← претходни дан | Минеј — Новембар | следећи дан →
24 ноября: Святой великомученицы Екатерины. Святого великомученика Меркурия. Святого мученика Меркурия Смоленского
Мѣ́сѧца тогѡ́же въ к҃д-й де́нь.
Ст҃ы́ѧ великомꙋ́ченицы є҆катері́ны:
И҆ ст҃а́гѡ великомч҃ника меркꙋ́рїа:
И҆ ст҃а́гѡ мꙋ́ченика меркꙋ́рїа смоле́нскагѡ, но́вагѡ чꙋдотво́рца.
Слꙋ́жба є҆гѡ̀ пи́сана по се́й слꙋ́жбѣ.
На Гдⷭ҇и, воззва́хъ, стїхи́ры ст҃ы́ѧ, гла́съ а҃. Поⷣ: Нбⷭ҇ныхъ чинѡ́въ:
Дне́сь красꙋ́етсѧ гра́дъ а҆леѯандрі́а, ꙳ пелєны̀ твоѧ̑, мꙋ́ченице, ꙳ въ бжⷭ҇твеннѣмъ хра́мѣ твое́мъ и҆мѣ́ѧ премꙋ́дрѡ. ꙳ тѣ́мже и҆ мы̀ благоче́стнѡ пра́зднꙋемъ, ꙳ є҆катері́но, па́мѧть твою̀ честнꙋ́ю: ꙳ моли́сѧ ѡ҆ чтꙋ́щихъ тѧ̀.
Є҆катері́ны па́мѧть ны́нѣ пра́зднꙋимъ: ꙳ та́ бо и҆́стиннѡ всѧ̑ вра̑жїѧ си̑лы, ꙳ и҆ сло́вомъ же и҆ дѣ́ломъ низложѝ крѣ́пкѡ, ꙳ и҆ ри́торское противле́нїе. ꙳ но моли́твами є҆ѧ̀ и҆зба́ви ны̀, бж҃е, ꙳ ѿ безбо́жныхъ вра̑гъ.
Ра́дꙋйсѧ, всесла́внаѧ мꙋ́ченице є҆катері́но честна́ѧ: ꙳ сїна́йскаѧ бо гора̀, ꙳ въ не́йже ви́дѣ кꙋпинꙋ̀ мѡѷсе́й неѡпали́мꙋ, ꙳ въ то́й хрⷭ҇то́съ бг҃оꙋго́дное тѣ́ло твоѐ, ꙳ ны́нѣ преложи́въ, храни́тъ, ꙳ да́же до вре́мене втора́гѡ прише́ствїѧ своегѡ̀.
И҆́ны стїхи̑ры мꙋ́ченика, гла́съ д҃ Подо́бенъ: Ꙗ҆́кѡ до́блѧ:
Поборе́нїемъ дх҃а, страстоте́рпче меркꙋ́рїе, ѡ҆долѣ́въ проти́внаго, ꙳ ꙗ҆́кѡ во́инъ непобѣди́мый, ꙳ ѻ҆рꙋ́жїемъ вѣ́ры, ꙳ тмы̀ разꙋ́мныхъ мꙋ́рїнѡвъ посѣ́клъ є҆сѝ, ꙳ и҆ соверши́въ тво́й по́двигъ зако́ннѡ, ꙳ со всѣ́ми страда̑льцы вѣнча́лсѧ є҆сѝ, ꙳ великомꙋ́чениче преблаже́нне.
Съ нб҃сѐ тебѣ̀ а҆́гг҃лъ, ꙳ ꙗ҆́звы твоѧ̑ и҆сцѣлѧ́ѧй, ꙳ по́сланъ бы́сть ма́нїемъ бжⷭ҇твеннагѡ дх҃а: ꙳ ѿне́лѣже и҆сцѣлѣ́въ, достосла́вне, ꙳ рѡжны̀ пробода́емь льсти́внѡ разжже́нными, ꙳ терпѣ́лъ є҆сѝ повѣ́шенъ и҆ протѧза́емь, ꙳ и҆ къ ка́мени привѧза́емь тѧ́жкомꙋ, ꙳ и҆ кровьмѝ твои́ми, ꙳ мꙋ́чениче, ѡ҆блива́емь всю́дꙋ.
Царю̀ во́инствꙋѧ земно́мꙋ, меркꙋ́рїе, ꙳ ѿ негѡ́же де́мѡнѡмъ повелѣва́емь жре́ти, ꙳ бг҃омꙋ́дре блаже́нне, ꙳ мꙋ̑ки претерпѣ́лъ є҆сѝ, ꙳ и҆ попале́нїе ѻ҆́гненное и҆ нꙋ́жднꙋю сме́рть: ꙳ и҆ восте́клъ є҆сѝ ко хрⷭ҇тꙋ̀ вѣнцено́сецъ, ꙳ и҆ сочета́лсѧ є҆сѝ мꙋ́ченикѡвъ стадѡ́мъ, ꙳ ѡ҆ мі́рѣ молѧ́сѧ.
Сла́ва, гла́съ в҃:
Ра́достнѡ къ торжествꙋ̀ бг҃омꙋ́дрыѧ мꙋ́ченицы є҆катері́ны стеце́мсѧ, мꙋчениколю́бцы. и҆ тꙋ́ю похвала́ми, ꙗ҆́кѡ цвѣ̑ты ᲂу҆вѧзе́мъ, ра́дꙋйсѧ, вопїю́ще є҆́й, ꙗ҆́же бꙋесло́вныхъ ри́торѡвъ свирѣпоꙋ́стїе ѡ҆бличи́вши, ꙗ҆́кѡ ненаказа́нїѧ и҆спо́лненныхъ, и҆ ты̑ѧ къ вѣ́рѣ бжⷭ҇твеннѣй рꙋково́дствовавши. ра́дꙋйсѧ, ꙗ҆́же тѣ́ло многоплетє́ннымъ мꙋ́камъ вда́вши, любвѐ ра́ди творца̀ твоегѡ̀, и҆ не низложи́вшисѧ, ꙗ҆́кѡ ѻ҆трокови́ца неги́блема. ра́дꙋйсѧ, ꙗ҆́же гѡ́рнѧѧ пребыва̑лища, возме́здїе болѣ́зней наслѣ́довавши, и҆ сла́вы вѣ́чныѧ наслажда́ешисѧ: є҆ѧ́же жела́юще пѣснопѣ́вцы твоѝ, наде́жды да не ѿпаде́мъ.
И҆ ны́нѣ, гла́съ и҃:
По ржⷭ҇твѣ̀ твое́мъ, бг҃оневѣ́сто влⷣчце, пришла̀ є҆сѝ въ хра́мъ гдⷭ҇ень, воспита́тисѧ во ст҃а̑ѧ ст҃ы́хъ, ꙗ҆́кѡ ѡ҆свѧще́нна: тогда̀ и҆ гаврїи́лъ по́сланъ бы́сть къ тебѣ̀ всенепоро́чнѣй, пи́щꙋ тебѣ̀ приносѧ̀: нбⷭ҇наѧ всѧ̑ ᲂу҆диви́шасѧ, зрѧ́ще дх҃а ст҃а́го въ тѧ̀ все́льшасѧ. тѣ́мже, пречⷭ҇таѧ и҆ нескве́рнаѧ, ꙗ҆́же на нб҃сѝ и҆ на землѝ сла́вима, мт҃и бж҃їѧ, спасѝ ро́дъ на́шъ.
На стїхо́внѣ пра́здника, гла́съ а҃. Подо́бенъ: Нбⷭ҇ныхъ чинѡ́въ:
Прїиди́те празднолю́бцы всѝ, ꙳ пѣ́сньми почти́мъ ꙳ є҆ди́нꙋ бцⷣꙋ ꙳ чⷭ҇тꙋю и҆ дв҃ꙋ: ꙳ вво́дитсѧ бо въ хра́мъ бж҃їй, ꙳ въ не́мъ жи́ти ны́нѣ свѣ́тлѡ, ꙳ ст҃ѣ́йшїй вои́стиннꙋ ꙳ хрⷭ҇то́въ хра́мъ, ꙳ и҆ ра́дости всѧ́кїѧ хода́таица.
Сті́хъ: Приведꙋ́тсѧ цр҃ю̀ дѣ̑вы въ слѣ́дъ є҆ѧ̀, и҆ и҆́скреннїѧ є҆ѧ̀ приведꙋ́тсѧ тебѣ̀.
Двє́ри, прⷪ҇ро́че, ѿве́рзи, ꙳ вѣ́рою прїе́мли въ хра́мъ гдⷭ҇ень приведе́ннꙋю, ꙳ всѣ́хъ а҆́гг҃лъ же и҆ человѣ̑къ похвалꙋ̀, ꙳ и҆ свѣ́тло ра́дованїе, ꙳ внꙋ́трь жи́ти и҆ ликова́ти, ꙳ ꙗ҆́же хра́мъ бж҃їй и҆ ѻ҆би́телище.
Сті́хъ: Приведꙋ́тсѧ въ весе́лїи и҆ ра́дованїи, введꙋ́тсѧ въ хра́мъ цр҃е́въ.
Бцⷣа марі́а въ хра́мъ приведе́на, ꙳ хлѣ́бъ прїе́млющи ѿ а҆́гг҃ла ꙗ҆ви́сѧ, ꙳ вопїю́ща є҆́й, ра́дꙋйсѧ: зачне́ши сн҃а неискꙋсомꙋ́жнѡ, ꙳ бг҃оневѣ́стнаѧ бл҃гослове́ннаѧ бцⷣе дв҃о, ꙳ земны̑мъ благонаслѣ́дїе и҆ назда́нїе.
Сла́ва, гла́съ в҃:
Житїѐ невеще́ственно навы́кши, сꙋди́ще безбо́жное дости́гши, ста́ла є҆сѝ, побѣдоно́сице є҆катері́но честна́ѧ, цвѣтоносѧ́щи бж҃їю свѣ́тлость, и҆ бжⷭ҇твенною мо́щїю ѡ҆дѣ́ѧна, повелѣ́нїю мꙋчи́телевꙋ порꙋга́ласѧ є҆сѝ, и҆ ри́торѡвъ ᲂу҆толи́ла є҆сѝ бꙋесло́вныѧ рѣ̑чи, многострада́льнаѧ.
И҆ ны́нѣ, пра́здника, гла́съ и҃:
Дв҃дъ провозглаша́ше тебѣ̀, пречⷭ҇таѧ, прови́дѧ ѡ҆свѧще́нїе вхо́да твоегѡ̀ въ хра́мъ: въ не́мже концы̀ дне́сь пра́зднꙋюще, славосло́вѧтъ тѧ̀, всепѣ́таѧ. ꙗ҆́же бо пре́жде ржⷭ҇тва̀ дв҃а, и҆ по ржⷭ҇твѣ̀ пребы́вши нетлѣ́нна, мт҃и сло́ва жи́зни, дне́сь въ хра́мѣ заха́рїа весели́тсѧ, воспрїе́мъ тѧ̀, влⷣчце, и҆ ст҃а̑ѧ ст҃ы́хъ ра́дꙋютсѧ, под̾е́мши тѧ̀ и҆сто́чника жи́зни на́шеѧ. сегѡ̀ ра́ди и҆ мы̀ ѱало́мски вопїе́мъ тѝ: ѡ҆ на́съ молѝ сн҃а твоего̀ и҆ бг҃а на́шего, дарова́ти на́мъ ве́лїю ми́лость.
Тропа́рь, мꙋ́ченицѣ, гла́съ д҃:
А҆́гница твоѧ̀, і҆и҃се, є҆катері́на зове́тъ ве́лїимъ гла́сомъ: тебѐ, женишѐ мо́й, люблю̀, и҆ тебѐ и҆́щꙋщи страда́льчествꙋю, и҆ сраспина́юсѧ и҆ спогреба́юсѧ креще́нїю твоемꙋ̀, и҆ страждꙋ̀ тебє̀ ра́ди, ꙗ҆́кѡ да црⷭ҇твꙋю въ тебѣ̀, и҆ ᲂу҆мира́ю за тѧ̀, да и҆ живꙋ̀ съ тобо́ю: но ꙗ҆́кѡ же́ртвꙋ непоро́чнꙋю прїими́ мѧ, съ любо́вїю поже́ршꙋюсѧ тебѣ̀: тоѧ̀ моли́твами, ꙗ҆́кѡ ми́лостивъ, спасѝ дꙋ́шы на́шѧ.
И҆лѝ се́й, гла́съ то́йже:
Добродѣ́тельми, ꙗ҆́кѡ лꙋча́ми со́лнечными, просвѣти́ла є҆сѝ невѣ̑рныѧ мꙋдрецы̀. и҆ ꙗ҆́коже пресвѣ́тлаѧ лꙋна̀ ходѧ́щымъ въ нощѝ, невѣ́рїѧ тмꙋ̀ ѿгна́ла є҆сѝ, и҆ цари́цꙋ ᲂу҆вѣ́рила є҆сѝ, вкꙋ́пѣ же и҆ мꙋчи́телѧ ѡ҆бличи́ла є҆сѝ, бг҃озва́ннаѧ невѣ́сто, бл҃же́ннаѧ є҆катері́но, жела́нїемъ востекла̀ є҆сѝ въ нбⷭ҇ный черто́гъ, къ прекра́сномꙋ женихꙋ̀, хрⷭ҇тꙋ̀, и҆ ѿ негѡ̀ ца́рскимъ вѣнце́мъ вѣнча́ласѧ є҆сѝ: є҆мꙋ́же со а҆́гг҃лы предстоѧ́щи, за ны̀ моли́сѧ, творѧ́щыѧ пречестнꙋ́ю па́мѧть твою̀.
Сла́ва, мꙋ́ченика, гла́съ то́йже.
Мч҃никъ тво́й, гдⷭ҇и, меркꙋ́рїй, во страда́нїи свое́мъ вѣне́цъ прїѧ́тъ нетлѣ́нный, ѿ тебє̀ бг҃а на́шегѡ: и҆мѣ́ѧй бо крѣ́пость твою̀, мꙋчи́телей низложѝ, сокрꙋшѝ и҆ де́мѡнѡвъ немощны̑ѧ де́рзѡсти. тогѡ̀ моли́твами спасѝ дꙋ́шы на́шѧ.
И҆ ны́нѣ, пра́здника.
На ᲂу҆́трени, на Бг҃ъ гдⷭ҇ь, тропа́рь пра́здника, є҆ди́ножды: и҆ є҆катері́ны, є҆ди́ножды. Сла́ва, мꙋ́ченика: И҆ ны́нѣ, пра́здника.
По а҃-мъ, стїхосло́вїи сѣда́ленъ, гла́съ а҃. Поⷣ: Ка́мени запеча́танꙋ:
Восхвали́те дѣ̑вы, ма́тєри пра́зднꙋйте, лю́дїе, славосло́вите, свѧще́нницы, благослови́те пречⷭ҇тꙋю мт҃рь бж҃їю: пло́тїю бо младе́нствꙋющи пре́жде во хра́мъ принесе́сѧ, ꙗ҆́кѡ хра́мъ бж҃їй ст҃ѣ́йшїй. тѣ́мже пра́здникъ дꙋхо́вный соверша́юще, воспои́мъ ю҆̀, ꙗ҆́кѡ предста́тельницꙋ ро́да человѣ́ческагѡ.
Сла́ва, и҆ ны́нѣ, то́йже:
По в҃-мъ стїхосло́вїи сѣда́ленъ, гла́съ а҃. Поⷣ: Ка́мени запеча́танꙋ:
Ст҃а́ѧ ст҃ы́хъ, бцⷣе, сꙋ́щи, досто́йнѡ приведе́сѧ жи́ти во ст҃а̑ѧ, ꙗ҆́кѡ ѡ҆дꙋшевле́нъ гдⷭ҇ень кївѡ́тъ, и҆ ст҃а́гѡ дх҃а и҆́стиннѡ вмѣсти́лище бжⷭ҇твенное, дв҃о мт҃и: тѣ́мже всели́сѧ въ тѧ̀, и҆́же ѻ҆ц҃ꙋ̀ є҆диноро́дный, и҆ ст҃о́мꙋ дх҃ꙋ соесте́ственный, тво́й сн҃ъ неискꙋсомꙋ́жнѡ, ѡ҆боготвори́въ всѐ человѣ́чество.
Сла́ва, и҆ ны́нѣ, то́йже.
Канѡ́нъ пра́здника, гла́съ д҃, со і҆рмосо́мъ на ѕ҃: И҆ ст҃ы́хъ два̀, на и҃:
Канѡ́нъ пра́здника.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ вхожде́нїе.
Премꙋ́дрости, пречⷭ҇таѧ, тѧ̀ сокро́вище вѣ́мы, и҆ благода́ти точа́щꙋю и҆сто́чникъ приснотекꙋ́щїй ра́зꙋма, про́симъ: твоѧ̑ ка̑пли ѡ҆дождѝ, влⷣчце, є҆́же воспѣва́ти тѧ̀ при́снѡ.
Превы́шши, пречⷭ҇таѧ, нб҃съ бы́вши, хра́мъ и҆ пала́та, въ хра́мъ бж҃їй возложи́ласѧ є҆сѝ, томꙋ̀ ᲂу҆гото́ватисѧ въ бжⷭ҇твенное жили́ще прише́ствїѧ є҆гѡ̀.
Свѣ́тъ возсїѧ́вши бцⷣа благода́ти, всѧ̑ просвѣтѝ, и҆ совокꙋпѝ пресвѣ́тлое є҆ѧ̀ ᲂу҆краси́ти торжество̀ пѣ́сньми: прїиди́те, къ не́й стеце́мсѧ.
Две́рь сла́внаѧ, пѡ́мыслы непроходи́маѧ, двє́ри ѿве́рзши хра́ма бж҃їѧ, ны́нѣ повелѣва́етъ на́мъ совше́дшымъ, бжⷭ҇твенныхъ є҆ѧ̀ чꙋде́съ наслади́тисѧ.
Канѡ́нъ мꙋ́ченицы, є҆гѡ́же краегране́сїе:
Є҆катері́нꙋ приснопа́мѧтнꙋю пѣ́сньми пою̀. Ѳеофа́ново.
Гла́съ и҃. Пѣ́снь а҃. І҆рмо́съ:
Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ, и҆ раздѣли́въ мо́ре: і҆и҃лѧ же бѣглеца̀ пѣшехо́дца спасѐ, пѣ́снь бг҃ови воспѣва́юща.
Є҆катері́ны всемꙋ́дрыѧ мч҃ницы моли́твами, хрⷭ҇тѐ, мра́чное ѻ҆́ко дꙋшѝ моеѧ̀ просвѣтѝ, зарю́ ми даѧ̀, влⷣко, твоегѡ̀ свѣтоли́тїѧ, дꙋшетлѣ́нныхъ паде́нїй мои́хъ ве́сь мра́къ потреблѧ́ющꙋю.
Направлѧ́ема влⷣки, всемꙋ́драѧ, бжⷭ҇твенными повелѣ̑нїи, и҆ тогѡ̀ любо́вїю пали́ма, потекла̀ є҆сѝ къ подвигѡ́мъ тща́щисѧ, и҆ мꙋчи́телей ра́зꙋмы, є҆катері́но, ᲂу҆страши́ла є҆сѝ, сло́вомъ и҆ мꙋ́дростїю и҆ благода́тїю.
Оу҆правлѧ́ема дла́нїю, сла́внаѧ, крѣ́пкою хрⷭ҇то́вою, і҆́дѡльскїѧ бꙋ́ри и҆збѣ́гла є҆сѝ, мч҃нице, немо́креннѡ преплы́вши крⷭ҇та̀ вѣ́триломъ, и҆ бжⷭ҇твенными вѣ̑тры дх҃а, пѣ́снь бг҃ꙋ воспѣва́ющи.
Ра́дꙋющисѧ дѣ́вственными добро́тами, є҆катері́но мꙋ́драѧ, и҆ бжⷭ҇твенное зна́нїе съ нб҃сѐ и҆мꙋ́щи, лжеиме́ннагѡ зна́нїѧ благодерзнове́ннѡ и҆ мꙋ́жественнѡ предста́тели посрами́ла є҆сѝ, ты̑ѧ держа́внѣ побѣди́вши.
Бг҃оро́диченъ:
И҆́же бцⷣꙋ тѧ̀ проповѣ́даетъ, пречⷭ҇таѧ, всѧ́кїѧ є҆́реси ѿринове́нїе и҆́мать: пло́ть бо бы́вша неизмѣ́ннѡ родила̀ є҆сѝ, превы́шша всѧ́кїѧ, бг҃ороди́тельнице, тва́ри, сло́во бж҃їе присносꙋ́щное.
И҆́нъ канѡ́нъ мꙋ́ченика, є҆гѡ́же краегране́сїе:
Меркꙋ́рїева мѧ̀ крѣ́пость да храни́тъ. І҆ѡ́сифъ.
Гла́съ и҃. Пѣ́снь а҃. І҆рмо́съ:
Посѣ́ченный несѣко́маго пресѣчѐ, и҆ ви́дѣ со́лнце зе́млю, ю҆́же не ви́дѣ, лю́таго врага̀ вода̀ потопѝ, и҆ непроходи́мое про́йде і҆и҃ль, пѣ́снь же воспѣва́шесѧ: гдⷭ҇еви пои́мъ, сла́внѡ бо просла́висѧ.
Съ го́рними ли̑ки, меркꙋ́рїе, благи́хъ и҆сто́чникꙋ ра́дꙋѧсѧ предстоѧ̀, и҆ бжⷭ҇твенныѧ сла́дости, приснопа́мѧтне, и҆сполнѧ́ѧсѧ, любо́вїю торжество̀ твоѐ соверша́ющыѧ сохранѧ́й, гдⷭ҇ꙋ пою́щыѧ: сла́внѡ бо просла́висѧ.
Во́льнѡ вше́лъ є҆сѝ въ три́знище мꙋче́нїѧ, мꙋ́дре, си́лою ᲂу҆крѣплѧ́емь хрⷭ҇то́вою, на́съ ра́ди стрⷭ҇ти спаси́тєльныѧ во́лею претерпѣ́вшагѡ пло́тїю, и҆ ра́дꙋѧсѧ взыва́лъ є҆сѝ: гдⷭ҇ꙋ пои́мъ, сла́внѡ бо просла́висѧ.
Глаго́лъ мꙋчи́телѧ ꙗ҆́вѣ ᲂу҆кори́лъ є҆сѝ, и҆сповѣ́данїемъ хрⷭ҇то́вымъ, бл҃же́нне, ᲂу҆краша́емь, и҆ всѧ́кїй болѣ́зней ви́дъ, веселѧ́сѧ претерпѣ́лъ є҆сѝ, меркꙋ́рїе, вопїѧ̀ тебѐ ᲂу҆крѣ́пльшемꙋ: гдⷭ҇ꙋ пои́мъ, сла́внѡ бо просла́висѧ.
Бг҃оро́диченъ:
Ѡ҆ ѻ҆трокови́цы дв҃ы ꙗ҆ви́лсѧ є҆сѝ воплоща́емь на́съ ра́ди, по на́мъ чл҃вѣ́къ бы́въ, и҆ свидѣ́телѧ вѣ́рна страсте́й свои́хъ ꙗ҆влѧ́етъ, меркꙋ́рїа до́блѧго своего̀ страда́льца, томꙋ̀ крѣ́пкѡ пою́ща: гдⷭ҇ꙋ пои́мъ, сла́внѡ бо просла́висѧ.
Пѣ́снь г҃. І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ честнѣ́мъ вхожде́нїи твое́мъ вѣнцє́въ сла́вы сподо́би.
Невѣстокраси́тель дне́сь ꙗ҆ви́сѧ, кра́сный дв҃ы хра́мъ и҆ черто́гъ, прїе́мь ѡ҆дꙋшевле́нный черто́гъ бж҃їй, чⷭ҇тꙋю и҆ непоро́чнꙋю, и҆ свѣтлѣ́йшꙋю всеѧ̀ тва́ри.
Дв҃дъ предначина́ѧ ликова́нїе, и҆гра́етъ и҆ ликовствꙋ́етъ съ на́ми, и҆ цр҃и́цꙋ зове́тъ тѧ̀ ᲂу҆кра́шенꙋ, пречⷭ҇таѧ, предстоѧ́щꙋ, всечⷭ҇таѧ, въ хра́мѣ цр҃ю̀ и҆ бг҃ꙋ.
И҆зъ неѧ́же престꙋпле́нїе произы́де дре́вле ро́дꙋ человѣ́ческомꙋ, и҆зъ тоѧ̀ и҆справле́нїе и҆ нетлѣ́нїе процвѣтѐ, бцⷣа дне́сь приводи́ма въ до́мъ бж҃їй.
И҆гра́ютъ а҆́гг҃льскаѧ вѡ́инства, и҆ всѣ́хъ человѣ̑къ мно́жество: и҆ предъ лице́мъ, пречⷭ҇таѧ, предтекꙋ́тъ твои́мъ дне́сь свѣщенѡ́сицы зовꙋ́ще, вели́чєствїѧ твоѧ̑ въ домꙋ̀ бж҃їи.
И҆́нъ. І҆рмо́съ:
Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ па́че тебє̀, є҆ди́не чл҃вѣколю́бче.
Во́льными твои́ми стремле́ньми, вошла̀ є҆сѝ ко страда́нїю во́лею хрⷭ҇та̀ подража́ющи, и҆ побѣди́вши свѣ́тлѡ тмы̑ мїроде́ржца, вѣнцено́сица ꙗ҆ви́ласѧ є҆сѝ, є҆катері́но бг҃опрїѧ́тнаѧ.
Крѣ́постїю ᲂу҆ма̀ ѡ҆бличи́ла є҆сѝ мꙋчи́тели, безбо́жїѧ въ глꙋбинѣ̀ валѧ́ющыѧсѧ, ри́торствꙋющи ꙗ҆́вѣ бг҃озна́нїѧ догма̑ты, бж҃їею мꙋ́дростїю мꙋ́ченица ᲂу҆ѧснѧ́ема всехва́льнаѧ.
Равнобо́жїе во ᲂу҆́ши є҆́ѵинѣ пошепта́вый, ѿ ѻ҆трокови́цы млады́ѧ ны́нѣ попира́етсѧ: ѻ҆рꙋ́жїемъ бо крⷭ҇та̀ ѡ҆гради́вшисѧ, посрамѝ є҆катері́на мꙋ́ченица, безмѣ́рнѡ того̀ хва́лѧщасѧ.
Бг҃оро́диченъ:
Оу҆мерщвле́нный мо́й ᲂу҆́мъ, жи́зни дѣ́йствомъ и҆зъ тебє̀ ꙗ҆́вльшїѧсѧ мі́рꙋ, воздви́гни, ꙗ҆́звы и҆ стрꙋ́пы и҆стреблѧ́ющи грѣхѡ́вныѧ, є҆ди́на бг҃ороди́тельнице всенепоро́чнаѧ.
И҆́нъ. І҆рмо́съ:
Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Ве́сь разжига́емь бжⷭ҇твенною любо́вїю, сла́вне, ѻ҆́гнь и҆ ю҆́зы, мечѝ и҆ мꙋ̑ки, ꙗ҆́коже со́нъ вмѣни́лъ є҆сѝ, меркꙋ́рїе.
Воспѣва́лъ є҆сѝ сотво́ршаго, примѣша́ѧсѧ лю̑тымъ ра́намъ, мꙋ́чениче мꙋ́дре, и҆ и҆сцѣлє́нїѧ ꙗ҆́звъ прїима́лъ є҆сѝ, сла́вне.
Жезло́мъ ᲂу҆крѣплѧ́емь бжⷭ҇твеннымъ, вра́жїе свирѣ́пство, ꙗ҆́кѡ страда́лецъ, мꙋ́чениче доблемꙋ́дренне, благомо́щнѡ смири́лъ є҆сѝ.
Бг҃оро́диченъ:
Ꙗ҆́кѡ да проѡбрази́тъ твоѐ па́че ᲂу҆ма̀, чⷭ҇таѧ, ржⷭ҇тво̀, кꙋпина̀ ꙗ҆ви́сѧ ѻ҆гне́мъ пали́ма, и҆ ника́коже сгара́ющи.
Конда́къ пра́здника, гла́съ д҃. Подо́бенъ: Вознесы́йсѧ:
Пречⷭ҇тый хра́мъ сп҃совъ, многоцѣ́нный черто́гъ и҆ дв҃а, свѧще́нное сокро́вище сла́вы бж҃їѧ, дне́сь вво́дитсѧ въ до́мъ гдⷭ҇ень, бл҃года́ть совводѧ́щи, ꙗ҆́же въ дс҃ѣ бжⷭ҇твенномъ, ю҆́же воспѣва́ютъ а҆́гг҃ли бж҃їи: сїѧ̀ є҆́сть селе́нїе нбⷭ҇ное.
І҆́косъ:
Неизрече́нныхъ бж҃їихъ и҆ бжⷭ҇твенныхъ та̑инъ зрѧ̀ въ дв҃ѣ благода́ть ꙗ҆влѧ́емꙋю, и҆ и҆сполнѧ́емꙋ ꙗ҆́вственнѡ, ра́дꙋюсѧ, и҆ ѻ҆́бразъ разꙋмѣ́ти недоꙋмѣ́юсѧ, стра́нный и҆ неизрече́нный: ка́кѡ и҆збра́ннаѧ чⷭ҇таѧ, є҆ди́на ꙗ҆ви́сѧ па́че всеѧ̀ тва́ри ви́димыѧ и҆ разꙋмѣва́емыѧ; тѣ́мже восхвали́ти хотѧ̀ сїю̀, ᲂу҆жаса́юсѧ ѕѣлѡ̀ ᲂу҆мо́мъ же и҆ сло́вомъ, ѻ҆ба́че дерза́ѧ проповѣ́даю и҆ велича́ю: сїѧ̀ є҆́сть селе́нїе нбⷭ҇ное.
Та́же конда́къ меркꙋ́рїа, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Во бранѣ́хъ непобѣди́маго во́ина, и҆ въ бѣда́хъ непосты́дна застꙋ́пника, пѣ́сньми меркꙋ́рїа ᲂу҆блажи́мъ сла́вѧще: пра́зднꙋющыѧ бо па́мѧть є҆гѡ̀ ве́селѡ ѿ бѣ́дъ и҆збавлѧ́етъ, и҆ скорбе́й.
Сѣда́ленъ ст҃ы́ѧ, гла́съ д҃. Подо́бенъ: Вознесы́йсѧ:
Жениха̀ твоего̀ хрⷭ҇та̀ возлюби́вши, свѣщꙋ̀ твою̀ свѣ́тлѡ ᲂу҆гото́вльши, добродѣ́тельми просїѧ́вши, сла́внаѧ. тѣ́мже вошла̀ є҆сѝ съ ни́мъ въ черто́гъ, и҆ вѣне́цъ страда́нїѧ ѿ негѡ̀ прїе́мши, ѿ бѣ́дъ и҆зба́ви на́съ соверша́ющихъ, є҆катері́но, па́мѧть твою̀.
Сла́ва, мꙋ́ченика, гла́съ то́йже. Подо́бенъ: Ско́рѡ предварѝ:
Мꙋ́ченикъ меркꙋ́рїй подвиза́всѧ, льсти́ваго посрамѝ, и҆ вѣне́чникъ крѣ́покъ хрⷭ҇то́въ бы́сть: тѣ́мже нбⷭ҇нымъ ны́нѣ причте́сѧ ликѡ́мъ, сла́вы непрее́мныѧ досто́йнѡ причаща́ѧсѧ. сегѡ̀ ра́ди свѧще́ннꙋю є҆гѡ̀ па́мѧть соверша́емъ вѣ́рнѡ.
И҆ ны́нѣ, пра́здника, гла́съ то́йже:
Дв҃де, пред̾идѝ въ хра́мъ бж҃їй, и҆ ра́дꙋѧсѧ прїимѝ цр҃и́цꙋ на́шꙋ, и҆ то́й возопѝ: вни́ди гпⷭ҇жѐ, въ хра́мъ царе́въ вни́ди: є҆ѧ́же сла́ва покрове́ннѡ разꙋмѣ́етсѧ, и҆зъ неѧ́же хо́щетъ и҆сточи́тисѧ на́мъ всѣ̑мъ свѣ́тъ хрⷭ҇то́съ.
Пѣ́снь д҃. І҆рмо́съ:
Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ тебє̀ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и.
Две́рь непрохо́днꙋю, бж҃їй до́мъ прїе́млѧ дне́сь, преста́ти сотворѝ всѧ́кой слꙋ́жбѣ зако́нной, ꙗ҆́кѡ и҆́стиннѡ ꙗ҆ви́сѧ, зовы́й, сꙋ́щымъ на землѝ и҆́стина.
Гора̀ присѣ́ннаѧ, ю҆́же прови́дѣ дре́вле а҆ввакꙋ́мъ, предпроповѣ́да внꙋ́трь вмѣсти́вшꙋюсѧ въ нехо́дныхъ хра́ма, добродѣ́тєли процвѣ́тши, и҆ покрыва́етъ концы̀.
Ви́дѣвши пресла̑внаѧ всѧ̀ землѧ̀, стра̑нныѧ же и҆ ди̑вныѧ вє́щи, ка́кѡ дв҃а, ѿ а҆́гг҃ла пи́щꙋ прїе́млющи, ѻ҆́бразы строе́нїѧ но́ситъ.
Хра́мъ и҆ пала́та, и҆ нб҃о ѡ҆дꙋшевле́нное ꙗ҆́вльшисѧ, бг҃оневѣ́сто цр҃е́ва, въ хра́мъ зако́нный приводи́ма дне́сь, томꙋ̀ соблюда́ема, пречⷭ҇таѧ.
И҆́нъ. І҆рмо́съ:
Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Страда́льческое, є҆катері́но, противле́нїе показа́ла є҆сѝ мч҃нице приснопа́мѧтнаѧ, вражде́бникꙋ ѕѣлѡ̀ терпѣли́внѡ противлѧ́ющисѧ, и҆ того̀ попра́вши нога́ми кра́сными, крⷭ҇та̀ си́лою, страстоно́сице, мꙋ́ченикѡвъ похвала̀.
Невѣ́ста хрⷭ҇то́ва, є҆катері́но всебл҃же́ннаѧ, ꙗ҆ви́ласѧ є҆сѝ бжⷭ҇твенныѧ красоты̀ свѣтови́дными лꙋча́ми просвѣща́ема, и҆ добро́тою сїѧ́ющи. тѣ́мже и҆ веселѧ́щисѧ пѣснопое́ши влⷣцѣ: си́лѣ твое́й сла́ва, чл҃вѣколю́бче.
Мꙋчи́тельскꙋю горды́ню низложи́ла є҆сѝ, и҆ бжⷭ҇твеннымъ сло́вомъ мꙋ́дрости твоеѧ̀, ꙗ҆́кѡ ѿ глꙋбины̀ ле́стнагѡ демѡноговѣ́нїѧ прельща́ємыѧ и҆схи́тила є҆сѝ, ᲂу҆ча́щи зва́ти хрⷭ҇тꙋ̀ пѣснопою́щыѧ: си́лѣ твое́й сла́ва, чл҃вѣколю́бче.
Благосла́вное и҆ свѣтоно́сное торжество̀ сла́вныѧ па́мѧти твоеѧ̀ всехва́льнаѧ, крѣ́пкѡ де́рзость вра́жїю попра́вши, ꙗ҆́кѡ со́лнце возсїѧ̀, въ не́мже велегла́снѡ влⷣцѣ вопїе́мъ: си́лѣ твое́й сла́ва, чл҃вѣколю́бче.
Бг҃оро́диченъ:
Ны́нѣ крѣ́пость низложѝ ѿмета́ющихсѧ ѻ҆́браза, ѻ҆трокови́це, поклоне́нїѧ, тебѐ чⷭ҇тыѧ, и҆ па́че ᲂу҆ма̀ и҆зъ тебє̀ воплоще́ннагѡ, и҆ мі́ръ ве́сь просвѣ́щшагѡ, и҆ всѣ́хъ свѧты́хъ: вѣ́рою же чтꙋ́щыѧ тѧ̀ просвѣтѝ, є҆ди́на всепѣ́таѧ.
И҆́нъ. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Присво́илсѧ є҆сѝ зижди́телю твоемꙋ̀, бжⷭ҇твеннагѡ свидѣ́тельства, бг҃омꙋ́дре, стрⷭ҇тьмѝ, и҆ свѣ̑тлыѧ вѣнцы̀ ѿ негѡ̀ прїѧ́лъ є҆сѝ, сла́вне, ꙗ҆́кѡ непобѣди́мый.
И҆стка́ннꙋю ѿ вы́шнїѧ благода́ти въ ри́зꙋ, мꙋ́чениче, ны́нѣ ѡ҆дѣ́ѧлсѧ є҆сѝ, тлѝ и҆ ме́ртвости ри́зъ, мꙋ́чениче, совле́ксѧ.
Да́же до кро́ве, сла́вне, ко грѣхꙋ̀ подвиза́всѧ, побѣдоно́сецъ показа́лсѧ є҆сѝ, и҆ вы́шнїѧ сла́вы сподо́билсѧ є҆сѝ, меркꙋ́рїе.
Бг҃оро́диченъ:
На тѧ̀ спаси́тельное сло́во сни́де, приснодв҃о, ꙗ҆́коже тꙋ́ча, и҆ и҆зсꙋшѝ многобо́жїѧ наводнє́нїѧ.
Пѣ́снь є҃. І҆рмо́съ:
Оу҆жасо́шасѧ всѧ́чєскаѧ въ честнѣ́мъ вхожде́нїи твое́мъ: ты́ бо, неискꙋсобра́чнаѧ дв҃о, внꙋ́трь вошла̀ є҆сѝ въ хра́мъ бж҃їй, ꙗ҆́коже чⷭ҇тѣ́йшїй хра́мъ, всѣ̑мъ воспѣва́ющымъ тѧ̀ ми́ръ подава́ющаѧ.
Свѧще́нїе сла́вное, и҆ свѧще́нное возложе́нїе дне́сь пречⷭ҇таѧ дв҃а, возложи́вшисѧ въ хра́мъ бж҃їй, всецр҃ю̀ на́шемꙋ, бг҃ꙋ є҆ди́номꙋ въ жили́ще соблюда́етсѧ, ꙗ҆́кѡ вѣ́сть са́мъ.
Добро́тꙋ, пречⷭ҇таѧ, дꙋшѝ твоеѧ̀ зрѧ̀ нѣ́когда вѣ́рою заха́рїа возопѝ: ты̀ є҆сѝ и҆збавле́нїе, ты̀ є҆сѝ всѣ́хъ ра́дость: ты̀ є҆сѝ воззва́нїе на́ше, є҆́юже невмѣ́стный вмѣще́нъ мнѣ̀ ꙗ҆ви́тсѧ.
Ѽ па́че ᲂу҆ма̀ чꙋде́съ твои́хъ, всечⷭ҇таѧ! стра́нное твоѐ ржⷭ҇тво̀ є҆́сть, стра́ненъ ѻ҆́бразъ возраще́нїѧ твоегѡ̀, стра̑нна и҆ пресла̑вна твоѧ̑, бг҃оневѣ́сто, всѧ̑, и҆ человѣ̑ки несказа̑нна.
Свѣ́щникъ многосвѣ́тлый сꙋ́щи, бг҃оневѣ́сто, дне́сь возсїѧ́ла є҆сѝ въ домꙋ̀ гдⷭ҇ни, и҆ ѡ҆зарѧ́еши ны̀ честны́ми дарова̑нїи, чⷭ҇таѧ, чꙋде́съ твои́хъ, бцⷣе всепѣ́таѧ.
И҆́нъ. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго. но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Любо́вїю ѻ҆гнепали́ма, мꙋ́ченице всесла́внаѧ, влⷣки твоегѡ̀, и҆ и҆́щꙋщи тогѡ̀ недомы́сленнꙋю добро́тꙋ ви́дѣти, самово́льнымъ пра́вомъ ра́намъ себѐ вдала̀ є҆сѝ, дѣ́вства сїѧ́ющи благода́тьми.
Страстьмѝ свѧще́ннѣйшими, ѻ҆трокови́це добродв҃о, ᲂу҆краси́вши тебѐ самꙋ́ю благолѣ́пнѡ, возшла̀ є҆сѝ къ небе́сномꙋ хрⷭ҇то́вꙋ черто́гꙋ, и҆ ны́нѣ свѣ́тлѡ твоемꙋ̀ женихꙋ̀ веселѧ́щисѧ сочта́ласѧ є҆сѝ, всеблаже́ннаѧ.
Ѻ҆трокови́ца всесвѣ́тлаѧ ꙗ҆ви́ласѧ є҆сѝ, возлюби́вши є҆ди́наго жела́емаго, и҆ во слѣ́дъ тогѡ̀ крѣпча́йшее тече́нїе соверши́вши, въ воню̀ мѵ́ра твоегѡ̀ ᲂу҆́мнагѡ и҆стоще́ннагѡ, вопїѧ́ла є҆сѝ: текꙋ̀, женишѐ мо́й.
Бг҃оро́диченъ:
И҆́стиннꙋю бцⷣꙋ тѧ̀ всѝ позна́вше, пречⷭ҇таѧ влⷣчце, и҆зъ тебє̀ ро́ждшагосѧ бг҃а сло́ва вѣ́дѧще, проповѣ́даемъ во двꙋ̀ сꙋщества́хъ, хотѣ́нїихъ самовла́стныхъ познава́ема, мт҃и бг҃оневѣ́стнаѧ.
И҆́нъ. І҆рмо́съ:
Оу҆́тренююще, вопїе́мъ тѝ, гдⷭ҇и, спаси́ ны. ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.
Растѧга́емь, и҆ ѻ҆строто́ю, меркꙋ́рїе, неѡсла́бнѡ разсѣка́емь, терпѣ́лъ є҆сѝ, бжⷭ҇твенными наде́ждами вжилѧ́емь.
Ка́менемъ мы́сленнымъ ᲂу҆крѣпи́въ твоѐ се́рдце, ка́менемъ ѡ҆тѧгча́емь, не преврати́лсѧ є҆сѝ, меркꙋ́рїе сла́вне.
Соприча́стникъ стрⷭ҇те́й влⷣки твоегѡ̀ бы́въ, сла́вы приѡбщи́лсѧ є҆сѝ тогѡ̀, и҆ бжⷭ҇твенныѧ свѣ́тлости.
Бг҃оро́диченъ:
Оу҆мертвѝ, дв҃о, живꙋ́щїй мо́й грѣ́хъ жи́знь ро́ждшаѧ ᲂу҆мертви́вшꙋю сме́рть.
Пѣ́снь ѕ҃. І҆рмо́съ:
Бжⷭ҇твенное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Всѧ́чєскаѧ носѧ́й глаго́ломъ, моли́твꙋ пра́ведныхъ ᲂу҆слы́ша: тѣ́мже непло́дныѧ разрѣши́лъ є҆сѝ недꙋ́гъ, ꙗ҆́кѡ бл҃гоꙋтро́бенъ, ра́дости вино́внꙋю си̑мъ дарова̀.
Сказа́ти хотѧ̀ гдⷭ҇ь ꙗ҆зы́кѡмъ своѐ спасе́нїе, неискꙋсобра́чнꙋю ны́нѣ ѿ человѣ̑къ прїѧ́тъ, примире́нїѧ зна́менїе и҆ ѡ҆бновле́нїѧ.
Ꙗ҆́кѡ до́мъ сꙋ́щи благода́ти, въ не́мже сокрѡ́вища лежа́тъ неизрече́ннагѡ бж҃їѧ строе́нїѧ, всечⷭ҇таѧ, въ хра́мѣ причасти́ласѧ є҆сѝ нетлѣ́нныѧ сла́дости.
Дїади́мꙋ тѧ̀ ца́рскꙋю прїе́мъ хра́мъ, бг҃оневѣ́сто, просвѣща́шесѧ, и҆ подстꙋпа́ше лꙋ́чшымъ, предрече́нныхъ зрѧ̀ на тебѣ̀ сбытїѐ.
И҆́нъ. І҆рмо́съ:
Бе́здна грѣхѡ́въ, и҆ прегрѣше́нїй бꙋ́рѧ мѧ̀ смꙋща́етъ, и҆ во глꙋбинꙋ̀ нꙋ́жднагѡ рѣ́етъ мѧ̀ ѿча́ѧнїѧ: но твою̀ крѣ́пкꙋю рꙋ́кꙋ мнѣ̀ прострѝ ꙗ҆́кѡ петро́ви, ѽ ᲂу҆пра́вителю, и҆ спасѝ.
Всю́ тѧ добро́тою сїѧ́ющꙋ двⷭ҇тва заре́ю, мꙋ́ченическими же, ѻ҆трокови́це, ѡ҆багре́нꙋ кровмѝ, ви́дѣвъ благо́е сло́во и҆ пречи́стое, въ черто́зѣхъ нбⷭ҇ныхъ тѧ̀ вселѝ.
Возмогла̀ є҆сѝ крⷭ҇то́мъ, мꙋчи́телей разрѣши́ти держа́вꙋ, и҆ мїрскі́ѧ мꙋ́дрости ѡ҆бличи́вши сꙋетꙋ̀, бг҃одохнове́ннагѡ ᲂу҆че́нїѧ точа́щи догма́ты, велемꙋ́дреннаѧ є҆катері́но приснопа́мѧтнаѧ.
Ле́стїю пе́рвѣе а҆да́ма ра́йскїѧ сла́дости и҆згна́вшаго, ра́нъ болѣ̑зни крѣ́пкѡ терпѧ́щи, низложи́ла є҆сѝ на зе́млю, мч҃нице всесла́внаѧ, и҆ вѣнцы̑ црⷭ҇твїѧ вѣнча́ласѧ є҆сѝ.
Бг҃оро́диченъ:
Ми́лостива мнѣ̀ сꙋдїю̀ и҆ сн҃а твоего̀, бцⷣе дв҃о, твои́ми мольба́ми бы́ти въ де́нь сꙋда̀, и҆зба́вителѧ же лю́тыхъ, мт҃и, сотворѝ: къ тебѣ́ бо є҆ди́ной надє́жды возглага́ю.
И҆́нъ. І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Вжилѧ́ше тѧ̀ присносꙋ́щное сло́во, за него̀ всѧ́къ ви́дъ мꙋ́къ, мꙋ́чениче мꙋ́дре, терпѧ́ща тѧ̀ ви́дѧ, и҆ чрезъ а҆́гг҃ла дерза́ти повелѣва́ше, меркꙋ́рїе, и҆ ника́коже мꙋчи́телей ᲂу҆страши́тисѧ противле́нїѧ.
Оу҆мертви́сѧ многоѻбра́зный ѕмі́й, и҆ нога́ми попра́сѧ кра́сными страда́льца, и҆ до́блѧгѡ ѻ҆рꙋ́жника: самово́льными бо стремлє́нїи вше́дъ къ мꙋче́нїѧ ра́намъ, сме́рти, сла́вы и҆спо́лненъ.
Всесоверше́ннѡ влⷣцѣ прине́слъ є҆сѝ серде́чное произволе́нїе, мч҃ниче. и҆ тогѡ̀ ра́ди претерпѣ́въ сломлє́нїѧ, ꙗ҆́кѡ побѣди́тель ѿ негѡ̀ вѣнча́лсѧ є҆сѝ, и҆ томꙋ̀ ны́нѣ на нб҃сѣ́хъ со всѣ́ми мꙋ́ченики предстои́ши, меркꙋ́рїе.
Бг҃оро́диченъ:
Зачала̀ є҆сѝ гла́сомъ а҆́гг҃ловымъ вели́кагѡ совѣ́та а҆́гг҃ла, ѻ҆трокови́це, и҆ ѿ твои́хъ пречⷭ҇тыхъ крове́й воплоще́нна, всенепоро́чнаѧ, родила̀ є҆сѝ, показа́вшаго всѣ̑мъ жи́зни вхо́ды за неизглаго́ланнꙋю ми́лость.
Конда́къ ст҃ы́ѧ, гла́съ в҃. Подо́бенъ: Вы́шнихъ и҆щѧ̀:
Ли́къ честны́й бжⷭ҇твеннѣ мꙋчениколю́бцы воздви́гните ны́нѣ, почита́юще всемꙋ́дрꙋю є҆катері́нꙋ: сїѧ́ бо въ три́знищи хрⷭ҇та̀ проповѣ́да, и҆ ѕмі́ѧ попра̀, ри́торѡвъ ра́зꙋмы ᲂу҆кроти́вши.
І҆́косъ:
Ѿ бг҃а мꙋ́дрость прїи́мши и҆здѣ́тства, мꙋ́ченице, и҆ внѣ́шнюю до́брѣ мꙋ́дрость всю̀ и҆звы́че: позна́вши ᲂу҆́бѡ ѿ тоѧ̀ стїхі́й движе́нїе же и҆ творе́нїе, по сло́вꙋ, и҆ сїѧ̑ и҆з̾ нача́ла сло́вомъ сотво́ршаго, томꙋ̀ бл҃годаре́нїе въ нощѝ и҆ во днѝ приноша́ше, і҆́дѡлы низложи́вши и҆ си̑мъ несмы́сленнѡ слꙋжа́щыѧ, ри́торѡвъ ра́зꙋмы ᲂу҆кроти́вши.
Пѣ́снь з҃. І҆рмо́съ:
Не послꙋжи́ша тва́ри бг҃омꙋ́дрїи, па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ, пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.
Сѐ дне́сь возсїѧ̀ концє́мъ весна̀ ра́достнаѧ, просвѣща́ющи на́шѧ дꙋ́шы, и҆ помышлє́нїѧ, и҆ ᲂу҆́мъ благода́тїю, торжество́мъ бцⷣы дне́сь та́инственнѡ да ᲂу҆чреди́мсѧ.
Да дароно́сѧтъ дне́сь всѧ́чєскаѧ цр҃и́цѣ и҆ мт҃ри бж҃їи, нб҃о и҆ землѧ̀, и҆ а҆́гг҃лѡвъ чи́ни, и҆ человѣ́кѡвъ мно́жество, и҆ да вопїю́тъ: во хра́мъ вво́дитсѧ ра́дость и҆ и҆збавле́нїе.
Писа́нїе мимотечѐ, и҆ ѡ҆скꙋдѣ̀ зако́нъ, ꙗ҆́коже сѣ́нь, и҆ благода́ти лꙋчѝ возсїѧ́ша, въ хра́мъ бж҃їй вше́дшей тебѣ̀, дв҃о мт҃и чⷭ҇таѧ, въ не́мъ бл҃гослове́ннаѧ.
Повине́сѧ ржⷭ҇твꙋ̀ твоемꙋ̀, всечⷭ҇таѧ, ꙗ҆́кѡ творцꙋ̀ и҆ бг҃ꙋ, нб҃о и҆ землѧ̀ и҆ преиспо́днѧѧ, и҆ всѧ́къ ѧ҆зы́къ земны́хъ и҆сповѣ́даетъ, ꙗ҆́кѡ гдⷭ҇ь ꙗ҆ви́сѧ сп҃съ дꙋ́шъ на́шихъ.
И҆́нъ. І҆рмо́съ:
Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.
Мч҃никѡвъ хвала̀, бл҃гоче́стїѧ ᲂу҆чи́тельница была̀ є҆сѝ, свѣ́тломꙋ твоемꙋ̀ женихꙋ̀, мꙋ́ченикѡвъ мно́жество приве́дши хрⷭ҇тꙋ̀. съ ни́миже зове́ши, всехва́льнаѧ, пою́щи: бл҃гослове́нъ бг҃ъ ѻ҆ц҃ъ на́шихъ.
Сло́во твоѐ премꙋ́дрое ко спасе́нїю мнѡ́ги и҆схи́ти ѿ і҆дѡлонеи́стовства, и҆ свѣтоно́сны ꙗ҆вѝ мꙋ́ченики, велегла́снѡ съ тобо́ю взыва́ющыѧ: бл҃гослове́нъ бг҃ъ ѻ҆ц҃ъ на́шихъ.
Ѻ҆трокови́ца въ слѣ́дъ тебє̀ и҆дꙋ́щи, тебѣ̀ приведе́сѧ мече́мъ посѣ́ченна, твою̀ подража́ющи стрⷭ҇ть пречⷭ҇тꙋю, и҆ тебѣ̀ зижди́телю вопїю́щи и҆ глаго́лющи: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
Ст҃ы́хъ ст҃ы́й въ тебѣ̀ свѧ́тѡ всели́всѧ, чⷭ҇таѧ бцⷣе дв҃о, воплоще́нъ и҆зъ тебє̀ ражда́етсѧ, за є҆́же спастѝ вѣ́рою зовꙋ́щыѧ: бл҃гослове́нъ бг҃ъ ѻ҆тє́цъ на́шихъ.
И҆́нъ. І҆рмо́съ:
Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Свѣ́томъ го́рнѧгѡ просвѣще́нїѧ ѡ҆зарѧ́емь, до́блїй во́ине, воспѣва́ющыѧ тѧ̀ ны́нѣ просвѣща́еши пѣснопою́щыѧ: бл҃гослове́нъ є҆сѝ, гдⷭ҇и бж҃е, во вѣ́ки.
Воспѣва́лъ є҆сѝ всѣ́хъ бл҃годѣ́телѧ, распалѧ́емь тогѡ̀ ре́вностїю, бл҃же́нне, и҆ ѻ҆гне́мъ чꙋ́вственнымъ жего́мь, и҆ пѣснопоѧ̀: бл҃гослове́нъ є҆сѝ, гдⷭ҇и бж҃е, во вѣ́ки.
Ка́менїю приносѧ́щїи че́сть, и҆̀же чꙋ́вство ѡ҆камене́но и҆мꙋ́ще, ка́менемъ, мꙋ́чениче, ѡ҆тѧгчава́ютъ вы́ю твою̀, вопїю́ща, меркꙋ́рїе: бл҃гослове́нъ є҆сѝ, гдⷭ҇и бж҃е, во вѣ́ки.
Кровьмѝ кро́вь смѣси́въ твою̀ честнꙋ́ю влⷣки чл҃вѣколю́бца, ѻ҆́бщникъ тогѡ̀ ꙗ҆ви́лсѧ є҆сѝ стрⷭ҇те́й, вопїѧ̀, меркꙋ́рїе: бл҃гослове́нъ є҆сѝ, гдⷭ҇и бж҃е, во вѣ́ки.
Бг҃оро́диченъ:
Чи́ни а҆́гг҃льстїи ᲂу҆жаса́ютсѧ та́инства твоегѡ̀ глꙋбинѣ̀, бцⷣе: бг҃ъ бо и҆зъ тебє̀ воплоще́нъ ꙗ҆ви́сѧ, є҆мꙋ́же пѣснопое́мъ: бл҃гослове́нъ є҆сѝ, гдⷭ҇и бж҃е, во вѣ́ки.
Пѣ́снь и҃. І҆рмо́съ:
Слы́ши, ѻ҆трокови́це, дв҃о чⷭ҇таѧ, да рече́тъ ᲂу҆́бѡ гаврїи́лъ, совѣ́тъ вы́шнѧгѡ дре́внїй и҆́стинный, бꙋ́ди къ прїѧ́тїю гото́ва бж҃їю: тобо́ю бо невмѣсти́мый, съ человѣ́ки поживѐ. тѣ́мъ и҆ ра́дꙋѧсѧ вопїю̀: благослови́те, всѧ̑ дѣла̀ гдⷭ҇нѧ, гдⷭ҇а.
Пречⷭ҇тый хра́мъ въ до́мъ бж҃їй приводѧ́щи а҆́нна и҆ногда̀, вопїю́щи, съ вѣ́рою речѐ свѧще́нникꙋ: ча́до, ѿ бг҃а да́нное мнѣ̀, прїи́мъ ны́нѣ, введѝ во хра́мъ зижди́телѧ твоегѡ̀, и҆ ра́дꙋѧсѧ по́й є҆мꙋ̀: благослови́те, всѧ̑ дѣла̀ гдⷭ҇нѧ, гдⷭ҇а.
Речѐ, ви́дѣвъ, а҆́ннѣ и҆ногда̀ дх҃омъ заха́рїа: жи́зни мт҃рь вво́диши и҆́стиннꙋю, ю҆́же свѣ́тлѡ прⷪ҇ро́цы бж҃їи бцⷣꙋ проповѣ́даша, и҆ ка́кѡ хра́мъ вмѣсти́тъ ю҆̀; тѣ́мъ чꙋдѧ́сѧ вопїю̀: благослови́те, всѧ̑ дѣла̀ гдⷭ҇нѧ, гдⷭ҇а.
Раба̀ бж҃їѧ бы́хъ а҆́зъ, ѿвѣща̀ а҆́нна є҆мꙋ̀, призыва́ющи сего̀ вѣ́рою и҆ моли́твою, прїѧ́ти моеѧ̀ болѣ́зни пло́дъ, по прїѧ́тїи же рожде́ннꙋю привестѝ да́вшемꙋ ю҆̀. тѣ́мъ зовѧ̀ вопїю̀: благослови́те, всѧ̑ дѣла̀ гдⷭ҇нѧ, гдⷭ҇а.
Зако́нное вои́стиннꙋ дѣ́ло є҆́сть, свѧще́нникъ речѐ є҆́й, стра́ннꙋ же весьма̀ ве́щь поразꙋмѣва́ю, зрѧ̀ приводи́мꙋю въ до́мъ бж҃їй, пресла́внѡ превосходѧ́щꙋю ст҃а̑ѧ благода́тїю. тѣ́мъ и҆ ра́дꙋѧсѧ вопїю̀: благослови́те, всѧ̑ дѣла̀ гдⷭ҇нѧ, гдⷭ҇а.
И҆́нъ. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Твои́ми ᲂу҆чє́нїи цари́ца вѣ́рꙋющи, притечѐ ко благоче́стїю, и҆ крѣ́пкѡ претерпѣ́вши болѣ́зней чꙋ́вство, и҆ ца́рствїѧ нбⷭ҇нагѡ непрее́мнагѡ ꙗ҆́вственнѡ сподо́бисѧ, вопїю́щи влⷣцѣ: свѧще́нницы, благослови́те, лю́дїе, превозноси́те во всѧ̑ вѣ́ки.
Съ мч҃ники да бꙋ́дꙋтъ вѣ́рныхъ прошє́нїѧ, страстоте́рпица бо хрⷭ҇тꙋ̀ предстои́тъ, просѧ́ще лꙋ̑чшаѧ, и҆ спасе́нїѧ хода́тайственнаѧ, всесвѧтꙋ́ю и҆ честнꙋ́ю є҆ѧ̀ па́мѧть ᲂу҆се́рднѡ соверша́ющымъ, и҆ вѣ́рнѡ пѣснопою́щымъ: лю́дїе, превозноси́те хрⷭ҇та̀ во вѣ́ки.
Ѿве́рзъ прїе́млетъ тѧ̀ жени́хъ, всемꙋ́драѧ, двє́ри ра̑йскїѧ, и҆ въ черто́зѣ всесвѣ́тлѣмъ ѡ҆бита́ти сотворѝ, црⷭ҇твїѧ прича́стницꙋ, ꙗ҆́кѡ соѻ́бщницꙋ стрⷭ҇те́й ꙗ҆влѧ́етъ. є҆мꙋ́же ны́нѣ предстоѧ́щи царе́ва дщѝ, свѣ́тлѡ ᲂу҆кра́шена, на́съ не забꙋ́ди.
Оу҆хищре́нными глагѡ́лы и҆скꙋша́ше мꙋчи́тель, и҆ ᲂу҆вѣтливослѡ́вїи лю́тый льстѧ̀, разсла́бити твою̀ крѣ́пость надѣ́ѧвсѧ, сла́внаѧ, но ᲂу҆невѣ́ститисѧ хрⷭ҇тꙋ̀ хотѧ́щи, вопїѧ́ла є҆сѝ влⷣцѣ: свѧще́нницы, воспо́йте, лю́дїе, превозноси́те хрⷭ҇та̀ во вѣ́ки.
Бг҃оро́диченъ:
Свѧще́ннѣйши была̀ є҆сѝ, бцⷣе всенепоро́чнаѧ, премі́рнагѡ а҆́гг҃лѡвъ чи́на: си́хъ бо родила̀ є҆сѝ содѣ́телѧ и҆ гдⷭ҇а, ѿ дѣ́вственныѧ и҆ неискꙋсобра́чныѧ ᲂу҆тро́бы, во двꙋ́хъ сꙋщества́хъ, неслїѧ́ннѡ и҆ невра́щнѡ, во є҆ди́ной же ѵ҆поста́си бг҃а воплоще́нна.
И҆́нъ. І҆рмо́съ то́йже.
Страда́льцєвъ прило́гъ тѧ̀ ли́къ прїѧ́ше, ᲂу҆кра́шена и҆ свѣ́тла бы́вша честны́ми красота́ми пречестны́хъ твои́хъ страда́нїй, и҆ благочести́вагѡ твоегѡ̀ и҆ честна́гѡ свидѣ́тельства. и҆ ны́нѣ вопїе́ши непреста́ннѡ: свѧще́нницы, бл҃гослови́те, лю́дїе, превозноси́те хрⷭ҇та̀ во вѣ́ки.
Благочестивомꙋ́дреннѡ, сла́вне, по́двигъ соверши́лъ є҆сѝ, и҆ доблемꙋ́дреннѡ врага̀ посрами́лъ є҆сѝ, и҆ побѣ́дꙋ нбⷭ҇нꙋю ꙗ҆́кѡ побѣди́тель взе́мъ, со а҆́гг҃льскими ны́нѣ ли̑ки весели́шисѧ, съ ни́миже вопїе́ши непреста́ннѡ: свѧще́нницы благослови́те, лю́дїе превозноси́те хрⷭ҇та̀ во вѣ́ки.
Сконча́всѧ, всебл҃же́нне, мече́мъ, меркꙋ́рїе, и҆ полꙋчи́въ жела́емагѡ тѝ предлежа́щагѡ конца̀, зе́млю ᲂу҆́бѡ кро́вными и҆злїѧ̑нїи напои́лъ є҆сѝ, побѣдоно́сное же и҆ бл҃же́нное тѣ́ло, бѣлѣ́йше снѣ́га показа́лъ є҆сѝ, поѧ̀: свѧще́нницы, благослови́те, лю́дїе, превозноси́те хрⷭ҇та̀ во вѣ́ки.
Бг҃оро́диченъ:
Ꙗ҆́кѡ на́шегѡ сꙋ́щи воззда́нїѧ, пречⷭ҇таѧ, всѝ вино́внꙋю вѣ́рнїи пое́мъ тѧ̀: бг҃а бо всевино́внаго па́че вины̀ родила̀ є҆сѝ, сокрꙋши́вшїйсѧ ѻ҆́бразъ ѕло́бою свои́мъ бл҃гоꙋтро́бїемъ назда́вшаго, є҆ди́на пребл҃гослове́ннаѧ и҆ ѡ҆бра́дованнаѧ.
Пѣ́снь ѳ҃. І҆рмо́съ:
Ꙗ҆́кѡ ѡ҆дꙋшевле́нномꙋ бж҃їю кївѡ́тꙋ, да ника́коже ко́снетсѧ рꙋка̀ скве́рныхъ, ᲂу҆стнѣ́ же вѣ́рныхъ бцⷣѣ немо́лчнѡ гла́съ а҆́гг҃ла воспѣва́юще, съ ра́достїю да вопїю́тъ: и҆́стиннѡ вы́шши всѣ́хъ є҆сѝ, дв҃о чⷭ҇таѧ.
Ꙗ҆́кѡ пресвѣ́тлꙋю, бцⷣе чⷭ҇таѧ, дꙋше́вныѧ чистоты̀ и҆мꙋ́щи добро́тꙋ, бл҃года́тїю же бж҃їею и҆сполнѧ́ема съ нб҃сѐ, свѣ́томъ присносꙋ́щнымъ просвѣща́еши всегда̀ съ весе́лїемъ вопїю́щыѧ: и҆́стиннѡ вы́шши всѣ́хъ є҆сѝ, дв҃о чⷭ҇таѧ.
Прелета́етъ, бцⷣе чⷭ҇таѧ, чꙋ́до твоѐ си́лꙋ слове́съ: тѣ́ло бо въ тебѣ̀ поразꙋмѣва́ю, па́че сло́ва, тече́нїѧ грѣхо́внагѡ непрїѧ́тно. тѣ́мже благода́рственнѡ вопїю́ ти: и҆́стиннѡ вы́шши всѣ́хъ є҆сѝ, дв҃о чⷭ҇таѧ.
Пресла́внѡ проѡбразова́ше, чⷭ҇таѧ, зако́нъ тѧ̀ ски́нїю, и҆ бжⷭ҇твеннꙋю ста́мнꙋ, стра́ненъ кївѡ́тъ, и҆ катапета́смꙋ, и҆ же́злъ, хра́мъ неразрꙋши́мый, и҆ две́рь бж҃їю. тѣ́мже наꙋча́ютъ тебѣ̀ зва́ти: и҆́стиннѡ вы́шши всѣ́хъ є҆сѝ, дв҃о чⷭ҇таѧ.
Пѣснопоѧ̀ тебѣ̀ провозглаша́ше дв҃дъ, глаго́лѧ тѧ̀ дще́рь цр҃е́вꙋ, красото́ю добродѣ́телей, ѡ҆деснꙋ́ю предстоѧ́щꙋю бг҃а, ви́дѣвъ тѧ̀ ᲂу҆пещре́ннꙋ. тѣ́мже, прⷪ҇ро́чествꙋѧ, вопїѧ́ше: и҆́стиннѡ вы́шши всѣ́хъ є҆сѝ, дв҃о чⷭ҇таѧ.
И҆́нъ. І҆рмо́съ:
Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.
Преста́виласѧ є҆сѝ къ черто́гѡмъ свѣтови̑днымъ, невѣ́стными ᲂу҆кра́шена ᲂу҆́тварьми, дѣ́вственнꙋю и҆мꙋ́щи свѣщꙋ̀ въ твое́й десни́цѣ, въ дрꙋго́й же держа́щи ѿсѣ́ченнꙋю твою̀ главꙋ̀. и҆ ны́нѣ предстоѧ́щи хрⷭ҇тꙋ̀, твоемꙋ̀ женихꙋ̀, тѧ̀ пою́щыѧ сохранѝ.
Прїѧ́та бы́сть твоѧ̀, бг҃омꙋ́драѧ, моли́тва: вѣ́рою бо твоѐ и҆менꙋ́ющыѧ и҆́мѧ, честна́ѧ, спаса́етъ влⷣка ѿ и҆скꙋше́нїй, и҆ благоздра́вїе подае́тъ, недꙋ́гѡвъ и҆збавлѧ́ѧ всеразли́чныхъ, дꙋше́вныхъ же и҆ тѣле́сныхъ. тѣ́мъ тѧ̀ веселѧ́щесѧ, є҆катері́но, ᲂу҆блажа́емъ.
Приста́ла є҆сѝ ти́хомꙋ приста́нищꙋ ны́нѣ, благоѡпрѧ́тнѡ же и҆ легкѡ̀ мо́ре мїрско́е, мч҃нице, преплы́вши треволне́нїй, не и҆скꙋси́вшисѧ, всемꙋ́драѧ, бога́тство многоразли́чное хрⷭ҇тꙋ̀ приносѧ́щи, дв҃о, мно́жество мꙋ́чєникъ, є҆катері́но всеблаже́ннаѧ.
Въ черто́зѣхъ нбⷭ҇ныхъ ны́нѣ внꙋ́трь съ дѣ́вственныхъ ли̑ки ликовствꙋ́ющи, мꙋ́ченическими ѡ҆зарѧ́ема лꙋча́ми, є҆катері́но всемꙋ́драѧ, разрѣшѝ паде́нїй мои́хъ плени̑цы, ᲂу҆се́рднѡ молѧ́щи всѣ́хъ бл҃годѣ́телѧ: за є҆го́же кро́вь твою̀ и҆злїѧ́ла є҆сѝ.
Бг҃оро́диченъ:
Ꙗ҆ви́ласѧ є҆сѝ, ѽ дв҃о мт҃и бж҃їѧ! па́че є҆стества̀ ро́ждши въ тѣлесѝ благо́е сло́во, є҆го́же ѿ се́рдца своегѡ̀ ѻ҆ц҃ъ ѿры́гне, пре́жде всѣ́хъ вѣкѡ́въ, ꙗ҆́кѡ бл҃гъ, є҆го́же ны́нѣ и҆ тѣле́съ превы́шша разꙋмѣва́емъ, а҆́ще и҆ въ тѣ́ло ѡ҆блече́сѧ.
И҆́нъ. І҆рмо́съ:
Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ. тѣ́мже пречⷭ҇тꙋю бцⷣꙋ, вѣ́рнїи, велича́емъ.
Гно́еве мꙋ́ченичестїи благово́нїе ны́нѣ и҆спꙋща́ютъ бл҃года́тїю, и҆ ѕлосмра̑дныѧ на́шѧ стра̑сти неизрече́ннымъ сло́вомъ ѿгонѧ́ютъ, и҆ и҆сточа́ютъ кѡ́сти врачева́нїй во́ды, и҆ напаѧ́ютъ дꙋ́шы пою́щихъ тѣ́хъ чꙋдодѣѧ̑нїѧ.
Ꙗ҆́кѡ вели́ка столпа̀ хрⷭ҇то́вы цр҃кве, свѧще́ннѡ тѧ̀ почита́емъ, ꙗ҆́кѡ стѣ́нꙋ непоколеби́мꙋю: ꙗ҆́кѡ гра́дъ вои́стиннꙋ, мꙋ́чениче, неплѣнѧ́емый: ꙗ҆́кѡ во́ина крѣ́пка бг҃а всецр҃ѧ̀: ꙗ҆́кѡ потреби́телѧ врагѡ́въ: ꙗ҆́кѡ свѣти́льника ᲂу҆́мнаго и҆ всемі́рнаго.
Соше́ственника а҆́гг҃ла свѣ́та, къ страда́нїю, бг҃омꙋ́дре, полꙋчи́лъ є҆сѝ: тѣ́мже терза́емь, и҆ свѣща́ми поджига́емь, и҆ разсѣка́емь лю́тѣ, и҆ мече́мъ посѣка́емь, не ᲂу҆страши́лсѧ є҆сѝ, страстоте́рпче хрⷭ҇то́въ до́блественнѣйше.
Де́нь по́лнъ просвѣще́нїѧ, весе́лїѧ и҆ ра́дости на́мъ возсїѧ̀ бжⷭ҇твеннаѧ па́мѧть твоѧ̀, тебѐ чтꙋ́щымъ, мч҃ниче меркꙋ́рїе, въ не́мже помина́й на́съ па́мѧть твою̀ творѧ́щихъ, и҆ лю́тыхъ и҆скꙋше́нїй и҆ бѣ́дъ и҆ страсте́й ны̀ и҆зба́ви.
Бг҃оро́диченъ:
Просвѣтѝ, две́ре свѣ́та, ѡ҆слѣ́пшꙋю дꙋ́шꙋ мою̀ стрⷭ҇тьмѝ, и҆ лꙋка́выми пѡ́мыслы ѡ҆мрачи́вшꙋюсѧ, и҆ бѣ́дствꙋющꙋю, и҆ и҆зба́ви мѧ̀ и҆скꙋше́нїй, бѣ́дъ и҆ скорбе́й, да сла́влю тѧ̀ наде́ждꙋ вѣ́рныхъ и҆ ᲂу҆твержде́нїе.
Свѣти́ленъ ст҃ы́ѧ. Подо́бенъ: Дх҃омъ во ст҃и́лищи:
Возжилѧ́ема мꙋдрова́нїемъ, же́нъ, ѽ дв҃о є҆катері́но, всечестна́ѧ, страстоте́рпцєвъ сла́во, фїлосо́фѡвъ хи́трость ѡ҆ бз҃ѣ ѡ҆бличи́ла є҆сѝ, ꙗ҆́кѡ бꙋ́йство сꙋ́щꙋ и҆ ба́снь, всенепоро́чнꙋю и҆́стиннѡ мт҃рь бж҃їю спомо́щницꙋ стѧжа́вши.
Сла́ва, и҆ ны́нѣ, пра́здника. Подо́бенъ: Оу҆ченикѡ́мъ зрѧ́щымъ:
А҆́гг҃льстїи чи́ни, и҆ мч҃ническїй ли́къ пра́зднꙋетъ дне́сь съ на́ми, въ бжⷭ҇твеннѣмъ введе́нїи бг҃оѻтрокови́цы и҆ мт҃ре гдⷭ҇ни, ѿ і҆ѡакі́ма же и҆ а҆́нны, вкꙋ́пѣ тве́рдагѡ меркꙋ́рїа, и҆ пресла́вныѧ є҆катері́ны: и҆́хже моли́твами ѡ҆брѣстѝ на́мъ ѡ҆ставле́нїе мно́гихъ согрѣше́нїй, мо́лимсѧ.
На хвали́техъ стїхи̑ры, на д҃, гла́съ д҃. Поⷣ: Да́лъ є҆сѝ зна́менїе:
Па́мѧть всесвѧще́ннꙋю, ꙳ є҆катері́но всехва́льнаѧ, ꙳ честна́гѡ твоегѡ̀ страда́нїѧ соверша́юще, ꙳ сла́вимъ во гла́сѣхъ непреста́нныхъ, ꙳ дарова́вшаго терпѣ́нїе тебѣ̀ тве́рдое, ꙳ и҆ побѣдоно́снꙋ тѧ̀ показа́вшаго, ꙳ и҆ сло́во тебѣ̀ пода́вшаго, ꙳ ᲂу҆страша́ющаго ри́торы, ꙳ і҆и҃са чл҃вѣколю́бца ꙳ и҆ сп҃са и҆ гдⷭ҇а.
Мч҃нице самово́льнаѧ, ꙳ є҆катері́но всесла́внаѧ, ꙗ҆ви́ласѧ є҆сѝ ꙳ мꙋчи́телѧ благомо́щнѡ ѡ҆бличи́вши, ꙳ и҆ лю́тое неи́стовство многобо́жїѧ, ꙳ бг҃озна́нїѧ сїѧ́нїемъ низлага́ющи, ꙳ и҆ бжⷭ҇твенною благода́тїю: ꙳ ѿѻнꙋ́дꙋже и҆ ꙗ҆́кѡ мꙋ́ченицꙋ, ꙳ и҆ ꙗ҆́кѡ дѣ́вꙋ непоро́чнꙋ, хрⷭ҇то́съ вѣнча̀, ꙳ сп҃съ дꙋ́шъ на́шихъ.
Бл҃года́ть дх҃а, ꙳ є҆катері́но всесла́внаѧ, ꙳ ѿверзе́нїемъ ᲂу҆́стъ прїѧ́ла є҆сѝ: ꙳ ѡ҆чи́стивши тебѐ самꙋ́ю житїе́мъ, ꙳ и҆ по́мысломъ терпѣли́внымъ, ꙳ мꙋчи́телей го́рдость попра́ла є҆сѝ: ꙳ и҆ добро́тѣ тѣле́сной, ꙳ дꙋше́внꙋю красотꙋ̀ бг҃омꙋ́дреннѣ предпочла̀ є҆сѝ, ꙳ страда́льцєвъ ᲂу҆добре́нїе.
Сла́ва, гла́съ в҃. Вавѵ́лы мона́ха:
Житїѐ невеще́ственно навы́кши, сꙋди́ще безбо́жное дости́гши ста́ла є҆сѝ, побѣдоно́сице є҆катері́но честна́ѧ, цвѣтоносѧ́щи бж҃їю свѣ́тлость, и҆ бжⷭ҇твенною мо́щїю ѡ҆дѣѧ́на, повелѣ́нїю мꙋчи́телевꙋ порꙋга́ласѧ є҆сѝ, и҆ ри́торѡвъ ᲂу҆толи́ла є҆сѝ лжи̑выѧ рѣ̑чи, многострада́льнаѧ.
И҆ ны́нѣ, гла́съ ѕ҃. Се́ргїа а҆гїополі́та:
Дне́сь собо́ри вѣ́рныхъ соше́дшесѧ, дꙋхо́внѣ да торжествꙋ́емъ, и҆ бг҃оѻтрокови́цꙋ дв҃ꙋ и҆ бцⷣꙋ, въ хра́мъ гдⷭ҇ень приводи́мꙋ, благоче́стнѡ восхва́лимъ, пред̾избра́ннꙋю ѿ всѣ́хъ родѡ́въ, во ѻ҆би́телище всѣ́хъ цр҃ѧ̀ хрⷭ҇та̀ и҆ бг҃а: дѣ̑вы, свѣщы̀ носѧ́ще, пред̾иди́те, приснодв҃ы чтꙋ́ще честно́е происхожде́нїе: ма́тєри, печа́ль всю̀ ѿложи́вше, ра́достнѡ спослѣ́дствꙋйте мт҃ри бг҃а быва́ющей, и҆ ра́дости мі́ра хода́таицѣ: всѝ ᲂу҆́бѡ ра́достнѡ, є҆́же ра́дꙋйсѧ, со а҆́гг҃ломъ возопїе́мъ ѡ҆бра́дованнѣй, при́снѡ молѧ́щейсѧ ѡ҆ дꙋша́хъ на́шихъ.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ.
Свѣ́тъ тѧ̀ трисїѧ́нный ꙳ вже́гши, бцⷣе, ꙳ въ хра́мѣ сла́вы, ꙳ нбⷭ҇нꙋю тѝ пи́щꙋ посыла́етъ, ꙳ велича́ѧ тѧ̀.
Сті́хъ: Приведꙋ́тсѧ цр҃ю̀ дѣ̑вы въ слѣ́дъ є҆ѧ̀, и҆́скрєннїѧ є҆ѧ̀ приведꙋ́тсѧ тебѣ̀.
И҆зъ ко́рене ᲂу҆́бѡ дв҃дова ꙳ прозѧбла̀ є҆сѝ, дв҃о, ꙳ гаврїи́лъ тебѣ̀ ра́дость приносѧ̀, ꙳ вопїѧ́ше: ꙳ бг҃а роди́ши, пречⷭ҇таѧ.
Сті́хъ: Приведꙋ́тсѧ въ весе́лїи и҆ ра́дованїи, введꙋ́тсѧ въ хра́мъ цр҃е́въ.
Бла́го же свѧще́нномꙋ ꙳ и҆ бжⷭ҇твенномꙋ сопрѧже́нїю ꙳ і҆ѡакі́ма и҆ а҆́нны, ꙳ и҆зъ ни́хже чⷭ҇таѧ роди́сѧ, ꙳ приведена̀ бы́сть ны́нѣ творцꙋ̀ своемꙋ̀.
Сла́ва, и҆ ны́нѣ, то́йже.
Двє́ри нбⷭ҇ныѧ, ꙳ воспрїими́те дв҃ꙋ марі́ю, ꙳ неискꙋсомꙋ́жнꙋю, ꙳ чⷭ҇тꙋю бцⷣꙋ, ꙳ и҆зъ неѧ́же человѣ́кѡмъ и҆збавле́нїе.
На лїтꙋргі́и, блажє́нна пра́здника, пѣ́снь з҃-ѧ и҆ и҃-ѧ на д҃: и҆ ст҃ы́ѧ пѣ́снь ѕ҃-ѧ. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. Сті́хъ: Въ цр҃квахъ благослови́те бг҃а, гдⷭ҇а ѿ и҆стѡ́чникъ і҆и҃левыхъ. А҆пⷭ҇лъ ко є҆фесе́ємъ, зача́ло сл҃г. А҆ллилꙋ́їа, гла́съ а҃. Воззва́ша пра́веднїи, и҆ гдⷭ҇ь ᲂу҆слы́ша и҆́хъ. Є҆ѵⷢ҇лїе лꙋкѝ, зача́ло р҃ѕ. Прича́стенъ: Ра́дꙋйтесѧ, пра́веднїи, ѡ҆ гдⷭ҇ѣ.
Слꙋ́жба ст҃а́гѡ меркꙋ́рїа мꙋ́ченика смоле́нскагѡ, но́вагѡ чꙋдотво́рца.
На вели́цѣй вече́рни стїхосло́вимъ: Блаже́нъ мꙋ́жъ:
На Гдⷭ҇и, воззва́хъ, стїхи̑ры, гла́съ д҃:
Дрꙋга́го тѧ̀ пое́мъ, и҆мꙋ́щаго поборе́нїе по дꙋ́хꙋ, хрⷭ҇то́въ меркꙋ́рїе, ꙗ҆́кѡ непобѣди́маго во́ина: внегда́ бо по повелѣ́нїю, ᲂу҆го́дниче, гпⷭ҇жѝ и҆ бцⷣы, и҆зше́лъ є҆сѝ на срѣ́тенїе пога́ныхъ си́лъ, и҆ и҆споли́на съ сы́номъ крѣ́пкаго побѣди́лъ є҆сѝ посо́бїемъ бцⷣы. подо́бїе и҆мы́й ꙗ҆́коже ст҃ы́й мꙋ́ченикъ не́сторъ, ꙗ҆́рость прекроти́въ ѕлосвирѣ́пагѡ мꙋчи́телѧ, лі́а бг҃обо́рца побѣдѝ хрⷭ҇то́вымъ и҆́менемъ и҆ си́лою. и҆лѝ тезоимени́томꙋ тѝ свѧто́мꙋ мꙋ́ченикꙋ меркꙋ́рїю: ꙗ҆́коже во а҆леѯандрі́и ѻ҆́нъ побѣди́въ, прободѐ въ се́рдце мꙋчи́телѧ и҆ законопрестꙋ́пника, ревнꙋ́ѧ по благоче́стїи: ты́ же тѣ́хъ подража́ѧ, сопроти́вныхъ и҆ пога́ныхъ и҆ноплемє́нникъ си́лꙋ пресѣ́клъ є҆сѝ, ꙗ҆́кѡ во́инъ до́бръ и҆ неко́сенъ, и҆ соверши́лъ є҆сѝ своѐ подвиза́нїе крѣ́пцѣ, по благовѣ́рїи ст҃ы́ѧ цр҃кве гпⷭ҇жѝ и҆ бцⷣы, со всѣ́ми ᲂу҆гѡ́дники хрⷭ҇та̀ бг҃а, и҆ вѣнча́сѧ ве́рхъ тво́й, свѧ́те и҆ великомꙋ́чениче.
Ꙗ҆́коже ѿ а҆́гг҃ла, и҆лѝ съ нб҃сѐ зна́менїе прїе́млеши: къ тебѣ́ бо по́сланъ быва́етъ слꙋга̀ це́ркве вели́цѣй гпⷭ҇жѝ и҆ бцⷣы, возвѣща́ѧ и҆ велѧ̀ тебѣ̀ и҆зы́ти на срѣ́тенїе си́лъ пога́ныхъ и҆ноплемє́нникъ: гла́сꙋ же къ тебѣ̀ свы́ше соше́дшꙋ: ра́бе мо́й и҆ ᲂу҆го́дниче меркꙋ́рїе, воста́въ препоѧ́шисѧ по́ѧсомъ во́инства, и҆зы́ди ско́рѡ съ вели́кою де́рзостїю сопроти́вныхъ побѣжда́ѧ, съ тобо́ю є҆́смь побора́ющи по благовѣ́рїи: не хощꙋ́ бо, речѐ, зрѣ́ти мое́й плѣне́нѣ бы́ти це́ркви ѿ пога́ныхъ: ᲂу҆моли́хъ бо сн҃а моего̀, да пода́стъ тѝ ѡ҆ се́мъ дерзнове́нїи твое́мъ вѣне́цъ нбⷭ҇ный, ѿ животво́рныѧ десни́цы є҆гѡ̀.
Ѿ ца́рска колѣ́на во́инъ и҆зы́де, и҆ посла́сѧ непобѣди́мый воево́да на́шемꙋ гра́дꙋ, вели́ко поможе́нїе ѿ гпⷭ҇жѝ на́шеѧ бцⷣы: во́инствꙋѧ бо не земно́мꙋ царю̀ ᲂу҆гожда́ѧ, но свы́ше повелѣ́нїе прїе́млѧ, бг҃омꙋ́дре и҆ блаже́нный страда́льче меркꙋ́рїе, жела́нїемъ и҆ ре́вностїю побора́ѧ по благовѣ́рїи, мꙋ́ченически стражда̀, и҆ проти́вныхъ полкѝ побѣжда́ѧ, пога́ныхъ и҆ноплемє́нникъ, и҆ са́мъ нꙋ́ждною сме́ртїю коне́цъ житїю̀ воспрїи́меши, и҆ ко хрⷭ҇тꙋ̀ бг҃ꙋ на нб҃о востече́ши, и҆ ра́вными тебѣ̀ ст҃ы́ми мч҃ники ли́кꙋ сочта́всѧ возме́здїе прїи́меши. тѣ́мже и҆ ны́нѣ мы̀ многогрѣ́шнїи, мо́лимъ тѧ̀, свѧ́те: и҆мѣ́ѧ дерзнове́нїе, помоли́сѧ ѡ҆ гра́дѣ на́шемъ невоева́нꙋ пребы́ти є҆мꙋ̀, и҆ дꙋша́мъ на́шымъ дарова́ти ве́лїю ми́лость.
Сла́ва, гла́съ в҃:
Прїиди́те, благовѣ́рнїи лю́дїе, прїиди́те, со́нмище празднолюбе́зныхъ, пѣ́снь воскли́кнемъ, и҆ рꙋка́ми воспле́щимъ къ застꙋ́пницѣ на́шей и҆ гпⷭ҇жѣ̀ и҆ бцⷣѣ, сы́нове гра́да смоле́нска, ра́достїю покрыва́ющесѧ: ꙗ҆́кѡ посла́сѧ ѿ неѧ̀, непобѣди́мь во́инъ гра́дꙋ на́шемꙋ, ᲂу҆го́дникъ сеѧ̀ сы́й меркꙋ́рїй, мно́гѡ побора́ѧ по на́мъ, пога́ныхъ побѣжда́етъ, и҆ забра́ло быва́етъ тве́рдо ѿ всѣ́хъ ра́тей находѧ́щихъ гра́дꙋ на́шемꙋ. сте́кшесѧ гра́ждане всѝ въ хра́мъ ст҃ы́й гпⷭ҇жѝ и҆ бцⷣы, и҆ пристꙋпи́вше ѡ҆б̾и́мемъ лобза́юще, се́рдцемъ же и҆ ᲂу҆сты̀ гро́бъ ст҃а́гѡ меркꙋ́рїа, и҆ похвала́ми пое́мъ є҆го̀: ра́дꙋйсѧ, вопїю́ще, хꙋдѡ́жства побѣди́вый ѕловѣ́рныхъ ва̑рваръ, и҆ свирѣ́пое и҆́хъ мꙋчи́тельство ѡ҆бличи́вый, и҆ ве́лїе дерзнове́нїе ѿ хрⷭ҇та̀ бг҃а прїи́мый. и҆ ны́нѣ, свѧ́те, мо́лимъ тѧ̀: не забꙋ́ди твоегѡ̀ гра́да и҆ люде́й живꙋ́щихъ въ не́мъ, и҆дѣ́же є҆́сть гро́бъ съ блаже́ннымъ тѣ́ломъ твои́мъ: моли́сѧ побѣ́дꙋ да́ти гра́дꙋ на́шемꙋ, и҆ дꙋша́мъ на́шымъ проще́нїе мно́гихъ грѣхѡ́въ, и҆ ве́лїю ми́лость.
И҆ ны́нѣ, бг҃оро́диченъ: Пре́йде сѣ́нь зако́ннаѧ:
Вхо́дъ. Прокі́менъ днѐ. Чтє́нїѧ г҃. Пи́саны сегѡ̀ мцⷭ҇а въ к҃в де́нь, мїхаи́лꙋ тферско́мꙋ.
На стїхо́внѣ стїхи̑ры, гла́съ д҃. Поⷣ: Ꙗ҆́кѡ до́блѧ:
Многоѻбра́зными мꙋчє́нїи, ꙳ лю́тый мꙋчи́тель ка́знемъ ѕлы̑мъ преда́въ казни́ти ꙳ многострада́льное и҆ долготерпѣли́вое тѣ́ло твоѐ, ꙳ бг҃омы́сленне меркꙋ́рїе, ꙳ не ѿве́рглсѧ є҆сѝ хрⷭ҇та̀, ꙳ ни кꙋмі́рѡмъ поже́рлъ є҆сѝ, ꙳ по терпѣ́лъ є҆сѝ, ꙳ ꙗ҆́кѡ и҆но́мꙋ стра́ждꙋщꙋ, ꙳ ѡ҆жида́ѧ бꙋ́дꙋщагѡ возда́нїѧ, и҆ безсме́ртнагѡ бг҃осло́вїѧ.
Сті́хъ: Пра́ведникъ, ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ.
Воздви́жемь и҆ стрꙋ́жемь, ꙳ и҆ ка́менїемъ посыпа́емь, и҆ желѣ́зомъ ᲂу҆ранѧ́емь, ꙳ и҆ мече́мъ скончава́емь, ꙳ непрекло́ненъ пребы́лъ є҆сѝ, ꙳ на ка́мени ᲂу҆́мнѣмъ ꙳ дꙋ́шꙋ твою̀ водрꙋзи́въ. ꙳ и҆ сегѡ̀ ра́ди а҆́гг҃льскимъ ликѡ́мъ сочета́лсѧ є҆сѝ, ꙳ свѣ́та невече́рнѧгѡ сподоблѧ́емь.
Сті́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ процвѣтꙋ́тъ.
И҆сцѣле́нїе дарова́нїй, ꙳ жела́ющымъ и҆сточа́ютъ сла́вне, ꙳ твоѧ̑ мо́щи, ꙳ и҆ потоплѧ́ютъ страсте́й недꙋ́ги, меркꙋ́рїе, ꙳ и҆ разорѧ́ютъ лꙋка́выхъ де́мѡнѡвъ толпы̑, ꙳ напаѧ́ютъ же вѣ́рныхъ сердца̀, прозѧба̑ющаѧ добродѣ́телей ꙳ плоды̀ бжⷭ҇твєнныѧ, ꙳ и҆ благоче́стїѧ разꙋмѣ́нїе.
Сла́ва, гла́съ в҃:
Житїе́мъ до́брымъ и҆ чистото́ю, свѧ́те, ᲂу҆гожда́ѧ хрⷭ҇тꙋ̀ бг҃ꙋ, и҆ тогѡ̀ ро́ждшей бг҃ома́тери, къ сꙋди́щємъ безбо́жныхъ и҆ноплемє́нникъ постиза́еши, повелѣ́нїемъ да́же подо́бнѣ и҆сходѧ́й на противоборю́щыѧ, цѣломꙋ́дрїе проти́вꙋ ѕловѣ́рнѣ цѣлꙋ́ющагѡ, меркꙋ́рїе: тꙋ̀ побѣ́дꙋ носѧ̀ подвиза́ешисѧ, и҆ чꙋ́до вели́ко ѡ҆ себѣ̀ сотворѧ́ѧ, ра́тника съ вели́кими си́лами побѣди́въ хрⷭ҇то́вою си́лою, и҆ са́мъ тꙋ̀ внѣ̀ предъ гра́домъ, блаже́нне, коне́цъ воспрїѧ́лъ є҆сѝ, и҆ си́мъ чꙋдесе́мъ гра́дъ ᲂу҆дивлѧ́еши: ѿсѣ́ченнꙋю бо твою̀ свѧтꙋ́ю главꙋ̀ ѿ и҆ноплеме́нника сꙋдо́мъ бж҃їимъ, са́мъ ꙗ҆́кѡ жи́въ по сме́рти съ тѣ́ломъ во гра́дъ вне́слъ є҆сѝ, и҆ ны́нѣ побѣ́ды вѣне́цъ и҆мѣ́еши. тѣ́мже и҆ мы̀ подвиза́ющесѧ мо́лимъ тѧ̀, ѡ҆бстоѧ́ще, свѧ́те, гро́бъ тво́й, да прише́дъ побо́реши на гра́дъ тво́й и҆ лю́ди держа́вы гпⷭ҇жѝ и҆ бцⷣы, ѕлѣ̀ ра́тꙋющыѧ, ѿ хрⷭ҇та̀ бг҃а просѧ̀ на́мъ ми́ра, и҆ ве́лїѧ ми́лости.
И҆ ны́нѣ, бг҃оро́диченъ воскрⷭ҇нъ, по гла́сꙋ. Тропа́рь, гла́съ д҃:
Мꙋ́ченикъ тво́й, гдⷭ҇и, меркꙋ́рїй, во страда́нїи свое́мъ вѣне́цъ прїѧ́тъ нетлѣ́нный ѿ тебє̀ бг҃а на́шегѡ: и҆мѣ́ѧй бо крѣ́пость твою̀, мꙋчи́телей низложѝ, сокрꙋшѝ и҆ де́мѡнѡвъ немощны̑ѧ де́рзѡсти. тогѡ̀ моли́твами спасѝ дꙋ́шы на́шѧ.
Сла́ва, и҆ ны́нѣ, бг҃оро́диченъ воскрⷭ҇нъ.
На ᲂу҆́трени, на Бг҃ъ гдⷭ҇ь: тропа́рь то́йже.
По а҃-й каѳі́смѣ сѣда́ленъ, гла́съ а҃. Подо́бенъ: Ли́къ а҆́гг҃льскїй:
Во́инство на землѝ возненави́дѣвъ, мч҃ниче, на нб҃сѣ́хъ возжелѣ́лъ є҆сѝ сла́вꙋ, и҆ болѣ̑зни претерпѣ́лъ є҆сѝ и҆ нꙋ́жднꙋю сме́рть. тѣ́мже дне́сь всесвѧтꙋ́ю твою̀ па́мѧть пра́зднꙋемъ, хрⷭ҇тꙋ̀ приносѧ́ще хвалꙋ̀, пребл҃же́нне меркꙋ́рїе.
Два́жды.
Сла́ва, и҆ ны́нѣ, бг҃оро́диченъ:
Мт҃рь тѧ̀ бж҃їю и҆ дв҃ꙋ мо́лимъ всѝ вои́стиннꙋ, въ щедрѡ́ты твоѧ̑ вопїе́мъ, любо́вїю прибѣга́юще къ твое́й бла́гости: тѧ́ бо и҆́мамы грѣ́шнїи застꙋ́пницꙋ, и҆ тебѐ стѧжа́хомъ въ напа́стехъ спасе́нїе, є҆ди́нꙋ пречⷭ҇тꙋю.
По в҃-й каѳі́смѣ сѣда́ленъ, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Тече́нїе соверши́въ и҆́стинно, и҆ мꙋчи́телей всю̀ крѣ́пость побѣди́лъ є҆сѝ, прїи́мъ вѣне́цъ ѿ рꙋкѝ вседержи́телѧ, меркꙋ́рїе всече́стне, и҆ показа́лсѧ є҆сѝ а҆́гг҃лѡмъ соприча́стникъ.
Два́жды.
Сла́ва, и҆ ны́нѣ, бг҃оро́диченъ:
Сло́во ѻ҆́ч҃ее, хрⷭ҇та̀ бг҃а на́шего, и҆зъ тебє̀ вопло́щшеесѧ разꙋмѣ́хомъ, бцⷣе дв҃о, є҆ди́на чⷭ҇таѧ и҆ бл҃гослове́ннаѧ. тѣ́мже всегда̀ прославлѧ́емъ тѧ̀ велича́юще.
По полѷеле́и сѣда́ленъ, гла́съ д҃:
Во́ина хрⷭ҇то́ва непобѣди́маго, побѣди́телѧ на врагѝ до́блѧго, въ вели́кихъ чꙋдесѣ́хъ возсїѧ́вшаго при́снѡ всѝ восхва́лимъ вѣ́рою меркꙋ́рїа страстоте́рпца: то́читъ бо цѣльбы̑ прири́щꙋщымъ вѣ́рою, и҆ ᲂу҆толѧ́етъ стра̑сти лю̑тыѧ, и҆ сꙋ́щыѧ въ ско́рбехъ человѣ́ки застꙋпа́етъ.
Два́жды.
Сла́ва, и҆ ны́нѣ, бг҃оро́диченъ:
Стѣна̀ непобѣди́маѧ на́мъ хрⷭ҇тїа́нѡмъ є҆сѝ, бцⷣе дв҃о: къ тебѣ́ бо прибѣга́юще невреди́ми пребыва́емъ, и҆ па́ки согрѣша́юще и҆́мамы тѧ̀ моли́твенницꙋ. тѣ́мъ благодарѧ́ще вопїе́мъ тѝ: ра́дꙋйсѧ, ѡ҆бра́дованнаѧ, гдⷭ҇ь съ тобо́ю.
Та́же степє́нна, а҃ а҆нтїфѡ́нъ, д҃-гѡ гла́са. Прокі́менъ: Пра́ведникъ, ꙗ҆́кѡ фі́нїѯъ, процвѣте́тъ: Сті́хъ: Насажде́ни въ домꙋ̀ гдⷭ҇ни: Всѧ́кое дыха́нїе: Є҆ѵⷢ҇лїе лꙋкѝ, зача́ло р҃ѕ.
По н҃-мъ ѱалмѣ̀ стїхи́ра, гла́съ ѕ҃:
Дне́сь вселе́ннаѧ всѧ̀ страстоте́рпца лꙋча́ми просвѣща́ема, и҆ бж҃їѧ цр҃ковь цвѣ̑ты ᲂу҆краша́ема, мꙋ́чениче меркꙋ́рїе, вопїе́тъ тѝ: ᲂу҆го́дниче хрⷭ҇то́въ и҆ застꙋ́пниче те́плый, не преста́й молѧ́сѧ за рабы̑ твоѧ̑.
Канѡ́нъ пра́здника со і҆рмосо́мъ на ѕ҃: И҆ ст҃а́гѡ на и҃.
Гла́съ и҃. Пѣ́снь а҃. І҆рмо́съ:
Посѣ́ченный несѣко́маго пресѣчѐ, и҆ ви́дѣ со́лнце зе́млю, ю҆́же не ви́дѣ, лю́таго врага̀ вода̀ потопѝ, и҆ непроходи́мое про́йде і҆и҃ль, пѣ́снь же воспѣва́шесѧ: гдⷭ҇еви пои́мъ, сла́внѡ бо просла́висѧ.
Ѿ вы́шнихъ повелѣ́нїй, свѧ́те, во́инствꙋеши, съ вы́шними ли̑ки предстои́ши благи́хъ и҆сто́чникꙋ, и҆ ра́дости бжⷭ҇твеннагѡ наслажде́нїѧ, приснопа́мѧтне, наслажда́ешисѧ, сохранѧ́й тве́рдѣ гра́дъ, въ не́мже соверша́ютъ, сла́вне, па́мѧть твою̀, гдⷭ҇еви пою́ще: сла́внѡ бо просла́висѧ:
По́двигъ тво́й ре́вности свидѣ́тельствова, мꙋ́дре, си́лою ᲂу҆крѣплѧ́емь хрⷭ҇то́вою, и҆ проти́въ ра̑тникъ и҆схо́диши, и҆ ра́дꙋѧсѧ претерпѣ́лъ є҆сѝ главы̀ твоеѧ̀ ѿсѣче́нїе, и҆ вопїѧ́ше сла́внѡ повелѣ́нїемъ є҆ѧ̀.
Стра́жъ гра́дꙋ ꙗ҆ви́лсѧ є҆сѝ, и҆ мꙋчи́телѧ ꙗ҆́вѣ ᲂу҆кори́лъ є҆сѝ, и҆ болѣ́зненное ѿ ни́хъ видѣ́нїе веселѧ́сѧ претерпѣ́лъ є҆сѝ, меркꙋ́рїе, вопїѧ̀ и҆ молѧ́сѧ къ посла́вшей тѧ̀: гдⷭ҇еви пои́мъ, сла́внѡ бо просла́висѧ.
Бг҃оро́диченъ:
Ꙗ҆́коже и҆ въ кесарі́и равноименова́нное тебѣ̀ прїе́млеши сꙋ́ще зва́нїе, та́кожде и҆ здѣ̀ и҆зво́ли благочести́ваѧ цр҃и́ца, посыла́етъ тѧ̀, меркꙋ́рїе, бцⷣа, мꙋ́чениче: къ то́й помоли́сѧ ѡ҆ мнѣ̀ ѻ҆каѧ́ннѣмъ, ми́лостива ѡ҆брѣстѝ на стра́шнѣмъ сꙋдѣ̀ сн҃а є҆ѧ̀.
Катава́сїа: Хрⷭ҇то́съ ражда́етсѧ:
Пѣ́снь г҃. І҆рмо́съ:
Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ, па́че тебє̀, є҆ди́не чл҃вѣколю́бче.
Ѿ младе́нства вво́инилсѧ є҆сѝ хрⷭ҇тꙋ̀, ро́дъ и҆ бога́тство ѻ҆те́чества ѡ҆ста́вль, и҆ ве́сь разжига́емь бжⷭ҇твенною любо́вїю, и҆ ѿ тогѡ̀ ро́ждшїѧ, сла́вне, стра́жъ гра́дꙋ є҆ѧ̀ посла́лсѧ є҆сѝ.
Воспое́мъ гдⷭ҇а и҆ съ ро́ждшею є҆го̀ бг҃омт҃рїю, пода́вшаго стра́жа тве́рда гра́дꙋ на́шемꙋ, во́ина до́блѧго меркꙋ́рїа и҆ чꙋде́съ и҆спо́лненнаго.
Десни́цею ᲂу҆крѣплѧ́емь влⷣчнею, вра́жїе па́гꙋбное наше́ствїе побѣди́лъ є҆сѝ ꙗ҆́кѡ до́бръ страда́лецъ, бг҃омꙋ́дре, за хра́мъ бцⷣы и҆ за благовѣ́рїе.
Бг҃оро́диченъ:
Ѽ гдⷭ҇а моегѡ̀ мт҃и! ты̀ наде́жда ѿча́ѧнныхъ, и҆ помо́щница всѣ̑мъ грѣ́шникѡмъ: не пре́зри, ми́лостиваѧ цр҃и́це, менє̀ ѻ҆каѧ́ннагѡ лю́тѣ и҆ пребезмѣ́рнѡ согрѣши́вшагѡ, па́че человѣ́ческагѡ є҆стества̀.
Сѣда́ленъ меркꙋ́рїа, гла́съ д҃. Подо́бенъ: Ско́рѡ предварѝ:
Ри́млѧнинъ ро́домъ сы́й, но вѣ́рою благовѣ́рною ѡ҆гражде́нъ, а҆ не полꙋвѣ́рїемъ болѧ́й, но ᲂу҆го́дникъ бг҃ꙋ бы́сть, и҆ тогѡ̀ ро́ждшей: льсти́вагѡ ра́тника посрамѝ, и҆споли́на съ сы́номъ поразѝ, и҆ вѣне́чникъ хрⷭ҇то́въ ꙗ҆ви́сѧ, и҆ сла́вы ра́достныѧ причасти́сѧ: сегѡ̀ ра́ди свѧще́ннꙋю є҆гѡ̀ па́мѧть пра́зднꙋемъ ны́нѣ.
Два́жды.
Сла́ва, и҆ ны́нѣ, бг҃оро́диченъ:
Данїи́лъ тѧ̀ го́рꙋ ве́лїю наречѐ, и҆́нъ же́злъ и҆ катапета́смꙋ, і҆езекі́иль же две́рь, є҆́юже про́йде хрⷭ҇то́съ бг҃ъ, бцⷣе: не пре́зри, ми́лостиваѧ, но прїимѝ мои́хъ скве́рныхъ ѻ҆каѧ́нныхъ ᲂу҆сте́нъ моле́нїе, и҆ тꙋ́не покажѝ, гпⷭ҇жѐ, твою̀ ми́лость на мнѣ̀ многогрѣ́шнѣмъ.
Пѣ́снь д҃. І҆рмо́съ:
Оу҆слы́шахъ, гдⷭ҇и, слꙋ́хъ тво́й, и҆ ᲂу҆боѧ́хсѧ, ꙗ҆́кѡ неизрече́ннымъ совѣ́томъ, бг҃ъ сы́й присносꙋ́щный, ѿ дв҃ы прише́лъ є҆сѝ вопло́щсѧ: сла́ва снизхожде́нїю твоемꙋ̀, хрⷭ҇тѐ, сла́ва си́лѣ твое́й.
Ꙗ҆́коже и҆ во свое́мъ ѻ҆те́чествѣ присво́илсѧ є҆сѝ любе́знѣ зижди́телю, и҆ свѣ́тлый вѣне́цъ ѿ негѡ̀ воспрїѧ́лъ є҆сѝ, и҆ во́инствовалъ є҆сѝ по благовѣ́рїи, ꙗ҆́кѡ непобѣди́мь, свѧ́те меркꙋ́рїе: помоли́сѧ, ѿ негѡ́же полꙋчи́лъ є҆сѝ дерзнове́нїе, ѡ҆ мнѣ̀ ѻ҆каѧ́ннѣмъ, да полꙋчꙋ̀ ми́лость.
И҆стка̀ себѣ̀ порфѵ́рꙋ благоче́стїѧ па́че ѻ҆тє́цъ свои́хъ, въ ню́же ѡ҆бо́лксѧ, и҆ во́инъ крѣ́покъ показа́сѧ, и҆ ме́ртвости совлечѐ ри́зꙋ невѣ́рїѧ, и҆ поѧ́ше: сла́ва си́лѣ твое́й, гдⷭ҇и.
Да́же до кро́ве ста́въ, подвиза́лсѧ є҆сѝ, побѣжда́ѧ проти̑вныѧ ра́тники, побѣдоно́сецъ показа́лсѧ є҆сѝ и҆ вы́шнїѧ сла́вы сподо́бивсѧ, меркꙋ́рїе.
Бг҃оро́диченъ:
Ꙗ҆́коже до́ждь на рꙋно̀ сни́де, та́коже въ твою̀ пречⷭ҇тꙋю ᲂу҆тро́бꙋ сло́во спаси́тельное сни́де, приснодв҃о: ты́ же, бцⷣе, ꙗ҆́кѡ тꙋ́ча, и҆зсꙋшѝ мно́гихъ мои́хъ ѕѡ́лъ бре́мѧ.
Пѣ́снь є҃. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Распросте́ръ рꙋ́цѣ протѧ́гъ ѕлы́й ва́рваринъ, хотѧ̀ внеза́пꙋ наитѝ на гра́дъ и҆ хра́мъ бцⷣы: ты́ же неѡсла́бнѡ просте́ръ твоѧ̑ со ѻ҆рꙋ́жїемъ ст҃ы̑ѧ рꙋ́ки, и҆зше́лъ є҆сѝ, и҆ побѣди́лъ є҆сѝ проти́вника, и҆ ѿтꙋ́дꙋ вѣнча́лсѧ є҆сѝ.
И҆́же со́лнцꙋ и҆ ѻ҆гню̀ слꙋжѧ̀ прїи́де: ты́ же, свѧ́те, хрⷭ҇тꙋ̀ и҆ тогѡ̀ мт҃ри слꙋжѧ̀ и҆зше́лъ є҆сѝ, и҆ тогѡ̀ си́лꙋ пресѣ́клъ є҆сѝ, и҆ гра́дъ свободи́лъ є҆сѝ, и҆ са́мъ ѿ хрⷭ҇та̀ просла́вилсѧ є҆сѝ.
Прича́стникъ стрⷭ҇те́й влⷣчнихъ ꙗ҆ви́сѧ меркꙋ́рїй, и҆ сла́вы тогѡ̀ приѻ́бщникъ бы́въ, и҆ тогѡ̀ бж҃е́ственнꙋю свѣ́тлость наслѣ́дова.
Бг҃оро́диченъ:
Оу҆мертвѝ, ѽ дв҃о, живꙋ́щїй во мнѣ̀ грѣ́хъ, жи́знь ро́ждшаѧ, и҆ ᲂу҆мертви́вшаго сме́рть.
Пѣ́снь ѕ҃. І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Вжилѧ́ше тѧ̀ присносꙋ́щное ѿ высоты̀, меркꙋ́рїе, зва́нїе всеви́дѧщее: и҆ слꙋга̀ цр҃ко́вный, мꙋ́дре, ᲂу҆вѣ́ри тѧ̀ ꙗ҆́коже а҆́гг҃лъ, повелѣва́ше тѝ дерза́ти, и҆ ника́коже ᲂу҆страши́тисѧ ва́рварска наше́ствїѧ.
Оу҆мерщвле́нъ бы́сть ѕмі́й вселꙋка́вый, и҆ не сбы́стсѧ ѕлохи́трїе є҆гѡ̀, но нога́ми попра́сѧ кра́сными до́блѧгѡ во́ина, и҆ ѻ҆рꙋ́жника хрⷭ҇то́ва меркꙋ́рїа: вше́дъ бо побѣдѝ пога́нина.
Всесоверше́нно влⷣцѣ прине́слъ є҆сѝ серде́чное и҆зволе́нїе, мꙋ́чениче, и҆ тогѡ̀ ра́ди и҆зше́лъ є҆сѝ проти́вѡ ра́ти пога́нскихъ си́лъ, и҆ побѣди́тель ве́лїй показа́лсѧ є҆сѝ: и҆ ны́нѣ на нб҃сѝ предстои́ши, меркꙋ́рїе.
Бг҃оро́диченъ:
Зача́тїе неизрече́нно, ржⷭ҇тво̀ неизглаго́ланно, ѻ҆трокови́це, ꙗ҆́кѡ бг҃а ражда́еши пло́тїю. ᲂу҆ми́лостивисѧ ѡ҆ мнѣ̀ ѻ҆каѧ́ннѣмъ, да ᲂу҆лꙋчꙋ̀ и҆ а҆́зъ лише́нный застꙋпле́нїе твоѐ.
Конда́къ, гла́съ д҃.
Ꙗ҆ви́сѧ во бранѣ́хъ непобѣди́мь во́инъ, ѿ ри́млѧнъ ро́домъ, сыновство̀ и҆мѣ̀ гра́да смоле́нска: ꙗ҆́кѡ бо си́хъ ра́ди нарече́сѧ, ꙗ҆́кѡ ѿ бцⷣы стра́жъ крѣ́покъ посла́сѧ гра́дꙋ: пѣ́сньми меркꙋ́рїа ᲂу҆блажи́мъ, пра́зднꙋюще ве́селѡ па́мѧть є҆гѡ̀, ꙗ҆́кѡ да и҆зба́витъ гра́дъ на́шъ ѿ бѣды̀ ра̑тникъ.
І҆́косъ:
Горды́ню низложи́въ льсти́вагѡ мꙋчи́телѧ, на правосла́вїе возносѧ́щагѡсѧ нечести́вагѡ, и҆ до конца̀ сегѡ̀ лю́тагѡ ѕмі́ѧ главꙋ̀ ѿсѣ́клъ є҆сѝ, свѧ́те меркꙋ́рїе, и҆ пꙋ́ста є҆го̀ сотво́рь, и҆ па́мѧть є҆гѡ̀ съ шꙋ́момъ бы́сть: ты́ бо и҆схо́диши на предгра́дїе є҆ди́нъ, бра́тисѧ съ ты́сѧщами безбо́жныхъ ва̑рваръ: ꙗ҆́кѡ бо ѿ высоты̀ и҆мѣ́ѧ повелѣ́нїе, наде́ждꙋ и҆ ᲂу҆пова́нїе ѿ самы́ѧ гпⷭ҇жѝ и҆ бцⷣы, застꙋпа́ющїѧ и҆ помога́ющїѧ тебѣ̀. тоѧ́ же посо́бїемъ непобѣди́мымъ, и҆ ра́тника ѕлоко́зненнаго крѣ́пкѡ ᲂу҆дави́лъ є҆сѝ, и҆ мно́жество си́лъ є҆гѡ̀ побѣди́лъ є҆сѝ, и҆ сама́го мꙋчи́телѧ посрами́лъ є҆сѝ. тѣ́мже, крѣ́пкїй хрⷭ҇то́въ во́ине, зове́мъ тѝ ра́достнѡ, и҆ ве́селѡ пра́зднꙋемъ па́мѧть твою̀: ꙗ҆́кѡ да и҆зба́виши гра́дъ на́шъ ѿ бѣды̀ ра̑тникъ.
Пѣ́снь з҃. І҆рмо́съ:
Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: благослове́нъ є҆сѝ, гдⷭ҇и бж҃е, во вѣ́ки.
Свѣ́томъ вы́шнѧгѡ сїѧ́нїѧ ѡ҆зарѧ́емь, до́блїй во́ине, воспѣва́ющыѧ ны́нѣ па́мѧть твою̀ просвѣтѝ, пою́щыѧ: бл҃гослове́нъ бг҃ъ ѻ҆тє́цъ на́шихъ.
Воспѣва́лъ є҆сѝ всѣ́хъ бл҃годѣ́телѧ распалѧ́ѧсѧ, и҆ и҆зше́дъ на побѣжде́нїе ра́тникѡвъ, ѻ҆гнѧ̀ ре́вностїю, бл҃же́нне, жего́мь, и҆ поѧ̀: бл҃гослове́нъ є҆сѝ гдⷭ҇и, бж҃е ѻ҆тє́цъ на́шихъ.
Въ кро́ви проти́вꙋ ста́лъ є҆сѝ беззако́нныхъ ѡ҆полче́нїѧ, свѧ́те, ка́менїю и҆ ѻ҆гню̀ кла́нѧющихсѧ: ты́ же къ ка́мени хрⷭ҇тꙋ̀ вопїѧ̀, си́хъ побѣди́лъ є҆сѝ, поѧ̀: бл҃гослове́нъ є҆сѝ гдⷭ҇и, бж҃е ѻ҆тє́цъ на́шихъ.
Зе́млю ѡ҆багри́въ, бл҃же́нне меркꙋ́рїе, кро́вїю твое́ю, влⷣки чл҃вѣколю́бца, жела́ѧ ѻ҆́бщникъ тогѡ̀ бы́ти, поѧ̀: бл҃гослове́нъ є҆сѝ гдⷭ҇и, бж҃е ѻ҆тє́цъ на́шихъ.
Бг҃оро́диченъ:
Чи́ни а҆́гг҃льстїи ᲂу҆дивлѧ́ютсѧ та́инства твоегѡ̀ глꙋбинѣ̀, бцⷣе, бг҃ъ бо и҆зъ тебє̀ воплоще́нъ ꙗ҆ви́сѧ, є҆го́же похва́лимъ, бж҃е, бл҃гослове́нъ є҆сѝ.
Пѣ́снь и҃. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Благоче́стнѡ и҆ мꙋ́дреннѡ по́двигъ тво́й, сла́вне, соверши́лъ є҆сѝ, и҆ доблемꙋ́дреннѡ врагѝ твоѧ̑ побѣди́лъ є҆сѝ, ꙗ҆́кѡ бо дарова́сѧ тебѣ̀, свѧ́тче, побѣ́да нбⷭ҇наѧ. тѣ́мже воспѣ́лъ є҆сѝ: свѧще́нницы, воспо́йте, лю́дїе, превозноси́те гдⷭ҇а во вѣ́ки.
Сконча́всѧ, свѧ́те, ѿ и҆споли́на, меркꙋ́рїе, мече́мъ бо ѿсѣчѐ главꙋ̀ твою̀, и҆ ѿтꙋ́дꙋ полꙋчи́лъ є҆сѝ жела́емаго тобо́ю вѣнца̀, и҆ зе́млю кро́вїю ѿ твои́хъ ᲂу҆де́съ и҆стече́нїемъ напои́лъ є҆сѝ, поѧ̀: свѧще́нницы, воспо́йте, лю́дїе, превозноси́те гдⷭ҇а во вѣ́ки.
Бг҃оро́диченъ:
Ꙗ҆́кѡ на́шего сꙋщества̀ поновле́нїе, пречⷭ҇таѧ, всѝ вино́внꙋ вѣ́рнїи пое́мъ тѧ̀: бг҃а бо па́че сло́ва родила̀ є҆сѝ, є҆ди́на па́че земноро́дныхъ: твои́мъ бл҃гоꙋтро́бїемъ и҆ на́съ ѡ҆зарѝ пою́щихъ тѧ̀.
Пѣ́снь ѳ҃. І҆рмо́съ:
Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.
Гно́еве мꙋ́ченичестїи благово́нїе ны́нѣ и҆спꙋща́ютъ бл҃года́тное, смра̑дныѧ на́шѧ стра̑сти и҆сцѣлѣва́ютъ: и҆сточа́ютъ бо ст҃ы̑ѧ и҆́хъ мѡ́щи цѣлє́бныѧ во́ды, и҆ напоѧ́ютъ дꙋ́шы пою́щихъ тѣ́хъ чꙋдодѣѧ́нїе.
Ꙗ҆́кѡ вели́ка столпа̀, и҆ тве́рдо забра́ло дарова́ тѧ̀ хрⷭ҇то́съ, меркꙋ́рїе, гра́дꙋ семꙋ̀: и҆дѣ́же ны́нѣ то́чиши чꙋде́съ стрꙋю̀, и҆ помога́еши побѣ́дою на пога̑ныѧ.
Спомо́щника и҆мѣ́ѧхꙋ всѝ гра́ждане, страстоте́рпче хрⷭ҇то́въ до́блественный, копїѐ и҆ щи́тъ тво́й вы́нꙋ вели́кое посо́бїе и҆мꙋ́ще тѧ̀ велича́ютъ, хрⷭ҇та̀ бг҃а сла́вѧще вѣнча́вшаго тѧ̀.
Бг҃оро́диченъ:
Просвѣтѝ, две́ре свѣ́та, ѡ҆мраче́ннꙋю дꙋ́шꙋ мою̀ страстьмѝ, и҆ лꙋка́выми пѡ́мыслы ѡ҆чернѣ́вшꙋю и҆ бѣ́дствꙋющꙋю, и҆ и҆зба́ви и҆скꙋше́нїй и҆ бѣ́дъ и҆ скорбе́й: да сла́влю тѧ̀, ᲂу҆пова́нїе вѣ́рныхъ и҆ ᲂу҆твержде́нїе.
Свѣти́ленъ. Подо́бенъ: Дх҃омъ во ст҃и́лищи:
Женихꙋ̀ свѣщꙋ̀ соблю́лъ є҆сѝ, жестокꙋ̀ стезю̀ ше́ствовалъ є҆сѝ, въ бжⷭ҇твєнныѧ стєзѝ вше́дъ, и҆ простра́нствꙋ ра́йскомꙋ чи́стою пло́тїю дости́глъ є҆сѝ, и҆ свѣ́тлѡ ѿ ст҃ы́ѧ трⷪ҇цы вѣнча́лсѧ є҆сѝ: чтꙋ́щыѧ тѧ̀ помѧнѝ, свѧ́те меркꙋ́рїе.
Бг҃оро́диченъ:
Ꙗ҆́кѡ застꙋ́пницꙋ нера́тнꙋ, предгра́дїе вои́стиннꙋ предлага́ю покро́въ тво́й, бцⷣе дв҃о, хода́таицꙋ же къ бг҃ꙋ, и҆зба́витисѧ мѝ, влⷣчце, мꙋ́ки вѣ́чныѧ, и҆ жи́зни нетлѣ́нныѧ тобо́ю причасти́тисѧ нбⷭ҇нагѡ црⷭ҇твїѧ.
На хвали́техъ стїхи̑ры на д҃, гла́съ д҃. Пи́саны ве́чера, на Гдⷭ҇и, воззва́хъ:
Сла́ва, гла́съ то́йже.
Столпа̀ твердѣ́йшаго, и҆ забра́ло тве́рдо гра́да на́шегѡ воспое́мъ, и҆ желѣ̑знаѧ врата̀ сꙋ́ща, и҆ посо́бїе крѣ́пко и҆мꙋ́ща со ѻ҆рꙋ́жїемъ ст҃а́го меркꙋ́рїа. тѣ́мже къ немꙋ̀ молѧ́щесѧ возопїи́мъ: свѧ́тче, не забꙋ́ди на́съ предстоѧ́щихъ гро́бꙋ твоемꙋ̀, но моли́сѧ къ чл҃вѣколю́бцꙋ бг҃ꙋ, спастѝ дꙋ́шы на́шѧ.
И҆ ны́нѣ, бг҃оро́диченъ:
Славосло́вїе вели́кое. И҆ ѿпꙋ́стъ.
На лїтꙋргі́и: слꙋ́жба мꙋ́ченическаѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.