡ҆держа́щихъ мѧ̀ печа́лей и҆ страсте́й разрѣше́нїе да́рꙋющи, и҆ соблюда́ющи вы́нꙋ неврежде́на, влⷣчце.
Конда́къ, гла́съ и҃. Подо́бенъ: Взбра́нной:
Ѿ ю҆́ности, прпⷣбне, пло́ть твою̀ въ постѣ́хъ и҆ моли́твахъ и҆стончи́лъ є҆сѝ, и҆ крⷭ҇тъ тво́й взе́мъ, хрⷭ҇тꙋ̀ послѣ́довалъ є҆сѝ. тѣ́мже и҆ къ вы̑шнимъ тече́нїе ра́достнѡ соверши́лъ є҆сѝ, и҆дѣ́же со всѣ́ми ст҃ы́ми ст҃ѣ́й трⷪ҇цѣ предстои́ши: и҆ ны́нѣ ста́до твоѐ посѣща́ѧ, помина́й чтꙋ́щихъ прест҃ꙋ́ю па́мѧть твою̀, да всѝ благода́рнѣ вопїе́мъ тѝ: ра́дꙋйсѧ, бг҃омꙋ́дре а҆нтѡ́нїе, наста́вниче пꙋсты́нный.
І҆́косъ:
Є҆ѵⷢ҇льскагѡ гла́са ревни́тель блаже́нне, ѡ҆брѣ́лсѧ є҆сѝ, всѧ̑ бо земна̑ѧ вмѣни́въ ᲂу҆ме́ты, хрⷭ҇то́въ вослѣ́дователь въ жи́зни се́й и҆зѧ́щенъ бы́лъ є҆сѝ, ѿ негѡ́же и҆ ра́зꙋмомъ ѡ҆богати́всѧ дарова́нїй бжⷭ҇твенныхъ, вразꙋми́ ны вѣща́ти тебѣ̀ сицева̑ѧ: ра́дꙋйсѧ, бг҃оно́се, нбⷭ҇ный чл҃вѣ́че, земны́й а҆́гг҃ле: ра́дꙋйсѧ, чи́стый до́ме прест҃а́гѡ дх҃а: ра́дꙋйсѧ, ꙗ҆́кѡ въ жи́зни се́й слꙋжи́тель прест҃ы́ѧ трⷪ҇цы бы́лъ є҆сѝ: ра́дꙋйсѧ, ꙗ҆́кѡ моли́твами твои́ми ѻ҆би́тель твою̀ и҆зба́вилъ є҆сѝ невре́днꙋ ѿ ѻ҆́гненнагѡ возгорѣ́нїѧ: ра́дꙋйсѧ, ꙗ҆́кѡ пꙋсты́ню слеза́ми напои́въ, многопло́днꙋ сотвори́лъ є҆сѝ: ра́дꙋйсѧ, ꙗ҆́кѡ всено́щными бжⷭ҇твенными пѣснопѣ̑нїи сїю̀ просвѣти́лъ є҆сѝ: ра́дꙋйсѧ, ꙗ҆́кѡ въ не́й сѣ́мѧ бжⷭ҇твенное многотрꙋ́днѡ всѣ́ѧлъ є҆сѝ, є҆гѡ́же ᲂу҆плодѝ бг҃ъ во мно́го: ра́дꙋйсѧ, ꙗ҆́кѡ въ то́й ᲂу҆чени̑къ стада̀ собра́въ, стра́хꙋ бж҃їю наказа́лъ є҆сѝ: ра́дꙋйсѧ, ꙗ҆́кѡ моли́твами твои́ми нечи́стїи дꙋ́си ѿ чл҃вѣ̑къ ѿгони́ми быва́ютъ: ра́дꙋйсѧ, ꙗ҆́кѡ непреста́ннѡ мо́лишисѧ прест҃ѣ́й трⷪ҇цѣ ѡ҆ соверша́ющихъ благоче́стнѡ па́мѧть твою̀, є҆́же соблюсти́сѧ ѿ вра̑гъ ненавѣ̑тнымъ, да зове́мъ тѝ: ра́дꙋйсѧ, бг҃омꙋ́дре а҆нтѡ́нїе, пꙋсты́нный наста́вниче.
Пѣ́снь з҃. І҆рмо́съ:
Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть. хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дꙋхо́внꙋю, сы́й бл҃гослове́нъ и҆ препросла́вленъ.
Смире́нъ нра́въ и҆ ѻ҆бы́чай кро́токъ и҆мѣ́въ, блаже́нне, кро́ткомꙋ па́стырю хрⷭ҇тꙋ̀, ꙗ҆́кѡ ѻ҆вча̀ неѕло́биво, ᲂу҆се́рднѡ послѣ́довалъ є҆сѝ. є҆мꙋ́же непреста́ннѡ пое́ши со и҆збра́нными всѣ́ми: ѻ҆ц҃ъ на́шихъ бж҃е, бл҃гослове́нъ є҆сѝ.
Жела́ѧ наслади́тисѧ нбⷭ҇нагѡ хлѣ́ба, хрⷭ҇та̀, є҆го́же ꙗ҆ды́й никогда́же ᲂу҆́мретъ, а҆́лчбою и҆ жа́ждею томи́лъ є҆сѝ пло́ть твою̀: є҆гѡ́же ны́нѣ, ѻ҆́ч҃е а҆нтѡ́нїе, насыща́ѧсѧ, и҆ на́мъ прича́стникѡмъ бы́ти ѻ҆́нагѡ моли́сѧ.
Свѣти́ло мі́ра въ послѣ́днемъ ро́дѣ се́мъ гдⷭ҇ь сотворѝ тѧ̀, ѻ҆́ч҃е, чꙋ́вствєннымъ ѻ҆чесє́мъ и҆ дꙋшє́внымъ тобо́ю да́рꙋетъ прозрѣ́нїе. того̀ молѝ просвѣти́ти ны̀ свѣ́томъ за́повѣдей бжⷭ҇твенныхъ, пою́щыѧ: ѻ҆ц҃ъ на́шихъ бж҃е, бл҃гослове́нъ є҆сѝ.
Бг҃оро́диченъ:
Ѡ҆бветша́вшыѧ ны̀ го́рькимъ дре́вле дре́ва вкꙋше́нїемъ, и҆ па́дшыѧ престꙋпле́нїемъ, пречи́стаѧ, ѡ҆бнови́ла є҆сѝ, зижди́телѧ, ро́ждши, сло́во ѵ҆поста́сное, дв҃о мт҃и, влⷣчце.
И҆́нъ. І҆рмо́съ:
Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.
Ꙗ҆́кѡ высо́къ ᲂу҆́мъ, прпⷣбне, ѿ земны́хъ всѣ́хъ къ бг҃ꙋ и҆мѣ́ѧ, высо́къ въ добродѣ́телехъ ѡ҆брѣ́лсѧ є҆сѝ, и҆ къ вы̑шнимъ тече́нїе твоѐ и҆спра́вивъ, сла́виши съ ни́ми непреста́нными гла́сы прест҃ꙋ́ю трⷪ҇цꙋ: ѻ҆ц҃ъ на́шихъ бж҃е, благослове́нъ є҆сѝ.
Ни́щыѧ ми́лꙋѧ, а҆́лчꙋщыѧ пита́лъ є҆сѝ, жа́ждꙋщыѧ напаѧ́лъ є҆сѝ. тѣ́мъ прїѧ̀ тебѐ въ вѣ̑чныѧ кро́вы, тебє̀ ра́ди въ ни́щихъ бы́вый. є҆мꙋ́же пое́ши: ѻ҆ц҃ъ на́шихъ бж҃е, бл҃гослове́нъ є҆сѝ.
Не ᲂу҆страшѝ тебє̀, блаже́нне, долгота̀ лѣ́тнѧѧ, ни пꙋсты́нное ѡ҆ѕлобле́нїе, ни въ потре́бныхъ скꙋ́дость, ни разбѡ́йникъ наше́ствїе: но є҆ди́но предъ ѻ҆чи́ма и҆мѣ́ѧ, є҆́же хрⷭ҇та̀ ра́ди сме́рть прїѧ́ти въ пꙋсты́ни се́й, да хрⷭ҇тꙋ̀ жи́ти бꙋ́деши.
Бг҃оро́диченъ:
Оу҆краси́ласѧ є҆сѝ дѣ́вства добро́тами, и҆ є҆́ѵы покры́ла є҆сѝ стꙋ́дъ ѕлоѻбра́зный, хрⷭ҇та̀ ро́ждшаѧ, ѡ҆дѣѧ́нїе безсме́ртїѧ да́рꙋющаго тебѐ чтꙋ́щымъ.
Пѣ́снь и҃. І҆рмо́съ:
Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Свѣтоно́снаѧ бл҃года́ть и҆ и҆сцѣле́нїй дарова̑нїѧ да́шасѧ ѿ бг҃а все́й странѣ̀ на́шей, прпⷣбне, чꙋдотво́рный ѻ҆́бразъ є҆диносꙋ́щныѧ трⷪ҇цы и҆ твоѧ̑ мо́щи ст҃ы̑ѧ. є҆мꙋ́же покланѧ́ющесѧ, тѧ̀ почита́емъ.
Ꙗ҆́кѡ шипо́къ сладкоꙋха́нный, ѻ҆́ч҃е а҆нтѡ́нїе, гро́бъ тво́й мі́рꙋ ѡ҆брѣ́тесѧ. къ немꙋ́же всѝ приходѧ́щїи дх҃о́вное благово́нїе въ сердца́хъ свои́хъ ѿ негѡ̀ ѡ҆б̾е́млютъ благопотре́бное ѕѣлѡ̀.
Всѣ̑мъ всѧ́къ, бл҃же́нне, благоче́стнѣ предложи́лъ є҆сѝ себѐ: ѻ҆́вѣмъ ᲂу҆́бѡ и҆збавле́нїе подаѧ̀ ѿ всѧ́кихъ ѕлы́хъ ѡ҆бстоѧ́нїй, ѻ҆́вѣмъ же ѿ недꙋ̑гъ здра́вїе неѡскꙋ́дное, ѻ҆́вѣмъ же спасе́нїе предлага́ѧ, хотѧ́щымъ мона́шеское пребыва́нїе.
Бг҃оро́диченъ:
Оу҆мертвѝ, бцⷣе, многоко́зненнаго врага̀, всю̀ тва́рь пре́жде тле́ю ᲂу҆мертви́вшаго: ны́нѣ же тобо́ю ме́ртвїи на жи́знь взыдо́хомъ: родила́ бо є҆сѝ вои́стиннꙋ жи́знь бг҃а всѣ́хъ.
И҆́нъ. І҆рмо́съ:
Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.
А҆́ще и҆ за́йде подъ зе́млю тѣ́ло твоѐ, но, ꙗ҆́кѡ со́лнце, дне́сь возсїѧ̀, всѧ̑ ѡ҆свѣща́ющее, хва́лѧщыѧ хрⷭ҇та̀ во вѣ́ки.
Многосвѣ́тлое житїѧ̀ твоегѡ̀, бг҃облаже́нне а҆нтѡ́нїе, просвѣща́етъ дꙋшє́вныѧ ѻ҆́чи, и҆ и҆справлѧ́етъ стопы̑ къ добродѣ́тели хва́лѧщихъ хрⷭ҇та̀ во вѣ́ки.
По сме́рти ꙗ҆вле́нїемъ твои́мъ ꙗ҆́кѡ прокаже́ннаго ѡ҆чи́стилъ є҆сѝ, та́кѡ, блаже́нне, и҆ менѐ, ᲂу҆ѧ́звленна грѣхо́мъ, моли́твъ твои́хъ ѵ҆ссѡ́помъ ѡ҆чи́сти, пою́ща хрⷭ҇та̀ во вѣ́ки.
Бг҃оро́диченъ:
На тѧ̀ наде́ждꙋ возложи́хъ, мт҃и приснодв҃о, спасе́нїѧ моегѡ̀, и҆ тѧ̀ предста́тельницꙋ и҆мѣ́ю жи́зни моеѧ̀, поѧ̀ хрⷭ҇та̀ во вѣ́ки.
Пѣ́снь ѳ҃. І҆рмо́съ:
Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.
Тѣ́снымъ и҆ приско́рбнымъ на землѝ ше́ствовавъ пꙋте́мъ, простра́нства нбⷭ҇нагѡ ра́достнѣ дости́глъ є҆сѝ: и҆дѣ́же зри́ши ꙗ҆́снѣ прест҃ꙋ́ю трⷪ҇цꙋ со а҆́гг҃льскими ли̑ки.
Ꙗ҆́кѡ зла́то, и҆скꙋше́но въ горни́лѣ терпѣ́нїѧ, ꙗ҆ви́лсѧ є҆сѝ, блаже́нне, безъ всѧ́кагѡ ѕло́бы примѣ́са: и҆ тогѡ̀ ра́ди высотꙋ̀ дости́гъ добродѣ́телей, воспрїѧ́лъ є҆сѝ прест҃а́гѡ дх҃а ѡ҆заре́нїе.
Честна̀ вои́стиннꙋ сме́рть твоѧ̀, прпⷣбне: а҆́ще бо и҆ преста́вилсѧ є҆сѝ ѿ на́съ, но дꙋ́хомъ неѿстꙋ́пнѡ съ на́ми пребыва́еши, вѣ́рнѡ почита́ющими тѧ̀.
Бг҃оро́диченъ:
Всѧ̑ сотво́ршаго матеролѣ́пнѡ въ твои́хъ нѣ́дрѣхъ носи́вши, марі́е дв҃о, ѿ рꙋки́ мѧ и҆зба́ви борца̀, ꙗ҆́кѡ, да спаса́емь тобо́ю, твоѧ̑ хвалю̀ вели̑чїѧ.
И҆́нъ. І҆рмо́съ:
Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.
Є҆ди́нагѡ лѣ́та ко ѻ҆сми́десѧтимъ въ тече́нїи твое́мъ не досконча́въ, блаже́нне, вы́шнее црⷭ҇твїе воспрїѧ́лъ є҆сѝ, со хрⷭ҇то́мъ црⷭ҇твꙋѧ во вѣ́ки.
Ѡ҆ста́вивъ земнꙋ́ю сла́вꙋ, къ нбⷭ҇нѣй взѧ́лсѧ є҆сѝ любо́вїю, и҆ ꙗ҆́кѡ а҆́гг҃лъ, въ жи́зни се́й бг҃ꙋ послꙋжи́въ, къ премі̑рнымъ дꙋховѡ́мъ преста́вилсѧ є҆сѝ, бжⷭ҇твеннымъ та́мѡ свѣ́томъ просвѣща́ѧсѧ.
Рꙋ́ки, а҆нтѡ́нїе свѧ́те, къ прест҃ѣ́й трⷪ҇цѣ на мольбꙋ̀ прострѝ, ми́лостивное просѧ̀, и҆̀же съ любо́вїю пѣ́нїе тѝ сїѐ прине́сшымъ: и҆ и҆зба́ви всѣ́хъ напа́стей и҆ бѣ́дъ вѣ́рою соверша́ющихъ па́мѧть твою̀ ст҃ꙋ́ю.
Бг҃оро́диченъ:
Пѣ́нїе съ пѣ́снїю и҆ хвале́нїе, и҆сплете́нное ѿ болѣ́зненны дꙋшѝ, принесо́хъ со стра́хомъ тебѣ̀, ро́ждшей хрⷭ҇та̀, є҆стество́мъ сꙋ́ща бг҃а: є҆го́же молѧ́щи, бцⷣе, благопрїѧ̑тна сотворѝ молє́нїѧ на̑ша, и҆ моли́твами твои́ми соблюдѝ лю́ди твоѧ̑.
Свѣти́ленъ.
Твоѐ ᲂу҆спе́нїе въ пѣ́снехъ пра́зднꙋющихъ посѣща́й моли́твами твои́ми, ѡ҆ставле́нїе просѧ̀ грѣхо́вныхъ собла̑знъ и҆ и҆зба́вити всѣ́хъ ѿ разли́чныхъ напа́стей: да вси́ тѧ прославлѧ́емъ, бл҃же́нне а҆нтѡ́нїе.
Два́жды.
Сла́ва, и҆ ны́нѣ, бг҃оро́диченъ:
Съ бг҃омъ ᲂу҆пова́нїе на тѧ̀, пречⷭ҇таѧ, возложи́хомъ, и҆зъ тебє̀ проше́дшемꙋ распѧ́томꙋ хрⷭ҇тꙋ̀, твои́ми къ немꙋ̀ мольба́ми неврє́дны да́же до конца̀ сохрани́ ны.
На хвали́техъ стїхи̑ры на д҃, гла́съ и҃. Поⷣ: Ѽ пресла́внагѡ чꙋдесѐ!
Прпⷣбне ѻ҆́ч҃е а҆нтѡ́нїе, ꙳ ты̀ ѿ ю҆́ности хрⷭ҇тꙋ̀ послѣ́довати возлюби́въ, ꙳ всѧ̑, ꙗ҆̀же на землѝ, мꙋдрова̑нїѧ ѿри́нꙋвъ, ꙳ по́стническими трꙋды̑ бг҃ꙋ ᲂу҆годи́лъ є҆сѝ, ꙳ сла́бое по́мысла повинꙋ́ѧ дꙋ́хꙋ. ꙳ и҆ ны́нѣ на нб҃сѣ́хъ со ст҃ы́ми всѣ́ми трⷪ҇цѣ предстои́ши, ꙳ бжⷭ҇твєнныѧ да́ры ѿ неѧ̀ прїе́млѧ: ꙳ ю҆́же молѝ, бл҃же́нне, ꙳ ѡ҆ и҆̀же вѣ́рою пресвѧтꙋ́ю твою̀ па́мѧть почита́ющихъ.
Два́жды.
Прпⷣбне ѻ҆́ч҃е а҆нтѡ́нїе, ꙳ ты̀ стрꙋѧ́ми сле́зъ твои́хъ пꙋсты́ню безпло́днꙋю напои́лъ є҆сѝ, ꙳ и҆ въ не́й плоды̀ преподо́бїѧ и҆ пра́вды и҆зрасти́лъ є҆сѝ: ꙳ и҆ сегѡ̀ ра́ди всыновле́нїѧ да́ръ прїѧ́ти ѿ бг҃а сподо́билсѧ є҆сѝ, ꙳ ст҃ы́мъ дх҃омъ просвѣща́емь, ꙳ сокрове́нныхъ та̑инъ ꙗ҆́снѡ зри́тель ѡ҆брѣ́лсѧ є҆сѝ, сбытїѧ̀ послѣ́днихъ време́нъ ꙳ сказа́тель нело́женъ бы́въ. ꙳ тѣ́мже моли́сѧ, спастѝ дꙋ́шы на́шѧ.
Прпⷣбне ѻ҆́ч҃е, блаже́нне а҆нтѡ́нїе, ꙳ и҆́го хрⷭ҇то́во на ра́мо твоѐ взе́мъ, ꙳ добродѣ́тели ве́рхъ ᲂу҆се́рднѡ дости́глъ є҆сѝ, ꙳ на не́мже ᲂу҆твержде́на любо́вїю гдⷭ҇а ᲂу҆зрѣ́лъ є҆сѝ, ꙳ восхо́дъ тебѣ̀ къ нбⷭ҇нымъ ѻ҆би́телемъ и҆справлѧ́юща. ꙳ є҆мꙋ́же предстои́ши съ преподо́бными всѣ́ми, ꙳ молѧ́сѧ спастѝ благоче́стнѣ вѣ́рꙋющыѧ въ прест҃ꙋ́ю трⷪ҇цꙋ, ꙳ и҆ любоче́стнѣ почита́ющыѧ ꙳ честны̑ѧ мо́щи твоѧ̑ трꙋдолюбє́зныѧ.
Сла́ва, гла́съ ѕ҃:
Ра́дꙋйсѧ, пꙋсты́не ст҃а́ѧ и҆ бг҃олюбе́знаѧ, и҆зрасти́вшаѧ ѻ҆ц҃а̀ сего̀ досточꙋ́днаго, и҆ воспита́вшаѧ самора́сленными свои́ми бы̑лїи, є҆гѡ́же житїе́мъ ѡ҆свѧти́вши ложесна̀ своѧ̑, небꙋ́рное приста́нище всѣ̑мъ вѣ̑рнымъ ѡ҆брѣ́тесѧ: то́й бо просла́ви бг҃а добродѣ́тельнымъ житїе́мъ свои́мъ, въ жи́зни се́й вѣ́рнѡ послꙋжи́въ є҆мꙋ̀. сегѡ̀ ра́ди и҆ бг҃ъ просла́ви тогѡ̀ чꙋдесы̀ свои́ми бг҃одарова́нными, ѻ҆би̑льна и҆сцѣлє́нїѧ подава́етъ приходѧ́щымъ съ вѣ́рою къ цѣльбоно́сномꙋ ст҃о́мꙋ є҆гѡ̀ гро́бꙋ. тѣ́мже и҆ мы̀, ѡ҆бстоѧ́ще всечестнꙋ́ю ра́кꙋ є҆гѡ̀, со стра́хомъ покланѧ́ющесѧ, благоче́стнѣ цѣлꙋ́емъ ст҃ы́й ѻ҆́бразъ свѧщеннолѣ́пнагѡ є҆гѡ̀ подо́бїѧ, и҆ любе́знѡ вопїе́мъ къ немꙋ̀: ѽ всебл҃же́нне ѻ҆́ч҃е на́шъ а҆нтѡ́нїе! моли́сѧ неѿстꙋ́пнѡ прест҃ѣ́й трⷪ҇цѣ, во́инствꙋ дарова́ти на врагѝ посо́бїе и҆ крѣ́пкое ѡ҆долѣ́нїе и҆ хрⷭ҇тоимени̑тыѧ лю́ди ѿ ѕѡ́лъ спастѝ всѧ́ческихъ, и҆ дꙋша́мъ на́шымъ и҆спросѝ ми́ръ и҆ ве́лїю ми́лость.
И҆ ны́нѣ: Бцⷣе, ты̀ є҆сѝ лоза̀:
Славосло́вїе вели́кое, и҆ ѿпꙋ́стъ. На лїтꙋргі́и, Бл҃жє́нна, пѣ́снь г҃-ѧ и҆ ѕ҃-ѧ. Прокі́менъ: Честна̀ пред̾ гдⷭ҇емъ сме́рть прпⷣбныхъ є҆гѡ̀. А҆пⷭ҇лъ къ гала́тѡмъ, зача́ло сг҃і. Є҆ѵⷢ҇лїе матѳе́а зача́ло і҃. Прича́стенъ: Въ па́мѧть вѣ́чнꙋю.
Слꙋ́жба прпⷣбнагѡ ѻ҆ц҃а̀ на́шегѡ ні́ла, и҆́же на є҆́зерѣ селиге́рѣ, на ѻ҆́стровѣ зово́момъ столобно́е, но́вагѡ чꙋдотво́рца.
На ма́лѣй вече́рни стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:
Наста̀, бг҃оно́се, сл҃нца свѣтлѣ́йшїй тво́й пра́здникъ, ѡ҆зарѧ́етъ приходѧ́щыѧ къ тебѣ̀ вѣ́рою, и҆ безсме́ртїемъ ѡ҆бл҃гоꙋха́етъ, и҆ дꙋша́мъ и҆сточа́етъ и҆сцѣле́нїе, ні́ле прпⷣбне, мл҃твенниче ѡ҆ дꙋша́хъ на́шихъ.
Два́жды.
Чꙋ́вствєнныѧ стра̑сти тѣлє́сныѧ ᲂу҆кроти́въ воздержа́нїѧ брозда́ми, чꙋдодѣ́йственниче ні́ле, и҆ ре́вность безпло́тныхъ во пло́ти показа́въ, всѧ̑ плѡтска́ѧ жела̑нїѧ дх҃ови повинꙋ́лъ є҆сѝ. тѣ́мъ ны́нѣ въ нбⷭ҇ныхъ селе́нїихъ водворѧ́ѧсѧ, молѝ ѡ҆ дꙋша́хъ на́шихъ.
Бл҃же́нне ні́ле, ѡ҆снова́нїе положи́въ добродѣ́телей, и҆ ве́тхагѡ человѣ́ка совле́ксѧ съ похотьмѝ, во хрⷭ҇та̀ ѡ҆бле́клсѧ є҆сѝ вои́стиннꙋ. тѣ́мъ и҆ побѣди́лъ є҆сѝ, прпⷣбне, мнѡ́гаѧ врагѡ́въ ѡ҆полчє́нїѧ, наста́вникъ мона́хѡмъ бы́въ, молѝ спасти́сѧ дꙋша́мъ на́шымъ.
Сла́ва, гла́съ и҃:
Прпⷣбне и҆ бг҃оно́се ѻ҆́ч҃е на́шъ ні́ле, ты̀ ᲂу҆се́рднѡ въ пꙋсты́ни подвиза́лсѧ є҆сѝ, любвѐ ра́ди гдⷭ҇а своегѡ̀, и҆ воздаѧ́нїѧ ра́ди, є҆́же со всѣ́ми ст҃ы́ми бꙋ́дꙋщихъ є҆гѡ̀ бла̑гъ, и҆ житїе́мъ свои́мъ по́стническимъ, ꙗ҆́кѡ а҆́гг҃лъ на землѝ, человѣ́ки ᲂу҆диви́лъ є҆сѝ: бѣ́сы же и҆ всю̀ си́лꙋ и҆́хъ ᲂу҆страши́лъ є҆сѝ, и҆ востаю́щыѧ на тѧ̀ ѕлотво́рцы, неми́лѡстивыѧ разбо́йники по́мощїю бж҃їею посрами́лъ є҆сѝ. и҆ ны́нѣ, прпⷣбне ᲂу҆го́дниче хрⷭ҇то́въ, ѻ҆́ч҃е на́шъ ні́ле, молѝ ѡ҆ на́съ всеми́лостиваго бг҃а, пода́ти ми́ръ мі́рови, и҆ дꙋша́мъ на́шымъ ве́лїю ми́лость.
И҆ ны́нѣ, бг҃оро́диченъ:
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
До́мъ и҆ селе́нїе ѻ҆ц҃ꙋ̀ безнача́льномꙋ бы́лъ є҆сѝ, прпⷣбне ні́ле, ѻ҆́ч҃е на́шъ, того̀ молѝ пода́ти ми́ръ цр҃кви є҆гѡ̀, и҆ дꙋша́мъ на́шымъ ве́лїю ми́лость.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
До́мъ и҆ ѻ҆би́тель безнача́льнагѡ ѻ҆ц҃а̀ є҆диноро́дномꙋ сн҃ꙋ бы́лъ є҆сѝ, прпⷣбне ні́ле, ѻ҆́ч҃е на́шъ. того̀ молѝ дꙋша́мъ на́шымъ пода́ти ве́лїю ми́лость.
Сті́хъ: Блаже́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
До́мъ и҆ жили́ще дх҃ꙋ прест҃о́мꙋ бы́лъ є҆сѝ, прпⷣбне ні́ле, ѻ҆́ч҃е на́шъ. того̀ молѝ, пода́ти ми́ръ всемꙋ̀ правосла́вїю и҆ дꙋша́мъ на́шымъ ве́лїю ми́лость.
Сла́ва, подо́бенъ то́йже:
До́мъ и҆ пребыва́нїе прест҃ѣ́й и҆ безнача́льнѣй трⷪ҇цѣ бы́лъ є҆сѝ, прпⷣбне ні́ле, ѻ҆́ч҃е на́шъ. ю҆́же молѝ, ми́ръ ѻ҆би́тели твое́й пода́ти, и҆ дꙋша́мъ на́шымъ ве́лїю ми́лость.
И҆ ны́нѣ, бг҃оро́диченъ. Подо́бенъ: то́йже.
До́мъ и҆ хра́мъ прекра́сенъ воздви́женъ во ѻ҆би́тели твое́й, прпⷣбне, въ похвалꙋ̀ и҆ сла́вꙋ прест҃ѣ́й бцⷣѣ мр҃і́и. ю҆́же молѝ, прпⷣбне ѻ҆́ч҃е на́шъ ні́ле, пода́ти дꙋша́мъ на́шымъ ве́лїю ми́лость.
Тропа́рь, гла́съ д҃:
Ꙗ҆́кѡ свѣти́льникъ всесвѣ́телъ, ꙗ҆ви́лсѧ є҆сѝ во ѻ҆́стровѣ селиге́ра є҆́зера, прпⷣбне ѻ҆́ч҃е ні́ле: ты́ бо крⷭ҇тъ хрⷭ҇то́въ ѿ ю҆́ности своеѧ̀ на ра́мо взе́мъ, ᲂу҆се́рднѡ томꙋ̀ послѣ́довалъ є҆сѝ, чистото́ю бг҃ови прибли́живсѧ, ѿѻнꙋ́дꙋже и҆ чꙋде́съ дарова́нїемъ ѡ҆богати́лсѧ є҆сѝ. тѣ́мъ и҆ мы̀, притека́юще къ ра́цѣ моще́й твои́хъ, ᲂу҆ми́льнѡ глаго́лемъ: ѻ҆́ч҃е прпⷣбне, молѝ хрⷭ҇та̀ бг҃а, спасти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́нное:
На вели́цѣй вече́рни пое́мъ, Блаже́нъ мꙋ́жъ: а҃-й а҆нтїфѡ́нъ.
На Гдⷭ҇и, воззва́хъ, стїхи̑ры, на и҃, гла́съ д҃. Поⷣ: Ꙗ҆́кѡ до́блѧ:
Въ пꙋсты́ню дости́глъ є҆сѝ, пребл҃ги́мъ бг҃омъ наставлѧ́емь, прпⷣбне ѻ҆́ч҃е ні́ле, ꙗ҆́кѡ дре́во при вода́хъ насажде́нъ, де́нь и҆ но́щь поꙋча́ѧсѧ въ зако́нѣ гдⷭ҇ни, плоды̀ воздержа́нїѧ прине́слъ є҆сѝ всест҃ѣ́й трⷪ҇цѣ: ю҆́же, прпⷣбне, молѝ вѣ́рою притека́ющымъ къ ра́цѣ моще́й твои́хъ бл҃года́ть и҆сцѣле́нїѧ дарова́ти, и҆ спастѝ и҆ просвѣти́ти дꙋ́шы на́шѧ.
Въ пꙋсты́ню всели́всѧ, пребл҃ги́мъ хрⷭ҇то́мъ бг҃омъ наста́влѧемь, прпⷣбне ѻ҆́ч҃е ні́ле, въ не́йже ꙗ҆́кѡ дре́во при вода́хъ насади́всѧ, и҆ въ зако́нѣ гдⷭ҇ни поꙋчи́всѧ де́нь и҆ но́щь, плоды̀ дх҃ѡ́вныѧ прине́слъ є҆сѝ хрⷭ҇тꙋ̀ бг҃ꙋ. є҆го́же молѝ ѡ҆ притека́ющихъ съ вѣ́рою къ ра́цѣ моще́й твои́хъ, бл҃года́ть и҆сцѣле́нїй дарова́ти, и҆ спастѝ и҆ просвѣти́ти дꙋ́шы на́шѧ.
Въ пꙋсты́ню водвори́лсѧ є҆сѝ бл҃года́тїю хрⷭ҇та̀ бг҃а, преблаже́нне ѻ҆́ч҃е ні́ле, въ не́йже ꙗ҆́кѡ лоза̀ благопло́днаѧ при вода́хъ насажде́нъ є҆сѝ, плоды̀ хрⷭ҇тꙋ̀ бг҃ꙋ приносѧ̀, и҆ къ жи́зни вѣ́чнѣй наставлѧ́ѧ вѣ́рою пра́зднꙋющихъ честнꙋ́ю па́мѧть твою̀: молѝ хрⷭ҇та̀ бг҃а ѿ тлѝ и҆ бѣ́дъ и҆зба́витисѧ на́мъ, и҆ спастѝ и҆ просвѣти́ти дꙋ́шы на́шѧ.
Сла́ва, гла́съ и҃:
Прпⷣбне ѻ҆́ч҃е ні́ле, ты̀ въ зако́нѣ гдⷭ҇ни де́нь и҆ но́щь поꙋчи́всѧ, досто́инъ бы́въ дре́ва живо́тнагѡ вѣ́твь бы́ти, и҆ пло́дъ тво́й страда́ньми и҆ вѣнцы̑ процвѣтѐ, дерзнове́нїе и҆мѣ́ѧ къ подвигополо́жникꙋ хрⷭ҇тꙋ̀ бг҃ꙋ, просѝ и҆ на́мъ ѡ҆чище́нїѧ грѣхѡ́въ и҆ ве́лїѧ ми́лости.
И҆ ны́нѣ, бг҃оро́диченъ: Цр҃ь нбⷭ҇ный:
Вхо́дъ, прокі́менъ днѐ, и҆ чтє́нїѧ г҃ прпⷣбничєскаѧ, пи́саны сегѡ̀ мцⷭ҇а въ є҃ де́нь. На лїті́и стїхи̑ры, гла́съ и҃:
Ра́дꙋйсѧ, свѣти́льниче пресвѣ́тлый, прпⷣбне и҆ бг҃оно́се ѻ҆́ч҃е на́шъ ні́ле: ты̀ на землѝ, ꙗ҆́кѡ безпло́тенъ, пожи́лъ є҆сѝ, посто́мъ и҆ моли́твою бг҃а себѣ̀ ми́лостива сотвори́лъ є҆сѝ, и҆ да́ръ ѿ негѡ̀ прозрѣ́нїѧ и҆ прⷪ҇ро́чества прїѧ́лъ є҆сѝ, и҆ по преставле́нїи чꙋдеса̀ ѿ ст҃ы́хъ моще́й твои́хъ, ꙗ҆́кѡ ѿ и҆сто́чника, преиз̾ѻби́льнѡ и҆сточа́ютсѧ, и҆ съ вѣ́рою приходѧ́щїи, разли́чными недꙋ́ги ѡ҆держи́мїи, и҆сцѣлева́ютсѧ. и҆ ны́нѣ, прпⷣбне ѻ҆́ч҃е на́шъ ні́ле, молѝ ѡ҆ на́съ хрⷭ҇та̀ бг҃а, пода́ти ми́ръ мі́рови и҆ дꙋша́мъ на́шымъ ве́лїю ми́лость.
Ра́дꙋйсѧ, рѡссі́йскїѧ землѝ свѣти́ло незаходи́мое, прпⷣбне ѻ҆́ч҃е на́шъ ні́ле: ты̀ въ пꙋсты́ни трина́десѧть лѣ́тъ, гдⷭ҇а ра́ди своегѡ̀, терпѣли́вѡ подвиза́лсѧ є҆сѝ, и҆ плотскі̑ѧ стра̑сти воздержа́нїемъ свои́мъ ᲂу҆мертви́лъ є҆сѝ, и҆ въ не́й, мно́гѡ пострада́въ ѿ нача́льника ѕло́бы, гꙋби́телѧ врага̀, съ ни́мъ мꙋ́жественнѡ бра́лсѧ є҆сѝ, и҆ по́мощїю бж҃їею, и҆ свое́ю къ бг҃ꙋ те́плою вѣ́рою, всѐ є҆гѡ̀ ѕлоко́знство, ꙗ҆́кѡ паꙋчи́нꙋ, до конца̀ расто́ргнꙋлъ є҆сѝ, и҆ посрами́лъ є҆сѝ всеси́льною по́мощїю пречⷭ҇тыѧ бцⷣы прише́дшыѧ на тѧ̀ ѕлы̑ѧ разбо́йники: и҆ ны́нѣ, прпⷣбне ѻ҆́ч҃е на́шъ ні́ле, не преста́й ѡ҆ на́съ молѧ̀ хрⷭ҇та̀ бг҃а, дарова́ти ми́ръ мі́рꙋ, и҆ дꙋша́мъ на́шымъ ве́лїю ми́лость.
Ра́дꙋйсѧ, прпⷣбне ѻ҆́ч҃е на́шъ ні́ле, ты̀ на ѻ҆́стровъ столобно́е, ꙗ҆́кѡ на ѻ҆́блакъ, ра́дꙋѧсѧ возше́лъ є҆сѝ, и҆ на не́мъ моли́твою и҆ посто́мъ, чистото́ю и҆ бл҃гоговѣ́нїемъ, смире́нїемъ и҆ безѕло́бїемъ, и҆ всѣ́ми добродѣ́тельми, ꙗ҆́кѡ а҆́гг҃лъ, подвиза́лсѧ є҆сѝ во вре́меннѣй се́й жи́зни: два́десѧть бо и҆ се́дмь лѣ́тъ препроводи́лъ є҆сѝ, соверша́ѧ за́пѡвѣди гдⷭ҇ни, и҆ ᲂу҆строѧ́ѧ себѣ̀ на нб҃сѣ́хъ пала̑ты нерꙋкотворє́ны и҆ вѣ̑чны, ѡ҆ ни́хже рече́но бы́сть: и҆́хже ѻ҆́ко не ви́дѣ, и҆ ᲂу҆́хо не слы́ша, и҆ на се́рдце человѣ́кꙋ не взыдо́ша, ꙗ҆̀же ᲂу҆гото́ва бг҃ъ лю́бѧщымъ є҆го̀: а҆́може и҆ пресели́лсѧ є҆сѝ къ вѣ̑чнымъ ѻ҆би́телємъ ѻ҆́нѣмъ, и҆ прїѧ́тъ тѧ̀ гдⷭ҇ь съ првⷣными, и҆́хже житїю̀ послѣ́довалъ є҆сѝ. ра́ка же и҆ ст҃ы̑ѧ мо́щи твоѧ̑, ꙗ҆́кѡ мо́ре, съ вѣ́рою приходѧ́щымъ неѡскꙋ́днѡ и҆сцѣлє́нїѧ и҆злива́ютъ, и҆ мно́зи мнѡ́гїѧ и҆ разли̑чныѧ цѣльбы̑ прїе́млютъ: слѣпі́и прозира́ютъ, глꙋсі́и слы́шатъ, слꙋкі̑ѧ и҆справлѧ́ютсѧ, прокаже́ннїи ѡ҆чища́ютсѧ, нѣмі́и бл҃гоглаго́ливи быва́ютъ, бѣ́си же ѿ человѣ̑къ моли́твами твои́ми ѿбѣга́ютъ. и҆ ны́нѣ, прпⷣбне ѻ҆́ч҃е на́шъ ні́ле, не преста́й молѧ́сѧ хрⷭ҇тꙋ̀ бг҃ꙋ ѡ҆ ста́дѣ и҆ ѡ҆ ѻ҆би́тели свое́й, и҆ дꙋша́мъ на́шымъ пода́ти ми́ръ и҆ ве́лїю ми́лость.
Сла́ва, гла́съ и҃:
Что́ ти принесе́мъ, прпⷣбне, ꙗ҆́кѡ неѡскꙋ́днѡ и҆злива́еши тре́бꙋющымъ благода́ть; и҆́бо тѣ́ло твоѐ, ѻ҆́ч҃е, чистоты̀ жили́ще показа́сѧ. тѣ́мъ и҆, посѣще́нїемъ ст҃а́гѡ дх҃а ѡ҆зари́вшесѧ, нетлѣ́нно въ на́ше благослове́нїе соблюда́етсѧ, бл҃года́тныхъ лꙋ̑чь сїѧ́нїй и҆спо́лнено, и҆́хже бѣ́сове не терпѧ́тъ зрѣ́ти, дале́че ѿбѣга́ютъ, да́нныѧ тѝ бл҃года́ти трепе́щꙋтъ: и҆̀хже ѿ дꙋ́шъ на́шихъ и҆ тѣле́съ ѿженѝ, мо́лимсѧ, и҆ ненавѣ́тны на́съ при́снѡ соблюдѝ ѿ тѣ́хъ ла́ѧнїѧ твои́ми моли́твами.
И҆ ны́нѣ, бг҃оро́диченъ: Ра́дꙋйсѧ, вселе́нныѧ похвало̀:
На стїхо́внѣ стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ!
Прпⷣбне и҆ бг҃оно́се, ѻ҆́ч҃е на́шъ ні́ле, ты̀ ѿ ю҆́ности ѿве́рглсѧ є҆сѝ мі́ра и҆ срѡ́дникъ свои́хъ, и҆ прїѧ́лъ є҆сѝ ѻ҆́бразъ а҆́гг҃льскїй и҆́ноческагѡ житїѧ̀ во ѻ҆би́тели ст҃а́гѡ а҆пⷭ҇ла и҆ є҆ѵⷢ҇лі́ста і҆ѡа́нна бг҃осло́ва, и҆ прпⷣбнагѡ ѻ҆ц҃а̀ на́шегѡ са́ввы, и҆́же въ кри́пцахъ, и҆ въ не́й подвиза́всѧ смире́нїемъ и҆ послꙋша́нїемъ, ꙗ҆́кѡ до́брый во́инъ хрⷭ҇то́въ: того̀ ѡ҆ на́съ молѝ, прпⷣбне, со ст҃ы́ми си́ми, пода́ти грѣхѡ́въ ѡ҆ставле́нїе и҆ дꙋша́мъ на́шымъ ве́лїю ми́лость.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
Прпⷣбне и҆ равноа́гг҃льне ѻ҆́ч҃е на́шъ ні́ле, ты̀ ѿ ю҆́ности хрⷭ҇та̀ возлюби́въ, и҆ ле́гкое и҆́го є҆гѡ̀ на сѧ̀ воспрїѧ́лъ є҆сѝ, и҆ невозвра́тнымъ по́мысломъ послѣ́довалъ є҆сѝ стопа́мъ влⷣки своегѡ̀, и҆ прїѧ́лъ є҆сѝ ѿ негѡ̀ трꙋдѡ́мъ свои̑мъ воздаѧ̑нїѧ, є҆́же съ ни́мъ пребыва́нїе, и҆ со а҆́гг҃лы ликова́нїе, и҆ со всѣ́ми ст҃ы́ми ра́дованїе: того̀ молѝ ѡ҆ на́съ, прпⷣбне, пода́ти грѣхѡ́въ проще́нїе, и҆ дꙋша́мъ на́шымъ ве́лїю ми́лость.
Сті́хъ: Блаже́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Прпⷣбне и҆ бг҃омꙋ́дре ѻ҆́ч҃е на́шъ ні́ле, ты̀ хрⷭ҇та̀ ра́ди ѿ ю҆́ности въ пꙋсты́ню всели́лсѧ є҆сѝ, и҆ въ не́й, ꙗ҆́кѡ безпло́тенъ, на стра̑сти плотскі̑ѧ подвиза́лсѧ є҆сѝ посто́мъ и҆ моли́твою, и҆ ст҃ы́мъ смире́нїемъ, и҆ нача́льника ѕло́бы врага̀ съ кова̑рствы є҆гѡ̀ до конца̀ низложи́лъ є҆сѝ, и҆ ны́нѣ, прпⷣбне, предстоѧ̀ ᲂу҆ прⷭ҇то́ла всѣ́хъ цр҃ѧ̀, моли́сѧ ѡ҆ почита́ющихъ свѧще́ннꙋю и҆ многора́достнꙋю па́мѧть твою̀, пода́ти грѣхѡ́въ ѡ҆ставле́нїе и҆ дꙋша́мъ на́шымъ ве́лїю ми́лость.
Сла́ва, гла́съ то́йже:
Мона́хѡвъ мно́жества наста́вника тѧ̀ почита́емъ, ѻ҆́ч҃е на́шъ ні́ле: твое́ю бо стезе́ю вои́стиннꙋ пра́вѡ ходи́ти позна́хомъ. блаже́нъ є҆сѝ, хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, прпⷣбныхъ соприча́стниче и҆ пра́ведныхъ: съ ни́миже моли́сѧ гдⷭ҇ꙋ, поми́ловатисѧ дꙋша́мъ на́шымъ.
И҆ ны́нѣ, бг҃оро́диченъ: Безневѣ́стнаѧ дв҃о:
На благослове́нїи хлѣ́бѡвъ, тропа́рь ст҃а́гѡ, два́жды.
Пи́санъ на ма́лѣй вече́рни, и҆ Бцⷣе дв҃о: є҆ди́ножды.
На ᲂу҆́трени, на Бг҃ъ гдⷭ҇ь, тропа́рь прпⷣбномꙋ, два́жды. Сла́ва, и҆ ны́нѣ, бг҃оро́диченъ:
По а҃-мъ стїхосло́вїи, сѣда́ленъ, гла́съ д҃. Поⷣ: Ско́рѡ предварѝ:
Зва́нїю гдⷭ҇а своегѡ̀ послѣ́довалъ є҆сѝ, мі́ръ ѡ҆ста́вивъ, и҆ всѧ̑, ꙗ҆̀же въ мі́рѣ, красова̑нїѧ, преблаже́нне ні́ле, претерпѣ́лъ є҆сѝ ᲂу҆се́рднѡ пꙋсты́нное ѡ҆ѕлобле́нїе, полки́ же бѣсѡ́вскїѧ побѣди́лъ є҆сѝ мꙋ́жески: тѣ́мже па́мѧть твою̀ при́снѡ восхвалѧ́емъ пѣ́сньми вѣ́рнѡ.
Два́жды.
Сла́ва, и҆ ны́нѣ, бг҃оро́диченъ:
Ѡ҆бнови́ла є҆сѝ, чⷭ҇таѧ, бжⷭ҇твеннымъ ржⷭ҇тво́мъ твои́мъ и҆стлѣ́вшее страстьмѝ земноро́дныхъ сꙋщество̀, и҆ возста́вила є҆сѝ ѿ сме́рти къ жи́зни нетлѣ́нїѧ. тѣ́мже тѧ̀ по до́лгꙋ блажи́мъ всѝ, дв҃о препросла́вленнаѧ, ꙗ҆́коже прорекла̀ є҆сѝ.
По в҃-мъ стїхосло́вїи, сѣда́ленъ, гла́съ є҃. Поⷣ: Собезнача́льное сло́во:
По́стника гдⷭ҇нѧ пѣ́сньми почти́мъ, ꙗ҆́кѡ ᲂу҆мертви́вша всѧ̑ прило́ги страсте́й воздержа́нїемъ тве́рдымъ и҆ крѣ́пкимъ терпѣ́нїемъ вои́стиннꙋ, и҆ посрами́вша ѕѣлѡ̀ сопроти́внагѡ всю̀ горды́ню, и҆ ны́нѣ молѧ́щасѧ гдⷭ҇еви поми́ловатисѧ дꙋша́мъ на́шымъ.
Два́жды.
Сла́ва, и҆ ны́нѣ, бг҃оро́диченъ:
Стра́шно чꙋ́до зача́тїѧ, и҆ несказа́ненъ ѻ҆́бразъ ржⷭ҇тва̀ въ тебѣ̀ позна́сѧ, чⷭ҇таѧ приснодв҃о, ᲂу҆жаса́етъ мѝ ᲂу҆́мъ, и҆ ᲂу҆дивлѧ́етъ помышлє́нїѧ: сла́ва твоѧ̀, бцⷣе, всѣ̑мъ простре́сѧ на спасе́нїе дꙋ́шъ на́шихъ.
По полѷеле́и сѣда́ленъ, гла́съ а҃. Подо́бенъ: Гро́бъ тво́й, сп҃се:
Погре́блъ є҆сѝ страсте́й всѐ воста́нїе ᲂу҆мерщвле́нїемъ пло́ти, свѧще́нный ѻ҆́ч҃е, жи́знь безконе́чнꙋю по сме́рти прїѧ́лъ є҆сѝ: тѣ́мже дне́сь хрⷭ҇то́ва цр҃ковь пра́зднꙋетъ твою̀ досточꙋ́днꙋю па́мѧть, прпⷣбнымъ ᲂу҆краше́нїе.
Два́жды.
Сла́ва, и҆ ны́нѣ, бг҃оро́диченъ:
Наста́ви на́съ на пꙋ́ть покаѧ́нїѧ, ᲂу҆клонѧ́ющихсѧ при́снѡ къ безпꙋ́тїѧмъ ѕѡ́лъ, и҆ преблага́го бг҃а прогнѣ́вающихъ, неискꙋсобра́чнаѧ бл҃гослове́ннаѧ мр҃і́е, прибѣ́жище ѿча́ѧнныхъ человѣ́кѡвъ, бж҃їе селе́нїе.
Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃. Честна̀ предъ гдⷭ҇емъ: Сті́хъ: Что̀ возда́мъ гдⷭ҇еви ѡ҆ всѣ́хъ: Всѧ́кое дыха́нїе. Є҆ѵⷢ҇лїе ѿ матѳе́а, зача́ло м҃г.
По н҃-мъ ѱалмѣ̀, стїхи́ра, гла́съ и҃:
Прпⷣбне ѻ҆́ч҃е ні́ле, мі́ра красоты̑ и҆ пи̑щи сла́дѡстныѧ возненави́дѣвъ, и҆́ноческое житїѐ па́че возлюби́лъ є҆сѝ, и҆ а҆́гг҃лѡмъ собесѣ́дникъ бы́въ, свѣти́льникъ многосвѣ́тлый ꙗ҆ви́лсѧ є҆сѝ чꙋдесмѝ, ꙗ҆́кѡ со́лнце сїѧ́ѧ. тѣ́мъ всѣ́хъ на́съ помина́й, соверша́ющихъ свѧще́ннꙋю па́мѧть твою̀: мы́ бо ча̑да твоѧ̑ и҆ ѻ҆́вцы слове́сныхъ тѝ ᲂу҆че́нїй, и҆ тѧ̀ на по́мощь призыва́емъ, просѧ́ще тобо́ю прїѧ́ти ми́ръ и҆ ве́лїю ми́лость.
Канѡ́нъ бцⷣы, со і҆рмосо́мъ, на ѕ҃, и҆ ст҃о́мꙋ є҆ди́нъ канѡ́нъ, на и҃.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ? и҆ воспою̀ ра́дꙋѧсѧ тоѧ̀ чꙋдеса̀.
Смири́лсѧ є҆сѝ хрⷭ҇та̀ ра́ди, ѻ҆́ч҃е ні́ле, и҆ крⷭ҇тъ взе́мъ, ѻ҆те́чества и҆ срѡ́дникъ бѣ́глъ є҆сѝ: ѿню́дꙋже въ пꙋсты́ню вше́дъ, и҆ въ не́й трꙋдолю́бнѡ подвиза́лсѧ є҆сѝ, прпⷣбне.
Ѿ ю҆́ности своеѧ̀, ѻ҆́ч҃е ні́ле, ᲂу҆́мъ къ бг҃ꙋ впери́въ, и҆ тлѣ́нными нетлѣ̑ннаѧ, ꙗ҆́кѡ до́брый кꙋпе́цъ, и҆скꙋпи́лъ є҆сѝ: тѣ́мже, ны́нѣ соше́дшесѧ, па́мѧть твою̀ почита́емъ.
Хрⷭ҇то́вымъ раче́нїемъ, ѻ҆́ч҃е ні́ле, па́че ѻ҆гнѧ̀ распала́емь, настоѧ̑щаѧ, ꙗ҆́кѡ ничто́же сꙋ́щи, презрѣ́лъ є҆сѝ: и҆ тогѡ̀ ра́ди въ поко́ище всели́сѧ, и҆дѣ́же пра́ведныхъ дꙋ́шы веселѧ́тсѧ.
Бг҃оро́диченъ:
Болѧ́ща и҆сцѣлѝ дꙋше́ю же и҆ тѣ́ломъ, влⷣчце, раба̀ твоего̀, бл҃же́ннагѡ ні́ла моле́нїемъ: тебе́ бо предста́тельницꙋ всѝ сꙋ́щїи въ печа́лѣхъ стѧжа́хомъ, ꙗ҆́кѡ ро́ждшꙋю спасе́нїе на́ше.
Катава́сїа: Хрⷭ҇то́съ ражда́етсѧ:
Пѣ́снь г҃. І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ, вѣнцє́въ сла́вы сподо́би.
Сна̀ твои̑мъ ѻ҆чесє́мъ не да́лъ є҆сѝ, бл҃же́нне ні́ле, ни вѣ́ждѡмъ дрема́нїѧ, до́ндеже сподо́билсѧ є҆сѝ пра́ведныхъ селе́нїѧ, ꙗ҆̀же ᲂу҆гото́ва бг҃ъ лю́бѧщымъ є҆го̀.
Бо́дренными твои́ми моли́твами, ѻ҆́ч҃е ні́ле, и҆ жесто́кимъ воздержа́нїемъ бг҃ꙋ на землѝ до́брѣ ᲂу҆годи́лъ є҆сѝ: и҆ сегѡ̀ ра́ди бы́въ стра́шенъ врагѡ́мъ и҆ сла́венъ человѣ́кѡмъ.
Ра́йскꙋю жи́знь, и҆ та́мѡ ст҃ы̑мъ весе́лїе, всегда̀ во ᲂу҆мѣ̀ свое́мъ помышлѧ́ѧ, прпⷣбне, тѣ́мже во слеза́хъ и҆ въ воздыха́нїи всю̀ жи́знь свою̀, ѻ҆́ч҃е ні́ле, проше́лъ є҆сѝ: и҆ сегѡ̀ ра́ди по сме́рти ѿ хрⷭ҇та̀ чꙋдесы̀ просла́висѧ.
Бг҃оро́диченъ:
И҆сточа́еши и҆сцѣле́нїемъ стрꙋи̑ болѧ́щымъ, дв҃о, всю́дꙋ: тѧ́ бо и҆сто́чникъ показа̀ и҆сцѣле́нїй, влⷣчце, и҆́же ми́лости гдⷭ҇ь, и҆зъ тебє̀ рожде́йсѧ па́че ᲂу҆ма̀.
Сѣда́ленъ, гла́съ д҃. Подо́бенъ: Ско́рѡ предварѝ:
Стра́стное покори́лъ є҆сѝ плотско́е мꙋдрова́нїе, и҆ хꙋ́ждшее порабо́тилъ є҆сѝ лꙋ́чшемꙋ, ѻ҆́ч҃е ні́ле пресла́вне, сокрꙋши́лъ є҆сѝ бѣсѡ́вскїѧ кѡ́зни посто́мъ, и҆ возсїѧ́лъ є҆сѝ въ мі́рѣ, ꙗ҆́кѡ лꙋча̀ со́лнечнаѧ, сїѧ̑нїи твои́хъ добродѣ́телей: сегѡ̀ ра́ди тѧ̀ воспѣва́емъ.
Два́жды.
Сла́ва, и҆ ны́нѣ, бг҃оро́диченъ:
Стѣна̀ непобѣди́маѧ на́мъ хрⷭ҇тїа́нѡмъ є҆сѝ, бцⷣе дв҃о, къ тебѣ̀ прибѣга́юще невреди́ми пребыва́емъ, и҆ па́ки согрѣша́юще, и҆́мамы тѧ̀ моли́твенницꙋ. тѣ́мъ благодарѧ́ще вопїе́мъ тѝ: ра́дꙋйсѧ, бл҃года́тнаѧ, гдⷭ҇ь съ тобо́ю.
Пѣ́снь д҃. І҆рмо́съ:
Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.
Житїѐ своѐ, ѻ҆́ч҃е ні́ле, чꙋ́дно на землѝ показа́лъ є҆сѝ, вели́ко поще́нїе и҆ смире́нїе: и҆ сегѡ̀ ра́ди на нб҃сѣ́хъ жи́знь вѣ́чнꙋю наслѣ́довалъ є҆сѝ, молѝ спасти́сѧ ѿ бѣ́дъ пою́щымъ тѧ̀.
Сѷмеѡ́на вели́кагѡ, на столпѣ̀ жи́вшагѡ, житїю̀ послѣ́дꙋѧ, прпⷣбне: тѣ́мже тогѡ̀, є҆ли́кѡ мо́щно, и҆менова́нїе ѿ житїѧ̀ стѧжа́лъ є҆сѝ, ні́ле пребога́те.
Посто́мъ и҆ моли́твами тѣ́ло твоѐ, ѻ҆́ч҃е ні́ле, и҆знꙋри́лъ є҆сѝ, и҆ сегѡ̀ ра́ди сподо́билсѧ є҆сѝ ви́дѣти неизречє́ннаѧ блага̑ѧ, ꙗ҆̀же ст҃ы̑мъ ᲂу҆готѡ́вана: съ ни́миже, ѻ҆́ч҃е ні́ле, ѡ҆ на́съ моли́сѧ.
Бг҃оро́диченъ:
Покро́въ и҆ застꙋпле́нїе и҆ прибѣ́жище бꙋ́ди мѝ, дв҃о, рабꙋ̀ твоемꙋ̀, и҆сцѣли́ мѧ ѿ безмѣ́рныхъ ѕѡ́лъ, воспѣва́ти, пречⷭ҇таѧ: сла́ва ржⷭ҇твꙋ̀ твоемꙋ̀.
Пѣ́снь є҃. І҆рмо́съ:
Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀, ми́ръ подава́ющаѧ.
Чи́сто житїѐ твоѐ ѿ ю҆́ности потща́лсѧ є҆сѝ, прпⷣбне, сохрани́ти: тѣ́мже, чистотꙋ̀ твою̀ ви́дѣвъ, прест҃ы́й дх҃ъ въ тѧ̀ всели́сѧ.
Ꙗ҆́кѡ преѡби́дѣвъ тлѣ̑ннаѧ, вѣ̑чныѧ, ѻ҆́ч҃е, сподо́билсѧ є҆сѝ прїѧ́ти, по нело́жномꙋ словесѝ: проси́те, и҆ прїи́мете. тѣ́мже ꙗ҆́кѡ проси́лъ, сїѧ̑ по досто́инствꙋ прїѧ́лъ є҆сѝ.
Мѣ́сто ѡ҆свѧти́сѧ, на не́мже честны̑ѧ мо́щи твоѧ̑ положи́шасѧ, прпⷣбне, и҆ по мнѡ́гимъ страна́мъ прославлѧ́емо є҆́сть, ꙗ҆́кѡ въ себѣ̀ мо́щи твоѧ̑ и҆мꙋ́щее.
Бг҃оро́диченъ:
Не преста́й молѧ́щи, є҆го́же родила̀ є҆сѝ, бг҃оневѣ́сто, ꙗ҆́кѡ сп҃са и҆ влⷣкꙋ, разрѣше́нїе мѝ пода́ти скорбе́й, и҆ болѣ́зней ѡ҆блегче́нїе: ꙗ҆́кѡ да прїимꙋ̀ проще́нїе, пѣсносло́вѧ тѧ̀ во вѣ́ки.
Пѣ́снь ѕ҃. І҆рмо́съ:
Бжⷭ҇твенное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Твоѐ вели́кое житїѐ и҆ чистотꙋ̀, къ си̑мъ же безмѣ́рное смире́нїе прови́дѣвъ прест҃ы́й дх҃ъ, сла́вна тѧ̀, ѻ҆́ч҃е, показа̀: тѣ́мже, ѿ сегѡ̀ житїѧ̀ ко ѻ҆́номꙋ преше́дъ, полꙋчи́лъ є҆сѝ съ пра́ведными та́мѡ весе́лїе.
Дне́сь наста́вши свѧще́ннаѧ па́мѧть твоѧ̀, прпⷣбне ні́ле, весели́тъ ᲂу҆ченикѝ твоѧ̑, воспѣва́ющыѧ любо́вїю по́двиги твоѧ̑, и҆̀же, честно́е твоѐ ᲂу҆спе́нїе сла́вѧще, торжествꙋ́ютъ, и҆̀хже моли́твами твои́ми, ѻ҆́ч҃е, соблюдѝ.
Разбо́йницы и҆ногда̀ прїидо́ша тебѐ ѡ҆скорби́ти, прпⷣбне, но ты̀, тѣ́хъ лꙋка́вство разꙋмѣ́въ, превѣ́чнагѡ хрⷭ҇та̀ бг҃а си́лою, и҆ пречⷭ҇тыѧ є҆гѡ̀ мт҃ре по́мощїю, си́хъ не́мѡщны сотвори́лъ є҆сѝ, и҆̀же, не могꙋ́ще тебѣ̀ проти́витисѧ, стра́хомъ ѿбѣго́ша, побѣжде́ни па́че бы́вше, не́жели побѣди́ша.
Бг҃оро́диченъ:
Твою̀ по́мощь да́ждь мѝ, и҆ и҆зба́ви мѧ̀ ѿ бѣ́дъ, и҆ скорбе́й, и҆ прегрѣше́нїй мои́хъ, ꙗ҆́же всѣ́хъ ро́ждши и҆збавле́нїе.
Конда́къ, гла́съ и҃:
Ѻ҆те́чества, прпⷣбне, ᲂу҆дали́всѧ, въ пꙋсты́ню всели́лсѧ є҆сѝ, и҆ на ѻ҆́стровъ селиге́ра є҆́зера возше́дъ, жесто́ко житїѐ показа́лъ є҆сѝ, и҆ мно́гихъ добродѣ́тельми ᲂу҆диви́въ, дарова̑нїѧ чꙋде́съ ѿ хрⷭ҇та̀ прїѧ́лъ є҆сѝ. помина́й на́съ, чтꙋ́щихъ па́мѧть твою̀, да зове́мъ тѝ: ра́дꙋйсѧ, ні́ле, ѻ҆́ч҃е на́шъ.
І҆́косъ:
Возлюби́въ, прпⷣбне, хрⷭ҇тѡ́вы бжⷭ҇твєнныѧ за́пѡвѣди, и҆ возненави́дѣвъ мі́ра сегѡ̀ наслажде́нїе, прите́клъ є҆сѝ ᲂу҆се́рднѡ къ томꙋ̀, и҆ бы́лъ є҆сѝ свѣти́льникъ, просвѣща́ѧй концы̀ блиста́нїемъ дꙋхо́внымъ. тѣ́мъ, припа́даѧ, молю̀ тѧ̀: просвѣти́ ми ѻ҆́чи сердє́чныѧ, воспѣ́ти твоѧ̑ по́двиги, поще́нїе, бдѣ́нїе, сле́зы, болѣ̑зни, и҆знꙋре́нїе тѣ́ла, блаже́нныѧ ра́ди бꙋ́дꙋщїѧ жи́зни, є҆ѧ́же ны́нѣ наслажда́ѧсѧ, молѝ непреста́ннѡ ѡ҆ всѣ́хъ на́съ.
Пѣ́снь з҃. І҆рмо́съ:
Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.
И҆сточа́етъ чꙋдеса̀ честна́ѧ ра́ка твоѧ̀, прпⷣбне, преиз̾ѡби́лꙋющи благода́тїю, вѣ́рою приходѧ́щымъ здра́вїе да́рꙋетъ, хрⷭ҇тꙋ̀ ѿ дꙋшѝ вопїю́щымъ: бл҃гослове́нъ бг҃ъ ѻ҆тцє́въ на́шихъ.
Дре́внихъ ѻ҆́нѣхъ и҆ вели́кихъ ѻ҆тцє́въ, въ постѣ̀ просїѧ́вшихъ, житїю̀ подо́бѧсѧ, прпⷣбне, въ пꙋсты́ню всели́лсѧ є҆сѝ, и҆ та́мѡ въ поще́нїихъ мнѡ́га лѣ̑та пребы́лъ є҆сѝ, ні́ле, ѻ҆́ч҃е на́шъ.
Ꙗ҆́кѡ и҆́стиннагѡ и҆ кро́ткагѡ пастыренача́льника хрⷭ҇та̀ неѕло́бивое ѻ҆вча̀, ѻ҆́ч҃е ні́ле, бы́лъ є҆сѝ. тѣ́мже неѕло́бивъ хотѧ́щымъ тебѐ ѡ҆ѕло́бити ꙗ҆ви́лсѧ є҆сѝ, хрⷭ҇тꙋ̀ вопїѧ̀: бл҃гослове́нъ бг҃ъ ѻ҆тцє́въ на́шихъ.
Бг҃оро́диченъ:
Ѡ҆бощрє́ны болѣ̑зни ра́намъ мои̑мъ ѿ безмѣ́рныхъ мои́хъ прегрѣше́нїй, влⷣчце, ведꙋ́тъ въ сме́рть дꙋше́внꙋю и҆ тѣле́снꙋю: но и҆схи́ти, ꙗ҆́кѡ си́льна, всѧ́кихъ скорбе́й и҆ недꙋ̑гъ.
Пѣ́снь и҃. І҆рмо́съ:
Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
И҆здѣ́тска, прпⷣбне ѻ҆́ч҃е, потща́лсѧ є҆сѝ свою̀ со́вѣсть и҆ се́рдце съ дꙋше́ю чи́сто гдⷭ҇ꙋ предста́вити. тѣ́мъ и҆ хрⷭ҇то́съ чꙋдесы̀ тебѐ прославлѧ́етъ, томꙋ̀ вопїю́ща: гдⷭ҇а воспѣва́йте дѣла̀, и҆ превозноси́те є҆го̀ во вѣ́ки.
Ны́нѣ пꙋсты́нѧ весе́лїемъ красꙋ́етсѧ, ѻ҆́ч҃е, и҆мꙋ́щи мо́щи твоѧ̑ въ себѣ̀, ні́ле прпⷣбне: ᲂу҆ченицы́ же твоѝ, твоемꙋ̀ житїю̀ ревнꙋ́юще, ѡ҆ твое́й па́мѧти ра́дꙋющесѧ, творцꙋ̀ вопїю́тъ: гдⷭ҇а воспѣва́йте дѣла̀, и҆ превозноси́те є҆го̀ во вѣ́ки.
Въ пꙋсты́ню, прпⷣбне, и҆дѣ́же селе́нїе и҆мѣ́лъ є҆сѝ, прече́стенъ хра́мъ во сла́вꙋ бг҃оѧвле́нїѧ гдⷭ҇нѧ воздви́глъ є҆сѝ, въ не́мже прославлѧ́етсѧ пречⷭ҇тое тогѡ̀ и҆́мѧ, и҆ всѝ вопїю́тъ: гдⷭ҇а воспѣва́йте дѣла̀, и҆ превозноси́сте є҆го̀ во вѣ́ки.
Бг҃оро́диченъ:
Свѣти́льникъ свѣ́та трисо́лнечнагѡ сꙋ́щи, заре́ю бл҃гоꙋтро́бїѧ твоегѡ̀, тмꙋ̀ ѿимѝ прегрѣше́нїй мои́хъ, бг҃ороди́тельнице, и҆збавле́нїе нꙋ́ждныхъ болѣ́зней подаю́щи, вѣ́рою превозносѧ́щемꙋ пречⷭ҇тое твоѐ ржⷭ҇тво̀.
Пѣ́снь ѳ҃. І҆рмо́съ:
Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всеблаже́ннаѧ бцⷣе, чⷭ҇таѧ приснодв҃о.
Бога́тство и҆ пи́ща, похвала̀ и҆ ра́дость прпⷣбнымъ є҆сѝ, хрⷭ҇тѐ бж҃е, є҆го́же возлюби́въ прпⷣбный ні́лъ, всѧ̑, ꙗ҆̀же въ мі́рѣ кра̑снаѧ, нивочто́же вмѣнѝ: тѣ́мже наслажда́етсѧ твоеѧ̀ красоты̀ во бл҃же́нномъ свѣ́тѣ.
Страстьмѝ коле́блющихсѧ, и҆ бꙋ́рею грѣхо́вною погрꙋжа́емыхъ, ꙗ҆́кѡ дерзнове́нїе и҆мѣ́ѧй ко гдⷭ҇ꙋ, всегда̀ сохранѧ́й благоче́стнѡ тѧ̀ воспѣва́ющихъ и҆ прославлѧ́ющихъ.
Ѡ҆блиста́въ заре́ю, просїѧ́лъ є҆сѝ дꙋхо́внѡ, и҆ ꙗ҆ви́лсѧ є҆сѝ вы́шнемꙋ ликостоѧ́нїю свѣ́телъ: ѡ҆зари́ ми ᲂу҆́мъ, бл҃же́нне, трисїѧ́ннымъ свѣ́томъ бж҃ества̀, и҆ ѿ страсте́й мѧ̀ и҆зба́ви моли́твами твои́ми.
Бг҃оро́диченъ:
Ты̀ є҆сѝ вѣ̑рнымъ похвала̀, безневѣ́стнаѧ, ты̀ застꙋпле́нїе и҆ свѧще́нное прибѣ́жище хрⷭ҇тїа́нѡмъ: къ сн҃ꙋ бо своемꙋ̀ и҆ бг҃ꙋ мольбы̑ но́сиши, всенепоро́чнаѧ, и҆ ѿ бѣ́дъ спаса́еши, вѣ́рою и҆ любо́вїю бцⷣꙋ чⷭ҇тꙋю тѧ̀ воспѣва́ющихъ и҆ велича́ющихъ.
Свѣти́ленъ. Подо́бенъ: Не́бо ѕвѣзда́ми:
Посто́мъ тече́нїе твоѐ соверши́въ, на нб҃са̀ возше́лъ є҆сѝ, и҆ хрⷭ҇тꙋ̀ бг҃ꙋ предстои́ши: ні́ле ѻ҆́ч҃е прпⷣбне, за ны̀ моли́сѧ, те́плѣ пою́щихъ тѧ̀.
Два́жды.
Сла́ва, и҆ ны́нѣ, бг҃оро́диченъ:
Ра́дость неизрече́ннꙋю ро́ждши гдⷭ҇а, ра́дости нбⷭ҇ныѧ прича́стникѡвъ всѣ́хъ на́съ сотворѝ, тебѐ почита́ющихъ, пречⷭ҇таѧ, и҆ ѿ дꙋшѝ вопїю́щихъ тѝ: не забꙋ́ди твоѧ̑ рабы̑, бл҃гослове́ннаѧ мр҃і́е.
На хвали́техъ стїхи̑ры, гла́съ д҃. Подо́бенъ: Да́лъ є҆сѝ зна́менїе:
Свѣтлѣ́йшїй со́лнца просїѧ̀ всепра́зднственнаѧ па́мѧть твоѧ̀, преподо́бне, лꙋча́ми блиста́ющи твои́хъ добродѣ́тельныхъ дѣѧ́нїй, и҆ ѡ҆зарѧ́ющи вѣ́рныхъ чꙋ̑вства свѣ́томъ чꙋде́съ твои́хъ: сїю̀ ᲂу҆́бѡ пра́зднꙋюще, ра́достнѡ тѧ̀ восхвалѧ́емъ и҆ вѣ́рнѡ ᲂу҆блажа́емъ.
Два́жды.
Ꙗ҆́коже а҆́гг҃лъ на землѝ пожи́лъ є҆сѝ, воздержа́нїемъ тѣ́ло твоѐ ᲂу҆вѧди́въ, сла́вне, бдѣ́нїемъ же и҆ па́мѧтїю сме́ртною къ верхо́вномꙋ бг҃омы́слїю возше́лъ є҆сѝ: тѣ́мъ и҆ прибли́жилсѧ є҆сѝ къ самомꙋ̀ краеꙋго́льномꙋ ка́меню хрⷭ҇тꙋ̀, бг҃ꙋ на́шемꙋ.
Стра̑сти тѣлє́сныѧ прилѣ́жнымъ моле́нїемъ къ бг҃ꙋ и҆ воздержа́нїемъ ᲂу҆кроти́лъ є҆сѝ, ѕмі́ѧ льсти́ваго сле́зными потѡ́ки ᲂу҆мертви́лъ є҆сѝ, ѻ҆́ч҃е прпⷣбне, и҆ ᲂу҆годи́лъ є҆сѝ бг҃ꙋ па́че и҆нѣ́хъ, досточꙋ́дне: тѣ́мъ тѧ̀ ᲂу҆красѝ нбⷭ҇ными дарова́ньми і҆и҃съ чл҃вѣколю́бецъ и҆ сп҃съ дꙋ́шъ на́шихъ.
Сла́ва, гла́съ є҃:
Прпⷣбне ѻ҆́ч҃е ні́ле, гла́съ є҆ѵⷢ҇льскїй гдⷭ҇ень ᲂу҆слы́шавъ, мі́ра ѡ҆ста́вилъ є҆сѝ красотꙋ̀, бога́тство и҆ сла́вꙋ нивочто́же вмѣни́лъ є҆сѝ, всѣ̑мъ вопїѧ̀, глаго́лѧ: возлюби́те бг҃а, и҆ ѡ҆брѧ́щете благода́ть вѣ́чнꙋю, и҆ ничто́же предпочти́те па́че любвѐ є҆гѡ̀: да є҆гда̀ прїи́детъ во сла́вѣ свое́й, ѡ҆брѧ́щете поко́й со всѣ́ми ст҃ы́ми, и҆́хже моли́твами, хрⷭ҇тѐ, сохранѝ и҆ спасѝ дꙋ́шы на́шѧ.
И҆ ны́нѣ, бг҃оро́диченъ:
Блажи́мъ тѧ̀, бцⷣе дв҃о, и҆ сла́вимъ тѧ̀ вѣ́рнїи по до́лгꙋ, гра́дъ непоколеби́мый, стѣ́нꙋ неѡбори́мꙋ, тве́рдꙋ предста́тельницꙋ и҆ прибѣ́жище дꙋша́мъ на́шымъ.
Славосло́вїе вели́кое. И҆ ѿпꙋ́стъ. На лїтꙋргі́и Бл҃жє́нна, ѿ канѡ́на ст҃а́гѡ, пѣ́снь г҃ и҆ ѕ҃. Прокі́менъ гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ: А҆пⷭ҇лъ къ корі́нѳѧнѡмъ, зача́ло рѻ҃ѕ. А҆ллилꙋ́їа, гла́съ ѕ҃: Блаже́нъ мꙋ́жъ, боѧ́йсѧ гдⷭ҇а: Є҆ѵⷢ҇лїе лꙋкѝ, зача́ло к҃д. Прича́стный: Въ па́мѧть вѣ́чнꙋю:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.