← претходни дан | Минеј — Новембар | следећи дан →
14 ноября: Святого апостола Филиппа
Мѣ́сѧца тогѡ́же въ д҃і-й де́нь.
Ст҃а́гѡ и҆ всехва́льнагѡ а҆пⷭ҇ла фїлі́ппа.
И҆ ст҃и́телѧ григо́рїѧ пала́мы. Слꙋ́жба є҆гѡ̀ пи́сана въ приложе́нїи.
На вече́рни пое́мъ, Бл҃же́нъ мꙋ́жъ: а҃-й а҆нтїфѡ́нъ.
На Гдⷭ҇и, воззва́хъ, стїхи̑ры, а҆пⷭ҇ла, на и҃. гла́съ ѕ҃. Поⷣ: Всѐ ѿло́жше:
Дѣѧ́нїе ᲂу҆́бѡ восхожде́нїе ꙳ и҆́стиннагѡ видѣ́нїѧ, ꙳ видѣ́нїе же коне́цъ бг҃олюби́вагѡ дѣѧ́нїѧ, ꙳ бл҃же́нне, положи́въ, ꙳ хрⷭ҇та̀ моли́лъ є҆сѝ, ꙳ ѻ҆́ч҃ꙋю сла́вꙋ показа́ти тебѣ̀ неизрече́ннꙋю: ꙳ и҆́бо жела́етъ всѧ́ко слове́сное є҆стество̀, сла́вне, ꙳ бг҃а соста́вльшаго, ꙳ и҆ жела́емаго полꙋчи́лъ є҆сѝ, ꙳ тогѡ̀ а҆́бїе прїе́мь печа́ть сн҃а: ꙳ є҆го́же со дерзнове́нїемъ молѝ ѡ҆ дꙋша́хъ на́шихъ.
Три́жды.
Бжⷭ҇твенными восхождє́нїи ꙳ всегда̀ наꙋча́емь, ꙳ ꙗ҆́кѡ мѡѷсе́й пе́рвѣе, ꙳ бг҃а ви́дѣти возжелѣ́лъ є҆сѝ: ꙳ и҆ мы́сленнѡ ви́дѣлъ є҆сѝ тогѡ̀ ѻ҆́бразъ, ꙳ прїе́мъ къ подо́бїю. ꙳ ѻ҆ц҃а́ бо ско́рое ᲂу҆вѣ́дѣнїе ꙳ сн҃ъ и҆ ᲂу҆каза́нїе: ꙳ сн҃а же и҆ роди́телѧ ꙳ є҆ди́но сꙋщество̀ зна́етсѧ, ꙳ и҆ ѿ всѣ́хъ то́ждество возно́ситсѧ че́стнѡ, ꙳ и҆ црⷭ҇тво и҆ си́ла, сла́ва и҆ поклоне́нїе.
Три́жды.
Ѻ҆рга́нъ брѧца́ѧ ꙳ бжⷭ҇твенными вдохнове́ньми ꙳ и҆ сказа̑нїи ст҃а́гѡ дх҃а бы́лъ є҆сѝ, ꙳ и҆ премі́рное пѣснопоѧ̀ ꙳ въ мі́рѣ сп҃сово є҆ѵⷢ҇лїе ꙳ ѻ҆́гненнымъ ѧ҆зы́комъ твои́мъ: ꙳ всю́ бо ле́сть попали́лъ є҆сѝ, ꙳ ꙗ҆́кѡ ве́щь ᲂу҆добосожига́емꙋ, ꙳ и҆ ꙗ҆́кѡ травꙋ̀ земнꙋ́ю ᲂу҆вѧда́емꙋ: ꙳ сꙋ́щаго же надъ всѣ́ми влⷣкꙋ и҆ гдⷭ҇а хрⷭ҇та̀ ꙳ вселе́ннѣй проповѣ́далъ є҆сѝ, ꙳ фїлі́ппе бг҃ови́дче.
Два́жды.
Сла́ва, гла́съ ѕ҃ Вѷзанті́ево:
Вели́кагѡ, фїлі́ппе, свѣ́та блиста̑нїи разже́гсѧ, всемі́рный возсїѧ́лъ є҆сѝ свѣти́льникъ, ѻ҆ц҃а́ же свѣ́тѡвъ, въ сн҃ѣ взыска́въ, ѡ҆брѣ́лъ є҆сѝ: во свѣ́тѣ бо свѣ́тъ ѡ҆брѣта́етсѧ. и҆́бо то́й печа́ть равноѻбра́зна, ꙗ҆влѧ́ѧ началоѻбра́зное: є҆го́же, а҆пⷭ҇ле, молѝ, запеча́тствѡваннымъ бжⷭ҇твенною спасти́сѧ кро́вїю.
И҆ ны́нѣ, бг҃оро́диченъ: Кто̀ тебѐ не ᲂу҆блажи́тъ:
Вхо́дъ. Прокі́менъ днѐ. И҆ чтє́нїѧ трѝ. Пи́саны сегѡ̀ мцⷭ҇а въ л҃[[Исправлена опечатка оригинала а҃. Прим. orthlib]] де́нь:
На лїті́и стїхи́ра хра́ма, и҆ а҆пⷭ҇ла, гла́съ д҃. Поⷣ: Ꙗ҆́кѡ до́блѧ:
Тро́стїю бл҃года́ти ꙳ ѿ глꙋбины̀ сꙋ́етства ꙳ человѣ́ки и҆звле́клъ є҆сѝ, досточꙋ́дне, ꙳ ᲂу҆ч҃телѧ ма́нїемъ ꙳ повинꙋ́всѧ, фїлі́ппе, ꙳ провѣ́щшагѡ по всемꙋ̀ твоѐ разꙋмѣ́нїе, ꙳ и҆ а҆пⷭ҇ла, и҆ че́стна бг҃оглаго́льника, ꙳ тѧ̀, всебл҃же́нне, показа́вша ꙳ тогѡ̀ непостижи́магѡ бжⷭ҇тва̀.
Дх҃а сїѧ́нїе на тѧ̀ сни́де ꙳ во ѻ҆́гненнѣ ви́дѣ, ꙳ и҆ тѧ̀, блаже́нне, бжⷭ҇твенное прїѧ́телище содѣ́ла, ꙳ ско́рѡ ѿгонѧ́ща безбо́жїѧ мглꙋ̀, ꙳ и҆ мі́ръ просвѣща́юща ꙳ сїѧ́нїемъ всемꙋ́дрыхъ твои́хъ слове́съ, ꙳ тайноглаго́льниче, ꙳ а҆пⷭ҇лѡвъ ᲂу҆краше́нїе, ꙳ хрⷭ҇то́въ самови́дче, блаже́нне.
Мо́лнїѧми проповѣ́данїѧ ꙳ во тмѣ̀ сѣдѧ́щыѧ ꙳ невѣ́дѣнїѧ, сла́вне, просвѣти́въ, ꙳ показа́лъ є҆сѝ сы́ны ꙳ влⷣки и҆ бг҃а, вѣ́ры ра́ди. ꙳ є҆гѡ́же стрⷭ҇те́мъ ревнова́лъ є҆сѝ и҆ сме́рти, ꙳ и҆ сла́вы бы́лъ є҆сѝ наслѣ́дникъ, ꙳ ꙗ҆́кѡ мꙋ́дръ и҆ бг҃оглаго́ливъ, ꙗ҆́кѡ ᲂу҆ч҃ни́къ и҆́стины.
Сла́ва, гла́съ в҃:
Ѡ҆ста́вивъ земна̑ѧ, послѣ́довалъ є҆сѝ хрⷭ҇тꙋ̀, и҆ зна́менавсѧ дохнове́нїемъ ст҃а́гѡ дх҃а, по́сланъ бы́въ ѿ негѡ̀ въ ꙗ҆зы́ки поги́бшыѧ, ѡ҆браща́ти человѣ́ки во свѣ́тъ бг҃озна́нїѧ, а҆пⷭ҇ле фїлі́ппе: и҆ сконча́въ по́двиги бжⷭ҇твенныѧ твоеѧ̀ стра́сти и҆ мꙋ́къ разли́чныхъ, дꙋ́шꙋ твою̀ хрⷭ҇тꙋ̀ пре́далъ є҆сѝ: того̀ молѝ, всеблаже́нне, дарова́ти на́мъ ве́лїю ми́лость.
И҆ ны́нѣ, бг҃оро́диченъ:
Всѐ ᲂу҆пова́нїе моѐ на тѧ̀ возлага́ю, мт҃и бж҃їѧ, сохрани́ мѧ подъ кро́вомъ твои́мъ.
На стїхо́внѣ стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:
Нбⷭ҇ныхъ твои́хъ вѣща́нїй и҆зглашє́нїѧ ꙳ на землѝ, всебл҃же́нне, разгласи́шасѧ, ꙳ и҆ сїю̀ и҆спо́лни догма́тѡвъ, ꙳ и҆́миже сн҃а ѻ҆ц҃ꙋ̀ и҆ дх҃ꙋ, ꙳ бг҃осло́вѧще, а҆пⷭ҇ле, та́йнѡ, ꙳ є҆диносꙋ́щна сла́вимъ.
Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.
Ꙗ҆́кѡ свѣтоно́сца тѧ̀ всѝ а҆пⷭ҇лѡвъ хрⷭ҇то́выхъ, ꙳ и҆ свѣ́тлаго свѣти́льника честны́ѧ цр҃кве, ꙳ фїлі́ппе треблаже́нне, и҆мꙋ́ще ны́нѣ, ꙳ дꙋша́ми просвѣща́емсѧ ꙳ и҆ ѿ бѣ́дъ ѕлолю́тыхъ и҆збавлѧ́емсѧ, моли́твами твои́ми, всехва́льне.
Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.
Крⷭ҇то́мъ по́двигъ страда́нїѧ сконча́вый, ꙳ побѣ́ды вѣнцы̑ ѡ҆дѣ́ѧлсѧ є҆сѝ, фїлі́ппе, досто́йнѣ: ꙳ съ ни́миже, вше́дъ въ гѡ́рнѧѧ црⷭ҇твїѧ, ꙳ спредстои́ши, а҆пⷭ҇ле, хрⷭ҇тꙋ̀, ꙳ и҆ мо́лишисѧ спасти́сѧ на́мъ.
Сла́ва, гла́съ в҃:
Ча́шы а҆рѡма̑тъ въ мі́рѣ лани̑ты твоѧ̑, мꙋ́дре, ꙗ҆ви́шасѧ, а҆пⷭ҇ле фїлі́ппе, почерпа́ющыѧ вѣ̑рнымъ пи́во жизнотво́рное. дѣѧ̑нїѧ бо въ видѣ̑нїѧ восхожде́нїе и҆мы́й, хрⷭ҇та̀ послѣ́дователь и҆ привѣ́тствователь бы́лъ є҆сѝ: непло́днꙋю и҆ безча́днꙋю ꙗ҆зы́кѡвъ цр҃ковь ᲂу҆краси́лъ є҆сѝ поꙋче́ньми, благоча́дствꙋющꙋ въ не́мъ. є҆́йже и҆ ны́нѣ молѝ и҆зба́витисѧ нꙋ́ждъ и҆ ѡ҆бстоѧ́нїѧ: мо́жеши бо ѡ҆ бз҃ѣ мно́гѡ, приближа́ѧсѧ є҆мꙋ̀.
И҆ ны́нѣ, бг҃оро́диченъ: Ѽ чꙋдесѐ но́вагѡ:
Тропа́рь, гла́съ ѕ҃.
А҆пⷭ҇ле ст҃ы́й фїлі́ппе, молѝ ми́лостиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.
И҆лѝ се́й, гла́съ то́йже.
Благоꙋкраша́етсѧ вселе́ннаѧ, є҆ѳїо́пїа ликовствꙋ́етъ, ꙗ҆́кѡ вѣнце́мъ красꙋ́ема, тобо́ю просвѣти́вшисѧ, свѣ́тлѡ торжествꙋ́етъ па́мѧть твою̀, бг҃оглаго́ливе фїлі́ппе: всѧ̑ бо вѣ́ровати хрⷭ҇тꙋ̀ наꙋчи́лъ є҆сѝ, и҆ тече́нїе соверши́въ досто́йнѡ є҆ѵⷢ҇лїа. тѣ́мъ дерзнове́ннѡ вари́тъ є҆ѳїо́пскаѧ рꙋка̀ бг҃ꙋ: є҆го́же молѝ дарова́ти на́мъ ве́лїю ми́лость.
Сла́ва, и҆ ны́нѣ, бг҃оро́диченъ: Тѧ̀ хода́тайствовавшꙋю:
На ᲂу҆́трени, на Бг҃ъ гдⷭ҇ь, тропа́рь а҆пⷭ҇ла, два́жды.
Сла́ва, и҆ ны́нѣ, бг҃оро́диченъ: По а҃-й каѳі́смѣ, сѣда́ленъ, гла́съ а҃.
Подо́бенъ: Гро́бъ тво́й:
А҆пⷭ҇ле хрⷭ҇то́въ и҆ самови́дче, и҆ мч҃ниче фїлі́ппе премꙋ́дре, дрꙋ́же бж҃їй блаже́нне, и҆̀же вѣ́рою пра́зднꙋющыѧ честнꙋ́ю твою̀ па́мѧть, свободѝ ѿ ѡ҆бдержа́щихъ прегрѣше́нїй моли́твами твои́ми, и҆ нбⷭ҇ное наслѣ́дїе полꙋчи́ти сподо́би.
Два́жды.
Сла́ва, и҆ ны́нѣ, бг҃оро́диченъ:
Кꙋпинꙋ̀, ю҆́же мѡѷсе́й неѡпа́льнꙋ ви́дѣ, го́рꙋ бж҃їю, ст҃ы́й ѻ҆́блакъ, сѣ́нь нескве́рнꙋю, бг҃опрїѧ́тнꙋю трапе́зꙋ, пала́тꙋ высоча́йшагѡ цр҃ѧ̀, всесвѣ́тлꙋю и҆ непрохо́днꙋю две́рь, дв҃о, пое́мъ тѧ̀.
По в҃-й каѳі́смѣ, сѣда́ленъ, гла́съ є҃. Поⷣ: Собезнача́льное сло́во:
Оу҆ч҃ни́къ словесѐ, и҆́стины проповѣ́дникъ, ꙗ҆́кѡ стрѣла̀ по́сланъ бы́лъ є҆сѝ, просвѣща́ѧ сꙋ́щыѧ во тмѣ̀ лю́тѣй, свѧ́те а҆пⷭ҇ле, и҆ безбо́жїѧ мглꙋ̀ ѿгонѧ̀ ѿ землѝ, и҆ всѧ̑ благовѣ́рꙋющыѧ сы́ны днѐ показа́лъ є҆сѝ, хрⷭ҇то́въ ви́дче, свѧ́те фїлі́ппе.
Два́жды.
Сла́ва, и҆ ны́нѣ, бг҃оро́диченъ:
И҆́же ᲂу҆пова́нїе на тѧ̀, дв҃о пречⷭ҇таѧ, непоткнове́нное и҆мꙋ́ще, покро́въ сꙋ́щи, ѿ разли́чныхъ напа́стей и҆ ѡ҆бстоѧ́нїй и҆ бѣ́дъ лю́тыхъ свободи́ ны, молѧ́щи сн҃а твоего̀ со а҆пⷭ҇лы є҆гѡ̀, и҆ спасѝ всѧ̑, воспѣва́ющыѧ тѧ̀.
По полѷеле́и сѣда́ленъ, гла́съ и҃. Подо́бенъ: Премꙋ́дрости и҆ сло́ва:
І҆́дѡльскꙋю ле́сть низложи́лъ є҆сѝ, сп҃совы стрⷭ҇ти возжелѣ́въ, фїлі́ппе сла́вне: ꙗ҆ви́лсѧ є҆сѝ мі́рꙋ, нбⷭ҇наѧ всѣ̑мъ и҆сточа́ѧ чꙋдеса̀, и҆ ꙗ҆зы́кѡвъ бы́въ, всебл҃же́нне, а҆пⷭ҇лъ. тѣ́мъ твою̀ па́мѧть досто́йнѡ чти́мъ, пѣсносло́вѧще: гдⷭ҇нь а҆пⷭ҇ле, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Въ напа̑сти многоплетє́нныѧ впа́дъ ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мъ безчи́сленныхъ согрѣше́нїй мои́хъ: и҆, ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бл҃гости, тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ, моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти воспѣва́ющымъ досто́йнѡ сла́вꙋ твою̀.
Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Во всю̀ зе́млю: Сті́хъ: Нб҃са̀ повѣ́даютъ: Всѧ́кое дыха́нїе: Є҆ѵⷢ҇лїе, і҆ѡа́нна, зача́ло ѯ҃з. По н҃-мъ ѱалмѣ̀ стїхи́ра, гла́съ ѕ҃. Самогла́сенъ:
Премꙋ́дрый ло́вче, ст҃ы́й ᲂу҆ч҃ничѐ, дѣ́лателю сп҃совъ и҆ сказа́телю тогѡ̀ стрⷭ҇те́й, и҆́же тва́рь вѣ́рою ѡ҆бте́къ, и҆ прельщє́нныѧ ꙗ҆зы́ки собра́въ и҆ бг҃ꙋ приве́дъ, ꙗ҆́кѡ кади́ло до́брое, на нб҃са̀ возведе́сѧ. тѣ́мже, предстоѧ̀ сꙋдїѝ, молѝ и҆зба́витисѧ на́мъ ѿ беззако́нїй на́шихъ, и҆ въ де́нь сꙋ́дный и҆зба́витисѧ мꙋче́нїѧ.
Канѡ́нъ бцⷣы, со і҆рмосо́мъ на ѕ҃: и҆ а҆пⷭ҇ла на и҃:
є҆гѡ́же краегране́сїе: Сла́внаго фїлі́ппа пою̀ благолѣ́пнѡ. Ѳеофа́нъ.
Гла́съ ѕ҃. Пѣ́снь а҃. І҆рмо́съ:
Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.
Пресвѣ́тлыми лꙋча́ми хрⷭ҇то́вы бжⷭ҇твенныѧ свѣ́тлости наслажда́ѧсѧ ꙗ҆́снѡ, бг҃опроповѣ́дниче фїлі́ппе, твои́ми по прича́стїю зарѧ́ми на́съ просвѣтѝ.
Ѻ҆́ч҃ꙋю тебѣ̀ сла́вꙋ собо́ю показа́вый, фїлі́ппе, ли́кꙋ ᲂу҆ченикѡ́въ тѧ̀ хрⷭ҇то́съ вчинѝ, твою̀ провѣ́дый добродѣ́тель, бг҃облаже́нне.
Ны́нѣ не въ гада́нїихъ зри́ши, нижѐ сѣ́нехъ, нижѐ зерца́лѣхъ, всемꙋ́дре, и҆сто́чника благи́хъ, жела́нїй коне́чное, хрⷭ҇та̀, но лице́мъ зри́ши ꙗ҆́вственнѡ къ лицꙋ̀.
Бг҃оро́диченъ:
Ѡ҆скꙋдѣ́вшымъ нача́льникѡмъ ѿ колѣ́на і҆ꙋ́дова, пречⷭ҇таѧ, сн҃ъ тво́й и҆ бг҃ъ прише́дъ, во́ждь землѝ концє́мъ и҆́стиннѡ ны́нѣ воцр҃и́сѧ.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃. І҆рмо́съ:
Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Ты̀ и҆спо́лненъ свѣ́та дѣ́ѧтельнагѡ видѣ́нїѧ, свѣ́тꙋ вели́комꙋ бы́вшꙋ съ на́ми, сподо́билсѧ є҆сѝ хрⷭ҇тꙋ̀ слꙋжи́ти, фїлі́ппе бг҃оглаго́ливе.
Степе́нь догма́тѡвъ благочести́выхъ, твоѐ тайново́дствїе благочести́вѡ ꙗ҆ви́сѧ: тѣ́мъ бо сн҃а позна́хомъ соесте́ственна и҆ соедине́нна сꙋ́ща роди́телю.
Свѣ́щникъ бы́лъ є҆сѝ зла́тъ, сїѧ́ѧ человѣ́кѡмъ присносꙋ́щный свѣ́тъ, и҆ просвѣща́ющъ и҆́мъ вселе́ннꙋю ꙗ҆́вѣ позна́нїемъ, фїлі́ппе всеизѧ́щнѣйше.
Бг҃оро́диченъ:
На тѧ̀, прест҃а́ѧ чⷭ҇таѧ, надѣ́ѧвсѧ, да не ѿпадꙋ̀ твоегѡ̀ ча́ѧнїѧ: но, ꙗ҆́кѡ мт҃и ми́лостивнаѧ чл҃вѣколюби́вагѡ бг҃а, сѣте́й мѧ̀ врага̀ и҆зба́ви.
Сѣда́ленъ, гла́съ и҃. Подо́бенъ: Премꙋ́дрости:
Тꙋчено́сенъ ѻ҆́блакъ дꙋхо́вный и҆́стиннѡ показа́лсѧ є҆сѝ сꙋ́щымъ на землѝ, напаѧ́ѧ, ꙗ҆́кѡ ни́вꙋ, та́инственнѡ сердца̀ на̑ша! проте́къ сло́вомъ, напаѧ́еши концы̀, и҆ до́ждь пролива́еши мѵ́ра ѿ ра́ки. тѣ́мъ дохнꙋ́въ невѣ̑рнымъ сердца́мъ воню̀ дх҃а, въ ни́хже сокро́вищствовалъ є҆сѝ, а҆пⷭ҇ле фїлі́ппе: моли́сѧ хрⷭ҇тꙋ̀ бг҃ꙋ, грѣхѡ́въ ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть твою̀.
Сла́ва, подо́бенъ то́йже:
І҆́дѡльскꙋю ле́сть низложи́лъ є҆сѝ, сп҃совы стрⷭ҇ти возжелѣ́въ, фїлі́ппе сла́вне, ꙗ҆ви́лсѧ є҆сѝ мі́рꙋ, нбⷭ҇наѧ всѣ̑мъ и҆сточа́ѧ чꙋдеса̀, и҆ ꙗ҆зы́кѡвъ бы́въ, всеблаже́нне, а҆пⷭ҇лъ. тѣ́мъ твою̀ па́мѧть досто́йнѡ чти́мъ, пѣсносло́вѧще: гдⷭ҇енъ а҆пⷭ҇ле, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть твою̀.
И҆ ны́нѣ, бг҃оро́диченъ:
Въ напа̑сти многоплетє́нныѧ впа́дъ ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ: и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бл҃гости. тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти воспѣва́ющымъ досто́йнѡ сла́вꙋ твою̀.
Пѣ́снь д҃. І҆рмо́съ:
Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.
Со́лнца селе́нїе, хрⷭ҇та̀ сꙋ́щагѡ свѣ́та, и҆ хра́мъ показа́лсѧ є҆сѝ вмѣсти́теленъ тогѡ̀ свѣ́тлости, и҆ нб҃о, сла́вꙋ бж҃їю человѣ́кѡмъ повѣ́даѧ.
Во и҆стлѣ́вшее страстьмѝ человѣ́чество ты̀ вложе́нъ, бж҃їѧ со́ль, ѿ хрⷭ҇та̀, тогѡ̀ и҆зсꙋшѝ гни́лость лю́тꙋю, бг҃овѣща́телю достосла́вне.
Си́лою, фїлі́ппе, хрⷭ҇то́вою ᲂу҆крѣплѧ́емь, де́мѡнскагѡ полка̀ и҆ ѕловѣ́рныхъ ꙗ҆ви́лсѧ є҆сѝ си́льншїй, сꙋ́щымъ на землѝ вопїѧ̀ жи́зни бжⷭ҇твенныѧ благовѣ́стїе.
Бг҃оро́диченъ:
Приста́нище благоти́хое хрⷭ҇то́съ ꙗ҆вѝ вѣ́рою и҆ любо́вїю тѧ̀, и҆́стиннꙋю влⷣчцꙋ всенепоро́чнꙋю, ѿ со́вѣсти чи́стыѧ бцⷣꙋ проповѣ́дающымъ.
Пѣ́снь є҃. І҆рмо́съ:
Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Ꙗ҆́да дꙋшегꙋби́тельнагѡ вра́жїѧ враче́бными твои́ми дла́ньми, бг҃оглаго́ливе, и҆зсꙋши́въ смертоно́сною глꙋбино́ю держи̑мыѧ, лю́тыѧ болѣ́зни и҆збавлѧ́ѧ.
Ѻ҆гнедохнове́ненъ ве́сь ꙗ҆ви́лсѧ є҆сѝ паракли́товымъ наше́ствїемъ и҆ бл҃года́тїю, фїлі́ппе: и҆ззѧ́бшыѧ безбо́жїѧ зимо́ю теплото́ю вѣ́ры ѡ҆животвори́лъ є҆сѝ.
Бли́зъ бы́лъ є҆сѝ хрⷭ҇та̀, дае́мыѧ тѝ зарѝ несре́дственнѡ прїе́млѧ, просвѣща́ѧ къ тебѣ̀ притека́ющыѧ, и҆ приводѧ̀ ты̑ѧ содѣ́телю твоемꙋ̀.
Бг҃оро́диченъ:
Сло́вомъ всѧ̑ содѣ́тельствꙋѧ, и҆ мꙋ́дрымъ про́мысломъ ѡ҆кормлѧ́ѧ є҆ди́нъ, ꙗ҆́кѡ хо́щетъ, гдⷭ҇ь, за бл҃гоꙋтро́бїе зи́ждетсѧ и҆зъ тебє̀, и҆ пло́ть несказа́ннѡ, пречⷭ҇таѧ, быва́етъ.
Пѣ́снь ѕ҃. І҆рмо́съ:
Ꙗ҆́тъ бы́сть, но не ᲂу҆держа́нъ въ пе́рсехъ ки́товыхъ і҆ѡ́на: тво́й бо ѻ҆́бразъ носѧ̀, страда́вшагѡ и҆ погребе́нїю да́вшагѡсѧ, ꙗ҆́кѡ ѿ черто́га, ѿ ѕвѣ́рѧ и҆зы́де, приглаша́ше же кꙋстѡді́и, хранѧ́щїи сꙋ́єтнаѧ и҆ лѡ́жнаѧ, ми́лость сїю̀ ѡ҆ста́вили є҆стѐ.
Ѡ҆держа́щꙋ и҆ гꙋбѧ́щꙋю зрѧ̀ пре́лесть вра́жїю человѣ́ческїй ро́дъ, твоѧ̑ стрѣ́лы и҆з̾ѻщрє́нныѧ а҆пⷭ҇лы напрѧ́гъ и҆спꙋсти́лъ є҆сѝ, и҆ разве́рзлъ є҆сѝ брє́ннаѧ ᲂу҆ста̀ ѕмі́ева, всѣ́хъ ѿ тогѡ̀ вре́да и҆ тлѝ, сп҃се, и҆сцѣлѧ́ѧ.
Вы́шнимъ сїѧ́нїемъ блиста́ѧ, ꙗ҆ви́лсѧ є҆сѝ, ꙗ҆́коже мо́лнїѧ, вселе́ннѣй свѣтѧ̀, и҆ ꙗ҆́кѡ гора̀, сла́дость и҆ска́пающаѧ, ꙗ҆́кѡ роса̀ бжⷭ҇твеннаѧ, съ нб҃сѐ па́дающаѧ, ꙗ҆́кѡ а҆пⷭ҇лъ и҆збра́нъ, дванадесѧточи́сленный по́лкъ и҆сполнѧ́ѧ ᲂу҆ч҃никѡ́въ хрⷭ҇то́выхъ, всебл҃же́нне.
Наꙋчи́всѧ твоеѧ̀ та́йны глꙋбинѣ̀ бжⷭ҇твенный ᲂу҆ч҃ни́къ, ꙗ҆́кѡ рѣкꙋ̀ мі́ра, наводнѧ́ющꙋ сла́дости пото́къ, ꙗ҆́кѡ потоплѧ́ющꙋю волнꙋ̀, сла́вꙋ ꙗ҆зы́кѡвъ, тѧ̀ проповѣ́да велегла́снѡ, и҆ твоѐ сла́вное и҆стоща́нїе, бла́же, є҆́же ѡ҆ на́съ благовѣстѝ.
Бг҃оро́диченъ:
Оу҆мерщвлѧ́ємыѧ и҆ ги́бнꙋющыѧ всѧ̑ сме́ртїю человѣ́ки, ты̀, хрⷭ҇та̀ ро́ждши нетлѣ́нное безсме́ртїе, призвала̀ є҆сѝ къ жи́зни вѣ́чнѣй, и҆ просвѣти́ла є҆сѝ ѡ҆мрачє́нныѧ, и҆ свободи́ла є҆сѝ, разрѣши́вши ᲂу҆́зы ѿведе́нїѧ на́шегѡ, всепѣ́таѧ.
Конда́къ, гла́съ и҃. Подо́бенъ: Ꙗ҆́кѡ нача́тки:
Оу҆ч҃ни́къ и҆ дрꙋ́гъ тво́й подража́тель стрⷭ҇ти твоеѧ̀, вселе́ннѣй бг҃а тѧ̀ проповѣ́да, бг҃оглаго́ливый фїлі́ппъ: тогѡ̀ моли́твами ѿ врагѡ́въ пребеззако́нныхъ цр҃ковь твою̀ и҆ всѧ́къ гра́дъ тво́й бцⷣею соблюдѝ, многоми́лостиве.
І҆́косъ:
Стрꙋю̀ сло́ва пода́ждь мѝ, гдⷭ҇и, водно́е є҆стество̀ содѣ́ѧвый, се́рдце моѐ ᲂу҆крѣпѝ, бл҃гоꙋтро́бне, и҆́же зе́млю ᲂу҆тверди́вый сло́вомъ твои́мъ, и҆ просвѣтѝ моѐ помышле́нїе, свѣ́томъ, ꙗ҆́кѡ ри́зою, ѡ҆дѣва́ѧйсѧ, да глаго́лю и҆ пою̀ подоба̑ющаѧ, и҆ досто́йнѡ восхвалю̀ твоего̀ ᲂу҆го́дника, многоми́лостиве.
Пѣ́снь з҃. І҆рмо́съ:
Ѻ҆́троцы въ вавѷлѡ́нѣ пе́щнагѡ пла́мене не ᲂу҆боѧ́шасѧ, но посредѣ̀ пла́мене вве́ржени, ѡ҆роша́еми поѧ́хꙋ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.
Ꙗ҆́кѡ свѣ́тъ посла́лсѧ є҆сѝ стрѣлы̀ подо́бїемъ, а҆пⷭ҇ле, свѣтоза́рными блиста̑нїи просвѣща́ѧ вѣ́рою зовꙋ́щыѧ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.
Бога́тыми свѣтоли̑тїи бжⷭ҇твеннагѡ, бл҃же́нне, проповѣ́данїѧ сїѧ́ѧ свѣ́тлѡ, во тмѣ̀ сꙋ́щыѧ пѣснопѣ́ти просвѣти́лъ є҆сѝ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.
Виті̑йскаѧ бꙋеслѡ́вїѧ и҆ слове́снꙋю всю̀ лю́тость крѣ́пкимъ сло́вомъ вѣ́ры побѣди́въ, пѣ́лъ є҆сѝ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.
Бг҃оро́диченъ:
Въ є҆стества́хъ пресꙋ́щественнѡ, дв҃о, двꙋ́хъ родила̀ є҆сѝ соедине́нныхъ, чⷭ҇таѧ, неслїѧ́ннѡ хрⷭ҇та̀, є҆мꙋ́же зове́мъ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.
Пѣ́снь и҃. І҆рмо́съ:
За зако́ны ѻ҆те́чєскїѧ бл҃же́ннїи въ вавѷлѡ́нѣ ю҆́ношы, предбѣ́дствꙋюще, царю́ющагѡ ѡ҆плева́ша повелѣ́нїе безꙋ́мное, и҆ совокꙋ́плени, и҆́мже не свари́шасѧ ѻ҆гне́мъ, держа́вствꙋющемꙋ досто́йнꙋю воспѣва́хꙋ пѣ́снь: гдⷭ҇а по́йте дѣла̀, и҆ превозноси́те во всѧ̑ вѣ́ки.
Свѣ́та тѧ̀ мі́ра совершѝ ѻ҆ч҃ь свѣ́тъ, сло́во ѵ҆поста́сное, и҆збра́вый а҆пⷭ҇ла ѿ мі́ра, требл҃же́нне: и҆ воѡрꙋжи́въ бжⷭ҇твенною си́лою свое́ю, посла̀ ꙗ҆́кѡ ѻ҆рꙋ́жника непобѣди́ма, вопїю́ща: гдⷭ҇а по́йте дѣла̀, и҆ превозноси́те во всѧ̑ вѣ́ки.
Си́лою бжⷭ҇твенною ᲂу҆крѣплѧ́емь, а҆пⷭ҇ле, проти̑вныѧ полкѝ побѣди́лъ є҆сѝ, свирѣ́пое ѡ҆полче́нїе тѣ́хъ разрꙋши́въ: ми́ръ бо, неѿѧ́тный жре́бїй, взе́мъ, ми́рное ᲂу҆строе́нїе насади́лъ є҆сѝ мі́рꙋ, гдⷭ҇а воспѣва́йте дѣла̀, вопїѧ̀, и҆ превозноси́те во всѧ̑ вѣ́ки.
Все́ю любо́вїю прилѣпи́лсѧ є҆сѝ воплоще́нномꙋ сло́вꙋ бж҃їю, а҆пⷭ҇ле, ᲂу҆ч҃ни́къ тогѡ̀ бы́въ, и҆ бж҃їй слꙋга̀, и҆ тайноглаго́льникъ: ѿѻнꙋ́дꙋже, ѿ негѡ̀ по́сланъ во ꙗ҆зы́ки, проповѣ́далъ є҆сѝ є҆гѡ̀ прише́ствїе, гдⷭ҇а по́йте, вопїѧ̀, и҆ превозноси́те во всѧ̑ вѣ́ки.
Бг҃оро́диченъ:
Ве́сь соедини́сѧ па́че ра́зꙋма неизмѣ́ннѡ всемꙋ̀ человѣ́чествꙋ, пребжⷭ҇твенный во ᲂу҆тро́бѣ твое́й, всест҃а́ѧ дв҃о. тѣ́мже во двꙋ̀ є҆стєствꙋ̀ зна́етсѧ хрⷭ҇то́съ, є҆ди́нъ сы́й ѻ҆боѐ. є҆мꙋ́же пою́ще, вопїе́мъ: гдⷭ҇а по́йте дѣла̀, и҆ превозноси́те во всѧ̑ вѣ́ки.
Пѣ́снь ѳ҃. І҆рмо́съ:
Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно. є҆го́же велича́юще, съ нбⷭ҇ными вѡ́и тѧ̀ ᲂу҆бл҃жа́емъ.
Ны́нѣ неизрече́нныѧ сла́вы и҆ свѣ́та невече́рнѧгѡ сподо́бивсѧ, и҆дѣ́же неизглаго́ланное є҆́сть весе́лїе, и҆дѣ́же ра́дость непреста́ннаѧ въ цр҃кви перворожде́нныхъ, и҆дѣ́же пра́ведныхъ селє́нїѧ. за всѧ̑ хрⷭ҇тїа́ны моли́сѧ, фїлі́ппе всемꙋ́дре.
Оу҆кра́шенъ добро́тою ᲂу҆́мнагѡ благолѣ́пїѧ, и҆ црⷭ҇твїѧ вѣнце́мъ ѡ҆бложе́нъ, бг҃омꙋ́дре, и҆ бога́тыми свѣтодаѧ̑нїи, фїлі́ппе, просвѣща́емь пресꙋ́щественнагѡ свѣ́та сїѧ́ньми, ра́дꙋѧсѧ влⷣки твоегѡ̀ престо́лꙋ, блаже́нне, предстои́ши.
Со а҆пⷭ҇лы всѣ́ми честны́ми, и҆ прⷪ҇рѡ́ки и҆ страстотє́рпцы, фїлі́ппе, прпⷣбными, і҆ера̑рхи и҆ пра́ведными, съ бцⷣею молѝ разрѣше́нїе грѣхѡ́въ мно́гихъ и҆ прегрѣше́нїй да́ти ѡ҆чище́нїе вѣ́рою свѣтоно́снꙋю и҆ бжⷭ҇твеннꙋю па́мѧть соверша́ющымъ твою̀.
Бг҃оро́диченъ:
Воплоще́нно сло́во, пре́жде безпло́тно сꙋ́що, дв҃о мт҃и, родила̀ є҆сѝ. сегѡ̀ ра́ди тѧ̀ гдⷭ҇ьственнѡ бцⷣꙋ всѝ благоче́стнѡ сла́вимъ, и҆́стиннѣйшее тебѣ̀ нарица́нїе приносѧ́ще, чⷭ҇таѧ: ты́ бо вѣ́рныхъ спасе́нїѧ ко́рень пребыва́еши.
Свѣти́ленъ. Подо́бенъ: Дх҃омъ во ст҃и́лищи:
Тече́нїе кра́сныхъ твои́хъ но́гъ, фїлі́ппе, возврати́въ, къ ше́ствїю нбⷭ҇номꙋ возше́лъ є҆сѝ ра́дꙋѧсѧ, и҆ трⷪ҇цѣ предста́въ, во ѻ҆ц҃ѣ̀ ви́диши сн҃а и҆ дх҃а бжⷭ҇твеннаго. сегѡ̀ ра́ди вѣ́рою всесвѧще́ннꙋю твою̀ и҆ бжⷭ҇твеннꙋю пра́зднꙋемъ па́мѧть.
Два́жды.
Сла́ва, и҆ ны́нѣ, бг҃оро́диченъ:
Стра́шнагѡ и҆спыта́нїѧ воспомина́ю ча́съ: мно́жество бо дѣ́лъ мои́хъ ᲂу҆жаса́етъ и҆ ᲂу҆страша́етъ мѧ̀. но ᲂу҆ще́дри, пречⷭ҇таѧ, те́плою твое́ю моли́твою, и҆ да́ждь мѝ спасе́нїе: є҆ли́кѡ бо хо́щеши, и҆ твори́ши, ꙗ҆́кѡ бг҃а ро́ждши, бл҃гослове́ннаѧ марі́е.
На хвали́техъ стїхи̑ры, на д҃, гла́съ и҃. Поⷣ: Ѽ пресла́внагѡ чꙋдесѐ!
Ѽ пресла́внагѡ чꙋдесѐ! ꙳ ры̑бы и҆ногда̀ ловѧ́й а҆пⷭ҇лъ, ꙳ человѣ́кѡвъ лове́цъ бы́сть, ꙳ бг҃опроизведе́нный, ꙳ слове́съ мре́жею ꙗ҆зы́ки ᲂу҆ловѝ, ꙳ крⷭ҇та̀ ᲂу҆́дицею мі́ръ возвлечѐ. ꙳ ѽ каковꙋ̀ лови́твꙋ ꙳ бг҃ꙋ принесѐ бг҃одѣ́латель! ꙳ є҆гѡ́же па́мѧть ны́нѣ пра́зднꙋемъ.
Ѽ пресла́внагѡ чꙋдесѐ! ꙳ ѿ бг҃а по́сланъ посредѣ̀ волкѡ́въ, ꙳ ꙗ҆́кѡ ѻ҆вча̀, небоѧ́зненнѡ прохожда́ше а҆пⷭ҇лъ фїлі́ппъ, ꙳ ѕвѣ́ри а҆́гнцы вѣ́рою ꙗ҆вѝ, ꙳ мі́ръ бжⷭ҇твеннѡ престїхі́йствова. ꙳ ѽ дѣ́лъ вѣ́ры! ꙳ ѽ си́лъ и҆зѧ́щнѣйшихъ! ꙳ є҆гѡ́же моли́твами, хрⷭ҇тѐ, ꙳ спасѝ дꙋ́шы на́шѧ, ꙳ ꙗ҆́кѡ є҆ди́нъ бл҃гоꙋтро́бенъ.
Ѽ пресла́внагѡ чꙋдесѐ! ꙳ кла́дѧзь, точа́щїй жи́знь, ꙳ мꙋ́дростнымъ черпа́нїемъ, ꙳ сꙋ́щымъ въ мі́рѣ бы́сть ꙳ а҆пⷭ҇лъ фїлі́ппъ. ꙳ ѿ негѡ́же стрꙋи̑ догма́тѡвъ и҆схо́дѧтъ, ꙳ ѿ ни́хже чꙋде́съ быстрины̑ пїе́мъ. ꙳ ѽ кѡли́ка содѣ́ѧ стра̑шнаѧ чꙋдеса̀ бг҃одѣ́латель! ꙳ є҆гѡ́же па́мѧть вѣ́рою сла́вимъ.
Гла́съ в҃. Самогла́сна:
Нбⷭ҇наѧ ча́ша ꙗ҆ви́лсѧ є҆сѝ мꙋ́дрости, дх҃а бо показа́лсѧ є҆сѝ ѻ҆би́тель кра́снаѧ, и҆ и҆зре́клъ є҆сѝ добродѣ́телей и҆́стинꙋ, земны̑ѧ ᲂу҆лови́въ ᲂу҆́мною ᲂу҆́дицею мꙋ́дрости бж҃їѧ. тѣ́мъ мо́лимъ тѧ̀, а҆пⷭ҇ле фїлі́ппе, моли́сѧ ѡ҆ дꙋша́хъ на́шихъ.
Сла́ва, гла́съ г҃:
Ры́бъ лови́твꙋ въ человѣ́чꙋ лови́твꙋ преложи́въ, сꙋ́щыѧ во глꙋбинѣ̀ пре́лести, не́водомъ и҆звле́къ та́инственнымъ, фїлі́ппе а҆пⷭ҇ле, ве́сь мі́ръ ᲂу҆лови́лъ є҆сѝ, и҆ ᲂу҆ч҃телю твоемꙋ̀ хрⷭ҇тꙋ̀ приве́лъ є҆сѝ. тѣ́мъ мо́лимъ тѧ̀: моли́сѧ є҆мꙋ̀ непреста́ннѡ, спастѝ дꙋ́шы на́шѧ, вѣ́рнѡ творѧ́щихъ всечестнꙋ́ю па́мѧть твою̀.
И҆ ны́нѣ, бг҃оро́диченъ:
Бцⷣе, предста́тельнице всѣ́хъ молѧ́щихсѧ тебѣ̀, тобо́ю дерза́емъ, и҆ тобо́ю хва́лимсѧ, и҆ къ тебѣ̀ всѐ ᲂу҆пова́нїе на́ше є҆́сть, молѝ ро́ждшагосѧ и҆зъ тебє̀, за непотрє́бныѧ рабы̑ твоѧ̑.
Славосло́вїе вели́кое. Тропа́рь.
Сла́ва, и҆ ны́нѣ, бг҃оро́диченъ: Тѧ̀ хода́тайствовавшꙋю:
И҆ ѿпꙋ́стъ.
На лїтꙋргі́и, Бл҃жє́нна а҆пⷭ҇ла, пѣ́снь г҃ и҆ ѕ҃. Прокі́менъ, гла́съ и҃: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ. Сті́хъ: Нб҃са̀ повѣ́даютъ сла́вꙋ бж҃їю: А҆пⷭ҇лъ къ корі́нѳѧнѡмъ, зача́ло рл҃а. А҆ллилꙋ́їа, гла́съ а҃. И҆сповѣ́дѧтъ нб҃са̀ чꙋдеса̀ твоѧ̑, гдⷭ҇и. Є҆ѵⷢ҇лїе і҆ѡа́нна, зача́ло ѕ҃. Прича́стенъ. Во всю̀ зе́млю и҆зы́де вѣща́нїе и҆́хъ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.