← претходни дан | Минеј — Октобар | следећи дан →
21 октября: Преподобного Илариона Великого. Святителя Илариона, епископа Меглинского
Мѣ́сѧца тогѡ́же въ к҃а-й де́нь.
Прпⷣбнагѡ ѻ҆тца̀ на́шегѡ і҆ларїѡ́на вели́кагѡ.
И҆ пренесе́нїе моще́й и҆́же во ст҃ы́хъ ѻ҆тца̀ на́шегѡ і҆ларїѡ́на, є҆пі́скопа мегли́нскагѡ.
Слꙋ́жба є҆гѡ̀ пи́сана по се́й слꙋ́жбѣ.
На Гдⷭ҇и, воззва́хъ, стїхи̑ры на ѕ҃, гла́съ д҃. Поⷣ: Зва́нный свы́ше:
Кро́токъ дꙋше́ю и҆ се́рдцемъ, ꙳ є҆гда́ тѧ бжⷭ҇твенное раче́нїе ᲂу҆ѧзвѝ, ꙳ и҆ свѧще́нными восхождє́нїи, ꙳ ѿлꙋчи́тисѧ мїрски́хъ смꙋще́нїй покорѝ, ꙳ тогда̀ воѡрꙋжи́всѧ си́лою крⷭ҇та̀, ꙳ на де́мѡны ᲂу҆стреми́лсѧ є҆сѝ, ꙳ всеблаже́нне, боре́нїемъ, ꙳ и҆ спле́лъ є҆сѝ побѣ́ды дїади́мꙋ. ꙳ и҆ ны́нѣ водворѧ́ешисѧ во свѣ́тлостехъ ст҃ы́хъ, ꙳ съ ни́миже и҆ на́мъ и҆спросѝ ꙳ просвѣще́нїе и҆ ми́ръ, ꙳ и҆ согрѣше́нїй и҆збавле́нїе.
Свѣтода́тельными зарѧ́ми, пресла́внѡ, ѻ҆́ч҃е достосла́вне, ꙳ и҆сцѣле́нїй твои́хъ, ꙳ просвѣща́еши подсо́лнечнꙋю, ꙳ недꙋ́гѡвъ разрѣша́ѧй тмꙋ̀ глꙋбоча́йшꙋю. ꙳ тѣ́мъ тѧ̀ со́лнце и҆но́е познава́емъ, ꙳ и҆ мона́шествꙋющихъ ᲂу҆твержде́нїе, ꙳ и҆ наста́вника спаса́емыхъ бжⷭ҇твеннымъ дх҃омъ. ꙳ и҆ ны́нѣ па́мѧть соверша́емъ твою̀, ꙳ свѣ́тлꙋю и҆ спаси́тельнꙋю, і҆ларїѡ́не, ꙳ прегрѣше́нїй тобо́ю ꙳ разрѣше́нїе прїе́млюще.
Воздержа́нїемъ, ꙳ тѣлє́сныѧ стра̑сти, ѻ҆́ч҃е, ꙳ покори́лъ є҆сѝ разꙋ́мномꙋ дꙋшѝ, ꙳ и҆ безстра́стїѧ крилы̀ ᲂу҆кра́шенъ, ꙳ бл҃года́ть прїѧ́лъ є҆сѝ цѣли́ти, прпⷣбне, ꙳ человѣ́кѡвъ не́мѡщи, ꙳ и҆ ѿгони́ти дꙋхѡ́въ лꙋка̑вствїѧ, ꙳ и҆ спаса́ти притека́ющыѧ къ тебѣ̀. ꙳ тѣ́мже ли́цы тѧ̀ блажа́тъ ꙳ мона́шествꙋющихъ, достосла́вне, ꙳ и҆ почита́етъ всѧ̀ тва́рь, ꙳ і҆ларїѡ́не, по́двиги твоѧ̑.
Сла́ва, гла́съ в҃. А҆нато́лїа:
Ѿ ю҆́ности твоеѧ̀ носѧ̀ соверше́нства мꙋ́дрость, возложи́въ на себѐ, і҆ларїѡ́не, и҆́го хрⷭ҇то́во, и҆ житїю̀ поревнова́лъ є҆сѝ бжⷭ҇твеннагѡ а҆нтѡ́нїа, ра́вными мѣ́рами добродѣ́тели подо́бѧсѧ: и҆зсꙋши́лъ є҆сѝ пло́ть ска́чꙋщꙋ а҆́ки жребѧ̀, ꙗ҆́кѡ до́лжно бѣ̀ дꙋшѝ покори́ти, по́стное тече́нїе соверши́въ. но, ѽ бл҃же́ннѣйше ѻ҆́ч҃е, и҆ чꙋдодѣ́йственне бг҃оно́се, па́мѧть твою̀ любо́вїю соверша́ющымъ, просѝ ѡ҆чище́нїѧ и҆ ве́лїѧ ми́лости.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Подо́бенъ: Є҆гда̀ ѿ дре́ва:
Дре́вꙋ крⷭ҇тномꙋ тѧ̀, і҆и҃се, пригвожде́на, зрѧ́щи, неискꙋсобра́чнаѧ, пла́чꙋщи гл҃го́лаше: ча́до сла́дкое, почто̀ ѡ҆ста́вилъ є҆сѝ менѐ, ро́ждшꙋю тѧ̀ є҆ди́нꙋ; свѣ́те непристꙋ́пный пребезнача́льнагѡ ѻ҆ц҃а̀, потщи́сѧ и҆ просла́висѧ, ꙗ҆́кѡ да сла́вꙋ полꙋча́тъ бжⷭ҇твеннꙋю, и҆̀же бжⷭ҇твєнныѧ стра̑сти твоѧ̑ сла́вѧщїи.
На стїхо́внѣ ѻ҆ктѡ́иха. Сла́ва, гла́съ и҃. Самогла́сенъ:
Дх҃а ст҃а́гѡ и҆спо́лненъ бы́въ прпⷣбный і҆ларїѡ́нъ, де́мѡнскїѧ кѡ́зни ᲂу҆празднѝ: крⷭ҇то́мъ бо воѡрꙋжи́всѧ, и҆ въ не́мъ дерза́ѧ, всѧ̑ недꙋ́ги сло́вомъ и҆сцѣлѝ, дꙋшє́вныѧ ᲂу҆́бѡ стра̑сти, тѣле́съ же всѧ́кꙋю ꙗ҆́зю. тогѡ̀ моли́твами хрⷭ҇тѐ, низпослѝ на́мъ ми́ръ, ꙗ҆́кѡ чл҃вѣколю́бецъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Подо́бенъ: Ѽ пресла́внагѡ чꙋдесѐ!
Ю҆́ница нескве́рнаѧ, ꙳ ю҆нца̀ ви́дѧщи на дре́вѣ ꙳ пригвожда́ема во́лею, ꙳ рыда́ющи жа́лостнѣ, ꙳ ᲂу҆вы̀ мнѣ̀, вопїѧ́ше, ꙳ люби́мѣйшее ча́до. ꙳ что́ ти со́нмъ воздадѐ ꙳ безблагода́тный є҆вре́йскїй, ꙳ хотѧ́ мѧ ѡ҆безча́дствовати ѿ тебє̀ вселюбе́зне;
Тропа́рь, гла́съ и҃:
Сле́зъ твои́хъ тече́ньми пꙋсты́ни безпло́дное воздѣ́лалъ є҆сѝ, и҆ и҆̀же и҆зъ глꙋбины̀ воздыха́ньми, во сто̀ трꙋдѡ́въ ᲂу҆плодоноси́лъ є҆сѝ, и҆ бы́лъ є҆сѝ свѣти́льникъ вселе́ннѣй, сїѧ́ѧ чꙋдесы̀, і҆ларїѡ́не, ѻ҆́ч҃е на́шъ: молѝ хрⷭ҇та̀ бг҃а спасти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
На ᲂу҆́трени ѻ҆́ба канѡ́на ѻ҆ктѡ́иха, безъ мч҃ничнѡвъ: и҆ ст҃а́гѡ на ѕ҃, є҆гѡ́же краегране́сїе:
Свѣ́тлость пою̀, всебл҃же́нне, твои́хъ чꙋде́съ. Ѳеофа́ново.
Гла́съ в҃. Пѣ́снь а҃. І҆рмо́съ:
Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.
Свѣтоно́сное и҆ свѣтови́дное житїѐ твоѐ, бл҃же́нне, прера́достнѡ благохвали́ти ᲂу҆се́рдствꙋюща, твоеѧ̀ свѣ́тлости ти́хостїю просвѣти́ мѧ, молю́сѧ, и҆ грѣха̀, ѻ҆́ч҃е, ᲂу҆ны́нїе ѿженѝ.
Всенра́внѡ, блаже́нне, къ бг҃ꙋ ра́дꙋѧсѧ пристꙋпи́лъ є҆сѝ, внѣ̀ пло́ти и҆ мі́ра бы́въ: и҆ ᲂу҆́мъ немꙋ́тенъ, ᲂу҆твержде́нъ воздержа́нїемъ соблю́лъ є҆сѝ, бжⷭ҇твеннымъ безстра́стїемъ ѿсю́дꙋ присвоѧ́ѧсѧ.
Свѣ́тлыми ты̀ зарѧ́ми просвѣща́емь безнача́льнагѡ и҆ несозда́ннагѡ бж҃ества̀, ѻ҆́ч҃а не бре́лъ є҆сѝ ѕловѣ́рїѧ, и҆ многомѧте́жнагѡ невѣ́жества тогѡ̀ ѿврати́всѧ, є҆ди́нѣй трⷪ҇цѣ сочета́лсѧ є҆сѝ.
Бг҃оро́диченъ:
Возсїѧ́вый сл҃нце и҆зъ тебє̀, мт҃и приснодв҃о, и҆зъ ѻ҆ц҃а̀ пре́жде вѣ̑къ неви́димый, и҆ ви́димымъ же пресла́внѡ ѡ҆писꙋ́емь тѣ́ломъ, благоче́стїѧ свѣ́томъ человѣ́ки просвѣти́лъ є҆́сть.
Пѣ́снь г҃. І҆рмо́съ:
На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.
Ꙗ҆дови́тыхъ страсте́й воста̑нїѧ, лѣчбо́ю по́стничества ѡ҆бложе́нъ, и҆зсꙋши́лъ є҆сѝ, приснопа́мѧтне, взыва́ѧ: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ па́че тебє̀, гдⷭ҇и.
Кѡ́жныѧ ме́ртвєнныѧ ри̑зы ѡ҆строга́въ ноже́мъ воздержа́нїѧ, и҆стка́лъ є҆сѝ ри́зꙋ спасе́нїѧ вопїѧ̀ творцꙋ̀ твоемꙋ̀: ты̀ є҆сѝ бг҃ъ на́шъ, и҆ нѣ́сть свѧ́тъ па́че тебє̀, гдⷭ҇и.
Оу҆крѣплѧ́емь наде́ждею вѣ́чныхъ, и҆ бг҃ꙋ приводи́мь, бг҃оно́се, дла́ньми бг҃омꙋ́драгѡ а҆нтѡ́нїа, є҆го́же подража́ѧ свѣти́льникъ бы́лъ є҆сѝ, пресла́вными чꙋдесы̀ свѣтѧ́сѧ, прпⷣбне.
Бг҃оро́диченъ:
И҆́же всѧ̑ воѡбрази́вый хотѣ́нїемъ бжⷭ҇твеннымъ, въ человѣ́ка воѡбрази́тисѧ сподо́бисѧ, созида́ѧсѧ во ᲂу҆тро́бѣ твое́й, бцⷣе. є҆мꙋ́же ны́нѣ зове́мъ: ты̀ є҆сѝ бг҃ъ на́шъ, и҆ нѣ́сть пра́веденъ па́че тебє̀, гдⷭ҇и.
Сѣда́ленъ, гла́съ и҃. Подо́бенъ: Премꙋ́дрости:
А҆нтѡ́нїа бжⷭ҇твеннагѡ дꙋхо́внѣ добродѣ́тельномꙋ житїю̀ поревнова́въ, на ра́мена твоѧ̑ взѧ́лъ є҆сѝ крⷭ҇тъ гдⷭ҇а твоегѡ̀, ѡ҆ста́вивъ житїѧ̀ всѐ попече́нїе, и҆ стра̑сти ᲂу҆мертви́въ, дꙋ́хомъ пожи́лъ є҆сѝ. тѣ́мъ и҆ тва́рь пресла́вными и҆спо́лнилъ є҆сѝ чꙋдесы̀, прпⷣбне, дх҃а бл҃года́тїю: і҆ларїѡ́не, ѻ҆́ч҃е на́шъ, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти, чтꙋ́щымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бж҃ества̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.
Крⷭ҇тобг҃оро́диченъ:
А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве, гдⷭ҇и, ми́лости бе́здно и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стра̑сти твоѧ̑.
Пѣ́снь д҃. І҆рмо́съ:
Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ, до менє́ бо и҆́деши, менѐ и҆щѧ̀ заблꙋ́ждшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многоми́лостиве.
Оу҆мертви́въ пло́ти мꙋдрова́нїе, пото́къ беззако́нїѧ мѧте́жи, прпⷣбне, и҆ де́мѡнскихъ ко́зней и҆збѣжа́въ, къ ти́хости бжⷭ҇твеннагѡ дх҃а, съ пра́ведными, ѻ҆́ч҃е, воспочи́лъ є҆сѝ.
Водны́ми сле́зъ течє́нїи наплѧ́емь, прпⷣбне, дꙋше́внꙋю ни́вꙋ многопло́днꙋ, дѣ́ланїемъ ꙗ҆́вѣ сп҃совымъ, ѻ҆́ч҃е, показа́лъ є҆сѝ, по́стникѡвъ ᲂу҆мно́живъ составлє́нїѧ.
Прича́стїемъ ст҃а́гѡ дх҃а ᲂу҆крѣплѧ́емь, бг҃оно́се, лꙋка́вствїѧ дꙋ́хи низложи́лъ є҆сѝ, и҆ си́лою хрⷭ҇то́вою немѡщны́ѧ и҆сцѣлѧ́еши, прⷪ҇ро́ческою ѡ҆богати́всѧ чистото́ю.
Бг҃оро́диченъ:
Хра́мъ тѧ̀ и҆ черто́гъ ѡ҆дꙋшевле́нный, и҆ мы́сленнꙋю трапе́зꙋ и҆ свѣти́льникъ, бг҃ома́ти бл҃гослове́ннаѧ, разꙋмѣ́емъ, и҆зъ неѧ́же сꙋ́щымъ во тмѣ̀ свѣ́тъ возсїѧ̀, ѻ҆́ч҃а сꙋщества̀ сїѧ́нїе.
Пѣ́снь є҃. І҆рмо́съ:
Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю, цр҃ю̀ ми́ра, просвѣти́ мѧ сїѧ́нїемъ твои̑мъ: и҆но́гѡ бо, ра́звѣ тебє̀, бо́га не зна́ю.
Ꙗ҆́кѡ мо́лнїѧ, чистото́ю житїѧ̀ и҆ жи́тельствомъ, безплѡ́тнымъ подо́бѧсѧ, просїѧ́въ въ мі́рѣ, тмы̀ предста́телѧ ѿго́ниши, бг҃облаже́нне, благоче́стїѧ свѣ́томъ просвѣща́емь.
Всѧ́ческими свѣтѧ́сѧ, бг҃омꙋ́дре, чꙋдодѣ́йствы, и҆ бл҃года́тїю бжⷭ҇твенною ѡ҆заре́нъ, всѣ̑мъ позна́лсѧ є҆сѝ сокро́вище и҆сцѣле́нїй лю́бѧщымъ, ѻ҆́ч҃е бг҃опрїѧ́тне, ꙗ҆́кѡ дрꙋгі́й нѣ́кїй прⷪ҇ро́къ бж҃їй познава́емь.
Свѣ́тлостїю твои́хъ, ѻ҆́ч҃е, кро́ткихъ и҆справле́нїй, мра̑чныѧ вра̑жїѧ си̑лы прогна́лъ є҆сѝ: и҆ ѿ тѣ́хъ ꙗ҆́рости и҆схити́въ къ тебѣ̀ прибѣга́ющыѧ, бжⷭ҇твенными твои́ми ᲂу҆чє́нїи къ вѣ́рѣ просвѣти́лъ є҆сѝ.
Бг҃оро́диченъ:
Є҆ди́нꙋ на́мъ во двꙋ̀ сꙋщєствꙋ̀ ви́димꙋю ѵ҆поста́сь, є҆ди́на бл҃гослове́ннаѧ родила̀ є҆сѝ неизрече́ннѡ, бж҃їѧ бг҃а сло́ва, вопло́щшасѧ за ми́лость неизглаго́ланнꙋю. сего̀ ᲂу҆́бѡ молѝ, сохрани́ти пою́щыѧ тѧ̀.
Пѣ́снь ѕ҃. І҆рмо́съ:
Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
Є҆динонача́лїю слꙋжа̀ бж҃ества̀ безнача́льнагѡ, многонача́лїе ѡ҆бличи́лъ є҆сѝ, і҆́дѡльское нече́стїе ᲂу҆праздни́въ, бг҃омꙋ́дре, бл҃года́тїю.
Прозѧ́бъ, ѻ҆́ч҃е, ꙗ҆́кѡ фі́нїѯъ процвѣ́лъ є҆сѝ въ цр҃кви, всебл҃же́нне бг҃омꙋ́дре, плодѡ́въ сла́достїю вѣ́рныхъ возвеселѧ́ѧ и҆сполне́нїе.
Низложи́тель ꙗ҆ви́лсѧ є҆сѝ непобѣди́мь лꙋка́выхъ дꙋхѡ́въ, всесла́вне, богатотвѡ́рнаѧ дарова̑нїѧ ѿ хрⷭ҇та̀ полꙋчи́въ, бл҃же́нне.
Бг҃оро́диченъ:
Неискꙋсомꙋ́жнѡ дв҃о, родила̀ є҆сѝ, и҆ вѣ́чнꙋеши дв҃а, ꙗ҆влѧ́ющи и҆́стиннагѡ бжⷭ҇тва̀, сн҃а и҆ бг҃а твоегѡ̀ ѻ҆́бразы.
Конда́къ, гла́съ г҃. Подо́бенъ: Дв҃а дне́сь:
Ꙗ҆́кѡ свѣти́льника незаходи́маго, ᲂу҆́мнаго тѧ̀ сл҃нца, соше́дшесѧ дне́сь восхвалѧ́емъ въ пѣ́снехъ: возсїѧ́лъ бо є҆сѝ сꙋ́щымъ во тмѣ̀ невѣ́дѣнїѧ, всѧ̑ возводѧ̀ къ бжⷭ҇твеннѣй высотѣ̀, і҆ларїѡ́не. тѣ́мже вопїе́мъ: ра́дꙋйсѧ, ѻ҆́ч҃е, всѣ́хъ по́стникѡвъ ѡ҆снова́нїе.
І҆́косъ:
Возлюби́въ хрⷭ҇то́вы бжⷭ҇твєнныѧ за́пѡвѣди, и҆ возненави́дѣвъ всегѡ̀ мі́ра наслажде́нїе, прише́лъ є҆сѝ ᲂу҆се́рднѡ къ томꙋ̀, и҆ бы́лъ є҆сѝ свѣти́льникъ, просвѣща́ѧ всѧ̑ концы̀ блиста́нїемъ дх҃а. тѣ́мъ припа́даѧ молю̀ тѧ̀: просвѣтѝ и҆ моѧ̑ ѻ҆́чи дꙋшє́вныѧ, воспѣ́ти твоѧ̑ по́двиги, ꙗ҆̀же показа́лъ є҆сѝ на землѝ ра́ди бꙋ́дꙋщїѧ жи́зни. є҆ѧ́же ны́нѣ наслажда́ѧсѧ, помина́й вопїю́щихъ тѝ: ра́дꙋйсѧ, ѻ҆́ч҃е, всѣ́хъ по́стникѡвъ ѡ҆снова́нїе.
Пѣ́снь з҃. І҆рмо́съ:
Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.
Глагѡ́лъ вѣща́нїе твоѐ, и҆ чꙋде́съ бл҃года́ть бжⷭ҇твеннаѧ во всю̀ и҆зы́де зе́млю, всебл҃же́нне, бг҃оче́стїѧ заре́ю всѣ̑мъ сїѧ́ѧ вѣ́рнѡ и҆сцѣле́нїй тишинꙋ̀.
Крⷭ҇то́мъ ѡ҆гражда́емь сп҃совымъ, неврежде́нъ пре́былъ є҆сѝ, безꙋ́мнѡ ѡ҆кꙋси́вшꙋсѧ де́мѡнскомꙋ свирѣ́пствꙋ ѡ҆ тебѣ̀, всемꙋ́дре: вѣ́сть бо вы́шнїй бг҃ъ соблюда́ти своѧ̑ ᲂу҆го́дники.
Ꙗ҆́кѡ сто́лпъ непоколе́бленъ, небесовысо́кїй, ꙗ҆́кѡ стѣна̀ неподви́жима ꙗ҆ви́лсѧ є҆сѝ посто́мъ, просвѣща́ѧ чꙋдесы̀, и҆ даѧ̀ и҆сцѣлє́нїѧ, и҆ и҆сточа́ѧ бжⷭ҇твєнныѧ догма́ты ѿ и҆сто́чника приснотекꙋ́ща бг҃одохнове́нныхъ писа́нїй.
Бг҃оро́диченъ:
Ѻ҆́блакъ дв҃а, тѧ̀ пра́вды сл҃нце родѝ, и҆ дв҃а пребы́вши, дебельствꙋ̀ пло́ти приѡбщи́вшасѧ, чл҃вѣ́ка бы́вша за бл҃гоꙋтро́бїе и҆ снизхожде́нїе: є҆го́же воспѣва́емъ ꙗ҆́кѡ препросла́влена.
Пѣ́снь и҃. І҆рмо́съ:
Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.
Престо́лъ и҆́стиннѡ чꙋ́вствїѧ бы́лъ є҆сѝ, бжⷭ҇твеннымъ ра́зꙋмомъ просвѣща́емь, и҆ бж҃їимъ повелѣ́нїемъ бг҃омꙋ́дреннѡ наставлѧ́емь, и҆ добродѣ́телїю свѣтѧ́сѧ зовы́й: благослови́те, всѧ̑ дѣла̀ гдⷭ҇нѧ, гдⷭ҇а.
Колесни́ца та́инственнаѧ, носѧ́щаѧ и҆́мѧ гдⷭ҇не, ꙗ҆ви́лсѧ є҆сѝ, прпⷣбне, свѣ́тлостїю дѣ́лъ, и҆ чꙋде́съ ꙗ҆вле́нїемъ, и҆ чистото́ю житїѧ̀, взыва́ѧ: благослови́те, всѧ̑ дѣла̀ гдⷭ҇нѧ, гдⷭ҇а.
Сыноположе́нъ бж҃е́ственною благода́тїю, снаслѣ́дникъ хрⷭ҇то́въ бы́лъ є҆сѝ, и҆ бога́тство нбⷭ҇ное и҆ црⷭ҇тво непрее́мное прїѧ́лъ є҆сѝ, бг҃оглаго́ливе, зовѧ̀: благослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Мѵ́ро ᲂу҆́мное и҆стоще́нное, дв҃о, и҆менꙋ́ема сн҃а чревоноси́ла є҆сѝ, кꙋре́нїемъ бж҃ества̀ земны̑ѧ бл҃гово́нствꙋюща, и҆ ѿ тлѝ и҆збавлѧ́ющаго взыва́ющыѧ: благослови́те, всѧ̑ дѣла̀ гдⷭ҇нѧ, гдⷭ҇а.
Пѣ́снь ѳ҃. І҆рмо́съ:
Безнача́льна роди́телѧ сн҃ъ, бг҃ъ и҆ гдⷭ҇ь вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.
Ст҃ы́хъ жили̑ща проходи́ти сподо́билсѧ є҆сѝ, житїѐ соверши́въ свѧ́то, прпⷣбне: и҆ ꙗ҆́кѡ сꙋ́щꙋ пра́веднꙋ тебѣ̀ трисвѣ́тлый возсїѧ̀ свѣ́тъ, и҆ тогѡ̀ сопрꙋ́гъ весе́лїе прїѧ́ше.
Трꙋдѡ́въ воздаѧ́нїе ѿ хрⷭ҇та̀ прїе́мъ, и҆ жи́зни вѣ́чныѧ ꙗ҆́вѣ причасти́всѧ, и҆ па́че ᲂу҆ма̀ благолѣ́пїѧ добро́тами, ѻ҆́ч҃е, преизѧ́ществованъ, ѡ҆ пою́щихъ тѧ̀ ко влⷣцѣ моли́сѧ.
Ꙗ҆́кѡ ке́дръ высокове́рхїй добродѣ́телїю возвыша́емь, во дво́рѣхъ, бг҃оно́се, бж҃їихъ наслажде́нъ бы́лъ є҆сѝ, и҆ ꙗ҆́кѡ заключе́нъ ѻ҆гра́дъ, ꙗ҆́кѡ благоцвѣты́й ра́й ꙗ҆ви́лсѧ є҆сѝ, и҆ ꙗ҆́кѡ и҆сто́чникъ кипѧ́щїй и҆сцѣле́нїй дарова́нїѧ.
Бг҃оро́диченъ:
Черто́гъ была̀ є҆сѝ па́че ᲂу҆ма̀ воплоти́вшагѡсѧ сло́ва, дв҃о бг҃ороди́тельнице, ѡ҆дѣ́ѧна сла́вою добродѣ́телей и҆ ᲂу҆кра́шенна. тѣ́мъ тѧ̀, всенепоро́чнаѧ, бцⷣꙋ возвѣща́емъ.
Свѣти́ленъ. Подо́бенъ: Жєны̀ ᲂу҆слы́шите:
Мїрска́гѡ пристра́стїѧ ꙗ҆́кѡ стра́стна ᲂу҆клони́лсѧ є҆сѝ, и҆ безпи́щїемъ пло́ть ᲂу҆вѧди́въ, ѡ҆бновлѧ́еши брозды̀ держа́щихъ, и҆ сла́вою ѡ҆богати́лсѧ є҆сѝ чꙋдодѣ́йствꙋѧ и҆зрѧ̑днаѧ, пастыренача́льникѡвъ ве́рхъ, бг҃опрїѧ́тне і҆ларїѡ́не.
Бг҃оро́диченъ:
Во двꙋ́хъ хотѣ́нїихъ и҆ є҆стества́хъ, всенепоро́чнаѧ, є҆ди́нѣй же ѵ҆поста́си ражда́еши бг҃а неизрече́ннѡ, на́съ ра́ди ѡ҆бнища́вшаго до крⷭ҇та̀ хотѣ́нїемъ, и҆ дарова́вшаго на́мъ бжⷭ҇тва̀ бога́тство, бг҃ома́ти дв҃о.
На стїхо́внѣ ѻ҆ктѡ́иха. Сла́ва, гла́съ в҃. Самогла́сенъ:
Ти́хое твоѐ, ѻ҆́ч҃е, и҆ чи́стое житїѐ ви́дѣвъ хрⷭ҇то́съ, кро́ткое и҆ молчали́вое, ѻ҆би́тель сотворѝ въ тебѣ̀, и҆ бы́лъ є҆сѝ жили́ще бжⷭ҇твенное. и҆ сегѡ̀ ра́ди со а҆́гг҃лы на нб҃сѣ́хъ водворѧ́ешисѧ, блаже́нне.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Є҆гда̀ ѿ дре́ва:
Є҆гда̀ нескве́рнаѧ а҆́гница ви́дѣ своего̀ а҆́гнца, на заколе́нїе ꙗ҆́кѡ чл҃вѣ́ка во́лею влеко́ма, пла́чꙋщи глаго́лаше: безча́дствовати мѧ̀ ны́нѣ тщи́шисѧ, хрⷭ҇тѐ, ро́ждшꙋю тѧ̀, что̀ сїѐ сотвори́лъ є҆сѝ, и҆зба́вителю всѧ́ческихъ; ѻ҆ба́че воспѣва́ю и҆ сла́влю твою̀, ю҆́же па́че ᲂу҆ма̀ и҆ сло́ва, кра́йнюю бла́гость, чл҃вѣколю́бче.
На лїтꙋргі́и: Бл҃жє́нна ѻ҆ктѡ́иха, на д҃: и҆ ст҃а́гѡ пѣ́снь г҃, на д҃. Прокі́менъ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми. А҆пⷭ҇лъ къ корі́нѳѧнѡмъ, зача́ло рп҃и. А҆ллилꙋ́їа, гла́съ ѕ҃: и҆ Блаже́нъ мꙋ́жъ боѧ́йсѧ гдⷭ҇а. Є҆ѵⷢ҇лїе лꙋкѝ, зача́ло к҃д. Прича́стенъ: Въ па́мѧть вѣ́чнꙋю.
Слꙋ́жба і҆ларїѡ́на, є҆пі́скопа мегли́нскагѡ.
Ве́черъ, Блаже́нъ мꙋ́жъ:
Стїхи̑ры, гла́съ в҃:
Кі́ими похва́льными вѣнцы̑ ны́нѣ соста́вимъ ликова́нїе, въ честнѣ́мъ пра́здницѣ твоегѡ̀ пренесе́нїѧ, і҆ера́рше; дꙋхо́внѡ пра́зднꙋюще мо́лимсѧ, моли́сѧ, правосла́вномꙋ во́инствꙋ побѣди́тєльнаѧ на врагѝ дарова́ти: тебе́ бо те́пла моли́твенника ко влⷣцѣ стѧжа́хомъ, подаю́щаго мі́рꙋ ве́лїю ми́лость.
Кі́ими похва́льными добро́тами воспои́мъ, во а҆рхїере́ехъ сла́внаго, и҆ въ вѣ́рѣ вели́каго, и҆ въ пелена́хъ доброразсꙋ́днаго, во ᲂу҆че́нїи ѧ҆зы́ка сла́дкаго, ᲂу҆че́нїемъ це́рковь ѡ҆бога́щша свѧти́телѧ і҆ларїѡ́на, є҆го́же вѣнцы̑ вѣнча́етъ хрⷭ҇то́съ бг҃ъ на́шъ, и҆мѣ́ѧй ве́лїю ми́лость;
Кі́ими дꙋхо́вными пѣ́сньми воспои́мъ а҆рхїере́а, ᲂу҆че́нїемъ къ бг҃оразꙋ́мїю всѣ́хъ наста́вльшаго, и҆сто́чника чꙋде́съ пречꙋ́дна, цр҃кви свѣти́льника пресвѣ́тлаго, и҆ ᲂу҆чи́телѧ премꙋ́дра мегли́нскїѧ землѝ, и҆ всеѧ̀ рѡссі́йскїѧ прекра́сное ᲂу҆добре́нїе; є҆гѡ́же ра́ди хрⷭ҇то́съ врагѡ́въ шата́нїе низложѝ, и҆мѣ́ѧй ве́лїю ми́лость.
Сла́ва, гла́съ ѕ҃:
А҆рхїере́євъ похвалꙋ̀, свѧще́нникѡвъ всѣ́хъ ᲂу҆краше́нїе, къ бг҃ꙋ моли́твенника непреста́ннаго, и҆сто́чника чꙋде́съ преиз̾ѡби́льна, дне́сь любо́вїю соше́дшесѧ мегли́нстїи наро́ди, і҆ера́рха і҆ларїѡ́на похва́лимъ: честны̑ѧ мо́щи ѡ҆бстоѧ́ще, благода̑рныѧ гла́сы томꙋ̀ прино́симъ, глаго́люще: ра́дꙋйсѧ, а҆рхїере́е і҆ларїѡ́не, свѣти́льниче свѣ́тлый! ѡ҆зарѝ и҆зрѧ́дное достоѧ́нїе твоѐ, правосла̑вныѧ лю́ди, ѡ҆ ни́хже непреста́ннѡ хрⷭ҇тꙋ̀ моли́сѧ, ми́рно житїѐ дарова́ти: да всѝ честно́е твоѐ пренесе́нїе любо́вїю почита́емъ, и҆ мо́лимсѧ, молѝ спасти́сѧ дꙋша́мъ на́шымъ.
И҆ ны́нѣ, бг҃оро́диченъ: Кто̀ тебѐ не ᲂу҆блажи́тъ: Вхо́дъ. Прокі́менъ днѐ. Чтє́нїѧ трѝ, пи́саны въ є҃ де́нь.
На стїхо́внѣ стїхи̑ры, гла́съ в҃. Самогла́сны:
Хрⷭ҇то́во ста́до слове́сныхъ ѻ҆ве́цъ, на ѕла́цѣ благоче́стїѧ до́брѣ ᲂу҆па́слъ є҆сѝ, і҆ера́рше. тѣ́мже и҆ по преставле́нїи цр҃ко́вныхъ твои́хъ ча̑дъ не ѡ҆ставлѧ́й, но посѣща́й: и҆ ст҃ѣ́й трⷪ҇цѣ со а҆рхїере́и предстоѧ̀, молѝ спастѝ всѧ̑, честно́е твоѐ пренесе́нїе любо́вїю почита́ющыѧ, і҆ларїѡ́не прехва́льне.
Сті́хъ: Свѧще́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ.
Тезоимени́тагѡ ра́ди твоегѡ̀ житїѧ̀, и҆ сла́дости ѧ҆зы́ка, и҆ разсꙋжде́нїѧ доброразсꙋ́днагѡ, па́стырѧ тѧ̀ лю́демъ до́брѣ врꙋча́етъ хрⷭ҇то́съ: є҆го́же молѝ спастѝ, и҆ ᲂу҆ще́дрити всѧ̑, пресвѣ́тлꙋю па́мѧть твою̀ пра́зднꙋющыѧ, і҆ларїѡ́не пресла́вне, моли́твениче ѡ҆ дꙋша́хъ на́шихъ.
Сті́хъ: Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ.
Дне́сь пресла́внѡ, ст҃и́телю, ѿ свои́хъ ко свои̑мъ же че́стнѡ прехо́диши, да свои́мъ ше́ствїемъ всѧ̑ ѡ҆свѧти́ши, и҆ ра́достїю напо́лниши, па́мѧть твою̀ любо́вїю пра́зднꙋющыѧ, и҆ честно́е прехожде́нїе твоѐ вѣ́рнѡ сла́вѧщыѧ, и҆ прилѣ́жнѡ вопїю́щыѧ: молѝ, мо́лимсѧ, спасти́сѧ дꙋша́мъ на́шымъ.
Сла́ва, гла́съ и҃:
Гра́дъ ѡ҆свѧти́сѧ, наро́ди благослови́шасѧ, цр҃ковь перворо́дныхъ дꙋ́хомъ ликовствꙋ́етъ, въ пренесе́нїе честны́хъ твои́хъ моще́й, і҆ера́рше і҆ларїѡ́не, съ людьмѝ зовꙋ́щи: ты̀ моѧ̀ крѣ́пость и҆ ᲂу҆твержде́нїе, ты̀ моѧ̀ добро́та, и҆ тобо́ю хвалю́сѧ, моли́сѧ спастѝ всѧ̑, любо́вїю всемі́рное твоѐ пренесе́нїе при́снѡ сла́вѧщыѧ.
И҆ ны́нѣ, бг҃оро́диченъ по гла́сꙋ. Тропа́рь, гла́съ г҃:
Чꙋ́до ꙗ҆ви́всѧ и҆звѣще́нїѧ, дѣ́лы возсїѧ́лъ є҆сѝ добродѣ́телей бж҃їихъ: мона́шествꙋющихъ ли́ки ᲂу҆па́слъ є҆сѝ, а҆рхїерє́йскаѧ сѣда̑лища и҆зчи́стилъ є҆сѝ: є҆реті́ческагѡ же напа́данїѧ не ᲂу҆сꙋмнѣ́всѧ, цр҃кви хрⷭ҇тѡ́вы воздви́глъ є҆сѝ, прпⷣбне і҆ларїѡ́не, ᲂу҆́меръ ꙗ҆́кѡ спѧ̀: тѣ́ло же твоѐ цѣ́ло и҆ нетлѣ́нно соблюдено̀ бы́сть, и҆ подае́тъ цѣльбы̑ болѧ́щымъ ѿ разли́чныхъ недꙋ̑гъ, и҆ де́мѡны прогонѧ́етъ. сегѡ̀ ра́ди мо́лимъ тѧ̀, молѝ спасти́сѧ дꙋша́мъ на́шымъ.
На ᲂу҆́трени по а҃-мъ стїхосло́вїи сѣда́ленъ, гла́съ д҃:
Бг҃ꙋ ѡ҆свѧти́лъ є҆сѝ твою̀ жи́знь, всебл҃же́нне, бы́въ и҆зрѧ́денъ свѧщеннодѣ́йственникъ вои́стиннꙋ хрⷭ҇то́въ свѧще́нне. тѣ́мже по мно́гихъ по́тѣхъ и҆ болѣ́знехъ ра́дꙋѧсѧ къ невеще́ствєннымъ преста́вилсѧ є҆сѝ селе́нїємъ, ны́нѣ и҆сточа́еши на́мъ стрꙋи̑ и҆сцѣле́нїй.
Два́жды.
Бг҃оро́диченъ:
Дв҃о всенепоро́чнаѧ, пресꙋ́щнаго бг҃а ро́ждшаѧ, со безпло́тными того̀ непреста́ннѡ молѝ, ѡ҆ставле́нїе прегрѣше́нїй, и҆ и҆справле́нїе житїѧ̀ да́ти на́мъ пре́жде конца̀, вѣ́рою и҆ любо́вїю пою́щымъ тѧ̀ по до́лгꙋ, є҆ди́на всепѣ́таѧ.
По в҃-мъ стїхосло́вїи сѣда́ленъ, гла́съ и҃:
Сле́зными стрꙋѧ́ми страсте́й взыгра̑нїѧ неꙋста̑внаѧ потопи́лъ є҆сѝ: пꙋчи́на бы́сть долготерпѣ́нїѧ, прпⷣбне, къ тишинѣ̀ веды́й долготерпѣ́нїѧ.
Два́жды.
Бг҃оро́диченъ:
Па́че є҆стества̀ и҆ сло́ва, влⷣчце, всѣ́хъ пита́телѧ родила̀ є҆сѝ, и҆ пита́еши ѿ сѡсцꙋ̀ твоє́ю, во вре́мѧ гото́вѧща трапе́зꙋ. є҆го́же прилѣ́жнѡ, пречⷭ҇таѧ, ѡ҆ на́съ молѝ.
По полѷеле́и сѣда́ленъ, гла́съ и҃:
Вели̑кимъ добродѣ́телемъ поревнова́лъ є҆сѝ, і҆ларїѡ́не, си̑мъ послѣ́дꙋѧ воздержа́нїемъ, прпⷣбне, верхо́венъ ꙗ҆ви́лсѧ є҆сѝ, и҆ ста́до воѡбраже́нное пѡ́ты воздержа́тельными ᲂу҆па́слъ є҆сѝ, ᲂу҆́глїе врага̀ невѣ́рїѧ стрѣла́ми слове́съ погаси́лъ є҆сѝ, и҆ є҆реті́чєскаѧ шата̑нїѧ.
Два́жды.
Сла́ва, и҆ ны́нѣ, бг҃оро́диченъ:
Ѡ҆ тебѣ̀ ра́дꙋетсѧ, бл҃года́тнаѧ, всѧ́каѧ тва́рь, а҆́гг҃льскїй собо́ръ, и҆ человѣ́ческїй ро́дъ: ѡ҆свѧще́нный хра́ме, и҆ раю̀ слове́сный, дѣ́вственнаѧ похвало̀, и҆зъ неѧ́же бг҃ъ воплоти́сѧ, и҆ млⷣнцъ бы́сть, пре́жде вѣ̑къ сы́й бг҃ъ на́шъ: ложесна́ бо твоѧ̑ прⷭ҇то́лъ сотворѝ, и҆ чре́во твоѐ простра́ннѣе нб҃съ содѣ́ла. ѡ҆ тебѣ̀ ра́дꙋетсѧ, бл҃года́тнаѧ, всѧ́каѧ тва́рь, сла́ва тебѣ̀.
Степє́нна а҃-й а҆нтїфѡ́нъ д҃-гѡ гла́са. Прокі́менъ: Честна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ: Є҆ѵⷢ҇лїе і҆ѡа́нна, зача́ло л҃ѕ. Ѱало́мъ н҃. Стїхи́ра, гла́съ в҃:
Ѿ ю҆́ности, ѻ҆́ч҃е, и҆мѣ́ѧ соверше́ннꙋю мꙋ́дрость, и҆ возложи́въ на сѧ̀ и҆́го хрⷭ҇то́во, житїю̀ поревнова́лъ є҆сѝ ст҃ы́хъ ѻ҆тє́цъ, ра́вными мѣ́рилы добродѣ́тели подо́бѧсѧ, ᲂу҆сꙋши́лъ є҆сѝ пло́ть ска́чꙋщꙋ, ꙗ҆́кѡ жребца̀: ꙗ҆́кѡ до́лжно бѣ̀, дꙋшѝ покори́лъ є҆сѝ по́стное тече́нїе соверши́ти, бл҃же́нне ѻ҆́ч҃е, па́мѧть твою̀ соверша́ющымъ просѝ ѡ҆чище́нїѧ грѣхѡ́въ, и҆ ве́лїѧ ми́лости.
Канѡ́нъ бцⷣы со і҆рмосо́мъ на ѕ҃: и҆ ст҃а́гѡ на и҃, є҆гѡ́же краегране́сїе: Внима́й ѡ҆ червле́нныхъ словесѣ́хъ.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ чꙋдеса̀.
Повелѣ́нїємъ влⷣки твоегѡ̀ подо́бѧсѧ, і҆ера́рше, кро́токъ и҆ смире́нъ, і҆ларїѡ́не, бы́лъ є҆сѝ, и҆ ѿсю́дꙋ ᲂу҆блажа́емыхъ, чи́нꙋ бы́ти сподо́билсѧ є҆сѝ. тѣ́мже дне́сь пресла́вное твоѐ пренесе́нїе почита́емъ.
Благочести́вагѡ ко́рене пресвѣ́тлаѧ пресла́внѡ прозѧбѐ ѻ҆́трасль, а҆рхїере́е і҆ларїѡ́не, въ добродѣ́тели соверше́ннѡ пожи́въ, и҆ сосꙋ́дъ чи́стъ дх҃а ст҃а́гѡ, ѻ҆́ч҃е, бы́лъ є҆сѝ.
Ꙗ҆дови́тыхъ страсте́й возгорѣ̑нїѧ, лѣчбо́ю по́стничества ѡ҆бложе́нъ, и҆зсꙋши́лъ є҆сѝ присносло́вый.
Бг҃оро́диченъ:
Возсїѧ̀ сл҃нце и҆зъ тебє̀ мт҃и приснодв҃о, и҆́же ѿ ѻ҆ц҃а̀ пре́жде вѣ̑къ неви́димый, и҆ ви́димь пресла́внѡ ѡ҆писꙋ́етсѧ тѣлесе́мъ, благоче́стїѧ свѣ́томъ человѣ́ки просвѣтѝ.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃. І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ, вѣнцє́въ сла́вы сподо́би.
Благослове́нїемъ твои́мъ всѧ̑ возмо́глъ є҆сѝ, ᲂу҆крѣплѧ́ющꙋ хрⷭ҇тꙋ̀ тѧ̀, ѻ҆́ч҃е, ѡ҆лѧденѣ́вшыѧ и҆ногда̀ люде́й бразды̑ дꙋшє́вныѧ, премꙋ́дрыми твои́ми ᲂу҆че́ньми, і҆ера́рше, ѡ҆чи́стилъ є҆сѝ, и҆ плодонѡ́сны сотвори́лъ є҆сѝ.
Фарїсе́йское киче́нїе ѿ ю҆́ности, ѻ҆́ч҃е, возненави́дѣвъ, мытаре́вꙋ же смире́нїю поревнова́въ, кро́токъ и҆ смире́нъ, ѻ҆́ч҃е, ко всѣ̑мъ бы́лъ є҆сѝ: сегѡ̀ ра́ди тѧ̀ всѝ, ꙗ҆́кѡ винꙋ̀ и҆ ѻ҆́бразъ благи́хъ почита́емъ.
И҆спо́лни ра́дости и҆ весе́лїѧ, тебѐ при́снѡ, і҆ера́рше і҆ларїѡ́не, лю́бѧщыѧ, и҆ торже́ствєннаѧ твоемꙋ̀ честно́мꙋ пренесе́нїю, въ пѣ́снехъ всегда̀ пою́щыѧ.
Бг҃оро́диченъ:
Тѧ̀ застꙋпле́нїе небла́знено, бг҃ома́ти, стѧжа́хомъ, наде́ждꙋ на тѧ̀ возлага́юще спаса́емсѧ, и҆ къ тебѣ̀ прибѣга́юще сохранѧ́емсѧ.
Сѣда́ленъ, гла́съ д҃. Подо́бенъ: Вознесы́йсѧ:
Моли́твамъ и҆ ми́лостынѧмъ, а҆рхїере́е і҆ларїѡ́не, при́снѡ прирадѣ́въ, ми́лостивъ къ тре́бꙋющымъ, ѻ҆́ч҃е, незави́стенъ бы́лъ є҆сѝ. тѣ́мже тѧ̀ почита́ющыѧ ѿ сопроти́вныхъ ѕѡ́лъ и҆збавлѧ́й, да всѝ твоѐ пренесе́нїе любо́вїю почита́емъ.
Два́жды.
Сла́ва, и҆ ны́нѣ, бг҃оро́диченъ:
Свѣ́тъ ро́ждши, пречестны́й, ѿ ѻ҆ц҃а̀ возсїѧ́вшїй пре́жде вѣ̑къ, просвѣтѝ, ѻ҆трокови́це, дꙋ́шꙋ мою̀ и҆ ᲂу҆́мъ, дале́че ѿ менє̀ ѿгонѧ́щи тмꙋ̀ страсте́й, да тѧ̀ ᲂу҆блажа́ю приснобл҃же́ннꙋю, вѣ́рныхъ ᲂу҆пова́нїе.
Пѣ́снь д҃. І҆рмо́съ:
Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ. сла́ва, хрⷭ҇тѐ, си́лѣ твое́й.
Є҆пⷭ҇копа тѧ̀ мегли́нскаѧ страна̀, пресла́внѡ, а҆рхїере́е і҆ларїѡ́не, стѧжа́вши, тобо́ю красꙋ́етсѧ, съ кнѧ́зи и҆ а҆рхїерє́и, и҆ со всенаро́днымъ мно́жествомъ хрⷭ҇та̀, воспѣва́етъ, си̑мъ при́снѡ тебѐ дарова́вшаго.
Всеѧ̀ мегли́нскїѧ землѝ первопресто́льникъ, а҆рхїере́е і҆ларїѡ́не, бы́лъ є҆сѝ, и҆ всѧ̑ твои́мъ ᲂу҆че́нїемъ просвѣти́лъ є҆сѝ. тѣ́мъ па́мѧть твою̀ почита́емъ, и҆ пренесе́нїе твоѐ почита́юще вопїе́мъ: молѝ, ѡ҆ всѣ́хъ пою́щихъ тѧ̀.
Прине́съ да́ръ бг҃ꙋ тобо́ю, мно́жество спаса́емыхъ, твоемꙋ̀ ᲂу҆че́нїю при́снѡ послѣ́дꙋющихъ, и҆ хрⷭ҇та̀ во хвале́нїи воспѣва́ющихъ, тебѐ всѣ̑мъ дарова́вшаго.
Бг҃оро́диченъ:
Крѣ́пкое тѧ̀ ѻ҆рꙋ́жїе на врагѝ предлага́емъ, и҆ скорбе́й всѧ́кихъ и҆ лю́тыхъ ѡ҆бстоѧ́нїй ѿрѣва́емъ вре́дъ, и҆ є҆реті́ческагѡ возмꙋще́нїѧ и҆збѣга́емъ, мт҃и бж҃їѧ.
Пѣ́снь є҃. І҆рмо́съ:
Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Многогрѣ́шнагѡ нерадѣ́нїемъ и҆жди́вшагѡ житїѐ не возгнꙋша́йсѧ, а҆рхїере́е, но твои́ми моли́твами ѡ҆чи́сти, твоѐ пренесе́нїе пѣ́сньми трꙋдолю́бнѡ сла́вѧща.
Пахѡ́мїа а҆́гг҃льскомꙋ видѣ́нїю сподо́бльшасѧ, сегѡ̀ пра́вилꙋ навы́къ, мно́гажды безъ сна̀ въ моли́твѣ всю̀ но́щь пребы́лъ є҆сѝ: ѿѻнꙋ́дꙋже сподо́билсѧ є҆сѝ го́рнѧгѡ зва́нїѧ.
Смире́нъ нра́въ, и҆ высоко̀ є҆́же по бг҃ꙋ житїѐ стѧжа́лъ є҆сѝ, і҆ера́рше. тѣ́мже всеви́дѧщее ѻ҆́ко, ви́дѣвъ твоѐ до́брое произволе́нїе, сла́вна тѧ̀ всѣ̑мъ концє́мъ показа̀ хрⷭ҇то́съ сп҃съ на́шъ.
Бг҃оро́диченъ:
Є҆ди́нꙋ тѧ̀, всенепоро́чнаѧ, ѿ родѡ́въ пречⷭ҇тꙋю ѡ҆брѣ́тъ, всели́сѧ въ тѧ̀, и҆ человѣ́ки ѡ҆божѝ: тѣ́мже ꙗ҆́кѡ мт҃рнее дерзнове́нїе къ немꙋ̀ стѧжа́вши, молѝ ѡ҆ и҆̀же вѣ́рою бцⷣꙋ и҆менꙋ́ющихъ тѧ̀.
Пѣ́снь ѕ҃. І҆рмо́съ:
Бжⷭ҇твенное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
На смире́нїе на́съ свы́ше ми́лостивнѡ назира́ѧ, вѣ́рнѡ тебѐ при́снѡ сла́вѧщихъ, моли́сѧ всѧ́кїѧ ско́рби и҆зба́вити, тебѐ те́пла предста́телѧ къ бг҃ꙋ стѧжа́вшихъ.
Селе́нїе ꙗ҆ви́лсѧ є҆сѝ прекра́сное дх҃а ст҃а́гѡ, бг҃одохнове́нными ᲂу҆че́ньми твои́ми, ѻ҆би́льнѡ пита́ѧ словє́снаѧ твоѧ̑ ча̑да: ѿѻнꙋ́дꙋже по преставле́нїи спребыва́еши лю́бѧщымъ тѧ̀, і҆ера́рше.
Возсїѧ́въ ꙗ҆́кѡ фі́нїѯъ процвѣ́лъ є҆сѝ въ цр҃кви, всебл҃же́нне, бг҃омꙋ́дре, плодѡ́въ сла́достїю вѣ̑рныѧ веселѧ́ѧ.
Бг҃оро́диченъ:
Неискꙋсомꙋ́жнаѧ дв҃о родила̀ є҆сѝ, и҆ пребыва́еши дв҃а, ꙗ҆влѧ́еши и҆́стиннагѡ бж҃ества̀, сн҃а и҆ бг҃а твоегѡ̀ ѻ҆́бразы.
Конда́къ, гла́съ г҃. Подо́бенъ: Дв҃а дне́сь:
Ꙗ҆́кѡ свѣтоно́сна ꙗ҆ви́сѧ, а҆рхїере́е, па́мѧть твоѧ̀, тмꙋ̀ разрꙋшѝ ᲂу҆ны́нїѧ, и҆ свѣ́тъ ѡ҆блиста̀ дарѡ́въ нбⷭ҇ныхъ, всѧ̑ созыва́ющи на ра́дость: ѿ бг҃а бо, і҆ларїѡ́не, бл҃года́ть ѡ҆брѣ́лъ є҆сѝ, и҆ мона́хѡвъ бы́лъ є҆сѝ степе́нь.
І҆́косъ:
Ѿ ю҆́ности бжⷭ҇твенное твоѐ житїѐ, і҆ера́рше, до́брѣ и҆спра́вивъ, и҆ внима́тельнымъ ѻ҆́комъ всегда̀ къ вы̑шнимъ зрѧ̀, и҆ та́мошнихъ непреста́ннѡ жела́ѧ, ѿню́дꙋже вели́кїѧ ра́ди добродѣ́тели, и҆ премꙋ́дрости ѧ҆зы́ка, а҆рхїере́йства са́номъ ᲂу҆кра́шенъ бы́въ, цр҃ковь и҆ лю́ди твои́ми ᲂу҆чє́нїи ѡ҆богати́лъ є҆сѝ. тѣ́мже тече́нїе благоче́стнѡ соверши́въ, къ бг҃ꙋ пресла́внѡ дꙋ́хомъ преше́лъ є҆сѝ, на́мъ честны̑ѧ мо́щи въ па́мѧть ѡ҆ста́вивъ. и҆́хже ны́нѣ честно́е пренесе́нїе пра́зднꙋюще, мо́лимсѧ побѣди́тєльнаѧ на врагѝ вѣ̑рнымъ лю́демъ дарова́ти, ꙗ҆́кѡ да въ тишинѣ̀ бг҃оꙋго́днѡ пожи́вше, тебѣ̀ ра́достною дꙋше́ю, благода́рнѡ воспое́мъ глаго́люще: ра́дꙋйсѧ, ѻ҆́ч҃е і҆ларїѡ́не, а҆рхїере́євъ всеѧ̀ рѡссі́йскїѧ землѝ ᲂу҆добре́нїе, и҆ мона́хѡвъ бы́лъ є҆сѝ степе́нь.
Пѣ́снь з҃. І҆рмо́съ:
Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.
Свы́ше ѿ бг҃а да́ръ тезоимени́тый гра́дꙋ, и҆ все́й землѝ да́нъ бы́сть, а҆рхїере́е і҆ларїѡ́не, ᲂу҆дивлѧ́ѧ ᲂу҆че́нїемъ всѧ̑ хрⷭ҇тꙋ̀ вопїю́щыѧ: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.
А҆рхїере́євъ пресвѣ́тлаѧ добро́та, ѻ҆́ч҃е, пребы́лъ є҆сѝ, и҆ хрⷭ҇то́вы цр҃кве сто́лпъ и҆ ᲂу҆твержде́нїе. тѣ́мже помина́й честно́е твоѐ пренесе́нїе сла́вѧщыѧ, пресла́вне.
Крⷭ҇то́мъ зна́менꙋѧсѧ хрⷭ҇то́вымъ пребы́лъ є҆сѝ неврежде́нъ, сꙋ́етнѡ покꙋси́вшꙋсѧ де́мѡнскомꙋ свирѣ́пствꙋ на тѧ̀, бг҃омꙋ́дре: вѣ́сть бо вы́шнїй бг҃ъ соблюда́ти ᲂу҆го́дники своѧ̑.
Бг҃оро́диченъ:
Ѻ҆́блакъ дв҃а, тѧ̀ пра́вды сл҃нце родѝ, дебельствꙋ̀ пло́ти приѡбщи́вшасѧ, чл҃вѣ́ка бы́вша за бл҃гоꙋтро́бїе и҆ снизхожде́нїе: є҆го́же пои́мъ ꙗ҆́кѡ препросла́влена.
Пѣ́снь и҃. І҆рмо́съ:
Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть. тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Бжⷭ҇твенное пребыва́нїе ст҃а́гѡ дх҃а, ѻ҆́ч҃е, бы́лъ є҆сѝ, тѣ́мже и҆ въ житїѝ се́мъ, ꙗ҆́кѡ внѣ̀ мі́ра бы́въ, къ та́мѡшнимъ раче́нїе и҆мѣ́ѧ. тѣ́мже и҆ всѧ̑ наꙋчи́лъ є҆сѝ хрⷭ҇тꙋ̀ вопи́ти: дѣ́ти, благослови́те, свѧще́нницы, по́йте, и҆ превозноси́те є҆го̀ во вѣ́ки.
По бз҃ѣ застꙋ́пника тѧ̀ превели́ка, а҆рхїере́е, дх҃ѡ́внаѧ твоѧ̑ ча̑да стѧжа́вше, всѧ́кїѧ сопроти́вныѧ ве́щи тобо́ю да и҆зба́вимсѧ, и҆ въ тишинѣ̀ пожи́вше, хрⷭ҇тꙋ̀ воспои́мъ: благослови́те, всѧ̑ дѣла̀ гдⷭ҇нѧ, гдⷭ҇а.
Колесни́ца та́инственнаѧ носѧ́щи и҆́мѧ гдⷭ҇не, ꙗ҆ви́лсѧ є҆сѝ, ст҃и́телю, свѣ́тлостїю дѣ́лъ, и҆ чꙋде́съ ꙗ҆вле́нїемъ, и҆ чистото́ю житїѧ̀, взыва́ѧ: свѧще́нницы, по́йте, и҆ превозноси́те є҆го̀ во вѣ́ки.
Бг҃оро́диченъ:
Мѵ́ро ᲂу҆́мное и҆стоще́нное, пречⷭ҇таѧ дв҃о, и҆менꙋ́ема, сн҃а родила̀ є҆сѝ, бл҃гово́нїемъ бжⷭ҇тва̀ всю̀ зе́млю благово́нствꙋюща, и҆ ѿ тлѝ и҆збавлѧ́юща пою́щыѧ: свѧще́нницы, по́йте, и҆ превозноси́те є҆го̀ во вѣ́ки.
Пѣ́снь ѳ҃. І҆рмо́съ:
Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всеблаже́ннаѧ бцⷣе, чⷭ҇таѧ приснодв҃о.
Свѣ́тлый свѧще́нный пра́здникъ преставле́нїѧ твоегѡ̀, а҆рхїере́е і҆ларїѡ́не, свѣтлѣ́е же пренесе́нїе твоѐ, є҆го́же сла́вѧще тебѐ велича́емъ.
И҆сто́чникъ благоче́стїѧ ꙗ҆ви́лсѧ є҆сѝ а҆рхїере́е, цр҃кѡ́внаѧ твоѧ̑ ча̑да напаѧ́еши: тѣ́мъ соше́дшесѧ благоче́стнѡ, во свѧще́нное твоѐ пренесе́нїе, любо́вїю тѧ̀ почита́емъ.
Ст҃ы́хъ жили̑ща проходи́ти сподо́билсѧ є҆сѝ, житїѐ соверши́въ, прпⷣбне, свѧ́то: ꙗ҆́кѡ сꙋ́щꙋ тѝ пра́веднꙋ, тебѣ̀ пресвѣ́тлый возсїѧ̀ свѣ́тъ, и҆ тогѡ̀ сопрꙋ́гъ весе́лїе прїѧ́лъ є҆сѝ.
Бг҃оро́диченъ:
Пло́тїю и҆зъ тебє̀ всенепоро́чнаѧ, ѡ҆дѣ́ѧвсѧ, и҆ въ мі́рѣ ꙗ҆́кѡ чл҃вѣ́къ пожи́въ, дре́вле всѧ̑ мꙋ́чащаго бжⷭ҇твенною си́лою низложѝ.
Свѣти́ленъ. Подо́бенъ: Жєны̀ ᲂу҆слы́шите:
А҆рхїере́е і҆ларїѡ́не, вои́стиннꙋ тезоимени́те, досто́йнѡ зва́нїе ѿ дѣ́лъ прїи́мъ, да́нный тебѣ̀ тала́нтъ до́брѣ ᲂу҆мно́живъ, и҆ внꙋ́трь черто́га бы́въ, и҆дѣ́же со свѧще́нными живе́ши, помѧнѝ твоѐ пренесе́нїе сла́вѧщыѧ.
Два́жды.
Бг҃оро́диченъ:
При́зри, чⷭ҇таѧ, на достоѧ́нїе твоѐ, и҆ непобѣди́мо сїѐ соблюдѝ застꙋпле́нїемъ, црⷭ҇твїѧ ᲂу҆пра́ви ски́птръ и҆ ᲂу҆твердѝ, ꙗ҆зы́ки ᲂу҆кротѝ, и҆зле́й ми́ръ въ концы̀ мі́ра.
На хвали́техъ стїхи̑ры на д҃, гла́съ д҃. Поⷣ: Да́лъ є҆сѝ зна́менїе:
Житїѐ нескве́рно, ꙳ терпѣ́нїе, кро́тость, ꙳ и҆ любо́вь нелицемѣ́рнꙋ, ꙳ воздержа́нїе безмѣ́рное, ꙳ всено́щное стоѧ́нїе, ꙳ ᲂу҆миле́нїе бжⷭ҇твенное, ꙳ вѣ́рꙋ и҆ наде́ждꙋ и҆́стиннꙋ, ꙳ съ ми́лованїемъ, ѻ҆́ч҃е, стѧжа́въ, ꙳ ꙗ҆́кѡ а҆́гг҃лъ пожи́лъ є҆сѝ на землѝ съ тѣ́ломъ, і҆ларїѡ́не блаже́нне, ꙳ мл҃твенниче ѡ҆ дꙋша́хъ на́шихъ.
Два́жды.
Земны́й а҆́гг҃лъ, ꙳ нбⷭ҇ный человѣ́къ, бы́лъ є҆сѝ, ст҃и́телю, ꙳ и҆сто́чникъ ᲂу҆миле́нїѧ, ꙳ пꙋчи́на чꙋде́съ, ꙳ грѣ́шникѡмъ порꙋ́чникъ, ма́слина вои́стиннꙋ бж҃їѧ плодови́та, ꙳ є҆ле́емъ трꙋдѡ́въ твои́хъ ᲂу҆ма́сти лицѐ, ꙳ і҆ларїѡ́не чꙋ́дне, ꙳ вѣ́рнѡ восхвалѧ́ющымъ тѧ̀.
Оу҆мертви́лъ є҆сѝ бжⷭ҇твенными разꙋмѣ̑нїи пло́ть, ꙳ тѣле́сныхъ страсте́й превы́ше бы́лъ є҆сѝ, ꙳ смѣше́нъ съ до́льными: ꙳ начерта́нїе и҆з̾ѡбража́ѧ ꙳ въ себѣ̀ бжⷭ҇твенныѧ добро́ты, ꙳ позна́нъ бы́лъ є҆сѝ, ꙳ ве́сь свѣтови́денъ ꙳ дѣ́йствомъ ст҃а́гѡ дх҃а, і҆ларїѡ́не ѻ҆́ч҃е на́шъ, ꙳ мона́шествꙋющихъ ᲂу҆краше́нїе.
Сла́ва, гла́съ ѕ҃:
Є҆щѐ ѿ ю҆́на во́зраста бг҃ꙋ ѡ҆свѧще́нъ бы́лъ є҆сѝ, а҆рхїере́е, мꙋ́дрости рачи́телю: тѣ́мже потща́лсѧ є҆сѝ тлѣ́нными вѣ̑чнꙋющаѧ стѧжа́ти, воздержа́нїѧ брозда́ми себѐ ѡ҆бложи́въ, пло́ть дꙋ́хꙋ повинꙋ́лъ є҆сѝ: тѣ́мже и҆ по честнѣ́мъ твое́мъ преставле́нїи, совокꙋплѧ́ѧсѧ съ нбⷭ҇ными ликостоѧ̑нїи, и҆́хже житїю̀ во пло́ти поревнова́лъ є҆сѝ. хрⷭ҇та̀, є҆мꙋ́же ѿ ю҆́ности послꙋжи́лъ є҆сѝ, молѝ спасти́сѧ всѣ̑мъ, честно́е твоѐ пренесе́нїе при́снѡ сла́вѧщымъ пѣ́сньми.
И҆ ны́нѣ, бг҃оро́диченъ: Бцⷣе, ты̀ є҆сѝ лоза̀:
Славосло́вїе вели́кое. И҆ ѿпꙋ́стъ. На лїтꙋргі́и слꙋ́жба ст҃и́тельскаѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.