← претходни дан | Минеј — Октобар | следећи дан →
29 октября: Святой преподобномученицы Анастасии Римляныни. Преподобного Аврамия затворника. Преподобного Аврамия, Ростовского чудотворца
Мѣ́сѧца тогѡ́же въ к҃ѳ-й де́нь.
Ст҃ы́ѧ прпⷣбномꙋ́ченицы а҆настасі́и ри́млѧныни:
И҆ прпⷣбнагѡ ѻ҆тца̀ на́шегѡ а҆вра́мїа затво́рника:
И҆ прпⷣбнагѡ ѻ҆тца̀ на́шегѡ а҆вра́мїа а҆рхїмандрі́та, росто́вскагѡ чꙋдотво́рца.
Слꙋ́жба є҆гѡ̀ пи́сана по се́й слꙋ́жбѣ.
На Гдⷭ҇и, воззва́хъ, стїхи̑ры мч҃ницы, гла́съ и҃.
Подо́бенъ: Что̀ ва́съ нарече́мъ:
Мч҃нице страстоте́рпице всехва́льнаѧ, ꙳ воздержа́нїемъ стра̑сти низложи́вши плотскі̑ѧ, ꙳ страда́нїемъ ѕмі́ѧ ᲂу҆мертви́ла є҆сѝ врага̀, ꙳ а҆́гг҃лы ᲂу҆диви́вши болѣ́зньми твои́ми, ꙳ человѣ́ки ѡ҆бвесели́вши страда̑нїи твои́ми, ꙳ мона́шествꙋющихъ ᲂу҆добре́нїе, ꙳ дѣ́вства сосꙋ́дъ. ꙳ молѝ спастѝ ꙳ и҆ просвѣти́ти дꙋ́шы на́шѧ.
Что́ тѧ воз̾именꙋ́емъ, сла́внаѧ; ꙳ дѣ́вства добро́тами невѣ́стꙋ просїѧ́вшꙋ хрⷭ҇то́вꙋ, ꙳ дще́рь и҆збра́ннꙋ вы́шнѧгѡ і҆ерⷭ҇ли́ма, ꙳ сожи́тельницꙋ а҆́гг҃лѡвъ и҆ собесѣ́дницꙋ, ꙳ черто́га мы́сленнагѡ наслажда́ющꙋсѧ, ꙳ а҆настасі́е многострада́льнаѧ, ꙳ мона́шествꙋющихъ ᲂу҆добре́нїе. ꙳ молѝ спастѝ ꙳ и҆ просвѣти́ти дꙋ́шы на́шѧ.
Терпѣ́ла є҆сѝ зꙋбѡ́въ и҆скорене́нїе, ꙳ рꙋ́къ ѿсѣче́нїе, и҆ но́гъ и҆ сосцє́въ, ꙳ ссѣка́ема на ᲂу҆́ды ѿ беззако́нныхъ мꙋчи́телей, ꙳ къ добро́тѣ жениха̀ взира́ющи, ꙳ и҆ болѣ̑зни па́че є҆стества̀ терпѧ́щи: ꙳ а҆настасі́е многострада́льнаѧ, ꙳ невѣ́сто хрⷭ҇то́ва нетлѣ́ннаѧ, ꙳ молѝ спастѝ ꙳ и҆ просвѣти́ти дꙋ́шы на́шѧ.
И҆́ны стїхи̑ры прпⷣбнагѡ, гла́съ то́йже. Поⷣ: Ѽ пресла́внагѡ чꙋдесѐ!
Ѻ҆́ч҃е бг҃омꙋ́дре а҆вра́мїе, ꙳ а҆враа́мꙋ подо́бникъ бы́въ дꙋ́хомъ, ꙳ пресе́льникъ бы́лъ є҆сѝ ꙳ землѝ ѻ҆те́ческїѧ, бл҃же́нне. ꙳ пло́ти пожела̑нїѧ ѿве́ргъ ꙳ и҆ въ хи́жинѣ ма́лѣй ꙳ заключи́въ ра́дꙋѧсѧ тѣ́ло твоѐ, ꙳ дꙋ́шꙋ же впери́лъ є҆сѝ. къ нб҃сѝ, ꙳ и҆дѣ́же житїѐ ꙗ҆́вѣ стѧжа́лъ є҆сѝ.
Прпⷣбне ѻ҆́ч҃е а҆вра́мїе, ꙳ а҆враа́мскꙋю дꙋ́шꙋ тезоиме́ннѡ стѧжа́въ, ꙳ напа̑сти претерпѣ́лъ є҆сѝ ꙳ вѣ́рою бжⷭ҇твенною ᲂу҆крѣплѧ́емь ꙳ и҆ любо́вїю бг҃ꙋ соединѧ́емь, ꙳ ѡ҆бѣтова́нїѧ зе́млю наслѣ́довалъ є҆сѝ, ꙳ ᲂу҆краша́емь добродѣ́телей свѣтлостьмѝ. ꙳ тѣ́мже веселѧ́щесѧ, ꙳ твою̀ па́мѧть торжествꙋ́емъ.
Прпⷣбне ѻ҆́ч҃е а҆вра́мїе, ꙳ пре́лестьми лю́тѣ ꙳ поглоще́ннꙋю ѕмі́емъ ꙳ и҆ попо́лзшꙋюсѧ поги́бели въ ро́въ, ꙳ про́мысломъ бжⷭ҇твеннымъ возвле́клъ є҆сѝ ꙳ и҆ спаса́емꙋ бг҃ꙋ предста́вилъ є҆сѝ. ꙳ є҆ѧ́же покаѧ́нїю ꙳ всѝ ᲂу҆диви́шасѧ, ꙳ бл҃гоче́стнѡ гдⷭ҇а сла́вѧщїи пребл҃га́го.
Сла́ва, и҆ ны́нѣ, бг҃оро́диченъ:
Ра́дꙋйсѧ, свѣ́та бж҃е́ственнагѡ носи́ло, ꙳ пресвѣ́тлый свѣ́щниче, ꙳ прест҃а́ѧ бг҃оневѣ́сто: ꙳ свѣ́тъ на́мъ возсїѧ́ла є҆сѝ ѿ пречⷭ҇тѡю бокꙋ̀ твоє́ю, ꙳ просвѣща́ѧ мі́ра концы̀ ꙳ и҆ ѡ҆свѧща́ѧ свое́ю бл҃гостїю. ꙳ ра́дꙋйсѧ, нача́ло на́шегѡ спасе́нїѧ, чⷭ҇таѧ. ꙳ ра́дꙋйсѧ, стра́шное слы́шанїе и҆ глаго́ланїе ꙳ надѣ́ющихсѧ на тѧ̀.
Крⷭ҇тобг҃оро́диченъ:
Что̀ зри́мое видѣ́нїе, ꙳ є҆́же мои́ма ѻ҆чи́ма ви́дитсѧ, ѽ влⷣко! ꙳ содержа́й всю̀ тва́рь, ꙳ на дре́во воздви́женъ бы́въ, ꙳ и҆ ᲂу҆мира́еши, всѣ̑мъ даѧ́й жи́знь; ꙳ бцⷣа пла́чꙋщи глаго́лаше, ꙳ є҆гда̀ ᲂу҆зрѣ̀ на крⷭ҇тѣ̀ возноси́ма, ꙳ и҆зъ неѧ̀ неизрече́ннѡ возсїѧ́вшаго ꙳ бг҃а и҆ чл҃вѣ́ка.
Тропа́рь ст҃ы́ѧ, гла́съ д҃:
А҆́гница твоѧ̀, і҆и҃се, а҆настасі́а, зове́тъ ве́лїимъ гла́сомъ: тебѐ, женишѐ мо́й, люблю̀, и҆ тебѐ и҆́щꙋщи страда́льчествꙋю, и҆ сраспина́юсѧ, и҆ спогреба́юсѧ креще́нїю твоемꙋ̀, и҆ страждꙋ̀ тебє̀ ра́ди, ꙗ҆́кѡ да црⷭ҇твꙋю въ тебѣ̀, и҆ ᲂу҆мира́ю за тѧ̀, да и҆ живꙋ̀ съ тобо́ю: но, ꙗ҆́кѡ же́ртвꙋ непоро́чнꙋю, прїими́ мѧ съ любо́вїю поже́ршꙋюсѧ тебѣ̀. тоѧ̀ моли́твами, ꙗ҆́кѡ ми́лостивъ, спасѝ дꙋ́шы на́шѧ.
Сла́ва, прпⷣбнагѡ, гла́съ и҃:
Въ тебѣ̀, ѻ҆́ч҃е, и҆звѣ́стнѡ спасе́сѧ є҆́же по ѻ҆́бразꙋ: прїи́мъ бо крⷭ҇тъ, послѣ́довалъ є҆сѝ хрⷭ҇тꙋ̀, и҆ дѣ́ѧ ᲂу҆чи́лъ є҆сѝ презира́ти ᲂу҆́бѡ пло́ть, прехо́дитъ бо, прилѣжа́ти же ѡ҆ дꙋшѝ, ве́щи безсме́ртнѣй. тѣ́мже и҆ со а҆́гг҃лы сра́дꙋетсѧ, прпⷣбне а҆вра́мїе, дх҃ъ тво́й.
На ᲂу҆́трени, канѡ́нъ прпⷣбныѧ, є҆гѡ́же краегране́сїе:
Мꙋ́жєскїѧ твоѧ̑, мꙋ́ченице, восхвалю̀ болѣ̑зни.
Творе́нїе і҆ѡ́сифово.
Гла́съ и҃. Пѣ́снь а҃. І҆рмо́съ:
Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.
Сїю̀ свѣтоно́снꙋю па́мѧть твою̀ почита́ющемꙋ, бг҃омꙋ́драѧ, просвѣще́нїе мѝ пода́ждь, дꙋшѝ моеѧ̀ тмꙋ̀ ѿгонѧ́щи.
Всю̀ ѿ пеле́нъ тебѐ самꙋ́ю возложи́ла є҆сѝ зижди́телю твоемꙋ̀, и҆ ѻ҆гне́мъ воздержа́нїѧ тѣлє́сныѧ стра̑сти попали́ла є҆сѝ.
Къ высотѣ̀ мꙋче́нїѧ, мч҃нице, возшла̀ є҆сѝ, непощадѣ́вши пло́ти, и҆ черто́гѡвъ мы́сленныхъ, ꙗ҆́кѡ дѣ́ва, сподо́биласѧ є҆сѝ.
Бг҃оро́диченъ:
Тѧ̀, нб҃омѣ́рнꙋю лѣ́ствицꙋ, на не́йже бг҃ъ ᲂу҆тверди́сѧ, человѣ́ки нбⷭ҇ны содѣ́лавъ, ѻ҆трокови́це, почита́емъ.
И҆́нъ канѡ́нъ прпⷣбнагѡ.
Є҆гѡ́же краегране́сїе: Твоѐ чествꙋ́ю всесвѣ́тлое житїѐ, бл҃же́нне.
І҆ѡ́сифъ.
Гла́съ то́йже. Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Бжⷭ҇твенными сїѧ́ѧ блиста̑нїи, свѣтоно́сный тво́й соверша́ющыѧ пра́здникъ, страсте́й ѡ҆мраче́нїѧ, всебл҃же́нне, моли́твами твои́ми, а҆вра́мїе, и҆зба́ви.
Бжⷭ҇твенное разжжѐ твою̀ дꙋ́шꙋ, бл҃же́нне, жела́нїе, ᲂу҆гасѝ плотска̑ѧ разжжє́нїѧ, ѻ҆́ч҃е, и҆ невеще́ственнѡ на земли́ тѧ жи́ти сотворѝ.
Оу҆мертви́въ ᲂу҆́ды, ꙗ҆̀же на землѝ, поще́нїемъ и҆ всѧ́кими ѕлострада̑нїи, ѻ҆́ч҃е мꙋ́дре, жи́зни сподо́билсѧ є҆сѝ лꙋ́чшїѧ на нб҃сѣ́хъ, бг҃оно́се а҆вра́мїе.
Бг҃оро́диченъ:
Ѿ крове́й твои́хъ свѧще́нныхъ, бг҃а ѻ҆ц҃а̀ сло́во воплоти́сѧ преесте́ственнѡ, дв҃о марі́е: є҆го́же молѝ, плотска̑ѧ моѧ̑ ᲂу҆мертви́ти взыгра̑нїѧ.
Пѣ́снь г҃. І҆рмо́съ:
Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Стоѧ́ла є҆сѝ предъ сꙋди́щемъ мꙋчи́телѧ, хрⷭ҇та̀, сла́внаѧ, творца̀ всѣ́хъ и҆ влⷣкꙋ, бг҃а сло́ва проповѣ́дающи.
Добро́та серде́чнаѧ ви́димымъ зра́комъ, сла́внаѧ, и҆зда́вшисѧ, тѧ̀ краснѣ́йшꙋю зрѧ́щымъ ꙗ҆ви́ла є҆́сть.
Бога́тство неистощи́мо и҆сцѣле́нїй тебѣ̀ подадѐ, ѻ҆трокови́це, хрⷭ҇то́съ, є҆гѡ́же нищетꙋ̀ во́льнѡ возлюби́ла є҆сѝ.
Бг҃оро́диченъ:
Ве́щь грѣхѡ́въ мои́хъ твои́хъ моли́твъ ѻ҆гне́мъ попалѝ, мт҃и свѣ́та, ро́сꙋ мѝ бжⷭ҇твеннꙋю ѡ҆ставле́нїѧ носѧ́щи.
И҆́нъ. І҆рмо́съ:
Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Всеѻбра́знѡ возжелѣ́въ жела́нїй коне́чное, мі́ра и҆ пло́ти, бг҃оно́се, внѣ̀ бы́лъ є҆сѝ. тѣ́мъ воспрїѧ́лъ є҆сѝ премі́рнꙋю сла́вꙋ и҆ вѣ́чнꙋющее, ѻ҆́ч҃е, наслажде́нїе.
Хра́мъ жи́въ ꙗ҆ви́лсѧ є҆сѝ вседѣ́тельнагѡ дх҃а, ѻ҆́ч҃е, въ хи́жинѣ тѣ́ло заключи́въ, прпⷣбне. тѣ́мже ѡ҆блиста́лъ є҆сѝ добродѣ́телей лꙋча́ми, свѧще́ннѡ ѡ҆божа́емь, бл҃же́нне а҆вра́мїе.
Дѣ́ланїемъ болѣ́зней, добродѣ́телей зрѣ́лъ, прпⷣбне, и҆зрасти́лъ є҆сѝ кла́съ стори́чествꙋющь, и҆́мже пита́ютсѧ че́стнѡ честно́е твоѐ ᲂу҆спе́нїе торжествꙋ́ющїи.
Бг҃оро́диченъ:
Въ тебѣ̀, всест҃а́ѧ, всегѡ̀ вино́вный, за премно́гое милосе́рдїе, хотѧ̀ всели́сѧ и҆ ѡ҆свѧтѝ человѣ́ческое сꙋщество̀, престꙋпле́нїемъ пе́рвѣе попо́лзшеесѧ.
По г҃-й пѣ́сни конда́къ а҆настасі́и, гла́съ г҃. Поⷣ: Дв҃а дне́сь:
Дѣ́вства вода́ми ѡ҆чище́нна, прпⷣбнаѧ, мч҃ничества кровьмѝ, а҆настасі́е, вѣнча́вшисѧ, подае́ши сꙋ́щымъ въ нꙋ́ждахъ недꙋ́гѡвъ и҆сцѣле́нїе и҆ спасе́нїе, пристꙋпа́ющымъ ѿ се́рдца: крѣ́пость бо тебѣ̀ подае́тъ хрⷭ҇то́съ, и҆сточа́ѧ бл҃года́ть приснотекꙋ́щꙋю.
Сѣда́ленъ, гла́съ и҃. Подо́бенъ: Премꙋ́дрости:
Воздержа́нїѧ росо́ю страсте́й погаси́ла є҆сѝ пла́мень ю҆́ношески, ѻ҆гне́мъ же крове́й твои́хъ всю̀ пре́лесть попали́ла є҆сѝ: и҆ женихꙋ̀ сло́вꙋ, ꙗ҆́кѡ да́ръ, принесла̀ є҆сѝ честно́е дѣ́вство и҆ до́блественное страда́нїе. тѣ́мже въ черто́гъ введе́ тѧ сла́вы, свѣ́тлѣ до́бльствовавшꙋю, и҆ ѕмі́ѧ попра́вшꙋю, а҆настасі́е многострада́льнаѧ: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.
Сла́ва, прпⷣбнагѡ, гла́съ а҃. Подо́бенъ: Гро́бъ тво́й:
И҆́же дре́внемꙋ а҆враа́мꙋ подо́бѧсѧ, ѻ҆́ч҃е, ᲂу҆дали́лсѧ є҆сѝ сро́дникѡвъ по пло́ти, повинꙋ́ѧсѧ, а҆вра́мїе, глаго́лꙋ бг҃а на́шегѡ. тѣ́мже, пости́всѧ, и҆ дꙋ́шꙋ свѣтлѣ́йшꙋ показа́лъ є҆сѝ со́лнечныхъ лꙋ̑чь, бг҃омꙋ́дре всебл҃же́нне.
И҆ ны́нѣ, бг҃оро́диченъ:
Наста́ви ны̀ на пꙋ́ть покаѧ́нїѧ, ᲂу҆кло́ншыѧсѧ при́снѡ къ безпꙋ́тїемъ ѕѡ́лъ, и҆ пребл҃га́го прогнѣ́вавшыѧ гдⷭ҇а, неискꙋсобра́чнаѧ, бл҃гослове́ннаѧ марі́е, прибѣ́жище ѿча́ѧнныхъ человѣ́кѡвъ, бж҃їе ѻ҆бита́лище.
Крⷭ҇тобг҃оро́диченъ:
Нескве́рнаѧ а҆́гница а҆́гнца и҆ па́стырѧ повѣ́шена на дре́вѣ ме́ртва зрѧ́щи, пла́чꙋщи вѣща́ше, мт҃рски восклица́ющи: ка́кѡ претерплю̀ твоѐ, є҆́же па́че сло́ва, сн҃е мо́й, сни́тїе, и҆ вѡ́льныѧ стрⷭ҇ти, бж҃е пребл҃гі́й;
Пѣ́снь д҃. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Тѧ̀, и҆́го легча́йшее хрⷭ҇то́во, мч҃нице, поне́сшꙋю ѿ ю҆́ности, желѣ́зное ᲂу҆́же носи́ти пребеззако́ннꙋющїи ѡ҆сꙋди́ша.
Ка̑пли крове́й твои́хъ, многобо́жїѧ ᲂу҆гаси́ша ᲂу҆́глїе: лꙋчи́ же чꙋде́съ твои́хъ страсте́й ве́щь попали́ша.
Не ѡ҆бнажѝ благода́ти, тѣ́ло твоѐ ѡ҆бнажи́въ лꙋка́внѣйшїй: и҆стка́нꙋ же па́че свы́ше нераздра́нꙋ ри́зꙋ и҆схода́таи тебѣ̀.
Бг҃оро́диченъ:
По ржⷭ҇твѣ̀ пребыла̀ є҆сѝ нетлѣ́нна дв҃а, ꙗ҆́коже пре́жде ржⷭ҇тва̀, ю҆́на бо млⷣнца родила̀ є҆сѝ, пре́жде вѣ̑къ познава́ема.
И҆́нъ. І҆рмо́съ то́йже:
Стрꙋѧ́ми, ѻ҆́ч҃е, сле́зъ твои́хъ дꙋшє́вныѧ сквє́рны ѡ҆мы́въ, бжⷭ҇твенное бы́лъ є҆сѝ дх҃а и҆ честно́е, всебл҃же́нне, жили́ще.
Бдѣ́нїе всено́щно, моли́твꙋ непреста́ннꙋ, безпристра́стїе и҆ любо́вь нелицемѣ́рнꙋ, и҆ соверше́ннꙋ вѣ́рꙋ ᲂу҆держа́лъ є҆сѝ.
И҆сцѣлѧ́ти стра̑сти и҆ ѿгони́ти, прпⷣбне, дꙋ́хи, бл҃года́ть прїѧ́лъ є҆сѝ, а҆вра́мїе, ꙗ҆́кѡ бж҃їй ᲂу҆го́дникъ и҆́стиннѣйшїй.
Бг҃оро́диченъ:
Оу҆ны́нїемъ ѡ҆держи́ма и҆ грѣхо́мъ ны́нѣ погрꙋже́на, мольбо́ю твое́ю и҆зба́ви мѧ̀, бцⷣе мт҃и приснодв҃о.
Пѣ́снь є҃. І҆рмо́съ:
Оу҆́тренююще, вопїе́мъ тѝ: гдⷭ҇и, спаси́ ны: ты̀ ко є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.
Не и҆знꙋре́на ѻ҆гне́мъ веще́ственнымъ ꙗ҆ви́ласѧ є҆сѝ, мч҃нице а҆настасі́е: ѻ҆́гнь бо тѧ̀ серде́чный бжⷭ҇твенныѧ любвѐ ѡ҆роша́ше.
Оу҆даре́ньми лица̀, мч҃нице а҆настасі́е, ᲂу҆краси́вшисѧ, врагѡ́въ ѿрази́ла є҆сѝ ме́рзское неразꙋ́мїе.
Протѧже́на на дре́вѣ, бг҃омꙋ́драѧ а҆настасі́е, любо́вїю жениха̀ твоегѡ̀, бжⷭ҇твеннꙋю стрⷭ҇ть ѡ҆бразова́ла є҆сѝ.
Бг҃оро́диченъ:
Пое́мъ тѧ̀, всепѣ́таѧ влⷣчце, бцⷣе: бг҃а бо препѣ́таго пло́тїю родила̀ є҆сѝ, пречⷭ҇таѧ.
И҆́нъ. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго. но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Ꙗ҆́кѡ плодови́таѧ розга̀, гро́зды и҆зрасти́лъ є҆сѝ, ѻ҆́ч҃е а҆вра́мїе, добродѣ́телей бжⷭ҇твенныхъ, ᲂу҆миле́нїѧ вїно̀ точа́щыѧ, и҆ страсте́й пїѧ́нство ѿ дꙋ́шъ ѿгонѧ́щыѧ, и҆ сердца̀ вѣ́рныхъ веселѧ́щыѧ.
Напа̑сти тебѣ̀ разли̑чны ѕмі́й вселꙋка́вый, ѻ҆́ч҃е, воздви́же, но того̀ ѻ҆рꙋ́жїемъ креста̀, бг҃оно́се, ᲂу҆мертви́лъ є҆сѝ: и҆ побѣ́ды вѣне́цъ ѿ бг҃а пра́веднымъ сꙋдо́мъ прїѧ́лъ є҆сѝ, бг҃омꙋ́дре а҆вра́мїе.
Ст҃ы́ни до́мъ, ѻ҆́ч҃е, бжⷭ҇твеннагѡ дх҃а вѣ́рою бы́въ, созда́лъ є҆сѝ до́мъ свѧще́нный, и҆ несвѧще́нный собо́ръ несвѧще́нныѧ ле́сти преложи́въ наказа́ньми, всѣ́хъ бг҃ꙋ ѡ҆свѧти́лъ є҆сѝ.
Бг҃оро́диченъ:
Мт҃рь, дв҃ꙋ ѻ҆трокови́цꙋ, бжⷭ҇твеннымъ просвѣща́еми дх҃омъ, пречⷭ҇таѧ, свѧще́ннїи прⷪ҇ро́цы свѧще́нными тѧ̀ гла́сы провозвѣсти́ша, и҆зъ неѧ́же бг҃ъ сло́во, па́че вины́ же и҆ сло́ва, воплоти́сѧ за милосе́рдїе безчи́сленное.
Пѣ́снь ѕ҃. І҆рмо́съ:
Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многоми́лостиве хрⷭ҇тѐ, бж҃е на́шъ.
Сокрꙋша́емо тѣ́ло ра́нами ꙗ҆влѧ́ше пра́вость твоеѧ̀ со́вѣсти, страстоте́рпице, ко хрⷭ҇тꙋ̀ бг҃ꙋ на́шемꙋ.
Ви́сѧщи высокѡ̀, ра̑ны, мч҃нице, терпѧ́щи, и҆ не ᲂу҆ѧ́звлено хранѧ́щи дꙋшѝ благоро́дїе, достохва́льнаѧ.
Претерпѣ́ла є҆сѝ зꙋбѡ́въ и҆ рꙋ́къ и҆ но́гъ ѿѧ́тїе, мч҃нице многострада́льнаѧ, взира́ющи ко хрⷭ҇тꙋ̀ женихꙋ̀ твоемꙋ̀.
Бг҃оро́диченъ:
Чл҃вѣколю́бца ро́ждши бг҃а, бл҃голюби́ваѧ влⷣчце: того̀ молѝ, гее́нны ѻ҆гнѧ̀ и҆зба́витисѧ на́мъ.
И҆́нъ. І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Свѣти́льника тѧ̀ сꙋ́щїи во тмѣ̀ пре́лести, неле́стнѡ наставлѧ́юща, ѡ҆брѣ́тше къ пꙋтє́мъ жи́зни, бг҃оно́се, невѣ́дѣнїѧ тмꙋ̀ ѿложи́ша, и҆ ꙗ҆ви́шасѧ свѣтови́дни вѣ́рою бжⷭ҇твенною, а҆вра́мїе.
Бо́дреннѡ, ᲂу҆моли́въ бг҃а, посыла́еши просвѣще́нїе спасе́нїѧ сꙋ́щымъ въ нощѝ і҆дѡлонеи́стовства ѡ҆держи̑мымъ, бг҃омꙋ́дре а҆вра́мїе: и҆ показа́лъ є҆сѝ всѧ̑ сы́ны свѣ́та и҆ днѐ бл҃года́тїю.
Безмо́лвнѡ твою̀ жи́знь соверши́въ, ꙗ҆̀же въ житїѝ треволнє́нїѧ, всебл҃же́нне, бж҃їими наде́ждами преше́лъ є҆сѝ, и҆ къ ти̑химъ приста́нищємъ дости́глъ є҆сѝ, а҆вра́мїе, нбⷭ҇нагѡ црⷭ҇тва и҆ бжⷭ҇твенныѧ свѣ́тлости.
Бг҃оро́диченъ:
Ѡ҆тѧгче́на мѧ̀ дрема́нїемъ ᲂу҆ны́нїѧ, возста́ви твои́мъ хода́тайствомъ, мт҃и бж҃їѧ, и҆ не да́ждь ᲂу҆снꙋ́ти въ сме́рть грѣха̀, дв҃о, предста́тельницꙋ бо и҆ пꙋтевожда̀ моеѧ̀ жи́зни написꙋ́ю тѧ̀.
Конда́къ а҆вра́мїа, гла́съ г҃. Подо́бенъ: Дв҃а дне́сь:
Во пло́ти, ꙗ҆́кѡ а҆́гг҃лъ, на землѝ ꙗ҆ви́лсѧ є҆сѝ, и҆ поще́нїемъ бы́лъ є҆сѝ ꙗ҆́кѡ дре́во насажде́нное, водо́ю воздержа́нїѧ до́брѣ возврати́всѧ, и҆ тече́ньми твои́хъ сле́зъ скве́рнꙋ ѡ҆мы́въ: сегѡ̀ ра́ди ꙗ҆ви́лсѧ є҆сѝ прїѧ́телище бжⷭ҇твенное, а҆вра́мїе, дх҃а.
І҆́косъ:
Тлѣ̑ннаѧ презрѣ́въ, нетлѣ̑нныѧ воспрїѧ́лъ є҆сѝ красѡты̀: сла̑сти плотскі̑ѧ возненави́дѣлъ є҆сѝ, мꙋ́дре, и҆змла́да возлюби́въ чистотꙋ̀. тѣ́мъ, черто́га мїрска́гѡ ѿбѣжа́въ, сопрꙋ́жницы же благосла́вныѧ и҆ роди́телей ᲂу҆клони́всѧ, є҆ди́наго бг҃а ꙗ҆́снѡ рачи́телѧ возжела́въ и҆ возлюби́въ ѿ всеѧ̀, ѻ҆́ч҃е, дꙋшѝ и҆ се́рдца и҆́стиннѡ: сегѡ̀ ра́ди показа́лсѧ є҆сѝ дѣ́вства и҆ чистоты̀ прїѧ́телище бжⷭ҇твенное, а҆вра́мїе, дх҃а.
Пѣ́снь з҃. І҆рмо́съ:
Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Шꙋ́мъ гла́са пра́зднꙋющихъ и҆дѣ́же є҆́сть ликꙋ́еши, страстоте́рпице съ дѣ́вами бг҃ꙋ зижди́телю пѣснопою́щи: бл҃гослове́нъ є҆сѝ, гдⷭ҇и бж҃е, во вѣ́ки.
Оу҆́ды сокрꙋша́емы зрѧ́щи и҆ ногте́й и҆стерза́нїе терпѧ́щи, принесла́сѧ є҆сѝ бг҃ꙋ же́ртва, пѣснопою́щи: бл҃гослове́нъ є҆сѝ, гдⷭ҇и бж҃е, во вѣ́ки.
Ꙗ҆ви́ласѧ є҆сѝ, ꙗ҆́кѡ лоза̀, бг҃омꙋ́драѧ, рꙋ́цѣ и҆ но́зѣ, ꙗ҆́кѡ вѣ̑тви, рѣ́жемы, и҆ на́мъ мы́сленно вїно̀ и҆сточа́ющее, сердца̀ ᲂу҆тѣша́ющее, и҆ страсте́й ѿрѣва́ющее пїѧ́нство.
Бг҃оро́диченъ:
Во всего̀ человѣ́ка ѡ҆бле́ксѧ нескве́рный кромѣ̀ грѣха̀, и҆зъ ᲂу҆тро́бы твоеѧ̀, чⷭ҇таѧ, про́йде плотоно́сецъ: є҆го́же ᲂу҆молѝ, вѣ́рою тѧ̀ чествꙋ́ющыѧ спастѝ.
И҆́нъ. І҆рмо́съ то́йже.
Да вы́шнее црⷭ҇тво полꙋчи́ши и҆ сла́вꙋ неизрече́ннꙋю, сла́вꙋ же попира́емꙋю, мꙋ́дре, и҆ тлѣ́ннꙋю, ꙗ҆́кѡ смы́сленъ и҆ разꙋ́менъ преѡби́дѣлъ є҆сѝ мꙋ́дреннѡ.
Є҆гда̀ во́лкъ лꙋка́вый а҆́гницꙋ твою̀ расто́ргне льсти́внѣ, тогда̀ сегѡ̀, мꙋ́дре, чє́люсти сокрꙋши́лъ є҆сѝ: сїю́ же, ꙗ҆́кѡ па́стырь и҆зрѧ́днѣйшїй, къ жи́зни приве́лъ є҆сѝ.
Зако́нѡмъ повинꙋ́ѧсѧ влⷣчнимъ, заблꙋ́ждшее взыска́лъ є҆сѝ и҆ ѡ҆брѣ́лъ є҆сѝ, и҆ на ра́мена твоѧ̑ взе́мъ, всебл҃же́нне, ꙗ҆́кѡ па́стырь, вве́лъ є҆сѝ во ѡ҆гра́дꙋ покаѧ́нїѧ.
Бг҃оро́диченъ:
Є҆ди́на є҆ди́нагѡ ѿ трⷪ҇цы родила̀ є҆сѝ во двꙋ̀ сꙋществꙋ̑, ѵ҆поста́си же є҆ди́нѣй ви́димаго, дв҃о. є҆мꙋ́же пѣснопое́мъ: бл҃гослове́нъ є҆сѝ, гдⷭ҇и бж҃е, во вѣ́ки.
Пѣ́снь и҃. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Ю҆́ношски до́бльствовавши, страстоно́сице всехва́льнаѧ, и҆ на пре́лесть воздви́гла є҆сѝ побѣ̑ды: рꙋ́къ бо лише́нїѧ и҆ но́гъ терпѣ́ла є҆сѝ, сосцє́въ же и҆ зꙋбѡ́въ твои́хъ и҆скорене́нїе, мч҃нице, претерпѣ́ла є҆сѝ, въ ра́дости пѣснопою́щи: лю́дїе, превозноси́те хрⷭ҇та̀ во вѣ́ки.
Всесвѣтла̀, ꙗ҆́кѡ со́лнце, дѣ́вства свѣ́тлостьми, и҆ мꙋче́нїѧ добро́тами ѡ҆блиста́ла є҆сѝ, и҆ мі́ръ просвѣти́ла є҆сѝ свѣтолꙋ́чными сїѧ̑нїи твоегѡ̀ терпѣ́нїѧ, страстоте́рпице, вопїю́щи: ѻ҆́троцы, благослови́те, свѧще́нницы, воспо́йте, лю́дїе, превозноси́те хрⷭ҇та̀ во вѣ́ки.
Ѡ҆скверне́ннꙋю страстьмѝ дꙋ́шꙋ мою̀, бг҃оневѣ́сто, и҆ ѡ҆черне́ннꙋю прилѡ́ги ѕмі́ѧ, твои́ми мольба́ми ѿ лю́тыхъ ѡ҆чи́сти, и҆ свѣ́тлымъ ѡ҆сѣне́нїемъ твои́мъ, мꙋ́ченице а҆настасі́е, ѡ҆зарѝ вопи́ти: свѧще́нницы по́йте, лю́дїе превозноси́те хрⷭ҇та̀ во вѣ́ки.
Бг҃оро́диченъ:
Тѧ̀ чи́стꙋю и҆ непоро́чнꙋю дѣ́ва жела́ющи, непоро́чно и҆ тѣ́ло и҆ дꙋ́шꙋ соблюдѐ, страсте́й подпалє́нїѧ терпѣ́нїемъ и҆спепели́вши, и҆скꙋше́нїе же мно́гихъ претерпѣ́вши мꙋ́къ, и҆ ны́нѣ въ нбⷭ҇ныхъ черто́зѣхъ ликꙋ́етъ съ тобо́ю, веселѧ́щисѧ во всѧ̑ вѣ́ки.
И҆́нъ. І҆рмо́съ:
Побѣди́тели мꙋчи́телѧ и҆ пла́мене, благода́тїю твое́ю бы́вше, за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: благослови́те, всѧ̑ дѣла̀ гдⷭ҇нѧ, гдⷭ҇а.
Въ поги́бели ро́въ чи́стꙋю све́рже голꙋби́цꙋ твою̀ ѕлодѣ́йственный ѕмі́й, но сїю̀ и҆зве́лъ є҆сѝ, ѻ҆́ч҃е, всемꙋ́дреннѡ, благослови́те, поѧ̀, дѣла̀ гдⷭ҇а, и҆ превозноси́те є҆го̀ во вѣ́ки.
И҆ въ житїѝ ѡ҆бходѧ̀, ѻ҆́ч҃е а҆вра́мїе, и҆ по кончи́нѣ вра́чь болѧ́щихъ ꙗ҆ви́лсѧ є҆сѝ, дх҃а бл҃года́тїю бжⷭ҇твенною, благослови́те, поѧ̀, дѣла̀ гдⷭ҇а, и҆ превозноси́те є҆го̀ во вѣ́ки.
Неѕло́бїемъ, бл҃же́нне, пра́вдою же и҆ цѣломꙋ́дрїемъ и҆ вѣ́рою просїѧ́въ, а҆́гг҃лѡмъ, прпⷣбне, счи́слилсѧ є҆сѝ, благослови́те, поѧ̀, дѣла̀ гдⷭ҇а, и҆ превозноси́те є҆го̀ во вѣ́ки.
Бг҃оро́диченъ:
Стрꙋѝ живы́ѧ ꙗ҆ви́ласѧ є҆сѝ всест҃о́е селе́нїе, ѿ неѧ́же пїю́ще, ᲂу҆мертви́вшїисѧ, жи́знь наслѣ́дꙋемъ, вопїю́ще: благослови́те дѣла̀ всѧ̑ гдⷭ҇а, и҆ превозноси́те є҆го̀ во вѣ́ки.
Пѣ́снь ѳ҃. І҆рмо́съ:
Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.
На дре́вѣ повѣ́шена была̀ є҆сѝ, сло́ва бж҃їѧ ѡ҆бразꙋ́ющи стрⷭ҇ть бл҃же́ннꙋю, и҆ ѿсѣче́нїе терпѣ́ла є҆сѝ рꙋ́къ твои́хъ и҆ но́гъ, зꙋбѡ́въ и҆скорене́нїе, ѧ҆зы́ка же ѿрѣ́занїе и҆ сосцє́въ, чи́стаѧ а҆настасі́е, мона́шествꙋющихъ сла́во и҆ мч҃никѡвъ ᲂу҆краше́нїе.
Ꙗ҆́кѡ невѣ́ста ᲂу҆краси́ласѧ є҆сѝ добро́тою, ѡ҆брꙋчи́вшисѧ женихꙋ̀ страда́ньми добротво́рными, внꙋ́трь же черто́гѡвъ свѣтови́дныхъ, ꙗ҆́кѡ и҆збра́ннаѧ, всели́ласѧ є҆сѝ, носѧ́щи свѣщꙋ̀ дѣ́вственнꙋю. и҆ ны́нѣ црⷭ҇твꙋеши съ живꙋ́щимъ во вѣ́ки, а҆настасі́е, сїѧ́ющи.
И҆ска́паютъ болѣ̑зни твоѧ̑ сла́дость, грѣха̀ го́ресть ѿе́млющꙋ: ра́ка же то́читъ и҆сцѣле́нїй рѣ́ки, и҆ потоплѧ́етъ всѧ̑ стра̑сти и҆ недꙋ́ги лю̑тыѧ, въ сла́вꙋ сп҃совꙋ, честна́ѧ а҆настасі́е, и҆̀же по достоѧ́нїю тѧ̀ сла́вѧтъ.
До́блествоваша жєны̀ твои́мъ крⷭ҇то́мъ ᲂу҆крѣ́пльшесѧ, хрⷭ҇тѐ всеси́льне, и҆ вра́жїю главꙋ̀ многоко́зненнꙋю мꙋ́жески, сло́ве бж҃їй, сокрꙋши́ша, и҆ раѧ̀ ра́достно селе́нїе полꙋчи́вше, ѡ҆боже́нїе прїѧ́ша ди́вное, воспѣва́юще тѧ̀.
Бг҃оро́диченъ: Поне́сшаго тѧ̀ пло́ть ѿ жены̀ ꙗ҆́кѡ позна̀ мч҃ница твоѧ̀, гдⷭ҇и, дѣ́вственными ᲂу҆кра́шена лꙋча́ми, и҆ мꙋче́нїѧ кро́вїю ѡ҆багрена̀, тебѣ̀ бг҃ꙋ, во слѣ́дъ мт҃ре твоеѧ̀, сла́внѡ приведе́сѧ, ꙗ҆́кѡ црⷭ҇твꙋющемꙋ тва́рїю.
И҆́нъ. І҆рмо́съ:
Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чи́стаѧ, съ безпло́тными ли́ки тѧ̀ велича́юще.
Ви́дѣти сподо́билсѧ є҆сѝ, ѻ҆́ч҃е бг҃оно́се, чрезъ наде́ждꙋ тебѣ̀ дре́вле жела́ємаѧ, и҆́хже ѻ҆́ко не ви́дѣ, и҆ ᲂу҆́хо не слы́ша.
Красе́нъ ꙗ҆ви́лсѧ є҆сѝ бжⷭ҇твенными добродѣ́телей лꙋча́ми сїѧ́ѧ, а҆вра́мїе, и҆ кра́сномꙋ влⷣцѣ ра́дꙋѧсѧ предстои́ши.
Совокꙋпи́лсѧ є҆сѝ ликѡ́мъ всѣ́хъ преподо́бныхъ, и҆ съ ни́ми ѡ҆боже́нїѧ, прпⷣбне, полꙋчи́въ, молѝ є҆́же спасти́сѧ всѣ̑мъ на́мъ.
Де́нь весе́лїѧ приво́дитъ ра́достнѡ, свѧще́нное твоѐ, а҆вра́мїе, ᲂу҆спе́нїе, цр҃ковь чествꙋ́ющи житїѐ твоѐ.
Бг҃оро́диченъ:
Благолюби́ваѧ дв҃о, ѡ҆ѕло́бленнꙋю грѣхо́мъ дꙋ́шꙋ мою̀ ᲂу҆блажѝ, и҆ бла̑гъ нбⷭ҇ныхъ прича́стника сотворѝ.
На лїтꙋргі́и прокі́менъ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇лъ къ гала́тѡмъ, зача́ло сг҃і. А҆ллилꙋ́їа, гла́съ ѕ҃: Блаже́нъ мꙋ́жъ: Сті́хъ: Си́льно на землѝ бꙋ́детъ сѣ́мѧ є҆гѡ̀. Є҆ѵⷢ҇лїе матѳе́а, зача́ло м҃г. Прича́стенъ: Въ па́мѧть вѣ́чнꙋю.
Слꙋ́жба прпⷣбнагѡ а҆вра́мїа, росто́вскагѡ чꙋдотво́рца.
На ма́лѣй вече́рни стїхи̑ры на д҃, самогла́сны, гла́съ д҃:
Вѣ́рою и҆ любо́вїю, празднолю́бцы, соше́дшесѧ, ѱалмы̑ и҆ пѣ́сньми восхва́лимъ дне́сь нбⷭ҇наго человѣ́ка и҆ земна́го а҆́гг҃ла, къ немꙋ́же возопїи́мъ: ѽ всебл҃же́нне и҆ прпⷣбне, по́стникѡвъ похвало̀! ѡ҆ на́съ моли́сѧ ко гдⷭ҇ꙋ, а҆вра́мїе, ѻ҆́ч҃е на́шъ, поми́ловатисѧ дꙋша́мъ на́шымъ.
Честны́й и҆ свѣтоно́сный, прпⷣбне, тво́й пра́здникъ, и҆спо́лненъ ра́дости и҆ весе́лїѧ дꙋхо́внагѡ: тѣ́мже соше́дшесѧ мона́хѡвъ мно́жєства и҆ хрⷭ҇тоимени́тїи лю́дїе, любо́вїю восхвалѧ́юще, блажи́мъ бжⷭ҇твєннаѧ дѣѧ̑нїѧ твоѧ̑: ꙗ҆́кѡ бо крі́нъ во ᲂу҆до́лїи процвѣ́лъ є҆сѝ, и҆ благово́ниши дꙋшє́внаѧ на̑ша чꙋ̑вства. а҆вра́мїе, ѻ҆́ч҃е на́шъ, молѝ спасти́сѧ дꙋша́мъ на́шымъ.
Ꙗ҆́кѡ ᲂу҆ѧзви́лсѧ є҆сѝ жела́нїемъ бжⷭ҇твеннымъ, преподо́бне ѻ҆́ч҃е на́шъ а҆вра́мїе, взе́мъ бо крⷭ҇тъ тво́й, послѣ́довалъ є҆сѝ влⷣцѣ хрⷭ҇тꙋ̀, тогда̀ всѧ̑ плотска̑ѧ мꙋдрова̑нїѧ ᲂу҆мертви́лъ є҆сѝ и҆ наслѣ́довалъ є҆сѝ вои́стиннꙋ кро́ткихъ зе́млю, прича́стїемъ ѡ҆божа́емь, неизрече́ннагѡ ѻ҆́нагѡ весе́лїѧ наслажда́ѧсѧ, помина́й на́съ, творѧ́щихъ всесвѧтꙋ́ю и҆ пречестнꙋ́ю твою̀ па́мѧть.
Сла́ва, гла́съ и҃.
Прпⷣбне и҆ бг҃обл҃же́нне ѻ҆́ч҃е на́шъ а҆вра́мїе, вои́стиннꙋ сподо́билсѧ є҆сѝ бжⷭ҇твенныѧ жи́зни, посто́мъ бо и҆ бдѣ́нїемъ и҆знꙋри́лъ є҆сѝ тѣ́ло твоѐ, тѣ́мже и҆ ѻ҆́бразъ бы́лъ є҆сѝ мона́хѡвъ. а҆́ще бо и҆ тѣле́сный ѧ҆зы́къ ᲂу҆молчѐ, но чꙋдеса̀ свидѣ́тельствꙋютъ. гра́дъ же росто́въ, проповѣ́дꙋѧ, хва́литсѧ: и҆мѣ́ю въ себѣ̀, глаго́лѧ, неистощи́мое сокро́вище: са́ми бо зрѧ́ще честнꙋ́ю ра́кꙋ моще́й твои́хъ, и҆ чꙋдеса̀ быва́єма, прославлѧ́ютъ просла́вльшаго тѧ̀ гдⷭ҇а, є҆мꙋ́же моли́сѧ дарова́ти вселе́ннѣй ми́ръ и҆ ве́лїю ми́лость.
И҆ ны́нѣ, бг҃оро́диченъ: На стїхо́внѣ стїхи̑ры, гла́съ в҃.
Дх҃а ст҃а́гѡ теплото́ю, мꙋ́дре, жела́нїе се́рдца твоегѡ̀, є҆́же къ бг҃ꙋ, согрѣ́ѧвъ, и҆ зи́мꙋ страсте́й ᲂу҆мертви́въ, многоко́зненнꙋю же си́лꙋ і҆́дѡла веле́са низложи́лъ є҆сѝ, въ коне́цъ не́мощна сего̀ показа́въ. нбⷭ҇наѧ же вѡ́инства ᲂу҆диви́лъ є҆сѝ терпѣ́нїемъ твои́мъ, ꙗ҆́кѡ по́стникѡвъ подража́тель и҆ преподо́бныхъ сожи́тель, молѝ спасти́сѧ дꙋша́мъ на́шымъ.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
Крⷭ҇тъ тво́й взе́мъ, прпⷣбне а҆вра́мїе, крѣ́пкѡ послѣ́довалъ є҆сѝ хрⷭ҇тꙋ̀, на́съ ра́ди на крⷭ҇тѣ̀ распе́ншемꙋсѧ: и҆ тогѡ̀ ра́ди любвѐ всѧ̑ ѡ҆ста́вилъ є҆сѝ, и҆ того̀ є҆ди́наго возлюби́лъ є҆сѝ: є҆мꙋ́же и҆ со а҆́гг҃лы предстоѧ̀, молѝ ᲂу҆ще́дрити мі́ръ и҆ спастѝ дꙋ́шы на́шѧ.
Сті́хъ: Блаже́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Ꙗ҆́кѡ прїе́мъ, ѻ҆́ч҃е, нбⷭ҇ное сѣ́мѧ, пло́дъ стори́чествꙋющь добродѣ́тели прине́слъ є҆сѝ, а҆вра́мїе, ѻ҆́ч҃е на́шъ, пита́ѧ благоче́стнѡ гла́домъ та́ющыѧ добродѣ́тели, ѿѻнꙋ́дꙋже и҆сцѣлє́нїѧ вѣ́рою приходѧ́щымъ подае́ши. тѣ́мже, ꙗ҆́кѡ и҆мѣ́ѧ дерзнове́нїе ко хрⷭ҇тꙋ̀, молѝ, прпⷣбне ѻ҆́ч҃е на́шъ а҆вра́мїе, спасти́сѧ вѣ́рою и҆ любо́вїю чествꙋ́ющымъ па́мѧть твою̀.
Сла́ва, гла́съ и҃:
Прїиди́те мона́хѡвъ мно́жєства дне́сь, ѱалѡ́мскаѧ пѣ̑нїѧ и҆ цвѣ́ты дꙋхѡ́вныѧ принесе́мъ, ꙗ҆́кѡ вои́стиннꙋ мона́шескомꙋ ᲂу҆добре́нїю и҆ прпⷣбныхъ сожи́телю. є҆го́же хва́лѧще, си́це рце́мъ: ра́дꙋйсѧ, свѣти́льниче многосвѣ́тлый, приведы́й ко хрⷭ҇тꙋ̀ мона́хѡвъ мно́жєства. ра́дꙋйсѧ, гра́да росто́ва похвала̀ и҆ ᲂу҆твержде́нїе, и҆ всѣ́хъ вѣ́рныхъ благоꙋти́шное приста́нище, и҆ ѡ҆чище́нїе болѧ́щихъ во грѣсѣ́хъ, на бжⷭ҇твєнныѧ ты́ѧ возвыша́ѧ рачє́нїѧ. тѣ́мъ, въ пречестнꙋ́ю твою̀ па́мѧть, свѧтꙋ́ю и҆ а҆гг҃логовѣ́йнꙋю, ѡ҆бстоѧ́ще, ра́кꙋ любе́знѡ ѡ҆блобыза́емъ, прпⷣбне ѻ҆́ч҃е на́шъ а҆вра́мїе, и҆ бжⷭ҇твеннагѡ чл҃вѣколю́бїѧ про́симъ полꙋчи́ти твои́ми моли́твами, мі́рꙋ ми́ръ дарова́ти и҆ дꙋша́мъ на́шымъ ве́лїю ми́лость.
И҆ ны́нѣ, бг҃оро́диченъ:
Тропа́рь, гла́съ а҃:
Просвѣти́всѧ бжⷭ҇твенною благода́тїю, невѣ̑рныѧ лю́ди наста́вилъ є҆сѝ къ свѣ́тꙋ бг҃оразꙋ́мїѧ: и҆ по сме́рти сїѧ́ѧ свѣ́тлостїю житїѧ̀ твоегѡ̀, и҆сточа́еши и҆сцѣлє́нїѧ притека́ющымъ съ вѣ́рою къ ра́цѣ моще́й твои́хъ, а҆вра́мїе ѻ҆́ч҃е на́шъ, хрⷭ҇та̀ бг҃а молѝ, дарова́ти на́мъ ве́лїю ми́лость.
Сла́ва, и҆ ны́нѣ, бг҃оро́диченъ воскрⷭ҇нъ.
На вели́цѣй вече́рни. На Гдⷭ҇и, воззва́хъ, стїхи̑ры, на и҃, гла́съ а҃. Подо́бенъ: Ѽ ди́внагѡ чꙋдесѐ:
Ѽ пресла́внагѡ чꙋдесѐ! и҆сто́чникъ благоче́стїѧ въ росто́вѣ ꙗ҆влѧ́етсѧ, и҆ лѣ́ствица къ нб҃сѝ а҆вра́мїй быва́етъ на́мъ: весели́тсѧ гра́дъ росто́въ, и҆мѣ́ѧ въ себѣ̀ мо́щи тогѡ̀. ра́дꙋетсѧ правосла́вныхъ мно́жество, а҆вра́мїа и҆мꙋ́ще въ бѣда́хъ застꙋ́пника, и҆ къ немꙋ̀ вопїю́ще: прпⷣбне, ра́дꙋйсѧ, и҆ гдⷭ҇ꙋ моли́сѧ, дарова́ти дꙋша́мъ на́шымъ ми́ръ и҆ ве́лїю ми́лость.
Ѽ ди́внагѡ чꙋдесѐ! вѣ́твь благода́ти въ рѡссі́и воспитова́етсѧ, и҆ кѷпарі́съ доброво́нный въ росто́вѣ возраста́етъ, и҆ сто́лпъ непоколе́блемь правосла̑внымъ ᲂу҆твержда́етсѧ, и҆ крѣ́пкїй а҆дама́нтъ дꙋше́ю быва́етъ а҆вра́мїй бг҃облаже́нный: тѣ́мъ бг҃омꙋ́дрыхъ собо́ри на высотꙋ̀ дх҃омъ вознеси́тесѧ, прпⷣбномꙋ вопїю́ще: ѻ҆́ч҃е а҆вра́мїе, ра́дꙋйсѧ, и҆ гдⷭ҇ꙋ помоли́сѧ, дарова́ти дꙋша́мъ на́шымъ ми́ръ и҆ ве́лїю ми́лость.
Ди̑вны твоѧ̑ та̑йны, хрⷭ҇тѐ бж҃е, ꙗ҆́кѡ дарова́лъ є҆сѝ на́мъ такова́го свѣти́льника а҆вра́мїа предо́блѧго, правосла́вномꙋ ѻ҆те́чествꙋ на́шемꙋ на сопроти̑вныѧ побо́рника, веле́са погꙋби́вшаго и҆ хра́мъ и҆́мени твоемꙋ̀ ст҃о́мꙋ воздви́гшаго, въ не́мже и҆́мѧ твоѐ прославлѧ́етсѧ, и҆ вѣ́рнїи ᲂу҆крѣплѧ́емсѧ, припа́дающе къ тебѣ̀, всѣ́хъ влⷣцѣ, просѧ́ще, чл҃вѣколю́бче, дарова́ти дꙋша́мъ на́шымъ ми́ръ и҆ ве́лїю ми́лость.
Сла́ва, гла́съ є҃:
Добродѣ́тели подража́телѧ похва́лимъ дне́сь, а҆вра́мїа, похвалꙋ̀ рѡссі́йскꙋю, и҆ па́мѧть є҆гѡ̀ свѣ́тлѡ торжествꙋ́имъ, вѣ́рныхъ собо́ри соше́дшесѧ въ це́рковь гдⷭ҇ню, мо́щи тогѡ̀ ѡ҆блобыза́юще, и҆ къ немꙋ̀ си́це вопїю́ще: прїидѝ ны́нѣ, прпⷣбне, и҆ ѡ҆ на́съ непреста́ннѡ моли́сѧ, пра́зднꙋющихъ твоѐ торжество̀, да твои́ми моли́твами да́рꙋетъ на́мъ хрⷭ҇то́съ ве́лїю и҆ бога́тꙋю ми́лость.
И҆ ны́нѣ, бг҃оро́диченъ: Въ чермнѣ́мъ мо́ри:
Вхо́дъ, Прокі́менъ днѐ. Чтє́нїѧ г҃.
Пи́саны сегѡ̀ мцⷭ҇а въ а҃ де́нь, прпⷣбномꙋ са́ввѣ ви́шерскомꙋ.
На лїті́и стїхи̑ры, гла́съ ѕ҃:
Прїиди́те празднолю́бцы и҆ пѡ́стникъ сосло́вїе, вѣ́рою соше́дшесѧ, ꙗ҆́кѡ и҆́стиннаго по́стника почти́мъ а҆вра́мїа дне́сь, ше́ствовавшаго по стопа́мъ влⷣки своегѡ̀, ᲂу҆́зкїй пꙋ́ть, и҆ безстра́стнꙋю жи́знь, и҆ вѣ́рою возопїи́мъ: ѽ всеблаже́нне сожи́телю прпⷣбныхъ и҆ по́стникѡвъ похвало̀! ѡ҆ на́съ моли́сѧ ко гдⷭ҇ꙋ, поми́ловатисѧ дꙋша́мъ на́шымъ.
Прпⷣбне ѻ҆́ч҃е бг҃оно́се а҆вра́мїе, ѿ ма́тернихъ пеле́нъ бг҃ꙋ возложе́нъ є҆сѝ, и҆ любвѐ ра́ди тогѡ̀ всѧ̑ ѡ҆ста́вилъ є҆сѝ, и҆ і҆́дѡла веле́са сокрꙋши́въ, кова̑рства є҆гѡ̀ всѧ̑ сте́рлъ є҆сѝ, и҆ ѻ҆би́тель соста́вивъ, мно́жество мона́хѡвъ собра́лъ є҆сѝ, сла́вити многопѣ́тꙋю трⷪ҇цꙋ, ю҆́же молѝ, бл҃же́нне, спасти́сѧ дꙋша́мъ на́шымъ.
И҆́же на землѝ а҆́гг҃ла и҆ на нб҃сѣ́хъ человѣ́ка бж҃їѧ, мі́ра благо́е ᲂу҆краше́нїе, пи́щꙋ благи́хъ добродѣ́телей, по́стникѡвъ похвалꙋ̀ а҆вра́мїа почти́мъ: насажде́нъ бо въ домꙋ̀ бж҃їи, процвѣтѐ пра́веднѡ, ꙗ҆́кѡ ке́дръ въ пꙋсты́ни, въ преподо́бствѣ и҆ пра́вдѣ.
Сла́ва, гла́съ и҃:
Мона́хѡвъ мно́жества наста́вника тѧ̀ почита́емъ, ѻ҆́ч҃е на́шъ а҆вра́мїе: твое́ю бо стезе́ю вои́стиннꙋ пра́вѡ ходи́ти позна́хомъ. блаже́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, прпⷣбныхъ соприча́стниче и҆ пра́ведныхъ: съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ.
И҆ ны́нѣ, бг҃оро́диченъ: Безневѣ́стнаѧ дв҃о:
На стїхо́внѣ стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:
Нбⷭ҇ныхъ чинѡ́въ ревни́тель, тѣ́хъ житїѐ пожи́въ, ꙳ въ ме́ртвеннѣмъ тѣлесѝ, ꙗ҆́кѡ а҆́гг҃лъ, показа́лсѧ є҆сѝ. ꙳ сегѡ̀ ра́ди ѿ хрⷭ҇та̀ бг҃а да́ръ чꙋде́съ прїе́мъ, ꙳ и҆ на́мъ ѡ҆би́льнѡ и҆сцѣлє́нїѧ подава́еши, ꙳ и҆ ѿ всѧ́кихъ скорбе́й спаса́еши къ тебѣ̀ притека́ющыѧ, ꙗ҆́кѡ на тѧ̀ ᲂу҆пова́нїе возлага́емъ, ꙳ и҆ твои́ми моли́твами ѿ бѣ́дъ и҆збавлѧ́емсѧ, ѻ҆́ч҃е а҆вра́мїе.
Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀:
Нбⷭ҇ныхъ чинѡ́въ ра́дованїе, ꙳ твоѐ житїѐ, свѧ́те а҆вра́мїе, ꙳ и҆ на землѝ человѣ́кѡмъ ско́рый въ бѣда́хъ застꙋ́пниче, ꙳ моли́сѧ ѡ҆ на́съ, къ тебѣ̀ притека́ющихъ и҆ твоѐ преставле́нїе пра́зднꙋющихъ, ꙳ ꙗ҆́кѡ на тѧ̀ ᲂу҆пова́нїе возлага́емъ, ꙳ и҆ твои́ми моли́твами ѿ бѣ́дъ спаса́емсѧ.
Сті́хъ: Пра́ведникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ.
Нбⷭ҇ный человѣ́къ ꙗ҆ви́сѧ на́мъ, и҆ земны́й а҆́гг҃лъ ꙳ провѣ́дꙋетсѧ дне́сь а҆вра́мїй ѡ҆свѧще́нный, ꙳ є҆гѡ́же житїю̀ ᲂу҆диви́шасѧ а҆́гг҃ли, и҆ вострепета́ша дꙋ́си лꙋка́вїи, ꙳ то́й на́ми пра́зднꙋетсѧ дне́сь. ꙳ и҆ тогѡ̀ торжество̀ ликовствꙋ́юще, вопїе́мъ: ꙳ молѝ, прпⷣбне, хрⷭ҇та̀ бг҃а, да твои́ми моли́твами ѿ вра̑гъ свободи́мсѧ.
Сла́ва, гла́съ ѕ҃:
Дне́сь вѣ́рныхъ собо́ри соше́дшесѧ, восхва́лимъ ѻ҆тца̀ на́шего, дꙋхо́внѡ веселѧ́щесѧ и҆ па́мѧть є҆гѡ̀ свѣ́тлѡ пра́зднꙋюще, ꙗ҆́кѡ вра̑жїѧ полкѝ прогна́вшаго и҆ де́мѡна посрами́вшаго, и҆ ѕла́го і҆́дѡла веле́са и҆скорени́вшаго, и҆ гра́дъ росто́въ кꙋпѣ́лїю ст҃а́гѡ дх҃а ѡ҆бно́вльшаго, и҆ ны́нѣ сїѧ́юща чꙋдесы̀, а҆вра́мїа предо́блѧго: ꙗ҆́кѡ да тогѡ̀ моли́твами да́рꙋетъ на́мъ хрⷭ҇то́съ ве́лїю и҆ бога́тꙋю ми́лость.
И҆ ны́нѣ, бг҃оро́диченъ: Тропа́рь, гла́съ а҃: Просвѣти́всѧ бжⷭ҇твенною благода́тїю: Пи́санъ на ма́лѣй вече́рни.
На ᲂу҆́трени тропа́рь ст҃а́гѡ, два́жды. Сла́ва, и҆ ны́нѣ, бг҃оро́диченъ:
По а҃-мъ стїхосло́вїи сѣда́ленъ, гла́съ д҃:
Крѣ́пкїй дꙋше́ю а҆дама́нтъ ꙗ҆ви́лсѧ є҆сѝ, прпⷣбне, непоколе́блемо ѡ҆снова́нїе въ вѣ́рѣ и҆мѣ́ѧй, ѻ҆́ч҃е а҆вра́мїе. сегѡ̀ ра́ди гнꙋ́снаго і҆́дѡла разори́лъ є҆сѝ и҆ въ не́мъ де́мѡнскїѧ полкѝ побѣди́лъ є҆сѝ, ꙗ҆́кѡ до́бръ во́инъ хрⷭ҇то́въ. є҆мꙋ́же моли́сѧ, да спасе́тъ тебє̀ ра́ди дꙋ́шы на́шѧ.
Два́жды.
Сла́ва, и҆ ны́нѣ, бг҃оро́диченъ:
Ра́дꙋйсѧ, влⷣчце, нбⷭ҇наѧ цр҃и́це, бг҃а пло́тїю на́мъ ро́ждшаѧ, є҆ди́наго а҆́гнца, за на́съ во́лею поже́ршагосѧ. того̀ молѝ, всеблаже́ннаѧ, да твои́ми моли́твами спасе́тъ дꙋ́шы на́шѧ.
По в҃-мъ стїхосло́вїи сѣда́ленъ, гла́съ в҃:
Моли́твъ твои́хъ тре́бꙋемъ, грѣ́шнїи, и҆ ты́ѧ на́мъ пода́ждь, ѻ҆́ч҃е а҆вра́мїе, ꙗ҆́кѡ да, наставлѧ́еми и҆́ми, пре́йдемъ къ небꙋ́рномꙋ приста́нищꙋ и҆ вѣнцы̀ небє́сныѧ ᲂу҆лꙋчи́мъ, и҆ тебѣ̀ воспѣва́емъ: ра́дꙋйсѧ, ѻ҆́ч҃е ѻ҆ц҃є́въ, похвала̀ на́ша и҆ ᲂу҆твержде́нїе.
Два́жды.
Сла́ва, и҆ ны́нѣ, бг҃оро́диченъ:
Моли̑твы твои́хъ ра̑бъ прїимѝ, бцⷣе, застꙋ́пнице на́ша и҆ прибѣ́жище: къ комꙋ́ бо прибѣ́гнемъ ра́звѣ тебє̀, влⷣчце; ты̀ покро́въ на́шъ и҆ застꙋпле́нїе. и҆ ны́нѣ не ѡ҆ста́ви на́съ до конца̀ поги́бнꙋти, да твои́ми моли́твами ѿ бѣ́дъ сохранѧ́емсѧ: на тѧ́ бо ᲂу҆пова́нїе, съ бг҃омъ, бцⷣе, возложи́хомъ.
По полѷеле́и сѣда́ленъ, гла́съ є҃:
А҆пⷭ҇лѡвъ ревни́тель бы́въ, прпⷣбне, сегѡ̀ ра́ди и҆ бг҃осло́вꙋ бесѣ́довати сподо́билсѧ є҆сѝ, и҆ сегѡ̀ же́злъ прїи́мъ, веле́са разрꙋши́лъ є҆сѝ, и҆ тогѡ̀ кѡ́зни до конца̀ и҆скорени́лъ є҆сѝ, и҆ невѣ̑рныѧ ко хрⷭ҇то́вѣ вѣ́рѣ приве́лъ є҆сѝ. ны́нѣ же хрⷭ҇та̀ бг҃а молѝ ѡ҆ чтꙋ́щихъ па́мѧть твою̀, дарова́ти на́мъ ми́ръ и҆ ве́лїю ми́лость.
Два́жды.
Сла́ва, и҆ ны́нѣ, бг҃оро́диченъ:
Храни́телище нело́жное содѣ́телѧ на́шегѡ, влⷣчце бцⷣе, сохранѝ гра́дъ и҆ лю́ди, и҆́мѧ твоѐ ст҃о́е сла́вѧщыѧ, и҆ покры́й покро́вомъ ми́лости твоеѧ̀: тѧ́ бо те́плꙋ предста́тельницꙋ и҆́мамы ко и҆зъ тебє̀ ро́ждшемꙋсѧ хрⷭ҇тꙋ̀, бг҃ꙋ на́шемꙋ, да твои́ми моли́твами спасе́тъ дꙋ́шы на́шѧ.
Степє́нна а҃-й а҆нтїфѡ́нъ д҃-гѡ гла́са. Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Всѧ́кое дыха́нїе: Є҆ѵⷢ҇лїе матѳе́а, зача́ло м҃г.
По н҃-мъ ѱалмѣ̀ стїхи́ра, гла́съ д҃:
Прїиди́те мона́хѡвъ мно́жєства, прїиди́те пꙋсты́нное воспита́нїе, прїиди́те, и҆ ли́къ соста́вимъ, дне́сь бо трапе́за поставлѧ́етсѧ, и҆ па́че бл҃гово́нныхъ а҆рѡма̑тъ ѡ҆благоꙋха́етъ на́съ па́мѧть преблаже́ннагѡ а҆вра́мїа, прїиди́те, стеце́мсѧ къ ра́цѣ є҆гѡ̀, и҆ любе́знѡ цѣлꙋ́емъ пречестно́е ѻ҆́но тѣ́ло, нетлѣ́нно во гро́бѣ лежа́що, и҆ на́мъ ѻ҆би́льнѡ и҆сто́чникъ чꙋде́съ и҆сточа́ющо, и҆ къ немꙋ̀ возопїе́мъ: ѻ҆́ч҃е а҆вра́мїе, твои́ми моли́твами просѝ на́мъ ᲂу҆ хрⷭ҇та̀ ми́ра и҆ ве́лїѧ ми́лости.
Канѡ́нъ бцⷣы на ѕ҃: и҆ прпⷣбнагѡ на и҃:
Гла́съ а҃. Пѣ́снь а҃. І҆рмо́съ:
Го́рькїѧ рабо́ты и҆зба́вльсѧ і҆и҃ль, непроходи́мое про́йде, ꙗ҆́кѡ сꙋ́шꙋ, врага̀ зрѧ̀ потоплѧ́ема, пѣ́снь, ꙗ҆́кѡ бл҃годѣ́телю, пое́тъ бг҃ꙋ, чꙋдодѣ́ющемꙋ мы́шцею высо́кою, ꙗ҆́кѡ просла́висѧ.
Лю́тыми страстьмѝ побѣжда́емь є҆́смь, ѻ҆каѧ́нный, и҆ сегѡ̀ ра́ди молю́ тѧ, хрⷭ҇тѐ бж҃е, ѿ си́хъ и҆зба́вити мѧ̀, ꙗ҆́кѡ да по достоѧ́нїю возмогꙋ̀ воспѣ́ти твоего̀ ᲂу҆го́дника, а҆вра́мїа прпⷣбнаго.
Лю́тыхъ смꙋще́нїй свободи́ мѧ, ѻ҆́ч҃е, да, наставлѧ́емь твои́ми моли́твами, свѣ́тлѡ воспою̀ твоѐ торжество̀, бг҃оно́се а҆вра́мїе.
Лю́таго і҆́дѡла и҆скорени́лъ є҆сѝ, ѻ҆́ч҃е пребл҃же́нне, и҆ ко хрⷭ҇тꙋ̀ приве́лъ є҆сѝ невѣ́рныхъ собѡ́рища, и҆ ты́ѧ, ꙗ҆́кѡ ке́дръ, и҆́же въ лїва́нѣ, ᲂу҆мно́жилъ є҆сѝ твои́ми моли́твами, во сто̀ плодоносѧ́щыѧ и҆ врага̀ попира́ющыѧ.
Бг҃оро́диченъ:
Лю́тыхъ напа́стей и҆ мно́гихъ прегрѣше́нїй свободи́ мѧ, влⷣчце, и҆ проще́нїе пода́ждь мѝ, ꙗ҆́кѡ дерзнꙋ́хъ написа́ти мое́ю скве́рною десни́цею ст҃о́е твоѐ и҆́мѧ.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃. І҆рмо́съ:
Да ᲂу҆тверди́тсѧ се́рдце моѐ въ во́ли твое́й, хрⷭ҇тѐ бж҃е, и҆́же надъ вода́ми не́бо ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне.
Да ᲂу҆тверди́тсѧ се́рдце моѐ моли́твами твои́ми, ст҃е, и҆ наꙋчи́ мѧ недосто́йнаго, похвали́ти по досто́инствꙋ пресла́внꙋю па́мѧть твою̀, бг҃оно́се ѻ҆́ч҃е на́шъ а҆вра́мїе.
Да ᲂу҆тверди́ши ны̀, бг҃омꙋ́дре, на безплѡ́тныѧ врагѝ, є҆́же прогони́ти ты́ѧ, твою́ же па́мѧть велича́ти и҆ хрⷭ҇та̀ прославлѧ́ти тебѐ просла́вльшаго, ѻ҆́ч҃е а҆вра́мїе.
Да ᲂу҆тверди́мсѧ на ка́мени непоколеби́мѣмъ твои́хъ мл҃твъ, да не поколе́блютъ на́съ прило́зи льсти́вагѡ, и҆ ᲂу҆́мъ на́шъ просвѣтѝ свѣ́томъ за́повѣдей хрⷭ҇то́выхъ, ꙗ҆́кѡ да вѣ́рою воспѣва́емъ тѧ̀, преблаже́нне а҆вра́мїе.
Бг҃оро́диченъ:
Да ᲂу҆твержде́нъ бꙋ́дꙋ ми́лостїю твое́ю, влⷣчце, и҆ покрове́нъ кро́вомъ кри́лъ твои́хъ, бцⷣе, и҆ и҆збѣ́гнꙋ сѣте́й лꙋка́вагѡ, воспѣва́ѧ пресла́вное твоѐ торжество̀.
По г҃-й пѣ́сни сѣда́ленъ, гла́съ є҃.
А҆пⷭ҇лѡвъ ревни́тель, бы́въ, прпⷣбне, сегѡ̀ ра́ди и҆ бг҃осло́вꙋ бесѣ́довати сподо́билсѧ є҆сѝ, и҆ сегѡ̀ же́злъ прїи́мъ, веле́са разрꙋши́лъ є҆сѝ, и҆ тогѡ̀ кѡ́зни до конца̀ и҆скорени́лъ є҆сѝ, и҆ невѣ̑рныѧ ко хрⷭ҇то́вѣ вѣ́рѣ приве́лъ є҆сѝ. ны́нѣ же хрⷭ҇та̀ бг҃а молѝ ѡ҆ чтꙋ́щихъ па́мѧть твою̀, дарова́ти на́мъ ми́ръ и҆ ве́лїю ми́лость.
Два́жды.
Сла́ва, и҆ ны́нѣ, бг҃оро́диченъ:
Побѣ́дꙋ и҆мꙋ́ще крѣ́пкїѧ си́лы на тѧ̀ любо́вїю вѣ́рнѡ надѣ́ющїисѧ, чⷭ҇таѧ цр҃и́це дв҃о бцⷣе, врагѝ покарѧ́юще, побо́рницꙋ и҆мꙋ́щи тѧ̀, весели́мсѧ.
Пѣ́снь д҃. І҆рмо́съ:
Разꙋмѣ́хъ, всеси́льне, твоѐ смотре́нїе, и҆ со стра́хомъ просла́вихъ тѧ̀, сп҃се.
Разꙋмѣ́хъ, прпⷣбне, моѐ недосто́инство, и҆ со стра́хомъ коснꙋ́хсѧ къ твоемꙋ̀ хвале́нїю: но ты̀, свѧ́те, прїимѝ, ꙗ҆́кѡ ᲂу҆бо́гїѧ двѣ̀ ца̑тѣ, съ вѣ́рою тебѣ̀ приноси́мое хвале́нїе, всехва́льне ѻ҆́ч҃е а҆вра́мїе.
Разꙋмѣ́лъ є҆сѝ, ѻ҆́ч҃е пребл҃же́нне, кова̑рствїѧ лꙋка́вагѡ веле́са, и҆ сего̀ до конца̀ низложи́лъ є҆сѝ: на́съ на моли́твꙋ воздви́гни дне́сь, да вѣ́рнѡ ликовствꙋ́емъ, пребл҃же́нне, въ па́мѧти твое́й, ѻ҆́ч҃е а҆вра́мїе.
Разꙋмѣ́лъ є҆сѝ, свѧ́те, де́мѡна во ᲂу҆мыва́льницꙋ твою̀ вше́дша и҆ па́кость тебѣ̀ сотвори́ти хотѧ́ща, сосꙋ́дъ крⷭ҇то́мъ покры́въ, того̀ ѡ҆пали́лъ є҆сѝ: ны́нѣ же на́съ спасѝ ѿ є҆гѡ̀ ловле́нїѧ твои́ми моли́твами, ѻ҆́ч҃е а҆вра́мїе.
Бг҃оро́диченъ:
Разꙋмѣ́ла є҆сѝ, влⷣчце, воплоти́вшагосѧ и҆зъ тебє̀ хрⷭ҇та̀ бг҃а на́шего, того̀ молѝ, бг҃облаже́ннаѧ, да твои́ми моли́твами сохрани́тъ на́съ ѿ всѧ́кагѡ навѣ́та льсти́вагѡ.
Пѣ́снь є҃. І҆рмо́съ:
Ѿ но́щи ᲂу҆́тренююще, воспѣва́емъ тѧ̀, хрⷭ҇тѐ бж҃е, ѡ҆бнища́вшаго на́съ ра́ди, и҆ крⷭ҇тъ и҆ сме́рть пло́тїю претерпѣ́вшаго.
И҆зъ но́щи тмы̀ глꙋбо́кїѧ возве́лъ є҆сѝ лю́ди твоѧ̑, и҆ покаѧ́нїѧ свѣ́томъ просвѣти́въ, ко хрⷭ҇тꙋ̀ приве́лъ є҆сѝ, бг҃оно́се а҆вра́мїе: и҆ на́съ просвѣтѝ, блаже́нне, сїѧ́нїемъ твоеѧ̀ бл҃года́ти, ꙗ҆́кѡ да при́снѡ тѧ̀ ᲂу҆блажа́емъ.
И҆зъ но́щи і҆дѡлонеи́стовства и҆звле́клъ є҆сѝ, ѻ҆́ч҃е, мно́жество люде́й, и҆ си́хъ погрꙋже́нїемъ благода́ти ѡ҆зари́лъ є҆сѝ дꙋхо́вныѧ: и҆ ны́нѣ на́съ ѡ҆зарѝ свѣ́томъ невеще́ственнымъ, и҆ моли́твами твои́ми просвѣтѝ, ꙗ҆́кѡ да по до́лгꙋ велича́емъ тѧ̀.
И҆зъ но́щи страсте́й мои́хъ возведи́ мѧ, свѧ́те, и҆ да́рꙋй мѝ свѣ́тъ мы́сленный, да возмогꙋ̀ недосто́йный, ѿ грꙋ́багѡ ᲂу҆ма̀ моегѡ̀ хꙋдо́е сїѐ плете́нїе принестѝ къ похвале́нїю чꙋде́съ, пресла́внагѡ твоегѡ̀ торжества̀, бг҃оно́се а҆вра́мїе.
Бг҃оро́диченъ:
И҆зъ но́щи а҆́да преиспо́днѧгѡ и҆зведе́ ны сн҃ъ тво́й, пречⷭ҇таѧ, и҆ раѧ̀ жи́тели па́ки содѣ́лавъ: сегѡ̀ ра́ди, покланѧ́ющесѧ є҆мꙋ̀, тебѐ, дв҃о, ᲂу҆блажа́емъ.
Пѣ́снь ѕ҃. І҆рмо́съ:
Ѿве́рглъ мѧ̀ є҆сѝ во глꙋбины̑ се́рдца морска́гѡ, и҆ спа́слъ є҆сѝ мѧ̀, сп҃се, ѿ рабо́ты сме́ртныѧ, и҆ разрѣши́лъ є҆сѝ ᲂу҆́зы беззако́нїй мои́хъ.
Ѿверго́шасѧ неразꙋ́мнїи твоегѡ̀ ᲂу҆че́нїѧ, бл҃же́нне, и҆ къ веле́сꙋ, глꙋ́хꙋ і҆́дѡлꙋ, нижѐ глаго́лющꙋ, нижѐ ѡ҆сѧза́ющꙋ притека́хꙋ. и҆ є҆гда̀ сего̀ пробо́лъ є҆сѝ тро́стїю бг҃осло́вовою, тогда̀ и҆ си́хъ къ ра́зꙋмꙋ благоче́стїѧ наста́вилъ є҆сѝ, ѻ҆́ч҃е а҆вра́мїе.
Ѿве́рженъ є҆́смь въ ро́въ неча́ѧнїѧ многостра́стный, но ты̀ возведи́ мѧ, свѧ́те, на стезю̀ покаѧ́нїѧ, ꙗ҆́кѡ да ѿве́ргꙋ всѧ̑ моѧ̑ ѕла̑ѧ дѣѧ̑нїѧ, и҆ ѡ҆блекꙋ́сѧ свѣ́томъ моли́твъ твои́хъ, ѻ҆́ч҃е а҆вра́мїе бл҃же́нне.
Ѿве́рженъ бы́въ ѻ҆каѧ́нный де́мѡнъ, восхотѣ̀ спо́нꙋ тебѣ̀ сотвори́ти, преѡбразꙋ́етсѧ въ во́ина лꙋка́вый: и҆ предстае́тъ тогда̀ владꙋ́щемꙋ благовѣ́рномꙋ кнѧ́зю влади́мїрꙋ, и҆ того̀ на тѧ̀ воѡрꙋжа́етъ: ты́ же, сего̀ прогна́въ, вѧ́щше прославлѧ́ешисѧ, и҆ кнѧ́зѧ въ вѣ́рѣ ᲂу҆твержда́еши.
Бг҃оро́диченъ:
Ѿве́рзи мнѣ̀, влⷣчце, двє́ри ми́лости твоеѧ̀, ꙗ҆́коже сн҃ъ тво́й ѿве́рзе разбо́йникꙋ и҆ блꙋдни́цѣ и҆ блꙋ́дномꙋ двє́ри милосе́рдїѧ: ꙗ҆́кѡ да и҆ а҆́зъ твои́ми моли́твами ᲂу҆лꙋчꙋ̀ жи́знь вѣ́чнꙋю, воспѣва́ѧ твою̀ бл҃гость.
Конда́къ, гла́съ в҃:
И҆́го хрⷭ҇то́во прїе́мъ, а҆вра́мїе, и҆ тогѡ̀ крⷭ҇тъ на ра́мо взе́мъ, послѣ́довалъ є҆сѝ є҆мꙋ̀: насажде́нъ бы́въ въ домꙋ̀ гдⷭ҇ни, и҆ процвѣ́лъ є҆сѝ, ꙗ҆́кѡ фі́нїѯъ, и҆ ꙗ҆́кѡ ке́дръ, и҆́же въ лїва́нѣ, ᲂу҆мно́жилъ є҆сѝ ча̑да твоѧ̑, мꙋ́жъ жела́нїй дꙋхо́вныхъ: ѿ возлю́бленнагѡ же а҆пⷭ҇ла і҆ѡа́нна бг҃осло́ва бл҃года́ть воспрїи́мъ, жезло́мъ сокрꙋши́лъ є҆сѝ і҆́дѡла, и҆ разсы́палъ є҆сѝ є҆го̀, ꙗ҆́кѡ пра́хъ, и҆ чꙋдотво́рецъ ᲂу҆́бѡ ве́лїй ꙗ҆ви́лсѧ є҆сѝ, прпⷣбне: тѣ́мже хрⷭ҇та̀ бг҃а молѝ непреста́ннѡ ѡ҆ всѣ́хъ на́съ.
І҆́косъ:
А҆вра́мїе бг҃омꙋ́дре, житїѐ непоро́чно стѧжа́лъ є҆сѝ. и҆ кі́й ѧ҆зы́къ человѣ́чь довлѣ́етъ когда̀ къ похвалѣ̀ повѣ́дати ꙗ҆̀же ѡ҆ тебѣ̀; ѻ҆ба́че воспое́мъ бж҃їю мꙋ́дрость и҆ твоѧ̑, прпⷣбне, стра̑сти и҆ по́двиги, ꙗ҆̀же на землѝ, ꙗ҆́кѡ свѣти́льника тѧ̀, ꙗ҆́вльшасѧ всѣ̑мъ человѣ́кѡмъ, и҆ мно́гимъ терпѣ́нїемъ въ ли́цѣ а҆́гг҃льстѣмъ возсїѧ́вша. тѣ́мъ въ пѣ́снехъ вопїе́мъ тѝ си́це: ра́дꙋйсѧ, а҆вра́мїе прпⷣбне и҆ бг҃оно́се, нбⷭ҇ный человѣ́че и҆ земны́й а҆́гг҃ле. ра́дꙋйсѧ, дх҃а ст҃а́гѡ ѻ҆би́телище. ра́дꙋйсѧ, ꙗ҆́кѡ и҆зъ мла́да послѣ́довалъ є҆сѝ ст҃ѣ́й трⷪ҇цѣ. ра́дꙋйсѧ, цѣломꙋ́дрїѧ сто́лпе, низложи́вый де́мѡна многокова́рственнаго. ра́дꙋйсѧ, ꙗ҆́кѡ ѿ млады́хъ ногте́й послѣ́довалъ є҆сѝ хрⷭ҇тꙋ̀. ра́дꙋйсѧ, свѣти́льниче многосвѣ́тлый, приведы́й ко хрⷭ҇тꙋ̀ мона́хѡвъ мно́жєства. ра́дꙋйсѧ, разори́вый і҆́дѡла и҆ воздви́гнꙋвый хрⷭ҇то́вꙋ це́рковь. ра́дꙋйсѧ, и҆́же і҆дѡлопокло́нники сотвори́лъ є҆сѝ прест҃ѣ́й трⷪ҇цѣ покло́нники. ра́дꙋйсѧ, ꙗ҆́кѡ моли́твами твои́ми де́мѡни побѣжда́ютсѧ. ра́дꙋйсѧ гра́дꙋ росто́вꙋ похвала̀, ꙗ҆́кѡ пе́рвꙋю ѻ҆́бщꙋю ѻ҆би́тель воздви́глъ є҆сѝ, и҆ въ не́й мнѡ́гїѧ мона́хи, ꙗ҆́кѡ вїногра́дъ хрⷭ҇то́въ, насади́лъ є҆сѝ, и҆ трⷪ҇цꙋ сла́вити наꙋчи́лъ є҆сѝ. ра́дꙋйсѧ, правосла́вномꙋ ѻ҆те́чествꙋ на́шемꙋ похвала̀ и҆ ᲂу҆твержде́нїе, є҆го́же соблюдѝ моли́твами твои́ми ѿ вра̑гъ ненавѣ́тно, да зове́мъ тѝ: ра́дꙋйсѧ, ѻ҆́ч҃е а҆вра́мїе бл҃же́нне, и҆ хрⷭ҇та̀ бг҃а молѝ непреста́ннѡ ѡ҆ всѣ́хъ на́съ.
Пѣ́снь з҃. І҆рмо́съ:
Ꙗ҆вле́йсѧ въ кꙋпинѣ̀ законополо́жникꙋ ѻ҆гне́мъ, и҆ ржⷭ҇тво̀ дв҃ы проѡбраже́й въ не́й, бл҃гослове́нъ є҆сѝ гдⷭ҇и, бж҃е ѻ҆ц҃ъ на́шихъ.
Ꙗ҆ви́лсѧ є҆сѝ въ рѡссі́и свѣти́льникъ пресвѣ́тлый, ѻ҆́ч҃е а҆вра́мїе, трисо́лнечными свѣтосїѧ̑нїи къ бг҃озна́нїю на́съ приводѧ̀ и҆ пѣ́ти наꙋча́ѧ: бл҃гослове́нъ бг҃ъ ѻ҆тє́цъ на́шихъ.
Ꙗ҆ви́лсѧ є҆сѝ рѣка̀ медото́чныхъ ᲂу҆че́нїй, бг҃оно́се, вѣ̑рныѧ напаѧ́ѧ, грѣхи́ же потоплѧ́ѧ, и҆ къ позна́нїю благоче́стїѧ всѣ́хъ возводѧ̀, и҆ наꙋча́ѧ пѣ́ти: бл҃гослове́нъ бг҃ъ ѻ҆тє́цъ на́шихъ.
Ꙗ҆́вльсѧ тебѣ̀ ᲂу҆чени́къ хрⷭ҇то́въ бг҃ослове́снѣйшїй, и҆ дѣ́вственникъ возлю́бленный, тро́сть тебѣ̀, блаже́нне, дарова̀, є҆́юже дїа́вола пробо́лъ є҆сѝ, и҆ ктомꙋ̀ неви́дима сего̀ сотвори́лъ є҆сѝ, и҆ человѣ́ки наꙋчи́лъ є҆сѝ вопи́ти. бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
Ꙗ҆вле́йсѧ, ꙗ҆́кѡ чл҃вѣ́къ, сн҃ъ, тво́й, бг҃оневѣ́сто, на́съ ѡ҆божѝ и҆ къ ра́зꙋмꙋ ми́лости возведѐ, и҆ во свѣ́тѣ непристꙋ́пнѣмъ ликова́ти ᲂу҆стро́и воспѣва́ющыѧ и҆ глаго́лющыѧ: бл҃гослове́нъ бг҃ъ ѻ҆тє́цъ на́шихъ.
Пѣ́снь и҃. І҆рмо́съ:
Пѣ́снь тебѣ̀ прино́симъ безпло́тныхъ, ꙗ҆́коже ѻ҆́троцы въ пещѝ, и҆, пою́ще, глаго́лемъ: бл҃гослови́те всѧ̑ дѣла̀ гдⷭ҇нѧ гдⷭ҇а.
Пѣ́снь тебѣ̀ приношꙋ̀, ѻ҆́ч҃е бг҃оно́се а҆вра́мїе, є҆́юже проповѣ́даю твоѧ̑ по́двиги и҆ чꙋдеса̀, и҆ прославлѧ́ю твоѐ вели́чество, вопїѧ̀: благослови́те, всѧ̑ дѣла̀ гдⷭ҇нѧ, гдⷭ҇а.
Пѣ́снь прино́сиши хрⷭ҇тꙋ̀, ликꙋ́ѧ со а҆́гг҃лы, ѻ҆́ч҃е а҆вра́мїе: тѣ́хъ бо житїю̀ поревнова́лъ є҆сѝ, и҆ на́съ въ па́мѧть твою̀ ликова́ти ᲂу҆стро́илъ є҆сѝ, пою́щихъ: благослови́те, всѧ̑ дѣла̀ гдⷭ҇нѧ, гдⷭ҇а.
Пѣ́снь пое́ши херꙋві́мскꙋю, и҆̀мже и҆ подо́бникъ бы́лъ є҆сѝ, кри́ла ѻ҆́гнєннаѧ воспрїе́мъ, и҆́миже го́рнѧгѡ і҆ерⷭ҇ли́ма дости́гъ, ѡ҆ на́съ моли́сѧ, ѻ҆́ч҃е а҆вра́мїе, пою́щихъ вѣ́рнѡ: благослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Пѣ́снь прїимѝ, влⷣчце, ѿ несоверше́ннагѡ ᲂу҆ма̀ на́шегѡ, и҆ моли́сѧ сн҃ꙋ твоемꙋ̀ и҆ бг҃ꙋ на́шемꙋ, пода́ти на́мъ ѡ҆ставле́нїе грѣхѡ́въ, ꙗ҆́кѡ да воспѣва́емъ тѧ̀ во всѧ̑ вѣ́ки.
Пѣ́снь ѳ҃. І҆рмо́съ:
Живопрїе́мный и҆сто́чникъ приснотекꙋ́щїи, свѣтоно́сный свѣти́льникъ бл҃года́ти, хра́мъ ѡ҆дꙋшевле́нный, сѣ́нь пречⷭ҇тꙋю, нб҃сѐ и҆ землѝ простра́ннѣйшꙋю, бцⷣꙋ, вѣ́рнїи велича́емъ.
Живоно́сный и҆сто́чникъ бл҃года́тныхъ во́дъ ꙗ҆ви́лсѧ є҆сѝ, а҆вра́мїе бг҃облаже́нне: пода́ждь мѝ и҆сто́чникъ сле́зъ, да ѡ҆мы́ю дꙋшє́вныѧ моѧ̑ стра̑сти, и҆ ᲂу҆бѣлю̀ свѣ́томъ покаѧ́нїѧ ѡ҆чернѣ́вшꙋю дꙋ́шꙋ мою̀.
Живоно́сный крⷭ҇тъ на ра́мо взе́мъ, прпⷣбне, распе́ншемꙋсѧ на не́мъ хрⷭ҇тꙋ̀ послѣ́довалъ є҆сѝ, ѻ҆́ч҃е а҆вра́мїе, и҆ вра̑жїѧ полкѝ прогна́лъ є҆сѝ, и҆ на́мъ просѝ ми́лости, торжествꙋ́ющымъ твоѐ пра́зднество, бг҃оно́се.
Живоно́снымъ крⷭ҇то́мъ врага̀ ѡ҆пали́лъ є҆сѝ, и҆ сего̀ въ сосꙋ́дѣ запеча́тавъ, ᲂу҆ченикѡ́мъ рабо́тати ѿше́лъ є҆сѝ, показꙋ́ѧ смире́нїѧ ѻ҆́бразъ, и҆ си́хъ наꙋча́ѧ любомꙋ́дреннѡ послѣ́довати тебѣ̀.
Бг҃оро́диченъ:
И҆сто́чникъ ро́ждши на́мъ, влⷣчце, житїѐ ми́рно рабѡ́мъ твои̑мъ и҆спросѝ, и҆ правосла́вномꙋ во́инствꙋ на́шемꙋ на и҆ноплеме́нники посо́бствꙋй, ꙗ҆́кѡ ты̀ є҆сѝ спасе́нїе на́ше, бг҃оневѣ́стнаѧ.
Свѣти́ленъ. Подо́бенъ: Жєны̀ ᲂу҆слы́шите:
По́стнически пожи́въ, ѻ҆́ч҃е а҆вра́мїе, и҆ на врагѝ вла́сть прїи́мъ, ꙗ҆́кѡ и҆ въ сосꙋ́дѣ ты́ѧ затворѧ́ти и҆ крⷭ҇то́мъ ѡ҆палѧ́ти: и҆ человѣ́ки ѿ недꙋ̑гъ и҆сцѣлева́еши, притека́ющыѧ съ вѣ́рою къ ра́цѣ моще́й твои́хъ и҆ почита́ющыѧ, бг҃оно́се, всечⷭ҇тнꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Зачала̀ є҆сѝ во ᲂу҆тро́бѣ бг҃а, є҆гѡ́же трепе́щꙋтъ всѧ̑ нбⷭ҇ныѧ си̑лы: сего̀, дв҃о, родила̀ є҆сѝ пло́тїю, на́ше є҆стество̀ ѡ҆божи́вшаго. є҆го́же молѝ, бг҃облаже́ннаѧ, съ прпⷣбнымъ а҆вра́мїемъ, да спасе́тъ тебє̀ ра́ди дꙋ́шы на́шѧ.
На хвали́техъ стїхи̑ры, на д҃. гла́съ в҃. Подо́бенъ: Є҆гда̀ ѿ дре́ва:
Терпѣ́лъ є҆сѝ гонє́нїѧ ѿ невѣ́рныхъ, ра́довалсѧ є҆сѝ надѣ́емыми, ꙗ҆̀же ᲂу҆гото́ва бг҃ъ лю́бѧщымъ є҆го̀. сегѡ̀ ра́ди, преподо́бне, ве́тхагѡ совле́клсѧ є҆сѝ человѣ́ка, и҆ ве́тхаго и҆скорени́въ і҆́дѡла, благода́тїю же креще́нїѧ просвѣти́лъ є҆сѝ гра́дъ росто́въ, и҆ въ не́мъ, ꙗ҆́кѡ сл҃нце, сїѧ́ѧ чꙋдесы̀, рѡссі́йскꙋю странꙋ̀ ѿ бѣ́дъ спаса́еши, и҆ ѿ ва́рварскагѡ нахожде́нїѧ. сегѡ̀ ра́ди мо́лимъ тѧ̀, ѻ҆́ч҃е а҆вра́мїе, молѝ хрⷭ҇та̀ бг҃а, спасти́сѧ дꙋша́мъ на́шымъ.
Два́жды.
Терпѣ́лъ є҆сѝ ѿ і҆дѡлопокло́нникѡвъ гонє́нїѧ, и҆ ра́довалсѧ є҆сѝ ѿ влⷣки хрⷭ҇та̀ воздаѧ́нїємъ, и҆ къ невѣ̑рнымъ вопїѧ́лъ є҆сѝ: нꙋ́ждно страда́нїе, но ра́достно возме́здїе: мнѡ́ги скѡ́рби, но сла́докъ ра́й. и҆ сегѡ̀ ра́ди ѻ҆нѝ, ѡ҆ста́вльше ѻ҆каѧ́ннаго веле́са, къ тебѣ̀ притека́хꙋ, глаго́люще: молѝ хрⷭ҇та̀ бг҃а, ѻ҆́ч҃е а҆вра́мїе, да твои́ми моли́твами спасе́тъ дꙋ́шы на́шѧ.
Терпѣ́лъ є҆сѝ ѿ врага̀ скѡ́рби, и҆ ра́дꙋѧсѧ, вѣне́цъ ѿ хрⷭ҇та̀ прїе́млеши, престо́лꙋ сла́вы предстоѧ̀, со а҆́гг҃лы ликꙋ́еши. ѡ҆ на́съ непреста́ннѡ моли́сѧ, прпⷣбне, да твои́ми моли́твами ѿ бѣ́дъ и҆ скорбе́й и҆зба́вимсѧ. тѧ́ бо те́пла предста́телѧ къ бг҃ꙋ и҆́мамы. ꙗ҆́кѡ да тебє̀ ра́ди, ѻ҆́ч҃е а҆вра́мїе, спасе́тъ дꙋ́шы на́шѧ.
Сла́ва, гла́съ и҃:
Прїиди́те, празднолю́бныхъ собо́ри, прїиди́те правосла́вныхъ торжество̀, прїиди́те мона́хѡвъ бг҃осочета́нный ли́че: прїиди́те, насы́титесѧ ны́нѣшнѧгѡ пра́зднства. прїиди́те ѻ҆вча́та гдⷭ҇нѧ дꙋхо́вныѧ ѡ҆гра́ды. прїиди́те, да ликꙋ́имъ свѣ́тлѡ въ па́мѧть ѻ҆тца̀ на́шегѡ: дне́сь бо бг҃оно́сный а҆вра́мїй ликꙋ́етъ со безпло́тными си́лами, предстоѧ̀ прⷭ҇то́лꙋ всѣ́хъ цр҃ѧ̀ хрⷭ҇та̀ бг҃а, и҆ мо́литсѧ ѡ҆ дꙋша́хъ на́шихъ.
И҆ ны́нѣ, бг҃оро́диченъ:
Влⷣчце, прїимѝ моли̑твы ра̑бъ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.
Славосло́вїе вели́кое. И҆ ѿпꙋ́стъ.
На лїтꙋргі́и: бл҃жє́нна ст҃а́гѡ ѿ канѡ́на, пѣ́снь г҃-ѧ и҆ ѕ҃-ѧ. Прокі́менъ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇лъ къ гала́тѡмъ, зача́ло сг҃і. А҆ллилꙋ́їа: Бл҃же́нъ мꙋ́жъ, боѧ́йсѧ гдⷭ҇а. Сті́хъ: Си́льно на землѝ бꙋ́детъ сѣ́мѧ є҆гѡ̀. Є҆ѵⷢ҇лїе матѳе́а, зача́ло і҃. Прича́стенъ: Въ па́мѧть вѣ́чнꙋю:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.