← претходни дан | Минеј — Октобар | следећи дан →
24 октября: Святого мученика Арефы и с ним пострадавших
Мѣ́сѧца тогѡ́же въ к҃д-й де́нь.
Ст҃а́гѡ мч҃ника а҆ре́ѳы, и҆ и҆̀же съ ни́мъ.
И҆ пра́зднованїе прест҃ѣ́й бцⷣѣ, въ че́сть і҆кѡ́ны є҆ѧ̀ всѣ́хъ скорбѧ́щихъ ра́дости.
Слꙋ́жба сїѧ̀ пи́сана въ приложе́нїи.
На Гдⷭ҇и, воззва́хъ, стїхи̑ры, гла́съ а҃. Поⷣ: Всехва́льнїи мч҃ницы:
Є҆вре́йскомꙋ свирѣ́пствꙋ ꙳ твоѐ мꙋ́жество противоположи́лъ є҆сѝ, ꙳ мч҃ниче а҆ре́ѳо всехва́льне, ꙳ и҆ бжⷭ҇твенною бл҃года́тїю ꙳ побѣдоно́сецъ ꙗ҆ви́лсѧ є҆сѝ, ꙳ и҆ ли́къ приве́лъ є҆сѝ мч҃никѡвъ, ꙳ хрⷭ҇тꙋ̀ во́инствꙋющїй, ѿ всѧ́кагѡ, сла́вне, во́зраста совокꙋплѧ́емь, ꙳ и҆ ѿ ро́да всѧ́кагѡ составлѧ́емь.
А҆ре́ѳо всесла́вне, ꙳ кра́сный ли́къ соста́вивъ, ꙳ свѧще́нныхъ сомꙋ́ченикѡвъ твои́хъ, ꙳ съ ни́миже подвиза́лсѧ є҆сѝ, ꙳ до́брый по́двигъ ꙳ и҆ тече́нїе соверши́въ, ꙳ твоегѡ̀ мꙋ́жественнѣйшагѡ страда́нїѧ. ꙳ тѣ́мъ хрⷭ҇та̀ молѝ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Дѣ̑вы, бг҃омꙋ̑дрыѧ мч҃ницы, ꙳ хрⷭ҇то́вымъ раче́нїемъ распалѧ́еми, ꙳ не́мѡщи є҆сте́ствєнныѧ забы́вше, ꙳ и҆ си́лою бжⷭ҇твенною ꙳ ꙗ҆́вѣ ᲂу҆крѣплѧ́еми, ꙳ льще́нїе вра́жїе попра́ша, ꙳ не ᲂу҆страши́вшесѧ мꙋче́нїѧ болѣ́зней, ꙳ и҆ пе́щи ѻ҆́гненныѧ не ᲂу҆боѧ́шасѧ.
Сла́ва, гла́съ д҃. А҆нато́лїа:
Пѣ́сненнѡ пастыренача́льника дне́сь, вѣ́рнїи, є҆диномы́сленнѡ почти́мъ, а҆ре́ѳꙋ сла́внѣйшаго съ сꙋ́щими є҆гѡ̀: ꙗ҆́кѡ ѡ҆бличѝ царѧ̀ пребеззако́нновавша и҆ кро́вь и҆злїѧ̀ за хрⷭ҇то́во и҆сповѣ́данїе, ѿѻнꙋ́дꙋже и҆ ѻ҆́гненный ѻ҆́блакъ попалѧ́ше на лицы̀ землѝ, ѡ҆блича́ѧ пребеззако́нныхъ нече́стїе. тѣ́мъ, хрⷭ҇тѐ бж҃е, твоѧ̑ страстоте́рпцы ᲂу҆крѣпи́въ къ твоемꙋ̀ славосло́вїю, и҆ на́съ соблюдѝ, ꙗ҆́кѡ всѣ́хъ влⷣка, ѿ и҆скꙋше́нїй и҆ скорбе́й, моли́твами ст҃ы́хъ твои́хъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Ꙗ҆́кѡ до́блѧ.
А҆́гнца и҆ па́стырѧ тѧ̀ ꙳ на дре́вѣ ꙗ҆́кѡ ви́дѣ, ꙳ а҆́гница ро́ждшаѧ рыда́ше, ꙳ и҆ мт҃рски тѝ вѣща́ше. ꙳ сн҃е возжелѣ́нне, ꙳ ка́кѡ на дре́вѣ крⷭ҇тнѣмъ повѣ́шенъ є҆сѝ, долготерпѣли́ве; ꙳ ка́кѡ рꙋ́цѣ и҆ но́зѣ твоѝ, сло́ве, ꙳ пригвозди́шасѧ ѿ беззако́нныхъ, ꙳ и҆ кро́вь твою̀ и҆злїѧ́лъ є҆сѝ, влⷣко;
На стїхо́внѣ ѻ҆ктѡ́иха. Сла́ва, гла́съ и҃:
Лꙋка́вое и҆ невѣ́рное ѕлосовѣ́тїе є҆вре́йское проразꙋмѣ́вше, де́рзостїю дꙋ́ха за хрⷭ҇та̀ пострада́ти подвиза́стесѧ. ꙗ҆́кѡ бо дре́вле въ зако́нѣ, и҆̀же ѿ є҆гѵ́пта спа́сшаго въ пꙋсты́ни прогнѣ́ваша, и҆ того̀ крⷭ҇тꙋ̀ ѡ҆сꙋди́ша: та́кѡ ны́нѣ и҆ въ ва́съ дѣ́ломъ сло́во преидо́ша, невѣ́рствїемъ недꙋ́говавше, ва́съ ѻ҆гню̀ ѡ҆сꙋди́ша. вы́ же кꙋпномꙋ́дреннѣ мꙋ́жески терпѣ́нїемъ пострада́вше, стра́шни въ мч҃ницѣхъ показа́стесѧ. дерзнове́нїе и҆мꙋ́ще къ бг҃ꙋ, моли́те ѿ прегрѣше́нїй лю́тыхъ и҆зба́витисѧ дꙋша́мъ на́шымъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Подо́бенъ: Ѽ пресла́внагѡ чꙋдесѐ!
Что̀ зри́мое видѣ́нїе, ꙳ є҆́же мои́ма ѻ҆чи́ма ви́дитсѧ, ѽ влⷣко! ꙳ содержа́й всю̀ тва́рь, ꙳ на дре́во воздви́женъ бы́въ, ꙳ и҆ ᲂу҆мира́еши всѣ̑мъ даѧ́й жи́знь, ꙳ бцⷣа, пла́чꙋщи, ꙳ гл҃го́лаше, ꙳ є҆гда̀ ᲂу҆зрѣ̀ на крⷭ҇тѣ̀ возноси́ма, и҆зъ неѧ̀ неизрече́ннѡ возсїѧ́вшаго ꙳ бг҃а и҆ чл҃вѣ́ка.
Тропа́рь, гла́съ а҃.
Болѣ́зньми ст҃ы́хъ, и҆́миже ѡ҆ тебѣ̀ пострада́ша, ᲂу҆моле́нъ бꙋ́ди, гдⷭ҇и, и҆ всѧ̑ на́шѧ болѣ̑зни и҆сцѣлѝ, чл҃вѣколю́бче, мо́лимсѧ.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
На ᲂу҆́трени ѻ҆́ба канѡ́на ѻ҆ктѡ́иха, и҆ мч҃никѡвъ, на д҃, є҆гѡ́же краегране́сїе:
Мч҃ническїй собо́ръ бг҃окра́снѣ воспое́мъ пѣ́сньми.
Творе́нїе ѳеофа́ново.
Гла́съ и҃. Пѣ́снь а҃. І҆рмо́съ:
Пѣ́снь возсле́мъ, лю́дїе, чꙋ́дномꙋ бг҃ꙋ на́шемꙋ, свободи́вшемꙋ і҆и҃лѧ ѿ рабо́ты, пѣ́снь побѣ́днꙋю пою́ще и҆ вопїю́ще, пои́мъ тебѣ̀ є҆ди́номꙋ влⷣцѣ.
Мч҃ниче, страстоте́рпче хрⷭ҇то́въ а҆ре́ѳо, всебл҃же́нне, моли́твами твои́ми и҆ сꙋ́щихъ съ тобо́ю мч҃никѡвъ ᲂу҆́мъ мо́й просвѣтѝ: ꙗ҆́кѡ да воспою̀ ва́шꙋ свѣтоно́снꙋю и҆ бжⷭ҇твеннꙋю па́мѧть.
Вы́спрь житїѐ ꙗ҆́вѣ на нб҃сѣ́хъ стѧжа́въ, бг҃облаже́нне, хрⷭ҇то́вымъ подо́бїемъ, себѐ пре́далъ є҆сѝ жела́нїемъ мꙋче́нїѧ беззакѡ́ннымъ є҆вре́ємъ, бг҃омꙋ́дре.
Глаго́лъ престꙋпи́въ бж҃їй, є҆вре́инъ пребеззако́нный и҆ непра́веднѣйшїй, бг҃оизбра́нное ста́до хрⷭ҇то́во погꙋбѝ, ѻ҆ба́че воспрїѧ́ше сꙋ́дъ пра́веднымъ и҆ бжⷭ҇твеннымъ про́мысломъ.
Стезю̀ ше́ствовалъ неꙋкло́ннѡ, къ нб҃сѝ ведꙋ́щꙋю, хрⷭ҇тꙋ̀ приве́лъ є҆сѝ мч҃ническїй собо́ръ, а҆ре́ѳо всехва́льне, всѧ́кагѡ во́зраста и҆ ро́да всѧ́кагѡ со́бранный.
Бг҃оро́диченъ:
Пѣ́сньми прест҃ꙋ́ю, вѣ́рнїи, марі́ю похва́лимъ, бг҃ома́терь, ѡ҆бра́дованнꙋю, покро́въ бжⷭ҇твенный, ти́хое приста́нище, всѣ́хъ вѣ́рныхъ предста́тельницꙋ.
Пѣ́снь г҃. І҆рмо́съ:
Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе є҆ди́не чл҃вѣколю́бче.
Оу҆твержде́ннꙋ зрѧ́ще крⷭ҇та̀ бл҃года́тїю твою̀ цр҃ковь, є҆вре́йстїи ѻ҆́троцы пребеззако́ннїи, за́вистїю та́юще, и҆ ра́нами многоѻбра́зными неща́днѡ мꙋ́чахꙋ, є҆ди́не человѣколю́бче.
Ꙗ҆доме́тный ѧ҆зы́къ ѕловѣ́рнїи и҆мꙋ́ще, и҆ тѧ̀ хꙋ́лѧще, си́хъ прароди́тели и҆зба́вльшаго дре́внѧгѡ мꙋчи́тельства, въ тѧ̀ вѣ́рꙋющыѧ, сп҃се, закла́ша.
Созда́вый наединѣ̀ бг҃одѣ́йственнымъ ма́нїемъ человѣ́чєскаѧ сердца̀, кто̀ про́мысла твоегѡ̀ глꙋбинꙋ̀ возмо́жетъ пости́гнꙋти; ꙗ҆́кѡ ста́до, є҆́же, хрⷭ҇тѐ, собра́лъ є҆сѝ, волкѡ́мъ пре́далъ є҆сѝ.
Бг҃омꙋ́дрое твоѐ ста́до, ва́рварскими мечи̑ ссѣка́емо, ᲂу҆се́рднѡ призыва́ше тѧ̀: прїимѝ дꙋ́хи и҆ дꙋ́шы на́шѧ, сп҃се, и҆ къ свѣ́тꙋ наста́ви црⷭ҇твїѧ твоегѡ̀.
Бг҃оро́диченъ:
Оу҆мерщвле́на мѧ̀ дре́вле, къ жи́зни, пречⷭ҇таѧ, па́ки возвела̀ є҆сѝ, є҆ди́на ѵ҆поста́снꙋю жи́знь ро́ждшаѧ: є҆́йже прирази́вшисѧ, расто́ржесѧ ꙗ҆́вѣ вражде́бнѣйшаѧ сме́рть.
Сѣда́ленъ, гла́съ и҃. Подо́бенъ: Премꙋ́дрости:
Крⷭ҇та̀ си́лою воѡрꙋжи́всѧ, и҆ вѣ́рою ѡ҆гради́въ гра́дъ тво́й, дѣ́лы посрами́лъ є҆сѝ мꙋчи́телево свирѣ́пство, терпѣ́нїѧ же ѻ҆́бразъ бжⷭ҇твеннагѡ бы́въ, приве́лъ є҆сѝ хрⷭ҇тꙋ̀ мч҃ники. тѣ́мъ соше́дшесѧ по до́лгꙋ почти́мъ, а҆ре́ѳо прехва́льне, всепра́зднственнꙋю па́мѧть твою̀: страстоно́сче всесла́вне, молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чествꙋ́ющымъ любо́вїю свѧтꙋ́ю па́мѧть твою̀.
Сла́ва, и҆ ны́нѣ, бг҃оро́диченъ:
Въ напа̑сти многоплетє́нныѧ впа́дъ ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ, и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бла́гости. тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ, моли́сѧ прилѣ́жнѡ, ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти, воспѣва́ющымъ досто́йнѡ сла́вꙋ твою̀.
Крⷭ҇тобг҃оро́диченъ:
А҆́гнца и҆ па́стырѧ и҆ и҆зба́вителѧ, а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ, и҆ да́рꙋй согрѣше́нїй ѡ҆ставле́нїе, вѣ́рою пою́щымъ бжⷭ҇твєнныѧ стра̑сти твоѧ̑.
Пѣ́снь д҃. І҆рмо́съ:
Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Собо́ръ ᲂу҆крѣплѧ́емь бл҃года́тїю, и҆ ли́къ бжⷭ҇твенный и҆ пресвѣ́тлый, мч҃нически мно́жество стражда̀, во́инство побѣдоно́сное, а҆ре́ѳꙋ и҆мꙋ́ще чинонача́льника, да пое́тсѧ любо́вїю че́стнѡ пѣснопою́щими: си́лѣ твое́й сла́ва, человѣколю́бче.
Твои́мъ содержа́щсѧ ра́зꙋмомъ бг҃омꙋ́дрый гра́дъ тво́й, пребога́те, є҆ди́ною свѣтѧ́щасѧ честно́ю, къ пребеззакѡ́ннымъ мꙋ́жески подвиза́сѧ, и҆ побѣ́дꙋ взе́мъ, пѣснопое́тъ сп҃сꙋ: си́лѣ твое́й сла́ва, чл҃вѣколю́бче.
Зако́номъ но́вымъ животворѧ́щагѡ дх҃а ѡ҆гражда́емь, зако́нъ пи́смене попира́ѧ, благоче́стный гра́дъ, преѡдолѣ̀ дꙋше́вною чистото́ю, и҆ нра́вомъ бл҃горо́дїѧ, хрⷭ҇тꙋ̀ пѣснопоѧ̀: си́лѣ твое́й сла́ва, чл҃вѣколю́бче.
Вои́стиннꙋ гра́дъ бж҃їй ꙗ҆ви́лсѧ є҆сѝ, пречестны́й, и҆ мч҃никѡвъ бжⷭ҇твенное жили́ще, и҆ ѡ҆ тебѣ̀ пою́тсѧ свѣ́тлѡ ны́нѣ пресла̑внаѧ, вє́лїѧ же и҆ ди̑внаѧ: ли́къ бо пою́щихъ влⷣцѣ приво́диши: си́лѣ твое́й сла́ва, чл҃вѣколю́бче.
Бг҃оро́диченъ:
И҆зъ дв҃дова ца́рскагѡ прозѧ́бши сро́дства, всецрⷭ҇твꙋющаго пре́жде вѣ̑къ и҆зъ ѻ҆ц҃а̀ сло́ва неизрече́ннѡ, и҆ па́че ᲂу҆ма̀ возсїѧ́вшаго родила̀ є҆сѝ, дв҃о. тѣ́мъ тѧ̀, бцⷣꙋ, бг҃омꙋ́дреннѡ вѣ́рнїи ᲂу҆блажа́емъ.
Пѣ́снь є҃. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Бг҃озва́нный собо́ръ и҆ бг҃облаже́нный подвиза́ѧсѧ, и҆ те́плѣ дрꙋ́гъ дрꙋ́га ᲂу҆крѣплѧ́юще, и҆ спосо́бствꙋюще, ѿ беззако́нныхъ хрⷭ҇та̀ ра́ди закла́тисѧ, благосла́внѡ, добропобѣ́днїи и҆зво́лиша.
Оу҆крѣ́пльшесѧ вѣ́рою, и҆ благоче́стїѧ ре́вностїю распалѧ́еми, ᲂу҆гѡ́дницы твоѝ, хрⷭ҇тѐ, пребеззако́нныхъ стра́ха не ᲂу҆боѧ́шасѧ, и҆ твое́ю любо́вїю цѣломꙋ́дреннѡ свѧ́зани, са́ми во́лею преда́шасѧ.
Бг҃а бжⷭ҇твєннымъ промышле́нїємъ и҆ неизбѣ̑жнымъ про́мысла сꙋдьба́мъ всю̀ жи́знь свою̀ возложи́вше, собо́ръ бжⷭ҇твенный, къ пребеззакѡ́ннымъ є҆врє́йскимъ скверноꙋбі́йствѡмъ благоде́рзостнѡ, до́блїи, ᲂу҆стреми́шасѧ.
На тѧ̀ надѣ́ющесѧ, и҆ вѣ́ровавше ны́нѣ воскрⷭ҇нїю твоемꙋ̀, твоѝ, сп҃се, мч҃ницы, не ретѧ́щесѧ, нижѐ во́плѧще, беззако́нными за твоѐ и҆сповѣ́данїе ᲂу҆бїе́ни бы́ша, до́блественнѣйшїи.
Бг҃оро́диченъ:
Бж҃їе бг҃ъ сло́во, пре́жде вѣ̑къ ѻ҆ц҃ꙋ̀ соприсносꙋ́щный, бл҃гоꙋтро́бїѧ бога́тствомъ, во ᲂу҆тро́бꙋ твою̀ всели́всѧ, ѡ҆бнища̀ и҆ чл҃вѣ́къ ꙗ҆ви́сѧ на землѝ, пло́ть бы́въ, дв҃о бцⷣе всепѣ́таѧ.
Пѣ́снь ѕ҃. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Кро́вїю хрⷭ҇то́вою зна́менавшесѧ, ст҃і́и, крѡ́ви своѧ̑ ᲂу҆се́рднѡ и҆злїѧ́ша, сла́внїи мч҃ницы, и҆ ны́нѣ црⷭ҇твовати съ ни́мъ сподо́бишасѧ.
Ми́ръ прⷪ҇ро́чески глаго́лахꙋ ѧ҆зы́цы нѣмотствꙋ́ющїи, проповѣ́дахꙋ хрⷭ҇та̀ младе́нцєвъ нѣмова̑нїѧ, дѣ̑вы бг҃омꙋ̑дрыѧ, за бл҃гоче́стїе, са́ми себѐ бг҃ꙋ принесо́ша.
Ѿдѣли́сѧ тебѣ̀ свѣ́тъ, возсїѧ́ющь и҆сцѣлє́нїѧ бога́тнѡ ѿ хрⷭ҇та̀, а҆ре́ѳо бг҃оглаго́ливе, къ немꙋ́же и҆зше́лъ є҆сѝ, є҆щѐ и҆ска́паѧ по́ты страда́нїѧ.
Мно́жество тебѣ̀ мч҃ническое, бжⷭ҇твеннѡ, сп҃се, приведе́сѧ: ѻ҆́крестъ тебє̀ ли́цы ст҃ы́хъ ликꙋ́юще, про́сѧтъ ѡ҆ставле́нїѧ грѣхѡ́въ, тѣ́хъ при́снѡ прославлѧ́ющымъ.
Бг҃оро́диченъ:
Возсїѧ̀ ѿ сїѡ́на высоча́йшагѡ благолѣ́пїе, прїѧ́тїемъ пло́ти, по соедине́нїю неизрече́ннѡ, и҆зъ тебє̀, неискꙋсобра́чнаѧ, ѡ҆дѣ́ѧнъ, и҆ мі́ръ просвѣтѝ.
Конда́къ, гла́съ д҃. Подо́бенъ: Ꙗ҆ви́лсѧ є҆сѝ дне́сь.
Весе́лїѧ хода́тай на́мъ наста̀ свѣтоно́сный дне́сь страстоте́рпєцъ пра́здникъ, є҆го́же соверша́юще, сла́вимъ въ вы́шнихъ сꙋ́щаго гдⷭ҇а.
І҆́косъ:
Оу҆́мъ мо́й просвѣтѝ, хрⷭ҇тѐ, заре́ю по́двигѡвъ а҆ре́ѳы до́блѧгѡ, и҆ всѣ́хъ ст҃ы́хъ, съ ни́мъ пострада́вшихъ: пе́рвый бо всѣ́хъ ꙗ҆ви́сѧ вѣ́рный, мꙋ́жески ѡ҆полчи́всѧ на ѿме́щꙋщихъ воплоще́нїе, тебє̀, па́че є҆стества̀ вопло́щшагѡсѧ и҆ ро́ждшагѡсѧ, да на́съ и҆зба́виши ѿ ле́сти, и҆ пока́жеши небла́зненнѡ хотѧ́щымъ ше́ствовати пꙋ́ть свидѣ́тельства, и҆́мже страда́льцы ходи́ша, тѧ̀ пою́ще въ вы́шнихъ сꙋ́щаго гдⷭ҇а.
Пѣ́снь з҃. І҆рмо́съ:
Бж҃їѧ снизхожде́нїѧ: ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Крове́й пото́цы страда́лєцъ твои́хъ и҆сточа́ютъ и҆сцѣлє́нїѧ, вѣ́рою тѣ́хъ па́мѧть похвалѧ́ющымъ, и҆ тебѣ̀, творцꙋ̀, ᲂу҆се́рднѡ зовꙋ́щымъ: бл҃гослове́нъ є҆сѝ, бж҃е ѻ҆тє́цъ на́шихъ.
Посрами́ша ве́сь, побѣдоно́сцы, беззако́нныхъ совѣ́тъ, ꙗ҆́кѡ бжⷭ҇твеннымъ ра́зꙋмомъ и҆ ѻ҆строꙋ́мїемъ ᲂу҆краша́еми, и҆, веселѧ́щесѧ, закала́еми поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.
Ма́тєри щє́дрыѧ, ꙗ҆́кѡ ᲂу҆ѧ́звлени твое́ю любо́вїю, хрⷭ҇тѐ, не пощадѣ́ша дѣте́й, но въ пещѝ попалѧ́ємыѧ, тебѣ̀, влⷣцѣ, взыва́юще поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.
Свѣщы̀ страда́нїѧ, дѣ́вства свѣ́тлѡ вше́гше, въ бж҃їи черто́зѣ, бг҃оно́снїи, веселѧ́щесѧ съ мꙋ́дрыми дѣ́вами, зовꙋ́тъ: бл҃гослове́нъ є҆сѝ, бж҃е ѻ҆тє́цъ на́шихъ.
Бг҃оро́диченъ:
Дꙋ́шъ ѡ҆чище́нїе и҆ спасе́нїѧ хода́таица є҆сѝ, вѣ́рою тѧ̀ и҆ любо́вїю бж҃їю мт҃рь возвѣща́ющымъ, и҆ сн҃ꙋ твоемꙋ̀ согла́снѡ зовꙋ́щымъ: бл҃гослове́нъ є҆сѝ, бж҃е ѻ҆тє́цъ на́шихъ.
Пѣ́снь и҃. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Не въ зако́нѣ бы́сть ꙗ҆́вѣ соверше́нїе, но въ хрⷭ҇тѣ̀ спасе́нїе даде́сѧ, вопїѧ́хꙋ мч҃ницы, бг҃оꙋбі́йцамъ глаго́люще. тѣ́мъ ра́дꙋющесѧ закала́емсѧ всѝ, и҆ ᲂу҆мира́емъ ᲂу҆се́рднѡ, томꙋ̀ пѣснопою́ще: лю́дїе, превозноси́те хрⷭ҇та̀ во вѣ́ки.
Тайнонаꙋча́етъ младе́нецъ и҆ ᲂу҆чи́тъ безꙋ́мныѧ къ твоемꙋ̀ ѻ҆́бразꙋ зрѣ́ти пречⷭ҇томꙋ, хрⷭ҇тѐ, и҆ вѣ́рꙋ прїѧ́ти прише́ствїѧ твоегѡ̀ на землѝ, и҆̀, ᲂу҆таи́всѧ пребеззако́нныхъ рꙋ́къ, въ пла́мень вни́де съ ро́ждшею, поѧ̀: лю́дїе, превозноси́те є҆го̀ во вѣ́ки.
На землѝ, мч҃ницы, благоче́стнѡ подвиза́вшесѧ, на нб҃сѣ́хъ ѿ хрⷭ҇та̀ вѣнцы̀ досто́йнѡ прїѧ́ша, ра́достнѡ ѿше́дше, и҆дѣ́же веселѧ́щихсѧ жили́ще, вѣ́рою пѣснопою́щихъ и҆ вопїю́щихъ непреста́ннѡ: лю́дїе, превозноси́те є҆го̀ во вѣ́ки.
Побѣди́вше, ст҃і́и, лю́таго мїроде́ржца, и҆ слꙋжа́щыѧ тогѡ̀ хотѣ́нїємъ, ко вседержи́телю и҆ всѣ́хъ гдⷭ҇ꙋ, со дерзнове́нїемъ и҆ ра́достїю неизрече́нною, преидо́сте, вопїю́ще: свѧще́нницы, воспо́йте, лю́дїе, превозноси́те є҆го̀ во вѣ́ки.
Бг҃оро́диченъ:
За ны̀ моли́сѧ сн҃ꙋ твоемꙋ̀ и҆ гдⷭ҇ꙋ, чи́стѡ и҆ и҆́стиннѡ пою́щыѧ тѧ̀, и҆ тѧ̀ бг҃ома́терь и҆сповѣ́дающыѧ, пречⷭ҇таѧ, грѣхѡ́въ просѧ́щи разрѣше́нїѧ, полꙋчи́ти же спасе́нїѧ вѣ́рнѡ пою́щымъ: свѧще́нницы, благослови́те, лю́дїе, превозноси́те є҆го̀ во вѣ́ки.
Пѣ́снь ѳ҃. І҆рмо́съ:
Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ. тѣ́мже пречⷭ҇тꙋю бцⷣꙋ, вѣ́рнїи, велича́емъ.
Прича̑стницы сла́вы хрⷭ҇то́вы, ѡ҆бщева́вшесѧ сме́рти бы́сте, ст҃і́и мч҃ницы, и҆ црⷭ҇твїѧ дїади́мою ᲂу҆краси́стесѧ свѣ́тлѡ: бг҃ꙋ же предстоитѐ, на́мъ просѧ́ще спасе́нїѧ дꙋше́внагѡ, достосла́внїи.
Зако́ннїи ꙗ҆ви́стесѧ хрⷭ҇то́ви во́ини и҆ непобѣди́мїи мч҃ницы, а҆ре́ѳо всемꙋ́дре, и҆ со страда́вшими съ тобо́ю ᲂу҆се́рднѡ, со страстоте́рпицами жена́ми, дѣ̑вы ѻ҆трокови̑цы. тѣ́мже. мо́лимъ прилѣ́жнѡ, ѡ҆ на́съ моли́тесѧ.
Оу҆пра́ви, сло́ве бж҃їй, жи́знь мою̀, и҆ ѡ҆кормѝ, влⷣко, ᲂу҆го́дникѡвъ твои́хъ моле́ньми лю́бѧщихъ тѧ̀, и҆ сподо́би тѣ́хъ соприча́стникꙋ бы́ти, грѣхи̑ моѧ̑ презира́ѧ, ꙗ҆́кѡ бл҃гъ и҆ чл҃вѣколю́бецъ.
Бг҃оро́диченъ:
Селе́нїе была̀ є҆сѝ бж҃їе, невмѣсти́маго во чре́вѣ вмѣ́щшаѧ, и҆ пре́жде безпло́тнаго, воплоще́нна на́мъ поро́ждшаѧ: є҆го́же ны́нѣ ᲂу҆молѝ, чⷭ҇таѧ, прегрѣше́нїй ѡ҆ставле́нїе всѣ̑мъ дарова́ти, вѣ́рою тѧ̀ при́снѡ велича́ющымъ.
Свѣти́ленъ. Подо́бенъ: Жєны̀ ᲂу҆слы́шите:
А҆ре́ѳина прⷪ҇ро́чества бг҃ъ и҆спо́лнитель бы́сть, возста́вивъ на паде́нїе нечести́вагѡ ѻ҆мирі́та, є҆лесвана̀ мꙋ́жественнаго, гонѧ́ща и҆ ᲂу҆бива́юща нечести́выхъ полкѝ, негра́нъ же возносѧ́ща и҆ весе́лїѧ и҆сполнѧ́юща.
Сла́ва, и҆ ны́нѣ, бг҃оро́диченъ:
Сꙋ́щꙋю бцⷣꙋ тѧ̀ и҆сповѣ́даемъ, влⷣчце, спа́сшїисѧ тобо́ю: бг҃а бо неизрече́ннѡ родила̀ є҆сѝ, разрꙋши́вшаго крⷭ҇то́мъ сме́рть, въ себѣ́ же привле́кша мч҃никѡвъ мно́жєства: съ ни́миже тѧ̀ восхвалѧ́емъ, дв҃о.
На лїтꙋргі́и прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀: Сті́хъ: Предзрѣ́хъ гдⷭ҇а предо мно́ю вы́нꙋ: А҆пⷭ҇лъ ко є҆вре́ємъ, зача́ло т҃л. А҆ллилꙋ́їа, гла́съ д҃: Воззва́ша пра́веднїи, и҆ гдⷭ҇ь ᲂу҆слы́ша и҆́хъ. Є҆ѵⷢ҇лїе матѳе́а, зача́ло л҃и. Прича́стенъ: Ра́дꙋйтесѧ, пра́веднїи ѡ҆ гдⷭ҇ѣ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.